Tag Archives: email.

நினைவூட்ட ஒரு இணையதளம் இருந்தால்…

இனி ஒரு முறை பிறந்த நாளை மறந்திட அனுமதிக்க மாட்டோம் என்று அன்போடு சூளுரைக்கிறது அந்த தளம்.அதாவது நெருக்கமானவர்களின் பிறந்த நாளை மறக்காமல் இருக்க நினைவூட்டும் சேவையை வழங்குகிறது.

இணையத்தில் நினைவூட்டும் சேவைகளை வழங்கும் இணையதளங்கள் இல்லாமல் இல்லை.அந்த தளங்களின் வரிசையில் இந்த 2ரிமைண்டர்ஸ் தளத்தையும் சேர்த்து கொள்ளலாம்.

ஆனால் 2ரிமைண்டர்ஸ் தளத்தை பிறந்த நாள் நினைவூட்டல் தளத்திற்கும் மேலானது என்றே சொல்ல வேண்டும்.உண்மையில் உங்கள் வாழ்க்கையை அழகாக நிரவகித்து கொள்ள இந்த தளம் உதவுகிறது.

இதனை பிறந்த நாளை மறக்காமல் இருக்க உதவுவதில் இருந்து துவங்குகிறது.

அதற்காக நீங்கள் செய்ய வேன்டியதெல்லாம் இந்த தளத்தில் உறுப்பினராக பதிவு செய்து கொண்டு உங்களது நண்பர்கள் மற்றும் நெருக்கமானவர்களின் பெயர் மற்றும் பிறந்த தேதியை சமர்பிக்க வேண்டும்.அதன்பிறகு இந்த தளத்தையே கூட நீங்கள் மறந்துவிடலாம்.

ஆனால் உங்கள் நண்பர்களின் பிறந்த நாள வருவதற்கு முன் இந்த தளம் மறக்காமல் இமெயில் மூலம் நினவூட்டலை அனுப்பி வைக்கும்.சரியாக ஒரு வாரத்திற்கு முன்னரே இந்த நினவூட்டல் வந்துவிடும்.தொடர்ந்து பிறந்த நாளுக்கு முந்தைய தினமும் நினைவூட்டல் வரும்.

எப்பொழுது நினைவூட்ட வேண்டும் என்பதை கட்டுப்படுத்திக்கொள்ளும் வசதியும் உண்டு.இமெயில் தவிர செல்போனில் எஸ் எம் எஸ் வாயிலாகவும் நினைவூட்டலை பெறலாம்.

எனவே,பிறந்த நாளுக்கு டிரிட் தரும் நண்பனிடம் இன்று உனக்கு பிறந்த நாளா சொல்லவேயில்லை என்றெல்லாம் அசடு வழிய தேவையிருக்காது.

நினைவூட்டுவதோடு நின்று விடாமல் பிறந்த நாளுக்கு அனுப்பக்குட்டிய வாழ்த்து அட்டைகளையும் இந்த தளம் பரிந்துரைக்கிறது.அப்படியே பரிசு பொருட்களுக்கான ஐடியாக்களையும் முன்வைக்கிறது.வாழ்த்து அட்டையோ பரிசு பொருளோ வாங்க நேரம் இல்லை என்றால் இந்த தளத்தின் மூலமாகவே வாழ்த்து சொல்லிவிடலாம்.

பிறந்த நாளுக்கு என்றில்லை,திருமண நாள் உள்ளிட்ட எந்த முக்கியமான நிகழ்வுகளுக்கு வேண்டுமானாலும் இந்த சேவையை பயன்படுத்தி கொள்ளலாம்.நம்மூர்காரர்கள் கிருத்திகை,பிரதோஷம் போன்ற தினங்களை மறக்காமல் இருக்க கூட இந்த சேவையை பயன்படுத்தி கொள்ள முடியும்.

