Tag Archives: google

2017 ல் இணையத்தை வென்ற சாமானியர்கள்!

விடைபெற இருக்கும் 2017 ம் ஆண்டை திரும்பி பார்க்கையில் இணைய உலகில் மீம்களும், வைரல் தருணங்களும் நிறைந்திருப்பதை பார்க்க முடிகிறது. சமூக ஊடகங்கள் முதல் செய்தி தளங்களை வரை ஆதிக்கம் செலுத்தி கவனத்தை ஈர்த்த வைரல் தருணங்களும் அநேகம் இருக்கின்றன. இவற்றுக்கு மத்தியில் இணைய நட்சத்திரமானவர்களும் பலர் இருக்கின்றனர். இப்படி இணையம் மூலம் இந்த ஆண்டு புகழ் பெற்ற சில சாமானியர்களின் சுவாரஸ்யமான கதை:

கேட்டது கிடைத்தது !

09xp-nugget-master675அமெரிக்க பள்ளி மாணவரான வால்டர் வில்கர்சன் இந்த ஆண்டு இணைய சாதனையாளராக மகுடம் சூட்டிக்கொண்டிருக்கிறார். டிவிட்டரில் வெளியிட்ட குறும்பதிவு ஒன்றுக்கு அதிக ரீடிவீட்கள் பெற்றது தான் அவரது சாதனை. ரீடிவீட் என்றால் ஒன்றில்லை, இரண்டில்ல, 34 லட்சத்திற்கும் மேல் ரீடிவீட்களை அவர் அள்ளி குவித்திருந்தார். இதன் மூலம், ஆஸ்கர் செல்பீக்காக அதிக ரீடிவீட் பெற்றிருந்த ஹாலிவுட் நட்சத்திரம் எல்லென் டிஜெனரஸ் சாதனையை அவர் முறியடித்தார். ரீடிவீட் என்பது டிவிட்டரில் வெளியாகும் ஒரு குறும்பதிவை மற்றவர்களும் தங்கள் டைம்லைனில் மறுபதிவிடுவதாகும். பொதுவாக கவனத்தை ஈர்க்கும் குறும்பதிவுகளுக்கு நூற்றுக்கணக்கில் ரீடிவீட்கள் கிடைத்தாலே பெரிய விஷயம். ஒரு சில குறும்பதிவுகள் ஆயிரக்கணக்கில் பகிரப்படுவதும் உண்டு. வெகு அபூர்வமாக சில குறும்பதிவுகள் லட்சக்கணக்கில் பகிரப்பட்டு இணையவெளி முழுவதும் பரவுவதும் உண்டு. பெரும்பாலும் செல்வாக்கு மிக்க பிரபலங்களுக்கே இது சாத்தியம்.

ரீடிவீட்களில் சில லட்சங்களை தாண்டுவதெல்லாம் எப்பேதேனும் நடக்கும் அதிசயம் என்று வைத்துக்கொள்ளலாம். அப்படி இருக்க, அமெரிக்க பள்ளி மாணவர் வில்கர்சனுக்கு மட்டும் இது எப்படி சாத்தியமானது? 34 லட்சத்திற்கும் மேற்பட்ட ரீடிவீட்களை பெறும் வகையில் அவர் என்ன செய்துவிட்டார்?

உண்மையில் அவர் எதுவும் பெரிதாக செய்துவிடவில்லை. டிவிட்டர் மூலம் ஒரு கோரிக்கை வைத்தார். அதுவும் என்ன கோரிக்கைத்தெரியுமா? எனக்கு இலவச சிக்கன் நக்கெட் உணவு வேண்டும், அதற்கு உதவுங்கள் என்பது தான். இந்த கோரிக்கைக்கு தான் அவரே கூட எதிர்பாராத வகையில் ஆதரவு குவிந்துவிட்டது. ஏன்? எப்படி? என்பது புரியாத புதிர்.

நடந்தது இது தான். அமெரிக்காவின் நெவேடாவில் பள்ளி மாணவராக இருக்கும், வில்கர்சனுக்கு ஆண்டு முழுவதும் சிக்கென் நக்கெட் உணவு இலவசமாக கிடைத்தால் எப்படி இருக்கும் என்ற எண்ணம் தோன்றியிருக்கிறது. உடனே வெண்டி எனும் பாஸ்ட் புட் நிறுவனத்தை டிவிட்டர் மூலம் தொடர்பு கொண்டு, ஒராண்டு இலவச சிக்கென் நக்கெட்டுக்கு எத்தனை ரீடிவீட் தேவை என கேட்டிருக்கிறார். நிறுவன தரப்பில் 18 மில்லியன் ரீடிவீட் பெற வேண்டும் என பதில் வந்திருக்கிறது. வில்கர்சன் அதிகம் யோசிக்காமல், அந்த குறும்பதிவை அப்படியே பதிவிட்டு, ’எனக்கு உதவுங்கள், ஒரு மனிதருக்கு நக்கெட்கள் தேவை’ என வேண்டுகோள் வைத்தார்.

அதாவது இதை ரீடிவீட் செய்தால் எனக்கு நக்கெட் கிடைக்கும், எனவே பகிருங்கள் என கேட்டிருந்தார். பத்து பேருக்கு மேல் பகிரப்போவதில்லை என நினைத்துக்கொண்டு விளையாட்டாக தான் இந்த கோரிக்கை வைத்தார். ஆனால், சற்றும் எதிர்பாராத வகையில் பலரும் அவரது கோரிக்கையை ஏற்றுக்கொண்டனர். நூறு,ஆயிரம், லட்சம் என ரீடீவிட்கள் குவிந்தன. விரைவிலேயே இந்த எண்ணிக்கை 34 லட்சத்தை தாண்டிவிட்டது. இது ஒரு சாதனையாகி, அவருக்கு சின்னதாக இணைய புகழை தேடித்தந்தது, நெக்கெட் ஆசாமி எனும் பட்டத்தையும் பெற்றுத்தந்துள்ளது. இறுதி இலக்கான 18 மில்லியனை அவரால் தொடர் முடியாவிட்டாலும் இந்த சாதனைக்காக வெண்டி நிறுவனம் அவருக்கு ஒராண்டு நக்கெட்டுக்கான கூப்பன்களை பரிசளித்துள்ளது.

இணையத்தில் எப்படி வைராலகி புகழ் பெறுவது என பலரும் ரூம் போட்டு யோசித்துக்கொண்டிருக்கையில், இவரைப்போன்ற சிலருக்கு எதிர்பாராமல் ஜாக்பாட் அடித்து விடுகிறது.

பிபிசி தந்தை

bbநக்கெட் வாலிபராவது கோரிக்கை வைத்து வைரல் புகழ் பெற்றார் என்றால், தென் கொரியா பேராசிரியர் ராபர்ட் கெல்லி பேட்டி கொடுத்து இணைய நட்சத்திரமாகி இருக்கிறார். ஆனால் பேராசிரியர் கெல்லி அவர் கொடுத்த பேட்டியால் பிரபலமாகவில்லை. பேட்டியின் போது ஏற்பட்ட இடையூறால் பிரபலாமானார். எல்லாம் பிள்ளைகளின் அன்புத்தொல்லை வடிவில் வந்த இடையூறு.

தென்கொரியாவில் அந்நாட்டு அதிபருக்கு எதிரான கண்டனத்தீர்மான விவகாரம் உச்சத்தில் இருந்த போது. பிபிசி தொலைக்காட்சி அவரிடன் ஸ்கைப் வழியே உரையாடிக்கொண்டிருந்தது. பேராரியரும் தனது அலுவலக அறையில் இருந்து தென்கொரிய அரசியல் சூழலை அலசி ஆராய்ந்துக்கொண்டிருந்தார். இதனிடையே அவரது 4 வயது மகள் அறையின் கதவை திறந்து உள்ளே நுழந்து பேராசிரியரின் கவனத்தை ஈர்க்க முயன்று கொண்டிருந்தார். பேராசிரியர் சங்கடத்தை வெளிக்காட்டாமல் காமிராவை பார்த்து பேசிக்கொண்டிருந்தார். இதற்குள் அவரது ஒரு வயது மகனும் வாக்கரை தள்ளிபடி உள்ளே வந்துவிட்டார். பேராசிரியரோ பேட்டி முடிந்துவிடாதா? என தத்தளித்துக்கொண்டிருக்க, நல்லவேளையாக பேராசிரியரின் மனைவி உள்ளே வந்து பிள்ளைகளை அழைத்துச்சென்றார்.

