Category Archives: இணையதளம்

தானாக படமெடுக்கும் கூகுளின் புதிய காமிரா!

கூகுள் கண்ணாடியைjbareham_170922_2006_0343 நினைவு இருக்கிறதா? வியரபில் எனப்படும் அணி கணிணி பிரிவில் கூகுள் கிளாஸாக இது அறிமுகமானது. ஆனால், இந்த  அதி நவீன மூக்கு கண்ணாடி அதிக ஆரவாரத்தையும், பரபரப்பையும் ஏற்படுத்திய அளவுக்கு வரவேற்பை பெறவில்லை. பின்னர் கூகுள் இதை விலக்கி கொண்டுவிட்டது. நிறுவன பயன்பாட்டிற்கான மாதிரியாக மட்டும் இது தொடர்கிறது. இணைய பக்கங்களை வாசிக்க கூடிய திரையாக திகழும் என்பது உள்ளிட்ட பல்வேறு அம்சங்களை கொண்டிருந்த கூகுள் கண்ணாடி எதிரே உள்ளவரை படமெடுக்கும் ஆற்றலும் கொண்டிருந்தது. இந்த தன்மைக்காகவே அது சர்ச்சைக்கும் இலக்கானது.

இப்போது கூகுள் வெள்ளோட்டம் விட்டிருக்கும் கூகுள் கிளிப்ஸ் காமிராவை பார்த்தால், கூகுள் கிளாஸ் நினைவுக்கு வராமல் இல்லை. ஸ்மார்ட் காமிரா என சொல்லப்படும் கூகுள் கிளிப்ஸ் உள்ளங்கைக்குள் அடங்கிவுடக்கூடிய சதுர வடிவ காமிராவாக இருக்கிறது. அண்மையில், பிக்சல்-2 நிகழ்ச்சியில் கூகுள் அறிமுகம் செய்த புதிய பிக்சல் போன், உள்ளிட்ட சாதனங்களுக்கு மத்தியில், விரைவில் வருகிறது எனும் அறிவிப்புடன் கிளிப்ஸ் காமிராவும் அறிமுகம் செய்யப்பட்டது.

சட்டை பாக்கெட் அல்லது பர்சில் வைத்துக்கொள்ளக்கூடிய அளவுக்கு கச்சிதமான இந்த இரண்டுஅங்குல காமிராவின் பர்ஸ்ட்லுக் அனுபவத்தை தொழில்நுட்ப இணைய இதழான தி வெர்ஜ், விரிவாக விவரித்துள்ளது. முதல் பார்வைக்கு கூகுள் கிளிப்ஸ் வியக்க வைக்கிறது.

இந்த காமிராவில் சின்னஞ்சிறிய லென்ஸ் மட்டும் தான் இருக்கிறது. மற்றபடி இதில் வியூபைண்டர் எல்லாம் கிடையாது. ஏனெனில் இந்த காமிரா தானாக படம் எடுத்துக்கொள்ளும். எனவே இதை கையில் வைத்து க்கொள்ள வேண்டிய அவசியமும் இல்லை. வீட்டின் எங்காவது ஒரு முளையில் தொங்கவிட்டால் போதும் அது தானாக படம் எடுத்து பதிவு செய்து கொள்ளும். இயந்திர கற்றல் மற்றும் செயற்கை நுண்ணறிவு இரண்டும் இணைந்த கலையில் இது செயல்படுவதால், காட்சிகளை தானாக உணர்த்து கிளிக் செய்து விடுகிறது. அது மட்டும் அல்ல, தான் பார்க்கும் முகங்களை நினைவில் நிறுத்துக்கொள்ளும் ஆற்றலும் கொண்டிருக்கிறது. ஆக, நாளடைவில் இது முகங்களை நன்றாக பரீட்சயம் செய்து கொண்டு, அறிமுகம் இல்லாதவர்களை படம் எடுப்பதை தவிர்க்கவும் கற்றுக்கொண்டு விடும் என எதிர்பார்க்கப்படுகிறது.

மற்றபடி வீட்டில் இருக்கும் போது, சுவாரஸ்யமான தருணங்கள் என கருதப்படும் காட்சிகளை அது படமெடுத்தபடி இருக்கும். ஒவ்வொரு காட்சியும் ஏழு நொடி ஓடக்கூடியதாக இருக்கும். இவற்றில் இருந்து தேவையான காட்சியை தேர்வு செய்து புகைப்படமாக மாற்றிக்கொள்ள்லாம். அப்படியே தொடர் படமாகவும் பயன்படுத்தலாம். ஆனால் ஒலி வசதி கிடையாது. எனவே வீடியோ என்று சொல்ல முடியாது.

காமிராவுடன் இணைக்கப்பட்ட பிரத்யேக செயலி மூலம் ஸ்மார்ட்போனில் படங்களை பார்க்க முடியும். அதிலேயே சேமித்துக்கொள்ளலாம். தேவை எனில் கையாலும் இதில் படமெடுக்கலாம். இதற்கான ஷட்டர் வசதி இருந்தாலும், இந்த காமிராவை அதன் போக்கில் விட்டு விடுவது தான் சிறந்தது என கூகுள் நினைக்கிறது. உதாரணத்திற்கு மழலைகள் உள்ள வீட்டில் பாசமிகு பெற்றோர்கள் கிளிப்ஸ் காமிராவை ஒரு மேஜையில் பொருத்தி விட்டால், மழழலையின் குறும்புகளும், மந்தகாசமான புன்னகைகளும் அழகாக பதிவாகி இருக்கும். பெற்றோர் அருகே இல்லாவிட்டால் கூட, காமிரா கச்சிதமாக குழந்தையின் பொன்னான தருணங்களை பதிவு செய்து கொள்ளும். சும்மா இல்லை, 130 கோணத்தில் விசாலமாக பார்த்து காட்சிகளை படமெடுக்கும் ஆற்றலும் கொண்டுள்ளது.

இந்த காமிரா, ஆக்‌ஷன் காமிராவாக வர்ணிக்கப்படும் கோ புரோ காமிரா மற்றும் ஸ்னேப்சேட் நிறுவனத்தின் ஸ்பெக்டகல் கண்ணாடிக்கு போட்டியாக சொல்லப்பட்டாலும் உண்மையில் கூகுள் இதை பெற்றோர்களை இலக்காக கொண்டு களமிறக்க உள்ளது. குழந்தைகள் மட்டும் அல்லாமல் செல்லப்பிராணிகள் மீது பாசம் கொண்டவர்களும் இந்த காமிராவை பயன்படுத்தலாம்.

சுற்றுப்புறத்தை புரிந்து கொண்டு, அதில் தென்படும் முகங்களை உணர்ந்து கொண்டு தானாக படமெடுக்கும் காமிரா, தானாக படமெடுக்கப்படும் போது சிக்க கூடிய அற்புதமான தருணங்களை நினைத்துப்பார்த்து வியக்க வைத்தாலும், இன்னொரு பக்கம் இது அந்தரங்கத்தின் மீதான ஊடுருவலாக அமைந்துவிடாதா எனும் கேள்வியும், அச்சமும் எழாமல் இல்லை.

கூகுள் இதை உணராமல் இல்லை. அதானால் தான் காமிரா என்று எல்லோரும் உணர்ந்து கொள்ளும் வகையில் இது வடிவமைக்கப்பட்டுள்ளது. இதில் இருந்து வெளியாகும் சிவப்பு ஒளியும் காமிரா படமெடுத்துக்கொண்டிருப்பதை உணர்த்தும் என்பதால் எதிரே இருப்பவர்கள் அறியாமல் படமெடுக்கப்படும் அபாயம் இல்லை, தவிர இதன் பயன்பாடு பெரும்பாலும் வீட்டு சூழலில் என்பதால் இதன் மீதான எதிர்பார்ப்பும் மாறுபட்டதாகவே இருக்கும் என கருதப்படுகிறது.

