Tag Archives: bookmark

டிவிட்டரில் சந்தித்தவர்களை நினைவில் கொள்ள.

1359263734
நிஜ உலகில் நண்பர்கள் இருப்பது போல இப்போது பேஸ்புக்கிலும் டிவிட்டரிலும் நண்பர்கள் கிடைக்கின்றனர்.

இவர்களில் பேஸ்புக் நண்பர்கள் ஒருவிதம் என்றால் டிவிட்டர் நண்பர்கள் இன்னொரு விதம்.பேஸ்புக்கில் நண்பர்கள் மூலம் நண்பர்கள் கிடைக்கின்றனர்.நண்பராக ஏற்க சம்மதமா என்று கேட்டு அது ஏற்றுக்கொள்ளப்பால் நண்பர்களாகலாம்.

டிவிட்டரில் அப்படி இல்லை,ஒருவருடைய‌ குறும்பதிவுகள் பிடித்திருந்தால் அல்லது பயனுள்ளதாக இருக்கும் என்று நினைத்தால் அவரது டிவிட்டர் கணக்கை பின்தொடர ஆரம்பித்து விடலாம்.அந்த நொடியில் இருந்து அவர் டிவிட்டர் நண்பராகி விடுவார்.

டிவிட்டரில் தான் சந்திக்க வேண்டும் என்றில்லை.நிகழ்ச்சிகளில் சந்தித்து பேசும் போது கூட டிவிட்டரில் இருக்கிறீர்களா என கேட்டு டிவிட்டர் முகவரியை வாங்கி பின் தொட‌ரலாம்.சிலர் அவர்களாகவே முன்வந்து டிவிட்டர் முகவரியை தரலாம்.

இப்படி பல நண்பர்கள் டவிட்டரில் சேரலாம்.எல்லாம் சரி டிவிட்டர் நண்பர்கள் அதிகரிக்கும் போது குறிப்பிட்ட டிவிட்டர் நண்பர்களை எங்கே சந்தித்தோம் என்பது நினைவில் இல்லாமல் போகலாம்.டிவிட்டரில் ஒருவரை எப்படி சந்தித்தோம் என்ற தகவல் பல காரணங்களுக்காக தேவைப்படலாம்.பலவிதங்களில் பயன்படலாம்.

அதற்காக அடடா டிவிட்டர் சந்திப்புகளை குறித்து வைக்காமல் போனோமோ என்று கவலைப்பட வேண்டியதில்லை.இந்த தேவையை நிறைவேற்றுவதற்காக என்றே ஒரு இணைய சேவை இருக்கிறது.மெட்.என்யு என்னும் அந்த தளம் மூலம் டிவிட்டர் சந்திப்புகளை குறித்து வைத்துக்கொள்ளலாம்.

இந்த சேவையை புக்மார்கிங் துண்டாக தரவிற்க்கம் செய்து கொண்டால் அது பிரவுசரில் போய் உட்கார்ந்து கொள்ளும்.அதன் பிறகு புதிய டிவிட்டர் நண்பர்கள் கிடைக்கும் போது இந்த புக்மார்க் துண்டை கிளிக் செய்து, அந்த டிவிட்டர் நண்பர எங்கே எப்படி அறிமுகமானார் என்பதை குறித்து வைத்துக்கொள்ளலாம்.அந்த நண்பரை டிவிட்டரில் பின் தொடர்வற்கான காரணத்தையும் குறித்து கொள்ளலாம்.அவரது தொடர்பு முகவரி மற்றும் தொலைபேசி எண்ணையும் குறித்து கொள்ளலாம்.

பின்னர் எப்போது தேவை என்றாலும் இந்த குறிப்புகளை பார்த்து கொள்ளலாம்.எந்த டிவிட்டர் நண்பரை பற்றிய சந்திப்பு விவரம் தேவைப்பட்டாலும் அவரது முகவரி மீது கிளிக் செய்தால் புக்மார்கிக் விவரம் மூலம் சந்திப்பு தகவல்களை தெரிந்து கொள்ளலாம்.

டிவிட்டர் பிரியர்களுக்கு பயனுள்ள சேவை.