இவ்வளவு ஏன் தொலைபேசி பில் கட்ட வேண்டிய நாள்,கேஸ் புக் செய்ய வேண்டிய தினம்,வங்கியில் லோனுக்கான தவணை செலுத்த வேண்டிய தேதி போன்றவற்றை கூட இந்த தளத்தில் குறித்து வைத்து சரியான நேரத்தின் நினைவூட்ட வைக்கலாம்.

நமக்கு நாமே திட்டம் போல கட்டாயம் இதனை செய்ய வேண்டும் என்று சில விஷயங்களை நினத்து கொண்டிருப்போம் அல்லவா அந்த வேலைகளை மறக்காமல் செய்து முடிக்கவும் இந்த சேவை கை கொடுக்கும்.அந்த வகையில் ஒருவருடைய வாழ்க்கையை சரியாக திட்டமிட்டு முக்கிய விஷயங்களை மறக்காமல் இருக்க இந்த தளம் உதவுகிறது.

இந்த சேவையை எந்த அளவுக்கு சிறப்பாக பயன்படுத்துவது என்பது அவரவர் கைகளில் தான் உள்ளது.

மருத்துவரிடம் செக் அப்பிற்கு சென்று கோண்டிருபவர்கள் அடுத்த முறை எப்போது டாக்டரை பார்க்க வேண்டும் என்பதையும் இந்த தளத்திடமே சொல்லி வைத்து நினைவுட்ட சொல்லலாம்.இப்படியே மனைவி வாங்கி வரச்சொல்லிய பொருளை மறக்காமல் இருக்கவும் இதனை பயன்படுத்தலாம்.

சில நேரங்களில் உறவினரை ஏர்போர்ட்டில் இருந்து பிக் அப் செய்வதாக சொல்லிவிட்டு வேலை அதற்கான நேரம் வந்ததும் மறந்து விட்டு அவரை அம்போவென தவிக்க விட்டு விடுவீர்கள் அல்லவா?அத்தகைய தவறுகள் நேராமல் இருக்கவும்,இந்த சேவையின் மூலமே எப்போது ஏர்போர்ட்டுக்கு செல்ல வேண்டும் என்றும் நினைவில் வைத்து கொள்ளலாம்.

இன்னும் ஒருபடி மேலே போய் ஒரு குழுவாக செய்ய திட்டமிட்டுள்ள பணியை கூட இந்த தளத்தின் வசம் ஒப்படைத்துவிடலாம்.உதாரணத்திற்கு நண்பர்கள் ஒன்றாக மதிய உணவுக்கோ பிக்னிக்கிற்கோ செல்ல விரும்பும் படசத்தில் தனிதனியே போன செய்து அல்லது இமெயிலனுப்பி கொண்டிருக்க வேண்டியதில்லை.நண்பர்களின் முகவரியை கொடுத்து மனதில் உள்ள திட்டத்தையும் சொன்னால் அவர்களுக்கு தகவல் தரும் பொறுப்பையும் இந்த தளமே ஏற்றுக்கொள்கிறது.

இப்படி ஒரு தற்காலிக சமூக வலைப்பின்னல் சேவையாகவும் செய்லப்டுவதாக் இந்த தளம் பெருமைப்பட்டு கொள்கிறது.

உங்கள் வாழ்க்கையை சிறந்த முறையில் திட்டமிடப்பட்டதாகவும் சுவை மிக்கதாகவும் மாற்றியமைத்து கொள்ள வழி செய்வதாகவும் இந்த தளம் சொல்கிறது.திட்டமிட உதவும் இணைய நாட்காட்டிகளை விட இந்த முறை சிறந்தது என்றும் இந்த தளம் உறுதியாக சொல்கிறது.

இண்டெர்நெட் துறையில் அனுபவம் மிக்க மார்க் லூக்கி என்பவர் தனது நண்பர்களுடன் சேர்ந்து இந்த தளத்தை நடத்தி வருகிறார்.பஸ்மைண்டர் என்னும் நிறுவனத்தின் ஒரு அங்கமாக இந்த தளத்தை அவர் நடத்தி வருகிறார்.நினைவூட்டல் சார்ந்த மேலும் பல சேவைகளை வழங்க இந்த தளம் திட்டமிட்டுள்ளது.

