Tag Archives: songs

இசையால் உலகை இணைத்த ஸ்முல் செயலியின் பூர்வ கதை!

http-mashable.comwp-contentuploads201208Singஸ்முல் செயலியை எல்லோரும் கரோக்கி செயலி என குறிப்பிடுவதை பார்த்தால் வருத்தமாக இருக்கிறது. இப்படி சொல்வதில் எந்த தவறும் இல்லை என்றாலும், இது ஸ்முலுக்கான சரியான அறிமுகம் இல்லை- முழமையான அறிமுகமும் இல்லை. இசைப்பிரியர்களுக்காக ஸ்முல் உருவாக்கி வரும் பரந்து விரிந்த இசைப்பரப்பில் கரோக்கி செயலி ஒரு அங்கம் அவ்வளவு தான். மற்றபடி ஸ்முலில் தெரிந்து கொள்ள இன்னும் நிறைய இருக்கிறது.

ஸ்முல் நிறுவனத்திற்கான விக்கிபீடியா பக்கம் சமூக இசை செயலிகளை உருவாக்குவதில் விஷேச கவனம் செலுத்தி வரும் அமெரிக்க நிறுவனம் என்றே ஸ்முலை குறிப்பிடுகிறது. இசை மூலம் உலகை இணைக்கும் முயற்சியாக ஸ்முல் இணையதளத்தின் அறிமுக வாசகம் தெரிவிக்கிறது.

ஆம், ஸ்முல் சாதாரண இசை சார்ந்த செயலி அல்ல; இசை மூலம் பரஸ்பரம் ஒருவரை ஒருவர் இணைக்க உதவும் சமூக வலைப்பின்னலாக அது உருவாகி வலுப்பெற்று வருகிறது. அதனால் தான், போர்ப்ஸ் பத்திரிகை கட்டுரை, சந்தேகத்திற்கு இடமில்லாமல் உலகின் சக்தி வாய்ந்த சமூக ஊடகங்களில் ஒன்றாக ஸ்முல் உருவாகி இருப்பதாக குறிப்பிடுகிறது. சும்மாயில்லை, உலக மக்கள் தொகையில் 4 சதவீதம் பேர் இதன் சேவையில் உறுப்பினர்களாக இணைந்துள்ளனர். இந்த எண்ணிக்கை இன்னும் அதிகரித்துக்கொண்டே இருக்கிறது.

’’இசை என்பது கேட்டு ரசிப்பதற்கானது மட்டும் அல்ல, என ஸ்முல் நிறுவனம் கருதுகிறது. இசை என்பது உருவாக்குவது, பகிர்வது, கண்டறிவது, பங்கேற்பது மற்றும் மற்றவர்களுடன் தொடர்பு கொள்வது என்று ஸ்முல் நம்புகிறது’ என மற்றொரு கட்டுரை ஸ்முலை வர்ணிக்கிறது.

’உங்களை இசைமயமாக்கும் இயந்திரம்’ என இன்னொரு பத்திரிகை கட்டுரை வர்ணிக்கிறது. ஸ்முல் சேவையில் மூழ்கி திளைத்திருக்கும் இசை பிரியர்களுக்கு இந்த வர்ணனை ஜாலம் எல்லாம் தேவையே இல்லை. ஏனெனில் இவற்றை எல்லாம் நடைமுறையில் அவர்கள் அனுபவித்துக்கொண்டிருக்கின்றனர். அதனால் தான் ஸ்முலின் அபிமானிகளாக இருக்கின்றனர்.

யூடியூப்பை போல ஸ்முல் இசையை ஜனநாயகமயமாக்கி இருப்பதாக பாராட்டப்படுகிறது. ரசிகர்கள் வெற்று தாளம் போட்டி, கைத்தட்டி இசையை கேட்டு மகிழந்தவர்களாக இருந்த காலம் மாறி, அவர்களும் இசையை உருவாக்கி, தங்களுக்குள் பகிர்ந்து கொண்டு, இசைமயமான உரையாடலையும், நட்பையும் வளர்த்துக்கொள்ள ஸ்முல் தனது செயலிகள் வாயிலாக வழி செய்திருப்பதாக கருதப்படுகிறது. இன்னும் எளிதாக புரிந்து கொள்ள வேண்டும் எனில், ஸ்முலை இசைப்பிரியர்களுக்கான பேஸ்புக் எனலாம். அல்லது இசைக்கான இன்ஸ்டாகிராம் என புரிந்து கொள்ளலாம். இன்ஸ்டாகிராம் எப்படி சாதாரண மக்கள் கூட புகைப்படங்களை எடுத்து அவற்றை பில்டர்கள் மூலம் மெருகேற்றி மற்றவர்களோடு பகிர்ந்து கொண்டு தங்கள் திறமையை வெளிப்படுத்துகின்றனரோ அதே போல ஸ்மூல் செயலிகள் மூலம் சாதாரண ரசிகர்கள் இசையை உருவாக்கி பகிர்ந்து கொண்டு நட்பு வளர்த்துக்கொள்கின்றனர்.

