Tag Archives: apps

1look

கூட்டத்தில் நண்பர்களை தேட உதவும் எளிமையான செயலி

இதோ இன்னொரு முட்டாள்தனமான செயலி, ஆனால் இதை நிச்சயம் நீங்கள் விரும்புவீர்கள் – இப்படி தான் ஸ்மார்ட்போன் உலகிற்கான புதிய செயலியான லுக்பாரை (LookFor ) அதனை உருவாக்கியுள்ள லோகன் ரைலே அறிமுகம் செய்கிறார்.

எல்லாமே ஸ்மார்ட் அடைமொழியுடன் அறிமுகமாகி கொண்டிருக்கும் உலகில் ஸ்மார்ட்போன்களின் உலகில் மட்டும் முட்டாள்த்தனம் எனும் வர்னணை மிகவும் பிடித்தமானதாக இருக்கிறது. பல வடிவமைப்பாளர்கள், புத்திசாலித்தனமானது என்றெல்லாம் மார்தட்டிக்கொள்ளாமல், இது கொஞ்சம் மடத்தனமான செயலி என்று சற்றே கூலாக தங்கள் புதிய செயலிகளை முன் வைக்கின்றனர்.

அதாவது, எங்கள் செயலி அதை செய்யும், இதை செய்யும் என்றெல்லாம் ஓவராக பேசமாமல், கொஞ்சம் விளையாட்டுத்தனமாக முட்டாள் செயலிகளாக இவை அறிமுகம் செய்யப்பட்டாலும் இவை முற்றிலும் பயனில்லாதவை என்று சொல்லிவிட முடியாது. இந்த செயலிகளும் நிச்சயம் பயனுள்ளவை தான்,.ஆனால் அந்த பயன்பாடு குறிப்பிட்ட நோக்கம் மற்றும் வரம்பு சார்ந்தது.

எல்லாவற்றுக்கும் மேல் இந்த செயலிகள் நிச்சயம் முதல் பார்வையில் உங்களை கவர்ந்திழுத்து குறைந்தபட்சம் அட போட வைக்கும்.
சமீபத்திய அறிமுகமான லுக் பார் இதற்கு அழகான உதாரணம்.
உலகின் மடத்தனமான இந்த செயலி, எந்த கூட்டத்திலும் உங்கள் நண்பர்களை அடையாளம் காண உதவுகிறது. எப்படி?
1look1
இந்த செயலியை பயன்படுத்த தீர்மானித்து அதை டவுன்லோடு செய்து கொண்டால் அதில் தேர்வு செய்ய அதிக அம்சங்க்ள் கிடையாது.அதில் இருப்பதெல்லாம் வண்ணங்கள் தான். அந்த வண்ணத்தில் ஒன்றை தேர்வு செய்து கொண்டால் உங்கள் போன் திரை அந்த வண்ணத்தில் பளிச் என கண் சிமிட்டும். அவ்வளவு தான் இந்த செயலி!
இதனால் என்ன பயன்? கூட்டமான இடங்களில் உங்கள் நண்பர்களை தேட இதை பயன்படுத்தலாம். அதாவது, பலர் கூடியுள்ள இடங்களில் இந்த செயலியை கிளிக் செய்து போனை கையுயர்த்தி காட்டினால், கூட்டத்தில் எங்கோ இருக்கும் நண்பர்களுக்கு, இதே நானிருக்கிறேன் என வண்ண போன் சிமிட்டல் மூலம் உணர்த்தலாம்.
இதெல்லாம் ஒரு செயலியா என கேட்கத்தோன்றுகிறதா? உண்மை தான் என இதன் உரிமையாளர் ரைலேவும் ஒப்புக்கொள்கிறார். ஆனாலும், கூட்டம் நிறைந்த இசை கச்சேரிகளிலோ, திரையரங்களிலோ உங்களை நண்பர்களுக்கு உணர்த்த இது கைகொடுக்கும் என்று நம்புகிறார்.

தேவைப்பட்டால் நண்பர்களுக்கு இந்த செயலி பற்றி குறுஞ்செய்தி அனுப்பி அதில் வண்ணத்தையும் குறிப்பிட்டு பின்னர் போனை உயர்த்தி காட்டலாம் என்கிறார்.
கூட்டம் நிறைந்த இடங்களில் நண்பர்களை தேட இது நிச்சயம் பயன்படும் என்று ரைலே உறுதியுடன் சொல்கிறார். ஏனெனில் அவருக்கு இப்படி ஒரு தேவை ஏற்பட்டதால் தான் இந்த செயலியை உருவாக்கும் எண்ணமே உண்டானதாம்.

இசை விழா ஒன்றில் பங்கேற்ற போது அந்த கூட்டத்தில் நண்பர்கள் இருக்கின்றனரா என தேடிப்பார்க்க ஒரு எளிய வழி தேவை என உணர்ந்த போது , இப்படி போனை உயர்த்தி காட்டி உணர்த்தலாம் என தோன்றியதாக ரைலே கூறியுள்ளார்.

