Tag Archives: smartphones

பூகம்ப எச்சரிக்கை சேவைக்கு ஒரு செயலி!

cropped_MyShake3
ஸ்மார்ட்போன்கள் நமக்கு பழகிவிட்டன.அவை இன்றியமையாததாவும் ஆகிவிட்டன. ஆனால், அவற்றின் அருமையை நாம் முழுவதுமாக உணர்ந்திருக்கிறோமா என்று தெரியவில்லை.ஸ்மார்ட்போன்களின் சர்வசகஜமான தன்மை அவற்றால் சாத்தியமாகக்கூடிய அற்புதங்கள் பற்றிய நாம் வியப்பு கொள்வதை மழுங்கடித்துவிட்டது.
ஆனாலும் என்ன,உள்ளங்கையில் இருக்கும் ஸ்மார்ட்போன்களின் மகத்துவத்தை உணர்த்தக்கூடிய பயன்பாடுகளும்,செயலிகளும் அறிமுகமாகி கொண்டு தான் இருக்கின்றன.

இந்த வரிசையில் சமீபத்தில் அறிமுகமாகி இருக்கும் மைஷேக் செயலி, நம் கையில் இருக்கும் ஸ்மார்ட்போனை பூகம்பத்தை கண்டறிய உதவும் சாதனமாக மாற்றுக்கூடியதாக இருக்கிறது. ஆண்ட்ராய்டு போன்களுக்காக அறிமுகமாகியுள்ள இந்த செயலி ஸ்மார்ட்போன்களில் உள்ள சென்சார்களை கொண்டு பூகம்ப அதிர்வுகளை முன்கூட்டியே உணர்ந்து எச்சரிக்கை செய்யக்கூடிய சாத்தியத்தை கொண்டிருக்கிறது.ஆனால்,அதற்கு இந்த செயலி உலகம் முழுவதும் உள்ள கணிசமான எண்ணிக்கையிலான ஸ்மார்ட்போன்களில் பொருத்தப்பட்டிருக்க வேண்டும்.
ஊர் கூடி தேர் இழுப்பது போல மைஷேக் செயலி எண்ணற்ற ஸ்மார்ட்போன்களை இணைக்கும் மாபெரும் வலைப்பின்னலை உருவாக்கி பூகம்ப அதிர்வுகளை கண்டறிந்து எச்சரிக்கை செய்யக்கூடியதாக உருவாக்கப்பட்டுள்ளது.செயலி மூலம் இணைக்கப்ட்ட ஸ்மார்ட்போன்களின் எண்ணிக்கை தவிர, இந்த மகத்தான நோக்கத்தை நோக்கி முன்னேற அதிர்வுகளை பகுத்துணரும் மென்பொருள் ஆற்றலிலும் மேம்பாடு தேவைப்படுகிறது.எனினும் கோட்பாடு அளவில் பார்க்கும் போது எங்கும் நீக்கமற நிறைந்திருக்கும் ஸ்மார்ட்போன்களை கொண்டு செயல்திறன் மிக்க பூகம்ப எச்சரிக்கை வசதியை உருவாக்கும் நம்பிக்கையை மைஷேக் செயலி கொண்டுள்ளது.

ஸ்மார்ட்போனில் ஜிபிஎஸ் மற்றும் சென்சார் வசதியை பூகம்ப கண்டறிதலுக்காக பயன்படுத்தும் முயற்சி சில ஆண்டுகளாகவே மேற்கொள்ளப்பட்டு வருகிறது. இதில் விரைவில் பெரும் பாய்ச்சல் நிகழக்கூடும் என்பதற்கான அறிகுறியாக அமெரிக்காவின் கலிபோர்னியாவில் உள்ள பெர்கிலி பூகமப் ஆய்வு மையம் மைஷேக் செயலியை உருவாக்கி இருக்கிறது. ஆண்ட்ராய்டு போனுக்கான இதன் முன்னோட்ட வடிவம் சமீத்தில் அறிமுகமானது.
ஸ்மார்ட்போன்களில் இருக்கும்,ஆக்சலரோமீட்டர் எனும் அசைவை உணரும் சென்சார்களை தான் இந்த செயலி மையமாக கொண்டிருக்கிறது.

பூமியின் மேற்பரப்பில் புதைக்கப்படும் சென்சார்கள் எப்படி, பூகம்பத்திற்கு முந்தைய அதிர்வுகள் உண்டாகும் போது அவற்றை உணர்கின்றனவோ அதே போலவே ஸ்மார்ட்போன் சென்சார்களாலும் பூகம்ப அதிர்வை உணர முடியும் என்பது தான் இந்த செயலியை இயக்கும் எண்ணம்.

ஸ்மார்ட்போன்களால் பூமி அதிர்வுகளை உணர முடியும் என்பதை புரிந்து கொள்ள முடிந்தாலும், சாதாரணமாக போனை அசைப்பது,இடம் மாற்றி வைக்கும் போதும் இதே உணர்வு ஏற்படும் தானே என்று சந்தேகம் எழலாம்.உண்மை தான். ஆனால் இந்த செயலி,வழக்கமான ஸ்மார்போன் நகர்த்தல் அல்லது அசைவுகளுக்கும் ,பூகம்ப அதிர்வுக்கும் இடையிலான வேறுபாட்டை கிரகித்துக்கொள்ளக்கூடிய ஆற்றலோடு வடிமைக்கப்பட்டுள்ளது. அதற்கான விஷேச அல்கோரிதம் அதன் மூளையாக செயல்படுகிறது.

சோதனைகளில் இந்த செயலி சாதாரண நகர்த்தலுக்கு மத்தியில் ,பூகம்ப அதிர்வு ஒலிப்பதிவுகளை சரியாக கண்டுபிடித்திருக்கிறது.

நடைமுறையில் இது எப்படி செயல்படும் என்றால், குறிப்பிட்ட இடத்தில் அதிவு உணரப்பட்டவுடன் இந்த செயலி அந்த தகவலை, இருப்பிடம் மற்றும் அளவு பற்றிய விவரங்களுடன் மைய சர்வருக்கு அனுப்பி வைக்கும். இதே போன்ற அதிர்வுகள் அருகாமையில் உள்ள ஸ்மார்ட்போன்களில் இருந்தும் வருமாயின் அவற்றை ஆய்வு செய்து பூகம்ப எச்சரிக்கை தகவலை அனுப்பி வைக்கிறது. பூகம்பத்தின் மையப்பகுதியில் இருந்து அதன் பாதிப்பு எல்லைக்குள் இருப்பவர்களுக்கு இந்த எச்சரிக்கை அனுப்பப்படும்.
handphonemapupdatesm
ஆக,பூகம்பம் தாக்க உள்ள தருணங்களில் இந்த செயலி அது பற்றி சில நொடிகளுக்கு முன் எச்சரிக்கை செய்யக்கூடியதாக இருக்கும்.

