Tag Archives: photo

இணைய தேடலில் ஒரு சுவாரஸ்யம்.

இந்த இணையதளம் எந்த அளவுக்கு பயனுள்ளதாக இருக்கும் என்று தெரியவில்லை.ஆனால் முதல் முறை பயன்படுத்தும் போது நிச்சயம் சுவாரஸ்யத்தை ஏற்படுத்தவே செய்யும்.

ரைட் வித் இமேஜஸ் என்னும் இந்த தளம் நீங்கள் டைப் செய்வதை எல்லாம் புகைப்பட உருவமாக மாற்றிக்காட்டுகிறது.அதாவது எந்த சொல்லை டைப் செய்தாலும் அதற்கு பொருத்தமான உருவத்தை காட்டுகிறது.

இந்த மாற்றத்தை உருவ மொழி என இந்த தளம் குறிப்பிடுகிறது.

டைப் செய்யப்படும் சொல்லுக்கு நிகரான உருவத்தை கூகுல் உருவ தேடலில் இருந்து கொண்டு வந்து காட்டுகிறது.ஆம் குறிப்பிட்ட சொல்லுக்கான கூகுல் உருவ தேடலில் எந்த உருவம் முதலில் வருகிறதோ அந்த உருவத்தை முன் வைக்கிறது.

இடது பக்கம் உள்ள தேடல் கட்டத்தில் சொற்களை டைப் செய்தால் வலது பக்கத்தில் கூகுல் உருவ தேடல் படம் தோன்றுகிறது.இந்த உருவ மொழியை பேஸ்புக் வழியே நண்பர்களோடு பகிர்ந்து கொள்ளவும் செய்யலாம்.

சொற்களையும் உருவங்களையும் இணைத்து உருவாக்கப்பட்ட அழகான இணைய பரிசோதனை முயற்சி என இந்த தளம் மேலும் குறிப்பிட்டுள்ளது.

ஒவ்வொரு முறையும் ஒரு சொல்லை டைப் செய்யும் போது ஒரு சொல் வரக்கூடும் என்பது தான் இந்த சோதனையில் உள்ள சுவாரஸ்யம்.காரணம் கூகுல் தேடலில் உருவங்களின் வரிசை மாறிக்கொண்டே இருக்கிறது அல்லவா?

நேரமும் ஆர்வமும் இருந்தால் பிடித்தமான ஒவ்வொரு சொல்லாக அல்லது சொற்றொடராக டைப் செய்து என்ன உருவங்கள் வருகிரது என பார்க்கலாம்.கவனம் சில நேரங்களில் அற்புதமான படங்கள் தோன்றலாம்.சில நேரங்களில் அலுப்பூட்டும் படங்களும் ஏன் மோசமான படங்களும் கூட தோன்றலாம்.

இணைய உலகின் பிரலமான தேடியந்திரமான கூகுலை வைத்து கொண்டு உருவாக்கப்பட்ட இன்னொரு அழகான சேவையாகவே இது தோன்றுகிற‌து.இதனை இணையம் சார்ந்த கலை ப‌டைப்பு என்று கூட சொல்லலாம்.

இணையதள முகவரி;http://writewithimages.com/index.php

புகைப்படங்களை விற்பனை செய்வதற்கான இணையதளம்.

‘எல்லோரும் புகைப்பட கலைஞர்களே’,என்பது தான் ஃபோப் இணையதளத்தின் நம்பிக்கையாக இருக்கிறது.இந்த நம்பிக்கை இருப்பதால் தான் புகைப்பட சந்தையாக ஃபோப் அறிமுகமாகியிருக்கிறது.

ஃபோப்பில் யார் வேண்டுமானாலும் அவர்கள் எடுத்த புகைப்படங்களை விற்பனை செய்யலாம்.விற்பனை செய்வது என்றால் புகைப்படங்களை பதிவேற்றுவது,அவ்வளவு தான்.புகைப்பட பகிர்வு தளமான பிளிக்கரில் புகைப்படங்களை பதிவேற்றுவது போல இதிலும் புகைப்படங்களை சமர்பிக்கலாம்.

புகைப்படங்கள் தேவைப்படுபவர்கள் இந்த புகைப்படங்களை தேர்வு செய்து வாங்கி கொள்ளலாம். இதன் மூலம் புகைப்படங்களை சமர்பித்தவர்கள் டாலர்களை பெற்றுக்கொள்ளலாம்.வர்த்தக நிறுவனங்கள் மற்றும் பத்திரிகை நிறுவனங்கள் இந்த புகைப்படங்களை வாங்கி பயன்படுத்தி கொள்ளும் என்று எதிர்பார்க்கப்படுகிறது.