அதன் பிறகு இந்த எண்ணத்துடன் இணைய நிதி திரட்டும் மேடையான கிக்ஸ்டார்ட்டரில் இரு பக்கத்தை அமைத்து ஆதரவு திரட்டி இப்போது ஐஒஎஸ் மற்றும் ஆண்ட்ராய்டிற்காக லுக் பார் செயலியை அறிமுகம் செய்துள்ளார்- மிகவும் புத்திசாலித்தனமாக முட்டாள் செயலி எனும் வர்னணையுடன்!.

லுக் பார் செயலி:https://play.google.com/store/apps/details?id=lookfor.retroproof.net.lookfor

——

skellie-skeleton6-550x352

இன்ஸ்டாகிராமில் கலக்கும் எலும்புக்கூடு !

அந்த எலும்புக்கூடு ரெஸ்டாரண்டிற்கு செல்கிறது. கம்ப்யூட்டர் முன் அமர்ந்து ஷாப்பிங் செய்கிறது. மேக் அப் செய்து கொள்கிறது. கண்ணாடி முன் அமர்ந்து அழகு பார்க்கிறது. நீச்சல் குளத்தில் குளிக்கிறது. புத்தாண்டு உறுதிமொழி எழுதிவைக்கிறது. எல்லாவற்றையும் புகைப்படம் எடுத்து இன்ஸ்டாகிராமில் பகிர்ந்து கொள்கிறது.இந்த பகிர்வ்களை பார்த்து ரசிக்க லட்சக்கணக்கானோர் காத்திருக்கின்றனர்.புகைப்பட பகிர்வு சேவையான இன்ஸ்டாகிராமில் அதிக பாலோயர்கள் அதற்கும் இருக்கின்றனர். சும்மாயில்லை, இன்றைய தேதிக்கு 2 லட்சத்தை அதன் பின் தொடர்பாளர்கள் எண்ணிக்கை நெருங்கியிருக்கிறது என்றால் பார்த்து கொள்ளுங்கள். ஆம், இன்ஸ்டாகிராமில் கலக்கி கொண்டிருக்கும் ஸ்கல்லியை அறிமுகம் செய்து கொள்ளுங்கள்! அது தான் அந்த எலும்புக்கூட்டின் பெயர்.

ஸ்கல்லியின் இன்ஸ்டாகிராம் பக்கத்தை பார்த்தால் அதன் புகைப்பங்களை பார்த்து நீங்களும் சொக்கிப்போவீர்கள். நீங்கள் இன்ஸ்டாகிராம் பயனாளி என்றால் அதற்கு கிடைத்து வரும் ஆதரவை பார்த்து லேசாக பொறாமை படவும் செய்வீர்கள். ஒரு எலும்புக்கூட்டிற்கு இத்தனை பாலோயர்களா? என்ற எண்ணம் ஏற்படலாம். ஆனால் அதன் படங்களை பார்த்தால், அததனையும் அழகாக தான் இருக்கின்றன என்று சொல்லத்தோன்றும்.

எலும்புக்கூடு எப்படி தன்னைத்தானே படம் எடுத்து வெளியிட முடியும் என்ற கேள்வி இந்நேரம் உங்கள் மனதில் தோன்றி அதற்கான பதிலையும் கூட ஊகித்திருக்கலாம்.

ஆம், சரி தான் இந்த எலும்புக்கூடு இன்ஸ்டகிராமின் கணக்கின் பின்னே யாராவது இருக்க வேண்டும் என்னும் ஊகம் சரியானது தான்.

கனடா நாட்டைச்சேர்ந்த டானா ஹெர்லி (Dana Herlihy ) எனும் பெண்மணி தான் இந்த எலும்புக்கூட்டை இன்ஸ்டாகிராமில் உரிய பெற வைத்திருப்பவர்- ஓஎம்ஜிலிட்ரலிடெட் எனும் முகவரியில்!

சமூக ஊடக மார்கெட்டிங் நிறுவனம் ஒன்றில் பணியாற்றும் டானா, இந்த இன்ஸ்டாகிராம் பக்கத்தை அமைத்ததன் பின்னே சுவாரஸ்யமான கதை இருக்கிறது.

skellie-skeleton2-550x550கடந்த ஆண்டு அக்டோபர் மாதம் டானா பணியாற்றும் நிறுவனத்திற்கு யாரோ ஒருவர் பிளாஸ்டிக் எலும்புக்கூட்டை பரிசாக அனுப்பி வைத்திருக்கிறார். இது போன்ற திகிலூட்டும் பரிசிகளுக்கும் செயல்களுக்கும் பெயர் பெற்ற ஹாலோவன் பண்டிகையின் போது தான் ஒரு குறும்புக்காரர் இந்த விஷமத்தனத்தை செய்திருக்கிறார். எலும்புக்கூட்டை பார்த்து டானாவின் சக ஊழியர்களில் எத்தனை பேர் பயந்தனர் என தெரியவில்லை, ஆனால் குறும்புக்காரர் ஒருவர் அந்த எலும்புக்கூட்டின் கைகளில் ஸ்டார்பக்ஸ் காபி கோப்பையை வைத்துவிட்டு சென்று விட்டார். எலும்புக்கூடு காபி பருகுகிறதாம் !

