Tag Archives: art

ஐரோப்பாவுக்கு ஒரு இணைய உலா!

 

lead.c2e3a89d927140b5ac304bf7bc2e45a9-800x420ஐரோப்பாவில் உள்ள எல்லா நாடுகளையும் சுற்றிப்பார்ப்பது சாத்தியமா? அது, உங்கள் கைவசம் உள்ள நேரம் மற்றும் உங்கள் வசதி சார்ந்தது. சில நாட்கள் முதல் ஓரிரு வாரங்கள் செலவிட முடிந்தால், ஐரோப்பாவின் முக்கிய நாடுகளை சுற்றிப்பார்த்து விட்டு வரலாம். ஆனால் அப்போதும் கூட பல நாடுகளை தவறவிட வேண்டியிருக்கும். கால் வைத்த நாடுகளில் கூட, அடையாளத்திற்கு சில இடங்களை பார்க்கலாம் அவ்வளவு தான். ஆனால் இந்த அனுபவமே மறக்க முடியாததாக இருக்கும் என்பது வேறு விஷயம்.

நிற்க, ஐரோப்பாவுக்கு சுற்றுலா செல்வது சாத்தியமோ இல்லையோ, நீங்கள் விரும்பினால் ஐரோப்பிய கலாச்சாரம் மற்றும் அதன் செழுமையான பாரம்பரியத்தில் மூழ்கி மகிழலாம் தெரியுமா? யூரோபியானா இணையதளம் (http://www.europeana.eu/portal/en# ) இதை சாத்தியமாக்கிறது. ஒரு அரை மணி நேரத்தை இந்த தளத்தில் செலவிட முடிந்தால், ஐரோப்பாவின் கலாச்சார செழுமை முதல் பேஷன் பெருமைகள் வரை பலவற்றை ஒளிப்படங்களாக பார்த்து மகிழலாம், இசைக்கோர்வைகளாக கேட்டு ரசிக்கலாம். கலைப்பொருட்களாக பார்த்து வியக்கலாம்.

இணையம் ஒரு அற்புதம் என்பதை பலமுறை நீங்கள் கேள்விப்பட்டிருக்கலாம். சில அரிய தருணங்களில் இந்த அற்புதத்தை நீங்களே உணர்ந்திருக்கலாம். யூரோபியானா இணையதளத்தில் நுழைந்ததுமே அத்தகைய தருணத்தை உணரத்துவங்கலாம். இந்த உணர்தலை ஒளிப்படங்களில் இருந்தே துவங்கலாம். ஏனெனில், மிகவும் அண்மையில் தான் இந்த பகுதி புதிய வசதியாக அறிமுகம் ஆகியிருக்கிறது. ’யூரோபியானா போட்டோகிராபி’ எனும் பெயரில் அறிமுகம் செய்யப்பட்டுள்ள இந்த பகுதி 20 லட்சத்திற்கும் மேற்பட்ட வரலாற்று ஒளிப்படங்களை கொண்டிருக்கிறது. 34 ஐரோப்பிய நாடுகளின் 50 க்கும் மேற்பட்ட அருங்காட்சியகங்கள் போன்ற அமைப்புகள் பங்களிப்புடன் இந்த புகைப்பட தொகுப்பு உருவாக்கப்பட்டுள்ளது.

முகப்பு பக்கத்தில், ஐரோப்பிய கலை, ஐரோப்பிய பேஷன், ஐரோப்பிய இசை என வரிசையாக உள்ள பட்டியலில் ஐரோப்பிய ஒளிப்படங்கள் எனும் தலைப்பு மூலம் இந்த படங்களை பார்த்து ரசிக்கலாம். ஒளிப்படக்கலையில் விஷயம் தெரிந்தவர்கள் எனில், ஐரோப்பாவின் புகழ் பெற்ற ஒளிப்பட மேதைகளின் பெயரை தட்டச்சு செய்து அவர்களின் ஒளிப்படைப்புகளை தேடலாம். குறிப்பிட்ட தலைப்புகள் சார்ந்தும் ஒளிப்படங்களை அணுகலாம்.

சும்மா சொல்லக்கூடாது, ஐரோப்பிய ஒளிப்படக்கலையின் முதல் 100 ஆண்டுகளில் எடுக்கப்பட்ட ஒளிப்படங்களை இந்தப்பகுதியில் பார்த்து ரசிக்கலாம். எதை பார்ப்பது, எப்படி பார்ப்பது என திகைத்து நிற்பவர்களுக்கு வழி காட்டும் வகையில் இந்த தளமே இணைய கண்காட்சிகளாக வழிகாட்டுகிறது. உதாரணத்திற்கு, ‘இயந்திரங்களின் யுகத்தில் எடுக்கப்பட்ட தொழில்கூட படங்கள் ’ கண்காட்சி மூலம் அந்த கால தொழிற்சாலைகள், இயந்திரங்கள், தொழிலாலர்கள் உள்ளிட்டவற்றை ஒளிப்படங்களாக பார்த்துபடி பின்னோக்கிச்செல்லலாம். இதே போல குறிப்பிட்ட தலைப்புகள் மற்றும் கலைஞர்கள் சார்ந்த ஒளிப்படங்களையும் காணலாம்.

