Tag Archives: blog

புதியதோர் வலைப்பதிவு சேவை!.

திமுக,அதிமுக போல காங்கிரஸ் ,பிஜேபி போல வலைப்பதிவு சேவை என்று வரும் போது பெரும்பாலானோர் பிலாகரையும்,வேர்டுபிர்சையும் மட்டுமே அறிந்து வைத்திருக்கின்றனர்.

ஆனால் மூன்றாம் அணி கட்சிகளும் எண்ணற்ற உதிரி கட்சிகளும் இருப்பது போல வலைப்பதிவு சேவையிலும் மேலும் பல இருக்கின்றன.

இவற்றில் டம்பலரை மாற்று சேவை என குறிப்பிடலாம்.வலைப்பதிவின் மேம்ப்பட்ட அம்சங்களை உள்ளடக்கிய ட‌ம்பலர் வலைப்பதிவு சேவை இணைய பகிர்வை எளிதாக்கி தருகிறது.

இதே போலவே சமூக வலைப்பின்னல் யுகத்திற்கு ஏற்ற வலைப்பதிவு சேவையாக ஓவர்பிலாக் அமைந்துள்ளது.

பிலாகர்,வேர்டுபிரஸ் போலவே இதிலும் புதிய வலைப்பதிவை துவக்குவது மிகவும் எளிதானது.

ஆனால் இதன் சிறப்பம்சம் சமூக வலைப்பின்னல் பகிர்வுக்கான வசதியாகும்.இதில் பதிவுகளை வெளியிடுவதோடு பேஸ்புக்,டிவிட்டர்,பிலிக்கர் போன்ற உங்களது சமூக வலைப்பின்னல் தளங்களில் பகிர்ந்து கொள்ளும் தகவல்களை இதில் எளிதாக சேர்த்து கொள்ளலாம்.

வேர்டுபிரஸ் உள்ளிட்ட சேவைகளிலும் பயனாளிகள் தங்கள் பேஸ்புக்,டிவிட்டர் பதிவுகளை இணைத்து கொள்ளும் வசதி இருந்தாலும் அவற்றை தனித்தனியே சேர்த்தாக வேண்டும்.ஆனால் ஓவர்பிலாக் சேவை எல்லா சமூக வலைப்பின்னல் பகிர்வுகளையும் தானாகவே உடனடியாக இணைக்கும் வசதியை தருகிறது.

இணையத்தில் எந்த இடத்திலும் பகிர்ந்து கொள்ளும் தகவல்கள் இங்கே சேர்க்கப்படும் என்று இந்த சேவை பெருமையோடு குறிப்பிடுகிறது.

இந்த வசதி உட்பட மொத்தம் பத்து காரணங்களுக்காக தனது சேவையை பயன்படுத்தி வலைப்பதிவு செய்யலாம் என்று ஓவர்பிலாக் அழைக்கிற‌து.

இலவசமானது போன்ற வழக்கமான காரணங்கள் அதில் இருந்தாலும் அதிக அளவிலான வடிவமைப்பு தேர்வு வசதி மற்றும் வருவாய் பகிர்வு ஆகியவை குறிப்பிடத்தக்கவை.அதே போல பகிரப்படும் தகவல்கள் உடனடியாக செல்போன் வாயிலாகவும் வெளியிடப்படும் வசதியும் இருக்கிறது.

டெஸ்க்டாப்,செல்போன்,ஐப்பேட் என எல்லா வகையான சாதங்களிலும் வலைப்பதிவு அட்டகாசமாக இருக்கும் என்றும் குறிப்பிடப்பட்டுள்ளது.

வலைப்பதிவு சேவையை மாற்றலாம் என்று நினைத்து கொண்டிருப்பவர்களும் பேஸ்புக் பிரியர்கள் டிவிட்டர் அபிமானிகளும் பயன்படுத்தி பார்க்கலாம்.தற்போது பயன்படுத்திக்கொண்டிருக்கும் வலைப்பதிவில் இருந்து இதற்கு எளிதாக மாறிக்கொள்ளும் வசதியும் இருக்கிறது.மாற்றத்திற்கு நீங்கள் தயாரா?

