Tag Archives: digital

பிட்காயின் ஒரு அறிமுகம்!

இணைய உலகில் கீக் என குறிப்பிடப்படும் தொழில்நுட்ப பித்தர்கள் மட்டுமே அறிந்திருந்த புதுயுக நாணயமான பிட்காயின் பற்றி இப்போது பலரும் பேசத்துவங்கியிருக்கின்றனர். சில மாதங்களுக்கு முன்னர் இணைய உலகை உலுக்கிய ரான்சம்வேர் தாக்குதலுக்கு காரணமாக தாக்காளர்கள் (ஹேக்கர்கள்) பிணைத்தொகையாக பிட்காயினை கேட்டதும் இந்த டிஜிட்டல் நாணயம் மீது கூடுதல் ஆர்வத்தை ஏற்படுத்தியுள்ளது. இணைய நிழல் உலகம் என சொல்லப்படும் இருண்ட வலையில் (டார்க் வெப்) பிட்காயின் பயன்பாடு அதிகம் இருப்பதும், இதன் முக்கிய அம்சமாக சொல்லப்படும் அனாமதேய தன்மையும் பிட்காயின் மீதான ஆர்வத்தை அதிகமாக்கியுள்ளது.

இதனிடையே பிட்காயின் தொடர்பாக பொதுமக்களின் கருத்துக்களை அரசு கோரியதும், அண்மையில் நிதி அமைச்சர் பிட்காயின் குறித்து ஆலோசனை நடத்தியதும், அதென்ன பிட்காயின் என பலரையும் கேட்க வைத்துள்ளது.

இணைய உலகின் அற்புதம் என அதன் ஆதாரவாளர்களாலும், இணைய பூதம் என அதன் எதிர்ப்பாளர்களாலும் கருதப்படும் பிட்காயின் என்றால் என்ன? அதன் பயன்பாடு என்ன? பிரச்சனைகள் என்ன? போன்றவை குறித்து பார்ப்போம்…

பிட்காயின் என்றால் என்ன? இந்த கேள்விக்கு பலவிதமாக பதில் அளிக்கலாம். பிட்காயின் என்பது ஒரு வகையான மெய்நிகர் பணம் அல்லது டிஜிட்டல் பணம். இணையத்திற்கான பணம் என்றும் குறிப்பிடப்படும் பிட்காயின் கொண்டு பொருட்களை வாங்கலாம், விற்கலாம். பிட்காயினில் முதலீடு செய்யலாம். ஆனால் இந்த பணத்தை கண்ணால் பார்க்க முடியாது, கையால் தொட முடியாது. ஏனெனில் இதற்கு உருவம் கிடையாது. பிட்காயின் எண்ம வடிவிலானது. இதற்காக உருவாக்கப்பட்ட பிரத்யேக் மென்பொருளால் அடையாளம் காணக்கூடிய கம்ப்யூட்டர் நிரல் துண்டுகளால் ஆனது என வைத்துக்கொள்ளலாம்.

ஆனால், இந்த பதில்களால் பிட்காயினை முழுவதுமாக புரிந்து கொள்ள முடியாது. பிட்காயினை புரிந்து கொள்ள வேண்டும் என்றால் அதன் அடிப்படை கோட்பாட்டையும், அதற்கே உரிய தனிச்சிறப்பான அம்சங்களையும் புரிந்து கொள்ள வேண்டும்.

பிட்காயின் என்பது அடிப்படையில் மின்னணு முறையில் உருவாக்கப்பட்டு மின்னணு முறையில் வைத்திருந்து பரிவர்த்தனை செய்யப்படும் ஒரு வகையான டிஜிட்டல் பணம். பிட்காயின் என்பது டிஜிட்டல் பணம் மட்டும் அல்ல, அந்த பணம் செயல்படுவதற்கான பரிவர்த்தனை அமைப்பும் தான். இதையே வேறு விதமாக சொலவது என்றால், மற்ற பணம் போல் பிட்காயின் எந்த ஒரு நாட்டு அரசாலும் வெளியிடப்படுவதில்லை: எந்த மத்திய வங்கியாலும் கட்டுப்படுத்தப்படுவதில்லை. அதனை அச்சிடவும் முடியாது. அதனால் தான் பிட்காயின் மையமில்லா பணம் என்று சொல்லபடுகிறது.

இந்த தன்மையால் தான் பிட்காயின் ஆர்வலர்கள் அதை நேசிக்கின்றனர். மத்திய வங்கிகளும், அரசாங்களும் இதை சந்தேகமாக பார்க்கின்றனர். தாக்காளர்களும், இணைய திருடர்களும் பிட்காயினை விரும்பி நாட இதுவே காரணம்.

பிட்காயின் தகவல்கள் சுவாரஸ்யமாக இருந்தாலும், குழப்புகிறதா? அதன் பின்னே உள்ள நுணுக்கங்கள் அப்படி!

கொஞ்சம் பொறுமையாக பிட்காயினை புரிந்து கொள்ள முயற்சிப்போம். முதலில் பிட்காயின் தோற்றம் பற்றி சில தகவல்கள். பிட்காயின் டிஜிட்டல் பணம் என்று குறிப்பிடப்பட்டாலும் அது முற்றிலும் புதுவகையான நாணயம். டிஜிட்டில் வடிவிலான எல்லா பரிவர்த்தனைக்கும் அதை முறைப்படுத்தக்கூடிய ஒரு மூன்றாம் அமைப்பு தேவை. அது வங்கியாக இருக்கலாம் அல்லது கிரெடிட் கார்டு நிறுவனமாக இருக்கலாம். ஆனால் பிட்காயினை, இப்படி எந்த ஒரு மூன்றாம் அமைப்பும் இல்லாமலே வாங்குபவரும், பெறுபவரும் நேரடியாக பரிவர்த்தனை செய்து கொள்ளலாம். இப்படி, இடைத்தரகர்கள் இல்லாத, பயணாளிகளுக்கு இடையிலான பரிவர்த்தனையே பிட்காயினின் ஆதாரம் அம்சங்களில் ஒன்றாக சொல்லப்படுகிறது.

எல்லாம் சரி, நேரடியாக பரிவர்த்தனை செய்யலாம் என்றால், ஒரே பிட்காயினை பலருக்கு கொடுப்பது போன்ற ஏமாற்று வேலைகள் எல்லாம் நடக்காதா? என கேட்கலாம். அப்படி எதுவும் நடக்க முடியாத அளவுக்கு, பிட்காயின் பரிவர்த்தனைக்கான முறை பக்காவாக உருவாக்கப்பட்டுள்ளது. சமகால வங்கி அமைப்புகளே வியந்து போகும் பிளாக்செயின் எனப்படும் இந்த நுட்பம் பிட்காயினின் இன்னொரு தனிச்சிறப்பாக அமைகிறது. கள்ள நாணயம் அல்லது கருப்பு பிட்காயினுக்கு எல்லாம் வாய்ப்பு இல்லாத வகையில் பிட்காயினுக்கான ஆதார வலைப்பின்னல் அமைப்பு அமைந்துள்ளது.

இந்த அமைப்பு பற்றி பின்னர் விரிவாக பார்க்கலாம். இப்போது பிட்காயின் தோற்றத்தை கவனிக்கலாம். பிட்காயினை விட அதன் தோற்றம், புதிரானது என்பது சுவாரஸ்யமான விஷயம். 2009 ல் சடோஷி நாகமோட்டோ என்பவர் முன்வைத்த இணைய அறிக்கையில் இருந்து தான் பிட்காயின் உருவானது. ஆனால் இன்று வரை யார் இந்த சடோஷி என்பது ஒருவருக்கும் தெரியாது. அவர் ஒருவரா? அல்லது பலரா? என்பதும் தெரியாது. யார் இந்த சடோஷி என்பதை கண்டுபிடிப்பதற்கான தேடல் ஒரு பக்கம் நடந்து கொண்டே இருக்கிறது.

விஷயம் என்னவெனில், 2009 ல் மூன்றாம் தரப்பு துணை இல்லாமலே இரு நபர்கள் நேரடியாக பரிவர்த்தனை செய்து கொள்வதற்கான கம்ப்யூட்டர் சார்ந்த முறையை பிட்காயின் ஒரு சகாக்களிடையேயான மின்னணு பண பரிவர்த்தனை முறை எனும் தலைப்பிலான கட்டுரை சடோஷி பெயரில் இணையத்தில் வெளியானது. இந்த பரிவர்த்தனையை உறுதி செய்வதற்கான அடிப்படையையும் அவர் வெளியிட்டிருந்தார். இணைய ஆர்வலர்கள் பலருக்கு இந்த முறையின் பின்னே இருந்த கோட்பாடு பிடித்துப்போகவே, இதற்கு செயல்வடிவம் கொடுக்க உதவும் மென்பொருளை உருவாக்கி வெளியிட்டனர். இந்த மென்பொருளை யார் வேண்டுமானாலும் தரவிறக்கம் செய்து பயன்படுத்திக்கொள்ளலாம் என அறிவித்தனர்.