012uP2P1sayKஅந்த கால ஐரோப்பா எப்படி இருந்தது என பார்க்க விரும்பினாலும் சரி, கால வெள்ளத்தில் ஐரோப்பா எப்படி மாறி வந்திருக்கிறது என அறிய விரும்பினாலும் சரி, ஒளிப்படங்கள் வாயிலாக அந்த அனுபவத்தை பெறலாம். அவரவர் விருப்பம் அல்லது தேடலுக்கு ஏற்ப மிலன் அல்லது லண்டன் என நகரங்களின் பெயரை தட்டச்சு செய்து ஒளிப்படங்களை தேடலாம். ஐரோப்பிய பேஷனில் ஏற்பட்ட மாற்றங்கள், கலாச்சார சுவடுகள் , மனிதர்கள் என பலவிதங்களில் வரலாற்றின் பக்கங்களை திரும்பிப்பார்க்கலாம். உதாரணத்திற்கு நடன அறைகளில் அணியப்பட்ட ஆடைகளை சித்தரிக்கும் ஒளிப்படங்களை பார்த்து ரசிக்கலாம். அதே போல பிரபலங்களின் பேஷனை பார்க்கலாம்.

ஒளிப்படங்களை பயன்படுத்துவது தொடர்பான காப்புரிமை சார்ந்த விவரங்களும் கொடுக்கப்பட்டுள்ளன. வண்ணங்கள், காலவரிசை என பலவிதங்களில் தேடலை மாற்றி அமைத்துக்கொள்ளும் வசதி இருக்கிறது. குறிப்பிட்ட ஒளிப்படம் கவனத்தை ஈர்த்தால் அந்த படம் தொடர்பான மேலதிக தகவல்கள் மற்றும் அதை பகிர்ந்து கொண்டுள்ள அருங்காட்சியக அமைப்பு குறித்த விவரங்களையும் தெரிந்து கொள்ளலாம்.

ஒளிப்படங்களின் தேடல் இந்த தளத்தின் ஒரு அம்சம் தான். இதே போல ஐரோப்பா தொடர்பான பலவிஷயங்களை இந்த தளத்தில் தேடலாம். குறிப்பிட்ட நாடு தொடர்பாக அறிய விரும்பினால், அந்த நாடு தொடர்பாக உள்ள ஒளிப்படங்கள் உள்ளிட்ட தகவல்கள் பட்டியலாக தோன்றுகிறது. காணொலிகள், ஒலிக்கோப்புகள், புத்தகங்கள், கலை வடிவங்கள் என பலவகையான தகவல்கள் அணிவகுக்கின்றன. தேவை எனில், தேடலில் ஈடுபடும் போது எந்த வகையான தகவல் வேண்டும் என தேர்வு செய்து கொள்ளலாம். ஒளிப்படங்களை தேர்வு செய்தால் படங்கள் மட்டும் வரும். இசை அல்லது கலையை தேர்வு செய்தால் தொடர்புடைய தகவல்களை காணலாம்.

சோவியத் யூனியன் வரலாற்றில் ஆர்வம் உள்ளவர்கள் ரஷ்ய புரட்சிக்கு வித்திட்ட லெனினின் அரிய ஒளிப்படங்களை காணலாம். அதே போல உளவியல் மேதை சிக்மண்ட் பிராய்டின் ஒளிப்படங்களை காணலாம். லண்டன் நகர தெருக்களின் உலாவலாம். மிலன் பேஷன் போக்குகளை கண்டு வியக்கலாம்.

இப்படி அநேகமாக ஐரோப்பிய நாடுகளின் முக்கிய அருங்காட்சியகங்களில் பொக்கிஷமாக பாதுக்காக்கப்படும் கலைப்பொருட்கள், காணொலிகள், ஒளிப்படங்கள் அனைத்தையும் இந்த தளம் மூலம் அணுகலாம். இந்த தளத்தை பயன்படுத்த வரலாற்று ஆர்வம் கொண்டவராக அல்லது ஆய்வாளராக இருக்க வேண்டும் என்றில்லை, சாமானியர்களையும் எளிதில் கவரக்கூடிய அம்சங்களை இந்த தளத்தில் காணலாம். அதற்கேற்ப கலாச்சார ஆர்வலர்களே வாருங்கள் என்று தான் இந்த இணையதளம் அழைப்பு விடுக்கிறது. ஆய்வு பணிக்காக வந்திருந்தாலும் சரி, அல்லது அலுப்பை போக்கி கொள்ள வந்திருந்தாலும் சரி, உங்களுக்கு ஆர்வத்தை ஏற்படுத்தக்கூடிய ஏதாவது சில எங்களிடம் நிச்சயம் இருக்கும் என்றும் இந்த தளம் பெருமிதம் கொள்கிறது.

ஐரோப்பிய பாரம்பரியம் தொடர்பான தரவுகளை இணையம் மூலம் அனைவருக்கும் அளிக்கும் நோக்கில் யூரோபியானா அமைப்பு இந்த தளத்தை நடத்தி வருகிறது. பல ஐரோப்பிய அமைப்புகள் ஒன்றிணைந்து உருவாக்கிய ஐரோப்பிய அறக்கட்டளை சார்பில் இந்த தளம் செயல்பட்டு வருகிறது. கலைப்படைப்புகளும், ஒளிப்படங்களும் டிஜிட்டல் மயமாக்கப்பட்டு, பகிரப்படும் போது என்னவெல்லாம் சாத்தியம் என்பதையும், கூட்டு முயற்சியின் அருமையையும் உணர்த்தும் வகையிலும் இந்த தளம் அமைந்துள்ளது.

