Tag Archives: web

இயற்கை வளம் காக்கும் இணைய முயற்சி!

afeature_phone_o4xapaஇயற்கை வளம் மற்றும் சுற்றுச்சூழல் நலன் காப்பது தொடர்பான விழிப்புணர்வை ஏற்படுத்தும் நோக்கத்துடன் பல இணயதளங்களும், செயலிகளும் உருவாக்கப்பட்டுள்ளன. இயற்கை ஆர்வலர்களை மேலும் உற்சாகம் கொள்ள வைக்கும் வகையில் மேலும் இரண்டு இணையதளங்கள் இந்த வரிசையில் சேர்ந்துள்ளன. முதல் இணையதளமான ‘நோ யுவர் பிஷ்’ தளம் இந்தியாவில் மீன் வளத்தை பாதுகாக்கும் வகையில் உருவாக்கப்பட்டுள்ளது என்றால், இரண்டாவது தளமான ’பிராக் ஐடி’ ஆஸ்திரேலியாவில் தவளைகள் நலன் காக்க உருவக்கப்பட்டுள்ளது. இரண்டுமே, இயற்கை நலன் காக்க இணையத்தை எப்படி எல்லாம் பயன்படுத்தலாம் என்பதற்கான அழகான உதாரணமாக விளங்குபவை.

முதலில் ’நோ யுவர் பிஷ்’ இணையதளம் பற்றி பார்க்கலாம். இந்த தளம் கடல் உணவை பொறுப்பான முறையில் சுவைக்க வேண்டும் என வழிகாட்டுவதற்காக உருவாக்கப்பட்டுள்ளது. இதற்காக என்றே மீன் நாட்காட்டியையும் உருவாக்கியுள்ளனர். இந்த நாட்காட்டியை பார்த்து, எந்த காலத்தில் எந்த வகை மீனை சாப்பிடலாம், எந்த வகை மீனை தவிர்க்கலாம் என தெரிந்து கொள்ளலாம். மீன் வளம் குறையாமல் பாதுகாக்க இத்தகைய கட்டுப்பாடு அவசியம் எனும் அடிப்படையில் இந்த தளம் அமைக்கப்பட்டுள்ளது.

இருபக்கமும் நீண்ட கடற்கரையை கொண்டுள்ள நம் நாடு அள்ள அள்ள குறையாக மீன் வளத்தையும் கொண்டிருக்கிறது தான். ஆனால் அதற்காக எந்தவித வரைமுறையும் இல்லாமல் மீன் வளத்தை சூறையாடிக்கொண்டிருந்தால் காலப்போக்கில் மீன் வளம் குறைந்துவிடும் அபாயம் இருக்கவே செய்கிறது. அதிலும் சில குறிப்பிட்ட மீன் இனங்களே அழிந்தே போய்விடலாம் என எச்சரிக்கப்படுகிறது. இந்த நிலையை தவிர்ப்பதற்காக தான், மீன்கள் இனப்பெருக்க காலத்தில் மீன்பிடித்தலுக்கு தடை விதிக்கப்படும் வழக்கம் அமலில் இருக்கிறது.

இந்த கட்டுப்பாடு மட்டும் போதாது, சுய கட்டுப்பாடும் அவசியம் என வலியுறுத்தும் வகையில் மயுரேஷ் கங்கல் உள்ளிட்ட மீன் வள ஆர்வலர்கள் மேலே சொன்ன இணையதளத்தை அமைத்துள்ளனர். கடல் வளத்திற்கு பாதிப்பு ஏற்படுத்தாத வகையில் மீன் உணவை சுவைக்க வழி செய்வதற்கான தன்னார்வ முயற்சி இந்த தளம் என இவர்கள் குறிப்பிடுகின்றனர். மீன் வளம் தொடர்பான தகவல்களை எளிதாக புரிந்து கொள்ளும் வகையில் முன்வைத்தால் மக்கள் தாங்களாகவே முன்வந்து சரியான முடிவை எடுப்பார்கள் என்பதும் இவர்களின் நம்பிக்கையாக இருக்கிறது.

அதாவது, மீன்கள் இனப்பெருக்கம் செய்யும் காலத்தை அறிந்து கொண்டு, அந்த காலத்தில் குறிப்பிட்ட மீன்களை சாப்பிடாமல் பொதுமக்களே தவிர்க்க வேண்டும் என இவர்கள் விரும்புகின்றனர். இதற்கான தகவல்களை எளிதாக புரிந்து கொள்ளும் வகையில் மீன்வள நாட்காடியாகவும் உருவாக்கி தந்துள்ளனர். இந்த நாட்காட்டியில் எந்த எந்த மாதங்களில் எந்த வகை மீன்கள் இனப்பெருக்கம் செய்யும் காலம் என்பது குறிப்பிடப்பட்டிருக்கும். அதே போல் எந்த வகை மீன்களை எந்த மாதங்களில் சாப்பிடலாம் என்றும் உணர்த்தப்பட்டுள்ளது.

பல ஆண்டு ஆய்வுகளின் அடிப்படையில் திரட்டப்பட்ட தகவல்களை இப்படி எளிதான முறையில் தொகுத்தளித்திருக்கின்றனர். இந்த நாட்காட்டியை பார்த்து மீன் உணவு பிரியர்களே, மீன்களின் இனப்பெருக்கம் பாதிக்காத வகையில் தங்கள் தேர்வுகளை அமைத்துக்கொண்டால் மீன் வளத்தை காக்கும் செயலாக அது அமையும் அல்லவா? அந்த எண்ணத்தில் தான் இந்த தளத்தை அமைத்துள்ளனர். மீன் உணவுப்பிரியர்கள் மட்டும் அல்லாமல் கடலோரப்பகுதியில் உள்ள உணவு விடுதிகளிலும் இந்த நாட்காட்டி பற்றிய விழிப்புணர்வை ஏற்படுத்தி வருகின்றனர். குஜராத் முதல் கேரளா வரையான கடற்கரைப்பகுதியில் பயன்படுத்தும் வகையில் இந்த நாட்காட்டி அமைந்துள்ளது. மற்ற பகுதிகளுக்கும் விரிவாக்கம் செய்தால் நன்றாக இருக்கும் அல்லவா! http://knowyourfish.org.in/our-calendar/

இதே போல ஆஸ்திரேலியாவில் தவளைகள் நலன் காப்பதற்கான விழிப்புணர்வு முயற்சியில் ஈடுபட்டுள்ளனர். இதற்காக நாடு தழுவிய அளவில் தவளை கணக்கெடுப்பில் ஈடுபட்டு வருகின்றனர். ஆஸ்திரேலியா பரந்து விரிந்த பெரிய நாடு என்பதால் ஆய்வாளர்கள் மட்டுமே இதை செய்து முடிப்பது சாத்தியம் இல்லை. அதனால் இதில் பொதுமக்கள் பங்களைப்பை கோரியுள்ளனர். தவளையை கண்டால் தகவல் தெரிவிப்பதற்காக என்று ஒரு பிரத்யேக செயலியையும் உருவாக்கி தந்துள்ளனர்.

