Tag Archives: world

புன்னகைக்க ஒரு இணையதளம்.

உங்கள் கம்ப்யூட்டர் முன் எப்போதாவது புன்னகைத்திருக்கிறீர்களா?

தி வேர்ல்ட் ஈஸ் ஸ்மைலிங் இணையதளம் அதை தான் செய்ய சொல்கிறது.

உள்ளே நுழைந்ததுமே ஸ்மைல் ப்ளிஸ் என்பது போல இங்கே கிளிக் செய்து புன்னகைக்கவும் என்று அன்பு கட்டளையிடுகிறது அந்த இணையதளம்.இந்த கட்டளையை ஏற்று உங்கள் கம்ப்யூட்டரில் உள்ள வெப்கேமை சரியாக வைத்து விட்டு அழகாக புன்னகைத்தபடி போஸ் கொடுத்தால் உங்கள் புன்னகை இந்த தளத்தின் மகிழ்ச்சி பூங்காவில் மேலும் ஒரு புன்னகை மலராக சேர்ந்துவிடும்.

இந்த தளத்தின் நோக்கமும் இது தான்.அதாவது உலகை மகிழ்ச்சியாக வைத்திருப்பது.உயர்வான ஆனால் இயலாத லட்சியம் என்பதால் மகிழ்ச்சியின் அடையாளமான புன்னகையை சேகரித்து வைக்கும் பணியை மட்டும் இந்த தளம் செய்து வருகிறது.

எல்லோரும் புன்னகைத்தபடி காட்சி தரும் இருப்பிடமாக விளங்கும் இந்த தளத்தின் முகப்பு பக்கத்தில் புன்னகை பூக்களாக சிரிக்கின்றன.இது வரை மொத்தம் 2 ஆயிரம் பேருக்கு மேல் இந்த தளத்தில் தங்கள் புன்னகை முகங்களை சமர்பித்துள்ளனர்.வெப்கேம் வைத்திருப்பவர்கள் தங்கள் புன்னகையையும் இங்கே சமர்பிக்கலாம்.

காதலனை பார்த்து முகம் மலரும் காதலியின் மென்மையான புன்னகையில் துவங்கி பி எஸ் வீரப்பாவின் அட்டகாசமான சிரிப்பு வரை உங்கள் விருப்பம் போல எப்படி வேண்டுனாலும் சிரிக்கலாம்.முகத்தில் ஆனந்ததை வெளீப்படுத்த வேண்டும்.அது தானே இந்த தளத்தின் நோக்கம்!.

தினம் தினம் இந்த தளத்திற்கு விஜயம் செய்து உலகம் முழுவதும் பதிவாகும் சிரித்த முகங்களை பார்த்து மகிழலாம்.மலர்ந்த முகம் தானாக ஊக்கத்தை தரக்கூடியது தானே.

ஆக புன்னகை பரவட்டும்.

நிற்ல சிரித்த முகத்துடன் இருப்பதன் மகத்துவம் உங்களுக்கு தெரிந்திருக்கலாம்.இல்லை என்றால் விக்கிஹவ் தளத்தில் பாருங்கள்,சிரிப்பது எப்படி என விளக்கும் கட்டுரை இருக்கிறது.

சிரிப்பதன் பயனனை அனுபவியுங்கள் என்று சொல்லும் இந்த கட்டுரை உண்மையாக சிரிப்பது எப்படி,சங்கடமில்லாமல் சிரிப்பது எப்படி? கண்களால் சிரிப்பது எப்படி என்றெல்லாம் வழி காட்டுகிறது.

சிரிக்க பயிற்சி எடுத்து கொள்ளவும் வழிகாட்டுகிறது.ஆம் சிரித்து பழகவும் பயிற்சி தேவை.ஒரு சில உம்மாணமூஞ்சிகளுக்கு இன்னும் அதிகமாகவே தேவை.

