Tag Archives: download

வீடியோ வழிகாட்டி இணையதளங்கள்

 

what-to-watch-next-findie-670x330’என்ன புத்தகம் படிக்கலாம்’ எனும் கேள்வி புத்தக புழுக்களுக்கு இருப்பது போல, ’என்ன வீடியோ பார்க்கலாம்’ எனும் கேள்வி வீடியோ பிரியர்களுக்கு இருக்கலாம். அதிலும் இப்போது ஆன்லைனில் அப்லோட் செய்யப்படும் வீடியோக்கள் அதிகரித்து வரும் நிலையில், பார்த்து ரசித்து பயன்பெற ஏற்ற வீடியோக்களை கண்டறிவது என்பது சவாலானது தான். ஒரு புள்ளிவிவரப்படி பார்த்தால் யூடியூப்பில் மட்டும் நிமிடத்திற்கு 100 மணி நேரத்திற்கு நிகரான வீடியோக்கள் பதிவேற்றப்படுகின்றன. இன்னொரு கணக்குபடி பார்த்தால் அமெரிக்காவில் கடந்த 30 ஆண்டுகளில் முன்னணி தொலைக்காட்சி சேனல்கள் உருவாக்கிய வீடியோக்களை விட அதிக வீடியோ 30 நாட்களில் இணையத்தில் பதிவேற்றப்படுகின்றன.

வீடியோ இணையதளங்களில் யூடியூப் முன்னணியில் இருந்தாலும், வேறு பல வீடியோ இணையதளங்களும் அநேகம் இருக்கின்றன. அதோடு, வழக்கமாக அறியப்படும் பொழுதுபோக்கு, நகைச்சுவை வீடியோக்கள் தவிர எண்ணற்ற வகை வீடியோக்களும் இணையத்தில் கொட்டிக்கிடக்கின்றன. அவற்றின் மத்தியில் தேடிப்பார்த்தால் அசர வைக்கும் பொக்கிஷங்களை கண்டறியலாம். இதற்காக இணையத்தில் அங்கும் இங்கும் அல்லாட வேண்டும் என்றில்லை. சுவாரஸ்யமான வீடியோக்களை அடையாளம் காட்டும் அருமையான இணையதளங்கள் இருக்கின்றன. அவற்றில், நீங்கள் புக்மார்க் செய்ய வேண்டிய தளங்கள் இதோ:

ஆன்லைன் டிவி

ஹைப்பர்ஸ்கிரீன் இணையதளத்திற்கு விஷயம் செய்தால் அதன் முகப்பு பக்கத்திலேயே வரிசையாக வீடியோ நிகழ்ச்சிகளை பார்க்கலாம். ஆன்லைன் டிவி என வர்ணித்துக்கொள்ளும் இந்த தளம், பல்வேறு வகையான சுவாரஸ்யாமான வீடியோ நிகழ்ச்சிகளை பட்டியலிட்டு பரிந்துரைக்கிறது. ஷேக்ஸ்பியரை புரிந்து கொள்வது என்பதில் துவங்கி, ஜப்பானில் அவசியம் பார்க்க வேண்டிய இடங்கள் வரை பலவகையான வீடியோ நிகழ்ச்சிகளை பார்க்கலாம்.

எந்த வீடியோவை பார்க்க விருப்பமோ அதை கிளிக் செய்தால் போதும், வீடியோ ஓடத்துவங்கி விடுகிறது. அதாவது முகப்பு பக்கத்திலேயே பார்க்கலாம். ஒரு சில வீடியோக்கள் மட்டும் வெளியே சென்று அதற்கான இணையதளத்தில் பார்க்க வேண்டியிருக்கிறது. இந்த பட்டியலே சுவாரஸ்யமாக இருந்தாலும், பயனாளிகள் தங்கள் விருப்பத்திற்கு ஏற்ப, வீடியோக்களை அவற்றின் வகைக்கேற்ப தேர்வு செய்து கொள்ளலாம். குறிப்பிட்ட வீடியோவை தேடிப்பார்ப்பதற்கான தேடல் வசதியும் இருக்கிறது. உறுப்பினராக பதிவு செய்து கொண்டால் கூடுதல் வசதிகளும் இருக்கின்றன. தினமும் புதிய வீடியோக்கள் பட்டியலிடப்படுகின்றன.

இணைய முகவரி: https://www.hypescreen.com/

பரிந்துரை புதிது

வீடியோக்களை தேடும் போது பொதுவாக அவற்றின் வகைகளை தான் குறிப்பிட்டு தேடுவோம். உதாரணத்திற்கு கல்வி வீடியோ அல்லது அறிவியல் வீடியோ எனத்தேடுவோம். இதற்கு மாறாக, பயனாளிகள் தங்கள் மனநிலைக்கு ஏற்ற வீடியோக்களை தேட வழிசெய்யும் புதுமையான இணையதளமான ஃபைண்டி விளங்குகிறது. மகிழ்ச்சி, சோகம், உற்சாகம், ஊக்கம், ஆர்வம், நம்பிக்கை, பரிவு என பலவகையான மனநிலைகளை குறிப்பிட்டு அதற்கு உரிய வீடியோக்களை தேடிப்பார்க்கலாம். இந்த மனநிலைகள் அழகான இமோஜிகள் மூலம் உணர்த்தப்படுகின்றன. அவற்றில் இருந்து தேர்வு செய்த பின், வீடியோ வகையையும் தேர்வு செய்து கொள்ளலாம். வீடியோவுக்கான கால அளவையும் தேர்வு செய்து கொள்ளலாம். முகப்பு பக்கத்தில் பட்டியலிடப்படும் வீடியோக்களையும் பார்த்து ரசிக்கலாம்.

சுவாரஸ்யமான வீடியோக்களை கண்டறிவதற்கான சுவாரஸ்யமான தளமாக இது விளங்குகிறது.

இணைய முகவரி: https://www.findie.me/

செய்தி விடியோக்கள்

செய்தி நோக்கிலான வீடியோக்கள் தேவை எனில் டிக் விடியோ பகுதி ஏற்றதாக இருக்கும். சமூக திரட்டி வகை சேவைகளில் முன்னோடியான டிக் அறிமுகமான காலத்தில் பயனாளிகள் செய்தி இணைப்புகளை பகிர்ந்து கொள்ள வழி செய்தது. பயனாளிகளே அந்த இணைப்புகளை வாக்களித்து முன்னிலைப்பெறச்செய்யலாம் என்பது டிக் அறிமுகம் செய்த புதுமை அம்சமாக விளங்கியது. சில ஆண்டுகள் செல்வாக்குடன் திகழ்ந்த நிலையில் பின் தங்கிப்போன டிக் இப்போது வீடியோ பரிந்துரை சேவையாக உருமாற்றம் பெற்றிருக்கிறது. இதன் முகப்பு பக்கத்தில் அருமையான செய்தி வீடியோக்களை பார்க்கலாம். வேறு வகையான வீடியோக்களையும் பார்க்கலாம்.

அறிவியல், தொழில்நுட்பம், செய்தி, பொழுதுபோக்கு என பலவேறு பிரிவுகளில் இருந்தும் தேர்வு செய்யலாம். இப்போது பெரிதாக பேசப்படும் செய்தி சார்ந்த வீடியோக்கள் முன்னிலைப்படுத்தப்படுகின்றன.