இந்த வகை ஸ்முல் செயலிகளில் ’சிங்! கரோக்கி’ மிகவும் பிரபலமானதாக இருக்கிறது. இப்போது செய்திகளிலும் அடிபடத்துவங்கியிருக்கும் இந்த செயலி கரோக்கி முறையில் பாட வழி செய்கிறது. ஒரு பாடலின் பின்னணி இசை மட்டும் ஒலிக்க, அதில் பாடியவர் குரலுக்கு பதிலாக ரசிகர்கள் தங்கள் குரலில் பாடிக்கொள்ளும் வசதியே கரோக்கி என குறிப்பிடப்படுகிறது. ஜப்பானில் கரோக்கி இசை மிகவும் பிரபலம். அங்கு கரோக்கி பாட உதவும் பார்கள் எல்லாம் இருக்கிறது. நமக்காக ஆர்க்கெஸ்ட்ரா ஒன்று இசை அமைக்க நடுவே நாம் மைக் பிடித்து பாட முடிந்தால் எப்படி இருக்கும்! இந்த அனந்த அனுபவத்தை தான் கரோக்கி இசை வழங்குகிறது.

இணையத்தில் இதை சாத்தியமாக்கும் இணையதளங்களும், செயலிகளும் அநேகம் இருக்கின்றன. இந்த இடத்தில் ஸ்முல் செயலி வருகிறது. ஸ்முலின் கரோக்கி செயலி, பிரபலமான மெட்டுகளுக்கு ரசிகர்கள் பாட வழி செய்வதோடு, அந்த ஒலிப்பதிவை பலவிதங்களில் பகிர்ந்து கொள்ளவும் வழி செய்கிறது. இந்த பகிர்வுகள் விதவிதமான உரையாடலாகவும் மலந்து நட்பு வலை விரியச்செய்கிறது.

இவையே ஸ்முலை இசை சமூக ஊடகம் என சொல்ல வைக்கிறது. ஸ்முலின் இந்த தன்மையை புரிந்து கொள்ள அதன் பூர்வ கதையையும், முக்கியமாக அதன் நிறுவனர்களாக இசை பிரம்மாக்களையும் தெரிந்து கொள்ள வேண்டும். அதோடு கரோக்கி ஸ்முலின் முதல் செயலி அல்ல என்பதையும் நினைவில் கொள்ள வேண்டும்.

2008 ல், ஸ்முல் ஒரு இசை ஸ்டார்ட் அப் நிறுவனமாக அமெரிக்காவில் உருவானது. ஆப்பிளின் ஐபோன் அறிமுகமான அடுத்த ஆண்டில் தான் ஸ்முல் அறிமுகமான ஆண்டு என்பதை கவனிக்க வேண்டும். ஏனெனில் ஸ்முல் உருவானதில் ஐபோனுக்கு முக்கிய பங்கிருக்கிறது. ஐபோன் இல்லாமல் ஸ்முல் இல்லை. அதோடு புதுயுக போனாக ஐபோன் பிரபலமாகி பெரும் வரவேற்பை பெறுவதற்கு காரணமாக அமைந்த ஆரம்ப கால அருமையான செயலிகளில் ஸ்மூலும் ஒன்று என்பதும் குறிப்பிடத்தக்கது.

27smule2-popupஅமெரிக்காவின் ஸ்டான்போர்ட் பல்கலைக்கழகத்தில் பேராசிரியராக இருந்த ஜி வாங் என்பவரும், அவரது மாணவருமான ஜெப் ஸ்மித் என்பவரும் இணைந்து தான் ஸ்முல் நிறுவனத்தை துவக்கினர். வாங்கை இசை திறனும், தொழில்நுட்ப அறிவும் இணைந்த கில்லாடி என்று தான் சொல்ல வேண்டும். இசையையும், தொழில்நுட்பத்தையும் இணைந்து பல ஜாலங்களை செய்யலாம் என்று அறிந்திருந்த வாங், இசை சார்ந்த புரோகிராம்களை உருவாக்குவதற்காக என்றே சங்க் எனும் கம்ப்யூட்டர் மொழியையும் உருவாக்கி இருந்தார். அதோடு லேப்டால் கம்ப்யூட்டர்களில் உள்ள ஆக்சலரேட்டர் எனும் கருவியை கொண்டு ஒலிக்குறிப்புகளை உண்டாக்கும் லேப்டாப் ஆர்க்கெஸ்ட்ராவையும் உருவாக்கி இருந்தார்.

ஒருமுறை வாங் பல்கலைக்கழகத்தில் உரையாற்றிக்கொண்டிருந்த போது அங்கு பிஎச்டி மாணவராக இருந்த ஜெப் ஸ்மித், அதைக்கேட்டு அசந்து போய்விட்டார். அந்த தாக்கத்தோடு, வாங் எண்ணங்களை வர்த்தக நோக்கிலான செயலி மூலம் மக்களிடம் கொண்டு செல்லலாம் என்று கூறினார். இதன் பயனாக வாங்கை இணை நிறுவனராகவும், ஸ்மித் சி.இ.ஓ. வாகவும் கொண்டு ஸ்முல் நிறுவனம் துவங்கியது. இசை உருவாக்கத்தை மையமாக கொண்ட புதுமையான சமூக வலைப்பின்னல் சேவையை உருவாக்க வேண்டும் என்பது தான் ஸ்மித்தின் நோக்கமாக இருந்தது. அந்த நோக்கத்தை கூறி நிறுவனத்திற்கான முதல் கட்ட நிதியையும் எப்படியோ திரட்டி பணிகளையும் துவக்கிவிட்டார்.