விளம்பரத்தில் பயன்படுத்தவோ அல்லது கட்டுரையில் பயன்படுத்தவோ நல்ல புகைப்படங்கள் தேவைப்பட்டால் நிறுவங்கள் தொழில் முறையிலான புகைப்பட கலைஞர்களையோ அல்லது புகைப்பட ஏஜென்சிகளையோ அணுகுவது வழக்கம்.இணையத்தின் மூலமே கூட புகைப்படம் வாங்கி கொள்ளலாம்.

ஆனால் இவை பெரும்பாலும் புகைப்பட கலைஞர்கள் எடுத்தவை.

இப்போது தான் பெரும்பாலானோர் கைகளில் ஸ்மார்ட் போன் இருக்கின்றன.ஸ்மார்ட் போன்கள் அழகான படம் எடுக்கும் திறன் பெற்றுள்ளன.இவற்றை கொண்டு பலரும் ஆர்வத்தோடு அழகிய புகைப்படங்களை எடுத்து தள்ளிக்கொண்டிருக்கின்றனர்.

இவர்கள் பெரும்பாலும் அமெச்சூர் புகைப்பட கலைஞர்கள் என்று அழைக்கப்பட்டாலும் பலநேரங்களில் இவர்களின் புகைப்படங்கள் அழகானதாக தரமானதாக அமைய வாய்ப்புண்டு.

இப்படி எடுக்கப்படும் புகைப்படங்களுக்கான சந்தையாக விளங்க வேண்டும் என்ற நோக்கத்தோடு ஃபோம் இணையதளம் உருவாக்கப்பட்டுள்ளது.

ஸ்மார்ட்போன்களில் எடுக்கும் படங்களை அந்த போன் வழியாகவே இந்த தளத்தில் பதிவேற்றலாம்.அதற்கான செயலியும் இருக்கிறது.

ஆக புகைப்படங்கள் தேவைப்படுபவர்கள் இந்த சந்தைக்கு வந்து தங்களுக்கு தேவையான படங்கள் இருக்கிறதா என பார்த்து கொள்ளலாம்.புகைப்படங்களை தேவைகேற்ப தேடிக்கொள்ளும் வசதியும் இருக்கிறது.

அதே போல ஸ்மார்ட்போன் வைத்திருப்பவர்கள் தாங்கள் எடுக்கும் புகைப்படங்களை இங்கே சமர்பிக்கலாம்.

அடிப்படையில் நல்ல கருத்தாக்கம் தான்.புகைப்படம் தேவைப்படுபவருக்கு உலக‌ம் முழுவதும் பரந்து விரிந்த புகைப்பட கலைஞர்களின் படையின் சேவை கிடைக்கும் வாய்ப்புள்ளது.அதே நேரத்தில் சாதாரண புகைப்பட கலைஞர்கள் தங்கள் ஆர்வத்தை வருவாயாக மாற்றி கொள்ளலாம்.

இப்போதைய நிலையில் இந்த தளம் ஆரம்ப கட்டத்திலேயே உள்ளது.முகப்பு பக்கத்தில் அருமையான புகைப்படங்கள் பட்டியலிடப்பட்டுள்ளன.ஆனால் இவை பல்நோக்கு தேவையை பூர்த்தி செய்யக்கூடிய புகைப்பட சந்தையாக உருவாகுமா என்பது தெரியவில்லை.

இருப்பினும் பிரப‌ல விளம்பர நிறுவனமோ பத்திரிகையோ சாமான்யர் எடுத்த அழகான புகைப்படத்தை வாங்கி கொள்ள வாய்ப்பிருப்பது நல்ல வாய்ப்பு தான்.

நிற்க காமிரா போன்களின் வளர்ச்சியை கவனித்து வருபவர்களுக்கு இதே போலவே அறிமுகமான ஸ்கூப்ட் இணைய சேவையை நினைவிருக்கலாம்.

காமிரா போன்கள் பிரப்லமாக துவங்கிய காலத்தில் ஸ்கூப்ட் அறிமுகமானது.சாமான்யர்களின் புகைப்பட ஏஜென்சியாக ஸ்கூப்ட் செயல்பட்டது.அதாவது கேமிரா போன்களை வைத்திருப்பவர்கள் எடுக்கும் புகைப்படங்களை பத்திரிகை நிறுவனங்களுக்கு விற்பனை செய்யும் ஏஜென்சியாக இரு செயல்பட்டது.