இணையதள முகவரி;http://www.2reminders.com/default.jsp

செல்லில் எழுதிய நாவல்

நீங்களும்தான் தினந்தோறும் ரெயிலில் போய் வருகிறீர்கள். கையில் செல்போன் வைத்திருக் கிறீர்கள். ஆனால் இத்தாலியை சேர்ந்த ராபர்ட் பெர்னகோவை போல உங்களால் செய்ய முடியவில்லையே! அப்படி என்ன அவர் செய்து விட்டார் என்று நீங்கள் கேட்கலாம். மனிதர் ரெயில் பயணத்திலேயே ஒரு நாவலை எழுதி முடித்து பதிப்பித்து விட்டார். பேனாவை கூட தொடாமல் அந்த நாவலை செல்போன் மூலமே எழுதி முடித்திருக்கிறார் என்பதுதான் குறிப்பிடத்தக்க விஷயம்.
.
அதாவது செல்போனில் சர்வ சகஜமாக இருக்கும் எஸ்எம்எஸ் வசதியை பயன்படுத்திக் கொண்டு அவர் நாவலை எழுதியிருக்கிறார். இதன் மூலம் உலகிலேயே செல்போன் மூலம் முதன் முதலில் நாவலை எழுதி வெளியிட்டவர் எனும் சிறப்பை அவர் பெற்றிருக்கிறார்.
ராபர்ட் பெர்னகோ செய்திருப்பது உண்மையிலேயே மெச்சத்தக்க விஷயம்தான். ஆனாலும் கூட முதன் முதலில் செல்போன் நாவலை எழுதியவர் எனும் அடைமொழிக்கு அவரை சொந்தக்காரராக்குவது சரியா என்று கேட்க தோன்றலாம். 

அதிலும் குறிப்பாக சீனாவில் சில ஆண்டுகளுக்கு முன்னரே எஸ்எம்எஸ் நாவல் அறிமுகமாகி பரபரப்பை ஏற்படுத்தியதை அறிந்திருப்பவர்கள், நிச்சயம் இந்த கேள்வியை கேட்பார்கள்.

நம் நாட்டில் கூட மலையாள எழுத் தாளர் ஒருவர் எஸ்எம்எஸ்சில் நாவல் எழுதி அசத்தியிருக்கிறார். எனினும் ராபர்ட் பெர்னகோ விஷயத்தில் என்ன சிறப்பு என்றால், மனிதர் எஸ்எம்எஸ் வசதியை பயன்படுத்தினாலும், எஸ்எம்எஸ் பாணியில் நாவலை எழுதாமல் முழுநீள நாவலாக அதனை எழுதி முடித்திருக்கிறார்.

அதாவது இதுவரை எழுதப்பட்ட எஸ்எம்எஸ் நாவல்கள் அனைத்தும் எஸ்எம்எஸ்க்கே உரித்தான குறுக்கெழுத்து பாணியில் (இலக்கண பிழையும் இருக்கலாம்) எழுதப் பட்டவை. எஸ்எம்எஸ்சின் வரம்பு மற்றும் அது ஏற்படுத்தி தரும் புதிய வாய்ப்பை பிரதானமாக கொண்டு இந்த படைப்புகள் உருவாக்கப் பட்டன.

ராபர்ட் பெர்னகோ எஸ்எம்எஸ் பாணியில் நாவலை எழுதாமல் நாவல் எழுத எஸ்எம்எஸ்சை பயன்படுத்திக் கொண்டிருக்கிறார். ஐடி துறையில் வேலை பார்க்கும் இளைஞரான பெர்னகோ மிகவும் பிசியானவர். வேலையில் மூழ்கி கிடக்கும் அவருக்கு எழுத்தாளராக வேண்டுமென்ற ஆர்வமும் உண்டு. அறிவியல் புனைக்கதைகளில் அவருக்கு மிகுந்த பற்று உண்டு.