இணைய முகவரி: http://digg.com/video

கதை சொல்லும் படங்கள்

இலக்கில்லாத வீடியோக்களை விட அர்த்தம் உள்ள வீடியோக்களை பார்க்க விருப்பம் எனில், ஷார்ட் ஆப் தி விக் இணையதளம் கச்சிதமாக இருக்கும். குறும்படம் மற்றும் ஆவணப்பட வகைகளை சேர்ந்த வீடியோக்களில் இருந்து கவனமாக தேர்வு செய்யப்பட்ட அருமையான வீடியோக்களை இந்த தளம் பரிந்துரைக்கிறது. எல்லாமே ஏதோ ஒரு வகையில் கதை சொல்லும் வீடியோக்கள்.

ஒவ்வொரு வீடியோவுடனும் அதற்கான அறிமுகமும் சுருக்கமாக இடம்பெறுகிறது. இந்த அறிமுகம் வீடியோவில் எதிர்பார்க்க கூடிய விஷயங்களுக்கான வழிகாட்டியாக அமையும். ஈரானிய படங்களில் துவங்கி இசை  வீடியோ வரை பலவகை குறும்படங்களை பார்த்து ரசிக்கலாம். இதன் நேர்த்தியான முகப்பு பக்கமும் கவர்கிறது. பல ஆண்டுகளாக செயல்பட்டு வரும் இணையதளம் இது.

இணைய முகவரி: https://www.shortoftheweek.com/

கல்வி வீடியோக்கள்

அன்பிளக்டிவி மிகவும் எளிமையான வீடியோ சேவை. ஆனால் மிகவும் சுவாரஸ்யமானது. தொலைக்காட்சி நிகழ்ச்சிகளுக்கு பதிலாக பயனுள்ள வீடியோக்களை பரிந்துரைப்பது தான் இந்த தளத்தின் நோக்கம். முகப்பு பக்கத்தில் எப்போதும் ஒரு வீடியோ பரிந்துரைக்கப்படுகிறது. அந்த வீடியோ பிடிக்காவிட்டால், அடுத்த வீடியோவுக்கு கிளிக் செய்யலாம். இல்லை எனில் அடுத்த வீடியோவுக்கு கிளிக் செய்யலாம். இப்படி வரிசையாக வீடியோக்களை பார்த்துக்கொண்டே இருக்கலாம். எல்லாமே புதிய விஷயங்கள் தொடர்பான விழிப்புணர்வை ஏற்படுத்தக்கூடிய வீடியோக்கள்.

இணைய முகவரி: http://unplugthetv.com/

சுட்டிஸ்களுக்கான வீடியோ

சிறுவர், சிறுமிகள் பார்த்து ரசிக்கும் வகையில் அவர்கள் பிஞ்சு மனதுக்கு ஆர்வம் அளிக்கும் வகையிலான வீடியோக்களை பரிந்துரைக்கிறது திகிட்ஸ்ஷுட்சீதிஸ் இணையதளம். அறிவியல், தொழில்நுட்பம், இசை, அனிமேஷன் என பலவகையான வீடியோக்களை பார்க்கலாம். எல்லாமே கவனமாக தேர்வு செய்யப்பட்டு பரிந்துரைக்கப்படுபவை.

இணைய முகவரி: http://thekidshouldseethis.com/

பாஸ்வேர்டு விதிமுறைகளில் புதிய மாற்றம்!

 

BN-UO739_80807p_HD_20170807010616பாஸ்வேர்டு பாதுகாப்பானதாக இருக்க வேண்டும் என்றால் அது அடிப்படையில் வலுவானதாக இருக்க வேண்டும் என்று சொல்லப்படுவதை நீங்கள் பலமுறை கேள்விப்பட்டிருக்கலாம். வலுவான பாஸ்வேர்டை உருவாக்க பல்வேறு வழிமுறைகள் முன்வைக்கப்படுவதையும் நீங்கள் அறிந்திருக்கலாம். இந்த வழிமுறைகளில் பல மீறப்படாத விதிமுறைகள் போலவே அழுத்தந்திருத்தமாக வலியுறுத்தப்பட்டு வருகின்றன. இந்நிலையில், இந்த விதிகள் உருவாக காரணமாக இருந்தவரே இவற்றில் சில தவறானவை என ஒப்புக்கொண்டிருப்பதை அடுத்து பாஸ்வேர்டு பாதுகாப்பிற்கான மூல விதிகள் தளர்த்தப்பட்டுள்ளன.

ஆக, இனியும் நீங்கள் பாஸ்வேர்டை அடிக்கடி மாற்றிக்கொண்டிருக்க வேண்டிய அவசியமில்லை. அதே போல பாஸ்வேர்டை சிக்கலானதாக மாற்றுவதற்காக எண்களையும் சிறப்பு எழுத்துக்களையும் இடையே நுழைத்து கஷ்டப்பட வேண்டியதில்லை. இதன் பொருள் எளிதாக நினைவில் கொள்ளக்கூடிய வலுவான பாஸ்வேர்டை உருவாக்கி கொள்ளலாம் மற்றும் ஒரே பாஸ்வேர்டை தொடர்ந்து தயக்கம் இல்லாமல் பயன்படுத்தலாம் என்பதும் தான். சிக்கலான பாஸ்வேர்டை உருவாக்குவதை விட அதை நினைவில் நிறுத்திக்கொள்வது இன்னும் கடினமாக இருக்கிறது என புலம்பிக்கொண்டிருப்பவர்கள் நிம்மதி பெருமூச்சு விட்டுக்கொள்ளலாம்.

அதற்காக பாஸ்வேர்டு விஷயத்தில் அலட்சியாக இருக்கலாம் என்றில்லை: பாஸ்வேர்டு உருவாக்கம் தொடர்பாக வலியுறுத்தப்படும் சில விதிகள் மாறியிருக்கின்றன என்பதே விஷயம்.

இணைய சேவைகளில் நுழைய பயன்படுத்தும் பாஸ்வேர்ட்களை ஹேக்கர்கள் என குறிப்பிடப்படும் தாக்களார்கள் களவாடுவதை தவிர்ப்பதற்காக பலவித முன்னெச்சரிக்கைகளை கடைப்பிடிப்பது அவசியமாகிறது. தாக்காளர்கள் பாஸ்வேர்டு திருடவும், கொள்ளையடிக்கவும் (ஆயிரக்கணக்கில் கொத்தாக பாஸ்வேர்டு திருடப்படுவது) அதிகரித்து வந்த நிலையில் பாஸ்வேர்டு பாதுகாப்பில் கவனம் செலுத்துவது அவசியமானது. இதை மனதில் கொண்டே பாஸ்வேர்டு உருவாக்கத்திற்கான வழிமுறைகள் முன்வைக்கப்பட்டன. இதனடிப்படையில் தான் எளிதில் ஊகிக்க முடியாத பாஸ்வேர்ட்களை அமைக்க வேண்டும், வழக்கமான பாஸ்வேர்டுகளை தவிர்க்க வேண்டும், ஒரே பாஸ்வேர்டை பல சேவைகளில் பயன்படுத்துவதை தவிர்க்க வேண்டும் என்பது உள்ளிட்ட பல்வேறு ஆலோசனைகள் சொல்லப்படுகின்றன.