இந்த காட்சி அப்படியே காமிராவில் பதிவாகி இணையத்தில் வெளியாகி அனைவராலும் பார்த்து ரசிக்கப்பட்டது. பேராசிரியரின் சங்கடமும், பிள்ளைகளின் அன்பு தொல்லையும் சேர்ந்து இந்த வீடியோவை வைரலாக்கியதோடு, அவருக்கு ’பிபிசி டாட்’ எனும் பட்டப்பெயரையும் பெற்றுத்தந்தது.

இன்ஸ்டாகிராம் புதல்வி

prc_61617189இதே போலவே பிரிட்டனைச்சேர்ந்த பைலட் ’பில் யங்’ இன்ஸ்டாகிராம் நட்சத்திரமாகி கவனத்தை ஈர்த்தார். பைலெட்டாக உலகம் முழுவதும் பறக்கும் வாய்ப்பை பெற்றிருந்த பில் யங் ஒரு நல்ல புகைப்பட கலைஞரும் கூட. விமானத்தில் பறக்கும் நகரங்களில் தான் தங்கும் ஓட்டல்களில் காணப்படும் தரைவிரிப்புகளை எல்லாம் கிளிக் செய்து இன்ஸ்டாகிராமில் பகிர்ந்து கொள்ளும் வழக்கத்தை அவர் கொண்டிருந்தார். அவர் எடுக்கும் படங்கள் எல்லாம் அட்டகாசமாக இருந்தன என்றாலும், இன்ஸ்டாகிராமில் அவருக்கு அதிக ஆதரவில்லை. மொத்தம் 83 பேரே அவரை பின் தொடர்ந்தனர். இது குறித்து அவர் கவலை பட்டதும் இல்லை.

ஆனால் அவரது மகள் ஜில்லுக்கு இது ஒரு பெரும் குறையாக இருந்தது. அப்பாவின் படங்கள் எல்லாம் அற்புதமாக இருந்தும் அதிகமானவர்கள் அவற்றை பார்த்து ரசிக்கவில்லையே என ஏங்கியவர், மற்றவர்களும் தந்தையின் கலையை ரசிக்க வேண்டும் என விரும்பினார். அது மட்டும் அல்ல அப்பாவின் இன்ஸ்டாகிராம் பக்கத்தை வைரலாக்கி புகழ்பெற வேண்டும் என்றும் விரும்பினார்.

இந்த எண்ணத்தை டிவிட்டர் பக்கம் மூலம் ஒரு வேண்டுகோளாக வைத்தார். ’கிறிஸ்துமசுக்கு நான் விரும்புவதெல்லாம், அப்பாவின் இன்ஸ்டாகிராம் தரைவிரிப்பு பக்கம் வைரலாக வேண்டும் என்பது தான். தயவு செய்து இதை நிகழ்த்திக்காட்ட உதவுங்கள்” என்று ஒரு வேண்டுகோளை டிவீட் செய்து அதனுடன் அப்பாவின் இன்ஸ்டாகிராம் பக்கத்தையும் இணைந்திருந்தார்.

அவ்வளவு தான், அவரது கோரிக்கை ஏற்கப்பட்டு அடுத்த சில மணி நேரங்களில் அவரது அப்பாவின் இன்ஸ்டாகிராம் பக்கத்திற்கு ஆதர்வு குவிந்தது. வெறும் 83 ஆக இருந்த இன்ஸ்டாகிராம்  பாலோயர்கள் எண்ணிக்கை முதலில் 28 ஆயிரத்தை தொட்டது. இதனிடையே பத்திரிகைகள், மற்றும் இணையதளங்கள் இந்த நிகழ்வு பற்றி செய்தி வெளியாக பில்லின் இன்ஸ்டாகிராம் பக்கத்திற்கு மேலும் ஆதரவு பெருகி,  சில நாட்களில் ஆயிரம் பல்லாயிரமாக, லட்சங்களையும் தொட்டது. இதனால் அப்பாவும், மகளும் திக்குமுக்காடிப்போயினர்.

இன்ஸ்டாகிராமில் லட்சக்கணக்கில் பாலோயர்கள் பெற்றவர்கள் பலர் இருந்தாலும், ஒரே ஒரு டிவீட்டால் லட்சக்கணக்கான பாலோயர்களை சில நாட்களில் பெற்றது பைலட் பில் மட்டும் தான். அதற்கு அவர் ஆசை மகளுக்கு தான் நன்றி கூற வேண்டும். இணையத்திற்கும் அன்புக்கும் தான்!

ஷாப்பிங் லிஸ்ட்

_98027960_e2e3b682-44a5-43a7-a0bb-c9a80a551476இந்தியாவிலும் இதே போல இளம் தம்பதி ஒன்று மனைவி உருவாக்கிய ஷாப்பிங் லிஸ்ட்டால் இணையம் அறிந்த தம்பதியாக மாறினர். ஆண்களில் பலர் வீட்டு வேலையில் மனைவிகளுக்கு உதவும் வழக்கம் கொண்டுள்ளனர். ஆனால் இந்த இயல்பை மீறி வேலைகளில் சொதப்புவது தான் பலரது பழக்கம். அதிலும் காய்கறி போன்றவற்றை வாங்கி வரச்செல்லும் போது, சொல்வது ஒன்று, செய்வது ஒன்றாக இருக்கும். ஐடி ஊழியரான இரா கோவல்கரின் கணவரும் இந்த ரகம் தான். இதனால் அதிருப்தி அடைந்த இரா, கணவரை மார்கெட்டுக்கு அனுப்பிய போது, காய்கறிகள் மற்றும் இதர பொருட்களை எப்படி எல்லாம் பார்த்து வாங்க வேண்டும் என விரிவாக வழிகாட்டும் குறிப்புகளை காகிதத்தில் எழுதிக்கொடுத்தார். இந்த குறிப்புச்சீட்டை அவர் டிவிட்டரிலும் பகிர்ந்து கொள்ள பலரும் இதை ரசித்து மகிழ்ந்தனர். இந்த குறும்பதிவு டிவிட்டரில் பேசப்பட்டு இரா கோவல்கர் தம்பதியை இணைய நட்சத்திரமாக்கியது.

 

 

2017 பிளேஷ்பேக்

நூ்று சிறந்த செயலிகள்

இந்த ஆண்டின் சிறந்த செயலிகளை கூகுள் மற்றும் ஆப்பிள் நிறுவனங்கள் பட்டியலிட்டுள்ளன. ஆண்ட்ராய்டு புதிய செயலிகளில் போட்டோஎடிட்டர். வாட்ஸ் த போர்காஸ்ட், பூமாரங், டாப் பஸ் வீடியோ, யார்ன் ஆகிய செயலிகள் இடம்பெற்றுள்ளன. ஆப்பிள் வெளியிட்டுள்ள பட்டியலில் பிட்மோஜி, யூடியூப், இன்ஸ்டாகிராம் உள்ளிட்டவை முன்னணி செயலிகளாக உள்ளன. இது தவிர பிசிமேக் இதழ் மிகச்சிறந்த நூறு செயலிகள் பட்டியலை வெளியிட்டுள்ளது: http://in.pcmag.com/apps/35320/feature/the-100-best-android-apps-of-2017

 

 

டிவிட்டரில் வந்த மாற்றம்

குறும்பதிவு சேவையான டிவிட்டரின் அழகே அதன் 140 எழுத்துக்கள் எனும் கட்டுப்பாடு தான். ஹாஷ்டேக் , இணைப்புகள் எல்லாவற்றையும் சேர்த்து 140 எழுத்துகளுக்குள் சொல்ல வந்ததை சொல்லிவிட வேண்டும். இந்த நிலை இப்போது மாறிவிட்டது. இந்த ஆண்டு மத்தியில் டிவிட்டர், 140 எழுத்து எனும் கட்டுப்பாட்டை இரு மடங்காக 280 எழுத்துகளாக உயர்த்திவிட்டது. இந்த வசதி முன்னோட்டமாக அறிமுகமான போது டிவிட்டர் அபிமானிகள் பலர் எதிர்ப்பு தெரிவித்தாலும், இறுதியில் இந்த சேவை அனைவருக்கும் அறிமுகமானது. அதே போல பெயர்களை குறிப்பிடுவதில் இருந்த கட்டுப்பாடும் தளர்த்தப்பட்டுள்ளது. சமூக ஊடக களத்தில் போட்டியை சமாளிக்க இந்த மாற்றம் அவசியம் என டிவிட்டர் கருதுகிறது.