இந்த காட்சியை பார்த்து புன்னகைத்த டானா அதை அப்படியே கிளிக் செய்து தன்னுடைய இன்ஸ்டாகிராம் பக்கத்தில் பகிர்ந்து கொண்டார். எலும்புக்கூடு காபி குடிக்கும் புகைப்படம் செம கியூட்டாக இருப்பதாக பலரும் பார்த்து ரசித்தனர். அதோடு அதை மற்றவர்களுக்கு பகிர்ந்து கொள்ளவும் செய்தனர். இப்படி தான் அந்த புகைப்படம் இணையத்தில் பிரபலமாகி ஸ்கெல்லியாக உருவெடுத்தது. டானா தொடர்ந்து எலும்புக்கூட்டை வைத்து வேறு சில புகைப்படங்கலை எடுத்து பகிர்ந்து கொண்ட போது இதற்காக என்றே தனி இன்ஸ்டாகிராம் பக்கத்தை அமைக்கலாமே என நினைத்து , எலும்புகூட்டிற்கு பெயரும் வைத்து இன்ஸ்டாகிராமில் அறிமுகம் செய்துவைத்தார்.

அடுத்தடுத்த புகைப்படங்களில் ஸ்கெல்லியும் பிரபலமாகி அதற்கென்று ரசிகர்கள் உருவாகத்துவங்கிவிட்டனர்.

அதற்கு ஈடு கொடுக்கும் வகையில் டானாவும் ஸ்கெல்லியை விதவிதமாக போஸ் கொடுக்க வைத்து புகைப்படங்களை பகிர்ந்து கொண்டு வருகிறார். இன்ஸ்டாகிராமில் பேஷன் ரசம் சொட்டும் புகைப்படங்களையும் சுய அழகு புகைப்படங்களையும் பார்த்து அலுத்தவர்கள் ஒரு மாறுதலுக்காக ஸ்கெல்லியின் புகைப்படத்த்தை பார்த்து ரசிக்கின்றனர். அதின் பின்னே மறைந்திருக்கும் கேலியான நகைச்சுவை சொக்க வைக்கிறது.

ஆனால் , ஸ்கெல்லியின் பிரம்மாவான டானா வெறும் நகைச்சுவையாக மட்டும் இந்த படங்களை எடுப்பதில்லை. சமகாலத்து இளம் பெண்களின் மனப்போக்கையும் பழக்க வழக்கங்களையும் அழகாக பகடி செய்யும் வகையில் இந்த புகைப்படங்களை வெளியிட்டு வருகிறார். அதாவது இந்த கால பெண்கள் எதை எல்லாம் புதிய போக்கு என விழுந்தடித்து பின்பற்றுகின்றனரோ அதை எல்லாம் ஸ்கெல்லியையும் செய்ய வைத்து விமர்சனம் செய்கிறார்.

அழகிய பின்னணியில் ஃபர் கோட்டு போட்டுக்கொண்டு தலையில் மலர் கிரிடம் வைத்துக்கொண்டிருக்கும் பெண் போல எலும்புக்கூடு போஸ் தரும் புகைப்படமும் அதனுடன் வன ராணி போல உணர்கிறேன் எனும் வாசகமும், சிரிக்கவும் வைக்கிறது சிந்த்திக்கவும் வைக்கிறது.

இன்னொரு புகைப்படத்தில் கண்களில் வெள்ளரிக்காயை வைத்துக்கொண்டு அழகு கலை ரகசியம் பற்றி பேசுகிறது. இன்னொரு படத்தில் பணியிடத்தில் களைத்து போய் படுத்திருக்கும் போசில் அலுத்துக்கொள்கிறது. இப்படி ஒவ்வொரு புகைப்படமும் சமகால போக்கை அழகாக கேலிக்குள்ளாக்கி பார்ப்பவர்களை ரசிக்க வைக்கிறது.

skellie-skeleton7-550x550இணையம் மூலம் படம் பார்க்கும் சேவையான நெட்பிளக்சில் படம் பார்ப்பது, போம் குளியல் குளித்து இளைப்பாறுவது, புதிய ஷூ வாங்கி கொண்டு பெருமைபடுவது என ஒவ்வொரு படமும் ஒரு செய்தியை கேலியாக முன்வைக்கிறது. ஆனால் புகைப்படத்தின் அமைப்பும் அதன் பின்னே உள்ள கற்பனைத்திறன் மற்றும் கிரியேட்டிவிட்டி கவர்ந்திழுக்குக்கிறது.

