Tag Archives: emial

இணையத்திற்கு டயல் செய்யவும்!

626700_49593_64487_ofvUruAIGஇணைய வசதியை பயன்படுத்த கம்ப்யூட்டரோ. லேப்டாப்போ வேண்டும் என்ற அவசியம் கூட இல்லை, கையில் இருக்கும் ஸ்மார்ட் போனிலேயே இணையத்தை வரவைத்துக்கொள்ளலாம். அதன் தொடுதிரையில் கட்டளைகள் இடுவதன் மூலம் இணைய பக்கங்களையும், இணைய சேவைகளையும் அணுகலாம். அந்த அளவுக்கு கம்ப்யூட்டரி தொழில்நுட்பமும், தொலைத்தொடர்பு நுட்பமும் மேம்பட்டிருக்கிறது.

எல்லாம் சரி, கொஞ்சம் காலத்தில் பின்னோக்கிச்சென்று பழைய தொலைபேசியில் இணையத்தை பயன்படுத்த முடிந்தால் எப்படி இருக்கும்? பழைய தொலைபேசி என்றால் கருப்பு வெள்ளை கால திரைப்படங்களில் பார்க்க கூடிய, கைகளால் சுழற்றி எண்களை டயல் செய்யக்கூடிய தொலைபேசி. டிஜிட்டல் தலைமுறையை சேர்ந்தவர்கள் இந்த வகை தொலைபேசியை அறிந்திருக்க வாய்ப்பில்லை. பழைய தலைமுறையை சேர்ந்தவர்களே கூட அநேகமாக இந்த வகை சுழல் டயல் தொலைபேசிகளை மறந்திருப்பார்கள். இந்த குறிப்பை படிதத்துமே அவர்கள் அந்த கால தொலைபேசி நினைவில் மூழ்கிவிட வாய்ப்பிருக்கிறது.

உள்ளங்கையில் இணையம் வந்து நிற்கும் செல்போன் யுகத்தில், இந்த பழைய போனை இணையத்துடன் இணைத்து வியக்க வைத்துள்ளனர் டென்மார்க் நாட்டின் கோப்பன்ஹேகனில் உள்ள இன்ஸ்டிடியூட் ஆப் இண்டரேக்‌ஷன் டிசைன் கல்வி நிறுவனத்தைச்சேர்ந்த மாணவர்கள், வடிவமைப்பு போட்டிக்காக இந்த இணைய போனை உருவாக்கி அதற்கு பரிசும் பெற்றிருக்கின்றனர்.

இந்த புதுமையான ’இணைய போன்’ மூலம், எந்தவித திரை மட்டும், கம்ப்யூட்டர் போன்ற இடைமுக சாதனம் இல்லாமல் இணையத்தை அணுக வழி செய்துள்ளனர். இது முற்றிலும் வித்தியாசமான மற்றும் புதுமையான அனுபவமாக இருப்பதோடு, இணையத்தை புரிந்து கொள்ளும் வகையிலும் அமைந்திருக்கிறது.

இணையத்தை பயன்படுத்த வேண்டும் என்றால், கம்ப்யூட்டர் வேண்டும், பிரவுசர் வேண்டும், அதில் இணையதள முகவரியை டைப் செய்ய வேண்டும், பின்னர் இணைய பக்கம் தோன்ற திரை (மானிட்டர்) வேண்டும். இப்படி எதுவுமே இல்லாமல், இணையத்தை எப்படி அணுக முடியும் என்ற குழப்பம் ஏற்படலாம். இங்கு தான் இணைய போனின் புதுமை இருக்கிறது.

எந்த இணையதளத்தை அணுக விருப்பமோ, அந்த தளத்திற்கான ஐபி முகவரியை முதலில் இந்த போனின் சுழற்சி டயலில் ஒவ்வொரு எண்ணாக சுழற்ற வேண்டும். முழு ஐபி முகவரியையும் சுழற்றிய பிறகு அந்த இணைய பக்கத்திற்கான தொடர்பு போனில் கிடைக்கும். மறுமுனையில் இருந்து குரல் வழி சேவையாக இணைய பக்கத்தில் உள்ள தகவல்கள் வாசிக்கப்படும். இணைய முகவரிகளுக்கு இணையான எபி எண்களை அறிந்து கொள்வதற்காக என்றே பழைய தொலைபேசி கையேடு போல ஒரு சைபர் கையேடு உருவாக்கப்பட்டுள்ளது. அந்த கையேட்டில் பார்த்து ஐபி எண்களை தெரிந்து கொண்டு அவற்றை டயல் செய்ய வேண்டும்.

இன்னும் கொஞ்சம் புதுமை தேவை எனில், கூடுதலாக உள்ள நான்கு பட்டன்களை அழுத்தி, கட்டுரைகள், தொகுப்பு, டவெலப்பர் உள்ளிட்ட சேவைகளை பெறலாம். தலையை சுற்றி மூக்கை தொடுவது போல, இணையத்தை இப்படி கஷ்டப்பட்டு அணுக என்ன அவசியம் என்று கேட்கலாம்.

இணையத்தின் செயல்பாட்டை எல்லோருக்கும் எளிதாக புரிய வைப்பதற்கான முயற்சி தான் இது என்கின்றனர் இணைய போனை உருவாக்கிய மாணவர்கள். இணையம் என்பது கிட்டத்தட்ட அனைவருக்கும் பழக்கமானதாக இருந்தாலும் அதன் செயல்பாடு என்பது பலருக்கும் புரியாத புதிராகவே இருக்கிறது. டொமைன் முகவரி, சர்வர், எச்டிஎம்.எல் போன்ற வார்த்தைகளை எல்லாம் மீறி, பின்னணியில் இணையம் எப்படி செயல்படுகிறது என்பது சாமனியர்களுக்கு குழப்பமானதாகவே இருக்கிறது.

