Tag Archives: cyber

வாட்ஸ் அப் புதிய வசதியும் என்கிரிப்ஷன் விவாதமும்!

encrpஇணைய உலகம் என்கிரிப்ஷனை நோக்கி முன்னேறிக்கொண்டிருக்கிறது தெரியுமா? இணையமும் அது சார்ந்த தொழில்நுட்ப சேவைகளும் எந்த அளவு விரைவாகவும், முழுமையாகவும் என்கிரிப்ஷன் மயமாகிறதோ அந்த அளவுக்கு நல்லது என்கின்றனர் தனியுரிமை ஆர்வலர்கள். இணைய பாதுகாப்பிற்கும் இது அவசியம் என்கிறனர்.

என்கிரிப்ஷன் என்றால் ஏதோ புரியாத விஷயமாக இருக்கிறதே என குழப்பம் ஏற்படலாம். மறையாக்கம் அல்லது குறியாக்கம் என தமிழில் குறிப்பிடப்படும் என்கிரிப்ஷன் தொடர்பான தொழில்நுட்ப விளக்கம் சிக்கலானது என்றாலும், ஒரு தகவலை அதற்கு உரியவர் தவிர வேறு யாரும் தெரிந்து கொள்ள முடியாத வகையில் அதனை மறைபொருளாக அனுப்பி வைக்கும் சங்கேத முறையாக இதை புரிந்து கொள்ளலாம். பொதுவாக ராணுவம் போன்ற அமைப்புகளால் பாதுகாப்பான தகவல் பரிமாற்றத்திற்காக பயன்பட்டு வந்த இந்த நுட்பம் இணைய யுகத்தில் பல்வேறு பரிமாணங்களை பெற்றிருக்கிறது.

வாட்ஸ் அப் பாதுகாப்பு

இவற்றில் ஒரு வகையான பாதுகாப்பு அம்சத்தை தான் பிரபல சமூக வலைப்பின்னல் செயலியான வாட்ஸ் அப் அன்மையில் அறிமுகம் செய்துள்ளது. எண்டு டு எண்ட் என்கிர்ப்ஷன் என குறிப்பிடப்படும் இந்த வசதியால் வாட்ஸ் அப் மூலம் பகிரப்படும் செய்திகள் அனைத்தும் முன்பு இருந்ததைவிட பாதுகாப்பு மிக்கவையாகி இருக்கின்றன. இதன் மூலம் வாட்ஸ் அப் சேவையில் பகிரப்படும் தகவல்கள், படங்கள் ,வீடியோக்கள் போன்றவை அனி மூன்றாம் நபர்களால் அணுக முடியாதவையாகி இருக்கின்றன. இதன் பொருள் வாட்ஸ் அப்பில் ஒரு செய்தி அனுப்பி வைத்தால் அதற்குறியவர் மட்டும் அதை படிக்க முடியும். மற்றவர்களுக்கு அந்த தகவல் கலைத்து போடப்பட்ட அர்த்தம் கொள்ள முடியாத குறியீடுகளாகவே தோன்றும்.

அதாவது செய்திகள் அல்லது தகவல்கள் அனைத்திற்கும் பூட்டு சாவிகள் உருவாக்கப்பட்டிருக்கும். சாவி இல்லாத எவரும் பூட்டை திறக்க முடியாது. இதற்கான சாவிகள் , செய்திக்கு உரியவர் சாதனத்தில் இயக்கப்பட்டு அவரால் இயல்பாக படிக்க முடியும்.

பூட்டும் சாவியும்
ஆக, வாட்ஸ் அப்பில் சைபர் குற்றவாளிகள் கைவரிசை காட்டுவதோ, அல்லது தனியுரிமை மீறல்கள் நிகழ்வதோ சாத்தியமில்லை. இவ்வளவு ஏன் சர்வாதிகார அரசுகள் தகவல் பரிமாற்றத்தை உளவு பார்ப்பதும் சாத்தியமில்லை. தாக்காளர்களும் உள்ளே நுழைய முடியாது. இவ்வளவு ஏன் வாட்ஸ் அப் செயலியே நினைத்தாலும் இது சாத்தியமில்லை. பயனாளிகள் பரிமாறிக்கொள்ளும் செய்தி அந்த அளவுக்கு பாதுகாப்பாக இருக்கும்.