அதனால் தான் ஸ்கெல்லிக்கு ரசிகர்கள் கூடிக்கொண்டே போகின்றனர்.

இவ்வளவு ஏன் பத்திரிகைகளில் ஸ்கெல்லியின் பேட்டியும் கூட வெளியாகி இருக்கிறது.

இன்ஸ்டாகிராமில் சில ஆயிரம் பாலோயர்களையேனும் பெறுவது எப்படி என பலரும் திண்டாடிக்கொண்டிருக்கையில் டானா, ஒரு எலும்புகூட்டை உருவாக்கி லட்சகணக்கானவர்களை அதன் அபிமானயாக்கி காட்டியிருக்கிறார். வித்தியாசமாக செயல்பட வேண்டும், அந்த வித்தியாசம் கவனத்தை பெறும் போது அந்த ஆர்வத்தை தக்க வைத்துக்கொள்ளும் அளவுக்கு புதுமையை கடைபிடிக்க வேண்டும் என்பதும் தான் ஸ்கெல்லி மூலம் டானா பிரலமாகி இருப்பது உணர்த்தும் செய்தி.

டானா, ஸ்கெல்லி மீது ஏற்பட்டிருக்கும் ஆர்வத்தை அடுத்த கட்டத்திற்கு கொண்டு செல்லும் வகையில் ஸ்கெல்லி படம் போட்ட கோப்பைகள், ஸ்மார்ட்போன் கவர்கள் ஆகியவற்றையும் விற்பனை செய்யத்துவங்கியிருக்கிறார்.

டானாவின் கதை ஊக்கமளிக்கிறதா? புதுசாக ஏதாவது செய்து பாருங்கள் ,நீங்களும் பிரபலமாகலாம்.

 

ஸ்கெல்லியின் இன்ஸ்டாகிராம் பக்கம்:..http://instagram.com/omgliterallydead/

 

——–

 

 

 

 

 

iphone

பார்வையற்றோருக்கு விழியாக இருக்க உதவும் செயலி

ரு சின்ன உதவி செய்வதில் திருப்தி அடையும் குணமும் மனமும் உள்ளவர்கள் உற்சாகமாக உதவிக்கரம் நீட்டி உலகம் முழுவதும் உள்ள பார்வையற்றவர்களுக்கு விழியாக இருந்து வழி காட்டக்கூடிய செயலி அறிமுகமாகி இருக்கிறது. இந்த செயலியின் மனிதநேய தன்மைக்கு ஏற்ப அறிமுகமான சில நாட்களிலேயே இந்த செயலி 40 ஆயிரத்துக்கும் மேற்பட்ட பங்கேற்பாளர்களை ஈர்த்திருக்கிறது.

பி மை ஐஸ் ( Be My Eyes) எனும் அந்த செயலி ஐபோனில் செயல்படும் வகையில் உருவாக்கப்பட்டுள்ளது. ஒரு சில நிமிடங்களை மற்றவர்களுக்காக ஒதுக்கி சின்ன உதவிகளை செய்யத்தயாராக இருப்பவர்களை , பார்வையற்றவர்களுடன் இணைப்பது இதன் நோக்கமாக இருக்கிறது.இப்படி முன்பின் தெரியாதவர்கள் செய்யும் சின்ன உதவிகள் பார்வையற்றோருக்கு மகத்தான உதவியாக அமைவதை இது சாத்தியமாக்க விரும்புகிறது.

சுருக்கமாக சொன்னால், பார்வையற்றவர்களுக்கு மற்றவர்கள் விழியாக இருந்து வழி காட்ட வைக்கிறது இந்த செயலி! எப்படி? பார்ப்போம்.

பார்வையற்றவர்கள் மற்றும் அவர்களுக்கு உதவ தயாராக இருப்பவர்கள் என இரு தரப்பினரும் இந்த செயலியை தங்கள் போனில் தரவிறக்கம் செய்து கொண்டு, உதவுபவர்களாக அல்லது உதவி கோருபவர்களாக பதிவு செய்து கொள்ள வேண்டும். அதன் பிறகு, பார்வையற்ற உறுப்பினர்களுக்கு மற்றவர் உதவி தேவைப்படும் நேரங்களில் இந்த செயலி மூலம் அவர்கள் உதவி கோரலாம்.

பார்வையற்றவர்கள் மற்றும் பார்வை குறைபாடு கொண்டவர்கள் மிகுந்த தன்னம்பிக்கையுடன் தங்கள் பணியை மேற்கொள்ளக்கூடியவர்களாக இருந்தாலும் சில நேரங்களில் அவர்களும் மற்றவர்களின் விழிப்பார்வை தேவைப்படலாம். உதாரணத்திற்கு பால் பாக்கெட் அல்லது உணவு பொருளின் மீதான காலாவதி தேதியை தெரிந்து கொள்ளும் தேவை ஏற்படலாம். அல்லது கையில் வைத்திருக்கும் பழரசம் மாம்பழமா? ஆப்பிளா என அறிய விரும்பலாம். அல்லது தெரு முனையில் இருக்கும் அறிவிப்பு பலகையின் வாசகத்தை படித்து பார்க்கும் தேவை ஏற்படலாம்.

