Tag Archives: hashtag

c3

பிரெஞ்சு பத்திரிகைக்கு ஆதரவாக டிவிட்டரில் எழுச்சி பெற்ற ஹாஷ்டேக்

பாரிசில் பிரெஞ்சு பத்திரிகை மீதான தாக்குதல் மனிதநேயம் மற்றும் கருத்து சுதந்திரம் மீதான இரட்டை தாக்குதலாக அமைந்து திகப்பை ஏற்படுத்தியிருக்கும் நிலையில் டிவிட்டரில் லட்சகணக்கானோர் ஐயம் சார்லி (#JeSuisCharlie) என பொருள்படும் ஹாஷ்டேக் கொண்ட குறும்பதிவுகள் மூலம் தங்கள் உணர்வுகளையும் ஆதரவையும் தெரிவித்து வருகின்றனர்.
பிரெஞ்சு பத்திரிகையான சார்லி ஹெப்டோ மீது தீவிரவாதிகள் நடத்தில் கொடூர தாக்குதலில் 4 கார்டூனிஸ்ட் உட்பட 12 பேர் சுட்டுக்கொல்லப்பட்டனர். நையாண்டி மற்றும் கேலி சித்திரங்களை வெளியிடுவதற்காக அறியப்படும் இந்த பத்திரிகை அலுவலகத்தில் நடத்தப்பட்ட இந்த தாக்குதலும் தொடர்ந்து ஏற்பட்ட உயிரிழப்பும் உலகை அதிர்ச்சியிலும் வேதனையிலும் ஆழ்த்தியது.
இந்த தாக்குதலை உலக தலைவர்கள் மற்றும் பத்திரிகையாளர்கள் கண்டித்துள்ள நிலையில் டிவிட்டரில் லட்சக்கணக்கானோர் குறும்பதிவுகள் மூலம் தங்கள் உணர்வுகளை வெளிப்படுத்தி வருகின்றனர். இந்த குறும்பதிவுகள் தாக்குதலில் பலியானவர்களுக்கும் காயமடைந்தவர்களுக்கும் இரங்கல் தெரிவிக்கும் வகையில் அமைந்திருப்பதுடன் கருத்து சுதந்திரத்திற்கு ஆதரவு தெரிவிக்கும் வகையில் அமைந்துள்ளது. இந்த குறும்பதிவுகள் பெரும்பாலும் #JeSuisCharlie எனும் ஹாஷ்டேக் அடையாளத்துடன் ஒன்று பட்ட குரலாக ஓங்கி ஒலிக்கின்றன.
ஐயம் சார்லி அதாவது நான் தான் சார்லி என பொருள்படும் இந்த ஹாஷ்டேக் மூலம் உலகம் முழுவதும் உள்ள பத்திரிகையாளர்கள் உட்பட லட்சக்கணக்கானோர் தங்கள் ஆதரவை தெரிவித்து வருகின்றனர்.
தாக்குதல் நடந்த சில மணி நேரங்களில் எல்லாம் இந்த ஹாஷ்டேகுடன் 2,50,000 குறும்பதிவுகளுக்கு மேல் பகிர்ந்துகொள்ளப்பட்டன.
இந்த குறும்பதிவுகள் அனைத்தும் கருத்து சுதந்திரத்தை வலியுறுத்தும் வகையில் அமைந்திருந்தன. பல்ரும் தங்கள் ஆதரவை தெரிவிக்கும் வகையில் குறும்பதிவுகளுடன் கேலிச்சித்திரங்களையும் பகிர்ந்து கொண்டனர். பலரும் வாள் முனையை விட பேனா முனை வலியது எனும் கருத்தையும் பகிர்ந்து கொண்டனர்.
செபஸ்டின் குட்ஸ் எனும் டிவிட்டர் பயனாளி” தீவிரவாதிகள் தாக்குதலை மீறி உலகம் முழுவதும் பத்திரிகை சுதந்திரத்திற்காக எழுந்து நிற்கும் சாதாரண மக்களுக்காக … என இதயத்தில் இரத்தம் வடிகிறது” என குறும்பதிவிட்டிருந்தார்.
