Tag Archives: user

menu

விண்டோசில் ஸ்டார்ட் மெனு பிறந்த கதை

விண்டோஸ் 10 இயங்குதளம் பற்றியும் அதன் பல்வேறு அம்சங்கள் பற்றியும் இணைய உலகில் பரபரப்பாக பேசப்பட்டு வருகின்றன. பரவலாக எதிர்பார்க்கபட்ட புதிய பிரவுசர் எட்ஜ், டிஜிட்டல் உதவியாளர் கார்ட்னா ஆகிய அம்சங்களோடு, ஸ்டார்ட்மெனு வசதி அதன் பழைய வடிவில் விண்டோசுக்கு திரும்பியிருப்பதும் முக்கியமாக குறிப்பிடப்படுகிறது.

ஸ்டார்ட்மெனு வசதி விண்டோஸ் 95 –ல் முதலில் அறிமுகமானது.அதன் பிறகு கிட்டத்தட்ட விண்டோஸ் இயங்குதளத்தின் அடையாள அம்சமாகவே மாறிவிட்டது. கோடிக்கணக்கான விண்டோஸ் பயனாளிகளை பொறுத்தவரை ஸ்டார்ட்மெனு என்பது விண்டோசுக்கான நுழைவு வாயில் போன்றது தான். பழக்கமான வீட்டில் வாசல் கதவைத்திறந்து கொண்டு உள்ளே நுழைந்து ஒவ்வொரு அறையாக இயல்பாக செல்வது போல விண்டோசில் ஸ்டார்ட்மெனுவை வரவைத்து தாங்கள் விரும்பிய புரோகிராம்களையும், ஆவணங்களையும் எளிதாக அணுகுவதி பயனாளிகளுக்கு சாத்தியமானது. எத்தனை பேர் ஸ்டார்ட்மெனுவின் முக்கியவத்துவத்தை உணர்ந்திருப்பார்கள் என்று தெரியவில்லை. ஆனால், பயனாளிகளுக்கு நட்பான இயங்குதளம் என பாராட்டப்படும் விண்டோசுக்கு அந்த பெருமையை பெற்றுத்தந்ததில் ஸ்டார்ட்மெனு அம்சத்திற்கு கணிசமான பங்கு இருக்கிறது.
1993 முதல் மாறாமல் இருக்கும் இந்த அம்சத்தில் சின்னதாக புரட்சி செய்வதாக நினைத்து விண்டோஸ் 8-ல் மைக்ரோசாப்ட் கையை வைத்து ஸ்டார்ட் ஸ்கிரீன் வசதியை கொண்டு வந்த போது பயனாளிகள் ,அட நம்ம அபிமான அம்சம் எங்கே போச்சு என அதிருப்திக்கு இலக்கானார்கள். விண்டோஸ் -8 எதிர்பார்த்த வரவேற்பை பெறாமல் போக இதுவும் முக்கிய காரணம்.

இப்போது, விண்டோஸ் 10 வெர்ஷனில் இந்த அம்சம் மீண்டும் நிலை நிறுத்தப்பட்டுள்ளது.

விண்டோஸ் எவ்வளவோ மாறிவிட்டது. விண்டோஸ் மட்டும் கம்ப்யூட்டர் உலகமே மிகவும் மாறி முன்னேறி வந்துள்ளது. கையடக்க கம்ப்யூட்டர்களாக ஸ்மார்ட்போன்கள் அவதாரம் எடுத்து இணைய உலகம் ஆண்ட்ராய்டு மயமாகி கொண்டிருக்கிறது. அப்படி இருக்க ஒரு பழைய அம்சத்தில் கொண்டாட என்ன இருக்கிறது என கேட்கலாம்.
22 ஆண்டுகள் ஆன பிறகும் ஸ்டார்ட்மெனுவை விண்டோசில் இருந்து தூக்கி வீச முடியாமல் இருப்பது ஏன் என்றும் கேட்கலாம்.

இங்கு தான் விஷயமே இருக்கிறது. ஸ்டார்ட்மெனு வெறும் ஒரு அம்சம் மட்டும் அல்ல; அது மென்பொருள் வடிவமைப்பின் முக்கியத்துவத்தை அழகாக உணர்த்தும் ஒரு அம்சம்; அதோடு பயன்பாட்டுத்தன்மை எனும் கோட்பாட்டின் அடையாளம் என்றும் சொல்லலாம்.
விண்டோஸ் மென்பொருள் வடிவமப்பில் இது சின்ன விஷயம் தான்; ஆனால் இந்த சின்ன விஷயம் பின்னே ஒரு சுவாரஸ்யமான கதை இருப்பது தெரியுமா?

அந்த கதையின் நாயகன் வடிவமைப்பாளரான டேனி ஆரன்.முன்னால் மைக்ரோசாப்ட் ஊழியரான இவர் தான் ஸ்டார்ட்மெனுவின் பிரம்மா. 1993 ல் இவர் மைக்ரோசாப்டில் பணிக்கு சேர்ந்தார். பழக்கவழக்க உளவியல் வல்லுனராக பயிற்சி பெற்ற செழுமையான ஆரனிடம் விண்டோஸ் இயங்குதளத்தின் பயனர் இடைமுகத்தை மெருகேற்றும் பொறுப்பு ஒப்படைக்கப்பட்டது. இதன் பொருள் விண்டோஸ் இயங்குதளத்தை பயன்படுத்துவதை சகலமானவருக்கும் மேலும் எளிமையாக்கி தரும் பணியாக இது அமைந்தது.
ஆரன் ஏற்கனவே சிம்பென்சி குரங்குகளுக்கு பேசும் திறன் பயிற்சில் ஈடுபட்டவர். இந்த முயற்சியின் ஒரு பகுதியாக அவர் சிம்பென்சிகளுடன் தொடர்பு கொள்வதற்கான சாதனம் ஒன்றை உருவாக்கினார். சிம்பென்சிகளுக்கு அவரால் எதையும் கற்றுத்தர முடியவில்லை என்றாலும் , இந்த ,முயற்சியின் மூலம் அவர் பயன்பாட்டுத்தன்மை பற்றிய முக்கிய குறிப்புகளை தெரிந்து கொண்டிருந்தார்.