கடந்த ஏப்ரல் 8 ம் தேதி அறிமுகம் செய்யப்பட்டுள்ள இந்த வசதியை பயன்படுத்த வாட்ஸ் அப்பின் சமீபத்திய வர்ஷெனை தரவிறக்கம் செய்வதை தவிர வேறு ஒன்றுமே தேவையில்லை. புதிய வர்ஷனில் இந்த வசதி தானாக செயல்படும். ஆனால் பயனாளிகள் விரும்பினால் தங்கள் அனுப்பும் செய்திகளில் இந்த வசதி இருக்கிறதா? என்பதை உறுதி செய்து கொள்ள முடியும். செய்தியின் மீது டேப் செய்தால்,ஆரம்பம் முதல் முடிவு வரை என்கிரிப்ட் செய்யப்பட்டுள்ளது என்ற தகவல் வரும். அதோடு கியூ.ஆர் கோட் மற்றும் 60 இலக்க எண்ணையும் பயனாளிகள் பார்க்கலாம். நீங்கள் தொடர்பு கொள்ளும் நபரும் இந்த கியூஆர் கோடை ஸ்கேன் செய்து பார்க்கலாம் அல்லது 60 இலக்க எண்ணை ஒப்பிட்டு பார்த்துக்கொள்ளலாம்.

நாம் அனுப்பி வைக்கும் மொக்கை செய்திகளுக்கு எல்லாம் இத்தனை பாதுகாப்பு தேவையா என நீங்கள் அப்பாவித்தனமாக நினைக்கலாம். விஷயம் ஒருவர் அனுப்பும் செய்தியின் உள்ளடக்கம் பற்றியதல்ல; மாறாக எந்த உள்ளடக்கமாக இருந்தாலும் அது பாதுகாப்பானதாக இருக்க வேண்டும் எனும் அடிப்படை கோட்பாடு சார்ந்தது.

இந்த யுகத்தின் தேவை
இணைய யுகத்தின் தேவை இது. கடிதம் அனுப்புவது பழங்கால சங்கதியாகி இருக்கலாம். ஆனால் கடிதம் அனுப்புவதில் இருந்த பாதுகாப்பு நொடியில் பறக்கும் இமெயிலில் இல்லை என்பதை நீங்கள் அறிந்திருக்கலாம். ஒருவருக்கு அனுப்பபட்ட கடிதத்தை அதை பெறுபவர் தவிர இடையே யாரும் படிக்க முடியாது. ஆனால் இன்று இமெயிலை விஷமிகள் இடையே ஹேக் செய்யலாம். சைபர் குற்றவாளிகள் உள்ளே புகுந்து தகவல்களை திருடலாம். உளவு அமைப்புகள் கண்காணிக்கலாம். இன்னும் என்னனவோ நடக்கலாம்.

இமெயிலுக்கு மட்டும் அல்ல, இணையம் மூலமான எல்லா பரிமாற்றங்களுக்கும் இது பொருந்தும்.
ஆக இணைய யுகத்தில் தனிநபர்களின் தகவல் பரிமாற்றம் பல மட்டங்களில் ஊடுருவப்படும் அபாயம் இருப்பதால் தனியுரிமை பாதுகாப்பு என்பது மிகப்பெரிய அச்சுறுத்தலுக்கு உள்ளாகியிருப்பதாக கருதப்படுகிறது.
இதற்கு மாற்று வைத்தியமாக தான் எல்லாவற்றையும் என்கிரிப்ட் செய்ய வேண்டும் என்கிறனர்.

