Tag Archives: youtube

உங்களை செதுக்கி கொள்ள உதவும் யூடியூப் சானல்கள்

youயூடியூப் வெறும் பொழுதுபோக்கு வீடியோக்களின் இருப்பிடம் மட்டும் அல்ல. பாடம் பயில உதவும் கல்வி சார்ந்த வீடியோக்கள் முதல், விஞ்ஞான தகவல்களை எவருக்கும் புரியும் வகையில் எளிதாக விளக்கும் வீடியோக்கள் வரை பயனுள்ள சேனல்கள் பல இருக்கின்றன. ஆர்வம் மட்டும் இருந்தால், போட்டோஷாப் முதல், புகைப்படக்கலை வரை எல்லாவற்றையும் யூடியூப் வீடியோக்களை பார்த்து கற்றுக்கொள்ளலாம்.

கட்டுரைகள் அல்லது புத்தகங்களை வாசிப்பதைவிட வீடியோவாக பார்த்து தெரிந்து கொள்வது சுவாரஸ்யமாக இருக்கிறது என நினைப்பவர்களுக்கு யூடியூப் ஒரு பல்கலைக்கழகம் தான். அந்த வகையில், உங்களை நீங்களே செதுக்கி கொள்ள விரும்பினாலும் சரி, அதற்கேற்ற வீடியோ சேனல்கள் அநேகம் இருக்கின்றன. அதாவது செயல்திறன் மேம்பாட்டிற்கு வழிகாட்டும் வீடியோ சேனல்கள்.

செயல்திறன் மேம்பாடு என்பது நிறுவனங்களுக்கு மட்டும் உரித்தானதா என்ன? தனிமனிதர்களுக்கும் செயல்திறன் மேம்பாடு முக்கியம் தான். சோம்பலை வெல்ல, எதையும் தள்ளிப்போடாமல் குறித்த நேரத்தில் முடிக்க, நினைத்ததை செய்து இலக்கை நோக்கி முன்னேற செயல்திறன் மேம்பாட்டு உத்திகள் அவசியம். இதற்கு வழிகாட்டும் புத்தகங்களும் அநேகம் இருக்கின்றன. கட்டுரைகளும் ஆயிரக்கணக்கில் இருக்கின்றன.

இந்த புத்தகங்கள் கட்டுரைகள் ஆகியவற்றை அடிப்படையாக வைத்துக்கொண்டு, அதில் உள்ள வழிகளை சுவாரஸ்யமாக வீடியோ வடிவில் விளக்கும் சேனல்கள் சிலவற்றைப்பார்க்கலாம்:

வாரம் ஒரு வீடியோ: (http://www.productivitygame.com/ )

’புரடக்டிவிட்டி கேம்’ யூடியூப் சேனலில் வாரம் ஒரு வீடியோவை பார்க்கலாம். ஒவ்வொரு வீடியோவும், புகழ்பெற்ற செயல்திறன் மேம்பாட்டு புத்தகத்தின் சாரம்சம் அல்லது அதில் உள்ள முக்கிய வழிகளை விளக்கும் வகையில் அமைந்துள்ளன. அனிமேஷன் முறையில் சுவாரஸ்யமாக கருத்துக்கள் விவரிக்கப்படுகின்றன. இந்த சேனலுக்கு புதியவர்கள் ஏற்கனவே பதிவேற்றப்பட்ட வீடியோக்களையும் பார்க்கலாம். செயல்திறன் மேம்பாட்டு நுணுக்கங்களை அறிந்து கொள்ள சிறந்த வழி என்பதோடு, அடுத்ததாக என்ன புத்தகம் படிக்கலாம் என்பதற்கான வழிகாட்டியாகவும் இவற்றை கருதலாம். இந்த வீடியோ விளக்கத்திற்கு பிறகு மூல நூலை படிப்பது இன்னும் சுவாரயமாக இருக்கும். இதே பெயரிலான இணையதளும் இருக்கிறது. வீடியோவில் இடம்பெறும் புத்தகக சுருக்கடத்தின் பிடிஎப் வடிவங்கள் இந்த தளத்தில் இடம்பெற்றுள்ளன.

மேதைகளின் பாதை (http://www.evancarmichael.com/ )

புத்தகங்களை பார்த்து கற்றுக்கொள்வது முன்னணி தொழிலதிபர்கள் வாழ்க்கையில் இருந்தும் செயல்திறனுக்கான வழிகளை கற்றுக்கொள்ளலாம். அதை தான் இவான் கார்மைக்கேலின் யூடியூப் சேனல் செய்கிறது. ஸ்டீவ் ஜாப்ஸ் முதல் வாரன் பப்பே வரை பலரது வாழ்க்கையில் இருந்து முன்னேற்றத்திற்கான வழிகளை தனது வீடியோக்கள் மூலம் இவர் தொகுத்தளிக்கிறார். கனடாவைச்சேர்ந்தவரான இவானும் ஒரு தொழில்முனைவோர் தான். தொழில்முனைவோர்களை நான் நம்புகிறேன் என்றும் சொல்லும் இவான், அவர்கள் வாழ்க்கையில் இருந்து கற்றுக்கொள்ளக்கூடியவற்றை வீடியோ வழியில் விளக்கி ஊக்கம் அளிக்கிறார். யூடியூப் சேனலில் இவருக்கு ஏழு லட்சத்திற்கும் மேற்பட்ட சந்தாதாரர்கள் இருக்கின்றனர். இவரது இணையதளம் மூலமும் வீடியோக்களை அணுகலாம். அமைதியான தூக்கம், முடிவெடுக்கும் ஆற்றல், வெற்றிக்கான வழிகள் என பல்வேறு விஷயங்களில் வழிகாட்டுகிறார். தொழில்முனைவில் ஆர்வம் கொண்டவர்களுக்கு கூடுதலாக ஊக்கம் அளிக்கும் இந்த இணையதளம்.

கேரியை கேளுங்கள்  (https://www.garyvaynerchuk.com/ )

அமெரிக்கரான கேரி வெயன்ர்செக் தொழில் நிறுவனங்களை துவக்குவதையே தொழிலாக வைத்துக்கொண்டிருப்பவர். தொடர் தொழில்முனைவாளர் என்று வர்ணிக்கப்படுகிறார். இணைய ஆற்றலை புரிந்து கொண்டு அவற்றை தொழில் வாய்ப்புகளாக மாற்றுவது கேரிக்கி கைவந்த கலை. தொழில் அனுபவத்தில் தான் கற்ற பாடங்களை கேரி வீடியோவாக பகிர்ந்து கொள்கிறார். தானே ஒரு தொடர் நிகழ்ச்சியையும் நடத்தி வருகிறார். என் வாழ்க்கையின் வெற்றிக்கு பொறுமை தான் முக்கிய காரணம் என ஒரு வீடியோவில் உற்சாகமாக சொல்கிறார். இவரது வாழ்க்கை பாடங்கள் உங்களுக்கும் ஊக்கம் அளிக்கலாம். 7 லட்சத்திற்கு மேற்பட்ட சந்ததாரர்களை கொண்ட யூடியூப் சேனல் தவிர தனது பெயரில் சுறுசுறுப்பான இணையதளத்தையும் நடத்தி வருகிறார்.