மேலும், இதில் பதிவாகும் காட்சிகள் வேறு எங்கும் தானாக சேமிக்கப்படாது என குறிப்பிடப்பட்டுள்ளது. இவற்றில் இருந்து தேர்வு செய்யப்பட்ட புகைப்படங்கள் மட்டுமே கிளவுட் வசதியில் ஒருங்கிணைக்கப்படும். எனவே புகைப்படங்கள் தவறாக பயன்படுத்தப்படும் வாய்ப்பும் குறைவு என கருதலாம். இந்த காமிரா அதன் உரிமையாளருக்கே விசுவாசமாக இருக்கும் என எதிர்பார்க்கப்படுகிறது. வீட்டில் தெரிந்த முகங்களுக்கு பழகி அவர்களை படமெடுக்கவே முற்படும் என்பதால் பூங்காவில் சென்று அமர்ந்திருக்கும் போது கூட, மற்ற குழந்தைகளை விட்டு, உரிமையாளர் குழந்தையின் விளையாட்டையே இது பதிவு செய்ய முற்படும். எல்லாம் செயற்கை நுண்ணறிவு செய்யும் மாயம்.

தினசரி வாழ்க்கை காட்சிகளை இடைவிடாமல் பதிவு செய்யும் வசதி தொழில்நுட்ப உலகில் லைப்லாகிங் என சொல்லப்படுகிறது. புதுமையான கருத்தாக்கம் என்பதை கடந்து இது நடைமுறை வாழ்க்கையில் இன்னும் பயன்பாட்டிற்கு வந்துவிடவில்லை. ஒருவிதத்தில் கூகுள் காமிராவும் இந்த பிரிவின் கீழ் தான் வருகிறது. இந்த காமிரா எந்த வகையான வரவேற்பை பெறுகிறது என்பதை பொருத்திருந்து தான் பார்க்க வேண்டும். ஆனால் இதை தனித்து பார்ப்பதற்கு இல்லை. ஸ்மார்ட்போன் தவிர வீடுகளில் தானியங்கி சாதனங்கள் நுழையத்துவங்கிவிட்டன. அமேசான் மற்றும் ஆப்பிள் நிறுவனங்கள் இந்த வகை சாதனங்களில் கவனம் செலுத்தி வருகின்றன. கூகுளும் தன்பங்கிற்கு கூகுள் ஹோம் உள்ளிட்ட சாதனங்களை அறிமுகம் செய்திருக்கிறது. வீடுகளை இல்லங்களை ஸ்மார்ட் இல்லமாக்கும் போட்டியில் கூகுளும் தன்னை தீவிரமாக இணைத்துக்கொண்டுள்ளது. இதனால் சராசரி வாழ்க்கை மேம்படுமா என்பது மில்லியன் டாலர் கேள்வி தான் அல்லவா!

 

 

வீடியோ புதிது: அழுகையின் பின்னே உள்ள அறிவியல்

ஆனந்தத்திலும் கண்ணீர் பெருகலாம், சோகத்திலும் கண்ணில் நீர் வரலாம். இன்னும் பல காரணங்களினால் கண்ணீர் பெருகலாம். எல்லாம் சரி, கண்ணீர் ஏன் வருகிறது என்பது தெரியுமா? இந்த கேள்விக்கு பதில் தெரிந்து கொள்ள விரும்பினால், ஆசாப் சயின்ஸ் யூடியூப் சானலின் நாம் ஏன் கண்ணீர் விடுகிறோம் எனும் வீடியோவை பார்க்கலாம். அழுகையின் பின்னே உள்ள விஞ்ஞானத்தை மிக எளிதாக இந்த வீடியோ விளக்குகிறது. சராசரி கண்ணீர், அன்னிச்சை உணர்வாக வரும் கண்ணீர், உணர்ச்சி பெருக்கால் வரும் கண்ணீர் என அழுகையில் அடிப்படையில் மூன்று வகை இருப்பதை தெரிந்து கொள்வதோடு, ஆனந்தக்கண்ணீர் மற்றும் உணரச்சி பெருக்கிலான கண்ணீர் உள்ளிட்டவை, பரிணாம நோக்கில் மற்றவர்களுக்கு தகவல் தெரிவிப்பதற்கான சமிக்ஞ்சை என்பது உள்ளிட்ட விளக்கத்தையும் தெரிந்து கொள்ளலாம்.

வீடியோவை காண: https://www.youtube.com/watch?v=QGdHJSIr1Z0

 

 

செய்தி புதிது; 360 கோணத்தில் காணும் வசதி

விர்ச்சுவல் ரியாலிட்டி மற்றும் 360 கோணத்திலான வீடியோக்கள் தான் அடுத்த பெரிய சங்கதி என பேசப்படுகிறது. இந்த வசதியை அளிக்கும் விர்ச்சுவல் ரியாலிட்டி சாதனங்களும் வரிசையாக அறிமுகமாகி கொண்டிருக்கின்றன. ஆனால் இந்த வகை உள்ளடக்கத்தை காண்பதில் சிக்கல் இல்லாமல் இல்லை. இந்த வீடியோக்களை டவுண்லோடு செய்த பிறகு அவற்றை காண தனியே பிளேயரை பயன்படுத்த வேண்டும். இந்த குறையை போக்கும் வகையில், முன்னணி பிரவுசர்களில் ஒன்றான ஓபரா விர்ச்சுவுவல் ரியாலிட்டி காட்சிகளுக்கான பிளேயர் வசதியையும் தனது பிரவுசரில் இணைத்துள்ளது. இதன் மூலம், பயனாளிகள் வி.ஆர் சாதங்களை மாட்டிக்கொண்டு எந்த சிக்கலும் இல்லாமல் மெய்நிகர் உலகில் பயணிக்கலாம். இதற்கென தனியே பிளேயரை டவுண்லோடு செய்யவேண்டிய அவசியமில்லை.

தகவல் புதிது: நோபல் பரிசு தகவல்களை அறிய …

நோபல் பரிசு தொடர்பான அறிவிப்புகளையும், செய்திகளையும் ஒரே இடத்தில் அறிய விருப்பம் எனில், நோபல் விருது குழுவின் அதிகார பூர்வ டிவிட்டர் பக்கத்தை பின் தொடரலாம். (@NobelPrize) நோபல் குழுவின் அறிவிப்புகள் அனைத்தும் இந்த பக்கத்தில் குறும்பதிவுகளாக சுடச்சுட பகிரப்படுகின்றன. அறிவிப்புகள் தவிர நோபல் பரிசு தொடர்பான முக்கிய செய்திகள் மற்றும் கட்டுரைகளுக்கான இணைப்புகளையும் ரிடிவீட் வடிவில் அறியலாம். டிவிட்டரில் இருப்பவர்கள் தாங்கள் பின் தொடரும் டிவிட்டர் முகவரிகளில் இந்த முகவரியையும் சேர்த்துக்கொள்ளலாம்.

 

 

 

தளம் புதிது: நேரம் என்ன நேரம்!