இப்படி தான் பிட்காயின் புழக்கத்திற்கு வந்தது. மத்திய வங்கிகளால் கட்டுப்படுத்தப்படாத தன்மை மற்றும் பரிவர்த்தனைக்கு பின்னே உள்ளவர்கள் அடையாளம் காணப்படாமல் அனாமதேயமாக இருப்பதற்கான வாய்ப்பு உள்ளிட்ட அம்சங்கள் இணைய ஆர்வலர்களை கவர்ந்திழுக்கவே இணைய உலகில் இந்த நாணயம் பிரபலமாகத்துவங்கியது.

கட்டுப்பாடில்லாத, மையமில்லா நாணயம் என்பது சரி. அப்படி எனில் பிட்காயினை வெளியிடுவது யார்? அது எப்படி புழக்கத்திற்கு வருகிறது? பிட்காயினை யாரும் வெளியிடுவதில்லை: மாறாக எல்லோரும் சேர்ந்து அதை உருவாக்கி புழக்கத்திற்கு கொண்டு வருகின்றனர். அதெப்படி?

பிட்காயின் என்றால், கண்ணுக்குத்தெரியாத கம்ப்யூட்டர் நிரல் துகள்களால் ஆனது அல்லவா? இந்த டிஜிட்டல் துகள்கள் பிட்காயின் மென்பொருளில் இருந்து, ஒரு வகையான கணித புதிரை விடுவிப்பது மூலம் உருவாக்கப்படுகிறது. மென்பொருளை தரவிறக்கம் செய்து, கணித புதிரை விடுவித்தால் அதற்கான பரிசாக புதிய பிட்காயினை பெறலாம். ஒவ்வொரு பத்து நிமிடத்திற்கு ஒரு முறை குறிப்பிட்ட அளவு பிட்காயின் விடுவிக்கப்படும்.

பிட்காயின் உருவாக்கத்தில் சில முக்கியமான விதிகள் இருக்கின்றன. முதல் விஷயம் பிட்காயின் உருவாக்கத்திற்கு என்று ஒரு இறுதி வரம்பு இருக்கிறது. இஷ்டம் போல பிட்காயினை உருவாக்கி கொண்டிருக்க முடியாது. இன்றைய தேதிக்கு 11 மில்லியன் பிட்காயின் உருவாக்கப்பட்டுள்ளது. ஆனால் ஆக மொத்தம் 21 மில்லியன் பிட்காயின் தான் உருவாக்கப்பட முடியும். இதற்கான கெடு 2140 என கெடு நிர்ணயிக்கப்பட்டுள்ளது. அது வரை பிட்காயின் உருவாக்கம் கடினமாகி கொண்டே இருக்கும். அதாவது போகப்போக பிட்காயின் புதிரை விடுவித்து புதிய பிட்காயின்களை விடுவிப்பது மிகவும் கடினமாகும். இதற்கு இன்னும் கூடுதலான கம்ப்யூட்டர் ஆற்றல் தேவை. இதுவே பிட்காயின் உலகின் மைனிங் என சொல்லப்படுகிறது. பிட்காயினை டிஜிட்டல் முறையில் தோண்டியெடுப்பது என்றும் புரிந்து கொள்ளலாம்.

இதில் இன்னொரு விஷயமும் கவனிக்க வேண்டும். பிட்காயின் என்பது நாணயம் மற்றும் அது செயல்படுவதற்கான அமைப்பும் என்று பார்த்தோம் அல்லவா? அதாவது பிட்காயின் உருவாக்கம் மற்றும் அதன் பரிவர்த்தனை இரண்டையும் மைனிங் தான் நிறைவேற்றித்தருகிறது. பிட்காயின் புழக்கம் அதிகரிப்பதற்கு ஏற்ப அதை பராமரிப்பதற்கு தேவையான ஆற்றலும் அதிகரிக்கும் தானே. அதனால் தான் பிட்காயின் உருவாக்கத்திற்கு தேவையான கம்ப்யூட்டர் ஆற்றலும் அதிகரிக்கும் வகையில் இந்த முறை உருவாக்கப்பட்டுள்ளது.

ஆக, கூடுதல் பிட்காயின் தேவை எனில் சக்தி வாய்ந்த கம்ப்யூட்டர்களை அமைப்பில் இணைந்து பிட்காயினை உருவாக்க வேண்டும். இதன் மூலம் அதிகரிக்கும் பிட்காயின் புழக்கத்தை கையாளும் திறனும் அமைப்பிற்கு உண்டாகும்.

கம்ப்யூட்டர் ஆற்றலை அளித்து மைனிங்கில் ஈடுபட்டால் பிட்காயினை விடுவித்து அதற்கு பரிசாக பிட்காயின் பெறலாம் சரி, ஆனால் பிட்காயினை பயன்படுத்துவது எப்படி?  அதை வைத்திருப்பது எப்படி? அதன் கொடுக்கல் வாங்கலை கண்காணிப்பது எப்படி?

இந்த கேள்விகளுக்கான பதில் பிட்காயினுக்கான பிளாக்செயின் முறையில் உள்ளது. பிளாக்செயினை டிஜிட்டல் பதிவேடு என்று வைத்துக்கொள்ளுங்களேன். ஒவ்வொரு முறை பிட்காயின் பரிவர்த்தனை செய்யப்படும் போது அதற்கான குறிப்பு இந்த பதிவேட்டில் இடம்பெறும். இது தான் பரிவர்த்தனைக்கான ஆதாரம். இந்த பதிவேட்டை பராமரிக்க ஒருவர் இருக்க வேண்டும் அல்லவா? அப்போது தானே ஏமாற்று வேலைகள் நடக்காமல் இருக்கும். ஆனால் அப்படி எந்த பராமரிப்பாளரும் கிடையாது. மையம் என்பதே பிட்காயினில் கிடையாதே, என்ன செய்ய!

எனில், பிட்காயின் பரிவர்த்தனையை உறுதி செய்வது எப்படி? பிளாக்செயின் பதிவேட்டில் தான் இதற்கான பதில் அடங்கியிருக்கிறது. ஒவ்வொருவரிடமும் ஒரு பதிவேடு இருக்கும் என்பதும், ஒவ்வொரு பரிவர்த்தனையும் எல்லா பதிவேட்டிலும் பதிவாகும் என்பது தான் விஷயம். ஆக, ஒரு முறை பரிவர்த்தனை நிகழ்ந்தால் அதற்கான குறிப்பு எல்லா பதிவேட்டிலும் அப்டேட் செய்யப்படும். இதன் பொருள் இதுவரை நிகழ்ந்த பரிவர்த்தனைகள் மற்றும் இனி நிகழ்ப்போகும் பரிவர்த்தனைகள் என எல்லாவற்றுக்குமான குறிப்புகளுடம் பிளாக் செயின் பதிவேட்டில் அப்டேட்டாகி  கொண்டே இருக்கும்.

ஒவ்வொரு பத்து நிமிடத்திற்கு நடக்கும் பரிவர்த்தனைகள் ஒரு பிளாக்காக சேர்க்கப்பட்டு ஏற்கனவே பதிவேட்டில் உள்ள பிளாக்கில் சேர்க்க்கப்படும். ஒருங்கிணைந்த பிட்காயின் மென்பொருள் கொண்டு பிட்காயின் சமூகத்தினர் தங்கள் கம்ப்யூட்டரை இணைத்து இவற்றை செய்து வருகின்றனர்.

எனவே பிடிகாயின் பரிவர்த்தனையில் போலி செய்வது, ஏமாற்றுவது சாத்தியம் இல்லை. எல்லா விவரத்திற்கும் பிளாக்செயின் சாட்சி. இந்த நுட்பத்தை தான் வங்கி அமைப்புகள் உன்னிப்பாக கவனித்து வருகின்றன. இந்த அம்சமே பிட்காயினை எதிர்கால நாணயமாக இருக்கும் என்றும் பேச வைக்கிறது.

பிட்காயினை தோண்டியெடுக்க பெரும் கம்ப்யூட்டர் ஆற்றல் தேவை என்பதால் எல்லோருக்கும் இது சாத்தியமில்லை. அதற்கான கவலைப்பட வேண்டாம், டாலர் அல்லது ரூபாய் போன்ற நாணயம் கொண்டு பிட்காயினை வாங்கிக்கொள்ளலாம். இதற்கான பிட்காயின் இணைப்பகங்கள் இணையத்தில் இருக்கின்றன. சில நாடுகளில் பிட்காயின் ஏ.டி.எம்கள் கூட இருக்கின்றன. நாணயம் வாங்குவது போல அன்றைய சந்தை விலையில் பிட்காயினை வாங்கலாம்.