அவர்கள் உருவாக்கிய முதல் செயலி நோக்கியா போனுக்காக இருந்தது. ஆனால் அதற்குள் ஆப்பிள் நிறுவனம் ஐபோனை அறிமுகம் செய்தது. ஒரு கையடக்க கம்ப்யூட்டர் என்று சொல்லக்கூடிய அளவுக்கு ஐபோன் அற்புதமாக இருக்கவே அதற்கேற்ற செயலியை வாங் மற்றும் ஸ்மித் உருவாக்கத்துவங்கினர். இப்படி அறிமுகமானது தான் சோனிக்லைட்டர் செயலி. இதற்குள் ஆப்பிள் நிறுவனமும் செயலிகளுக்கான ஐஸ்டோர் கடையையும் திறந்துவிடவே சோனிக்லைட்டர் அறிமுகமாகி அட்டகாசமான வரவேற்பை பெற்றது.

சோனிக்லைட்டரை விளையாட்டான செயலி என்று தான் சொல்ல வேண்டும். போனுக்குள் ஒரு லைட்டர் இருந்து அதை அப்படியே ஏற்றி ஜோதியாக ஒளிரச்செய்தால் எப்படி இருக்கும். போனில் லைட்டர் ஒளி எரிவது போன்ற தோற்றம் சுவாரஸ்யமாக இருந்தது என்றால், போனை பக்கவாட்டில் அசைதால் லைட்டர் ஒளியும் அதற்கேற்ப வளைந்து கொடுத்தது இன்னும் சுவாரஸ்யமாக இருந்தது. அது மட்டும் அல்ல, இந்த லைட்டர் ஒளியை ஐபோன் திரை மீது ஊதி அணைக்கவும் செய்யலாம். அப்போது திரையில் இருந்து புகை வருவது போன்ற தோற்றமும் உண்டாகும். இந்த சாக்சங்களால் வியக்க வைத்த சோனிக்லைட்டர் செயலி லட்சக்கணக்கில் தரவிறக்கம் செய்யப்பட்டு பிரபலமானது. இந்த லைட்டர் தோற்றத்தை ஐபோன் பயனாளிகள் உலகின் எந்த மூளையில் உள்ள சக ஐபோன் பயனாளிகளுடனும் பகிர்ந்து கொள்ள முடிந்தது. இந்த பகிர்வுத்தன்மையே சோனிக்லைட்டர் செயலியை மேலும் சுவாரஸ்யமாக்கி அதன் மீதான ஈர்ப்பை அதிகமாக்கியது.

ஐபோன் அற்புதத்தை உணர்த்திய வெற்றிகரமான செயலிகளில் இதுவும் ஒன்றாக அமைந்தது. சோனிக்லைட்டரின் வெற்றியை அடுத்து மேலும் அசத்தலான ஆக்கரினா செயலியை ஸ்முல் அறிமுகம் செய்தது.  ( ஆக்கரினா என்பது ஒரு பழங்கால இசைக்கருவி)

ஆக்கரினா, ஐபோனையே ஒரு இசைக்கருவியாக மாற்றும் செயலியாக அமைந்தது. ஐபோனை வாயருகே வைத்துக்கொண்டு அதன் மீது ஊதினால், குழலில் இருந்து ஒலி வருவது போல இந்த செயலி உருவாக்கப்பட்டிருந்தது. அது மட்டும் அல்ல, திரையில் உள்ள நான்கு துளைகளின் மீது விரல்களை மாற்றி மாற்றி வைத்துக்கொண்டிருந்தால் ஒலியின் தாள லயத்தை மாற்றலாம். கொஞ்சம் பழகிவிட்டால், இந்த இசை செயலியை இயக்குவதில் தேர்ச்சி பெற்று இனிமையான இசையை உருவாக்குவதும் கூட சாத்தியம் தான்.

ஆக்கரினா செயலி அறிமுகமான போது, ஐபோனை ஒரு இசைக்கருவியாக மாற்றும் தன்மைக்காக அமோக வரவேற்பை பெற்றது. கையில் இருக்கும் போனை இசைக்கருவியாக மாற்றுவதே ஒரு புதுமை தான். இன்று ஸ்மார்ட்போன் சார்ந்த கித்தார் உள்ளிட்ட இசைக்கருவி செயலிகளுக்கு எல்லாம் முன்னோடியாக அமைந்த ஆரம்ப கால ஐபோன் இசை செயலிகளில் ஆக்கரினாவும் ஒன்று. ஆனால் ஆக்கரினா செயலி மற்ற செயலிகள் போல முன் தீர்மானிக்கப்பட்ட ஒலிக்கோவைகளை வழங்காமல், பயனாளிகளின் ஊதும் போது வரும் காற்றின் போக்கிற்கு ஏற்ப தனித்தன்மை வாய்ந்த ஒலியை உருவாக்கி தரக்கூடியதாக இருந்தது. அந்த அளவுக்கு மைக்ரோபோனின் உணரும் தன்மையை நன்றாக பயன்படுத்திக்கொண்டு இந்த செயலி உருவாக்கப்பட்டிருந்தது.

