Tag Archives: digital

டிஜிட்டல் பணம்: சில கேள்விகளுக்கான விளக்கம்

 

கிழக்கு பதிப்பக வெளியீடாக வந்திருக்கும் ’டிஜிட்டல் பணம்’ புத்தகத்தின் தலைப்பும் உள்ளடக்கமும் சில பொதுவான கேள்விகளையும், சந்தேகங்களையும் எழுப்பவதாக இருப்பதை நண்பர்கள் கருத்துக்கள் மூலம் அறிகிறேன். இந்த புத்தகம் தொடர்பாக எழக்கூடிய கேள்விகளுக்கான விளக்கம் இதோ:money

  • இந்த புத்தகம் ரொக்கமில்லா சமூகத்திற்கு ஆதாரவானதா?

ஆம்.

  • இந்தியா போன்ற நாடுகளில் ரொக்கமில்லா சமூகம் எப்படி சாத்தியம்?

இதற்கான பதில் மொபைல் பணம் எனும் கருத்தாக்கத்தில் உள்ளது. அதை மையமாக கொண்ட முயற்சிகளை தான் இந்த புத்தகம் பேசுகிறது.

  • கிரெடிட் கார்டு, டெபிட் கார்டு எல்லோரிடமும் இல்லையே?

கார்டு தேவையில்லை. மொபைல் போதுமானது என்பதே இந்த புத்தகத்தின் அடிநாதம்.

 

  • ஸ்மார்ட்போனும் எல்லோரிடமும் இல்லையே?

தேவையில்லை. சாதாரண போனே போதும்.

  • எப்படி ?

கென்யாவின் மொபைல் பணமான எம்-பெசா இதற்கான உதாரணம்.

  • இந்தியாவில் யதார்த்தம் என்ன?

இந்தியாவிலும் எகோ மணி, பீம் மணி போன்ற முன்னோடி உதாரணங்கள் உள்ளன. இந்தியா மட்டும் அல்ல ஆப்கானிஸ்தான் , சோமாலிலாந்தில் முன்னோடி முயற்சிகள் மேற்கொள்ளபடுகின்றன.

  • ரொக்கமில்லா பரிவர்த்தனை ஏழைகளுக்கு பாதகமாக அமையாதா?

பரவலாக கருதப்படுவதற்கு மாறாக ரொகமில்லா பரிவர்த்தனை ஏழைகளுக்கு உதவக்கூடியது. மொபைல் பணம் என்பது ஏழைகளுக்கான வங்கிச்சேவைக்கான அடிப்படையாக பார்க்கபடுகிறது.

  • வங்கி சேவையை இன்னும் பரவலாகவில்லையே?

வங்கிச்சேவையை ஏழைகள் மற்றும் விளிம்பு நிலை மக்களுக்கு கொண்டு செல்ல செல்போன் உதவும். செல்போன் மாற்றத்திற்கான சாதமாக பார்க்கப்படுக்கிறது. மூன்றாம் உலக நாடுகளில் இதற்கான முன்னோடி முயற்சிகள் இருக்கின்றன.

  • இந்த புத்தகத்திற்கான நியாயம் என்ன?

உலகில் எல்லாம் டிஜிட்டல்மயமாகி வருகிறது. பணமும் டிஜிட்டல் மயமாவது தொழில்நுட்ப நோக்கில் தவிர்க்க இயலாதது. அதற்கு நாம் தயாராக வேண்டும். உலகின் பல்வேறு நாடுகளில் இந்த முயற்சி துவங்கிவிட்டது. நாமும் பின் தங்கியிருக்க முடியாது. அது மட்டும் அல்ல, பண பரிவர்த்தனையை டிஜிட்டல் மயமாக்க தொழில்நுட்பம் சார்ந்த பல முன்னோடி முயற்சிகள் மேற்கொள்ளப்பட்டு வருகின்றன. நாமும் அதில் இணைவதே சரி . இல்லை எனிம் தொழில்புரட்சி பேருந்தை தவறவிட்டது போல டிஜிட்டல் பண பேரூந்தை தவறவிட்டு பின்னால் ஓட வேண்டியிருக்கும்.

  • பணமதிப்பு நீக்க நடவடிக்கை பற்றி?

இந்த புத்தகம் அது பற்றி பேசவில்லை.

  • ஏன்?

இதன் மைய நோக்கம் அதுவல்ல. பண மதிப்பு நீக்க நடவடிக்கையின் போது அதிக கவனத்தையும், சர்சையையும், விவாதத்தையும் ஏற்படுத்திய ரொக்கமில்லா பரிவர்த்தனையின் சார்பு அம்சங்களை தொழில்நுட்ப நோக்கில் இந்த புத்தகம் பேசுகிறது.

  • பண மதிப்பு நீக்க நடவடிக்கை சரியானதா?

தெரியாது. ஆனால் அது மிக மோசமாக செயல்படுத்தப்பட்டது.

  • டிஜிட்டல் பணத்தில் வேறு என்ன சாதகம் உண்டு?

டிஜிட்டல் பணம் டிஜிட்டல் கடன், அனைவரிக்குமான வங்கி- நிதிச்சேவைகள் பற்றி எல்லாம் சிந்திக்க வைக்கிறது. நடைமுறையிலும் செயல்பட வைக்கிறது.

  • கருப்புபணம் ஒழியுமா?

ஓரளவு உதவலாம். ஆனால் கருப்பு பணம் வேறு பிரச்சனை.

  • டிஜிட்டல் பணம் பாதுகாப்பானதா?

பாதுகாப்பாக ஆக்குவதற்கான எல்லா வழிமுறைகளும் உள்ளன. ஆனால் சைபர் தாக்குதல், இணைய களவு உள்ளிட்ட ஆபத்துகள் உள்ளனை. அவற்றை எதிர்கொள்ள வேண்டும். ஆனால் இது டிஜிட்டல் யுகத்தின் பிரச்சனை. டிஜிட்டல் பணத்திற்கு மட்டும் உரியது அல்ல. டிஜிட்டல் பணம் இல்லாவிட்டாலும் கூட இத்தகைய ஆபத்துகள் உண்டு.

  • இந்த புத்தகத்தை படித்தால் டிஜிட்டல் பணத்திற்கு மாற முடியுமா?

