Tag Archives: friends

பேஸ்புக் நட்பு இலக்கணம்

People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images
People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images

திருவிளையாடல் திரைப்படத்தின் சிவபெருமான் –புலவர் தருமி உரையாடலை இணைய யுகத்திற்கு ஏற்ப அப்டேட் செய்ய வேண்டும் எனில், பேஸ்புக்கில் செய்யக்கூடிவையும், செய்யக்கூடாதவையும் என தருமி கேட்பதாக சேர்த்துக்கொள்ளலாம். அந்த அளவுக்கு பேஸ்புக் பயன்பாட்டில் கவனம் கொள்ள வேண்டிய விஷயங்கள் இருக்கின்றன. புதிய நட்பை தேடிக்கொள்ளவும், நண்பர்களோடு உரையாடவும் பேஸ்புக் அருமையான வழி தான். ஆனால் பேஸ்புக்கில் பகிரும் தகவல்கள் நட்பையும், விருப்பங்களையும் (லைக்ஸ்) மட்டும் பெற்றுத்தருவதில்லை. பல நேரங்களில் வில்லங்கத்தையும் தேடித்தரலாம்.

பேஸ்புக் நட்புக்கான வலைப்பின்னல் சேவை என்றாலும், பெரும்பாலானோரால் அது ஒரு வெளியீட்டு சாதனமாகவும் பயன்படுத்தப்படுகிறது. மனதில் உள்ள எண்ணங்களை பகிரவும், நாட்டு நடப்புகள் குறித்து கருத்து தெரிவிக்கவும் பேஸ்புக் சுவற்றை பயன்படுத்துவது என்பது அதன் பயனாளிகளுக்கு இயல்பாக இருக்கிறது. பலரும் ஆழமான கருத்துக்களை நீள் பதிவுகளாக வெளியிடவும் பேஸ்புக்கை பயன்படுத்தி வருகின்றனர். வலைப்பதிவு உலகில் இயங்கி வந்தவர்களில் பலர் பேஸ்புக்கிற்கு மாறிவிட்டதாகவும் தெரிகிறது.

மிகை பகிர்வு!

எதை எடுத்தாலும் பேஸ்புக்கில் வெளியிடுவது என்பது மிகை பகிர்வு பழக்கமாக மாறி இருப்பது மற்றும் கலாய்த்தால், கேலி செய்தல், சண்டையிடுதல், துவேஷம் கக்குதல், தனிமனித தாக்குதல் உள்ளிட்டவை பேஸ்புக் பயன்பாடு தொடர்பான விவாதத்தை ஏற்படுத்தியிருக்கிறது. பேஸ்புக்கில் நல்லவையும் உண்டு, தீயவையும் உண்டு எனும் நிலையில், அந்த சேவையை சரியாக பயன்படுத்துவது என்பது பயனாளிகளின் கைகளில் தான் இருக்கிறது.

பேஸ்புக் நிலைத்தகவல்களை எப்படி வெளியிடுவது என்பதும், மற்றவர்கள் தகவல்களுக்கு எவ்வாறு எதிர்வினை ஆற்றுவதும் அவரவர் விருப்பமும், உரிமையும் சார்ந்தது. பேஸ்புக் சேவையை எப்படி பயன்படுத்துவது என்பது தொடர்பாக விதிமுறைகளை எல்லாம் உருவாக்க முடியாது என்றாலும், பயனாளிகள் தங்கள் நலன் கருதி (மற்றவர்கள் நலனுக்காகவும் தான்) பேஸ்புக்கில் சில அடிப்படையான நெறிமுறைகளை கடைப்பிடிப்பது நல்லது என இணைய வல்லுனர்கள் கருதுகின்றனர்.

நண்பர்கள் மட்டும்

முதல் விஷயம், சமூக வலைப்பின்னல் சேவையாக பேஸ்புக்கின் தன்மையை புரிந்து கொள்ள வேண்டும். பேஸ்புக்கை நண்பர்களின் இருப்பிடம் என நீங்கள் கருதினாலும், உங்கள் பதிவுகளை கவனித்துக்கொண்டிருப்பது நண்பர்கள் மட்டும் அல்ல; அறிமுகம் இல்லாதவர்களும் தான். நண்பர்கள், நண்பர்களின் நண்பர்கள், அவர்களின் நண்பர்கள் என விரியும் நட்பு வலையில் நேரடியாக அறிமுகம் இல்லாதவர்களும் இருக்கலாம். எனவே பொதுவெளியில் எதை எல்லாம் பகிர்வோமோ அவற்றை மட்டுமே பேஸ்புக் சுவற்றில் பகிர்வது சரியாக இருக்கும். புகைப்படங்களை பகிர்ந்து கொள்வதையே எடுத்துக்கொள்வோம். ஒருவர் தன்னுடைய திருமண ஆல்பத்தை சாலையில் சென்று கொண்டிருப்பவர்களிடம் எல்லாம் காண்பிக்க விரும்புவாரா, என்ன? ஆனால் பேஸ்புக்கில் இதற்கு நிகரான செயலை தான் பலரும் செய்கின்றனர். ஊருக்கு போன படத்தையும், வீட்டில் பிறந்த நாள் அல்லது திருமண நாள் கொண்டாடிய படத்தையும் உடனுக்குடன் பகிர்ந்து கொள்கின்றனர்.

இப்படி படத்தை பகிர்வதன் நோக்கத்தை விமர்சிப்பதோ, கேலி செய்வதே அல்ல நம் நோக்கம்; இந்த பகிர்வால் ஏற்படக்கூடிய வில்லங்களும், விபரீதங்களும் தான் கவனத்தில் கொள்ளப்பட வேண்டியவை. எத்தனையோ படங்களை இதுவரை வெளியிட்டிருக்கிறோம், எந்த பிரச்சனையும் வந்தது இல்லையே என நீங்கள் கேட்கலாம். வராத வரை சந்தோஷம் என நினைத்துக்கொள்ளுங்கள். ஆனால் தனிப்பட்ட படங்களை பேஸ்புக் போன்ற பொதுவெளியில் பகிர்வது எப்போதுமே ஆபத்தானது தான். எப்போது என்ன நோக்கில் அவை பயன்படுத்தப்படலாம் எனத்தெரியாது.