ஆனால், இசைப்பது என்பது இதன் ஒரு பகுதி தான். இந்த இசையை மற்றவர்களோடு பகிர்ந்து கொள்ள முடியும் என்பது தான் ஆக்கரினாவின் இன்னொரு தனிச்சிறப்பாக அமைந்தது. ஆம், ஆக்கரினா பயனாளிகள் தங்களைப்போலவே மற்ற பயனாளிகள் உருவாக்கும் ஒலிக்கோவைகளை கேட்டு மகிழலாம். செயலியில் உள்ள பூமி உருண்டை பகுதியில், இப்போது உலகில் எந்த மூளையில் எல்லாம் பயனாளிகள் ஆக்கரினாவை இசைத்துக்கொண்டிருக்கின்றர் என்பதை பார்த்து, அங்கி கிளிக் செய்து கேட்டு மகிழலாம். அதே போல தாங்கள் உருவாக்கும் இசையையும் பகிர்ந்து கொள்ளலாம். உங்கள் இசையை சேமித்தும் வைக்கலாம். இதற்கான பக்கத்தை ஆக்கரினா வலைமனையிலேயே உருவாக்கி கொள்ளலாம். இமெயில் மற்றும் பேஸ்புக் வாயிலாக நட்பு வட்டத்திலும் பகிர்ந்து கொள்ளலாம். இந்த சமூகத்தன்மையே ஆக்கரினா செயலியை இசைப்பிரியர்கள் மத்தியில் பிரபலமாக்கியது.

உண்மையில், ஐபோனின் கையடக்க கணிணி ஆற்றல் மற்றும் இணையத்தின் வலைப்பின்னல் தன்மை இரண்டையும் அழகாக பயன்படுத்திக்கொண்ட இசை செயலியாக ஆக்கரினா அமைந்தது.

இந்த செயலியின் வெற்றிக்கு பிறகு ஸ்முல் மேலும் பல செயலிகளை அறிமுகம் செய்துள்ளது. எல்லாமே சமூக பகிர்வு தன்மையை கொண்டவை. இவற்றில் ஒன்று தான் கரோக்கி செயலி. கரோக்கி செயலியில் இளம் பாடகர்கள் மற்றும் இசை ஆர்வம் உள்ளவர்கள் தங்கள் குரலில் மெட்டுக்கு ஏற்ப பாடி பதிவு செய்து கொள்ளலாம். குரல் வளத்தை விட்டுத்தள்ளுங்கள், இசை சூழலில் தன்னை மறந்து பாடுவதே ஒரு பரசவமான அனுபவம் தான். இந்த அனுபவத்தை பெறுவதோடு, இப்படி பாடியதை பதிவு செய்து நண்பர்களோடும் பகிர்ந்து கொள்ளலாம். ஸ்முல் பயனாளிகளோடும் பகிர்ந்து கொள்ளலாம். விரும்பினால் ஒரு பாடலை மற்றவர்களோடு சேர்ந்தும் பாடலாம். இது நல்ல இசை பயிற்சியாகவும் அமையும். யூடியூப்பில் போய் பார்த்தல் இப்படி இணைந்து பாடப்பட்ட பாடல்களின் வீடியோக்களை பார்க்கலாம். பாடும் திறனை மெருகேற்றிக்கொள்வதற்கான அம்சமும் இந்த செயலியிலேயே இருக்கிறது.

பிரபலமான பாடகர்களுடன் ரசிகர்கள் ஒரு பாடலை டூயட்டாக சேர்ந்து பாடிய அனுபவத்தையும் ஸ்முல் வழங்கியிருக்கிறது. இதில் ஒரு சில ரசிகர்கள் லட்சக்கணக்கானோரை கவர்ந்து இணைய நட்சத்திரமாகவும் உருவாகி இருக்கின்றனர். 2011 ல் ஜப்பானின் சக்திவாய்ந்த பூகம்பம் உலுக்கிய போது, உலகம் முழுவதும் உள்ளவர்கள் ஸ்முலில் ஒன்றிணைந்து என் தோள் மீது சாய்ந்து கொள்ளுங்கள் என பொருள்படும் லீன் ஆன் மீ பாடலை பாடி நெகிழ வைத்தனர்.

இசைப்பிரியர்கள் இசை மூலம் தங்களுக்குள் தொடர்பு கொள்வதையும், இசையால் பேசிக்கொள்வதையும் ஸ்முல் சாத்தியமாக்குகிறது. இசையை கேட்டு ரசிப்பது மட்டும் ரசிகர்களின் வேலை அல்ல, அவர்கள் இசையை உருவாக்கலாம், பகிர்ந்து கொள்ளலாம், புதிய இசையை கண்டறிலாம் என்கிறது ஸ்முல். அதுவே அதன் பலமாக இருக்கிறது.

 

இணைப்புகள்:

  1. ஸ்முல் ஆக்கரீனா பற்றி அறிய: https://www.smule.com/ocarina/original
  2. ஸ்முல் பற்றிய போர்ப்ஸ் கட்டுரை; https://www.forbes.com/sites/mnewlands/2016/09/20/smule-has-changed-the-music-industry-completely-heres-how/#5e20381b41c0
  3. ஸ்முல் சி.இ.ஒ பேட்டி- http://techblogwriter.co.uk/107-jeff-smith-smule-founder-ceo-talks-rise-social-music-apps/
  4. ஸ்முல் தொடர்பான நியூயார்க் டைம்ஸ் கட்டுரை- http://www.nytimes.com/2011/11/27/magazine/smule.html?mcubz=1

=

நன்றி. யுவர் ஸ்டோரி தமிழ் இணைய இதழில் எழுதியது

 

 

உலக வானெலிகளை கேட்டு ரசிக்க!

NDL-Android-Appஇணைய யுகத்திலும் வானொலிகளுக்கான தேவை இருப்பது மட்டும் அல்ல, இணையம் மூலம் வானெலிகளை கேட்டு ரசிப்பதும் எளிதாகி இருக்கிறது. இதற்கு உதாரணமாக திகழும் சேவைகளில் ரேடியோ.கார்டன் தளமும் ஒன்று.