இந்த திட்டத்தில் குடிமக்கள் விஞ்ஞானியாக பங்கேற்க ஆர்வம் கொண்டவர்கள் தவளையை கண்டுணரும் திட்டத்தின் செயலியை தங்கள் போனில் டவுண்லோடு செய்து கொள்ள வேண்டும். அதன் பிறகு தவளைகளை தேடி புறப்பட வேண்டும். தங்கள் பகுதியில் தவளையை காணும் போது அதன் ஒலியை மட்டும் பதிவு செய்து இந்த செயலி மூலம் சமர்பித்தால் போதுமானது. விஞ்ஞானிகள் மற்றும் ஆய்வாளர்கள் குழு, இந்த ஒலிப்பதிவுகளை கேட்டு அது எந்த வகை தவளைக்கு உரியது என கண்டறியும். இதன் மூலம் குறிப்பிட்ட இடத்தில் வாழும் தவளைகளின் எண்ணிக்கையையும் கண்டறிய முடியும்.

ஆஸ்திரேலியாவில் மொத்தம் 240 வகைக்கு மேல் வகைப்பட்ட தவளைகள் வாழ்கின்றன. இவற்றில் பல அழியும் நிலையை நோக்கி தள்ளப்பட்டு வரும் நிலையில், நாடு முழுவதும் தவளை கணக்கெடுப்பு நடத்துவதன் மூலம், எந்த வகையான தவளைகள் ஆபத்தில் இருக்கின்றன என்பதை எளிதாக அறிந்து நடவடிக்கை எடுக்க முடியும் என ஆய்வாளர்கள் நம்புகின்றனர்.

தவளைகள் சுற்றுசூழல் நோக்கில் முக்கியமான விலங்காக அமைகின்றன. ஏனெனில் சுற்றுச்சூழலில் ஏற்படும் மாற்றங்களினால் முதலில் பாதிக்கப்படும் விலங்குகளில் ஒன்றாக தவளைகள் இருக்கின்றன. எனவே தவளைகள் நலனை கண்காணிப்பதன் மூலம் சுற்றுசூழல் மற்றும் பருவநிலை மாற்றத்தின் பாதிப்பை முன்கூட்டியே உணர்ந்து கொள்ளலாம் என்றும் ஆய்வாளர்கள் கருதுகின்றனர்.

அந்த வகையில் தவளைகளை காப்பதற்கான முயற்சியில் ஈடுபட்டுள்ளனர். பொதுமக்களுக்கு ஆர்வம் அளிக்கும் வகையில் தவளைகளின் முக்கியத்துவம் மற்றும் அவற்றின் வாழும் முறை உள்ளிட்ட தகவல்களும் இந்த திட்டத்திற்கான இணையதளத்தில் அளிக்கப்பட்டுள்ளன.

மேலும் தகவல்களுக்கு: https://www.frogid.net.au/

 

 

தளம் புதிது; டிவிட்டர் பதிவுகளை நீக்க உதவும் தளம்

சமூக ஊடகங்களில் பகிர்ந்து கொள்ளும் சில தகவல்கள் பயனாளிகளுக்கு பாதகமாக அமையலாம். இப்படி பழைய சமூக ஊடக பகிர்வுகளால் வேலையை இழப்பு உள்ளிட்ட பாதிப்புக்கு பலர் இலக்காகி இருக்கின்றனர். எனவே சமூக ஊடகங்களில் கொஞ்சம் பின்னோக்கி பார்த்து தேவையில்லாத தகவல்களை நீக்கி விடுவது நல்லது தான். ஆனால் இது அத்தனை எளிதானது அல்ல. பெரும்பாலான சமூக ஊடக சேவைகள் பழைய பதிவுகளை நீக்க எளிதான வழியை அளிப்பதில்லை. உதாரணத்திற்கு குறும்பதிவு சேவையான டிவிட்டரில் பழைய பதிவுகளை எல்லாம் ஒருவர் நீக்க நினைத்தாலும் அது எளிதாக இருக்காது. கணக்கை முடக்கி வைப்பது அல்லது ஒட்டுமொத்தமாக வெளியேறுவது போன்ற வழிகளை தேர்வு செய்தால், குறும்பதிவு செய்வதை தொடர முடியாமல் போகலாம்.

இந்த இடத்தில் தான் டிவீட்டெலிட் இணையதளம் கைகொடுக்கிறது. இந்த தளம் பழைய குறும்பதிவுகளை எளிதாக நீக்க வழி செய்கிறது. இந்த சேவையின் மூலம் 3,200 வரையான குறும்பதிவுகளை ஒரே நேரத்தில் நீக்கி விடலாம். அது மட்டும் அல்ல, எதிர்காலத்தில் பகிரும் குறும்பதிவுகளையும் குறிப்பிட்ட கால இடைவெளிக்குப்பின் தானாக நீக்கப்படவும் இதன் மூலமே வழி செய்யலாம்.

இணைய முகவரி: https://www.tweetdelete.net/

செயலி புதிது; ஹாஷ்டேக் வழிகாட்டி

சமூக ஊடகங்களில் தகவல்களை பகிர்ந்து கொள்ளும் போது அவற்றுடன் பொருத்தமான ஹாஷ்டேகை இணைப்பதும் முக்கியம். அப்போது தான் அவற்றின் மையகருத்திற்கு ஏற்ப மற்றவர்களால் எளிதாக அடையாளம் காண முடியும். டிவிட்டர், பேஸ்புக், இன்ஸ்டாகிராம் என எல்லா சமூக ஊடகங்களிலும் ஹாஷ்டேக் பயன்பாடு பிரபலமாக இருக்கிறது. ஆனால் ஒன்று செய்திகள், தகவல்களை விட ஒளிப்படங்களுக்கான ஹாஷ்டேகை தேர்வு செய்வது கொஞ்சம் சிக்கலானதாக இருக்கலாம். இன்ஸ்டாகிராமில் முன்னிலையில் இருக்கும் ஹாஷ்டேகாக மட்டும் இருந்தால் போதாது, படத்திற்கு பொருத்தமானதாகவும் இருக்க வேண்டும். இந்த வகையில் ஒளிபட கலைஞர்களுக்கு உதவுவதற்காக என்றே போட்டர்லூ,காம் சார்பில் புதிய செயலி அறிமுகம் செய்யப்பட்டுள்ளது. செயற்கை நுண்ணறிவு மூலம் செயல்படும் இந்த செயலியிடம் ஒளிப்படத்தை சமர்பித்தால் அதற்கு பொருத்தமான ஹாஷ்டேக் மற்றும் குறிச்சொற்களை பரிந்துரைக்கிறது. இந்த பட்டியலில் இருந்து தேர்வு செய்து கொள்ளலாம்.