இல்லை. டிஜிட்டல் பணம் தொடர்பாக உலகில், குறிப்பாக தொழில்நுட்ப உலகில் நடைபெறும் முன்னோடி முயற்சிகளை தெரிந்து கொண்டு நீங்களாக அதை நோக்கி முன்னேறலாம்.

சைபர்சிம்மன்

டிஜிட்டல் பணம்

கிழக்கு பதிப்பக வெளியீடு

விலை;ரூ150.

 

 

எம்பி- 3 க்கு என்ன ஆச்சு?

mp3-share_custom-47303cc4c2f139b693ff86def5556f68bc18e4e2-s800-c85பிரபலமான இசை கோப்பு வடிவமான எம்பி-3 தொடர்பாக அண்மையில் வெளியான செய்தி இணையவாசிகளையும், இசைப்பிரியர்களையும், அதிர்ச்சியிலும் கவலையிலும் ஆழ்த்தியிருக்கும். அதிலும் குறிப்பாக டிஜிட்டல் இசைப்பிரியர்கள் எம்பி-3 வடிவத்திற்கு விடை கொடுக்க நேருமோ என நினைத்து நொறுங்கி போயிருக்கலாம்.

எம்பி-3 இறந்து விட்டது!, எம்பி-3 கொல்லப்பட்டு விட்டது! போன்ற தலைப்புகளில் வெளியான செய்திகளை பார்த்தால் இசை மனதும், இணைய மனதும் திடுக்கிடத்தானே செய்யும். ஆனால் இந்த கவலை தேவையற்றது என்பதை, இல்லை,எம்பி3 இறக்கவில்லை!, எம்பிஎ இறந்துவிட்டது, ஆனால் எம்பி3 நீடூடி வாழ்க! போன்ற தலைப்பிலான விளக்கச்செய்திகள் புரிய வைத்தன.

விஷயம் இது தான், எம்பி3 இசை கோப்பு வடிவத்தை உருவாக்கிய ஜெர்மனி ஆய்வு அமைப்பிற்கு பின்னே உள்ள பாரன்ஹோபர் கழகம் வெளியிட்ட அறிவிப்பே இதற்கு காரணமாக அமைந்தது. எம்பி-3 கோப்பு தொடர்பான காப்புரிமை சார்ந்த உரிமம் வழங்குவதை நிறுத்திக்கொள்வதாகவும், எம்பி-3 வடிவம் நுகர்வோர் மத்தியில் இன்னமும் பிரபலமாக இருந்தாலும், அதைவிட மேம்பட்ட கோப்பு வடிவங்களான ஏஏசி போன்றவை வந்துவிட்டதால், அவை எம்பி-3 யை விட அதிக ஒலித்தரத்தை அளிக்க வல்லவை என்றும் அந்த அறிவிப்பில் குறிப்பிடப்பட்டிருந்தது.

எம்பி-3 க்கு விடைகொடுத்துவிட்டு அதைவிட மேம்பட்ட கோப்பு வடிவத்திற்கு மாறும் அவசியம் வந்திருப்பதை இதன் மூலம் புரிந்து கொள்ளலாம்.

இந்த அறிவிப்பு தான், எம்பி-3 கொல்லப்படுகிறது எனும் தலைப்புடன் வெளியாயின. ஜெர்மனி அமைப்பை பொருத்தவரை எம்பி-3 கோப்பு வடிவம் காலாவதியாகி விட்டதை இந்த அறிவிப்பு உணர்த்தினாலும், இந்த கோப்பு வடிவத்தின் கதி அவ்வளவு தான் எனும் வகையில் எந்தவித கருத்தும் இந்த அறிவிப்பில் இல்லை. அப்படியிருந்தும் கூட, எம்பி-3 கோப்பு வடிவம் அதை உருவாக்கியவர்களால் கொல்லப்படுவதாக செய்திகள் வெளியாகின.

பழையன கழிதலும், புதியன புகுதலும் தொழில்நுட்ப உலகில் வெகு வேகமாக நிகழ்ந்து கொண்டிருக்கின்றன. இசைத்துறையில் இன்னும் வேகமாக மாற்றம் நிகழ்வதை பார்த்து வருகிறோம். கிராம்போன் பேழைகள், கேசெட்கள், சிடிக்கள், டிவிடிக்கள் என இசையை கேட்கும் வடிவம் மாறிக்கொண்டே இருக்கும் நிலையில், இப்போது பிரபலமாக உள்ள எம்பி-3 கோப்பு வடிவத்திற்கும் விடை கொடுக்கும் காலம் வந்துவிட்டது என இந்த செய்தியை படித்ததும் தோன்றுவது இயல்பு தான். கேசட், சிடிக்கள் வரிசையில் எம்பி-3 பிளேயர்களையும் வரலாற்றின் பரண்களில் தூக்கி வீச வேண்டியிருக்குமோ எனும் எண்ணமும் பலருக்கு ஏற்பட்டிருக்கலாம். இன்னும் பலருக்கு என்னிடம் உள்ள எம்பி- பாடல்களின் என்ன ஆகும் எனும் கவலை ஏற்பட்டிருக்கலாம்.

ஆனால், எபி-3 க்கும் ஒன்றும் ஆகவில்லை. எம்பி- 3 பாடல்களுக்கும் ஒன்றும் ஆகவில்லை. கோப்பு வடிவில் மாற்றம் ஏற்பட்டிருப்பது உண்மை தான். ஜெர்மனி அமைப்பு போன்றவை மேம்பட்ட இசை கோப்பு வடிவமான ஏஏசி போன்றவற்றை முன்னிறுத்துகின்றன என்பதும் உண்மை தான். ஆனால் அதனால் எம்பி-3 க்கு அதிக பாதிப்பில்லை. குறிப்பாக உடனடியாக அதற்கு எந்த ஆபத்தும் இல்லை. அது பயன்பாட்டில் தொடரும். அதில் பாடல்களை கேட்கலாம்.

ஏனெனில், ஜெர்மனி அமைப்பு எம்பி-3 க்கான உரிம ஒப்பந்த முறையை தான் கைவிட்டுள்ளது. ஏற்கனவே எம்பி-3 கோப்பு வடிவம் தொடர்பான காப்புரிமை காலாவதியாகிவிட்ட நிலையில், இதற்கான உரிம ஒப்பந்தம் கைவிடப்பட்டுள்ளது. இதன் பொருள் எம்பி-3 கோப்பு உருவாக்கத்திற்கு இனி எந்த நிறுவனமும் கட்டணம் செலுத்த வேண்டியதில்லை என்பதாகும். மேம்பட்ட வடிவத்திற்கு மாறுவதால் ஜெர்மனி அமைப்பு இந்த முடிவை எடுத்துள்ளது.