வானொலி சேவை தொடர்பான மற்ற தளங்களை எல்லாம் விட ரேடியோ.கார்டன் மிகவும் எளிமையானதாக இருக்கிறது. இந்த தளத்தில் உலகில் உள்ள எந்த வானொலி நிலையத்தை வேண்டுமானாலும் கேட்டு ரசிக்கலாம். வானொலி நிலையத்தை தேடுவது மிகவும் சுலபம். தளத்தின் முகப்பு பகுதியில் கூகுளின் பூமி வரைபட சேவை தோன்றுகிறது. அதில் விரும்பிய நாட்டின் பகுதியில் கிளிக் செய்தால் அங்குள்ள வானொலியை கேட்கத்துவங்கிவிடலாம்.
இந்த சேவையை கிளிக் செய்ததுமே நம்முடைய இருப்பிடத்தை உணர்ந்து, அங்குள்ள வானொலி சேவையை அடையாளம் காட்டுகிறது. இதே முறையில் உலகின் எந்த பகுதிக்கும் சென்று வானொலியை கேட்கலாம்.
இது தவிர, வரலாற்று வானொலி நிகழ்ச்சிகளையும் கேட்டு ரசிக்கலாம். விளம்பரங்கள் மற்றும் கதைகளையும் கேட்டு ரசிக்கும் வசதி இருக்கிறது.
இணைய முகவரி: http://radio.garden/live/

செயலி புதிது; உள்ளங்கையில் பாடப்புத்தகங்கள்
தேசிய டிஜிட்டல் நூலகம் (NDLI ) பற்றி உங்களுக்குத்தெரியுமா? மத்திய மனித வள மேம்பாடுத்துறையின் கீழ் தகவல் தொழில்நுட்பம் மூலமான கல்விக்கான தேசிய திட்டம் முலம் உருவாக்கப்பட்ட டிஜிட்டல் நூலகம் இது.
மாணவர்கள் இந்த நூலகம் மூலம் பாட நூல்கள், கட்டுரைகள் போன்றவற்றை அணுகலாம். இந்த வசதியை மேலும் பரவலாக்குவதற்காக தற்போது ஐஐடி கராக்பூர் மாணவர்கள் சிலர் இந்த நூலகத்திற்கான ஆண்ட்ராய்டு செயலியை உருவாக்கி உள்ளனர்.
இந்த செயலி மூலமும் டிஜிட்டல் நூலகத்தில் உள்ள தகவல்களை அணுகலாம். தொழில்நுப்டம், சமூக அறிவியல், இலக்கியம் என பல்வேறு தலைப்புகளின் கீழ் புத்தகங்களும் ,கட்டுரைகளும் வகைப்படுத்தப்பட்டுள்ளன. கல்வி நிறுவனங்கள் பிரிவிலும் இவற்றை அணுகலாம். எந்த வகையான கற்றல் பாடங்கள் தேவையோ அதற்கேற்ப அணுகலாம். தேடல் வசதியும் இருக்கிறது.
ஆங்கிலத்தில் தேடலாம்ம். முதல் கட்டமாக இந்தி மற்றும் வங்காள மொழிகளில் தேடும் வசதியும் அறிமுகம் செய்யப்பட்டுள்ளது.
கல்லூரி தேர்வுக்கு தயாராகும் மாணவர்கள் முதல் போட்டித்தேர்வுக்கு தயாராகும் மாணவர்கள் வரை பல தரப்பட்ட மாணவர்களும் இந்த செயலியை பயன்படுத்திக்கொள்ளலாம்.

மேலும் விவரங்களுக்கு: http://www.ndlproject.iitkgp.ac.in/ndl/

இசை ரசிகர்களை உற்சாகத்தில் ஆழ்த்தும் இளையராஜா செயலி!

unnamed1இசைப்பிரியர்களையும், இளையராஜா ரசிகர்களையும் மகிழ்ச்சியில் ஆழ்த்தும் செய்தியாக, இளையராஜா இசைக்கான பிரத்யேக செயலி அறிமுகம் ஆகியுள்ளது. மாஸ்ட்ரோஸ் மியூசிக் எனும் இந்த செயலி இளையராஜாவின் அதிகாரபூர்வ செயலி என்பது தான் இன்னும் விசேஷமானது. இந்த பிரத்யேக செயலிக்கான அறிவிப்பை இளையராஜவே தனது பேஸ்புக் பக்கத்தில் பகிர்ந்து கொண்டு ரசிகர்களை மகிழ்ச்சியில் ஆழ்த்தினார்.

இசைஞானி, ராகதேவன், மேஸ்ட்ரோ என போற்றப்படும் இளையராஜாவின் இசை மீது ரசிகர்களுக்கு இருக்கும் அளவில்லா ஈடுபாடு பற்றி அனைவரும் அறிந்தது தான். ராஜாவின் இசை ஊக்கமளிக்கும் தாலாட்டாக, சோகங்களில் இருந்து ஆறுதல் அளிக்கும் மருந்தாக, உள்ளத்தை உற்சாகத்தில் ஆழ்த்தும் உத்வேக இசையாக என பலவிதங்களில் ரசிகர்களை கவர்ந்து வருகிறது. மணிக்கணக்கில் இளையராஜா பாடல்களை கேட்டு மெய்மறந்திருக்கும் ரசிகர்கள் அநேகம் பேர் உள்ளனர்.