இந்த வரிசையில் தான், சிக்கான பாஸ்வேர்டை உருவாக்குவது மற்றும் பாஸ்வேர்டை அடிக்கடி மாற்றுவது ஆகிய ஆலோசனைகளும் இடம்பெறுகின்றன. பயனாளிகள் பார்வையில் இரண்டுமே கடினமானவை தான். ஏனெனில், பாஸ்வேர்டு வலுவாக இருக்க வேண்டும் என்பதற்காக எழுத்துக்களுக்கு நடுவே எண்கள், அடைப்பு குறிகள், குறீயீடுகள் உள்ளிட்ட சிறப்பு எழுத்துகளை நுழைத்து அவற்றை சிக்கலாக தோன்றச்செய்ய வேண்டியிருக்கிறது. ஆனால், இப்படி உருவாக்கிய பாஸ்வேர்டை நினைவில் கொள்வது கடினமாகி விடுகிறது. அதே போல தாக்களர்களை ஏமாற்ற வேண்டும் என்பதற்காக பாஸ்வேர்டை 3 மாதங்கள் அல்லது 6 மாதங்களுக்கு ஒரு முறை மாற்றிக்கொண்டே இருந்தால், எந்த பாஸ்வேர்டை இப்போது பயன்படுத்துகிறோம் என குழம்பும் நிலை வரலாம் அல்லவா?

ஆனால் நல்லவேளையாக இந்த இரண்டு விதிகளும் தவறானவை என பில் பர் (Bill Burr ) இப்போது கூறியிருக்கிறார். இவர் தான் பாஸ்வேர்டு பாதுகாப்பிற்காக வலியுறுத்தப்படும் வழிமுறைகளுக்கு காரணமானவர். அமெரிக்காவின் தரநிர்ணயம் மற்றும் தொழில்நுட்பத்திற்கான தேசிய கழகம் (என்.ஐ.எஸ்.டி) எனும் அமைப்பில் பணியாற்றிக்கொண்டிருந்த போது, பில் பர் பாஸ்வேர்டு நிர்வாகத்திற்கான வழிமுறைகளை உருவாக்கி வெளியிட்டார். 2003 ல் வெளியான இந்த எட்டு பக்க ஆவணம் தான் அதன் பிறகு பாஸ்வேர்டு பாதுகாப்பிற்கான வழிகாட்டி விதிமுறைகளாக அமைந்தன.

பத்தாண்டுகளுக்கும் மேலாக இந்த வழிமுறைகள் கோலோச்சிய நிலையில், அண்மையில் இந்த வழிகாட்டி ஆவணம் திருத்தி அமைக்கப்பட்டு என்.ஐ.எஸ்.டி அமைப்பால் புதிதாக வெளியிடப்பட்டுள்ளது. பாஸ்வேர்டு சிக்கலானதாக இருக்க வேண்டும், அடிக்கடி மாற்றிக்கொண்டே இருக்க வேண்டும் ஆகிய விதிகள் புதிய ஆவணத்தில் கைவிடப்பட்டுள்ளன.

அதற்கேற்ப பில் பர்ரும், இந்த விதிகளை சேர்த்ததற்காக வருத்தம் தெரிவித்துள்ளார். இது தொடர்பாக அமெரிக்காவின் ’வால்ஸ்டிரீட் ஜர்னல்’ இதழுக்கு அளித்துள்ள பேட்டியில், பாஸ்வேர்டை 90 நாட்களுக்கு ஒருமுறை மாற்ற வேண்டும் என்பதற்காக பலரும் பழைய பாஸ்வேர்டில் ஒரு சின்ன திருத்தம் செய்து கொள்கின்றனர். இதனால் பெரிய அளவில் பலன் ஏற்படுவதில்லை என கூறியிருக்கிறார். அதே போல கடினமான பாஸ்வேர்டை உருவாக்குவதற்கான வழிமுறை பயனாளிகளிடம் குழப்பத்தை ஏற்படுத்தியதாகவும் அவர் கூறியிருக்கிறார்.

ஆனால் ஒன்று பில் பர் தவறாக வழிநடத்திவிட்டார் என்றெல்லாம் அவர் மீது பழி சொல்ல முடியாது. 2003 ல் அவருக்கு கிடைத்த பாஸ்வேர்டு தொடர்பான தரவுகளின் அடிப்படையில் இந்த வழிமுறைகளை அவர் முன்வைத்தார். பாஸ்வேர்டு பற்றிய ஆழமான புரிதலுக்காக தனது அமைப்பில் உள்ளவர்கள் பயன்படுத்திய பாஸ்வேர்டுகளை பார்க்க அவர் அனுமதி கேட்டிருக்கிறார். ஆனால் யாரும் இதற்கு உடன்படவில்லை. அதோடு பாஸ்வேர்டை பார்க்க அனுமதி கேட்டதற்காகவே சகாக்கள் தன்னை நம்ப முடியாமல் வியப்புடன் பார்த்ததாக அவர் கூறுகிறார். பிறகு வேறுவழியில்லாமல் அப்போது கிடைத்த தகவல்களை கொண்டு பாஸ்வேர்டு பாதுகாப்பு வழிமுறைகளை வகுத்துக்கொடுத்தார்.

அது மட்டும் அல்ல, அதன் பிறகு இணைய உலகிலும் ஏகப்பட்ட மாற்றங்கள் ஏற்பட்டு விட்டன. எனவே பாதுகாப்பான பாஸ்வேர்டு என்பதற்கான வரையறையும் மாறியிருக்கிறது. மேலும், இடைப்பட்ட காலத்தில் தாக்காளர்கள் வசம் சிக்கிய பாஸ்வேர்டுகள் லட்சக்கணக்கில் பொதுவெளியில் வீசப்பட்டிருக்கின்றன. இத்தகைய பட்டியல் பில் பர் கையில் கிடைத்திருந்தால் மனிதர் இன்னும் துல்லியமான விதிகளை வகுத்திருக்கலாம் என நம்பலாம்.

அது மட்டும் அல்ல, புதிய ஆவணத்தை உருவாக்கிய குழுவுக்கு பொறுப்பேற்ற பால் கிராஸி, தனது சகா பில் பர் வருத்தம் கொள்ள வேண்டிய அவசியமே இல்லை, இத்தனை ஆண்டுகள் தாக்குப் பிடித்த வழிமுறைகளை உருவாக்கியதே பெரிய விஷயம் எனக்கூறியுள்ளார். இது போல் நீடித்திருக்ககூடிய ஆவணத்தை உருவாக்குவது பற்றி தன்னால் கனவு தான் காண முடியும் எனக்கூறியிருக்கிறார்.