இது போன்ற நேரங்களில் அவர்கள் அருகே இருப்பவரின் உதவியை நாட வேண்டியிருக்கும். அருகே யாரும் இல்லாவிட்டால் அல்லது அருகே இருப்பவர்கள் செவி சாய்க்க மறுத்தால் காத்திருக்க வேண்டும். இந்த இடத்தில் தான் பி மை ஐஸ் செயலி உதவிக்கு வருகிறது. இத்தகைய நேரங்களில் பார்வையற்றவர்கள் செயலியை ஆன் செய்து உதவி தேவை என கோரிக்கை வைத்தால் போதும். அந்த கோரிக்கை பங்கேற்பாளர்களுக்கு அனுப்பி வைக்கப்படும். அதை பார்த்தததும் உதவ தயாராக இருப்பவர்கள் சம்மதம் தெரிவித்தால் உடனே ஐபோனில் இருக்கும் வீடியோ உரையாடல் வசதி மூலம் இருவரும் இணைக்கப்படுவார்கள். அதன் பிறகு மறு முனையில் இருப்பவர் பார்வையற்றவர் தனது போனில் காட்டும் காட்சியை பார்த்து அவரது கேள்விகளுக்கு பதில் அளித்து வழிகாட்டலாம்.

உதவ தயாராக இருப்பவர்களுக்கு இது சாதாரண செயலாக இருந்தாலும் உதவி கோருபவருக்கு இது சரியான நேரத்தில் கிடைத்த வழிகாட்டுதலாக இருக்கும்.

இந்த கைகொடுத்தலை உலகின் எந்த மூளையில் இருப்பவரும் செய்யக்கூடிய வகையில் டிஜிட்டல் உறவுப்பாலம் அமைக்கும் வகையில் பி மை ஐஸ் உருவாக்கப்பட்டுள்ளது.

டென்மார்க் நாட்டை சேர்ந்த தெல்லி கிறிஸ்டன் என்பவர் தனது நிறுவனம் மூலம் இந்த செயலியை வடிவமைத்திருக்கிறார். இவரும் பார்வை குறைபாடு கொண்டவர் தான். இரண்டு ஆண்டுகளுக்கும் மேலாக உழைத்து இதை உருவாக்கி இருக்கிறார்.

இந்த மனிதநேய செயலியை இதுவரை 40 ஆயிரம் பேருக்கு மேல் தரவிறக்கம் செய்து ப்ங்கேற்பாளராக பதிவு செய்து கொண்டுள்ளனர். 1500 க்கும் மேற்பட்ட பார்வையற்றவர்களும் பயனாளிகளாக பதிவு செய்து கொண்டுள்ளனர். இதுவரை 3,000 உதவிகளுக்கு மேல் நிகழ்ந்துள்ளன.

உதவுபவர்கள் மற்றும் பயனாளிகள் இருவருமே மற்றவர்களை மதிப்பீடு செய்யலாம்.ஏதேனும் தவறான பயன்பாடு தலைதூக்கினால் அதை தவிர்க்க இந்த மதிப்பீடு உதவும் என கருதப்படுகிறது.

அடுத்ததாக ஆண்ட்ராய்டு சாதனங்களுக்கான செயலி வடிவமும் உருவாக்கப்பட்டு வருகிறது.

 

பி மை ஐஸ் செயலியின் இணைய பக்கம்:http://www.bemyeyes.org/

 

செயலிகள் சிறப்பு பற்றிய முந்தைய பதிவுகள்;

அகதிகள் நிலை உணர்த்தும் செல்போன் செயலி!http://cybersimman.com/2012/06/27/app/

 

 

பிரிந்தவர்களை சேர்த்து வைக்கும் அற்புதமான செயலி; http://cybersimman.com/2010/12/20/apps-2/

தூக்கத்தில் இருந்து எழுப்ப ஒரு புதுமையான ஆப்

ஸ்மார்ட்போன்களில் விதவிதமான ஆலாரம் வசதியை அளிக்கும் செயலிகள் (ஆப்ஸ்) இருக்கின்றன. வேக்கி ( ) இந்த ரகம் தான் என்றாலும் கொஞ்சம் புதுமையானது. கூடவே சுவாரஸ்யமானது. வேக்கி சாதராணமான அலாரம் இல்லை. மனித முகம் கொண்ட சமூக அலாரம். இந்த செயலியை பயன்படுத்தும் போது, இதில் தொலபேசி எண்ணை தெரிவித்து ( ரகசியம் காக்கப்படுமாம்) எந்த நேரத்திற்கு தூக்கத்தில் இருந்து எழுப்ப வேண்டும் என தெரிவிக்க வேண்டும். இதெல்லாம் வழக்கமான துயிலெழுப்பும் செயலிகளில் உள்ளது தான். ஆனால் வேக்கியில் என்ன வேறுபாடு என்றால் , குறிப்பட்ட நேரம் வந்தவுடன், யாரேனும் அறிமுகம் இல்லாத நபர் ஒருவர் போன் செய்து எழுப்புவார் என்பது தான்.