சிரிப்பதன் பலன் பற்றி மற்றொரு அருமையான கட்டுரை ஸ்பிரிங் இணையதளத்தில் இருக்கிறது.புன்னகை என்பது மகிழ்ச்சியின் அடையாளம் மட்டும் அல்ல என்னும் இந்த கட்டுரை சிரிப்பதால் ஏற்படும் பத்து பலன்களை பட்டியலிட்டு விளக்குகிறது.அதில் ஒன்று சிரிப்பது மற்றவர்களுக்கு உங்கள் மீது நம்பிக்கை வர வைக்கிறது என்பதாக உள்ளது.

பாலுணர்வின் புன்னகை உள்ளுனர்வின் புன்னகை என்றெல்லாம் சுட்பமாக உளவியல் நோக்கில் தகவல் தருகிறது இந்த கட்டுரை.சிரித்தால் பாதி உலகம் உங்களை பார்த்து சிரிக்கும் என்ற ஊக்கத்தோடு கட்டுரை முடிகிறது.

இன்னும் புன்னகை கலையை கற்க விரும்பினால் திங் சிம்பில் நவ் இணையதளம் சிரிக்கும் கலை கட்ட்டுரை மூலம் புன்னகை கலையை நுட்பமாக கற்றுத்துருகிறது.முழுவதுமாக சிரிப்பது எப்படி,அறிமுகம் இல்லாதவர் போல சிரிப்பது எப்படி,வேலைக்கு நடுவே சிரிப்பது எப்படி என்றெல்லாம் பயிற்சி தருகிறது இந்த தளம்.

வாழ்க்கை புன்னகைமயமாக இருப்பதற்கான குறிப்புகளையும் வழங்குகிறது.

புன்னகைக்க,புன்னகையை பார்த்து ரசிக்க:http://www.theworldsmiling.com/

http://thinksimplenow.com/happiness/the-art-of-smiling/

http://www.wikihow.com/Smile

http://www.spring.org.uk/2011/06/10-hidden-benefits-of-smiling.php

சிந்தனைகளுக்கான டிவிட்டர்.

நான் என்ன நினைக்கிறேன் என்பதை உலகிற்கு உரத்த குரலில் சொல்ல விருப்பம் இருந்தால் யீடி இணையதளத்தின் பக்கம் போய் பார்க்கலாம்.

ஆனால் இந்த‌ இணைய‌தளத்தை பார்த்ததுமே டிவிட்டர் போலவே இருக்கிறதே என்ற எண்ணம் ஏற்படுவதை தவிர்க்க முடியாது.காரணம் தோற்றத்திலும் சரி செய்லபாட்டிலும் சரி டிவிட்டர் போலவே தான் இருக்கிறது.

டிவிட்டரில் எப்படி,இப்போது என்ன நிகழ்கிறது என்பதை பகிர்ந்து கொள்ள வழி செய்கிறதோ அதே போல யீடி இப்போது என்ன நினைக்கிறோம் என்னும் எண்ணத்தை வெளியிட உதவுகிறது.

மனதில் உள்ள எண்ணம் எதுவாக இருந்தாலும் சரி அதனை இந்த தளத்தின் மூலம் வெளியிடலாம்.நான் என்ன நினைக்கிறேன் என்றால் என்னும் சொற்றொடரின் கீழே உள்ளத்தில் தோன்றுவதை 160 எழுத்துக்களுக்குள் பகிர்ந்து கொள்ளலாம்.

நீங்கள் யார் என்பதை தெரிவித்தும் இதனை பகிர்ந்து கொள்ளலாம்.அல்லது உங்கள் அடையாளத்தை வெளிப்படுத்தாமலேயே பகிர்ந்து கொள்ளலாம்.யார் என்பதை சொல்ல விரும்பினால் இந்த கருத்தை அப்படியே டிவிட்டர் மற்றும் பேஸ்புக் போன்ற சமூக வலைப்பின்னல் தளங்களிலும் பகிர்ந்து கொள்ளலாம்.

உலக‌மே சுயநலம் கொண்டதாக இருக்கிறது என்றோ,அல்லது வாழ்க்கையில் முன்னேற கடினமாக உழைக்க வேண்டும் என்றோ மனதில் தோன்றும் எண்ணம் எதுவாக இருந்தாலும் இங்கே இடமுண்டு.