யூரோபியானா திட்டம் பற்றிய அறிமுகம் : http://pro.europeana.eu/about-us/our-vision

-நன்றி; தமிழ் இந்து , இளமை புதுமை பகுதியில் எழுதியது.

கலைகளுக்கான தேடியந்திரம்!

women-artists-of-the-renaissance-sofonisba-anguissola-self-portrait-midகுறிப்பிட்ட துறைகளுக்காக என்று உருவாக்கப்பட்ட பிரத்யேக தேடியந்திரங்கள் வகையின் கீழ் வருகிறது ஆர்ட்சைக்லோபீடியா (artcyclopedia). பெயரில் இருந்தே உணரக்கூடியது போலவே இது கலைகளுக்கான தேடியந்திரம்.

கலை மற்றும் கலைஞர்கள், குறிப்பாக ஓவியக்கலைஞர்கள் தொடர்பான தகவல்களை தேட இது உதவுகிறது.
முதல் முறையாக இந்த தேடியந்திரத்தை அறிமுகம் செய்து கொள்ளும் போது, அட கலைகளுக்காக என்று தனியே ஒரு தேடியதிரமா என வியக்கத்தோன்றும். ஆனால், இதை பயன்படுத்திப்பார்க்கும் போது, இவ்வளவுதானா? என்ற அலுப்பும் ஏற்படலாம். ஏனெனில் இதில் எல்லா கலைஞர்களை பற்றிய தகவல்களை தேட முடியாது. இதன் தொகுப்பில் உள்ள கலைஞர்கள் பற்றி மட்டுமே தேட முடியும். பொதுவான தேடலில் ஈடுபட விரும்புகிறவர்களுக்கு இது ஏமாற்றம் தரலாம். ஆனால் இந்த தேடியந்திரத்தின் வரம்பை புரிந்து கொள்ளும் போது தான் அதன் அருமை புரியும்.

அருங்காட்சியக தரத்தை அளவுகோளாக வைத்துக்கொண்டு தான் இந்த தேடியந்திரம் கலைஞர்கள் மற்றும் அவர்களின் கலை தொடர்பான தகவல்களை தொகுத்தளிக்கிறது. அதாவது உலக அருங்காட்சியகத்தில் படைப்புகள் இடம்பெற்றிருக்க கூடிய கலைஞர்கள் மட்டுமே இந்த தொகுப்பில் உள்ளனர். அது மட்டும் அல்ல, அருங்காட்சியகத்தில் உள்ள அந்த கலைஞர்களின் படைப்புகளை இணையம் மூலம் அணுகும் வாய்ப்பும் இருக்க வேண்டும்.

இது தவிர, பொதுவாக இணையத்தில் தேடப்படும் கலைஞர்கள், இணையத்தின் மூலம் தகவல்கள் தேட்பபடக்கூடிய கலைஞர்கள் தொடர்பான தகவல்களே பட்டியலிடப்படுவதாகவும் குறிப்பிடப்பட்டுள்ளது. மொத்தம் 9,000 கலைஞர்கள் , 2900 கலை இணையதளங்கள் மட்டுமே பட்டியலிடப்பட்டுள்ளதாக தெரிவிக்கப்பட்டுள்ளது என்றால் பார்த்துக்கொள்ளுங்கள். மொத்த இணைப்புகளின் எண்ணிக்கை 1,60,000 தான்!
ஆனால் இந்த வரம்புகளை புரிந்து கொண்ட பிறகு இந்த தேடியந்திரத்தை பயன்படுத்த முற்பட்டால் புதிய வெளிச்சம் கிடைத்தது போல இருக்கும். இதில் பிரதானமான மூன்று வகையாக தேடலாம்: கலைஞர்களின் பெயரை குறிப்பிட்டு தேடலாம். அவர்களின் படைப்புகளை பெயரை குறிப்பிட்டும் தேடலாம். மூன்றாவது வழி அருங்காட்சியகத்தை குறிப்பிட்டு தேடுவது.

தேடல் வசதி தவிர, இந்த தளத்தில் இடம்பெற்றுள்ள பட்டியலில் இருந்தும் கலைஞர்களை அணுகலாம். கலைஞர்களின் பெயர், அவர்கள் பயன்படுத்திய கலை சாதனம், தேர்வு செய்து கொண்ட வகை மற்றும் அவர்களின் தேசம் ஆகிய தலைப்புகளில் தகவல்கள் வகைப்படுத்தப்பட்டுள்ளன. பெண் கலைஞர்களுக்கும் தனிப்பகுதி இருக்கிறது. கலை இயக்க வகைகளுக்கான பட்டியலும் கூட இடம்பெற்றுள்ளது. ஒவ்வொரு தலைப்பாக கிளிக் செய்து பார்க்கலாம். அந்த பிரிவில் இடம்பெற்றுள்ள கலைஞர்களை தனித்தனியே கிளிக் செய்து பார்க்கலாம்.