இந்த செயலி முதலில் ஆயிரக்கணக்கானோரால் பதவிற்க்கப்பட்டு, ஓரிரு பூகம்ப அதிர்வுகள் பதிவு செய்யப்பட்டு பரிசோதிக்கப்பட்டால் இந்த அமைப்பில் உள்ள எல்லா அம்சங்களும் சரியாக செயல்படுவதை உறுதி செய்து கொள்ள முடியும் என்று ,பெர்கிலி பூகம்ப ஆய்வு மையத்தின் இயக்குனரான ரிச்சர்டு ஆலன் நம்பிக்கை தெரிவித்துள்ளார்.

உலகம் முழுவதும் விரியக்கூடிய அடர்த்தியான பூகம்ப அதிர்வு உணர் வலைப்பின்னலாக இது உருவாகும் என்றும் அவர் கூறியுள்ளார்.

இந்த செயலி மூலம் திரட்டப்படும் தகவல்கள் பூகம்பம் பற்றிய புரிதலை மேம்படுத்துவதுடன், உரிய நேரத்தில் முன்கூட்டியே பூகம்ப எச்சரிக்கைகளை அளித்து பாதிப்பை குறைப்பதையும் சாத்தியமாக்கும் என்கிறார் ஆலன்.
பொதுவாக பூகம்ப நிகவுகளின் போது சில நொடிகள் என்பதே உயிர் பிழைப்பதற்கும், பலியாவதற்கும் போதுமான அவகாசமாக இருக்கிறது. மேலும் பெரும்பாலும் பூகம்ப பாதிப்பை விட இடிபாடுகளில் சிக்கிக்கொள்வதாலேயே அதிக உயிரிழப்பு ஏற்படுகிறது. முன்கூட்டியே எச்சரிக்கை பெறுவதன் மூலம் இந்த பொன்னான அவகாசத்தை பெற்று உரிய தற்காப்பு நடவடிக்கைகளை மேற்கொள்ளலாம்.

உதாரணமாக, இயக்கத்தில் இருக்கும் மெட்ரோ ரெயில்களை அதிர்வை உணர்ந்தவுடன் தானாக நிற்கச்செய்யலாம்.அதே போல அடுக்கு மாடி கட்டிடங்களில் லிப்ட்கள் நடுவழியில் அல்லாமல், தளத்தின் மேல் அல்லது கீழே உள்ள வாயிலுக்கு அருகே வந்து நிற்கச்செய்யலாம்.

ஏற்கனவே கலிபோர்னியா போன்ற பகுதிகளில் பொருத்தப்பட்ட பூமிக்கு அடியிலான சென்சார்கள் வலைப்பின்னல் திரட்டும் தகவல்களுடன் ஒருங்கிணைக்கும் வகையில் இந்த செயலி செயல்படும் என்கிறார் ஆலன்.
சென்சார்களை எல்லா இடங்களிலும் பொருத்துவது சாத்தியமில்லை,ஆனால் எல்லா இடங்களிலும் ஸ்மார்ட்போன் இருப்பதால் இந்த செயலி சிறந்த முறையில் பூகம்பத்தை உணரக்கூடிய ஆற்றலை அளிக்கும் என்கிறார் அவர்.
அதிலும் குறிப்பாக நேபாளம் போன்ற நாடுகளில் இது பேரூதவியாக இருக்கும் என்கிறார். கடந்த ஆண்டு பூகம்பத்தால் பாதிப்புக்குள்ளான நேபாளத்தில் 6 மில்லியன் போன்கள் இருக்கின்றன.தலைநகர் காட்மாண்டுவில் மட்டும் 6 லட்சம் ஸ்மார்ட்போன்கள் உள்ளன. இவை போதுமானவை என்கிறார்.

ஆனால் இதற்கு இந்த செயலி போதுமான அளவில் ஸ்மார்ட்போனில் இயங்கும் நிலை வரவேண்டும்.68 சதுர கிமீ பரப்பில் 300 ஸ்மார்ட்போன்களிலாவது செயலி இயங்கினால் தான் செயல்திறன் இருக்கும். உலகில் உள்ள பெரும்பாலான போன்களில் இந்த செயலி பொருத்தப்படும் நிலை வரவேண்டும் என ஆலன் மற்றும் அவரது சகாக்கள் விரும்புகின்றனர். அதற்கேற்ப, இந்த செயலி பயனாளிகளின் போனில் அதிக ஆற்றலை எடுத்துக்கொள்ளாத வகையில் உருவாக்கப்பட்டுள்ளது.பூகம்பம் தொடர்பான தகவல்களையும் இதன் மூலம் பயனாளிகள் பெறலாம்.

மைஷேக் செயலிக்கான இணையதளம்:http://myshake.berkeley.edu/

——-
நன்றி; தமிழ் இந்துவில் எழுதியது

இணைய கால புகைப்படம் இது!

4439-hjvedj-1000x510இணையவெளியில் ஒரு புகைப்படம் வைரல் அந்தஸ்து பெறுவது புதிய விஷயமல்ல.புகைப்படத்தில் உள்ள ஏதேனும் ஒரு அம்சன் கவனத்தை ஈர்க்க கூடியதாக இருந்து, அது சமூக வலைதளத்தில் பகிரப்படும் நிலை ஏற்பட்டால் போதும்- அது இணைய பரப்பு முழுவதும் உலா வரத்துவங்கிவிடும்.
அன்மையில் இப்படி வைரலாக பரவி விவாதத்தை ஏற்படுத்திய புகைப்படம் நம் காலத்து புகைப்படம் எனும் அந்தஸ்த்தை பெற்றுள்ளது.

அந்த புகைப்படம் மனசாட்சியை உலக்க கூடிய வகையை சேர்ந்ததில்லை என்றாலும் கூட இக்கால தலைமுறையை யோசிக்க வைக்க கூடிய படமாக இருப்பது தான் விஷேசம்.

ஹாலிவுட் புதிய படம் ஒன்று தொடர்பான நிகழ்ச்சியில் எடுக்கப்பட்ட புகைப்படம் அது.ஹாலிவுட் நாயகன் ஜானி டெப் உள்ளிட்ட கலைஞர்கள் பங்கேற்றதால் அவர்களை பார்க்க நூற்றுக்கணக்கான ரசிகர்கள் ஆர்வமுடன் கூடிய நிலையை படம் பிடித்துக்காட்டும் அந்த காட்சியை முதலில் பார்த்தால் சாதாரணமாக தோன்றும்.நட்சத்திரங்களை பார்க்க திரண்டிருந்த ரசிகர்கள் அனைவரும் கையில் ஸ்மார்ட்போனை வெவ்வேறு கோணங்களில் நீட்டியபடி அந்த தருணத்தை படம் பிடிக்க முயன்று கொண்டிருப்பதை தான் அந்த படம் உணர்த்துகிறது.

