Tag Archives: share

கற்றலில் உதவும் வீடியோக்கள்

classhookஇணையத்தில் பொழுதுபோக்கு வீடியோக்கள் மட்டும் அல்ல, பாடங்களை கற்றுக்கொள்ள உதவும் கல்வி வீடியோக்களும் அநேகம் இருப்பது தெரிந்த விஷயம் தான். இத்தகைய கல்வி சார்ந்த வீடியோக்களை தேடித்தரும் இணையதளங்களும் இருக்கின்றன.
கிளாஸ்ஹுக் தளமும், கல்வி சார்ந்த வீடியோக்களை தேடித்தருகிறது என்றாலும், முற்றிலும் புதுமையான முறையில் இதை நிறைவேற்றுகிறது. இந்த தளம், புதிய விஷயங்களை கற்றுக்கொள்ள உதவும் திரைப்பட கிளிப்களை அடையாளம் காட்டுகிறது.
திரைப்படங்கள் மற்றும் டிவி நிகழ்ச்சியில், கணிதம், அறிவியல் மற்றும் உலக நடப்புகள் சார்ந்த உரையாடல்கள் இடம்பெறுவது உண்டல்லவா? இத்தகைய உரையாடல் கொண்ட வீடியோக்களை இந்த தளம் பட்டியலிடுகிறது. ( ஆனால் ஹாலிவுட் படங்கள் தான் இடம்பெற்றுள்ளன)
இந்த காட்சிகளை கொண்டு ஆசிரியர்கள் வகுப்பில் மாணவர்களுக்கு தொடர்புள்ள பாடத்தை நடத்தினால் அவர்களால் எளிதாக புரிந்து கொள்ள முடியும் என இந்த தளம் கருதுகிறது. அதனால் தான் கற்றலுக்கு உதவக்கூடிய கிளிப்களை தேடித்தருகிறது. வகுப்புகளுக்கு ஏற்பவும் தேடலாம்.
அறிவியல், கணிதம், மொழி என எந்த தலைப்பு சார்ந்த வீடியோக்கள் தேவை என தேடிப்பார்க்கலாம். அல்லது இதில் பட்டியலிப்பட்டுள்ள கிளிப்களை ஒவ்வொன்றாக பார்க்கலாம். தேவையான தலைப்புகளை டைப் செய்தும் தேடிப்பார்க்கலாம்.
ஆசிரியர்கள் பயன்படுத்திக்கொள்ளலாம். ஆர்வம் உள்ளவர்கள் முற்றிலும் தகவல் நோக்கில் வீடியோ கிளிப்களை பார்த்து ரசிக்கவும் இந்த தளத்தை அணுகலாம்.
இணைய முகவரி: https://www.classhook.com/

செயலி புதிது; இன்ஸ்டாகிராம் பயண வழிகாட்டி
ஒளிப்பட பகிர்வு செயலியான இன்ஸ்டாகிராமை பல விதங்களில் பயன்படுத்தலாம். உணவுப்பிரியர்கள் அதில் பகிரப்படும் ரெஸ்டாராண்ட் சார்ர்ந்த படங்கள் மூலம் புதிய உணவை சுவைக்க ஏற்ற இடங்களை அடையாளம் காணலாம். அதே போல பேஷன் பிரியர்கள் புதிய ஆடை அலங்காரங்களை ஒளிப்படங்களாக காணலாம். யோகா பிரியர்கள் ஒளிப்படங்களை பார்த்து யோகா கற்றுக்கொள்ளலாம். இதே போலவே சுற்றுலா பிரியர்கள் இன்ஸ்டாகிராமில் பகிரப்படும் பயணம் சார்ந்த படங்கள் மூலம் புதிய இடங்களை தெரிந்து கொள்ளலாம்.
– இப்படி பயணம் சார்ந்த படங்களை பார்ப்பதற்காக என்றே தனியே ஷெர்பா எனும் செயலி அறிமுகம் செய்யப்பட்டுள்ளது. ஐபோனுக்கான இந்த செயலி மூலம், இன்ஸ்டாகிராமில் பகிரப்படும் சுற்றுலா சார்ந்த படங்களை பின் தொடரலாம்.
– உலக நகரங்கள் சார்ந்த ஒளிப்படங்களை வரிசையாக காணலாம். உலக வரைப்படம் மீதான இடங்களை கிளிக் செய்தும் ஒளிப்படங்களை காணலாம்.
– பயணங்களுக்கான புதிய சுவாரஸ்யமான இடங்களை அறிமுகம் செய்து கொள்ள இந்த செயலி உதவும்.
– மேலும் தகவல்களுக்கு: https://sherpa.guide

வீடியோ வழிகாட்டி இணையதளங்கள்

 

what-to-watch-next-findie-670x330’என்ன புத்தகம் படிக்கலாம்’ எனும் கேள்வி புத்தக புழுக்களுக்கு இருப்பது போல, ’என்ன வீடியோ பார்க்கலாம்’ எனும் கேள்வி வீடியோ பிரியர்களுக்கு இருக்கலாம். அதிலும் இப்போது ஆன்லைனில் அப்லோட் செய்யப்படும் வீடியோக்கள் அதிகரித்து வரும் நிலையில், பார்த்து ரசித்து பயன்பெற ஏற்ற வீடியோக்களை கண்டறிவது என்பது சவாலானது தான். ஒரு புள்ளிவிவரப்படி பார்த்தால் யூடியூப்பில் மட்டும் நிமிடத்திற்கு 100 மணி நேரத்திற்கு நிகரான வீடியோக்கள் பதிவேற்றப்படுகின்றன. இன்னொரு கணக்குபடி பார்த்தால் அமெரிக்காவில் கடந்த 30 ஆண்டுகளில் முன்னணி தொலைக்காட்சி சேனல்கள் உருவாக்கிய வீடியோக்களை விட அதிக வீடியோ 30 நாட்களில் இணையத்தில் பதிவேற்றப்படுகின்றன.

வீடியோ இணையதளங்களில் யூடியூப் முன்னணியில் இருந்தாலும், வேறு பல வீடியோ இணையதளங்களும் அநேகம் இருக்கின்றன. அதோடு, வழக்கமாக அறியப்படும் பொழுதுபோக்கு, நகைச்சுவை வீடியோக்கள் தவிர எண்ணற்ற வகை வீடியோக்களும் இணையத்தில் கொட்டிக்கிடக்கின்றன. அவற்றின் மத்தியில் தேடிப்பார்த்தால் அசர வைக்கும் பொக்கிஷங்களை கண்டறியலாம். இதற்காக இணையத்தில் அங்கும் இங்கும் அல்லாட வேண்டும் என்றில்லை. சுவாரஸ்யமான வீடியோக்களை அடையாளம் காட்டும் அருமையான இணையதளங்கள் இருக்கின்றன. அவற்றில், நீங்கள் புக்மார்க் செய்ய வேண்டிய தளங்கள் இதோ:

ஆன்லைன் டிவி

ஹைப்பர்ஸ்கிரீன் இணையதளத்திற்கு விஷயம் செய்தால் அதன் முகப்பு பக்கத்திலேயே வரிசையாக வீடியோ நிகழ்ச்சிகளை பார்க்கலாம். ஆன்லைன் டிவி என வர்ணித்துக்கொள்ளும் இந்த தளம், பல்வேறு வகையான சுவாரஸ்யாமான வீடியோ நிகழ்ச்சிகளை பட்டியலிட்டு பரிந்துரைக்கிறது. ஷேக்ஸ்பியரை புரிந்து கொள்வது என்பதில் துவங்கி, ஜப்பானில் அவசியம் பார்க்க வேண்டிய இடங்கள் வரை பலவகையான வீடியோ நிகழ்ச்சிகளை பார்க்கலாம்.