உதாரணத்திற்கு கேளிக்கை விருந்து நிகழ்ச்சியில் ஒருவர் உற்சாகமாக மது அருந்தும் புகைப்படத்தை தனது நண்பர்கள் வட்டத்தில் பகிர்ந்து கொள்ளலாம். ஆனால் அந்த படத்தை அலுவலக மேலதிகாரி பார்க்கும் நிலை ஏற்பட்டால் என்னாகும் யோசித்துப்பாருங்கள். அதிலும், அவர் உடல்நிலை சரியில்லை என காரணம் கூறி அலுவலகத்தில் விடுப்பு கோரியிருந்தால், நிலைமை மோசமாகிவிடும் அல்லாவா! அது மட்டும் அல்ல, இந்த புகைப்படம் காப்பீடு நிறுவனத்தின் பார்வையில் பட்டாலும் சிக்கலாகலாம். குடிப்பழக்கம் என்பது காப்பீடு கோரிக்கை நிராகரக்கப்படுவதற்கான காரணமாக கூட அமையலாம். நிஜ வாழ்க்கையில் இப்படி பாதிப்பு ஏற்பட்டதற்கான கதைகள் இருக்கின்றன. அது மட்டும் அல்ல, புகைப்படங்களில் உள்ளவர்கள் எல்லாம் எங்கங்கோ டேக் செய்யப்படுவதும், முகம் உணர் தொழில்நுட்பம் காரணமாக, புகைப்படங்களில் உள்ளவர்கள் அடையாளம் காணப்படும் சாத்தியத்தையும் எண்ணிப்பார்க்க வேண்டும்.

புகைப்படம் பகிரும் முன்!

எனவே, புகைப்படங்களை பகிரும் முன், இது அவசியமா? என ஒரு முறை கேட்டுக்கொள்ளுங்கள், புகைப்படத்தை வேறு மாற்று வழியில் நண்பர்களுடன் பகிரலாமா? என்றும் யோசித்துப்பாருங்கள். பல நேரங்களில் நண்பர்களுக்கு இமெயில் மூலம் படங்களை அனுப்பி வைப்பது சரியாக இருக்கும்.

இதே போலவே பணி நிமித்தமாகவோ அல்லது தனிப்பட்ட முறையிலோ வெளியூர் பயணங்களுக்கு செல்லும் போது, எல்லோருக்கும் சொல்லிக்கொள்வது போல அந்த செய்தியை பகிர்வது தவிர்க்கப்பட வேண்டியது. ஏனெனில் ஒருவர் ஊரில் இல்லை என்பதை அவரது நண்பர்கள் மட்டும் அல்ல, விஷமிகள் யாரேனும் கூட தெரிந்து கொண்டு அந்த தகவலை தவறாக பயன்படுத்த முற்படலாம். பேஸ்புக்கில் வெளியூர் சென்ற தகவலை பார்த்துவிட்டு அவரது வீட்டில் கொள்ளையடிக்கப்பட்ட சம்பவம் எல்லாம் மேலைநாட்டில் நடந்திருக்கின்றன.  பொதுவாகவே இருப்பிடத்தை காட்டும் தகவல்களை பேஸ்புக்கில் மட்டும் அல்ல, இணையத்தில் பகிராமல் இருப்பதே நல்லது. எப்படியும் இணைய நிறுவனங்களும், உளவு மென்பொருள்களும் ஓயாமல் இணையவாசிகளை பின் தொடர்ந்து அவர்கள் இணைய சுவடுகளை கண்காணித்து தகவல்களை சேகரிக்கின்றன. இதில் நம் பங்கிற்கு நாமும் இருப்பிடம் சார் தகவல்களை இணைய சுவடாக பதிவு செய்ய வேண்டுமா?

இருப்பிடம் சார் தகவல்களை தவிர்ப்பது போலவே, தொலைபேசி எண் அல்லது இல்ல முகவரியையும் டைம்லைனில் பகிரக்கூடாது. தொலைபேசி எண் போன்றவை தேவை எனில், இன்பாக்ஸ் வழியே தனியே செய்தி அனுப்பிக்கொள்ளலாம்.

நம்மைப்பற்றிய தகவல்களை பகிர்வதில் கவனமாக இருப்பது போலவே நண்பர்கள், உறவினர்கள் தொடர்பான தகவல்களை பகிர்வதிலும் கவனம் தேவை. அவர்கள் பொதுவெளியில் பகிர விரும்பாத தகவல்களை நாம் வெளியிடாமல் இருப்பதே சரியானது.

துவேஷம் வேண்டாம்

பொதுவாக மற்றவர்கள் மீது துவேஷம் கொண்ட கருத்துகள், மிரட்டல், சீண்டல் கருத்துக்களை வெளியிடாமல் இருக்க வேண்டும். எதிர் கருத்தை கூறினாலும், கண்ணியமான வார்த்தைகளை பயன்படுத்த வேண்டும். தேவையில்லாத கேலி, கிண்டலை தவிர்த்தல் நல்லது.

ஒரே விஷயம் தொடர்பாக பதிவுகளை வெளியிடுவதும் ஏற்றதல்ல. இது நண்பர்களை வெறுப்புக்குள்ளாக்கும். உங்கள் ஆர்வம் சார்ந்த கருத்துகள் நிறைய இருந்தால் அதற்கென தனியே ஒரு பேஸ்புக் பக்கம் துவங்கி பகிர்ந்து கொள்வது பொருத்தமாக இருக்கும்.

