Tag Archives: web

இணையதளங்கள் தேட புதிய வழி.

சைட் நெக்ஸ்ட் டோர்,சிமிலர் சைட்ஸ்,வெப்சைட்லைக் போன்ற தளங்கள் ஒரே மாதிரியான தளங்களை தேடித்தரும் சேவையை வழங்கி வருகின்றன.குறிப்பிட்ட இணையதளம் போலவே உள்ள பிற தளங்களை இவை தேடித்தருகின்றன.

இதே சேவையை ஸ்கிர்டில் இன்னும் சுவாரஸ்யமாக வழங்குகிறது.அதனால் தான் தன்னை இணையதளங்களுக்கான பான்டோரா என வர்ணித்து கொள்கிறது.

அதாவது இணையவாசிகள் தேடாமலேயே அவர்களுக்கு தேவைப்படகூடிய இணையதளங்கள் பட்டியலை இது பரிந்துரைக்கிறது.

இணைய வானொலியான பான்டோரா ஒருவர் கேட்டுக்கொண்டிருக்கும் பாடலின் அடிப்படையில் அவருக்கு பிடித்தமான பாடல்களை பரிந்துரைக்கும் சேவையாகும்.

ஸ்கிர்டில் இதே பாணியில் ஒருவர் பார்த்து கொண்டிருக்கும் இணையதளத்தை அடிப்படையாக வைத்து கொண்டு அதே போன்ற இணையதளங்களை பரிந்துரைக்கிறது.

பான்டோரா இசைப்பிரியர்களை வியப்பில் ஆழ்த்தக்கூடியது போல ஸ்கிர்டில் இணையவாசிகளை பிரமிப்பில் ஆழ்த்தக்கூடியது.

நீங்கள் குறிப்பிட்ட இணையதளத்தை பார்வையிட்டு கொண்டிருக்கும் போது அதே போலவே உள்ள வேறு சில தளங்களும் பிரவுசரில் எட்டிப்பார்த்தால் எப்படி இருக்கும்.இதை தான் ஸ்கிர்டில் புக்மார்கிங் வடிவில் சாத்தியமாக்குகிறது.

இதற்காக ஸ்கிர்டில் புக்மார்கை டவுண்லோடு செய்து கொள்ள வேண்டும்.அதன் பிறகு இணையத்தில் உலாவிக்கொண்டிருக்கும் போது அப்போது பார்த்து கொண்டிருக்கும் இணையதளம் போலவே உள்ள வேறு தளங்களை தேட விரும்பினால் புக்மார்க்கை கிளிக் செய்தால் தொடர்புடைய பிற தளங்களை காட்டுகிறது.

இணையதளங்கள் அழகிய வட்டங்கள் போல பல வண்ணங்களில் வந்து விழுகின்றன.இந்த தளங்களோடு விளம்பர நோக்கில் பரிந்துரைக்கப்படும் இணையதளங்களும் இடம் பெறுகின்றன.(வருவாய்க்காக) அவற்றில் இருந்து பொருத்தமானதை தேர்வு செய்து கொள்ளலாம்.

தளங்களில் கிளிக் செய்தால் நேராக அவற்றின் முகப்பு பக்கத்துக்கே சென்று விடலாம்.இணையதள பரிந்துரை திருப்தி அளிக்காவிட்டால் உங்கள் அதிருப்தியை தெரிவிக்கும் வசதியும் இருக்கிறது.சரியான பரிந்துரை என்றால் அதற்கு பாராட்டாகவும் செய்கை செய்யலாம்.

பரிந்துரை சரியில்லை என்று நீங்கள் சுட்டிக்காட்டிய தளங்கள் பின்னர் மீண்டும் உங்கள் பார்வைக்கு வந்து நிற்காது என்பதோடு இப்படி இணையவாசிகள் சொல்லும் கருத்துக்களுக்கு ஏற்ப எதிர்கால பரிந்துரைகள் பட்டை தீட்டப்படும்.