இந்த அம்சங்கள் இந்த தளத்திற்கு இணைய கையேடு தன்மையை அளிக்கிறது. முகப்பு பக்கத்திலேயே, பிரபலமான கலைஞர்கள் பட்டியலும் வழிகாட்டுகிறது. மற்றொரு முக்கிய அம்சம் கலை சார்ந்த செய்திகளும் தனியே கொடுக்கப்பட்டுள்ளது.

கலைஞர்கள் பற்றி அறியும் ஆர்வம் கொண்டவர்கள் இந்த தளத்தில் அங்கும் இங்கும் உலாவும் போதே கலைகள் தொடர்பான அருமையான தகவல் களஞ்சியமாக இது அமைந்திருப்பதை உணரலாம்.
குறிப்பிட்ட கலைஞர்கள் தொடர்பான தகவல்களை தேடும் போது இதன் அருமையை இன்னும் கூடுதலாக உணரலாம். பிக்காசோ, வான்கா, சால்வடார் டாலி என ஓவிய மேதைகள் பெயரை கிளிக் செய்து தேடினால் அட என்ற வியப்பு கண்டிப்பாக ஏற்படும். பிக்காசோ என்று குறிப்பிட்டதும் கூகுள் போல கோடிக்கணக்கில் பக்கங்களை பட்டியலிடுவதற்கு பதிலாக், ஒரே பக்கத்தில் பிக்காசோ தகவல்களை முன்வைக்கிறது. ஆனால், எந்த முடிவை கிளிக் செய்தால் பிக்காசோ பற்றிய தகவல்களை சரியாக தெரிந்து கொள்ள முடியும், எந்த தளத்தில் அவரது ஓவியங்களை பார்க்கலாம் என்ற தடுமாற்றம் எல்லாம் இருக்காது. பிக்கசோ பற்றிய சுருக்கமான அறிமுகத்திற்கு கீழே, இந்த விவரங்கள் எல்லாம் அழகாக வகைப்படுத்தப்பட்டிருப்பதை பார்க்கலாம். முதலில் அருங்காட்சியகங்களிள் உள்ள பிக்காசோ படைப்புகளின் பட்டியல் தோன்றுகிறது. உலகம் முழுவதும் உள்ள பிக்காசோ ஓவியங்களை இதில் பார்க்கலாம். புதிய சேர்க்கைகள் தனியே அடையாளம் காட்டுப்பட்டுள்ளன. தொடர்ந்து கலைக்கூடங்களில் உள்ள படைப்புகள், ஒளிபடங்களின் பட்டியல் இடம்பெறுகின்றன. பிக்காசோ தொடர்பான இணையதளங்கள், கட்டுரைகள் மற்றும் புத்தகங்களையும் தனிதனியே அணுகலாம். தளங்களை தேடிப்பார்க்க வேண்டிய தேவையே இல்லாமல், ஏற்கனவே கவனமாக அலசி ஆராய்ந்து தேர்ந்தெடுத்த தளங்களில் உள்ள தகவல்களை மட்டுமே இங்கு அணுகலாம்.

இதே போல ஒவ்வொரு கலைஞர்களுக்குமான தகவல்களை தேடலாம்.
இந்த தளத்தின் பயன்பாட்டை உணர வேண்டும் என்றால் கலைகளின் மீதும் ஓவியர்கள் மீதும் தனியாத தாகம் இருக்க வேண்டும். இந்த தேடியந்திரத்தை சீர்தூக்கி பார்க்க வேண்டும் என்றால் கூட, கலைஞர்கள் பற்றியும், கலைகள் பற்றியும் ஓரளவாவது அறிந்திருக்க வேண்டும்.

கனடாவைச்சேர்ந்த ஜான் மேல்யான் என்பவர் இந்த தேடியந்திரத்தை நடத்தி வருகிறார். 1999 ம் ஆண்டு முதல் இது செயல்பட்டு வருகிறது.

தேடியந்திர முகவரி:http://www.artcyclopedia.com/

தேடல் நுட்பங்கள்: தமிழ் இந்துவில் தேடியந்திரங்கள் தொடர்பான ஆ’வலை’ வீசுவோம் தொடரில் இடம்பெற்று வரும் பிரதான தேடியந்திரங்கள் தவிர கவனத்தை ஈர்க்கும் பிற தேடியந்திரங்களின் வரிசையில் இந்த தேடியந்திரம் அமைகிறது.

close_up_5pntz-730x487

கிரவுட்சோர்சிங் முறையில் உருவான இணைய ஓவியம்

ணையத்தை கண்ணால் பார்க்க முடிந்தால் எப்படி இருக்கும்? அதுவும் ஓவியமாக பார்க்கா, முடிந்தால் எப்படி இருக்கும்? இந்த கேள்வியும் ,எதிர்பார்ப்பும் உங்களுக்கு இருந்தால் அதற்கான பதிலை இண்டெர்நெட்டோபியா மூலம் அளித்திருக்கிறார் பிரிட்டன் ஓவியர் பெஞ்சமின் ரெட்போர்ட். தேர்ந்த ஓவியரான ரெட்போர்ட் இணையவாசிகளின் பங்களிப்போடு இணையத்தை ஓவியமான வரைந்து பிரம்மாண்டமான பிக்சல் ஓவியமாக வரைந்திருக்கிறார்.