ஆரம்ப்பத்தில் பரப்ரப்பாக பேசப்பட்ட இந்த தளம் பின்னர் மூடப்பட்டு விட்டது.தொழில் முறை புகைப்பட சேவையான கெட்டி இமெஜஸ் இதனை வாங்கியது தான் மூடப்பட்டதற்கான காரணமா என்று தெரியவில்லை.

ஆனால் ஸ்கூப்ட் தளத்திற்கு நேர்ந்த கதி ஃபோமிறகு நேரக்கூடாது என்பது தான் எனது விருப்பம்.

இணையள முகவரி;http://foap.com/

புகைப்பட இணையதளங்களில் ஒரு புரட்சி.


வீசே.காம் இணையதளத்தை புரட்சிகரமானது என வர்ணிப்பது அந்த சொல்லுக்கான நியாயமாகாது தான் என்ற போதிலும் மற்ற புகைப்பட தளங்களில் இருந்து மாறுப்பட்ட தன்மையை சுட்டிக்காட்டுவதற்காக இந்த வர்ணனையை பயன்படுத்தலாம்.

அது மட்டும் அல்லாமல் வீசே புகைப்பட வெளியீட்டில் ஒரு சமத்துவத்தை கொண்டு வருவதையும் முக்கிய நோக்கமாக கொண்டிருப்பதால் இப்படி வர்ணிப்பதில் தவறில்லை.

புகைப்பட பகிர்வு தளங்களில் முன்னோடியான பிலிக்கர் உட்பட அநேக புகைப்பட தளங்கள் எந்த கட்டுப்பாடும் இல்லாமல் சுலபமாக புகைப்படங்களை பகிர்ந்து கொள்ள உதவுகின்றன.இந்த படங்களை பார்த்து ரசிக்கலாம் அவ்வளவு தான்.

ஆனால் வீசே செய்தி புகைப்படங்களை பகிர்ந்து கொள்ள வழி செய்கிற‌து.அதனால் தான் இது தன்னை செய்தி தளம் என அறிமுகம் செய்து கொள்கிறது.அதிலும் மாறுப்ப்ட்ட செய்தி தளம்.

அப்படி என்ன மாறுப்பட்ட தன்மை என்றால் செய்திகளை புரிய வைக்கும் புகைப்படங்களை தொழில் முறையிலான புகைப்பட கலைஞர்கள் மட்டும் அல்லாமல் சாமான்யர்களும் பகிர்ந்து கொள்ள வழி செய்கிற‌து.

அதனால் தான் காமிரா வைத்திருக்கும் சாமான்யர்களை அவர்களை சுற்றி நடக்கும் விஷயங்கள் குறித்து புகைப்படம் எடுத்து சம‌ர்பிக்குமாறு கேட்டு கொள்கிற‌து.

இந்த புகைப்படங்கள் தொழில்முறை புகைப்பட கலைஞர்கள் படங்களுக்கு நிகராக வெளியிடப்படும்.உலக நிகழ்வுகளையும் நாட்டு நடப்புக்களையும் தேர்ந்த புகைப்பட கலைஞர்கள் மட்டும் தானா படம் எடுத்து வெளியிட வேண்டும்.சாதாரண மனிதர்களும் கூட இப்படி சமூக நிகழ்வுகளை புகைப்படம் வழியே பதிவு செய்யக்கூடிய சமமான வாய்ப்பை வழங்குவது தான் இந்த தளத்தின் பிரதான நோகமாக இருக்கிறது.

பெரிய பத்திரிகை நிறுவனங்கள் மற்றும் தொழில் முறையிலான புகைப்பட கலைஞர்கள் செய்தி வெளியிட்டில் ஆதிக்கம் செலுத்து வருவதை குறைத்து சாமானயர்க்கும் சரிசமமான வாய்ப்பு ஏறப்டுத்தி தருகிறது.

இன்று பெரும்பாலானோர் கைகளில் டிஜிட்டல் காமிராவோ செல்போன் காமிராவோ இருக்கிறது.இவர்களில் நாட்டு நடப்பு மீது ஆர்வம் உள்ளவர்கள் மக்கள் புகைப்பட கலைஞராக மாறி புகைப்படங்களை எடுத்து சம‌ர்பிக்க ஊக்கம் அளிக்கிறது இந்த தளம்.