தொலைபேசி செயல்பாட்டை அடிப்படையாக கொண்டு இணையம் செயல்படும் விதத்தை இந்த இணைய போன் விளக்கும் வகையில் அமைந்துள்ளது. இதில் உள்ள ஒவ்வொரு செயலும் இணையத்தின் செயல்முறையை ஒத்தே அமைந்திருக்கிறது. போன் புத்தக்கத்தில் முகவரியை தேடுவது என்பது, இணையத்தில் பிரவுசர்கள் இணைய முகவரியை தேடுவது போன்றது. 12 இலக்க எண்களை டயல் செய்துவிட்டு காத்திருப்பது என்பது, பிரவுசர்கள் குறிப்பிட்ட இணையபக்கத்தில் உள்ள தகவல்களை கேட்டு பெறுவதற்கு நிகரானது. பின்னர் போனில் தகவல்கள் வாசிக்கப்படுவது என்பது எச்டிஎம்.எல் குறியீடுகளை எல்லோருக்கும் புரியும் மொழியில் இணையம் தருவதற்கு நிகரானது. மற்ற நான்கு பட்டன்கள், இணையத்தில் பிரவுசர்கள் மூலம் நிறைவேற்றிக்கொள்ளும் மற்ற செயல்முறைகளை குறிக்கும்.

டிஜிட்டல் யுகத்தில் மிகவும் பழக்கமாகி விட்ட இணையத்தில் உலாவுதலை இந்த போன் மூலம் முற்றிலும் மாறுபட்ட வகையில் அணுகலாம். கோப்பன்ஹேகன் நகரில் நடைபெறும் வடிவமைப்பு கண்காட்சியில் இந்த இணைய போன் காட்சிக்கு வைக்கப்பட்டிருந்தது. இதை பயன்படுத்திப்பார்த்தவர்கள் எல்லாம், பழையும், புதுமையும் கைகுலுக்கும் இதன் தன்மை கண்டு வியந்திருக்கின்றனர். வியப்படைந்தது மட்டும் அல்லாமல், இணையத்தின் பின்னணியில் என்ன எல்லாம் நடக்கிறது என்பதையும் ஒரளவு புரிந்து கொண்டுள்ளனர்.

செய்திகள் வாசிக்க, வீடியோ பார்க்க என இணையத்தை பலரும் பயன்படுத்தினாலும் அதன் செயல்பாடு பற்றி பலருக்கும் சரியான புரிதல் இல்லை. அதனால் தான் கண்ணகுக்குத்தெரியாத பிரவுசர் மூலம் இணையத்தை அணுகுவதற்கு பதிலாக கண்களால் பார்க்க கூடிய தொலைபேசி சாதனம் மூலம் இணையத்தை கொண்டு வந்திருக்கிறோம் என்கிறார் இந்த புதுமையான முயற்சியின் பின்னே உள்ள மாணவர்கள். முதலில் இதற்காக ரவுட்டர்களை பயன்படுத்த நினைத்ததாகவும் ஆனால் அவை மிகவும் சிக்கலாக இருந்ததால் பழைய தொலைபேசியை தேர்வு செய்ததாகவும் கூறியுள்ளனர். பின்னர் ஆர்டியூனோ கம்ப்யூட்டருடன் தொலைபேசியை இணைத்து, டயல் செய்தால் இணைய தகவல்கள் கேட்கும் வகையில் ஏற்பாடு செய்துள்ளனர்.

இந்த இணைய போன் பார்வையாளர்களுக்கு புதுமையான அனுபவமாக இருப்பதோடு அதை உருவாக்கிய குழுவினருக்கு முக்கிய கற்றல் அனுபவமாகவும் அமைந்திருக்கிறது. தொலைபேசி என்பது எளிமையான சாதனம். அதை பயன்படுத்துவதும் எளிதானது. ஆனால் அதன் பயன்பாட்டு நோக்கத்தை மாற்றும் போது மிகவும் சிக்கலாகிவிடுகிறது என்கின்றனர். உதாரணமாக டயல் செய்தவுடன் இணைய பக்கம் வருவதற்கு பதில், அது டவுண்லோடு ஆக தாமதம் ஆனால் என்ன செய்வது? தவறான ஐபி எண்களை அழைத்தால் என்ன செய்வது? இது போன்ற கேள்விகள் பயணர்கள் அனுபவம் பற்றி யோசிக்க வைத்ததாக குழுவினர் தெரிவிக்கின்றனர்.

இணைய போன் பற்றி தகவல் அறிய: http://designawards.core77.com/Interaction/64487/The-Internet-Phone

வாட்ஸ் அப் சேவையை இப்படியும் பயன்படுத்தலாம்!

 

WhatsApp-568x500முன்னணி மேசேஜிங் சேவையான வாட்ஸ் அப்பின் பலவித பயன்களை நீங்கள் நன்றாக அறிந்திருக்கலாம். தகவல் தொடர்புக்கு, வீடியோக்களையும், செய்திகளையும் பகிர்ந்து கொள்ள, உங்களுக்கான குழுவை உருவாக்கி கருத்துக்களை பகிர்ந்து கொள்ள என வாட்ஸ் அப்பை பலவிதங்களில் பயன்படுத்தலாம். அழைப்பிதழ்களை அனுப்ப, பள்ளி மாணவர்கள் வீட்டுப்பாட குறிப்புகளை பகிர்ந்து கொள்ள என எல்லாவற்றுக்கும் வாட்ஸ் அப் கைகொடுக்கிறது.

நீங்கள் வாட்ஸ் அப் சேவையை அதிகம் பயன்படுத்துபவர் என்றால், குறிப்பெடுக்கும் சேவையாகவும் அதை பயன்படுத்திக்கொள்ளலாம் தெரியுமா? இதற்கான எளிய வழியை தொழில்நுட்ப செய்தி தளமான மேக் யூஸ் ஆப் அழகாக விவரித்துள்ளது.