எந்த வீடியோவை பார்க்க விருப்பமோ அதை கிளிக் செய்தால் போதும், வீடியோ ஓடத்துவங்கி விடுகிறது. அதாவது முகப்பு பக்கத்திலேயே பார்க்கலாம். ஒரு சில வீடியோக்கள் மட்டும் வெளியே சென்று அதற்கான இணையதளத்தில் பார்க்க வேண்டியிருக்கிறது. இந்த பட்டியலே சுவாரஸ்யமாக இருந்தாலும், பயனாளிகள் தங்கள் விருப்பத்திற்கு ஏற்ப, வீடியோக்களை அவற்றின் வகைக்கேற்ப தேர்வு செய்து கொள்ளலாம். குறிப்பிட்ட வீடியோவை தேடிப்பார்ப்பதற்கான தேடல் வசதியும் இருக்கிறது. உறுப்பினராக பதிவு செய்து கொண்டால் கூடுதல் வசதிகளும் இருக்கின்றன. தினமும் புதிய வீடியோக்கள் பட்டியலிடப்படுகின்றன.

இணைய முகவரி: https://www.hypescreen.com/

பரிந்துரை புதிது

வீடியோக்களை தேடும் போது பொதுவாக அவற்றின் வகைகளை தான் குறிப்பிட்டு தேடுவோம். உதாரணத்திற்கு கல்வி வீடியோ அல்லது அறிவியல் வீடியோ எனத்தேடுவோம். இதற்கு மாறாக, பயனாளிகள் தங்கள் மனநிலைக்கு ஏற்ற வீடியோக்களை தேட வழிசெய்யும் புதுமையான இணையதளமான ஃபைண்டி விளங்குகிறது. மகிழ்ச்சி, சோகம், உற்சாகம், ஊக்கம், ஆர்வம், நம்பிக்கை, பரிவு என பலவகையான மனநிலைகளை குறிப்பிட்டு அதற்கு உரிய வீடியோக்களை தேடிப்பார்க்கலாம். இந்த மனநிலைகள் அழகான இமோஜிகள் மூலம் உணர்த்தப்படுகின்றன. அவற்றில் இருந்து தேர்வு செய்த பின், வீடியோ வகையையும் தேர்வு செய்து கொள்ளலாம். வீடியோவுக்கான கால அளவையும் தேர்வு செய்து கொள்ளலாம். முகப்பு பக்கத்தில் பட்டியலிடப்படும் வீடியோக்களையும் பார்த்து ரசிக்கலாம்.

சுவாரஸ்யமான வீடியோக்களை கண்டறிவதற்கான சுவாரஸ்யமான தளமாக இது விளங்குகிறது.

இணைய முகவரி: https://www.findie.me/

செய்தி விடியோக்கள்

செய்தி நோக்கிலான வீடியோக்கள் தேவை எனில் டிக் விடியோ பகுதி ஏற்றதாக இருக்கும். சமூக திரட்டி வகை சேவைகளில் முன்னோடியான டிக் அறிமுகமான காலத்தில் பயனாளிகள் செய்தி இணைப்புகளை பகிர்ந்து கொள்ள வழி செய்தது. பயனாளிகளே அந்த இணைப்புகளை வாக்களித்து முன்னிலைப்பெறச்செய்யலாம் என்பது டிக் அறிமுகம் செய்த புதுமை அம்சமாக விளங்கியது. சில ஆண்டுகள் செல்வாக்குடன் திகழ்ந்த நிலையில் பின் தங்கிப்போன டிக் இப்போது வீடியோ பரிந்துரை சேவையாக உருமாற்றம் பெற்றிருக்கிறது. இதன் முகப்பு பக்கத்தில் அருமையான செய்தி வீடியோக்களை பார்க்கலாம். வேறு வகையான வீடியோக்களையும் பார்க்கலாம்.

அறிவியல், தொழில்நுட்பம், செய்தி, பொழுதுபோக்கு என பலவேறு பிரிவுகளில் இருந்தும் தேர்வு செய்யலாம். இப்போது பெரிதாக பேசப்படும் செய்தி சார்ந்த வீடியோக்கள் முன்னிலைப்படுத்தப்படுகின்றன.

இணைய முகவரி: http://digg.com/video

கதை சொல்லும் படங்கள்

இலக்கில்லாத வீடியோக்களை விட அர்த்தம் உள்ள வீடியோக்களை பார்க்க விருப்பம் எனில், ஷார்ட் ஆப் தி விக் இணையதளம் கச்சிதமாக இருக்கும். குறும்படம் மற்றும் ஆவணப்பட வகைகளை சேர்ந்த வீடியோக்களில் இருந்து கவனமாக தேர்வு செய்யப்பட்ட அருமையான வீடியோக்களை இந்த தளம் பரிந்துரைக்கிறது. எல்லாமே ஏதோ ஒரு வகையில் கதை சொல்லும் வீடியோக்கள்.

ஒவ்வொரு வீடியோவுடனும் அதற்கான அறிமுகமும் சுருக்கமாக இடம்பெறுகிறது. இந்த அறிமுகம் வீடியோவில் எதிர்பார்க்க கூடிய விஷயங்களுக்கான வழிகாட்டியாக அமையும். ஈரானிய படங்களில் துவங்கி இசை  வீடியோ வரை பலவகை குறும்படங்களை பார்த்து ரசிக்கலாம். இதன் நேர்த்தியான முகப்பு பக்கமும் கவர்கிறது. பல ஆண்டுகளாக செயல்பட்டு வரும் இணையதளம் இது.

இணைய முகவரி: https://www.shortoftheweek.com/

கல்வி வீடியோக்கள்

அன்பிளக்டிவி மிகவும் எளிமையான வீடியோ சேவை. ஆனால் மிகவும் சுவாரஸ்யமானது. தொலைக்காட்சி நிகழ்ச்சிகளுக்கு பதிலாக பயனுள்ள வீடியோக்களை பரிந்துரைப்பது தான் இந்த தளத்தின் நோக்கம். முகப்பு பக்கத்தில் எப்போதும் ஒரு வீடியோ பரிந்துரைக்கப்படுகிறது. அந்த வீடியோ பிடிக்காவிட்டால், அடுத்த வீடியோவுக்கு கிளிக் செய்யலாம். இல்லை எனில் அடுத்த வீடியோவுக்கு கிளிக் செய்யலாம். இப்படி வரிசையாக வீடியோக்களை பார்த்துக்கொண்டே இருக்கலாம். எல்லாமே புதிய விஷயங்கள் தொடர்பான விழிப்புணர்வை ஏற்படுத்தக்கூடிய வீடியோக்கள்.

