Tag Archives: online

ikid1

அப்பாவின் சிகிச்சைக்கு நிதி திரட்டிய இணைய குழந்தை!

மகன் தந்தைக்கு ஆற்றும் உதவி என்பார்களே,அதே போல இணைய நட்சத்திரமாக விளங்கிய குழந்தை இன்று சிறுநீரக கோளாறால் வாடும் தந்தையின் மருத்துவ செலவிற்காக நிதி திரட்டி கொடுத்து நெகிழ வைத்திருக்கிறார்.
முதலில் கொஞ்சம் பிளேஷ்பேக்.

இணைய வரலாறை திரும்பி பார்க்கும் போது, இணைய குழந்தை வெற்றி புன்னகையோடு கையுர்த்தி நிற்கும் காட்சியை கட்டாயம் பார்க்கலாம். இணையம் முழுவதும் பரவிய இணைய நிகழ்வுகளில் ஒன்றாக இந்த புகைப்படம் கருதப்படுகிறது. நீங்களும் கூட அந்த புகைப்படத்தை பார்த்து ரசித்திருக்கலாம்.அல்லது இப்போது இணையத்தில் இண்டெர்நெட் கிட் என டைப் செய்து பார்த்தால் கூட அந்த புகைப்படத்தை பார்த்து ரசிக்கலாம்.
அந்த புகைப்படத்தில் இருப்பது சாம் கிரின்னர். படம் எடுக்கப்பட்ட போது கிரின்னரெ 11 மாத குழந்தை. கடற்கரை மணலில் எடுக்கப்பட்ட அந்த புகைப்படத்தை சேமின் அம்மா லானே கிரின்னர் புகைப்பட பகிர்வு தளமான பிலிக்கரில் பகிர்ந்து கொண்டார்.

கைப்பிடி கடல் மண்ணுடன் கள்ளச்சிரிப்பு சிரித்தபடி வெற்றி எனதே என்பது போல கம்பீரமாக போஸ் அந்த குழந்தை கொடுத்த போஸ் காண்பவர்களை கவர்ந்தது. அதன் பிறகு மைஸ்பேஸ் வலைப்பின்னல் தளத்தில் பகிரப்பட்டு பிரபலமானது.
அவ்வளவு தான் அந்த படத்தை பார்த்த பலரும் அதனோடு புகைப்பட குறிப்பையும் சேர்ந்த்து பகிர்ந்து கொள்ளத்துவங்கினர்.

சூழ்நிலையை மீறி வெற்றி கொள்ளும் அல்லது நிம்மதி பெருமூச்சு விட வைக்கும் குறிப்புகளை இடம் பெற வைத்து இந்த புகைப்படத்தை பலரும் பகிர்ந்து கொண்டனர். இப்படி வைரலாக பரவி இணையம் முழுவதும் அந்த குழந்தையை வெற்றிக்குழந்தையாக கொண்டாடியது.

இப்போது குழந்தை சேமிக்கு 8 வயதாகிறது.இப்போது சேமியின் தாய் இணையத்தின் உதவியை நாடி வந்திருக்கிறார். அவரது கணவருக்கு அதாவது சேமியின் தந்தை சிறுநீரக கோளாறால் பாதிக்கப்பட்டிருக்கிறார்.கடந்த ஆறு ஆண்டுகளாக டயாலிசிஸ் சிகிச்சை எடுத்துக்கொண்டு வரும் ஜஸ்டின் கிரின்னருக்கு இப்போது சிறுநீரக மாற்று சிகிச்சை தேவைப்படுகிறது.
ikid2
அறுவை சிகிச்சை செலவு மற்றும் மருத்துவ செலவுக்கு தேவைப்படும் 75,000 டாலருக்கான நிதி திரட்ட சிறுவனின் அம்மா லேனே கிரின்னர் இணையத்தின் உதவியை நாடினார். இணைய நிதி திரட்டும் மேடையான கோஃபண்ட்மீ தளத்தில் கணவரின் சிகிச்சைக்காக நிதி உதவி கோரும் பக்கத்தை அமைத்தவர், ஜஸ்டினின் அம்மா சிறுநீரக கோளாரால் உயிரிழந்தார், ஆனால் ஜஸ்டினுக்கும் அவரது மகனுக்கும் அவ்வாறு நிகழக்கூடாது என வேண்டுகோள் விடுத்திருந்தார்.