இணையதளங்களுக்கு இந்த வகை பாதுகாப்பு எச்டிடிபிஎஸ் எனும் வடிவில் முன்வைக்கப்படுகிறது. இந்த வகை பாதுக்காப்பிற்காக இணையதளங்கள் சான்றிதழ் பெற வேண்டும் என வலியுறுத்தப்படுகிறது. இணையவாசிகளின் தனியுரிமை நலனுக்காக பாடுபட்டு வரும் மின்னணு எல்லை அமைப்பு (Electronic Frontier Foundation ) இணையத்தை எச்டிடிபிஎஸ் மயமாக்குவோம் (HTTPS Everywhere ) எனும் விழிப்புணர்வு திட்டத்தையும் செயல்படுத்தி வருகிறது.

எங்கும் என்கிர்ப்ஷன்
வலைப்பதிவு சேவையான வேர்ட்பிரசும் தனது தளங்களுக்கு இந்த பாதுகாப்பை அளிக்கத்துவங்கியிருக்கிறது.
செயலிகள் வழியில் பரிமாறப்படும் செய்திகளுக்கும் இத்தகைய பாதுகாப்பு வசதி தேவை என வலியுறுத்தப்பட்டு வருகிறது. இந்த பின்னணியில் தான் பேஸ்புக் நிறுவனத்திற்கு சொந்தமான வாட்ஸ் அப் சேவையிலும் என்கிரிப்ஷன் வசதி அறிமுகம் செய்யப்பட்டுள்ளது.

வாட்ஸ் அப்பின் இந்த செயல் பரவலாக வரவேற்கப்பட்டாலும், இந்த வசதிக்கு பின்னே உள்ள பாதுகாப்பு நிரலை முழுவதும் திறவு மூல தன்மை கொண்டதாக செய்யவில்லை எனும் புகார் மட்டும் இருக்கிறது.
இதனிடயே வாட்ஸ் அப் பயன்படுத்தும் சைபர் பூட்டின் 265 பிட் தன்மை காரணமாக இது இந்தியாவில் சட்டவிரோதமானதா எனும் கேள்வியும் எழுந்துள்ளது.

ஆனால் இவற்றை எல்லாம் விட முக்கியமான விஷயம், இந்த வசதியின் இன்னொரு பக்கம் தொடர்பான விவாதமாக இருக்கிறது. சாமானியர்களுக்கு இந்த வசதி பயன்படுகிறதோ இல்லையோ, சைபர் திருடர்களுக்கும், தீவிரவாதிகளுக்கும் இது பெரிதும் பயன்படலாம் என்ற அச்சம் அரசு அமைப்புகளுக்கு இருக்கிறது. ஏற்கனவே தீவிரவாதிகளும், இன்னும் பிற விஷமிகளும் ரகசிய தகவல் தொடர்பிற்கு இணைய வசதியை கச்சிதமாக பயன்படுத்தி வருகின்றனர். இந்நிலையில் பூட்டு போடப்பட்ட தகபல் பரிமாற்றம் குற்றவாளிகளுக்கு மேலும் அணுகூலமாகிவிடாதா? என்ற கேள்வி எழுந்துள்ளது.

உளவு பார்ப்பதற்கு எதிரான தனியுரிமை பாதுகாப்பு அவசியம் என்றாலும், முக்கிய விசாரணையின் போது சந்தேகிக்கப்படும் குற்றவாளிகளின் தகவல் பரிமாற்றத்தை அரசு அமைப்புகளால் அணுக முடியாமல் ஆகிவிடுமே என்ற கவலையும் இருக்கிறது.

ஆப்பிள் -எப்பிஐ மோதல்
அன்மையில் ஆப்பிள் நிறுவனத்திற்கும் ,புலனாய்வு அமைப்பான எப்பிஐக்கும் இடையே நடைபெற்ற மோதலை இந்த இடத்தில் பொருத்திப் பார்ப்பது சரியாக இருக்கும்.

ஆப்பிளின் ஐபோன் உள்ளிட்ட சாதனங்கள் விலை அதிகம் கொண்டவையாக கருதப்படுபது போலவே பாதுகாப்பு விஷயத்திலும் பக்காவானவை. ஐபோனில் பரிமாறிக்கொள்ளப்படும் தகவல்கள் வேறு நபர்களால் ஊடுருவப்பட முடியாதவை. ஆப்பிள் நிறுவனமே கூட அவற்றை இடைமறிக்க முடியாது.