எப்படியோ, பாஸ்வேர்டு விதிமுறைகள் கொஞ்சம் மாறியிருக்கின்றன. இனியும் அடைப்புக்குறிகள், கேள்விக்குறிகள், எண்களை எல்லாம் சேர்த்து பாஸ்வேர்டை சிக்கலாக அமைக்க மெனக்கெட வேண்டாம். அதைவிட, பாஸ்பிரேஸ் என சொல்லப்படும் சொற்றொடர் ஒன்றை எடுத்துக்கொண்டு அதன் வார்த்தைகளில் உள்ள முதல் எழுத்துக்களை சேர்த்து உருவாக்கும் பாஸ்வேர்டு வலுவானதாக அமையும். அதே போல, பாஸ்வேர்டை அடிக்கடி மாற்ற வேண்டிய கட்டாயமும் இல்லை. பாஸ்வேர்டு தாக்குதலுக்கு உள்ளாகி இருக்கலாம் எனும் சந்தேகம் ஏற்பட்டால் மட்டும் மாற்றிக்கொண்டால் போதுமானது என்கின்றனர். அதே போலவே ஒரே பாஸ்வேர்டை எல்லா சேவைகளுக்கும் பயன்படுத்தக்கூடாது எனும் விதியும் கொஞ்சம் தளர்த்தப்பட்டுள்ளது. மிகவும் முக்கியமான சேவைகளுக்கு வேண்டுமானால் தனித்தனி பாஸ்வேர்ட்களை அமைத்துக்கொள்ள வேண்டுமேத்தவிர, மற்றபடி அவ்வளவாக முக்கியமில்லாத சேவைகளில் ஒரே பாஸ்வேர்டை பயன்படுத்தினாலும் தவறில்லை என்கின்றனர்.

ஐரோப்பாவுக்கு ஒரு இணைய உலா!

 

lead.c2e3a89d927140b5ac304bf7bc2e45a9-800x420ஐரோப்பாவில் உள்ள எல்லா நாடுகளையும் சுற்றிப்பார்ப்பது சாத்தியமா? அது, உங்கள் கைவசம் உள்ள நேரம் மற்றும் உங்கள் வசதி சார்ந்தது. சில நாட்கள் முதல் ஓரிரு வாரங்கள் செலவிட முடிந்தால், ஐரோப்பாவின் முக்கிய நாடுகளை சுற்றிப்பார்த்து விட்டு வரலாம். ஆனால் அப்போதும் கூட பல நாடுகளை தவறவிட வேண்டியிருக்கும். கால் வைத்த நாடுகளில் கூட, அடையாளத்திற்கு சில இடங்களை பார்க்கலாம் அவ்வளவு தான். ஆனால் இந்த அனுபவமே மறக்க முடியாததாக இருக்கும் என்பது வேறு விஷயம்.

நிற்க, ஐரோப்பாவுக்கு சுற்றுலா செல்வது சாத்தியமோ இல்லையோ, நீங்கள் விரும்பினால் ஐரோப்பிய கலாச்சாரம் மற்றும் அதன் செழுமையான பாரம்பரியத்தில் மூழ்கி மகிழலாம் தெரியுமா? யூரோபியானா இணையதளம் (http://www.europeana.eu/portal/en# ) இதை சாத்தியமாக்கிறது. ஒரு அரை மணி நேரத்தை இந்த தளத்தில் செலவிட முடிந்தால், ஐரோப்பாவின் கலாச்சார செழுமை முதல் பேஷன் பெருமைகள் வரை பலவற்றை ஒளிப்படங்களாக பார்த்து மகிழலாம், இசைக்கோர்வைகளாக கேட்டு ரசிக்கலாம். கலைப்பொருட்களாக பார்த்து வியக்கலாம்.

இணையம் ஒரு அற்புதம் என்பதை பலமுறை நீங்கள் கேள்விப்பட்டிருக்கலாம். சில அரிய தருணங்களில் இந்த அற்புதத்தை நீங்களே உணர்ந்திருக்கலாம். யூரோபியானா இணையதளத்தில் நுழைந்ததுமே அத்தகைய தருணத்தை உணரத்துவங்கலாம். இந்த உணர்தலை ஒளிப்படங்களில் இருந்தே துவங்கலாம். ஏனெனில், மிகவும் அண்மையில் தான் இந்த பகுதி புதிய வசதியாக அறிமுகம் ஆகியிருக்கிறது. ’யூரோபியானா போட்டோகிராபி’ எனும் பெயரில் அறிமுகம் செய்யப்பட்டுள்ள இந்த பகுதி 20 லட்சத்திற்கும் மேற்பட்ட வரலாற்று ஒளிப்படங்களை கொண்டிருக்கிறது. 34 ஐரோப்பிய நாடுகளின் 50 க்கும் மேற்பட்ட அருங்காட்சியகங்கள் போன்ற அமைப்புகள் பங்களிப்புடன் இந்த புகைப்பட தொகுப்பு உருவாக்கப்பட்டுள்ளது.

முகப்பு பக்கத்தில், ஐரோப்பிய கலை, ஐரோப்பிய பேஷன், ஐரோப்பிய இசை என வரிசையாக உள்ள பட்டியலில் ஐரோப்பிய ஒளிப்படங்கள் எனும் தலைப்பு மூலம் இந்த படங்களை பார்த்து ரசிக்கலாம். ஒளிப்படக்கலையில் விஷயம் தெரிந்தவர்கள் எனில், ஐரோப்பாவின் புகழ் பெற்ற ஒளிப்பட மேதைகளின் பெயரை தட்டச்சு செய்து அவர்களின் ஒளிப்படைப்புகளை தேடலாம். குறிப்பிட்ட தலைப்புகள் சார்ந்தும் ஒளிப்படங்களை அணுகலாம்.

சும்மா சொல்லக்கூடாது, ஐரோப்பிய ஒளிப்படக்கலையின் முதல் 100 ஆண்டுகளில் எடுக்கப்பட்ட ஒளிப்படங்களை இந்தப்பகுதியில் பார்த்து ரசிக்கலாம். எதை பார்ப்பது, எப்படி பார்ப்பது என திகைத்து நிற்பவர்களுக்கு வழி காட்டும் வகையில் இந்த தளமே இணைய கண்காட்சிகளாக வழிகாட்டுகிறது. உதாரணத்திற்கு, ‘இயந்திரங்களின் யுகத்தில் எடுக்கப்பட்ட தொழில்கூட படங்கள் ’ கண்காட்சி மூலம் அந்த கால தொழிற்சாலைகள், இயந்திரங்கள், தொழிலாலர்கள் உள்ளிட்டவற்றை ஒளிப்படங்களாக பார்த்துபடி பின்னோக்கிச்செல்லலாம். இதே போல குறிப்பிட்ட தலைப்புகள் மற்றும் கலைஞர்கள் சார்ந்த ஒளிப்படங்களையும் காணலாம்.

012uP2P1sayKஅந்த கால ஐரோப்பா எப்படி இருந்தது என பார்க்க விரும்பினாலும் சரி, கால வெள்ளத்தில் ஐரோப்பா எப்படி மாறி வந்திருக்கிறது என அறிய விரும்பினாலும் சரி, ஒளிப்படங்கள் வாயிலாக அந்த அனுபவத்தை பெறலாம். அவரவர் விருப்பம் அல்லது தேடலுக்கு ஏற்ப மிலன் அல்லது லண்டன் என நகரங்களின் பெயரை தட்டச்சு செய்து ஒளிப்படங்களை தேடலாம். ஐரோப்பிய பேஷனில் ஏற்பட்ட மாற்றங்கள், கலாச்சார சுவடுகள் , மனிதர்கள் என பலவிதங்களில் வரலாற்றின் பக்கங்களை திரும்பிப்பார்க்கலாம். உதாரணத்திற்கு நடன அறைகளில் அணியப்பட்ட ஆடைகளை சித்தரிக்கும் ஒளிப்படங்களை பார்த்து ரசிக்கலாம். அதே போல பிரபலங்களின் பேஷனை பார்க்கலாம்.