அறிவியல் புனைக்கதை வரிசையில் நாவல் ஒன்றை எழுத அவர் மனதில் ஒரு கதைகருவும் உருவாகி இருந்தது. ஆனால் என்ன பிரச்சனை என்றால், வீட்டுக்கும், வேலைக்குமாக அலைந்து கொண்டிருந்த அவருக்கு உட்கார்ந்து எழுததான் நேரமில்லை. இருப்பினும் மனிதர் அதனை சொல்லி புலம்பிக் கொண்டிருக்கவில்லை.

தினந்தோறும் அவர் நம்மை போலவே ரெயிலில் வேலைக்கு சென்று வருபவர். ரெயில் பயணங்க ளில் செய்வதறியாமல் போரடித்து அமர்ந்திருக்கும் செயலை செய்யாமல் அந்த நேரத்தில் நாவலை எழுத தீர்மானித்தார்.

இங்கு இருப்பது போல இத்தாலியில் ரெயில்கள் நெரிசலாக இல்லாமல், மிகவும் சொகுசாக இருக்கின்றன என்றாலும், ரெயிலில் அமர்ந்தபடி நாவலை எழுத முடியுமா என்ன? பெர்னகோ அப்படி நினைக்க வில்லை. கையில் செல்போன் இருக்க என்ன கவலை என்று நினைத்தார்.

தான் எழுத உத்தேசித்திருந்த நாவலின் அத்தியாங்களை சிறுசிறு பத்திகளாக பிரித்து ஒவ்வொரு பத்தியாக எஸ்எம்எஸ் மூலம் பதிவு செய்து கொண்டார். பின்னர் ஒவ்வொரு நாளும் இந்த எஸ்எம்எஸ்களை தனது கம்ப்யூட்டர் மாற்றி கொண்டு விடுவார்.
இப்படியாக 17 வாரங்களுக்கு தினந் தோறும் எஸ்எம்எஸ்சில் ஒவ்வொரு பத்தியாக நேரம் கிடைத்த போதெல் லாம் எழுதி முழு நாவலையும் முடித்து விட்டார்.

“சகபயணிகள்’ எனும் பெயரிலான அந்த நாவல் இப்படித்தான் உருவானது. சரி! நாவலை எழுதியாகி விட்டது. அதனை வெளியிடுவது எப்படி? இன்டெர்நெட் யுகத்தில் இந்த கேள்வி எந்த அறிமுக எழுத்தாளரை யும் வாட்ட வேண்டியதில்லை. இருக்கவே இருக்கிறது சுயபதிப்பு சேவை தளமான லூலு டாட் காம்.

இணையவாசிகள் தங்கள் படைப்புகளை இந்த தளத்தின் மூலம் புத்தகமாக வெளியிட்டு, இந்த தளத்தின் மூலமே வாசகர்களுக்கு விற்பனை செய்து கொள்ளலாம்.

பதிப்பகங்களின் தயவோ, எந்த விதமான முதலீடோ இல்லாமல் புத்த கத்தை பதிப்பித்து தேவைக் கேற்ப அவற்றை இந்த தளத்தின் மூலமே அச்சிட்டு விற்பனையும் செய்யலாம். இந்த வசதியை பெர்னகோ மிக அழகாக பயன்படுத்திக் கொண்டு தனது நாவலை வெளி யிட்டார். இதன் மூலம் ரெயிலில் பயணம் செய்யும் மற்ற வாசகர்களுக் கெல்லாம் அவர் முன்னோடியாக இருக்கிறார்.