யூடியூப் தளத்தில் அதிகம் கேட்டு பகிரப்படும் பாடல்களாக இளையராஜா இசையமைத்த பாடல்கள் அமைந்துள்ளன. சவுண்ட் கிளவுட் உள்ளிட்ட தளங்களிலும் அவரது பாடல்களை கேட்டு ரசிக்கலாம். ஸ்மார்ட்போனில் கேட்டு ரசிக்கும் வகையில் இளையராஜா பாடல்களுக்காக என்று பல செயலிகளும் இருக்கின்றன.

இந்நிலையில், இளையராஜா தனது ரசிர்களுக்காக என்று பிரத்யேக செயலியை உருவாக்கி அறிமுகம் செய்திருக்கிறார். ’என்னுடைய முதல் அதிகாரபூர்வ செயலிக்கு வரவேற்கிறேன்” என்று திங்கள் கிழமை அன்று தனது பேஸ்புக் பக்கத்தில் இளையராஜா, அறிவித்து ரசிகர்களை இன்ப அதிர்ச்சியில் ஆழ்த்தியிருந்தார். உலகம் முழுவதும் உள்ள எனது ரசிகர்கள், இசைத்திருட்டு இல்லாமல் எனது இசையை உள்ளங்கையில் அணுகலாம் என்றும் அவர் குறிப்பிட்டிருந்தார். இந்த செயலி மூலம் என்னுடன் தொடர்பு கொள்ளலாம், என்றும் இசை உருவாக்கம் பற்றி தெரிந்து கொள்ளலாம் என்றும் அவர் குறிப்பிட்டிருந்தார்.

இந்த பேஸ்புக் பதிவு வெளியான சில மணி நேரங்களில் எல்லாம் ரசிகர்கள் உற்சாகமாகி ஆயிரக்கணக்கில் கைல் தெரிவித்திருந்தனர். எண்ணற்றவர்கள் இந்த தகவலை பகிர்ந்து கொள்ளவும் செய்தனர். பல ரசிகர்கள் ,இது போன்ற ஒரு செயலியை தான் எதிர்பார்த்திருந்தோம் என்றும் மகிழ்ச்சியுடன் குறிப்பிட்டிருந்தனர்.

ஆண்ட்ராய்டு மற்றும் ஐபோனுக்கான வடிவங்களில் வெளியாகியுள்ள இந்த செயலி தொடர்பான தகவல்களை அளிக்க தனி இணையதளமும் (http://www.maestrosmusic.net/ ) உருவாக்கப்பட்டுள்ளது. கூகுள் பிளேஸ்டோரில் இருந்து ஆண்ட்ராய்டு போனுக்கான செயலியை தரவிறக்கம் செய்து பயன்படுத்தலாம்.

இளையராஜா ரசிகர்களுக்கு இசை விருந்தளிக்கும் வகையில் செயலி அமைந்துள்ளது. எளிமையான வடிவமைப்பு கொண்டுள்ள செயலியில் ராஜாவின் இசையை பல்வேறு தலைப்புகளின் கீழ் அணுக முடிகிறது. இந்த செயலியை முழுமையாக பயன்படுத்த இதில் உறுப்பினராக பதிவு செய்து கொள்ள வேண்டும். பேஸ்புக் அல்லது கூகுள் கணக்கு மூலம் உள்நுழைந்து உறுப்பினராகாலம். அல்லது பொபைல் எண் மூலம் உறுப்பினராகலாம்.

இளையாராஜா இசையில் உருவான பாடல்கள் , கர்நாடக இசை, சாஸ்திரிய இசை, பக்தி இசை, நாட்டுப்புற இசை, கருவிகள், காதல், துடிப்பான பாடல்கள், சோகப்பாடல்கள், மேற்கத்திய பாணி மற்றும் மெல்லிசை பாடல்கள் ஆகிய தலைப்புகளில் வகைப்படுத்தப்பட்டுள்ளன. இவற்றில் தேவையான பகுதியை கிளிக் செய்து பாடல்களை கேட்டு ரசிக்கலாம். பாடல்களை கேட்கவும், தரவிறக்கம் செய்யவும் வசதி இருக்கிறது. பாடல்களை நண்பர்களுடன் பகிர்ந்து கொள்ளவும் செய்யலாம்.

இவைத்தவிர, மாஸ்ட்ரோஸ் வழங்குவது, முன்னணியில் உள்ள பாடல்கள், வாரத்தின் சிறந்த பாடல் , மாதத்தின் இனிமையான குரல் ஆகிய தலைப்புகளின் கீழும் தேர்வுகள் இருக்கின்றன. செயலி அறிமுகமான கட்டத்தில் மாதத்தின் இனிய குரலாக சின்னக்குயில் சித்ரா ஈர்க்கிறார். வாரத்தின் சிறந்த பாடகாக நான் மகான் அல்ல படத்தின் மாலை சூடும் வேளை’ பாடல் அமைந்துள்ளது.

இவைத்தவிர தனுஷ் விருப்பங்கள், கமல் விருப்பங்கள் உள்ளிட்ட பிரபலமான தேர்வுகளும் பரிந்துரைக்கப்படுகின்றன.