ஸ்கிர்டில் புக்மார்கை டவிண்லோடு செய்து கொண்டால் எப்போது தொட‌ர்புடைய தளங்களை பார்வையிட வேண்டிய தேவை ஏற்படுகிறதோ அப்போது ஒரு கிளிக் செய்தால் அந்த தேவையை நிறைவேற்றி கொள்ளலாம்.

இணையதள முகவரி;http://skrittle.com/

மாற்று இணையதளங்களை தேட!.

ஒரே போன்ற தன்மை கொண்ட இணையதளங்களை தேட உதவும் இணையதளங்களில் வெப்சைட்ச்லைக்.ஆர்ஜி இணையதளத்தியும் சேர்த்து கொள்ளலாம்.

எந்த இணையதளத்தை சமர்பித்தாலும் அதே போன்ற இணையதளங்களை முன்வைக்கும் இந்த தளம் இதே போன்ற சேவையை வழங்கும் வேறு எந்த தளத்தையும் விட இதனை சிறப்பாக நிறைவேற்றித்தருவதாக பெருமை பட்டு கொள்கிற‌து.அது மட்டும் அல்லாமம் ஒரு நாளில் பல முறை இதில் பட்டியலிடப்படும் இணையதளங்கள் புதுப்பிக்கப்படுவதால் ஒரே மாதிரியான தளங்கள் தொடர்பான சமீபத்திய தகவல்களை தன்னகத்தே கொண்டிருப்பதாகவும் தெரிவிக்கிறது.

தேடலில் கூகுல் எப்படி தனி உத்தியை பின்பற்றுகிறதோ அதே போல எங்களுக்கும் ஒரே மாதிரியான தளங்களை பட்டியலிட தனி உத்தி இருப்பதாகவும் இந்த தளம் சொல்கிறது.இணையதள‌ங்களின் அலெக்சா ரேங்க் உள்ளிட்ட அம்சங்களை கருத்தில் கொண்டு செயல்படுவதாகவும் சொல்கிறது.

ஒவ்வொரு தேடலுக்கும் குறைந்த பட்சம் 50 இணையதளங்களை கொண்டு வந்து கொட்டுவதாக‌வும் தெரிவிக்கிறது.

மற்றவர்கள் சமீபத்தில் தேடிய த‌ளங்களின் பட்டியலும் கொடுக்கப்பட்டுள்ளது.

ஆக குறிப்பிட்ட இணையதளம் போலவே உள்ள இணையதளங்கள் அல்லது அதற்கான மாற்று தளங்களை தேட விரும்பினால் இதனை பயன்படுத்தலாம்.

இதே போன்ற மற்ற இணையதளங்களை விட சிறப்பாக இருக்கிறதா என்று பயன்படுத்தி பார்த்து சொலுங்கள்.மற்ற தளங்கள் பற்றி ஏற்கனவே எழுதியிருக்கிறேன்.

இணையதள முகவரி;http://www.websiteslike.org/

ஒரு கிளிக் இணைய சேவை.

இணையத்தில் அடுத்து ,அடுத்து என கிளிக் செய்து கொண்டிருப்பதற்கு வாழ்க்கையில் நேரமே இல்லை என்று சொல்கிறது பேஜ் ஜிப்பர் இணையதளம்.

இணையத்திற்கான குறுக்கு வழி வேவைகளில் இதுவும் ஒன்று.உண்மையில் குறுக்கு வழி சேவை இல்லை,சில குறுக்கு வழிகளை நேராக்கும் சேவை என்றும் சொல்லலாம்.

இந்த இணையதளம் என்ன செய்கிறது என்பதை தெரிந்து கொண்டால் ,இது மிகவும் தேவையான சேவை என்று அமோதிப்பீர்கள்.

அப்படி என்ன செய்கிறது என்று கேட்டால் ஓயாமல் கிளிக் செய்து படிக்க வேண்டிய இணைய பக்கங்களை ஒரே கிளிக்கில்,அதாவது ஒரே பக்கத்தில் சுலபமாக படிக்க வழி செய்கிறது பேஜ் ஜிப்பர்.