அதே போல், அறிமுகம் இல்லாதவர்களின் கோரிக்கையை ஏற்றுக்கொள்ள வேண்டாம். முதலில் அவர்களைப்பற்றிய விவரங்களை தெரிந்து கொண்டு பிறகு முடிவு செய்யுங்கள். நண்பர்கள் எண்ணிக்கை அதிகரிப்பதை பெருமையாக கருத வேண்டாம். அர்த்தமுள்ள உரையாடல் சாத்தியமாக வேண்டும் என்பதே முக்கியம்.

பேஸ்புக்கில் எட்டிப்பார்க்கும் சுவாரஸ்யமான விளையாட்டுகள் மற்றும் செயலிகளை பயன்படுத்தும் முன், அவை உங்களைப்பற்றிய தனிப்பட்ட தகவல்களை சேகரிக்க கூடியவை என்பதை மனதில் கொள்ளுங்கள். 20 வருடம் கழித்து நீங்கள் எப்படி தோற்றம் அளிப்பீர்கள் அல்லது நீங்கள் எந்த பிரபலம் போல இருக்கிறீர்கள் என உணர்த்தும் செயலிகள் சுவாரஸ்யமாக இருக்கலாம். ஆனால் அந்த செயலிகளை பயன்படுத்தும் போது உங்கள் முழு டைம்லைனையும் அவற்றின் வசம் ஒப்படைக்கு நிலை இருக்கலாம் என்பதை பலரும் கவனிப்பதில்லை.

மேலும் பணியிடத்து சிக்கல்கள் குறித்து புலம்புவதும் தேவையில்லாத வம்பை விலை கொடுத்து வாங்குவது போன்றது தான்.

இவைத்தவிர, பேஸ்புக்கின் பிரைவசி செட்டிங் வசதி பற்றியும் அறிந்திருக்க வேண்டும். நிலைத்தகவல்கள் பொது வெளியில் பகிரப்பட வேண்டியவையா அல்லது நண்பர்கள் வட்டத்தில் மட்டும் தெரிய வேண்டியவையா என்பதை தீர்மானிக்கும் வசதி செட்டிங் பகுதியில் இருக்கிறது. தனிப்பட்ட பகிர்வு எனில் அவற்றை நண்பர்கள் வட்டத்தில் மட்டுமே பகிர்ந்து கொள்வது சரியாக இருக்கும். பேஸ்புக் வழங்கும் பிரைவஸி அமைப்புகள் பற்றி தெரிந்து கொள்வதோடு, பொறுமையாக நேரம் எடுத்துக்கொண்டு பேஸ்புக்கின் பிரைவசி கொள்கை பற்றியும் கூட படித்துப்பார்ப்பது பல விஷயங்களை புரிய வைக்கும்.

 

நன்றி; புதிய தலைமுறை இதழில் நிறைவடைந்த எண்டெர்.நெட் தொடருக்கான எழுதியது.

சமூக ஊடகங்களும் செய்தி வாசிப்பு பழக்கமும்!

3565344000000578-3646526-image-a-52_1466161957869செய்திகள் பகிர்வது நாங்கள்; வாசிப்பது யார்? இப்படி கேட்கும் நிலை தான் சமூக ஊடக உலகில் நிலவுவது சமீபத்திய ஆய்வில் தெரிய வந்துள்ளது. அதாவது சமூக ஊடக பயனாளிகள் பலரும் செய்திகளை பகிர்ந்து கொள்வதில் ஆர்வம் காட்டுகின்றனரேத்தவிர, பெரும்பாலானோர் அவற்றை படிப்பதில் அதே அளவு ஈடுபாடு கொண்டிருப்பதில்லை என டிவிட்டர் குறும்பதிவுகளை கொண்டு நடத்தப்பட்ட ஆய்வு தெரிவிக்கிறது.

இணைய உலகில் சமூக ஊடகங்களின் செல்வாக்கு அதிகரித்து வருகிறது ஏற்கனவே தெரிந்த விஷயம் தான்.
அது மட்டும் அல்ல சமூக ஊடகங்கள் தான் செய்திகளை தெரிந்து கொள்வதற்கான பிரதான வழியாகவும் அமைந்திருக்கின்றன. இளம் தலைமுறையினர் மத்தியில் தொலைக்காட்சியை விட, டிவிட்டர் உள்ளிட்ட சமூக ஊடகங்களே செய்திகளை தெரிந்து கொள்வதற்கான முக்கிய வழியாக இருப்பதாக கருதப்படுகிறது. இதில் வியப்பதற்கு எதுவுமில்லை. இந்த உண்மையை நம்முடைய பேஸ்புக் அல்லது டிவிட்டர் டைம்லைனை பார்த்தாலே தெரிந்து கொள்ளலாம். நட்பு சார்ந்த நிலைத்தகவல்களோடு செய்திகளுக்கான பகிர்வுகளையும் பார்த்துக்கொண்டே இருக்கலாம். நாமும் கூட இப்படி நம்மை கவரும் செய்திகளை அவற்றுக்கான இணைப்புகளுடன் பகிர்ந்து கொள்கிறோம்.

பேஸ்புக் டைம்லைன்
அதனால் பேஸ்புக் போன்ற சமூக வலைதளங்கள் செய்திகள் மட்டும் கட்டுரைகளை டைம்லைனுக்கு அருகே இடம்பெற வைத்திருக்கின்றன.