“பிரான்ஸ் ஒன்றுபட்டு நிற்கிறது . உலகம் உடன் நிற்கிறது. உங்கள் அன்பும் ஒற்றுமையும் அழகானது. இன்று நான் உங்களுடன் இருக்கிறேன் “ என குறிப்பிட்டிருந்தார்.
ஆஸ்திரேலியாவை சேர்ந்த கார்டூனிஸ்ட் டேவிட் போப் , சுடப்பட்டு இறந்து கிடக்கும் கார்டூனிஸ்ட் அருகே முகமடி அணிந்த மனிதர் நிற்பது போல கார்டூன் வரைந்து, அவர் தான் முதலில் வரைந்தார், என கூறுவது போல வாசகத்தை இடம்பெற வைத்திருந்த கார்டூனை பகிர்ந்து கொண்டார்.
ஜே மெக்கினான் எனும் டிவிட்டர் பயனாளி “ இன்று இரவு மக்கள் கூட்டம் ஐயம் சார்லி மூலம் பிரான்ஸ் கூடுதலான பத்திரிகை சுந்ததிரத்திற்கு ஆதரவாக நிற்கும் நம்பிக்கையை அளிக்கிறது” என குறிப்பிட்டிருந்தார்.
இப்படி லட்சக்கணக்கானோர் ஐயம் சார்லி எனும் ஹாஷ்டேகுடன் தங்கள் ஆதரவை வெளிப்படுத்தியுள்ளனர். இதனால் டிவிட்டரில் இந்த ஹாஷ்டேக் மிகவும் பிரபலமாகி இருக்கிறது. பத்திரிகை சுதந்திரத்துக்கு ஆதரவான உலகின் ஒன்றுபட்ட குரலாக இந்த ஹாஷ்டேக் தாங்கிய குறும்பதிவுகள் அமைந்துள்ளன.
இதனிடையே பிரபல செய்தி நிறுவனமான ஏஎப்பி ,அதன் புகைப்பட கலைஞர்கள் சார்லி பத்திரிகைக்கு ஆதரவு தெரிவிக்கும் அட்டையை ஏந்தியபடி காட்சி தரும் புகைப்படத்தை டிவிட்டரில் பகிர்ந்து கொண்டுள்ளது.
பிரெஞ்சு அதிபர் ஹாலாண்டேவும் இந்த தாக்குதலுக்கு எதிராக கண்டனம் தெரிவிக்கும் குறும்பதிவை வெளியிட்டுள்ளார்.” எந்த காட்டுமிராண்டித்தனமான செயலாலும் பத்திரிகை சுதந்திரத்தை ஒன்றும் செய்ய முடியாது. நாங்கள் ஒன்றுபட்ட தேசம் என அவர் குறிப்பிட்டிருந்தார்.
இதே போல பிரான்சில் உள்ள அமெரிக்க தூதரகத்தின் டிவிட்டர் பக்கம் தனது அறிமுக பக்கத்தை சார்லி பத்திரிகைக்கு ஆதரவு தெரிவிக்கும் வகையில் மாற்றுக்கொண்டுள்ளது. இதன் அறிமுக பக்கத்தில் ஐயம் சார்லி என்ற பதம் இடம்பெற்றுள்ளது. ” தவறாக வெளியாகும் செய்திகளை மீறி பாரிசில் உள்ள அமெரிக்க தூதரகத்தை மூட எந்த திட்டமும் இல்லை என்றும் குறும்பதிவு மூலம் தெரிவிக்கப்பட்டுள்ளது.
சார்லி ஹெப்டோ பத்திரிகையின் இணையதளம் சிறிது நேரம் முடங்கிய நிலையில் கருப்பு வண்ண முகப்பு பக்கத்துடன் இணையத்திற்கு திரும்பியது. அதன் நடுவே வெள்ளை எழுத்துக்களில் பத்திரிகை பெயர் மின்னியது.
இதன் நடுவே ஐயம் சார்லி ஹாஷ்டேகுடன் பத்திரிகை சுந்ததிரத்துக்கான ஆதரவும் பெருகி கொண்டிருக்கிறது.
ஐயம் சார்லி குறும்பதிவுகளை பின் தொடர: #JeSuisCharlie