அவை நீங்கள் நம்பும் வாழ்க்கை தத்துவமாக இருக்கலாம்.பட்டறிவின் பலனாக‌ தெரிந்து கொண்டதாக இருக்கலாம்.உங்களை கவர்ந்த பொன்மொழியாக இருக்கலாம்.ஏன் வேதனை அல்லது விரக்தியின் வெளிப்பாடாக இருக்கலாம்.

உங்கள் எண்ணம் எதுவாக இருந்தாலும் அதனை வெளிப்படுத்தி கொள்ளலாம்.

எண்ணத்தை வெளிப்படுத்திய பிறகு அதற்கான விளக்கத்தையும் அளிக்கலாம்.ஆனால் இது கூடுதல் வசதி தான் கட்டாயமில்லை.சிந்தனைக்கான காரணங்களை அல்லது நியாயங்களையோ எடுத்து சொல்ல நினைத்தால் இவ்வாறு விளக்கம் தரலாம்.

அதன் பிறகு உங்கள் சிந்தனையும் இந்த தளத்தில் வந்துவிடும்.எல்லா எண்ணங்களைக்குமே மற்றவர்கள் கருத்து தெரிவிக்கும் வசதி இருக்கிற‌து.ஆக உங்கள் சிந்தனையை யாரோ ஆமோதிக்கவோ எதிர்க்கவோ வாய்ப்புண்டு.இது விவாத‌மாகவோ உரையாடலாகவோ மாறலாம்.

எல்லாம் சரி,மனதில் உள்ளதை ப‌கிர்ந்து கொள்ள விரும்பினால் டிவிட்டர் அல்லது பேஸ்புக்கிலேயே அதனை செய்யலாமே,இது போன்ற தளங்கள் தனியே தேவையா என்று கேட்கலாம்.

உண்மை தான்.ஆனால் இந்த தளத்தை எண்ணங்களுக்கான டிவிட்டர் என்று வைத்து கொள்ளலாம்.அதாவது மனதில் உள்ள என்ணங்களை மட்டும் பகிர்ந்து கொள்வதற்கான தளமாக கொள்ளலாம்.

ஒருவிதத்தில் கொஞ்சம் டிவிட்டர் கொஞ்சம் வலைப்பதிவின் கலைவை என்றும் சொல்லலாம்.டிவிட்டர் போல எண்ணத்தை பகிர்ந்து கொண்டு வகைப்பதிவு போல அதற்கான விளக்கத்தையும் அளிக்கலாம்.ஆனால் என்ன டிவிட்டர் அல்லது வலைப்பதிவில் முதலில் நமக்கான முகவரி கணக்கை துவக்கி கொள்ள வேண்டும்.அதனை தொடர்ந்து பராமரிக்க வேண்டும்.

ஆனால் ‘யீடி’யிலோ நினைப்பதை மட்டும் சொல்லிவிட்டு வேறு வேலை பார்க்கலாம்.நிரந்தர உறுப்பினர் பக்கம் எதுவும் தேவையில்லை.அதாவது சொலவதற்கு ஏதோ ஒன்று மனதில் இருக்கிறது,ஆனால் அதற்காக வலைப்பதிவை துவக்கி நடத்த விரும்பாதவர்களுக்கு இந்த சேவை பயனுள்ளதாக இருக்கும்.

எந்த அளவுக்கு இந்த தளம் பிரபலமாக கூடும் என்று தெரியவில்லை.ஆனால் சுவாரஸ்யமாக இருக்கிறது.இணையத்தில் என்னவெல்லாம் செய்து கொண்டிருக்கின்றனர் என்ற வியப்பையும் ஏற்படுத்துகிற‌து.

சில நேரங்கள் மற்றவர்களின் வாழ்கை அனுபவ வெளிப்பாட்டையோ அல்லது சிந்த‌னை கீற்றையோ இதில் தரிசிக்க நேரலாம்.

இணையதள முகவரி;http://www.yeedy.com/

what

டிவிட்டரில் இன்றைய சூடான செய்தி.