பெரும்பாலான இணையதளங்களில் ஒரே கட்டுரை பல பகுதிகளாக பிரிக்கப்பட்டு தொடர் பக்கங்களாக கொடுக்கப்பட்டிருப்பதை நீங்கள் பார்த்திருக்கலாம்.பார்த்து வெறுத்திருக்கலாம்.

முதல் பகுதியை படித்து முடித்த உடன் அதன் கீழே உள்ள அடுத்து பகுதியை கிளிக் செய்தால் தான் அடுத்த பகுதியை படிக்க முடியும்.நீளமான கட்டுரை என்றால் அடுத்து அடுத்து என கிளிக் செய்து கொண்டே இருக்க வேண்டும்.

நீளமான,ஆழமான செறிவான கட்டுரை என்றால் அதனை ஒரே பக்கத்தில் தராமல் சில பகுதிகளாக பிரித்து அளிக்கப்பட்டிருப்பது புரிந்து கொள்ளகூடியது தான்.இத்தகைய கட்டுரைகளில் கூட அதனை ஒரே பக்கத்தில் படிப்பதற்கான வசதி கொடுக்கப்பட்டிருக்கும்.

ஆனால் பல கட்டுரைகள் தேவையில்லாமல் பல பகுதிகளாக பிரித்து தரப்பட்டிருக்கும்.இவை கிளிக் விகிதத்தை அதிகரிப்பதற்கான மலிவான உத்தியே தவிர வேறில்லை.கட்டுரைகள் மட்டும் அல்லாமல் டாப் டென் அல்லது டாப் 50 போன்ற பரிந்துரை கட்டுரைகளும் இதே போல பல பகுதிகளாக பிரிக்கப்பட்டிருக்கும்.

ஒவ்வொரு பகுதியாக கிளிக் செய்து ஒவ்வொரு பரிந்துரையாக படிக்க வேண்டும்.ஒவ்வொருவரும் பல இணையதளங்களை பறவை பார்வையாக பார்த்து வரும் போது இப்படி ஒரே கட்டுரையில் நேரத்தை செலவிடுவது வெறுப்பை ஏற்படுத்தும்.

இது போன்ற நேரங்களில் இணையவாசிகள் கொஞ்சம் ஆவேசமாகி இந்த கட்டுரையே வேண்டாம் என வெளியேறிவிடுவதும் உண்டு.

பேஜ் ஜிப்பரை பயன்படுத்த துவங்கிவிட்டால் இப்படி கோபத்தில் வெளியேற வேண்டாம்.காரணம் இந்த சேவை பல பக்கங்களாக பிரிந்து கிடக்கும் கட்டுரைகளை ஒரே பக்கத்தில் படிக்க உதவுகிறது.உங்கள் பிரவுசருக்கான டூல்பாராக கிடைக்கும் இதனை டவுண்லோடு செய்து கொண்டுவிட்டால் போதும்,அதன் பிறகு எப்போதெல்லாம் தொல்லை தரும் பல பகுதி கட்டுரைகளை பார்க்கிறீர்களோ,அப்பொதெல்லாம் இந்த டூல் பாரை கிளிக் செய்தால் போதும் அது தானாக அடுத்து பகுதியில் அந்த பக்கம் விரிந்து கொண்டே போக வழி செய்து தொட்ர்சியாக படிக்க வைக்கும்.

மாமுலான இணைய பக்கங்கள் மட்டும் அல்லாது புகைப்பட கேலரி தளங்களையும் இந்த சேவை மூலம் பார்வையிடலாம்.அடுத்த புகைப்படத்தை கிளிக் செய்யாமலேயே வரிசையாக புகைப்படங்களை பார்த்து ரசிக்கலாம்.

அதே போல இணைய விவாத குழுக்களிலும் இந்த சேவையை பயன்படுத்தி அனைத்து கருத்துக்களையும் ஒரே பக்கத்தில் பார்வையிடலாம்.

