Tag Archives: trolls

இணையத்தில் நல்லெண்ணத்தை பரப்பும் பேராசிரியர்

sஇணையத்தின் மீது நம்பிக்கை கொண்டவர்கள் தென்கொரிய பேராசிரியர் மின் யங் சுல் பற்றியும் அவரது ’முழு ஒளி’ இயக்கம் பற்றியும் தெரிந்து கொள்ள வேண்டும். இணையத்தின் எதிர்மறை தன்மையால் அதன் மீது அவம்பிக்கை கொண்டவர்களும் இந்த பேராசிரியரை அவசியம் அறிமுகம் செய்து கொள்ள வேண்டும்.

ஏனெனில் இந்த பேராசிரியரின் முழு ஒளி இயக்கம், , இணையத்தின் மிகப்பெரிய பிரச்சனைக்கு தீர்வு காணும் வகையில் அமைந்திருக்கிறது என்பது தான். இந்த இயக்கம் பற்றி அறிந்து கொண்டால் நிச்சயம் பேராசிரியரை பாராட்டவும் தோன்றும், அவர் செய்வதை பின்பற்றி நடக்கவும் தோன்றும். இந்த ஊக்கமே அவரை கவனிக்க வைக்கிறது.

இணையத்தில் நல்ல விஷயங்கள் கொட்டிக்கிடக்கின்றன. கூட்ட நிதி திரட்டுதல் முதல் கூட்டு முயற்சிகள் வரை எண்ணற்ற செயல்களுக்கு இணையத்தை பயன்படுத்தலாம். இணையம் மூலம் மாற்றங்களை கொண்டு வரலாம், புதிய பாதை காட்டலாம். ஆனால் இணைய பயன்பாட்டிற்கு இன்னொரு பக்கமும் இருக்கிறது. இது எதிர்முறையான செயல்களையும் கொண்டிருக்கிறது. அதிலும் குறிப்பாக இணையத்தில் அவதூறு பரப்புவதும், காரணமே இல்லாமல் வசைபாடி வெறுப்பை உமிழ்வதும் வெகு சுலபம்.

இதை பின்னூட்ட  வடிவில் செய்யலாம். நேரடி தாக்குதலாகவும் நடத்தலாம். விவாதங்களில் ஊடுருவி அதன் மைய பொருளையே பாழாக்கலாம். இன்னும் பலவிதங்களில் நிகழும் இந்த பாதிப்பு பிரச்சனை பொதுவாக ’டிரால்ஸ்’ என குறிப்பிடப்படுகிறது. அதாவது இணையத்தில் ஒருவரை பின் தொடர்ந்து எதிர்மறையான கருத்துக்களை கூறி வெறுப்பேற்றுவது. சைபர் சீண்டிவிடுதல் என்றும் இதை புரிந்து கொள்ளலாம்.

பேஸ்புக்கில் துவங்கி, டிவிட்டர், வாட்ஸ் அப், விவாத தளங்கள், செய்தி தளங்கள் என எல்லாவற்றிலும் இவற்றை பார்க்கலாம். அரத்தமுள்ள கருத்துக்களுக்கு நடுவே எதிர்மறை கருத்துக்கள் தோன்றும். இவை வெற்று கேலியாக இருக்கலாம். ஆவேசம் கொண்ட தாக்குதலாகவும் இருக்கலாம். துவேஷ நஞ்சை கக்கலாம். இணைய சாமானியர்கள் முதல் நட்சத்திரங்கள் வரை பலரும் இந்த தாக்குதலுக்கு இலக்காகுகின்றனர். பலர் இணையத்தில் இப்படியும் உண்டு என புறந்தள்ளி சென்றுவிடுகின்றனர். இன்னும் சிலர் வேதனைக்கு இலக்காகி இணையமே வேண்டாம் என விலகி விடுவதும் உண்டு. விபரீதமான சில தருணங்களில் தாக்குதலுக்கு இலக்கானவர்கள் தற்கொலை போன்ற தீய முடிவுகளுக்கும் வந்துவிடுவதுண்டு.

இணையம் இந்த பிரச்சனையை அறியாமல் இல்லை. இதை கட்டுப்படுத்தவும் இணையத்தில் பலர் முயன்று வருகின்றனர். இந்த வரிசையில் தான் கொரிய பேராசிரியரும் வருகிறார். ஆச்சர்யப்படும் வகையில் பத்தாண்டுகளுக்கும் மேலாக இந்த முயற்சியில் அவர் ஈடுபட்டிருக்கிறார். இந்த முன்னோடி பற்றி தற்செயலாகவே அறிந்து கொள்ள முடிந்தது. இணைய கலாச்சாரம் தொடர்பாக தேடிக்கொண்டிருந்த போது, சைபர்வெளியில் நல்லெண்ணத்தை பரப்பும் கொரிய பேராசிரியர் எனும் செய்தி தலைப்பு கவனத்தை ஈர்தத்து. ஸ்டார்2 எனும் தளத்தில் வெளியாகி இருந்த அந்த செய்தியை கிளிக் செய்து படித்துப்பார்த்தால், கொரிய பேராசிரியரின் முயற்சி வியக்க வைப்பதாக இருக்கிறது.

பேராசிரியர் மின், இணையத்தில் நல்லெண்ண கருத்துக்களை பரவச்செய்து வருகிறார். அதாவது இணையத்தில் வெளியாகும் எதிர்மறையான கருத்துக்களுக்கு பதிலடி கொடுக்கும் வகையில் நல்லவிதமான கருத்துக்களை பதிவு செய்ய ஊக்குவித்து வருகிறார். இதற்காக என்றே ’முழுஒளி’ இணைய இயக்கத்தையும் துவக்கி நடத்தி வருகிறார்.

கொரியாவில் உள்ள பள்ளி மாணவர்கள் மற்றும் இணையவாசிகள் நல்லெண்ண கருத்துக்களை இணையத்தில் வெளியிடுவதை அவரது இயக்கம் ஊக்குவித்து வருகிறது. அதிலும் குறிப்பாக இணையத்தில் தாக்குதலுக்கும், துவேஷத்திற்கும் இலக்காகின்றனர்களுக்கு ஆறுதல் அளிக்கும் வகையில் நல்லவிதமான கருத்துக்களை வெளியிட ஊக்குவித்து வருகிறது. இதற்காக பள்ளி அளவில் திட்டங்கள் செயல்படுத்தப்பட்டு வருகின்றன. கொரிய அளவில் மட்டும் அல்லாமல் மற்ற நாடுகளிலும் இந்த முறை பிரபலமாகி வருகிறது.

இந்த இயக்கத்தின் பயனாக, இதுவரை 72 லட்சத்திற்கும் மேலான நல்லெண்ண கருத்துக்கள் இதன் உறுப்பினர்களால் பதிவு செய்யப்பட்டுள்ளதாக இயக்க இணையதளத்தில் தெரிவிக்கப்பட்டுள்ளது. எண்ணிக்கை பெரிய விஷயமல்ல. ஆனால் இந்த செயலின் பின்னே உள்ள நோக்கம் பெரியது.

விஷமிகள் இணையத்தில் போகிற போக்கில் மோசமான கருத்துக்களை பதிவு செய்து விட்டுச்செல்கின்றனர். இந்த கருத்துக்கள் ஆறாத வடுக்களை ஏற்படுத்துவதும் உண்டு. அதைவிட மோசமான முடிவுக்கும் கொண்டு செல்வதுண்டு. சில ஆண்டுகளுக்கு முன் சீனாவில் நடைபெற்ற சம்பவம் ஒன்று இதற்கான உதாரணம். விவாத தளம் ஒன்றில் ‘ நான் உயிரை மாய்த்துக்கொள்ள வேண்டுமா? என ஒருவர் கேட்டிருக்கிறார். காதலியுடனான மன முறிவு தந்த சோகத்தில் இருந்த அந்த வாலிபர் கேட்ட கேள்விக்கு, ஆம் என்று ஒருவர் பதில் சொல்லி இருந்தார். இன்னொருவர், நீங்கள் இறப்பதற்கு முன் ஐபோனை கொடுத்து விட்டு செல்லவும் என கூறியிருந்தார். இப்படி நீண்ட கருத்துக்களின் விளையாக அந்த இளைஞர் இறுதியில் தற்கொலை செய்து கொண்டார்.

இது போல எண்ணற்ற வேதனையான உதாரணங்கள் இருக்கின்றன. கொரியாவிலும் நட்சத்திரம் ஒருவர் இணைய பின்னூட்ட தாக்குதலால் மனம் உடைந்து தற்கொலை செய்து கொண்டதை அறிந்த போது பேராசிரியர் மின், இணையத்தில் வெளியாகும் எதிர்மறை கருத்துக்களை சமன் செய்ய ஏதாவது செய்ய வேண்டியது அவசியம் என நினைத்தார். தலைநலர் சியோலில் உள்ள சுன்காங் எனும் பல்கலைக்கழகத்தில் பணியாற்றிக்கொண்டிருந்தவர், பல்வேறு இணையதளங்களில் நட்சத்திரங்களின் பக்கத்தில் நல்ல விதமான கருத்துக்களை பதிவு செய்ய வேண்டும் என தனது மாணவர்களுக்கு வீட்டுப்பாடம் கொடுத்தார். மாணவர்களும் ஆயிரக்கணக்கில் நல்லெண்ன கருத்துக்களை பதிவு செய்தனர்.

இந்த முயற்சி பற்றி நாளிதழ் ஒன்றில் செய்தி வெளியாகி அதற்கு நல்ல வரவேற்பும் கிடைத்தது. இதனால் ஊக்கம் பெற்ற பேராசிரியர் இந்த செயலை தொடர்வதற்காக சன்புல் இயக்கத்தை துவக்கினார். கொரிய மொழியில் முழு ஒளி என்று பொருள்.

இந்த இயக்கத்தின் மூலம், உறுப்பினர்கள் இணையத்தில் நல்லவிதமான கருத்துக்களை வெளியிட ஊக்குவித்து வருகிறார். இதன் உறுப்பினர்கள் இணையத்தில் உலாவி, வெறுப்பை உமிழும் கருத்துக்கள் வெளியாகி இருக்கும் இடங்களில் அதற்கு பதிலடி கொடுக்கும் வகையில் நல்ல கருத்துக்களை பகிர்ந்து வருகின்றனர். ஒவ்வொரு சூழலுக்கும் ஏற்ப பொருத்தமான கருத்துக்களை வெளியிடுகின்றனர்.