கூட்டு முயற்சியின் அழகான அடையாளமாக திகழும் இந்த இணைய ஓவியம் வண்ணமயமாக வியக்கவும் வைக்கிறது. கிக்ஸ்டார்ட்டர் இணையதளம் மூலம் வெற்றிகரமான சாத்தியமான படைப்பூக்கம் மிக்க திட்டத்திற்கு உதாரணமாகவும் இருக்கிறது.

இனி ,இண்டெர்நெட்டோபியா உருவான வித்ததை பார்ப்போம்.

பெஞ்சமின் ரெட்போர்ட் பிரிட்டனின் மான்செஸ்டரை சேர்ந்த சுயேட்சை வடிவமைப்பாளர்.கோட்டோவியம் போன்றவற்றை வரைவதில் ரெட்போர்ட் கில்லாடி.

பெரும்பாலும் ஓவியங்களை தனக்குள் தோன்றும் எண்ணங்களுக்கு ஏற்ப வரைந்து கொண்டிருந்தவர் 2013 ம் ஆண்டில் கூட்டு முயற்சியாக ஒரு ஓவியத்தை உருவாக்க நினைத்தார். அந்த ஓவியத்தின் பெயர் தான் இண்டெர்நெட்டோபியா– அதாவது இணையவெளியை ஓவியமாக உருவகப்படுத்தும் முயற்சி.

அறிவியில் புனைகதைகளை படிப்படில் ஆர்வம் கொண்ட ரெட்போர்ட் ,சைபர்வெளி (cyberspace) பற்றிய வர்ண்னைகளால் வியந்து போயிருக்கிறார். ஆனால் விவரிக்கப்பட்ட வித்ததில் அத்தனை திருப்தி இல்லை என்கிறார். எல்லாமே முடிவில்லாத கிரிட் அமைப்பு போல இருந்ததன என்கிறார். இதற்கு மாறாக இணையத்தை மனிதன்மையுடன் உருவகப்படுத்தி பார்த்தால் என்ன என்று தோன்றியிருக்கிறது. இதை தனியே செய்யாமல் இணையவாசிகளுடன் இணைந்து கூட்டு முயற்சியாக செய்ய விரும்பினார்.இதற்காக தான் இணையம் மூலம் நிதிதிரட்டுவதற்கான கிக்ஸ்டாட்டர் இணையதளத்தை நாடினார்.

ஒரு மெகா டிஜிட்டல் போஸ்ட்டராக ஓவியத்தை வரைவது அவரது திட்டம். ஆனால் அதில் என்ன வரைவது என்பதை அவர் முடிவு செய்யமாட்டார். இணையவாசிகள் அதை தீர்மானிப்பார்கள். அவர்கள் சொல்லும் கருத்துக்கு ஏற்ப அவர் ஓவிய பகுதியை வரைவார்.

இதற்காக டிஜிட்டல் போஸ்ட்டரை கனசதுரங்களாக பிரித்துக்கொண்டார். ஒவ்வொரு கனசதுரமும் ஒரு டாலர். ஒருவர் எத்தனை சதுரங்கள் வேண்டுமானாலும் வாங்கி கொண்டு அவற்றில் என்ன வரைய வேண்டும் என்று குறிப்பிடலாம். இப்படி இணையவாசிகள் சொல்வதை எல்லாம் ரெட்போர்ட் வரைந்து முழு டிஜிட்டல் ஓவியத்தை உருவாக்க திட்டமிட்டார்.

இந்த புதுமையான கோரிக்கையை இணையவாசிகள் உற்சாகமாக ஆதரிக்கவே, ரெட்போர்ட் வெற்றிகரமாக 25 மீட்டர் மற்றும் 1.5 மீட்டர் நீள அகலம் கொண்ட ஓவியத்தை உருவாக்கினார். கிரவுட்சோர்சிங் முறையில் வரையப்பட்ட மிகப்பெரிய ஓவியமாகவும் இது கருதப்படுகிறது.

இணையத்தின் கூட்டு கற்பனையை பிரதிபலித்த அந்த ஓவியத்தை ரெட்போர்ட் தனது பாணியில் பென்சில் மற்றும் பேனா கொண்டு கருப்பு வெள்ளை காட்சியாக வரைந்திருந்தார். மூன்று மாத கால உழைப்பு மூலம் உருவான அந்த ஓவியம் மிகவும் நுட்பமாகவே உருவாகி இருந்தது. அதை ஆன்லைனில் பார்க்கும் போது ஒவ்வொரு பகுதிய நகர்த்தி, பெரிதாக கிளிக் செய்து அதன் நுணுக்கங்களை ரசிக்கலாம்.

இந்த ஓவியத்தை முடித்தவுடனே அடுத்ததாக என்ன செய்யலாம் என்று அவர் மீண்டும் தன்னை ஆதரித்த இணையவாசிகளிடமே கேட்டார். இதே ஓவியத்தை வண்ணத்தில் வரைய வேண்டும் என்பது அவர்களின் கட்டளையாக இருந்தது. அதன்படியே ரெட்போர்ட் முதலில் வரைந்த இணைய ஓவியத்தைற்கு வண்ணங்களை உயிர்கொடுத்திருக்கிறார். கருப்பு வெள்ளையில் கண்ணில் படாத நுட்பங்கள் கூட வண்ணத்தில் மிளிர்வதை இப்போது பார்க்க முடிகிறது.