இமெயில் இன்னல்

இமெயில் கலாச்சாரம்  பிடிபடவில்லை என்ற எண்ணம் கொண்டவர்களா நீங்கள்? அப்படி என்றால் அதை நினைத்து சந்தோஷப்படுங்கள்! இமெயில் தொடர்பான நுணுக்கங்கள் அனைத்தும் அத்துபடி என்று பெருமையுடன் சொல்லிக்கொள்ளும் தகுதி உங்களுக்கு இல்லாமல் போகலாம்.  எதற்கெடுத்தாலும் இமெயில் அமைப்பு என்று சொல்லும் பழக்கமும், தேவையும் உங்களுக்கு இல்லாமல் இருக்கலாம்

 

அப்படி இருந்தால் ஒருவிதத்தில் அது நல்லதுதான். இமெயில் விஷயங் களில் பரிட்சயம் பெற்றிருப்பது, நவீன வாழ்க்கைக்கு ஏற்றவராக  உங்களை கருதப்பட வைக்கும் என்றாலும், இமெயிலுக்கென்று சில குறைகள் இருக்கவே செய்கிறது.

அந்த குறைகளால் ஏற்படும் பாதிப்புகள் பற்றிதான் இப்போது இன்டர்நெட் உலகில் கவலையோடு பேசத் தொடங்கியிருக்கின்றனர்.

 

இமெயில் கலாச்சாரம், ஈடுசெய்ய முடியாத சில இழப்புகளை ஏற்படுத்தி வருவதாகவும், இது குறித்து நாம் எச்சரிக்கையோடு இருக்க வேண்டும் என்றும் சொல்கின்றனர். அது மட்டுமல்ல, இமெயில் அனுப்புவதை கொஞ்சம் குறைத்து கொண்டாலும் நல்லதுதான் என்கின்றனர்.

கடிதங்களுக்கு இல்லாத சவுகர்யங்களும், சுலபத்தன்மையும் இமெயிலுக்கு இருக்கலாம்.  ஆனால்  கடிதங்களால் ஏற்பட வாய்ப்பு இல்லாத இன்னல்கள் இமெயில்களால் ஏற்படுகின்றன  என்பதுதான் விஷயம்.

அலுவலக தொடர்புகளுக்கு சர்வசகஜமாக இமெயிலை பயன்படுத்துபவர்கள் இருக்கின்றனர். நண்பர்களோடு கருத்துப்பரிமாற்றம் செய்வதற்கும், கண்ணில்படும் தகவல்களை தட்டிவிடுவதற்கும்  இமெயிலை நாடுபவர்கள் இருக்கின்றனர்.

 

இவ்வளவு ஏன் ஒரே அலுவலகத்தில் பக்கத்து  அறையில் இருப்பவருக்கு  ஒரு தகவலை சொல்ல வேண்டும் என்றால், இமெயிலை  அனுப்பி வைக்கும் நபர்களும் இருக்கவே செய்கின்றனர். 

இங்கேதான் பிரச்சனை வருகிறது என்று சொல்கின்றனர். கூப்பிடும் தூரத்தில் இருக்கும் நபருக்கு  தகவலை சொல்ல வேண்டும் என்றால், எழுந்து சென்றால் போயிற்று அல்லது குறைந்த பட்சம் போனை கையில் எடுத்து பேசினாலாவது பரவாயில்லை. மாறாக இருந்த இடத்தில் இருந்தே இமெயிலில் நாலு வரியை டைப் செய்வது சுலபமாக இருக்கலாம். ஆனால் பிரச்சனைக்குரியதாக மாறிவிடுகிறது. காரணம் தகவல் தொடர்பு சாதனங்களில் இமெயில் மிகவும் வறட்டுத்தனமானதாக கருதப்படுகிறது. 

அதாவது இமெயில் உணர்வு ரீதியான குறிப்புகளை தாங்கி செல்லும் ஆற்றல் இல்லாத வாகனமாகவே இருக்கிறது.  நேரிலோ அல்லது போனிலோ சொல்லத் தயங்கும் விஷயங்களை நாம் இமெயிலில் தெரிவித்து வம்பில் மாட்டி கொள்கிறோம் என்று கூறப்பட்டு வருகிறது.