சில ஆண்டுகளுக்கு முன்வரை இணையத்தில் செய்திகளை தெரிந்து கொள்ள தேடல் தான் பிரதான வழியாக இருந்தது. ஆனால் 2014ல் நிலைமை மாறி, சமூக ஊடங்கள் வாயிலாக செய்திகளை தெரிந்து கொள்வது 30 சதவீதமாக அமைந்தது. சமூக ஊடகங்களும் செய்திகளும் இப்படி நெருக்கமாக பின்னி பினைந்திருப்பதை மீறி, சமூக ஊடகங்களில் செய்திகள் நுகரப்படும் விதம் பற்றி அதிக புரிதல் இல்லை. அதாவது சமூக ஊடகங்களில் பகிரப்படும் செய்திகள் எவ்வாறு வாசிக்கப்படுகின்றன என்பது பற்றிய விவரங்கள் அதிகம் தெரியவில்லை.
இந்த நோக்கில் முதல் முறையாக நடத்தப்பட்டுள்ள ஆய்வு, இது தொடர்பான சிந்தனைக்குறிய தகவல்களை முன்வைத்துள்ளது. அமெரிக்காவின் கொலம்பியா பல்கலைக்கழகம் மற்றும் பிரெஞ்சு நேஷனல் இன்ஸ்டிடியூட் இணைந்து நடத்திய இந்த ஆய்வு, சமூக ஊடகங்களில் பகிரப்படும் செய்தி இணைப்புகளில் 59 சதவீதம் படிக்கப்படுவதே இல்லை என தெரிவிக்கிறது. இதன் பொருள் சமூக ஊடக பயனாளிகள் செய்திகளை படிக்காமலே அவற்றை பகிர்ந்து கொள்கின்றனர் என்பது தான்.

செய்தி இணைப்புகளை கொண்ட 28 லட்சம் டிவிட்டர் குறும்பதிவுகள் இந்த ஆய்விற்காக ஒரு மாத காலம் பரிசீலிக்கப்பட்டன. இந்த காலத்தின் போது அவை எந்த அளவுக்கு கிளிக் செய்யப்பட்டன என்பது அதாவது வாசிக்கப்பட்டனவா? என ஆய்வு செய்யப்பட்டது. இதன் பயனாக தான் பகிரப்பட்ட இணைப்புகளில் 59 சதவீதம் கிளிக் செய்யப்படாமல் இருந்துள்ளது தெரிய வந்துள்ளது.

” மக்கள் ஒரு செய்தியை வாசிப்பதை விட அதை பகிர்ந்து கொள்வதில் அதிக ஆர்வம் காட்டுகின்றனர்’ என்று இந்த ஆய்வில் முக்கிய பங்காற்றிய ஆய்வாளரான ஆர்னாட் லெகாட் கூறியுள்ளார். ”இந்த கால கட்டத்தில் இப்படி தான் தகவல்கள் நுகரப்படுகின்றன” என்றும் அவர் கூறியிருக்கிறார்.

இணைய பழக்கம்
நம் கால இணையப்பழக்கம் பற்றி லெகாட் மேலும் கூறும் விஷயங்கள் கவனிக்கத்தக்கது. ‘மக்கள் மேலும் ஆழமாக தெரிந்து கொள்ள முயற்சிக்காமலே, சுருக்கம் அல்லது சுருக்கத்தின் சுருக்கத்தை கொண்டே முடிவுக்கு வருகின்றனர்” என்கிறார் அவர்.

அதாவது தலைப்புச்செய்தியை பார்த்ததுமே பலரும் அதை தங்கள் சமூக வட்டத்தில் பகிர்ந்து கொண்டு விடுவதாக கொள்ளலாம். இதை பெறுவர்களும் தங்கள் பங்கிற்கு அதை பகிர்ந்து கொள்கின்றனர். இப்படி ஒரு செய்தி வைரலாக பரவுகிறதே தவிர, அதை உண்மையில் எத்தனை பேர் படித்துள்ளனர் என்பது கேள்விக்குறியாக தான் இருக்கிறது. எனவே ஒரு செய்தி வைரலாக பரவியிருக்கிறது என்பது அதன் பிரபலத்தை உணர்த்தலாமேத்தவிர, அதன் தாக்கத்தை குறிப்பதாக கருத முடியாது.

இணையத்தில் வைரலாக பரவும் செய்திகளை அடையாளம் காட்டும் பஸ்பீட் போன்ற சர்வதேச செய்தி தளங்களும், ஸ்கூப்வூப் போன்ற இந்திய செய்தி தளங்களும் சுண்டியிழுக்கும் வகையில் அவற்றுக்கு தலைப்புகளை கொடுப்பதன் ரகசியம் இது தான். ஆனால் இந்த தலைப்புகள் பகிர தூண்டுகின்றனவே படிக்க வைக்கின்றனவா? எனும் கேள்வியை இந்த ஆய்வு எழுப்பியுள்ளது. ஊடகங்கள் பகிரும் செய்திகளை விட, பயனாளிகள் பகிரும் செய்திகளை அதிகம் பகிரப்படுவதாகவும் இந்த ஆய்வு தெரிவிக்கிறது. இந்த பழக்கம் அரசியல் மற்றும் கலாச்சார விஷயங்கள் ஏற்படுத்தக்கூடிய தாக்கம் நாம் நினைப்பதைவிட அதிகமாக இருக்கப்போகின்றன என்றும் இந்த ஆய்வு தெரிவிக்கிறது.

வாசிக்காமலே பகிர்வு
செய்திகளை வாசிப்பதற்கும், பகிர்ந்து கொள்வதற்கும் அதிக தொடர்பில்லை என்றும் இந்த ஆய்வின் அடிப்படையில் லெகாட் கூறுகிறார். இந்த இட்த்தில் தி சயன்ஸ் போஸ்ட் இணையதளம் ஜூன் 4 ம் தேதி வெளியிட்ட செய்தியை பொருத்திப்பார்ப்பதும் சரியாக இருக்கும். 70 சதவீத வாசகர்கள் அறிவியல் செய்திகளின் தலைப்பை மட்டுமே படித்துவிட்டு கருத்து தெரிவிக்கின்றனர், எனும் தலைப்பிலான அந்த செய்தியில் முதல் பத்திக்கு கீழே இருந்த்தெல்லாம் அர்த்தமே இல்லாத வெற்று வார்த்தைகள் தான். ஆனாலும் என்ன அந்த செய்தி 46,000 முறைக்கு மேல் சமூக ஊடகங்களில் பகிரப்பட்டது.