உங்களுக்கான குழுவை உருவாக்கி கொண்டு அதில் நீங்கள் மட்டுமே உறுப்பினராக இருப்பது தான் அந்த வழி. இது எப்படி சாத்தியம் என கேட்கலாம். இதற்கான வழி இதோ: முதலில் வாட்ஸ் அப் பக்கத்திற்கு சென்று அதில் உள்ள சாட் பகுதியை கிளிக் செய்யவும். பின்னர் அதில் உள்ள புதிய குழுவை உருவாக்கும் பகுதியை கிளிக் செய்யவும். குழுவை உருவாக்க முதலில் நீங்கள் அதில் உறுப்பினர்களை சேர்க்க வேண்டும். எனவே உங்கள் தொடர்பு பட்டியலில் இருக்கும் ஒருவரை உறுப்பினராக சேர்த்துக்கொள்ளவும்.

அடுத்த கட்டமாக இந்த குழுவுக்கு பெயர் சூட்ட வேண்டும். உங்கள் குறிப்புகளை மையமாக கொண்டு ஒரு பெயரை சூட்டவும். ஏனெனில் இந்த குழுவை குறிப்புகளுக்கு மட்டும் தான் பயன்படுத்த போகிறீர்கள். இதன் பிறகு குழுவின் மேல் பகுதிக்கு சென்று கிளிக் செய்யவும். குழு உறுப்பினர் பட்டியல், புதிய உறுப்பினரை சேர்க்கும் வசதி ஆகியவற்றுக்கான பட்டியல் தோன்றும்.

நீங்கள் புதிதாக யாரையும் உறுப்பினராக சேர்க்க வேண்டாம். மாறாக ஏற்கனவே சேர்த்துள்ள அந்த ஒற்றை உறுப்பினரையும் நீக்கி விட வேண்டும். உறுப்பினர் பெயரின் மீது கிளிக் செய்தால் அவரை நீக்குவதற்கான வசதி தோன்றும்.

இருந்த ஒரே ஒரு உறுப்பினரையும் நீக்கிய பின், இந்த குழுவில் நீங்கள் மட்டும் தான் இருப்பீர்கள். இனி ஏதேனும் குறிப்புகளை சேர்க்க விரும்பினால், இந்த குழுவின் குறிப்பு பகுதிக்க்சென்று மனதில் உள்ள கருத்துகக்ளை குறித்து வைக்கலாம். இவை உங்களுக்கே வாட்ஸ் அப் செய்தியாக வரும்.

இவ்விதமாக தகவல்கள், நினைவூட்டல்கள், சின்ன சின்ன ஐடியாக்களை உங்களுக்கு நீங்களே அனுப்பிக்கொள்ளலாம். ஆடியோ மற்றும் வீடியோ குறிப்புகளையும் அனுப்பி  வைக்கலாம். மற்ற குழுக்கள் போல இந்த குழு உங்கள் நேரத்தை வீணாக்காது. மாறாக பயனுள்ள தகவல்களை எளிதாக அணுக வழி செய்யும். உங்கள் தேவைக்கேற்ப திட்டமிட இந்த வசதியை பயன்படுத்திக்கொள்ளலாம்.

இந்த குழுவில் யாரையும் நீங்கள் உறுப்பினராக அழைக்க வேண்டாம். நண்பர்களிடம் வேண்டுமானால் அவர்களுக்கான குழுவை உருவாக்கி கொள்ளுமாறு ஆலோசனை கூறலாம்.

வாட்ஸ் அப் சேவையின் டெஸ்க்டாப் வடிவத்தை பயன்படுத்தும் வசதி மூலம், இந்த குறிப்புகளை கம்ப்யூட்டருக்கு அல்லது லேப்டாப்பிற்கு மாற்றிக்கொள்ளலாம். அங்கிருந்து போனுக்கு தகவல்களை மாற்றிக்கொள்ளலாம்.

மேலும் வாட்ஸ் அப் செய்திகள் அனைத்தும் என்கிரிப்ஷன் பாதுகாப்புக்கு உட்பட்டவை என்பதால் உங்கள் குறிப்புகளுக்கும் அந்த பாதுகாப்பு கிடைக்கும்.

ஆனால் இந்த குறிப்பேடு வசதியில் வகைப்படுத்துவது, பழைய கோப்பை எளிதாக வரிசைப்படுத்துவது போன்றவை சாத்தியம் இல்லை. தகவல்களை சேமிக்க, கோப்புகளை பரிமாற, சேமிக்க பயன்படுத்திக்கொள்ளலாம். வாட்ஸ் அப் சேவைக்கு பழகியவர்களுக்கு ஸ்மார்ட்போனிலே உள்ள பலவித குறிப்பெடுக்கும் செயலிகளை விட இந்த வசதி எளிதாக இருக்கலாம்.

வாட்ஸ் அப்பை இப்படியும் பயன்படுத்தலாமா எனும் வியப்பை ஏற்பட்டால் இந்த வசதிய பயன்படுத்திப்பாருங்கள். உங்களுக்கு சரியாக இருந்தால் செயல்திறன் மேம்பாட்டிற்கு கைகொடுக்கும்.

இதே போலவே நீங்கள் நன்கறிந்த ஜிமெயில் சேவையையும் குறிப்பெடுக்கும் வசதியாக பயன்படுத்திக்கொள்ளலாம் தெரியுமா? ஜிமெயில் உள்ள டிராப்ட் எனப்படும் வரைவு வசதி மூலம் இது சாத்தியம்.