பூகம்பம் பாதிப்பு, தீவிரவாத தாக்குதல் போன்ற சம்பங்களால் பாதிக்கப்பட்டவர்களுக்கு ஆறுதல் அளிக்கும் வகையிலும் நல்லெண்ண கருத்துக்களை வெளியிட்டு வருகின்றனர். இப்படி நல்லெண்ண கருத்துக்களை பரவச்செய்ய முயன்று வருவதோடு, அண்மையில் சமூக ஊடக மனித உரிமைகள் குழுவையும் அவர் துவக்கியிருக்கிறார். இந்தக்குழு இணைய தாக்குதலால் பாதிக்கப்பட்டவர்களுக்கு ஆலோசனை மற்றும் சட்ட உதவியை வழங்கி வருகிறது.

மோசமான கருத்துக்கள் எந்த வகையான தாக்கத்தை ஏற்படுத்தகூடியது என்பது நமக்கு தெரிந்தது தான். ஆனால் நல்லவிதமான கருத்துகளை பதிவு செய்வதன் மூலம், எல்லோரும் நமக்கு எதிரானவர்கள் அல்ல, ஆதரவான குரல்களும் உள்ளன என்பதை பாதிக்கப்பட்டவர்களுக்கு உணர்த்த முடியும். அதை தான் முழு ஒளி இயக்கம் ஊக்குவித்து வருகிறது.

அது மட்டும் அல்ல, நல்லவிதமான கருத்துகள் தெரிவிக்கப்பட்டிருப்பது மற்றவர்கள் எதிர்மறையான கருத்துகளை வெளியிடுவதையும் தவிர்க்க உதவலாம். இத்தகைய கருத்துகள் இணைய சீண்டலில் ஈடுபடும் எண்ணம் கொண்டவர்கள் மனதிலும் மாற்றத்தை ஏற்படுத்தலாம்.

இணையத்தில் நல்லெண்ணத்தை விதைப்போம்!

முழுஒளி இயக்க இணையதளம்: http://sun-full.org/index.htm#&panel1-2

 

-=

 

 

 

 

டிரால்கள் பிரச்சனைக்கு புதுமையான தீர்வு!

linkmoji-readyexamples-left-p-500x500இணையத்தின் டாப் டென் பிரச்சனைகளை பட்டியலிட்டால், டிரால்களின் தாக்குதல் அதில் நிச்சயம் முன்னணியில் இடம் பெறும். ஃபேக் நியூஸ் போன்ற புதிய பிரச்சனைகள் விஸ்வரூபம் எடுத்து வரும் நிலையில், டிரால்கள் எனப்படும் இணைய விஷமிகளின் தாக்குதல் இணையத்தின் தீராத தலைவலியாக தொடர்கிறது.

இணையத்தின் ஆதிகால பிரச்சனையான இதற்கு பலவித தீர்வுகள் முயற்சிக்கப்பட்டு, எதுவும் முழு பலன் தராத நிலையில் நார்வே நாட்டு இணையதளம் ஒன்று புதிய தீர்வை முன்வைத்துள்ளது. இந்த தீர்வு புதுமையாக மட்டும் அல்ல புதிர் வடிவிலும் அமைந்துள்ளது. அதாவது கேள்வி பதில் வடிவில் அமைந்துள்ளது.

டிரால்களுக்கு பலவிதமான விளக்கம் சொல்லப்படுகிறது. அதற்கேற்ப டிரால்களும் பலவிதமான வடிவில் செயல்பட்டு வருகின்றனர். ஆனால், டிரால்களின் பொதுத்தன்மை என்று பார்த்தால் இணைய விவாதம் போன்றவற்றில் சம்மன் இல்லாமல் ஆஜராகி துவேஷம் நிறைந்த கருத்துக்களை பதிவு செய்வது என புரிந்து கொள்ளலாம். விவாதத்தின் நோக்கத்தை பாதிப்பதில் துவங்கி, தொடர்புடையவர்கள் மனதை நோகடிப்பது வரை இது அமையலாம். இத்தைய தாக்குதலுக்கு இலக்காகி இணைய பக்கமே இனி வரமாட்டேன் என கண்ணீர் மல்க விலகிய பிரபலங்கள் உண்டு. அன்மை காலமாக இணைய சாமானியர்களும் இந்த வகை தாக்குதலுக்கு இலக்காகி அவதிப்பட்டு வருகின்றனர்.

சுருக்கமாக சொலவதானால் இணைய விஷமிகள் இணையத்தை பாதுகாப்பற்ற இடமாக மாற்றி வருகின்றனர். இவ்வளவு ஏன் செய்தி தளங்களிலும் கூட டிரால்கள் தொடர்ந்து கைவரிசை காட்டி வருகின்றனர். செய்தி கட்டுரைகள் தொடர்பாக கருத்து தெரிவிக்கும் பின்னூட்ட வசதியை தவறாக பயன்படுத்தி மனம் போன போக்கில் கருத்துக்களை பதிவு செய்து வெறுத்துப்போக வைப்பதில் விஷமிகள் ஆனந்தம் காண்கின்றனர். சிலர் வம்புக்காகவேனும் தேவையில்லாத கருத்துகளை தெரிவித்து கோபம் கொள்ள வைப்பதும் உண்டு. ஏதேனும் ஒரு விதத்தில் தூண்டிவிடுவது தானே அவர்களின் நோக்கம்!

பின்னூட்டங்களில் இப்படி காழ்ப்புணர்ச்சி கொண்ட கருத்துக்கள் பதிவு செய்யப்படுவதை தவிர்க்க கண்காணிப்பு, கட்டுப்பாடு போன்ற உத்திகள் எல்லாம் பலன் தராமல் போகவே, பல இணையதளங்கள் பின்னூட்ட வசதியையே ரத்து செய்துவிட்டன. ஆனால், பின்னூட்டம் என்பது இணையம் சாத்தியமாக்கும் பங்கேற்பு ஜனநாயகத்தின் முக்கிய அம்சம் என்பதால் இந்த உத்தியையும் அப்படியே ஏற்றுக்கொள்வதற்கில்லை. மேலும் பின்னூட்ட வசதி அர்த்தமுள்ள விவாதம் மூலம் கருத்து பரிமாற்றம் மற்றும் கூடுதல் புரிதலுக்கு வழிவகுக்கும்.

எனவே தான் பின்னூட்ட வசதியை இயன்ற வரை ஆரோக்கியமான முறையிலேயே பயன்படுத்தப்படுவதை உறுதி செய்வது எப்படி என பலரும் யோசித்து வருகின்றனர். இந்த வரிசையில் தான் நார்வே நாட்டு பொதுத்துறை ஒளிபரப்பு ஊடகமான என்.ஆர்.கேவின் தொழில்நுட்ப பிரிவான என்.ஆர்.கே. பீட்டா பின்னூட்டங்களை நெறிப்படுத்த புதிய தீர்வை அறிமுகம் செய்துள்ளது. இந்த தீர்வு கேள்வி பதில் பாணியில் அமைந்துள்ளது.

அதாவது, குறிப்பிட்ட செய்தி அல்லது கட்டுரை தொடர்பாக யாரேனும் பின்னூட்டம் வெளியிட விரும்பினால் முதலில், சில கேள்விகளுக்கு பதில் சொல்ல வேண்டும். அவர்கள் பின்னூட்டம் அளிக்க விரும்பும் கட்டுரை தொடர்பாக அந்த கேள்விகள் அமைந்திருக்கும். அவற்றுக்கு சரியான பதில் அளித்தால் மட்டுமே பின்னூட்டம் பதிவு செய்ய முடியும்.

பெரும்பாலும் இணைய விஷமிகள் செய்திகளை படிக்காமலேயே பின்னூட்டத்தில் துவேஷ கருத்துக்களை கூறி கசப்புணர்வு அளிக்கின்றனர் என கருதப்படுகிறது. இதை தடுக்கும் வகையில், முதலில் கருத்து சொல்ல விரும்புகிறவர்கள் அது தொடர்பான கட்டுரையை படித்திருப்பதை உறுதி செய்ய இந்த கேள்வி பதில் உத்தி முயற்சிக்கிறது.

” கருத்து தெரிவிக்க விரும்புகிறீர்களா? எனில் இது தொடர்பான கேள்விகளுக்கு பதில் அளியுங்கள். கருத்துக்களின் தரம் குறித்து கவலைப்படுவதால், பின்னூட்டம் அளிப்பவர்கள் அது தொடர்பான செய்தியை வாசித்திருப்பதை உறுதி செய்ய விரும்புகிறோம்” என இதற்கான காரணம் அந்த இணையதளம் சார்பாக விளக்கப்பட்டுள்ளது.

கருத்து தெரிவிப்பதற்கு முன், எல்லோரும் கட்டுரையில் என்ன இருக்கிறது என்பதை ஒப்புக்கொண்டார்கள் எனில், அவர்கள் தெரிவிக்கும் கருத்துக்கள் அர்த்தமுள்ளதாக அமைய வாய்ப்புள்ளது என என்.ஆர்.கே பீட்டா தளத்தில் பணியாற்றும் செய்தியாளர் ஒருவர் இது தொடர்பாக தெரிவித்துள்ளார்.

நிச்சயம், பின்னூட்ட வசதி தவறாக பயன்படுத்தப்படுவதை தடுக்கும் போராட்டத்தில் இது சுவாரஸ்யமான முயற்சி தான். பின்னூட்டம் மூலம் விஷம் கக்குவதை இது தடுக்குமா? என்று தெரியவில்லை. ஆனால், கருத்து தெரிவிக்கவுள்ள ஒரு கட்டுரையை முழுவதும் படித்து, அதன் சாரம்சத்தை புரிந்து கொண்டு பதில் அளிக்க நிர்பந்திக்கப்படுவது போகிற போக்கில் கருத்துக்களை வீசி எறிவதில் இன்பம் காண்பவர்களை யோசிக்க வைக்கலாம். அல்லது குறைந்தபட்சம் விலக்கி வைக்கலாம். மேலும் இடைப்பட்ட நேரம் அவர்களின் ஆவேசத்தையும் தணித்துவிடலாம்.