 

நவீன உலகில் இரவு பகல் பார்க்காமல் தான் உழைக்க வேண்டியிருக்கிறது. அதோடு, நம்முடைய பணி தொடர்புகள் உலக அளவில் விரிந்திருப்பதால், நாம் பகலில் பணியாற்றும் போது, மறுமுனைவில் இருப்பவர்களுக்கு அது இரவா, பகலா என அறிந்து கொள்வதும் அவசியமாகிறது. இதற்கு உதவும் வகையில், உலக நேரங்களை உள்ளூர் நேரத்திற்கு ஏற்ப மாற்றிக்காட்டுகிறது ’மைடைம்சோன்’ இணையதளம். குரோம் பிரவுசருக்காக இது வழங்கும் நீட்டிப்பு சேவை மூலம், இந்த வசதியை மிக எளிதாக பயன்படுத்திக்கொள்ளலாம். உதாரணத்திற்கு இமெயில் மூலம் வெளிநாட்டில் உள்ள ஒருவருடன் சந்திப்புக்கான திட்டமிடலில் ஈடுபடும் போது, இங்குள்ள நேரத்தை குறிப்பிட்டு சம்மதமா என கேட்கும் போது, வலப்பக்கமாக கிளிக் செய்தால், மெயிலை பெறுபவர் ஊரில் என்ன நேரம் என மாற்றிக்காட்டுகிறது.

 

இணைய முகவரி: https://mytimezone.io/

 

 

 

 

 

 

படிவங்களுக்கான இணையதளம்

TidyForm-670x459விண்ணப்ப படிவங்கள் அல்லது ஆவணங்களுக்கான இணைய காப்பகமாக டைடிபார்ம் இணையதளம் விளங்குகிறது. இந்த தளத்தில் பல வகையான படிவங்களை காணலாம். எக்செல் கோப்புகள், வேலைவாய்ப்பு விண்ணப்ப படிவம், வரவு செலவு வடிவங்கள் என பல வகையான ஆவண வடிவ நகல்களை இந்த தளத்தில் காணலாம். 2,000 க்கும் மேற்பட்ட வகைகளில் 20,000 க்கும் மேற்பட்ட படிவங்கள், ஆவணங்களின் நகல்கள் இந்த தளத்தில் பட்டியலிடப்பட்டுள்ளன.

செலவு கணக்கு அறிக்கை, வாராந்திர அறிக்கை, இன்வாய்ஸ், குடும்ப பட்ஜெட் என பலவிதமான வடிவங்கள் இந்த பட்டியலில் உள்ளன. வர்த்தக தேவை முதல் வாழ்க்கை வரை எல்லா விதமான தேவைகளுக்கும் இவை கைகொடுக்கும்.

பயணர்கள் தங்களுக்கு தேவையான வகையை கிளிக் செய்து அதில் உள்ள வடிவங்களில் இருந்து தேர்வு செய்து கொள்ளலாம்.

ஒவ்வொரு தலைப்பாக கிளிக் செய்து பார்க்கலாம் அல்லது தேவையான குறிச்சொல்லை குறிப்பிட்டு தேடிப்பார்க்கலாம். குறிப்பிட்ட ஆவண நகல் வடிவத்தை தரவிறக்கம் செய்து பயன்படுத்தும் வசதியும் இருக்கிறது.

இணைய முகவரி: https://www.tidyform.com/

 

——-\

 

செயலி புதிது: புதுமையான உரையாடலுக்கு உதவும் செயலி

மெசேஜிங் பரப்பில் புதிய செயலியாக எக்சேட்லி.மி செயலி அறிமுகம் ஆகியுள்ளது. ஐபோன்களுக்கான அறிமுகம் ஆகியுள்ள இந்த செயலி புதுமையான முறையில் மற்றவர்களுடன் தொடர்பு கொள்வதை சாத்தியமாக்குவதாக தெரிவிக்கிறது.

மேசேஜிங் செயலிகள் பொதுவாக ஏற்கனவே அறிந்த நபர்களுடன் தொடர்பு கொள்ள உதவுகின்றன. இந்த செயலி மாறுபட்ட வகையில், ஒத்த கருத்துள்ளவர்களி அறிந்து தொடர்பு கொள்ள வழி செய்வதாக தெரிவிக்கிறது.

இந்த செயலியில் ஒளிப்படத்தை பதிவேற்றிவிட்டு, பயனாளிகள் தங்களைப்பற்றி தெரிவித்து அதனடிப்படையில் தங்களைப்போலவே உள்ளவர்களை தேடலாம். பின்னர் அவர்களுடன் தொடர்பு கொண்டு உரையாடலில் ஈடுபடலாம்.

மெசேஜிங் பரப்பில் ஏற்கனவே அதிக செயலிகள் இருக்கும் நிலையில், இந்த புதுமையான செயலியால் எந்த அளவு வரவேற்பை பெற முடியும் என பார்க்கலாம்./

மேலும் தகவல்களுக்கு: http://exactly.me/

கண்ணை நம்பாதே! ஒளிப்படங்கள் ஏமாற்றும்…

42570D2B00000578-4697160-One_of_these_images_has_been_changed_but_which_one_is_it_and_whe-a-90_1500359733849இனி அடுத்தமுறை இணையத்தில் ஒளிப்படங்களை பார்த்து ரசிக்கும் போது கொஞ்சம் கூடுதல் கவனம் செலுத்துங்கள். கண்ணில் விளக்கெண்ணெய் விட்டுக்கொண்டு பார்ப்பது என்பார்களே, அது போல கூட நீங்கள் காணும் ஒளிப்படத்தை ஆய்வு செய்யுங்கள். அதிலும் முக்கியமாக, ஒரு ஒளிப்படம் உங்களை கவர்ந்து அதை இணையவெளியில் பகிர்ந்து கொள்ளத்தோன்றும் நிலையில், அந்த படத்தை ஒருமுறைக்கு இருமுறை கூர்ந்து கவனிப்பது நல்லது. ஏனெனில், அந்த படம் போலியான ஒளிப்படமாக கூட இருக்கலாம். எனவே நீங்களும் ஏமாந்து, மற்றவர்களையும் ஏமாற செய்யக்கூடாது அல்லவா? அதனால் தான், ஒளிப்படங்கள் விஷயத்தில் கொஞ்சம் எச்சரிக்கை தேவை.

இது என்ன வம்பா பேச்சோ என்று நீங்கள் நினைக்கலாம். ஆனால் இணைய யதார்த்தம் இப்படி தான் இருக்கிறது. இணையத்தை ஒரு பக்கம், ஃபேக் நியூஸ் எனப்படும் பொய்ச்செய்தி உலக்கிக்கொண்டிருக்கிறது என்றால் இன்னொரு பக்கம் பொய் படங்கள் பெரிய பிரச்சனையாக இருக்கிறது. அண்மையில் இது தொடர்பாக முக்கியமான ஆய்வு முடிவு ஒன்றும் வெளியாகி இருக்கிறது. அதைப்பற்றி பார்க்கும் முன், முதலில் பொய் படங்களின் பிரச்சனையை சுருக்கமாக பார்த்துவிடலாம்.

ஃபேக் நியூஸ் பிரச்சனை பற்றி நீங்கள் அறிந்திருக்கலாம். இணையத்தில் நிஜ செய்திகள் ;போலவே வெளியிடப்படும் உண்மை அல்லாத செய்திகளே இவ்வாறு கூறப்படுகின்றன. உண்மையான இணையதளம் போல தோன்றும் இணையதளங்களில் வெளியிடப்படுவதும், கவனத்தை ஈர்க்கும் பளிச் தலைப்புகளும், விறுவிறுப்பான விவரிப்பும் பொய்ச்செய்திகளின் முக்கிய அம்சங்களாக அமைகின்றன. பெரும்பாலான இணையவாசிகள் இவற்றை அடையாளம் காண முடியாமல் ஏமாந்து போவதும், அதைவிட முக்கியமாக இவற்றை சமூக ஊடகங்களில் தாராளமாக பகிர்ந்து கொண்டு பிரபலமாக்குவதும் மோசமான தாக்கத்தை ஏற்படுத்தி வருகிறது. சமூக வலைப்பின்னல் சேவையான பேஸ்புக் மற்றும் கூகுளில் இத்தகைய பொய்ச்செய்திகள் வடிகட்டப்படாமல் தலைகாட்டுவதும் பெரும் விவாதத்தை ஏற்படுத்தியுள்ளது.