இணையதள முகவரி;http://met.nu/

இணைய மறதியை வெல்ல ஒரு இணையதளம்!


நாம் பார்த்ததை மறந்து விடுகிறோம்.அதனால் இணையத்தில் தேடியதையே தேடிக்கொண்டிருக்கிறோம் என்று இடித்து சொல்கிறது அனோடோரி இணையதளம்.இடித்து சொல்வதோடு நின்று விடாமல் இதற்கான தீர்வையும் வழங்குகிறது.

அனோடோரி வழங்கும் தீர்வு பார்த்த இணையபக்கங்களை குறித்து வைத்து கொள்ளும் புக்மார்கிங் சேவை.

புக்மார்கிங் சேவைகளுக்கு குறைவு இல்லை என்றாலும் அனோடோரி கொஞ்சம் வித்தியாசமானது.வழக்கமான புக்மார்கிம்ங் சேவைகளை விட மேம்பட்டது என்று அனோடோரி தன்னை பற்றி வர்ணித்து கொள்கிறது.

அதாவது வளர்ந்து விட்ட புக்மார்கிங் சேவை என்று பெருமை பட்டு கொள்கிறது.

அனோடோரி அப்படி என்ன செய்கிறது என்றால் புக்மார்க் செய்ய விரும்பும் இணையதளத்தை அடிகோடிட்டு அதற்கான விளக்க குறிப்புகளோடு சேமித்து வைத்து கொள்ள உதவுகிறது.

நாளிதழ் அல்லது புத்தகங்களில் ஒரு விஷய‌த்தை படிக்கும் போது பின்னர் தேவை என்றால் அதில் முக்கிய பகுதியை அடிக்கோட்டி வைத்து கொள்வோம் அல்லவா அதே போலவே அனோடோரியில் எந்த இணையதளத்திலும் அதன் முக்கிய பகுதிகளை மஞ்சள் வண்ணத்தில் அடிக்கோடிட்டு கொள்ளலாம்.

தேவைப்பட்டால் அவற்றின் அருகே அந்த பக்கத்திற்கான விளக்க குறிப்புகளையும் எழுதி வைக்கலாம்.

புக்மார்கிங் செய்வதே ஏற்கனவே பார்த்த இணையதளம் எது என்பதை மறந்து விடாமல் இருப்பதற்காக தானே.ஆனால் இணையதளங்களை புக்மார்க் செய்து விட்டு பின்னர் அவற்றை மீண்டும் பார்க்கும் போது அவற்றை ஏன் குறித்து வைத்தோம் என்று தெரியாமல் குழம்பி தவிக்கும் அனுபவமும் பல முறை நேரலாம் அல்லவா?

இந்த குழப்பத்தை தவிர்க்கும் வகையில் தான் அந்த தளங்களில் நம்மை கவர்ந்தவை எவை என்றும் அந்த தளத்தை குறித்து வைத்தது ஏன் என்றும் குறிப்பெழுதி வைக்கும் போது மீண்டும் அந்த தளத்தை பார்க்கும் போதே இந்த குறிப்புகள் வழகாட்டியாக விளங்கும்.

இணையதளங்கள் மீது இப்படி அடிக்கோடிடுவது மிகவும் சுலபம்.இந்த தளத்திஒல் உறுப்பினராகி புக்மார்கிங் டூல்பாரை நமது பிரவுசரில் இணைத்து கொண்டால் போதும்,அதன் பிறகு எப்போது தேவையோ அப்போது புக்மார்கிங் பட்டனை கிளிக் செய்தால் போதும் அடிக்கோடிடுவதற்கான வசதியும் குறிப்பெழுதும் வசதியும் திரையில் தோன்றுகிறது.

இப்படி எத்தனை தளங்களை வேண்டுமானாலும் குறிப்புகளோடு சேமித்து கொள்ளலாம்.இந்த தளங்களின் பட்டியலை எப்போடு வேண்டுமானாலும் பார்க்கலாம் என்பதோடு இவற்றை நண்பர்களோடு பகிர்ந்து கொள்ளவும் செய்யலாம்.