இணைய நுணுக்கங்கள் (https://www.youtube.com/user/dottotech )

செயல்திறன் மேம்பாட்டு குறிப்புகள் இணைய பயன்பாடு சார்ந்ததாக இருந்தால் இன்னும் நன்றாக இருக்கும் என நீங்கள் நினைத்தால் ஸ்டீவ் டோட்டோவின், டோட்டோடெக் சேனலை நாடலாம். கூகுள் வரைபட சேவையை பயன்படுத்தும் வழிகள், இணைய குறிப்பேடு சேவையான எவர்நோட்டை இன்னும் சிறப்பாக பயன்படுத்துவது எப்படி? ஜிமெயிலில் நீங்கள் அறிய வேண்டியவை என பல்வேறு விதமான இணைய நுணுக்கங்களை இவர் வீடியோவில் விளக்குகிறார். பிரவுசர் குறிப்புகள் முதல் பாஸ்வேர்டு பாதுகாப்பு வரை எண்ணற்ற விஷயங்களை அறியலாம். தினம் ஒரு வீடியோவாக பார்த்து வந்தால் கூட போதும் நீங்கள் இணைய பயன்பாட்டில் கில்லாடியாகிவிடலாம். தொழில்நுட்ப சந்தேகங்கள் இருந்தாலும் இவரிடம் கேட்டு தெளிவு பெறலாம்.

மாணவர்களுக்கு.. (https://collegeinfogeek.com/ )

நீங்கள் மாணவராக இருந்து கற்றல் திறனை மேம்படுத்திக்கொள்ள வேண்டும் என விரும்பினால் காலேஜின்போகீக் யூடியூப் சேனல் அதற்கு வழிகாட்டுகிறது. படித்தவற்றை எப்படி மறக்காமல் நினைவில் நிறுத்திக்கொள்வது, அதிகாலை பழக்கங்களை ஏற்படுத்திக்கொள்வது எப்படி? சுய ஒழுக்கத்தை உருவாக்கி கொள்வது எப்படி? வகுப்பில் குறிப்புகள் எடுப்பது எப்படி? என பலவகையான தலைப்புகளில் வீடியோக்கள் வழிகாட்டுகின்றன. அமெரிக்கத்தன்மை இருந்தாலும் இதில் இடம்பெறும் குறிப்புகள் பொதுவானவை. தாமஸ் பிராங்க் என்பவர் இந்த சேனலை நடத்தி வருகிறார். இவருக்கும் தனியே இணையதளம் இருக்கிறது.

சுய முன்னேற்றக்குறிப்புகள் (https://www.youtube.com/channel/UCRI6t05DNVlV0XhdI7hx_iw)

ஒன்பர்செண்ட்பெட்டர் சேனல், சுய முன்னேற்ற நூல்களில் இடம்பெற்றிருக்கும் குறிப்புகளை அழகிய அனிமேஷன் வீடியோக்களாக வழங்குகிறது. வாரம் நான்கு புத்தகங்கள் படிப்பது எப்படி? புதிய பழக்கங்களை உருவாக்கி கொள்வது எப்படி? போன்ற விஷயங்களையும் கற்றுக்கொள்ளலாம். பல பெஸ்ட்செல்லர் புத்தகங்களின் முக்கிய வழிகளையும் அனிமேஷன் வீடியோவாக பார்க்கலாம்.

பணியிட வழிகாட்டி (https://www.youtube.com/channel/UCAp3b6zIvS8ct4yci-GwxIg/videos )

சிம்ப்ளிவிட்டி வீடியோ சேனல் அலுவலக சூழலில் செயல்திறனை மேம்படுத்திக்கொள்வதற்காக வழிகாட்டுகிறது. இமெயில் பயன்பாடு, இணைய குறிப்பேடு சேவைகளை பயன்படுத்தும் வழி என எல்லாமே பணி சார்ந்த வீடியோக்களாக அமைகிறது. குறிப்பாக இமெயில் பயன்பாட்டில் நேரத்தை வீணாக்காமல் மேலும் சிறந்த முறையில் அவற்றை கையாளும் வழிகளை விளக்கும் பல வீடியோக்கள் இருக்கின்றன. இணையம் சார்ந்த பல நுணுக்கங்களையும் கற்றுக்கொள்ளலாம்.

 

தளம் புதிது; வீடியோக்களை திருத்த உதவும் சேவை

இணையவாசிகள் பலரும் இப்போது ஸ்மார்ட்போனில் இருந்து தான் இணையத்தை அதிகம் அணுகுகின்றனர். பேஸ்புக் பதிவுகளை பார்ப்பது முதல், ஒளிப்படங்களை பார்ப்பது, வீடியோக்களை கண்டு ரசிப்பது என எல்லாவற்றுக்கும் ஸ்மார்ட்போனை நாடுகின்றனர். ஸ்மார்ட்போன் உள்ளங்களையில் இணையத்தை கொண்டு வந்தாலும் அதில் சின்ன சின்ன சிக்கல்கள் இல்லாமல் இல்லை. உதாரணத்திற்கு வீடியோக்களையே எடுத்துக்கொள்வோம். இணைய வீடியோக்கள் முழுவதும், அகல வடிவில் எடுக்கப்பட்டவை. இவற்றை ஸ்மார்ட்போன் திரையில் பார்க்கும் போது பொருத்தமில்லாமல் இருக்கும்.

ஸ்மார்ட்போன் திரையில் ஒளிப்படங்களோ, வீடியோக்களோ சதுர வடிவில் அல்லது, நீள் வடிவில் இருந்தால் நல்லது. ஒளிப்படம் என்றால், ஸ்மார்ட்போன் திரைக்கு ஏற்ப திருத்திக்கொள்ளலாம். ஆனால் வீடியோக்களை என்ன செய்வது?

இந்த கேள்விக்கு பதிலாக அமைகிறது கிராப்.வீடியோ இணையதளம். அகல வடிவிலான வீடியோக்களை ஸ்மார்ட்போன் திரைக்கு ஏற்ப இந்த தளம் திருத்தி தருகிறது. அடிப்படை சேவை இலவசமானது. ஆனால் கூடுதல் வசதிக்கு கட்டணம் செலுத்த வேண்டும்.