மேலும் தகவல்களுக்கு: https://app.photerloo.com/InstagramHashtagKeywordingApp/

 

வீடியோ புதிது; தலைவலி அறிவோம்

தலைவலியால் பாதிக்கப்பட்ட அனுபவம் எல்லோருக்கும் இருக்கலாம். ஆனால் தலைவலியில் பல வகை இருக்கின்றன. சிலருக்கு ஒத்த தலைவலி வரலாம். சிலருக்கு பனிச்சுமையால் தலைவலி உண்டாகலாம். எனவே இவற்றுக்கான நிவாரணமும் மாறுபடும். இப்படி தலைவலியில் உள்ள வகைகள் மற்றும் அவற்றுக்கான நிவாரணத்தை ஒரு வீடியோ மூலம் அறிந்து கொள்ள விரும்பினால், உங்களுக்காக என்றே குட்லைப் வீடியோ ஒன்றை உருவாக்கியுள்ளது. பலவகையான தலைவலிக்கான எளிய விளக்கத்தை இந்த வீடியோ மூலம் தெரிந்து கொள்ளலாம்.

வீடியோவை காண: http://designtaxi.com/news/396889/Watch-Different-Types-Of-Headaches-And-How-To-Cure-Them/

 


 

நன்றி; தமிழ் இந்துவில் எழுதியது;

 

தமிழில் இதுவரை எழுதியவற்றை படிக்க:http://tamil.thehindu.com/…/%E0%AE%9A%E0%AF%88%E0%AE%AA%E0…/

 

ஒவ்வொரு கிளிக்கிலும் ஒரு புதிய புத்தகம்

booksமறக்கப்பட்ட ஒரு புத்தகம் அழிக்கப்பட்ட ஒரு புத்தகத்திற்கு சமமானது அல்லவா? என்று கேள்வி எழுப்புகிறார் சாப்ட்வேர் வல்லுனரான ஸ்டீவ் ஜெயின். அதாவது ஆயிரம் ஆண்டுகளுக்கு முன் எழுதப்பட்ட எண்ணற்ற நல்ல புத்தகங்கள் இருக்கும் போது அவற்றை அணுக வழியில்லாவிட்டால் என்ன பயன், அந்த புத்தகங்கள் இருந்தும் இல்லாதது போன்றது தானே எனும் அர்த்தத்தில் தான் இந்த கேள்வியை கேட்கிறார். ஆனால் வெறும் கேள்வுயோடு நிறுத்திக்கொள்ளவில்லை. அதற்கான பதிலாக விளங்கும் இணைய சேவையையும் அவரே உருவாக்கி இருக்கிறார்.

உண்மையில், மறக்கப்பட்ட புத்தகங்களை நினைவு கூறுவதற்கான அழகான இணைய சேவையை உருவாக்கிவிட்டு தான் இந்த கேள்வியை கேட்டிருக்கிறார்.

’100 மில்லியன் புக்ஸ்’ எனும் பிரவுசர் நீட்டிப்பு சேவை தான் அவர் உருவாக்கியிருப்பது. கூகுள் குரோம், பயர்பாக்ஸ் உள்ளிட்ட பிரவுசர்களில் செயல்படக்கூடிய இந்த நீட்டிப்பு சேவை, புதிய புத்தகங்களை புதுமையான வழியில் அறிமுகம் செய்கிறது. எப்படி என்றால், பிரவுசரில் புதிய தளத்தை திறப்பதற்காக கிளிக் செய்யும் ஒவ்வொரு முறையும் ஒரு புத்தகம் அறிமுகம் செய்யப்படும். புத்தகத்தின் அட்டைப்படத்துடன் தரப்படும் அறிமுக குறிப்புகள் மூலம் அடையாளம் காட்டப்படும் புத்தகம் பற்றி தெரிந்து கொள்ளலாம். அடுத்த முறை பிரவுசரில் புதிய பக்கத்தை திறக்க முற்பட்டால் இன்னொரு புதிய புத்தகம் எட்டிப்பார்க்கும். அடுத்த கிளிக் செய்தால் இன்னொரு புத்தகத்தை பற்றி தெரிந்து கொள்ளலாம்.

ஆக, புத்தக பிரியர்கள் இணையத்தில் அங்கும் இங்கும் அல்லாடாமலே பிரவுசர் எல்லைக்குள்ளேயே புதுப்புது புத்தகங்களை தெரிந்து கொள்ளலாம். (இங்கு புதிய என்பது இதுவரை அறியாத என்பதை குறிக்கிறது. அது பழைய புத்தகமாகவும் இருக்கலாம்.) புத்தக அறிமுக இணையதளங்கள் பல இருக்கின்றன என்றாலும், அவை ஒவ்வொன்றிலும் நுழைந்து பார்க்க வேண்டும். நமக்கான புத்தகங்களை தேடிப்பார்க்க வேண்டும்; அவற்றில் இருந்து தேர்வு செய்ய வேண்டும். இதற்கு மாறாக, எப்போது பிரவுசரை திறந்தாலும் ஒரு புத்தகம் பற்றி தெரிந்து கொள்ள வாய்ப்பிருப்பது சுவாரஸ்யமானது தானே. இந்த சுவாரஸ்யத்தை தான் ’100 மில்லியன் புக்ஸ்’ நீட்டிப்பு சேவை அளிக்கிறது.

பிரவுசரில் கிளிக் செய்யும் போது, ஒவ்வொரு முறையும் புகைப்படம் அல்லது கலைப்படைப்பு போன்றவை எட்டிப்பார்க்கும் வகையிலான பிரவுசர் நீட்டிப்புகள் இருக்கின்றன. இதே முறையில் ஜெயின், புத்தகங்களுக்கான நீட்டிப்பு சேவையை உருவாக்கி இருக்கிறார்.