ஆனால் அதற்காக இசைப்பிரியர்களும் இந்த மேம்பட்ட முறைக்கு மாறியாக வேண்டிய நிர்பந்தம் இல்லை. அவர்கள் பழகிய எம்பி-3 வடிவத்தையை பயன்படுத்தலாம். அது மட்டும் அல்ல, இந்த முறையில் பாடல்களை உருவாக்க இனி கட்டணம் செலுத்த வேண்டியதில்லை என்பதால், சுதந்திரமாக செயல்படலாம். எப்படி ஜிப் கோப்பு வடிவத்திற்கான காப்புரிமை காலாவதியாக பல ஆண்டுகள் ஆன பிறகும் அந்த கோப்பு வடிவம் பயன்பாட்டில் இருக்கிறதோ அதே போல எம்பி-3 வடிவமும் தொடரும் என்று எதிர்பார்க்கப்படுகிறது.

புதிய இசை கோப்பு வடிவமான அடவான்ஸ்டு ஆடியோ கோடிங் எனப்படும் ஏஏசி, எம்பி-3 இடத்தில் அதன் பிரம்மாக்களால் முன்னிறுத்தப்பட்டாலும், இசைத்துறை ஒரே நாளில் எம்பி-யில் இருந்து மாறிவிடும் என எதிர்பார்ப்பதற்கில்லை. தற்போதே இசை ஸ்டீரிமிங் சேவையில் ஏஏசி முறை பின்பற்றப்பட்டாலும் கூட, எம்பி-3 அவ்வளவு தான் என சொல்ல முடியாது என்றே கருதப்படுகிறது.

ஏன்? எப்படி? என புரிந்து கொள்ள எம்பி- 3 வரலாற்றை கொஞ்சம் சுருக்கமாக திரும்பி பார்க்கலாம். எம்பி-3 என்பது உண்மையில் ஒலிகளுக்கான கோப்பு வடிவம். எம்பெக் ஆடியோ லேயர் 3 என்பதை குறிக்கும் இந்த வடிவம் ஒலிக்குறிப்புகளை அவற்றின் மூல அளவை விட பத்து மடங்கிற்கும் குறைவான அளவில் சுருக்கி சேமித்து வைத்து பகிர்ந்து கொள்ள வழி செய்கிறது. அளவு சுருங்கினாலும் ஒலியின் தரம் பெரிய அளவில் பாதிக்காது. எனவே இந்த முறையில் இசையை சேமிப்பதும், பரிமாற்றம் செய்வதும் எளிதானது. குறைந்த இடத்தில் அதிக அளவில் பாடல்களை பதியலாம் என்பதோடு, குறைவான நேரத்தில் பரிமாற்றலாம். இந்த இரண்டும் சேர்ந்து தான் இணையத்தை இந்த கோப்பு வடிவத்திற்கு நெருக்கமாக்கியது.

இங்கு இரண்டு முக்கிய விஷயங்களை கவனிக்க வேண்டும். எம்பி-3 கோப்பு வடிவத்தை உருவாக்கும் முயற்சி 1980 களில் துவங்கப்பட்டு, பத்தாண்டுகளுக்கும் மேலாக இதற்கான ஆய்வுப்பணிகள் மேற்கொள்ளப்பட்டு 1990 களின் மத்தியில் பலன் அளித்தது. ஜெர்மனியை சேர்ந்த பரன்ஹோபர் கழகம் (Fraunhofer Institut ) 1987 ல் இதற்கான பணியை முழு மூச்சில் துவக்கியது. இந்த ஆய்வில் முக்கிய பங்காற்றிய பேராசிரியர் பிராண்டன்பர்க் (Brandenburg ) தான் எம்பி-3 யின் தந்தை என கருதப்படுகிறார்.

பிராண்டபர்க் இந்த ஆய்வில் ஈடுபட்டதே ஒரு சுவாரஸ்யமான கதை. முதலில் பிராண்டபர்கிற்கு ஒலி குறிப்புகளை சுருக்குவதற்கான ஆய்வில் நாட்டம் இருக்கவில்லை. ஆனால் அவரது முனைவர் பட்ட வழிகாட்டிக்கு அந்த எண்ணம் இருந்தது. இது தொடர்பான ஒரு எண்ணத்திற்கு அவர் காப்புரிமையும் பெற விரும்பினார். அந்த கால கட்டத்தில் அறிமுகமாகி இருந்த டிஜிட்டல் தொலைபேசி இணைப்புகள் வழியே இசையை ஒலிபரப்ப வேண்டும் என்பது தான் அந்த எண்ணம். இசையை சிடிகள் வடிவில் விநியோகிப்பதை விட, ஒரு மைய சர்வரில் சேமித்து வைத்துக்கொண்டு, விரும்பும் நபர்களுக்கு தொலைபேசி வழியே கேட்ட பாடல்களை ஒலிபரப்ப வழி செய்யலாம் என அவர் நம்பினார். ஆனால் இதற்கு முதலில், தொலைபேசி இணைப்பு வழியே இசையை அனுப்பக்கூடிய அளவுக்கு அதை சுருக்க வேண்டும். இத்தகைய சுருக்கம் நடைமுறை சாத்தியம் இல்லை என கருதப்பட்டது.

பேராசிரியர் இந்த பிரச்சனைக்கு வழி காணுமாறு கேட்டுக்கொண்டதை அடுத்து பிராண்டன்பர்க் இதற்கான ஆய்வில் ஈடுபட்டார். பிராண்டன்பர்க் கணிதப்புலி என்பதால், கணிதவியல் மூலம் இந்த புதிருக்கு விடை காணும் வகையில் ஒலிக்குறிப்புகளுக்கான சமன்பாடுகள் எழுதிப்பார்த்தார். ஒலிக்குறிப்புகளை பல அடுக்குளாக பிரித்து அவற்றை சுருக்குவதற்கான வழி தேடினார். 1980 களின் மத்தியில் அறிமுகமான மேம்பட்ட திறன் கொண்ட கம்ப்யூட்டர்கள் இந்த சோதனையில் உதவின.