இணையதள முகவரி;http://en.overblog.com/

80 வ‌யது பாட்டியின் வலைப்பதிவு!

‘சொல்லுகிறேன்’ வலைப்பதிவை சாதாரண சமையல் குறிப்பு வலைப்பதிவு என்று நினைத்துவிட வாய்ப்பிருக்கிறது.அதிலும் சமையலில் ஆர்வம் இல்லாதவர்களுக்கு அந்த வலைப்பதிவு எந்தவித சுவாரஸ்யத்தையும் அளிக்காமல் போகலாம்.

ஆனால் அந்த வலைப்பதிவை எழுதி வருபவர் 80 வயதை கடந்த பெண்மணி என்பது ஆச்சர்யத்தை அளிக்க கூடிய விஷயம்.(அவரது பெயர் காமாட்சி.காமாட்சி பாட்டி என்று சொல்லலாம்.அல்லது மரியாதை கருதி காமாட்சி அம்மாள் எனலாம்)அதை விட ஆச்சர்யம் அந்த வலைப்பதிவை அவர் எழுதி வரும் விதம்.

ஒரு நல்ல வலைப்பதிவுக்கு சொல்லப்படக்கூடிய அடைப்படையான அம்சங்கள் அனைத்தையும் இந்த வலைப்பதிவு பூர்த்தி செய்யக்கூடியதாக இருக்கிறது.வலைப்பதிவுக்கு என்று ஒரு மைய நோக்கம்,தொடர்ச்சியான பதிவுகள்,பின்னூட்டம் மூலமான உரையாடல் போன்ற அம்சங்களை கொண்டு பார்த்தால் தமிழின் சிறந்த வலைப்பதிவுகளின் பட்டியலில் இந்த வலைப்பதிவிற்கு சிறப்பு அனுமதியோடு இடம் அளிக்கலாம்.

அதைவிட முக்கியமாக இந்த வலைப்பதிவில் வெளிப்படும் பகிர்தலின் ஆர்வம் பாராட்டத்தக்கது.வரவேற்கத்தக்கது.அந்த பகிர்தலில் வெளிப்படும் அனுபவத்தின் கீற்றுகளும் வெளிப்பாடத தன் முனைப்பின் சாயலும் இன்னும் கூட வரவேற்கத்தக்கது.

சமையல் குறிப்புகளை அறிந்து கொள்வதில் ஆர்வம் உள்ளவர்கள் நிச்சயம் இந்த வலைப்பதிவை பயனுள்ளதாக கருதுவார்கள்.கருதி தொடர்ந்து வருகை தருவார்கள்.காரணம் தொடர்ச்சியாக புதிய புதிய சமையல் குறிப்புகள் இடம் பெற்று வருவது தான்.ஏற்கனவே பதிவிடப்பட்ட குறிப்புகள் அவற்றின் பிரிவுக்கு ஏற்ப வகைப்படுத்தப்பட்டுள்ள பட்டியலை பார்த்தால் ஒரு முழுமையான‌ சமையல் குறிப்பு புத்தகத்தின் தன்மை கொண்டிருப்பதை உணரலாம்.இந்த வலைப்பதிவின் செறிவின் சான்று இது.

வலைப்பதிவின் எழுத்து நடை அலங்காரமோ மேல்பூச்சோ இல்லாமல் எளிமையானதாக இருக்கிறது.நேரிடையாக பேசும் தன்மையோடு எந்த வித நீட்டி முழக்கலும் இல்லாமல் எடுத்த எடுப்பில் விஷயத்திற்கு வந்து விடுகிறார் காமாட்சி அம்மாள்.இந்த எளிமை சமையலில் ஆர்வம் உள்ளவர்கள் புதிய உனவு வகைகளை கற்றுக்கொள்ள உதவியாக இருக்கும்.

80 வயதில் காமாட்சி அம்மாள் இப்படி சுறுசுறுப்பாக பதிவிடுவது ஆச்சர்யமான விஷயம் தான்!.