ஒளிப்படங்களை பயன்படுத்துவது தொடர்பான காப்புரிமை சார்ந்த விவரங்களும் கொடுக்கப்பட்டுள்ளன. வண்ணங்கள், காலவரிசை என பலவிதங்களில் தேடலை மாற்றி அமைத்துக்கொள்ளும் வசதி இருக்கிறது. குறிப்பிட்ட ஒளிப்படம் கவனத்தை ஈர்த்தால் அந்த படம் தொடர்பான மேலதிக தகவல்கள் மற்றும் அதை பகிர்ந்து கொண்டுள்ள அருங்காட்சியக அமைப்பு குறித்த விவரங்களையும் தெரிந்து கொள்ளலாம்.

ஒளிப்படங்களின் தேடல் இந்த தளத்தின் ஒரு அம்சம் தான். இதே போல ஐரோப்பா தொடர்பான பலவிஷயங்களை இந்த தளத்தில் தேடலாம். குறிப்பிட்ட நாடு தொடர்பாக அறிய விரும்பினால், அந்த நாடு தொடர்பாக உள்ள ஒளிப்படங்கள் உள்ளிட்ட தகவல்கள் பட்டியலாக தோன்றுகிறது. காணொலிகள், ஒலிக்கோப்புகள், புத்தகங்கள், கலை வடிவங்கள் என பலவகையான தகவல்கள் அணிவகுக்கின்றன. தேவை எனில், தேடலில் ஈடுபடும் போது எந்த வகையான தகவல் வேண்டும் என தேர்வு செய்து கொள்ளலாம். ஒளிப்படங்களை தேர்வு செய்தால் படங்கள் மட்டும் வரும். இசை அல்லது கலையை தேர்வு செய்தால் தொடர்புடைய தகவல்களை காணலாம்.

சோவியத் யூனியன் வரலாற்றில் ஆர்வம் உள்ளவர்கள் ரஷ்ய புரட்சிக்கு வித்திட்ட லெனினின் அரிய ஒளிப்படங்களை காணலாம். அதே போல உளவியல் மேதை சிக்மண்ட் பிராய்டின் ஒளிப்படங்களை காணலாம். லண்டன் நகர தெருக்களின் உலாவலாம். மிலன் பேஷன் போக்குகளை கண்டு வியக்கலாம்.

இப்படி அநேகமாக ஐரோப்பிய நாடுகளின் முக்கிய அருங்காட்சியகங்களில் பொக்கிஷமாக பாதுக்காக்கப்படும் கலைப்பொருட்கள், காணொலிகள், ஒளிப்படங்கள் அனைத்தையும் இந்த தளம் மூலம் அணுகலாம். இந்த தளத்தை பயன்படுத்த வரலாற்று ஆர்வம் கொண்டவராக அல்லது ஆய்வாளராக இருக்க வேண்டும் என்றில்லை, சாமானியர்களையும் எளிதில் கவரக்கூடிய அம்சங்களை இந்த தளத்தில் காணலாம். அதற்கேற்ப கலாச்சார ஆர்வலர்களே வாருங்கள் என்று தான் இந்த இணையதளம் அழைப்பு விடுக்கிறது. ஆய்வு பணிக்காக வந்திருந்தாலும் சரி, அல்லது அலுப்பை போக்கி கொள்ள வந்திருந்தாலும் சரி, உங்களுக்கு ஆர்வத்தை ஏற்படுத்தக்கூடிய ஏதாவது சில எங்களிடம் நிச்சயம் இருக்கும் என்றும் இந்த தளம் பெருமிதம் கொள்கிறது.

ஐரோப்பிய பாரம்பரியம் தொடர்பான தரவுகளை இணையம் மூலம் அனைவருக்கும் அளிக்கும் நோக்கில் யூரோபியானா அமைப்பு இந்த தளத்தை நடத்தி வருகிறது. பல ஐரோப்பிய அமைப்புகள் ஒன்றிணைந்து உருவாக்கிய ஐரோப்பிய அறக்கட்டளை சார்பில் இந்த தளம் செயல்பட்டு வருகிறது. கலைப்படைப்புகளும், ஒளிப்படங்களும் டிஜிட்டல் மயமாக்கப்பட்டு, பகிரப்படும் போது என்னவெல்லாம் சாத்தியம் என்பதையும், கூட்டு முயற்சியின் அருமையையும் உணர்த்தும் வகையிலும் இந்த தளம் அமைந்துள்ளது.

யூரோபியானா திட்டம் பற்றிய அறிமுகம் : http://pro.europeana.eu/about-us/our-vision

-நன்றி; தமிழ் இந்து , இளமை புதுமை பகுதியில் எழுதியது.

இணையத்தை உலுக்கிய ரான்சம்வேர் தாக்குதல்

ransomசாப்ட்வேர், ஸ்பைவேர், மால்வேர் வரிசையில் இப்போது, ரான்சம்வேர் என்பதும் பெரும்பாலானோர் அறிந்த வார்த்தையாகி இருக்கிறது. கடந்த வெள்ளிக்கிழமை அன்று இணையத்தில் தலைகாட்டி கம்ப்யூட்டர்களை முடக்கி போட்டு பினைத்தொகை கேட்டு மிரட்டும் வகையில் நடத்தப்பட்ட ரான்சம்வேர் இணையதாக்குதலே இதற்கு காரணம். 150 க்கும் மேற்பட்ட நாடுகளில் உள்ள லட்சக்கணக்கான கம்ப்யூட்டர்கள் இந்த தாக்குதலால் பாதிக்கப்பட்டதால், இணைய உலகம் முழுவதும் பீதி பரவியது. இந்தியாவில் உள்ள கம்ப்யூட்டர்களும் தாக்குதலுக்கு இலக்காயின. சென்னையிலும் கூட பாதிப்பு உண்டானது.

வான்னா கிரை எனும் பெயரிலான வார்ம் மூலம் பரவிய இந்த வைரஸ் அரசு அமைப்புகள், வர்த்தக நிறுவனங்களின் கம்ப்யூட்டர்களை முடக்கி போட்ட விதம் இணைய உலகில் மறைந்திருக்கும் ஆபத்துகளை மீண்டும் ஒரு முறை வெளிச்சம் போட்டு காண்பித்துள்ளது. நாளிதழ் செய்தி ஒன்றின் தலைப்பு குறிப்பிட்டது போலவே, இமெயிலில் பெட்டியில் கன்னி வெடிகள் மறைந்திருப்பதையே இந்த தாக்குதல் உணர்த்தியுள்ளது.

ரான்சம்வேர் தாக்குதல் புதிதல்ல என்றாலும், இந்த அளவுக்கு உலகம் தழுவிய அளவில் தாக்குதல் இதற்கு முன்னர் நடைபெற்றதில்லை. இது பற்றி மேற்கொண்டு பார்ப்பதற்கு முன், இணைய உலகில் அண்மையில் நிகழந்த இன்னொரு தாக்குதலை நினைவில் கொள்வது பொருத்தமாக இருக்கும்.