தனது இணையதளத்தில் இந்த வண்ண இணைய ஓவியத்தை ரெட்போர்ட் இடம்பெற வைத்திருக்கிறார். கைவசம் நேரம் இருந்தால் அந்த ஓவியத்தை அங்குலம் அங்குலமாக நகர்த்தி அணுஅணுவாக ரசிக்கலாம். இல்லை ஒரு பறவை பார்வை போல பார்த்தாலும் பிரமிக்க வைக்கும்.

 

ரெட்போர்டின் கிக்ஸ்டார்ட்டர் பக்கம்; https://www.kickstarter.com/projects/benjaminredford/internetopia-the-supersized-internet-drawing

 

ரெட்பொர்டின் இண்டெர்நெட்டோப்பிய ஓவிய தளம்:http://www.internetopia.squarespace.com/

 

———

 

 

 

 

 

sm1

ஆன்லைனில் ஆசிய கலை பொக்கிஷங்கள்

ங்கள் டெஸ்க்டாப்பிலோ ,லேப்டாப்பிலோ ஆசிய கலை பொக்கிஷங்களை வால்பேப்பராக வைத்துக்கொள்ள விருப்பமா?அல்லது உங்கள் டிவிட்டர் பக்கம் அல்லது பேஸ்புக் பக்கத்தில் பின்னணி சித்திரமாக கலைபடைப்புகள் இருக்க விருப்பமா? ஆம் எனில் அமெரிக்காவின் புகழ்பெற்ற அருங்காட்சியகம் அதற்கான வசதியை ஆன்லைனில் செய்து கொடுத்திருக்கிறது. பின்னணி புகைப்படங்களை டிஜிட்டல் வடிவில் தரவிறக்கம் செய்வது மட்டும் அல்ல, அந்த படைப்புகள் அனைத்துமே டிஜிட்டல் வடிவில் கண்டு களிக்கலாம். அதாவது மொத்த அருங்காட்சியகத்தையும் ஆன்லைனிலேயே உலா வரலாம்.
அகில உலக அளவில் புகழ்பெற்ற ஸ்மித்சோனியன் அருங்காட்சியக பிரிவு ஒன்று தான் இப்படி டிஜிட்டல் உலா வசதியை செய்து தந்திருக்கிறது. ’ஸ்மித்சோனியன் அருங்காட்சியகங்கள் பாரம்பரியம் மிக்க ஸ்மித்சோனியன் கழகத்தால் நிர்வகிக்கப்படுகிறது. இதன் கீழ் மொத்தம் 19 அருங்காட்சியகங்கள் மற்றும் ஒரு விலங்கியல் பூங்கா இருக்கிறது. பெரும்பாலான அருங்காட்சியகங்கள் வாஷிங்டன் நகரில் அமைந்துள்ளன.
இவற்றில் ஆசிய கலைப்பொருட்கள் அங்கம் வகிக்கும் ப்ரீர் /சாக்லெர் கலைகூடம் தான் இப்போது ஆன்லைனில் அடியெடுத்து வைத்து டிஜிட்டல் உலாவுக்கான வசதியை செய்து தந்துள்ளது.