இதனிடயே மனித இயல்பு தொடர்பான ஒரு அம்சமும் அவருக்கு உதவியது. மனித செவி பேச்சை கேட்கும் போதும் சரி, இசையை கேட்கும் போதும் சரி, முழுவதும் கேட்பதில்லை. பலவற்றை கேளாமல் விட்டுவிடுகிறது. அதாவது மனித செவியால் உணர முடியாத அலைவரிசை கொண்ட ஒலிக்குறிப்புகளும் இருக்கின்றன. இவற்றை நாம் கேட்பதேயில்லை. இந்த அம்சம் தொடர்பான துறை சைக்கோ அக்வ்ஸ்டிக்ஸ் எனப்படுகிறது.

மனித செவித்திறனில் உள்ள இந்த வரம்பை பிராண்டன்பர்க் சாதகமாக பயன்படுத்திக்கொண்டு, செவியால் கேட்க முடியாத ஒலிக்குறிப்புகளை தேவையில்லாதவை என நீக்கிவிடும் வகையில் ஒரு முறையை உருவாக்கினார். இந்த முறையில் மூல இசை வடிவை அதன் தன்மை பாதிக்காமல் பத்தில் ஒரு மடங்காக சுருக்க முடிந்தது.

இதை அடிப்படையாக கொண்டே எம்பி-3 கோப்பு வடிவம் அறிமுகமானது. ஏறக்குறைய இதே காலகட்டத்தில், மோஷன் பிக்சர்ஸ் எக்ஸ்பர்ட்ஸ் குருப் அமைப்பு கோப்புகளுக்கான வடிவத்திற்கான தர நிரணயத்தை உருவாக்கியிருந்தது. இவையே சுருக்கமாக எம்பெக் என குறிப்பிடப்படுகின்றன. இவற்றில் மூன்று அடுக்குகள் உண்டு. சர்வதேச தர அமைப்பான ஐ.எஸ்.ஒ வின் துணை அமைப்பாக இது உருவாக்கப்பட்டது. ஒலி கோப்புக்கான தர நிர்ணயத்தில் இந்த அமைப்பு கவனம் செலுத்திய நிலையில், பிராண்டன்பர்க் குழு உருவாக்கிய கோப்பு வடிவத்திற்கு காப்புரிமை அளிக்கப்பட்டது. எம் பெக் மூன்றாம் அடுக்கை கொண்டு உருவானதால் இது எம்பி-3 என அழைக்கப்பட்டது.

1995 ல் இந்த முறை அறிமுகமானது அந்த ஆர்ப்பாட்டமும் இல்லை. இசை கோப்புகளை அதன் தரம் மாறாமல் சுருக்க வழி செய்தாலும், அப்போது தான் சிடிக்களுக்கு மாறியிருந்த இசை உலகம் இன்னொரு மாற்றம் அவசியம் என நினைக்கவில்லை. 1990 களின் பின் பகுதியில் இணைய பயன்பாடு அதிகரித்த போது இதற்கான அவசியம் உணரப்பட்டது. இணையம் எம்பி3 கோப்பு வடிவத்தை ஆரத்தழுவிக்கொண்டது.

இதன் பின் நிகழ்ந்தவையே பெரிய வரலாறு என்றாலும், அவற்றை சுருக்கமாக இப்படி புரிந்து கொள்ளலாம். இசையை எம்பி3 வடிவத்திற்கு மாற்ற ஒரு என்கோடிங் முறை தேவை. அதற்கான உரிமத்தை இந்த நுப்டத்திற்கான ஆய்வுக்கு நிதி அளித்த ஜெர்மனி அமைப்பு வைத்திருந்தது. இப்படி மாற்றப்பட்ட கோப்புகளை இசையாக மாற்றவும் ஒரு சாதனம் தேவை. இவை தான் எம்பி-3 பிளேயராக அறிமுகமாயின. அதற்கு முன் டெஸ்க்டாப்பில் இதை சாத்தியமாக்கும் வின் ஆம்ப் மென்பொருள் அறிமுகமானது. அதற்கும் முன்னர் இணையவாசி ஒருவர், எம்பி-3 கோப்பு முறை மாற்ற நுட்பத்தை திருட்டுத்தனமாக இணையத்தில் வெளியிட்டு விட்டார். இதன் பிறகு ஜெர்மனி அமைப்பு உரிமக்கட்டணத்தை குறைத்தது. (இந்த உரிம ஒப்பந்தத்தை தான் இப்போது கைவிட்டுள்ளது. )

இவை எல்லாம் நிகழ்ந்து கொண்டிருந்த நிலையில், இசையை எம்பி-3 வடிவில் பரிமாறிக்கொள்வது பிரபலமாகி இணைய உலகை புரட்டிப்போட்டது.

இந்த வடிவம் அத்தனை சீக்கிரம் காலாவதியாகாது என்றே தோன்றுகிறது, நீங்கள் என்ன சொல்கிறீர்கள்!

எம்பி-3 அதிகாரப்பூர்வ வரலாறு: https://www.mp3-history.com/

சுருக்கமான வரலாறு: http://www.npr.org/sections/therecord/2011/03/23/134622940/the-mp3-a-history-of-innovation-and-betrayal

 

  • நன்றி தமிழ் இந்துவில் எழுதியது.

டிஜிட்டல் வாழ்க்கையை மேம்படுத்த உதவும் குறும் பழக்கங்கள்!

mini-habits-desktop-storage-clutterபதிவுகள், குறும்பதிவுகள் என சொல்வது போல, பழக்கங்களிலும் குறும் பழக்கங்கள் இருக்கின்றன தெரியுமா? ஆங்கிலத்தில் இதை மைக்ரோ ஹாபிட்ஸ் அல்லது மினி ஹாபிட்ஸ் என்கின்றனர். அதாவது ஒரு பழக்கத்தின் சிறு அங்கம் என்று பொருள். எந்த ஒரு செயலையும் செய்வதற்கு அது முதலில் பழக்கமாக மாற வேண்டும். ஆனால் பழக்கம் அத்தனை எளிதல்ல. புதிய பழக்கத்தை ஏற்படுத்திக்கொள்ள அல்லது பழைய பழக்கத்தை மாற்றிக்கொள்ள விடாமுயற்சி தேவை. உற்சாகத்துடன் ஆரம்பித்து தொடர்ந்து கடைபிடிக்கும் உறுதி இல்லாமல் தொய்வு ஏற்பட்டால் எல்லாம் வீணாகிவிடும். அதன் பிறகு மீண்டும் முயற்சிக்க வேண்டும்.