இணைய முகவரி: http://unplugthetv.com/

சுட்டிஸ்களுக்கான வீடியோ

சிறுவர், சிறுமிகள் பார்த்து ரசிக்கும் வகையில் அவர்கள் பிஞ்சு மனதுக்கு ஆர்வம் அளிக்கும் வகையிலான வீடியோக்களை பரிந்துரைக்கிறது திகிட்ஸ்ஷுட்சீதிஸ் இணையதளம். அறிவியல், தொழில்நுட்பம், இசை, அனிமேஷன் என பலவகையான வீடியோக்களை பார்க்கலாம். எல்லாமே கவனமாக தேர்வு செய்யப்பட்டு பரிந்துரைக்கப்படுபவை.

இணைய முகவரி: http://thekidshouldseethis.com/

திரைப்புத்தகங்களை பின் தொடரும் டிவிட்டர் பக்கம்!

 

b2திரைப்பட நட்சத்திரங்கள் எந்த புத்தகத்தை ஆர்வத்துடன் வாசிக்கின்றனர் என்பதை அவர்கள் பேட்டி மூலம் அறிந்து கொள்ளலாம். ரசிகர்கள் அந்த புத்தகங்களை தேடிப்பிடித்து வாசிக்கவும் செய்யலாம். எல்லாம் சரி, திரைப்பட கதாபாத்திரங்கள் எந்த புத்தகங்களை வாசிக்கின்றனர் என்பதை நீங்கள் எப்போதேனும் கவனித்ததுண்டா? அதாவது திரைப்படங்களில் வரும் நடிகர் அல்லது நடிகை புத்தகம் படிப்பது போல வரும் காட்சிகளை கவனித்திருக்கிறீர்களா? அந்த புத்தகங்கள் உங்கள் நினைவில் இருக்கின்றனவா?

இந்த கேள்விகள் உங்களுக்கு சுவாரஸ்யம் அளித்தால், @புக்ஸ்_இன்_மூவிஸ் ( @books_in_movies ) டிவிட்டர் பக்கம் உங்களை கவர்ந்திழுக்கும். ஏனெனில் இந்த டிவிட்டர் பக்கம் திரையில் தோன்றி மறைந்த புத்தகங்களை குறும்பதிவு வடிவில் அடையாளம் காட்டி வருகிறது.

திரைப்படங்களில் கதை சொல்லும் உத்தியாகவும், காட்சி அமைப்பிற்கு வலு சேர்க்கவும் பல விஷயங்கள் பயன்படுத்துவது உண்டு. இதேவிதமாக தான் திரையில் தோன்றும் பாத்திரங்கள் புத்தகம் அல்லது நாவலை வாசித்துக்கொண்டிருப்பது போல காண்பிப்பதும் வழக்கம். இந்த திரை வாசிப்பு கதையை ஒட்டியும் இருக்கலாம், அல்லது கதையுடன் நேரடியாக தொடர்பு இல்லாமாலும் அமையலாம்.சில நேரங்களில் திரையில் பாத்திரங்கள் வாசிகப்படுவது போன்ற புத்தகம் பரவலான கவனத்தை ஈர்ப்பதும் உண்டு. கபாலி படத்தின் அறிமுக காட்சியில் ரஜினி காந்த் ’மை பாதர் பாலைய்யா’ எனும் புத்தகத்தை படித்துக்கொண்டிருப்பது போன்ற காட்சி கவனத்தை ஈர்த்தது இதற்கான உதாரணம். பாலச்சந்தரின் ஏக் துஜே கேலியே படத்தில் நாயகி, ஷேக்ஸ்பியர் நாடகங்கள் மற்றும் 20 நாட்களில் தமிழ் மொழியை கற்றுக்கொள்வது எப்படி? எனும் புத்தகங்களை வாசிப்பது போல வரும்.

ஆனால் பெரும்பாலும் ரசிகர்கள் இந்த காட்சிகளை கடந்து போய்விடுவதுண்டு. அதில் வரும் புத்தகங்களையும் கவனிக்காமல் விட்டுவிடுவார்கள். திரை வாசிப்பை மையமாக கொண்டு ஏதேனும் சர்சசை அல்லது விவாதம் ஏற்படும் போது தான், காட்சிகளில் காண்பிக்கப்படும் புத்தகங்களை கவனிக்கத்தோன்றும்.

இவ்வாறு இல்லாமல், திரைப்படங்களில் பாத்திரங்களால் வாசிக்கப்பட்ட புத்தகங்களை எல்லாம் கண்டறிந்து அடையாளம் காட்டும் வகையில் மேலே குறிப்பிட்ட  புக்ஸ்_இன்_மூவிஸ் டிவிட்டர் பக்கம் அமைந்துள்ளது. அபிஷேக் சுமன் எனும் திரைப்பட ரசிகர் இந்த டிவிட்டர் பக்கத்தை நடத்தி வருகிறார். திரைப்படங்களில் எந்த காட்சியில் நடிகர், நடிகையர் புத்தகம் வாசிப்பது போல வருகின்றனவோ அந்த காட்சிகளை எல்லாம் ஸ்கிரின்ஷாட் எடுத்து அதன் விவரத்தை குறும்பதிவாக பகிர்ந்து வருகிறார். எந்த படத்தில், எந்த காட்சியில் என்ன புத்தகம் வாசிக்கப்படுகிறது என்பதை இந்த குறும்பதிவுகள் மூலம் அறிந்து கொள்ளலாம்.

bநம்மூர் திரைப்படங்கள் மட்டும் அல்லாமல் சர்வதேச திரைப்படங்களிலும் பாத்திரங்கள் வாசிக்கும் புத்தகங்களையும் இப்படி படம் பிடித்துக்காட்டி வருகிறார். தில்லிவாசியான அபிஷேக் தணிக்கையாளராக பணியாற்றி வருபவர். சினிமா, புத்தகம் இரண்டிலுமே அவருக்கு ஆர்வம் அதிகம் என்கிறார். திரையில் பாத்திரங்கள் வாசிக்கும் புத்தகம் தொடர்பாக பத்திரிகை ஒன்றில் சில ஆண்டுகளுக்கு முன் வாசித்த கட்டுரை ஏற்படுத்திய தாக்கம் காரணமாக, திரைப்புத்தகங்களை அடையாளம் காட்டும் ஆர்வம் உண்டானதாக அவர் ஸ்க்ரோல் இணைய இதழுக்கு அளித்துள்ள பேட்டியில் தெரிவித்துள்ளார். முதலில் தனது டிவிட்டர் பக்கத்திலேயே இந்த தகவல்களை பகிர்ந்து வந்திருக்கிறார். பின்னர் தான் இதற்கென்றே தனி டிவிட்டர் பக்கத்தை அமைந்த்ததாக குறிப்பிடுகிறார். இதே போலவே ஒளிப்பட பகிர்வு சேவையான இன்ஸ்டாகிராமிலும் ஒரு பக்கத்தை உருவாக்கியிருக்கிறார்.