ஸ்மார்ட்போன் யுகத்தில் எல்லா இடங்களிலும் எதிர்கொள்ளகூடிய வெகு இயல்பான காட்சி தான் இது இல்லையா?
ஆனால் அந்த படத்தில் கொஞ்சம் உற்றுப்பார்த்தால் பலதரப்பட்ட ரசிகர்கள் நடுவே வயதான பெண்மணி ஒருவர் தனித்திருப்பதை பார்க்கலாம். அந்த மூதாட்டியில் கையில் ஸ்மார்ட்போன் இல்லை என்பது மட்டும் அல்ல அவர் தன்னைச்சுற்றிய பரபரப்பு பற்றி கூட கவலைப்படாமல் ஒரு உண்மையான ரசிகையின் ஆர்வத்துடன் நட்சத்திரங்களை பார்த்துக்கொண்டிருப்பதை உணரலாம்.
ஆம், அந்த வயதான பெண்மணி நம் காலத்தில் மிகவும் அரிதாக ஆகிவிட்ட ஒரு விஷயத்தில் ஈடுபட்டிருக்கிறார். அதாவது
அரிய தருணங்களை ஸ்மார்ட்போனில் படமெடுத்து ,சமூக ஊடகங்களில் பகிரும் வேட்கையில் அந்த தருணத்தை அனுபவிக்க தவறுவதற்கு பதிலாக அந்த பெண்மணி நட்சத்திரங்களை நேரில் பார்க்க கிடைத்த தருணத்தில் லயித்திருக்கிறார்.

தற்செயலாக அமைந்த அந்த காட்சி பல விஷயங்களை சொல்லாமல் சொல்லி விடுகிறது.
திருமணம் போன்ற சுப நிகழ்ச்சிகளாக இருந்தாலும் சரி, சுற்றுலா பயணங்களாக இருந்தாலும் சரி அப்போதைய கணங்களை அனுபவிப்பதை விட அந்த காட்சிகளை ஸ்மார்ட்போனில் படமெடுப்பதிலோ அல்லது சுயபடம் எடுப்பதிலோ தான் பெரும்பாலானோர் கவனம் செலுத்துகின்றனர். பிள்ளைகளின் பள்ளி நிகழ்ச்சிகளுக்கு செல்லும் போது கூட அவர்களின் திறமை வெளிப்படும் வித்ததை பார்த்து ரசிப்பதற்கு பதில் அந்த காட்சியை காமிரா கண் கொண்டு பார்க்க முற்படுகின்றனர்.

இந்த பழக்கம், நாம் வாழும் தருணங்களை தவறவிடுவதற்கு சமம் என்று சமூகவியல் வல்லுனர்கள் கவலையோடு சுட்டிக்காட்டுகின்றனர்.

இந்த முரணை, ஸ்மார்ட்போன் கூட்டத்தினர் நடுவே தனித்து நிற்கும் வயதான பெண்மணி மூலம் கச்சிதமாக உணர்த்தும் இந்த புகைப்படம் முதலில் அமெரிக்க நாளிதழான போஸ்டன் குளோபில் வெளியானது.
அந்த படத்தை பார்த்து ரசித்த வைனே டால்பர்க் எனும் டிவிட்டர் பயனாளி தனது டிவிட்டர் பக்கத்தில் (@waynedahlberg) அதை பகிர்ந்து கொண்டார்.எக்காலத்திலும் என்னை மிகவும் கவர்ந்த புகைப்படம் எனும் வாசகத்துடன் அவர் பகிர்ந்து கொண்ட அந்த படம் உடனே டிவிட்டரில் பலரால் ரிடீவிட் செய்து பாராட்டப்பட்டது.புகைப்படம் நூற்றுக்கணக்கான முறை பகிரப்பட்த்துவங்கிய நிலையில் அதை வெளியிட்ட டால்பர்க், அந்த படத்தை எடுத்த புகைப்பட கலைஞர் ஜான் பிளாண்டிங் பெயரையும் டேக் செய்திருந்தார்.
இணைய வல்லுனரான டிம் ரெய்லி,அந்த படத்தை சுட்டிக்காட்டி அந்த தருணத்தில் பெண்மணி லயித்திருக்கிறார் என பாராட்டியிருந்தார். பிரெண்ட் ஜென்சன் என்பவர் ,நிகழ் காலத்தில் இருந்து ,தன்னைச்சுற்றிய தருணத்தை ரசிக்க தெரிந்த ஒருவர் என பாராட்டியிருந்தார்.

இன்னொருவரோ, இன்றைய காலத்தில் நாம் வாழும் கணத்தை அனுபவித்து ரசிக்க மறந்து கொண்டிருக்கிறோம் என குறிப்பிட்டிருந்தார். இணைய யுகத்தின் கவலை தரும் யதார்த்தாம் இது!.