இணையதள முகவரி: https://crop.video/

 

 

 

——-

செயலி புதிது: பழக்கங்களை கற்றுத்தரும் செயலி

பழக்க வழக்கங்கள் தான் சாதனையாளர்களை உருவாக்குகின்றன என்கிறது டைனிகெயின் செயலி. ஆண்ட்ராய்டு போன்களுக்கான இந்த செயலி, நீங்களும் இது போன்ற வெற்றிகரமான பழக்க வழக்கங்களை உருவாக்கி கொள்ள வழி செய்கிறது. மற்றவர்கள் பின்பற்றும் வெற்றிகரமான பழக்கங்களை அறிந்து கொண்டு பின்பற்றுவதோடு, பிரபலமானவர்களின் அதிகாலை பழக்கங்களையும் கற்றுக்கொள்ளலாம்.

அதிகாலை பழக்கங்களை மேலும் மேம்படுத்திக்கொள்வதற்கான குறிப்புகளையும் அளிக்கிறது. அதற்கேற்ப நன்றாக தூங்குவதற்கான வழிகளையும் முன்வைக்கிறது. உங்கள் வாழ்க்கையை மேலும் ரசிக்க, மேலும் மகிழ்ச்சியாக இருக்க இந்த குறிப்புகள் வழி காட்டும் என இந்த செயலி தெரிவிக்கிறது. பணியிடத்தில் மேலும் கவனத்தை மேம்படுத்திக்கொள்ளவும் இந்த செயலியை நாடலாம்.

மேலும் விவரங்களுக்கு: https://play.google.com/store/apps/details?id=com.ziggycrane.tinygain

 

–=

நன்றி; தமிழ் இந்து இளமை புதுமையில் எழுதியது.

 

 

 

 

 

 

தூங்க வைக்கும் இணையதளம் இது!

தூக்கமின்மை பிரச்சனையால் தவிப்பவர்களுக்கு உதவுவதற்காக என்றே ’நேப்பிளிக்ஸ்’ எனும் புதிய இணையதளம் அறிமுகமாகியுள்ளது. இந்த இணையதளத்தை பார்த்துக்கொண்டிருந்தாலே போதும் தானாக தூக்கம் வந்துவிடும்- அதாவது இந்த தளத்தில் இடம்பெற்றுள்ள யூடியூப் வீடியோக்களை பார்த்தால் தூக்கம் வரும்! அதற்கேற்ற வகையில் இந்த தளத்தில் இடம்பெறும் வீடியோக்கள் தேர்வு செய்யப்பட்டுள்ளன.
யூடியூப்பில் பொதுவாக, ஹிட்களை அள்ளிக்குவிக்கும் வீடியோக்களே அதிகம் பேசப்படும்: அதன் காரணமாகவே அதிகம் பார்த்து ரசிக்கப்படும். இப்படி ஹிட்டான வீடியோக்கள் தவிர அதிகம் கவனத்தை ஈர்க்காத அருமையான வீடியோக்களும் ஆயிரக்கணக்கில் இருக்கின்றன. அதே போல ஒரு சில நிடங்களுக்கு மேல் பார்க்க முடியாமல் அலுப்பூட்டி விரட்டும் வீடியோக்களும் அநேகம் இருக்கின்றன. இந்த வகை வீடியோக்களை யாரும் பெரிதாக கண்டுகொள்வதில்லை.
நேபிபிளிக்ஸ் இணையதளம் இத்தகைய அலுப்பூட்டும் வீடியோக்களை எல்லாம் தேடிப்பிடித்து பட்டியலிடுகிறது. அதன் நோக்கம், இவற்றை பார்த்து தூக்கத்தை வரவைத்துக்கொள்வது தான்.
சுவாரஸ்யம் இல்லாத படங்கள் அல்லது வீடியோக்களை பார்க்கும் போது, தூக்கம் வருகிறது என நொந்து கொள்வோம் அல்லவா? இவற்றை விமர்சசனமாக தான் கருத வேண்டுமா என்ன? இத்தகைய வீடியோக்களை எல்லாம் ஒரே இடத்தில் சேமித்து வைத்து, தூக்கமின்மையால் தவிக்கும் போது, ஏதேனும் ஒரு சில வீடியோக்களை தேர்வு செய்து பார்த்தால் தூங்கி வழியலாம் அல்லவா? இதை தான் நேப்பிளிக்ஸ் தளம் செய்கிறது.
பார்வையாளர்களுக்கு தூக்கத்தை வர வைக்க கூடிய வீடியோக்கள் மட்டுமே இந்த தளத்தில் இடம்பெறுகின்றன. இந்த வீடியோக்களையும், அவரவர் ரசனைக்கேற்ப விளையாட்டு, வீடியோகேம், இசை என பலவகைகளில் இருந்து தேர்வு செய்து பார்க்கலாம். வீடியோக்களில் நேரத்தை செட் செய்து கொள்ளும் வசதியும் இருக்கிறது.
டிவி பார்த்துக்கொண்டே தூங்கிவிடும் பழக்கம் கொண்டவர்களுக்கு இந்த தளம் மிகவும் ஏற்றதாக இருக்கும். பொதுவாக இணையத்தில் வீடியோ பார்ப்பவர்களுக்கும் இந்த தளம் உதவியாக இருக்கும்.
மழையின் ஓசையை படம்பிடிக்கும் வீடியோ, ஒருவர் காரை சுத்தம் செய்வதை சித்தரிக்கும் வீடியோ என இந்த கலெக்‌ஷன் அருமையாக அமைந்திருக்கிறது.

இணையதள முகவரி:http://napflix.tv/

 

இந்த தளத்தை இந்த பதிவுடன் பொருத்திப்பார்த்தால் சுவார்ஸ்யமான புரிதல் உண்டாகும்: http://cybersimman.com/2016/09/18/video-18/

 