செய்திகளை படிக்காமலே பகிர்வதற்கான காரணங்கள் குறித்து ஆழமான ஆய்வு அவசியம் என்றாலும் கூட இணையத்தில் பரவி வரும் ஷேர்பைட் கலாச்சாரம் இதற்கு ஒரு காரணமாக இருக்கலாம் என கருதப்படுகிறது. அதென்ன ஷேர்பைட் என்று கேட்கிறீர்களா? சமூக ஊடகங்களில் பகிரப்படும் அம்சங்களை பிரதானமாக கொண்ட உள்ளடக்க தன்மையே இவ்வாறு குறிப்பிடப்படுகிறது. அதாவது பார்த்தவுடன் கிளிக் செய்து பகிரத்தூண்டும் வகையில் இருக்க வேண்டும். இப்படி பகிரும் தன்மையை ஆரம்பத்தில் மார்க்கெட்டிங் நிறுவனங்கள் மற்றும் பிராண்ட்களே அதிகம் பயன்படுத்தி வந்தன. கிளிக் செய்ய வைப்பதற்காக என்றே அவை பலவித தூண்டுதல் அம்சங்களை உருவாக்குவதில் கவனம் செலுத்தின. இதற்காக பொய்யான தகவல்களை இடம் பெற வைப்பது கூட வழக்கமாக இருக்கிறது. இதன் காரணமாகவே இவை கிளிக்பைட் அல்லது லைக்பைட் என்றும் குறிப்பிடப்பட்டன. கிளிக்குகளை அள்ளுவதற்காக இந்த உத்தி கடைபிடிக்கப்படுகிறது. கிளிக்பைட் வலையில் சிக்காமல் இருக்க வேண்டும் என்றும் கூட இணையவாசிகள் எச்சரிக்கப்படுவது வழக்கமாக இருக்கிறது.

ஆனால் இப்போது இந்த பகிர்வு பழக்கம் சமூக ஊடக பயனாளிகளையும் பிடித்துக்கொண்டுவிட்டது. எல்லோரும் பகிர்ந்து கொள்ள விரும்புகின்றனர். பகிர்வதோடு படித்துப்பார்ப்பதிலும் கவனம் செலுத்தினால் நன்றாக இருக்கும் அல்லவா? தகவல் நெடுஞ்சாலை என குறிப்பிடப்படும் இணையத்தில் தகவல்களை உள்வாங்கி கொள்ளாமலே பயணம் செய்தால் எப்படி?

நன்றி; தமிழ் இந்துவில் எழுதியது

பேஸ்புக் லைக் தேர்வுகள்; ஒரு ஆய்வு

Reactions11-1024x768உலகம் விருப்பங்களால் மட்டும் ஆனதல்ல. இந்த உண்மையை இப்போது பேஸ்புக்கும் அங்கீகரித்திருக்கிறது. இதன் பயனாக பேஸ்புக் பயனாளிகள் இனி விருப்பம் தெரிவிப்பதுடன் நிறுத்திக்கொள்ள வேண்டியதில்லை. அவர்கள் இனி தாங்கள் எப்படி உணர்கிறோம் என்பதையும் வெளிப்படுத்தலாம். இதற்கு உதவும் வகையில் பேஸ்புக் அறிமுகம் செய்துள்ள ரியாக்‌ஷன்ஸ் வசதி பற்றி தான் இப்போது இணைய உலகில் பெரிய அளவில் விவாதிக்கப்பட்டு வருகிறது. பேஸ்புக் உலகில் ஏற்கனவே பிரபலமாக இருக்கும் லைக் வசதியின் நீட்டிப்பாக அறிமுகமாகி இருக்கும் இந்த வசதியின் பொருளாதார கோணம் பற்றி விவாதிக்கப்படுவதோடு உளவியல் மற்றும் மொழியியல் பார்வையிலும் கருத்துக்கள் முன்வைக்கப்படுகின்றன.

பேஸ்புக் பயனாளிகளை பொருத்தவரை உலகம் விருப்பங்களால்,அதாவது லைக்களால் ஆனது என்பது தெரிந்த விஷயம் அல்லவா! பேஸ்புக்கில் நிலைத்தகவலை வெளியிட்டாலும் சரி, புகைப்படம் அல்லது வீடியோவை பகிர்ந்து கொண்டாலும் சரி, நண்பர்களும் ,நண்பர்களும் அதை லைக் செய்து ஆமோதிக்கலாம்.படித்ததும் பிடித்திருந்தால் அதை வரிகளாகவோ வார்த்தைகளாகவோ தெரிவிக்க வேண்டிய தேவை இல்லாமல்,இதற்காகவே இருக்கும் உயர்த்திய கட்டை விரல் ஐகானை கிளிக் செய்தால் போதும், பயனாளியின் விருப்பம் பதிவாகி பகிரப்படும்.

இந்த எளிமை லைக் செய்வதையும் ,லைக் செய்யப்படுவதையும் பேஸ்புக் கலாச்சாரமாகவே மாற்றியுள்ளது. லைக் செய்யுங்கள் என கோரிக்கை வைப்பதும், இத்தனை ஆயிரம் லைக்குகள் குவிந்தன என பெருமைபட்டுக்கொள்வதும் பேஸ்புக் மொழியாகி இருக்கிறது. பேஸ்புக் உலகில் பிரபலங்கள் மற்றும் நட்சத்திரங்களின் செல்வாக்கும் லைக் எண்ணிக்கையால் தான் அளவிடப்படுகிறது. பிராண்ட்களும் இந்த எண்ணிக்கை விளையாட்டில் மகிழ்ச்சியோடு பங்கேற்கின்றன.