மற்றவர்களுடன் அதிகம் பேசும் பழக்கம் இல்லாத தனக்கு, திரைப்படங்களும், புத்தகங்களும் தான் தஞ்சம் அளிப்பதாக கூறும் அபிஷேக், எந்தவித திட்டமிடலும் இல்லாமல் இந்த பக்கத்தை துவக்கியதாக கூறியிருக்கிறார். திரையில் தோன்றும் புத்தகங்களை தேடி கண்டுபிடிப்பதற்காக என்றே அவர் தினமும் திரைப்படம் பார்க்கிறாராம். ஏற்கனவே பார்த்த படங்களில் தோன்றிய புத்தகங்கள் நன்றாக நினைவில் இருந்தது துவக்கத்தில் இவருக்கு கைகொடுத்திருக்கிறது. இப்போது இதற்காக என்றே படங்களை பார்க்கிறார். மற்றவர்கள் பரிந்துரையையும் ஏற்றுக்கொள்கிறார். புத்தகங்கள் மட்டும் அல்ல பத்திரிகை, சஞ்சிகைகள் போன்றவை வாசிக்கப்பட்டாலும் அவற்றையும் பகிர்ந்து கொள்கிறார்.

இதுவரை நானுறுக்கும் மேற்பட்ட புத்தகங்களை பகிர்ந்து கொண்டிருக்கிறார். திரைப்படத்தில் எந்த இடத்தில் புத்தகம் வருகிறது என்பதை சுட்டிக்காட்டுவதோடு நிறுத்திக்கொள்வதாகவும், அந்த புத்தகத்திற்கும் காட்சிக்கும் என்ன தொடர்பு என்றெல்லாம் ஆய்வு செய்வதில்லை என்கிறார் அவர். பல படங்கள் புத்தகங்கள் எந்தவித அர்த்தமும் இல்லாமல் காட்சி அமைப்பிற்கு தேவையான ஒரு பொருளாகவே பயன்படுத்தப்படுவதாகவும் அவர் கூறுகிறார்.

எனினும் ஒரு சில படங்களில் புத்தகங்கள் காட்சி மற்றும் கதை அமைப்புடன் கச்சிதமாக பொருந்தி இருப்பதும் உண்டு என்கிறார். அபிஷேக்கின் டிவிட்டர் பக்கத்தை பின் தொடர்ந்தால் தினம் ஒரு புத்தகத்தை சுவாரஸ்யமான முறையில் அறிமுகம் செய்து கொள்ளலாம். புத்தக பிரியர்கள் இதை புத்தகங்களுக்கான அங்கீகாரமாக கருதலாம் என்றால், திரைப்பட பிரியர்கள் அந்த ஆர்வத்தின் அடிப்படையில் புத்தகங்களை தேடிச்செல்வதற்கான வழியாக இதை கருதலாம்.

குறும்பதிவு சேவையான டிவிட்டரை எப்படி எல்லாம் சுவாரஸ்யமாக பயன்படுத்தலாம் என்பதற்கான அழகான உதாரணமாகவும் இந்த பக்கம் அமைந்துள்ளது. அடுத்த கட்டமாக, இந்த தகவல்களை எல்லாம் கொண்ட இணையதளம் ஒன்றை உருவாக்கவும் திட்டமிட்டிருப்பதாக அபிஷேக் குறிப்பிட்டுள்ளார். அதோடு திரையில் பார்த்த ஆனால் என்ன புத்தகம் என கண்டுபிடிக்க முடியாமல் இருக்கும் நூல்களுக்கான பிரத்யேக பகுதியையும் துவக்க திட்டமிட்டிருப்பதாக கூறியுள்ளார்.

திரைப்புத்தகங்களுக்கான டிவிட்டர் பக்கம்: @books_in_movies

ஒவ்வொரு கிளிக்கிலும் ஒரு புதிய புத்தகம்

booksமறக்கப்பட்ட ஒரு புத்தகம் அழிக்கப்பட்ட ஒரு புத்தகத்திற்கு சமமானது அல்லவா? என்று கேள்வி எழுப்புகிறார் சாப்ட்வேர் வல்லுனரான ஸ்டீவ் ஜெயின். அதாவது ஆயிரம் ஆண்டுகளுக்கு முன் எழுதப்பட்ட எண்ணற்ற நல்ல புத்தகங்கள் இருக்கும் போது அவற்றை அணுக வழியில்லாவிட்டால் என்ன பயன், அந்த புத்தகங்கள் இருந்தும் இல்லாதது போன்றது தானே எனும் அர்த்தத்தில் தான் இந்த கேள்வியை கேட்கிறார். ஆனால் வெறும் கேள்வுயோடு நிறுத்திக்கொள்ளவில்லை. அதற்கான பதிலாக விளங்கும் இணைய சேவையையும் அவரே உருவாக்கி இருக்கிறார்.

உண்மையில், மறக்கப்பட்ட புத்தகங்களை நினைவு கூறுவதற்கான அழகான இணைய சேவையை உருவாக்கிவிட்டு தான் இந்த கேள்வியை கேட்டிருக்கிறார்.

’100 மில்லியன் புக்ஸ்’ எனும் பிரவுசர் நீட்டிப்பு சேவை தான் அவர் உருவாக்கியிருப்பது. கூகுள் குரோம், பயர்பாக்ஸ் உள்ளிட்ட பிரவுசர்களில் செயல்படக்கூடிய இந்த நீட்டிப்பு சேவை, புதிய புத்தகங்களை புதுமையான வழியில் அறிமுகம் செய்கிறது. எப்படி என்றால், பிரவுசரில் புதிய தளத்தை திறப்பதற்காக கிளிக் செய்யும் ஒவ்வொரு முறையும் ஒரு புத்தகம் அறிமுகம் செய்யப்படும். புத்தகத்தின் அட்டைப்படத்துடன் தரப்படும் அறிமுக குறிப்புகள் மூலம் அடையாளம் காட்டப்படும் புத்தகம் பற்றி தெரிந்து கொள்ளலாம். அடுத்த முறை பிரவுசரில் புதிய பக்கத்தை திறக்க முற்பட்டால் இன்னொரு புதிய புத்தகம் எட்டிப்பார்க்கும். அடுத்த கிளிக் செய்தால் இன்னொரு புத்தகத்தை பற்றி தெரிந்து கொள்ளலாம்.