ஜிமெயிலை குறிப்பெடுக்க பயன்படுத்த வேண்டும் எனில், வழக்கம் போல கம்போஸ் வசதியை கிளிக் செய்து புதிய மெயிலை அனுப்பும் வசதியை பெற வேண்டும். எனினும், மெயில் பெட்டியில் மெயில் வாசகத்தை டைப் செய்வதற்கு பதில், மனதில் உள்ள குறிப்புகளை டைப் செய்யத்துவங்க வேண்டும். எல்லாவற்றையும் அடித்து முடித்தவுடன், இந்த செய்தியை யாருக்கும் அனுப்பாமல் விட்டுவிட வேண்டும். தானாக சேமிக்கும் வசதி காரணமாக இந்த மெயில் வரைவு பகுதிக்கு சென்று விடும். நாமாக சேமிக்கும் வசதியை கிளிக் செய்தும் சேமிக்கலாம். பின்னர் வரைவு பகுதிக்குச்சென்று அங்கிருந்து இதை அணுகலாம்.

இந்த குறிப்புகளை அப்படியே கூகுள் டிரைவிற்கும் மாற்றிக்கொள்ளலாம். வழக்கமான மின்னஞ்சல் கட்டம் சிறியதாக இருக்கும். எனவே மின்னஞ்சல் மேல் பகுதியில் உள்ள பகுதியில், மினிமைஸ் மற்றும் சேமிக்கும் வசதிக்கு இடையே உள்ள குறியீட்டில் கிளிக் செய்தால் இன்னும் சற்று பெரிய முகவரி பெட்டி உண்டாகும்.

மின்னஞ்சல் உருவாக்க பகுதியில் மவுசை வைத்து, ஷிப்ட் கீயை டைப் செய்தால் இதை தனி பெட்டியில் பெறலாம். கண்ட்ரோல் விசை மூலம் இவ்வாறு செய்தால் புதிய விண்டோவில் இந்த வசதியை பெறலாம்.

inbox.google.comஎனும் பகுதியில் இருந்தும் வரைவு வசதியை அணுகலாம். இதன் அமைப்பு குறிப்பெடுக்க இன்னும் ஏற்றதாக இருக்கும்.

 

முடிவெடுக்க உதவும் இணையதளம்

poolதளம் புதிது; முடிவெடுக்க உதவும் இணையதளம்

முடிவெடிப்பதில் உங்களுக்கு உதவி தேவையா? முடிவெடுப்பதற்கு முன் மற்றவர்களின் கருத்துக்களை அறிந்து கொண்டால் நன்றாக இருக்கும் என நினைக்கிறீர்களா? எனில் டூபூல்.கோ (doopoll.co ) இணையதளம் உங்களுக்கு பயனுள்ளதாக இருக்கும்.

இந்த தளம் இணையம் மூலம் கேள்வி கேட்டு கருத்துக்கணிப்பு நடத்த வழி செய்கிறது. இந்த தளத்தில் உறுப்பினராக பதிவு செய்து கொண்டு, நீங்கள் கருத்துக்களை அறிய விரும்பும் விஷயம் தொடர்பான கேள்விகளை கேட்கலாம்.

ஆம், இல்லை என பதில் அளிக்கும் எளிய கேள்வியில் துவங்கி, ஒரே கேள்விக்கு பல பதில்களை அளிக்கும் வாய்ப்பு அளிப்பது வரை பலவிதமாக இதில் கருத்துக்கணிப்பு நடத்ததலாம். இப்படி இணைய வாக்கெடுப்பு நடத்த உதவும் இணையதளங்கள் ஏற்கனவே இருக்கின்றன. ஆனால் இந்த தளம் கூடுதலான பல அம்சங்களை கொண்டிருக்கிறது.

இந்த தளத்தை எப்படி பயன்படுத்தலாம் என்பதற்கான உதாரணங்களும் இடம்பெற்றுள்ளன. நேரில் கேட்கும் போது பலர் வெளிப்படையாக கருத்து கூற தயங்கலாம். இப்படி கேள்வி கேட்டு பதில் அளிக்கச்சொல்வதன் மூலம் நேர்மையான எதிர்வினைய அறியலாம் என இந்த தளம் குறிப்பிடுகிறது. உடனடியாக பதில்களை அறியும் வசதியும் இருக்கிறது.

நீங்களும் முயன்று பார்க்கலாம்:http://doopoll.co/

=—

வீடியோ புதிது: பழைய படம் பார்க்கலாம் வாங்க!

காப்புரிமை சிக்கல் இல்லாமல் இணையத்தில் ஆங்கில திரைப்படங்களை பார்த்து ரசிக்க விருப்பமா? கவலையை விடுங்கள் இதற்காக என்றே ஒரு யூடியூப் சேனல் இருக்கிறது.

பப்ளிக் டொமைன் புல் மூவிஸ் எனும் அந்த யூடியூப்பில் நூற்றுக்கும் மேற்பட்ட அந்தக்கால ஆங்கில திரைப்படங்களை பார்த்து ரசிக்கலாம். இவை எல்லாமே காப்புரிமை விடுபட்டு பொது வெளியில் இருப்பவை என்பதால் எந்த சிக்கலும் இல்லை.

சார்லி சாப்ளின், லார்ல் ஹார்டி காமெடி திரைப்படங்கள் உள்ளிட்ட அந்த கால படங்கள் பலவற்றை பார்த்து ரசிக்கலாம்.

பழைய ஆங்கில திரைப்படங்களை பார்த்து ரசிக்க விரும்புகிறவர்களுக்கு இந்த சேனல் ஏற்றதாக இருக்கும்.

படங்களை பார்த்து ரசிக்க:https://www.youtube.com/user/BestPDMovies/

——-

உலகம் முழுவதும் உணவு

தினமும் ஒரே மாதிரியான மதிய உணவு சாப்பிட்டு அலுத்துவிட்டதா? மதிய உணவுக்காக மாறுபட்ட சுவையை எதிர்பார்க்கிறீர்கள? இதற்கான ஊக்கமும் உந்துதலும் தேவையா?