பதிவுலகிற்கு அவர் வந்த விதத்தை விவரிக்கும் அவரது அறிமுக குறிப்பை படித்தால் இன்னும் ஆச்சர்யமாக இருக்கிறது.காலம் தந்த பணிவு,இந்த வயதிலும் கற்றுக்கொள்ளும் ஆர்வம் இரண்டையும் அந்த குறிப்புகளில் பார்க்கலாம்.

ஒரு வருடம் முன் வரை கம்ப்யூட்டர் பயன்படுத்த தெரியாது ,இப்போது சிறிது தெரிகிறது என ஆரம்பித்து தான் வலைபதிவு செய்யத்துவங்கிய காரண‌த்தை காமாட்சி அம்மாள் விளக்கியிருக்கிறார்.

அந்த அறிமுக கதையில் இந்திய பெண்களின் சொல்லப்படாத சோகமும் கல்ந்திருப்பதாகவே தோன்றுகிறது.எதிர் நீச்சல் போடுவதிலும் என்ன செய்வது என யோசிப்பதிலுமே காலம் போய்விட்டதாக குறிப்பிடுவதை படிக்கும் போது மிடில் கிளாஸ் பெண்களின் கைகளில் மாட்டப்பட்ட கண்ணுக்கு தெரியாத கை விளங்களின் சுமையை உணர முடிகிறது.

இளம் வயதில் எழுத்தார்வம் மிக்கவராக இருந்தவர் கலியாண வாழ்க்கைக்கு பின் அந்த தொடர்புகள் அறவே விடுபட்டு குடும்பத்தின் பொறுப்புகளால் நேரமின்மை ஏற்பட்டதாக குறிப்பிடுகிறார்.

தற்போது கடைசி மகனோடு பனிபொழியும் சுவிட்சர்லாந்தின் ஜெனிவாவில் இருக்கும் காமாட்சியம்மாள் மகனின் உதவியோடு கம்ப்யூட்டர் பழகி விகடன் ஆர்வத்தால் பின்னூட்டங்களில் துவங்கி பின்னர் வலைப்பதிவு பற்றி தெரிந்து கொண்டு சொல்லுகிறேன் பதிவை துவக்கியிருக்கிறார்.

தொடர்ந்து சுறுசுறுப்போடு குறிப்புகளை பகிர்ந்து கொண்டு வருகிறார்.அத்தையாக,பாட்டியாக,தாயாக பாவித்து எனக்கு ஊக்கம் கொடுங்கள்,எழுதுகிறேன்,வலைப்பதிவை உபயோகிப்பதில் எனக்கு ஆசானாக இருந்ந்து கற்று கொடுங்கள் என்ற கோரிக்கையோடு முடித்திருக்கிறார்.80 வயதில் தனக்கு தெரியாததை பிரரிடம் இருந்து கற்றுக்கொள்ளும் ஆர்வமும் ஆசானாக இருங்கள் என்று சொல்லும் பணிவும் அசாத்தியமானது இல்லையா?

(காமாட்சி அம்மாள் உண்மையில் நாங்கள் தான் உங்களிடன் இருந்து கற்றுக்கொள்ள வேண்டும்.உங்களுக்கு கம்புயூட்டர் தான் தெரியவில்லை,வாழ்க்கை தெரிந்திருக்கிறது. )

பின்னூட்டம் ஒன்றில் பாட்டி கலக்குகிறீர்கள் என்னும் பாராட்டிற்கு கலக்கவில்லை எழுதுகிறேன் என பதில் சொல்லி இருப்பதை பார்க்கும் போது இன்னும் வியப்பாக இருக்கிறது.

சமையல் குறிப்புகளிலும் இந்த பின்னூட்ட உரையாடலை பார்க்க முடிகிறது.பலர் குறிப்புகளை படித்து சமைத்த அனுபவத்தை பகிர்ந்து கொண்டுள்ளனர்.அவற்றுக்கெல்லாம் உற்சாகமாக கருத்து தெரிவித்திருக்கிறார். பதிவுலகில் இருக்கும் அவரது விசிறியான இன்னொரு பதிவர் ரஞ்சனியுடனான உரையாடலையும் பார்க்க முடிகிற‌து.