இப்படி ஒரு சேவையை உருவாக்குவதற்கான காரணம் அல்கோரிதம்கள் மீதான கோபம் தான் என்கிறார் ஜெயின். இந்த சேவை தொடர்பாக அவர் மீடியம் தளத்தில் எழுதியிருக்கும் வலைப்பதிவில், அல்கோரிதம்களின் ஆதிக்கத்தால் இணையத்தில் கண்டறிதலின் சுவையே போய்விட்டது என குறிப்பிடுகிறார். அது மட்டும் அல்ல, அல்கோரிதம்கள் மூலம் முன்வைக்கப்படும் விஷயங்களால் சமூகத்தில் ஒருவித சார்புத்தன்மையும் வந்துவிடுவதாக குறைப்பட்டுக்கொள்கிறார்.

இந்த குறையை போக்கும் நோக்கத்துடன் தான், புத்தகங்களை கண்டறிவதற்கான சேவையை உருவாக்கி இருப்பதாக குறிப்பிடுகிறார். அல்கோரிதம் இல்லாமல், சமூக பகிர்வு அம்சங்கள் இல்லாமல், புத்தக வகைகள் இலலாமல். ஒரு புதிய புத்தகத்தை ஒவ்வொரு முறையும் அறிமுகம் செய்து கொள்ள வைப்பதே இதன் நோக்கம் என்கிறார்.

அவர் இன்னொரு விஷயத்தையும் சுட்டிக்காட்டுகிறார். மனிதர்கள் தோன்றி மறைகின்றனர். ஆனால் அவர்கள் உருவாக்கிய புத்தகங்கள் காலத்தை மீறி நிற்கின்றன. அவை இன்றளவும் படித்தால் பயன் தரக்கூடிய விஷயங்களை கொண்டுள்ளன. புத்தக பொக்கிஷங்களை டிஜிட்டல் மயமாக்கும் பிராஜக்ட் குடென்பர்க் திட்டம், கூகுள் புக்ஸ் போன்ற திட்டங்கள் காரணமாக எண்ணற்ற நல்ல புத்தகங்கள் டிஜிட்டல் மயமாக்கப்பட்டுள்ளன. ஆனால், இவற்றை அணுகவும் வழி செய்யப்பட்டுள்ளது. இருப்பினும் இவை மட்டும் போதுமா என்ன?

இந்த புத்தகங்களை எல்லாம் அறிமுகம் செய்து கொள்ள ஒரு தூண்டுதல் வேண்டும் அல்லவா? அதற்கான வழியாக தான் 100 மில்லியன் புக்ஸ் சேவை.

1-RAbHmvjF_h5la5i9RmYrRgஇந்த நீட்டிப்பு சேவையை இன்ஸ்டால் செய்து சோதனை செய்துப்பார்த்தால், ஒவ்வொரு கிளிக்கிலும் ஒரு புத்தகம் பற்றி அறிய முடிகிறது. புத்தகம் தொடர்பான மேலும் தகவல்களை அதற்கான குட்ரீட்ஸ் அல்லது அமேசான் பக்கத்தில் இருந்து தெரிந்து கொள்ளலாம். ஒரு சில பரிந்துரைகள் நாம் தேடினாலும் கிடைக்காத, நமக்கான புத்தகத்தை அறிமுகம் செய்யும் வகையிலும் இருக்கலாம். உண்மையில் புத்தக புழுக்களுக்கு உற்சாகம் அளிக்க கூடிய சேவை தான். தேடல் முடிவுகள் கூட, ஒருவரின் கடந்த கால தேடல் தன்மைக்கு ஏற்ப வடிகட்டி அளிக்கப்படும் கால கட்டத்தில் எந்தவிட வடிகட்டலும் இல்லாத பரிந்துரை சேவையாக இது இருக்கிறது.

இந்த நீட்டிப்பு சேவை தொடர்ந்து புதுப்பிக்கப்பட்டு மேம்படுத்தப்படுமானால் இன்னும் சிறப்பாக இருக்கும். இந்த முயற்சியில் வாசகர்களும் பங்கேற்கும் வாய்ப்பும் அளிக்கப்பட்டுள்ளது. நீங்கள் விரும்பினால், புதிய புத்தகத்தை அதற்கான அறிமுகத்தோடு சமர்பிக்கலாம். மற்றவர்களின் முயற்சியால் மட்டுமே இதை தொடர்ந்து மேம்படுத்த முடியும் என்று ஜெயின் குறிப்பிட்டுள்ளதோடு, யோசனைகள் மற்றும் பரிந்துரைகள் பகிர்வதற்கான வேண்டுகோளையும் வைத்திருக்கிறார்.

எத்தனையோ மகத்தான புத்தகங்கள் மனிதர்கள் கையில் கிடைக்காமல் அழிந்து போயிருக்கின்றன. எண்ணற்ற புத்தகங்கள் திட்டமிட்டு அழிக்கப்பட்டிருக்கின்றன. ஆனால் காலத்தை வென்று நிற்கும் புத்தகங்கள் மறக்கப்பட்ட புத்தகங்களாக மாறிவிடாமல் இருக்க அவற்றை நினைவில் நிறுத்துக்கொண்டே இருப்பது அவசியம் தானே. இணையம் புத்தகங்களை சேமித்து வைக்கவும், தேடி எடுக்கவும் வழி செய்திருக்கும் போது, அவற்றை கண்டறிவதற்கான புதுப்புது சேவைகளை உருவாக்குவதும் அவசியமானது தானே!

’100 மில்லியன் புக்ஸ்’ இணையதளம்: http://www.100millionbooks.org/

 


 

நன்ற்இ; யுவர்ஸ்டோரியில்  எழுதியது.

 

.

 

இணைய வரலாற்றுக்கு இங்கே கிளிக் செய்யவும்!

 

browser-2-800x594இணையத்தின் வரலாற்றை திரும்பி பார்ப்பதில் உங்களுக்கு ஆர்வம் இருக்கிறதா? அது அலுப்பூட்டும் என்ற எண்ணமோ அல்லது இணையம் நாளுக்கு நாள் அப்டேடாகி கொண்டிருக்கும் நிலையில் பழைய கதை எல்லாம் எதற்கு என்ற எண்ணமோ உண்டானால், உங்களுக்கு ஒரு ஆச்சர்யம் காத்திருக்கிறது.- இணையம் கதைகளால் நிரம்பியிருக்கிறது என்பதும், அந்த கதைகள் அனைத்துமே சுவாரஸ்யமானவை என்பதும் தான் அது.