——

4ee222d7-9ce1-4dce-a4c8-65be880a46a6தளம் புதிது; கணித நண்பன்

எழுத்தாளர்கள் தட்டச்சு செய்வதற்கு என்றே பிரத்யேக எழுதிகள் இருக்கின்றன.வழக்கமான தட்டச்சு மென்பொருளான வேர்டு பிராசஸரை விட இவை மேம்பட்டவை.அதைவிட முக்கியமாக கவனச்சிதறல் இல்லாமல் எழுதுவதில் மட்டும் ஈடுபட உதவுபவை.இதற்கு உதாரணம் வேண்டும் என்றால் ஆகிய எழுதிகளை சொல்லலாம்.
இதேபோல விஞ்ஞானிகள் மற்றும் பொறியியல் வல்லுனர்களுக்காக என்றும் தனியே எழுதி இருக்கிறது தெரியுமா? கேல்கா (http://calca.io/) அந்த எழுதியை பயன்படுத்தும் போது நடுவே கணக்கு போட்டுப்பார்க்கலாம். கணிதவியல் சமன்பாடுகளையும் பயன்படுத்திக்கொள்ளலாம். இயற்பியல் அல்லது வேதியல் போன்ற பிரிவுகளில் தட்டச்சு செய்யும் போது சமன்பாடுகளை பயன்படுத்த வேண்டியிருந்தால் அவற்றை தட்டச்சு செய்யும் போதே பின்னணியில் அதற்கான கணக்கு போடப்பட்டு விடை தானாக திரையில் தோன்றும். நிதி மற்றும் பொருளாதார விஷயங்களை டைப் செய்யும் போது வட்டி,கூட்டு வட்டி போன்றவற்றை குறிப்பிட்டாலும் இந்த எழுதியே கணக்கு போட்டு விடை அளிக்கும். கம்ப்யூட்டரில் தட்டச்சு செய்யும் போது,எளிய கூட்டல் கணக்கை இடம்பெற வைக்க வேண்டும் என்றால் கூட, வெளியே வந்து தனியே கால்குலேட்டரை பயன்படுத்தும் நிலையில் இருந்து கால்கா அளிக்கும் வசதி எத்தனை மேம்பட்டது என்று அதை பயன்படுத்திப்பார்த்தால் தான் புரியும்.
ஆனால் கால்காவை உங்கள் வீட்டு மளிகை கணக்கு போட்டு பார்க்க எல்லாம் பயன்படுத்த முடியாது. ஏனெனில் அது கட்டண சேவை. விண்டோசில் தரவிறக்கம் செய்து பயன்படுத்த 10 டாலர் செலுத்த வேண்டும்.
ஆனால் கவலைப்பட வேண்டாம், கால்குலேட்டர் உதவி இல்லாமலே எளிய கணக்குகளை போட்டு பார்க்க விரும்பினால் நோட்பேட் கால்குலேட்டர் இருக்கவே இருக்கிறது. டையில் இருந்து கிழிக்கப்பட்ட காகிதம் போல இருக்கும் இதன் முகப்பு பக்கத்தில் குறிப்பெழுதுவது போல எழுத துவங்க வேண்டியது தான். இப்படி தட்டச்சு செய்யும் போது கூட்டல் ,கழித்தல்களை பயன்படுத்தினால் அந்த சமன்பாட்டுக்கான விடை அருகே வந்து நிற்கிறது. ஸ்டீவ் ரைடவுட் எனும் மென்பொருள் வல்லுனர் உருவாக்கியுள்ள இந்த எளிய நோட்பேடை பயன்படுத்திப்பாருங்கள், லேசாக அசந்து போவீர்கள்;
இணையதளம்:http://notepadcalculator.com

———-

செயலி புதிது; நான் பிஸியாக இருக்கிறேன்!

ட்ரு டயலர் செயலி இனி உங்கள் தனிப்பட்ட உதவியாளர் போலவும் செயல்பட உள்ளது.ட்ரு டயலரில் அறிமுகம் செய்யப்பட்டுள்ள புதிய வசதியை இந்த செயலியின் பின்னே உள்ள ட்ரு காலர் இப்படி குறிப்பிடுகிறது.முக்கிய வேலை அல்லது ஆலோசனை கூட்டம் போன்றவற்றில் ஈடுபட்டிருக்கும் போது அந்த தகவலை பயனாளிகள் மற்றவர்களுக்கு தெரிவிக்க எளிதாக தெரிவிக்க முடியும். இதற்காக நான் பிஸியாக இருக்கிறேன் எனும் வாய்ப்பை தேர்வு செய்து அமைத்துக்கொண்டால் போதும் மற்றவர்கள் அழைக்கும் போது,சிவப்பு புள்ளி மூலம் அவர் அழைப்பை ஏற்க முடியாத நிலையில் இருப்பது உணர்த்தப்படும். மாறாக அழைப்பை ஏற்கும் நிலையில் இருந்தால் பச்சை புள்ளி வரவேற்கும்.ஆக, ஒருவரை அழைப்பதற்கு முன்னரே அவர் பிஸியாக இருக்கிறாரா என்பதை தெரிந்து கொள்ளலாம்.இந்த வசதியை பயனாளிகள் காலண்டருடன் இணைத்துக்கொள்ளவும் செய்யலாம். ஆண்ட்ராய்டு போன்களில் இது அறிமுகமாகியுள்ளது.
மேலும் விவரங்களுக்கு: https://www.truecaller.com/blog/truedialer-availability-feature

————
gmail-blocked-senders
ஜிமெயிலில் புதிய வசதி

ஜிமெயிலில் சின்னதாக பல வசதிகள் உண்டு.இவற்றில் பலவற்றை நீங்கள் கவனிக்காமல் கூட இருக்கலாம்.இப்போது இந்த பட்டியலில் புதிதாக ஒரு அம்சம் அறிமுகமாகி இருக்கிறது.அது இமெயில்களை பிளாக் செய்யும் வசதி. ஏதேனும் ஒரு காரணத்திற்காக குறிப்பிட்ட ஒருவரது இமெயில் நீங்கள் பெற விரும்பாவிட்டால், அவர்கள் மெயிலை வரும் முன் தடுத்துவிடலாம்.இதற்காக மெயிலின் வலப்பக்கத்தில் பதில் அளிக்கும் வசதி அருகே உள்ள கீழ்நோக்கிய அம்புகுறியை கிளிக் செய்தால் வரிசையாக பல அம்சங்களின் பட்டியல் வரும்.அதில் உள்ள,பிளாக் செய்யவும் வசதியை தேர்வு செய்தால் இனி அந்த நபரின் இமெயில் உங்கள் இன்பாகிசிற்கு வராது. அதற்கு முன்னடே தடுக்கப்பட்டு ஸ்பேம் போல்டருக்குள் அனுப்பி வைக்கப்படும். விளம்பர மெயில் போன்ற தொல்லைகளில் இருந்து தப்பிக்க இந்த வசதி கைகொடுக்கும்.இதற்கு முன்னரும் கூட ஜிமெயிலில் உள்ள வடிகட்டல் வசதியை பயன்படுத்தி வேண்டாத மெயில்களை தடுக்கலாம். ஆனால் இதை மிக எளிதாக செய்யக்கூடிய வகையில் புதிய அம்சம் அமைந்துள்ளது.
ஆனால் பழைய மெயில்களுக்கு இது பொருந்தாது.புதிதாக வரும் மெயில்களில் இந்த வசதியை தேர்வு செய்து இயக்கினால் மட்டுமே பிளாக் செய்வது சாத்தியம்.இதே போல ஆண்ட்ராய்டுக்கான ஜிமெயில் செயலியில் இமெயில் சந்தாக்களில் இருந்து விலகி கொள்ளும் அம்சமும் அறிமுகமாகி இருக்கிறது.