பழக்கம் இப்படி பாடாக படுத்துவதை தவிர்ப்பதற்காக தான் எளிதான மாற்று வழியாக குறும் பழக்கங்களை முன்வைக்கின்றனர். எந்த பழக்கத்தை பின்பற்ற விரும்புகிறோமோ, அந்த பழக்கம் தொடர்பாக ஏதேனும் ஒரு சிறிய செயலை மட்டும் செய்யத்துவங்கினால் போதும். இதை செய்ய பெரிய அளவில் ஊக்கம் தேவையிருக்காது என்பதால், அதிகம் யோசிக்காமல் செய்யலாம். நாளடைவில் அது பழகிவிடும்.

பெரும் பாய்ச்சலாக முயற்சிப்பதை விட, இப்படி சின்ன சின்ன அடியாக எடுத்து வைத்து பழக்கங்களை வெல்லலாம் என்கின்றனர்.
இந்த வழிமுறையை தொழில்நுட்ப உலகிற்கும் பொருத்திப்பார்க்கலாம் எனும் மேக் யூஸ் ஆப் இணையதள கட்டுரை, நம்முடைய டிஜிட்டல் வாழ்க்கையை மேம்படுத்த்திக்கொள்ள உதவும் குறும் பழக்கங்களை பரிந்துரைக்கிறது:

* வாரம் ஒரு சேவைக்கு பாதுகாப்பு

இணைய பயன்பாடு பரவலாகி இருக்கும் அதே நேரத்தில் ஆபத்தாகவும் மாறி இருக்கிறது. ஹேக்கிங், பாஸ்வேர்டு திருட்டு, அடையாளத்திருட்டு, ஆன் -லைன் மோசடி, மால்வேர் பாதிப்பு என பலவிதங்களில் ஆபத்துகள் மறைந்திருக்கின்றன. இவற்றில் இருந்து பாதுகாத்துக்கொள்ள வேண்டும் என்றால் இணைய சேவைகளை பாதுகாப்பானதாக அமைத்துக்கொள்ள வேண்டும். பேஸ்புக்கில் துவங்கி, ஜிமெயில், வாட்ஸ் அப் என பெரும்பாலான சேவைகளில் பயனாளிகளுக்கான பாதுகாப்பு அம்சங்கள் இருக்கின்றன. பலவகையான சேவைகளை பயன்படுத்தும் நிலையில், ஒவ்வொன்றிலும் இந்த அம்சங்களை செயல்படுத்துவதை தள்ளிப்போட்டுக்கொண்டே இருக்கலாம். இதற்கு தீர்வாக, வாரம் ஒரு சேவையை தேர்வு செய்து அதில் உள்ள பாதுகாப்பு அம்சங்களை செயல்படுத்தலாம். அதிகம் பயன்படுத்தும் சேவையில் இருந்து இதை துவங்கலாம்.
இதே முறையை பாஸ்வேர்ட் பாதுகாப்பிற்கும் பின்பற்றலாம். பலவீனமான பாஸ்வேர்டுகளை வைத்திருக்க கூடாது, பரவலாக பயன்படுத்தப்படும் பாஸ்வேர்டை தவிர்க்க வேண்டும், ஒரே பாஸ்வேர்டை எல்லா சேவைகளுக்கும் பயன்படுத்தக்கூடாது என பாஸ்வேர்டு தொடர்பான பல விஷயங்கள் வலியுறுத்தப்படுகின்றன. வாரம் ஒரு இணைய சேவையாக தேர்வு செய்து அதன் பாஸ்வேர்டு பலமாக இருக்கிறதா என சோதித்துப்பார்த்து மாற்று நடவடிக்கைகளை மேற்கொள்ளலாம்.

* சுத்தமான டெஸ்க்டாப்
வீட்டைகூட சுத்தம் செய்து விடலாம் ஆனால் டெஸ்க்டாப்பை தூய்மையாக்க முடியவில்லை என்று புலம்பும் வகையில் உங்கள் கம்ப்யூட்டர் டெஸ்க்டாப்பில் ஐகான்களாகவும், கோப்புகளாகவும் அடைத்துக்கொண்டிருக்கின்றனவா? இதை ஒரேடியாக சுத்தமாக்க முயன்று தோல்வியை தழுவாமல், ஒவ்வொரு முறை கம்ப்யூட்டரை இயக்கும் போதும் ஒரு ஐகான் அல்லது கோப்பை டெஸ்க்டாப்பில் இருந்து அகற்றுவது என வைத்துக்கொள்ளுங்கள்.

* உடற்பயிற்சி அவசியம்
நீண்ட நேரம், ஒரே இடத்தில் அமர்ந்து கொண்டு வேலை செய்வது ஆரோக்கிய கேடு என்பது உங்களுக்கேத்தெரிந்திருக்கும். ஆனால் கம்ப்யூட்டர் அல்லது லேப்டாப்பே கதி என இருப்பவர்கள் என்ன செய்வது? கவலையே வேண்டாம், கம்ப்யுட்டர் முன் அமர்ந்தபடியே அவ்வப்போது கை காலை நீட்டி மடக்கி செய்யும் எளிதான உடற்பயிற்சிகள் இருக்கின்றன. இந்த உடற்பயிற்சிகளை இ- மெயில் பார்க்கும் போது அல்லது பேஸ்புக்கில் நுழையும் போது செய்வது என வைத்துக்கொண்டால் போதும்.

* ஒளிபடங்கள்
கையில் ஸ்மார்ட்போன் இருப்பதால் ஒளிப்படங்களாக எடுத்து தள்ளிக்கொள்கிறோம். ஆனால் இவை அப்படியே சேர்ந்துவிட்டால் எவை என்ன படம் என்று தெரியாமல் குழப்பமாக இருக்கும். எனவே, ஓய்வு நேரத்தில் ஒளிபடங்களை வகைப்படுத்தி அவற்றுக்கென குறிச்சொல் அமைத்து சேமித்து வைக்கலாம். ஒளிபடங்களுக்கு பேக் அப் எடுக்கவும் மறக்க வேண்டாம்.

* மாதம் ஒரு சாதனம்

கம்ப்யூட்டர், மவுஸ், கீபோர்ட் தவிர தேவைக்கேற்ப ரவுட்டர், வை-பை, புளு டூத் ஸ்பிக்கர் என பல சாதனங்களை பயன்படுத்தும் நிலை இருக்கலாம். இந்த சாதனங்களை முறையாக பராமரிக்க வேண்டும். மாதம் ஒரு சாதனத்தை சுத்தம் செய்வது என வைத்துக்கொண்டால் கூட போதும், கம்ப்யூட்டர் மேஜை ஓரளவு சுத்தமாக இருக்கும்.

