Tag Archives: apple

ஐபோனே உன் விலை என்ன?

yஐபோன் விலை உயர்ந்தது என்பது அதை வாங்க விரும்புகிறவர்களுக்கும் தெரியும். அந்த காரணத்திற்காகவே அதை வாங்க நினைக்காதவர்களுக்கும் தெரியும். ஆகவே, இந்த கட்டுரையின் நோக்கம் ஐபோனையோ அல்லது அதன் விலையை விமர்சிப்பது அல்ல. ஆனால் ஐபோனின் உண்மையான விலை என்னத்தெரியுமா? எனும் கேள்வி தொடர்பாக சிந்திக்க வைப்பது தான் இதன் உண்மையான நோக்கம்.

இந்த கேள்வியும் கூட நான் எழுப்பவில்லை. பிலிப் ஸ்கிமிட் எனும் மென்பொருள் வல்லுனர் எழுப்பியிருக்கிறார். இந்த கேள்வியை அவர் எழுப்பியிருக்கும் விதம் சுவாரஸ்யமாகவும் இருக்கிறது. அதே நேரத்தில் அவரது கேள்வி சிந்திக்கவும் வைக்கிறது.

ஐபோனின் ஒவ்வொரு புதிய மாதிரி அறிமுகமாகும் போதும் அதைச்சுற்றி எழும் எதிர்பார்ப்பும், பரபரப்பும் ஆப்பிள் சாதனங்களுக்கே உரியது. புதிய ஐபோன் விற்பனைக்கு வரும் முதல் நாளில் ஆப்பிள் அபிமானிகள் அதை வாங்க வரிசைகட்டி காத்திருப்பதும் வழக்கமானது தான். தீவிர ஐபோன் அபிமானிகள் புதிய போனை வாங்குவதற்காகவே ஒரு நாட்டில் இருந்து இன்னொரு நாட்டிற்கு பறந்து சென்று வரிசையில் நின்ற விநோத கதைகள் எல்லாம் இருக்கின்றன.

ஐபோன் மீதான இந்த அபிமானத்திற்கான காரணங்களை தனியே ஆராயலாம். இப்போதைக்கு அதன் விலை அம்சத்தை மட்டும் எடுத்துக்கொள்வோம். கட்டுரை துவக்கத்திலேயே குறிப்பிட்டபடி அது அதிகமானது என்பது எல்லோருக்கும் தெரியும். அதை மீறி தான் வாங்க விரும்புகின்றனர். நம் நாட்டைப்பொருத்தவரை ஐபோன் என்பது அந்தஸ்த்தின் அடையாளமாக கருதப்படுவதும் இதற்கான காரணமாக அமைகிறது.

எல்லாம் சரி, ஐபோனின் உண்மையான விலை என்ன தெரியுமா? இந்த கேள்வியை தான், மென்பொருள் வல்லுனர் பிலிப் தனது இணைய பக்கத்தின் மூலம் எழுப்பி அதற்கான பதிலை அவரவரே தெரிந்து கொள்ளவும் வைத்திருக்கிறார். கொஞ்சம் தகவல், கொஞ்சம் புள்ளிவிவரம் ஆகியவற்றை எடுத்துக்கொண்டு பின்னணியில் கொஞ்சம் புரோகிராமிங் கலந்து இதை கச்சிதமாக செய்திருக்கிறார்.

அண்மையில் அறிமுகம் செய்யப்பட்ட புதிய ஐபோன் எக்ஸ் மாதிரியின் அமெரிக்க விலை 999 டாலர் என்பதை நீங்கள் அறிந்திருக்கலாம். இதை ஒவ்வொருவரும் தங்கள் நாட்டு பணத்தின் மதிப்பிற்கு மாற்றிப்பார்த்தால் அதன் விலையை உள்ளூர் மதிப்பில் தெரிந்து கொள்ளலாம். அதன் மூலம் அது தங்களுக்கு கட்டுப்படியாகுமா? அல்லது எட்டாக்கனியா என்றும் முடிவு செய்யலாம். இது ஒன்றும் பெரிய விஷயம் இல்லை. ஆனால், பிலிப் இந்த எண்ணிக்கையை வேறு ஒரு கோணத்தில் பார்க்க வைத்திருக்கிறார்.

அவர் உருவாக்கியுள்ள இணைய பக்கத்தில் நுழைந்ததுமே, ஐபோனின் உண்மையான விலை எனும் வாசகம் கொட்டை எழுத்தில் கண்ணில் படுகிறது. அதன் கீழ், பயனாளிகள் தாங்கள் வசிக்கும் நாட்டின் பெயரை டைப் செய்தால், அவர்கள் ஐபோனை வாங்க எத்தனை நாட்கள் வேலை செய்ய வேண்டியிருக்கும் எனும் தகவல் காண்பிக்கப்படுகிறது. ஒவ்வொரு நாட்டின் குறைந்த பட்ச ஊதியத்தின் அடிப்படையில் இந்த தகவல் முன்வைக்கப்படுகிறது. அதாவது, ஐபோன் விலையை டாலர் அல்லது வேறு பணத்தில் எடை போடாமல், அந்த அந்த நாட்டின் குறைந்த பட்ச ஊதியத்தின் அடிப்படையில், அதை வாங்க எத்தனை நாட்கள் உழைக்க வேண்டியிருக்கும் எனும் தகவல் சுட்டிக்காட்டப்படுகிறது.

இந்த கணக்கு படி பார்த்தால், இந்தியர்கள் புதிய ஐபோனை வாங்க வேண்டும் எனில் 416 நாட்கள் உழைக்க வேண்டியிருக்கும். அதாவது 416 நாட்கள் உழைத்தால் கிடைக்கும் தொகையை அதற்கான விலையாக கொடுக்க வேண்டும். இந்தியர்களின் குறைந்த பட்ச ஊதியம் படி பார்த்தால், புதிய ஐபோனை வாங்க ஒருவர் ஒரு ஆண்டுக்கு மேல் உழைக்க வேண்டியிருக்கும். இப்படி ஒவ்வொரு நாட்டுக்கும் ஐபோனுக்கான விலை கணக்கிட்டு சொல்லப்படுகிறது. இது தான் ஐபோனின் உண்மையான விலை என இந்த இணைய பக்கம் மூலம் புரிய வைக்க பிலிப் முயற்சிக்கிறார்.

இது கொஞ்சம் புதுமையான முயற்சி தான் இல்லையா? ஆனால், பிலிப்பின் நோக்கம் ஐபோனின் உண்மையான விலையை உழைக்கும் மணித்துளிகளாக காட்சிப்படுத்தி பார்க்க வைப்பது மட்டும் அல்ல, அப்படியே உலகில் நிலவும் ஏற்றத்தாழுவு தொடர்பாகவும் சிந்திக்க வைப்பதாக இருக்கிறது.

ஆம், இந்த இணைய பக்கத்தில் ஒவ்வொருவரும் தங்கள் நாட்டிற்கான ஐபோன் விலையை தெரிந்து கொள்வதோடு, உலகின் மற்ற நாடுகளில் அதன் விலை எப்படி இருக்கிறது என்றும் பார்க்கலாம். உதாரணத்த்திற்கு நெதர்லாந்து நாட்டில் 12 நாட்கள் வேலை செய்தால் ஐபோன் வாங்கிவிடலாம். ஸ்பெயினில் 23 நாட்கள் வேலை செய்தால் வாங்கிவிடலாம். ஆஸ்திரேலியாவில் 9 நாட்கள் வேலை செய்தால் வாங்கிவிடலாம். ஆனால் ஆப்பிரிக்க நாடான உகாண்டாவில் 12487 நாட்கள் வேலை செய்தால் தான் ஐபோன் வாங்க முடியும். அதாவது கிட்டத்தட்ட 37 ஆண்டுகள் வேலை செய்தாக வேண்டும். இந்த ஏற்றத்தாழ்வு மலைக்க வைக்கிறது அல்லவா?