——

விக்டன்.காமில் எழுதியது

டிவிட்டரில் நடந்த வியக்க வைக்கும் உரையாடல்.

idfகுறும்பதிவு சேவையான டிவிட்டரில் தினம் தினம் ஆயிரம் உரையாடல்கள் நிகழ்கின்றன. தகவல் பகிர்வை கடந்து உரையாடலை சாத்தியமாக்குவது தான் டிவிட்டரின் தனிச்சிறப்பு. ஆனால் நிஜ வாழ்க்கையில் நிகழ வாய்பில்லாத உரையாடலை கூட சாத்தியம்மாக்குவது தான் டிவிட்டரின் கூடுதல் சிறப்பு . இதற்கான சமீபத்திய உதாரணம், நேர் எதிர் துருவங்களாக இருக்கும் இஸ்ரேல் மற்றும் பாலஸ்தீன போராட்ட குழுவான ஹமாசுக்கும் டிவிட்டரில் நிக்ழந்த உரையாடல்.
இஸ்ரேல் ஹமாசை தீவிரவாத குழு என்கிறது. ஹமாஸ் பாலஸ்தீனத்தை ஆக்கிரமிப்பில் இருந்து விடுவிக்க போராடுவதாக கூறுகிறது.இரு தரப்புக்கும் இடையே பரஸ்பரம் தாக்குதல்கள் நடவடிக்கைகள் நடந்து கொண்டிருக்கின்றன.
சரியோ தவறோ இஸ்ரேல் தீவிரவாத செயல்களை சிறிதும் பொறுத்து கொள்வதில்லை. கைது மற்றும் தாக்குதல் நடவடிக்கைகளை மேற்கொள்ளவும் தயங்குவதில்லை. இந்த செயல்களை தான் ஹமாஸ் தன் இருப்புக்கான நியாமமாக கருதுகிறது.
இப்படி தான் இஸ்ரேல் சமீபத்தில் 2012 பஸ் குண்டுவெடிப்பு சம்பவம் தொடர்பாக பாலஸ்தீனர் ஒருவரை கைது செய்தது. இந்த நடவடிக்கையில் குற்றம் சாட்டப்பட்டவர் இறந்து விட்டார்.
இஸ்ரேலின் நாணுவ செய்தி தொடர்பாளர் பீட்டர் லெர்னர் இந்த நடவடிக்கைக்கு விளக்கம் அளித்து குறும்பதிவை ஒன்றை வெளியிட்டார்.
இஸ்ரேலை போலஃ ஹமாஸ் அமைப்பும் டிவிட்டரில் இருக்கிறது. ஹமாஸின் ராணுவ பிரிவான அல்சாம் பிரிகேட்ஸ் இந்த குறும்பதிவுக்கு பதில் குறும்பதிவு ஒன்றை வெளியிட்டது.அதில் பால்ஸ்தீனம் விடுதலை பெறும் வரை தங்கள் போராட்டம் தொடரும் என குறிப்பிடப்பட்டிருந்தது. பாலஸ்தீனத்துக்கு ஆதரவான ( #Palestine”) போன்ற ஹாஷ்டேகும் அதில் இடம் பெற்றிருந்தது.
இஸ்ரேலின் லெனார் இந்த குறும்பதிவை பார்த்து விட்டு அதற்கும் பதில் அளித்தார். இஸ்ரேல் இங்கே நீடித்து இருக்கும் என்று குறும்பதிவிட்டவர் இஸ்ரேல் நிலைப்பாட்டுக்கு ஆதரவான ஹாஷ்டேகுகளையும் இணைத்திருந்தார். ( #TerrorDoesntPay.”)
இஸ்ரேல் ராணுவம் மற்றும் ஹமாஸ் டிவிட்டரில் கருத்துக்களை வெளியிடுவது இது முதல் முறை அல்ல. ஆனால் அது பொதுவாக ஒரு வழி பாதையாகவே இருக்கும். முதல் முறையாக ஒரு தரப்பு தெரிவித்த கருத்துக்கும் மற்றொரு தரப்பு நேரடியாக பதில் அளித்து உரையாடியுள்ளது தற்போது நிகழ்ந்துள்ளது.
ஹமாஸ் குறும்பதிவுகளுக்கு பதில் அளிப்பதில்லை எனும் நிலை மாறி , இப்படி நேரடியாக பதில் அளிக்க காரணம் , இரு தர‌ப்பின் வாதத்தையும் பின் தொடர்பாளர்கள் தெரிந்து கொள்ளட்டும் என்பதற்காக தான் என்று லெனார் கூறியுள்ளார். இதுவே சமூக ஊடகத்தின் சிறப்பு என்றும் கூறியுள்ளார்.
உண்மை தான், இரு தரப்பு வாத்ததையும் பார்த்து டிவிட்டர்வாசிகள் முடிவுக்கு வரட்டும் யார் பக்கம் நியாயம் என்று!.