சந்தையில் பிட்காயினுக்கான தேவைக்கு ஏற்ப அதன் மதிப்பு அமைகிறது. இன்றைய தேதிக்கு பிடிகாயினுக்கு நல்ல டிமாண்ட் இருப்பதால் ஒரு பிடிகாயினின் மதிப்பு 2,400 டாலருக்கு மேல். இந்திய மதிப்பை கேட்டால் தலைசுற்றும். ஒரு லட்சத்து ஐம்பத்தெட்டாயிரத்துக்கு மேல். கற்பனை செய்து பாருங்கள் சில ஆண்டுகளுக்கு முன் கொஞ்சம் பிட்காயின் வாங்கி வைத்திருந்தால் இப்போது எப்படி இருக்கும் என்று! பிட்காயின் ஒரு முதலீடாக கவர்வதற்கான காரணம் இந்த எகிரும் மதிப்பு தான். ஆனால் இடையே பிட்காயின் மதிப்பு சரிந்த காலங்களும் உண்டு என்பதை மனதில் கொள்ள வேண்டும். பங்குச்சந்தை போன்றது தான் அதுவும்.

இந்தியாவின் ஜெப்பே, காயின்செக்யூர் போன்ற ஸ்டார்ட் அப் நிறுவனங்கள் பிட்காயினை வாங்கி விற்க வழி செய்கின்றன.

பிட்காயின் மோகத்திற்கான பதில் இப்போது கிடைத்திருக்கும். சரி, பிட்காயினை எப்படி கையாள்வது? இதற்காக என்று பிட்காயின் வாலெட்கள் இருக்கின்றன. வாலெட்கள் என்றால், மின்னணு பர்ஸ் போன்றவை. இதில் தான் பிட்காயின் வீற்றிருக்கும். எண்ம நாணயம் என்பதால், இதை விடுவிக்கவும் வாங்கவும், மின்னணு பர்சிற்கான இரண்டு சாவிகள் உண்டு. ஒரு சாவி பொதுவானது. அதை பரிவர்த்தனையின் போது பகிரலாம். மற்றொரு சாவி தனிப்பட்டது. அதை ரகசியமாக வைத்திருந்து இயக்கலாம். இந்த ரகசிய சாவியே பிட்காயின் பரிவர்த்தனையை பாதுகாப்பானதாக்குகிறது.

இனி முக்கிய கேள்விகளுக்கு வருவோம். பிட்காயின் எதிர்காலம் என்ன? அது எந்த அளவு சட்டபூர்வமானது?

பிட்காயின் எதிர்காலம் எப்படி இருக்கும் என்பது சுவாரஸ்யமான கேள்வி. அதன் ஆதாரவாளர்கள் பிட்காயின் தான் எதிர்கால பணம் என்று கொண்டாடுகின்றனர். தொழில்நுட்ப ஆர்வலர்கள் பலரும் இதன் அம்சங்களால் கவரப்பட்டு பிட்காயினுக்கு தாவுகின்றனர். தடயம் இல்லாத பரிவர்த்தனை என்பதால் தாக்காளர்கள் பிணைத்தொகை கேட்டாலும் பிட்காயினாக கேட்கின்றனர்.

மையமில்லாத பணம் என்பதால் மத்திய வங்கிகள் பிட்காயினை சந்தேகத்துடனே நோக்குகின்றன. பிட்காயினுக்கான சட்டபூர்வ அந்தஸ்து நாட்டுக்கு நாடு மாறுகிறது. ஒருசில நாடுகள் பிட்காயின் பரிவர்த்தனையை சட்ட விரோதமானதாக அறிவித்துள்ளன ஆனால் பணமாக பிட்காயின் பரிவர்த்தனை தொடர்பான அணுகுமுறை மற்றும் கட்டுப்பாடுகளும் மாறுபடுகின்றன.

இந்தியாவை பொருத்தவரை பிட்காயின் பயன்பாட்டிற்கு அவரவரே பொறுப்பு என ரிசர்வ வங்கி சில மாதங்களுக்கு முன் எச்சரித்துள்ளது. அதன் பிறகு மத்திய நிதி அமைச்சகம் சார்பில் பிட்காயின் உள்ளிட்ட டிஜிட்டல் நாணயங்கள் ( பிட்காயின் போலவே வேறு பல நாணயங்களும் உள்ளன) தொடர்பாக ஆய்வு செய்ய ஒரு குழு அமைக்கப்பட்டது. மத்திய அரசும் டிஜிட்டல் நாணயங்களை கட்டுப்படுத்துவது தொடர்பாக பொதுமக்களின் கருத்துக்களை இணையம் மூலம் கோரியது. அண்மையில் நிதி அமைச்சர் அருண் ஜேட்லி தலைமையில் இது தொடர்பாக ஆலோசனை கூட்டமும் நடைபெற்றுள்ளது.

பிட்காயின் போன்ற டிஜிட்டல் நாணயங்களை கட்டுப்படுத்துவது அல்லது முறைப்படுத்துவது தொடர்பான விவாதமும் தீவிரமாகி வரும் நிலையில் பிட்காயின் மீதான ஆர்வமும் அதிகரித்து வருகிறது.

 

ரொக்கமில்லா சமூகம் சாத்தியமா? அலசும் ‘டிஜிட்டல் பணம்” புத்தகம்

vanigaபணமதிப்பு நீக்க நடவடிக்கைக்கு பிறகு டிஜிட்டல் பரிவர்த்தனை தொடர்பான சர்ச்சையும், விவாதமும் தீவிரமடைந்து சற்று ஓய்ந்திருக்கிறது. இந்நிலையில், டிஜிட்டல் பரிவர்த்தனையை மையமாக கொண்டு டிஜிட்டல் பணம் புத்தகம் வெளியாகி இருக்கிறது. பத்திரிகையாளரும், தொழில்நுட்ப வலைப்பதிவாளருமான சைபர்சிம்மன் இந்த புத்தகத்தை எழுதியிருக்கிறார். கிழக்கு பதிப்பக வெளியீடாக இந்த நூல் வெளியாகி இருக்கிறது.

கடந்த நவம்பர் மாதம் அறிவிக்கப்பட்ட பண மதிப்பு நீக்க நடவடிக்கை பொதுமக்களுக்கு ஒரு பக்கம் பெரும் இன்னலை ஏற்படுத்தினாலும், டிஜிட்டல் பரிவர்த்தனையை சார்ந்த ரொக்கமில்லா சமூகம் தொடர்பான விவாதத்தையும் ஏற்படுத்தியது. இந்தியா போன்ற நாட்டில் முழுவதும் டிஜிட்டல் பரிவர்த்தனைக்கு மாறுவது சாத்தியம் தானா? எனும் கேள்வியும் பலரால் கேட்கப்பட்டது. இதற்கான பதில்கள் மாறுபட்ட நிலையில், எல்லாமே டிஜிட்டலுக்கு மாறிவரும் உலகில் பணமும் டிஜிட்டல்மயமாவது தவிக்க இயலாதது என வாதிடுகிறது ‘டிஜிட்டல் பணம்’ புத்தகம்.

நவீன தொழில்நுட்ப வளர்ச்சியின் காரணமாக உலகம் ரொக்கமில்லா சமூகத்தை நோக்கி முன்னேறிக்கொண்டிருப்பதை விவரிக்கும் இந்த புத்தகம், இந்தியா போன்ற நாடுகளில், இதற்கு கைகொடுக்க கூடிய மொபைல் பணம் தொடர்பான விரிவாக பேசுகிறது.

சாதாரண செல்போன் மூலம் டிஜிட்டல் பண பரிவர்த்தனையை சாத்தியமாக்கும் மொபைல் பணம் சார்ந்த முன்னோடி முயற்சிகள் பற்றி விரிவான கட்டுரைகள் இடம்பெற்றுள்ளன. மொபைல் பணம் சார்ந்த முன்னோடி முயற்சிகள் இந்தியாவில் நடைபெற்று வருவதை அடையாளம் கட்டுரைகள் நிச்சயம் வியப்பில் ஆழ்த்தும்.

 

இந்த புத்தகம் தொடர்பான கேள்விகளுக்கு சைபர்சிம்மன் அளித்த பதில்கள் வருமாறு:

டிஜிட்டல் பணம் புத்தகம் எழுதியது ஏன்?