ஆக நாம் பார்த்து ரசித்த தளங்களை நண்பர்களும் அவற்றின் விளக்க குறிப்புகளோடு காணலாம் என்பதோடு நாமும் மற்றவர்களின் சேமிப்பு பட்டியலை பார்த்து சுவாரஸ்ய‌மான இணையதளங்களை தெரிந்து கொள்ளலாம்.

டிவிட்டரில் இருப்பது போல சக உறுப்பினர்களை பின் தொடர‌வும் செய்யலாம்.அந்த வகையில் சமூக வலைப்பின்னல் தன்மை கொண்டதாகவும் இந்த புக்மார்கிம்ங் சேவை விளங்குகிறது.

சக உறுப்பினர்கள் சேமித்து வைத்துள்ள தளங்களையும் உலா வரலாம்.குறிப்பிட்ட வகை தளங்கள் உள்ளதா என்று தேடிப்பார்க்கும் வசதியும் உள்ளது.

அஷோக் நாயர் என்னும் இந்தியரும் டிரேவிஸ் ஹார்ட்மேன் என்னும் அமெரிக்கரும் இணைந்து இந்த சேவையை உருவாக்கியுள்ளனர்.

இந்த சேவைக்காக ஒரு வலைப்பதிவு பகுதியும் வைத்திருக்கின்றனர்.அதில் ஒரு பதிவில் சோர்ஸ் அம்னிஷியா என்னும் பதத்தை பயன்படுத்தியுள்ளனர்.அதாவது இனையத்தில் எந்த தகவலை எந்த தளத்தில் பார்த்தோம் என்பதை மறந்து விட்டு திண்டாடுவது.அந்த இணைய மறதியில் இருந்து விடுவிக்க தான் இந்த புக்மார்கிங் சேவை !

இணையதள முகவரி;http://annotary.com/

ஏற்கனவே பார்த்த தள‌ங்களை எளிதாக தேட!

சீன்பிபோர் புதிய தேடியந்திரம் தான் என்றாலும் அதனை பயன்படுத்த நீங்கள் தேடியந்திர கட்சி மாற வேண்டியதில்லை.அதாவது உங்கள் தேடியந்திரத்தை மாற்றி கொள்ள வேண்டாம்.கூகுல் தான் உங்கள் அபிமான தேடியந்திரமாக இருந்தால் அதனையே நீங்கள் தொடர்ந்து பயன்படுத்தலாம்.

அப்படி என்றால் சீம்பிவோர் எத‌ற்கு என்று கேட்கலாம்?

சீன் பிபோர் கூகுலில் நீங்கள் ஏற்கனவே தேடியதை மீண்டும் எளிதாக தேடுவதற்கான தேடியந்திரம்.அதாவது நீங்கள் நேற்றோ அதற்கு முன் தினமோ அல்லது கடந்த வாரத்திலோ பார்த்த இணையதளங்களை இப்போது எளிதாக தேடி கண்டு பிடித்து தருவது தான் இதன் வேலை.

அதனால் தான் நீங்கள் ஏற்கனவே பார்த்த தளங்களை தேடுவதற்கான தேடியந்திரம் என்று சீன் பிபோர் தன்னை வர்ணித்து கொள்கிறது.அதே பொருள் படும் வகையில் தான் அதன் பெயரும் அமைந்துள்ளது.

ஏற்கனவே பார்த்த தள‌ங்களை ஏன் மீண்டும் பார்க்க வேண்டும் என்று ஒரு இணையவாசியாக நீங்கள் அசட்டுத்தனமாக கேட்க வாய்ப்பில்லை.காரணம் உங்களுக்கே பல முறை இத்தகைய அனுபவம் இருந்திருக்கும்.கடந்த வாரத்தில் அல்லது கடந்த மாதத்தில் பார்த்த ஒரு இணையதளத்தை மீண்டும் பார்க்க நேரும் தேவையும் விருப்பமும் பல முறை உங்களுக்கு ஏற்பட்டிருக்கலாம்.