நமது தாத்தாக்களுக்கும் பாட்டிகளுக்கும் கம்ப்யூட்டர் கற்று கொடுத்து அவர்களை வலைப்பதிவுக்கும் குறும்பதிவுக்கும் கொண்டு வந்து அவர்களில் அனுபவ பாடங்களை காத்தின் சுவடுகளை பதிவு செய்ய வைக்க வேண்டும் என்பதற்கு காமாட்சி அம்மாள் அழகான உதாரண‌ம்.

காமாட்சி அம்மாளுக்கு எனது ஒரே யோசனை ,அல்ல வேண்டுகோள் சமையல் குறிப்புகளில் இருந்து சற்றே விலகி உங்கள் வாழ்க்கை அனுபவங்களை அதிகம் பகிர்ந்து கொள்ளுங்கள் என்பது தான்.

வலைப்பதிவு முகவரி;http://chollukireen.wordpress.com/

அமிதாப்பின் பேஸ்புக் பக்கம்.

பாலிவுட்டின் ஷாயென்ஷா அமிதாப் பேஸ்புக்கிவாசியாகியிருக்கிறார்.பேஸ்புக்கில் நுழைந்திருக்கும் அமிதாப்புக்கு லைக்குகள் மூலம் வரவேற்பு குவிந்திருக்கிறது.முதல் ஒரு மணி நேரத்திலேயே 8 லட்சம் லைக்குகளுக்கு மேல் கிடைத்திருக்கிறது.

இப்படி ஒரு வரவேற்பு பேஸ்புக்கில் வேறு எந்த பிரபலத்திற்கு சாத்தியம் என்று தெரியவில்லை.

ஆனால் இதில் வியப்பதற்கு ஒன்றும் இல்லை.அமிதாப் பாவிவுட்டில் மட்டும் சூப்பர் ஸ்டார் அல்ல இண்டெர்நெட்டிலும் அவர் சூப்பர் ஸ்டாராக தான் இருக்கிறார்.அதாவது இணைய உலகிலும் அவர் கொண்டாடப்பட்டு வருகிறார்.படிக்கப்படுகிறார்.பின் தொட்ரப்படுகிறார்.

இந்த அபிமானத்திற்கும் வரவேற்பிற்கும் காரணம் அமிதாப் இண்டெர்நெட்டை சரியாக பயன்படுத்துகிறார் என்பதே.பயன்படுத்துகிறார் என்றால் தன்னை முன்னிலைப்படுத்தி கொள்ளவோ தனது சாதனைகளை மார் தட்டி கொள்ளவோ அல்ல! மாறாக தனது ரசிகர்களை நேரடியாக தொடர்பு கொள்ள,அவர்களுடன் பேச,தன்னை வெளிப்படுத்தி கொள்வதிலேயே அவர் கவனம் செலுத்தி வருகிறார்.

அவரது வலைப்பதிவிலும் டிவிட்டர் பக்கத்திலும் இதனை பார்க்கலாம்.

அமிதாப் பற்றிய செய்திகளை ரசிகர்கள் தெரரிந்து கொள்ள விரும்பினால் நாளிதழ்களையோ டிவிக்களையோ நாட வேண்டியதில்லை.அவருடைய டம்ப்ளர் வலைப்பதிவை பின்தொடர்ந்தாலே போதுமானது.இன்னும் கூடுதல் தகவல்கள் தேவை என்றால் அவரது டிவிட்டர் பக்க‌த்தை கவனித்தால் போதுமானது.

வலைப்பதிவு செய்வதிலும் சரி டிவிட்டரில் பதிவிடுவதிலும் சரி அமிதாப் அந்த அளவுக்கு தீவிரமும் சுறுசுறுப்பும் காட்டி வருகிறார்.

ஒரு நட்சத்திரத்தை பற்றி அறிய ரசிகர்களுக்கு ஆர்வம் உள்ளவற்றை எல்லாம் அமிதாப் தானே வலைப்ப‌திவு மூலம் வெளியிட்டு வருகிறார்.படப்பிடிப்பு அனுபவங்கள்,பங்கேற்கும் நிகழ்ச்சிகள்,மன உணர்வுகள் என எல்லாவற்றையும் பற்றி அவர் பதிவு எழுதுகிறார்.