ஆனால், கட்டுரையின் உண்மையான வாசகர்கள் இப்படி கேள்வி கேட்கப்படுவதை எப்படி எடுத்துக்கொள்வார்கள் எனத்தெரியவில்லை. கட்டுரை தொடர்பான கேள்விகளுக்கு பதில் அளிப்பதை அவர்கள் ரசிக்கவும் செய்யலாம். எனில் இது, இணைய யுகத்தில் செய்திகள் தொடர்பான உரையாடல் தன்மையில் கூடுதல் அம்சமாகலாம். வாசித்த பிறகே பின்னூட்டம் தெரிவிக்க வழி செய்யும் இந்த உத்தி அர்த்தமுள்ள இணைய விவாதத்திற்கு வழி செய்யலாம் என்று இணைய வல்லுனர்கள் தரப்பிலும் கருத்து தெரிவிக்கப்பட்டுள்ளது.

 

தளம் புதிது: இமோஜி வடிவில் இணையதள இணைப்புகள்!

இணையதளங்களின் இணைப்புகளை பகிர்ந்து கொள்ளும் பழக்கமும்,தேவையும் இணையவாசிகளில் பலருக்கு இருக்கலாம். இணையதள முகவரிகள் நீளமாக வால் போல தோன்றமால், கச்சிதமான இருக்க வேண்டுமானால் அதற்காக முகவரி சுருக்க சேவைகள் இருக்கின்றன. அதே போல இணையதள முகவரிகளை கொஞ்சம் சுவாரஸ்யமான முறையில் பகிர்ந்து கொள்ள விரும்பினால், லிங்க்மோஜி இணையதளம் அதற்கு உதவுகிறது.

இந்த இணையதளம் இணைய முகவரிகளை எல்லோருக்கும் பிடித்தமான இமோஜிகள் வடிவில் பகிர்ந்து கொள்ள வைக்கிறது. இதற்கு, முதலில் பகிர விரும்பும் இணைய முகவரிகளை இந்த தளத்தில் சமர்பிக்க வேண்டும். உடனே அந்த இணைப்பை இமோஜி எழுத்துக்கள் கொண்டதாக மாற்றித்தருகிறது.

இந்த இணைப்பை பேஸ்புக், டிவிட்டர் மூலம் பகிர்ந்து கொள்ளலாம். இமோஜி இணைப்பை கிளிக் செய்தால் அதன் பின்னே உள்ள இணையதளத்திற்கு செல்லலாம்.

லிங்க்மோஜி தளம் உருவாக்கித்தரும் இமோஜி இணைப்பு பிடிக்கவில்லை எனில், பயனாளிகள் தாங்கள் விரும்பிய இமோஜி உருவங்களை தேர்வு செய்து இணைப்பை உருவாக்கி கொள்ளலாம். இணைய பயன்பாட்டில் கொஞ்சம் சுவாரஸ்யமும் தேவை என நினைப்பவர்கள் முயன்று பார்க்கலாம். ஆனால் இமோஜி இணைப்பை கிளிக் செய்ததும், இணையதளம் தோன்றும் வரை காத்திருக்க நேரலாம்.

இணைய முகவரி: http://www.linkmoji.co/

 

செயலி புதிது; பிரிஸ்மா செயலியில் புதிய வசதி

ஸ்மார்ட்போன் பிரியர்களின் மனம் கவர்ந்த பிரிஸ்மா செயலி புதிய அம்சங்களோடு தொடர்ந்து மேம்பட்டுக்கொண்டே இருக்கிறது. இப்போது இந்த செயலி புதிய பில்டர் வசதியை அறிமுகம் செய்துள்ளது.

பிரிஸ்மா செயலி, பயனாளிகளின் ஒளிப்படங்களை நவீன ஓவியம் போன்ற தோற்றமாக மாற்றி பகிர்ந்து கொள்ள வழி செய்கிறது. ஸ்மார்ட்போனில் எடுக்கப்பட்ட ஒளிப்படத்தை பிரிஸ்மா செயலியின் பில்டர்கள் மூலம் கலைபடைப்பாக மாற்றிக்கொள்ளலாம். செயற்கை நுண்ணறிவு சார்ந்த தொழில்நுட்பம் இதன் பின்னே இயங்குகிறது.

இந்த புதுமையான அம்சத்திற்காக அறிமுகமான வேகத்திலேயே பிரிஸ்மா, ஸ்மார்ட்போன் பயனாளிகள் மத்தியில் பெரும் வரவேற்பை பெற்றது. ஆண்ட்ராய்டு மற்றும் ஐபோன்களுக்கான 2016 ம் ஆண்டுக்கான சிறந்த செயலி விருதையும் வென்றது.

பிரிஸ்மா தொடர்ந்து பயனாளிகளை கவரும் வகையில் புதிய அம்சங்களை அறிமுகம் செய்து வருகிறது. பயனாளிகள் புரபைல் மற்றும் பீட்களை பராமரிக்கும் வசதியை அறிமுகம் செய்தது. தற்போது, பயனாளிகள் புதிய பில்டர்களை உருவாக்கி கொள்ளும் வசதி அறிமுகம் ஆகியுள்ளது.

இதுவரை, அடிப்படையான பில்டர்களை மட்டுமே பயன்படுத்த முடியும். இப்போது பிரிஸ்மா ஸ்டோர் மூலம் அதில் உள்ள ஸ்டைல்களை அணுகி, புதிய பில்டர்களை உருவாக்கி கொள்ளலாம். முதல் கட்டமாக இலவசமாக அறிமுகமாகியுள்ளது. ஆனால் இது கட்டணச்சேவையாகும் வாய்ப்பு உள்ளது.

மேலும் விவரங்களுக்கு: https://prisma-ai.com/

 

ஊக்கம் பெற 16 வழிகாட்டும் இன்போகிராபிக்

எப்போதும் சுறுசுறுப்பாக பம்பரம் போல சுற்றிச்சுழன்று செயல்பட்டுக்கொண்டிருக்கவே எல்லோரும் விரும்புகின்றனர் என்றாலும், பல நேரங்களில் சோம்பலும், சோர்வும் நம்மை முடக்கி விடுவதுண்டு. இன்னும் சில நேரங்களில் இலக்கில்லாமல் செயல்பட்டு நேரத்தை வீணடித்துக்கொண்டிருப்பும் அனுபவமும் ஏற்படலாம்.

இந்த நிலையில் இருந்து மீண்டு செயல்திறன் பெற்று ஊக்கமுடன் செயல்படுவதற்கான 16 எளிய வழிகளை ரைக்.காம் (wrike.com/ ) இன்போகிராபிக் எனப்படும் தகவல் வரைபடமாக உருவாக்கியுள்ளது.

5 நிமிடங்கள் கவனம் செலுத்துவதன் மூலம் ஊக்கம் பெறலாம், சிரித்தபடி அலுவலகத்தில் இருக்கையில் இருந்து எழுந்து நடை பயிலுங்கள், நாளைய செயல்களை இன்று இரவே குறித்து வைத்துக்கொள்ளுங்கள், ஊக்கம் தரும் வாசகங்களை படியுங்கள் என்பது உட்பட எளிய வழிகளை இந்த தகவல் வரைபடம் விவரிக்கிறது. உங்கள் இலக்குகளை நினைவில் கொள்ளுங்கள், மனதுக்கு பிடித்த இசையை கேளுங்கள் உள்ளிட்ட வழிகளோடு, முழுமைவாதியாக இருக்க வேண்டும் என்றும் குறிப்பிடப்பட்டுள்ளது.

இணைப்பு: http://bit.ly/2lRMBd2

 

நன்றி; தமிழ் இந்துவில் எழுதியது

 

பெண் விஞ்ஞானிகள் புகழ் பரப்பும் விக்கி வீராங்கனை!

_88730047_keilana_portraitஇணையத்தில் புழங்குபவர்கள் எமிலி டெம்பிள் உட்டை அவசியம் அறிந்து கொள்ள வேண்டும். எமிலியை பற்றி தெரிந்து கொண்டால் அவர் மீது மதிப்பு உண்டாகும் என்பது மட்டும் அல்ல இணையம் மீதான நம்பிக்கையும் அதிகமாகும். அதைவிட முக்கியமாக இணையத்தின் இருண்ட பக்கமான டிரால்களின் தொல்லையை எதிர்கொள்வதற்கான ஊக்கமும் உண்டாகும்.

அமெரிக்க கல்லூரி மாணவியான எமிலி விக்கிபீடியாவின் முன்னணி பங்களிப்பாளராக இருக்கிறார். கூட்டு முயற்சியின் அடையாளமாக திகழும் விக்கிபீடியாவில் ஆயிரக்கணக்கான தன்னார்வ பங்களிப்பாளர்கள் இருந்தாலும், எமிலியின் பங்களிப்பை விஷேசமாக குறிப்பிட காரணம் இல்லாமல் இல்லை.

அவர் விக்கிபீடியாவின் பெருங்குறை ஒன்றை சரி செய்யும் வகையில் பங்களிப்பு செய்து வருகிறார். அதோடு இணையத்தின் பெருங்குறை ஒன்றை எதிர்கொள்ளும் வகையிலும் அந்த பங்களிப்பில் தீவிரம் காட்டி வருகிறார்.
இதை தான் விக்கிமீடியாவின் வலைப்பதிவு, எமிலி பகலில் உயிரியல் மாணவியாகவும்,இரவில் இணைய டிரால்களுடன் மல்லு கட்டுபவராகவும் இருக்கிறார் என குறிப்பிடுகிறது. டிரால்களுக்கு அவர் நல் தண்டனை வழங்கி வருவதாகவும் அந்த பதிவு பாராட்டுகிறது. அதாவது டிரால்கள் தொடுக்கும் ஒவ்வொரு ஆவேச தாக்குதலுக்கும் பதிலாக கோபமோ, வெறுப்போ கொள்ளாமல் ஒரு பெண் விஞ்ஞானிக்கான அறிமுக பக்கத்தை அவர் விக்கிபீடியாவில் உருவாக்கி வருகிறார்.

இது டிரால்களின் தாக்குதலை இலக்கு தவறிய அம்புகளாக மாற்றும் அதே நேரத்தில் அவரது ஆதார நோக்கத்தை மேலும் செழுமையாக்குகிறது.
எமிலி இதை எப்படி செய்கிறார் என பார்ப்போம்.

எமிலிக்கு இப்போது 21 வயதாகிறது. ஆனால் 12 வயதிலேயே அவர் விக்கிபீடியாவில் களமிறங்கிவிட்டார். 5 வயதிலேயே குழந்தைகள் கலைக்களஞ்சியத்தை கரைத்து குடித்திருந்தவருக்கு இதே ஆர்வத்தை உள்ளடக்கத்தை உருவாக்கும் திசையில் திருப்புவது இயல்பாக இருந்திருக்கிறது. தைவான் பாடகி ஏஞ்சலா சாங் பற்றிய முதல் கட்டுரையை உருவாக்கியவர் அதன் பிறகு நூற்றுக்கணக்கான கட்டுரைகளை சமர்பிப்பவராகவும், கட்டுரை தகவல்களை திருத்துபவராகவும் உருவானார்.