இந்த கேள்விகளுக்கான பதிலை அழகான வரைபட சித்திரம் அளிக்கிறது. சோஸ் வீடியோடூல்ஸ் உருவாக்கியுள்ள இந்த வரைபட சித்திரம் உலகின் பல நாடுகளில் மதிய உணவு எப்படி இருக்கிறது எனும் தகவலை சுவாரஸ்யமாக அளிக்கிறது. சீனா, கோஸ்டா ரிக்கா, டென்மார்க்,பிரான்ஸ், அர்ஜண்டினா,ஜெர்மனி, ஐஸ்லாந்து உள்ளிட்ட நாடுகளின் மதிய உணவு பற்றிய விவரங்களை இதன் மூலம் தெரிந்து கொள்ளலாம். இந்தியாவும் இந்த பட்டியலில் இருக்கிறது.

உலக உணவு சித்திரம்: https://www.sousvidetools.com/toolshed/lunch-around-the-world/

——-

குறிப்பு; மேலே குறிப்பிட்ட தளங்களில் பழைய படங்களுக்கான யூடியூப் சேனல் காப்புரிமை சார்ந்த புகாரால் கைவிடப்பட்டுள்ளது. இந்த தகவலை பகிர்ந்து கொண்ட டிவிட்டர் வாசகர் விவன் சாமுவேலுக்கு நன்றி. மாற்றாக ஒரு தளம் :http://www.openflix.com/ விரிவாக பின்னர் எழுத திட்டம்.

இன்ஸ்டாகிராமில் உயிர்பெறும் தீப்பெட்டி கலைகள்

Untitledகையிலே கலைவண்ணம் என்பது போல,பெட்டியில் கைவண்ணம் என்கிறார் ஸ்ரேயா கத்தூரி.அவரது இன்ஸ்டாகிராம் பக்கமான ஆர்ட் ஆன் எ பாக்ஸ்-க்கு (https://www.instagram.com/artonabox/ ) சென்றால் இதன் அர்த்ததை பளிச்சென புரிந்து கொள்ளலாம்.அப்படியே தீப்பெட்டிகளின் அழகிலும் மெய்மறந்து நிற்கலாம்.ஆம், ஸ்ரேயா தீப்பெட்டிகளின் மேலே உள்ள படங்களை ஆர்வத்துடன் சேகரித்து வருபவர்.இப்படி தான் சேகரிக்கும் தீப்பெட்டி படங்களை அவர் தனது இன்ஸ்டாகிராம் பக்கம் மூலம் பகிர்ந்து கொண்டு வருகிறார்.

அடடா! தீப்பெட்டிகளின் மீது இடம்பெறும் படங்கள் தான் எத்தனை அழகாக இருக்கின்றன. அவற்றின் வகைகள் தான் எத்தனை! இந்த வியப்பை தான் அவரது இன்ஸ்டாகிராம் பக்கம் உண்டாக்குகிறது.

தீப்பெட்டிகளை சாதாரணமாக நினைத்துவிட முடியாது என்கிறார் ஸ்ரேயா. அவை பலவற்றை வெளிப்படுத்துவதாகவும்,அவற்றை வெறும் பெட்டிகளாக பார்க்கத்தயாராக இல்லை என்றும் ஒரு பேட்டியில் உற்சாகமாக கூறியிருக்கிறார். தீப்பெட்டிகள் பிரச்சார சாதனமாக ,விளம்பர வாகனமாக பயன்படலாம் என்கிறார்.
தீப்பெட்டி மேலே இருக்கும் ஒவ்வொரு படமும் மேலும் ஆழமான ஒன்றை,கனவின் கதைகளை,தினசரி பொருட்களின் கதைகளை ,சமூகத்தின் மனப்போக்கை பேசுவதாக அவர் சொல்கிறார்.

அவரது இன்ஸ்டாகிராம் பக்கத்தில் வெளியாகி கொண்டிருக்கும் தீப்பெட்டி படங்களை ஒரு முறை வலம் வந்தால் இதே கருத்தை அவை ஒவ்வொன்றும் வலியுறுத்துவதை புரிந்து கொள்ளலாம்.
இந்தியா முழுவதும் வெளியாகும் தீப்பெட்டிகளில் உள்ள படங்கள் பெரும்பாலும் கடவுளின் உருவங்களை கொண்டிருக்கின்றன என்றாலும் பலவகையான படங்களையும் அலங்கரிக்கின்றன.

குடியரசு தின வாழ்த்துடன், இந்திய தேசியக்கொடி படம் கொண்ட தீப்பெட்டி சித்திரம் மற்றும் ராஜஸ்தான் சுற்றுலாத்துறை விளம்பரம் தொடர்பான குறிப்புடன் ராஜஸ்தான் அரண்மனை பட தீப்பெட்டி சித்திரத்தை அவர் பகிர்ந்து கொண்டுள்ளதை பார்க்கும் போது தீப்பெட்டி கலை என்பது எத்தனை பரந்துவிரிந்தது என்பது மட்டும் அல்ல நம் நாட்டின் இயல்பை அவை எப்படி பிரதிபலிக்கின்றன என்பதையும் உணர முடிகிறது.

ஸ்ரேயாவின் ஆர்வத்தை அறிந்து அவரது உறவுனர்களும் நண்பர்களும் எங்கே சென்றாலும் தீப்பெட்டிகளை சேகரித்து வந்து தருகின்றனராம். அதோடு இண்டாகிராம் பக்கம் மூலம் உலகம் முழுவதும் உள்ளவர்களும் அவருடன் தீப்பெட்டி கலையை பகிர்ந்து கொண்டு வருகின்றனர்.