கூகுள் டாக்ஸ் சேவை தொடர்பாக நடந்த தாக்குதல் இது. பிஷிங் மோசடி வகையை சேர்ந்ததாக அமைந்திருந்தது. இந்த சேவையின் பயனாளிகள் பலருக்கு, புதிய பிரதியை பார்க்குமாறு கோரிக்கை இமெயில் மூலம் வந்து சேர்ந்தது. இதை ஏற்று இணைப்பை கிளிக் செய்தால், கூகுளின் அனுமதி பக்கம் போலவே தோன்றும் போலியான பக்கத்திற்கு அழைத்துச்செல்லப்பட்டனர். அந்த பக்கத்தில் நுழைந்தவுடன், பயனாளியின் ஜிமெயில் கணக்கை அணுகும் அனுமதி கோரப்பட்டது.

இந்த கட்டத்திலும் ஏமாந்து அனுமதி அளித்தால், இந்த போலியான இணையதளம் பயனாளியின் ஜிமெயில் கணக்கிற்குள் நுழைந்து தகவல் திருட்டில் ஈடுபடும் அபாயம் உண்டு. வேகமாக பரவிய இந்த மோசடி இமெயில் உடனடியாக கண்டறியப்பட்டு பயனாளிகள் எச்சரிக்கப்பட்டனர். ஜிமெயில் பயனாளிகளில் சொற்பமானவர்களையே இந்த மோசடி பாதித்ததாக கூகுள் தெரிவித்தது. விஷயம் அதுவல்ல, ஆவலை தூண்டக்கூடிய ஒரு இமெயில் மூலம் போலி தளங்களுக்கு இணையவாசிகள் அழைத்துச்செல்லப்பட்டு அவர்களிடம் இருந்து முக்கியமான தகவல்கள் திருடப்படும் அபாயம் இருக்கிறது என்பதும், பெரும்பாலனோர் இத்தகைய வலையில் தங்களை அறியாமல் சிக்கி கொள்ளும் நிலை இருக்கிறது என்பதுமே இணையத்தின் திகிலான யதார்த்தமாக இருக்கிறது.

இந்த யதார்த்தத்தின் இன்னொரு இருண்ட அம்சம் தான் ரான்சம்வேர் தாக்குதல்!

ரான்சம்வேர் வைரஸ் என்றால் என்ன?

ரான்சம்வேர் என்பது தீய நோக்கம் கொண்ட மென்பொருள்களாக அறியப்படும் மால்வேர்களில் ஒரு வகை. பொதுவாக மால்வேர்கள் இமெயில் அல்லது தரவிறக்க வசதியின் பின்னே ஒளிந்து கொண்டு பயனாளிகளின் கம்ப்யூட்டருக்குள் ஊடுருவி வில்லங்கத்தை ஏற்படுத்துகின்றன. மால்வேர்கள் பெரும்பாலும் பாஸ்வேர்டு உள்ளிட்ட தகவல்களை குறி வைக்கின்றன.

ரான்சம்வேர் கொஞ்சம் மாறுபட்டது. இந்த வகை மால்வேர் கம்ப்யூட்டருக்குள் நுழைந்ததும், அதில் உள்ள தரவுகளை என்கிரிப்ட் செய்து முடக்கி விடுகிறது. கம்ப்யூட்டரை அணுக முடியாதபடி முடக்கப்படுவதும் உண்டு. இப்படி தரவுகளை பயன்படுத்த முடியாமல் முடக்கிய பிறகு, இதிலிருந்து விடுபட வேண்டும் எனில், குறிப்பிட்ட தொகையை பினையாக அளிக்க வேண்டும் எனும் வாசகம் மட்டுமே கம்ப்யூட்டரில் தோன்றும். அனாமதேய பரிவர்த்தனைக்கான இணைய நாணயமான பிட்காயின் வடிவில் பினைத்தொகை கேட்கப்படும்.

நிஜ உலகில் யாரையாவது கடத்தி வைத்துக்கொண்டு விடுவிக்க பினைத்தொகை கேட்கப்படுவது போல, கம்ப்யூட்டர் உலகில் தரவுகளை பூட்டு போட்டு முடக்கி விட்டு, அதை மீட்க பணம் கேட்டு மிரட்டுவது தான் ரான்சம்வேரின் பின்னே உள்ள திகிலான உத்தி. கம்ப்யூட்டர் முடக்கப்பட்ட பின் அதை விடுவிக்க அநேகமாக வழி இருக்காது என்பதும், பினைத்தொகை கொடுத்தாலும் தரவுகள் விடுதலைக்கு உத்தரவாதம் கிடையாது என்பதும் மோசமான அம்சங்கள்.

தற்போது இணையத்தை உலுக்கியிருக்கும் வான்னகிரை தாக்குதலிலும் இது தான் பெரிய அளவில் நடந்திருக்கிறது. அமெரிக்காவின் என்.எஸ்.ஏ அமைப்பு உருவாக்கி வைத்திருந்த இணைய தகவல்களை திருடுவதற்கான டூல் எப்படியோ இணையத்தில் கசிந்து அதைக்கொண்டு தாக்காளர்கள் இந்த தாக்குதலை நடத்தியதாக அறிய முடிகிறது. ஒரு கம்ப்யூட்டரில் இருந்து இன்னொரு கம்ப்யூட்டருக்கு தானாக பரவும் வகையில் உருவாக்கப்பட்டதால் இந்த வில்லங்க வைரசும் வைரலாகி விபரீத்ததை ஏற்படுத்தியுள்ளது. இதற்கான மென்பொருள் பேட்சை மைக்ரோசாப்ட் நிறுவனம் ஏற்கனவே வெளியிட்டுள்ளது.

இதுவரை பசையுள்ள தனி மனிதர்களும், வர்த்தக நிறுவனங்களும் இந்த வகை தாக்குதலுக்கு இலக்காகியுள்ளன. ஆனால் முதல் முறையாக இப்படி மெகா அளவில் தாக்குதல் நிகழ்ந்துள்ளது. இது போன்ற தாக்குதல்கள் இனி அதிகரிக்கும் அபாயம் இருக்கிறது என சைபர் வல்லுனர்கள் எச்சரித்துள்ளனர்.

அது மட்டும் அல்ல, இந்த தாக்குதலில் இருந்து தற்காத்துக்கொள்வதற்கான வழிகளையும் முன் வைக்கின்றனர். மால்வேர்கள் இமெயிலை வாகனமாக கொள்வதால், சந்தேகத்திற்குறிய இமெயில்கள் எனில் அவற்றை கிளிக் செய்யாமல் டெலிட் செய்வது நல்லது என்கின்றனர். அதைவிட முக்கியம், இது போன்ற மெயில்களில் உள்ள இணைப்புகளை கிளிக் செய்யாமல் கையை கட்டிக்கொண்டிருப்பது.

இணைப்புகளை கிளிக் செய்வதை விட முழு முகவரியை டைப் செய்து இணையதளத்தை அணுக வேண்டும். இமெயில் உள்ள இணைப்புகள் பற்றி உறுதியாக தெரியவில்லை எனில், சம்பந்தப்பட்ட நிறுவனத்திடம் தொடர்பு கொண்டு அத்தகைய இமெயில் அனுப்பட்டதாக் என்பதை உறுதி செய்து கொள்ளலாம். இவை அநேகமாக பிரபலமான தளங்கள் போல தோன்றும் போலி தளங்களுக்கு அழைத்துச்செல்லும் வகையிலே அமைந்திருக்கும் என்பதால் கவனம் தேவை.