அவரது கட்டுரைகளில் பல குறிப்பிடத்தகவையாக இருந்தாலும், 2012 ல் அவர் துவங்கிய முயற்சி தான் இப்போது அவரைப்பற்றி பேச வைத்திருக்கிறது.

பெண் விஞ்ஞானிகளுக்கான அறிமுக பக்கங்களை கட்டுரையாக எழுதுவது தான் அவர் துவங்கிய விக்கி திட்டம்!
விக்கி நோக்கில் இது மிகவும் முக்கியமான முயற்சி. ஏனெனில் விக்கிபீடியா உள்ளடக்கத்திலும், செயல்பாட்டிலும் பெண்கள் தொடர்பாக இருக்கும் குறையை களையும் வகையில் இது அமைந்துள்ளது.

விக்கிபீடியா பங்களிப்பாளர்களில் பெண்களின் பிரதிநித்துவம் போதுமான அளவு இல்லை என்ற ஒரு கருத்து முன்வைக்கப்பட்டு கவலையுடன் விவாதிக்கப்படுவதை நீங்கள் அறிந்திருக்கலாம். அதே போலவே விக்கிபீடியா உள்ளடக்கத்திலும் பாலின இடைவெளி வெளிப்படையாகவே இருக்கிறது. விக்கிபீடியாவில் உள்ள வாழ்க்கை வரலாறுகளில் 15 சதவீதம் தான் பெண்கள் பற்றியதாக இருப்பதாக புள்ளிவிவரங்கள் தெரிவிக்கின்றன. அதிலும் பெண் விஞ்ஞானிகள் என்று எடுத்துக்கொண்டால் இது இன்னமும் குறைந்து போகும்.

எமிலி இந்த குறையை ராயல் சொசைட்டி ஆப் சயின்ஸ் அமைப்பின் பெண் விஞ்ஞானிகள் பற்றி விக்கிபீடியாவில் போதிய தகவல்கள் இல்லாததை கவனித்த போது உணர்ந்து கொண்டார். இந்த தகவல் அப்போது தனக்கு பெரும் ஆவேசத்தை தந்ததாக எமிலி கூறியிருக்கிறார். ராயல் சொசைட்டி என்பது விஞ்ஞானிகளின் புகழரங்கு போன்றது. அதில் இடம் பெற்ற பெண் விஞ்ஞானிகளுக்கே விக்கிபீடியாவில் இடமில்லை என்றால் எப்படி என கொதித்துப்போனவர் அந்த கணமே ( அதிகாலை 2 மணி) ஒரு பெண் விஞ்ஞானி பற்றிய அறிமுக கட்டுரையை எழுதி பதிவேற்றினார். அத்தோடு நின்று விடாமல் பெண் விஞ்ஞானிகள் பற்றிய கட்டுரைகளை தொடர்ந்து எழுதுவதற்காக என்றே ஒரு விக்கி திட்டத்தையும் துவக்கினார். இதன் ஒரு பகுதியாக பெண் விஞ்ஞானிகளை அணுகு அவர்கள் பங்களிப்பையும் கோரினார். அறிவியல் பயிலும் மாணவிகளையும் ஒன்று திரட்டி இந்த முயற்சியில் ஈடுபடுத்தி வருகிறார். இதன் பயனாக பெண் விஞ்ஞானிகள் பற்றிய 300 க்கும் மேற்பட்ட கட்டுரைகளை விக்கிபீடியா முகப்பு பக்கத்தில் கொண்டு வந்திருக்கிறார்.

_88736330_288விக்கிபீடியாவில் பெண் விஞ்ஞானிகள் பற்றி நூற்றுக்கணக்கான கட்டுரைகள் உருவாக்கி இருப்பது ஒரு சாதனை என்றால், அவர்களில் இன்னும் கவனிக்கப்படாத பிரிவினராக இருக்கும் கருப்பின பெண் விஞ்ஞானிகளையும் அடையாளப்படுத்தும் செயலில் எமிலி ஈடுபட்டு வருவது சாதாரண செயல் அல்ல என்கிறார் விக்கிமீடியா அமைப்பின் முன்னாள் ஊழியரான சிகோ பவுட்டர்சே.

இந்த செயலுக்காக எமிலி பாராட்டுக்கு மட்டும் இலக்காகவில்லை; அதைவிட அதிகமாக இணைய தாக்குதலுக்கு இலக்காகி வருகிறார். அவர் பெண் என்படாலும், பெண் விஞ்ஞானிகள் பற்றிய தகவல்களை தேடித்தேடி இடம்பெறச்செய்வதாலும் அதிருப்தி அடைந்த டிரால்கள் எனும் இணைய விஷமிகள் பலர் அவருக்கு இமெயில் மூலம் தொல்லை கொடுப்பதை வழக்கமாக கொண்டிருக்கின்றனர். அவரை ஆபாசமாக வர்ணிப்பது, டேட்டிங்கிற்கு அழைப்பது, அவதூறாக பேசுவது என பலவிதங்களில் தங்கல் துவேஷத்தை வெளிப்படுத்துகின்றனர்.

இப்படி இணைய தாக்குதலுக்கு பெண்கள் இலக்காவது தொடர்ந்து நடக்கத்தான் செய்கிறது. இதனால் மனம் உடைந்து போகிறவர்கள் இருக்கின்றனர். இணையமே வேண்டாம் என வெறுத்து ஒதுங்கியவர்களும் உண்டு. வரிந்து கட்டுக்கொண்டு பதிலடி கொடுப்பவர்களும் இல்லாமல் இல்லை.

ஆனால் எமிலி இந்த தாக்குதலை எதிர்கொண்ட விதம் கொஞ்சம் வித்தியசாமாக இருக்கிறது. ஒவ்வொரு முறை தாக்குதலுக்கு இலக்காகும் போதும் அவர், புதிதாக ஒரு பெண் விஞ்ஞானி பற்றிய அறிமுக கட்டுரையை எழுதுவது எனும் கொள்கையை கடைபிடித்து வருகிறார். ஆக, மனம் வருந்தச்செய்யும் மெயில் வரும் போதெல்லாம் அதனால் துவண்டு விடாமால் அதையே ஒரு உத்வேகமாக மாற்றிக்கொண்டு புதிய கட்டுரையை எமிலியும் அவரது சகாக்களும் எழுதி வருகின்றனர்.
இப்படி அடுத்தடுத்து எழுத வேண்டிய கட்டுரைகளுக்கு என்று அவர் ஒரு பெரிய பட்டியலே வைத்திருக்கிறார்.
இது போன்ற தாக்குதல்களை எதிர்கொள்ள தேவைப்படும் உணர்வு ரீதியான உழைப்பு அளவில்லாதது எனும் நிலையில், இத்தகைய தாக்குதல் ஒவ்வொன்றையும் தனது நோக்கத்தை மேலும் வலுவாக்கி கொள்ளும் வகையில் எமிலி செயல்படுவது துணிச்சலானது என்று பாராட்டுகிறார் பவுட்டர்சே. இது இணையத்தில் பெண்களை மவுனமாக்க முயல்பவர்களை தோல்வியடையச்செய்கிறது என்றும் அவர் புகழ்கிறார்.

எமிலியின் பங்களிப்பில் கவனிக்க வேண்டிய இன்னொரு விஷயம் அவரது விக்கி நிபுணத்துவம். விக்கிபீடியாவில் எந்த புது கட்டுரையையும் இடம்பெற வைக்கலாம் என்றாலும் அது விக்கி விதிகளுக்கு உட்பட்டிருக்க வேண்டும். இல்லை என்றால் நிராகரிக்கப்பட வேண்டும். அதிலும் வாழ்க்கை வரலாறு கட்டுரையை பதிவேற்ற வேண்டும் என்றால் அதற்கான தகுந்த முகாந்திரம் இருக்க வேண்டும். அதாவது வாழ்க்கை வரலாற்றுக்குறிய நபர் பற்றி ஏற்கனவே பரவலாக எழுதப்பட்டிருக்க வேண்டும். அந்த நபர் பற்றி ஆதார பூர்வமான கட்டுரைகள் வெளியாகி இருக்க வேண்டும்.

பெண் விஞ்ஞானிகள் வெளியே தெரியாமல் இருப்பது தான் பெருங்குறை எனும் போது அவர்களை பற்றிய கட்டுரைகள் விக்கிபீடியாவில் இடம்பெறாமல் போக இதுவே ஒரு காரணமாக இருக்கிறது. ஆனால் எமிலி விக்கிபீடியா நிபந்தனைகளை பூர்த்தி செய்யும் ஆதாரங்களை தேடிப்பிடித்து அதில் ஏற்கப்படும் நடையில் பெண் விஞ்ஞானிகளை அறிமுகம் செய்து வருகிறார்.

எமிலி பற்றிய விக்கிமீடியா வலைப்பதிவு குறிப்பு: https://blog.wikimedia.org/2016/03/08/alchemy-turning-harassment-into-women-scientists/

எமிலியின் பெண் விஞ்ஞானிகள் விக்கி திட்டம்: https://en.wikipedia.org/wiki/Wikipedia:WikiProject_Women_scientists

——-


இணைய குறிப்பேடு

papiewrஇணையத்தில் உலாவும் போது, காகிதமும் பேனாவும் கையில் இருந்தால் நல்லது தான். பயனுள்ள இணைதளங்கள் அல்லது பின்னர் பார்க்க நினைக்கும் இணைய சேவைகளை குறித்து வைத்துக்கொள்ள இது உதவலாம். அப்படியே இணைய உலாவுதலின் போது மனதில் மின்னலென தோன்றும் எண்ணங்களையும் உடன் எழுதி வைக்கலாம். காதிக குறிப்பேட்டை விட டிஜிட்டல் குறிப்பேடு இன்னும் நல்லது. இதற்கென தனியே இணைய சேவையை நாடாமல் நினைத்த நேரத்தில் குறித்து வைக்கும் வசதி இருப்பது மேலும் சிறந்தது – இப்படி நினைப்பவர்கள் குரோம் பிரவுசரில் நீட்டிப்பாக செயல்படும் கெட்பேப்பியர் சேவையை புக்மார்க் செய்து கொள்ளலாம்.