அவருடைய வலைப்பதிவுகள் படிப்பதற்கு சுவாரஸ்யமாக இருப்பதோடு அமிதாப் என்னும் நடத்திரத்தின் வாழ்க்கை பக்கத்தை படித்தது போன்ற உணர்வையும் தரும்.ஒரு நெருங்கிய நண்பனிடம் பேசுவது போல அவர் தனது அனுபவங்களை பகிர்ந்து கொண்டு வருகிறார்.

அமிதாப் பதிவுகள் எல்லாம் கேள்வி கேட்கப்படாத பேட்டிகள் போல இருக்கும்.அல்லது ரசிகர்கள் கேட்க நினைத்த கேள்விகளுக்கான பதிலாக இருக்கும்.

அதானல் தான் பால் நேரங்களில் மீடியாக்களே கூட வலைப்பதிவில் அமிதாப் சொல்வதை செய்தியாக வெளியிடுகின்றன.

குறும்பதிவு சேவையான டிவிட்டரில் அமிதாப் இன்னும் தீவிரமாக இருக்கிறார்.

குடும்ப நிககழ்வுகள் பற்றியும் நாட்டு நடப்பு பற்றியும் அவர் குறும்பதிவுகளை வெளியிட்டு வருகிறார்.

மரும‌கள் ஐஸ்வர்யா கர்பமுற்ற போது அமிதாப் மகிழ்ச்சி பொங்க அந்த செய்தியை டிவிட்டரில் தான் முதலில் பகிர்ந்து கொண்டார்.ஒரு தாத்தாவின் மன உணர்வை அதில் பார்க்க முடிந்தது.

அதே போல பேத்திக்கு சூட்டப்பட்ட பெயரையும் டிவிட்டரில் பகிர்ந்து கொண்டார்.

தொடர்ந்து அவர் குறும்பதிவுகளை வெளியிட்டு வருகிறார்.சும்மாயில்லை இது வரை 15 ஆயிரத்துக்கும் அதிகமான குறும்பதிவுகளை வெளீயிட்டிருக்கிறார்.அதன் பயனாக மூன்று லட்சத்திற்கும் அதிகமான பின் தொடர்பாளர்களை பெற்றிருக்கிறார்.

இப்படி சைபர் ராஜாவாக விளங்கும் அமிதாப் இப்போது பேஸ்புக் பக்கம் வந்திருக்கிறார்.

பேஸ்புக்கில் நுழையப்போவதை முதலில் டிவிட்டரில் தான் தெரிவித்தார்.அதன் பிறகு சில மணிநேரங்கள் கழித்து பேஸ்புக்கில் நுழைந்து விட்டதை டிவிட்டரில் பகிர்ந்து கொண்டார்.அதற்குள் பேஸ்புக்கில் அவருக்கு லட்சகணக்கில் லைக்குகள் குவிந்து விட்டன.

அருமையான புகைப்படங்களோடு தான் பங்கேற்கும் நிகழ்ச்சி பற்றி தனது மகள் கலந்து கொண்ட நிகழ்ச்சி பற்றி எல்லாம் அவர் பகிர்ந்து கொண்டு வருகிறார்.ஒவ்வொரு பதிவும் தனியே லைக் செய்யப்படுவதோடு அவற்றுக்கான கருத்துக்களும் குவிகின்றன.அருமையான வீடீயோக்களையும் வெளீயிட்டு வருகிறார்.

சமூக வலைப்பின்னல் தளங்களை நட்சத்திரங்கள் எப்படி பயன்ப‌டுத்த வேண்டும்
என்பத‌ற்கு மட்டும் அல்ல எதற்காக பயன்ப‌டுத்த வேண்டும் என்பதற்கும் அமிதாப் சிறந்த உதாரணமாக இருக்கிறார்.