கணவர் மற்றும் சிறுவன் சேமியிடன் இணைந்து இருக்கும் புகைப்படத்தை வெளியிட்டிருந்தவர், இந்த நிதி கோரிக்கை பற்றி டிவிட்டரிலும் தகவல் தெரிவித்திருந்தார்.
தனது டிவிட்டர் பக்கத்தில், அன்பான மக்களே இணைய குழந்தை தனது தந்தைக்காக நிதி திரட்டுக்கிறான் என குறிப்பிட்டு இந்த இணைய பக்கத்திற்கு இணைப்பு கொடுத்திருந்தார்.
சேமியை வெற்றிக்குழந்தையாக ஆக்கிய ஒவ்வொருவரும் ஒரு டாலர் கொடுத்தால் கூட போதும், அவனது அப்பா உயிரை காப்பாற்ற முடியும் என்றும் அடுத்த குறும்பதிவில் தெரிவித்திருந்தார்.
ikid3
அவ்வளவு தான், இந்த குறும்பதிவை பார்த்த பலரும், இணையக்குழந்தையின் அழகிய படத்தை நினைத்துப்பார்த்து அவனது தந்தைக்கு உதவுவது தங்கள் கடமை என நினைத்து டாலர்களை அள்ளிக்கொடுத்தனர். பலரும் இந்த செய்தியை தங்கள் சமூக வட்டத்தில் #SuccessKid எனும் ஹாஷ்டேகுடன் பகிர்ந்து கொண்டனர். இதன் பயனாக இந்த செய்தி இணையத்தில் வைரலாக பரவி சிகிச்சைக்கான நிதி குவிந்தது.
முதல் ஒரு வாரத்திலேயே கேட்ட தொகைக்கும் மேலாக நிதி குவிந்துவிட்டது.

நிதி அளித்தவர்கள் பலரும் இணையத்தில் சிறுவன் சேமியின் புகைப்படத்தை பார்த்து ரசித்ததை நினைவு கூர்ந்து தங்கள் கருத்துக்களையும் பகிர்ந்து கொண்டுள்ளனர்.

இந்த ஆதரவால் சேமியின் அம்மா லானே நெகிழந்து போயிருக்கிறார். நல்ல இணைய குழந்தையின் பெற்றோர்கள் என பெருமையாக குறிப்பிட்டுள்ள லானே, இணையத்தின் ஆற்றலையும் வீச்சையும் அறிந்து மகிழ்வதாக தெரிவித்துள்ளார்.

லானே அமைத்த நிதி திரட்டும் பக்கம்:http://www.gofundme.com/opp5cs

—-

cyb

ஆலோசனை கூட்ட குறிப்புகளை பகிர்ந்து கொள்ள உதவும் இணையதளம்!

அலுவலக ஆலோசனை கூட்டங்கள் அலுப்பூட்டகூடியவையாக இருக்கலாம்; ஆனால் தவிர்க்க இயலாதவை இல்லையா? அதிலும் புதிய குழுக்களுக்கு இவை மிகவும் முக்கியம்.
அலுவலக கூட்டங்கள் சுவாரஸ்யமாக இருக்கின்றனவோ இல்லையோ அவை பயனுள்ளதாக இருக்க வேண்டும் என்றால் கூட்டத்தில் விவாதிக்கப்பட்ட விஷயங்களை உறுப்பினர்களுடன் பகிர்ந்து கொண்டாக வேண்டும்.!

ஆலோசனை கூட்டங்களை பயனுள்ளதாக ஆக்குவது எந்த அளவு எளிதானது எனத்தெரியவில்லை, ஆனால் கூட்டத்தின் முடிவுகளை பகிர்ந்து கொள்வதை எளிதாக்க ஒரு வழி இருக்கிறது. மினிட்.இயோ (minute.io ) இணையதளம் இதை அழகாக செய்கிறது.

கூட்டம் முடிந்தவுடன் அதில் விவாதிக்கப்பட்ட விஷயங்களை நினைவு கூர்ந்து எடுக்கப்பட்ட முக்கிய முடிவுகளை பகிர்ந்து கொள்வது கூட்டத்தின் பலனை பெற அவசியம் தான் இல்லையா?
ஆலோசனை நடத்தியதே அடுத்த கட்ட முன்னேற்றத்திற்காக எனும் போது கூட்டத்தின் சாரம்சத்தை நினைவூட்டுவது செயலுக்கான உந்துதலாக இருக்கும்!

ஆனால், இதை செய்வதற்கு கொஞ்சம் மெனக்கெட வேண்டும். குறிப்புகளை எழுதி, விவாதங்களை குறிப்பிட்டு , முடிவுகளை தெரிவித்து அதன் பிறகு எல்லோருக்கும் மெயில் அனுப்ப வேண்டும். இதை உடனடியாக செய்து முடிககாமல் தள்ளிப்போட்டால் இதை செய்வது இன்னும் சுமையாக விடும்.
இந்த இடத்தில் தான் மினிட்.இயோ தளம வருகிறது.