இந்த படங்கள் முகப்பு பக்கத்தில் வெளியிடப்படுவதோடு பல்வேறு புகைப்பட போட்டி நடத்தப்பட்டு அதில் பரிசு பெறும் வாய்ப்பும் பெற்றிருக்கின்றன.

உறுப்பினர்கள் முதலில் தாங்கள் எடுத்த புகைப்படத்தை தங்களுக்கான பக்கத்தில் வெளியிடலாம்.அதன் பிறகு ஆசிரியர் குழு அவற்றை பரிசிலித்து முகப்பு பகத்தில் இடம் பெற வாய்ப்பு அளிக்கப்படுகிற‌து.

பின்னர் பல்வேறு போட்டிகளிலும் பங்கேற்கலாம்.

செய்தி,பிரபலங்கள்,விளையாட்டு என பல பிரிவுகளில் படம் எடுத்து சம்ர்பிக்கலாம்.உங்கள் சுற்றுப்புரத்தின் பிரச்ச்னைகளையும் படம் எடுத்து சமர்பிக்க‌லாம்.

மற்றவர்கள் எடுத்த புகைப்படங்களை பார்த்து ரசிக்கவும் செய்யலாம்.அவற்ரை பாராட்டியோ விமர்சித்தோ கருத்தும் தெரிவிக்கலாம்.

சில முக்கிய நிகழ்வுகளின் போது சாமான்யர்கள் எடுத்த புகைப்படங்கள் அரிதானதாக அமைந்து அந்த ப்டங்கள் கொண்டாடப்படுவதை அவப்போது பார்க்கிறோம்.

இனி இவை தற்செய்லாக இருக்க வேண்டியதில்லை.நீங்களும் கூட திட்டமிட்டு புகைப்படம் எடுத்து பெயர் வாங்கலாம்.

ஆக காமிராவை குறி பாருங்கள்.கிளிக் செய்யுங்கள்.கிளிக் ஆகுங்கள்.

இணையதள முகவரி;http://www.wesay.com/

ADay1

புகைப்படத்தோடு வாருங்கள்! அழைக்கும் இணையதளம்.


மே 15 ம் தேதியை குறித்து வைத்து கொள்ளுங்கள்;அப்படியே காமிராவையும் எடுத்து வைத்து கொள்ளுங்கள்!

அன்றைய தினம் உங்கள் உலகை ஒரு புகைப்படம் எடுத்து அதனை எங்கள் தளத்தில் சம‌ர்பியுங்கள் என்கிறது ஏடே.ஆர்ஜி.

உலகை ஒரு நாளில் புகைப்படம் எடுத்து அந்த படங்களை பதிவு செய்யும் நோக்கத்தோடு உருவாக்கப்பட்டுள்ள இணையதளம் இது.

தொழில்முறை புகைப்பட கலைஞர்கள் ஆர்வம் மட்டும் உள்ளவர்கள் என புகைப்படங்களை எல்லோரும் எடுக்கின்றனர்.அதிலும் டிஜிட்டல் காமிரா வருகைக்கு பின் புகைப்படம் எடுப்பவ‌ர்களின் எண்ணிக்கையும் அதிகரித்துள்ளது.புகைப்பட வழி பதிவுகளும் அதிகரித்துள்ளது.

புகைப்படங்களை பகிர்ந்து கொள்வதற்காக இணைய சேவைகளும் அதிகரித்துள்ளன.

ஆனால் எடுக்கப்படும் புகைப்படங்களும் ப‌கிரப்படும் புகைப்படங்களும் இணையத்தில் சிதறிக்கிடக்கின்றன.

இந்நிலையில் புகைப்படங்கள் வாயிலாக உலகை புரிந்து கொள்ளும் ஒரு முயற்சியாக ஒரு நாளில் எடுக்கப்படும் அனைத்து புகைப்படங்களையும் திரட்டும் நோக்கத்தோடு ஏடே.ஆர்ஜி இணையதளம் அமைக்கப்பட்டுள்ளது.இதற்காக தான் மே 15 ம் தேதி தேர்வு செய்ப்பட்டுள்ளது.