அது மட்டும் அல்ல, இணைய வரலாற்றில் அறியாத விஷயங்கள் இத்தனை இருக்கின்றனவா? என்ற வியப்பும் உண்டாகும். அதோடு இணையம் எத்தனை மகத்தான கண்டுபிடிப்பு என்பதும், அந்த தொழில்நுட்ப அற்புதம் எத்தனை எளிமையாக கருக்கொண்டு வளர்ந்துள்ளது என்பதும் உங்களுக்கு புரிய வரும். ஒரு பானை சோற்றுக்கு ஒரு சோறு பதமாக இதற்கு உதாரணமாக இணையத்தின் ஆதி கதைகளில் மிக சுவாரஸ்யமான கதை ஒன்றை பார்ப்பதற்கு முன் அமெரிக்க புரோகிரமரான ஜே ஹாப்மனை அறிமுகம் செய்து கொள்ள வேண்டும். ஏனெனில் அவர் தான் இணையத்தின் மறக்கப்பட்ட கதைகளை எல்லாம் அகழ்வராய்ச்சி செய்து கண்டெடுத்து பகிர்ந்து கொண்டு வருகிறார்.

ஹாப்மன், ’திஹிஸ்டரிஆப்திவெப்’ எனும் பெயரில் வலையின் வரலாற்றை பதிவு செய்வதற்கான இணையதளத்தை அமைத்திருக்கிறார். ( இணையமும், வலையும் ஒன்றாக புரிந்து கொள்ளப்பட்டாலும் இரண்டும் ஒன்றல்ல. இணையம் வலைப்பின்னல்களின் வலைப்பின்னல். வலை அதில் ஒரு அங்கம். இணையத்தை எளிதாக அணுகக்கூடிய மூல செயலியாக வலையை புரிந்து கொள்ளலாம். எனினும் நடைமுறையில் இரண்டையும் ஒன்றென கொள்வதில் தவறில்லை). அதாவது வேர்ல்டு வைட் வெப் எனப்படும் வலை உருவான கதைகளை அவர் இந்த தளத்தில் வெளியிட்டு வருகிறார்.

வலையின் வரலாற்றை கூகுளில் தேடினால் படித்துவிடலாமே என நினைப்பவர்கள் ஹாப்மன் தளத்திற்கு கட்டாயம் விஜயம் செய்து பார்க்க வேண்டும். பரவலாக அறியப்பட்ட வலையின் தோற்றம், வளர்ச்சி, விஸ்விரூப வெற்றி சார்ந்த தகவல்கள் மற்றும் காலவரிசை விவரங்களை எல்லாம் கடந்து, வலையின் உருவாக்கத்தில் இன்னும் தெரிந்து கொள்ள எத்தனை விஷயங்கள் இருக்கின்றன என்பதை இந்த தளத்தின் மூலம் உணரலாம். ஹாப்மனே இப்படி உணர்ந்ததால் தான் இந்த தளத்தை அமைத்ததாக குறிப்பிட்டுள்ளார்.

browser-3அவர் ஒரு வரலாற்று மாணவராம். படிக்கும் காலத்திலேயே இணையதள உருவாக்கத்தில் பகுதிநேரமாக ஈடுபட்டிருக்கிறார். பின்னர் அதுவே முழு நேர பணியாக மாறிவிட்டாலும் மனிதருக்கு வலை உருவான வரலாற்றின் மீதான காதல் மாறாமல் இருந்திருக்கிறது. கொஞ்சம் கொஞ்சமாக வலை தொடர்பான கதைகளை படித்தவருக்கு அதன் ஆரம்பமும் அடுத்தடுத்து நிகழும் பாய்ச்சல்களும் வசீகரித்தன. அந்த ஆர்வத்தில் தான் கண்டெடுத்த கதைகளையும், அவற்றுக்கான இணைப்புகளையும் சேகரித்து வைக்கத்துவங்கினார்.

இந்த வரலாறு தனித்துவம் மிக்கதாக இருக்கிறது என்கிறார் அவர். அது மட்டும் அல்ல, வலை ஆவணங்களின் பக்கமாக உருவானது என்றும், இந்த பக்கங்கள் காணாமல் போகும் தன்மை கொண்டவை என்றும் அவர் குறிப்பிடுகிறார். அதன்படியே எண்ணற்ற பக்கங்கள் காணாமல் போயிருக்கின்றன என்கிறார். அதிலும் குறிப்பாக நாம் அறிந்த வகையில் வலை வேகமாக வளர்ந்து கொண்டே வரும் நிலையில் அதன் பாதையில் ஒரு சில தருணங்கள் மைல்கற்களாக அமைந்து மற்ற தருணங்கள் பின்னுக்குத்தள்ளப்பட்டுவிடும் நிலை உள்ளது.

இந்த தருணங்கள் அனைத்தையும் திரட்டி தொகுத்து வலையின் முழுமையான கால வரிசையை உருவாக்கும் நோக்கத்துடன் இதற்கான இணையதளத்தை அமைத்து, இணையக்கடலில் தான் தேடி கண்டுபிடிக்கும் கதைகளை பகிர்ந்து கொண்டு வருகிறார். இணையத்தின் அங்கமாக வலை கருக்கொண்ட 1988 ம் ஆண்டு முதல் இந்த கதைகளை காலவரிசையாக படித்துப்பார்க்கலாம்.

ஒவ்வொரு கால கட்டத்திலும் வலையின் முக்கிய தருணங்களாக விளங்கிய நிகழ்வுகளின் பின்னே உள்ள கதைகள் படு சுவாரஸ்யமாக இருப்பதோடு, அதைவிட சுவையான வரலாற்றுப்பாடங்களையும் கொண்டிருக்கின்றன.

இதற்கு உதாரணமாக கதையை இனி பார்க்கலாம். வேர்ல்டு வைடு வெப் என குறிப்பிடப்படும் வலையை உருவாக்கியது பிரிட்டனைச்சேர்ந்த டிம் பெர்னர்ஸ் லீ என்பதை நீங்கள் அறிந்திருக்கலாம். விஞ்ஞானியான அவர் சுவிட்சர்லாந்தில் உள்ள செர்ன் ஆய்வுக்கூடத்தில் பணியாற்றிக்கொண்டிருந்த போது, 1989 ம் ஆண்டில் வலையை உருவாக்குவதற்கான யோசனையை முன் வைத்து, அது பின்னர் ஏற்கப்பட்டு 1991 ல் வலை பிரவுசர் மற்றும் எச்டிஎம்.எல் இணைப்பு வசதி உள்ளிட்ட அம்சங்களோடு உதயமானது எனும் சுருக்கமான வரலாற்றையும் பலரும் அறிந்திருக்கலாம்.