உண்மையில், உலகில் நிகழும் இந்த ஏற்றத்தாழ்வு தொடர்பான விழிப்புணர்வை ஏற்படுத்துவதும் தனது நோக்கம் என்கிறார் பிலிப். ஆக, ஐபோன் விலையை ஒரு புள்ளியாக வைத்துக்கொண்டு, உலகில் நிகழும் ஏற்றத்தாழ்வு பற்றிய சிந்தனையை அவர் உண்டாக்கி விடுகிறார். இருக்கும் புள்ளிவிவரங்களை கொண்டு இதை அவர் எளிமையான இணையதளம் செய்திருக்கும் விதமும் பாராட்டுக்குறியது.

நல்ல இணையதளம் என்பது இப்படி தான் இருக்க வேண்டும் என இந்த தளம் சொல்லவும் வைக்கிறது.

ஐபோன் விலை அறியும் இணையதளம்: http://felipeschmitt.com/real-cost-of-an-iphone/

 

 

நன்றி; யுவர்ஸ்டோரி தமிழ் பதிப்பில் எழுதியது.

 

 

எந்திரன்களிடம் எப்படி பேச வேண்டும்?

 

maxresdefaultஎந்திரன் படத்தில் சந்தானமும், கர்ணாசும் சிட்டி ரோபோவிடம் இடக்காகவும், ஆபாசமாகவும் பேசி விட்டு அதற்காக நாயகன் ரஜினியிடன் வாங்கி கட்டிக்கொள்வது போல ஒரு காட்சி வரும். வெறும் நகைச்சுவை என்பதை மீறி இந்தக்காட்சி எதிர்காலத்தில் நினைவில் கொள்ள வேண்டிய செய்தியை கொண்டிருக்கிறது தெரியுமா? எந்திரன்களிடம் கன்ணியமாக நடந்து கொள்ள வேண்டும் என்பது தான் அந்த செய்தி. இல்லை எனில் விளைவுகள் விபரீதமாக இருக்கலாம். வேலையை இழக்கும் அபாயமும் ஏற்படலாம்!

உடனே எந்திரன் போன்ற சூப்பர் ரோபோ நடைமுறையில் இப்போதைக்கு சாத்தியமில்லையே என்று வாதாட  முற்பட வேண்டாம்.  இத்தகைய எந்திரன்கள் பழக்கத்திற்கு வர காலம் ஆகலாம் என்றாலும், நம்முடன் உரையாடல் நடத்தக்கூடிய, கேள்விகளுக்கு பதில் சொல்லகூடிய மென்பொருள் எந்திரன்கள் நிச்சயம் சர்வ சகஜமாக இருக்கும்.

இந்த போக்கு ஏற்கனவே துவங்கிவிட்டது. ஆப்பிளின் சிறியும், மைக்ரோசாப்டின் கார்ட்டனாவும், அமேசானின் அலெக்சாவும் இதற்கான உதாரணங்கள். அரட்டை இயந்திரங்கள் ( சாட் பாட்) என குறிப்பிடப்படும்  மென்பொருள்களில் இவை டிஜிட்டல் உதவியாளர்கள் எனும் பிரிவின் கீழ் வருகின்றன. போனுக்குள் வீற்றிருக்கும் உதவியாளர்கள். இந்த மென்பொருள்கள் அடிப்படையான செயற்கை அறிவை கொண்டிருப்பதோடு, எந்திர கற்றல் ஆற்றலையும் கொண்டுள்ளன. எனவே, இவை பயனாளின் கேள்விகளுக்கு பதில் அளித்து அவர்களுடன் உரையாடும் ஆற்றல் பெற்றிருப்பதோடு, காலப்போக்கில் பயனாளிகளின் விருப்பு வெறுப்புகளை புரிந்து கொண்டு, அதற்கேற்ப  பரிந்துரகளை வழங்க கூடியவையாக இருக்கும். உதாரணத்திற்கு, தொடர்ந்து இளையராஜா பாடல்களை விரும்பிக்கேட்டால், இந்த மென்பொருள்கள் அதை புரிந்து கொண்டு, ஓய்வு நேரத்தில் ராஜாவின் பாடலை ஒலிக்கச்செய்யலாம்.

கூகுளும் கூட இந்த பிரிவில் ஒரு மென்பொருளை பெற்றிருக்கிறது. பேஸ்புக்கும் இந்த பிரிவில் விஷேச கவனம் செலுத்தி வருகிறது. அதோடு  வாடிக்கையாளர் சேவையில் இருந்து, காப்பீடு அல்லது முதலீடு பரிந்துரை போன்றவற்றை மென்பொருள்கள்வழங்கத்துவங்கியிருக்கின்றன. வங்கிகள், இகாமர்ஸ் நிறுவனங்கள், வர்த்தக நிறுவனங்கள் இது போன்ற மென்பொருள் எந்திரன்களை பயன்படுத்த துவங்கியுள்ளன.

ஸ்டார்ட் அப் நிறுவனங்களும் கூட இத்தகைய எந்திரன்களை உருவாக்குவதில் ஆர்வம் காட்டி வருகின்றன. குறிப்பாக நிதிச்சேவை பிரிவில் பல வகையான அரட்டை மென்பொருள் எந்திரங்கள் உருவாக்கப்பட்டுள்ளன. ரோபோ அட்வைசர் என குறிப்பிடப்படும் இவை, கேள்விகளுக்கு முதலீட்டாளர்கள் அளிக்கும் பதில்களின் அடிப்படையில் அவர்களுக்கு ஏற்ற முதலீட்டு வாய்ப்புகளை பரிந்துரைக்கின்றன. நிதிச்சேவைகளுக்கான செலவை குறைக்கவும், அவற்றை பரவலாக்கவும் இந்த வகை ’பாட்க’ள் கைகொடுக்கும் என்று கருத்தும் உற்சாகமாக முன்வைக்கப்படுகிறது.

இவ்வளவு ஏன் செய்தி சேகரிப்புக்கு கூட இத்தகைய மென்பொருள்களை உருவாக்கி களமிறக்கலாம். அலுவலக பணிகளுக்கும் இவை உருவாக்கப்படலாம். இன்னும் பலவிதங்களில் இவற்றை பயன்படுத்தலாம். நாமும் கூட இவற்றை பலவிதங்களில் பயன்படுத்தலாம் என்பதையும் நினைவில் கொள்ளுங்கள். எனவே தான் நாம் இவற்றிடம் எப்படி நடந்து கொள்கிறோம் என்பதில் எச்சரிக்கையாக இருக்க வேண்டியது அவசியமாகிறது. இவற்றிடம் வாய்த்துடுக்கு காட்டுவதோ அல்லது வசை பாடுவதோ வில்லங்கமாக அமையலாம். இப்படி தான் ஹார்வர்டு பிஸ்னஸ் ரிவ்யூ கட்டுரை ஒன்று எச்சரிக்கிறது.