விலம்பரங்கள் இல்லாமல் விரும்பிய வண்ணம் இணைய பக்கங்களை அச்சிட்டு கொள்ள உதவும் பிரின்ட் வாட் யூ லைக் தளத்தின் உப சேவை இந்த பயனுள்ள இணையதளம்.பயன்படுத்தி பாருங்கள்.

பிரின்ட் வாட் யூ லைக் சேவை எந்த இணைய பக்கத்திலும் அதில் உள்ள விளம்பரங்கள் மற்றும் தேவையில்லாத விவரங்களை தவிர்த்துவிட்டு தேவையான் பகுதிய மட்டும் அச்சிட்டு கொள்ள வழி செய்கிறது.இணைய பக்கங்களை அச்சிட்டு பயன்படுத்துபவர்களுக்கு மிகவும் பயனுள்ளதாக இருக்கும் இது.

இணையதள முகவரி;http://www.printwhatyoulike.com/pagezipper

audiolip

பாட்காஸ்டிங் செய்ய புதிய வழி.

பாட்காஸ்டிங் பரபரப்பாக பேசப்பட்ட அளவுக்கு பிரபலமாகவில்லை.பெரிய அளவில் வெற்றியும் பெறவில்லை.பாட்காஸ்டிங்க்கை பலரும் மறந்து விட்ட நிலையில் அதனை நினைவு படுத்தும் வகையில் ஆடியோ சார்ந்த புதிய சேவை அறிமுகமாகியுள்ளது.

ஆடியோலிப் என்னும் இந்த சேவை உலகின் முதல் மைக்ரோ பாட்காஸ்டிங் சேவை என்று வர்ணித்து கொள்கிறது.புதிய பாட்காஸ்ட்களை பகிர்ந்து கொள்வதற்கான சுலபமான வழியாக இது அமைந்துள்ளது.

பாட்காஸ்டிங் என்பது ஒலி வடிவிலான கோப்புகளை செய்தியோடை வழியே பகிர்ந்து கொள்வதற்கான வசதி என்பதை நீங்கள் அறிந்து கொள்ளலாம்.செய்தியோடை(ஆர் எஸ் எஸ்) வழியே புதிய பதிவுகளை பெறுவது போல பாட்காஸ்டிங்கில் ஒலி கோப்புகளை இமெயில் போல பெற்று கேட்டு ரசிக்கலாம்.

பாட்காஸ்டிங் நிகழ்ச்சிகளுக்கு சந்தாதாரராகி ஐபாட் போன்ற இசை கேட்பு சாதனங்களில் அதனை கேட்டு ரசிக்கலாம்.

பாட்காஸ்டிங் தனி உலகமாக இயங்குகிறது.

பாட்காஸ்டிங் வழியே உரை நிகழ்த்தலாம்,வானொலி போல நிகழ்ச்சி நடத்தலாம்!

இப்போது இத்தகைய பாட்காஸ்டிங்கை டிவிட்டர் பதிவுகள் போல பகிர்ந்து கொள்ளும் வசதியை அளிக்கும் வகையில் ஆடியோலிப் சேவை உருவாக்கப்பட்டுள்ளது.

நீங்கள் உருவாக்கிய பாட்காஸ்டிங்க்கை அதாவது ஆடியோலிப் வழியே வெளியிடலாம்.அவை இந்த தளத்தின் மூலம் வெளியிடப்படும்.இந்த பதிவுகளை இங்கேயே கேட்டு ரசிக்கும் வசதியும் உண்டு.இந்த தளத்தில் இருந்து உங்களது பேஸ்புக் மற்றும் டிவிட்டர் வட்டத்திலும் இதனை பகிர்ந்து கொள்ளலாம்.

பாட்காஸ்டிங்கை உருவாக்குவது என்றால் ஏதோ சிக்கலான விஷய‌மாக இருக்கும் என்று நினைத்து விட வேண்டாம்!நீங்கள் சொல்ல நினைக்கும் எந்த கருத்தையும் மைக் மூலம் பதிவு செய்து அந்த ஒலி கோப்பை இங்கே சம‌ர்பித்தால் அது தான் உங்களின் பாட்காஸ்டிங்.