விண்டோஸ் இயங்குதளம் தொடர்பான பயனாளிகள் அனுபவம் பற்றிய ஆய்வில் ஈடுபட்டிருந்த போது இந்த பாடம் தான அவருக்கு கைகொடுத்தது.
அவரின் கீழ் பணியாற்றிய குழுவினர் விண்டோஸ் இயங்குதளத்தை தேர்ந்தெடுக்கப்பட்ட பயனாளிகளிடம் கொடுத்து சோதனை செய்து கொண்டிருந்தனர்.அநேகமாக எல்லா பயனாளிகளுமே ஒரு சின்ன டாஸ்க்கை கூட செய்து முடிக்க முடியாமல் திணறிக்கொண்டிருந்தனர். அதாவது அவர்களால் விண்டோசில் இருந்த அம்சங்களுக்குள் எளிதாக சென்றடைய முடியவில்லை. இந்த தடுமாற்றத்தை பார்த்த மற்ற புரோகிராமர்கள் நொந்து போயினர். பயனாளிகள் இவ்வளவு முட்டாள்களாக இருக்கின்றனரே என கோபம் அடைந்தனர்.
ஆனால் ஆரன் மட்டும் பிரச்சனை பயனாளிகளிடம் அல்ல; விண்டோசில் என புரிந்து கொண்டார். அதிலும் சோதனையில் பங்கேற்ற ஒருவரிடம் பேசிப்பார்த்த போது அவர் விமான தயாரிப்பு நிறுவனமான போயிங்கில் பொறியாளராக இருப்பவர் என தெரிந்து கொண்டார். போயிங் பொறியாளரே விண்டோஸ் உள்ளே எளிதாக உலா வர முடியாமல் தடுமாறினால் மற்றவர்கள் கதி என்ன யோசித்த ஆரன், இயங்குதளத்தின் அடிக்கடி பயன்படுத்தும் அம்சங்களை எல்லாம் எப்படி பயனாளிகள் கைகளில் எப்படி எளிதாக கிடைக்கச்செய்வது என தீவிரமாக யோசித்தார்.விண்டோசில் இருந்த்து வடிவமைப்பு கோளாறு என உணர்ந்தவர் ஒற்றை பட்டனில் எல்லாவற்றையும் பயனாளிகளுக்கு கிடைக்கச்செய்ய வேண்டும் என நினைத்தார்.

இந்த யோசனையின் பயனாக தான், ஏற்கனவே பயன்படுத்திக்கொண்டிருக்கும் புரோகிராம்கள் அனைத்தும் விண்டோஸ் கீழே கட்டம் கட்டமாக தோன்றச்செய்யும் டாஸ்க் பார் வசதியை உருவாக்கினார். அதன் பிறகு எந்த புரோமிராமையும் எளிதாக சென்றடையும் வகையில் டாஸ்க் பார் அடியில் ஸ்டார்ட்மெனுவை வைத்தார். அவ்வளவு தான் வடிவமைப்பு முழுமையாயிற்று. விண்டோசின் இடது மூளையில் ஆரம்ப கட்டம் போல இருக்கும் இந்த அம்சத்தை கிளிக் செய்தால் போதும் ஏணியில் ஏறுவது போல சரசரவென்று விண்டோசுக்குள் சென்றுவிடலாம்.

இப்படி தான் ஸ்டார்ட்மெனு விண்டோசில் அறிமுகமானது.
ஆரன் பின்னர் மைக்ரோசாப்டில் இருந்து விலகிச்சென்றுவிட்டார். ஆனால் இந்த சின்ன கண்டுபிடிப்பிற்கான காப்புரிமை அவரிடம் தான் இன்னமும் இருக்கிறது. இந்த கண்டுபிடிப்பு பற்றி அவர் தனது குறிப்புகளை சமீபத்தில் இணையத்தில் பகிர்ந்து கொண்டுள்ளார். பயனாளிகள் அனுபவத்தில் பாடமாக விளங்க கூடிய அந்த குறிப்பைக்காண: https://881f64c278cb1349c96072c92810513d84a02339-www.googledrive.com/host/0ByD4nlnF8T9Takl3eGFxQTlrNWM