டிவிட்டர் மூலம் திட்டமிட உதவும் இணையதளம்.

app-play-button
‘பல்லும் இருந்து பசியும் எடுப்பதால் சீப்பு என் முடியை தின்கிறது’ என்னும் கவிஞர் கலாப்பிரியாவின் அழகான கவிதையை போல உங்களுக்கு டிவிட்டரிலும் நாட்டம் இருந்து திட்டமிடுதலிலும் ஆர்வம் இருந்தால் எதையும் அழகாக திட்டமிட்டு மேற்கொள்வதற்கான வழியை டுடுடிவீட் இணையதளம் காட்டுகிறது.

இணையத்தில் செய்து முடிக்க விரும்பும் செயல்களை குறித்து வைத்து கொள்ள உதவும் தளங்கள் அநேகம் இருக்கின்றன.இந்த வகை தளங்களில் குறும்பதிவு சேவையான டிவிட்டரின் ஆற்றலை சரியாக பயன்படுத்தி கொள்ளக்கூடியதாக டுடுடிவீட் தளம் உருவாக்கப்பட்டுள்ளது.

இந்த சேவையை பயன்படுத்துவது மூலமாக டிவிட்டர் வழியே உங்கள் வாழ்க்கையை திட்டமிட்டுக்கொள்ளலாம்.அதாவது செய்ய வேண்டிய செயல்களை டிவிட்டர் மூலம் உங்களுக்கு நீங்களே நினைவுபடுத்திக்கொள்ளலாம்!.

இதற்கு நீங்கள் செய்ய வேண்டியதெல்லாம் எதை செய்ய வேண்டும் என்று நினைக்கிறீர்களோ ,எதை மறக்காமல் இருக்க வேண்டும் என்று நினைக்கிறீர்களோ அவற்றை எல்லாம் டிவிட்டரில் குறும்பதிவுகளாக பகிர்ந்து கொள்ள வேண்டியது தான்.

இவை எல்லாம் செயற்கறிய செயல்களாக தான் இருக்க வேண்டும் என்றில்லை.இன்று செல்போன் பில் கட்ட வேண்டும் என்பதில் துவங்கி புதிய புத்தகத்தை படித்து முடிக்க வேண்டும்,யோகா செய்ய வேண்டும்,சிகிரெட் பிடிக்காமல் இருக்க வேண்டும்,மளிகை சாமான வாங்க வேண்டும் என்று எந்த வகையான செயல்களையும் டிவிட்டரில் வெளியிடலாம்.

இத்தகைய குறும்பதிவுகளோடு டுடு என்னும் ஆங்கில சொற்களை ஹாஷ்டேகாக சேர்த்து வெளியிட வேண்டும்.