அதே போல இமெயில் வாசகங்கள் நாம் எதை நினைத்து சொல்கிறோமோ அவற்றுக்கான தன்மையை உணர்த்தாமல் இருப்பதாக கண்டறியப்பட்டுள்ளது. உதாரணத்திற்கு இமெயிலில் ஒரு வாசகத்தை படிக்கும் போது, அதனை படிப்பவர் தான் மரியாதை குறைவாக நடத்தப்பட்டதாக உணரலாம்.  அல்லது  மிகுந்த கோபத்தோடு அந்த வாசகம் எழுதப்பட்டதாக உணரலாம்.

சுருக்கமாக சொன்னால் இமெயில் அனுப்பியவர் குறிப்பிட விரும்பிய கருத்துக்கு மாறான எந்த விஷயத்தை வேண்டுமானாலும் புரிந்து கொள்ளலாம். ஏனென்றால் நாம் பேசும் போது வார்த்தைகளை மட்டுமே வைத்து ஒரு விஷயத்தை புரிந்து கொள்வதில்லை. அது சொல்லப்படும் முறை, அப்போது நமது முகத்தில் காணப்படும் உணர்ச்சி, நம்முடைய  அங்கஅசைவுகள் போன்ற பல்வேறு  குறிப்புகளை வைத்தே பேசப்படும் விஷயத்தை கிரகித்து கொள்கிறோம். 

உண்மையாக திட்டுவதற்கும், செல்லமாக திட்டுவதற்கும்  வித்தியாசம் இருக்கிறதல்லவா?
கடுமையாக நடந்து கொள்வதற்கும், கண்டிப்போடு சொல்வதற்கும் வேறுபாடு இருக்கிறதல்லவா?

நேரில் பேசும் போது இவற்றையெல்லாம் நாம் தானாகவே புரிந்துகொண்டு விடுகிறோம். எனவே  கருத்து வேறுபாடு ஏற்படுவதற்கான வாய்ப்பு மிகவும் குறைவு. ஆனால் இமெயிலில் இப்படி இல்லை.

ஒரு விஷயத்தை தவறுதலாக புரிந்துகொள்ள அனேக வாய்ப்புகள் இருக்கின்றன.
சொல்லப்போனால் இமெயில் மூலம் மட்டுமே கருத்துக்களை பரிமாறிக் கொள்ளும் போது மனக்கசப்பு ஏற்பட வாய்ப்பு அதிகம் இருப்பதாக சொல்கின்றனர். 

இமெயில் மூலம் ஜோக்குகளை அனுப்பி வைப்பது பலருக்கு  பழக்கமாக இருக்கிறதல்லவா? பொதுவாக இப்படி அனுப்பப்படும் ஜோக்குகளை பெறுபவர்கள் இதில் சிரிப்பதற்கு என்ன இருக்கிறது என்றே நினைப்பதாக ஒரு கருத்து கணிப்பு தெரிவிக்கிறது.  எல்லாம்  இமெயிலால் வரும் கோளாறுதான்.

முகத்தை பார்த்து பேசும் போது, நம்முடைய மூளை பல்வேறு குறிப்புகளை புரிந்து கொண்டு பேச்சின் தன்மையை உணர்ந்துகொள்ள வழிசெய்கிறது. இமெயில் இந்த குறிப்புகள்  இல்லாமல் வெறுமையோடு வருகிறது. ஆகையால்தான் இமெயில் அனுப்புவதை விட நேரில் அல்லது குறைந்தபட்சம் போனில் பேசுவது மேலானது என்கின்றனர்.
எல்லா நேரங்களிலும் முடியா விட்டாலும், முக்கியமான மற்றும் தேவைப்படும் நேரங்களில் இமெயிலை மூடிவிட்டு,  நேர்முக பேச்சுக்கு தயாராகுங்கள்.