oran
தளம் புதிது; வீடியோ துண்டு

இணையத்தில் பார்க்க கூடிய பெரும்பாலான வீடியோக்கள் குவிக் பைட் ரகம் தான். அதாவது நிமிடக்கணக்கில் ஓடக்கூடியவை தான். யூடியூப்பை எடுத்துக்கொண்டால் அதன் வீடீயோக்களின் சராசரி நேரம் 3 முதல் 5 நிமிடங்கள் தான். அதிகபட்சம் போனால் பத்து நிமிடங்களில் அநேக வீடியோக்களை பார்த்து ரசித்துவிடலாம். விஷயம் என்ன என்றால் சில நேரங்களில் வீடியோக்களை பகிரும் போது , முழு வீடியோவையும் பார்க்கச்சொல்வதை விட ,அதில் உள்ள குறிப்பிட்ட பகுதியை மட்டும் அடையாளம் காட்டினால் போதும் என்று தோன்றும். இது போன்ற நேரங்களில் கைகொடுக்கிறது வைப்பி இணையதளம் .
வைப்பி தளத்தில் ஒரு வீடியோவின் குறிப்பிட்ட பகுதியை சுட்டிக்காட்டி, அதை மட்டும் பகிர்ந்து கொள்ளலாம். அதுனுடன் கருத்து தெரிவிக்கும் வசதியும் இருப்பதால் , வீடியோவை பார்த்து ரசிப்பவர்கள் உரையாடலிலும் ஈடுபடலாம். வீடியோவுடன் இணைக்கப்பட்ட சின்ன பெட்டியில் டைப் செய்து கருத்துக்களை தெரிவிக்கலாம்.
வைப்பி தளத்தில் ,நீங்கள் விரும்பும் வீடியோவின் இணைய முகவரியை டைப் செய்து அதன் குறிப்பிட்ட பகுதியை அடையாளம் காட்டி பகிர்ந்து கொள்ளலாம்.
பலவிதங்களில் இந்த வீடியோ மெருக்கூட்டல் சேவையை பயன்படுத்தலாம். ஆசிரியர்கள் , கல்வி சார்ந்த வீடியோக்களை பகிர்ந்து கொண்டு மாணவர்களுடன் உரையாடலாம்.
வைப்பி தளத்தில் இவ்வாறு ஏற்கனவே உருவாக்கப்பட்டுள்ள வீடியோக்களையும் பார்க்கலாம். இத்தகையை வீடியோக்களை இமெயிலில் அனுப்பி வைக்கவும் கோரலாம்.

இணையதள முகவரி: https://www.vibby.com/

——-
unnamed
செயலி புதிது; குறுஞ்செய்தி பேக்-அப்

வாட்ஸ் அப் வந்த பிறகு குறுஞ்செய்திகளின் (எஸ்.எம்.எஸ்) பயன்பாடு குறைந்துவிட்டது. இருந்தாலும் குறுஞ்செய்திகளை சேமித்து வைத்துக்கொள்ள வேண்டும் என்று நினைத்தால் எஸ்.எம்.எஸ் பேக்-அப் செயலி அதற்கு உதவுகிறது. இந்த செயலி மூலம் போனில் வரும் குறுஞ்செய்திகளை உங்கள் ஜிமெயில் கணக்கில் சேமித்து கொள்ளலாம். இதற்காக முதலில் ஜிமெயில் செட்டிங்கில் ஐ.எம்.ஏ.பி அம்சத்தை இயக்கி கொள்ள வேண்டும். அதன் பிறகு செயலியை இயக்கி இமெயில் முகவரியை சமர்பித்து இயக்க வேண்டும். கொஞ்சம் பழைய செயலி தான். ஆனால் குறுஞ்செய்தி பிரியர்களுக்கு பயனுள்ளதாக இருக்கும். இதே பணியை செய்யும் வேறு பல செயலிகளும் இருக்கின்றன.
ஆண்ட்ராய்டில் தரவிறக்கம் செய்ய: https://play.google.com/store/apps/details?id=tv.studer.smssync

ஜிமெயிலில் இரட்டை இமெயில்

நீங்கள் ஜிமெயில் பயனாளியா? அப்படி என்றால் உங்களுக்கு இன்னொரு இமெயில் முகவரியும் இருப்பது உங்களுக்குத்தெரியுமா? இதென்ன புதிதா( ரா)க இருக்கிறதே என குழம்ப வேண்டும். ஜிமெயிலில் கணக்கு துவக்கும் எல்லோருக்குமே, அவர்கள் வழக்கமான இமெயில் முகவரியுடன் உதாரணம்@gmail.com அதே பெயரில் உதாரணம்@googlemail.com என இன்னொரு முகவரியும் இருக்கும். உங்கள் சொந்த மெயிலை கொடுக்க வேண்டாம் என நினைக்கும் இடங்களில் இந்த கூகுல்மெயில் முகவரியை சமர்பிக்கலாம். இதற்கு வரும் மெயில்களும் உங்கள் இன்பாக்சில் தான் வந்து சேரும். அதற்கேற்ப ஜிமெயிலில் உள்ள பில்டர் வசதியை பயன்படுத்திக்கொள்ளலாம். இந்த இரட்டை இமெயில் முகவரி வசதி பற்றி லேப்னால் தளத்தில் அமீத் அக்ர்வால் விரிவாக எழுதியிருக்கிறார்; http://www.labnol.org/internet/email/gmail-email-alias-two-separate-gmail-address/2388/

—–

நன்றி; தமிழ் இந்துவில் எழுதியது

சேர்ந்து யோசிக்கலாம் வாங்க,அழைக்கும் இணையதளம்!.


எப்போதும் யோசித்து கொண்டிருப்பவர்கள்,புதிய சேவைகள் அல்லது புதிய பொருட்களை உருவாக்க நினைப்பவர்கள்,அதற்கான அகினிகுஞ்சு எண்ணங்களை மனதில் சுமந்து கொண்டிருப்பவர்கள் ‘யூனிக்.லே’ தளத்தை பார்த்தால் நிச்சயம் கவரப்படுவார்கள்.உற்சாகம் அடைவார்கள்.ஊக்கம் பெறுவார்கள்.

காரணம் இந்த தளம் புதுமையான எண்ணங்களை பகிர்ந்து கொள்வதற்காக என்றே உருவாக்கப்பட்டுள்ளது.

இந்த தளத்தை எண்ணக்களை பகிர்ந்து கொள்வதற்கான வலைப்பின்னல் என்று சொல்லலாம்.எண்ணங்கள் என்றால் புதுமையான எண்ணங்கள்!