இவ்வாறு வெளியாகும் குறும்பதிவுகளை டுடுடிவீட் தளம் தனியாக பிரித்து உங்களுக்கான பக்கத்தில் சேமித்து வைக்கும்.

எப்போது தேவையோ அப்போது இந்த பக்கத்தை பார்த்தால் என்ன வேலைகளை செய்ய வேண்டும்,எவை செய்து முடிக்கப்படாமல் இருக்கின்றன என்பதை நீங்கள் தெரிந்து கொள்ளலாம்.

திட்டமிட உதவுவதற்கான நினிவூட்டல் தளம் தான் என்றாலும் இதற்கென தனியே நீங்கள் எதுவுமே செய்ய வேண்டியதில்லை.செய்ய நினைப்பவற்றை டிவிட்டரில் பகிர்ந்து கொண்டால் போதுமானது.

குறும்பதிவுகளில் ‘டுடு’சொற்களை சேர்ப்பதோடு அந்த செயல் தொடர்பான குறிச்சொற்களையும் சேர்த்து கொண்டால் அந்த சொற்கள் தொடர்பான செயல்களை எல்லாம் தனியே பிரித்து வகைப்படுத்தியும் தருகிறது இந்த தளம்.உதாரணத்திற்கு உடற்பயிற்சி என்றோ அலுவல் என்றோ குறிப்பிட்டுக்கொள்ளலாம்.

எப்போதும் டிவிட்டரே கதி என இருப்பவர்கள் இந்த தளம் மூலம் டிவிட்டர் வழியே தங்கள் வாழ்க்கையை திட்டமிட்டு கொண்டு செய்ய வேண்டியவற்றை செய்து முடித்து முன்னேறலாம்.

இதை டிவிட்டரிலேயே செய்து கொள்ளலாமோ இதற்கு தனியே ஒரு இணையதளம் தேவையா என்று கேட்கலாம்.ஆனால் டிவிட்டரில் குறும்பதிவுகளை தொடர்ந்து வெளியிடும் போது நினைவூட்டல் பதிவுகள் அவற்றில் பின்னுக்குத்தள்ளப்பட்டு மறைந்துவிடலாம்.

ஆனால் டுடுடிவீட் தளமோ அழகாக அத்தகைய குறும்பதிவுகள் கண்டு கொண்டு தொகுத்தளிக்கிறது.

இணைதள முகவரி;http://todotweet.com/

சாம் பிட்ரோடாவின் டிவிட்டர் சந்திப்பு;ஒரு அலசல்!.

சாம் பிட்ரோடா டிவிட்டரை எப்படி பயன்படுத்தலாம் என்று காட்ட முயன்று டிவிட்டரை எப்படி பயன்படுத்த வேண்டும் என்று அவரே பாடம் கேட்கும் நிலைக்கு தள்ளப்பட்டுள்ளார்.இதை பிட்ரோடா எதிர்பார்த்திருப்பாரா என்று தெரியவில்லை.ஆனால் அவருடைய‌ டிவிட்டர் செய்தியாளர் சந்திப்பு நடந்து முடிந்த விதம் இதை தான் உணர்த்துகிறது.

ஆனால் பிட்ரோடாவின் முயற்சியை அலசுவதற்கு முன் அவரது செயலை முதலில் பாராட்ட வேண்டும்.காரணம் இந்தியாவின் முதல் டிவிட்டர் செய்தியாளர் சந்திப்பை அவர் நடத்தி காட்டியிருக்கிறார்.அதாவது டிவிட்டரிலேயே கேள்விகளை எதிர்கொண்டு டிவிட்டரிலேயே பதில் அளித்திருக்கிறார்.

செய்தியாளர் சந்திப்பு என்றால் அதற்கு ஒரு அமைப்பு இருக்கிறது.அதற்கு இரு அரஙகம் தேவை,அதன் நடுநாயகமாக பேட்டி தருபவர் அமர்ந்திருப்பார்.அவர் முன் அமர்ந்திருக்கும் செய்தியாளர்கள் கேட்கும் கேள்விகளுக்கு பதிலளிப்பார்.