எல்லாம் சரி, ஸ்ரேயாவுக்கு எப்படி தீப்பெட்டி கலை மீது ஆர்வம் வந்தது? சில ஆண்டுகளுக்கு முன் இதழியல் பட்டத்திற்கான ஆய்வுக்கட்டுரையை சமர்பிக்க வேண்டியிருந்த போது , தீப்பெட்டி படங்கள் உணர்த்தும் செய்தி எனும் தலைப்பை தேர்வு செய்திருக்கிறார். அப்போது துவங்கிய தீப்பெட்டி சேகரிப்பு இப்போது இன்ஸ்டாகிராமில் விரிவாக்கம் பெற்றுள்ளது.

——-


வீடியோ புதிது;நேர்க்காணல் வழிகாட்டி

வேலைவாய்ப்புக்கான நேர்க்காணலின் போது செய்யக்கூடியவை, செய்யக்கூடாதவை என பெரிய பட்டியலே இருக்கிறது. இவற்றில் சிலவற்றை நீங்களும் கூட அறிந்திருக்கலாம். இந்த பட்டியலில் கைகளுக்கான பிரதேயக குறிப்புகள் இருப்பது தெரியுமா? அதாவது நேர்க்காணலின் போது கைகளை எப்படி வைத்திருக்க வேண்டும் எப்படி எல்லாம் வைத்திருக்க கூடாது என்பதற்கு தெளிவான விதிகள் இருக்கின்றன.
உதாரணத்திற்கு மேஜை மீது கைகளை தாளமிட்ட படி இருப்பதையும், உள்ளங்கை மறைந்திருக்கும் நிலையில் வைத்திருப்பதையும் தவிர்க்க வேண்டும். முன்னது பதற்றத்தின் வெளிப்பாடாக அமையும் என்றால் இரண்டாவது சைகை ஒருவர் எதையோ மறைப்பதாக நினைக்க வைக்கும். அதே போல கைகளை கட்டியபடியும் இருக்க கூடாது. உள்ளங்கையை வெளிப்புறமாக வைத்திருக்கலாம். இது நம்பகத்தன்மையை உணர்த்தும். கைகளை கூப்புவது போல ஒன்றாகவும் வைத்திருக்கலாம்.
கிரேசி குட் இண்டர்வியூவிங் எனும் புத்தகத்தை அடிப்படையாக கொண்டு இந்த குறிப்புகளை அருமையான வீடியோவாக பிஸ்னஸ் இன்சைடர் தளம் உருவாக்கியுள்ளது: https://www.youtube.com/watch?v=uAHb6uzDVrU

———–
comments-section-640x440
டிராப் பாக்ஸ் ரகசியம்

கோப்பு பகிர்வு சேவையான டிராப் பாக்சில் கோப்புகளை அனுப்பி பெறுவதை தவிர பல துணை அம்சங்களும் கூடுதல் வசதிகளும் இருக்கின்றன. இவற்றில் ஒன்று, இணையத்தில் டிராப் பாக்ஸ் மூலம் பகிரும் கோப்புகள் மீதான கருத்தறியும் வசதி. உங்கள் கோப்பின் வலது பக்க பட்டையில் பார்த்தால், பகிர்க பட்டன் கீழ்யே ,பின்னூட்டம் எனும் பகுதியை பார்க்கலாம். இதன் மூலம் கோப்பு தொடர்பான கருத்துக்களை பகிரலாம். கருத்தறிய விரும்பும் நபரை பற்றிய விவரத்தை @ எனும் குறியீட்டுடன் குறிப்பிட்டால் அது தொடர்பான தகவல் அருக்கு தெரிவிக்கப்பட்டு கருத்து கோரப்படும். இதற்கு அந்த நபர் டிராப் பாக்ஸ் பயனாளியாக இருக்க வேண்டும் என்ற அவசியமில்லை.

z

பேஸ்புக் நிறுவனரின் வெற்றிப்பாதை

பேஸ்புக் நிறுவனர் மார்க் ஜக்கர்பர்கின் வெற்றிப்பாதை உங்களுக்கு தெரிந்திருக்கலாம். மார்க்கின் பயணம் முழுவதும் தெரியாவிட்டாலும் கூட, அவர் ஹார்வர்ட்டில் படித்தவர் என்பதும், அங்கு படிக்கும் போது உருவாக்கிய பேஸ்புக் இணையதளம் தான் அவரை வெற்றிகரமான இணைய முனைவோராராகவும், இளம் கோடீஸ்வராராகவும் ஆக்கியது எனும் சுருக்கமான விவரமேனும் நிச்சயம் தெரிந்திருக்கும்.
எல்லாம் சரி, மார்க்கின் ரெஸ்யூம் எப்படி இருக்கும் என்று உங்களுக்கு தெரியுமா?

சிக்கலான கேள்வி தான். மார்க் வேலைக்கு செல்லாமலே லட்சக்கணக்கானோருக்கு வேலை கொடுக்கும் நிலைக்கு உயர்ந்து விட்டதால் அவர் வேலைக்கு விண்ணப்பிக்க பயன்படுத்திய ரெஸ்யூம் எப்படி இருந்திருக்கும் என அறிய வாய்ப்பில்லை. அதனால் என்ன, மார்க் தனக்கான ரெஸ்யூமை தயார் செய்திருந்தால் எப்படி இருந்திருக்கும் என்பதை என்ஹான்ஸ்சிவி இணையதளம் உருவாக்கி காட்டியிருக்கிறது.

மார்க் வாழ்க்கை இப்போது ஒரு திறந்த புத்தகம் என்பதால் ,அவருடைய கல்வித்தகுதி, கம்ப்யூட்டர் கோடிங் அனுபவம், பேஸ்புக்கிற்கு முன் அவர் துவக்கிய இணைய சேவைகள் போன்ற விவரங்களை எல்லாம் வைத்துக்கொண்டு அவருக்கான ரெஸ்யூமை உருவாக்கியுள்ளனர்.