ஏ.ஓ.எல் மெசஞ்சருக்கு குட்பை

வாட்ஸ் அப், பேஸ்புக் மெசஞ்சர் எல்லாம் வருவதற்கு முன்னரே இணையத்தில் ஏ.ஒ.எல் நிறுவனத்தின் இன்ஸ்டண்ட் மெசஞ்சர் வசதி பிரபலமாக இருந்தது. 1997 ல் அறிமுகமான இந்த சேவை இணையத்தின் மூலம் உடனுக்குடன் செய்திகளை பரிமாறிக்கொண்டு உரையாட வழி செய்தது. இன்றைய சமூக ஊடகங்களுக்கு எல்லாம் ஒருவிதத்தில் இது முன்னோடியானது. 20 ஆண்டுகளுக்குப்பின் இந்த சேவைக்கு விடை கொடுக்க இருப்பதாக அக்டோபர் மாதம் ஏ.ஓ.எல் நிறுவனம் அறிவித்தது. இணைய வரலாற்றில் மற்றுமொரு ஒரு மைல்கல் சேவை விடைபெற்றது.

 

 

-0———–

இணையம் எங்கே போகிறது? சில கேள்விகள், சில கவலைகள்!

1000x-1நாம் அறிந்த இணையத்திற்கு 28 வயதாகிறது. 1989 ம் ஆண்டில் தான் ’டிம் பெர்னர்ஸ் லீ’, இணையத்தை பிரவுசர் மூலம் அணுக கூடிய ’வேர்ல்டு வைடு வெப்’ எனப்படும் வைய விரிவு வலைக்கான கருத்தாக்கத்தை முன் வைத்தார். லீயின் திட்டம் ஏற்கப்பட்டு, நடைமுறைப்படுத்தப்பட்டு மெல்ல பரவலாகி, இன்று இன்றியமையதாதாகவும் மாறிவிட்டது.

இணையத்திற்கும், வலைக்கும் வேறுபாடு இருக்கிறது என்பதும், வலை உருவாவதற்கு 20 ஆண்டுகளுக்கு முன்பே இணையம் எனும் மாபெரும் வலைப்பின்னலின் வலைப்பின்னல் உருவாகிவிட்டது என்பதை எல்லாம் கூட விட்டுவிடலாம். ஏனெனில், இணையம் என்றாலும் சரி, வலை என்றாலும் சரி நடைமுறையில் நாம் வலையையே புரிந்து கொள்கிறோம். இதில் தவறு ஏதும் இல்லை.

ஆனால், இந்த 28 ஆண்டுகளில் இணையம் எப்படி வளர்ந்திருக்கிறது என்பதும், இனி எப்படி இருக்கப்போகிறது என்பதும் தான் இப்போது முக்கியமான விஷயமாக இருக்கிறது. ஏனெனில் வலைவை உருவாக்கிய பிரம்மாவான டிம் பெர்னஸ் லீயே இது குறித்து கவலை தெரிவித்திருக்கிறார். அவரது உருவாக்கமான வலைக்கு 28 வயதாவதை முன்னிட்டு அளித்துள்ள பேட்டியில், டிம் பெர்னர்ஸ் லீ, ’ஏன் தான் வலையை கண்டுபிடித்தேனோ என்று நொந்துக்கொள்ளவில்லை என்றாலும், வலையின் எதிர்கால போக்கு குறித்து ஆதங்கம் தெரிவித்திருக்கிறார்.

ஃபேக் நியூஸ் எனப்படும் பொய்ச்செய்தி, சார்புத்தன்மை, பிரச்சார ஆயுதமாக பயன்படுவது போன்ற பிரச்சனைகளை இணையத்தை உலுக்கி வரும் நிலையில் வலையை உருவாக்கிய பிரம்மா லீயும் இவற்றை எல்லாம் சுட்டிக்காட்டி இணையத்தின் எதிர்காலம் பற்றி கவலை தெரிவித்திருப்பதை நமக்கான எச்சரிக்கை மணி என்றே எடுத்துக்கொள்ள வேண்டும். இணையத்தில் அதிகம் பேசப்படும் ஏ.ஐ என குறிப்பிடப்படும் செயற்கை நுண்ணறிவு குறித்தும் அவர் கவலை தெரிவித்திருக்கிறார்.

அதற்கான இணையம் மீது லீ அவநம்பிக்கை கொண்டுவிடவில்லை. ’நான் இன்னமும் நம்பிக்கைவாதி தான், ஆனால், முகத்திற்கு நேராக கோரப்புயல் வீசிக்கொண்டிருக்கும் நிலையில் மலை உச்சியின் மீது வேலியை பிடித்து தொங்கி கொண்டிருக்கும் நம்பிக்கைவாதி’ என அவர் கூறியிருக்கிறார். ’ நாம் பல்லை கடித்துக்கொண்டு உறுதி காட்டி, வேலியில் தொங்கியபடி இருக்க வேண்டும் என்றும், இணையம் நமக்கு அற்புதமான விஷயங்களை கொண்டு வரும் என கண்ணை மூடிக்கொண்டு இருந்துவிடக்கூடாது’ என்றும் அவர் கூறியிருக்கிறார்.

’லீ’யை இப்படி பேச வைத்திருக்கும் பிரச்சனைகள் குறித்து இணைய வல்லுனர்களும், இணைய ஆர்வலர்களும் தீவிரமாக விவாதித்து வருகின்றனர். இவை நம்மையும் பாதிப்பவை என்பதால் நமக்கென்ன போச்சு என்று அலட்சியமாக இருப்பதற்கில்லை.

’லீ” சுட்டிக்காட்டும் முக்கிய பிரச்சனைகளில் ஒன்று பொய்ச்செய்தியின் தாக்கம். பொய்ச்செய்தி எப்படி பரவுகிறது என்பதை இணையவாசிகள் எல்லோருமே ஏதோ ஒரு வகையில் அறிந்திருக்கலாம். ஆனால் வாட்ஸ் அப்பில் வரும் வதந்திகளை எல்லாம் விட்டுவிடுங்கள். அமெரிக்க அதிபர் தேர்தலின் போது, இணையத்தில் திட்டமிட்டு உருவாக்கப்பட்ட பொய்ச்செய்தியின் தோற்றமும், நோக்கமும், தாக்கமும் பற்றி மிக தீவிரமாக அலசிக்கொண்டிருக்கின்றனர். ஒரு பெரிய நாட்டின் தேர்தலிலேயே தலையிட்டு விளையாட முடியும் அளவுக்கு இருக்கிறது என்றால் பொய்ச்செய்தி எத்தனை பெரிய பிரச்சனை என்பதை புரிந்து கொள்ளலாம்.