பொய்ச்செய்திகளை கண்டறிவது எப்படி? கட்டுப்படுத்துவது எப்படி? களைவது எப்படி? என்றெல்லாம் விவாதம் தீவிரமாகி இருக்கிறது. இதற்காக என்றே பிரத்யேக அல்கோரிதம்கள் உருவாக்கப்படுகின்றன. இந்த பொறுப்பை மென்பொருள்கள் வசம் ஒப்படைப்பது பலன் தராது, விக்கிபீடியா பாணியில் இணைய கூட்டமே இந்த கண்டறிதலை சிறப்பாக செய்ய முடியும் எனும் நம்பிக்கையில், விக்கிபீடியா நிறுவனர் ஜிம்மி வேல்சும் தன் பங்கிற்கு, விக்கிடிரிப்யூன் எனும் புதிய இணையதளத்தை நிறுவியிருக்கிறார்.

பொய்ச்செய்திகள் போலவே, பொய் படங்களும் இணையத்தில் உலா வருகின்றன. அதாவது ஒளிப்படங்களை திருத்தி மேம்படுத்த உதவும் போட்டோஷாப் மென்பொருள் கொண்டு, மாற்றப்பட்ட படங்கள். பொதுவாக ஒளிப்படத்தின் பின்னணியில் உள்ள ஒளி அடர்த்தியை மாற்றுவது, சின்ன சின்ன குறைகளை சரி செய்வது போன்றவை மூலம் ஒளிப்படத்தை மெருகேற்றுவதற்காக போட்டோஷாப் பயன்படுகிறது. வண்ணத்தை கூட்டலாம், குறைக்கலாம் என்றாலும், படத்தின் மூல அம்சங்களில் கை வைக்க கூடாது. அதாவது படத்தில் இல்லாத அம்சத்தை சேர்ப்பது, இருக்கும் அம்சத்தை நீக்குவது போன்றவற்றை செய்யக்கூடாது. இப்படி மூல அம்சங்களில் மாற்றம் அல்லது திருத்தங்களை செய்தால் அந்த படம் பொய் படமாக கருதப்படுகிறது.

ஆர்வக்கோளாறு கொண்ட இணையவாசிகள் பலர் இப்படி போடோஷாப் செய்த படங்களை வெளியிட்டு மாட்டிக்கொண்டிருக்கின்றனர். இதைவிட மோசம், முன்னணி ஒளிப்பட கலைஞர்கள் சிலரும் இத்தகைய சர்ச்சையில் சிக்கி இருக்கின்றனர். அதே போல முன்னணி வலைப்பதிவாளர்கள் சிலரும் கூட, ஒளிப்படத்தில் கையை வைத்து மாட்டிக்கொண்டிருக்கின்றனர். அண்மையில் கூட, பிரபல பேஷன் மற்றும் சுற்றுலா வலைப்பதிவாளரான அமீலியா லயானா என்பவர், போட்டோஷாப் மூலம் மாற்றப்பட்ட படங்களை தனது இன்ஸ்டாகிராம் பக்கத்தில் பகிர்ந்து கொண்டது கண்டுபிடிக்கபட்டு கடும் விமர்சனத்திற்கு இலக்கானார்.

இன்னொரு பக்கம் பார்த்தால், சமூக ஊடகங்களில் பகிரப்பட்டு பரபரப்பாக பேசப்படும் பல படங்கள் உண்மையில் மாற்றம் அல்லது திருத்தம் செய்யப்பட்டவையாக இருப்பதை பலரும் உணர்வதில்லை. இந்த பின்னணியில் தான், பிரிட்டனின் வார்விக் பல்கலைக்கழகத்தை சேர்ந்த ஆய்வுக்குழு ஒன்று, பொய் படங்கள் தொடர்பான ஆய்வை நடத்தி, அதன் முடிவுகளை வெளியிட்டுள்ளது.

இந்த ஆய்வின் போது, 707 பயனாளிகளிடம் இரண்டு வகையான ஒளிப்படங்கள் காண்பிக்கப்பட்டுள்ளன. இவற்றில் ஐந்து மூலப்படங்கள் மற்றும் ஐந்த படங்கள் டிஜிட்டல் முறையில் மாற்றப்பட்டவை. இந்த படங்களில் பொய்யான அம்சங்களை கண்டறிய முடியுமா எனும் கேள்வியோடு, அவற்றை கண்டறியும் சோதனையில் ஈடுபடுத்தப்பட்டனர். இவர்களில் 60 சதவீதம் பேருக்கு மேல் பொய் படங்களை கண்டறிந்தாலும், அதில் என்ன பிரச்சனை என கண்டறிய முடியாமல் திண்டாடியிருக்கின்றனர்.

இன்னொரு சோதனையில், பொய்படங்கள் பற்றிய தகவல் தெரிவிக்காமல் இரண்டு வகையான படங்களை பார்த்து வித்தியாசத்தை கண்டறியுமாறு கேட்கப்பட்டனர். இவர்களில் 65 சதவீதம் பேர் படத்தில் வில்லங்கம் இருப்பதை கண்டுபிடித்தாலும், பெரும்பாலானோரால் படத்தில், எந்த இடத்தில் பிரச்சனை இருக்கிறது என கண்டறிய முடியவில்லை.

இந்த ஆய்வு முடிவுகள் தொடர்பான விரிவான கட்டுரை அறிவியல் சஞ்சிகை ஒன்றில் வெளியிடப்பட்டுள்ளது. ஒரு ஒளிப்படம் உண்மையானதா? பொய்யானதா? என்பதை கண்டறியும் திறன் மக்களிடம் குறைவாக இருப்பதை இந்த ஆய்வு சுட்டிக்காட்டுகிறது.

முனைவர் பட்ட ஆய்வாளர் சோபியா நைட்டிங்கேல் மற்றும் டெரிக் வாட்சன் உள்ளிட்டோர் இந்த ஆய்வை மேற்கொண்டுள்ளனர். ஒளிப்படங்களை ஆதாரமாக கொள்வதை இது சிக்கலாக்கும் என்று சோபியா கூறியிருக்கிறார். ஒளிப்படங்கள் நமது நினைவாற்றல் மீது மிகப்பெரிய தாக்கம் செலுத்துவதால், உண்மையான படத்தையும், பொய்யான படத்தையும் கண்டறிய முடியாதது நாம் நம்புவது மற்றும் நினைவில் கொள்வது மீது தாக்கம் செலுத்தலாம் என்கிறார் வாட்சன்.

இந்த ஆய்வு தொடர்பாக இணையதளம் ஒன்றும் அமைக்கப்பட்டுள்ளது; http://bit.ly/2uEbjow  இந்த தளத்தில் நீங்களும் கூட பொய பட கண்டறிதல் சோதனைக்கு உங்களை உட்படுத்திக்கொள்ளலாம். உங்கள் திறமையை சோதித்துக்கொள்வதோடு, இணைய ஆய்வுக்கு பங்களிப்பு செலுத்தியது போலவும் இருக்கும்.

 

 

தளம் புதிது; செய்திகளுக்கான சமூக வலைப்பின்னல்

செய்திப்பிரியர்களை உற்சாகத்தில் ஆழ்த்தும் வகையில், செய்திகளை தெரிந்து கொள்வதற்காக புதிய இணையதளம் ஒன்று அறிமுகம் ஆகியிருக்கிறது. காங்ஸ்டர்ஸ் எனும் அந்த தளம், செய்திகளை கண்டறிவதற்கானது மட்டும் அல்ல, பகிர்ந்து கொள்வதற்கானதாகவும் இருக்கிறது. அதாவது செய்திகளுக்கான வலைப்பின்னல் தளம் போல இது உருவாக்கப்பட்டுள்ளது.