பொதுவாக மினிட்ஸ் என குறிப்பிடப்படும் கூட்டத்தின் முக்கிய அம்சங்களை கூட்டம் முடிந்தவுடன் எளிதாக பகிர்ந்து கொள்ள இந்த தளம் வழி செய்கிறது.

ஆலோசனை கூட்டங்களில் பங்கேற்பதில் அனுபவம் உள்ளவர் என்றால் இந்த தளம் அதன் எளிமையாலும் பயன்பாட்டு தன்மையாலும் உங்க்ளை கவர்ந்துவிடும். இதுவரை ஆலோசனை கூட்டங்களில் அதிகம் பங்கேற்றதில்லை என்றாலும் கூட, இந்த தளத்தை பார்த்ததும் ஒரு கூட்டம் நடத்திப்பார்க்கலாமே என்று தோன்றும் . அந்த அளவுக்கு இது தரும் வசதி இருக்கிறது.
minutes.io_thumb
ஆலோசனை கூட்டம் முடிந்ததுமே கம்ப்யூட்டாரிலோ லேப்டாப்பிலோ இந்த தளத்தை திறந்து வைத்துக்கொள்ள வேண்டும். அதன் பிறகு குறிப்புகளை எழுதுவதற்கான பகுதியை கிளிக் செய்ததும் குறிப்புகளுக்கான பக்கம் வந்து நிறகும்.

உதவியாளர் ஒருவர் உங்களுக்காக என்று குறிப்பெடுக்கும் பக்கத்தை தயார் செய்து கொடுத்தது போல எல்லா அம்சங்களுடனும் இந்த பக்கம் இருக்கும். அதில் மேலே கூட்டத்தின் தலைப்பை டைப் செய்துவிட்டு, குறிப்பெடுப்பவரின் பெயர் மற்றும் இதை பெற வேண்டியவர்களின் இமெயில் முகவரிகளை வரிசையாக டைப் செய்து விட்டு அதன் பிறகு குறிப்புகளை அடிக்க வேண்டியது தான்.

குறிப்புகளை டைப் செய்வதற்கும் அழகான வழிகாட்டுதல் இருக்கின்றன. குறிப்பின் தன்மை பற்றிய பகுதியை கிளிக் செய்ததுமே, நோக்கம் (ஏஜெண்டா), முடிவுகள், செய்ய வேண்டியவை, கருத்துக்கள் என துணை தலைப்புகள் தோன்றுகின்றன. அவற்றில் பொருத்தமானவற்றில் தகவல்களை இடம்பெறச்செய்யலாம்.
இதற்கான அவகாச தேதியையும் குறிப்பிடலாம். கூட்டத்தின் நோக்கம் பற்றியும் டைப் செய்ய தனிப்பகுதி இருக்கிறது.

அவ்வளவு தான் கூட்டத்தின் குறிப்புகள் தயார். இனி ஒரே கிளிக்கில் அனுப்பிவிடலாம். குறிப்புகளை அனுப்பும் முன் அதன் முன்னோட்ட வடிவையும் பார்த்துக்கொள்ளலாம். தேவை எனில் அச்சிட்டு கொள்ளலாம். நகலெடுக்கலாம்.

கூட்டத்தில் விவாதித்த விஷயங்களை மேற்கொண்டு முன்னெடுத்துச்செல்ல இது உதவும். கூட்டத்திற்கான ஆவணமாகவும் இருக்கும்.

இதை பயன்படுத்த உறுப்பினராக பதிவு செய்ய வேண்டிய அவசியமில்லை. ஆனால் பதிவு செய்து கொண்டால் குறிப்புகளை சேமித்துக்கொள்ளலாம்.

அடுத்த முறை அலுவலக கூட்டம் நடக்கும் போது முயன்று பாருங்கள். அலுலவலக் கூட்டத்திற்கு தான் பயன்படுத்த வேண்டும் என்றில்லை, நண்பர்கள் சந்தித்து பேசுவதை கூட இப்படி குறிப்புகளாக்கி ஆவணப்படுத்தலாம்!.

இணையதள முகவரி: https://minutes.io/welcome

netneutrality

இணைய சுதந்திரம் காப்போம்!

நீங்கள் தினமும் நூறு இமெயில்களை அனுப்பலாம். அல்லது எப்போதாவது முக்கிய பணிகளுக்கு மட்டுமே இமெயிலை பயன்படுத்துபவராக இருக்கலாம். எப்படி இருந்தாலும் இப்போது நீங்கள் அனுப்பும் இமெயில் இணைய சுதந்திரம் காக்க குரல் கொடுக்கும் வகையில் அமையலாம். இந்த நம்பிக்கையில் தான் ஒரு லட்சம் இந்தியர்களுக்கு மேல் இதுவரை தொலைதொடர்பு ஒழுங்கு முறை ஆணையமான டிராய்க்கு இமெயில் அனுப்பியுள்ளனர். வருங்காலத்தில் இணைய உரிமை பாதிக்கப்படக்கூடாது என கருதினால் நீங்களும் டிராய்க்கு இமெயில் அனுப்பி கருத்து தெரிவிக்கலாம்.