அமிதாப்பின் பேஸ்புக் பக்கம்.:http://www.facebook.com/AmitabhBachchan

பிகு;அமிதாப்பின் பேஸ்புக் பக்கத்தில் அவர் பயன்படுத்தும் இணைய சேவைகள் பட்டியலும் கொடுக்கட்டுள்ளது.இசை சேவையான ஸ்பாட்டிபை உட்பட சிம்பை,ர்டியோ,மாக்,டீசர் என பத்துக்கும் மேற்பட்ட சேவைகளில் அவர் உறுப்பினராக இருப்பதை பார்த்தால் ஆச்சர்யமாக இருக்கிற‌து.

இஷ்டம் போல இமெயில் சேவை.

இன்றைய பதிவை நாளைக்கு வெளியாகும் வகையில் செய்வதற்கான வசதி வலைப்பதிவுகளில் இருக்கிறது.அதே போல டிவிட்டரில் குறும்பதிவுகளை விரும்பிய நாளில் விரும்பிய நேரத்தில் வெளியிடுவதற்கான வசதியை அளிக்கும் தளங்களும் இருக்கின்றன.

இதே போன்ற வசதி இமெயிலுக்கும் தேவை என்று நினைத்தால் ரைட் இன் பாக்ஸ் இணையதளம் இதனை வழங்குகிறது.

பிரபலமான ஜிமெயில் சேவையில் செய்லபடக்கூடிய வகையில் அறிமுகம் செய்யப்பட்டுள்ள இந்த வசதியின் மூலம் நீங்கள் இப்போது டைப் செய்த இமெயிலை எப்போது வேண்டுமானாலும் உரியவர்களுக்கு அனுப்பலாம்.

அதாவது வேலையை எல்லாம் முடித்து விட்டு நள்ளிரவு ஒரு மெயிலை டைப் செய்கிறீர்கள் என்று வைத்து கொள்வோம் அதனை அந்த நேரத்தில் அனுப்பிவைக்காமல் காலை 8 மணிக்கோ அல்லது 10 மணிக்கோ செல்லும்படி செய்யலாம்.பிரவுசர் இணைப்பாக செயல்படும் இந்த சேவையை பயன்ப்டுத்து போது மெயிலை இப்போதே அனுப்பவா அல்லது பிறகா? என்று கேட்கும்.பிறகு என்றால் எப்போது என குறிப்பிட்டால் அந்த நேரத்தில் மெயில் இன்பாக்ஸ் கதவை தட்டும்.

ஐடி சார்ந்த நிறுவனத்தில் பணியாற்றுபவர்களுக்கு இந்த சேவை மிகவும் பயனுள்ளதாக இருக்கும்.காரணம் அமெரிக்கா போன்ற நாடுகளுடன் தொடர்பு கொள்ளும் போது அந்நாட்டுக்கும் நம் நாட்டுக்கும் இடையிலான நேர இடைவெளி சிக்கலாக இருக்கலாம்.ஆனால் இந்த சேவையை பயன்படுத்தி நாம் பகலில் டைப் செய்தாலும் அங்கிருப்பவருக்கு இரவில் போய் சேராமல் காலையில் கிடைக்கும் படி செய்யலாம்.

அது மட்டுமா நமக்கு நாமே நினைவூட்டல் மெயில்களை அனுப்பி வைத்து கொள்ளவும் இதனை பயன்டுத்தலாம்.பிறந்த நாள் வாழ்த்து சொல்ல நினைவு படுத்துவது ,மின் கட்டணம்க் செலுத்த நினைவூட்டுவது போன்ற மெயில்களை நாமே அனுப்பி கொள்ளலாம்.

மேலும் நாம் அனுப்பிய இமெயில் எப்போது திறந்து பார்க்கப்படுகிறது என்பதையும் இந்த சேவை கண்டறிந்து சொல்லும்.அதில் உள்ள இணைப்புகள் கிளிக் செய்யப்படுவதையும் சொல்கிறது.

இமெயில் துனை சேவைகளில் மிகவும் சுவாரஸ்யமானது.பயனுள்ளதும் கூட!

http://www.rightinbox.com/

பதிவர்களுக்கு பரிசளிக்கும் திரட்டி.

தமிழ் இணைய உலகில் திரட்டிகளுக்கு குறைவில்லை.ஆனாலும் புதிது புதிதாக திரட்டிகள் அறிமுகமாகி கொண்டு இருக்கின்றன.இப்போது புதிதாக அறிமுகமாகியிருக்கும் திரட்டி ஹாட்லிங்ஸ்இன் டாட் காம்.