உடனடி குறிப்பேடாக செயல்படக்கூடியது என்பது இதன் சிறப்பு. இந்த சேவையை நீட்டிபாக நிறுவிக்கொண்ட பின், எப்போது குறிப்பேடு தேவையோ அப்போது புதிய டேப் ஒன்றை கிளிக் செய்து விட்டு அந்த பக்கத்தில் டைப் செய்யத்துவங்கிவிடலாம். டைப் செய்பவை தானாக சேமிக்கப்படும். இதற்கென தனியே கணக்கு துவங்க தேவையில்லை. இந்த குறிப்பேட்டை அச்சிட்டுக்கொள்ளலாம். இரவு வாசிப்புக்கு ஏற்ற அம்சமும் இருக்கிறது.

மேலும் விவரங்களுக்கு: https://getpapier.com/

———

செயலி புதிது; மரம் வளர்க்கும் செயலி
forest-app-trees
ஸ்மார்ட்போனை கையில் எடுத்தால் கீழே வைக்க முடியவில்லை என்று புலம்பும் அளவுக்கு அதற்கு பழகிவிட்டீர்களா? கவலையே வேண்டாம், ஸ்மார்ட்போன் மோகத்தில் இருந்து சற்றே விடுபட சுவாரஸ்யமான முறையில் வழி காட்டுகிறது பாரஸ்ட் ஆப் செயலி.

ஸ்மார்ட்போனில் கவனம் செலுத்தாமல் வேறு முக்கிய பணிகளில் ஈடுபட விரும்பும் போது இந்த செயலியை இயக்க வேண்டும். உடனே திரையில் ஒரு மரம் வளரத்துவங்கும். அடுத்த அரை மணி நேரத்திற்கு செயலி அப்படியே இயங்கி கொள்ள அனுமத்தீர்கள் என்றால் மரம் முழுவதும் வளரும். அது வரை நீங்களும் உங்கள் பணியில் மூழ்கி இருக்கலாம்.

மரத்தை வெட்டாமல் இருக்க வேண்டும் எனும் நல்லெண்ணத்தில் நீங்கள் போனில் கை வைக்காமல் இருக்க வேண்டும். மரம் வளர்ந்து நிற்பதை பார்க்கும் போது உற்சாகம் ஏற்படும் அல்லவா? அதற்காக பொறுமையாக இருக்கத்தோன்றும். வேலையையும் கவனிக்கலாம்.

போனில் இருந்து விடுதலை தேவை என நினைக்கும் போது இந்த செயலியை நாடலாம்.
ஸ்மார்ட் போன் மோகத்திற்கு கொஞ்சம் எளிமையான தீர்வு தான். ஆண்ட்ராய்டு, ஐபோனில் செயல்படுவதோடு, இணைய பிரவுசர்களிலும் செயல்படுகிறது.

பிரவுசரில் பயன்படுத்தும் போது, அரை மணி நேரத்திற்கு இணையதளங்களின் பக்கம் செல்லாமல் இருக்க வேண்டும். எந்த தளங்களை பிளாக் செய்ய வேண்டும் எனும் பட்டியலை பயனாளிகள் தீர்மானித்துக்கொள்ளலாம். சதா பேஸ்புக், டிவிட்டர் என இருப்பவர்களும் இதை முயன்று பார்ககலாம். கவனச்சிதற்ல்களுக்கான வாய்ப்பு இணையத்தில் அதிகம் இருக்கும் நிலையில், அவற்றில் இருந்து மீட்டுக்கொள்ள இந்த சேவை கைகொடுக்கும்.

மேலும் விவரங்களுக்கு: http://www.forestapp.cc/

—-

தளம் புதிது: உடனடி மொழிபெயர்ப்பு வசதி
tras
இணையத்தின் மூலம் கருத்துக்களை வெளியிடுவது மிகவும் எளிதாக இருக்கிறது. சில நேரங்களில் சொந்த மொழி தவிர பிற மொழிகளிலும் கருத்துக்களை வெளியிட இணையத்திலேயே மொழிபெயர்ப்பு வசதியும் இருக்கிறது. இப்படி பல மொழிகளில் மொழிபெயர்க்கும் வசதியை ஒரே இடத்தில் தொகுத்தளிக்கிறது டிரான்ஸ்லேட்டர் இணைதளம்.
எளிமையாக உள்ள இந்த தளத்தில் மேல் பக்கத்தில் மொழிபெயர்க்க விரும்ப்பும் வரிகளை டைப் செய்து விட்டு, கீழே உள்ள பட்டியலில் இருந்து மொழிபெயர்க்கப்பட வேண்டிய மொழியை தேர்வு செய்து கொள்ளலாம். அவ்வளவு தான் மொழிபெயர்ப்பு முடிந்தது. ஆனால் நீளமான பத்திகளுக்கு எல்லாம் பொருத்தமாக இருக்காது. சின்ன சின்ன வாசகங்கள் என்றால் சரியாக இருக்கும். ஒரே நேரத்தில் பல மொழிகளிலும் மாற்றிக்கொள்ளலாம். மிக எளிமையான சேவை; ஆனால் பயன்மிக்கது.
கூகுள் மொழிபெயர்ப்பு வசதியை அடிப்படையாக கொண்டு இந்த சேவை உருவாக்கப்பட்டுள்ளது.

இணையதள முகவரி: http://translatr.varunmalhotra.xyz/

——-

வீடியோ புதிது: புளுடோனியம் அறிவோம்
science-elements
புளுடோனியம் தான் உலகின் ஆபத்தான தனிமம் என்று கருதப்படுவது உங்களுக்குத்தெரியுமா? மற்ற தனிமங்கள் கண்டுபிடிக்கப்பட்டவை என்றால், புளுடோனியம் மனிதர்களால் உருவாக்கப்பட்டவை. கதிரியக்க செயல்பாடால் கண்டறியப்பட்டது என்பதால் அது ஆபத்தானது. அது கதிரியக்க தன்மை கொண்டது. புளுடோனியத்தை சாதாரண ஆய்வுக்கூடத்தில் வைத்திருக்க முடியாது.; அதற்கென வடிவமைக்கப்பட்ட ஆய்வுக்கூடத்தில் தான் வைக்க முடியும். புளுடோனியத்தை நேரில் பார்ப்பது சாத்தியமில்லை. புளுடோனியம் பற்றி இப்படி இன்னும் பல சுவாரஸ்யமான தகவல்களை வழங்குகிறது ரியல் புளுடோனியம் வீடியோ. ஆர்வத்தை தூண்டும் ஆவணப்பட பாணியில் அமைந்துள்ள இந்த வீடியோவை பார்த்து பல பயனுள்ள தகவல்களை தெரிந்து கொள்ளலாம். புளுடோனியம் பற்றி மட்டும் அல்ல, பீரியாடிக் டேபிள் எனப்படும் தனிப அட்டவனையில் உள்ள ஒவ்வொரு தனிமம் பற்றிய வீடியோக்களையும் இதன் பின்னே உள்ள யூடியூப் சேனலில் பார்க்கலம்;

வீடியோவைக்காண: https://www.youtube.com/watch?v=89UNPdNtOoE

நன்றி; தமிழ் இந்துவில் எழுதியது

emford

இணைய விஷமிகளும் வீடியோ பதிலடியும்

இணையம் அற்புதமான அனுபவங்களை தரக்கூடிய அருமையான இடம் தான். ஆனால் எல்லா நேரங்களிலும் இப்படி இருப்பதில்லை. சில நேரங்களில் மனங்கொத்திப்பறவைகளாக மாறும் மனிதர்கள் பகிர்ந்து கொள்ளும் கருத்துக்கள் இதயத்தை நொறுக்கிவிடக்கூடியதாக அமைந்துவிடுகின்றன. டிரால்கள் என சொல்லப்படும் இந்த இணைய விஷமிகள் தனியேவும் தாக்குதல் நடத்துவதுண்டு; குழுவாக சேர்ந்துக்கொண்டு கூட்டுத்தாக்குதல் நடத்துவதும் உண்டு. எப்படி இருந்தாலும் தாக்குதலுக்கு இலக்காகும் அப்பாவிகளுக்கு இதனால் ஏற்படக்கூடிய மன உளைச்சல்களும் பாதிப்புகளும் எல்லையில்லாதது. இதனால் பலர் தூக்கத்தை இழந்து தவித்துள்ளனர். சிலர் இணையத்தில் இருந்து வெளியேறியுள்ளனர். இணையத்தின் இருண்ட பக்கத்திற்கான இந்த கசப்பான உதாரணங்கள் நீண்டு கொண்டே இருக்கின்றன.

லண்டனைச்சேர்ந்த இளம் பெண்ணான எம் ஃபோர்ட் அன்மையில் இந்த வகையான கசப்பான அனுபவத்திற்கு இலக்கான போது இணைய விஷமிகளுக்கு பதிலடி தரும் வகையில் வீடியோ ஒன்றை உருவாக்கி பதிவேற்றினார். சபாஷ் சரியான பதிலடி என பாராட்டப்படும் அந்த வீடியோ இணையத்தில் வைரலாக பரவி 60 லட்சம் முறைக்கு மேல் பார்த்து ரசிக்கப்பட்டுள்ளது. அதைவிட முக்கியமாக அந்த வீடியோ இணைய தாக்குதலுக்கு இலக்காக கூடிய எவருக்கும் நம்பிக்கையையும் துணிச்சலையும் தரக்கூடியதாக இருக்கிறது.

எம் போர்ட் பற்றி முதலில் ஒரு சிறு குறிப்பு. மாடலிங் துறையில் இருந்துள்ள அவர் 20 வயதிலேயே அதிலிருந்து ஓய்வு (!) பெற்று திரைப்பட உருவாக்கத்தின் பக்கம் வந்தவர். தன்னை இயல்பான கதை சொல்லி என குறிப்பிடும் இவர் 2014 க்கு பிறகு வீடியோ வலைப்பதிவாளராகி யூடியூப் நட்சத்திரமாக பிரபலமானார். மை பேல் ஸ்கின் எனும் அந்த வலைப்பதிவு மூலம் அவர் அழகு கலை குறிப்புகளை பகிர்ந்து கொண்டு வருகிறார்.