புகைப்படக்கலையில் ஆர்வம் உள்ளவர்கள் யார் வேண்டுமானாலும் அன்றைய தினம் புகைப்படம் எடுத்து அதனை இந்த தளத்தில் சம‌ர்பிக்க‌லாம்.புகைப்படம் எடுப்பவர் முக்கியமாக கருதும் எந்த விஷயம் பற்றியும் படமெடுத்து சமர்பிக்கலாம். வேலை,வீடு மற்றும் தொடர்புகள் ஆகிய மூன்று பிரிவுகளின் கீழ புகைப்படங்களை சமர்பிக்கலாம்.புகைப்படங்களோடு அவற்றின் குறிப்பு மற்றும் அதன் பின்னே உள்ள கதையையும் குறிப்பிடலாம்.

சமர்பிக்கப்படும் படங்கள் அனைத்தும் அந்தந்த பிரிவில் இந்த தளத்தில் இடம் பெற்றிருக்கும்.குறிப்பிட்ட படங்கள் தேர்வு செய்யப்பட்டு புகைப்பட புத்தகமாக வெளியிடப்பட உள்ளது.

புகைப்படக்கலையின் ஆற்றலை தினசரி வாழ்க்கையை புரிந்து கொள்ளவதற்காக இந்த முயற்சி மேற்கொள்ளப்படுவதாக குறிபிடப்பட்டுள்ளது.புகைப்படங்களை பகிர்ந்து கொள்வதோடு நாளைய தலைமுறைக்காக அவற்றை பதிவு செய்வதும் நோக்கமாக குறிப்பிடப்பட்டுள்ளது.

ஸ்வீடனை சேர்ந்த மனித உணர்வுகளுக்கான அமைப்பு (எக்ஸ்பிரஷன் ஸ் ஆப் ஹுயுமைகைன்ட்) என்னும் தன்னார்வ அமைப்பு இந்த முயற்சியை மேற்கொண்டுள்ளது.பல்வேறு பிரபலங்களும் இந்த அமைப்போடு கை கோர்த்துள்ளனர்.

இந்த தளம் சொல்வது போல ஒரு நாள்;பல லட்சம் பார்வைகள் இந்த திட்டத்தின் மூலம் காட்சி ரீதியாக பதிவாக வாய்ப்புள்ளது.உலகை அதன் அததனை வண்ணங்களோடும் புகைப்பட கொலாஜாக பார்க்கலாம்.

உங்களது புகைப்படமும் இதில் இடம் பெறட்டுமே!

இணையதள முகவரி;http://www.aday.org/

இரண்டு லட்சம் வால்பேப்பர்களோடு அழைக்கும் இணையதளம்.

டெஸ்க்டாப்பின் பின்னணியில் தோன்றும் அழகான வால்பேப்பர்களை நினைத்த நேரத்தில் மாற்றிக்கொள்ளலாம் தான்.இது மிகவும் சுலபமானது.ஆனால் மனதுக்கு பிடித்தமான வடிவமைப்பில் வால்ப்பேப்பர்கள் கிடைப்பது அத்தனை சுலபமல்ல!.

காரணம் எப்போதுமே நமது டெஸ்க்டாப்பில் இருப்பதைவிட நண்பர்களின் டெஸ்க்டாப்பை அலங்கரித்து கொண்டிருக்கும் வால்பேப்பர் அழகாக இருப்பது போல தோன்றும்.அது மட்டும் அல்ல எந்த வால்பேப்ப்ர் என்றாலும் மீண்டும் மீண்டும் பார்த்து கொண்டிருந்தால் அலுப்பாக தான் இருக்கும்.

வால்பேப்பர்களை இன்டெர்நெட்டில் தேடிக்கொள்ளலாம் தான்.வால்பேப்பருக்கு என்றே பல இணையதளங்களும் இல்லாமல் இல்லை.ஆனால் பெரும்பாலான வால்பேப்பர் தளங்கள் ஒரே மாதிரியான தோற்றத்தில் அலுப்பூட்டக்கூடியதாகவே இருக்கின்றன.அவற்றில் தேடுவதே அயற்சியை தரலாம்.

ஆனால் வால்ப்பேப்பர்களுக்கான வால்பூப்பர் இணையதளம் அவ்வாறு இல்லாமல் கொஞ்சம் சுவாரஸ்யமானதாகவே இருக்கிறது.இந்த தளத்தை வால்பேப்பர்களுக்கான தேடியந்திரம் என்றோ அல்லது வால்பேப்பர்களுக்கான வலைவாசல் என்றோ சொல்லலாம்.