ஹாட்லிங்ஸ்இன் பற்றி பார்ப்பதற்கு முன் தமிழ் திரட்டிகள் பற்றி ஒரு பார்வை பார்த்து விடலாம்.தமிழ்மண‌த்தில் துவங்கி தமிழிஷ் (இப்போது இன்ட்லி)வலைப்பூக்கள்,உலவு,உடான்ஸ்,தமிழ்10 என பத்துக்கும் மேற்பட்ட திரட்டிகள் உள்ளன.

இவை எல்லாமே பொதுவில் திரட்டி என்று குறிப்பிடப்படாலும் அடிப்படையில் இரண்டு வகை இருக்கின்றன.தமிழ்மணம்,தேன்கூடு போன்றவை பிரதானமாக வலைப்பதிவுகளுக்கானவை.இந்த பிரிவில் முன்னோடியாக கருதப்படும் டெக்னோரெட்டியை பின்பற்றி துவங்கப்பட்டவை.

இன்ட்லி போன்றவை வலைப்பதிவுக்கானவை மட்டும் அல்ல;இணையத்தில் வெளியாகும் எல்லா விதமான செய்திகளுக்கும் ஆனவை.இந்த வகை திரட்டிகள் முன்னோடி தளமான டிக்கை பின்பற்றி உருவானவை என்று கருதலாம்.

டிக் செய்திகளை ஜனநாயகமயமாக்கிய சேவையாக புகழப்படுகிறது.அதாவது செய்தி வெளியீட்டை ஆசிரியர் குழுவிடம் இருந்து விடுவித்து இணையவாசிகள் கைகளில் ஒப்படைத்த சேவையாக கருதப்படுகிறது.டி வருகைக்கு முன்னர் செய்தி தேர்வு என்பது ஆசிரியர்களாலேயே மேற்கொள்ளப்பட்டு வந்தது.அவர்களால் மட்டுமே இதனை சரியாக செய்ய முடியும் என கருதப்பட்டது.

டிக் தான் இதனை உடைத்து இணையவாசிகளே செய்திகளை சமர்பிக்கலாம் என கொண்டு வந்தது.அந்த செய்தி தகுதியுடையதா என தீர்மானிக்கும் பொறுப்பை சக இணைய‌வாசிகளிடமே வழங்கியது.அதாவது வாக்களிப்பதன் மூலம் ஒரு செய்தியை முன்னுக்கோ பின்னுக்கோ கொண்டு வர முடியும்.

இப்படி இணையவாசிகளே ஒரு சமூகமாக செய‌ல்ப‌டும் போது பலதரப்பட்ட செய்திகளை பாரபட்சமற்ற முறையில் தெரிந்து கொள்ள வழி ஏற்படும் என கருதப்பட்டது.

டிக் செல்வாக்கு பெற்ற விதம் மற்றும் இப்போது தேய்ந்து போயிருக்கும் விதம் குறித்து நிறையவே விவாதிக்கலாம்.விஷ்யம் என்னவென்றால் டிக் செய்திகளை ஜனநாயகமயாமாக்கியது என்பது தான்.டிக் மூலம் இணையத்தில் கண்ணில் படாமலே போய்விடக்கூடிய பல செய்திகளை தெரிந்து கொள்ள முடிந்தது.

டிக்கின் குளோனாகவே தமிழிஷ் அறிமுகமானது என கருதலாம்.தொடர்ந்து பல திரட்டிகள் அறிமுகமாயின.

இப்போது ஹாட்லிங்ஸ்இன் திரட்டிக்கு வருவோம்.வடிவமைப்பிலோ தோற்றத்திலோ இந்த திரட்டியும் மற்ற திரட்டிகள் போலவே உள்ளது.அடிப்படை செயல்பாடும் ஒன்றாகவே உள்ளது.பதிவர்கள் அல்லது இணையவாசிகள் செய்தி அல்லது கட்டுரையை சமர்பிக்கலாம்.இப்படி சம‌ர்பிக்கப்பட்டவை வரிசையாக முகப்பு பக்கத்தில் பட்டியலிடப்படுகின்றன.