இந்த செயலியில் பதிவு செய்து கொண்டுள்ள ஒருவர் இப்படி போன் செய்து எழுதிருங்கள் என்பார். அநேகமாக அவர் சம வயதான எதிர் பாலினத்தை சேர்ந்தவராக இருப்பார் என வேக்கி தெரிவிக்கிறது. இந்த அழைப்புகள் தானாக ஒரு நிமிட்த்தில் துண்டிக்கப்பட்டு விடும். நீங்கள் விரும்பினால் யாரேனும் ஒருவரை இப்படி துயிலெழுப்பவும் பதிவு செய்து கொள்ளலாம். அறிமுகம் இல்லாத யாரோ ஒருவர் , போன் செய்து தூக்கத்தில் இருந்து எழுப்புவது வித்தியாசமான யோசனை தான். ஆனால் வில்லங்கமாக இல்லாமல் இருக்க வேண்டும். சரி , யாருமே கிடைக்காவிட்டால் என்ன செய்வது ? அந்த கவலை வேண்டாம் தானியங்கி மெசேஜ் எழுப்பி விடுமாம். அமெரிக்கா, யு.கே உள்ளிட்ட நாடுகளில் துயிலெழ இந்த சேவையை பயன்படுத்தலாம். ஆனால் உலகம் முழுவதும் உள்ளவர்கள் துயிலெழுப்ப முன்வரலாம்:

வேக்கி பற்றி அறிய: http://wakie.com/

ஒரு ஹிட் வீடியோகேமின் வெற்றிக்கதை!

sw2சூப்பர் ஹிட்டான படத்தை கொடுத்த இளம் இயக்குனர் எக்கச்சக்க எதிர்பார்ப்புக்கு மத்தியில் அடுத்த படத்தையும் சூப்பர் ஹிட்டாக கொடுத்தால் எப்படி இருக்குமோ அதே போல் இணைய உலகில் தனது இரண்டாவது மொபைல் கேம் மூலம் கவனத்தை ஈர்த்து சபாஷ் சொல்ல வைத்திருக்கிறார் வியட்னாம் நாட்டு வாலிபர் டாங் நுயேன்.( Dong Nguyen ).

ஸ்மார்ட் போன் வைத்திருப்பவர்கள் யார் இந்த நுயேன் என கேட்க வாய்ப்பில்லை.அவர்களில் பெரும்பாலானோர் ,நுயேனின் பிளாப்பி பேர்ட் (Flappy Bird ) மொபைல் கேமை அறிந்திருப்பார்கள். பலர் அந்த விளையாட்டை ஆடி களைத்து கடுப்பாகியும் இருப்பார்கள். அதாவது அந்த விளையாட்டு நுயேனால் திரும்பப்பெறப்படும் வரை!.
இந்த விளையாட்டு நுயேனை உலக அளவில் புகழ்பெற வைத்த்து. பின்னர் அந்த புகழில் இருந்து ஓடி ஒளியவும் வைத்தது.