ஆனால் லைக் செய்வதில் ஒரு பிரச்சனை இருக்கிறது. அது எளிதாக இருந்தாலும் எல்லா நேரங்களிலும் பொருத்தமானதாக இல்லை. அதிலும் குறிப்பாக வருத்தமான அல்லது சோகமான நிலைத்தகவல்களுக்கு லைக் செய்வது என்பது சங்கடமான அனுபவமாக மாறிவிடுகிறது.நெருக்கமானவர்களை இழந்த சோகத்தை வெளிப்படுத்தும் போது கூட நட்பு வட்டத்தில் பலரும் அதை லைக் செய்து தங்கள் ஆதரவை தெரிவித்த அபத்தம் பலமுறை அரங்கேறியிருக்கிறது. இவை விரும்பி செய்யப்பட்டவை அல்ல;எதையும் லைக் செய்யும் பழக்கத்தின் விளைவு இது!.

அதனால் தான் பேஸ்புக் பயனாளிகள் லைக் பட்டன் மட்டும் போதாது மாற்று பட்டன்களும் தேவை என கோரி வந்தனர். லைக் செய்வது போலவே டிஸ்லைக் செய்யவும் ஒரு பட்டன் வேண்டும் என்றும் கூட பயனாளிகள் வலியுறுத்தி வந்தனர்.

பேஸ்புக்கும் சரி அதன் நிறுவனர் ஜக்கர்பர்கும் சரி இந்த தேவையை உணர்ந்தே இருந்தனர். ஆனால் இதை நிறைவேற்றுவதில் தான் சிக்கல் இருந்தது.
Reactions-Variations-482x263
விருப்பம் தெரிவிக்க லைக் சின்னம் இருக்கும் போது, அதற்கு எதிரான உணர்வுகளை தெரிவிக்கவும் ஒரு சின்னம் இருக்க வேண்டும் என்று எதிர்பார்ப்பது இயல்பானது தான். இந்த சின்னம் டிஸ்லைக் பட்டன் வடிவில் இருக்க வேண்டும் என்று பயனாளிகள் பலர் எதிர்பார்த்ததும் இயல்பானது தான். ஆனால் டிஸ்லைக் பட்டனை அறிமுகம் செய்வதால் ஏற்படக்கூடிய விபரீதங்களை பேஸ்புக் அறிந்திருந்தது. முதலில் இது பயனாளிகள் மத்தியில் டிஸ்லைக் யுத்த்தை ஏற்படுத்தும் அபாயம் இருந்த்து. எப்படியும் இத்தனை ஆயிரம் பேர் லைக் செய்தனர் என்று சொல்வது போல, இத்தனை பேர் டிஸ்லைக் செய்தனர் என்று சொல்வது விரும்பத்தக்கது இல்லை அல்லவா! மேலும் எதற்காக டிஸ்லைக் செய்கின்றனர் என்பதும் சிக்கலை ஏற்படுத்தலாம். மாஜி காதலன் அல்லது காதலி தங்கள் முன்னாள் துணையின் பக்கத்தை டிஸ்லைக் செய்து தொலை தரலாம். கருத்து மோதல் ஏற்படும் இடங்களில் டிஸ்லைக் தாக்குதலுக்கான ஆயுதமாகலாம்.

அதோடு, ஒருவர் குறிப்பிட்ட தலைப்பை டிஸ்லைக் செய்தால், அந்த தலைப்பை டிஸ்லைக் செய்கிறாரா? அல்லது அது பற்றி நண்பர் தெரிவித்த கருத்தை டிஸ்லைக் செய்கிறாரா? என்று தெரியாத குழப்பமும் உண்டாகலாம். இவை தவிர வர்த்தக நிறுவனங்களின் பிராண்ட்களை டிஸ்லைக் செய்து அதிருப்தி தெரிவித்தால் என்ன செய்வது?
இப்படி பல வித பாதிப்புகளை யோசித்துப்பார்த்து பேஸ்புக் இந்த விஷயத்தில் முடிவெடுக்க முடியாமல் தயங்கியது. கடந்த ஆண்டு, பேஸ்புக் பயனாளிகள் மத்தியிலான டவுன் ஹால் கூட்டத்தில் உரையாடிய பேஸ்புக் நிறுவனர் மார்க் ஜக்கர்பர்க் , லைக் பட்டன் தவிர வேறு பட்டன்கள் தேவை என்பதை ஒப்புக்கொண்டாலும் ,டிஸ்லைக் பட்டனாக அது இருக்காது என கூறியிருந்தார்.

அதன் பிறகு பேஸ்புக் இது தொடர்பாக நிறைய யோசித்து, லைக் பட்டனுக்கான நீட்டிப்பை வழங்க தீர்மானித்தது. இது தான் ரியாக்‌ஷன்ஸ் வசதியாக அறிமுகமாகி இருக்கிறது. சில மாதங்களுக்கு முன்னரே இது பற்றி அறிவித்த நிலையில், தேர்ந்தெடுக்கப்பட்ட பயனாளிகள் மத்தியில் இதை வெள்ளோட்டம் பார்த்து அவர்கள் கருத்துக்களின் அடிப்படையில் இப்போது இந்த வசதி தீர்மானிக்கப்பட்டு உலகம் முழுவதும் உள்ள பயனாளிகளுக்கு கடந்த வாரம் அறிமுகம் செய்யப்பட்டுள்ளது.

இந்த வசதியில் லைக் செய்யலாம். லைக் தவிர ஐந்து விதமாக கருத்தை வெளிப்படுத்தலாம். ஒவ்வொன்றுக்கும் ஒரு விதமாக சித்திர வடிவம் (எமோடிகானஸ்) இருக்கும். இவ்வாறு பயனாளிகள், அன்பு, வியப்பு,கோபம்,சிரிப்பு, சோகம் ஆகிய உணர்வுகளை வெளிப்படுத்தலாம். லைக் சின்னத்தை கிளிக் செய்யும் போது விரும்பினால் இந்த வசதியை விரிவாக்கம் செய்து கொள்ளலாம்.