குறும்பதிவு யுகத்தில் இத்தகைய சம்பிரதாயங்கள் இல்லாமல் அழகாக டிவிட்டரிலேயே செய்தியாளர் சந்திப்பை நடத்துவது சாத்தியம் தான்.

இந்தியாவை பொருத்து வரை சாம் பிட்ரோடா இந்த சாத்தியத்தை நிகழ்த்தி காட்டியிருக்கிறார்.

பிரோடா இந்திய தொலை தொடர்பு துறையின் முன்னோடி என்று வர்ணிக்கப்படுபவர்.தொழில்நுட்ப பயன்பாட்டில் வழிகாட்டியாக விளங்குபவர்.தற்போது பிரதமரின் தொழில்நுட்ப‌ ஆலோசகராக இருப்பவர்.அவர் இந்தியாவின் முதல் டிவிட்டர் செய்தியாளர் சந்திப்பை நடத்த முன் வந்தது பொருத்தமானது தான்.

இந்தியாவில் டிவிட்டர் உள்ளிட்ட சமூக வலைப்பின்னல் சேவைகள் மீது தணிக்கை கத்தி வீசப்பட்டும் பின்னணியில் ,பிரதமர் அலுவல‌கமே டிவிட்டர் கணக்குகளுக்கு எதிரான நடவடிக்கைகளை எடுத்து வரும் நிலையில் அதிகார வர்கத்தை சேர்ந்த தொழில்நுடபவாதியான பிட்ரோடா டிவிட்டரில் கேள்விகளை எதிர் கொண்டு பதில் அளிக்க முன் வந்தது வரவேற்கத்தக்கதே.

‘தகவல்களை ஜனநாயகமாயமாக்குவது’ என்னும் தலைப்பின் கீழ் இந்த சந்திப்புக்கு பிட்ரோடா ஏற்பாடு செய்திருந்ததும் பொருத்தமானதே.காரணம் வழக்கமான செய்தியாளர் சந்திப்பு என்றால் அங்கீகரிக்கப்பட்ட பத்திரிகையாளர்கள் மட்டுமே அதில் பங்கேற்க முடியும்.ஆனால் டிவிட்டர் சந்திப்பு என்றால் எல்லோரும் அதில் பங்கேற்று கேள்வி எழுப்பலாம்.ஒரே ஒரு டிவீட் போதும் அதற்கு!

இந்த ஜ‌னநாயக‌த்தன்மை டிவிட்டர் சந்திப்பின் முக்கிய அம்சமாக கொண்டாடப்படுகிறது.

இதன் காரணமாகவே பிட்ரோடா டிவிட்டர் சந்திப்பு பற்றி அறிவித்ததுமே டிவிட்டர் பயனாளிகள் மத்தியில் பெரும் எதிர்பார்ப்பு உண்டானது.பலரும் இந்த‌ செய்தியாளர் சந்திப்புக்காக ஆர்வத்தோடு காத்திருந்தனர்.

அறிவித்தபடி 25 ம் தேதி பிட்ரோடா இந்த செய்தியாளர் சந்திப்பையும் நடத்தி முடித்தார்.வரும் காலத்தில் பிரதமரும் முதல்வர்களும் இன்னும் பிற முக்கிய புள்ளிகளும் கூட டிவிட்டரிலேயே மக்களை சந்தித்து அவர்கள் கேள்விக்கு பதில் சொல்ல வழிவகுக்கலாம் என்பதால் இந்த சந்திப்பை வரவேற்கவே செய்யலாம்.

ஆனால் இந்த சந்திப்பு நிகழ்ந்த விதம் கொஞ்சம் ஏமாற்றம் தந்து விட்டது.பிட்ரோடா கேட்கப்பட்ட எல்லா கேள்விகளுக்கும் பதில் அளிக்காமல் போனதோடு சர்ச்சைக்குறிய கேள்விகளுக்கு நேரடியாக பதில் அளிக்காமல் மழுப்பிவிட்டதாக பலரும் கருதுகின்றனர்.