பாதுகாப்பாக வீடியோக்களை பார்க்கும் வழி

தளம் புதிது: பாதுகாப்பாக வீடியோக்களை பார்க்கும் வழி
safeshare_logo

இணையத்தில் வீடியோக்களை பார்க்க எத்தனையோ வழிகள் இருக்கின்றன. இவற்றில் யூடியூப் நன்கறியப்பட்டதாக இருக்கிறது. யூடியூப் தவிர விமியோ உள்ளிட்ட வீடியோ பகிர்வு சேவைகளும் இருக்கின்றன.
யூடியூப்பில் எல்லா வகையான வீடியோக்களையும் பார்த்து ரசிக்கலாம் என்றாலும், இடையூறாக தோன்றும் விளம்பரங்களை பொறுத்துக்கொள்ள வேண்டும். எனினும் விளம்பரங்கள் இல்லாமல் வீடியோக்கள் பார்க்க விரும்பினால் சேப்ஷேர்.டிவி இணையதளம் அதற்கு வழிகாட்டுகிறது.
யூடியூப் வீடியோவுக்கான இணைப்பை இந்த தளத்தில் சமர்பித்தால் அதில் உள்ள விளம்பரங்களை நீக்கி வீட்டு, இடையூறு இல்லாமல் பார்க்க கூடிய வடிவில் மாற்றித்தருகிறது. இந்த இணைப்பை மற்றவர்களுடன் பகிர்ந்து கொள்ளவும் செய்யலாம்.
விளம்பரங்களை நீக்குவதோடு, தொடர்புடைய வீடியோக்களையும் நீக்கி விடுவதால் சிறுவர், சிறுமியர்களுக்கு இந்த இணைப்புகளை நம்பி பரிந்துரைக்கலாம். நாம் தேர்வு செய்ய வீடியோவை மட்டும் அவர்கள் பார்க்க முடியும். அந்த வகையில் இந்த சேவை மிகவும் பாதுகாப்பானது. யூடியூப்பில் உள்ள பாதுகாப்பு வசதியை விட இது சிறந்த்து என்கிறது சேப்ஷேர் தளம். எனவே கல்வி சார்ந்த வீடியோக்களை பரிந்துரைக்க இந்த வசதி மிகவும் ஏற்றது. வீடியோவின் துவக்கம் மற்றும் முடிவையும் தீர்மானிக்கும் வசதி இருக்கிறது.
யூடியூப் வீடியோ மட்டும் அல்லாமல் விமியோ தளத்தில் உள்ள வீடியோக்களையும் இப்படி பகிர்ந்து கொள்ளலாம்.

இணைய முகவரி: http://safeshare.tv/

செயலி புதிது: உள்ளங்கையில் விக்கிபீடியா’

wikipedia-android
கட்டற்ற கலைக்களஞ்சியமான விக்கிபீடியாவை ஸ்மார்ட்போன்களில் செயலி வடிவிலும் அணுகலாம் என்பது உங்களுக்கு தெரிந்திருக்கும். இப்போது, ஆண்ட்ராய்டு போன்களுக்கான விக்கிபீடியா செயலி புதுப்பிக்கப்பட்டுள்ளது. புதிய வடிவில் மாற்றி அமைக்கப்பட்ட முகப்பு பக்கம் மற்றும் கூடுதல் அம்சங்கள் இடம்பெற்றுள்ளன.
செயலியை திறந்ததும் தோன்றும் முகப்பு பக்கத்தில் தேடல் வசதி பிரதானமாக இருக்கிறது. இங்கிருந்தே வேண்டிய கட்டுரைகளை தேட்த்துவங்கலாம். குரல் வழி தேடலுக்கான வசதியும் இருக்கிறது.
தேடல் பகுதிக்கு கீழ், பிரபலமாக உள்ள கட்டுரைகள், செய்திகள் மற்றும் ஒளிபடங்கள் பரிந்துரைக்கப்படுகின்றன. வாசிக்கும் கட்டுரைகளுக்கு தொடர்புடைய கட்டுரைகளும் பரிந்துரைக்கப்படுகின்றன.
முகப்பு பக்கத்தை விருப்பத்திற்கு ஏற்ப மாற்றி அமைத்துக்கொள்ளும் வசதியும் இருக்கிறது. இதன் மூலம் அதிகம் பயன்படுத்தாத அம்சங்களை விலக்கி விடலாம்.
வாசித்துக்கொண்டிருக்கும் கட்டுரைகளை சேமித்து வைத்து பின்னர் படிக்கும் வசதியும் இருக்கிறது. இணைய இணைப்பு இல்லாவிட்டாலும் கூட சேமிக்கப்பட்ட கட்டுரையை வாசிக்கலாம்.
கட்டுரைகளின் மொழியையும் மாற்றி அமைத்துக்கொள்ளலாம். பின்னணி மற்றும் எழுத்துரு அளவிலும் மாற்றங்களை செய்யலாம்.

மேலும் விவரங்களுக்கு: https://play.google.com/store/apps/details?id=org.wikipedia

==

வீடியோ புதிது: நலமாய் இருப்பதன் அறிகுறிகள்
2
வாழ்க்கையில் எப்போது வேண்டுமானாலும் பிரச்சனைகள் வரலாம். அப்படி பிரச்சனைகள் வரும் போது உடலும் உள்ளமும் சோர்ந்து போகலாம். ஆனால், வாட்டும் பிரச்சனைகளால் சோர்வுக்கு உள்ளாகி இருக்கும் போது அதிலிருந்து மீண்டு வர விரும்பினால், பவர் ஆப் பாசிடிவிட்டு உருவாக்கியுள்ள வீடியோவை பார்த்து ஊக்கம் பெறலாம்.
ஒருவரது சோர்வான மனநிலைக்கான காரணம் என்னவாக இருந்தாலும் சரி, அதைப்பற்றி கவலைப்படாமல் உற்சாகமாக இருப்பதற்கான பத்து காரணங்களை இந்த வீடியோ சுட்டிக்காட்டுகிறது.
சொந்தமாக குடியிருக்க விடு இருப்பது, குடிப்பதற்கு நல்ல தண்ணீர் கிடைப்பது, அக்கறை கொள்ள யாரேனும் இருப்பது .. என நீளும் இந்த காரணங்களை யாராலும் மறுத்து சொல்ல முடியாது.
ஊக்கம் தருவதோடு, சிந்திக்கவும் வைக்கிறது இந்த வீடியோ.

வீடியோவைக்காண: https://www.youtube.com/watch?v=mQonlXk_FBM

பாஸ்வேர்டு குறிப்புகள்

இணைய உலகில் சைபர் தாக்குதல்கள் அதிகரித்து வரும் நிலையில் பாஸ்வேர்ட்களின் முக்கியத்துவதும் அதிகரித்திருக்கிறது. பாஸ்வேர்ட் பாதுகாப்பு தொடர்பான விழிப்புணர்வும் அதிகரித்துள்ளது.
பலரும் வலுவான பாஸ்வேர்டு உருவாக்கி கொள்வதன் அவசியத்தை உணர்ந்துள்ளனர். இல்லை என்றாலும் கூட, இணைய சேவைகளில் உறுப்பினராக பதிவு செய்யும் போது, உங்கள் பாஸ்வேர்டு பலவீனமானதாக இருக்கிறது, இன்னும் வலுவாக்கவும் எனும் குறிப்பை அடிக்கடி பார்க்க நேரிடலாம்.இதனால் குழப்பமும் உண்டாகலாம்.
வலுவான பாஸ்வேர்டை உருவாக்குவது எப்படி எனும் கேள்வி உங்களுக்கும் இருந்தால், அதற்கு சில எளிதான வழிகள் இருக்கின்றன. எழுத்துக்களை மட்டும் பயன்படுத்தாமல், எண்கள், குறியீடுகள் போன்றவற்றை பயன்படுத்தவும். பெரிய எழுத்துக்கள், சிறிய எழுத்துக்கள் போன்றவற்றை இடையிடையே பயன்படுத்தவும். உருவ எழுத்துக்களையும் பயன்படுத்தலாம்.
உங்கள் பெயர், நிறுவன பெயர் , குடும்பத்தினர் பெயர் போன்றவற்றை தவிர்த்து விட வேண்டும். அகராதியில் உள்ள வார்த்தைகளையும் விட்டுவிட வேண்டும். அதோடு ஓவ்வொரு சேவைக்கும் தனித்தனி பாஸ்வேர்டை பயன்படுத்த வேண்டும்.
அதோடு வழக்கமாக பயன்படுத்தப்படும் பாஸ்வேர்ட்களின் பக்கம் போகாமல் இருக்க வேண்டும்.