அதற்கு முன்னர் நெட் நியூட்ராலிட்டி பற்றி நீங்கள் தெரிந்து கொள்ள வேண்டும். ஏனெனில் நெட் நியூட்ராட்லிட்டி காக்க தான் இணையவாசிகள் இமெயில் மூலம் தங்கள் கருத்துக்களை தெரிவித்து வருகின்றனர்.
நெட் நியூட்ராலிட்டி எனும் பதம் சமீப காலமாக இந்தியா முழுவதும் பலமாக அடிபடுவதை நீங்கள் கவனித்திருக்கலாம். அதிலும் சமீபத்தில் டிராய் அமைப்பு இது தொடர்பாக கருத்து திட்ட முன்வடிவை வெளியிட்டு பொது மக்களிடம் இருந்து கருத்து கோரியதை அடுத்து இது தொடர்பான விவாதம் தீவிரமாகி இருக்கிறது.
அமெரிக்கா போன்ற நாடுகளில் நெட் நியூட்ராலிட்டி தொடர்பான விவாதம் பல ஆண்டுகளாகவே தீவிரமாக நடைபெற்று வருகிறது என்பதுடன் அதை காக்கவும் நடவடிக்கை எடுக்கப்பட்டுள்ளது.

இண்டெர்நெட் சமநிலை என புரிந்து கொள்ளக்கூடிய நெட் நியூட்ராலிட்டி என்றால் இணையத்தில் எல்லா வகையான இணையதளங்கள் மற்றும் சேவைகளை சமமாக கருதுவது என புரிந்து கொள்ளலாம். அதாவது எல்லா இணையதளங்களையும் அணுகுவதற்கான சமமான வாய்ப்பு எப்போதும் இணையவாசிகள் கையில் இருக்க வேண்டும் என்று பொருள். எல்லா இணையதளங்களும் சமமான வேகத்தில் அணுக கூடியதாக இருக்க வேண்டும்.
இதன் உட்பொருள் எந்த ஒரு இணையதளத்தையும் பயன்படுத்த தனியே கட்டணம் கொடுக்கும் நிலை வரக்கூடாது என்பதும் இதற்கான உரிமை இணைய சேவை வழங்கும் நிறுவனம் அல்லது தொலை தொடர்பு நிறுவனங்களிடம் வழங்கப்படக்கூடாது என்பது தான்.

இணைய சேவைய வழங்குவது மட்டும் தான் நிறுவனங்களின் வேலையே தவிர அதை எப்படி பயன்படுத்துவது என்பது இணையவாசிகளின் உரிமை என்பது தான் இணைய சமநிலையின் அடிநாதம்.
ஆனால் இப்போதே இணையத்தை அப்படி தானே பயன்படுத்திக்கொண்டிருக்கிறோம் என நீங்கள் கேட்கலாம். உண்மை தான் . ஆனால் இந்த நிலை தொடர்வதற்கு ஆபத்து வந்திருக்கிறது என்பதே விஷயம்.
எப்படி என்றால், இணைய சேவை வழங்கும் நிறுவனங்கள் குறிப்பிட்ட இணையதளங்கள் அல்லது செயலிகளை பயன்படுத்த கட்டுப்பாடு விதிக்கும் நிலை உருவாகலாம் என்பது தான். இப்படி கட்டுப்பாடு விதிக்கப்படும் இணையதளங்களை பார்க்க கூடுதல் கட்டணம் செலுத்த வேண்டிவரலாம். மற்ற இணையதளங்களை இலவசமாக பயன்படுத்தலாம் என்று சொல்லப்படலாம்.

உதாரணத்திற்கு வீடியோ பகிர்வு சேவையான யூடியூப் அல்லது இணைய தொலைபேசி சேவையான ஸ்கைப்பை பயன்படுத்த கூடுதல் கட்டணம் செலுத்த வேண்டி வரலாம். அதே போல செல்பேசியில் வாட்ஸ் அப் போன்றவைக்கும் கட்டுப்பாடுகள் வரலாம்.

இத்தகைய உரிமை இணைய நிறுவனங்களுக்கு வழங்கப்பட்டால், இணைய பயன்பாட்டுக்கான கட்டணம் வசுலிக்கப்படுவதற்கு பதிலாக, குறிப்பிட்ட இணையதளங்களை அதிகம் பயன்படுத்துவதற்கு ஏற்ப கட்டணம் செலுத்த வேண்டி வரலாம். அப்போது செலவை மிச்சமாக்க இணையவாசிகள் சில இணையதளங்களை பயன்படுத்துவதை குறைத்துக்கொள்ள நேரலாம். அல்லது சில இணையதளங்களை அதிகம் பயன்படுத்த அதிக கட்டணம் செலுத்த வேண்டி வரலாம்.