எல்லாம் சரி மென்பொருள்களிடம் நாம் ஏன் வாய் கொடுக்கப்போகிறோம் என்று கேட்பதற்கில்லை. ஏனெனில் ஏற்கனவே பலர் இதை தான் செய்து கொண்டிருக்கின்றனர். டிஜிட்டல் உதவியாளர் மென்பொருள்கள் அளிக்கும் பதில் திருப்தி அளிக்கவில்லை அல்லது ஏமாற்றம் தரும் விதமாக இருந்தால், அதன் பயனாளிகள் கடுப்பாகி கோபத்தை வார்த்தைகளாக வெளிப்படுத்துவது அடிக்கடி நடக்கவே செய்கிறது. ஆப்பிளின் சிறி மென்பொருள் மீதோ, மைக்ரோட்சாப்டின் கார்ட்டனா மென்பொருள் மீதோ பயனாளிகள் கோபம் கொண்டதற்கான எண்ணற்ற உதாரணங்கள் இருக்கின்றன. மேலும் தெளிவு தேவை எனில் இது தொடர்பாக கூகுளில் தேடிப்பாருங்கள்.

பொதுவாக டிஜிட்டல் உதவியாளர் மென்பொருள்கள் புத்திசாலித்தனமாக உருவாக்கப்பட்டிருந்தாலும் அவற்றில் போதாமைகள் அதிகம். இன்றைய வானிலை எப்படி இருக்கும் என்றோ, நகரில் குறிப்பிட்ட திரையரங்கில் என்ன திரைப்படம் பார்க்கலாம் என்றோ பொதுவாக கேட்டால் இவை சரியாக பதில் சொல்லிவிடும். ஆனால் குறிப்பிட்ட கேள்விகளுக்கு இவை சொதப்பிவிடலாம். இது போன்ற நேரங்களில் பலருக்கு சிரிப்பு வரலாம். இன்னும் சிலருக்கு கோபம் வரலாம். அதனால் ஆபாசமாக திட்டவும் செய்யலாம்.

மென்பொருள் தானே திட்டினால் என்ன ஆகிவிடும் என்றும் கேட்கத்தோன்றலாம். இந்த மென்பொருள்கள் உணர்வில்லாதவையாக இருக்கலாம், ஆனால் பதில் பேசாமல் இருக்கக்கூடியவை அல்ல. மோசமான வார்த்தைகள் பேசப்படும் போது, கொஞ்சம் பார்த்துப்பேசுங்கள் என்று இவை பதிலுக்கு சொல்லக்கூடும். ’ஒரு போன் நம்மை பார்த்து வாயை மூடச்சொல்கிறதே’ என இது போன்ற ஒரு சம்பவத்தை உதாரணம் காட்டுகிறது ’மெட்ரோ’ பத்திரிகை கட்டுரை.

பெரும்பாலான நவீன அரட்டை மென்பொருள்கள் பயனாளிகள் கேள்விகளுக்கு பதில் அளிப்பதோடு, அவர்கள் சொல்லும் வார்த்தைகளை புரிந்து கொள்ளும் தன்மையும் கொண்டிருக்கின்றன. அதாவது பயனாளிகள் நடவடிக்கையை பார்த்து அவையும் கற்றுக்கொண்டு தங்களை மேம்படுத்திக்கொள்கின்றன. ஆப்பிளின் சிறி மென்பொருள், ஆபாச வார்த்தைகள் இனங்கண்டு கொண்டு, கொஞ்சம் பார்த்து பேசுங்கள் என்று சொன்னது இப்படி தான்.

ஆக, நாம் விவாதிக்கும் விஷயத்திற்கு வந்துவிட்டோம். அரட்டை மென்பொருள்கள் பயனாளிகளுடனான உரையாடல் மூலம் கற்றுக்கொள்ளும் எந்திர கற்றல்( மிஷின் லேர்னிங்) ஆற்றலுடன் உருவாக்கப்பட்டிருப்பதால் அவை காலப்போக்கில் மேலும் மேலும் புத்திசாலி ஆகிவிடும் எனும் எதிர்பார்ப்பு இருக்கிறது. ஆக நாம் நல்லவிதமாக பேசினால் மென்பொருள்கள் அதற்கேற்ப கற்றுக்கொண்டு, அடுத்த முறை தொடர்புடைய கேள்விகள் வரும் போது பொருத்தமாக பதில் அளிக்கும். மாறாக அவற்றிடம் மோசமாக பேசினால் அவை தப்பும் தவறுமான விஷயங்கள் கற்றுக்கொள்ளும்.

மைரோசாப்ட் நிறுவனம் அறிமுகம் செய்த ’டே’ எனும் செயற்கை அறிவு சார்ந்த மென்பொருள், மற்றவர்களுடன் பேசத்துவங்கியவுடன், நாசிசம் பற்றி பேசவும், ஹிட்லர் நல்லவர் என கூறவும் கற்றுக்கொண்டுவிட்டது. இந்த சம்பவம் பெரும் சர்ச்சையை ஏற்படுத்தி இயந்திர கற்றலில் உள்ள சிக்கல்களை உணர்த்தியது. ஒரு சில விஷமத்தனமான பயனாளிகள் அதனிடம் விவகாரமான முறையில் உரையாடியதன் விளைவு இது.

இப்படி தான் பலரும், நடந்து கொள்வதாக டாக்டர்.ஷெரில் பிரானம் எனும் ஆய்வாளரும் கூறுகிறார். மென்பொருள்களுடனான மனிதர்கள் உரையாடல் பற்றி விரிவாக ஆய்வு நடத்தியிருக்கும் ஷெரில், 50 சதவீதம் வரையான இத்தகையை உரைடால்கள் அவதூறான வகையில் இருப்பதாக பேட்டி ஒன்றில் தெரிவித்துள்ளார். ஆக, மனிதர்களாகிய நம்முடைய நயத்தக்க நாகரீகம் இவ்வளவு தான். பாட்களிடம் பேசும் போது நம்மில் பலர், எந்திரன் சந்தானம் போலவே நடந்து கொள்ளும் வாய்ப்பிருக்கிறது.

ஆனால், இது பாட்களுக்கும் நல்லதல்ல. நமக்கும் நல்லதல்ல.

பாட்களுக்கு ஏன் நல்லதல்ல என எளிதாக புரிந்து கொள்ளலாம். நாம் வசைபாடினால் அவை நல்ல விஷயங்களை எப்படி கற்றுக்கொள்ள முடியும். சரி, இதனால் பயனாளிகளுக்கு என்ன பிரச்சனை? என்று கேட்கலாம்.

இந்த பாட் வகை மென்பொருள்கள் உருவாக்கத்திலும், ஆய்விலும் அமேசான், கூகுள் உள்ளிட்ட நிறுவனங்கள் பெரும் செல்வத்தையும், உழைப்பையும் முதலீடு செய்துள்ளன. இவற்றின் மீது மிகுந்த நம்பிக்கையும் வைத்துள்ளன. ஆகவே அவை தங்கள் மென்பொருள் படைப்புகள் பயனாளிகளால் மோசமாக நடத்தப்படுவதை விரும்பாது என்பதோடு இவ்வாறு நிகழ்வதை தவிர்க்கவே முயற்சிக்கும். அது மட்டும் அல்ல, மோசமாக நடத்தப்படும் போது அதை உணர்ந்து கொண்டு, புகார் செய்யவும் இவை புரோகிராம் செய்யப்படலாம் என்கிறது ஹார்வர்டு பிஸ்னஸ் ரிவ்யூ கட்டுரை.