பாட்காஸ்டிங் செய்வது என்றால் ஒரு மைய கருத்தை தேர்வு செய்து அதனடிப்படையில் நிகழ்ச்சியை தயார் செய்ய வேண்டும்.இது எளிதானதே என்றாலும் கொஞ்சம் மெனக்கெட வேண்டும்.

ஆனால் ஆடியோலிப்பில் என்ன சிறப்பம்சம் என்றால் எந்த விதமான முன் தயாரிப்பு அல்லது திட்டமிடலும் தேவை இல்லாமால் சொல்ல விரும்பும் கருத்தை நண்பர்களிடம் பேசுவது போல அப்படியே பேசி பதிவு செய்தால் போதுமானது.அதாவது டிவிட்டரில் டைப் செய்வது போல இதில் பேச்சு மூலம் பகிர்ந்து கொள்ளலாம்.

புதிய படம் பற்றிய விமர்சனம்,நாட்டு நடப்பு மீதான் கருத்து,கேட்டு ரசித்த பாடல் பற்றிய பாராட்டு,திடிரென மின்னல் கீற்றாக தோன்றிய சிந்தனை என எதை வேண்டுமானாலும் பாட்காஸ்டிங் வடிவில் இங்கே பகிர்ந்து கொள்ளலாம்.

அந்த வகையில் கருத்து பகிர்வுக்கான புதிய களமாக இந்த சேவை அமைந்துள்ளது எனலாம்.

இதில் மேலும் சிறப்பம்சம் என்னவென்றால் பகிரப்பட்ட குரல் பதிவுகளை கேட்பதோடு அவற்றுக்கு குரல் வழியிலேயே கருத்தும் தெரிவிக்கலாம் என்பது தான்.இது விவாதம் போன்ற அழகான உரையாடலாகவும் உருவாகும் வாய்ப்புள்ளது.

புதிய பாட்காஸ்டிங்,பிரபலமான பாட்காஸ்டிங் என வகைப்படுத்தப்பட்டிருப்பதோடு மையப்பகுதியில் பாட்காஸ்டிங் பகிர்வுகள் வரிசையாக இடம் பெறுகின்றன.

ஆடியோ பிரியர்களை மகிழ்ச்சியில் ஆழத்தக்கூடிய சேவை தான்!.

இணையதள முகவரி;http://audiolip.com/

மறைந்திருந்து பார்க்கும் இணையதளங்கள்

இணையத்தில் எப்போதுமே எச்சரிக்கையாக இருப்பது நல்லது.காரணம் வைரஸ் வில்லங்கங்கள் எப்போது வரும் எப்படி வரும் என்று சொல்லவே முடியாது.அதோடு மால்வேர் ,ஸ்பைவேர் போன்ற வில்லங்கங்களும் இருக்கின்றன.இவை போதாதென்று பிஷிங் மோசடி இமெயில் மோசடி உள்ளிட்ட அபாயங்களும் அப்பாவி இணையவாசிகளி குறி வைத்து காத்திருக்கின்றன.

எனவே தான் ‘ஐ லவ் லாங் யூ ஆர் எல்’ இணையதளம் எந்த சுருக்கமான முகவரியையும் நேரடியாக திறந்து உள்ளே சென்று விடாதீர்கள் என்று ஆலோசனை சொல்கிறது.அதற்கு மாறாக முதலில் சுருக்கமான முகவ்ரிகளுக்கு பின்னே உள்ள பெரிய முகவரி என்ன என்பதை தெரிந்து கொண்டு உள்ளே செல்லுங்கள் என்று சொல்கிறது.பெரிய முகவரி என்றால் இணையதளங்களின் மூல முகவரி!

டிவிட்டர் யுகத்தில் நீள்மான இணைய முகவரியை அப்படியே பகிர்ந்து கொள்ளும் தேவை இல்லாமல் அவற்றின் சுருக்கங்களை மட்டுமே பகிர்ந்து கொள்ள உதவும் இணைய முகவரி சுருக்க சேவைகள் அறிமுகமாகி பிரபலமாகி பரவலாயின.