இது தான் நெட் நியூட்ராலிட்டி பாதிக்கப்படும் போது ஏற்படும் விபரீதம்.
ஏனெனில் நிறுவனங்கள் இணைய சேவையை சமமாக வழங்குவதை நிறுத்திக்கொண்டு தங்கள் இஷ்டம் போல வழங்கத்துவங்கும். இதனால் இணையத்தின் அடிப்படை சுந்ததிரம் பாதிக்கப்பட்டு அதன் ஆதார தன்மையான எவராலும் கட்டுப்படுத்தப்படாத குணமும் பாதிக்கப்படும் என்று வல்லுனர்களும் இணைய ஆர்வலர்களும் கவலைப்படுகின்றனர்.

பொதுவாக இந்த கட்டுப்பாட்டை இணைய நிறுவனங்கள் கொள்ளைப்புற வழியாக கொண்டு வர பார்க்கின்றன. உதாரணத்திற்கு அவை அதிவேக இணைய சேவையை பெற அதிக கட்டணம் வசூலிக்க அனுமதிக்க வேண்டும் என்றும் அரசுகளிடன் அனுமதி கோரி வருகின்றன. இவை இண்டெர்நெட் பாஸ்ட் லேன் என குறிப்பிடப்படுகின்றன. இந்த விரைவு பாதையில் பயன்படுத்தக்கூடிய இணைய சேவைகளுக்கு கூடுதல் கட்டணம் வசூலிக்கவும் இவை அனுமதி கோருகின்றன.

ஆனால் இப்படி அனுமதித்தால் அதிக பயன்பாடு உள்ள இணையதளங்களை எல்லாம் அதிவேக சேவைக்கு கொண்டு சென்று இணையத்தை கூறு போட்டு விடுவார்கள் என்று அஞ்சப்படுகிறது. ஒரு இணையம் இருப்பதற்கு பதில் துண்டு துண்டாக பல இணையங்கள் இருக்கும். அவற்றின் மீது இணைய நிறுவனங்களுக்கே கட்டுப்பாடு இருக்கும் என்றும் குற்றம்சாட்டப்படுகிறது.

பேஸ்புக் நிறுவனம் குறிப்பிட்ட இணையதளங்களை இலவசமாக வழங்க முயலும் இண்டெர்நெட்.ஆர்க் அமைப்பும் சரி இந்தியாவில் ஏர்டெல் அறிமுகம் செய்துள்ள ஜிரோ இண்டெர்நெட்டும் சரி இத்தகைய நிலைக்கே வித்திடும் என்று இணைய ஆர்வலர்கள் எச்சரிக்கின்றனர்.

இணைதளங்களை இலவசமாக பார்க்கலாம் என்பது கவர்ச்சியாக தோன்றினாலும் இதையே சாக்காக வைத்து மற்ற இணைய சேவைகளுக்கு கட்டணம் வசூலிக்க முற்படும் நிலை வரும் என்பது கவனிக்க வேண்டிய விஷயம்.
இணைய ஆர்வலர்கள் எல்லோருமே இதற்கு எதிர்ப்பு தெரிவித்து வருகின்றனர். ஆனால் இணைய நிறுவனங்கள் மட்டும் இதை ஆதரிக்கின்றன. ஸ்கைப் ,வாட்ஸ் அப் போன்ற இணைய சேவைகளை வாடிக்கையாளர்கள் பயன்படுத்தும் போது அவற்றுக்கு எந்த லாபமும் வருவதில்லை. எனவே இது போன்ற சேவைகளுக்கு கட்டணம் வசூலிக்க உரிமை கேட்கின்றன. அதே போல தங்கள் சேவையை பயன்படுத்தி வருவாய் ஈட்டும் பேஸ்புக் மற்றும் கூகுள் போன்ற நிறுவனங்களும் கட்டணம் செலுத்த வேண்டும் என கேட்கின்றன.

இது தொடர்பாக தான் டிராய் அமைப்பு இப்போது இணையவாசிகளின் கருத்தை கேட்டுள்ளது.
நெட் நியூட்ராலிட்டி காக்கப்பட வேண்டும் என்பதையும் அதற்கான காரணங்க்ளையும் விளக்கி மெயில் அனுப்பலாம்.
இணையவாசிகள் இப்படி டிராய் அமைப்புக்கு கருத்து தெரிவிக்க வசதியாக சேவ் தி இண்டெர்நெட் ( http://www.savetheinternet.in/) எனும் இணையதளமும் அமைக்கப்பட்டுள்ளது.இந்த தளம் மூலம் மெயில் அனுப்பலாம். இதுவரை ஒரு லட்சம் மெயில்களுக்கு மேல் அனுப்பட்டுள்ளன.