வளர்த்தெடுக்கப்பட்டால் புதியதொரு பொருளாகவோ அல்லது புதிய தீர்வாகவோ மாறக்கூடிய எண்ணங்கள் பலரது மனதில் இருக்கலாம் அல்லவா?அவை,புதிய நிறுவனத்தை துவக்குவதற்கான எண்ணமாக இருக்கலாம்.நடைமுறை பிரச்சனைக்கும் தீர்வு காணும் சேவையாக இருக்கலாம்.சமூகத்திற்கு பயன் தரக்கூடிய நல்லதொரு கண்டுபிடிப்பாக இருக்கலாம்.ஏன் உலகை மாற்றக்கூடிய மகத்தான யோசனையாக இருக்கலாம்.

இத்தகைய யோசனைகள் ஆர்வமும் சிந்தனையும் கொண்ட பலரிடம் இருக்கலாம்.ஆனால் இவற்றை மனதிலே பூட்டி வைப்பதால் ஒரு பயனும் கிடையாது.யாரிடமாவது பகிர்ந்து கொண்டு அவற்றை மேலும் வளர்த்தெடுக்க வேண்டும்.

ஆனால் எண்ணங்களை பகிர்ந்து கொள்ள பொருத்தமானவர்களுக்கு எங்கே போவது?கொஞ்சம் உற்சாகமாக மனதில் உள்ள எண்ணங்களை பேசினால் நல்ல நண்பர்கள் கூட தலை தெறித்து ஓடலாம்.அல்லது ஆசையோடு கேட்டாலும் அந்த எண்ணங்களை மேம்படுத்தக்கூடிய வகையில் யோசனை சொல்லி விவாதிக்க கூடியவர்களாக இருந்தால் தானே பயனுள்ளதாக இருக்கும்.

இப்படி விவாதிக்க கூடிய நண்பர்களை தேடித்தரும் களமாக யூனிக்.லே தளம் அமைந்துள்ளது.

பயன் தரக்கூடிய எண்ணங்கள் உள்ளவர்கள் இந்த தளத்தில் அந்த எண்ணத்தை வெளியிடலாம்.அதாவது மற்றவர்களோடு பகிர்ந்து கொள்ளலாம்.

எண்ணங்களை பகிர்ந்து கொள்வது என்பது டிவிட்டரில் குறும்பதிவிடுவது போல தான்.முதலில் இந்த தளத்தில் உறுப்பினராகி(டிவிட்டர் கணக்கு மூலமே உள்ளே நுழையலாம்)அதன் பிறகு புதிய எண்ணத்தை பகிர்வதற்கான பகுதியை கிளிக் செய்து மனதில் உள்ள எண்ணத்தை டைப் செய்து சமர்பித்தால் அந்த எண்ணம் மற்றவர்களோடு பகிர்ந்து கொள்ளப்படும்.

சக உறுப்பினர்கள் இந்த எண்ணத்தை படித்து பார்த்து அது பற்றிய யோசனைகளை தெரிவிக்கலாம்.அந்த எண்ணத்தை மேலும் மேம்படுத்தக்கூடியதாக யோசனைகள் இருக்கலாம்.அப்படியென்றால் அந்த எண்ணம் சார்ந்த செறிவான உரையாடல் நிகழவும் வாய்ப்புண்டு.ஒத்த கருத்துள்ள மேலும் சிலரும் இதில் பங்கேற்றால் உரையாடல் மேலும் செழுமையாகும்.

அதே போலவே இந்த எண்ணத்தால் கவரப்படுவர்கள் அது குறித்த கருத்தை மட்டும் தெரிவித்து ஊக்குவிக்கலாம்.

நீங்களும் உங்கள் பங்கிற்கு மற்றவர்கள் சமர்பித்துள்ள எண்ணங்களை படித்து பார்த்து கருத்து தெரிவிக்கலாம்.உறுப்பினர்களின் எண்ணங்கள் வாழ்வியல்,தொழில்நுட்பம்,கண்டுபிடிப்பு என பல்வேறு தலைப்புகளின் கீழ் வகைப்படுத்தப்பட்டுள்ளன.

இந்த எண்ணங்கள் புதிய கண்டுபிடிப்புகளுக்கான அச்சாரமாக இருக்கலாம்.புதிய திசையிலான முயற்சியாக இருக்கலாம்.புதிய சிந்தனையை ஏற்படுத்தக்கூடியதாக இருக்கலாம்.வியக்க வைக்கலாம்.நெகிழ வைக்கலாம்.

இப்படி புதிய எண்ணங்களை பகிர்ந்து கொண்டு புதிய தீர்வுகளை உருவாக்குவதற்கான நட்பான சிந்தனை மேடையாக இந்த தளம் அமைந்துள்ளது.

எனவே எண்ணங்களை பகிர்ந்து கொண்டு படைப்பாற்றல் மிக்கவர்களோடு கருத்துரையாடலில் ஈடுபட்டு புதிய வழிகளை காணுங்கள் என்று அழைக்கிறது யூனிக்.லே.

நல்ல விஷயம் தான்.ஆனால் எண்ணங்களை பகிர்ந்து கொள்ளும் போது அவை களவாடப்பட்டு விட்டால்?இயல்பாக எழக்கூடிய இந்த கேள்விக்கு யூனிக்.லேயின் பதில் சிந்தனைக்குறியது.

‘ஒரு எண்ணம் மட்டுமே மதிப்பானது என்று சொல்வதற்கில்லை.உண்மையில் ஒரு எண்ணத்தின் மதிப்பே அதனை கொண்டு பயனுள்ள ஒன்றை உருவாக்குவது தான்.இதற்கு மற்றவர்களோடு பகிர்ந்து கொண்டு அந்த எண்ணத்தை மேம்படுத்துவது தான் சிறந்த வழி’.இப்படி பதில் அளிக்கும் யூனிக்.லே அழகாக அதற்கான வழியையும் காட்டுகிறது.