நிறுவனங்களில் பலவிதமான பணிகளுக்கு டிஜிட்டல் உதவியாளர்கள் பயன்படுத்தப்படும் போது, பலரும் பழக்க தோஷத்தில் அவற்றை வசை பாடலாம், வம்புக்கு இழுக்கலாம், மோசமான வார்த்தைகளை பேசலாம். ஆனால் நிறுவனங்கள் இவற்றை பார்த்துக்கொண்டு சும்மா இருக்காது என்கிறது இந்தக்கட்டுரை. மோசமான உரையாடல்கள் தங்கள் மென்பொருள்களின் ஆற்றலை பாதிக்கும் என்பதால் நிறுவனங்கள் அவற்றிடம் தரக்குறைவாக நடந்து கொள்ளும் ஊழியர்களை கண்டறிந்து அவர்கள் மீது நடவடிக்கை எடுக்கும் வாய்ப்பு இருப்பதாக குறிப்பிடப்பட்டுள்ளது. விஷமத்தனம் கொண்ட ஊழியர்கள் பாட்களிடம் ஆபாசமாக பேசுவது தெரியவந்தால், மனிதவள அதிகாரியிடம் இருந்து அழைப்பு வந்து வேலையில் இருந்து நீக்கப்படலாம்.

எனவே தான் நாளைய அலுவலகங்களில் பாட்களிடம் மோசமாக நடந்து கொள்வது ஏற்றுக்கொள்ளப்படாத விஷயமாக இருக்கும் என்றும் இந்தக்கட்டுரையில் தெரிவிக்கப்பட்டுள்ளது. எனவே பாட்களிடம் எப்படி பேச வேண்டும் என நாம் கற்றுக்கொள்வதும் நல்லது தான்.

எச்.பி.ஆர் கட்டுரை: https://hbr.org/2016/10/why-you-shouldnt-swear-at-siri

மெட்ரோ செய்தி; http://metro.co.uk/2017/10/05/heres-what-happens-when-you-swear-at-or-insult-apples-siri-6942091/

 

நன்றி; யுவர்ஸ்டோரிக்காக எழுதியது

 

 

 

புதுமையான முறையில் தகவல் தரும் இனையதளம்

ageஉங்களுக்கு வயதாகி கொண்டிருக்கிறது என்பதை நினைவு படுத்துவது எல்லோருக்கும் பிடித்தமானதாக இருக்க வாய்ப்பில்லை. ஆனால் இதை மிகவும் சுவாரஸ்யமான வகையில் செய்கிறது யூஆர்கெட்டிங்ஓல்ட் இணையதளம்.
இந்த தளத்தில் பயனாளிகள் தங்கள் பிறந்த தேதி விவரத்தை சமர்பித்தால், அவருக்கு எத்தனை வயதாகிறது எனும் விவரத்தை இந்த தளம் அளிக்கிறது. இது என்ன பெரிய விஷயமா? வயது விவரம் தெரியாதா என்று கேட்கலாம். விஷயம் என்ன என்றால், பயனாளியின் வயதை வருடங்கள், மாதங்கள், நாட்கள் என துல்லியமாக தெரிவிப்பதோடு, தொடர்புடைய வேறு பல புள்ளிவிரங்களையும் முனவைத்து வியக்க வைக்கிறது.
பிரபலங்கள் சிலரின் வயதுடன் ஒப்பிடப்படுவதோடு, பயனாளியின் இதயத்துடிப்புகளின் எண்ணிக்கை, மூச்சுக்காற்றின் எண்ணிக்கை, அவர் பிறந்த போது பூமியில் உயிருடன் இருந்தவர்களின் எண்ணிக்கை என வரிசையாக தகவல்கள் இடம்பெறுகின்றன. கடந்த காலங்களில் நிகழ்ந்த முக்கிய நிகழ்வுகளும் பட்டியலிடப்படுகின்றன. உங்கள் சிறு வயதில் நடந்தவை, இளமை காலத்தில் நடந்தவை என இந்த நிகழ்வுகளை பார்க்கலாம். உங்களை முன்வைத்து பயனுள்ள தகவல்களை தெரிந்து கொள்ள சுவாரஸ்யமான வழியாக இந்த தளம் அமைகிறது.

இணையதள முகவரி: http://you.regettingold.com/

செயலி புதிது: பழைய ஒளிப்படங்களை பாதுகாக்க!

photoscan-adjustஸ்மார்ட்போன் யுகத்தில் ஒளிப்படங்களை எடுப்பதும், பகிர்ந்து கொள்வதும் எளிதாக இருக்கிறது. எல்லாம் சரி, பழைய காலத்தில் எடுத்த ஒளிப்படங்களை என்ன செய்வது? அவற்றை டிஜிட்டல் வடிவில் பாதுகாப்பது தானே சரியாக இருக்கும். இதற்காக பழைய ஒளிப்படங்களை ஸ்கேன் செய்து டிஜிட்டல் வடிவிற்கு மாற்றலாம். ஆனால் இதற்கு கொஞ்சம் மெனக்கெட வேண்டும். இந்த பணியை எளிதாக நிறைவேற்றிக்கொள்ள கூகுள் புதிதாக ஒரு செயலியை அறிமுகம் செய்துள்ளது.
போட்டோஸ்கேன் எனும் அந்த செயலி மூலம் ஒருவர் தன்னிடம் உள்ள ஒளிப்படங்களை எளிதாக ஸ்கேன் செய்து கொள்ளலாம். இந்த செயலியை திறந்து, வீட்டில் ஆல்பத்தில் உள்ள ஒளிப்படங்களை படம் பிடிக்கத்துவங்க வேண்டும். உடனே போன் திரையில் நான்கு வட்டங்கள் தோன்றும். நடுவே ஒரு வட்டம் இருக்கும். நான்கு வட்டங்களும் நடு வட்டத்தில் வரும் வகையில் செய்ய வேண்டும். அதன் பிறகு அந்த படம் முழுவதும் ஸ்கேன் ஆகிவிடும். அவற்றில் உங்களுக்கு தேவையான படத்தை சேமித்துக்கொள்ளலாம். இதன் மூலம் பழைய படங்களை எளிதாக டிஜிட்டல்மயமாக்கி விடலாம்.
ஆண்ட்ராய்டு மற்றும் ஐபோன் இரண்டிலும் செயல்படுகிறது.

மேலும் விவரங்களுக்கு:https://support.google.com/photos/answer/7177983?visit_id=0-636153165166706948-363832123&p=scan_help&rd=1

இது ஆப்பிளின் ஸ்மார்ட் கண்ணாடி

apple-mirrorஸ்மார்ட்போன்கள் வரிசையில் ’ஸ்மார்ட் கண்ணாடிகள்’ உருவாகத்துவங்கியிருப்பது உங்களுக்குத்தெரியுமா? சந்தேகம் எனில் இணையத்தில் ஸ்மார்ட் கண்ணாடிகள் என ஆங்கிலத்தில் தேடிப்பாருங்கள், வரிசையாக ஆண்ட்ராய்டு கண்ணாடிகள் தொடர்பான முடிவுகளாக வந்து நிற்கும். எல்லாமே வழக்கமான முகம் பார்க்கும் கண்ணாடியை ராஸ்ப்பெரி பை போன்ற சின்ன கம்ப்யூட்டர்கள் மற்றும் ஆண்ட்ராய்டு இடைமுகத்தை கொண்டு ஸ்மார்ட் கண்ணாடியாக மாற்றி இருப்பவை. இந்த ஸ்மார்ட் கண்ணாடிகளில் நேரம் பார்க்கலாம், வானிலை அறியலாம். இன்னும் பலவற்றை செய்யலாம்.
இப்போது இந்த வரிசையில் ஆப்பிள் கண்ணாடியும் அறிமுகமாகி உள்ளது. ஆனால் ஒன்று, இந்த கண்ணாடி ஆப்பிள் நிறுவனத்தின் தயாரிப்பு அல்ல. ஆப்பிளின் சமீபத்திய ஐஓஎஸ் 10 இடைமுகத்தை கொண்டு ரபேல் டைமெக் என்பவர் உருவாக்கிய ஸ்மார்ட் முகம் பார்க்கும் கண்ணாடி.
பெரிய அளவிலான ஐபோன் அல்லது ஐபேடு தோற்றம் தரும் இந்த கண்ணாடியில் இரு பக்கமும் ஐபோனில் பார்க்க கூடிய ஐகான்கள் பலவற்றை பார்க்கலாம். அந்த ஐகான்களை தொட்டு இயக்கவும் செய்யலாம். இந்த ஐகான்கள் மூலம் உபெர் சேவையை அழைக்கலாம். நெட்பிளக்சில் படம் பார்க்கலாம். பேஸ்புக் பதிவுகளுக்கு பதில் போடலாம், குறுஞ்செய்திகளை படிக்கலாம். செய்திகளை அறியலாம், வீட்டில் உள்ள பொருட்களையும் இயக்கலாம்.
கொஞ்சம் நேரம் பயன்படுத்தாமல் விட்டால், கண்ணாடி தூங்கப்போய்விடும். அதாவது ஐகான்கள் எல்லாம் மறைந்து சாதாரண கண்ணாடியாகிவிடும். ஆனால் மறுபடியும் கண்ணாடியில் தொட்டால் போதும் எல்லா ஐகான்களும் மீண்டும் உயிர்பெற்றுவிடும். ஐகான்களை இஷ்டம் போல இடம் மாற்றிக்கொள்ளலாம்.
வடிவமைப்பாளாரான ரபேல் சொந்த ஆர்வத்தில் இந்த ஸ்மார்ட் கண்ணாடியை உருவாக்கி இருக்கிறார். இது வர்த்தக நோக்கிலானது அல்லம் தனிப்பட்ட திட்டம் என்று அவர் கூறுகிறார். இந்த கண்ணாடி பற்றி மேலும் அறிய:http://www.rafaeldymek.com/