-0—

நன்றி; தமிழ் இந்துவில் எழுதியது.

ikea1

ஸ்மார்ட்போனை சார்ஜ் செய்யும் மேஜை, நாற்காலிகள்

ஸ்மார்ட்போனில் சார்ஜ் தீர்ந்து போவதும், அந்த நேரத்தில் சார்ஜர் தேடி அலைவதோ அல்லது சார்ஜரை பொருத்த மின்சார வசதியை தேடி அலைவதோ பரவலாக எல்லோருக்கும் ஏற்படும் அனுபவம் தான். ஆனால் வருங்காலத்தில் இந்த பிரச்சனை அநேகமாக இல்லாமல் போய்விடும் வாய்ப்பு இருக்கிறது. எப்போது போனில் சார்ஜ் இல்லாமல் போனாலும் இருந்த இடத்திலேயே சார்ஜ செய்து கொண்டு விடலாம். இதற்கு சார்ஜரே தேவை இருக்காது. அதெப்படி என்று ஆர்வத்தோடு கேட்டீர்கள் என்றால் எல்லாம் வயர்லெஸ் செய்யும் மாயம் என்று தான் சொல்ல வேண்டும்.

ஆம், ஸ்மார்ட்போன் உள்ளிட்ட சாதனங்களை வயர்லெஸ் மூலம் சார்ஜ் செய்து கொள்ளும் முறை தற்போது மெல்ல பிரபலமாகி கொண்டு வருகிறது. இதன் அடையாளமாக ஸ்பைனின் பார்சிலோனாவில் நடைபெற்று வரும் மொபைல் வேர்ல்ட் காங்கிரஸ் எனும் கேட்ஜெட் கண்காட்சியில், ஸ்மார்ட்போன் உள்ளிட்ட சாதனங்களை சார்ஜ் செய்ய வழி செய்யும் மேஜை, நாற்காலி மற்றும் மின்விளக்கு ஆகியவை அறிமுகம் ஆகியிருக்கிறது. பர்னீச்சர்கள் உலகில் புகழ்பெற்ற ஸ்வீடன் நிறுவனமான ஐகியா இந்த மேஜை நாற்காலிகளை அறிமுகம் செய்திருக்கிறது.
இந்த நவீன பர்னீச்சர்கள் ஒவ்வொன்றிலும் வயர்லெஸ் சார்ஜிங் பேட் இணைக்கப்பட்டிருக்கும். அவற்றின் மீது போனை வைத்தால் போதும் வயர்லெஸ் உயிர்பெற்று போன் சார்ஜாகத்துவங்கிவிடும். தனியே கேபிள்களை பயன்படுத்தும் அவசியம் எல்லாம் கிடையாது.

மேஜை, நாற்காலி என்றால் அவற்றுடன் மின்சார் கேபிளை இணைக்க வேண்டும். மின் விளக்கு என்றால் அந்த தேவையும் இல்லை.
ikea_3214675b
இவை தவிர தனியே சார்ஜிங் பேடையும் ஐகியா அறிமுகம் செய்திருக்கிறது. அவற்றை சுவற்றிலோ அல்லது வேறு எந்த பரப்பிலோ பொருத்தி , வயர்லெஸ் மூலம் சார்ஜ் செய்து கொள்ளலாம்.
வயர்லெஸ் மூலம் சார்ஜிங் செய்யும் வசதி நவீன வாழ்க்கைக்கு மிகப்பெரிய வரப்பிரசாதமாக அமையும் என்றாலும் இதை சாத்தியமாக்கும் தொழில்நுட்பம் நூற்றாண்டு பழைமையானது என்பது தான் சுவாரஸ்யமான விஷயம்.
வயர்லெஸ் சார்ஜிங் முறை மேக்னட்டிக் இண்டக்‌ஷன் எனும் முறையில் செயல்படுகிறது. இந்த வகை வயர்லெஸ் சாதனத்தில் டிரான்ஸ்மிட்டர் மற்றும் ரிசிவர் என இரண்டு பகுதிகள் இருக்கும். டிரான்ஸ்மிட்டரில் பாயும் மின்சாரம் காந்த மண்டலைத்தை உருவாக்கும். இதன் மூலம் ரிசிவரில் வோல்டேஜ் உண்டாகும். இந்த மின்சாரம் தான் சாதனங்களை சார்ஜ் செய்ய கைகொடுக்கிறது.

வயர்லெஸ் சாரிஜிங் முறையில் கேபிலுக்கே வேலை கிடையாது.
நவீன சாதனங்களில் அடிக்கடி சார்ஜ் தீர்ந்து போகும் பிரச்சனைக்கு தீர்வு காண பலவகையான பேக்கப் வழிகள் உருவாக்கப்பட்டு வரும் நிலையில் வயர்லெஸ் சார்ஜிங் இதற்கான சரியான தீர்வாக அமையும் என கருதப்படுகிறது.

ஆனால் ஒன்று இந்த வகையில் சார்ஜிங் செய்து கொள்ள ஸ்மார்ட்போனில் அதற்கு ஏற்ற வசதி இருக்க வேண்டும். புதிய போன்கள் எல்லாம் இந்த அம்சத்துடன் தான் வருகின்றன. பார்சிலோனா கண்காட்சியில் அறிமுகமாகும் சாம்சங் ஸ்மார்ட்போன் உள்ளிட்ட புதிய போன்களில் இந்த வசதி இருக்கிறது.
பழைய போனாக இருந்தாலும் கவலையில்லை, பொருத்தமான சார்ஜிங் கேஸ் மூலம் வயர்லெஸ் சார்ஜிங் வசதியை பயன்படுத்தலாம்.

வயர்லெஸ் சார்ஜிங் பேட்களும் தனியே சந்தையில் இருக்கும் நிலையில் ஐகியா இதை பர்னீச்சர்களுடன் இணைத்து வீட்டிற்குள் கொண்டு வந்துள்ளது.

முதல் கட்டமாக, அமெரிக்கா மற்றும் ஐரோப்பிய சந்தைகளில் இந்த வயர்லெஸ் சாதங்கள் அறிமுகமாகி பின்னர் மற்ற நாடுகளுக்கு வர உள்ளது. அநேகமாக மற்ற நிறுவனங்களும் இந்த பாதையை பின்பற்றலாம்.
இவை தவிர ஸ்டார்பக்ஸ் மற்றும் மெக்டோனால்ட்ஸ் போன்ற நிறுவனங்களும் வயலெஸ் சார்ஜிங் வசதியை தங்கள் மையங்களில் அமைத்து வருகின்றன. வருங்காலத்தில் மேலும் பல பொதுஇடங்களில் வயர்லெஸ் சார்ஜிங் மையங்கள் உருவாகலாம்.

ஆகையால் போனில் சார்ஜ் தீரும் பிரச்சனையை மறந்தே போகலாம்.,
ஆனால் இதில் உள்ள ஒரே சிக்கல் என்ன என்றால், இப்படி வயலெஸ் மூலம் சார்ஜ் செய்யும் வசதியை வழங்க மூன்று வகையான முறைகள் பின்பற்றப்பட்டு வருகின்றன. மூன்று அமைப்புகள் இவற்றை உருவாக்கி பிரபலமாக்கி வருகின்றன. இவற்றில் கியூஐ எனும் முறையை தான் ஐகியா பின்பற்றுகிறது. வயலெஸ் பவர் கன்சார்டியம் அமைப்பு இதன் பின்னே இருக்கிறது. சாம்சங் போன்றவை இதில் உறுப்பினர்கள்.