டிவிட்டர் என்ன நினைக்கிறதோ அதை தான் உலகம் நினைக்கிறது என்று சொல்லலாம்.இதையே ,உலகம் என்ன நினைக்கிற‌தோ அதையே டிவிட்டர் நினைப்பதாகவும் சொல்லலாம்.

உலகம் எதை பற்றி பேடிக்கொண்டிருக்கிறதோ அதை பற்றி தான் டிவிட்டரும் பேசுகிறது.அதாவது டிவிட்டரில் குறும்பதிவுகள் பகிர்ந்து கொள்ளப்படுகின்றன.இப்படி எந்த தலைப்பின் கீழ் அதிக குறும்பதிவுகள் வெளியாகின்றனவே அந்த தலைப்பு கவனத்தை ஈர்த்து உலகை பேச வைத்து விடுகின்றன‌.

இப்படி டிவிட்டரில் முன்னிலை பெறும் தலைப்புகள் திடிரென பரப‌ரப்பை ஏற்படுத்தி மேலும் கவனத்தை ஈர்க்கும்.அதன் பிறகு பார்த்தால் எங்கும் அந்த தலைப்பு பற்றி தான் பேச்சாக இருக்கும்.டிவிட்டர் மொழியில் இவை டிரென்டிங் டாபிக் என்று அழைக்கப்படுகின்றன.

ஒரே தலைப்பு பற்றி பலரும் குறும்பதிவுகளை பகிர்ந்து கொள்ளத்துவங்கும் போது அவை தானாக மேலெழுத்து வந்துவிடுகின்ற‌ன.

இவ்வாறு டிவிட்டரில் மேலெழும் தலைப்புகளை கோட்டை விடாமல் இருக்க விரும்பினால் ‘வாட் த டிரென்ட்’ இணையதளம் அதற்காகவே உருவாக்கப்பட்டுள்ளது.

இதோ இந்த நிமிடத்தில் டிவிட்டரில் எந்த தலைப்பு மேலெழுகிறதோ அந்த தலைப்புகளை எல்லாம் தொகுத்தளித்து நம் பார்வைக்கு வைக்கிறது.அதனால் தான் உடனடி வலையின் முகப்பு பக்கம் என்றும் பெருமைபட்டு கொள்கிற‌து.

நாளிதழ் உலகில் சுடச்சுட செய்திகள் என்று சொல்வது போல டிவிட்டர் உலகில் அந்த நிமிடத்தில் பரிமாறப்படும் தகவல்கள் ரியல் டைம் என்று சொல்லப்படுகின்றன.இந்த உடனடி செய்திகளில் கவனிக்க வேண்டியவை எவை என்பதை தான் இந்த தளம் அடையாளம் காட்டுகிறது.

செய்தி தளங்களில் எப்படி முக்கிய செய்திகள் பட்டியலிடப்பட்டிருக்குமோ அதே போல இந்த தள‌த்தில் டிவிட்டரில் இப்போது எந்த தலைப்பு முக்கியமாக இருக்கின்றனவோ அவை எல்லாம் வரிசையாக பட்டியலிடப்படுகின்ற‌ன.

குறிப்பிட்ட தலைப்பை கிளிக் செய்தால் அந்த தலைப்பில் வெளியான குறும்பதிவுகளை எல்லாம் படிக்கலாம்.முதல் பத்து தலைப்புகள் வரிசையாகவும் அதற்கு மேலே மற்ற தலைப்புகள் குறிச்சொற்களாகவும் இடம் பெறுகின்றன.

இவை உலகலாவிய போக்குகள் .அதே நேரத்தில் ஒவ்வொருவரும் தங்கள் நாட்டில் எநத தலைப்பு டாப்பில் இருக்கின்றன என்பதையும் தனியே தெரிந்து கொள்ளலாம்.வலது பக்கத்தில் உள்ள நாடுகளின் பட்டியலில் கிளிக் செய்தால் குறிப்பிட்ட நாட்டு டிவிட்டர் போக்குகளை தெரிந்து கொள்ளலாம்.அதே போல முக்கிய நகரங்களுக்கான டிவிட்டர் போக்குகளையும் அந்த அந்த நகரங்களை கிளிக் செய்து பார்க்கலாம்.