இப்படி விதவிதமாக உணர்வுகளை வெளிப்படுத்தும் வசதி பயனாளிகள் இதுவரை எதிர்கொண்டு வந்த போதாமையை ஓரளவு போக்கியிருப்பதாக கருதப்பட்டாலும், உண்மையில் இதனால் பேஸ்புக்கிற்கே அதிக ஆதாயம் என்ற கருத்தும் சொல்லப்படுகிறது.

பேஸ்புக் விளம்பரங்கள் மூலம் தான் வருவாயை அள்ளிக்குவிக்கிறது. பயனாளிகள் நிலைத்தகவல்களுக்கு ஏற்ப அது பொருத்தமான விளம்பரங்களை இடம்பெற வைக்கிறது. இந்த புரிதலை மேலும் ஆழமாக்கி கொள்ள பேஸ்புக் முயற்சி செய்து வரும் நிலையில், கருத்து தெரிவிப்பவர்கள் லைக் செய்யும் வித்த்தை வைத்தே அதனால் அவர்கள் விருப்பு, வெறுப்புகளை இன்னும் தெளிவாக புரிந்து கொள்ள முடியும் என கருதப்படுகிறது. உதாரணத்திற்கு குறிப்பிட்ட நிறுவன செய்தி தொடர்லாக ஒருவர் ’கோபம்’ தெரிவித்திருந்தால் அவரது டைம்லைனில் அந்த நிறுவனம் தொடர்பான செய்தியை தவிர்த்துவிடலாம். அதே நேரத்தில் இன்னொருவர் நேசிப்பை வெளிப்படுத்தி இருந்தால் அவரது டைம்லைனில் அந்த பொருள் தொடர்பான செய்தியை அதிகமாக்கலாம். இப்படி பயனாளிகளின் மன உணர்வுகளை மேலும் சரியாக அறிந்து கொண்டு அவர்கள் டைம்லைனில் செய்திகளையும், விளம்பரங்களையும் இடம்பெறச்செய்வது சாத்தியமாகும் என்பதால் பேஸ்புக்கிற்கு இது பெரும் சாதகமாக அமையும் என கருதப்படுகிறது.

இது ஒரு புறம் இருக்க மொழியில் வல்லுனர்கள் உண்மையில் இப்படி லைக் மூலம் கருத்து தெரிவிப்பது, அந்த வசதியை மேலும் விரிவு படுத்தியிருப்பது என்பது மனித மனம் உணர்வுகளை வெளிப்படுத்தும் விதத்தையே கட்டுப்படுத்தி மாற்றி அமைக்க்கூடியது என அச்சம் தெரிவித்துள்ளனர். மனித உணர்வுகள் ஒவ்வொன்றும் நுட்பமானவை,அவற்றை சித்திர எழுத்து வடிவத்திற்குல் சுருக்கப்பார்ப்பதே தவறானது என்றும் அவர்கள் எதிர்ப்பு தெரிவித்துள்ளனர். நேர் பேச்சில் வார்த்தைகளில் மட்டும் மல்லாமல் உடல் அசைவு, கண் பார்வை என பலவிதங்களில் உணர்வுகளை வெளிப்படுத்தப்பட்டு புரிந்து கொள்ளப்படும் நிலையில், வெறும் ஆறு வித லைக் சின்னங்களில் அவற்றை முடக்கப்பார்ப்பது பாதிப்பை ஏற்படுத்தும் என்றும் எச்சரித்துள்ளனர்.

——-

நன்றி; தமிழ் இந்திவில் எழுதியது.

பேஸ்புக்கின் புதிய வசதி

safetycheckmobielcarouselபுயல் ,பூகம்பம் போன்ற பேரிடர் காலங்களில் நலமாக இருக்கிறேன் என நெருக்கமானவர்களுக்கு தகவல் தெரிவிக்கும் புதிய வசதியை சமூக வலைப்பின்னல் சேவையான பேஸ்புக் அறிமுகம் செய்துள்ளது. சேப்டி செக் எனும் பெயரில் இந்த வசதி அறிமுகமாகியுள்ளது.
பூகம்பம் ,புயல்,சுனாமி போன்ற இயற்கை பேரிடர் நிகழ்வுகளின் போது எல்லோருக்கும் உறவினர்களும் நண்பர்களும் நலமாக இருக்கின்றரா? என அறிந்து கொள்ளும் துடிப்பு இயல்பாக ஏற்படும். பேரிடர் காலங்களில் பலர் சமூக ஊடகம் மூலம் இந்த கேள்வியை கேட்பதையும் , பலரும் சமூக ஊடகம் வாயிலாக தாங்கள் நலமுடன் இருப்பதை தெரிவிப்பதையும் பார்க்கலாம்.
இப்போது இந்த தகவலை சுலபமான முறையில் நட்பு வட்டாரத்தில் பகிர்ந்து கொள்ளும் புதிய வசதியை பேஸ்புக் அறிமுகம் செய்துள்ளது. சேப்டி செக் எனும் பெயரில் பேஸ்புக் இதை அறிமுகம் செய்துள்ளது.
இந்த வசதியின் மூலம் இயற்கை பேரிடர் தாக்கும் போது, நலமாக இருக்கும் தகவலை பேஸ்புக் மூலம் எளிதாக பகிரலாம். பாதிக்கப்பட்ட பகுதியில்; உள்ள நண்பர்கள் நலமுடன் இருப்பதையும் இதன் மூலம் அறியலாம்.
சேப்டி செக் வசதியை இயக்கி வைத்தால், உங்கள் நகரில் புயலோ, பூகம்பமோ தாக்கும் போது , பேஸ்புக் உங்களுக்கு ஒரு நோட்டிபிகேஷன் அனுப்பி தகவல் கோரும். அதில் நலமாக இருக்கிறேன் எனும் வாய்ப்பை தேர்வு செய்தால் அந்த செய்தி உங்கள் டைம்லைனில் தோன்றும். நண்பர்களும் உறவினர்களும் நீங்கள் நலமாக இருப்பதை தெரிந்து கொள்ளலாம். இதே போல உங்கள் நண்பர்கள் நிலையையும் நீங்கள் அறியலாம். உங்கள் நண்பர்கள் பற்றிய தகவல் தெரிந்தால் அதையும் பகிரலாம். ( ஆனால் இதற்கு அவர்கள் அனுமதி தேவை).
பேஸ்புக்கில் நீங்கள் சம்பர்பித்துள்ள நகரின் அடிப்படையில் இந்த சேவை இயங்குகிறது. நீங்கள் அந்த நகரில் இல்லை அல்லது உங்களுக்கு பாதிப்பு இல்லை என்றால் அதையும் தெரிவிக்கலாம்.