ஒரு வைரல் வீடியோவும், வாழ்க்கை பாடமும்!

getty_489356577_108668ஜேக்சன் எனும் பெயரில் ஒரு மாயம் இருக்கத்தான் செய்கிறது போலும்! மறைந்த பாப் இசை நட்சத்திரம் மைக்கேல் ஜேக்சனில் துவங்கி உலகப்புகழ் பெற்ற ஜேக்சன்கள் பலர் இருக்கின்றனர். ஜேக்சன் பெயர் மனிதர்களுக்கு மட்டும் சொந்தமானதல்ல. ஜேக்சன் பெயரில் ஊர்களும் நகரங்களும் அநேகம் இருக்கின்றன. விக்கிபீடியா , ஜேக்சன் என்பது மனிதர்களை குறிக்கலாம், இடங்களையும் குறிக்கலாம் என தெரிவித்து, ஜாக்சன் பெயரில் உள்ள நகரங்களை பட்டியலிட்டுள்ளது. இந்த பட்டிலயை பார்த்தால் அமெரிக்காவில் பல மாநிலங்களில்ஜேக்சன் நகரம் இருக்கிறது. அமெரிக்காவுக்கு வெளியே ஆஸ்திரேலியாவிலும் ஜேக்சன் நகரங்கள் இருக்கின்றன.

இந்த ஜேக்சன் நகர பெயர் ஆய்வுக்கு காரணம் இல்லாமல் இல்லை. அமெரிக்காவின் உள்ள ஜேக்சன் நகரங்களில் ஒன்று இப்போது இணையத்தில் புகழ் மிக்க நகரமாக மாறியிருக்கிறது. அந்த நகரில் இருந்து ஒளிபரப்பாகும் வீடியோ காட்சி ஒன்று தான் இந்த திடீர் புகழுக்கு காரணம். லைவ்ஸ்டீரிமிங் முறையில் நேரடியாக ஒளிபரப்பாகும் இந்த காட்சியை ஆயிரக்கணக்கான இணையவாசிகள் ஆர்வத்துடன் பார்த்து ரசிக்கின்றனர். அது மட்டும் அல்ல, அந்த வீடியோவில் பார்க்கும் விஷயங்களை மையமாக கொண்டு இணைய அரட்டையிலும் ஈடுபட்டு வருகின்றனர். இதற்காக என்றே பிரத்யேக ஹேஷ்டேகும் உருவாக்கப்பட்டு டிவிட்டரிலும் கருத்துக்களை பகிர்ந்து கொண்டு வருகின்றனர்.

புரியாத புகழ்
இந்த வீடியோவின் திடீர் புகழ் இணையத்தின் கவனத்தை ஈர்த்திருப்பதுடன் குழப்பத்திலும் ஆழ்த்தியுள்ளது.
குழப்பத்திற்கு காரணம் அந்த வீடியோ ஏன் பார்க்கப்படுகிறது என்பதற்கான காரணம் யாருக்கும் தெரியவில்லை என்பது தான். அந்த வீடியோவில் அப்படி என்ன இருக்கிறது என்பது புரியாத புதிராக இருக்கிறது.
குறிப்பிட்ட அந்த வீடியோவை முதல் முறை பார்க்கும் போது உங்களுக்கும் இந்த கேள்வி நிச்சயம் மனதில் எழலாம். ஆனால் ஆச்சர்யமான விஷயம் என்ன எனில், நீங்களும் கூட அந்த வீடியோவை ரசிக்கலாம் என்பது தான்! அது மட்டும் அல்ல, இந்த வீடியோவை ஏன் ரசிக்கிறோம் என்பது உங்களுக்கும் கூட புரியாத புதிராக இருக்கலாம்.

இப்படி, வைரலாக பரவும் வீடியோக்கள் இணையத்திற்கு புதிதல்ல. ஆனால் பெரும்பாலும் அந்த வீடியோக்கள் வைரலாக பரவியதற்கான காரணம் ஒன்று இருக்கும். வீடியோவை பார்க்கும் போதே அதை புரிந்து கொள்ளலாம். ஆனால், இணையத்தை கவர்ந்திருக்கும் ஜேக்சன் நகர வீடியோவை பொருத்தவரை இப்படி எந்த காரணத்தையும் கூற முடியாது.

crmcaqowyaa38s3அமெரிக்காவின் யோமிங் மாநிலத்தில் இந்த ஜேக்சன் நகரம் அமைந்துள்ளது. ஜேக்சன் ஹோல் என குறிப்பிடப்படும் பள்ளத்தாக்கு பகுதியில் உள்ள இந்த நகரின் சதுக்கத்தின் சாலை சந்திப்பு காட்சி தான் வீடியோவில் ஒளிபரப்பாகி கொண்டிருக்கிறது. சுற்றிலும் இயற்கை எழிலான சூழல் அமைந்திருந்தாலும் ஒரு சாலை சந்திப்பு காட்சியில் சுவாரஸ்யமாக என்ன இருந்துவிட முடியும்.