ஆனால் இதற்கான யோசனையை லீ, உலக அளவிலான போன் புத்தகமாக முன்வைத்து தான் வெற்றி பெற்றார் என்பது உங்களுக்குத்தெரியுமா?

லீ அப்போது பணியாற்றிக்கொண்டிருந்த செர்ன் ஆய்வுக்கூடம் நவீன இயற்பியல் ஆய்வில் ஈடுபட்டிருந்தது. இயற்பியல் சார்ந்த ஆய்வு தவிர வேறு விஷயங்களுக்கு அங்கு முக்கியத்துவம் இல்லை. ஆனால், லீயோ உலகம் முழுவதும் உள்ள விஞ்ஞானிகள் தங்கள் ஆய்வு தகவல்களை எளிதாக பகிர்ந்து கொள்வதற்கான வழியை எச்.டிம்.எம்.எல் உள்ளிட்ட அம்சங்களோடு உருவாக்க கனவு கண்டார். ஆனால் செர்ன் போன்ற ஆய்வுக்கூடத்தில் இத்தகைய திட்டத்திற்கான அனுமதி கிடைப்பது கடினம். இதை எல்லாம் மூட்டைக்கட்டி வைத்துவிட்டு ஆய்வு வேலையை கவனியுங்கள் என்றே எச்சரிக்கப்படும் வாய்ப்பு அதிகம்.

ஆனால் நல்லவேளையாக டிம் பெர்னர்ஸ் லீ முன் வைத்த யோசனைக்கு அந்த கதி ஏற்படவில்லை. அவரது தலைமை அதிகாரியான மைக் செண்டல், இந்த யோசனையை ஆதரிக்க விரும்பினார். எனினும் மூல வடிவில் அது அதிகார மேல் அடுக்குகளில் செல்லுபடியாகாது என அறிந்திருந்தவர் இதற்கான மாற்று வழியை முன்வைத்தார். இந்த யோசனையை அப்படியே முன்வைக்காமல் செர்ன் ஆய்வு கூடத்திற்கு மிகவும் அவசியமான போன் புத்தகத்தை இணையத்தில் உருவாக்கித்தரும் திட்டமாக முன்வைக்குமாறு கூறினார். செர்ன் ஆய்வாளர்கள் உலகம் முழுவதும் இருந்ததால் அவர்கள் அனைவரையும் ஒருங்கிணைக்க கூடிய ஒரு போன் புத்தகம் தேவைப்பட்டது என்பதால் இந்த போர்வையில் ஐடியாவை சொன்னால் யாரும் மறுக்க மாட்டார்கள் என அவர் நம்பினார். அதன்படியே இணைய போன் புத்தகத்தை உருவாக்கும் முயற்சியாக வலை துவங்கி பின்னர் மெல்ல நிலைப்பெற்று இன்று வலையில்லாமல் வாழ்க்கை இல்லை எனச்சொல்லும் நிலையை உருவாக்கும் அளவுக்கு வளர்ச்சி பெற்றிருக்கிறது.

இது போன்ற வரலாற்று கதைகளை தெரிந்து கொள்ள: https://thehistoryoftheweb.com/

 

பாஸ்வேர்டு விதிமுறைகளில் புதிய மாற்றம்!

 

BN-UO739_80807p_HD_20170807010616பாஸ்வேர்டு பாதுகாப்பானதாக இருக்க வேண்டும் என்றால் அது அடிப்படையில் வலுவானதாக இருக்க வேண்டும் என்று சொல்லப்படுவதை நீங்கள் பலமுறை கேள்விப்பட்டிருக்கலாம். வலுவான பாஸ்வேர்டை உருவாக்க பல்வேறு வழிமுறைகள் முன்வைக்கப்படுவதையும் நீங்கள் அறிந்திருக்கலாம். இந்த வழிமுறைகளில் பல மீறப்படாத விதிமுறைகள் போலவே அழுத்தந்திருத்தமாக வலியுறுத்தப்பட்டு வருகின்றன. இந்நிலையில், இந்த விதிகள் உருவாக காரணமாக இருந்தவரே இவற்றில் சில தவறானவை என ஒப்புக்கொண்டிருப்பதை அடுத்து பாஸ்வேர்டு பாதுகாப்பிற்கான மூல விதிகள் தளர்த்தப்பட்டுள்ளன.

ஆக, இனியும் நீங்கள் பாஸ்வேர்டை அடிக்கடி மாற்றிக்கொண்டிருக்க வேண்டிய அவசியமில்லை. அதே போல பாஸ்வேர்டை சிக்கலானதாக மாற்றுவதற்காக எண்களையும் சிறப்பு எழுத்துக்களையும் இடையே நுழைத்து கஷ்டப்பட வேண்டியதில்லை. இதன் பொருள் எளிதாக நினைவில் கொள்ளக்கூடிய வலுவான பாஸ்வேர்டை உருவாக்கி கொள்ளலாம் மற்றும் ஒரே பாஸ்வேர்டை தொடர்ந்து தயக்கம் இல்லாமல் பயன்படுத்தலாம் என்பதும் தான். சிக்கலான பாஸ்வேர்டை உருவாக்குவதை விட அதை நினைவில் நிறுத்திக்கொள்வது இன்னும் கடினமாக இருக்கிறது என புலம்பிக்கொண்டிருப்பவர்கள் நிம்மதி பெருமூச்சு விட்டுக்கொள்ளலாம்.

அதற்காக பாஸ்வேர்டு விஷயத்தில் அலட்சியாக இருக்கலாம் என்றில்லை: பாஸ்வேர்டு உருவாக்கம் தொடர்பாக வலியுறுத்தப்படும் சில விதிகள் மாறியிருக்கின்றன என்பதே விஷயம்.

இணைய சேவைகளில் நுழைய பயன்படுத்தும் பாஸ்வேர்ட்களை ஹேக்கர்கள் என குறிப்பிடப்படும் தாக்களார்கள் களவாடுவதை தவிர்ப்பதற்காக பலவித முன்னெச்சரிக்கைகளை கடைப்பிடிப்பது அவசியமாகிறது. தாக்காளர்கள் பாஸ்வேர்டு திருடவும், கொள்ளையடிக்கவும் (ஆயிரக்கணக்கில் கொத்தாக பாஸ்வேர்டு திருடப்படுவது) அதிகரித்து வந்த நிலையில் பாஸ்வேர்டு பாதுகாப்பில் கவனம் செலுத்துவது அவசியமானது. இதை மனதில் கொண்டே பாஸ்வேர்டு உருவாக்கத்திற்கான வழிமுறைகள் முன்வைக்கப்பட்டன. இதனடிப்படையில் தான் எளிதில் ஊகிக்க முடியாத பாஸ்வேர்ட்களை அமைக்க வேண்டும், வழக்கமான பாஸ்வேர்டுகளை தவிர்க்க வேண்டும், ஒரே பாஸ்வேர்டை பல சேவைகளில் பயன்படுத்துவதை தவிர்க்க வேண்டும் என்பது உள்ளிட்ட பல்வேறு ஆலோசனைகள் சொல்லப்படுகின்றன.