பிடரோடா அன்று மாலை 3.30 மணிக்கு டிவிட்டரில் ஆஜரானார்.அதன் பிறகு 45 நிமிடங்களுக்கு அந்த சந்திப்பு நீடித்தது.ஆனால் 45 நிமிடமும் அவர் கேள்விகளுக்கு பதில் அளித்து கொண்டிருக்கவில்லை.

முதல் கேள்வியை எதிர் கொள்வதற்கு முன்பாக முதலில் அவர் டிவிட்டர் செய்தியாளர் சந்திப்புக்கு நல்வரவு கூறிவிட்டு இந்த சந்திப்பு தொடர்பான யூடியூப் வீடியோ விளக்கம் ஒன்றை பார்த்துவிட்டு வருமாறு குறிப்பிட்டு அதற்கான இணைப்பும் கொடுத்திருந்தார்.

இதன் மூலம் கேள்விகளை கேட்க தயாராவதா அல்லது வீடியோவை பார்ப்பதா என தெரியாமல் குழம்ப வைத்தவர் அடுத்து தொடர்ச்சியாக தனது நோக்கத்தை விளக்கும் குறும்பதிவுகளாக வெளியிட்டு கொண்டிருந்தார்.அதாவ்து அவரே பேசிக்கொண்டிருந்தார்.

பத்து குறும்பதிவுகளுக்கு மேல் வெளியிட்ட பிறகே அவர் சரி இனி கேள்விகள் கேடகாலம் என அனுமதி தந்தார்.

இதற்குள் இந்திய டிவிட்டர் வெளியில் பிட்ரோடா பெயரும் ,இந்த சந்திப்புக்காக அவர் உருவாக்கியிருந்த டிஓஐ என்னும் ஹாஷ்டேகும் முன்னிலை பெற்றிருந்தன.

அதன் பிறகு பிரபல பத்திரிகையாளர்கள் உடபட பலரும் டிவிட்டர் குறும்பதிவுகளாக கேள்வி கனைகளை வீசினர்.

முதல் கேள்வியே நெத்தியடியாக தான் வெளியானது.

நமது அதிகாரிகள் மற்றும் மக்கள் பிரதிநிதிகள் மத்தியில் முற்போக்கான மாற்றம் வராமல் தகவல்கள் ஜன்நாய‌கமாயமாவது சாத்தியமாகுமா?என்பது தான் அந்த கேள்வி.

இல்லை,ஆனால் நாம் இப்போது துவங்கியிருக்கிறோம்,இன்னும் நீண்ட தூரம் போக வேண்டும் என பிட்ரோடா ராஜதந்திர மொழியிலேயே பதில் அளித்தார்.

தகவல்களுக்கான வழி இல்லாத போது தகவல்களை ஜனநாயகமாக்குவது என்பது கிராமவாசிகளுக்கு என்ன பொருள் தரும்?என அடுத்த குறும்பதிவு இன்னும் நேரடியாக தாக்கியது?

அவர்களுக்கு தகவல்களை கிடைக்க செய்வது தான் நோக்கமே என்று பிடரோடா பொதுவான பதிலை கூறினார்.

தொடர்ந்து அரசின் கொள்கை முடிவுகள் தொடர்பான கேள்விகளுக்கு பிட்ரோடா ஒரு அதிகாரி போலவே பதில் அளித்தார்.

ஆனால் டிவிட்டர் மீதான தணிக்கை நடவடிக்கை பற்றி கேட்கப்பட்ட கேள்விகளுக்கு அவர் நேரடியாக பதில் அளிக்காமல் மழுப்பியது பலரை அதிருப்தி அடைய வைத்தது.

கேள்விகளை எதிர் கொண்டால் மட்டும் போதுமா அதற்கு நேரடியாக நேர்மையாக பதில் அளிக்க வேண்டாமா? என பலரும் ஆவேசம் கொண்டனர்.