இந்த விவகாரம் தொடர்பான விசாரணையும், விவாதமும் தீவிரமாகி வரும் நிலையில், இந்த செய்திகள் பரவுவதற்கான முக்கிய வாகனங்களாக இருந்த பேஸ்புக்கும், கூகுளும் இன்னும் பிற இணைய நிறுவனங்களும் இதற்கான மாற்று மருந்து முயற்சியில் ஈடுபட்டிருக்கின்றன. இந்த பிரச்சனையை புரிந்து கொள்ள இன்னும் நுட்பமான அலசல் தேவை. ஆனால் இப்போதைக்கு ‘லீ’ சொல்லும் முக்கியமான கருத்தை கவனிப்போம். இணையத்தை இயக்கி கொண்டிருக்கும் அமைப்பு தோற்று வருவதாக அவர் தெரிவித்திருக்கிறார். அமைப்பு என இங்கே அவர் குறிப்பிடுவது, இணைய நிறுவனங்களுக்கு லாபத்தை ஈட்டித்தரும் விளம்பர உத்திகளை தான். கீவேர்டு எனப்படும் குறிச்சொற்கள் மூலம் தூண்டிலிட்டு இணையவாசிகளை கவரும் விதத்தில் தகவல்களை முன்வைத்து கூகுளும், பேஸ்புக்கும் வருமானத்தை அள்ளுகின்றன. இந்த சூட்சமங்களை சராசரி இணையவாசிகள் அறியாமல் இருக்கும் நிலையில், விஷமிகளும், கில்லாடிகளும் இந்த போக்கை நன்றாக பயன்படுத்தி காசு பார்க்கின்றனர். பொய்ச்செய்தி விவகாரத்தில் இது தான் நடந்தது. எங்கோ ஐரோப்பாவில் மசிடோனியா எனும் நாட்டில் உள்ள கில்லாடிகள், அமெரிக்க தேர்தல் தொடர்பான பொய்ச்செய்திகளை உருவாக்கி உலாவவிட்டு, அவற்றை இணையவாசிகள் ஓயாமல் கிளிக் செய்து படித்து மேலும் பரவச்செய்த போது, கிளிக் வருமானத்தை குவித்தனர்.

இணைய விளம்பர உத்தி இப்படி செயல்படுவது உண்மையையும், ஜனநாயகத்தையும் முன்னிறுத்தும் மனிதகுலத்தின் நோக்கத்திற்கு உதவவில்லை என ‘லீ’ கூறியிருக்கிறார். இணையவாசிகளை குறி வைத்து வெளியிடப்படும் இருண்ட இலக்கு விளம்பரங்கள் நம்மை ஏமாற்றிவிட்டு பின் மறைந்துவிடுவது ஜனநாயகம் அல்ல என அவர் கூறியிருக்கிறார்.

யார் கவனம் பெறுகின்றனர் எனும் தேர்வை லாப நோக்கம் கொண்ட பெரிய நிறுவனங்களின் கைகளில் விடுவது சரியானது அல்ல என்றும் அவர் கூறியிருக்கிறார். கூகுள், பேஸ்புக் போன்ற நிறுவனங்கள் இதை வேண்டுமென்றே செய்யவில்லை என்றாலும், வர்த்தக நோக்கத்திற்காக வேறு எதைப்பற்றியும் கவலைப்படாமல் செயல்பட்டுள்ளன என இதே விஷயம் தொடர்பாக அளித்துள்ள இன்னொரு பேட்டியில் அவர் கூறியிருக்கிறார்.

இந்த நிறுவனங்கள் விளைவுகள் பற்றி எல்லாம் யோசிக்காமல் உருவாக்கிய விளம்பர வருவாய் வழிகள் தான் இன்று முக்கிய பிரச்சனையாக உருவாகி இணையத்தின் நம்பகத்தன்மைக்கு வேட்டு வைத்திருப்பதாகவும் ’லீ’ ஆதங்கப்படுவதை அவரது பதில்களில் இருந்து புரிந்து கொள்ளலாம். செயற்கை நுண்ணறிவு மூலம் வெளியிடப்படும் விளம்பரங்கள் மிக அழகாக இணையவாசிகள் கவனத்தை ஈர்த்து அவர்களை திசை திருப்பவதாகவும் அவர் ஆதங்கப்படுகிறார்.

’லீ’ சொல்வதை எல்லாம் பார்த்தால் இணையம் பயணிக்கும் திசை அத்தனை ஆரோக்கியமாக இல்லை என உணர்ந்து கொள்ளலாம். கூடவே இணையத்தின் எதிர்காலம் பற்றியும் கவலையாக இருக்கலாம். ஆனால், நிலைமை இப்போதும் கூட கை மீறிவிடவில்லை என்பதே அவரது கருத்தாக இருக்கிறது. இன்னும் கூட இந்த நிலையை மாற்றலாம் என்றாலும், அதற்கு முதலில் நாம் தற்போதைய நிலைக்கு சவால்விட வேண்டும் என்கிறார்.

இணையத்தில் மேற்கொள்ளப்படும் விளம்பர உத்தி போன்றவற்றையும், இணைய பழக்கங்களை கண்காணிப்பது, பெரிய நிறுவனங்களின் ஆதிக்கம் போன்றவற்றை எல்லாம் ஏற்றுக்கொள்வதை விட இவற்றை கேள்வி கேட்க வேண்டும் என்கிறார். இணையம் இப்படி தான் இருக்கிறது என சமரசம் செய்து கொள்ளாமல், இணையம் எப்படி இருக்க வேண்டும் என்பது பற்றி நாம் யோசிக்க வேண்டியது கட்டாயமாகி இருக்கிறது என்கிறார் ‘லீ”. அந்த பொறுப்பு நமக்கும் இருக்கிறது தானே!

 

டிம் பெர்னர்ஸ் லீ பேட்டி; 1. https://www.theguardian.com/technology/2017/nov/15/tim-berners-lee-world-wide-web-net-neutrality

  1. https://www.bloomberg.com/news/articles/2017-11-13/father-of-the-web-confronts-his-creation-in-the-era-of-fake-news

நீங்கள் அறியாத தேடல் ரகசியங்கள்

ddg-bangs-640x460மாற்று தேடியந்திரங்களில் முன்னணியில் இருக்கும் ’டக்டக்கோ’ பற்றி நீங்கள் கேள்விப்பட்டிருக்கலாம். கூகுள் சவால் விடக்கூடிய அளவுக்கு மிகப்பெரிய தேடியந்திரம் இல்லை என்றாலும், ’டக்டக்கோ’ கடந்த 7 ஆண்டுகளில் கொஞ்சம் கொஞ்சமாக வளர்ந்து தனக்கென தனியிடத்தை பிடித்திருக்கிறது. இதற்கு முக்கிய காரணம் டக்டக்கோ இணைவாசிகளின் தனியுரிமையை மதிக்கும் வகையில் செயல்படுவது தான். ஆம், இணையவாசிகளின் தேடல் பழக்கத்தை கண்காணிப்பதில் ஈடுபடாமல் இருப்பதும், அவர்களைப்பற்றி தகவல்களை திரட்டி விளம்பர வலை விரிக்காமல் இருப்பதும் டக்டக்கோவின் தனிச்சிறப்பாக அமைகிறது. இணையத்தில் தகவல்களை தேடுவதற்காக டக்டக்கோவை பயன்படுத்தும் போது, நீங்கள் யார் என்பதை அது கவனிக்காமல் இருக்கிறது. இந்த அனாமதேய தன்மையை பிரைவசி ஆர்வலர்கள் கொண்டாடி வருகின்றனர்.