கார்களும், டிரக்குகளும் என வாகனங்கள் சென்று கொண்டிருக்கும். மனிதர்கள் கடந்து செல்வார்கள். மற்ற நேரங்களில் அதிக இயக்கம் இல்லாமல் அமைதியாக இருக்கும். இந்த காட்சி தான் வெப்கேம் வழியே பதிவாகி யூடியூப்பில் ஆர்வத்துடன் பார்த்து ரசிக்கப்படுகிறது. இது ஏன் என்று தான் யாருக்கும் புரியவில்லை.
ஒரு சாலை சந்திப்பு காட்சியை நேரில் பார்த்தாலே அலுப்பூட்டுகிறது என அலட்சியம் செய்து விடுவோம்: அப்படியிருக்க, காமிரா மூலம் பதிவாகும் சாலை சந்திப்பு காட்சியை அலுப்பில்லாமல் பலரும் பார்த்து ரசிப்பது எப்படி? இத்தனைக்கும் ஜேக்சன் நகரில் இதே போல பல காமிரா காட்சிகள் பதிவாகி ஒளிபரப்பாகி கொண்டிருக்கின்றன. உள்ளூர் வர்த்தக நிறுவனங்கள் மற்றும் சுற்றுலா காட்சிகளை பிரபலமாக்க அமைக்கப்பட்ட ஜேக்சன்ஹோல் இணையதளத்தில் இவை ஒளிபரப்பாகி வருகின்றன. இவற்றில் சாலை சந்திப்பு வீடியோ காட்சி மட்டும் இப்போது பிரபலமாகி இருக்கிறது.

வீடியோ விருப்பம்
ஒரு வீடியோ வைரலாகி ஆயிரக்கணக்கானோரால் ரசிக்கப்படுகிறது, ஆனால் அது ஏன் என்று தான் புரியவில்லை எனும் கேள்வியையே இது தொடர்பான செய்திகளில் முன்வைக்கப்பட்டன. ஆனால் இந்த புதிருக்கும் இப்போது மெல்ல விடை கிடைத்து வருகிறது. மெதுவான இணையத்தை பலரும் விரும்புவதே இதற்கான காரணம்!
அதென்ன மெதுவான இணையம் என்று கேட்கலாம். இதற்கான பதில் மெதுவான தொலைக்காட்சியில் இருக்கிறது.
இந்த நிகழ்வு ஸ்லோ டிவி என குறிப்பிடப்படுகிறது. நார்வே நாட்டில் தான் ஸ்லோ டிவி உருவானது. அந்நாட்டில் தான் விரும்பி பார்க்கப்படுகிறது.

வழக்கமான டிவி நிகழ்ச்சிகள் போல பரபரப்பு , விறுவிறுப்பு, திடீர் திருப்பம் போன்ற அமசங்கள் எல்லாம் இல்லாமல், ஒரே நேர்க்கோட்டில் சென்று கொண்டிருக்கும் நிகழ்ச்சியை தான் ஸ்லோ டிவி என்கின்றனர். உண்மையில் இது நிகழ்ச்சி கூட கிடையாது. சாதாரணம் நிகழ்வின் ஒன்றின் தொடர் ஒளிபரப்பாகவே இது அமைகிறது. உதாரணத்திற்கு ஒரு நீண்ட ரெயில் பயணத்தை அப்படியே ஒளிபரப்பு செய்வதை நினைத்துப்பாருங்கள். திரைக்கதையோ, திருப்பங்களோ இல்லாமல் பயண நிகழ்வுகள் அப்படியே பதிவானால் எப்படி இருக்கும்? இப்படி தான் 2009 ல் நார்வேயில் பெர்ஜன் மற்றும் ஆஸ்லோ நகரங்களுக்கு இடையிலான 7 மணி நேர ரெயில் பயணம் தொலைக்காட்சியில் ஒளிபரப்பாகி பெரும் வரவேற்பை பெற்றது. இதனையடுத்து இதே பாணியிலான ஸ்லோ டிவி நிகழ்ச்சிகள் பிரபலமாயின. பின்னலாடை பின்னும் காட்சி போன்றவை எல்லாம் நிகழ்ச்சியாக ஒளிபரப்பாகி கொண்டிருக்கின்றன. இந்த ஸ்லோ டிவி இப்போது நெட்பிளிக்ஸ் இணையதளம் மூலம் அமெரிக்காவிலும் அறிமுகமாகி இருக்கிறது.

இதை எல்லாம் யார் பார்ப்பார்கள் என நாம் கேட்கலாம். இவற்றில் பார்த்து ரசிக்க என்ன இருக்கிறது என்றும் கேட்லாம். ஆனால், ஒன்றும் இல்லை எனும் காரணத்திலான் தான் இவை பார்த்து ரசிக்கப்படுகின்றன என்பது தான் விஷயம்.

இந்த வகை நிகழ்ச்சிகளை பார்த்து ரசிக்க பார்வையாளர்கள் எதுவுமே செய்ய வேண்டியதில்லை. இஷ்டம் போல பார்க்கலாம். நடுவே பல நொடிகள் பார்க்காமல் விட்டாலும் எதுவும் ஆகிவிடாது. அதனால் தான் இவை விரும்பி பார்க்கப்படுகின்றன.
crn9yshwiauiijs
ஸ்லோ டிவி தாக்கம்!

இதே காரணத்தினால் தான் ஒன்றுமே நிகழாத ஜேக்சன் சாலை சந்திப்பு வீடியோ விரும்பி பார்க்கப்படுவதாக விளக்கம் அளிக்கப்படுகிறது. இந்த வீடியோவில் ஒருவித தியான தன்மை இருக்கிறது. பரபரப்பும், மன அழுத்தமும் மிக்க நவீன வாழ்க்கைக்கு நடுவே இந்த வீடியோ ஒருவித ஆசுவாசத்தை அளிக்கிறது.
இந்த காட்சியில் சுவாரஸ்யமாக ஒன்றும் இல்லை என நமது வழக்கமான மனது நினைத்தாலும், இந்த காட்சியில் ஏதாவது நிகழ்ந்து கொண்டே இருக்கிறது. ஒரு டிரெக் செல்கிறது- அதிலும் சிவப்பு டிரெக். ஒரு கார் செல்கிறது. மனிதர்கள் பேசிய படி செல்கின்றனர். இவை எல்லாம் தான் கவர்கிறது.

இதில் காணும் காட்சிகள் பற்றி ஒற்றை வரியில் யூடியூப் பின்னூட்டம் வழியே அரட்டை அடிப்பது, ஸ்டீரிமிங் யுகத்திற்கு ஏற்றதாக இருக்கிறது. மனிதர்களோடு தொடர்பு கொள்ளும் உள்ளார்ந்த தேவையை இது பூர்த்தி செய்கிறது. தனிமை மற்றும் நிராகரிப்பின் அச்சத்தை இது போக்குவதாகவும் கருதப்படுகிறது. மொதத்தில் மிக ஆழமான உளவியல் உணர்விற்கான வடிகாலாக இது அமைகிறது என்கின்றனர்.

ஆக, ஜாக்சன் சந்திப்பு வீடியோ மெதுவான இணையம் எனும் புதிய போக்கின் அடையாளமாக கருதப்படுகிறது. நீங்களும் ஒருமுறை இந்த வீடியோவை பார்த்து இந்த போக்கில் இணைந்து கொள்ளுங்கள்: https://youtu.be/psfFJR3vZ78

நன்றி தமிழ் இந்துவில் எழுதியது!