* இ-மெயில் சுமை
செய்திமடல் சேவைகள் பயனுள்ளவை தான். ஆனால் அதிக சேவைகளில் உறுப்பினராக சேரும் போது, தொடர்ந்து வரும் மெயில்களை திறந்து பார்ப்பதற்கே நேரம் இல்லாமல் போகலாம். இது இமெயில் சுமையாக மாறுவதை தவிர்க்க தினம் ஒரு செய்திமடல் சேவையை பரிசீலித்து தேவை இல்லை எனில் அதில் இருந்து விலகி விடலாம்.

இப்படியே உங்கள் தேவை மற்றும் இலக்குகளுக்கு ஏற்ப தினம் ஒரு இணையதளத்தை பார்ப்பது, அல்லது இணைய அகராதியில் தினம் ஒரு வார்த்தைக்கு பொருள் அறிவது போன்ற வழிகளையும் பின்பற்றலாம். இணைய குறிப்பேடு அல்லது புக்மார்க் வசதியை பயன்படுத்தி தினம் ஒரு விஷயம் அல்லது நல்ல இணையதளத்தை குறித்து வைக்கும் பழக்கத்தை ஏற்படுத்திக்கொள்ளலாம்.

fingerprint1

கைரேகையிலும் கைவரிசை காட்டிய ஹேக்கர்கள்

இணையத்திற்கான எத்தனை பாதுகாப்பான பூட்டை தயார் செய்தாலும் அதற்கான கள்ளச்சாவியை தங்களால் தயார் செய்துவிட முடியும் என்று ஹேக்கர்கள் மீண்டும் ஒரு முறை நிருபித்துள்ளனர். ஐரோப்பாவை சேர்ந்த நட்சத்திர ஹேக்கர் ஒருவர் எவருடைய கைரேகையையும் நகலெடுக்க முடியும் என காண்பித்து திகைக்க வைத்திருக்கிறார்.
இணைய உலகில் இமெயிலும் துவங்கி வங்கிச்சேவை வரை எல்லாவற்றுக்கும் பாஸ்வேர்ட் முறையே பூட்டுச்சாவியாக பயன்படுத்தப்படுகிறது. ஆனால் பாஸ்வேர்டு முழுவதும் பாதுகாப்பானது அல்ல என்பதை ஹேக்கர்கள் பலமுறை பலவிதங்களில் நிருபித்து வருகின்றனர். இதற்கு மாற்று மருந்தாக கடினமான பாஸ்வேர்டுகளை உருவாக்குவது, இரண்டு அடுக்கு பாதுகாப்பு வழங்குவது என பலவித முயற்சிகள் மேற்கொளப்பட்டு வருகின்றன. ஆனால் எல்லாவற்றிலுமே ஏதாவது ஒரு குறை இல்லாமல் இல்லை. மேலும் எத்தனை பாதுகாப்பான பாஸ்வேர்டாக இருந்தாலும் சரி அதற்கான கள்ளச்சாவியை தயார் செய்வதில் ஹேக்கர்கள் கில்லாடிகளாக இருக்கின்றனர்.
அதனால் தான், ஒருவரின் தனிப்பட்ட அடையாளமான முகம் அல்லது கைரேகை போன்றவ்ற்றை பாஸ்வேர்டாக பயன்படுத்தலாம் என்று சொல்கின்றனர். இது தொடர்பான ஆய்வுகளும் தீவிரமாக நடைபெற்று வருகின்றன. நினைவில் கொள்ள வேண்டிய பஸ்வேர்டை விட , கைரேகை போன்ற பயோமெட்ரிக் முறை பாதுகாப்பாக இருக்கும் என்று கருதப்படுகிறது. ஐபோன் போன்றவற்றில் இந்த பாதுகாப்பு முறை பின்பற்றப்பட்டு வருகிறது.
எப்படியும் ஒருவரது கைரேகையை இன்னொருவரால் திருடிவிட முடியாது அல்லவா? இந்த நம்பிக்கைக்கு தான் ஹேக்கர்கள் இப்போது வேட்டு வைத்துள்ளனர்.
ஐரோப்பாவை சேர்ந்த நட்சத்திர ஹேக்கர் ஒருவர் கைரேகையை மிக சுலபமாக நக்லெடுக்க முடியும் என உணர்த்தி இணைய உலகிற்கும் பாஸ்வேர்டு வல்லுனர்களுக்கும் ஒருசேர அதிர்ச்சி வைத்தியம் அளித்துள்ளார்.
ஹேக்கர்கள் உலகில் ஸ்டார்பக் என அறியப்படும் ஜான் கிறிஸ்லர் எனும் அந்த ஹேக்கர் ஜெர்மனியில் நடைபெற்ற சோஸ் கம்ப்யூட்டர் கிளப் எனும் ஹேக்கர்கள் சங்கம் சார்பில் நடைபெற்ற மாநாட்டில் தனது கண்டுபிடிப்பை பெருமையுடன் அரங்கேற்றியுள்ளார்.
கிறிஸ்லர், ஜெர்மனி பாதுகாப்பு அமைச்சர் உர்சுலா வான் டே லேயேன் கைரேகையை தான் நகலெடுத்து காட்டியிருக்கிறார். அதிலும் எப்படி தெரியுமா? பொது வெளியில் இருக்கும் அமைச்சரின் புகைப்படங்களை வைத்துக்கொண்டே அவரது கைரேகையை நகலெடுத்திருக்கிறார்.
செய்தியாளர் சந்திப்பில் அமைச்சர் பேசுவது போன்ற புகைப்படங்களை கொண்டே கைரேகையை கிறிஸ்லர் தயார் செய்துவிட்டார். நவீன காமிராக்களின் செயல்திறன் மூலம் வெளிப்படும் புகைப்ப்டத்தின் தரம் தான் அவருக்கு கைகொடுத்திருக்கிறது. அதோடு வெரிஃபிங்கர் எனும் சாப்ட்வேரை துணையாக கொண்டு புகைப்படங்களில் தோன்றும் கைகளின் காட்சியை கொண்டே கைரேகையை சுட்டிருக்கிறார்.
இதே போல யாருடைய கைரேகையை வேண்டுமானாலும் திருடி ப்யோமெட்ரிக் பூட்டுகளை ஏமாற்றிவிடலாம் என்று ஹேக்கர்கள் நம்புகின்றனர்.
பயோமெட்ரிக் முறை முற்றிலும் பாதுகாப்பனதல்ல என்பது வல்லுனர்களும் அறிந்தது தான். ஒருவர் பயன்படுத்திய கண்ணாடி போன்ற மென்மையான பொருள் மூலம் கைரேகையை நகலெடுப்பது சாத்தியமே என கருதப்பட்டு வந்தது. ஆனால் இந்த முறை கொஞ்சம் சிக்கலானது.
ஆனால், ஒருவர் பொருட்களை திருடும் அவசியம் இல்லாமல் பொது வெளியில் கிடைக்கும் புகைப்ப்டங்கள் மூலமே ஒருவரின் கைரேகையை தயார் செய்ய முடியும் என்னும் செய்தி கொஞ்சம் கவலைதரக்கூடியது தான்.
அதுமட்டும் அல்ல, இனி உலக தலைவர்கள் எல்லாம் பொது இடங்களில் கிளவுஸ் அணிந்து தான் தோன்ற வேண்டியிருக்கும் என்றும் இந்த கண்டுபிடிப்பை நிகழ்த்திய ஹேக்கர் திமிறாக கூறியுள்ளார். உலகம் எப்படி போகிறது பாருங்கள்!