ஜப்பான் சுனாமிக்கு பிறகு பரிதவித்தவர்கள் தங்கள் நிலையை உறவினர்களுக்கு தெரிவிக்க் பேஸ்புக் பேரிடர் தகவல் பலகையின் மேம்பாடாக இந்த வசதியை பேஸ்புக் அறிமுகம் செய்துள்ளது. நிச்சயம் பேஸ்புக்கின் ஸ்டேடஸ் அப்டேட்களில் இது தான் பயனுள்ளதாக இருக்கும்.
உலக அளவில் இந்த சேவை அறிமுகமாக உள்ளது. செல்போன் செயலிகளிலும் செயல்படும்.

பேஸ்புக் சேப்டி செக் வசதி பற்றி அறிய: https://www.facebook.com/about/safetycheck/

டிவிட்டரில் சந்தித்தவர்களை நினைவில் கொள்ள.

1359263734
நிஜ உலகில் நண்பர்கள் இருப்பது போல இப்போது பேஸ்புக்கிலும் டிவிட்டரிலும் நண்பர்கள் கிடைக்கின்றனர்.

இவர்களில் பேஸ்புக் நண்பர்கள் ஒருவிதம் என்றால் டிவிட்டர் நண்பர்கள் இன்னொரு விதம்.பேஸ்புக்கில் நண்பர்கள் மூலம் நண்பர்கள் கிடைக்கின்றனர்.நண்பராக ஏற்க சம்மதமா என்று கேட்டு அது ஏற்றுக்கொள்ளப்பால் நண்பர்களாகலாம்.

டிவிட்டரில் அப்படி இல்லை,ஒருவருடைய‌ குறும்பதிவுகள் பிடித்திருந்தால் அல்லது பயனுள்ளதாக இருக்கும் என்று நினைத்தால் அவரது டிவிட்டர் கணக்கை பின்தொடர ஆரம்பித்து விடலாம்.அந்த நொடியில் இருந்து அவர் டிவிட்டர் நண்பராகி விடுவார்.

டிவிட்டரில் தான் சந்திக்க வேண்டும் என்றில்லை.நிகழ்ச்சிகளில் சந்தித்து பேசும் போது கூட டிவிட்டரில் இருக்கிறீர்களா என கேட்டு டிவிட்டர் முகவரியை வாங்கி பின் தொட‌ரலாம்.சிலர் அவர்களாகவே முன்வந்து டிவிட்டர் முகவரியை தரலாம்.

இப்படி பல நண்பர்கள் டவிட்டரில் சேரலாம்.எல்லாம் சரி டிவிட்டர் நண்பர்கள் அதிகரிக்கும் போது குறிப்பிட்ட டிவிட்டர் நண்பர்களை எங்கே சந்தித்தோம் என்பது நினைவில் இல்லாமல் போகலாம்.டிவிட்டரில் ஒருவரை எப்படி சந்தித்தோம் என்ற தகவல் பல காரணங்களுக்காக தேவைப்படலாம்.பலவிதங்களில் பயன்படலாம்.

அதற்காக அடடா டிவிட்டர் சந்திப்புகளை குறித்து வைக்காமல் போனோமோ என்று கவலைப்பட வேண்டியதில்லை.இந்த தேவையை நிறைவேற்றுவதற்காக என்றே ஒரு இணைய சேவை இருக்கிறது.மெட்.என்யு என்னும் அந்த தளம் மூலம் டிவிட்டர் சந்திப்புகளை குறித்து வைத்துக்கொள்ளலாம்.

இந்த சேவையை புக்மார்கிங் துண்டாக தரவிற்க்கம் செய்து கொண்டால் அது பிரவுசரில் போய் உட்கார்ந்து கொள்ளும்.அதன் பிறகு புதிய டிவிட்டர் நண்பர்கள் கிடைக்கும் போது இந்த புக்மார்க் துண்டை கிளிக் செய்து, அந்த டிவிட்டர் நண்பர எங்கே எப்படி அறிமுகமானார் என்பதை குறித்து வைத்துக்கொள்ளலாம்.அந்த நண்பரை டிவிட்டரில் பின் தொடர்வற்கான காரணத்தையும் குறித்து கொள்ளலாம்.அவரது தொடர்பு முகவரி மற்றும் தொலைபேசி எண்ணையும் குறித்து கொள்ளலாம்.

பின்னர் எப்போது தேவை என்றாலும் இந்த குறிப்புகளை பார்த்து கொள்ளலாம்.எந்த டிவிட்டர் நண்பரை பற்றிய சந்திப்பு விவரம் தேவைப்பட்டாலும் அவரது முகவரி மீது கிளிக் செய்தால் புக்மார்கிக் விவரம் மூலம் சந்திப்பு தகவல்களை தெரிந்து கொள்ளலாம்.

டிவிட்டர் பிரியர்களுக்கு பயனுள்ள சேவை.

இணையதள முகவரி;http://met.nu/