இந்த மூன்று அமைப்புகளும் வயர்லெஸ் சார்ஜ் வசதிக்கான பொது வரையறையை உருவாக்க வேண்டும் என வலியுறுத்தப்படுகிறது. இல்லை என்றால் ஒரு முறையில் செயல்படும் சார்ஜிங் இன்னொரு முறையில் செயல்படாமல் போகும்.

———

விகடன்.காமில் எழுதியது

WP_20141029_13_49_24_Pro-624x351

ஆண்டின் சிறந்த ஸ்மார்ட்போன்கள்

இந்த ஆண்டு ஏகப்பட்ட புதிய ஸ்மார்ட்போன்கள் அறிமுகமாகி இருக்கின்றன. அநேகமாக எல்லா முன்னணி நிறுவனங்களுமே புதிய ரகங்களை அறிமுகம் செய்திருக்கின்றன. இவற்றில் சிறந்த அறிமுகங்களை பட்டியலிடுவது சிக்கலானது. ஆனால் , இந்த ஆண்டின் சிறந்த ஸ்மார்ட்போன்கள் எவை என அறிந்து கொள்ளும் ஆர்வம் இருந்தால் மார்குவஸ் பிரவுன்லீ (Marques Brownlee ) அதற்கான பட்டியலை வெளியிட்டுள்ளார். பிரவுலீ கேட்ஜெட் பிரியர்கள் மத்தியில் பிரபலமான பெயர். யூடியூப் மூலம் புதிய கேட்ஜெட்களை விமர்சனம் செய்து வருபவர். இவரது யூடியூப் சேனலுக்கு சந்தாதாரர்களும் அதிகம் செல்வாக்கும் அதிகம்.
பிரவுன்லீ ஒரு குறும்பதிவில் ஆண்டின் சிறந்த ஸ்மார்ட்போன்கள் என தான் கருதுவதை குறிப்பிட்டுள்ளார். எச்டிசி. ஒன் எம்8, ஓன் பிளஸ் ஒன், ஐபோன் 6 பிளஸ் , சாம்சங் கேல்க்ஸி நோட் 4 மற்றும் நெக்சஸ் 6 ஆகியவற்றை அவர் குறிப்பிட்டுள்ளார். ஆனால் இவற்றை அவர் வரிசைப்படுத்தவில்லை. இவை எல்லாமே அளவில் பெரிய ஸ்மார்ட்போன்கள் என்பது தான் கவனிக்கத்தக்கது.

பிரவுன்லியின் யூடியூப் சேனல்: http://www.youtube.com/user/marquesbrownlee

———

இந்த பதிவு தமிழ் இந்துவுக்காக எழுதிய கேட்ஜெட் உலகம் கட்டுரையின் ஒரு பகுதி. இதை தனியே பதிவிட முக்கிய காரணம் இருக்கிறது. இதில் வரும் வாலிபர் பிரவுன்லி யூடியூப் நட்சத்திரம். கேட்ஜெட் பற்றிய விம்சர்சனம் வழங்க்கும் இவரது யூடியூப் சேனலுக்கு லட்சகணக்கில் சந்தாதாரர்கள் உள்ளனர். கேட்ஜெட் உலகில் இவருக்கு இருக்கும் செல்வாகு வியப்பானது.

இப்படி இணையம் மூலம் செல்வாக்கு பெற்றவர்களின் வெற்றிக்கதைகள் எனது 2 வது புத்தகமான நெட்ச்த்திரங்கள் முதல் பாகத்தில் இடம்பெற்றுள்ளன. பிரவுலிக்கு முன்பாகவே யுடீயுப்பில் மேக் அப் மகாராணியாக உருவான மிச்சிலி பேன் பற்றிய சுவாரஸ்யமான அறிமுகம் இதில் உள்ளது.

நெட்சத்திரங்கள் புத்தகம் புத்தக கண்காட்சியை முன்னிட்டு வெளியாகி உள்ளது. விரைவில் தமிழகம் முழுவதும் உள்ள புத்தக நிலையங்களில் கிடைக்கும். புத்தக கண்காட்சியில் கிடைக்கும்.

ஆர்வம் உள்ளவர்கள் தெரிவித்தால் பதிப்பகமான மதிநிலையத்தாரிடம் பேசி , வலைப்பதிவின் வாசக்ர்களுக்கு சலுகை விலை பெற்றுத்தர முயற்க்கலாம் என இருக்கிறேன். வாசக நண்பர்கள் இமெயில் மூலம் கோரினால் மகிழ்வேன்.

அன்புடன் சிம்மன்

ஸ்மார்ட்போன் உலகில் …. !

பேட்டரியை காக்க ஆறு வழிகள்!

செல்போனோ ,ஸ்மார்ட்போனோ பேட்டரி எப்போதும் சார்ஜில் இருப்பது முக்கியமானது .ஆனால் பேட்டரியில் சார்ஜ் இல்லாமல் தவிக்கும் அனுபவம் ( அவஸ்த்தை) எல்லோருக்கும் எப்போதாவது ஏற்படதான் செய்கிறது. அதிலும் ஸ்மார்ட்போனை அதிக நேரம் பயன்படுத்துபவர்களுக்கு இந்த அனுபவமும் அவஸ்த்தையும் அடிக்கடி ஏற்படலாம். பேட்டரியின் ஆற்றலுக்கு வரம்பு இருந்தாலும் கொஞ்சம் கவனமாக இருந்தால் பேட்டரியின் ஆயுலையும் , அதன் சார்ஜிங் ஆற்றலையும் அதிகரிக்கலாம். இதற்கான ஆறு எளிய வழிகளை கிஸ்மோடோ தொழில்நுட்ப தளம் அடையாளம் காட்டியுள்ளது. அவை;
1. வெப்பநிலை உங்கள் பேட்டரியை பாதிக்கலாம். கூடுமானவரை போனை அல்லது எந்த சாதனத்தையும் சூரிய ஒளியில் நேரடியாக படும் படி வைப்பதை தவிர்க்கவும். அதிக குளிருக்கும் இது பொருந்தும்.
2. பேட்டரியை எந்த அளவி சார்ஜ் செய்யலாம். பொதுவாக முழுவதும் சார்ஜ் செய்வது நல்லது எனும் கருத்து இருக்கிறது. ஆனால் உண்மையில் முழு சார்ஜ் செய்யலாமல் பகுதி அளவு சார்ஜ் செய்வது ஏற்றது என வல்லுனர்கள் சொல்கின்றனர். பகுதி அளவு என்றால்? அதற்கு ஒரு பார்முலா சொல்கின்றனர். 40-80 சதவீதம் வரை சார்ஜில் இருக்க வேண்டும் என்கின்றனர். அதாவது, சார்ஜ் 40 சதவீதம் வந்ததும், மீண்டும் 80 சதவீதம் வரை சார்ஜ் செய்து கொள்ள வேண்டும். ஆனால் வேலை அதிகம் அல்லது வெளியூர் செல்வதாக இருந்தால் 100 சதவீதம் சார்ஜ் செய்து கொள்வதே சரியாக இருக்கும்.
3. சார்ஜிங்கில் கவனிக்க வேண்டிய இன்னொரு விஷ்யம், முழுவதும் சார்ஜான பிறகு பிளக் செய்யப்பட்ட நிலையிலேயே விடப்படுவதி தவிர்க்கவும். அதிகமாக சார்ஜ் ஆவதும் பேட்டரியை பாதிக்கும்.
4. அதே போல அதிவிரைவு சார்ஜர் மற்றும் போலி சார்ஜர்களை பயன்படுத்தாமல் இருப்பதும் நல்லது.
5. போனை பயன்படுத்தும் போது மட்டும் அல்ல ஸ்விட்ச் ஆப் செய்யும் போது சார்ஜை கவனிக்க வேண்டும். ஸ்விட்ச் ஆப் செய்யும் நிலை ஏற்பட்டால் 50 சதவீதம் சார்ஜ் இருக்குமாறு பார்த்துக்கொள்ள வேண்டும்.
எல்லாம் சுலபமான வழிகளாக தான் இருக்கிறது அல்லவா? குறித்து வைத்துக்கொள்ளுங்கள் .