கண்களில் கனவுடன் பெரிய நிறுவனத்தில் பணியாற்றும் துடிப்புடன் விண்ணப்பிக்கும் தொழில்நுட்ப கில்லாடி ஒருவரில் ரெஸ்யூம் எப்படி நவீனமாக இருக்குமோ அப்படி அமைந்திருக்கிறது.
கல்வித்தகுதி, சாப்ட்வேர் அனுபவம், சாப்ட்வேர் சேவைகள் ஆகிய விவரங்கள் வரிசையாக இடம்பெற்றுள்ளது என்றால், வலது பக்கத்தில், தொழில்நுட்ப பலங்கள், படித்த புத்தகங்கள், சாதனைகள், அறிந்த மொழிகள் மற்றும் ஈடுபாடுகள் ஆகிய விவரங்கள் பட்டியலிடப்பட்டுள்ளன.

மார்க் கல்லூரியில் உளவியலை தான் மூல பாடமாக படித்தார் எனும் தகவலும், ஆங்கிலம் தவிர சீனம், பிரெஞ்சு உள்ளிட்ட ஐந்து மொழிகளை அறிந்திருந்தார் எனும் தகவலும் வியப்பை அளிக்காமல் இல்லை.
பேஸ்புக்கிற்கு முன்னதாக பேஸ்மெஷ் எனும் சமூக வலைதளத்தை உருவாக்கிய விவரமும் அதன் பிறகு கோர்ஸ் மேட்ச் எனும் தளத்தை அமைத்ததும் பலரும் அறியாத தகவல்களாக இருக்கும்.
மார்கிற்கு பிடித்த மேற்கோகள் மற்றும் அவரது வாழ்க்கை பழக்கம் பற்றிய வரைபடமும் கவனத்தை ஈர்க்கின்றன.
மொத்தமாக பார்க்கும் போது இந்த ரெஸ்யூம் சிறப்பாக இருப்பதுடன், பேஸ்புக் நிறுவனரை சுருக்கமாக, ஆனால் கச்சிதமாக அறிமுகம் செய்து வைக்கிறது.

பக்கம் பக்கமாக வாழ்க்கை வரலாற்றை படித்துக்கொண்டிருப்பதை விட ஒருவரை அவரது சுய விவரக்கோவை ( ரெஸ்யூம்) மூலம் அறிந்து கொள்வது சுவாரஸ்யமாக தான் இருக்கிறது.என்ஹான்ஸ்சிவி இணையதளம் தனது அடிப்படை சேவையான புதிய ரெஸ்யூம் தயாரத்தளித்தலுக்கான புதுமையான விளம்பரமாக தான் இதை உருவாக்கி இருந்தாலும் கூட மிக அழகாக மார்க் ஜக்கர்பர்க் பற்றி இது அறிமுகம் செய்கிறது.
ரெஸ்யூம் கீழே, அதற்கு அடிப்படையாக பயன்படுத்தப்பட்டுள்ள வாழ்க்கை குறிப்புகள் இதற்கு இன்னும் கூட சுவாரஸ்யம் அளிக்கின்றன. மார்க்கின் தந்தை அவருக்கு அட்டாரி பேசிக் புரோகிராமிங் கற்றுத்தந்தது, பின்னர் பயிற்சியாளர் ஒருவர் மூலமாக தனியே சாப்ட்வேர் திறமை பயிற்றுவித்தது போன்ற விவரங்களை இதன் மூலம் தெரிந்து கொள்ள முடிகிறது.

மார்க் ஜக்கர்பர் ரெஸ்யூமை காண:http://blog.enhancv.com/the-success-journey-mark-zuckerbergs-pre-facebook-resume/

——
filepizza
தளம் புதிது: எளிதான கோப்பு பகிர்வு

பொருளோ,சேவையோ, இடைத்தரகர் இல்லாமல் நேரடியாக பெற முடிவது சிறந்து இல்லையா? எனில் கோப்பு பகிர்வுக்கு மட்டும் ஏன் இடைத்தரகர்களாக செயல்படும் இணையதளங்களை நாட வேண்டும்? இப்படி கேட்கச்செய்யும் பைல்பிட்சா இணையதளம் இடைத்தரகர் இல்லாமல் கோப்புகளை பகிர்ந்து கொள்ள உதவுகிறது.
கோப்புகளை பகிர இதில் பதிவு செய்து கொள்ள வேண்டிய அவசியம் கூட கிடையாது. பைல் பிட்சா தளத்தின் முகப்பு பக்கத்தில் உள்ள ,கோப்பை தேர்வு செய்க பகுதியை கிளிக் செய்து, நாம் அனுப்ப விரும்பும் கோப்பை தேர்வு செய்து கொண்டால் போதுமானது. உடனே நம்முடைய கோப்புக்கு ஒரு இணைய முகவரி உருவாக்கி தரப்படும்.கோப்பை அனுப்புவதற்கு பதில் இந்த முகவரியை மட்டும் அனுப்பி வைத்தால் போதும். கோப்பை பெற விரும்பும் நபர் , இந்த இணைய முகவரியை டைப் செய்து இயக்கினால் அவரது பிரவுசரில் கோப்பு டவுண்லோடு ஆகத்துவங்கிவிடும்- அவ்வளவு தான்.