sm2
இந்த முயற்சியை டிஜிட்டல் சாதனை அல்லது டிஜிட்டல் மைல்கல் என்று கூறலாம். ஏனென்னில் ஒட்டுமொத்த கலைகூடமும் டிஜிட்டல் மயமாக்கப்பட்டும் ஆன்லைனில் பார்க்க வழி செய்யப்பட்டுள்ளது. அதாவது கலை கூடத்தில் உள்ள ஒவ்வொரு கலைபொருளும் டிஜிட்டல் மயமாக்கப்பட்டு அவற்றின் புகைப்படம் ஆன்லைனில் இடம் பெற்றுள்ளன.
இவ்வாறு கிட்டத்தட்ட 40,000 க்கும் மேற்பட்ட கலைப்பொருட்கள் மற்றும் ஓவியங்கள் டிஜிட்டல் மயமாக்கப்பட்டுள்ளன.
ஆக, இந்த கலைகூடத்திற்கு நேரடியாக சென்றால் கூட அனைத்து பொருட்களையும் பார்க்க முடியுமா என்பது சந்தேகமே ,ஆனால் ஆன்லைனில் எல்லாவற்றையும் பொறுமையாக பார்க்கும் வசதி இருக்கிறது. அதே போல அருங்காட்சியகம் இயங்கும் நேரம் பற்றி எல்லாம் கவலைப்பட வேண்டாம். எந்த நேரத்திலும் பார்க்கலாம். எந்த இடத்தில் இருந்தும் பார்க்கலாம்.
டிஜிட்டல் ஜிரோ எனும் முயற்சியில் கீழ் இப்படி எல்லா கலைப்படைப்புகளையும் டிஜிட்டல் வடிவில் மாற்றியுள்ளனர்.
இந்த ஆன்லைன் கலைக்கூடத்தில் என்ன வகையான கலைப்படைப்புகளை எல்லாம் பார்க்கலாம் தெரியுமா? சாக்கிய முனி புத்தரில் துவங்கி, முகாலாய கலைப்படைப்புகள், சோழர் கால நடராஜர் என ஆசிய கலைப்பொக்கிஷங்கள் பலவற்றை இங்கு காணலாம். ஆம், இந்த அருங்காட்சியகம் ஆசிய கலைபொருட்களுகான பிரிவு என்பது மட்டும் அல்ல, அமெரிக்காவில் உள்ள ஆசிய கலைப்பொருட்களுக்கான ஒரே அருங்காட்சியகம் இந்த ப்ரீர் /சாக்லெர் கலைகூடம் தான் என்பது கவனிக்க வேண்டிய விஷயம்.
சிற்பங்கள்,ஓவியங்கள்,பானைகள் போன்ற கலைப்பொக்கிஷங்கள் என பலவகையான கலைப்பொருட்களை பார்க்கலாம். இவை தவிர சீன மற்றும் கொரியா உள்ளிட்ட ஆசிய கலாச்சார பொக்கிஷங்களையும் காணலாம்.
கலை பொருட்கள் அனைத்தும் அவற்றின் வகைகளுக்கு ஏற்ப வரிசையாக பட்டியலிடப்பட்டுள்ளது. ஒவ்வொரு பொருளையும் கிளிக் செய்து பார்ப்பதோடு அவை தொடர்பான வரலாற்று தகவல்களையும் தெரிந்து கொள்ளலாம். அந்த காலத்தின் அடையாளங்களாக திகழும் கலைப்படைப்புகளை கிளிக் செய்து பார்ப்பது சுவாரஸ்யமாக தான் இருக்கிறது.
அருங்காட்சியகத்தை உலா வருவதை விட இப்படி இருந்த இடத்தில் இருந்தே வரிசையாக கிளிக் செய்து பார்ப்பது இன்னும் கூட கூடுதல் சுவாரஸ்யம் தான்.
கலைப்படைப்புகளை பல அளவிகளில் டிஜிட்டல் வடிவில் தரவிறக்கம் செய்து கொள்ளலாம். கம்ப்யூட்டர் வால்பேப்பராகவோ அல்லது டிவிட்டர் /பேஸ்புக் பின்னணி சித்திரமாகவோ பயன்படுத்திக்கொள்ளும் வசதி இருக்கிறது. லாப நோக்கில்லாத தனிப்பட்ட பாட்டிற்காக இவற்றை பயன்படுத்திக்கொள்ளலாம்.
சோழர்கால நடராஜர் சிற்பத்தின் டிஜிட்டல் வடிவம் அப்படியே நெஞசை அள்ளுகிறது .

ஆன்லைனில் உலா வர; http://www.asia.si.edu/collections/default.asp

———–

 

கம்ப்யூட்டர் சிப்புக்குள் இருக்கும் ஓவியம்!

1415447கலை ஆர்வம் எங்கெல்லாம் மறைந்து கிடக்கிறது என தெரிந்து கொண்டால் ஆச்சர்யமாக இருக்கும். ஆம் கம்ப்யூட்டர் சிப்புக்குள்ளும் கலை ஆர்வத்தை காணலாம் தெரியுமா? இது கம்ப்யூட்டர் உலகம் அதிகம் அறிந்திரதா ரகசிய அதிசயம்.

மைக்ரோசிப்பை கம்ப்யூட்டரின் மூளை என்கின்றனர். அந்த சிப்பின் ஏதோ ஒரு மூலையில் தான் சிப் வடிவமைப்பாளர்களின் நுண் ஓவியங்கள் ஒளிந்திருக்கின்றன. அதாவ்து சிப்பில் இருக்கும் சர்க்யூட்டில் வரையப்பட்ட ஓவியங்கள் .

இப்படி சிப்புக்குள் ஓவியம் இருப்பது அநேகமாக யாருக்குமே தெரியாது.ஏன் என்றால் இந்த ஓவியங்களை வெறும் கண்களால் பார்க்க முடியாது.மைக்ராஸ்கோப் எனப்படும் நுண்நோக்கி வழியே மட்டுமே இவற்றை காணலாம். நகக்கணு அளவிலான இடத்தில் சிப் செயல்பாட்டிற்கு தேவையான முழு சர்க்யூட்டையும் உருவாக்கிவிடும் தொழில்நுட்ப கலையில் கைதேர்ந்த பொறியியல் வல்லுனர்கள் இதே திறமையை பயன்படுத்தி சிப்பின் பயன்படுத்தப்படாத ஒரு மூலையில் ஒரு சித்திரத்தை வரைந்து வைத்து விடுகின்றனர்.

ஓவியர்கள் தாங்கள் வரைந்த படைப்பின் கீழ் உரிமையுடனும் பெருமித்த்துடனும் கையெழுத்திடுவது போல் சிப் வடிவமைப்பாளர்களும் தங்களது முத்திரையாக மைக்ரோ ஓவியங்களை வரைவதை வழக்கமாக கொண்டுள்ளனர்.