பறக்கும் தட்டு வீடியோக்களுக்கு விளக்கம் அளிக்கும் வல்லுனர்

imageபறக்கும் தட்டுகள் மீது உங்களுக்கு ஆர்வம் இருக்கிறதா?
பறக்கும் தட்டுகளை பார்த்ததாக சொல்லப்படுவதை நீங்கள் நம்புகிறீர்களா? பறக்கும் தட்டுகள் வேற்று கிரகவாசிகளின் இருப்புக்கான அடையாளமாக அமைகின்றனவா?

இந்த கேள்விகளில் உங்களுக்கு ஆர்வம் இருந்தால், ஜேம்ஸ் ஆபர்கை (james oberg ) நீங்கள் அறிந்து கொள்ள வேண்டும். பறக்கும் தட்டு தொடர்பான சங்கதிகள் மீது உங்களுக்கு நம்பிக்கை கொண்டவர்களும் சரி, நம்பிக்கை இல்லாதவர்களும் சரி ஆபர்கை அறிந்து கொள்வது நல்லது. ஏனெனில் அவர் பறக்கும் தட்டு நிகழ்வுகள் பின்னால் இருக்கும் அறிவியவிலுக்கான விளக்கத்தை அளித்து வருகிறார். இந்த விளக்கத்தை அவர் அளித்து வரும் விதம் தான் கவனத்திற்கு உரியதாக இருக்கிறது. இணைய உலகிற்கு மிகவும் ஏற்றதாகவும் இருக்கிறது.
பறக்கும் தட்டுகள் தொடர்பான விவாதம் பல ஆண்டுகளாக நடந்துக்கொண்டிருக்கின்றன. ஆரம்பத்தில் பிளையிங் சாஸர்ஸ் என்று குறிப்பிடப்பட்டு அதன் பிறகு யு.எப்.ஒ (அன் ஐடிண்டிபைடு பிளையிங் ஆப்ஜக்ட்ஸ்) என பொதுவாக குறிப்பிடப்படும் பறக்கும் தட்டுகள் 60 ஆண்டுகளுக்கும் மேலாக பொதுமக்களின் கற்பனையையும் கருத்தையும் ஈர்த்து வருகின்றன.

பூமியில் பார்த்தறியாத ஒரு பொருளை பார்க்கும் போது அல்லது பார்த்ததாக சொல்லப்படும் போது அது பறக்கும் தட்டாக இருக்கலாம் எனும் நம்பிக்கை பலவித கதைகளுக்கும், கட்டுக்கதைகளுக்கும் வித்திட்டிருக்கின்றன. இணையத்திற்கு முந்தைய காலத்தில் வெறும் செய்திகளையும், புகைப்பட ஆதாரங்களையும் வைத்துக்கொண்டு தான் இது பற்றி விவாதிக்க வேண்டியிருந்தது. ஆனால் இணைய யுகத்தில் பறக்கும் தட்டுகளை பார்த்ததாக சொல்லப்படுவதற்கு வீடியோ ஆதாரங்களும் அநேகம் இருக்கின்றன. யூடிடூப் தளத்தில் யு.எப்.ஒ என தேடிப்பார்த்தால் ஒரு கோடிக்கும் அதிகமான வீடியோக்கள் பட்டியலிடப்படுகின்றன. யு.எப்.ஒ பார்த்தல் தொடர்பான பிரபலமான யூட்டியூப் சேனல்களை நூற்றுக்கும் மேல் இருக்கின்றன. இந்தியாவின் விமானத்திற்கு அருகே காணப்பட்ட பறக்கும் தட்டு, வானத்தில் பெரிய பறக்கும் தட்டை பார்த்தவர் என விதவிதமாக பறக்கும் தட்டு வீடியோக்கள் காணக்கிடைக்கின்றன.

இந்த ஆர்வத்தையும், நம்பிக்கையையும் மீறி பறக்கும் தட்டுகள் இன்னும் அறிவியலின் எல்லைக்குள் வரவில்லை. விஞ்ஞானிகள் இவற்றை ஏற்பதில்லை.
ஆனால் இவற்றின் அறிவியல் அடிப்படை பற்றி எல்லாம் அதிகம் கவலைப்படாமல், பறக்கும் தட்டுகள் பற்றி தீவிரமாக விவாதித்துக்கொண்டிருப்பவர்கள் இல்லாமல் இல்லை.

இந்த இடத்தில் தான் ஜேம்ஸ் ஆபர்க் வருகிறார். அமெரிக்க விண்வெளி ஆய்வுக்கழகமான நாசாவின் முன்னாள் ஊழியரான ஆபர்க் அந்த பணியில் இருந்து விலகிய பிறகு விண்வெளி ஆய்வு தொடர்பான பத்திரிகையாளர் மற்றும் ஆய்வாளராக செயல்பட்டு வருகிறார். விண்வெளி ஆய்வு திட்டங்கள் பற்றி, குறிப்பாக ரஷ்யா மற்றும் சீனாவின் விண்வெளி ஆய்வு திட்டங்கள் பற்றி அவர் நன்கறந்தவராக கருதப்படுகிறார். விண்வெளி ஆய்வு திட்டங்கள் மற்றும் அவற்றிம் அடிப்படை பற்றி தொடர்ந்து கட்டுரைகளும் எழுதி வருகிறார்.

இவற்றுக்கு நடுவே அவர் பறக்கும் தட்டு தொடர்பான உண்மைகளை விளக்குவதிலும் நேரத்தை செலவிட்டு வருகிறார்.

பொதுவாக விஞ்ஞான உலகில் இருப்பவர்கள் பறக்கும் தட்டு தொடர்பான விவாதங்களை புறங்கையாக ஒதுக்கித்தள்ளி விடுகின்றனர். ஆனால் ஆபர்க் அப்படி செய்வதில்லை. மாறாக அவர் பறக்கும் தட்டு நிகழ்வுகள் என்று சொல்லப்படுவதன் பின்னே உள்ள உண்மையை புரிய வைக்க முயனறு வருகிறார். இதை அவர் செய்து வரும் விதம் தான் பாராட்டுக்குறியதாக இருக்கிறது. பறக்கும் தட்டு தொடர்பான யூடியூப் வீடியோக்களில் பின்னூட்டமாக அவர் தனது கருத்துக்களை பதிவு செய்து வருகிறார்.