அது மட்டும் அல்ல,ஒவ்வொரு தலைப்புடனும் அந்த தலைப்பு டிவிட்டரில் பிரபலமானதற்கு என்ன காரணம் என்பதற்கான சுருக்கமான விளக்கமும் இடம் பெறுகிறது.இந்த விளக்கத்தை உறுப்பினரகளே சமர்பிக்கலாம் என்பது தான் விசேஷம்.அப்படியே டிவிட்டரில் முன்னிலை பெறும் தலைப்புகளையும் சமர்பிக்க‌லாம்.குறும்பதிவுகளை அப்படியே ரீடிவீட் செய்ய‌லாம் என்பதை சொல்லவே வேண்டாம்.

ஆக டிவிட்டரும் உலகமும் என்ன நினைக்கிறது என அறிய விரும்பும் போதெலாம இந்த தளத்திற்கு விஜயம் செய்யலாம் .இல்லை இந்த தளத்தை டிவிட்டரில் பின் தொடர்ந்தால் டிவிட்டரையே பின் தொடர்வது போல பிரபலமான தலைப்புகளை எல்லாம் உடனே உடனே தெரிந்து கொள்ளலாம்.

இணையதள முகவரி;http://www.whatthetrend.com/

பின்குறிப்பு;இப்போது இந்தியாவை பொருத்தவரை சச்சின் 100 வது சத்ததை அடிப்பதற்கு முன் என்ன விஷயம் எல்லாம் நடக்கும் என்பது தொடர்பான குறும் பதிவுகளே முன்னணியில் உள்ளன.

janmap

உலகின் பாடலை கேட்டு ரசிக்க இந்த இணையதளம்.

அமெரிக்கா என்றால் ராக் அன் ரோல்.ஜமைக்கா என்றால் ரெகே.பிரேசில் என்றால் துள்ளி குதிக்க வைக்கும் சம்பா நடன மெட்டு.கியூபா என்றால் தாளம் போட் அவைக்கும் கரிபிய இசை.இந்தியா என்றால் வடக்கே இந்துஸ்தானி,தெற்கே கர்நாடக சங்கீதம்.கூடவே நாட்டு பாடல்கள்.

இப்படி ஒவ்வொரு நாட்டுக்கும் ஒரு இசை மனம் உண்டு.வியட்னாமில் போனால் ஒரு வகையான சங்கீதம் கேட்கலாம்.இத்தாலியிலோ ஸ்பெயினிலோ முற்றிலும் வேறு வகையான இசையை கேட்டு மகிழலாம்.

உள்நாட்டு சங்கீதம் இல்லையென்றால் சர்வதேச அளவிலான பிரபலமான பாப் பாடல்களை கேட்டு ரசிப்பத்தை காட்டிலும் புதுப்புது வகையான இசையை கேட்டு ரசிக்க வேண்டும் என்ற விருப்பம் இருந்தால் ஜாம்மேப் இணையதளம் உங்களை துள்ளி குதிக்க வைத்துவிடும்.

உலகில் உள்ள எந்த நாட்டின் இசையை கேட்டு ரசிக்க வேண்டும் என்றாலும் இந்த தளம் வழி செய்கிறது.

புதிய நாட்டின் பாடலை கேட்டு ரசிப்பதும் எளிதானது தான்.எந்த நாட்டின் இசையை கேட்க விருப்பமோ அந்த நாட்டின் மீது கிளிக் செய்தால் போதும் அந்த நாட்டில் இருந்து பட்டியலிடப்பட்டுள்ள பாடல்கள் வந்து நிற்கின்றன.அதில் தேவையானதை கிளிக் செய்து கேட்க வேண்டியது தான்.

தளத்தின் முகப்பு பக்கத்திலேயே இதற்கான உலக வரைபடம் தோன்றுகிறது.அதில் நாடுகளை கிளிக் செய்து கொள்ளலாம்.