ஆண்ட்ராய்ட் போன்களில் இந்த அளவு பாதுகாப்பு இல்லை. ஆண்ட்ராய்டு இயங்குதளம் பல உற்பத்தியாளர்களால் பயன்படுத்தப்படுவதால் அதில் பாதுகாப்பு அம்சத்தை அமல் செய்வதில் நடைமுறை சிக்கல் இருக்கிறது. இந்த ஒப்பீடு தகவலுக்காக தானே தவிர மதிபீடல்ல.

நிற்க, அமெரிக்காவில் சில மாதங்களுக்கு முன் சான்பெர்னார்டினோவில் கண்மூடித்தனமான துப்பாக்கி சூடு நடைபெற்ற சம்பவத்தில் ஈடுபட்ட குற்றவாளி பயன்படுத்திய ஐபோன் எப்பிஐ க்கு கிடைத்தது. ஆனால் அதில் உள்ள தகவல்களின் என்கிரிப்ஷன் பூட்டை உடைத்து உள்ளே செல்ல முடியவில்லை. இது தொடர்பாக மாற்று சாவியை கொடுத்து உதவுமாறு எப்பிஐ விடுத்த வேண்டுகாளை ஆப்பிள் நிறுவனம் நிராகரித்துவிட்டது.
பயனாளிகளின் தகவல் பரிமாற்றம் பாதுகாப்பானதாக இருக்க வேண்டும் என்பதை உறுதி செய்யும் இந்த வசதியை ஊடுருவ அனுமதிக்க முடியாது என ஆப்பிள் உறுதியாக கூறிவிட்டது. பயனாளிகளின் தனியுர்மையை இது பாதுக்கும் என்று நீதிமன்றம் வரை ஆப்பிள் இதில் உறுதியாக நின்றது.

தனியுரிமை விவாதம் !
இந்த பிரச்சனை பொது நலன் மற்றும் தனியுரிமை இடையிலான விவாதமாகவும் உருவாகி இருக்கிறது. என்கிரிப்ஷன் தொடர்பான சட்ட வடிவம் கொண்டு வருவது பற்றியும் அமெரிக்காவில் பேசப்பட்டு வருகிறது.
ஆனால் தனியுரிமை காவலர்கள் என்கிரிப்ஷன் பாதுகாப்பின் அவசியத்தில் அதைவிட உறுதியாக இருக்கின்றனர்.என்கிரிப்ஷன் பாதுகாப்பில் ஓட்டகளை ஏற்படுத்துவது அல்லது பின் பக்க கதவை வைப்பது இணையவாசிகளின் தனியுமைக்கு வேட்டு வைக்கும் செயலாகிவிடும் என்று எச்சரிக்கின்றனர்.

இந்த பின்னணியில் தான் வாட்ஸ் அப் பாதுகாப்பு வசதியை பார்க்க வேண்டும். அதோடு இதை ஒரு வாய்ப்பாக வைத்துக்கொண்டு இணையத்தில் பாதுகாப்பின் நிலை மற்றும் அதற்கான தேவையையும் புரிந்து கொள்ள முற்பட வேண்டும். நம் காலத்து நிர்பந்தம் இது!

இணையத்தில் தனியுரிமை பாதுகாப்பு தொடர்பான தகவலுக்கு; https://www.eff.org/encrypt-the-web

—-

நன்றி; தமிழ் இந்துவில் எழுதியது.

இவர் ட்விட்டர் வள்ளல் தெரியுமா?

2016 ஒலிம்பிக் போட்டிகள் பிரேசிலின் ரியோ டிஜெனிரோ நகரில் நடைபெற இருப்பது தெரிந்த விஷயம் தான். இந்த போட்டிகளை உலகம் வியந்து போகும் வகையில் நடத்திக்காட்ட ரியோ நகர அதிகாரிகள் தீவிரமாக இருக்கின்றனர். இதுவும் எதிர்பார்க்க கூடியது தான். ஆனால் ரியோ ஒலிம்பிக் போட்டிகள் சிறப்பாக நடைபெறுவதில் ஸ்பெயின் நாட்டு ஏழை பெரியவர் ஒருவருக்கு சின்ன பங்கிருக்கிறது.