பணமதிப்பு நீக்க நடவடிக்கை அறிவிக்கப்பட்ட பின், ரொக்க பணத்திற்கான தட்டுப்பாடு நிலவிய நிலையில், டிஜிட்டல் பரிவர்த்தனைக்கு மாறுவது தொடர்பான அவசியத்தை வலியுறுத்தி இந்த புத்தகத்தை எழுதுவதற்கான எண்ணம் உண்டானது. ஏடிஎம் வாயில்களில் நீண்ட வரிசையில் மக்கள் கால் கடுக்க காத்திருந்த நிலையில், பொது கருத்து டிஜிட்டல் பரிவர்த்தனைக்கு எதிராக அமைந்த நிலையில் இந்த புத்தகத்திற்கான தகவல் சேகரிப்பு மற்றும் ஆய்வில் ஈடுபட்டிருந்தேன்.

டிஜிட்டல் பணம் இந்தியாவுக்கு எல்லாம் சரிபட்டு வராது என பரவலாக கருதப்பட்ட சூழலில் இந்த புத்தகத்தை எழுத தீர்மானித்ததற்கு சில முக்கிய காரணங்கள் உண்டு. அவற்றில் முதன்மையானது கென்யாவில் எம்-பெசா எனும் மொபைல் பணம் பெரும் வெற்றி பெற்று ஒரு முன்னோடி முயற்சியாக இருந்ததை அறிந்திருந்தது தான். ஆப்பிரிக்க நாடான கென்யாவில் மொபைல் மூலமான பண பரிவர்த்தனை சரியாக வரும் எனில் இந்தியாவிலும் இந்த சிக்கலுக்கான பதில் மொபைல் பணமாக தான் இருக்க வேண்டும் என நம்பினேன்.

இங்கு கவனிக்க வேண்டிய விஷயம், மொபைல் பணம் என்பது பரவலாக அறியப்பட்ட மொபைல் வாலெட்டில் இருந்து வேறுபட்டது. இது சாதாரணா செல்போனிலேயே செயல்படக்கூடியது. அதனால் தான் எம்-பெசா கென்யாவில் வெற்றி பெற்று மற்ற ஏழை நாடுகளிலும் பரவலானது . உள்நாட்டு போரால் பாதிக்கப்பட்ட ஆப்கானிஸ்தான் மற்றும் சோமாலியாவிலும் மொபைல் பணம் செயல்படுத்தப்படுவதை கட்டுரைகள் வாயிலாக அறிய முடிந்தது.

எம்-பெசா பற்றிய புரிதலே இந்த புத்தகம் எழுத மூலக்காரணம். அதே போலவே தொழில்நுட்பத்தின் மீது எனக்கிருந்த ஆர்வமும், நம்பிக்கையும் மற்றொரு முக்கிய காரணமாக அமைந்தது. டிஜிட்டல்மயமாக்கலின் முக்கியத்துவம் மற்றும் தவிர்க்க இயலா தன்மையை அறிந்திருப்பதால் பணமும் டிஜிட்டல்மயமாக வேண்டும் என நினைத்தேன். அதுவே இந்த புத்தகத்தை எழுத மூலக்காரணம்.

moneyரொக்கமில்லா சமூகம் ஏன் தேவை என நினைக்கிறீர்கள்?

பண பரிவர்த்தனை தொடர்பான வரலாற்று செய்திகளை தேடிப்படித்த போது இன்னும் கூடுதல் புரிதல் கிடைத்தது. ரொக்கமில்லா சமூகம் எனும் கருத்தாக்கத்தின் துவக்கப்புள்ளி காசோலை இல்லா சமூகம் எனும் புள்ளியிலிருந்து துவங்குவதையும், கம்ப்யூட்டர்களின் வருகை மற்றும் பயன்பாடு இதற்கு முக்கிய காரணம் என்பதையும் அறிய முடிந்தது. இந்த வரலாறு பற்றிய கட்டுரைகள் புத்தகத்தின் துவக்கமாக அமைந்துள்ளன.

உண்மையில், தந்தி மூலமான தகவல் பரிமாற்றம் பண பரிவர்த்தனைக்கு உதவிய காலத்திலேயே பணம் டிஜிட்டல் மயமாவது துவங்கிவிட்டது. இப்போது நவீன தொழில்நுட்பம் இதை மேலும் செழுமையாக்கியுள்ளது.

இவைத்தவிர ஸ்வீடன் போன்ற நாடுகள் ரொக்கமில்லா சமூகத்திற்கு மாறியுள்ள தகவலும் என்னை ஈர்த்தன. ஸ்விடனில் ரொக்கமில்லா சமூகத்திற்கான கருத்தாக்கம் வேரூன்றிய விதமும், செயல்படுததப்படும் விதமும் தனிக்கட்டுரைகளாக அமைந்துள்ளன.

ஸ்வீடன் சரி, இந்தியாவுக்கு எப்படி பொருந்தும் என கேட்பர்வர்களுக்கு பதிலாக நம் நாட்டிலேயே விளிம்பு நிலை மக்களுக்கு மொபைல் பணம் மூலம் நிதிச்சேவைகளை கொண்டு சேர்க்கும் எகோ மணி, பீம் மணி போன்ற முயற்சிகள் அமைந்துள்ளன. இவை பற்றிய தனிக்கட்டுரைகள் உள்ளன. இது தவிர வங்கதேசத்தில் மொபைல் போனை ஏழைகளுக்கு கொண்டு சென்ற முன்னோடி தொழில்முனைவோரான இக்பால் காதீர் பற்றியும் எழுதியுள்ளேன்.

உண்மையில் ரொக்கமில்லா சமூகத்தின் சாத்தியம் பற்றிய வல்லுனர்கள் விவாதம் மற்றும் சந்தேகங்களை மீறி, மொபைல் பணம் சார்ந்த முன்னோடி முயற்சிகளில் ஈடுபட்டுள்ள தொலைநோக்கு மிக்க மனிதர்களின் முயற்சியே இந்த புத்தகத்தை எழுதும் உத்வேகத்தை தீவிரமாக்கியது.

அதென்ன மொபைல் பணம்?

இந்த புத்தகத்தை எழுதும் முயற்சியில் ஈடுபட்டிருந்த போது,  ரொக்கமில்லா சமூகத்தில் வாழந்து பார்த்த மனிதர்களின் பரிசோதனை முயற்சியும் அறிந்து கொள்ள முடிந்தது. முக்கியமாக பணத்தின் வரலாற்றை ஆய்வு செய்து எழுதிய பத்திரிகையாளர் டேவிட் வால்மனின் புத்தகம் பற்றி படித்தது கண்களை திறந்துவிட்டது போல இருந்தது. வால்மன் புத்தகம் மூலமே இந்தியாவில் மொபைல் பணம் முயற்சிகள் பற்றி அறிய முடிந்தது.

மொபைல் பணம் என்பது செல்போன் மூலமான டிஜிட்டல் பணவர்த்தனை. மொபைல் பணம் என்பது செல்போன் ரீசார்ஜ் செய்வது போலதான். சாதாரண செல்போனே இதற்கு போதும். இந்த வகை பரிவர்த்தனை வசதி மூலம் குக்கிராமங்களுக்கு கூட டிஜிட்டல் பரிவர்த்தனையை கொண்டு செல்லலாம். இதற்கு உதாரணமாக திகழும் இந்திய கிராமம் பற்றியும் புத்தகத்தில் தனிக்கட்டுரை இடம்பெற்றுள்ளது.

ரொக்கமில்லா சமூகத்தின் சாத்தியம் குறித்த அனைத்து அம்சங்களை எழுத விரும்பினாலும், அதன் மீதான சந்தேகங்களுக்கு பதிலாக அமையக்கூடிய மொபைல் பணம் பற்றிய முக்கிய கவனம் செலுத்தியுள்ளேன்.

இந்த புத்தகம் எழுதும் போக்கில், மொபைல் பணம் மூலம் ஏழை மக்களுக்கு நிதிச்சேவைகளை கொண்டு செல்லும் முயற்சிகள் பற்றியும், வங்கியில்லா வங்கிச்சேவைகள் பற்றியும் அறிந்து கொள்ள முடிந்தது. ஏழைகளுக்கு டிஜிட்டல் பணம் எல்லாம் சரிபட்டு வருமா என்பது தவறான கேள்வி. உண்மையில் டிஜிட்டல் பணம் மூலம் தான் ஏழைகளுக்கு அடிப்படை நிதிச்சேவைகளை அளிக்க முடியும் என்பது தான் இந்த புத்தகம் சொல்லும் சேதி.

இந்த புத்தகம் ரொக்கமில்லா சமூகத்திற்கு ஆதாரவானதா?

ஆம்.

இந்தியா போன்ற நாடுகளில் ரொக்கமில்லா சமூகம் எப்படி சாத்தியம்?

இதற்கான பதில் மொபைல் பணம் எனும் கருத்தாக்கத்தில் உள்ளது. அதை மையமாக கொண்ட முயற்சிகளை தான் இந்த புத்தகம் பேசுகிறது.