இந்தியாவிற்கான பட்டியலில் சென்னை இசைக்குழு உட்பட பல்வேறு குழுக்களின் இசை பட்டியலிடப்படுகிறது.

ஆனால் ஒன்று ஒரு நாட்டின் இசைக்கான மாதிரியாக தான் இந்த பட்டியல் அமைகிறதே தவிர குறிப்பிட்ட ஒரு நாட்டின் இசை பரப்பை அப்படியே முழுமையாக பிரதிபலிக்ககூடியது என்று சொல்ல முடியாது.இதற்கு காரணம் பொது காப்புரிமை உள்ள பாடல்கள் மட்டுமே இடம் பெறுவது தான்.

இருந்தாலும் கூட உலக நாடுகளின் இடையை இருந்த இடத்தில் இருந்தே கேட்டு ரசிப்பதற்கான வாய்ப்பு இசை பிரியர்களை மகிழ்ச்சியில் ஆழ்த்திவிடும்.

அதிலும் உறுப்பினராக சேர வேண்டிய தேவையில்லாமல்,எந்த இசை கேட்கும் பிளேயரையும் டவுண்லோடு செய்யாமல் கிள்க் செய்து மட்டுமே கேட்டு மகிழ்வது உண்மையிலேயே இனிமையான அனுபவம்.பல நேரங்களில் அருமையான புதிய இசயையும் கூடவே புதிய பாடகர்ளையும் அறிமுகம் செய்து கொள்ளலாம்.

உலகில் எத்தனை நாடுகள் இருக்கின்றன.எத்தனை வகையான இசையை கேட்டு ரசிக்கலாம் இல்லையா!

உலக இசையை கேட்க இணைய முக‌வரி;http://www.jammap.com/

உலக போராட்டங்களை அறிய ஒரு இணையதளம்.

உலகம் போராடிக்கொண்டே இருக்கிறது.அதாவது, உலகில் எங்காவது ஒரு மூளையில் ஏதாவது ஒரு காரணத்திற்காக ஏதாவது ஒரு போராட்டம் நடந்து கொண்டு தான் இருக்கிற‌து.

ஆனால் எல்லா போராட்டங்களுமே உலகின் கவனத்தை ஈர்ப்பத்தில்லை.சில இருட்டடிப்பு செய்யப்படுகின்ற‌ன.சில மறைக்கப்படுகின்றன.பல அலட்சியப்படுத்தப்படுகின்றன.ஆனால் இவற்றை மீறி ஆர்ப்பாட்டம்,பேரணி,பொதுக்கூட்டம்,கிளர்ச்சி என மக்கள் தங்கள் எதிர்ப்பை தெரிவித்து கொண்டு தான் இருக்கின்றன.

நாளிதழ்களும் ,செய்தி தளங்களும் இந்த போராட்டங்களை பதிவு செய்து கொண்டு தான் இருக்கின்றன.போர்க்குணம் கொண்டவர்கள் அதாவ்து போராட்டத்தில் ஆர்வம் உள்ளவர்களும்,போராட்டங்களுக்கு ஆதரவு தெரிவிக்க விரும்புகிறவர்களும் போராட்ட செய்திகளை தேடிப்பிடித்து படித்தும் வருகின்றனர்.

ஆனால் போராட்ட செய்திகளை எல்லாம் ஒரே இடத்தில் காணவேண்டும் என நினைத்தால் அதற்கான வழி இது வரை இல்லை.போராட்ட செய்திகளுக்கு முக்கியத்துவம் தரும் தளங்களாக தேடிச்செல்ல வேண்டும்.சினிமா செய்தி,உலக செய்தி ,தொழில்நுட்ப செய்தி என அனைத்து வகையான் செய்திகளையும் ஒரே இடத்தில் தொகுத்து தர பல தளங்கள் இருக்கும் நிலையில் போராட்டங்களுக்கு ஒரு தளம் இல்லாதது பெருங்குறை தான்.