கைரேகை நகலெடுப்பு பற்றிய ஹேக்கர்கள் விளக்கத்தை அறிய விருப்பமா? http://www.ccc.de/en/updates/2014/ursel

l1

இணையத்தை கலக்கும் லெகோ விவசாயி

கிறிஸ்துமஸ் பண்டிகை என்றதுமே கிறிஸ்துமஸ் மரமும், கேக்கும்,நட்சத்திரமும் தான் நினைவுக்கு வரும். ஆனால் ஆஸ்திரேலியா இளம் பெண் விவசாயி ஒருவர் தனது லெகோ விவசாயி மூலம் கிறிஸ்துமஸ் பண்டிகையை புதுமையாக வரவேற்றிருக்கிறார்.
அதென்ன லெகோ விவசாயி என்று கேட்கலாம் . சிறுவர்கள் விளையாட ஆசையோடு பயன்படுத்தும் லெகோ செங்கற்களை கொண்டு உருவாக்கப்பட்ட பொம்மை விவசாயி தான் இந்த லெகோ விவசாயி.
ஆஸ்திரேலியாவின் நியூ சவுத் வேல்ஸ் பகுதியை சேர்ந்த 24 வயது இளம் பெண்ணான எய்மீ ஸ்னோடன் ( Aimee Snowden ) தான் இந்த லேகோ பொம்மை விவசாயியை உருவாக்கி இருக்கிறார். எய்மீ தற்கால தலைமுறையை சேர்ந்தவராக இருந்தாலும் நவீன வாழ்க்கை மோகத்தால் அடித்துச்செல்லப்படாமல் விவசாயத்தின் மீது ஆர்வம் கொண்டிருக்கிறார். அவரது குடும்பமே விவசாய குடும்பம் என்பதால் தங்கள் பண்ணையேலேயே அவர் விவசாயம் மேற்கொண்டு வருகிறார்.
விவசாயம் தவிர ஏய்மீக்கு இணையத்திலும் ஆர்வம் அதிகம். லொகோ பொம்மைகள் மீதும் சிறுவயதில் இருந்தே ஈடுபாடு அதிகம். புகைப்படக்கலையும் பிடிக்கும். இவை எல்லாவற்றின் கலைவயாக உருவானவர் தான் லெகோ விவசாயி –