இந்த வரிசையில் தான், சிக்கான பாஸ்வேர்டை உருவாக்குவது மற்றும் பாஸ்வேர்டை அடிக்கடி மாற்றுவது ஆகிய ஆலோசனைகளும் இடம்பெறுகின்றன. பயனாளிகள் பார்வையில் இரண்டுமே கடினமானவை தான். ஏனெனில், பாஸ்வேர்டு வலுவாக இருக்க வேண்டும் என்பதற்காக எழுத்துக்களுக்கு நடுவே எண்கள், அடைப்பு குறிகள், குறீயீடுகள் உள்ளிட்ட சிறப்பு எழுத்துகளை நுழைத்து அவற்றை சிக்கலாக தோன்றச்செய்ய வேண்டியிருக்கிறது. ஆனால், இப்படி உருவாக்கிய பாஸ்வேர்டை நினைவில் கொள்வது கடினமாகி விடுகிறது. அதே போல தாக்களர்களை ஏமாற்ற வேண்டும் என்பதற்காக பாஸ்வேர்டை 3 மாதங்கள் அல்லது 6 மாதங்களுக்கு ஒரு முறை மாற்றிக்கொண்டே இருந்தால், எந்த பாஸ்வேர்டை இப்போது பயன்படுத்துகிறோம் என குழம்பும் நிலை வரலாம் அல்லவா?

ஆனால் நல்லவேளையாக இந்த இரண்டு விதிகளும் தவறானவை என பில் பர் (Bill Burr ) இப்போது கூறியிருக்கிறார். இவர் தான் பாஸ்வேர்டு பாதுகாப்பிற்காக வலியுறுத்தப்படும் வழிமுறைகளுக்கு காரணமானவர். அமெரிக்காவின் தரநிர்ணயம் மற்றும் தொழில்நுட்பத்திற்கான தேசிய கழகம் (என்.ஐ.எஸ்.டி) எனும் அமைப்பில் பணியாற்றிக்கொண்டிருந்த போது, பில் பர் பாஸ்வேர்டு நிர்வாகத்திற்கான வழிமுறைகளை உருவாக்கி வெளியிட்டார். 2003 ல் வெளியான இந்த எட்டு பக்க ஆவணம் தான் அதன் பிறகு பாஸ்வேர்டு பாதுகாப்பிற்கான வழிகாட்டி விதிமுறைகளாக அமைந்தன.

பத்தாண்டுகளுக்கும் மேலாக இந்த வழிமுறைகள் கோலோச்சிய நிலையில், அண்மையில் இந்த வழிகாட்டி ஆவணம் திருத்தி அமைக்கப்பட்டு என்.ஐ.எஸ்.டி அமைப்பால் புதிதாக வெளியிடப்பட்டுள்ளது. பாஸ்வேர்டு சிக்கலானதாக இருக்க வேண்டும், அடிக்கடி மாற்றிக்கொண்டே இருக்க வேண்டும் ஆகிய விதிகள் புதிய ஆவணத்தில் கைவிடப்பட்டுள்ளன.

அதற்கேற்ப பில் பர்ரும், இந்த விதிகளை சேர்த்ததற்காக வருத்தம் தெரிவித்துள்ளார். இது தொடர்பாக அமெரிக்காவின் ’வால்ஸ்டிரீட் ஜர்னல்’ இதழுக்கு அளித்துள்ள பேட்டியில், பாஸ்வேர்டை 90 நாட்களுக்கு ஒருமுறை மாற்ற வேண்டும் என்பதற்காக பலரும் பழைய பாஸ்வேர்டில் ஒரு சின்ன திருத்தம் செய்து கொள்கின்றனர். இதனால் பெரிய அளவில் பலன் ஏற்படுவதில்லை என கூறியிருக்கிறார். அதே போல கடினமான பாஸ்வேர்டை உருவாக்குவதற்கான வழிமுறை பயனாளிகளிடம் குழப்பத்தை ஏற்படுத்தியதாகவும் அவர் கூறியிருக்கிறார்.

ஆனால் ஒன்று பில் பர் தவறாக வழிநடத்திவிட்டார் என்றெல்லாம் அவர் மீது பழி சொல்ல முடியாது. 2003 ல் அவருக்கு கிடைத்த பாஸ்வேர்டு தொடர்பான தரவுகளின் அடிப்படையில் இந்த வழிமுறைகளை அவர் முன்வைத்தார். பாஸ்வேர்டு பற்றிய ஆழமான புரிதலுக்காக தனது அமைப்பில் உள்ளவர்கள் பயன்படுத்திய பாஸ்வேர்டுகளை பார்க்க அவர் அனுமதி கேட்டிருக்கிறார். ஆனால் யாரும் இதற்கு உடன்படவில்லை. அதோடு பாஸ்வேர்டை பார்க்க அனுமதி கேட்டதற்காகவே சகாக்கள் தன்னை நம்ப முடியாமல் வியப்புடன் பார்த்ததாக அவர் கூறுகிறார். பிறகு வேறுவழியில்லாமல் அப்போது கிடைத்த தகவல்களை கொண்டு பாஸ்வேர்டு பாதுகாப்பு வழிமுறைகளை வகுத்துக்கொடுத்தார்.

அது மட்டும் அல்ல, அதன் பிறகு இணைய உலகிலும் ஏகப்பட்ட மாற்றங்கள் ஏற்பட்டு விட்டன. எனவே பாதுகாப்பான பாஸ்வேர்டு என்பதற்கான வரையறையும் மாறியிருக்கிறது. மேலும், இடைப்பட்ட காலத்தில் தாக்காளர்கள் வசம் சிக்கிய பாஸ்வேர்டுகள் லட்சக்கணக்கில் பொதுவெளியில் வீசப்பட்டிருக்கின்றன. இத்தகைய பட்டியல் பில் பர் கையில் கிடைத்திருந்தால் மனிதர் இன்னும் துல்லியமான விதிகளை வகுத்திருக்கலாம் என நம்பலாம்.