எனவே உங்கள் இணைய தேடல் அனாமதேயமாக இருக்க வேண்டும் என விரும்பினால் நீங்களும் டக்டக்கோவை பயன்படுத்திப்பார்க்கலாம். பிரைவசி பாதுகாப்பு பிரதான அம்சம் என்றாலும், டக்டக்கோவுக்கு மாறலாம் என நினைப்பதற்கு மேலும் பல காரணங்கள் இருக்கின்றன. ஒரு தேடியந்திரமாக டக்டக்கோ பல தனித்தன்மையான சேவைகளை வழங்கி வருகிறது. இவற்றில் பல பிரத்யேகமானவை என்பது குறிப்பிடத்தக்கது:

ஸ்டாப்வாட்ச்

நீங்கள் விரும்பினால் டக்டக்கோவை ஸ்டாப்வாட்சாக பயன்படுத்தலாம். இதன் கட்டத்தில் ஸ்டாப்வாட்ச் என டைப் செய்தால் போதும், அதற்கான கடிகாரம் தோன்றும். அதில் உங்களுக்கு தேவையான நேரத்தை அமைத்துக்கொள்ளலாம். அது மட்டும் அல்ல, அடுத்தடுத்து வேலைகள் இருப்பின், லேப் வசதி மூலம் தொடச்சியாக பயன்படுத்தலாம். இதே முறையில் டைமர் சேவையையும் பயன்படுத்தலாம். டைமரில் நேரம் முடிந்ததும் அலாரமும் ஒலிக்கும்.

பெரிய எழுத்துக்கள்

ஆங்கில வாசகங்களில் தேவையான இடங்களில் கேபிடல் எழுத்துக்களை அமைக்க விரும்பினால் அதற்கான வசதியையும் இந்த தேடியந்திரம் வழங்குகிறது. வாசகத்தை டைப் செய்து அதற்கு முன் டைடில் கேஸ் என குறிப்பிட்டு இடைவெளி விடுவதன் மூலம் இந்த வசதியை பயன்படுத்திக்கொள்ளலாம். எழுத்துக்களை லோவர் கேஸ் அல்லது அப்பர் கேசாக மாற்றவும் இதை பயன்படுத்தலாம். மாணவர்களுக்கு இந்த வசதி மிகவும் பயனுள்ளதாக இருக்கும்.

செய்திகளை தேட

கூகுளில் தகவல்களை தேடும் போது, தொடர்புடைய செய்திகளும் இடம்பெற்றிருக்கும். ஆனால் டக்டக்கோ தேடல் முடிவுகளை மட்டுமே அளிக்கிறது. இருப்பினும் செய்திகளும் இடம்பெற விரும்பினால், தேடலுக்கான கீவேர்டு முன் அல்லது முடிவில் நியூஸ் என சேர்த்துக்கொண்டால் போதும், தொடர்புடைய செய்திகளையும் காணலாம். 100 க்கும் மேற்பட்ட தளங்களில் இருந்து செய்திகள் பட்டியலிடப்படுகின்றன.

பிடிஎப் கோப்புகள்

டக்டக்கோவில் எச்.டி.எம்.எல் கோப்புகளையும் எளிதாக தேடலாம். எச்.டி.எம்.எல்: என குறிப்பிட்டால் பொருத்தமான முடிவுகளை காணலாம். புரோகிராமிங் சிறப்பு குறியீடுகளையும் தேடலாம். இதே போல பிடிஎப் கோப்புகள் அல்லது மின் புத்தகங்களை எதிர்பார்க்கும் போது, கீவேர்டுடன் பிடிஎப் எனும் வார்த்தையை சேர்த்துக்கொண்டால் போது, இத்தகைய கோப்புகளை மட்டும் தேடலாம்.

நெத்தியடி தேடல்

சில நேரங்களில் ஒட்டுமொத்த இணைய கடலிலும் தேட விரும்பாமல் குறிப்பிட்ட இணையதளத்தில் மட்டும் தேட விரும்பலாம். இதற்கும் டக்டக்கோவில் வழி இருக்கிறது. இந்த வசதி ஐபேங்க் என சொல்லப்படுகிறது. தேடல் பதத்திற்கு முன் ஆச்சர்யக்குறியை சேர்த்து, குறிப்பிட்ட தளத்திற்கான முதல் எழுத்தை குறிப்பிட்டால் போதும், அந்த ஒரு தளத்தில் மட்டும் தேடலாம். உதாரணத்திற்கு  !a என்றால் அமேசான் தளத்தில் தேடலாம். இப்படி நூற்றுக்கணக்கான தளங்களில் நேரடியாக தேடும் வசதியை அளிக்கிறது. இதற்கான நீண்ட பட்டியலும் கொடுக்கப்பட்டுள்ளது: https://duckduckgo.com/bang

ஆய்வுப்பிரிவிலும் தளங்கள் பட்டியலிடப்பட்டுள்ளதால் மாணவர்கள் மற்றும் ஆய்வாளர்களுக்கு இந்த சேவை மிகவும் பயனுள்ளதாக இருக்கும். இவ்வளவு ஏன், இந்த வசதியை பயன்படுத்தி கூகுளிலும் தேடலாம் தெரியுமா? https://duckduckgo.com/bang?q=google

உடனடி பதில்கள்

இன்ஸ்டண்ட் ஆன்சர்ஸ் எனும் பெயரில் உடனடி பதில்களையும் டக்டக்கோ வழங்கி வருகிறது. குறிப்பிட்ட பல கேள்விகள் அல்லது பதங்களுக்கு தேடல் வார்த்தையை டைப் செய்ததுமே பொருத்தமான பதிலை காணலாம். கிளிக் செய்யாமலே தேடும் வசதி எனும் வர்ணனையோடு டக்டக்கோ இதை அறிமுகம் செய்தது. கூகுள் நாலட்ச் கிராப் எனும் பெயரில் இது போன்ற வசதியை வழங்கினாலும், முதலில் டக்டக்கோ தான் இதை அறிமுகம் செய்தது.

வீடியோ தேடல்

வீடியோ கோப்புகள் மட்டும் தான் தேவை எனில் தேடல் பதத்திற்கு முன் வீடியோ என சேர்த்துக்கொண்டால் 28 வீடியோக்கள் வந்து நிற்கின்றன. மேலும் வீடியோக்கள் தேவையில் எனில் அதற்கான வசதியை கிளிக் செய்யலாம். சமையல் குறிப்பு வீடியோக்கள் என்று குறிப்பிட்டும் தேடலாம். இந்த முடிவுகள் யூடியூப் மட்டுமே சார்ந்திருப்பது தான் ஒரே குறை.

குறுக்கு வழிகள்

இணையசேவைகளுக்கான கீபோர்டு சார்ந்த குறுக்கு வழிகள் தேவை எனில், சீட்ஷீட் வசதியை பயன்படுத்திக்கொள்ளலாம். உதாரணத்திற்கு போட்டோஷாப்  சீட்ஷீட் என தேடினால் போட்டோஷாப் தொடர்பான குறுக்கு வழிகளை பெறலாம். புரோகிராமிங் தொடர்பான தகவல்களையும் எளிதாக தேடலாம்.

டக்டக்கோவில் இன்னும் கூட பல அம்சங்கள் இருக்கின்றன. எல்லாம் சரி, கூகுள் போல வருமா? என கேட்பவர்களுக்காக கூகுல் தொடர்புடைய சுவாரஸ்யமான தகவல் ஒன்று. கூகுளில் ஏதேனும் பிரச்சனையா? எனும் பொருள்பட, ஈஸ் கூகுள் டவுன் என கூகுளில் கேட்டால், இல்லை (நோ) என பதில் பளிச் என தோன்றுகிறது.

 

தளம் புதிது: லண்டன் திரைப்பட வரைபடம்

லண்டன் நகரம் பல விஷயங்களுக்கு புகழ் பெற்றது. தேம்ஸ் நதிக்கரை, லார்ட்ஸ் மைதானம், விம்பிள்டன் மைதானம் என நீளும் இந்த பட்டியலில் திரைப்படங்ளுக்கான படிப்பிடிப்பையும் சேர்த்துக்கொள்ள வேண்டும். ஆங்கில படங்கள் பல லண்டனில் படமாக்கப்பட்டுள்ளன. லண்டன் நகரில் படமாக்கப்பட்ட படங்கள் பற்றி அறிய விருப்பம் எனில், கோ3சினிமா தளத்தின் திரைப்பட படப்பிடிப்பு பகுதி உதவுகிறது.