இப்படி ஒரே போன்ற திரட்டிகள் தேவையா?மற்ற திரட்டிகளில் இருந்து இது எந்த விதத்தில் மாறுபடுகிறது என்பது போன்ற கேள்விகள் எழுகின்றன.

இந்த கேள்விகளுக்கு ஹாட்லிங்ஸ்இன் சார்பில் தெரிவிக்கப்பட்டுள்ள பதில்கள் அதன் நோக்கத்தை தெளிவாக உணர்த்துகிறது.

முதலில் ஏற்கனவே பல திரட்டிகள் இருப்பதை இது ஒப்புக்கொள்கிறது.ஆனால் தன்னை வேறுபடுத்தி கொள்ள முடியும் என்று நம்புகிறது.

தற்போது தமிழில் துவக்கப்பட்டுள்ள இந்த திரட்டி ஆங்கிலம் மற்றும் தெலுங்கு போன்ற இந்திய மொழிகளிலும் விரிவாக்கம் செய்யப்பட உள்ளது.

உண்மையில் இந்த விரிவாக்கம் நலல் யோசனை.பல மொழிகளை பேசும் மாநிலங்களை கொண்ட நம் நாட்டில் ஒரு சேவையை நாடு தழுவிய அளவில் விரிவாக்கம் செய்வது நமக்குள்ள அணுகூலங்களில் முக்கியமானது.

மேலும் தமிழ் சூழலில் முன்னிலை பெற வாரம் ஒரு நட்சத்திர பதிவரை தேர்வு செய்து பரிசளிக்க திட்டமிட்டுள்ளதாக தெரிவிக்கப்பட்டுள்ளது.ஏற்கனவே தமிழ் மணம் இப்படி நட்சத்திர பதிவரை அடையாளம் காட்டினாலும் பதிவர்களுக்கு பரிசளிப்பது என்பது வரவேற்கத்தக்கது.தமிழ் சூழலில் பதிவர்கள் எந்த விதமான பலனோ ஊக்கமோ இல்லாமல் தான் செயல்படுகின்றனர்.எனவே பரிசுகள் தேவை தான்.

இந்த திரட்டியை குறைவான நபர்களே பயன்ப்டுத்தி வருகின்றனர்.முகப்பு பக்கத்தில் ஒரு சிலரின் பெயர்களே மீண்டும் மீண்டும் வருகின்றன.ஆனால் திரட்டிக்கு வருகை தரும் வாசக‌ர்களின் எண்ணிக்கை அதிகமாக இருப்பதாக குறிப்பிடுகிறது.அதாவது இணைப்புகளை வெளியிடும் பதிவர்களை விட படிக்கும் வாசகர்கள் அதிகம் என்கிறது.அப்படியிருந்தால் அதுவும் நல்லது தான்.

அதே போல குழு மனப்பான்மைக்கு வித்திடக்கூடிய வாக்களிக்கும் முறைக்கு மாறாக வாசகர்களி அதிகம் படிக்கும் பதிவுகள் தானாக முன்னிலை பெறும் முறை பின்பற்றப்படுவதாக குறிப்பிடுகிறது.

இவையெல்லாம் நல்ல விஷயங்கள் தான்.பார்ப்போம் ஹாட்லிங்ஸ்இன் எப்படி போட்டியை சமாளிக்கிறது என்று.

ஹாட்லிங்ஸ்இன் திரட்டியில் கவனத்தி ஈர்க்கும் ஒரு விஷயம் வலது பக்கத்தில் மேலே உள்ள வண்ண புள்ளிகளை கிளிக் செய்தால் இணைப்புகளின் நிறமும் அதற்கேற்ப மாறுகிறது.சின்ன விஷயம் தான் ஆனால் இணையவாசிகளுக்கு கூடுதல் அதிகாரத்தை தரும் இது போன்ற இன்னும் பிற அம்சங்களை எதிட்பார்க்கிறோம்.

இணையதள முகவரி;http://www.hotlinksin.com/