அது மட்டும் அல்ல ரெயில்வேயின் இணைய தளம் பற்றி வைக்கப்பட்ட விமர்சங்களுக்கும் சரியான பதில் வரவில்லை.

கிட்டத்தட்ட 900 மேல் கேள்விகள் சமர்பிக்கப்பட்டு அவற்றில் 20 கேள்விகளுக்கு மட்டுமே அவர் பதில் அளித்திருந்தார்.

முக்கிய கேள்விகளுக்கு மழுப்பலான பதில் அளித்தது ஏமாற்றமாக இருந்ததாக பலரும் குறும்பதிவுகளை வெளியிட்டனர்.

அது மட்டும் அல்ல,பிட்ரோடா கடைபிடித்த டிவிட்டர் நடைமுறைகளும் விமர்சனத்திற்கு ஆளாகி முதலில் டிவிட்டரை எப்படி பயன்படுத்துவது என தெரிந்து கொள்ளுங்கள் என சிலரை சொல்ல வைத்தது.

ஆக பிட்ரோடா டிவிட்டரில் கேள்விகளை எதிர் கொண்டது பாராட்டத்தக்கது என்றாலும் இந்த ச‌ந்திப்பை உயிரோட்டமாக மாற்றத்தவறியதாகவே பலரும் குற்றஞ்சாட்டுகின்றனர்.

45 நிமிட சந்திப்பில் எல்லா கேள்விகளுக்கும் பதில் அளித்து விட முடியாது என்பது உண்மை தான்.ஆனால் பிட்ரோடா தந்த உண்மையான ஏமாற்றம் என்னவென்றால் இந்த சதிப்புக்கு பின் அவர் டிவிட்டரில் இருந்து காணாமல் போனது தான்.

ஆம் செய்தியாளர் சந்திப்பு முடிந்த பிறகு பிட்ரோடா அது குறித்து எந்த கருத்தையும் குறும்பதிவாக வெளியிடவில்லை.நன்றி கூறி விடைபெற்ற பிறகு இரண்டு நாட்களுக்கு ஒரு புதிய குறும்பதிவை கூட வெளியிடவில்லை.

பிட்ரோடா தீவிர டிவிட்டர் பயனாளி என்று சொல்ல முடியாது.அவர் மொத்தமே 235 குறும்பதிவுகளை தான் வெளியிட்டுள்ளார்.எனவே டிவிட்டரில் சுறுசுறுப்பாக இயங்கி கொண்டிருப்பவர் இல்லை.

ஆனாலும் கூட டிவிட்டர் செய்தியாளர் சந்திப்பு நடந்து முடிந்த பிறகு எல்லோரும் அது பற்றியே பேசி விவாதித்து கொண்டிருக்கும் நிலையில் பிட்ரோடா இந்த விவாதத்தை கவனித்து இதில் ப‌ங்கேற்று இருக்க வேண்டும் என்பதே பரவலான எதிர்பார்ப்பு.

சந்திப்பு பற்றி முன் வைக்கப்பட்ட பலவிதமான கருத்துக்களுக்கு குறும்பதிவுகள் முலமே அவர் விளக்கம் அளித்திருக்கலாம்.இது மேலும் உயிரோட்டமான விவாதமாக மாறி நல்லதொரு கருத்து பரிமாற்றத்திற்கு வித்திட்டிருக்கும்.

இருப்பினும் பிட்ரோடாவின் டிவிட்டர் கணக்கை ஆர்வத்தோடு சென்று பார்த்தால் ‘எல்லோருடனும் உரையாடியது மகிழ்ச்சி தருகிறது,அடுத்த முறை விரிவாக பேசுவோம் ‘என விடைபெற்று சென்ற குறும்பதிவுக்கு பிறகு எந்த பதிவும் இல்லாதது ஏமாற்றத்தை அளிக்கிறது.

—————-

http://twitter.com/pitrodasam