இந்த பகுதியில் லண்டன் நகர் மற்றும் சுற்றுப்புற பகுதிகளில் படமாக்கப்பட்ட படங்கள் தொடர்பான விவரங்களை பார்க்கலாம். லண்டன் வரைபடம் மீதி இந்த தகவல்கள் அழகாக சுட்டிக்காட்டப்பட்டுள்ளன. வரைப்படத்தில் மஞ்சள் மற்றும் சிவப்பு நிற ஐகான்கள் மீது கிளிக் செய்தால் படப்பிடிப்பு தொடர்பான விவரங்களை காணலாம். திரைப்பட போஸ்டர் சின்னதாக எட்டிப்பார்க்க மற்ற தகவல்களும் சுருக்கமாக இடம்பெற்றுள்ளன.

திரைப்பட ரசிகர்களுக்கு இந்த தளம் நிச்சயம் சுவாரஸ்யமானதாக இருக்கும். லண்டன் நகர் மீது அபிமானமும் இருந்தால் இன்னும் ஈர்ப்புடையதாக இருக்கும். மற்ற நகரங்களுக்குக் இது போன்ற ஒரு வரைபடம் இருந்தால் நன்றாக இருக்குமே என்ற எண்ணத்தையும் இது ஏற்படுத்தலாம்.

இணைய முகவரி:  https://go2cinema.com/filming-location-map

 

செயலி புதிது: மாணவர்களுக்கான பயனுள்ள செயலி

மாணவர்கள் ஸ்மார்ட்போன்களை பொழுதுபோக்கு நோக்கில் மட்டும் பயன்படுத்துவதில்லை. கல்வி தொடர்பான பணிகளுக்கும் ஸ்மார்ட்போனை பயன்படுத்தலாம். இதற்கு உதவக்கூடிய எண்ணற்ற செயலிகள் இருக்கின்றன. இந்த பட்டியலில் டைம்டேபிள் செயலியையும் சேர்த்துக்கொள்ள வேண்டும்.

இந்த செயலி வகுப்பு பாட அட்டவனையை குறித்து வைத்துக்கொண்டு, வகுப்புகளை மறக்காமல் இருக்க உதவுகிறது. இதில் வகுப்புகள் நடைபெறும் நேரத்தை குறிப்பிடுவதோடு, மாணவர்கள் தங்களுக்கு தரப்படும் வீட்டுப்பாடங்கள் போன்றவற்றையும் குறித்து வைக்கலாம். விடுமுறை நாட்களையும் குறித்து கொள்ளலாம். வகுப்பில் எடுக்கும் குறிப்புகளையும் இதில் சேமித்து வைக்கலாம். முக்கியமாக வகுப்பு நடந்து கொண்டிருக்கும் போது போனில் அழைப்பு வந்தால் அதை மவுனமாக்கும் வசதியும் இருக்கிறது.

பள்ளி அல்லது கல்லூரி பாடத்திட்டங்களை நிர்வகிப்பதில் இந்த செயலி மிகவும் உதவியாக இருக்கும். எந்த சாதனத்தில் இருந்து வேண்டுமானாலும் இதில் உள்ள தகவல்களை அணுகலாம்.

மேலும் தகவல்களுக்கு: https://play.google.com/store/apps/details?id=com.gabrielittner.timetable&hl=en_GB

 

 

நன்றி; தமிழ் இந்துவில் எழுதியது.

 

டக்டக்கோ பற்றிய முந்தைய பதிவுகள்;

டக்டக்கோ தேடியந்திரத்திற்கு மாறலாமா? http://cybersimman.com/2015/10/28/search-55/

*

கூகுள் தவிர நீங்கள் அறிந்திருக்க வேண்டிய தேடியந்திரங்கள்! http://cybersimman.com/2016/09/28/%E0%AE%95%E0%AF%82%E0%AE%95%E0%AF%81%E0%AE%B3%E0%AF%8D-%E0%AE%A4%E0%AE%B5%E0%AE%BF%E0%AE%B0-%E0%AE%A8%E0%AF%80%E0%AE%99%E0%AF%8D%E0%AE%95%E0%AE%B3%E0%AF%8D-%E0%AE%85%E0%AE%B1%E0%AE%BF%E0%AE%A8/

 

-\

 

மாற்று தேடியந்திரங்கள் எதற்காக? http://cybersimman.com/2016/07/31/search-56/

போட்டோஷாப் கவிதை

Apple_Orchardபோட்டோஷாப் மென்பொருளை வைத்துக்கொண்டு சின்ன சின்ன அற்புதங்களை செய்யலாம் என்பதற்கு அழகான உதாரணமாக கானர் நிக்கர்சன் எனும் ஒளிபட கலைஞர், கடந்த காலத்தையும், நிகழ் காலத்தையும் ஒளிபடங்களில் இணைத்து அசத்தியிருக்கிறார். ’என்னோடு இருக்கும் நான்’ எனும் கவித்துவமான தலைப்பில் இந்த திட்டத்தை அவர் உருவாக்கியிருக்கிறார். சிறுவனான தன்னுடன் இப்போது வளர்ந்து பெரியவனாகிவிட்ட நிக்கர்சன் இணைந்திருக்கும் வகையிலான ஒளிப்படங்களை உருவாக்கி இருக்கிறார். இது எப்படி சாத்தியம் என கேட்கலாம். எல்லாம் போட்டோஷாப் மாயம் தான். ஆம் தன்னுடைய சிறுவயது படங்களை எடுத்துக்கொண்டு, அதில் தன்னுடைய இப்போதையை தோற்றத்தை போட்டோஷாப் மூலம் அழகாக ஒருங்கிணைத்து விட்டார். அதிலும் சிறு வயது போலவே உடைகளை அணிந்து கொண்டு ஒரே படத்தில் சின்ன பையனாகவும், பெரிய இளைஞனாகவும் அவர் காட்சி அளிக்கிறார். ஒளிப்பட ஆல்பங்களை வைத்துக்கொண்டு அந்த நாள் படங்களை புரட்டியை படி நிகழ்கால தோற்றத்தை ஒப்பிடுவது என்பதே சுவாரஸ்யமானது தான். அதை இன்னும் ஒரு படி உயர்த்தும் வகையில், கடந்த கால படத்திற்குள் இப்போதைய தோற்றத்தை இடம்பெற வைத்திருக்கிறார் நிக்கர்சன்.

இணைய முகவரி: https://www.conornickerson.com/en/projects/childhood

 

 

தேடியந்திரம் புதிது; பாட்காஸ்டிங் கேட்கவா!

வெப்காஸ்ட், பிராட்காஸ்ட் என்றெல்லாம் இருப்பது போல இணையத்தில் பாட்காஸ்டிங்கும் பிரபலமாக இருக்கிறது. ஒலி வடிவ நிகழ்ச்சிகளை சந்தா முறையில் பெற்று கையடக்க சாதனங்களில் கேட்டு ரசிப்பதற்கான முறையை தான் பாட்காஸ்டிங் என்கின்றனர். இந்த வகையில் ஆயிரக்கணக்கான நிகழ்ச்சிகள் உருவாக்கப்படுகின்றன. ஒலிப்புத்தகங்களில் துவங்கி பலவகையான ஆடியோ நிகழ்ச்சிகளை இந்த வடிவில் கேட்டு ரசிக்கலாம். இந்த வகையான சுவாரஸ்யமான நிகழ்ச்சிகளை தேடித்தருவதற்காக என்றே லிஸின்நோட்ஸ் தேடியந்திரம் உருவாக்கப்பட்டுள்ளது. இந்த தேடியந்திரம் மூலம் உங்களுக்கு விருப்பமான தலைப்புகளில் பாட்காஸ்டிங் நிகழ்ச்சிகளை எளிதாக தேடி கண்டறியலாம்.