இணையதள முகவரி;http://uniq.ly/welcome

டிவிட்டரில் ஒரு ஜீவமரண போராட்டம்

டிவிட்டர் எத்தனையோ பிரச்சாரங்களை பார்த்திருக்கிறது. ஆனால் இது வரை இப்படியொரு பிரச்சாரத்தை கண்டதில்லை என்று கூறும் வகையில் இறப்பதற்கான உரிமை கேட்டு போராடிக்கொண்டிருக்கும் ஒருவரின் மனதை மாற்றுவதற்காக பலரும் டிவிட்டரில் குரலெழுப்பிக் கொண்டிருக்கின்ற‌னர்.

வாழ்விற்கும் மரண‌த்திற்கும் இடையிலான நெகிழ்ச்சியான போராட்டமாக இது மாறிக்கொண்டிருக்கிற‌து.

இந்த பிரச்சாரத்தின் மையமாக இருப்பவர் பிரிட்டனைச் சேர்ந்த டோனி நிக்லின்சன். 58 வயதாகும் நிக்லின்சன் கடந்த 7 ஆண்டுகளாக படுத்த படுக்கையாக இருப்பவர். 2005ம் ஆண்டில் வர்த்தக விஷயமாக வெளிநாட்டுக்கு சென்றிருந்தபோது நிக்கலின்சன் பக்கவாதத்தால் பாதிக்கப்பட்டு ‘லாக்ட் இன் சின்ட்ரோம்’ என்னும் நோய்க்கு ஆளானார்.அதிலிருந்து அவர் நகரமுடியாமல் அசையமுடியாமல் படுத்திருக்கும் நிலைக்கு தள்ளப்பட்டார். மற்றவர்களோடு பேசவோ தொடர்பு கொள்ளவோ முடியாத நிலையில் அவர் மரண படுக்கையில் நாட்களை கழித்து வருகிறார்.

நிக்லின்சனின் குடும்பத்தினர் அவர் இந்த நிலையில் தவிப்பதை விட சட்டப்பூர்வமாக மருத்துவர் உதவியோடு தனது வாழ்க்கையை முடித்து கொள்ள அனுமதி அளிக்க வேண்டும் என்று கோரி நீதிமன்றத்தில் வழக்கு தொடர்ந்துள்ளனர். இந்த வழக்கு கருணைக் கொலை தொடர்பான விவாதத்தை மீண்டும் மக்கள் மன்றத்திற்கு உயிர் பெற வைத்துள்ளது.

எந்த காரணத்திற்காகவும் ஒரு உயிரை எடுக்கும் உரிமையை யாருக்கும் கொடுக்க கூடாது என்னும் கருத்து முன்வைக்கப்படும் நிலையில், மரணத்தை விடக் கொடிய வேதனையை அனுபவித்து கொண்டிருப்பவர்கள் அந்த வேதனையில் இருந்து விடுதலை பெறுவது சரியே என்ற கருத்தும் முன்வைக்கப்படுகிற‌து.

இந்த வழக்கின் தீர்ப்பு மிகுந்த கவனத்தோடு எதிர்பார்க்கப்பட்டு வரும் நிலையில், சமீபத்தில் நிக்லின்சன் டிவிட்டர் மூலம் பேசினார். எந்த விதத்திலும் மற்றவர்களோடு பேசவோ தொடர்பு கொள்ளவோ முடியாத நிக்கல்சன் கண் இமைகளால் தொடர்பு கொள்ளும் தொழில்நுட்பத்தின் மூலம் டிவிட்டரில் பேசினார்.

“உலகிற்கு வனக்கம்,நான் டோனி நிக்லின்சன்.. நான் லாக்ட் இன் சின்ட்ரோமால் பாதிக்கப்பட்டிருக்கிறேன்.. இது எனது முதல் குறும்பதிவு.” இது தான் அவரது முதல் குறும்பதிவு.

ஒருவரது கரு விழி நகர்வைக் கொண்டு அவரது எண்ணங்களை ஊகித்து அதனை வார்த்தைகளாக மாற்றும் கம்ப்யூட்டர் தொழில்நுட்பத்தை கொண்டு டிவிட்டரில் குறும்பதிவுகளை வெளியிடும் முதல் மனிதரான‌ நிக்லின்சன் வெளியிட்ட குறும்பதிவுகள் தனது உடலுக்குள்ளேயே சிறைப்பட்டு கிடக்கும் மனிதரின் மன உணர்வை வெளிப்படுத்துவதாக அமைந்தது.

” பழைய நண்பன் ஒருவர் அழைத்திருந்தார். ஆனால் மனைவி ஜேன் மட்டுமே அவரோடு பேசிக்கொண்டிருந்தாள். காரணம் அவளால் மட்டுமே பேச முடியும், என்றாலும் அவனை கண்டது மகிழ்ச்சியாக தான் இருந்தது” என்பது போன்ற குறும்ப‌திவுகள் நிக்லின்சனின் நிலையை உணர்த்தி, உலுக்கக் கூடியதாக இருந்தன.

அடுத்த சில நாட்களில் பலரும் அவரது டிவிட்டர் கணக்கை பின் தொடர‌ துவங்கினர். சிலர் அவரது மரண கோரிக்கைக்கு ஆதரவு தெரிவித்தனர். ஆனால் இன்னும் பலரோ அவரது மனதை மாற்றி தன் மரண விழைவை கைவிட வைக்கும் முயற்சியில் ஈடுபட்டனர்.