இளையராஜா இசையமைத்த படங்களில் இருந்து எளிதாக பாடல்களை தேர்வு செய்ய விரும்பும் ரசிகர்கள் கவலைப்படவே வேண்டாம். இதற்காக என்றே நூகம் பகுதி அமைந்துள்ளது. இந்த பகுதியில் அவரது இசையில் உருவான படங்கள் அனைத்தும் அகரவரிசைப்படி வரவேற்கின்றன. விரும்பிய படத்தை தேர்வு செய்து அதில் உள்ள பாடல்களை கேட்டு மகிழலாம். திரைப்படங்களின் பாடல் ஆல்பத்தின் முகப்பு படங்கள் திரை நினைவுகளில் மூழ்க வைக்கின்றன.

முகப்பு பக்கத்தின் மேல் பகுதியிலேயே இளையராஜாவின் இணைய வானலியையும் கேட்டு ரசிக்கலாம். பாடல்களை குறிப்பிட்டு தேடும் வசதியும் இருக்கிறது. இதில் விருப்ப தேர்வுகளை கொண்ட பாடல்கள் பட்டியலையும் உருவாக்கி கொள்ளலாம்.

தீவிர இளையராஜா ரசிகர்களை பரவசத்தில் ஆழ்த்தக்கூடிய பகையில் செயலி வடிவமைக்கப்பட்டுள்ளது. கூகுள் பிளேஸ்டோரில் செயலி நல்ல வரவேற்பை பெற்றிருப்பதுடன், ரசிகர்கள் உற்சாகமாக கருத்துக்களையும் தெரிவித்துள்ளனர். பலரும் இந்த செயலிக்காக நெகிழ்ச்சியுடன் நன்றி தெரிவித்துள்ளனர். செயலியின் வடிவமைப்பு பரவலாக பாராட்டப்பட்டாலும், ரசிகர்கள் தங்கள் எதிர்பார்ப்பு தொடர்பான கோரிக்கைகளையும் முன்வைத்து வருகின்றனர். இன்னும் பிரத்யேகமான தேடல் வசதி தேவை என ஒருவர் குறிப்பிட்டுள்ளார். அறிவிக்கை வசதி தேவை என்றும் சிலர் குறிப்பிட்டுள்ளனர். வேற்று மொழி பாடல்களையும் எளிதாக அணுகும் வசதி தேவை என்றும் குறிப்பிட்டுள்ளனர். மொதத்தில் இளையராஜா ரசிகர்களை இந்த செயலி உற்சாகத்தில் ஆழ்த்தியிருக்கிறது.

இந்த செயலியில் புதிய அம்சங்கள் சேர்க்கப்பட்டு மேலும் மெருகேற்றப்படும் என்ற எதிர்பார்ப்பும் ரசிகர்கள் மத்தியில் இருக்கிறது.

 

மேலும் விவரங்களுக்கு: http://www.maestrosmusic.net/

 

 

விஞ்ஞானிகளை கவர்ந்த பாப் டைலன்!

gettyimages-85061395அமெரிக்க பாடகரும், பாடலாசிரியருமான பாப் டைலன் இலக்கிய நோபல் பரிசுக்காக தேர்வு செய்யப்பட்டது உலக அளவில் ஆச்சர்யத்தையும், ஏற்படுத்தவே செய்தது. இருந்தாலும் இந்த விருக்து ஒரு இலக்கிய மேதைக்கே வழங்கப்பட்டிருக்க வேண்டும் என்பதே பலரது அபிப்ராயமாக இருக்கிறது.
மேலைநாட்டு இலக்கிய மேதைகளின் பெயர்களுக்கு பரிட்ய்சமான தமிழ் இலக்கிய உலகில் பாப் பாடகரான டைலனுக்கு இலக்கிய நோபல் எனும் செய்தி கொஞ்சம் கூடுதல் அதிர்ச்சியை ஏற்படுத்தியதாக தெரிகிறது.
எனக்கு டைலனிடம் அதிக பரிட்சயம் இல்லை: இசையிலும் அத்தனை தேர்ச்சி இல்லை என்பதால், டைலனுக்கு இலக்கிய நோபல் வழங்கப்பட்டது சரியா? தவறா? என அலசி ஆராய முற்படப்போவதில்லை. டைலனுக்கு நோபல் பரிசு அறிவிக்கப்பட்ட நாள் முதல் அவரைப்பற்றி ஒரு சிறு குறிப்பு எழுதிவிட துடித்துக்கொண்டிருந்தேன். டைலனை அதிகம் அறியாத நிலையில், வெறும் கூகுள் தேடலில் அவரைப்பற்றி எழுத விரும்பவில்லை. ஆனால் அதிர்ஷ்டவசமாக டைலன் பற்றி எழுது அருமையான வாய்ப்பு கிடைத்துள்ளது. டைலன் விஞ்ஞானிகளை பெரிதும் கவர்ந்திருக்கிறார் எனும் செய்தி தான் அது.
டைலனின் வரிகள் அமெரிக்க பாடல் பாரம்பரியத்தில் புதிய கவித்துவ வெளிப்பாட்டை பிரதிபலிக்கின்றன என்ற நோபல் குழுவின் பாராட்டு ஒரு புறம் இருக்க, அவரது வரிகள் விஞ்ஞானிகளால் அவரது ஆய்வுக்கட்டுரைகளில் விரும்பி மேற்கோள் காட்டப்பட்டுள்ளது எனும் தகவல் அவரது கவித்துவ தாக்கத்தை உணர்த்துவதாக இருக்கிறது.
இதில் என்ன விஷேசம் என்றால், இந்த தகவல் கடந்த ஆண்டு வெளியான ஆய்வுக்கட்டுரையில் தெரிவிக்கப்பட்டுள்ளது என்பது தான். பி.எம்.ஜே எனும் சஞ்சிகையில் வெளியான அந்த கட்டுரை, விஞ்ஞான ஆய்வுக்கட்டுரைகளில் 727 முறை பாப் டைலன் பற்றிய மேற்கோள்கள் இருப்பதாக தெரிவிக்கிறது.
ஆக, டைலன் விஞ்ஞானிகளையும் கவர்ந்திருக்கிறார். இதற்கு அழகான உதாரணம் பார்ப்போமா? நைட்ரிக் அமிலம் பற்றிய கட்டுரை ஒன்றில், பதில் காற்றில் வீசிக்கொண்டிருக்கிறது (“Nitric Oxide and Inflammation: The answer is blowing in the wind.” ) எனும் டைலனின் வரி பொருத்தமாக அமைந்துள்ளது.
நெதர்லாந்தை சேர்ந்த ஜெர் ரிஜ்கர்ஸ் எனும் விஞ்ஞானி, நான் டைனலில் ரசிகன், அதனால் தான் அவரை மேற்கோள் காட்டுகிறேன் என்று கூறியுள்ளார்.
டைலனின் பாடல் வரிகள் சாகசம் நிறைந்ததாக, சித்தனையை தூண்டுவதாக இருப்பதே இதற்கு காரணம் என்றும் அவர் தெரிவித்துள்ளார்.
நிற்க, ஸ்வீடனின் கரோலின்ஸ்கா பல்கலைக்கழகத்தை சேர்ந்த ஆய்வாளர்கள் சிலர், தங்களில் யார் அதிக அளவில் டைலனின் வரிகளை மேற்கோள் காட்டுகிறோம் என பார்க்கலாம் என ஒரு போட்டி வைத்துக்கொண்டதாகவும் ஒரு செய்தி வெளியாகியுள்ளது.
டைலனுக்கு நோபல் பரிசு வழங்கப்பட்டது பற்றி கருத்து கூறும் முன் டைலனை அறிந்து கொள்வது நல்லது.
விஞ்ஞான சமூகத்தில் டைலனின் தாக்கம் ஒரு புறம் இருக்க, விஞ்ஞான கட்டுரைகளில் அவரை விட தாக்கம் செலுத்திய பாடகர்கள் இல்லாமல் இல்லை: அவர்களின் பெயர் பீட்டில்ஸ்!