தேடியந்திர முகவரி: https://www.listennotes.com/?s=logo

 

வீடியோ புதிது; கிளிக்பைட் வலைப்பற்றிய பாடல்

ஆசை காட்டி மோசம் செய்வது போல, இணையத்தில் ஏதாவது ஒன்றின் மூலம் ஆசை காட்டி ஆர்வத்தை ஏற்படுத்தி வில்லங்கமான இணைப்புகளை கிளிக் செய்ய வைக்கும் உத்தி கிளிக்பைட் எனப்படுகிறது. தேவையில்லாத விளம்பரங்களை கிளிக் செய்ய வைப்பது முதல் வைரஸ் இணைப்புகளை கிளிக் செய்ய வைப்பது வரை பலவிதமாக வலை விரிக்கப்பட்டு இணையவாசிகள் வீழ்த்தப்படுகின்றன. இந்த கிளிக்பைட் உத்தியின் விபரீத்தத்தை நகைச்சுவையாக உணர்த்தும் வகையில் அயர்லாந்து காமெடி குழு ஒன்று சூப்பரான பாடல் ஒன்றை படமாக்கி அதை யூடியூப் வீடிவோவாக வெளியிட்டுள்ளது.

கேட்டு ரசிக்கும் வகையில் உள்ள அந்த பாடல், இணையத்தில் உள்ள ஆபத்துகளையும் அழகாக சுட்டிக்காட்டுகிறது.

வீடியோவை காண; https://youtu.be/bVn7sLDhZBw

 

 

பலூன் வரும் முன்னே, இணையம் வரும் பின்னே!

 

lபியூர்ட்டோ ரிக்கோ மக்கள் அந்த பலூன்கள் எப்போது வந்து சேரும் என ஏக்கத்துடன் காத்திருக்கின்றனர். அந்நாட்டு அரசாங்கமும், தொண்டு அமைப்புகளும், வர்த்தக நிறுவனங்களும் கூட அந்த பலூன்கள் எப்போது தங்கள் வானில் மிதக்கத்துவங்கும் என எதிர்பார்த்திருக்கின்றனர். மற்ற நாடுகளும் கூட இந்த பலூன்கள் எப்படி செயல்படுகின்றன என்பதை உன்னிப்பாக கவனித்துக்கொண்டிருக்கின்றன.

ஒரு பலூன் மீது இத்தனை எதிர்பார்ப்பா? என்று கேட்கலாம். அதிலும், அண்மையில் சூறாவளியில் சிக்கி அதன் கோரத்தாண்டவத்தில் இருந்து மீள முடியாமல் போராடிக்கொண்டிருக்கும் பியூர்டோ ரிக்கோ மக்கள் ஏன், ஒரு பலூனுக்காக காத்திருக்க வேண்டும் என கேட்கத்தோன்றலாம். அந்த பலூன்கள் சாதாரன பலூன்கள் அல்ல, வானிலிருந்து மண்ணுக்கு இணைய இணைப்பை வழங்க கூடிய அதி நவீன பலூன்கள் என்பது தான் கவனிக்க வேண்டிய விஷயம்.

முன்னணி தேடியந்திர நிறுவனமான கூகுளின் தாய் நிறுவனமான ஆல்பபெட் நிறுவனத்தின் கீழ் செயல்பட்டு வரும் லூன் திட்டத்தின் சார்பில் இந்த வகை பலூன்கள் பறக்க விடப்படுகின்றன. சாகச விளையாட்டாக கருதக்கூடிய ஹாட் ஏர் பலூன் ரகத்தைச்சேர்ந்த இந்த பலூன்கள் காற்றுவெளி மண்டத்தில் மிதந்தபடி தொலைத்தொடர்பு வசதி மற்றும் இணைய வசதியை கீழே உள்ள பகுதிக்கு அளிக்க வல்லவை. அதனால் தான், பியூர்ட்டோ ரிக்கோ மக்கள் இந்த பலூன்கள் வரை எதிர்பார்த்து காத்திருக்கின்றனர். சூறாவளி தாக்குதலால் அந்நாட்டு செல்போன் கோபுரங்களும், தொலைத்தொடர்பு வசதியும் முறித்து போய் கிடக்கின்றன. எனவே அங்கு தகவல் தொடர்பு வசதி முற்றிலும் செயலிழந்து போயிருக்கிறது. இதனால் மீட்பு பணிகளை ஒருங்கிணைப்பது முதல் நிவராண உதவிகளை அளிப்பது வரை எல்லாவற்றிலும் சிக்கல் இருக்கிறது.

தொலைத்தொடர்பு உள்கட்டமைப்பு வசதியை சீரமைக்க மாதக்கணக்கில் ஆகலாம் எனும் நிலையில், அத்தியாவசிய பணிகளை ஒருங்கிணைக்கவும், பொதுமக்கள் தொடர்பு கொள்ளவும் அடிப்படை தொலைத்தொடர்பு வசதி உடனடி தேவை.

இந்த பின்னணியில் தான் ஆல்பபெட் நிறுவனம் தனது லூன் திட்டத்தின் இணைய பலூன்கள் பியூர்ட்டோ ரிக்கோவில் பறக்கவிட திட்டமிட்டு இதற்காக அமெரிக்க அரசின் அனுமதியையும் பெற்றிருக்கிறது. பியூர்ட்டோ ரிக்கோவில் பலூன்களை பறக்கவிட்ட பிறகு உள்ளூர் தொலைத்தொடர்பு நிறுவனங்களுடன் இணைந்து செயல்பட்டு, செல்போன் இணைப்பு மற்றும் இணைய வசதியை அளிக்க திட்டமிடப்பட்டுள்ளது. உறவினர்களை தொடர்பு கொள்ளவும், உதவிகளை பெறவும் செல்போன் இணைப்பு கிடைக்காமல் அல்லாடிக்கொண்டிருக்கும் பியூர்ட்டோ ரிக்கோ மக்களுக்கு இந்த சேவை பேரூதவியாக இருக்கும்.

கூகுளின் தாய் நிறுவனம் இந்த பலூன் திட்டத்தில் மிகுந்த நம்பிக்கை வைத்துள்ளது. பேரிடர் பாதிக்கப்பட்ட பகுதிகள் உள்பட உலகில் இணைய வசதி இல்லாத தொலைதூர பகுதிகள் மற்றும் கிராமப்புற பகுதிகளில் இந்த பலூன்கள் மூலம் இணைய வசதி அளிப்பதை நோக்கமாக கொண்டுள்ளது. குறிப்பிட்ட பகுதியில் வானில் இந்த பலூன்களை வரிசையாக பறக்கவிட்டு அவற்றை வயர்லெஸ் முறையில் வலைப்பின்னலாக இணைப்பதன் மூலம் தரைப்பகுதியில் உள்ளவர்களுக்கு இணைய வசதியை அளிக்கும்.

பலூன்கள் மூலம் எப்படி இணைய வசதி அளிக்க முடியும் என பார்ப்பதற்கு முன், இந்த திட்டம் பற்றி சுருக்கமான அறிமுகம். தேடியந்திரமான கூகுள் பிரவுசர்கள், இமெயில், மொபைல் இயங்குதளம் என பல்வேறு சேவைகளை வழங்கு வருகிறது. இவைத்தவிர கூகுள் நிறுவனம் பல்வேறு ஆய்வு திட்டங்கள் மற்றும் சோதனை திட்டங்களையும் கொண்டிருந்தது. இப்படி கூகுள் குழுவால் பிராஜெக்ட் எக்ஸ் எனும் பெயரில் துவங்கப்பட்டது தான் இணைய பலூன் திட்டம்.