ஒருவர், “டோனி அவர்களே.. வாழ்கை என்பது ஒரு கொண்டாட்டம் என்பதால் உங்கள் மனதை மாற்றிக்கொள்ளுமாறு மன்றாடுகிறேன்.. உங்களுக்காக இல்லை என்றாலும், பிள்ளைகளுக்காக” என்று குறும்ப‌திவிட்டிருந்தார்.

இன்னொருவரோ “எல்லாமே ஒரு காரணத்தோடு தான் நடக்கிற‌து.. எனவே தயவு செய்து வாழப் போராடுங்கள்” என்று கூறியிருந்தார்.

“கடவுள் எல்லாவற்றையும் ஒரு திட்டத்தோடும் நோக்கத்தோடும் தான் நிகழ்த்துகிறார். நீங்கள் ஒரு நல்ல உதாரணமாகி உத்வேகத்தின் அடையாளமாக விள‌ங்குங்கள்” என்று இன்னொருவர் குறும்ப‌திவில் வேண்டுகோள் விடுத்தார்.

அமெரிக்காவில் இருந்து ஒருவர் பக்கவாதத்தால் பாதிக்க‌ப்பட்டவர்களுக்கு உதவும் அமைப்புகளின் இணைய‌ முகவரிகளை அனுப்பியிருந்தார்.

“அற்புதங்கள் நிகழும் என்பதில் எனக்கு நம்பிக்கை உள்ளது. உங்களுக்காக பிரார்த்தனை செய்கிறேன் ”

“சாத்தியமான எல்லாவற்றையும் முயன்று பார்க்காமல் உலகை விட்டு நீங்கள் செல்வதை நான் விரும்ப மாட்டேன் ”

முடிவெடுக்கும் உரிமை உங்களுக்கு இருக்கிறது என்றாலும் இத்தனை பேர் நீங்கள் உயிர் வாழ விரும்புவதை நீங்கள் தெரிந்து கொள்ள வேண்டும் என விரும்புகிறேன் ”

இப்படி பலரும் டிவிட்டர் வழியே நிக்லின்சன் மரணத்தை கோரும் தனது முடிவை மாற்றிக்கொள்ள வேண்டும் என்று வலியுறுத்தி வருகின்ற‌னர்.

நிக்கிலின்ச‌ன் இந்த ஆதரவு குரல்களால் நெகிழ்ந்து போயிருக்கிறார். “நான் என் முடிவை மாற்றி கொள்வேனா என்று அறிய பலரும் விரும்புகின்றனர்.. முதலில் நீதிமன்ற‌ தீர்ப்பு வரட்டும்” என அவர்களுக்கு பதில் அளித்திருந்தார்.

இப்போது 25,000 பேருக்கும் மேல் அவரை டிவிட்டரில் பின் தொடர்கிறார்கள்.

இதனிடையே நிக்லின்சன் தனது வழக்கறிஞர் பால் போவன் மூலமாக நீதி மன்றத்தில் தனது கோரிக்கையை வலியுறுத்தி தாக்கல் செய்த மனுவில், 2007ம் ஆண்டு முதல் தனது வாழ்க்கையை முடித்து கொள்ள விரும்பி வருவதாக கூறியுள்ள அவர், தனது முடிவுக்கு எதிரான தீர்ப்பு மேலும் துன்பம் நிறைந்த வாழ்கையிலேயே தன்னை தள்ளி விடும் என்று குறிப்பிட்டுள்ளார்.

குழந்தை போல உணவு அளிக்க வேண்டி இருக்கிறது.. என்னால் குளிக்க முடியாது, உடை மாற்ற முடியாது, உயிரை மாய்த்து கொள்வதைக் கூட மருத்துவர் உதவி இல்லாமல் செய்து கொள்ள முடியாது என குறிப்பிட்டுள்ளார். எனவே மருத்துவர் எனக்கு உதவினால், அவர் சட்டத்தால் தண்டிக்கப்படக்கூடாது என கேட்டுள்ளார்.

ஆனால் நீதிமன்றம் தனக்கு சாதகமாக தீர்ப்பளித்தாலும் உடனே இறந்து விட மாட்டேன் என அவர் தெரிவித்துள்ளது குறிப்பிடத்தக்கது.

என்ன செய்வது என்று அரசு எனக்கு உத்தரவிடுவதற்கு மாறாக, அதாவது விருப்பத்திற்கு மாறாக உயிர் வாழ்ந்து துன்பப்படுவதை விட என் வாழ்க்கையை நானே தீர்மானித்து கொள்ளும் உரிமை இருப்பது எனக்கு எத்தனை மன நிம்மதியை தரக்கூடியது தெரியுமா? என்று உருக்கத்தோடு குறிப்பிட்டுள்ளார்.

இறப்பதற்கு முன் நிக்லின்சன் தனது சுயசரிதையை எழுத விரும்புகிறார் என்று அவரது வழக்கறிஞர் தெரிவித்துள்ளார்.

இந்த வழக்கு தொடர்பாக நிக்லின்சன் மனைவி மற்றும் பிள்ளைகளின் கருத்தையும் நீதிமன்றம் கேட்க உள்ளது.

இந்த வழக்கு விசாரணை மனிதனின் தனிப்பட்ட உரிமை, அரசின் கடமை, உயிரின் அருமை உள்ளிட்ட பல்வேறு விஷயங்கள் தொடர்பான விவாதமாக மாறியுள்ளது. பிரிட்டனில் உள்ளவர் மட்டும் அல்லாமல் உலகம் முழுவதும் இந்த வழக்கை பின் தொடர்ந்து வருகின்றனர்.