இதே போல இந்த பிரச்சனையின் அடிப்படையை விளக்கி நெட்நியூடிராலிட்டி (http://www.netneutrality.in/ ) எனும் தளமும் அமைக்கப்பட்டுள்ளது.

நெட்நியூட்ராலிட்டிக்கான பாதிப்பு இணையம் பயன்படுத்தப்படும் விதம் மற்றும் நிர்வகிக்கப்படும் விதத்தை பாதிக்கும் என்பதால் இது தொடர்பாக இமெயில் அனுப்பி கருத்து தெரிவிப்பது உங்களின் உரிமையை மட்டும் அல்ல இணையத்தையும் காக்கும்!.

நன்றி; தமிழ் இந்து இணையதளத்தில் எழுதியது.

1apologyscreenshot

மகளின் செயலுக்காக பேஸ்புக்கில் மன்னிப்பு கேட்ட அமெரிக்க அம்மா!

அமெரிக்க அம்மா ஒருவர் தனது மகளின் செயலால் பாதிக்கப்பட்ட பெண்மணியிடம் பேஸ்புக் மூலம் மன்னிப்பு கேட்டு எல்லா அம்மாக்களாலும் பாராட்டப்படும் முன்னோடி அம்மாவாகி இருக்கிறார். அப்படியே மற்றவர்களிடன் எப்படி தன்மையுடன் நடந்து கொள்ள வேண்டும் என்று தன் மகளுக்கு பாடமும் கற்றுத்தந்திருக்கிறார்.
கேயிஷா ஸ்மித் எனும் அந்த அம்மா அமெரிக்காவின் அலபாமாவில் வசிக்கிறார். கடந்த வாரம் அவர் தந்து இரண்டு பெண்கள் மற்றும் பையனை திரையரங்கில் புதிய படமான சிண்ட்ரெல்லா பார்ப்பதற்காக காரில் விட்டுவிட்டு வீட்டிற்கு வந்துவிட்டார்.

திரையரங்கில் அவரது இரண்டு மகள்களும் துடுக்குத்தனமாக நடந்து கொண்டிருக்கின்றனர். அவர்களின் துடுப்புத்தனத்தால், மகளுடன் படம் பார்க்க வந்திருந்த அம்மா ஒருவர் மிகவும் பாதிக்கப்பட்டிருக்கிறார். படம் முடிந்ததும் அந்த பெண்மணி மிகுந்த வருத்ததுடன் இவர்களிடம் வந்து , தனது கணவருக்கு வேலை போய்விட்டதால் இனி தங்களால் சினிமாவுக்கு எல்லாம் வர முடியாது எனும் நிலையில் கடைசியாக பார்த்த படத்தையும் நிம்மதியில்லாமல் செய்துவிட்டதாக வேதனையுடன் குறிப்பிட்டு சென்றிருக்கிறார்.
மகளின் இந்த நடவடிக்கை பற்றி அவர்களின் தம்பி கூறியதை கேட்டு கேயிஷா ஸ்மித் மிகவும் வேதனையடைந்தார்.
1kyeshasmithwoodandkids
இன்னொருவரின் மனம் நோகும் படி மகள்கள் நடந்து கொண்டிருக்கின்றனரே என்று கலங்கியவர் அத்துடன் நிற்கவில்லை. புது யுகத்து அம்மாவாக இந்த விஷயத்தை பேஸ்புக்கிற்கு கொண்டு சென்றார்.
நடந்த சம்பவத்தை முழுவதும் விவரித்து, திரையரங்கில் தனது மகள்களின் மோசமான நடத்தையால் பாதிக்கப்பட்ட அம்மாவிடம் மன்னிப்பு கேட்டுக்கொள்ள விரும்புவதாகவும், பாதிக்கப்பட்ட அந்த பெண்மணியை தேடிகொண்டிருப்பதாகவும் தெரிவித்திருந்தார். தங்கள் செயல் தவறானது என் பெண்களுக்கு உணர்த்தப்பட்டதாக குறிப்பிட்டிருந்தவர் ,இது ஏற்றுக்கொள்ள முடியாத செயலுக்காக அவர்கள் மன்னிப்பு கேட்க தயராக இருப்பதாகவும் தெரிவித்திருந்தார். அதோடு அவர்கள் தங்கள் பாக்கெட் மணியில் தங்கள் செயலால் பாதிக்கப்பட்ட அம்மா மற்றும் அவரது மகளை சினிமாவுக்கு அழைத்துச்சென்று சிற்றுண்டி வாங்கித்தந்து மகிழ்விக்க தயாராக இருப்பதாகவும் உருக்கமாக குறிப்பிட்டிருந்தவர்,சம்பந்தப்பட்ட அம்மா இதை பார்த்தால் தயவு செய்து தன்னை தொடர்பு கொள்ள வேண்டும் என்றும் கேட்டிருந்தார்.