ஆனால் என்ன பிரச்சனை என்றால் அந்த தளத்தின் முகவரி சரியாக நினைவில் இல்லாமல் போவது தான்.தளத்தின் ஏதாவது ஒரு சில குறிசொற்களை கொண்டு கூகுலிலேயே மீண்டும் தேடிப்பார்க்கலாம் தான்.அனால் என்ன பிரச்ச‌னை என்றால் கூகுல் பல்லாயிரக்கணக்கில் முடிவுகளை பட்டியல்லிட்டு வெறுப்பேற்றும்.அதிலிருந்து நாம் பார்த்த தளத்தை தேடி கண்டுபிடிக்க வேண்டும்.

இதற்கு மாறாக பார்த்த தளங்களை எல்லாம் புக்மார்க் செய்து கொள்ளலாம் தான்.

ஆனால் புக்மார்க்கிலும் சிக்கல் இல்லாமல் இல்லை.சுறுசுறுப்பாக புக்மார்க் செய்து விட்டு பின்னர் மறந்து போய் விடுவோம்.

இந்த பிரச்ச‌னை எவையும் இல்லாமல் ஏற்கனவே பார்த்த தளம் எதுவாக இருந்தாலும் அதை எளிதாக தேடித்தருவது தான் சீன் பிபோரின் சிறப்பாக இருக்கிறது.அடிப்படையில் புக்மார்கிங் போல தான் இதுவும்.இதன் புக்மார்கிங் பாரை டவுண்லோடு செய்து கொண்டு விட்டீர்கள் என்றால் அதன் பிறகு நீங்கள் செல்லும் ஒவ்வொரு இணையதளத்தையும் இது குறித்து வைத்து கொள்ளும்.

பின் எப்போது உங்களுக்கு ஏற்கனவே பார்த்த இணையதளம் தேவையோ அப்போது இதில் தேடிப்பார்த்தால் நீங்கள் பார்த்த தளங்களின் பட்டியலில் இருந்து பொருத்தமான தளத்தை அடையாளம் காட்டும்.

கம்புயூட்டர் விட்டு கம்ப்யூட்டர் மாறினாலும் எந்த பிரச்சனையும் இல்லை.நீங்கள் பார்த்த இணையதளத்தின் பக்கமே மாறியிருந்தாலும் கவலையில்லை,அதன் நகலை இது வைத்திருக்கும்.

பிரவுசரில் உள்ள வரலாறு பக்கத்தோடு இதனை ஒப்பிடலாம் என்றாலும் பலவிதங்களில் இது மேம்பட்டது.காரணம் பிரவுசரில் வரலாற்று பக்கத்தை நாமே கூட அடிக்கடி டெலிட் செய்து விடுவோம்.

சீன் பிபோரில் அந்த சிக்கல் எல்லாம் கிடையாது.

இதனை பயன்ப‌டுத்தும் போது மிக அழகாக எந்த நாளில் பார்த்தது,செய்தியா புகைப்படமா அல்லது வீடியோவா என்றெல்லாம் குறிப்பிட்டு தேடிக்கொள்ளலாம்.

இணையத்தில் தேடப்படுவதில் 40 சதவீதம் ஏற்கனவே பார்த்த தளங்கள் தொடர்பானதாக இருப்பதாக சொல்லும் இந்த் தேடியந்திரம் அந்த தேடலை எளிதாக்கி தருவதாக சொல்கிற‌து.

வீட்டில் பொருட்களை வைத்த இடம் தெரியாமல் தேடுபவர்கள் போல இணையத்தில் பார்த்த தளங்களை மறந்து திண்டாடுபவர்கள் இந்த தேடியந்திரத்தை பற்றிக்கொள்ளலாம்.

தேடியந்திர‌ முகவரி;https://www.seenbefore.com/pages/landing

எளிமையான புக்மார்கிங் சேவை.

இணையத்தில் உலாவுகின்றவர்களால் புக்மார்கிங் சேவை இல்லாமல் இருக்கவே முடியாது.காரணம் நல்ல தளங்களும் பயனுள்ள தகவல்கலும் கண்ணில் பட்டு கொண்டேயிருக்கும் என்பதால் அவற்றை பின்னர் பார்த்து கொள்ளலாம் என புக்மார்க் செய்து கொள்வது தேவையானது தான்.