பார்க்கலாம், காலம் அவருக்கு என்ன வழி வைத்திருக்கிறது என்று!

டிவிட்டர் முகவரி : http://twitter.com/#!/TonyNicklinson

————

யூத்புல் விகடனுக்காக எழுதியது.

நீங்களும் பரிசளிக்கலாம்;அழைக்கும் இணையதளம்.

பாண்டியன் நெடுஞ்செழியன் மட்டும் தானா தன்னுடைய சந்தேகத்தை தீர்ப்பவருக்கு ஆயிரம் பொற்காசுகள் பரிசளிக்கத்தயார் என்று அறிவித்து பாட்டெழுத சொல்ல முடியும்! நீங்களும் கூட விரும்பினால் உங்கள் சந்தேகம் தீர அல்லது உங்களுக்கு வேண்டிய தகவலை பெற பரிசளிப்பதாக சொல்லி மற்றவர்களை அதற்கான தேடலில் ஈடுபட கோரலாம்.

கிரவுன்டி இணையதளம் இதற்கான வாய்ப்பை ஏற்படுத்தி தருகிறது.தகவல் தருபவரை ஊக்குவிக்க பரிசளிப்பதை குறிக்கும் ஆங்கில சொல்லான பவுன்டியின் திருத்தமாக கிரவுன்டி.

உங்களுக்கு என்ன தகவல் தேவை என்றாலும் சரி,அதனை கிரவுன்டி மூலம் கோரலாம்.இதற்கெனவே ஒரு விண்ணப்ப படிவம் இருக்கிறது.அதில் உங்கள் தேவை என்ன என்பதை குறிப்பிட்டு விட்டு அதற்கு நீங்கள் தரத்தயாராக இருக்கும் பரிசுத்தொகையை குறிப்பிட வேண்டும்.

அதன் பிறகு உங்கள் தேவையை விளக்கி கூறி விட்டு இமெயில் முகவரியையும் சமர்பித்தால் இந்த கோரிக்கைக்கான பிரத்யேக இணைய முகவரி ஒன்றை கிரவுன்டி உருவாக்கித்தருகிறது.இந்த இணைய முகவரியை உங்கள் நண்பர்களோடு பேஸ்புக்,டிவிட்டர்,ஜீபிளஸ் அல்லது இமெயில் மூலம் பகிர்ந்து கொள்ளலாம்.

நண்பர்கள் அந்த இணைப்பை கிளிக் செய்தால் கிரவுன்டி பக்கத்திற்கு வந்து சேருவார்கள்.இப்போது அவர்கள் இரண்டு விதமாக உதவலாம்.ஒன்று உங்கள் கோரிக்கைக்கான பதில் அல்லது சேவை அவர்களுக்கு தெரிந்திருந்தால் நேரடியாக தெரிவிக்கலாம்.இல்லை என்றால் அந்த கோரிக்கையை தங்களது நண்பர்களோடு பகிர்ந்து கொள்ளலாம்.

நண்பர்களிடம் ஏதாவது தகவல் கேட்கும் போது அவர்களுக்கு பதில் தெரியாவிட்டால் தங்களது நண்பர்களை கேட்டு சொல்லக்கூடும் அல்லவா அதே போலவே இந்த தளத்திலும் நண்பர்கள் தங்களுக்கு தெரிந்த பதிலை சொல்லலாம்,அல்லது நண்பர்களிடம் பரிந்துரைக்கலாம்.

அவர்களே கோரிக்கையை பூர்த்தி செய்தால் முழு பரிசுத்தொகையும் அவர்களுக்கே கிடைத்து விடும் .மாறாக அவர்கள் பரிந்துரைத்த நண்பர்கள் கோரிக்கையை நிறைவேற்றினால் பாதி தொகை நண்பர்களுக்கு கொடுக்கப்பட்டு மீதி தொகை கைகாட்டியவருக்கு கொடுக்கப்படும்.இரண்டு மூன்று பேர் கைகாட்டியிருந்தால் பரிசுத்தொகை அடுத்த அடுத்த கட்டங்களில் பாதி பாதியாக பிரித்து அளிக்கப்படும்.எஞ்சிய தொகை தளத்திற்கு சொந்தமாகும்.

இணையதள வடிவமைப்பாளர் தேவை என்பதில் துவங்கி குடியிருக்க வீடு தேவை என்பது வரை எந்த விதமான தேவைகளுக்கும் இந்த சேவையை பயன்படுத்தி கொள்ளலாம்.

ஏதாவது சந்தேகம் என்றால் பதில் அறிய இணையவாசிகளிடம் கேள்வி கேட்க உதவும் கேள்வி பதில் தளங்கள் நிறையவே இருக்கின்றன.அதே போல பேஸ்புக் வழியே நண்பர்களை கேட்கும் பழக்கமும் பிரபலமாக இருக்கிறது.

கிரவுன்டி இந்த இரணையும் இணைத்து சுவாரஸ்யமான சேவையை வழங்குகிறது.ஒருவரிடம் கேட்பதை பலரிடம் கேட்பது எப்போதுமே நல்ல பலனைத்தரும் தானே.அந்த வகையில் நண்பர்கள் அவர்களின் நண்பர்கள் என பரந்த வலைப்பின்னலில் தேட இந்த தளம் உதவுகிறது.அதற்கு பரிசளிக்க வாய்ப்பு தருவது இன்னும் ஊக்கம் தரக்கூடியது.

இணையதள முகவரி;http://www.crounty.com/

சாப்ட்வேர் நீதிபதிகளே வாருங்கள்!