ஆண்ட்ராய்டில் நோக்கியா ஹியர்

நோக்கியாவின் செல்போன் பிரிவை கையகப்படுத்திக்கொண்ட மைக்ரோசாப்ட் நிறுவனம் லூமியா ஸ்மார்ட்போன்களை நோக்கியா பெயர் இல்லாமல் விற்பனை செய்ய முடிவு செய்திருக்கிறது. நோக்கியா லூமியாவில் இருந்து மைக்ரோசாப்ட் லூமியாவுக்கான மாற்றம் துவங்கியிருக்கிறது என நிறுவனம் தெரிவித்துள்ளது. எனினும் சாதாரண செல்போன்களில் நோக்கியா பெயரை தொடர்ந்து பயன்படுத்த உள்ளது. சமீபத்தில் நோக்கியா 130 புதிய போன் அறிமுகமானது . இரட்டை சிம் கார்டு வசதி கொண்ட இந்த போனின் விலை, ரூ. 1,649. வண்ன டிஸ்பிலே கொண்ட இந்த போன் தன் 32 ஜிபி மெமரி கார்டில் 6,000 பாடல்களை சேமித்து வைக்கும் வசதி கொண்டதாம். 13 மணிநேர டாக்டைம் அல்லது 46 மணிநேர பாடல் வசதி கொண்டது என்றும் குறிப்பிடப்பட்டுள்ளது.
முதல் போனை வாங்க விரும்புகிறவர்கள் அல்லது மாற்று போன் தேவை என நினைப்பவர்கள் இதன் இலக்காக கொள்ளப்படுகிறது.
இதனிடையே நோக்கியா அதன் வரைட சேவை வசதியை ஆண்ட்ராய்டு சாதனங்களுக்கு விரிவு படுத்தியுள்ளது. நோக்கியா நிறுவனம் செல்போன் பிரிவில் இருந்து வெளியேற்றிவிட்டாலும் நோக்கியா ஹியர் எனும் வரைபட சேவையை உருவாக்கி இருப்பதை நீங்கள் அறிந்திருக்கலாம். இந்த வரைபட வசதி சாம்சங்கின் கேலகஸி சாதங்கள் மற்றும் சான்சங் கியர் ஸ்மார்ட்வாட்சிகளில் இணைக்கப்பட்டுள்ளது. தற்போது ஆண்ட்ராய்டு ஸ்மார்ட்போன் மற்றும் சாதங்களிலும் ( ஜெல்லிபீன் மற்றும் அதற்கும் மேலான வர்ஷென்கள்) இவற்றை பயன்படுத்தலாம் என நோக்கிய அறிவித்துள்ளது. ஆனால் கூகிள்பிளே ஸ்டோரில் டவுண்லோடு செய்ய முடியாது, நோக்கிய இணையதளத்தில் இருந்து பெறலாம். தொடர்ந்து மேம்படுத்தப்பட்டு வருவதால் இன்னும் பீட்டா வடிவில் இருப்பதாக தெரிவிக்கப்பட்டுள்ளது.

—————

ப்ளுடூத் ஸ்விட்ச்

ஸ்மார்ட்போன் மட்டுமா? ஸ்மார்ட் டிவி, ஸ்மார்ட் ஹோம் என்றேல்லாம் பேசப்படுகிறது. எல்லாமே ஸ்மார்ட்டாகி வரும் நிலையில் வீட்டில் பயன்படுத்தும் மின்விளக்குகளை இயக்கும் ஸ்விட்ச்களும் ஸ்மார்ட்டாக இருக்க வேண்டாமா? அது தான் ஆவி-ஆன் (Avi-on ) எனும் நிறுவனம் புளுடூத்தால் வயல்லெஸ் மூலம் இயங்கும் ஸ்மார்ட் ஸ்விட்சை உருவாக்கி உள்ளது.
இந்த ஸ்மார்ட் ஸ்விட்சில் என்ன விஷேசம் தெரியுமா? பிளக் பாயிண்ட் பற்றி கவலைபடாமல் வீட்டில் எந்த இடத்தில் வேண்டுமானாலும் இதை பொருத்திக்கொள்ளலாம். முக்கியமாக அணி அடிக்கும் அவசியம் இல்லை. அப்படியே ஒட்டி விடலாம். அதன் பிறகு இதை வயர்லெஸ் மூலம் அடாப்டர் வழியே விளக்குடன் இணைக்கலாம். அல்லது ப்ளுடூத் பல்ப வாங்கினால் அதனுடன் இணைத்துவிடலாம். இதன் இயக்கத்தை ஸ்மார்ட்போன் செயலி மூலம் கட்டுப்படுத்தலாம்.
ஒட்டுமொத்த வீட்டையும் குறைந்த செலவில் ஸ்மார்ட் லைட்டிங் வசதி கொள்ளச்செய்யலாம் என்று ஏவி ஆன் தெரிவிக்கிறது.
ஆனால் இன்னமும் சந்தையில் விற்பனைக்கு வரவில்லை. கிரவுட்சோர்சிங் முறையில் வாங்க ஒப்புக்கொண்டு ஆதரவு தெரிவிக்கலாம் என அதன் இணையதளத்தில் தெரிவிக்கப்பட்டுள்ளது. சுவாரஸ்யமாக இருந்தால் சென்று பார்க்கவும்: http://www.avi-on.com/avi-on