140 எழுத்துக்களுக்கு கருத்துக்களை பகிர்ந்து கொள்ள முயலும் போது இணைய முகவரி சுருக்கமாக இருப்பதும் பேருதவியாக தான் இருக்கின்றன.ஆனால் இந்த சுருக்கமான முகவரிக்கு பின்னே எதிர்பாராத வில்லங்கங்களும் இருக்கலாம்.

காரணம் பிஷிங் என்னும் இணைய கடத்தலில் ஈடுபடும் மோசடி பேர்வழிகள் சுருக்கமான முகவரிக்கு பின்னே மறைந்திருக்கலாம்.நீங்களும் தெரியாமல் அதை கிளிக் செய்தால் வலை விரித்து காத்திருக்கும் இணையயதளத்திற்கு சென்று மாட்டிக்கொள்ள நேரலாம்.
இப்படியாக மால்வேர் ,ஸ்பைவேர் போன்ற வில்லங்கள் உளவு சாப்ட்வேர்களின் தாக்குதலுக்கு இலக்காகலாம்.பொதுவாக‌ வைரஸ் தடுப்பு சேவைகள் சுருக்கப்பட்ட முகவரிகளை கண்காணிப்பதில்லை என்பதால் ஸ்பைவேர்கள் சுலபமாக உள்ளே நுழைந்து விடுகின்றன.

இன்னும் பல மோசடி முயற்சிகள் சுருக்கப்பட்ட முகவரிகள் பின்னே மறைந்திருக்கலாம்.

ஆகையால் தான் எந்த சுருக்கப்பட்ட முகவரிகளை பார்த்தாலும் முதலில் அதன் பின்னே உள்ள மூல முகவரியை பார்த்து அது சரியான இணையதளம் தானா என்பதை உறுதி செய்து கொள்ளுங்கள் என்று எச்சரிக்கிறது ஐ லவ் லாங் யூ ஆர் எல் இணைய சேவை.

இந்த தளத்திற்கு ஏன் இந்த அக்கறை வேறு எந்த தளத்திற்கும் இல்லாத அக்கறை என்று பராசக்தி பாணியில் கேட்டால் ,இப்படி சுருக்கமான முகவரிகளின் பின்னே உள்ள முழுமையான முகவரி என்ன என்பதை அடையாளம் காட்டும் சேவையை இந்த தளம் வழங்குகிறது என்பதே விஷயம்.

சுருக்கமான முகவரிகளின் பின்னே உள்ள இணையதளம் எது என்பதை அடையாளம் காட்டுவது தான் இந்த தளத்தின் நோக்கமே.இமெயிலிலோ டிவிட்டர் இனைப்பிலோ சுருக்கமான இணைய முகவரியை பார்த்தால் அதனை இந்த தளத்தில் சம்ர்பித்தால் அதன் பின்னே உள்ள தளம் எது என்பதை இது சொல்லி விடுகிறது.

இப்படி அவசரப்படாமல் மூல முகவரியை அறிந்து கொண்டு அவற்ரை பயன்ப‌டுத்த துவங்கினால் முகவரி சுருக்கம் என்னும் முகமுடியின் கீழ் மறைந்திருக்கும் மோசடி தளங்களின் வலையில் சிக்காமல் இருக்கலாம்.

அவசியமான சேவை தான்.இந்த அவசிய‌த்தை இந்த தளம் புகைப்பட சித்திரங்களாக அழகாக விளக்கியிருக்கும் விதமும் அருமை.

லாங் யூ ஆர் எல் தளமும் இதே போன்ற சேவையை வ‌ழங்குகிறது.சுருக்கமான இணையதள முகவரிகளை பயன்படுத்துவதற்கு முன் நீங்கள் எந்த தளத்திற்கு அழைத்து செல்லப்பட இருக்கிறிர்கள் என்னும் முன்னோட்டத்தை இந்த தளம் காட்டுகிறது.

இணையதள முகவரி;http://www.ilovelongurl.com/

http://www.longurl.org/