  • கிரெடிட் கார்டு, டெபிட் கார்டு எல்லோரிடமும் இல்லையே?

கார்டு தேவையில்லை. மொபைல் போதுமானது என்பதே இந்த புத்தகத்தின் அடிநாதம்.

 

  • ஸ்மார்ட்போனும் எல்லோரிடமும் இல்லையே?

தேவையில்லை. சாதாரண போனே போதும்.

  • எப்படி ?

கென்யாவின் மொபைல் பணமான எம்-பெசா இதற்கான உதாரணம்.

  • இந்தியாவில் யதார்த்தம் என்ன?

இந்தியாவிலும் எகோ மணி, பீம் மணி போன்ற முன்னோடி உதாரணங்கள் உள்ளன. இந்தியா மட்டும் அல்ல ஆப்கானிஸ்தான் , சோமாலிலாந்தில் முன்னோடி முயற்சிகள் மேற்கொள்ளபடுகின்றன.

  • ரொக்கமில்லா பரிவர்த்தனை ஏழைகளுக்கு பாதகமாக அமையாதா?

பரவலாக கருதப்படுவதற்கு மாறாக ரொகமில்லா பரிவர்த்தனை ஏழைகளுக்கு உதவக்கூடியது. மொபைல் பணம் என்பது ஏழைகளுக்கான வங்கிச்சேவைக்கான அடிப்படையாக பார்க்கபடுகிறது.

  • வங்கி சேவையை இன்னும் பரவலாகவில்லையே?

வங்கிச்சேவையை ஏழைகள் மற்றும் விளிம்பு நிலை மக்களுக்கு கொண்டு செல்ல செல்போன் உதவும். செல்போன் மாற்றத்திற்கான சாதமாக பார்க்கப்படுக்கிறது. மூன்றாம் உலக நாடுகளில் இதற்கான முன்னோடி முயற்சிகள் இருக்கின்றன.

  • இந்த புத்தகத்திற்கான அவசியம் என்ன?

உலகில் எல்லாம் டிஜிட்டல்மயமாகி வருகிறது. பணமும் டிஜிட்டல் மயமாவது தொழில்நுட்ப நோக்கில் தவிர்க்க இயலாதது. அதற்கு நாம் தயாராக வேண்டும். உலகின் பல்வேறு நாடுகளில் இந்த முயற்சி துவங்கிவிட்டது. நாமும் பின் தங்கியிருக்க முடியாது. அது மட்டும் அல்ல, பண பரிவர்த்தனையை டிஜிட்டல் மயமாக்க தொழில்நுட்பம் சார்ந்த பல முன்னோடி முயற்சிகள் மேற்கொள்ளப்பட்டு வருகின்றன. நாமும் அதில் இணைவதே சரி . இல்லை எனிம் தொழில்புரட்சி பேருந்தை தவறவிட்டது போல டிஜிட்டல் பண பேரூந்தை தவறவிட்டு பின்னால் ஓட வேண்டியிருக்கும்.

  • பணமதிப்பு நீக்க நடவடிக்கை பற்றி?

இந்த புத்தகம் அது பற்றி பேசவில்லை.

  • ஏன்?

இதன் மைய நோக்கம் அதுவல்ல. பண மதிப்பு நீக்க நடவடிக்கையின் போது அதிக கவனத்தையும், சர்சையையும், விவாதத்தையும் ஏற்படுத்திய ரொக்கமில்லா பரிவர்த்தனையின் சார்பு அம்சங்களை தொழில்நுட்ப நோக்கில் இந்த புத்தகம் பேசுகிறது.

  • பண மதிப்பு நீக்க நடவடிக்கை சரியானதா?

தெரியாது. ஆனால் அது மிக மோசமாக செயல்படுத்தப்பட்டது.

  • டிஜிட்டல் பணத்தில் வேறு என்ன சாதகம் உண்டு?

டிஜிட்டல் பணம் டிஜிட்டல் கடன், அனைவரிக்குமான வங்கி- நிதிச்சேவைகள் பற்றி எல்லாம் சிந்திக்க வைக்கிறது. நடைமுறையிலும் செயல்பட வைக்கிறது.

  • கருப்புபணம் ஒழியுமா?

ஓரளவு உதவலாம். ஆனால் கருப்பு பணம் வேறு பிரச்சனை.

  • டிஜிட்டல் பணம் பாதுகாப்பானதா?

பாதுகாப்பாக ஆக்குவதற்கான எல்லா வழிமுறைகளும் உள்ளன. ஆனால் சைபர் தாக்குதல், இணைய களவு உள்ளிட்ட ஆபத்துகள் உள்ளனை. அவற்றை எதிர்கொள்ள வேண்டும். ஆனால் இது டிஜிட்டல் யுகத்தின் பிரச்சனை. டிஜிட்டல் பணத்திற்கு மட்டும் உரியது அல்ல. டிஜிட்டல் பணம் இல்லாவிட்டாலும் கூட இத்தகைய ஆபத்துகள் உண்டு.

  • இந்த புத்தகத்தை படித்தால் டிஜிட்டல் பணத்திற்கு மாற முடியுமா?

இல்லை. டிஜிட்டல் பணம் தொடர்பாக உலகில், குறிப்பாக தொழில்நுட்ப உலகில் நடைபெறும் முன்னோடி முயற்சிகளை தெரிந்து கொண்டு நீங்களாக அதை நோக்கி முன்னேறலாம்.

 

 

’டிஜிட்டல் பணம்’

சைபர்சிம்மன்

கிழக்கு பதிப்பக வெளியீடு

விலை.ரூ150

 

—-

நன்றி; வணிகமணி இதழ் 

 

ரொக்கமில்லா சமுகத்தை கணித்த கம்ப்யூட்டர் முன்னோடி

 

 

moneyசெல்போன் மூலம் வங்கிச்சேவை பெறுவதும், பண வரிவர்த்தனை செய்வதும் சாத்தியமாகி இருக்கும் நிலையில் கூட ரொக்கமில்லா சமூகத்தின் தேவை அல்லது சாத்தியம் குறித்து கேள்விகளும், சந்தேகங்களும் உள்ளவர்கள் ஜார்ஜ் மாரோ பற்றி தெரிந்து கொள்ள வேண்டும். அமெரிக்கரான ஜார்ஜ் மாரோ கம்ப்யூட்டர் முன்னோடிகள் ஒருவர். கம்ப்யூட்டர் என்பது புரியாத மாயமாக இருந்த காலத்தில் மைக்ரோ கம்ப்யூட்டர்களின் மகத்துவம் பற்றியும், எதிர்கால பயன்பாடு பற்றி எடுத்துரைத்தவர் மாரோ. கம்ப்யூட்டர் வடிவமைப்பிலும் அவர் ஈடுபட்டிருக்கிறார். பர்சனல் கம்ப்யூட்டர் துறை பெற்ற வளர்சிக்கான அடித்தளம் அமைத்ததில் மாரோவும் ஒருவர்.

கம்ப்யூட்டர் வர்த்தக முயற்சியில் மாரோ சறுக்கல்களை சந்திக்காமல் இருந்திருந்தால் இன்னொரு பில்கேட்சாகவோ, ஸ்டீப் ஜாப்சாகவோ வந்திருப்பார் என நினைக்கதோன்றுகிறது.அவரது மறைவை முன்னிட்டு சீனெட் இணையதளம் எழுதிய நினைவுக்கட்டுரை அவரது கம்ப்யூட்டர் சார்ந்த முயற்சிகளை விவரித்து வியக்க வைக்கிறது.

ஆனால் மாரோவை இப்போது நினைவில் கொள்ள வேண்டிய முக்கிய காரணம் கம்ப்யூட்டர்களின் எதிர்கால பலன்கள் குறித்து அவருக்கு இருந்த தீர்க்தரிசனம் தான். இதுவே அவரை ரொக்கமில்லா சமூகம் பற்றி பேச வைத்தது.

கிரெடிட் கார்டு அளவுக்கு ஒரு கம்ப்யூட்டர் உருவாக்கி, அதில் நம்முடைய எல்லா நிதி பரிவர்த்தனைகளையும் மேற்கொள்ள முடியும் என்றும் இதுவே ரொக்கமில்லா சமூகத்திற்கு வழிவகுக்கும் என்றும் அவர் கணித்திருக்கிறார் என்றால் பார்த்துக்கொள்ளுங்கள்.