ஆக, புத்தக பிரியர்கள் இணையத்தில் அங்கும் இங்கும் அல்லாடாமலே பிரவுசர் எல்லைக்குள்ளேயே புதுப்புது புத்தகங்களை தெரிந்து கொள்ளலாம். (இங்கு புதிய என்பது இதுவரை அறியாத என்பதை குறிக்கிறது. அது பழைய புத்தகமாகவும் இருக்கலாம்.) புத்தக அறிமுக இணையதளங்கள் பல இருக்கின்றன என்றாலும், அவை ஒவ்வொன்றிலும் நுழைந்து பார்க்க வேண்டும். நமக்கான புத்தகங்களை தேடிப்பார்க்க வேண்டும்; அவற்றில் இருந்து தேர்வு செய்ய வேண்டும். இதற்கு மாறாக, எப்போது பிரவுசரை திறந்தாலும் ஒரு புத்தகம் பற்றி தெரிந்து கொள்ள வாய்ப்பிருப்பது சுவாரஸ்யமானது தானே. இந்த சுவாரஸ்யத்தை தான் ’100 மில்லியன் புக்ஸ்’ நீட்டிப்பு சேவை அளிக்கிறது.

பிரவுசரில் கிளிக் செய்யும் போது, ஒவ்வொரு முறையும் புகைப்படம் அல்லது கலைப்படைப்பு போன்றவை எட்டிப்பார்க்கும் வகையிலான பிரவுசர் நீட்டிப்புகள் இருக்கின்றன. இதே முறையில் ஜெயின், புத்தகங்களுக்கான நீட்டிப்பு சேவையை உருவாக்கி இருக்கிறார்.

இப்படி ஒரு சேவையை உருவாக்குவதற்கான காரணம் அல்கோரிதம்கள் மீதான கோபம் தான் என்கிறார் ஜெயின். இந்த சேவை தொடர்பாக அவர் மீடியம் தளத்தில் எழுதியிருக்கும் வலைப்பதிவில், அல்கோரிதம்களின் ஆதிக்கத்தால் இணையத்தில் கண்டறிதலின் சுவையே போய்விட்டது என குறிப்பிடுகிறார். அது மட்டும் அல்ல, அல்கோரிதம்கள் மூலம் முன்வைக்கப்படும் விஷயங்களால் சமூகத்தில் ஒருவித சார்புத்தன்மையும் வந்துவிடுவதாக குறைப்பட்டுக்கொள்கிறார்.

இந்த குறையை போக்கும் நோக்கத்துடன் தான், புத்தகங்களை கண்டறிவதற்கான சேவையை உருவாக்கி இருப்பதாக குறிப்பிடுகிறார். அல்கோரிதம் இல்லாமல், சமூக பகிர்வு அம்சங்கள் இல்லாமல், புத்தக வகைகள் இலலாமல். ஒரு புதிய புத்தகத்தை ஒவ்வொரு முறையும் அறிமுகம் செய்து கொள்ள வைப்பதே இதன் நோக்கம் என்கிறார்.

அவர் இன்னொரு விஷயத்தையும் சுட்டிக்காட்டுகிறார். மனிதர்கள் தோன்றி மறைகின்றனர். ஆனால் அவர்கள் உருவாக்கிய புத்தகங்கள் காலத்தை மீறி நிற்கின்றன. அவை இன்றளவும் படித்தால் பயன் தரக்கூடிய விஷயங்களை கொண்டுள்ளன. புத்தக பொக்கிஷங்களை டிஜிட்டல் மயமாக்கும் பிராஜக்ட் குடென்பர்க் திட்டம், கூகுள் புக்ஸ் போன்ற திட்டங்கள் காரணமாக எண்ணற்ற நல்ல புத்தகங்கள் டிஜிட்டல் மயமாக்கப்பட்டுள்ளன. ஆனால், இவற்றை அணுகவும் வழி செய்யப்பட்டுள்ளது. இருப்பினும் இவை மட்டும் போதுமா என்ன?

இந்த புத்தகங்களை எல்லாம் அறிமுகம் செய்து கொள்ள ஒரு தூண்டுதல் வேண்டும் அல்லவா? அதற்கான வழியாக தான் 100 மில்லியன் புக்ஸ் சேவை.

1-RAbHmvjF_h5la5i9RmYrRgஇந்த நீட்டிப்பு சேவையை இன்ஸ்டால் செய்து சோதனை செய்துப்பார்த்தால், ஒவ்வொரு கிளிக்கிலும் ஒரு புத்தகம் பற்றி அறிய முடிகிறது. புத்தகம் தொடர்பான மேலும் தகவல்களை அதற்கான குட்ரீட்ஸ் அல்லது அமேசான் பக்கத்தில் இருந்து தெரிந்து கொள்ளலாம். ஒரு சில பரிந்துரைகள் நாம் தேடினாலும் கிடைக்காத, நமக்கான புத்தகத்தை அறிமுகம் செய்யும் வகையிலும் இருக்கலாம். உண்மையில் புத்தக புழுக்களுக்கு உற்சாகம் அளிக்க கூடிய சேவை தான். தேடல் முடிவுகள் கூட, ஒருவரின் கடந்த கால தேடல் தன்மைக்கு ஏற்ப வடிகட்டி அளிக்கப்படும் கால கட்டத்தில் எந்தவிட வடிகட்டலும் இல்லாத பரிந்துரை சேவையாக இது இருக்கிறது.

இந்த நீட்டிப்பு சேவை தொடர்ந்து புதுப்பிக்கப்பட்டு மேம்படுத்தப்படுமானால் இன்னும் சிறப்பாக இருக்கும். இந்த முயற்சியில் வாசகர்களும் பங்கேற்கும் வாய்ப்பும் அளிக்கப்பட்டுள்ளது. நீங்கள் விரும்பினால், புதிய புத்தகத்தை அதற்கான அறிமுகத்தோடு சமர்பிக்கலாம். மற்றவர்களின் முயற்சியால் மட்டுமே இதை தொடர்ந்து மேம்படுத்த முடியும் என்று ஜெயின் குறிப்பிட்டுள்ளதோடு, யோசனைகள் மற்றும் பரிந்துரைகள் பகிர்வதற்கான வேண்டுகோளையும் வைத்திருக்கிறார்.

எத்தனையோ மகத்தான புத்தகங்கள் மனிதர்கள் கையில் கிடைக்காமல் அழிந்து போயிருக்கின்றன. எண்ணற்ற புத்தகங்கள் திட்டமிட்டு அழிக்கப்பட்டிருக்கின்றன. ஆனால் காலத்தை வென்று நிற்கும் புத்தகங்கள் மறக்கப்பட்ட புத்தகங்களாக மாறிவிடாமல் இருக்க அவற்றை நினைவில் நிறுத்துக்கொண்டே இருப்பது அவசியம் தானே. இணையம் புத்தகங்களை சேமித்து வைக்கவும், தேடி எடுக்கவும் வழி செய்திருக்கும் போது, அவற்றை கண்டறிவதற்கான புதுப்புது சேவைகளை உருவாக்குவதும் அவசியமானது தானே!

’100 மில்லியன் புக்ஸ்’ இணையதளம்: http://www.100millionbooks.org/

 


 

நன்ற்இ; யுவர்ஸ்டோரியில்  எழுதியது.

 

.