இந்த ஓவியங்கள் எந்த அளவு சிறியவை தெரியுமா? நமது தலை முடி இருக்கிறது அல்லவா? அதன் அகலத்தில் பாதி தான் இவற்றின் அளவு இருக்கும்!

சாதரணமாக சிப்பை பார்க்கும் போது இந்த ஓவியங்கள் இருப்பதே தெரியாது.அதனால் தான் சிப்புக்குள் இருக்கும் இந்த ஓவியங்களும் உலகம் அறியாத ரகசியமாகவே இருந்தன.

யாரும் பார்க்க முடியாத இந்த ஓவியங்களை வடிவமைப்பாளர்கள் வரைந்து வைத்தது ஏன்? இதை ஒரு வித சுய திருப்தி எனலாம். சுய வெளிப்பாடு ஏன்றும் சொல்லலாம்.முழுமையான ஒன்றை உருவாக்கிய மகிழ்ச்சியில் ஒரு படைப்பாளியாக வடிவமைப்பாளர்கள் தங்கள் முத்திரையை பதிக்கும் வழியும் கூட!’

ஆரம்ப காலத்தில் இவற்றிக்கு நடைமுறை பயனும் இருந்தது. சிப் வடிவமைப்பை வேறு ஒரு நிறுவனம் காபி அடித்து விட்டால், அவை எங்களுடையவை என்று அடையாளம் காட்டுவதற்கான வழியாகவும் இந்த ஓவியங்கள் அமைந்திருதன. ஆனால் 1984 ல் அறிமுகமான காப்புரிமை சட்டத்திருத்தம் இந்த பழக்கத்தை தேவையில்லாமல் செய்து விட்டது.

இந்த ஓவியங்களை சிப் கலை, சிலிக்கான் கலை, சிலிக்கான சித்திரம் என்று பல பெயர்களில் குறிப்பிடுகின்றனர். நாம் சிப்போவியம் என்றும் வைத்துக்கொள்ளலாம்.

கம்ப்யூட்டர் சிப் உருவாக்கப்பத்துவங்கிய காலத்தில் இருந்தே இந்த மைரோ ஓவியங்கள் வரையப்பட்டிருக்கின்றன. அன்றைய மைக்ரோசாப்டான டெக்சாஸ் இன்ஸ்ட்ருமென்ட் உருவாக்கிய ஆரம்ப கால சிப்களில் சிப்போவியத்தை காணலாம். பொதுவாக சிப் வடிவமைப்பாளர்கள் தங்களுக்கு பிடித்த கார்ட்ட்டுன் பாத்திரம், செல்லப்பிராணிகள், வாகனங்கள் போன்றவற்றை வரைத்து வைத்துள்ளனர். டெக்சாஸ் இன்ஸ்ட்ருமென்ட் நிறுவன வடிவமைப்பாளர்கள் நிலவில் கால் பதித்த சாதனை போன்றவற்றையும் சிப்போவியமாக தீட்டியுள்ளனர்.

இந்த ஓவியங்கள் பெரும்பாலும் சிப் செயல்பாட்டில் குறுக்கிடாதவையாக இருக்கும் என்றாலும் இவற்றால் சிப் செயல்பாட்டில் குழப்பம் ஏற்பட்ட சம்பவங்களும் உண்டு.

வடிவமைப்பாளர்கள் தங்கள் குழுவில் உள்ள சக வடிவமைப்பாளர்களை கேலி செய்யவும் இந்த ஓவியங்களை பயன்படுத்தியதுண்டு. எது எப்படியோ இவற்றை பெரும்பாலும் யாரும் பார்த்து ரசிக்க முடியாது. சிப்பை மேம்படுத்தும் போது இவை வடிவமைப்பாளர்கள் கண்ணில் படலாம். ஒரு சில வடிவமைப்பாளர்கள் இந்த மைக்ரோ ஓவியங்களை பெரிதாக்கி தங்கள் அலுவலகங்களில் மாட்டி வைத்ததும் உண்டு.ஆனால் அவற்றை அலுவலக ஊழியர்கள் மட்டுமே பார்க்க முடியும்.

நவீன குகை ஓவியங்களாக மறைந்திருந்த இவற்றை உலகின் பார்வைக்கு வெளிச்சம் போட்டு காட்டியது மைக்கேல் டேவிட்சன் என்பவர். அவருக்கு மட்டும் இந்த ஓவியங்கள் கண்ணில் பட்டது எப்படி?

அது உண்மையிலேயே சுவாரஸ்யமான கதை அந்த கதை நாளை….

( சைபர்சிம்மன் கையேட்டிற்காக பழைய பதிவுகளை அப்டேட் செய்து செப்பனிட்டு வருகிறேன்.அவற்றில் ஒன்று தான் இந்த பதிவு. 2008 ம் ஆண்டு வாக்கில் எழுதிய இந்த பதிவு இன்னும் சுவாரஸ்ய்மாக இருப்பதாக கருதுகிறேன். அதோடு இன்னும் கூட யாரும் இந்த சிப்போவியம் பற்றி எழுதவில்லை என்றே கருதுகிறேன். ஒருவேளை சுஜாதா தனது சில்லு புரட்சி நூலில் இதை குறிப்பிட்டிருக்கலாம். படித்தவர்கள் சரி பார்த்து சொல்லுங்கள். அன்புடன் சிம்மன் )