இதில் சக உறுப்பினர்கள் பகிர்ந்து கொள்ளும் செய்திகளை பார்ப்பதோடு, அவற்றை சமூக ஊடகங்களிலும் பகிர்ந்து கொள்ளலாம். இதில் முன்னிலை பெறும் செய்திகளை கிளிக் செய்தால் அவற்றின் சுருக்கத்தை வாசிக்கலாம். மேலும் கிளிக் செய்தால் விரிவான செய்தியை வாசிக்கலாம்.

பலவித தலைப்புகளில் செய்திகள் வெளியாகின்றன. தினமும் ஒரு லட்சத்திற்கு மேற்பட்ட செய்திகளை பரிசீலித்து செய்திகளை தேர்வு செய்து வழங்குவதாக இந்த தளத்தின் அறிமுகப்பகுதியில் குறிப்பிடப்பட்டுள்ளது.

சமூக செய்தி கண்டறிதல் சேவையாக அறியப்பட்ட டிக் உள்ளிட்ட தளங்கள் வழங்கிய சேவையை போன்றதே என்றாலும், செய்திகளை அறிந்து கொள்வதில் ஆர்வம் உள்ளவர்கள் இந்த தளத்தை பயன்படுத்திப்பார்க்கலாம்.

செய்திகளை தேடிப்பார்க்கும் மற்றும் சமர்பிக்கும் வசதி இருக்கிறது.

இணைய முகவரி: http://gongsters.com/

 

 

 

செயலி புதிது: வரலாற்றில் நடந்தது என்ன?

வரலாற்று நிகழ்வுகளை உள்ளங்கையில் கொண்டு வரும் வகையில் வாட் ஹாப்பண்ட் டுடே இன் ஹிஸ்டிரி, செயலி உருவாக்கப்பட்டுள்ளது. ஐபோனுக்காக உருவாக்கப்பட்டுள்ள இந்த செயலியில், ஒவ்வொரு மாதத்திற்கான முக்கிய வரலாற்று நிகழ்வுகள் சுட்டிக்காட்டப்படுகின்றன. அவற்றில் எந்த நிகழ்வு தொடர்பான கூடுதல் தகவல்களையும் தெரிந்து கொள்ளலாம். நிகழ்வுகளின் ஒளிப்படங்களையும் காணலாம். எல்லா நிகழ்வுகளுமே கவனமாக தேர்வு செய்யப்பட்டுள்ளதாக குறிப்பிடப்பட்டுள்ளது. முப்பரிமான டச் முன்னோட்ட வசதியும் இருப்பதாக தெரிவிக்கப்பட்டுள்ளது.

நிகழ்வுகளை அறிவிக்கையாக பெறும் வசதியும் இருக்கிறது. இந்த வசதி மூலம் முக்கிய நிகழ்வுகளை தவறவிடாமல் இருக்கலாம். வரலாற்று நிகழ்வுகளில் ஆர்வம் உள்ளவர்களை கவரக்கூடிய செயலி இது. ஆண்ட்ராய்டு வடிவம் எப்போது வெளியாகும் என்றுத்தெரியவில்லை.

மேலும் தகவல்களுக்கு: http://apple.co/2gX5U6R

 

 

 

சைபர்சிம்மன்

 

இணையத்திற்கு டயல் செய்யவும்!

626700_49593_64487_ofvUruAIGஇணைய வசதியை பயன்படுத்த கம்ப்யூட்டரோ. லேப்டாப்போ வேண்டும் என்ற அவசியம் கூட இல்லை, கையில் இருக்கும் ஸ்மார்ட் போனிலேயே இணையத்தை வரவைத்துக்கொள்ளலாம். அதன் தொடுதிரையில் கட்டளைகள் இடுவதன் மூலம் இணைய பக்கங்களையும், இணைய சேவைகளையும் அணுகலாம். அந்த அளவுக்கு கம்ப்யூட்டரி தொழில்நுட்பமும், தொலைத்தொடர்பு நுட்பமும் மேம்பட்டிருக்கிறது.

எல்லாம் சரி, கொஞ்சம் காலத்தில் பின்னோக்கிச்சென்று பழைய தொலைபேசியில் இணையத்தை பயன்படுத்த முடிந்தால் எப்படி இருக்கும்? பழைய தொலைபேசி என்றால் கருப்பு வெள்ளை கால திரைப்படங்களில் பார்க்க கூடிய, கைகளால் சுழற்றி எண்களை டயல் செய்யக்கூடிய தொலைபேசி. டிஜிட்டல் தலைமுறையை சேர்ந்தவர்கள் இந்த வகை தொலைபேசியை அறிந்திருக்க வாய்ப்பில்லை. பழைய தலைமுறையை சேர்ந்தவர்களே கூட அநேகமாக இந்த வகை சுழல் டயல் தொலைபேசிகளை மறந்திருப்பார்கள். இந்த குறிப்பை படிதத்துமே அவர்கள் அந்த கால தொலைபேசி நினைவில் மூழ்கிவிட வாய்ப்பிருக்கிறது.

உள்ளங்கையில் இணையம் வந்து நிற்கும் செல்போன் யுகத்தில், இந்த பழைய போனை இணையத்துடன் இணைத்து வியக்க வைத்துள்ளனர் டென்மார்க் நாட்டின் கோப்பன்ஹேகனில் உள்ள இன்ஸ்டிடியூட் ஆப் இண்டரேக்‌ஷன் டிசைன் கல்வி நிறுவனத்தைச்சேர்ந்த மாணவர்கள், வடிவமைப்பு போட்டிக்காக இந்த இணைய போனை உருவாக்கி அதற்கு பரிசும் பெற்றிருக்கின்றனர்.

இந்த புதுமையான ’இணைய போன்’ மூலம், எந்தவித திரை மட்டும், கம்ப்யூட்டர் போன்ற இடைமுக சாதனம் இல்லாமல் இணையத்தை அணுக வழி செய்துள்ளனர். இது முற்றிலும் வித்தியாசமான மற்றும் புதுமையான அனுபவமாக இருப்பதோடு, இணையத்தை புரிந்து கொள்ளும் வகையிலும் அமைந்திருக்கிறது.

இணையத்தை பயன்படுத்த வேண்டும் என்றால், கம்ப்யூட்டர் வேண்டும், பிரவுசர் வேண்டும், அதில் இணையதள முகவரியை டைப் செய்ய வேண்டும், பின்னர் இணைய பக்கம் தோன்ற திரை (மானிட்டர்) வேண்டும். இப்படி எதுவுமே இல்லாமல், இணையத்தை எப்படி அணுக முடியும் என்ற குழப்பம் ஏற்படலாம். இங்கு தான் இணைய போனின் புதுமை இருக்கிறது.

எந்த இணையதளத்தை அணுக விருப்பமோ, அந்த தளத்திற்கான ஐபி முகவரியை முதலில் இந்த போனின் சுழற்சி டயலில் ஒவ்வொரு எண்ணாக சுழற்ற வேண்டும். முழு ஐபி முகவரியையும் சுழற்றிய பிறகு அந்த இணைய பக்கத்திற்கான தொடர்பு போனில் கிடைக்கும். மறுமுனையில் இருந்து குரல் வழி சேவையாக இணைய பக்கத்தில் உள்ள தகவல்கள் வாசிக்கப்படும். இணைய முகவரிகளுக்கு இணையான எபி எண்களை அறிந்து கொள்வதற்காக என்றே பழைய தொலைபேசி கையேடு போல ஒரு சைபர் கையேடு உருவாக்கப்பட்டுள்ளது. அந்த கையேட்டில் பார்த்து ஐபி எண்களை தெரிந்து கொண்டு அவற்றை டயல் செய்ய வேண்டும்.