சில மாதங்களுக்கு முன்னர் போர்ட் மேக்கப் இல்லாத தோற்றத்தில் தனது புகைப்படத்தை இணையத்தில் பதிவேற்றினார். முகப்பருக்களுடன் தோன்றும் அந்த புகைப்படத்தில் இயல்பாக காட்சி தருவதற்காக அவர் பாராட்டப்பட்டிருக்க வேண்டும். ஆனால் அதற்கு மாறாக இணைய வெளியில் வறுத்தெடுக்கப்பட்டார். மேக்கப் இல்லாத கோலத்திற்காகவும் ,முகப்பரு தோற்றத்திற்காகவும் அவர் கடுமையாக வசைபாடப்பட்டார். இவரது முகத்தை நேராக பார்க்க கூட முடியவில்லை, இவர் முகத்தை கழுவவே மாட்டாரா? என்பது போல மிக மோசமான வகையில் கருத்துக்கள் அமைந்திருந்தன. இது போல ஆயிரக்கணக்கில் கருத்துக்கள் குவிந்தன. இந்த கருத்துக்களை படிக்க கூட வேண்டாம், பார்த்தாலே மனதை வலிக்கச்செய்யும் வகையில் இருந்தன.

இவற்றை தொடர்ச்சியாக படித்துக்கொண்டிருந்த போர்ட் எந்த அளவுக்கு வேதனைக்கு ஆளாகியிருப்பார் என புரிந்து கொள்ளலாம். ஆனால் அவர் கண்ணீர் வீட்டு கதறவில்லை; ஆவேசமாக பதில் தாக்குதல் நடத்தவில்லை. இந்த வேதனையை மற்றவர்களுக்கும் குறிப்பாக , வசைபாடியவர்களுக்கு உணர்த்தும் வகையில் ஒரு வீடியோ படத்தை உருவாக்கினார். முகப்பரு கோலத்துடன் அவர் காட்சி அளிக்கும் அந்த வீடியோவில், அதைப்பார்த்து தெரிவிக்கப்பட்ட கருத்துக்கள் வரிசையாக வாசகங்களாக இடம்பெற்றன. அந்த கருத்துக்களால் ஏற்படக்கூடிய வலியை அவரது முகபாவனைகள் உணர்த்தின. அதன் பிறகு அவர் மேக்கப் சாதானங்கள் மூலம அழகு செய்து கொண்டார். அப்போது அவரது அழகை பாராட்டும் வகையிலான கருத்துக்கள் திரையில் தோன்றின. ஆனால் அதன் பிறகு எல்லாவற்றுக்கும் மேக்கப் தான் காரணம், அழகில்லாத தோற்றத்தை மறைக்கிறார் என்பது போல மோசமான கருத்துக்கள் தோன்றின. அப்போது அவரது முகத்தில் கண்ணீர் வழிகிறது. இதை பார்க்கும் போது பார்வையாளர்கள் நெஞ்சமும் உலுக்கப்படுகிறது.

இறுதிக்காட்சியில் அவர் கண்களை துடைத்துக்கொள்கிறார். அப்போது ,நீங்கள் அழகாக இருக்கிறீர்கள் எனும் வாசகம் திரையில் தோன்றுகிறது. உங்கள் அழகை மற்றவர்கள் தீர்மானிக்க அனுமதிக்காதீர்கள் எனும் ஊக்கமான வரிகளுடன் இந்த வீடியோ முடிவடைகிறது.
சமூக ஊடகங்கள் உண்டாகும் மிதமிஞ்சிய எதிர்பார்ப்பின் பாதிப்பு பற்றி உணர்த்துவதற்காக இந்த வீடியோவை உருவாக்கியதால் போர்ட் கூறியிருக்கிறார்.
நீங்கள் அருவறுப்பாக இருக்கிறீர்கள் (YOULOOKDISGUSTING ) எனும் தலைப்பிலான வீடியோ மூலம் அவர் மற்றவர்கள் தோற்றத்தை விமர்சிப்பவர்களுக்கு எல்லாம் அழகாக பதிலடி கொடுத்திருப்பதாக பாராட்டப்படுகிறார்.

எம் போர்ட் உருவாக்கிய வீடியோ: http://mypaleskin.blogspot.com.au/2015/07/you-look-disgusting.html#.VZt_7bV6fCP

silicon
தளம் புதிது; சிலிக்கான் அகராதி

இணைய அகராதிகளுக்கு குறைவில்லை. ஆங்கில அகராதிகளும் அநேகம் இருக்கின்றன. தமிழ் அகராதிகளும் இருக்கின்றன. இப்போது புதிதாக ஒரு இணைய அகராதி உருவாகி இருக்கிறது- சிலிக்கான் வேலி டிக்‌ஷனரி!
சிலிக்கான் வேலி எல்லோருக்கும் தெரியும். தொழில்நுட்ப நிறுவனங்களின் இருப்பிடம் இது. சிலிக்கான் வேலிக்கு என்று பிரத்யேக கலாச்சாரம் உண்டு. அதற்கென தனி மொழி பிரயோகங்களும் உண்டு. இப்படி சிலிக்கான் வேலியில் புழங்கும் வார்த்தைகளுக்கும் , பதங்களுக்கும் பொருள் சொல்லும் அகராதியாக இந்த தளம் விளங்குகிறது. அப்படியே அகராதி நோக்கிலான விளக்கம் என்று சொல்வதற்கில்லை. கொஞ்சம் கேலியும், கிண்டலும் கலந்து சற்றே விமர்சன ரகமாக இவை அமைந்துள்ளன. ஆனால், ரசிக்கும்படி இருக்கிறது.

இணையதள முகவரி: http://svdictionary.com/



செயலி புதிது; அலர வைக்கும் அலாரம்

ஸ்மார்ட்போனுக்குள் இருந்தபடி துயிலெழுப்ப உதவும் அலாரம் செயலிகள் தான் எத்தனை வகை. இப்போது அலார்மி எனும் புதியதொரு அலாரம் செயலியும் சேர்ந்திருக்கிறது. உலகிலேயே மிகவும் எரிச்சலுட்டக்கூடிய துயிலெழுப்பும் செயலி என இது தன்னை வர்ணித்துக்கொள்கிறது.
இந்த அலாரம் செயலி தினமும் காலையில் துயிலெழுப்பும் நேரத்திற்கு சரியாக ஒலிக்கும். அந்த வகையில் இது மற்ற செயலிகள் போன்றது தான். ஆனால் இது ஒலிக்கத்துவங்கிய பின் இதை சாதாரணமாக நிறுத்திவிட முடியாது. போனில் ஒரு புகைப்பட்த்தை எழுத்து பதிவேற்றிய பிறகு தான் இது மெளனமாகும். அதுவும் எப்படி தெரியுமா? அலாரமை அமைக்கும் போது நீங்கள் தேர்வு செய்து புகைப்படமாக சமர்பித்த இடத்திற்கு சென்று படமெடுத்தால் தான் இதை நிறுத்த முடியும். அது வரை கத்திக்கொண்டே இருக்கும்- அதனால் அதான் எரிச்சலூட்டும் செயலி என்கிறது. பொறுப்பாக அலாரம் வைத்துவிட்டு அதைவிட பொறுப்பாக அதை அனைத்து விட்டு தூங்கி விடுபவர்களுக்காக உருவாக்கப்பட்டுள்ளது.
ஆண்ட்ராய்டில் தரவிறக்கம் செய்ய: https://play.google.com/store/apps/details?id=droom.sleepIfUCan&feature=search_result#?t=W251bGwsMSwxLDEsImRyb29tLnNsZWVwSWZVQ2FuIl0.

யூடியூப் ரகசியம்

டிவியையே கூட கம்ப்யூட்டர் மானிட்டராக மாற்றிக்கொள்ளும் வசதி வந்துவிட்டது. ஆனால் கம்ப்யூட்டர் மானிட்டருக்கு பழக்கப்பட்டவர்களுக்கு டிவி திரையில் மெனுவை பார்த்து பயன்படுத்துவது சிக்கலாக இருக்கலாம். ஆனால் டிவி திரையில் யூடியூப் வீட்டியோக்களை பார்க்க விரும்பினால் இந்த பிரச்சனைக்கு சுலபமான தீர்வு இருக்கிறது. https://www.youtube.com/tv#/browse-sets?c=FEwhat_to_watch எனும் முகவரிக்கு சென்று டிவிக்கு பொருத்தமான இடைமுகத்தை தேர்வு செய்து பயன்படுத்தலாம்.

கேட்ஜெட் புதிது; கம்ப்யூட்டர் ஸ்டிக்
சிப் தயாரிப்பில் பிரபலமாக இருக்கும் இண்டெல் நிறுவனம் தனது பிசி ஆன் எ ஸ்டிக் சாதனத்தை இந்தியாவில் அறிமுகம் செய்துள்ளது. பெண்டிரைவ் போல இருக்கும் இந்த சாதனத்தை டிவி திரை அல்லது மானிட்டருடன் இணைத்து கம்ப்யூட்டர் போல பயன்படுத்திக்கொள்ளலாம். சேமித்திறன், வை-பை வசதி என எல்லாமும் இருக்கிறது. லேப்டாப் போல எங்கும் பயன்படுத்தலாம், ஆனால் பாக்கெட்டில் போட்டுக்கொண்டு சென்று விடலாம். மின் வணிக தளம் மூலம் வாங்கலாம் என இண்டெல் நிறுவனம் தெரிவித்துள்ளது.

நன்றி; தமிழ் இந்துவில் எழுதியது. +

இணைய வரைபடமும், துணி துவைக்கும் ரோபோ மீனும் !


இது தான் இணைய வரைபடம்

இணையத்தில் தொடர்புடைய எல்லா சாதங்களையும் ஒரே வரைபடத்தில் கொண்டு வந்திருக்கிறார் அமெரிக்க சாப்ட்வேர் வல்லினரான ஜான் மேத்ர்லி. அதாவது இண்டெநெர் இணைப்பு கொண்டிருக்கும் எல்லா சாதனங்களையும் அவர் உலக வரைப்டத்தில் புள்ளிகாளாகி காட்டியிருக்கிறார். பல வண்ண புள்ளிகளுடன் மின்னும் அந்த படத்தை பார்த்தாலே உலகின் எந்த பகுதிகளில் இணைய இணைப்பு கொண்ட சாதனங்கள் இருக்கின்றன என்று தெரிந்து கொள்ளலாம். சிவப்பு புள்ளிகள் அதிக அடர்த்தியை குறிக்கும். நீல புள்ளிகள் குறைவான எண்ணிக்கையை குறிக்கின்றன. இணையத்துடன் இணைகக்ப்பட்ட சாதனங்களுக்கு எல்லாம் கோரிக்கை அனுப்பி தகவல் திரட்டி இந்த வரைபடத்தை உருவாக்கி இருக்கிறார். இந்த வரைபடத்தை வருங்காலத்தில் அப்டேட் செய்யும் எண்ணமும் இருப்பதாக சொல்லி இருக்கிறார்.
மேதர்லி சாதாரண நபர் இல்லை. ஷோடன் எனும் தேடியந்திரத்தை அவர் நடத்தி வருகிறார். உலகிலேயே திகிலூட்டும் தேசியந்திரம் என இது வர்ணிக்கப்படுகிறது. இணையம் மூலம் எவரும் தொடர்பு கொண்டு ஹேக் செய்து விடக்கூடிய வெப்கேம்களையும் , இதர சாதனங்களையும் தேடி அடையாளம் காட்டுகிறது இந்த தேடியந்திரம். ஆனால் இந்த சேவை தவறான பயன்பாட்டிற்கானது அல்லது, இணைய பாதுகாப்பு பற்றிய விழிப்புணர்வுக்கானது என்கிறார் மேதர்லி.