 

இசையால் உலகை இணைத்த ஸ்முல் செயலியின் பூர்வ கதை!

http-mashable.comwp-contentuploads201208Singஸ்முல் செயலியை எல்லோரும் கரோக்கி செயலி என குறிப்பிடுவதை பார்த்தால் வருத்தமாக இருக்கிறது. இப்படி சொல்வதில் எந்த தவறும் இல்லை என்றாலும், இது ஸ்முலுக்கான சரியான அறிமுகம் இல்லை- முழமையான அறிமுகமும் இல்லை. இசைப்பிரியர்களுக்காக ஸ்முல் உருவாக்கி வரும் பரந்து விரிந்த இசைப்பரப்பில் கரோக்கி செயலி ஒரு அங்கம் அவ்வளவு தான். மற்றபடி ஸ்முலில் தெரிந்து கொள்ள இன்னும் நிறைய இருக்கிறது.

ஸ்முல் நிறுவனத்திற்கான விக்கிபீடியா பக்கம் சமூக இசை செயலிகளை உருவாக்குவதில் விஷேச கவனம் செலுத்தி வரும் அமெரிக்க நிறுவனம் என்றே ஸ்முலை குறிப்பிடுகிறது. இசை மூலம் உலகை இணைக்கும் முயற்சியாக ஸ்முல் இணையதளத்தின் அறிமுக வாசகம் தெரிவிக்கிறது.

ஆம், ஸ்முல் சாதாரண இசை சார்ந்த செயலி அல்ல; இசை மூலம் பரஸ்பரம் ஒருவரை ஒருவர் இணைக்க உதவும் சமூக வலைப்பின்னலாக அது உருவாகி வலுப்பெற்று வருகிறது. அதனால் தான், போர்ப்ஸ் பத்திரிகை கட்டுரை, சந்தேகத்திற்கு இடமில்லாமல் உலகின் சக்தி வாய்ந்த சமூக ஊடகங்களில் ஒன்றாக ஸ்முல் உருவாகி இருப்பதாக குறிப்பிடுகிறது. சும்மாயில்லை, உலக மக்கள் தொகையில் 4 சதவீதம் பேர் இதன் சேவையில் உறுப்பினர்களாக இணைந்துள்ளனர். இந்த எண்ணிக்கை இன்னும் அதிகரித்துக்கொண்டே இருக்கிறது.

’’இசை என்பது கேட்டு ரசிப்பதற்கானது மட்டும் அல்ல, என ஸ்முல் நிறுவனம் கருதுகிறது. இசை என்பது உருவாக்குவது, பகிர்வது, கண்டறிவது, பங்கேற்பது மற்றும் மற்றவர்களுடன் தொடர்பு கொள்வது என்று ஸ்முல் நம்புகிறது’ என மற்றொரு கட்டுரை ஸ்முலை வர்ணிக்கிறது.

’உங்களை இசைமயமாக்கும் இயந்திரம்’ என இன்னொரு பத்திரிகை கட்டுரை வர்ணிக்கிறது. ஸ்முல் சேவையில் மூழ்கி திளைத்திருக்கும் இசை பிரியர்களுக்கு இந்த வர்ணனை ஜாலம் எல்லாம் தேவையே இல்லை. ஏனெனில் இவற்றை எல்லாம் நடைமுறையில் அவர்கள் அனுபவித்துக்கொண்டிருக்கின்றனர். அதனால் தான் ஸ்முலின் அபிமானிகளாக இருக்கின்றனர்.

யூடியூப்பை போல ஸ்முல் இசையை ஜனநாயகமயமாக்கி இருப்பதாக பாராட்டப்படுகிறது. ரசிகர்கள் வெற்று தாளம் போட்டி, கைத்தட்டி இசையை கேட்டு மகிழந்தவர்களாக இருந்த காலம் மாறி, அவர்களும் இசையை உருவாக்கி, தங்களுக்குள் பகிர்ந்து கொண்டு, இசைமயமான உரையாடலையும், நட்பையும் வளர்த்துக்கொள்ள ஸ்முல் தனது செயலிகள் வாயிலாக வழி செய்திருப்பதாக கருதப்படுகிறது. இன்னும் எளிதாக புரிந்து கொள்ள வேண்டும் எனில், ஸ்முலை இசைப்பிரியர்களுக்கான பேஸ்புக் எனலாம். அல்லது இசைக்கான இன்ஸ்டாகிராம் என புரிந்து கொள்ளலாம். இன்ஸ்டாகிராம் எப்படி சாதாரண மக்கள் கூட புகைப்படங்களை எடுத்து அவற்றை பில்டர்கள் மூலம் மெருகேற்றி மற்றவர்களோடு பகிர்ந்து கொண்டு தங்கள் திறமையை வெளிப்படுத்துகின்றனரோ அதே போல ஸ்மூல் செயலிகள் மூலம் சாதாரண ரசிகர்கள் இசையை உருவாக்கி பகிர்ந்து கொண்டு நட்பு வளர்த்துக்கொள்கின்றனர்.

இந்த வகை ஸ்முல் செயலிகளில் ’சிங்! கரோக்கி’ மிகவும் பிரபலமானதாக இருக்கிறது. இப்போது செய்திகளிலும் அடிபடத்துவங்கியிருக்கும் இந்த செயலி கரோக்கி முறையில் பாட வழி செய்கிறது. ஒரு பாடலின் பின்னணி இசை மட்டும் ஒலிக்க, அதில் பாடியவர் குரலுக்கு பதிலாக ரசிகர்கள் தங்கள் குரலில் பாடிக்கொள்ளும் வசதியே கரோக்கி என குறிப்பிடப்படுகிறது. ஜப்பானில் கரோக்கி இசை மிகவும் பிரபலம். அங்கு கரோக்கி பாட உதவும் பார்கள் எல்லாம் இருக்கிறது. நமக்காக ஆர்க்கெஸ்ட்ரா ஒன்று இசை அமைக்க நடுவே நாம் மைக் பிடித்து பாட முடிந்தால் எப்படி இருக்கும்! இந்த அனந்த அனுபவத்தை தான் கரோக்கி இசை வழங்குகிறது.

இணையத்தில் இதை சாத்தியமாக்கும் இணையதளங்களும், செயலிகளும் அநேகம் இருக்கின்றன. இந்த இடத்தில் ஸ்முல் செயலி வருகிறது. ஸ்முலின் கரோக்கி செயலி, பிரபலமான மெட்டுகளுக்கு ரசிகர்கள் பாட வழி செய்வதோடு, அந்த ஒலிப்பதிவை பலவிதங்களில் பகிர்ந்து கொள்ளவும் வழி செய்கிறது. இந்த பகிர்வுகள் விதவிதமான உரையாடலாகவும் மலந்து நட்பு வலை விரியச்செய்கிறது.

இவையே ஸ்முலை இசை சமூக ஊடகம் என சொல்ல வைக்கிறது. ஸ்முலின் இந்த தன்மையை புரிந்து கொள்ள அதன் பூர்வ கதையையும், முக்கியமாக அதன் நிறுவனர்களாக இசை பிரம்மாக்களையும் தெரிந்து கொள்ள வேண்டும். அதோடு கரோக்கி ஸ்முலின் முதல் செயலி அல்ல என்பதையும் நினைவில் கொள்ள வேண்டும்.