இன்னும் கொஞ்சம் புதுமை தேவை எனில், கூடுதலாக உள்ள நான்கு பட்டன்களை அழுத்தி, கட்டுரைகள், தொகுப்பு, டவெலப்பர் உள்ளிட்ட சேவைகளை பெறலாம். தலையை சுற்றி மூக்கை தொடுவது போல, இணையத்தை இப்படி கஷ்டப்பட்டு அணுக என்ன அவசியம் என்று கேட்கலாம்.

இணையத்தின் செயல்பாட்டை எல்லோருக்கும் எளிதாக புரிய வைப்பதற்கான முயற்சி தான் இது என்கின்றனர் இணைய போனை உருவாக்கிய மாணவர்கள். இணையம் என்பது கிட்டத்தட்ட அனைவருக்கும் பழக்கமானதாக இருந்தாலும் அதன் செயல்பாடு என்பது பலருக்கும் புரியாத புதிராகவே இருக்கிறது. டொமைன் முகவரி, சர்வர், எச்டிஎம்.எல் போன்ற வார்த்தைகளை எல்லாம் மீறி, பின்னணியில் இணையம் எப்படி செயல்படுகிறது என்பது சாமனியர்களுக்கு குழப்பமானதாகவே இருக்கிறது.

தொலைபேசி செயல்பாட்டை அடிப்படையாக கொண்டு இணையம் செயல்படும் விதத்தை இந்த இணைய போன் விளக்கும் வகையில் அமைந்துள்ளது. இதில் உள்ள ஒவ்வொரு செயலும் இணையத்தின் செயல்முறையை ஒத்தே அமைந்திருக்கிறது. போன் புத்தக்கத்தில் முகவரியை தேடுவது என்பது, இணையத்தில் பிரவுசர்கள் இணைய முகவரியை தேடுவது போன்றது. 12 இலக்க எண்களை டயல் செய்துவிட்டு காத்திருப்பது என்பது, பிரவுசர்கள் குறிப்பிட்ட இணையபக்கத்தில் உள்ள தகவல்களை கேட்டு பெறுவதற்கு நிகரானது. பின்னர் போனில் தகவல்கள் வாசிக்கப்படுவது என்பது எச்டிஎம்.எல் குறியீடுகளை எல்லோருக்கும் புரியும் மொழியில் இணையம் தருவதற்கு நிகரானது. மற்ற நான்கு பட்டன்கள், இணையத்தில் பிரவுசர்கள் மூலம் நிறைவேற்றிக்கொள்ளும் மற்ற செயல்முறைகளை குறிக்கும்.

டிஜிட்டல் யுகத்தில் மிகவும் பழக்கமாகி விட்ட இணையத்தில் உலாவுதலை இந்த போன் மூலம் முற்றிலும் மாறுபட்ட வகையில் அணுகலாம். கோப்பன்ஹேகன் நகரில் நடைபெறும் வடிவமைப்பு கண்காட்சியில் இந்த இணைய போன் காட்சிக்கு வைக்கப்பட்டிருந்தது. இதை பயன்படுத்திப்பார்த்தவர்கள் எல்லாம், பழையும், புதுமையும் கைகுலுக்கும் இதன் தன்மை கண்டு வியந்திருக்கின்றனர். வியப்படைந்தது மட்டும் அல்லாமல், இணையத்தின் பின்னணியில் என்ன எல்லாம் நடக்கிறது என்பதையும் ஒரளவு புரிந்து கொண்டுள்ளனர்.

செய்திகள் வாசிக்க, வீடியோ பார்க்க என இணையத்தை பலரும் பயன்படுத்தினாலும் அதன் செயல்பாடு பற்றி பலருக்கும் சரியான புரிதல் இல்லை. அதனால் தான் கண்ணகுக்குத்தெரியாத பிரவுசர் மூலம் இணையத்தை அணுகுவதற்கு பதிலாக கண்களால் பார்க்க கூடிய தொலைபேசி சாதனம் மூலம் இணையத்தை கொண்டு வந்திருக்கிறோம் என்கிறார் இந்த புதுமையான முயற்சியின் பின்னே உள்ள மாணவர்கள். முதலில் இதற்காக ரவுட்டர்களை பயன்படுத்த நினைத்ததாகவும் ஆனால் அவை மிகவும் சிக்கலாக இருந்ததால் பழைய தொலைபேசியை தேர்வு செய்ததாகவும் கூறியுள்ளனர். பின்னர் ஆர்டியூனோ கம்ப்யூட்டருடன் தொலைபேசியை இணைத்து, டயல் செய்தால் இணைய தகவல்கள் கேட்கும் வகையில் ஏற்பாடு செய்துள்ளனர்.

இந்த இணைய போன் பார்வையாளர்களுக்கு புதுமையான அனுபவமாக இருப்பதோடு அதை உருவாக்கிய குழுவினருக்கு முக்கிய கற்றல் அனுபவமாகவும் அமைந்திருக்கிறது. தொலைபேசி என்பது எளிமையான சாதனம். அதை பயன்படுத்துவதும் எளிதானது. ஆனால் அதன் பயன்பாட்டு நோக்கத்தை மாற்றும் போது மிகவும் சிக்கலாகிவிடுகிறது என்கின்றனர். உதாரணமாக டயல் செய்தவுடன் இணைய பக்கம் வருவதற்கு பதில், அது டவுண்லோடு ஆக தாமதம் ஆனால் என்ன செய்வது? தவறான ஐபி எண்களை அழைத்தால் என்ன செய்வது? இது போன்ற கேள்விகள் பயணர்கள் அனுபவம் பற்றி யோசிக்க வைத்ததாக குழுவினர் தெரிவிக்கின்றனர்.

இணைய போன் பற்றி தகவல் அறிய: http://designawards.core77.com/Interaction/64487/The-Internet-Phone

டிஜிட்டல் தலைமுறைக்கு தனித்திறன் உண்டா?

GettyImages-150007692டிஜிட்டல் உலகிலும் மண்ணின் மைந்தர்கள் உண்டு. இவர்கள் டிஜிட்டல் பூர்வகுடிகள் என குறிப்பிடப்படுகின்றனர். ஆங்கிலத்தில் டிஜிட்டல் நேட்டிவஸ்!. பொதுவாக 1980 களுக்கு பிறகு பிறந்த தற்கால தலைமுறையினர் அனைவரும் இந்த பிரிவின் கீழ் வருகின்றனர். அதற்கு முந்தைய தலைமுறையினர் எல்லோரும் டிஜிட்டல் குடியேறிவர்கள் என கருதப்படுகின்றனர். இதை பாகுபாடு என கொள்வதா அல்லது வகைப்படுத்தல் என கொள்வதா என்பது கேள்விக்குறியது தான்.