இணையம் மூலம் செய்திகளை தெரிந்து கொள்வது முதல் ஷாப்பிங் செய்வது வரை எண்ணற்ற வசதிகள் சாத்தியமாகி இணையம் இல்லாத வாழ்க்கைக்கு நாம் பழகிவிட்டோம். கம்ப்யூட்டர்கள், லேப்டாப் மட்டும் அல்லாமல், ஸ்மார்ட்போன் மூலம் உள்ளங்கையிலேயே இணைய வசதி சாத்தியமாகிறது. ஆனால், இணைய வசதி என்பது இன்னமும் உலகம் முழுவதும் பரவலாகிவிடவில்லை. உலகில் இணைய வசதி எட்டிப்பார்க்காத பகுதிகளும் அநேகம் இருக்கின்றன. இணைய வசதி மோசமாக உள்ள பகுதிகளும் உள்ளன. மலைப்பகுதி, குக்கிராமங்கள் போன்ற இடங்களுக்கு இணைய வசதியை அளிப்பது என்பது மிகப்பெரிய சவாலாக இருக்கிறது.

இன்னமும் தொலைத்தொடர்பு வசதி எட்டிப்பார்க்காத இடங்களில் இணைய வசதியை அளிப்பதற்கான உள்கட்டமைப்பு வசதியை ஏற்படுத்தி தருவது பெருட்செலவு மிக்கதாகும். இதற்கான லாபமும் குறைவு என்பதால் வர்த்தக நிறுவனங்கள் இதில் அதிக முனைப்பு காட்டவும் தயங்குகின்றன.

இந்த சிக்கலுக்கான தீரவாக தான் பலூன் மூலம் தொலைதூர பகுதிகளில் இணைய வசதி அளிக்கும் திட்டத்தை கூகுள் சோதனை முறையில் துவங்கியது. 2013 ம் ஆண்டு, அதிகாரபூர்வமாக இந்த திட்டம் துவங்கியது. கூகுள் செயல்படுத்தி வந்த பல்வேறு துணை திட்டங்களில் ஒன்றாக விளங்கிய இந்த திட்டம் கடந்த சில ஆண்டுகளுக்கு முன், கூகுளுக்கு என தனியே ஆல்பபெட் எனும் தாய் நிறுவனம் உருவாக்கப்பட்ட போது தனியே பிரிக்கப்பட்டு, அதன் கீழ் இயங்கி வருகிறது. இடைப்பட்ட காலத்தில் கூகுள் தனது பலூன் தொழில்நுட்பத்தை மேம்படுத்தி அதற்கான வெள்ளோட்டங்களையும் நிகழ்த்தி வருகிறது. இதற்கான முதல் சோதனை சில ஆண்டுகளுக்கு முன் நியூசிலாந்து நாட்டில் மேற்கொள்ளப்பட்டது.

தொலைத்தொடர்பு வசதி இல்லாத இடங்களில் வானில் இந்த பலூன்களை பறக்கவிட்டு அவற்றை வலைப்பின்னலாக இணைத்து இணைய இணைப்பை வழங்குவது தான் இந்த திட்டத்தின் நோக்கம். இந்த பலூன்கள் காற்றின் போக்கில் இயங்கி அதற்கேற்ப நிலைநிறுத்திக்கொள்ளும் ஆற்றல் பெற்றிருக்கின்றன. வானிலை நிகழ்வு உள்ளிட்டவற்றால் பாதிக்கப்படாத அளவுக்கு பாதுகாப்பானவை. மேலும் விமானங்கள் போன்றவற்றுக்கு இடைஞ்சல் இல்லாத அளவுக்கு காற்று மண்டத்தில் 15 முதல் 20 கிமீ எல்லையில் இவை இயக்கப்படுகின்றன.

உயர்தரமான பிளாஸ்டிக்கால் ஆன இந்த பலூன்கள் ஹீலியம் வாயுவால் நிரப்பப்பட்டு அதன் மூலம் இயங்குகின்றன. ஒவ்வொரு பலூனும் ஒரு டென்னிஸ் மைதானம் அளவு பெரிதானவை. பூமியில் உள்ள ராட்சத டிரெக்கில் இருந்து இவை விண்ணில் செலுத்தப்படுகின்றன. 30 நிமிடத்திற்கு ஒரு பலூனை இப்படி செலுத்த முடியும். பின்னர், வானில் மிதந்தபடி இவை தங்களுக்கான இடத்தில் நிலைப்பெறும். வரிசையாக பலூன்கள் செலுத்தப்படும் போது பரஸ்பரம் வயர்லெஸ் மூலம் தொடர்பை ஏற்படுத்திக்கொண்டு வானில் வலைப்பின்னல் அமைத்துக்கொள்ளும். இந்த பலூன்கள் சராசரியாக 100 நாட்கள் செயல்படக்கூடியவை. அதன் பிறகு தானாக இறங்கி வந்துவிடும். அதுவரை இயங்குவதற்கான ஆற்றலை உருவாக்கி கொள்ளும் சோலார் வசதியை பெற்றுள்ளன.

பூமியில் உள்ள செல்போன் கோபுரங்கள் மற்றும் செல்பான் பயனாளிகளை இணைக்கும் பாலமாக பலூன் வலைப்பின்னல் செயல்படுவதால் செல்போனில் பேசுவது மற்றும் இணையத்தில் உலாவுவது சாத்தியமாகும். பலூனில் வயர்லெஸ் வசதி இருக்கிறது. 4 ஜி சேவையை இதன் மூலம் பெறலாம் என்றாலும், உண்மையில் இந்த பலூன்கள் இணைய வசதியை அளிப்பதில்லை. இவை செல்போன் கோபுரங்களாக மட்டுமே செயல்படுகின்றன. தரைப்பகுதியில் உள்ள செல்போன் கோபுரங்கள் இந்த மிதக்கும் கோபுரங்களுடன் இணைக்கப்படுவதால் இடைவெளி இல்லாத இணைய இணைப்பு உண்டாகிறது. எனவே லூன் திட்டம் உள்ளூர் தொலைத்தொடர்பு நிறுவனங்கள் மற்றும் அரசு அமைப்புகளுடன் இணைந்தே இந்த சேவையை வழங்க முடியும். கரடுமுரடான பகுதியில் செல்போன் கோபுரங்கள் உள்ளிட்ட உள்கட்டமைப்பு வசதியை அமைப்பதைவிட பலூன்களை செல்போன் கோபுரமாக்கி இணைய இணைப்பு வழங்குவது எளிதானதாக கருதப்படுகிறது.

இந்த நம்பிக்கையுடன் தான், கூகுளின் தாய் நிறுவனம் இணைய பலூன்களை உருவாக்கி வருகிறது. அண்மையில் இந்த திட்டம் தனி நிறுவனமாக அமைக்கப்பட்டுள்ளது. அடுத்த கட்டமாக வர்த்தக நோக்கில் இந்த சேவையை வழங்க திட்டமிட்டுள்ளது. இதனிடையே பேரிடர் பாதித்த பகுதிகளில் அவசர கால உதவியாக இணைய இணைப்பை வழங்க இந்த பலூன்கள் பயன்படுத்தப்படுகின்றன. சில மாதங்களுக்கு முன் தென்னமரிக்க நாடான பெருவில் வெள்ள பாதிப்பு உண்டான போது, இணைய பலூன்கள் மூலம் தொலைத்தொடர்பு வசதி அளிக்கப்பட்டது. தற்போது பேரிடர் பாதித்த பியூர்ட்டோ ரிக்கோவில் இந்த பலூனள் வலம் வந்து மிகவும் அவசியமான இணைப்பு சேவையை அளிக்க உள்ளன.

உலகம் முழுவதும் இணைய வசதியில் ஏற்றத்தாழ்வு நிலவி வரும் சூழலில், தொலைதூர பிராந்தியங்களில் இணைய வசதியை அமைக்க லூன் பலூன்கள் உதவியாக இருக்கும் என கருதப்படுகிறது. சமூக வலைப்பின்னல் தளமான பேஸ்புக்கும், இதே போலவே ஆளில்லா விமானம் மூலம் தொலைதூர பகுதிகளில் இணைய வசதியை வழங்கும் சோதனை திட்டத்தில் கவனம் செலுத்து வருவதும் குறிப்பிடத்தக்கது.

 

 

சைபர்சிம்மன்