ஸ்கைப் சேவையில் புதிய வசதி

ஸ்கைப் சேவைக்கான புதிய வசதியை மைக்ரோசாப்ட் அறிமுகம் செய்துள்ளது. இந்த புதிய வசதி மூலம் ஸ்கைப் சேவையில் உறுப்பினராக பதிவு செய்யாமலேயே அதை பயன்படுத்தி இணையம் முலம் உரையாடலாம். ஸ்கைப் இணையதளம் மூலம் இந்த வசதியை அணுகலாம். உடனே பிரத்யேகமான இணைய முகவரி ஒன்று அளிக்கப்படும். இதை யாருடன் வேண்டுமானாலும் பகிர்ந்து கொண்டு ஸ்கைப் மூலம் உரையாடலாம்.
இதன் மூலம் ஸ்கைப் விருந்தாளியாக ஸ்கைப் பயனாளிகளுடன் உரையாடலாம். ஆனால் இந்த முகவரி 24 மணி நேரம் தான் இருக்கும். டெக்ஸ் சாட், குரல் வழி உரையாடல், வீடியோ சேவை என எல்லாவற்றையும் பயன்படுத்தலாம். ஸ்கைப் திரை மற்றும் கோப்பு பகிர்வு வசதியையும் அணுக முடியும். எனினும் தொலைபேசி எண்களை அழைத்து பேச முடியாது.

தானியங்கி கார்களின் எதிர்காலம் எப்படி இருக்கும்?

3060466-inline-3-how-self-driving-cars-could-reshape-city-streetsதானியங்கி கார்களுக்கு நிங்கள் தாயரா? இதுவரை இல்லை எனில், இப்போது முதல் தயாராகி கொள்வது நல்லது. ஏன்? எதற்காக? பார்க்கலாம்…

தானாக ஓடும் கார்கள் எனும் பொருளில் ஓட்டுனர் இல்லாமல், பென்பொருள் வழிகாட்டுதலில், சென்சார்ஸ்கள் புன்னியத்தில் தானாக இயங்குவதை குறிக்கும் தானியங்கி கார்கள் முயற்சி பற்றி நீங்கள் நிச்சயம் அறிந்திருக்கலாம். கூகுள் உள்ளிட்ட பல நிறுவனங்கள் இதற்கான ஆய்வு முயற்சியில் ஈடுபட்டுள்ளன. தானியங்கி கார் என்பது கருத்தாக்க நிலையில் இருந்து முன்னேறி வந்து இப்போது ஆய்வுகளும், வெள்ளோட்ட பரிசோதனைகளும் தீவிரமாகி இருக்கின்றன.

இந்த கார்கள் சாலையில் விபத்துகளை குறைக்கும், தனிநபர் போக்குவரத்தை மட்டும் அல்லாமல், பொதுப்போக்குவரத்தையும் தலைகீழாக மாற்றிவிடும் எனும் ரீதியில் வல்லுனர்களின் கருத்துக்களை அமைந்துள்ளன. ஓட்டுனர் தேவையில்லாத காரில் சாலைக்கு முன்னே கவனம் செல்த்தாமல் புத்தகம் படித்தபடியோ அல்லது சாலையோரத்தில் விரியும் காட்சிகளிலோ லயித்தபடி செல்லக்கூடிய வாய்ப்பை நினைத்துப்பாருங்கள்.

சவால்கள்
ஆனால், தானியங்கி கார்கள் ஓட்டுனர்களுக்கு விடை கொடுக்கும் நிலையை அடைவதற்கு முன்னர் பல முக்கிய சவால்களையும், பரீட்சைகளையும் சந்தித்துக்கொண்டிருக்கின்றன. குறுக்கே வந்து விழும் மனிதர்களையும், எதிர்பாராமல் வந்து நிற்கும் விலங்குகளையும் அவற்றால் சமாளிக்க முடியுமா? போன்ற தொழில்நுட்ப நோக்கிலான கேள்விகளோடு, உள்ளே அமர்ந்திருப்பவர்களை காப்பாற்றுவதா? அல்லது நடைபாதையில் நின்றிருப்பவர்கள் உயிரை காப்பாற்றுவதா? என முடிவெடுக்க வேண்டி வரக்கூடிய நெருக்கடியாக சூழல்களில் இவை என்ன செய்யும்? என்பது போன்ற அறம் சார்ந்த கேள்விகளும் முன்வைக்கப்படுகின்றன. இன்னும் எண்ணற்ற கேள்விகளை எதிர்கொண்ட படியே தான் ஆய்வு முயற்சிகள் நடக்கின்றன.

தானியங்கி கார்கள் சாலைக்கு வந்து சேரும் முன், இன்னும் பல சுற்று சோதனைகளை கடந்தாக வேண்டும். அப்படியிருக்க தானியங்கி கார்களுக்கு நாம் தயாரா? என கேப்டதைவிட, தானியங்கி கார்கள் தயாராக இருக்கின்றவா? என கேப்டதே சரியாக இருக்கும் என பலரும் நினைக்கலாம்.

ஆனால், நடைமுறையில் இந்த கார்கள் பழக்கத்திற்கு வருவது என்பது எதிர்பார்ப்பதை விட விரைவாக நிகழ்ந்தாலும் சரி அல்லது மேலும் தள்ளிப்போனாலும், இனி வருங்காலம் தானியங்கி கார்களுக்கானது என்பது நிச்சயமாகி இருக்கிறது. பல்வேறு துறையை சேர்ந்தவர்கள் இந்த கருத்தாக்கத்தை உள்வாங்கிக்கொண்டு, தானியங்கி கார்களால் ஏற்படக்கூடிய மாற்றங்களையும், தாக்கத்தையும் எதிர்கொள்வது எப்படி என சிந்திக்கத்துவங்கியிருப்பதன் மூலம் இதை உணர முடிகிறது. ஒரு அழகான உதாரணமாக பென்சா எனும் வடிவமைப்பு நிறுவனம் முன்வைத்துள்ள எதிர்கால நகரங்களுக்கான வரைவு திட்டத்தை எடுத்துக்கொள்வோம். அமெரிக்காவின் நியூயார்க்கைச்சேர்ந்த இந்த வடிவமைப்பு ஆலோசனை நிறுவனம் மூன்றாம் இடம் எனும் தலைப்பில் இதற்கான வரைவை வெளியிட்டுள்ளது.