புதிய சாப்ட்வேர்களை அவற்றின் குறை நிறையோடு அறிமுகம் செய்து கொள்ளும் விருப்பம் உங்களுக்கு இருந்தால் சாப்ட்வேர்ஜட்ஜ் இணையதளம் அதற்கு மிகவும் பொருத்தமானது.அதோடு புதிய சாப்ட்வேரின் பயன்பாடு குறித்து ஆணித்தரமான விமர்சனத்தை முன் வைக்கும் ஆர்வமும் இருந்தால் இந்த தளம் இன்னும் பொருத்தமானது மட்டும் அல்ல,அதன் மூலம் வருவாய் ஈட்டி தரக்கூடியது.

காரணம் அடிப்படையில் இந்த இணையதளம் புதிய சாப்ட்வேர் தொடர்பான விமர்சனங்களை வரவேற்று அதற்கு பரிசாக வருவாயும் அளிப்பது தான்.

புதிய சாப்ட்வேர்களை பட்டியலிடும் இந்த தளம் அவை குறித்த விமர்சன‌ங்களையும் வரவேற்கிறது.யார் வேண்டுமானாலும் சாப்ட்வேர் குறித்த விமர்சனத்தை சமர்பிக்கலாம்.ஒரே நிபந்தனை விமர்சன்ம் செய்பவர் அந்த சாப்ட்வேரை பயன்படுத்தியிருக்க வேண்டும் என்பது மட்டுமே.

விமர்சனம் என்றாவுடன் ஆஹா சூப்ப்ர் சாப்ட்வேர் என்று புகழ் பாடும் நோக்கிலோ அல்லது சுத்த வேஸ்ட் என்று நிராகரிக்கும் நொக்கிலோ இல்லாமால் சாப்ட்வேரின் பயன்பாட்டுத்தன்மை குறித்த அசலான கருத்துக்களாக இருக்க வேண்டும்.அப்படி இல்லாத விமர்சங்களை நிராகரிப்பது மட்டும் அல்ல சுட்டு எழுதும் விமர்சங்களையும் கண்டு பிடித்து டெலிட் செய்து விடுவோம் என்று எச்சரிக்கிறது இந்த தளம்.

அதே போல குறிப்பிட்ட சாப்ட்வேரை தொட்டுக்கூட பார்க்காமல் பொய்யாக விமர்சன்ம் செய்தாலும் பிடிபட்டு விடுவீர்கள் என எச்சரிக்கிறது.எனவே இவ்வாறு எல்லாம் செய்யாமல் உண்மையிலேயே நேர்மையான விமர்சன‌ங்களை எழுதினால் அதற்கு பரிசளிக்கப்படும் என்கிறது இந்த தளம்.

விமர்சங்கள் மூலம் கணிசமான அளவு தொகை சேர்ந்த பிறகு அவை இணைய பரிமாற்றம் மூலம் அனுப்பி வைக்கப்படும்.அல்லது அதற்கு முன்பே கூட பரிசு தொகைக்கு நிகரான சாப்ட்வேரை வாங்கி கொள்ளலாம்.

சாப்டேவ‌ரை விமர்சிக்க வாய்ப்பு என்பது உண்மையிலேயே சுவாரஸ்யமான விஷயம் தான்.இதன் மூலம் சாப்ட்வேர் புலிகள் தங்கள் கருத்துக்களை பகிர்ந்து கொள்ள வாய்ப்பு கிடைப்பதோடு மற்றவர்களுக்கு புதிய சாப்ட்வேரை அறிமுகம் செய்து கொள்ளும் வழியாகவும் அமைகிறது.புதிய சாப்ட்வேர் எந்த அளவுக்கு பயனுள்ளதாக இருக்கும் என்பதை பயனாளிகள் விமர்ன‌சங்கள் மூலம் தெரிந்து கொள்ளலாம்.

குற்றம் கண்டு பிடித்தே பெயர் வாங்கும் புலவர்கள் போல சாப்ட்வேர் பற்றி விமர்சனம் செய்யும் நிபுணர்களும் தொழில்நுட்ப வல்லுனர்களும் இருக்கின்றனர்.இருப்பினும் பயனாளிகளில் விமர்சனம் இன்னும் கூட துல்லிய‌மாக இருக்க‌லாம்.

அமேசான் இணையதளம் புத்தக விற்பனையை அறிமுகம் செய்த போது வாசக‌ர்கள் புத்தகங்களை விமர்சனம் செய்யும் வசதியை அறிமுகம் செய்தது.புதிய புத்தகம் வாங்கு அனுபவத்தை மேலும் சுவாரஸ்யமாக்க இது வழி வகுத்ததோடு வாசக விமர்சன‌ங்கள் மூலமே பெஸ்ட் செல்லர் பட்டியல் தாண்டி பல அரிய புத்த‌கங்கள் கண்டுபிடிக்கப்பட வாய்ப்பாக அமைந்தது.

அந்த வகையில் சாப்ட்வேர் விமர்சனத்திற்கான வாயிலை திறந்து விட்டிருக்கும் இந்த இனையதளம் நல்ல விஷயம் என்றே சொல்ல வேண்டும்.

விமர்சன நோக்கம் இல்லாவிட்டாலும் இந்த தளத்தில் எட்டிப்பார்த்தால் இணைய சந்தையில் புதிதாக அறிமுகமாகியிருக்கும் சாப்ட்வேரை தெரிந்து கொள்ளலாம்.அதோடு அவற்றில் ஆர்வம் தரும் சாப்ட்வேர் பற்றிய முழு விவரங்களையும் விமர்சங்களை படித்து தெரிந்து கொள்ளலாம்.

இணையதள‌ முகவரி;http://www.softwarejudge.com/