மேதர்லியின் இணைய வரைபடம் ; https://imgur.com/aQUHzgu

ஷோடன் தேடியந்திரம்; http://www.shodanhq.com/

*****

அமிதாப்புக்கு 15 மில்லியன் லைக்ஸ்

பாலிவுட் நட்சத்திரம் அமிதாப் பச்சனுக்கு 71 வயதானாலும் கூட இணையம் மற்றும் சமூக ஊடகங்களை பயன்படுத்துவதில் இளைஞனுக்குரிய உற்சாகத்தை வெளிப்படுத்தி வருகிறார். அதன் பயனாக அமிதாப் பேஸ்புக்கில் ஒரு மைல்கல்லை தொட்டுள்ளார். ஆம் பேஸ்புக்கில் அவருக்கு 15 மில்லியன் லைக்ஸ் கிடைத்துள்ளன. இது பற்றி அமிதாப் தனது டிவிட்டர் பக்கத்தில் குறிப்பிட்டு ரசிகர்களுக்கு நன்றி தெரிவித்துள்ளார்.
அதிக பேஸ்புக் லைக் பட்டியலில் இந்திய நட்சத்திரங்களில் சல்மான் கான் தான் முன்னிலையில் இருக்கிறார் ( 19,143,677 லைக்ஸ்). ஆனால் அமிதாப்பிற்கு டிவிட்டரில் பாலோயர்கள் அதிகம் ( 9.85 மில்லியன்).

*****

ஒரு பேராசிரியரின் பெருந்தன்மை

2-marybeardjpg_2857755b
பிரபலங்கள் துவங்கி சாதாரண இணையவாசிகள் வரை இணையத்தில் பலரும் சீண்டலுக்கும் தாக்குதலுக்கும் இலக்காவது தொடந்ந்து கொண்டு தான் இருக்கிறது. இந்த சீண்டல்கள் சில நேரங்களில் எல்லை மீறிச்சென்று விடுதலால் அதற்கு இலக்கானவர்கள் மனம் வெதும்பி இணையத்தில் இருந்தே விலகிச்சென்றிருக்கின்றனர். சிலர், விஷமத்தனமாகவும் ,துவேஷமாகவும் கருத்து தாக்குதல் நடத்தியவர்களுக்கு பாடம் புகட்டுவதற்காக பதிலடி கொடுக்க முறப்பட்டதும் உண்டு. ஆனால் கேம்பிர்ட்ஜ் பல்கலைக்கழக பேராசிரியர் மேரி பியரட் தன் மீது ஆவேச தாக்குதல் நடத்திய வாலிபரை மன்னித்து அவர் மனதையும் மாற்ற வைத்திருக்கிறார்.
கடந்த ஜூலை மாதம் ஆலிவர் ராலிங்ஸ் எனும் 20 வயது வாலிபர் ,பேராசிரியர் பியர்ட்டின் ஒரு கருத்துக்கு எதிர்ப்பு தெரிவிக்கும் வகையில் அவர் மீது மோசமான தாக்குதலை தொடுத்திருந்தார். ’வயதான கிழமே வாயை மூடு முதலில் .. என கூறியிருந்தவர் அதன் பிறகு மிக மோசமான கருத்தையும் கூறியிருந்தார். இதனால் வெறுத்துப்போன பேரசிரியர் தனது டிவிட்டர் பக்கதில் இது பற்றி தெரிவித்திருந்தார். டிவிட்டரில் அவருக்கு 42,000 பாலோயர்கள் இருந்தனர். அவர்களில் பெரும்பாலானோர் இந்த கருத்தை ரீடிவீட் செய்து வாலிபர் ராலிங்சிற்கு கண்டனம் தெரிவித்தனர். ஒரு சிலர் ராலிங்க்ஸ் வீட்டு முகவரியை கண்டுபிடித்து தருகிறோம் அவன் அம்மாவிடம் இது பற்றி முறையிடுங்கள் என்றும் சொல்லியிருந்தனர்.
இணைய உலகமே ராலிங்கிஸிற்கு எதிராக பொங்கியது எனலாம். ஆனால் பேராசியரோ பின்னர் ரேடியோ பேட்டி ஒன்றில், அந்த வாலிபரை மன்னித்து விட்டதாகவும் வாய்ப்பு கிடைத்தால் அவரை நேரில் சந்தித்து , இது போல இனி செய்யக்கூடாது என அறிவுரை சொல்லவும் விரும்புவதாக தெரிவித்தார்.
சொன்னது போலவே ,பேராசிரியர் ராலிங்சை சந்தித்து பேசியிருக்கிறார். அப்போது ராலிங்க்ஸ் பேராசிரியரிடம் தன் செயலுக்காக மன்னிப்பு கேட்டதுடன் தொர்ந்து இமெயில் மூலம் கருத்து பரிமாற்றம் செய்து கொள்ளும் அளவுக்கு இருவரும் நட்பாகி இருக்கின்றனர்.
அது மட்டும் அல்ல, பேராசிரியர் பியர்ட் அந்த வாலிபருக்கு வேலைவாய்ப்புக்கான பரிந்துரையும் செயதிருக்கிறார்.
எப்போது கூகிளில் ராலிங்க்ஸ் பற்றி தேடினாலும் இந்த சம்பவம் பற்றிய தகவல்கள் வந்து நின்று அவனது வேலைவாய்ப்பை பாதிக்க்கப்போகிறது. ஒரு நிமிட மடத்தனத்தால் அவனது வாழ்க்கை பாழாக வேண்டுமா? என்று பேராசிரியர் இது தொடர்பாக நியூயார்கர் பத்திரிகை பேட்டியில் குறிப்பிட்டுள்ளார்.

*****

விண்ணில் இருந்து ஒரு லைவ் பேட்டி!
2stronaut_3014794b
சமூக வலைப்பின்னல் சேவையான பேஸ்புக்கில் பிரபலங்களுடனான கேள்வி பதில் பகுதி மிகவும் பிரபலமானது. அதாவது பிரபலங்கள் பேஸ்புக் வாயிலாக பயனாளிகளின் கேள்விகளுக்கு பதில் அளிப்பார்கள். சில வாரங்களுக்கு முன் பெண் கல்வி போராளியான பாகிஸ்தான் இளம்பெற் மலாலா இதில் பங்கேற்றார்.
இந்நிலையில் பேஸ்புக்கில் முதல் முறையாக விண்ணில் இருந்து கேள்வி பதில் நிகழ்ச்சி நடத்தப்பட்டுள்ளது. விண்வெளியில் இருக்கும் சர்வதேச விண்வெளி ஆய்வு மையத்தில் வசிக்கும் விண்வெளி வீரர் அலக்சாண்டர் ஜெர்ஸ்ட் ( Alexander Gerst ) இதன் மூலம் விண்வெளியில் இருந்து கேள்விகள்க்கு பதில் அளித்தார்.
ஒவ்வொரு முறை விண்கள ஜன்னலில் இருந்து எட்டிப்பார்த்து பூமியை பார்க்கும் போது கண்ணில் நீர் வந்துவிடுகிறது என ஜெர்ஸ்ட் ஒரு கேள்விக்கு பதில் அளிக்கும் போது கூறினார். பூமியை மேலிருந்து பார்ப்பது அற்புதமான அனுபவம் என்று கூறியவர் , நான் நினைத்ததை விட அது மிகவும் சிறியதாக இருக்கிறது, ஒரே நேரத்தில் தென் அமெரிக்கா, ஆஸ்திரேலியா மற்றும் ஆப்பிரிக்காவை எல்லாம் ஒரே நேரத்தில் பார்க்க முடிகிறது என்றும் கூறிருந்தார். விண்வெளியில் வேலை பார்க்கும் விண்வெளி வீரர்கள் தினமும் 12 மணீ நேரம் பணியாற்றுவதாகவும் ஒரு மணி நேரம் குடும்பத்துடன் பேசவும், மெயில் அனுப்பவும் கிடைப்பதாக அவர் கூறியிருந்தார். நவம்பரில் பூமிக்கு திரும்ப உள்ள ஜெர்ஸ்ட் விண்ணில் இருந்து பூமியை பார்க்கும் அற்புத அனுபவத்தை தான் மிஸ் செய்ய வேண்டிருக்கும் என்று கூறியுள்ளார். இருந்தாலும் மழையில் நனைவது , காட்டில் மரங்களுக்கு நடுவே சுற்றுவது போன்ற பூமி தரும் சுகங்களுக்கு ஈடில்லை என்றும் கூறியுள்ளார்.