இது தொடர்பான கருத்துக்களை 1984 ம் ஆண்டு வெளியான அட்டயர்மேகஜைன்ஸ் இதழில் அவர் கட்டுரையாக எழுதியிருக்கிறார். கம்ப்யூட்டர்மயமாக்கப்பட்ட ரொக்கமில்லா சமூகம் எனும் தலைப்பிலான அந்த கட்டுரையை அவர் துவங்கு விதம் கவனிக்கத்தக்கது: “ நம்முடைய வங்கிகள் மற்றும் நிதி அமைப்புகள் ஒவ்வொரு நாளும் சமாளிக்க முடியாததாக ஆகி கொண்டிருக்கும் இரண்டு பிரச்சனைகளை எதிர்கொண்டு வருகின்றன. ஒன்று அவை காகிதத்தில் மூழ்கி கொண்டிருக்கின்றன. ஆண்டின் ஒவ்வொரு நாளும் நிகழும் லட்சக்கணக்கான தனிநபர் மற்றும் வர்த்தக பரிவர்த்தனைகளை பதிவு செய்யவும், சர் பார்க்கவும் தேவைப்படும் காகிதங்களின் அளவை சமாளிக்க நடைமுறை சார்ந்த வழி இல்லை. இரண்டாவதாக பரிவர்த்தனைகளின் எண்ணிக்கை அதிகரிப்பதோடு மட்டும் அல்லாமல், முன் எப்போதையும் விட அவை அதிக அளவிலான பணம் கொண்டதாக இருக்கும் போது இந்த பரிவர்த்தனைகள் மீதான கட்டுப்பாடு இல்லாமல் இருக்கிறது. கசோலைகள் தவறு மற்றும் பணம் செலுத்தப்படாத நிகழ்வுகள் அதிகரிக்கின்றன”…..

 

( சமீபத்தில் வெளியான டிஜிட்டல் பணம்’புத்தகத்தில் இருந்து….)  நன்றி; கிழக்கு பதிப்பகம்

 

புத்தகத்தை இணையத்தில் வாங்க: http://marinabooks.com/detailed?id=5%206474&name=%E0%AE%9F%E0%AE%BF%E0%AE%9C%E0%AE%BF%E0%AE%9F%E0%AF%8D%E0%AE%9F%E0%AE%B2%E0%AF%8D%20%E0%AE%AA%E0%AE%A3%E0%AE%AE%E0%AF%8D

டிஜிட்டல் பணம்: சில கேள்விகளுக்கான விளக்கம்

 

கிழக்கு பதிப்பக வெளியீடாக வந்திருக்கும் ’டிஜிட்டல் பணம்’ புத்தகத்தின் தலைப்பும் உள்ளடக்கமும் சில பொதுவான கேள்விகளையும், சந்தேகங்களையும் எழுப்பவதாக இருப்பதை நண்பர்கள் கருத்துக்கள் மூலம் அறிகிறேன். இந்த புத்தகம் தொடர்பாக எழக்கூடிய கேள்விகளுக்கான விளக்கம் இதோ:money

  • இந்த புத்தகம் ரொக்கமில்லா சமூகத்திற்கு ஆதாரவானதா?

ஆம்.

  • இந்தியா போன்ற நாடுகளில் ரொக்கமில்லா சமூகம் எப்படி சாத்தியம்?

இதற்கான பதில் மொபைல் பணம் எனும் கருத்தாக்கத்தில் உள்ளது. அதை மையமாக கொண்ட முயற்சிகளை தான் இந்த புத்தகம் பேசுகிறது.

  • கிரெடிட் கார்டு, டெபிட் கார்டு எல்லோரிடமும் இல்லையே?

கார்டு தேவையில்லை. மொபைல் போதுமானது என்பதே இந்த புத்தகத்தின் அடிநாதம்.

 

  • ஸ்மார்ட்போனும் எல்லோரிடமும் இல்லையே?

தேவையில்லை. சாதாரண போனே போதும்.

  • எப்படி ?

கென்யாவின் மொபைல் பணமான எம்-பெசா இதற்கான உதாரணம்.

  • இந்தியாவில் யதார்த்தம் என்ன?

இந்தியாவிலும் எகோ மணி, பீம் மணி போன்ற முன்னோடி உதாரணங்கள் உள்ளன. இந்தியா மட்டும் அல்ல ஆப்கானிஸ்தான் , சோமாலிலாந்தில் முன்னோடி முயற்சிகள் மேற்கொள்ளபடுகின்றன.

  • ரொக்கமில்லா பரிவர்த்தனை ஏழைகளுக்கு பாதகமாக அமையாதா?

பரவலாக கருதப்படுவதற்கு மாறாக ரொகமில்லா பரிவர்த்தனை ஏழைகளுக்கு உதவக்கூடியது. மொபைல் பணம் என்பது ஏழைகளுக்கான வங்கிச்சேவைக்கான அடிப்படையாக பார்க்கபடுகிறது.

  • வங்கி சேவையை இன்னும் பரவலாகவில்லையே?

வங்கிச்சேவையை ஏழைகள் மற்றும் விளிம்பு நிலை மக்களுக்கு கொண்டு செல்ல செல்போன் உதவும். செல்போன் மாற்றத்திற்கான சாதமாக பார்க்கப்படுக்கிறது. மூன்றாம் உலக நாடுகளில் இதற்கான முன்னோடி முயற்சிகள் இருக்கின்றன.

  • இந்த புத்தகத்திற்கான நியாயம் என்ன?

உலகில் எல்லாம் டிஜிட்டல்மயமாகி வருகிறது. பணமும் டிஜிட்டல் மயமாவது தொழில்நுட்ப நோக்கில் தவிர்க்க இயலாதது. அதற்கு நாம் தயாராக வேண்டும். உலகின் பல்வேறு நாடுகளில் இந்த முயற்சி துவங்கிவிட்டது. நாமும் பின் தங்கியிருக்க முடியாது. அது மட்டும் அல்ல, பண பரிவர்த்தனையை டிஜிட்டல் மயமாக்க தொழில்நுட்பம் சார்ந்த பல முன்னோடி முயற்சிகள் மேற்கொள்ளப்பட்டு வருகின்றன. நாமும் அதில் இணைவதே சரி . இல்லை எனிம் தொழில்புரட்சி பேருந்தை தவறவிட்டது போல டிஜிட்டல் பண பேரூந்தை தவறவிட்டு பின்னால் ஓட வேண்டியிருக்கும்.

  • பணமதிப்பு நீக்க நடவடிக்கை பற்றி?

இந்த புத்தகம் அது பற்றி பேசவில்லை.

  • ஏன்?

இதன் மைய நோக்கம் அதுவல்ல. பண மதிப்பு நீக்க நடவடிக்கையின் போது அதிக கவனத்தையும், சர்சையையும், விவாதத்தையும் ஏற்படுத்திய ரொக்கமில்லா பரிவர்த்தனையின் சார்பு அம்சங்களை தொழில்நுட்ப நோக்கில் இந்த புத்தகம் பேசுகிறது.

  • பண மதிப்பு நீக்க நடவடிக்கை சரியானதா?

தெரியாது. ஆனால் அது மிக மோசமாக செயல்படுத்தப்பட்டது.

  • டிஜிட்டல் பணத்தில் வேறு என்ன சாதகம் உண்டு?

டிஜிட்டல் பணம் டிஜிட்டல் கடன், அனைவரிக்குமான வங்கி- நிதிச்சேவைகள் பற்றி எல்லாம் சிந்திக்க வைக்கிறது. நடைமுறையிலும் செயல்பட வைக்கிறது.

  • கருப்புபணம் ஒழியுமா?

ஓரளவு உதவலாம். ஆனால் கருப்பு பணம் வேறு பிரச்சனை.

  • டிஜிட்டல் பணம் பாதுகாப்பானதா?

பாதுகாப்பாக ஆக்குவதற்கான எல்லா வழிமுறைகளும் உள்ளன. ஆனால் சைபர் தாக்குதல், இணைய களவு உள்ளிட்ட ஆபத்துகள் உள்ளனை. அவற்றை எதிர்கொள்ள வேண்டும். ஆனால் இது டிஜிட்டல் யுகத்தின் பிரச்சனை. டிஜிட்டல் பணத்திற்கு மட்டும் உரியது அல்ல. டிஜிட்டல் பணம் இல்லாவிட்டாலும் கூட இத்தகைய ஆபத்துகள் உண்டு.

  • இந்த புத்தகத்தை படித்தால் டிஜிட்டல் பணத்திற்கு மாற முடியுமா?

இல்லை. டிஜிட்டல் பணம் தொடர்பாக உலகில், குறிப்பாக தொழில்நுட்ப உலகில் நடைபெறும் முன்னோடி முயற்சிகளை தெரிந்து கொண்டு நீங்களாக அதை நோக்கி முன்னேறலாம்.

சைபர்சிம்மன்

டிஜிட்டல் பணம்

கிழக்கு பதிப்பக வெளியீடு

விலை;ரூ150.