—————

ரெயில் சேவைக்கான செயலி

இந்திய ரெயில்வே செயலி மூலமான சேவை வழங்குவதில் கவனம் செலுத்தி வருகிறது. இதன் தொடர்ச்சியாக இப்போது ரெயில்களின் பயண நேரம் ,வருகை ,புறப்படும் நேரம் ஆகியவற்றை அறிந்து கொள்வதற்கான செயலியை ( ஆப்) அறிமுகம் செய்துள்ளது. என்.டி.இ.எஸ் – நேஷனல் டிரைன் என்குவைரி சிஸ்டம் (NTES ) எனும் இந்த செயலி ஆண்ட்ராய்டு சாதனங்களில் செயல்படக்கூடியது. ரெயில்வேயின் ஐடி பிரிவான சி.ஆர்.ஐ.எஸ் (CRIS) மூலம் இந்த செயலி அறிமுகம் செய்யப்பட்டுள்ளது.
இந்த செயலி மூலம் ரெயில்கள் பற்றிய தகவல்களை அறிவதுடன் , ஸ்பாட் யுவர் டிரைன் எனும் அம்சம் மூலம் குறிப்பிட்ட ரெயிலின் தற்போதைய நிலையை எளிதாக அறியலாம். ரெயில்களின் அட்டவணை, நிலையங்களுக்கு இடையிலான ரெயில்கள், ரத்தான மற்றும் மாற்றிவிடப்பட்ட ரெயில்கள் பற்றிய விவரங்களை அறியலாம். ஏற்கனவே வின்டோசுகு அறிமுகமான நிலையில் இப்போது ஆண்ட்ராய்டில் வந்துள்ளது. ரெயில்கள் இயக்கம் பற்றிய தகவல்களை உடனுக்குடன் அறியக்கூடிய வசதியாக இது இருக்கிறது. www.trainenquiry.com), இணையதளம் மூலமும் அறியலாம். ஆண்ட்ராய்டு போனில் பயன்படுத்த: https://play.google.com/store/apps/details?id=cris.icms.ntes&hl=en.

————–

நோபோன் வேணுமா?

சில மாதங்களுக்கு முன் இணையத்தில் அறிமுகமான நோபோன் பரவலாக கவனத்தை ஈர்ததது. பேசமுடியாது, செய்தி அனுப்ப முடியாது ,டிஸ்பிலேவும் கிடையாது, பேட்டரியும் இல்லை என வர்ணிக்கப்பட்ட இந்த நோபோன் உண்மையில் போன் இல்லை. நவீன யுகத்தில் ஸ்மார்ட்போன் மீதான சார்பு மற்றும் மோகத்தை நையாண்டி செய்யும் வகையில் முன்வைக்கப்பட்ட கருத்தாக்கம். எப்போதும் போனின் திரைய பார்த்துக்கொண்டிருக்காமல் நண்பர்களை கொஞ்சம் கவனியுங்கள் என்னும் கருத்தை அழகாக முன்வைத்த இந்த நோபோனுக்கான இணையதளத்தை நெதர்லாந்து மற்றும் அமெரிக்காவை சேர்ந்த நண்பர்கள் உருவாக்கினர். நையாண்டியாக உதயமான ஐடியா என்றாலும் பலரும் சீரியசாகவே நோபோன் எப்போது வரும் என கேட்கத்துவங்கியதால் , இப்போது இதை உண்மையான தயாரிப்பாக அறிமுகம் செய்யும் உத்தேசத்துடன் கிக்ஸ்டார்ட்டர் இணையதளத்தில் அதற்கான இணைய பக்கத்தை அமைத்துள்ளனர்.
இத்தகைய பேச முடியாத போன் மிகவும் அவசியம் தான் என்று சமீக ஊடகங்களில் சிலர் உற்சாகமாகவும் கூறியுள்ளனர்.
இந்த நோபோனில் இப்போதைய கிரேசான செல்பி அதாவது சுயபடம் எடுக்கும் வசதியும் இருக்ககிறது. இதற்காக கருப்பு வண்ண போனை திருப்பினால் பின்பக்கதில் முகம் பார்க்கும் கண்ணாடி இருக்கிறது. அது தான் காமிரா?
எப்படி இருக்கிறது!

கிக்ஸ்டார்ட்டரில் பார்க்க: https://www.kickstarter.com/projects/nophone-usa/the-new-and-unimproved-nophone
———
ஸ்மார்ட்போன் இல்லாமல் நானில்லை

இந்தியர்கள் வாழ்க்கையில் ஸ்மார்ட்போன் எந்த அளவுக்கு ஆதிக்கம் செலுத்துகிறது? உலக அளவில் பார்க்கும் போது, ஸ்மார்ட்போன் வைத்திருக்கும் இந்தியர்களில் 95 சதவீதம் பேர் அதை மிகவும் முக்கியமாக கருதுவதாக சமீபத்திய ஆய்வு தெரிவிக்கிறது.
பயண இணையதளமான எக்ஸ்பீடியா சார்பில் நடத்தப்பட்ட இந்த ஆய்வு, இந்தியர்கள் ஸ்மார்ட்போனை தங்கள் தினசரி வாழ்க்கையின் முக்கிய அங்கமாக கருதுவதாக தெரிவிக்கிறது. 25 நாடுகளை சேர்ந்த 18 வயதுக்கு மேற்பட்ட 8,856 ஊழியர்களிடம் இந்த ஆய்வு நடத்தப்பட்டது.
உலக அளவில் இந்தியாவில் ஸ்மார்ட்போன் பயனாளிகள் அதிகம் இருப்பதகாவும் உலகிலேயே இந்தியர்கள் தான் விடுமுறை காலத்திலும் ஸ்மார்ட்போனை எடுத்துசெல்பவர்களில் அதிகமாக இருப்பதாகவும் தெரிவிக்கிறது இந்த ஆய்வு.
ஆச்சயப்படும் வகையில் கூகிள் கிளாஸ் பயனாளிகளும் இந்தியாவில் அதிகம் இருப்பதாக தெரிவிக்கப்பட்டுள்ளது.
பயண் நிறுவனம் நடத்திய ஆய்வு என்பதால் , இந்தியர்கள் ஸ்மார்ட்போன் மூலம் பயணங்களை திட்டமிடுவது பற்றியும் குறிப்பிடப்பட்டுள்ளது.

————–

நன்றி; தமிழ் இந்துவுக்காக எழுதியது.

————–