2008 ல், ஸ்முல் ஒரு இசை ஸ்டார்ட் அப் நிறுவனமாக அமெரிக்காவில் உருவானது. ஆப்பிளின் ஐபோன் அறிமுகமான அடுத்த ஆண்டில் தான் ஸ்முல் அறிமுகமான ஆண்டு என்பதை கவனிக்க வேண்டும். ஏனெனில் ஸ்முல் உருவானதில் ஐபோனுக்கு முக்கிய பங்கிருக்கிறது. ஐபோன் இல்லாமல் ஸ்முல் இல்லை. அதோடு புதுயுக போனாக ஐபோன் பிரபலமாகி பெரும் வரவேற்பை பெறுவதற்கு காரணமாக அமைந்த ஆரம்ப கால அருமையான செயலிகளில் ஸ்மூலும் ஒன்று என்பதும் குறிப்பிடத்தக்கது.

27smule2-popupஅமெரிக்காவின் ஸ்டான்போர்ட் பல்கலைக்கழகத்தில் பேராசிரியராக இருந்த ஜி வாங் என்பவரும், அவரது மாணவருமான ஜெப் ஸ்மித் என்பவரும் இணைந்து தான் ஸ்முல் நிறுவனத்தை துவக்கினர். வாங்கை இசை திறனும், தொழில்நுட்ப அறிவும் இணைந்த கில்லாடி என்று தான் சொல்ல வேண்டும். இசையையும், தொழில்நுட்பத்தையும் இணைந்து பல ஜாலங்களை செய்யலாம் என்று அறிந்திருந்த வாங், இசை சார்ந்த புரோகிராம்களை உருவாக்குவதற்காக என்றே சங்க் எனும் கம்ப்யூட்டர் மொழியையும் உருவாக்கி இருந்தார். அதோடு லேப்டால் கம்ப்யூட்டர்களில் உள்ள ஆக்சலரேட்டர் எனும் கருவியை கொண்டு ஒலிக்குறிப்புகளை உண்டாக்கும் லேப்டாப் ஆர்க்கெஸ்ட்ராவையும் உருவாக்கி இருந்தார்.

ஒருமுறை வாங் பல்கலைக்கழகத்தில் உரையாற்றிக்கொண்டிருந்த போது அங்கு பிஎச்டி மாணவராக இருந்த ஜெப் ஸ்மித், அதைக்கேட்டு அசந்து போய்விட்டார். அந்த தாக்கத்தோடு, வாங் எண்ணங்களை வர்த்தக நோக்கிலான செயலி மூலம் மக்களிடம் கொண்டு செல்லலாம் என்று கூறினார். இதன் பயனாக வாங்கை இணை நிறுவனராகவும், ஸ்மித் சி.இ.ஓ. வாகவும் கொண்டு ஸ்முல் நிறுவனம் துவங்கியது. இசை உருவாக்கத்தை மையமாக கொண்ட புதுமையான சமூக வலைப்பின்னல் சேவையை உருவாக்க வேண்டும் என்பது தான் ஸ்மித்தின் நோக்கமாக இருந்தது. அந்த நோக்கத்தை கூறி நிறுவனத்திற்கான முதல் கட்ட நிதியையும் எப்படியோ திரட்டி பணிகளையும் துவக்கிவிட்டார்.

அவர்கள் உருவாக்கிய முதல் செயலி நோக்கியா போனுக்காக இருந்தது. ஆனால் அதற்குள் ஆப்பிள் நிறுவனம் ஐபோனை அறிமுகம் செய்தது. ஒரு கையடக்க கம்ப்யூட்டர் என்று சொல்லக்கூடிய அளவுக்கு ஐபோன் அற்புதமாக இருக்கவே அதற்கேற்ற செயலியை வாங் மற்றும் ஸ்மித் உருவாக்கத்துவங்கினர். இப்படி அறிமுகமானது தான் சோனிக்லைட்டர் செயலி. இதற்குள் ஆப்பிள் நிறுவனமும் செயலிகளுக்கான ஐஸ்டோர் கடையையும் திறந்துவிடவே சோனிக்லைட்டர் அறிமுகமாகி அட்டகாசமான வரவேற்பை பெற்றது.

சோனிக்லைட்டரை விளையாட்டான செயலி என்று தான் சொல்ல வேண்டும். போனுக்குள் ஒரு லைட்டர் இருந்து அதை அப்படியே ஏற்றி ஜோதியாக ஒளிரச்செய்தால் எப்படி இருக்கும். போனில் லைட்டர் ஒளி எரிவது போன்ற தோற்றம் சுவாரஸ்யமாக இருந்தது என்றால், போனை பக்கவாட்டில் அசைதால் லைட்டர் ஒளியும் அதற்கேற்ப வளைந்து கொடுத்தது இன்னும் சுவாரஸ்யமாக இருந்தது. அது மட்டும் அல்ல, இந்த லைட்டர் ஒளியை ஐபோன் திரை மீது ஊதி அணைக்கவும் செய்யலாம். அப்போது திரையில் இருந்து புகை வருவது போன்ற தோற்றமும் உண்டாகும். இந்த சாக்சங்களால் வியக்க வைத்த சோனிக்லைட்டர் செயலி லட்சக்கணக்கில் தரவிறக்கம் செய்யப்பட்டு பிரபலமானது. இந்த லைட்டர் தோற்றத்தை ஐபோன் பயனாளிகள் உலகின் எந்த மூளையில் உள்ள சக ஐபோன் பயனாளிகளுடனும் பகிர்ந்து கொள்ள முடிந்தது. இந்த பகிர்வுத்தன்மையே சோனிக்லைட்டர் செயலியை மேலும் சுவாரஸ்யமாக்கி அதன் மீதான ஈர்ப்பை அதிகமாக்கியது.

ஐபோன் அற்புதத்தை உணர்த்திய வெற்றிகரமான செயலிகளில் இதுவும் ஒன்றாக அமைந்தது. சோனிக்லைட்டரின் வெற்றியை அடுத்து மேலும் அசத்தலான ஆக்கரினா செயலியை ஸ்முல் அறிமுகம் செய்தது.  ( ஆக்கரினா என்பது ஒரு பழங்கால இசைக்கருவி)

ஆக்கரினா, ஐபோனையே ஒரு இசைக்கருவியாக மாற்றும் செயலியாக அமைந்தது. ஐபோனை வாயருகே வைத்துக்கொண்டு அதன் மீது ஊதினால், குழலில் இருந்து ஒலி வருவது போல இந்த செயலி உருவாக்கப்பட்டிருந்தது. அது மட்டும் அல்ல, திரையில் உள்ள நான்கு துளைகளின் மீது விரல்களை மாற்றி மாற்றி வைத்துக்கொண்டிருந்தால் ஒலியின் தாள லயத்தை மாற்றலாம். கொஞ்சம் பழகிவிட்டால், இந்த இசை செயலியை இயக்குவதில் தேர்ச்சி பெற்று இனிமையான இசையை உருவாக்குவதும் கூட சாத்தியம் தான்.