மகள்களின் செயலுக்காக இப்படி பேஸ்புக் மூலம் மன்னிப்பு கேட்க முன்வந்து அந்த பாதிப்புக்கு ஈடு செய்யவும் முற்பட்ட அவரது கண்டிப்பு மிக்க தாயுள்ளத்தை வெளிப்படுத்திய இந்த பேஸ்புக் பதிவை பார்த்தவர்கள் எல்லாம் வியப்புடன் அதை தங்கள் நட்பு வட்டத்தில் பகிர்ந்து கொண்டனர்.
இப்படி ஆயிரகணக்கானவர்களால் பார்க்கப்பட்ட அந்த பதிவு இறுதியில் அதற்குறிய பெண்மணியாலும் பார்க்கப்பட்டது.

ரெபேக்கா பாய்ட் எனும் அந்த பெண்மணி இந்த மன்னிப்பு கோரலை பார்த்து நெகிழ்ந்து போய்விட்டார்.
அந்த பெண்களின் செயலால் தான் வேதனையடைண்டாலும் அவர்கள் அம்மாவின் மன்னிப்பு கோரும் பதிவை படித்த போது கண் கலங்கிவிட்டதாக குறிப்பிட்டுள்ளார். அந்த பெண்கள் மீது தனக்கு கோபமில்லை என்று கூறியவர் ,அவர்கள் கற்றுக்கொள்வார்கள் என்றும் கூறியுள்ளதுடன் ஒரு அம்மாவாக கேயிஷா பொறுப்புடன் நடந்து கொண்ட விதம் குறித்தும் பாராட்டு தெரிவித்திருந்தார்.

இதனிடையே இந்த நிகழ்வு பற்றி ஆன்லைனில் படித்தவர்களில் பலர் அவரது கணவருக்கு வேலை வாய்ப்பு வழங்கவும் முன் வந்திருந்தனர்.

பேஸ்புக் தற்பெருமைக்கும், அலுப்பூட்டும் நிலைத்தகவலுக்கும் மட்டும் அல்ல, அதன் வழியே சின்ன சின்ன அற்புதங்களும் நடந்தேறும் என்பதற்கு இந்த சம்பவம் அழகான உதாரணமாக இருப்பதாக பலரும் பாராட்டுகின்றனர்.

——–

விகடன்.காமி எழுதியது.

—-

தினமணி.காமில், இணையம் தொடர்பான முக்கிய பதிவுகளை நெட்டும் நடப்பும் என எழுதுகிறேன்: படித்து விட்டு கருத்து மற்றும் ஆலோசனை சொல்லவும்: http://www.dinamani.com/junction/nettum-nadappum/2015/04/03/%E0%AE%87%E0%AE%A3%E0%AF%88%E0%AE%AF%E0%AE%A4%E0%AF%8D%E0%AE%A4%E0%AE%BF%E0%AE%A9%E0%AF%8D-%E0%AE%AE%E0%AF%81%E0%AE%A4%E0%AE%B2%E0%AF%8D-%E0%AE%AE%E0%AF%81%E0%AE%95%E0%AE%B5%E0%AE%B0%E0%AE%BF/article2743460.ece

monica

பரிவு மிக்க இணையம் வேண்டும்; மோனிகா லெவின்ஸ்கி உருக்கம்.

மோனிகா லெவின்ஸ்கி மீண்டும் இணையத்தின் முன் வந்திருக்கிறார். இணையத்தின் வீச்சால் தாங்க முடியாத அவமானத்திற்கு இலக்கானவர் தன்னைப்போன்ற பாதிப்புகுள்ளாகிறவர்கள் சார்பில் பரிவு மிக்க இணையம் வேண்டும் என உருக்கமாக வேண்டுகோள் வைத்திருக்கிறார்.

மோனிகா லெவின்ஸ்கி என்றதும் அவர் வெள்ளை மாளிகை பணிப்பெண்ணாக இருந்ததும் முன்னாள் அமெரிக்க அதிபர் கிளிண்டனுடனான தொடர்பு விவகாரத்தில் சிக்கி தலைப்பு செய்திகளாகி நின்றதும் தான் நினைவுக்கு வரும். ஆனால் லெவின்ஸ்கி பற்றிய அறிமுகத்தில் இது ஒரு பாதி தான். இந்த விவகாரத்தால் அவர் எந்த அளவுக்கு வேதனைக்கும் மன உளைச்சலுக்கும் இலக்கானார் என்பதை பலரும் அறியவில்லை. அது மட்டும் அல்ல, இணையத்தின் வீச்சால் மாபெரும் அவமானத்திற்கு இலக்கான முதல் நபராகவும் அவர் வலியை அனுபவித்ததையும் பெரும்பாலானோர் அறியவில்லை. பல ஆண்டு மவுனத்தை களைத்து கடந்த ஆண்டு போர்ப்ஸ் மாநாட்டில் உருக்கமாக தனது கதையை எடுத்துரைத்த போது தான் இணையம் மூலம் அவமானத்திற்கு ஆளாகும் வேதவையின் தீவிரத்தை உலகம் உணர்ந்தது.