அது மட்டும் அல்ல, புதிய ஆவணத்தை உருவாக்கிய குழுவுக்கு பொறுப்பேற்ற பால் கிராஸி, தனது சகா பில் பர் வருத்தம் கொள்ள வேண்டிய அவசியமே இல்லை, இத்தனை ஆண்டுகள் தாக்குப் பிடித்த வழிமுறைகளை உருவாக்கியதே பெரிய விஷயம் எனக்கூறியுள்ளார். இது போல் நீடித்திருக்ககூடிய ஆவணத்தை உருவாக்குவது பற்றி தன்னால் கனவு தான் காண முடியும் எனக்கூறியிருக்கிறார்.

எப்படியோ, பாஸ்வேர்டு விதிமுறைகள் கொஞ்சம் மாறியிருக்கின்றன. இனியும் அடைப்புக்குறிகள், கேள்விக்குறிகள், எண்களை எல்லாம் சேர்த்து பாஸ்வேர்டை சிக்கலாக அமைக்க மெனக்கெட வேண்டாம். அதைவிட, பாஸ்பிரேஸ் என சொல்லப்படும் சொற்றொடர் ஒன்றை எடுத்துக்கொண்டு அதன் வார்த்தைகளில் உள்ள முதல் எழுத்துக்களை சேர்த்து உருவாக்கும் பாஸ்வேர்டு வலுவானதாக அமையும். அதே போல, பாஸ்வேர்டை அடிக்கடி மாற்ற வேண்டிய கட்டாயமும் இல்லை. பாஸ்வேர்டு தாக்குதலுக்கு உள்ளாகி இருக்கலாம் எனும் சந்தேகம் ஏற்பட்டால் மட்டும் மாற்றிக்கொண்டால் போதுமானது என்கின்றனர். அதே போலவே ஒரே பாஸ்வேர்டை எல்லா சேவைகளுக்கும் பயன்படுத்தக்கூடாது எனும் விதியும் கொஞ்சம் தளர்த்தப்பட்டுள்ளது. மிகவும் முக்கியமான சேவைகளுக்கு வேண்டுமானால் தனித்தனி பாஸ்வேர்ட்களை அமைத்துக்கொள்ள வேண்டுமேத்தவிர, மற்றபடி அவ்வளவாக முக்கியமில்லாத சேவைகளில் ஒரே பாஸ்வேர்டை பயன்படுத்தினாலும் தவறில்லை என்கின்றனர்.

புத்தகங்களை தெரிந்து கொள்ள புதிய வழி

tumblr_onp12eUadT1qaouh8o1_500புதிதாக படிக்க வேண்டிய புத்தகங்களை அறிமுகம் செய்து கொள்ள எத்தனையோ வழிகள் இருக்கின்றன. பெஸ்ட் செல்லர் பட்டியல், வல்லுனர்களின் பரிந்துரை என நீளும் இந்த வழிகளில் கொஞ்சம் சுவாரஸ்யமான புதிய வழியாக கவர்ஸ்பை தளம் அறிமுகமாகியுள்ளது.

டம்ப்ளர் வலைப்பதிவு சேவையை கொண்டு உருவாக்கப்பட்டுள்ள இந்த தளம் வாயிலாக புதிய புத்தகங்களை அவற்றின் முகப்பு பக்கங்களாக அறிமுகம் செய்து கொள்ளலாம். இந்த புத்தகங்கள் எல்லாம் எப்படி தேர்வு செய்யப்படுகின்றன தெரியுமா? எல்லாமே புத்தக புழுக்கள் பொது இடங்களில் கையில் வைத்திருக்கும் புத்தகங்கள்.  ஆம், பொது போக்குவரத்து மற்றும் பூங்காக்கள் போன்ற பொது இடங்களில் புத்தக புழுக்கள் கையில் வைத்திருக்கும் புத்தகங்களை கண்டறிந்து அவற்றின் முகப்பு படம் இந்த தளத்தில் வெளியிடப்படுகிறது.

புத்தக அட்டைப்படம் மற்றும் அவை கண்டெடுக்கப்பட்ட இடம் மட்டுமே இடம்பெறுகிறது. புத்தகம் தொடர்பான விமர்சன குறிப்புகள் எல்லாம் கிடையாது.

ஆக, ஒருவிதத்தில் வாசகர்கள் படித்துக்கொண்டிருக்கும் புத்தகங்களை தெரிந்து கொள்ளலாம். இவை இயல்பான பரிந்துரையாகவும் அமையும்.

அமெரிக்காவின் நியூயார்க் நகரில் துவங்கி மற்ற நகரங்களுக்கும் விரிவாகி இருக்கிறது. இந்த வரிசையில் தில்லியும், மும்பையும், நம்ம சென்னையும் இடம்பெறும் வாய்ப்புள்ளதா என தெரியவில்லை.

இணை முகவரி: http://coverspy.tumblr.com/

 

செயலி புதிது; ஒலிகளை கேட்க உதவும் செயலி

இசை கேட்பது மன அமைதிக்கு உதவுவது போலவே, விரும்பமான ஒலிகளை பின்னணில் கேட்டுக்கொண்டிருப்பதும் மனநிலை மேம்பட உதவும். மழை பெய்து கொண்டிருக்கும் ஓசை, காற்று வீசும் ஒலி ஆகியவற்றை பின்னணியில் கேட்டுக்கொண்டிருந்தால் மன ஒரு நிலைப்படும். பணியில் கவனச்சிதறலை தவிர்ப்பதில் துவங்கி, இரவு தூக்கம் வரவைத்துக்கொள்வது வரை பலவற்றுக்கு இப்படி பின்னணி ஒலிகளை பயன்படுத்தலாம்.

இத்தகைய ஒலிகளை கேட்டு ரசிக்க வழி செய்யும் இணைய சேவைகளும் அநேகம் இருக்கின்றன. இந்த வரிசையில் ஏ சாப்ட் மர்மர் செயிலி உருவாக்கப்பட்டுள்ளது.

இந்த செயலி மூலம் மழை, இடியோசை, காபி ஷாப் சத்தம், பறவைகள் கீதம் என பலவித ஒலிகளை கேட்கும் வகையில் அமைத்துக்கொள்ளலாம். ஒலிகளை கலந்து கேட்கும் வசதியும் இருக்கிறது. ஒலிகளுக்கான நேரத்தை நிர்ணயித்துக்கொள்ளலாம். ஒலிகளை சமூக ஊடகம் மூலம் நட்பு வட்டத்தில் பகிரவும் செய்யலாம்.

மேலும் விவரங்களுக்கு: http://asoftmurmur.com/

 

——-