இந்த குறையை போக்கும் வகையில் உலக் போராட்டங்களை ஒரே இடத்தில் தரும் தளமாக வேர்ல்டு அட் புரடஸ்ட் இணையதளம் உருவாக்கப்பட்டுள்ளது.

ஆர்ப்பாட்டங்கள்,பேரணிகள்,கிளர்ச்சிகள் ஆகியவற்றை அறிந்து கொள்ளுங்கள் என்று அழைப்பு விடுக்கும் இந்த தளம் உலகில் அதற்கேற்ப உலகில் எங்கெல்லாம் போராட்டம் நடக்கின்றன்னவோ அந்த போராட்ட செய்திகளை தொகுத்தளிக்கிற‌து.

போராட்ட செய்திகளை பலவிதமாக தெரிந்து கொள்ளலாம்.முகப்பு பக்கத்தின் மேலேயே சமீப்பத்திய போராட்ட செய்திகள் செய்தி வரிகளாக ஓடிக்கொண்டே இருக்கின்றன.அதன் கீழே உலக வரைபடம் போராட்ட வரைபடமாக விரிகிறது.வரைபடத்தில் எந்த இடத்தில் கிளிக் செய்தாலும் அந்த நாட்டில் நடைபெற்று கொண்டிருக்கும் போராட்டங்கள் தொடர்பான‌ செய்திகள் வருகின்ற‌ன.
வரைபடத்தில் சில நாடுகள் சிவப்பு வண்ணத்தில் கொடுக்கப்பட்டுள்ளன.அதன் பொருள் அந்த நாடுகளில் நடக்கும் போராட்டங்கள் தொடர்பான செய்திகள் அதிக அளவில் உள்ள என்பதாகும்.ஒருவிதத்தில் போராட்டத்தின் தீவிரத்தையும் இவை உணர்த்தக்கூடும்.போராட்டம் தீவிரமாகும் போது செய்திகளும் அதிகமாக வெளியாக வாய்ப்புள்ளது தானே.
வரைபடத்தை சின்னதக்கியும் பெரிதாக்கியும் பார்க்கும் வசதியும் உள்ளது.அதே போல கீழே வந்தால் அங்குள்ல ஸ்லைடர் வசதியை கொண்டு பழைய போராட்டங்க‌ளை தேதிவாரியாக பார்க்கலாம்.

போராட்டத்தில் நாட்டம் கொண்டவர்களுக்கு இந்த தளம் பேரூதவியாக இருக்கும்.ஆய்வு நோக்கிலும் இந்த தளம் பயன்படும்.மனித உரிமை ஆர்வளர்கள் அரசுகள் பொய சொல்கின்ரனவா என்று கன்கானிக்கவும் இந்த தளத்தை பய‌ன்ப‌டுத்த‌லாம்.

இப்போதைக்கு போராட்டங்கள் பற்றி நாளிதழ்களிலும் செய்தி தளங்களிலும் வெளியாகும் செய்திகளே இங்கு தொகுத்தளிக்கப்படுகின்றன.இருட்டடிப்பு செய்யப்படும் போராட்டங்கள் பற்றி அறிய வாய்ப்பில்லை.

எனவே போராட்ட விவரங்களை இணையவாசிகள் சம‌ர்பிக்க வாய்ப்பளித்தால் மேலும் சிற‌ப்பாக இருக்கும்.அதே போல போராட்டங்கள் தொடர்பான் டிவிட்டர் மற்றும் பேஸ்புக் பதிவுகள் கூட தொகுத்தளிக்கப்படலாம்.

எகிப்திலும்,அரபு நாடுகளிலும் நடைபெற்ற மக்கள் கிள‌ர்ச்சி டிவிட்டரிலும் பேஸ்புக்கிலும் தானே உயிர் பெற்றன.

இதே போன்றதொரு போராட்டதளத்தினை இந்தியாவுக்காகவும் தமிழகத்துக்காகவும் ஊட உருவாக்கினால் நன்றாக இருக்கும்.

போராடங்களை அறிய இணைய‌ முகவரி http://worldatprotest.com/