*****

ஆண்ட்ராய்டுக்கு சீனா பதிலடி

இணையத்தை பொருத்தவரை சீனாவின் வழி தனி வழி தான். உலகமே தேடியந்திரம் என்றாலே கூகிள் என்று நினைத்துக்கொண்டிருந்தாலும் சீனாவில் பெய்டு தான் தேடியந்திர ராஜா. அதே போல குறும்பதிவு சேவையாட ட்விட்டருக்கு நிகரான சீனாவில் வெய்போ குறும்பதிவு சேவை செல்வாக்கு பெற்றிருக்கிறது. மின்வணிகத்தை பொருத்தவரை அலிபாபா தான் சீனத்து அமேசான். இப்போது சீனா , ஓப்பரேட்டிங் சிஸ்டத்திலும் தனக்கான தனி வழியை நாட முடிவு செய்திருக்கிறது.
இணைய உலகில் பிரபலமாக இருக்கும் மைரோசாப்டின் விஸ்டோஸ் மற்றும் மொபைல் உலகில் ஆதிக்கம் செலுத்தும் ஆண்டராய்டுக்கு போட்டியாக உள்நாட்டில் உருவான ஆப்பரேட்டிங் சிஸ்டத்தை அறிமுகம் செய்ய சீனா தீர்மானித்துள்ளது. அடுத்த மாதம் இந்த ஆப்பரேடிங் சிஸ்டம் அறிமுகமாக இருக்கிறது. முதல் டெஸ்க்டாப் கம்ப்யூட்டர்களிலும் அதன் பிறகு ஸ்மார்ட்போன்களிலும் இந்த ஓ.எஸ் பயன்பாட்டிற்கு வரலாம் என கூறப்படுகிறது.
மார்ச் மாதம் இதற்கான சாப்ட்வேர் கூட்டு ஏற்படுததப்பட்டதாக சீன செய்தி நிறுவனம் தெரிவித்துள்ளது.
சீனாவின் சுயசார்பு தணிக்கை சார்ந்த்தாகவும் இருக்கிறது. எனவே தான் வெளிநாட்டு நிறுவனங்கள் ஆதிக்கம் தனது இணைய சந்தையில் ஆதிக்கம் செலுத்துவதை அது விரும்பவில்லை. சாப்ட்வேர் மூலம் அமெரிக்கா உளவு பார்ப்பதாகவும் சீனா குற்றம்சாட்டுகிறது.
ஓ.எஸ் தொடர்பான் இன்னொரு செய்தி, மைரோசாப்ட் விண்டோசின் அடுத்த வடிவமான விண்டோஸ் 9.0 செப்டம்பர் 30 ந் தேதி அறிமுகமாக இருப்பதாக சொல்லப்படுகிறது. தெர்ஷ்ஹோல்ட் எனும் கோட்நேம் கொண்ட இந்த வடிவில் விண்டோஸ் 8 ல் சொல்லப்பட்ட குறைகள் எல்லாம் நீக்கப்பட்டிருக்கலாம் என்றும் சொல்லபடுகிறது.

*****

சுயபட சர்ச்சைக்கு சுவையான முடிவு
2macaca_nigra_selfie
சுயபடம் (selfie.) என்பது சுயம்புவான படமாகவே கருப்பட வேண்டும் என அமெரிக்க காப்புரிமை அலுவலகம் தெரிவித்துள்ளது. இந்த முடிவு சுயபட காப்புரிமை தொடர்பான சர்ச்சைக்கான தீர்ப்பாகவும் அமைந்துள்ளது. நிச்சயம் இந்த கருத்து புகைப்பட கலைஞர் டேவிட் ஸ்லேட்டருக்கு ஏமாற்றத்தையே அளித்திருக்கும். அவர் தான் இந்த சுயபட சர்ச்சையின் மையத்தில் இருப்பவர். இல்லை, இந்த சர்ச்சையின் மையமாக இருப்பது ஒரு குரங்கு எடுத்த புகைப்படம். அந்த புகைப்படம் தனக்கு சொந்தமானது என்னும் உரிமையை நிலை நாட்ட ஸ்லேட்டர் போராடி வருகிறார்.
குரங்கு எடுத்த படத்திற்காக ஸ்லேட்டர் எப்படி உரிமை கொண்டாடலாம் ? இந்த கேள்வி தான் சர்ச்சையின் சுவாரஸ்யமே.
விஷயம் இது தான். பிரிட்டனைச்சேர்ந்த வனவிலங்கு புகைப்பட கலைஞரான டேவிட் ஸ்லேட்டர் 2011ல் இந்தோனேசியாவின் சுலாவேசி தீவுகளில் அங்குள்ள மாகாவு (macaque ) ரக குரங்குகளை படமெடுத்துக்கொண்டிருந்தார். அப்போது குரங்கு ஒன்று அவரது காமிராவை பறித்துக்கொண்டு சென்று அதை வைத்து கிளிக்கி தள்ளியது. இப்படி குரங்கு எடுத்த படங்களில் சுயபடமும் ஒன்று. அதாவது தன்னைத்தானே எடுத்துக்கொண்ட் புகைப்படம். குரங்கு காமிராவை பார்த்து சிரிப்பது போன்ற அந்த படம் பத்திரிகைகளில் வெளியாகி தலைப்புச்செய்தியானது.
அந்த படம் தான் ஸ்லேட்டருக்கு தலைவலியாகவும் மாறியது. அந்த புகைப்படத்தை ஆன்லைன் களஞ்சியமான விக்கிபீடியாவை நிர்வாகிக்கும் விக்கிமீடியா தனது புகைப்படங்கள் பகுதியில் இடம்பெற வைத்தது. இங்குள்ள படங்கள் எல்லாமே காப்புரிமை இல்லாதவை என்பதால் யார் வேண்டுமானாலும் பயன்படுத்தலாம்.
ஆனால் ஸ்லேட்டர், தனது காமிராவில் எடுக்கப்பட்ட அந்த புகைப்படம் தனக்கு சொந்தமானது என கருதுகிறார். அந்த படத்தை எல்லோரும் பயன்படுத்த அனுமதிப்பதால் தனது வருமானம் பாதிப்பதாகவும் ஆகவே அந்த புகைப்படத்தை தளத்தில் இருந்து நீக்க வேண்டும் என்றும் ஸ்லேட்டர் விக்கிமீடியாவிடம் கோரிக்கை வைத்தார்.
விக்கிமீடியா இதை ஏற்க மறுத்துவிட்டது. குரங்கு எடுத்த சுயபடத்திற்கான காப்புரிமை ஸ்லேட்டருக்கு உரியது அல்ல எனவே படத்தை காப்புரிமை இல்லாததாகவே கருதுவோம் என கூறிவிட்டது.
விக்கிமீடியா டெக்னிக்கலாக பேசுகிறது, காமிரா விசையை அழுத்தியதை தவிர இதில் பல விஷயங்கள் இருக்கின்றன, இதை நீதிமன்றம் தான் முடிவு செய்ய வேண்டும் என்று ஸ்லேட்டர் சொல்கிறார்.
காமிரா தன்னுடையது என்பதால் அதில் குரங்கு எடுத்த சுயபடமும் தனக்கு உரிமையானது என்பது அவரது வாதம்.
இந்நிலையில் அமெரிக்க காப்புரிமை அலுவலகம் சமீபத்தில் வெளியிட்டுள்ள அறிக்கையில் குரங்கு எடுத்த சுயபடம் ,யானை வரைந்த ஓவியம் போன்றவை எல்லாம் காப்புரிமை பெற முடியாதவை என கூறியுள்ளது.
ஆக குரங்கு எடுத்த சுயபடம் யாருக்கும் சொந்தமில்லாதது!.

*****

துணிகளை சுத்தமாக்கும் ரோபோ மீன்.

2lectroluxdesignlab_
கொரியாவை சேர்ந்த வடிவமைப்பாளர் ஒருவர் ரோபோ மீன்கள் கொண்டு துணிகளை சுத்தமாக்கும் வஷிங் மிஷினை உருவாக்கி வியக்க வைத்திருக்கிறார். இந்த ரோபோ மீன்கள் துணியின் உள்ள அழுக்கை எல்லாம் உறிஞ்சி எடுத்துவிடும் என்பதால் சலவைத்தூள் இல்லாமலே துணி துவைத்து விடலாம் .
சான் யோப் ஜியோங் (Chan Yeop Jeong. ) எனும் அந்த வடிவமைப்பாளர் உருவாக்கி உள்ள வாஷிங் மெஷினின் பெயர் பெசிரா. இது பார்த்தற்கு வாஷிங்மெஷின் போல இல்லாமல் அழகிய மீன் தொட்டி போல இருக்கும். இந்த தொட்டியில் உள்ள தண்ணீரில் டோஃபி ( Dofi) எனும் குட்டி ரோபோ மீன்கள் நீந்திக்கொண்டிருக்கும்.
இந்த ரோபோ மீன்கள் தான் ,துணிகளில் உள்ள அழுக்குகளை எல்லாம் உறிஞ்சி எடுத்து விடுகிறது. ரோபோ மீன்களில் கண்கள் போல பொருத்தப்பட்டுள்ள காமிரா மூலம் துணிகளில் உள்ள அழுக்கை கண்டுபிடித்து செயல்படுகிறது.
மனிதர்கள் கால்களில் உள்ள அழுக்குகளை உணவாக கொண்டு தூய்மையாக்கும் டாக்டர் பிஷ் என்று சொல்லப்படும் காரா ருஃபா ( Garra rufa) மீன்களை அடிப்படையாக கொண்டு இந்த துணிகளை சுத்தமாக்கும் ரோபோ மீன்களுக்கான எண்ணம் பிறந்ததாக வடிவமைப்பாளர் ஜியோங் சொல்கிறார்.
எலக்ட்ரோலக்ஸ் நிறுவனம் நடத்திய புதுமையான வாஷிங் மிஷின் வடிவமைப்பு போட்டிக்காக இந்த ரோபோ மீன் ஐடியாவை அவர் சமர்பித்திருக்கிறார்.
இந்த முறையில் சலவைத்தூளும் தேவை கிடையாது என்கிறார் ஜியோங். ரோபோ மீன் துணிகளை சுத்தமாக்கி தருவதோடு தொட்டியில் உள்ள தண்ணீரையும் சுத்தமாகவே வைத்திருப்பதால் நீரை மீண்டும் பயன்படுத்தலாம் என்கிறார்.
ஆக இந்த எந்திரம் சுற்றுச்சூழலுக்கு நட்பானது என்கிறார். எலக்ட்ரோலக்ஸ் டிசைன்லேப் தளத்தில் இந்த ரோபோ மீன் பற்றிய விரிவான விவரங்கள் மற்றும் அவை செயல்படும் விவரங்கள் வீடியோவுடன் இடம்பெற்றுள்ளன.
மீன் தொட்டி வடிவில் இருப்பதால் இதை வீட்டில் எந்த பகுதியில் வேண்டுமானாலும் வைத்திருக்கலாம் என்று குறிப்பிடப்பட்டுள்ளது. அதோடு இதில் துணி துவைக்கும் அழகை பார்த்து கொண்டே இருக்கலாமாம்.
இப்போதைக்கு சிறந்த வடிவமைப்பு கருத்தாக்கமாக மட்டுமே இது இருக்கிறது. இந்த ரோபோ மீன் துணி துவைக்க, அதாவது தயாரிப்புக்கு எப்போது வரும் என்று தெரியவில்லை.
ரோபோ மீன் துணை துவைப்பதை பார்க்க: http://electroluxdesignlab.com/2014/development-blog/chan-yeop-jeong/
——

நன்றி; விகடன்.காம்