சாத்தியங்கள்
வருங்கால நகரங்கள் எப்படி இருக்கும் என கற்பனை செய்துள்ள இந்த வரைவு திட்டம் நம்ப முடியாத பல வருங்கால மாயங்களை விவரிக்கிறது. அவற்றில் ஒன்று, தானியங்கி கார்கள் சாலைப்போக்குவரத்தை மட்டும் அல்ல, நடைபாதைகளையும் மாற்றிவிடும் என்பதாக இருக்கிறது. எப்படி என்றால், தானியங்கி கார்கள் புழக்கத்திற்கு வருவதால் ஏற்படக்கூடிய பிரதான நன்மை பார்கிங் இடத்திற்கான தேவை குறைவது தான். இந்த கார்களுக்கான செயல்பாட்டு விதிகள் முற்றிலும் வேறாக இருக்கும் என்பதால் வழக்கமான கார்கள் போல இவற்றை நிறுத்தி வைக்க வீட்டிலும் வெளியேவும் இடம் தேவை வேண்டியிருக்காது. ஆகவே பார்கிங்கிற்கு என ஒதுக்கப்படும் இடம் விடுவிக்கப்பட்டு மற்ற தேவைகளுக்காக பயன்படுத்திக்கொள்வது சாத்தியமாகும். சதுர அடி நிலம் கூட குதிரை கொம்பாக இருக்கும் நகரங்களில் இப்படி விடுவிக்கப்படும் இடம்பகுதி நகர திட்டமிடலுக்கு பெரும் வரப்பிரசாதமாக அமையும்.
imrs.php
இந்த அம்சம் குறைந்த விலை வீடுகளை கட்டுவதை சாத்தியமாக்கும் என சுட்டிக்காட்டும் பென்சாவின் வரைவு, இன்னொரு முக்கிய மாற்றத்தையும் குறிப்பிடுகிறது. தொழில்நுட்பத்தின் விளைவாக ஏற்கனவே அலுவலக சூழலின் வரம்பும், வரையறையும் கரையத்துவங்கியுள்ளது. இப்போது அலுவலக பணியை வீட்டில் இருந்தே கவனிக்கலாம். எங்கோ ஒரு காபி கடையில் இருந்தும் கவனிக்கலாம். இனி வரும் காலத்தில் காரில் இருந்த படியேவும் கவனிக்கலாம். ஆம், காரோட்டும் கவலை நமக்கிருக்காது என்பதால் பின் சீட்டில் ஏறி அமர்ந்து கொண்டு லேப்டாப்பில் அலுவலக பணியில் மூழ்கி விடலாம். ஆக அலுவலக சூழலுக்கான எல்லைகள் மேலும் நீர்த்துப்போகக்கூடிய நிலையில், கட்டிடங்களுக்கும் சாலைகளுக்கும் இடையிலான வெளியின் தன்மையும் மாறும் என்கிறது இந்த வரைவு.

நடைபாதை மாற்றம்
தானியங்கி கார்கள் மின்சக்தியால் இயங்க கூடியதாக இருக்கும். விபத்தை ஏற்படுத்தாது. சத்தமும் போடாது. எனவே இந்த காரை அழைப்பதற்கான விசையை அழுத்திவிட்டு, அவை வந்து சேரும் வரை நடைபாதையிலே காத்திருக்கலாம். வாகங்கள் மோதிவிடும் என்ற அச்சம் இல்லாமல், இறைச்சலும் இல்லாத சூழலில் நின்று கொண்டிருக்கும் போது, இந்த வெளி உட்கார்ந்து கொள்ளவும் ஏற்றதாக இருக்காதா? என்று இந்த வரைவு கேட்கிறது. நடைபாதைகள் மீதான நெருக்கடி குறையும் சூழலில் அவற்றை சந்திக்கும் இடங்களாகவும், காபி மையங்களாகவும் மாற்றிக்கொள்ளலாம் எனும் விதமாக இதற்கான பதில் விரிகிறது.
இந்த எண்ணங்களின் அடிப்படையில் பென்சாவின் எதிர்கால நகரத்துக்கான சித்திரம் அமைகிறது. இது பற்றிய பாஸ்ட்கோடிசைன் இணையதள கட்டுரை : https://www.fastcodesign.com/3060466/self-driving-cars-could-revolutionize-our-sidewalks-too

இதே போல, வாஷிங்டன் போஸ்ட் நாளிதழில், மூத்த குடிமகன்களுக்கு தானியங்கி கார்கள் வரப்பிரசாதமாக இருக்கும் என்று வயதானவர்களின் சார்பில் ஜே மேத்யூஸ் எனும் பத்திரிகையாளர் விவரித்துள்ளார். வயதானவர்களுக்கு கார் ஓட்டுவதில் உள்ள சங்கடங்களையும், சவால்களையும் தானியங்கி கார்கள் போக்கி போக்குவரத்தை எளிதாக்கும் என்று அவர் சந்தோஷப்படுகிறார்:https://www.washingtonpost.com/opinions/a-self-driving-car-will-be-my-godsend/2016/06/03/57da67a4-2028-11e6-8690-f14ca9de2972_story.html

நாம் தயாரா?
இதே நாளிதழில் வெளியான மற்றொரு கட்டுரை கார்கள் மட்டும் அல்ல, டிரக்குகளும் தானியங்கி மயமாகும் என்கிறது. இதனால் டிரக் டிரைவர்கள் வேலை இழக்கும் சூழல் உருவானாலும், டிரக்குகள் மூலம் செய்யப்படும் அனைத்து பணிகளும் தானியங்கி மயமாக்கபடலாம். சரக்குகளை ஏற்றி, இறக்குவதை பொருட்களை டெலிவரி செய்வதை ரோபோக்களே செய்யத்துவங்கலாம். இதற்கேற்ப வீடுகள் மற்றும் அலுவலகங்களிலும் பொருட்களை பெற்றுக்கொள்வதற்கு மற்றும் பதில் அளிப்பதற்கான தானியங்கி அமைப்புகள் உருவாகலாம். இத்தகைய இயந்திர ஒழுங்கின் பயனாக, நாமும் கூட பொருட்களை வாங்கி இருப்பு வைத்துக்கொள்ளும் மனநிலையில் இருந்து விடுபட்டு,தேவைப்படும் போது ஆர்டர் செய்து கொள்ளும் நிலை வரலாம்.
இப்படி பல எதிர்கால சாத்தியங்களை விவரிக்கிறது அந்தக்கட்டுரை.

ஆக, தானியங்கி கார்கள் சாத்தியமாகும் போது அவை பணியிடம் முதல் கலாச்சாரம் வரை எல்லாவற்றையும் அடியோடு மாற்றும் வாய்ப்பு இருப்பதால் நாமும் அவற்றுக்கு ஏற்ப தயாராவது தான் முறை. மற்றத்தையும், தாக்கத்தையும் மனதில் கொள்வதோடு, அவற்றோடு வரக்கூடிய புதிய வாய்ப்புகளையும் கருத்தில் கொண்டு நாமும் செயல்பட்டால், புதிய சேவைகளும், தீர்வுகளும் சாத்தியமாகும். நாம் தயாராக இருக்கிறோமா!

நன்றி; தமிழ் இந்துவில் எழுதியது.