l2
ஆனால் இந்த லெகோ விவசாயின் விளையாட்டு முயற்சி அல்ல. விவசாயத்தையும்,விவசாயியையும் கொண்டாடும் வித்தியாசமான முயற்சி.
இங்கு லெகோ பொம்மை கலாச்சாரம் பற்றி கொஞ்சம் தெரிந்து கொள்ள வேண்டும். லெகோ செங்கற்கள் சிறுவர்களுக்கான விளையாட்டு பொம்மைகள் தான் என்றாலும் அவை பெரியவர்களாலும் புதுமையான முறையில் பயன்படுத்தப்பட்டு வருகிறது. லெகோ செங்கற்களின் எளிமையான மற்றும் வளைந்து கொடுக்கும் தன்மை அவற்றை கொஞ்சம் கற்பனை சேர்த்து படைப்பாற்றலை வெளிப்படுத்தி பயன்படுத்தவும் வழி செய்கிறது. இதற்கு அழகான உதாரணங்கள் பல இருக்கின்றன.
இவற்றில் ஒரு அழகான உதாரணம் தான் லெகோ விவசாயிக்கான விதையாக எய்மீ மனதில் விழுந்தது. அந்த உதாரணம் லெகோ பயணிகள் (http://legotravellers.com/) . ஸ்காட்லாந்தை பூர்விகமாக கொண்ட கிரேக் மற்றும் லின்சே தான் இந்த லெகோ பயணிகளை உருவாக்கியவர்கள். இந்த பயணிகளும் லெகோ பொம்மைகள் தான் . அதாவது லெகோ செங்கற்களை கொண்டு சுற்றுலா பயணிகள் போன உருவாக்கப்பட்ட பொம்மைகள். ( ஒரு ஆண், ஒரு பெண்)
பொதுவாக சுற்றுலா பயணிகள் மத்தியில் தாங்கள் செல்லும் இடங்களின் பின்னணியில் புகைப்படம் எடுத்துக்கொள்ளும் வழக்கம் இருக்கிறது இல்லையா? அதிலும் இப்போது செல்ஃபீ மோகம் பிடித்தாட்டும் நிலையில் எங்கு சென்றாலும் எல்லோரும் முதலில் ஒரு சுயபடத்தை எடுத்துக்கொள்கின்றனர்.
கிரேக்,லின்சே ஜோடியும் இப்படி உலக சுற்றுலாவுக்கு புறப்பட்ட போது இந்த பழக்கத்தில் இருந்து மாறுபட்டு தங்கள் பயண அனுபவத்தை புதுமையான முறையில் படமாக்கி பகிர்ந்து கொண்டனர். அதாவது தங்களை புகைப்படம் எடுத்துக்கொள்ளாமல் எல்லா இடங்களிலும் அந்த இடத்தில் தாங்கள் உருவாக்கி லெகோ பயண ஜோடியை நிற்க வைத்து புகைப்படம் எடுத்தனர்.
ஒவ்வொரு ஊரிலும் அதன் பின்னணிக்கு ஏற்ப பொருத்தமான முறையில் லெகோ பயண ஜோடியை தயார் செய்து போஸ் கொடுக்க வைத்து படமெடுத்தனர். இந்த பயண புகைப்படங்கள் அவர்கள் பார்த்து ரசித்த இடங்களை அழகாக படம் படித்திருக்கும் .ஆனால் அதில் அவர்கள் இடம்பெறுவதற்கு பதில் அவர்கள் பிரதிநிதிகளாக லெகோ பொம்மை பயணிகள் காட்சி அளிப்பார்கள்.
இந்த லெகோ பயண புகைப்படங்களை இந்த ஜோடி இணையத்தில் பகிர்ந்து கொண்ட போது பலரும் கவரப்பட்டனர். பேஸ்புக்கில் இந்த படங்களுக்கு லைக்குகள் குவிந்தன. பலரும் ஆர்வத்துடன் இந்த பயண புகைப்படங்களை பின் தொடர்ந்தனர். இதன் விளைவாக இந்த ஜோடி லேகோ டிராவலர்ஸ் எனும் இணையதளத்தையே அமைத்துவிட்டது.
அட புதுமையான ஐடியாவாக இருக்கிறதே என்று லெகோ பயணிகள் புகைப்படங்களை பலரும் பார்த்து ரசித்து பாராட்டினர். இவர்களில் ஒருவரான எயிமீ இந்த ஐடியாவை ரசித்ததுடன் நில்லாமல் தானும் இதே போல செய்யலாமே என ஊக்கம் பெற்றார்.
எய்மீக்கும் லெகோ பொம்மைகள் மற்றும் புகைப்படக்கலை இரண்டிலுமே மோகம் இருந்தது. இரண்டையும் இணைத்து தான் நேசிக்கும் விவசாயத்திற்காக ஏதவாது செய்ய விரும்பினார். அவர் அடிக்கடி புழங்கும் புகைப்பட பகிர்வு சேவையான இன்ஸ்டாகிராமில் லெகோ குழுக்கள் பல இருந்தாலும் விவசாயம் சார்ந்து எதுவுமில்லை. அப்போது தான் அவருக்கு லெகோ பொம்மை விவசாயியை உருவாக்கும் எண்ணம் பிறந்தது.
லெகோ பொம்மை விவசாயியை தங்கள் பண்ணையில் பணி புரிவது போல படம் பிடித்து அதை புகைப்படங்களாக பகிர்ந்து கொள்ளத்துவங்கினார். விவசாய பண்ணையில் என்ன நடக்கிறது என்பதை மற்றவர்களுக்கு இதன் மூலம் உணர்த்த முடியும் என அவர் நம்பினார்.
இப்படி தான் அவரது லெகோவிவசாயி வலைப்பதிவு ஆரம்பமானது.
கடந்த செப்டம்பர் மாதம் முதல் பண்ணை நிலத்தில் லெகோ விவசாயியை பலவித வேலைகளில் ஈடுபட வைத்து அவர் படங்களாக பகிர்ந்து கொண்டு வருகிறார். இந்த புதுமையான முயற்சிக்கு அமோக வரவேற்பு கிடைத்துள்ளது அவரை உற்சாகத்தில் ஆழ்த்தியுள்ளது.
இந்த மகிழ்ச்சியுடன் தான் அவர், ஆஸ்திரேலிய வழக்கப்பட கிறிஸ்துமஸ் பண்டிகைக்கு முந்தைய 12 நாள் கொண்டாட்டத்தையும் லெகோ விவசாயி மூலம் வெளிப்படுத்தியிருக்கிறார். கடந்த 10 தேதி முதல் லெகோ விவசாயியை வயல்வெளியில் கிறிஸ்துமஸ் கொண்டாட்டத்தில் ஈடுபட வைத்து ஒவ்வொரு நாளும் அதை புகைப்படமாக எடுத்து வெளியிட்டிருக்கிறார்.
முதல் நாள் அன்று விவசாயி மழையில் நனைந்தபடி இருப்பதில் துவங்கும் இந்த கொண்டாட்டம் 12 ம் நாள் வயலில் நண்பர்கள் ஒன்றாக புகைப்டம் எடுத்துக்கொள்வதுடன் முடிந்திருக்கிறது. நடுவே விவசாயி பாசனம் செய்வதும் ,அறுவடைக்கு தயாரான கதிரை பார்த்து மகிழ்வதுமான படங்கள் செம கியூட்டாக இருக்கிறது.
விவசாயத்தின் மீது ஆர்வத்தை இப்படி ஒரு வழியா என வியக்க வைக்கிறார் ஏய்மீ ஸ்னோடன்!.

 

லெகோவிசாயியின் இணைய வீடு: http://www.legofarmer.com/

லெகோ பயணிகளின் இணைய வீடு: http://legotravellers.com/

———–

 

விகடன்.காமில் எழுதியது.

 

( இது போன்ற புதுமையான முயற்சியில் ஈடுபட்டு கவனத்தை ஈர்த்து வருபவர்கள் மீது எனக்கு எப்போதுமே ஆர்வம் அதிகம். இவர்கள் இணையத்தின் எல்லையில்லா சாத்தியங்களை உணர்த்தி வருகின்றனர். இவர்களே இணைய நட்சத்திரங்களாக உருவாகின்றனர். இத்தகைய இணைய நெட்சத்திரங்கள் பற்றிய விரிவான ஊக்கம் அளிக்கும் அறிமுகத்துடன் எனது இரண்டாவது புத்தகமான நெட்சத்திரங்கள் உருவாகி இருக்கிறது. சென்னை புத்தக கண்காட்சியை முன்னிட்டு வெளியாகி இருக்கும் நூல் இது.

நெட்சத்திரங்கள் புத்தகம் பற்றி மேலும் விவரம் தேவை எனில் இமெயிலில் தொடர்பு கொள்ளலாம் )

 

லெகோ பயணிகள் பற்றிய முந்தைய பதிவை படிக்க விருப்பமா; http://cybersimman.com/2014/05/21/travel-5/