லெவின்ஸ்கி -கிளிண்டன் விவகாரம் இணையத்தின் மூலம் வெளிச்சத்திற்கு வந்து அதன் பிறகு உலகை உலுக்கியது என்பதை இங்கே நினைவில் கொள்ள வேண்டும். இணையத்தின் மூளை முடுக்கெல்லாம் இது பேசப்பட்டு அவர் தலைகுணிந்து நின்றார்.

இந்நிலையில் மோனிகா லெவின்ஸ்கி, டெட் அமைப்பின் சார்பிலான மாநாட்டில் கலந்து கொண்டு உரை நிகழ்த்தினார். பார்வையாளர்களை எழுந்து நின்று கைத்தட்டி ஆங்கிகரிக்க வைத்த இந்த உரையில் அவர் இணைய கலாச்சாரம் மற்றும் போக்கு தொடர்பாக கவலை தரும் பல விஷ்யங்களை சுட்டிக்காட்டி பரிவு மிக்க இணையத்தின் அவசியம் பற்றி உருக்கமாக வேண்டுகோள் வைத்திருக்கிறார்.
இப்போது இணையச்சீண்டல் என அறியப்படும் பிரச்சனையின் முதல் உதாரணம் தான் என்று கூறியவர், 22 வயதில் எனது மேலதிகாரியுடன் நான் காதலில் விழுந்தேன். 24 வயதில் அதன் மோசமான பாதிப்பை அனுபவித்தேன்” என்று குறிப்பிட்டார்

தன்னுடைய தனிப்பட்ட அவமானத்தை இணையம் பன்மடங்கு மோசமாக்கியதாக அவர் மேலும் தெரிவித்தார்.
இந்த விவகாரம் டிஜிட்டல் புரட்சியால் ஊதிப்பெரிதாக்கப்பட்டதாக குறிப்பிட்டவர் ,தனிப்பட்ட நபராக இருந்த நிலை மாதிரி உலகம் முழுவதும் அவமானத்திற்கு இலக்காக்கப்பட்டவர் , இணையம் முழுவது கல்வீச்சுக்கு ஆளானதாகவும் தெரிவித்தார்.

மோசமான பெண்ணாக முத்திரை குத்தப்பட்டு , மதிப்பை இழந்து, கவுரவத்தை இழந்து கிட்டத்தட்ட வாழ்க்கையையும் இழந்துவிட்டதாக அவர் உருக்கமாக குறிப்பிட்டார்.
அவமானத்தின் உணர்வை தொழில்நுட்பம் பன்மடங்காக்கி இருப்பதாக வேதனை தெரிவித்தவர், முன்பு நண்பர்கள் வட்டம் , குடும்பத்தினரோடு முடிந்த விஷயம் இப்போது முழு இணைய சமூகத்திற்கும் பரவி இருப்பதாக தெரிவித்தார்.

இணையம் மற்றவர்களின் வலி மற்றும் தவிப்பு குறித்து உணர்ச்சியற்று போகச்செய்திருப்பதாக கூறியவர் , அவமானப்படுத்தும் கலாச்சாரத்தில் இருந்து விலகி பரிவு மற்றும் அக்கறை கொண்ட இணையம் உருவாக வேண்டும் என்று கேட்டுக்கொண்டார்.
பரிவான பின்னூட்டம் எதிர்மறையான கருத்துக்களை வெல்ல உதவும் என்று கூறியவர் பரிவு எல்லோருக்கும் நலன் பயக்கும் என்றார். மற்றவர்கள் தலைப்புச்செய்தியில் ஒரு மைல் தூரம் பயணித்து பாருங்கள் என்றும் கூறியவர், இணையம் மூலம் அவமானத்திற்கு ஆளாகும் எவரும் இதை தாக்கு பிடித்து எழுந்து நிற்பது சாத்தியம் என உணர வேண்டும் என்றும் கேட்டுக்கொண்டார்.

மோனிகா லெவின்ஸ்கியின் டெட் உரை: http://blog.ted.com/imagine-walking-a-mile-in-someone-elses-headline-monica-lewinsky-speaks-at-ted2015/

——