அதோடு, இமெயிலில் உள்ள முகவரியையும் கொஞ்சம் கவனிக்க வேண்டும். ஒரு சில எழுத்துக்களை மட்டும் மாற்றி ஏமாற்ற முயற்சிக்கப்படலாம்.

இதே போலவே அதிகார பூர்வமம் அல்லாத தளங்கள் தவிர மற்ற இடங்களில் எந்த கோப்பையும் தரவிறக்கம் செய்யாமல் இருப்பது நல்லது.

இவை மட்டும் போதாது. கம்ப்யூட்டரில் உள்ள இயங்குதளத்தை அப்டேட்டாக வைத்திருக்க வேண்டும். புதிய அப்டேட்கள் வந்தால் அதை செயல்படுத்த வேண்டும். வைரஸ் தருப்பு மென்பொருள் பாதுகாப்பு அவசியம் என்பதோடு அதுவும் புதுப்பிக்கப்பட்டிருக்க வேண்டும்.

இவற்றையும் மீறி தாக்குதல் நடக்கும் அபாயம் இருக்கவே செய்கிறது. எனவே கம்ப்யூட்டரில் உள்ள முக்கிய தரவுகளை எப்போதுமே பாதுகாப்பாக பேக்கப் செய்து கொள்ள வேண்டும். இப்படி பேக்கப் இருந்தால் கம்ப்யூட்டர் முடக்கப்பட்டால் கூட, பதற்றம் அடையாமல் பணிகளை தொடர்ந்து, தாக்குதலில் இருந்து மீளும் வழியை யோசிக்கலாம்.

நிற்க, இந்த வகை தாக்குதலின் விபரீதத்தை உணர்ந்து யூரோபோல் மற்றும் நெதர்லாந்து காவல்துறை, வைரஸ் தடுப்பு நிறுவனமான காஸ்பர்ஸ்கை மற்றும் இண்டெல் செக்யூரிட்டி ஆகியவற்றுடன் இணைந்து நோமோர்ரேன்சம்.ஆர்க் எனும் விழிப்புணர்வு தளத்தை அமைதுள்ளன. இந்த தளத்தில் ரான்சம்வேருக்கு எதிரான தற்காப்பு வழிகள் தெரிவிக்கப்பட்டுள்ளதோடு, ஏற்கனவே நடைபெற்ற தாக்குதல்களில் இருந்து விடுபடுவதற்கான வழிகளும் இடம்பெற்றுள்ளன. தாக்காளர்களின் மிரட்டலுக்கு பணியாமல் இருங்கள், இணைய பாதுகாப்பு தொடர்பான விழிப்புணர்வு பெறுங்கள் என வழிகாட்டுகிறது இந்த தளம்: https://www.nomoreransom.org/index.html

டிஜிட்டல் பண பரிவர்த்தனையை எளிதாக்குக்கும் பீம் செயலி

BHIM-Detailsபண மதிப்பு நீக்க நடவடிக்கைக்குப்பிறகு ரொக்கமில்லா பரிவர்த்தனைகளை அரசு பெரிய அளவில் ஊக்குவித்து வருகிறது. இதற்கு உதவும் வகையில் டிஜிட்டல் பரிவர்த்தனைக்கு மாறுவதற்கான புதிய வசதிகளும் அறிமுகம் செய்யப்பட்டு வருகின்றன. அந்த வகையில் அன்மையில் அறிமுகமான பீம் செயலி துவக்க நிலையிலேயே அதிக வரவேற்பை பெற்று கவனத்தை ஈர்த்துள்ளது. தேசிய பேமெண்ட் கார்ப்பரேஷனால் உருவாக்கப்பட்ட இந்த செயலியை பிரதமர் நரேந்திர மோடி அறிமுகம் செய்து வைத்தார். பாரத் பேமெண்ட் இண்டர்பேஸ் பார் மணி என்பதன் சுருக்கமான பீம் செயலி சட்ட மேதை அம்பேத்கர் பெயரையும் குறிக்கும் வகையில் அமைந்துள்ளது.

ஆண்ட்ராய்டு போன்களில் செயல்படக்கூடிய இந்த செயலி ஏற்கனவே அறிமுகம் செய்யப்பட்டுள்ள யூனிபைடு பேமெண்ட் இண்ட்பர்பேஸ் எனப்படும் யு.பி.ஐ தொழில்நுட்ப மேடையை அடிப்படையாக கொண்டு உருவாக்கப்பட்டுள்ளது. யு.பி,ஐ. வசதி ஸ்மார்ட் போன் மூலம் வங்கி கணக்கில் இருந்து நேரடியாக பணபரிவர்த்தனை செய்ய வழி செய்கிறது. இந்த பரிவர்த்தனைகளின் போது வங்கி கணக்கு உள்ளிட்ட விவரங்களை சமர்பிக்க வேண்டிய அல்லது ஊள்ளீடு செய்ய வேண்டிய அவசியம் இல்லை என்பது இந்த வசதியின் சிறப்பாக அமைகிறது.

யு.பி.ஐ வசதி சார்ந்து முன்னணி வங்கிகள் தனி செயலிகளை அறிமுகம் செய்துள்ளன. அந்த வரிசையில் பீம் செயலியும் அறிமுகம் செய்யப்பட்டாலும், எளிமையான பயன்பாட்டில் இது மற்ற செயலிகளில் இருந்தெல்லாம் வேறுபட்டிருக்கிறது. யு.பி.ஐ செயலியின் இலகுவான வடிவமாக வெகுமக்களை மனதில் கொண்டு மிகவும் எளிமையாக இந்த செயலி வடிவமைக்கப்பட்டுள்ளது. எளிமையான இடைமுகம் மற்றும் மொபைல் வங்கிச்சேவைக்கு பதிவு செய்திருக்க வேண்டிய அவசியமில்லை ஆகிய அம்சங்கள் பீம் செயலியின் பயன்பாட்டை எளிதாக்குகிறது.

வங்கி கணக்கு (யு.பி.ஐ இடைமுகத்தில் இணைந்துள்ள வங்கி) மற்றும் அதனுடன் இணைக்கப்பட்ட மொபைல் எண் கொண்ட எல்லோரும் பீம் செயலியை பயன்படுத்தலாம். பீம் செயலி மூலம் எளிதான பண பரிவர்த்தனையை மேற்கொள்ளலாம்.