புக்மார்க் செய்து கொள்ள பல சேவைகள் இருந்தாலும் எல்லாவற்றிலும் ஏதாவது போதாமை இல்லாமல் இல்லை.எனவே புதிய புக்மார்கிங் சேவைகள் தேவைபடவே செய்கின்றன.அதற்கேற்ப புதிதாக புக்மார்கிங் சேவைகளும் அறிமுகமாகி கொண்டே இருக்கின்றன.

டூரீட் தளமும் இத்தகைய புக்மார்கிங் சேவை தான் என்றாலும் புக்மார்கிங் சேவைகளிலேயே மிகவும் எளிமையானது என்று இதனை சொல்லலாம்.இதன் வடிவமைப்பும் தோற்றமும் கூட எந்த வித ஆடம்பரமும் இல்லாமல் எளிமையாகவே இருக்கிறது.

ஆனால் இதன் எளிமை தான் இதன் சிறப்பே!.

இதன் மூலம் இணையதளங்களை புக்மார்க் செய்வது மிகவும் சுலபமானது.எந்த தளத்து குறித்து வைக்க நினைக்கிறோமோ அந்த தளத்தில் புக்மார்கிங் டூல் பாரை கிளிக் செய்தால் போதும் அந்த தளத்தின் இணைப்பை இமெயில் முகவரிக்கு இந்த தளம் அனுப்பி வைத்துவிடும்.

அதன் பிறகு எப்போது தேவையோ அப்போது இமெயில் பெட்டியை திறந்து இந்த இணையதளத்தை பார்த்து கொள்ளலாம்.இமெயில் இருந்து கம்ப்யூட்டரில் டவுண்லோடு செய்து இணைய இணைப்பு இல்லாமலும் கூட இணையதளத்தை பார்க்கலாம்.

பயனுள்ள தளங்களை மறக்க கூடாது என புக்மார்க் செய்து விட்டு அதன் பிறகு புக்மார்க் செய்ததையே மறந்து நிற்பதை காட்டிலும் புக்மார்க் செய்த தளங்கள் நேரடியாக இமெயில் பெட்டிக்கு வந்து சேர்வது பயனுள்ளது தானே.

எளிமையான இந்த தளத்தில் உறுப்பினராக சேர்வதும் எளிதானது.இமெயில் முகவரியை சமர்பித்தால் போதும்ம் உறுப்பினராகிவிடலாம்.பின்னர் அதே முகவரிக்கு புக்மார்க் செய்யப்பட்ட தளங்கள் வரத்துவங்கிவிடும்.

இணையதள முகவரி;http://toread.cc/

புக்மார்க் சேவையில் புதிய அவதாரம்.


உங்கள் வாழ்கையையே மாற்றி காட்டுகிறோம் வாருங்கள் என அழைக்கிறது கிலிபிக்ஸ் இணையதள‌ம்.வாழ்கை என்று கிலிபிக்ஸ் குறிப்பிடுவது இணைய வாழ்கையை!

அதாவது இணைய பயணத்தில் எதிர்கொள்ளும் விஷயங்களை பின்னர் எளிதாக தேடி கண்டுபிடிக்கும் வகையில் ஒரே இடத்தில் தொகுத்து வைத்து கொள்ள உதவுகிறது கிலிபிக்ஸ்.

ஒரு விதத்தில் பார்த்தால் கிலிபிக்ஸ் புக்மார்கிங் சேவை தான்.ஆனால் அதனை மிகவும் மேம்பட்ட முறையில் வழங்குகிறது.

புக்மார்கிங் என்பது என்ன?இணையத்தில் உலாவி கொண்டிருக்கும் போது நல்ல கட்டுரையையோ அல்லது சுவையான விஷயத்தையோ பார்க்கும் போது அப்போது அதில் கவனம் செலுத்த முடியாவிட்டால் பின்னர் வந்து பார்த்து கொள்ளலாம் என்று குறித்து வைத்து கொள்ளும் வசதி தானே!.