வாட்ஸ் அப் புதிய வசதியும் என்கிரிப்ஷன் விவாதமும்!

encrpஇணைய உலகம் என்கிரிப்ஷனை நோக்கி முன்னேறிக்கொண்டிருக்கிறது தெரியுமா? இணையமும் அது சார்ந்த தொழில்நுட்ப சேவைகளும் எந்த அளவு விரைவாகவும், முழுமையாகவும் என்கிரிப்ஷன் மயமாகிறதோ அந்த அளவுக்கு நல்லது என்கின்றனர் தனியுரிமை ஆர்வலர்கள். இணைய பாதுகாப்பிற்கும் இது அவசியம் என்கிறனர்.

என்கிரிப்ஷன் என்றால் ஏதோ புரியாத விஷயமாக இருக்கிறதே என குழப்பம் ஏற்படலாம். மறையாக்கம் அல்லது குறியாக்கம் என தமிழில் குறிப்பிடப்படும் என்கிரிப்ஷன் தொடர்பான தொழில்நுட்ப விளக்கம் சிக்கலானது என்றாலும், ஒரு தகவலை அதற்கு உரியவர் தவிர வேறு யாரும் தெரிந்து கொள்ள முடியாத வகையில் அதனை மறைபொருளாக அனுப்பி வைக்கும் சங்கேத முறையாக இதை புரிந்து கொள்ளலாம். பொதுவாக ராணுவம் போன்ற அமைப்புகளால் பாதுகாப்பான தகவல் பரிமாற்றத்திற்காக பயன்பட்டு வந்த இந்த நுட்பம் இணைய யுகத்தில் பல்வேறு பரிமாணங்களை பெற்றிருக்கிறது.

வாட்ஸ் அப் பாதுகாப்பு

இவற்றில் ஒரு வகையான பாதுகாப்பு அம்சத்தை தான் பிரபல சமூக வலைப்பின்னல் செயலியான வாட்ஸ் அப் அன்மையில் அறிமுகம் செய்துள்ளது. எண்டு டு எண்ட் என்கிர்ப்ஷன் என குறிப்பிடப்படும் இந்த வசதியால் வாட்ஸ் அப் மூலம் பகிரப்படும் செய்திகள் அனைத்தும் முன்பு இருந்ததைவிட பாதுகாப்பு மிக்கவையாகி இருக்கின்றன. இதன் மூலம் வாட்ஸ் அப் சேவையில் பகிரப்படும் தகவல்கள், படங்கள் ,வீடியோக்கள் போன்றவை அனி மூன்றாம் நபர்களால் அணுக முடியாதவையாகி இருக்கின்றன. இதன் பொருள் வாட்ஸ் அப்பில் ஒரு செய்தி அனுப்பி வைத்தால் அதற்குறியவர் மட்டும் அதை படிக்க முடியும். மற்றவர்களுக்கு அந்த தகவல் கலைத்து போடப்பட்ட அர்த்தம் கொள்ள முடியாத குறியீடுகளாகவே தோன்றும்.

அதாவது செய்திகள் அல்லது தகவல்கள் அனைத்திற்கும் பூட்டு சாவிகள் உருவாக்கப்பட்டிருக்கும். சாவி இல்லாத எவரும் பூட்டை திறக்க முடியாது. இதற்கான சாவிகள் , செய்திக்கு உரியவர் சாதனத்தில் இயக்கப்பட்டு அவரால் இயல்பாக படிக்க முடியும்.

பூட்டும் சாவியும்
ஆக, வாட்ஸ் அப்பில் சைபர் குற்றவாளிகள் கைவரிசை காட்டுவதோ, அல்லது தனியுரிமை மீறல்கள் நிகழ்வதோ சாத்தியமில்லை. இவ்வளவு ஏன் சர்வாதிகார அரசுகள் தகவல் பரிமாற்றத்தை உளவு பார்ப்பதும் சாத்தியமில்லை. தாக்காளர்களும் உள்ளே நுழைய முடியாது. இவ்வளவு ஏன் வாட்ஸ் அப் செயலியே நினைத்தாலும் இது சாத்தியமில்லை. பயனாளிகள் பரிமாறிக்கொள்ளும் செய்தி அந்த அளவுக்கு பாதுகாப்பாக இருக்கும்.

கடந்த ஏப்ரல் 8 ம் தேதி அறிமுகம் செய்யப்பட்டுள்ள இந்த வசதியை பயன்படுத்த வாட்ஸ் அப்பின் சமீபத்திய வர்ஷெனை தரவிறக்கம் செய்வதை தவிர வேறு ஒன்றுமே தேவையில்லை. புதிய வர்ஷனில் இந்த வசதி தானாக செயல்படும். ஆனால் பயனாளிகள் விரும்பினால் தங்கள் அனுப்பும் செய்திகளில் இந்த வசதி இருக்கிறதா? என்பதை உறுதி செய்து கொள்ள முடியும். செய்தியின் மீது டேப் செய்தால்,ஆரம்பம் முதல் முடிவு வரை என்கிரிப்ட் செய்யப்பட்டுள்ளது என்ற தகவல் வரும். அதோடு கியூ.ஆர் கோட் மற்றும் 60 இலக்க எண்ணையும் பயனாளிகள் பார்க்கலாம். நீங்கள் தொடர்பு கொள்ளும் நபரும் இந்த கியூஆர் கோடை ஸ்கேன் செய்து பார்க்கலாம் அல்லது 60 இலக்க எண்ணை ஒப்பிட்டு பார்த்துக்கொள்ளலாம்.

நாம் அனுப்பி வைக்கும் மொக்கை செய்திகளுக்கு எல்லாம் இத்தனை பாதுகாப்பு தேவையா என நீங்கள் அப்பாவித்தனமாக நினைக்கலாம். விஷயம் ஒருவர் அனுப்பும் செய்தியின் உள்ளடக்கம் பற்றியதல்ல; மாறாக எந்த உள்ளடக்கமாக இருந்தாலும் அது பாதுகாப்பானதாக இருக்க வேண்டும் எனும் அடிப்படை கோட்பாடு சார்ந்தது.

இந்த யுகத்தின் தேவை
இணைய யுகத்தின் தேவை இது. கடிதம் அனுப்புவது பழங்கால சங்கதியாகி இருக்கலாம். ஆனால் கடிதம் அனுப்புவதில் இருந்த பாதுகாப்பு நொடியில் பறக்கும் இமெயிலில் இல்லை என்பதை நீங்கள் அறிந்திருக்கலாம். ஒருவருக்கு அனுப்பபட்ட கடிதத்தை அதை பெறுபவர் தவிர இடையே யாரும் படிக்க முடியாது. ஆனால் இன்று இமெயிலை விஷமிகள் இடையே ஹேக் செய்யலாம். சைபர் குற்றவாளிகள் உள்ளே புகுந்து தகவல்களை திருடலாம். உளவு அமைப்புகள் கண்காணிக்கலாம். இன்னும் என்னனவோ நடக்கலாம்.

இமெயிலுக்கு மட்டும் அல்ல, இணையம் மூலமான எல்லா பரிமாற்றங்களுக்கும் இது பொருந்தும்.
ஆக இணைய யுகத்தில் தனிநபர்களின் தகவல் பரிமாற்றம் பல மட்டங்களில் ஊடுருவப்படும் அபாயம் இருப்பதால் தனியுரிமை பாதுகாப்பு என்பது மிகப்பெரிய அச்சுறுத்தலுக்கு உள்ளாகியிருப்பதாக கருதப்படுகிறது.
இதற்கு மாற்று வைத்தியமாக தான் எல்லாவற்றையும் என்கிரிப்ட் செய்ய வேண்டும் என்கிறனர்.