இப்போது நுயேன் இரண்டாவது மொபைல் கேமான ஸ்விங் காப்டர்சை ( Swing Copters) ரிலிஸ் செய்து இணைய உலக முழுவதும் பேச வைத்திருக்கிறார். குறும்பதிவு சேவையான டிவிட்டரிலும் , இணைய விவாத குழுக்களிலும் இந்த விளையாட்டு பற்றி படு சுறுசுறுப்பாக விவாதம் நடைபெற்றுக்கொண்டிருக்கிறது. விவாதத்தின் முக்கிய சரடு இந்த விளையாட்டின் வெற்றிக்கொள்ள முடியாத தன்மை பற்றியதாகவே இருக்கிறது.
#SwingCopters எனும் ஹாஷ்டேகுடன் இந்த விளையாட்டு தொடர்பாக வெளியாகும் குறும்பதிவுகள் பெரும்பாலும் 1 அல்லது 2 புள்ளிகளுக்கு மேல் எடுக்க முடியாதது பற்றிய புலம்பல்களாகவே இருக்கிறது. ஒருவழியாக 1 புள்ளி எடுத்து விட்டேன்,இனி நிம்மதியாக தூங்கப்போவேன் ‘என்கிறது டான் கவுன்சல் என்பவரின் குறும்பதிவு. இன்னொருவர் இந்த விளையாட்டுக்கு பிளாப்பிபேர்டே பரவாயில்லை எளிமையாக இருந்தது என்று கூறியுள்ளார்.
ஸ்விங் காப்டர்ஸ் பிலாப்பி பேர்ட் போல அதிகம் டவுன்லோடு செய்யப்பட்ட விளையாட்டாக மாறுமா, அப்படியே மாறினாலும் எவ்வளவு காலம் அந்த இடத்தில் நீடிக்கும் என்று தெரியவில்லை. ஆனால் ஒன்று நிச்சயம், இந்த விளையாட்டு அதன் தன்மை பற்றி சுவாரஸ்யமான விவாதத்தை ஏற்படுத்தியிருக்கிறது. கூடவே பயனாளிகளை அடிமையாக்கும் ஆற்றல் கொண்ட வீடியோ கேமின் அடிப்படை தன்மை பற்றிய முக்கிய கேள்வியையும் எழுப்பியுள்ளது. வெற்றி பெற முடியாத ஒரு விளையாட்டை ஆடுவதில் ஏன் இத்தனை ஆர்வம் ஏற்படுகிறது என்பது தான் அந்த கேள்வி.
ஸ்விங் காப்டர்ஸ் அறிமுகமான உடனே அதன் வெல்ல முடியாத தன்மையே கவனத்தை ஈர்த்திருக்கிறது. இத்தனைக்கும் இது மிக எளிமையான விளையாட்டு. இதில் சிக்கலான சங்கதி எதுவும் கிடையாது. ஹெல்மெட் போட்ட ஒரு பாத்திரத்தை பறந்த படி முன்னேற வைக்க வேண்டும். பெண்டுலம் போல ஆடிக்கொண்டிருக்கும் சுத்திகளில் சிக்கி அடிபடாமல் அந்த பாத்திரத்தை முன்னேற வைக்க வேண்டும். அவ்வளவு தான் விளையாட்டு.
எளிதான விளையாட்டாக தான் இருக்கிறது இல்லையா? ஆனால் விளையாடிப்பார்த்தால் தான் இது உண்மையில் எத்தனை கடினமாக இருக்கிறது எனத்தெரியும் என்கிறனர்.

ஆட்டம் ஆரம்பித்த வேகத்திலேயே ஏதாவது தவறு செய்து ஆட்டம் முடிவுக்கு வந்துவிடுகிறது என்கின்றனர். விளைவு இன்னும் தீவிரத்தோடு அடுத்த முறை ஆட வேண்டியிருக்கிறது என்கின்றனர். ஆனால் என்ன தான் முழுகவனம் செலுத்தி ஆடினாலும் ஒரு புள்ளியை தொடவே படாதபாடு பட வேண்டிக்கிறது. விளைவு அடச்சீ என வெறுத்துப்போக தோன்றினாலும் இன்னும் தீவிரத்துடன் விளையாட தூண்டுகிறது.
எளிமையான தோற்றத்தை மீறி இந்த கேமில் இருக்கும் சவாலான தன்மையும் அவை ஏற்படுத்தும் கடினமான உணர்வுமே இதன் மீது ஆர்வத்தை ஏற்படுத்தியிருக்கிறது.
sw3
உண்மையிலேயே கடினமாக தான் இருக்கிறது, வேண்டுமானால் நீங்களே முயன்று பாருங்கள் என பலரும் இந்த விளையாட்டு பற்றி பேஸ்புக்கிலும் டிவிட்டரிலும் பகிர்ந்து கொண்டு வருகின்றனர். இதுவே இந்த விளையாட்டுக்கான கவனத்தையும் ஏற்படுத்தியிருக்கிறது.
பிளாப்பி பேர்ட் விளையாட்டும் இதே தன்மையை தான் கொண்டிருந்தது. அதில் ஒரு பிக்சல் பறவையை குழாய்களுக்கு மத்தியில் பறக்கச்செய்ய வேண்டும். எளிதான விளையாட்டு என்றாலும் சவாலானது, கடினமானது; அதனால் தான் பலரும் பிளாப்பி பேர்டே கதி என இருந்தனர். இப்படி பலரையும் அடிமையாக்குகிறது என்பதை காரணம் காட்டி தான் நுயேன் மிகவும் பிரபலமாக இருந்த நிலையில் பிளாப்பி பேர்ட் விளையாட்டை விலக்கி கொள்வதாக கூறி பரபரப்பை ஏற்படுத்தினார்.
நுயேனின் இரண்டாவது விளையாட்டு இதைவிட எளிமையானதாக ,இதைவிட கடினமானதாக இருப்பதாக வர்ணிக்கப்படுகிறது.

பிரபலமான சினெட்.காம் ( http://www.cnet.com/news/flappy-bird-follow-up-swing-copters-will-drive-you-to-insanity/) இணையதளத்தை சேர்ந்த நிக் ஸ்டாட் இந்த விளையாட்டை இதுவரை வந்த ஸ்மார்ட்போன் விளையாட்டுகளிலேயே கடினமானது என வர்ணித்துள்ளார். ஸ்டாட் இந்த விளையாட்டை ஒரு கை பார்க்க முயன்றுவிட்டு , 2 புள்ளிகள் எடுக்க 20 நிமிடம் வேறு எதுபற்றியும் சிந்திக்காமல் ஜென் யோகி போல இதிலேயே கவனம் செலுத்த வேண்டியிருக்கிறது என்று குறிப்பிட்டுள்ளார்.