 

 

எம்பி- 3 க்கு என்ன ஆச்சு?

mp3-share_custom-47303cc4c2f139b693ff86def5556f68bc18e4e2-s800-c85பிரபலமான இசை கோப்பு வடிவமான எம்பி-3 தொடர்பாக அண்மையில் வெளியான செய்தி இணையவாசிகளையும், இசைப்பிரியர்களையும், அதிர்ச்சியிலும் கவலையிலும் ஆழ்த்தியிருக்கும். அதிலும் குறிப்பாக டிஜிட்டல் இசைப்பிரியர்கள் எம்பி-3 வடிவத்திற்கு விடை கொடுக்க நேருமோ என நினைத்து நொறுங்கி போயிருக்கலாம்.

எம்பி-3 இறந்து விட்டது!, எம்பி-3 கொல்லப்பட்டு விட்டது! போன்ற தலைப்புகளில் வெளியான செய்திகளை பார்த்தால் இசை மனதும், இணைய மனதும் திடுக்கிடத்தானே செய்யும். ஆனால் இந்த கவலை தேவையற்றது என்பதை, இல்லை,எம்பி3 இறக்கவில்லை!, எம்பிஎ இறந்துவிட்டது, ஆனால் எம்பி3 நீடூடி வாழ்க! போன்ற தலைப்பிலான விளக்கச்செய்திகள் புரிய வைத்தன.

விஷயம் இது தான், எம்பி3 இசை கோப்பு வடிவத்தை உருவாக்கிய ஜெர்மனி ஆய்வு அமைப்பிற்கு பின்னே உள்ள பாரன்ஹோபர் கழகம் வெளியிட்ட அறிவிப்பே இதற்கு காரணமாக அமைந்தது. எம்பி-3 கோப்பு தொடர்பான காப்புரிமை சார்ந்த உரிமம் வழங்குவதை நிறுத்திக்கொள்வதாகவும், எம்பி-3 வடிவம் நுகர்வோர் மத்தியில் இன்னமும் பிரபலமாக இருந்தாலும், அதைவிட மேம்பட்ட கோப்பு வடிவங்களான ஏஏசி போன்றவை வந்துவிட்டதால், அவை எம்பி-3 யை விட அதிக ஒலித்தரத்தை அளிக்க வல்லவை என்றும் அந்த அறிவிப்பில் குறிப்பிடப்பட்டிருந்தது.

எம்பி-3 க்கு விடைகொடுத்துவிட்டு அதைவிட மேம்பட்ட கோப்பு வடிவத்திற்கு மாறும் அவசியம் வந்திருப்பதை இதன் மூலம் புரிந்து கொள்ளலாம்.

இந்த அறிவிப்பு தான், எம்பி-3 கொல்லப்படுகிறது எனும் தலைப்புடன் வெளியாயின. ஜெர்மனி அமைப்பை பொருத்தவரை எம்பி-3 கோப்பு வடிவம் காலாவதியாகி விட்டதை இந்த அறிவிப்பு உணர்த்தினாலும், இந்த கோப்பு வடிவத்தின் கதி அவ்வளவு தான் எனும் வகையில் எந்தவித கருத்தும் இந்த அறிவிப்பில் இல்லை. அப்படியிருந்தும் கூட, எம்பி-3 கோப்பு வடிவம் அதை உருவாக்கியவர்களால் கொல்லப்படுவதாக செய்திகள் வெளியாகின.

பழையன கழிதலும், புதியன புகுதலும் தொழில்நுட்ப உலகில் வெகு வேகமாக நிகழ்ந்து கொண்டிருக்கின்றன. இசைத்துறையில் இன்னும் வேகமாக மாற்றம் நிகழ்வதை பார்த்து வருகிறோம். கிராம்போன் பேழைகள், கேசெட்கள், சிடிக்கள், டிவிடிக்கள் என இசையை கேட்கும் வடிவம் மாறிக்கொண்டே இருக்கும் நிலையில், இப்போது பிரபலமாக உள்ள எம்பி-3 கோப்பு வடிவத்திற்கும் விடை கொடுக்கும் காலம் வந்துவிட்டது என இந்த செய்தியை படித்ததும் தோன்றுவது இயல்பு தான். கேசட், சிடிக்கள் வரிசையில் எம்பி-3 பிளேயர்களையும் வரலாற்றின் பரண்களில் தூக்கி வீச வேண்டியிருக்குமோ எனும் எண்ணமும் பலருக்கு ஏற்பட்டிருக்கலாம். இன்னும் பலருக்கு என்னிடம் உள்ள எம்பி- பாடல்களின் என்ன ஆகும் எனும் கவலை ஏற்பட்டிருக்கலாம்.

ஆனால், எபி-3 க்கும் ஒன்றும் ஆகவில்லை. எம்பி- 3 பாடல்களுக்கும் ஒன்றும் ஆகவில்லை. கோப்பு வடிவில் மாற்றம் ஏற்பட்டிருப்பது உண்மை தான். ஜெர்மனி அமைப்பு போன்றவை மேம்பட்ட இசை கோப்பு வடிவமான ஏஏசி போன்றவற்றை முன்னிறுத்துகின்றன என்பதும் உண்மை தான். ஆனால் அதனால் எம்பி-3 க்கு அதிக பாதிப்பில்லை. குறிப்பாக உடனடியாக அதற்கு எந்த ஆபத்தும் இல்லை. அது பயன்பாட்டில் தொடரும். அதில் பாடல்களை கேட்கலாம்.

ஏனெனில், ஜெர்மனி அமைப்பு எம்பி-3 க்கான உரிம ஒப்பந்த முறையை தான் கைவிட்டுள்ளது. ஏற்கனவே எம்பி-3 கோப்பு வடிவம் தொடர்பான காப்புரிமை காலாவதியாகிவிட்ட நிலையில், இதற்கான உரிம ஒப்பந்தம் கைவிடப்பட்டுள்ளது. இதன் பொருள் எம்பி-3 கோப்பு உருவாக்கத்திற்கு இனி எந்த நிறுவனமும் கட்டணம் செலுத்த வேண்டியதில்லை என்பதாகும். மேம்பட்ட வடிவத்திற்கு மாறுவதால் ஜெர்மனி அமைப்பு இந்த முடிவை எடுத்துள்ளது.

ஆனால் அதற்காக இசைப்பிரியர்களும் இந்த மேம்பட்ட முறைக்கு மாறியாக வேண்டிய நிர்பந்தம் இல்லை. அவர்கள் பழகிய எம்பி-3 வடிவத்தையை பயன்படுத்தலாம். அது மட்டும் அல்ல, இந்த முறையில் பாடல்களை உருவாக்க இனி கட்டணம் செலுத்த வேண்டியதில்லை என்பதால், சுதந்திரமாக செயல்படலாம். எப்படி ஜிப் கோப்பு வடிவத்திற்கான காப்புரிமை காலாவதியாக பல ஆண்டுகள் ஆன பிறகும் அந்த கோப்பு வடிவம் பயன்பாட்டில் இருக்கிறதோ அதே போல எம்பி-3 வடிவமும் தொடரும் என்று எதிர்பார்க்கப்படுகிறது.

புதிய இசை கோப்பு வடிவமான அடவான்ஸ்டு ஆடியோ கோடிங் எனப்படும் ஏஏசி, எம்பி-3 இடத்தில் அதன் பிரம்மாக்களால் முன்னிறுத்தப்பட்டாலும், இசைத்துறை ஒரே நாளில் எம்பி-யில் இருந்து மாறிவிடும் என எதிர்பார்ப்பதற்கில்லை. தற்போதே இசை ஸ்டீரிமிங் சேவையில் ஏஏசி முறை பின்பற்றப்பட்டாலும் கூட, எம்பி-3 அவ்வளவு தான் என சொல்ல முடியாது என்றே கருதப்படுகிறது.

ஏன்? எப்படி? என புரிந்து கொள்ள எம்பி- 3 வரலாற்றை கொஞ்சம் சுருக்கமாக திரும்பி பார்க்கலாம். எம்பி-3 என்பது உண்மையில் ஒலிகளுக்கான கோப்பு வடிவம். எம்பெக் ஆடியோ லேயர் 3 என்பதை குறிக்கும் இந்த வடிவம் ஒலிக்குறிப்புகளை அவற்றின் மூல அளவை விட பத்து மடங்கிற்கும் குறைவான அளவில் சுருக்கி சேமித்து வைத்து பகிர்ந்து கொள்ள வழி செய்கிறது. அளவு சுருங்கினாலும் ஒலியின் தரம் பெரிய அளவில் பாதிக்காது. எனவே இந்த முறையில் இசையை சேமிப்பதும், பரிமாற்றம் செய்வதும் எளிதானது. குறைந்த இடத்தில் அதிக அளவில் பாடல்களை பதியலாம் என்பதோடு, குறைவான நேரத்தில் பரிமாற்றலாம். இந்த இரண்டும் சேர்ந்து தான் இணையத்தை இந்த கோப்பு வடிவத்திற்கு நெருக்கமாக்கியது.