பீம் செயலியை பயன்படுத்த ஆண்ட்ராய்டு போன் வழியே கூகுள் பிளேஸ்டோரில் இருந்து இந்த செயலியை தரவிறக்கம் செய்து நிறுவிக்கொள்ள வேண்டும். பீம் செயலியை தரவிறக்கம் செய்யும் போது, அதிகாரபூர்வமான செயலியை தான் தரவிறக்கம் செய்கிறோம் என்பதை உறுதி செய்து கொள்வது மிகவும் அவசியம். ஏனெனில் பீம் பெயர் போலவே பல போலி செயலிகள் உலாவிகின்றன. எனவே செயலியை தரவிறக்கம் செய்யும் முன் அது தேசிய பேமனெட் கார்ப்பரேஷன் உருவாக்கிய செயலியா என்பதை கண்டறிய வேண்டும். அதிகார பூர்வ இணைப்பு மூலம் இதை நாடுவது நலம். பொதுவாகவே வங்கி மற்றும் நிதிச்சேவை செயலிகளை பயன்படுத்துவதற்கு முன், அவை அதிகாரபூர்வ செயலி தானா என்பதை உறுதி செய்து கொள்ள வேண்டும். இமெயில் அல்லது குறுஞ்செய்தி மூலம் வரும் இணைப்புகளை எல்லாம் பயன்படுத்துவதை தவிர்க்க வேண்டும்.

bhimsசெயலியை நிறுவிய பின் விருப்ப மொழியை தேர்வு செய்ய வேண்டும். இப்போது முதல் கட்டமாக ஆங்கிலம் மற்றும் இந்திய மொழிகள் மட்டுமே உள்ளன. வரும் வாரங்களில் தமிழ் உள்ளிட்ட மற்ற மொழிகளும் அறிமுகம் செய்யப்பட உள்ளன. இதன் பிறகு பயனாளியின் போன் மற்றும் குறுஞ்செய்திகளை அணுகும் அனுமதியை கேட்கும். இதற்கு அனுமதி அளித்தவுடன், பயனாளியின் போன் எண்ணை உறுதி செய்து கொள்ளும். இரட்டை சிம் கார்டு கொண்ட போன் எனில் எது பரிவர்த்தனைக்கான சிம்கார்டு என குறிப்பிட வேண்டும். அடுத்த கட்டமாக நான்கு இலக்க பாஸ்கோடை உருவாக்கி கொள்ள வேண்டும். இந்த பாஸ்கோடை தான் தொடர்ந்து கடவுச்சொல்லாக பயன்படுத்துவோம். பாஸ்கோடை உருவாக்கிய பிறகு வங்கியை தேர்வு செய்ய வேண்டும். யு.பி.ஐ பட்டியலில் உள்ள 31 வங்கிகளில் இருந்து தேர்வு செய்து கொள்ளலாம். ஒரு வங்கி கணக்கை மட்டும் தான் தேர்வு செய்ய முடியும். வங்கி கணக்கை இணைத்தவுடன், டெபிட் கார்டின் கடைசி ஆறு இலக்கத்தை தெரிவித்து, யு.பி.ஐ பரிவர்த்தனை பின் எண்ணை உருவாக்கி கொள்ள வேண்டும். இதன் பிறகு பரிவர்த்தனைக்கான வி.பி.ஏ எனப்படும் விர்ச்சுவல் பேமெண்ட் அட்ரஸ் எனும் முகவரியை உருவாக்கி கொள்ள வேண்டும். இது மொபைல் எண் அல்லது பெயராக இருக்கலாம். பணம் அனுப்ப அல்லது கோர இந்த முகவரி அவசியம். வி.பி.ஏவை உருவாக்கி கொண்ட பிறகு, பரிவர்த்தனைக்கான பக்கம் தோன்றும். அதில் அனுப்ப ( செண்ட்), கோர ( ரிக்வஸ்ட்) மற்றும் ஸ்கேன் ஆகிய மூன்று பகுதிகள் இருக்கும். செண்ட் பகுதி மூலம் பணம் அனுப்பலாம். ரிக்வஸ்ட் பகுதி மூலம் பணம் அனுப்ப கோரலாம்.

பணம் அனுப்ப, பெறுபவரின் மொபைல் எண் அல்லது பரிவர்த்தனையை முகவரியை குறிப்பிட வேண்டும். உடனே அதை பரிசோதித்து உறுதி செய்யும். அதன் பிறகு தொகையை தெரிவித்து பின் எண்ணை அடித்தவுடன் பணம் பரிவர்த்தனை செய்யப்படும். பணம் பெறுபவர் யு.பி.ஐ பரிவர்த்தனை முகவரி கொண்டவராக இருக்க வேண்டும். இல்லை எனில் அவரது வங்கி கணக்கு மற்றும் ஐ.எப்.எஸ்.சி கோடு தெரிவித்து பரிவர்த்தனை செய்யலாம். பரிவர்த்தனை முகவரி கொண்டவர்கள் எனில், எளிதாக பரிவர்த்தனை செய்யலாம். ஸ்கேன் செய்வது மூலமும் பரிவர்த்தனை செய்யலாம். பணம் அனுப்புவதற்கான கியூ.ஆர் கோடையும் உருவாக்கி அதனை பகிர்ந்து கொள்ளலாம். மற்றவர்கள் உருவாக்கிய கோடை ஸ்கேன் செய்தும் பணம் செலுத்தலாம்.

சாதாரண போனில் *99# என்ற எண்ணை அணுகுவது மூலமும் இந்த வசதியை பயன்படுத்தலாம். பண பரிவர்த்தனை தவிர கணக்கில் உள்ள தொகையை அறியவும் இந்த வசதியை பயன்படுத்தலாம். ஆனால் மற்ற யு.பி.ஐ செயலியில் உள்ளது போல காசோலை கோருவது போன்ற மற்ற வசதிகளை அணுக முடியாது. பீம் செயலி மூலமான பரிவர்த்தனை நேரடியான வங்கி கணக்கிற்கு சென்றுவிடும். இதை பயன்படுத்த கட்டணம் கிடையாது. ஆனால் வங்கிகள் தரப்பில் சிறிதளவு கட்டணம் வசூலிக்கப்படலாம்.

தற்போது பண பரிவர்த்தனை செயலிகளை விட பீம் செயலி மிகவும் எளிதானதாக கருதப்படுகிறது. முதல் முறை பயனாளிகளை டிஜிட்டல் பரிவர்த்தனை உலகிற்குள் ஊக்குவிக்கும் வகையில் இந்த செயலி வடிவமைக்கப்பட்டுள்ளதாகவும் கருதப்படுகிறது. இந்த செயலி பாதுகாப்பான செயல்பாடுகளை கொண்டிருப்பதாகவும் தெரிவிக்கப்பட்டுள்ளது. மூன்று அடுக்கு பாதுகாப்பை கொண்டுள்ளது. ஒரு முறை 10,000 ரூ வரை பணம் அனுப்பலாம். நாள் ஒன்றுக்கு 20,000 எனும் வரம்பு உள்ளது.

நேரடி பண பரிவர்த்தனைக்கு இது மிகவும் ஏற்றது. இந்த செயலி பரிவர்த்தனையை ஏற்கும் வர்த்தர்களிடமும் இதை பயன்படுத்தலாம். வருங்காலத்தில் இந்த எண்ணிக்கை தற்போதுள்ளதைவிட அதிகரிக்கும் என எதிர்பார்க்கப்படுகிறது. பீம் செயலி பயன்பாட்டில் சில சிறிய இடர்கள் இருப்பதாக கூறப்படுகிறது. மேலும் ஸ்பேம் கோரிக்கைகளும் தொல்லை தருவதாக செய்திகள் வெளியாகியுள்ளன. ஆனால் இவற்றை சரி செய்யும் வகையில் அப்டேட் வர்ஷன் வெளியாகியுள்ளது. ஸ்பேம் தொலைக்கு குறித்து புகார் தெரிவிக்கும் வசதியும் அறிமுகம் செய்யப்பட உள்ளது.

 

மேலும் விவரங்களுக்கு; https://upi.npci.org.in/static/faq/en_US/

நன்றி : தமிழ் இந்துவில் எழுதியது