விருப்பமான வால்பேப்பரை இந்த தளத்தில் குறிச்சொல் மூலமாக தேடிக்கொள்ளலாம்.எந்த வகையான வால்பேப்பர் தேவையோ அதற்கான குறிச்சொல்லை டைப் செய்து தேடலாம் என்பதோடு வால்பேப்பரின் அளவு மற்றும் அதன் தோற்றத்தின் துல்லியம் (ரெஸல்யூஷன்)ஆகியவற்றை குறிப்பிட்டும் தேடும் வசதி இருப்பது நல்ல விஷயம்.எந்த வண்ணம் தேவை என்றும் தேடிக்கொள்ளலாம்.

டெஸ்க்டாப்பிற்கு மட்டும் அல்லாது செல்போன் மற்றும் ஸ்மார்ட்போனுக்கான வால்பேப்பரையும் தேடலாம் என்பது மேலும் சிறப்பானது.

இவற்றைத்தவிர முகப்பு பக்கத்திலேயே அழகான் வால்பேப்பர்கள் பட்டியலிடப்பட்டுள்ளன.அவற்றை பார்த்தும் தேர்வு செய்து கொள்ளலாம்.தவிர புதியவை ,மிகவும் பிரபலமானவை என்ற தலைப்பிலும் வால்பேப்பர்களை காணலாம்.

மொத்தம இரண்டு லட்சத்திற்கு மேலான அழகிய வால்ப்பேப்பர்களோடு அழைக்கிறது இந்த இணையதளம்.இனி நீங்களும் உங்கள் வால்பேப்பரை பார்த்து நண்பர்களை வியக்க வைத்து எங்கே கிடைத்தது என கேட்க வைக்கலாம்.

வால்பேப்பர் அழகாக இருக்க வேண்டும் எனபது ஒரு விஷயம் ஆனால் அந்த அழகு கவனத்தை திசை திருப்பாததாகமிருக்க வேண்டும் என்பது அதைவிட முக்கியம்.அலங்காரத்துக்கு மட்டுமே முக்கியத்துவம் கொடுத்து வண்ணமயமான வால்பேப்பரை தேர்வு செய்தால் அதுவே உருத்தலாகவும் அமைந்து விடுவதாக சிலர் கருதலாம்.

தவிர எளிமையே அழகு என்ற கருத்துப்படி பார்த்தால் வால்பேப்பர் ரொம்பவும் வண்ணமயமாக இல்லாமல் நேர்த்தியானதாக இருந்தால் போதும் என்ற கருதுபவர்களும் இருக்கலாம்.அலங்கார தோற்றத்தைவிட மாடர்ன் ஆர்ட் போல இருந்தால் நன்றாக இருக்க வேண்டும் என்றும் கருதுபவர்களுக்கு உற்சாகத்தை தரக்கூடிய வகையில் சிம்பிலான வால்பேப்பர்களை தருகிறது சிம்பில் டெஸ்க்டாப்ஸ் இணையதளம்.

கவனத்தை சிதறடிக்காத,அதே நேரத்தில் அலுப்பூட்டும் தோற்றமாகவும் இராத அழகான வால்பேபர்களின் தொகுப்பாக இந்த தளம் விளங்குகிறது.

இதில் உள்ள வால்பேப்பர்களை பார்க்கும் போதே அவற்றின் எளிமையும் கலை நேர்த்தியும் வியப்பில் ஆழ்த்திவிடும்.வேறும் புகைப்பட தோற்றங்களை விட படைபாட்ற்றல் மிக்க எளிய தோற்றங்கள் எத்தனை அற்புதமான்வை என்பதை இவை உணர்த்துகின்றன.

கைப்பட எழுத்தும் வாழ்த்துக்கு தனி மதிப்பு இருப்பது போல இங்கு உள்ள வால்பேப்பர்கள் எல்லாமே வாட்சன் என்பவரால் கைப்பட தேர்வு செய்யப்பட்டவை.

அதாவது ஓவியர்கள் போல அழகான டெஸ்க்டாப் வால்பேப்பர்களை உருவாக்கும் கலைஞர்கள் எல்லாம் இருக்கின்றனர்.அத்தகை கலைஞர்கள் உருவாக்கிய வால்பேப்பர் படைப்புகளை டாம் வாட்சன் என்பவர் இங்கே தொகுத்துள்ளார்.எல்லாமே இலவசம் தான்.ஆனால் வணிக நோக்கத்திற்கான பயன்பாட்டிற்கானவை அல்ல.

இணையதல முகவரி;http://wallpoper.com/

http://simpledesktops.com/