ஆனால் இதற்கு கோப்பை அனுப்பியவர் தனது பைல் பிட்சா பக்கத்தை மூடாமல் வைத்திருக்க வேண்டும். இந்த முறையின் சிறப்பு என்ன என்றால், கோப்பு உண்மையில் எங்கேயும் செல்லவில்லை. பைல் பிட்சா தளத்திலும் சேமிக்கப்படுவதில்லை. அனுப்புகிறவர் பிரவுசரில் இருந்து பெறுபவர் நேரடியாக தரவிறக்கம் செய்து கொள்கிறார். இதற்கான இணைப்பு பாலமாக மட்டுமே இந்த தளம் இருக்கிறது. சகாவிடம் இருந்து சகா ( பியர் டூ பியர்) முறை என இது குறிப்பிடப்படுகிறது. டெப் ஆர்டிசி எனப்படும் நுட்பம் இதன் பின்னே பயன்படுத்தப்பட்டுள்ளது.
பயனாளிகளைப்பொருத்தவரை கோப்புகளை அனுப்ப எளிதான வழி என்பது மட்டும் அல்லாமல்,அனுப்படும் கோப்பு இணையத்தில் எங்கும் தங்காமல் இருப்பதால் மிகவும் பாதுகாப்பானது. ஆனால் ஒன்று அனுப்புகிறவர் மற்றும் பெறுபவரின் இணைய இணைப்பு வேகத்திற்கு ஏற்ப தான் பரிமாற்றம் இருக்கும்.
கொஞ்சம் பாதுகாப்பான கோப்பு பகிர்வை நாடுபவர்கள் பயன்படுத்திப்பார்க்கலாம்.

இணையதள முகவரி; http://file.pizza/

——-

செயலி புதிது; எனக்கொரு இமெயில்

நமக்கு நாமே திட்டம் போல, நமக்கு நாமே இமெயில் அனுப்பிக்கொள்ள முடிந்தால் எப்படி இருக்கும்? முக்கிய விஷயங்களை மறக்காமல் இருக்க நினைவூட்டல் சேவையாகவும், குறிப்புகளை அனுப்பவும் இந்த சேவையை பயன்படுத்திக்கொள்ளலாம். இமெயில் மீ செயலி இந்த வசதியை அளிக்கிறது.
இந்த செயலி மூலம் ஒருவர் தான் விரும்பும் இமெயில் முகவரிக்கு குறிப்புகளை அனுப்பி வைக்கலாம். செயலியில் ஒரு தட்டு தட்டினால், மெயில் அனுப்புவதற்கான கட்டம் எட்டிப்பார்க்கிறது. அதில் குறிப்பு அல்லது நினைவூட்டல் செய்தியை டைப் செய்து நம்முடைய மெயில் முகவரிக்கு அனுப்பி கொள்ளலாம். வேறு பலவிதங்களிலும் அனுப்பி வைக்கும் வசதி இருக்கிறது. பயனுள்ள சேவை. ஆனால் கட்டண செயலி.

ஆண்ட்ராய்டில் தரவிறக்கம் செய்ய: https://play.google.com/store/apps/details?id=com.superlinear.emailme

—-

வாட்ஸ் அப் வால்பேப்பர்

வாட்ஸ் அப் சேவையில் சேட் செய்யும் போது பின்னணியில் தோன்றும் காட்சிகளை மாற்றி அமைத்துக்கொள்ளலாம் தெரியுமா? இந்த வசதியை பயன்படுத்த செட்டிங்ஸ் பகுதிக்கு சென்று சாட்ஸ் மற்றும் கால் – வால்பேபர் கட்டளையை தேர்வு செய்து புதிய வால்பேப்பரை பின்னணியில் தோன்ற வைக்கலாம். போனில் உள்ள எந்த கோப்பு படம் அல்லது, வால்பேப்பர் செயலிகளில் படங்களை இந்த முறையை வரவைக்கலாம். அக, உங்கள் வாட்ஸ் அப் அரட்டைகளின் போது பின்னணியும் கூட சுவாரஸ்யமாகவே இருக்கும்.


Password-01
பாஸ்வேர்டு குறிப்புகள்

உலகறிந்த ரகசியம் தான் ,ஆனால் இப்போது மீண்டும் நிருபணமாகி இருக்கிறது. ஆம், உலகின் மோசமான பாஸ்வேர்ட் எண்களின் வரிசை என்பது மீண்டும் ஒரு முறை நிருபிக்கபட்டுள்ளது. அதாவது 123456.
பெரும்பாலான இணையவாசிகள் எளிதாக நினைவில் வைத்துக்கொள்ள வசதியாக 12345, abc123 போன்ற பாஸ்வேர்ட்களை பயன்படுத்துகின்றனர். இந்த பாஸ்வேர்ட்கள் பல ஆயிரக்கணக்கானோரால் பயன்படுத்தப்படுவதால் பரவலானதாக இருப்பதுடன், தாக்காளர்கள் எளிதில் கைவரிசை காட்டக்கூடியதாகவும் இருக்கிறது. இப்படி தாக்காளர்கள் எந்த சிக்கலும் இல்லாமல் திருடப்படக்கூடிய பாஸ்வேர்ட்கள் மோசமான பாஸ்வேர்ட்கள் என குறிப்பிடப்படுகின்றன. இவற்றில் முதல் பத்து இடங்களில் 12345 க்கும் இடமுண்டு, பாஸ்வேர்ட் எனும் பாஸ்வேர்டுக்கும் இடம் உண்டு. ஆம், பாஸ்வேர்டை கடவுச்சொல்லாக பயன்படுத்தும் அப்பாவிகளும் அதிகம் இருக்கின்றனர்.
நிற்க, இணைய உலகில் இப்போது ஆஷ்லே மேடிசன் எனும் தகாத உறவு இணையதளமும், அதன் உறுப்பினர் கணக்குகள் தாக்காளர்களால் களவாடப்பட்ட விவகாரமும் பரபரப்பை ஏற்படுத்தியிருக்கிறது. இந்த தளத்தில் இருந்து களவாடப்பட்ட பாஸ்வேர்ட்களில் ஆயிரக்கணக்கானவற்றை பரிசீலித்த போது எண்களின் வரிசையை பலர் பாஸ்வேர்டாக பயன்படுத்தியது தெரிய வந்துள்ளது.
ஆக பாஸ்வேர்ட் விஷயத்தில் இன்னமும் விழிப்புணர்வு தேவைப்படுகிறது.

————-

நன்றி;தமிழ் இந்துவில் எழுதியது