பறக்கும் தட்டு நிகழ்வுகளை விளக்கி கட்டுரை எழுதலாம். வீடியோ விளக்கங்களை தயார் செய்யலாம். ஆனால் அவை எல்லாம் பொதுவான வாசகர்களுக்கானவையாகவே இருக்கும். பறக்கும் தட்டுகள் மீது நம்பிக்கை கொண்டவர்கள் அந்த உலகிலேயே தான் முழ்கியிருப்பார்கள். அதனால் தான் ஆபெர்க், யூடியூப்பில் பறக்கும் தட்டு தொடர்பாக தீவிர உரையாடல் நடக்கும் வீடியோக்களை தேர்வு செய்து, அதன் விவாத சரட்டில் விஞ்ஞான பூர்வமான உண்மைகளை விளக்கி பதில் அளித்து வருகிறார்.

பறக்கும் தட்டு நம்பிக்கையை ஒரேடியாக அலட்சியம் செய்து விடாமல் உண்மையில் இந்த ஆர்வத்திற்கான காரணம் என்ன என்பதை அறிந்து கொள்ளும் ஆர்வத்துடன் அவர் செயல்பட்டு வருகிறார். பறக்கும் தட்டு அபிமானிகள் சுட்டிக்காட்டும் தகவல்களை எல்லாம் சேகரித்து அவற்றை உண்மையான நிகழ்வுகளுடன் அவர் ஒப்பிட்டுப்பார்த்து இந்த பணியை செய்து வருகிறார். இதன் பயனாக அவர், ஒரு சுவாரஸ்யமான முடிவை முன்வைக்கிறார். மெதுவாக நகரும் பொருட்கள், குறிப்பிட்ட ஒளி சூழல் மற்றும் காற்று மணடலத்திற்கு பழகிய மனித உணர்வுகள், பூமிக்கு பொருத்தமான சூழலில் சரியாக செயல்படுகின்றன. ஆனால், பூமியை விட்டு விலகிச்செல்லும் போது நமது உணர்வு குழப்பமாகி விடுகின்றன என்கிறார் ஆபெர்க். இந்த குழப்பமே பறக்கும் தட்டுகளை நம்ப வைக்கிறது என்றும் சொல்கிறார்.

யூடியூப்பில் தான் பார்த்த பறக்கும் தட்டு வீடியோக்களை அலசி ஆராய்ந்து அவற்றில் காணப்படும் பொதுத்தன்மைக்கு ஏற்ப மூன்று முக்கிய பிரிவாக பிரித்து ஒவ்வொன்றுக்கும் விளக்கம் அளித்துள்ளார்.
அமெரிக்காவின் கலிபோர்னியாவில் கடந்த நவம்பர் மாதம் 7 ம் தேதி வானத்தில் திடிரென தோன்றிய ஒரு பொருள் கவனத்தை ஈர்த்தது. அதன் பிறகு அந்த பொருள் வெடித்துச்சிதறி நீல நிற பிழம்பாகி மறைந்தது. இது பெரும் பரபரப்ப ஏற்படுத்தியதோடு இந்த நிகழ்வு தொடர்பான யூடியூப் வீடியோ பத்து கோடி முறை பார்க்கப்பட்டது.
ஆனால், ராக்கெட் வெளியேற்றிய புகையின் தாக்கத்தால் உண்டானது இது என்று விளக்கம் தருகிறார் ஆபெர்க். பூமியில் இருந்து வானத்தை பார்க்கும் போது, அது முழு சூரிய ஒளியில் இருக்க நாம் இருளில் இருப்பதால் வானத்திற்கு பழக்கப்பட்டாத நம் கண்களுக்கு அது பிழம்பாக காட்சி அளித்தாலும் அது ராக்கெட்டில் இருந்து வெளியேறும் புகையின் தோற்றமே என்கிறார் அவர்.

இதே போல நாசாவின் விண்கலம் ஒன்றில் இருந்து எடுக்கப்பட்ட காட்சி நடுவே வெள்ளைத்துகள்கள் மிதந்து நடனமாடுவது போல அமைகின்றன. இது தொடர்னாப யூடியூப் வீடியோக்கள், வேற்று கிரக விண்கலங்களில் இருந்து வந்த ஒளி என்ற கருத்து முன்வைக்கப்படுகிறது.

ஆனால் ஆபெர்க் இதற்கும் பொறுமையாக விளக்கம் தருகிறார். பூமியில் இருந்து பார்க்கும் மனநிலையே இதற்கு அடிப்படை காரணம் என்கிறார் அவர். பூமியில் நாம் நிலையாக நிற்கிறோம். ஆனால் வெளியில் விண்கலம் 17,500 மைல் வேகத்தில் பயணிக்கிறது. அதை கடந்து செல்லும் எந்த பொருளும் ஒரு நொடிக்கும் குறைவான நேரம் மட்டுமே பார்க்க கூடியதாக இருக்கும். இவ்வாறு கடந்து செல்லும் பொருட்களில் ஏதேனும் ஒன்று அதன் பார்வையில் சிக்க வேண்டும் என்றால் அது விண்கல காமிராவில் பதிவானால் மட்டுமே சாத்தியம். விண்கலத்தில் இருந்து உதிர்ந்த சில பொருட்களே இப்படி அதன் காமிராவில் சிக்கி மிதக்கும் புள்ளிகளாக தெரிகிறது என்கிறார் அவர்.

பறக்கும் தட்டு என நம்பப்படும் நிகழ்வுக்கு பின்னே உள்ள இத்தகைய அறிவியல் தகவல்களை அவர் வீடியோக்களில் பின்னூட்டமாக தெரிவித்து வருகிறார். இந்த புள்ளிகளை அவர் விண்வெளி பொடுகுகள் என்கிறார்.

அதே போல, பூமியில் சூரிய ஒளி ஒரு பொருளின் மீது படும் போது அதன் நிழல் வேறு ஒன்றின் மீது படர்கிறது. ஆனால் விண்வெளியில் பயணிக்கும் விண்கலத்தின் நிழல் வேறு எதன் மீதும் விழ வாய்ப்பில்லாத நிலையில், அவப்போது எதிர்படும் விண்வெளி பொடுகளால் ஈர்த்துக்கொள்ளப்பட்டு,வெளியேற்றப்படுகிறது. இதைப்பார்த்தும் ஏமாந்து போகின்றனர் என்கிறார்.

இணைய வெளியில் தகவல்களுக்கும் பஞ்சமில்லை. தகவல் பிழைகளுக்கும் குறைவில்லை. தவறான தகவல்களை நம்புவதற்கும் பல்வேறு குழுக்கள் இருக்கின்றன. இவர்களுக்கு மத்தியில் சென்று கருத்து போராட்டம் நடத்துபவராக ஆபெர்க் விளங்குகிறார்.

ஜேம்ஸ் ஆபெர்க் இணையதளம்:http://www.jamesoberg.com/
ஆபெர்க் விளக்கம் பற்றிய கட்டுரை: http://www.atlasobscura.com/articles/how-one-man-has-explained-almost-every-internet-ufo-theory

நன்றி; தமிழ் இந்துவில் எழுதியது.