இணையம் தொழில்நுட்பங்களையும், டிஜிட்டல் கருவிகளையும், சேவைகளையும் வெகு இயல்பாக பயன்படுத்தும் திறன் அடிப்படையில் இந்த வகைப்படுத்தல் அமைகிறது. இப்போது பிறக்கும் குழந்தைகள் ஐபேட் சாதனத்துடனும், ஸ்மார்ட்போனுடனும் பிறப்பதாக நாமே கூட பல முறை வியப்பதுண்டு அல்லவா! இப்படி வியக்க வைக்கும் பிள்ளைகள் தான் டிஜிட்டல் பூர்வகுடிகள். டிஜிட்டல் உலகம் அவர்களின் தாய் வீடு போல. எனவே அவர்களால் கம்ப்யூட்டரையும், ஸ்மார்ட்போனையும், பேஸ்புக்கையும், வாட்ஸ் அப்பையும் தானாகவே பழகிக்கொள்ள முடியும். டிஜிட்டல் சங்கதி என்று வரும் போது அவர்கள் பெற்றோர்களுக்கு மட்டும் அல்ல ஆசிரியர்களுக்கே பாடம் நடத்தக்கூடியவர்களாக இருப்பதாகவும் சொல்லலாம்.

இப்படி கம்ப்யூட்டரும், இணையமும் அவர்கள் உடன் பிறந்த நுட்பங்களாக இருப்பதால் கம்ப்யூட்டர் யுகத்திற்கு பிறந்தவர்கள் எல்லாம் டிஜிட்டல் மைந்தர்களாக அறியப்படுகின்றனர். முந்தைய தலைமுறையினர் இணைய பயன்பாட்டில் என்ன தான் கில்லாடிகளாக இருந்தாலும், அவர்கள் டிஜிட்டல் நுணுக்கங்களை கற்றுக்கொண்டு புதிய யுகத்திற்கு ஏற்ப மாறியவர்களாக கருதப்படுவதால், டிஜிட்டல் உலகில் குடியேறிவர்களாக குறிப்பிடப்படுகின்றனர். அதாவது டிஜிட்டல் இமிகிரண்ட்ஸ்!.

இந்த வகைப்படுத்தல் எந்த அளவுக்கு சரி என்பது இருக்கட்டும், இக்கால தலைமுறை டிஜிட்டல் தலைமுறையாக கருதப்படுவது ஏற்றுக்கொள்ளப்பட்டதாகவே இருக்கிறது. இளம் பெண்களும், பையன்களும், கையில் போனை வைத்துக்கொண்டு குறுஞ்செய்தி தட்டச்சு செய்யும் வேகத்தையும், காதில் இயர்போனை மாட்டிக்கொண்டு தன்னை மறந்தவர்களாக உலாவுவதையும் பார்க்கும் போது இவர்கள் வேறு கிரகத்தில் இருந்து வந்தவர்கள் போல தான் தோன்றும். இந்த அளவுக்கு தொழில்நுட்ப உலகில் மூழ்கி விடுவது நமக்கெல்லாம் சாத்தியம் இல்லை என முந்தைய தலைமுறையினர் எண்ணலாம்.

ஆனால் விஷயம் என்னவெனில் இதெல்லாம் வெற்று மாயை என ஆய்வாளர்கள் தெரிவித்துள்ளனர் என்பது தான். அதாவது முந்தைய தலைமுறையோ, இந்த தலைமுறையோ தொழில்நுட்ப பயன்பாடு என்று வரும் போது, யாருக்கும் தனித்திறன் எல்லாம் கிடையாது எனத்தெரிவித்துள்ளனர். டிஜிட்டல் பூர்வகுடிகள் எனும் கருத்தாக்க பலூனை ஊசியால் குத்தி காற்றுப்போக வைத்திருக்கும் இந்த ஆய்வை பற்றி பார்ப்பதற்கு முன், அமெரிக்க கல்வியாளரான மார்க் பிரென்ஸ்கை பற்றி கொஞ்சம் தெரிந்து கொள்வது நல்லது. ஏனெனில் இவர் தான், டிஜிட்டல் பூர்வகுடிகள் எனும் கருத்தாக்கத்தை துவக்கி வைத்தவர்.

2001 ம் ஆண்டு அவர் எழுதிய கட்டுரை ஒன்றில் தான் டிஜிட்டல் பூர்வகுடிகள், டிஜிட்டல் குடியேறியேறிவர்கள் எனும் கருத்தாக்கத்தை முன்வைத்திருந்தார். கட்டுரையின் தலைப்பே ’டிஜிட்டல் பூர்வகுடிகள், டிஜிட்டல் குடியேறியேறிவர்கள்’ என அமைந்திருந்தது. அமெரிக்க கல்வித்தரத்தில் ஏற்பட்டுள்ளதாக சொல்லப்படும் வீழ்ச்சி பற்றிய விவாதத்துடன் துவங்கிய இந்த கட்டுரையில், இதற்கான மூலக்காரணம் நம்முடைய மாணவர்கள் எல்லாம் மிகவும் மாறிவிட்டனர், இன்றைய மாணவர்கள் நம்முடைய கல்வி அமைப்பு கற்றுத்தரக்கூடியவர்களாக இல்லை என குறிப்பிட்டிருந்தார்.

கல்வி அமைப்பில் தேவையான மாற்றத்தை தொடர்ந்து வலியுறுத்தியவர், இன்றைய மாணவர்கள் புதிய மாணவர்களாக இருக்கின்றனர், அவர்கள் கம்ப்யூட்டர், வீடியோகேம், இணையத்தின் மொழியை இயல்பாக பேசும் டிஜிட்டல் பூர்வகுடிகளாக இருக்கின்றனர் என்றும் குறிப்பிட்டிருந்தார். மற்றவர்கள் எல்லாம், அதாவது டிஜிட்டல் உலகில் பிறக்காமல் புதிய தொழில்நுட்பத்தின் அம்சங்களால் ஈர்க்கப்பட்டு அவற்றை கற்றுக்கொண்டவர்களாகவே இருப்பதால் அவர்களை டிஜிட்டல் குடியேறியவர்கள் என்றும் குறிப்பிட்டிருந்தார். கல்வியாளர்களும், வர்த்தக நிறுவனங்களும் பழைய வழிகளை தூக்கியெறிந்துவிட்டு, டிஜிட்டல் தலைமுறைக்கு ஏற்ற புதிய வழிகளை கடைப்பிடிக்க வேண்டும் என்றும் இந்த கட்டுரையில் வாதிட்டிருந்தார்.

இதன் பிறகு டிஜிட்டல் பூர்வகுடிகள் எனும் கருத்தாக்கம் மெல்ல வலுப்பெற்று பரவலாகி விட்டது. கம்ப்யூட்டர் சார்ந்த தொழில்நுட்பங்கள் நிறைந்த யுகத்தில் பிறந்து வளரும் தலைமுறை, டிஜிட்டல் நுட்பங்களை தாய்மொழி போல கற்றுக்கொண்டு விடுவதாகவும் கருதுவதும் பரவலாக ஏற்றுக்கொள்ளப்பட்டுள்ளது. இந்த கருத்தாக்கம் அறிவியல் சார்ந்தது அல்ல என்பது மட்டும் அல்ல, இடைப்பட்ட காலத்தில் பல ஆய்வுகள் இந்த கருத்தாக்கத்தை கேள்விக்குள்ளாக்கி இருக்கின்றன.

இந்த வரிசையில் தான் அண்மையில், நெதர்லாந்து ஆய்வாளர் பால் கிற்ச்னர் ( ) மற்றும் அவரது சகா பெட்ரோ டி புருக்கரே ( ) இணைந்து நடத்திய ஆய்வு அமைந்துள்ளது. ’டீச்சிங் அண்ட் டிச்சர் எஜுகேஷன்’ எனும் சஞ்சிகையில் வெளியாகியுள்ள இந்த ஆய்வு, டிஜிட்டல் பூர்வகுடிகள் என இக்கால தலைமுறையினரை கருதுவதே ஒரு மாயை என தெரிவிக்கிறது. உயர் கல்வியில் நுழையும் புதிய இளம் மாணவர் தலைமுறைக்கான எந்த ஆதாரமும் இல்லை என்றும், இணைய தலைமுறை மற்றும் டிஜிட்டல் பூர்வகுடிகள் என்று சொல்வதெல்லாம் இப்போது நிகழும் மாற்றத்தை பிரதிபலிப்பதாக இல்லை என்றும் தெரிவிக்கப்பட்டுள்ளது. இளம் தலைமுறையைச்சேர்ந்த பலரும், முந்தைய தலைமுறை ;போல தான் தொழிநுட்பத்தை பயன்படுத்துவதாகவும் ஆய்வு தெரிவிப்பதாக இது தொடர்பான நேச்சர் பத்திரிகை கட்டுரை சுட்டிக்காட்டுகிறது.