இத்தகைய புக்மார்கிங் சேவைகளில் பலவிதங்கள் இருக்கின்றன.அவற்றில் புதுவிதமானதாக கிலிபிக்ஸ் அறிமுகமாகியிருக்கிறது.

கிலிபிக்சை பயன்படுத்துவது மிகவும் எளிதானது.டிவிட்டர் அல்லது பேஸ்புக் கணக்கு மூலமே இதில் உறுப்பினராகி விடலாம்.ஜிமெயில் கணக்கு மூலமும் உள்ளே நுழையலாம்.அதன் பிறகு இணையத்தில் எந்த இடத்திலும் கிலிப் செய்யலாம்.அதாவது அந்த பக்கத்தை குறித்து வைத்து கொள்ளலாம்.

இதற்காக கிலிப் பட்டனை பிரவுசரின் புக்மார்க் பகுதியில் இணைத்து விட்டால் போதுமானது.எந்த இணையபக்கத்தை குறித்து வைத்து கொள்ள விரும்புகிறோமோ அந்த பக்கத்தில் இருந்து கிலிப் ப‌ட்டனை கிளிக் செய்தால் அந்த பக்கம் புக்மார்க் செய்யப்பட்டு விடும்.

இது வழக்கமாக எல்லா புக்மார்கிங் சேவையும் செய்வது தான்.ஆனால் கிலிபிக்சில் இதன் பிறகு தான் சுவாரஸ்யமே இருக்கிற‌து.

புக்மார்க் செய்தவற்றை எல்லாம் அழகாக அடுக்கி வைக்க முடியும் என்பது தான் அது.

நல்ல கட்டுரை,சுவாரஸ்யமான யூடியூப் வீடியோ,வாங்க‌ நினைக்கும் புத்தகம்,ஆன்லைன் ஷாப்பிங்கில் பார்த்து ரசித்த ஆடை என எதை வேண்டுமானாலும் புக்மார்க் செய்து கொள்வதோடு ஒவ்வொன்றையும் அதற்குறிய தலைப்பின் கீழ் வகைப்படுத்தி வைக்க முடியும்.

அதாவது நல்ல கட்டுரைகளையும் செய்திகளையும் அதற்கான தலைப்பின் கீழ் போட்டு வைக்கலாம்.அதே போல புத்தகங்களுக்கு ஒரு பெட்டி வீடியோக்களுக்கு ஒரு பெட்டி என உருவாக்கி கொள்ளலாம்.அவரவர் தெவைக்கேற்ப எத்தனை பெட்டிகள் வேண்டுமானாலும் உருவாக்கி புக்மார்க் செய்தவற்றை வகைப்படுத்தி கொள்ளலாம்.

இப்படி எல்லாமே ஒழுங்காக வகைப்படுத்தப்படுவதை தான் கிலிபிக்ஸ் இணைய வாழ்கையை ஒருங்கிணைக்க உதவுவதாக கிலிபிக்ஸ் சொல்கிற‌து.

புக்மார்க் இணைப்புகளை பெட்டிபெட்டியாக சேமித்து வைப்பதை பார்க்கும் போது இணையத்த்தில் பார்த்து ரசிப்பவற்றை இணைய பலகையில் அவற்றை புகைப்படங்களாக குத்தி வைத்து கொள்ள வழி செய்யும் பின்ட்ரெஸ்ட் சேவை நினைவுக்கு வரலாம் என்றாலும் இது பின்ட்ரெஸ்ட் போன்றது அல்ல!.

புக்மார்க் செய்தவற்றை அழகாக வகைப்படுத்தி கொள்ள உதவுவதோடு அவற்றை நண்பர்களோடு பகிர்ந்து கொள்ளவும் இந்த சேவை கைகொடுக்கிறது.இதற்காக சின்போர்டு என்னும் வசதி உள்ளது.இதில் ஒரு விஷயத்தை பகிர்ந்து கொண்டால் நண்பர்கள் எல்லோரும் ஒரே நேரத்தில் பார்க்கலாம்.

புக்மார்கிங் சேவையில் புதிய அவதாரமான கிலிபிக்சை ப‌யன்படுத்தி பாருங்கள்!

இணையதள முகவரி;http://www.clipix.com/