செய்தி இணைப்பு:https://www.newscientist.com/article/2109079-its-not-just-the-nobel-committee-scientists-love-bob-dylan-too/

பாப் டைலன் பற்றி அறிய:http://bobdylan.com/

 

nostalgiamachine

இந்த தளம் இசை கால இந்திரம்!

விரும்பின இசையை கேட்டு ரசிக்க புதிய வழியை மட்டும் அல்ல புதுமையான வழியை அறிமுகம் செய்திருக்கிறது தி நாஸ்டால்ஜியா மிஷின் இணையதளம்.  அப்படி இந்த தளம் என்ன செய்கிறது என்று கேட்டால் ,காலத்தால் பின்னோக்கி அழைத்துச்சென்று அந்த காலத்தி இசையை கேட்டு லயிக்க வைக்கிறது. அந்த வகையில் இது சாதாரண இணையதளம் அல்ல, இசைக்கான கால இயந்திரம்.

இப்போது இசைப்பிரியர்களுக்கு இந்த தளம் என்ன செய்கிறது என்பது இசை மின்னலாக தோன்றியிருக்குமே !

சிறு வயதிலோ அல்லது இளம் பருவத்திலோ கேட்டு ரசித்த பாடல்கள் எல்லோர் மனதிலும் இருக்கும் அல்லவா? இந்த பாடல்களை கேட்கும் போதே அந்த கால நினைவுகளில் மூழ்கிவிடலாம். இந்த பிளேஷ்பேக் அருமையான அனுபவம் . இதே அனுபவத்தை தான் இந்த இணையதளம் வழங்க முற்படுகிறது.  இதன் முகப்பு பக்கத்தின் மையத்தில் உள்ள கட்டத்தில் கடந்த காலத்தில் நாம் விரும்பும் ஆண்டை தேர்வு செய்து கிளிக் செய்தால் போதும் இந்த தளம் அந்த காலத்தில் பிரபலமான போக்காக இருந்த பாடல்களை பட்டியல் போட்டு காட்டுகிறது.

ஒவ்வொருவரும் அவர்களுக்கு விரும்பிய ஆண்டை தேர்வு செய்து கொள்ளலாம். அந்த கால இசை நினைவுகளில் மூழகலாம். அருமையான இணைதளம் இல்லையா? என்ன ஒரே குறை , எல்லா பரிந்துரைகளுமே பாப் பாடல்கள் மற்றும் மேற்கத்திய மெட்டுகள் தான். நம்மூர் இசையையும் சேர்த்திருந்தால் நன்றாக இருக்கும். அல்லது நம்மூர் இசை தளங்கள் இதே போன்ற சேவையை முயற்சிக்கலாம். 70 களை கிளிக் செய்து இளையராஜாவின் அன்னக்கிளியை கேட்பதோ 60 களை கிளிக் செய்து டிஎம்.எஸ் ஹிட்களை கேட்பதோ சுகமாக இருக்கும்  அல்லவா?

 

இசை நினைவில் மூழ்க; http://thenostalgiamachine.com/