இங்கு இரண்டு முக்கிய விஷயங்களை கவனிக்க வேண்டும். எம்பி-3 கோப்பு வடிவத்தை உருவாக்கும் முயற்சி 1980 களில் துவங்கப்பட்டு, பத்தாண்டுகளுக்கும் மேலாக இதற்கான ஆய்வுப்பணிகள் மேற்கொள்ளப்பட்டு 1990 களின் மத்தியில் பலன் அளித்தது. ஜெர்மனியை சேர்ந்த பரன்ஹோபர் கழகம் (Fraunhofer Institut ) 1987 ல் இதற்கான பணியை முழு மூச்சில் துவக்கியது. இந்த ஆய்வில் முக்கிய பங்காற்றிய பேராசிரியர் பிராண்டன்பர்க் (Brandenburg ) தான் எம்பி-3 யின் தந்தை என கருதப்படுகிறார்.

பிராண்டபர்க் இந்த ஆய்வில் ஈடுபட்டதே ஒரு சுவாரஸ்யமான கதை. முதலில் பிராண்டபர்கிற்கு ஒலி குறிப்புகளை சுருக்குவதற்கான ஆய்வில் நாட்டம் இருக்கவில்லை. ஆனால் அவரது முனைவர் பட்ட வழிகாட்டிக்கு அந்த எண்ணம் இருந்தது. இது தொடர்பான ஒரு எண்ணத்திற்கு அவர் காப்புரிமையும் பெற விரும்பினார். அந்த கால கட்டத்தில் அறிமுகமாகி இருந்த டிஜிட்டல் தொலைபேசி இணைப்புகள் வழியே இசையை ஒலிபரப்ப வேண்டும் என்பது தான் அந்த எண்ணம். இசையை சிடிகள் வடிவில் விநியோகிப்பதை விட, ஒரு மைய சர்வரில் சேமித்து வைத்துக்கொண்டு, விரும்பும் நபர்களுக்கு தொலைபேசி வழியே கேட்ட பாடல்களை ஒலிபரப்ப வழி செய்யலாம் என அவர் நம்பினார். ஆனால் இதற்கு முதலில், தொலைபேசி இணைப்பு வழியே இசையை அனுப்பக்கூடிய அளவுக்கு அதை சுருக்க வேண்டும். இத்தகைய சுருக்கம் நடைமுறை சாத்தியம் இல்லை என கருதப்பட்டது.

பேராசிரியர் இந்த பிரச்சனைக்கு வழி காணுமாறு கேட்டுக்கொண்டதை அடுத்து பிராண்டன்பர்க் இதற்கான ஆய்வில் ஈடுபட்டார். பிராண்டன்பர்க் கணிதப்புலி என்பதால், கணிதவியல் மூலம் இந்த புதிருக்கு விடை காணும் வகையில் ஒலிக்குறிப்புகளுக்கான சமன்பாடுகள் எழுதிப்பார்த்தார். ஒலிக்குறிப்புகளை பல அடுக்குளாக பிரித்து அவற்றை சுருக்குவதற்கான வழி தேடினார். 1980 களின் மத்தியில் அறிமுகமான மேம்பட்ட திறன் கொண்ட கம்ப்யூட்டர்கள் இந்த சோதனையில் உதவின.

இதனிடயே மனித இயல்பு தொடர்பான ஒரு அம்சமும் அவருக்கு உதவியது. மனித செவி பேச்சை கேட்கும் போதும் சரி, இசையை கேட்கும் போதும் சரி, முழுவதும் கேட்பதில்லை. பலவற்றை கேளாமல் விட்டுவிடுகிறது. அதாவது மனித செவியால் உணர முடியாத அலைவரிசை கொண்ட ஒலிக்குறிப்புகளும் இருக்கின்றன. இவற்றை நாம் கேட்பதேயில்லை. இந்த அம்சம் தொடர்பான துறை சைக்கோ அக்வ்ஸ்டிக்ஸ் எனப்படுகிறது.

மனித செவித்திறனில் உள்ள இந்த வரம்பை பிராண்டன்பர்க் சாதகமாக பயன்படுத்திக்கொண்டு, செவியால் கேட்க முடியாத ஒலிக்குறிப்புகளை தேவையில்லாதவை என நீக்கிவிடும் வகையில் ஒரு முறையை உருவாக்கினார். இந்த முறையில் மூல இசை வடிவை அதன் தன்மை பாதிக்காமல் பத்தில் ஒரு மடங்காக சுருக்க முடிந்தது.

இதை அடிப்படையாக கொண்டே எம்பி-3 கோப்பு வடிவம் அறிமுகமானது. ஏறக்குறைய இதே காலகட்டத்தில், மோஷன் பிக்சர்ஸ் எக்ஸ்பர்ட்ஸ் குருப் அமைப்பு கோப்புகளுக்கான வடிவத்திற்கான தர நிரணயத்தை உருவாக்கியிருந்தது. இவையே சுருக்கமாக எம்பெக் என குறிப்பிடப்படுகின்றன. இவற்றில் மூன்று அடுக்குகள் உண்டு. சர்வதேச தர அமைப்பான ஐ.எஸ்.ஒ வின் துணை அமைப்பாக இது உருவாக்கப்பட்டது. ஒலி கோப்புக்கான தர நிர்ணயத்தில் இந்த அமைப்பு கவனம் செலுத்திய நிலையில், பிராண்டன்பர்க் குழு உருவாக்கிய கோப்பு வடிவத்திற்கு காப்புரிமை அளிக்கப்பட்டது. எம் பெக் மூன்றாம் அடுக்கை கொண்டு உருவானதால் இது எம்பி-3 என அழைக்கப்பட்டது.

1995 ல் இந்த முறை அறிமுகமானது அந்த ஆர்ப்பாட்டமும் இல்லை. இசை கோப்புகளை அதன் தரம் மாறாமல் சுருக்க வழி செய்தாலும், அப்போது தான் சிடிக்களுக்கு மாறியிருந்த இசை உலகம் இன்னொரு மாற்றம் அவசியம் என நினைக்கவில்லை. 1990 களின் பின் பகுதியில் இணைய பயன்பாடு அதிகரித்த போது இதற்கான அவசியம் உணரப்பட்டது. இணையம் எம்பி3 கோப்பு வடிவத்தை ஆரத்தழுவிக்கொண்டது.

இதன் பின் நிகழ்ந்தவையே பெரிய வரலாறு என்றாலும், அவற்றை சுருக்கமாக இப்படி புரிந்து கொள்ளலாம். இசையை எம்பி3 வடிவத்திற்கு மாற்ற ஒரு என்கோடிங் முறை தேவை. அதற்கான உரிமத்தை இந்த நுப்டத்திற்கான ஆய்வுக்கு நிதி அளித்த ஜெர்மனி அமைப்பு வைத்திருந்தது. இப்படி மாற்றப்பட்ட கோப்புகளை இசையாக மாற்றவும் ஒரு சாதனம் தேவை. இவை தான் எம்பி-3 பிளேயராக அறிமுகமாயின. அதற்கு முன் டெஸ்க்டாப்பில் இதை சாத்தியமாக்கும் வின் ஆம்ப் மென்பொருள் அறிமுகமானது. அதற்கும் முன்னர் இணையவாசி ஒருவர், எம்பி-3 கோப்பு முறை மாற்ற நுட்பத்தை திருட்டுத்தனமாக இணையத்தில் வெளியிட்டு விட்டார். இதன் பிறகு ஜெர்மனி அமைப்பு உரிமக்கட்டணத்தை குறைத்தது. (இந்த உரிம ஒப்பந்தத்தை தான் இப்போது கைவிட்டுள்ளது. )

இவை எல்லாம் நிகழ்ந்து கொண்டிருந்த நிலையில், இசையை எம்பி-3 வடிவில் பரிமாறிக்கொள்வது பிரபலமாகி இணைய உலகை புரட்டிப்போட்டது.

இந்த வடிவம் அத்தனை சீக்கிரம் காலாவதியாகாது என்றே தோன்றுகிறது, நீங்கள் என்ன சொல்கிறீர்கள்!

எம்பி-3 அதிகாரப்பூர்வ வரலாறு: https://www.mp3-history.com/

சுருக்கமான வரலாறு: http://www.npr.org/sections/therecord/2011/03/23/134622940/the-mp3-a-history-of-innovation-and-betrayal

 

  • நன்றி தமிழ் இந்துவில் எழுதியது.