ஆக்கரினா செயலி அறிமுகமான போது, ஐபோனை ஒரு இசைக்கருவியாக மாற்றும் தன்மைக்காக அமோக வரவேற்பை பெற்றது. கையில் இருக்கும் போனை இசைக்கருவியாக மாற்றுவதே ஒரு புதுமை தான். இன்று ஸ்மார்ட்போன் சார்ந்த கித்தார் உள்ளிட்ட இசைக்கருவி செயலிகளுக்கு எல்லாம் முன்னோடியாக அமைந்த ஆரம்ப கால ஐபோன் இசை செயலிகளில் ஆக்கரினாவும் ஒன்று. ஆனால் ஆக்கரினா செயலி மற்ற செயலிகள் போல முன் தீர்மானிக்கப்பட்ட ஒலிக்கோவைகளை வழங்காமல், பயனாளிகளின் ஊதும் போது வரும் காற்றின் போக்கிற்கு ஏற்ப தனித்தன்மை வாய்ந்த ஒலியை உருவாக்கி தரக்கூடியதாக இருந்தது. அந்த அளவுக்கு மைக்ரோபோனின் உணரும் தன்மையை நன்றாக பயன்படுத்திக்கொண்டு இந்த செயலி உருவாக்கப்பட்டிருந்தது.

ஆனால், இசைப்பது என்பது இதன் ஒரு பகுதி தான். இந்த இசையை மற்றவர்களோடு பகிர்ந்து கொள்ள முடியும் என்பது தான் ஆக்கரினாவின் இன்னொரு தனிச்சிறப்பாக அமைந்தது. ஆம், ஆக்கரினா பயனாளிகள் தங்களைப்போலவே மற்ற பயனாளிகள் உருவாக்கும் ஒலிக்கோவைகளை கேட்டு மகிழலாம். செயலியில் உள்ள பூமி உருண்டை பகுதியில், இப்போது உலகில் எந்த மூளையில் எல்லாம் பயனாளிகள் ஆக்கரினாவை இசைத்துக்கொண்டிருக்கின்றர் என்பதை பார்த்து, அங்கி கிளிக் செய்து கேட்டு மகிழலாம். அதே போல தாங்கள் உருவாக்கும் இசையையும் பகிர்ந்து கொள்ளலாம். உங்கள் இசையை சேமித்தும் வைக்கலாம். இதற்கான பக்கத்தை ஆக்கரினா வலைமனையிலேயே உருவாக்கி கொள்ளலாம். இமெயில் மற்றும் பேஸ்புக் வாயிலாக நட்பு வட்டத்திலும் பகிர்ந்து கொள்ளலாம். இந்த சமூகத்தன்மையே ஆக்கரினா செயலியை இசைப்பிரியர்கள் மத்தியில் பிரபலமாக்கியது.

உண்மையில், ஐபோனின் கையடக்க கணிணி ஆற்றல் மற்றும் இணையத்தின் வலைப்பின்னல் தன்மை இரண்டையும் அழகாக பயன்படுத்திக்கொண்ட இசை செயலியாக ஆக்கரினா அமைந்தது.

இந்த செயலியின் வெற்றிக்கு பிறகு ஸ்முல் மேலும் பல செயலிகளை அறிமுகம் செய்துள்ளது. எல்லாமே சமூக பகிர்வு தன்மையை கொண்டவை. இவற்றில் ஒன்று தான் கரோக்கி செயலி. கரோக்கி செயலியில் இளம் பாடகர்கள் மற்றும் இசை ஆர்வம் உள்ளவர்கள் தங்கள் குரலில் மெட்டுக்கு ஏற்ப பாடி பதிவு செய்து கொள்ளலாம். குரல் வளத்தை விட்டுத்தள்ளுங்கள், இசை சூழலில் தன்னை மறந்து பாடுவதே ஒரு பரசவமான அனுபவம் தான். இந்த அனுபவத்தை பெறுவதோடு, இப்படி பாடியதை பதிவு செய்து நண்பர்களோடும் பகிர்ந்து கொள்ளலாம். ஸ்முல் பயனாளிகளோடும் பகிர்ந்து கொள்ளலாம். விரும்பினால் ஒரு பாடலை மற்றவர்களோடு சேர்ந்தும் பாடலாம். இது நல்ல இசை பயிற்சியாகவும் அமையும். யூடியூப்பில் போய் பார்த்தல் இப்படி இணைந்து பாடப்பட்ட பாடல்களின் வீடியோக்களை பார்க்கலாம். பாடும் திறனை மெருகேற்றிக்கொள்வதற்கான அம்சமும் இந்த செயலியிலேயே இருக்கிறது.

பிரபலமான பாடகர்களுடன் ரசிகர்கள் ஒரு பாடலை டூயட்டாக சேர்ந்து பாடிய அனுபவத்தையும் ஸ்முல் வழங்கியிருக்கிறது. இதில் ஒரு சில ரசிகர்கள் லட்சக்கணக்கானோரை கவர்ந்து இணைய நட்சத்திரமாகவும் உருவாகி இருக்கின்றனர். 2011 ல் ஜப்பானின் சக்திவாய்ந்த பூகம்பம் உலுக்கிய போது, உலகம் முழுவதும் உள்ளவர்கள் ஸ்முலில் ஒன்றிணைந்து என் தோள் மீது சாய்ந்து கொள்ளுங்கள் என பொருள்படும் லீன் ஆன் மீ பாடலை பாடி நெகிழ வைத்தனர்.

இசைப்பிரியர்கள் இசை மூலம் தங்களுக்குள் தொடர்பு கொள்வதையும், இசையால் பேசிக்கொள்வதையும் ஸ்முல் சாத்தியமாக்குகிறது. இசையை கேட்டு ரசிப்பது மட்டும் ரசிகர்களின் வேலை அல்ல, அவர்கள் இசையை உருவாக்கலாம், பகிர்ந்து கொள்ளலாம், புதிய இசையை கண்டறிலாம் என்கிறது ஸ்முல். அதுவே அதன் பலமாக இருக்கிறது.

 

இணைப்புகள்:

  1. ஸ்முல் ஆக்கரீனா பற்றி அறிய: https://www.smule.com/ocarina/original
  2. ஸ்முல் பற்றிய போர்ப்ஸ் கட்டுரை; https://www.forbes.com/sites/mnewlands/2016/09/20/smule-has-changed-the-music-industry-completely-heres-how/#5e20381b41c0
  3. ஸ்முல் சி.இ.ஒ பேட்டி- http://techblogwriter.co.uk/107-jeff-smith-smule-founder-ceo-talks-rise-social-music-apps/
  4. ஸ்முல் தொடர்பான நியூயார்க் டைம்ஸ் கட்டுரை- http://www.nytimes.com/2011/11/27/magazine/smule.html?mcubz=1

=

நன்றி. யுவர் ஸ்டோரி தமிழ் இணைய இதழில் எழுதியது