எளிமையான விளையாட்டு,ஆனால் எளிதான வெற்றி பெற முடியாத விளையாட்டாக இருப்பதே பிலாப்பி பேர்ட் மற்றும் ஸ்விங் காப்டர்ஸ் போன்ற விளையாட்டுகளின் வெற்றிக்கு காரணமாக சொல்லப்படுகிறது.
ஆனால், ஒரு விளையாட்டில் வெற்றி பெற்றால் அந்த வெற்றி தரும் திருப்தியும் பெருமிதமும் அதன் மீது ஆர்வம் கொள்ள வைக்கும். இருப்பினும் மீண்டும் மீண்டும் தோற்றுப்போக வைக்கும் பிளாப்பி பேர்டும் , அதன் ஊக்கமாக கருதப்படும் சூப்பர் மரியோ பிரஸ் போன்ற வீடியோ கேம்கள் எப்படி பிரபலமாகின்றன என்பது சுவாரஸ்யமான கேள்வி.

வீடியோ கேம் தாக்கம் பற்றி ஆய்வு செய்து தி ஆர்ட் ஆப் பைலியர் எனும் புத்தகம் எழுதியுள்ள ஜெஸ்பர் ஜூல் (Jesper Juul ) இந்த முரணான அம்சத்தில் தனி கவனம் செலுத்தியிருக்கிறார். மனிதர்களுக்கு வெற்றி பெரும் உணர்வும் அது தரக்கூடிய திறமைசாலி என எண்ணமும் தான் முக்கியமானது என்றாலும் , வீடியோ கேம் பிரியர்கள் தங்களை தோல்வி பெற வைத்து,திறனற்றவர்களாக உணர வைக்கும் விளையாட்டுகளிலேயே ஈடுபட விரும்புவதாக ஜூல் குறிப்பிடுவதாக சினெட் கட்டுரை மேற்கோள் காட்டுகிறது. அதாவது தாங்கள் தோற்கப்போகும் விளையாட்டுகளையே வீடியோ கேம் ஆர்வலர்கள் விரும்புகின்றனர், இது தான் வீடியோ கேமின் முரண் என்கிறார் ஜூல்.

மைதானத்துக்கு சென்று கிரிக்கெட்டோ ,கபடியோ விளையாடும் தன்மை இல்லாமல் , கம்ப்யூட்டரிலும் ,ஸ்மார்ட்போனிலும் ஆங்க்ரி பேர்ட்ஸ் போன்ற விளையாட்டுகளில் மூழ்கியுள்ள தலைமுறையை சரியாக புர்ந்து கொள்ள , ஸ்விங்க் காப்டர்ஸ் போன்ற விளையாட்டுகளும் ஜூல் போன்றோரின் ஆய்வும் உதவும்.
இதனிடையே இந்த விளையாட்டில் எந்த புதுமையும் இல்லை, இது பிளாப்பி பேர்டின் இன்னொரு வடிவம் தான் என்ற விமர்சனமும் முன்வைக்கப்பட்டுள்ளது. ஆனால் இது கடினமானது என்பதை விமசிப்பவர்களும் ஒப்புக்கொள்கின்றனர்.

இந்த விளையாட்டை இன்னும் நான் ஆடிப்பார்க்கவில்லை. நீங்கள் முயன்று பார்த்துச்சொல்லுங்களேன் , இது எந்த எளவு எளிமையாதனது? எந்த அளவு கடினமானது என்று? https://play.google.com/store/apps/details?id=com.dotgears.swing. ஐஓஎஸ்-லும் டவுண்லோடு செய்யலாம்.
வீடியோ கேம் ஆய்வாளர் ஜெஸ்பர் ஜூல் இணையதளம்: http://www.jesperjuul.net/
——–

பிளாப்பி பேர்ட் பிரபலமான போதே , அதன் பிரம்மா நுயேன் பற்றி எழுத விரும்பினேன். இப்போது அவரது இரண்டாவது கேமை முன்னிடு விகடன்.காமிற்கு எழுதியதை பகிர்ந்து கொள்கிறேன்.

நுயேன் கவனிக்க வேண்ட்டிய ஆளுமை. வீடியோகேமின் படைப்பாற்றல் குறித்து யோசிக்க வைப்பவர். முக்கியமாக எங்கோ வியட்னாமில் ஒரு மூளையில் இருந்து கொண்டு ஒற்றை கேமால் உலகையே தன்னைப்பற்றி பேச வைத்தவர். இவரைப்போன்றவர்களை தான் நான் நெட்சத்திரங்களாக கருதுகிறேன். அடுத்த தொகுப்பில் நுயேனை சேர்க்கலாமா? சொல்லுங்களேன்!

-அன்புடன் சிம்மன்