மக்களை வழக்கமான முறையில் கற்றுக்கொள்ளக்குடியவர்களாக தான் பார்க்க வேண்டுமேத்தவிர, ஒரு குறிப்பிட்ட பிரிவினரை விஷேச திறன் கொண்டவர்களாக பார்க்க முடியாது என்று ஆய்வை முன்னின்று நடத்திய பால் கிற்ச்னர் கூறியுள்ளார். அது மட்டும் அல்ல, இணைய தலைமுறை ஒரே நேரத்தில் பல வேலை பார்க்க கூடியவர்களாக இருப்பதாக கூறப்படுவதையும் இந்த ஆய்வு மறுத்துள்ளது. வகுப்பில் பாடம் கேட்டுக்கொண்டே, போனில் செய்தி அனுப்புவது ஒரே நேரத்தில் பலவற்றை செய்யும் மல்டிடாஸ்கிங் ஆற்றல் அல்ல, பாடத்தில் கவனம் செல்லாமல் இருப்பது என தெரிவிக்கப்பட்டுள்ளது.

டிஜிட்டல் யுகம் தொடர்பான பிரதான மாயை தகர்க்கும் வகையிலான இந்த ஆய்வு பலவிதங்களில் இது முக்கியமானது தான். ஏனெனில் டிஜிட்டல் பூர்வகுடிகள் என்று யாருமே கிடையாது என இந்த ஆய்வு தெரிவிக்கிறது. இந்த மாயை கலைவது நல்லது தான்.

இந்த இடத்தில், டிஜிட்டல் பூர்வகுடிகள் கருத்தாக்கத்தை முதலில் தெரிவித்த மார்க் பெர்ன்ஸ்கையை மீண்டும் நினைவில் கொள்ள வேண்டும். பெர்ன்ஸ்கை, இந்த கருத்தாக்கம் ஏற்படுத்திய விவாதங்களையும், சர்ச்சையையும் அறியாமல் இல்லை. எனவே தான் இந்த கருத்தாக்கத்திற்கு ஏற்கனவே விளக்கம் அளித்துள்ளார். டிஜிட்டல் பூர்வகுடி எனும் பதத்தை பலரும் தவறாக புரிந்து கொண்டுள்ளனர், நம்மைச்சுற்றி நடக்கும் மாற்றத்தை குறிப்பதற்கான உருவகமே இந்த பதம் என்றும் அவர் தெரிவித்துள்ளார். குறிப்பிட்ட காலத்திற்கு பிறகு பிறந்தவர்களுக்கு எல்லாம் தொழில்நுட்பம் பற்றி எல்லாம் தெரியும் எனும் அர்ததத்தில் இந்த பதம் அமையவில்லை என்றும் அவர் விளக்கம் அளித்திருந்தார். இந்த பதம் உண்மையில், தொழில்நுட்பம் தொடர்பான அணுகுமுறையை மட்டுமே குறிப்பதாகவும் தெரிவித்திருந்தார்.

அது மட்டும் அல்ல, இந்த பதத்திற்கு பதிலாக டிஜிட்டல் ஞானம் எனும் பதத்தை அவர் பயன்படுத்தி வருகிறார்.: http://marcprensky.com/digital-native/

 

 

தளம் புதிது: பிட்காயினால் என்ன பயன்?

எண்ம நாணயம், இணைய நாணயம் என்றெல்லாம் பலவிதமாக குறிப்பிடப்படும் மெய்நிகர் நாணயமான பிட்காயின் தொடர்பான ஆர்வம் பரவலாக அதிகரித்து வருவதோடு, அதன் மதிப்பும் அதிகரித்தபடி தான் இருக்கிறது. மையமில்லாத பணம், எதிர்கால பணம் போன்ற காரணங்களுக்காக பிட்காயினை ஆதரிப்பவர்கள் இருந்தாலும், பிட்காயினை ஒரு முதலீடாக பார்ப்பவர்களும் இருக்கின்றனர். அதற்கேற்பவே பிட்காயினுக்கு நிகரான மதிப்பும் எக்கச்சக்கமாக உயர்ந்திருக்கிறது.

சில ஆண்டுகளுக்கு முன் கொஞ்சம் போல பிட்காயினை வாங்கி வைத்திருந்தால் இன்று அதன் மதிப்பு எங்கோ போயிருக்கும் என்றும் சொல்லப்படுவதுண்டு. இப்படி பிட்காயின் மதிப்பு எங்கே போயிருக்கும் என்பதை உணர்த்துவதற்காக என்றே ஒரு இணையதளம் அமைக்கப்பட்டுள்ளது. வாட் இப் பிட்காயின் எனும் அந்த தளத்தில் 2011 ம் ஆண்டு முதல் பிட்காயினில் முதலீடு செய்திருந்தால் அதற்கு இப்போது என்ன மதிப்பு இருக்கும் என கணக்கிட்டு சொல்லப்படுகிறது.

பிட்காயின் மதிப்பை தெரிந்து கொள்ள இந்த இணையதளம் உதவலாம். ஆனால் இந்த தளத்தைப்பார்த்துவிட்டு பிட்காயினை வாங்க தீர்மானிப்பது எல்லாம் ரிஸ்கானதாக இருக்கும். ஏனெனில் பிட்காயினை ஒரு முதலீடாக கருதலாம் தப்பில்லை. ஆனால் எல்லா முதலீடுகள் போலவே அதுவும் ரிஸ்கானது தான் என்பதை உணர வேண்டும்.

இணைய முகவரி: http://whatifbitcoin.com

 

செயலி புதிது; ஒளிப்படங்களை மேம்படுத்தும் செயலி

ஸ்மார்ட்போன்களில் ஒளிப்படங்களை எடுக்கும் ஆர்வம் கொண்டவர்களுக்கு உதவக்கூடிய பல்வேறு காமிரா செயலிகள் இருக்கின்றன. இந்த வரிசையில் ஓபம் காமிரா செயலியையும் சேர்த்துக்கொள்ளலாம்.

ஒளிப்படக்காட்சிகளை அசைவுகள் இல்லாமல் தானாக நிலைப்படுத்துவது உள்பட பல்வேறு அம்சங்களை இந்த செயலி கொண்டிருக்கிறது. குரல் வழி மூலுமும் இதில் படம் எடுக்கலாம். சுயபடங்கள் எடுப்பதற்கான விஷேச வசதியும் இருக்கிறது.

படங்களின் கோப்பு அளவு சிறியதாக இருக்கும் என குறிப்பிடப்பட்டுள்ளது. வெளிப்புற மைக்ரோபோனை இணைக்கும் வசதியும் உள்ளது. படத்துடன் நாள் , நேரம் ஆகிய விவரங்களை சேர்ப்பதோடு, ஒளிப்பட குறிப்பையும் சேர்க்கலாம். பல வகையான காட்சி அமைப்பு மற்றும் வண்ணம் சேர்க்கும் வசதியும் உள்ளது.

மேலும் தகவல்களுக்கு: http://opencamera.org.uk/