இணையதளங்களுக்கு இந்த வகை பாதுகாப்பு எச்டிடிபிஎஸ் எனும் வடிவில் முன்வைக்கப்படுகிறது. இந்த வகை பாதுக்காப்பிற்காக இணையதளங்கள் சான்றிதழ் பெற வேண்டும் என வலியுறுத்தப்படுகிறது. இணையவாசிகளின் தனியுரிமை நலனுக்காக பாடுபட்டு வரும் மின்னணு எல்லை அமைப்பு (Electronic Frontier Foundation ) இணையத்தை எச்டிடிபிஎஸ் மயமாக்குவோம் (HTTPS Everywhere ) எனும் விழிப்புணர்வு திட்டத்தையும் செயல்படுத்தி வருகிறது.

எங்கும் என்கிர்ப்ஷன்
வலைப்பதிவு சேவையான வேர்ட்பிரசும் தனது தளங்களுக்கு இந்த பாதுகாப்பை அளிக்கத்துவங்கியிருக்கிறது.
செயலிகள் வழியில் பரிமாறப்படும் செய்திகளுக்கும் இத்தகைய பாதுகாப்பு வசதி தேவை என வலியுறுத்தப்பட்டு வருகிறது. இந்த பின்னணியில் தான் பேஸ்புக் நிறுவனத்திற்கு சொந்தமான வாட்ஸ் அப் சேவையிலும் என்கிரிப்ஷன் வசதி அறிமுகம் செய்யப்பட்டுள்ளது.

வாட்ஸ் அப்பின் இந்த செயல் பரவலாக வரவேற்கப்பட்டாலும், இந்த வசதிக்கு பின்னே உள்ள பாதுகாப்பு நிரலை முழுவதும் திறவு மூல தன்மை கொண்டதாக செய்யவில்லை எனும் புகார் மட்டும் இருக்கிறது.
இதனிடயே வாட்ஸ் அப் பயன்படுத்தும் சைபர் பூட்டின் 265 பிட் தன்மை காரணமாக இது இந்தியாவில் சட்டவிரோதமானதா எனும் கேள்வியும் எழுந்துள்ளது.

ஆனால் இவற்றை எல்லாம் விட முக்கியமான விஷயம், இந்த வசதியின் இன்னொரு பக்கம் தொடர்பான விவாதமாக இருக்கிறது. சாமானியர்களுக்கு இந்த வசதி பயன்படுகிறதோ இல்லையோ, சைபர் திருடர்களுக்கும், தீவிரவாதிகளுக்கும் இது பெரிதும் பயன்படலாம் என்ற அச்சம் அரசு அமைப்புகளுக்கு இருக்கிறது. ஏற்கனவே தீவிரவாதிகளும், இன்னும் பிற விஷமிகளும் ரகசிய தகவல் தொடர்பிற்கு இணைய வசதியை கச்சிதமாக பயன்படுத்தி வருகின்றனர். இந்நிலையில் பூட்டு போடப்பட்ட தகபல் பரிமாற்றம் குற்றவாளிகளுக்கு மேலும் அணுகூலமாகிவிடாதா? என்ற கேள்வி எழுந்துள்ளது.

உளவு பார்ப்பதற்கு எதிரான தனியுரிமை பாதுகாப்பு அவசியம் என்றாலும், முக்கிய விசாரணையின் போது சந்தேகிக்கப்படும் குற்றவாளிகளின் தகவல் பரிமாற்றத்தை அரசு அமைப்புகளால் அணுக முடியாமல் ஆகிவிடுமே என்ற கவலையும் இருக்கிறது.

ஆப்பிள் -எப்பிஐ மோதல்
அன்மையில் ஆப்பிள் நிறுவனத்திற்கும் ,புலனாய்வு அமைப்பான எப்பிஐக்கும் இடையே நடைபெற்ற மோதலை இந்த இடத்தில் பொருத்திப் பார்ப்பது சரியாக இருக்கும்.

ஆப்பிளின் ஐபோன் உள்ளிட்ட சாதனங்கள் விலை அதிகம் கொண்டவையாக கருதப்படுபது போலவே பாதுகாப்பு விஷயத்திலும் பக்காவானவை. ஐபோனில் பரிமாறிக்கொள்ளப்படும் தகவல்கள் வேறு நபர்களால் ஊடுருவப்பட முடியாதவை. ஆப்பிள் நிறுவனமே கூட அவற்றை இடைமறிக்க முடியாது.

ஆண்ட்ராய்ட் போன்களில் இந்த அளவு பாதுகாப்பு இல்லை. ஆண்ட்ராய்டு இயங்குதளம் பல உற்பத்தியாளர்களால் பயன்படுத்தப்படுவதால் அதில் பாதுகாப்பு அம்சத்தை அமல் செய்வதில் நடைமுறை சிக்கல் இருக்கிறது. இந்த ஒப்பீடு தகவலுக்காக தானே தவிர மதிபீடல்ல.

நிற்க, அமெரிக்காவில் சில மாதங்களுக்கு முன் சான்பெர்னார்டினோவில் கண்மூடித்தனமான துப்பாக்கி சூடு நடைபெற்ற சம்பவத்தில் ஈடுபட்ட குற்றவாளி பயன்படுத்திய ஐபோன் எப்பிஐ க்கு கிடைத்தது. ஆனால் அதில் உள்ள தகவல்களின் என்கிரிப்ஷன் பூட்டை உடைத்து உள்ளே செல்ல முடியவில்லை. இது தொடர்பாக மாற்று சாவியை கொடுத்து உதவுமாறு எப்பிஐ விடுத்த வேண்டுகாளை ஆப்பிள் நிறுவனம் நிராகரித்துவிட்டது.
பயனாளிகளின் தகவல் பரிமாற்றம் பாதுகாப்பானதாக இருக்க வேண்டும் என்பதை உறுதி செய்யும் இந்த வசதியை ஊடுருவ அனுமதிக்க முடியாது என ஆப்பிள் உறுதியாக கூறிவிட்டது. பயனாளிகளின் தனியுர்மையை இது பாதுக்கும் என்று நீதிமன்றம் வரை ஆப்பிள் இதில் உறுதியாக நின்றது.

தனியுரிமை விவாதம் !
இந்த பிரச்சனை பொது நலன் மற்றும் தனியுரிமை இடையிலான விவாதமாகவும் உருவாகி இருக்கிறது. என்கிரிப்ஷன் தொடர்பான சட்ட வடிவம் கொண்டு வருவது பற்றியும் அமெரிக்காவில் பேசப்பட்டு வருகிறது.
ஆனால் தனியுரிமை காவலர்கள் என்கிரிப்ஷன் பாதுகாப்பின் அவசியத்தில் அதைவிட உறுதியாக இருக்கின்றனர்.என்கிரிப்ஷன் பாதுகாப்பில் ஓட்டகளை ஏற்படுத்துவது அல்லது பின் பக்க கதவை வைப்பது இணையவாசிகளின் தனியுமைக்கு வேட்டு வைக்கும் செயலாகிவிடும் என்று எச்சரிக்கின்றனர்.

இந்த பின்னணியில் தான் வாட்ஸ் அப் பாதுகாப்பு வசதியை பார்க்க வேண்டும். அதோடு இதை ஒரு வாய்ப்பாக வைத்துக்கொண்டு இணையத்தில் பாதுகாப்பின் நிலை மற்றும் அதற்கான தேவையையும் புரிந்து கொள்ள முற்பட வேண்டும். நம் காலத்து நிர்பந்தம் இது!

இணையத்தில் தனியுரிமை பாதுகாப்பு தொடர்பான தகவலுக்கு; https://www.eff.org/encrypt-the-web

—-

நன்றி; தமிழ் இந்துவில் எழுதியது.