ரியோ ஒலிம்பிக் போட்டிகள் பெரிய அளவில் வெற்றி பெற்றால்,குறிப்பாக சமூக ஊடகங்களில் அது தாக்கத்தை ஏற்படுத்தினால் நிச்சயம் அதற்காக ரியோ நகரமும் பிரேசில் மக்களும் ஸ்பெயினின் சேவியர் காஸ்டனோவாவிற்கு நன்றி சொல்ல வேண்டும். ஏனெனில் இந்த போட்டிகளுக்காக அவர் மனமுவந்து பெரிய உதவியை செய்திருக்கிறார். அவர் கொடைவள்ளலாக நடந்து கொண்டு ரியோ நகருக்கு கைகொடுத்திருக்கிறார். அவர் அப்படி என்ன செய்திருக்கிறார் என்றால், ரியோ நகரின் பெயரில் தான் பதிவு செய்து வைத்திருந்த @riodejaneiro எனும் டிவிட்டர் முகவரியை விட்டுக்கொடுத்திருக்கிறார்.

சமூக ஊடக உலகில் அதிகார பூர்வ கணக்குகளுக்கு இருக்கும் முக்கியத்துவத்தை உணர்ந்தவர்களுக்கு இது எத்தனை பெரிய விஷயம் என்று தெரியும்.அதிலும் கஸ்டனோ இந்த முகவரியை ஒப்படைக்க பேரம் பேசாமல் இதன் மூலம், எந்த லாபமும் அடைய நினைக்காமல் இலவசமாக ரியோ நகரிடம் இந்த கணக்கை ஒப்படைத்திருக்கிறார்.

காஸ்டனோ ஷூ பாலிஷ் போடுபவராக வேலை பார்க்கும் ஏழ்மை நிலையில் இருப்பவர் என அறியும் போது அவர் இப்படி பெருந்தன்மையுடன் நடந்து கொண்டிருப்பது இன்னும் கூட வியப்பளிக்கலாம்.
ஒருவித்ததில் காஸ்டனோவை தொலைநோக்கு மிக்கவர் என்று தான் சொல்ல வேண்டும்.. அதைவிட டிவிட்டர்நோக்கு மிக்கவர் என்று சொல்லலாம். கடந்த 2007 ம் ஆண்டீல் டிவிட்ட்ர சேவை அறிமுகமான காலத்தில் அவர் பல முக்கிய குறிச்சொற்களை கொண்டு டிவிட்டர் முகவரிகளை பதிவு செய்து வைத்துக்கொண்டார். கவனிக்க அந்த காலக்கட்டத்தில் டிவிட்டர் சேவை அத்தனை பிரபலமாகவில்லை. அப்போதே அவர் டிவிட்டரின் முக்கியத்தவத்தை உணர்ந்து செயல்பட்டார்.

இணைய உலகில் இது ஆரம்ப காலம் தொட்டு நடப்பது தான். ரெயிலில் முன்கூட்டியே துண்டு போட்டு இடம் பிடிப்பது போல, பின்னாளில் வளரக்கூடிய இடத்தில் தரிசாக கிடக்கும் நிலத்தை வாங்கிப்போடுவது போல இணையத்திலும் புதிய சேவைகளில் முக்கிய பெயர்களை பதிவு செய்து வைத்துக்கொள்ளும் கில்லாடிகள் இருக்கின்றனர். சிலர் இதை திட்டமிட்டு செய்வதுண்டு. சிலர் தற்செய்லாக செய்து வைப்பதும் உண்டு. எது எப்படியோ அந்த குறிப்பிட்ட இணைய சேவை பிரபலமானால் இத்தகைய முகவரிகளுக்கு கிராக்கி ஏற்படும் . இதை பயன்படுத்தி காசு பார்த்தவர்களும் இருக்கிறார்கள். சில நேரங்களில் இது வம்பு வழக்கு என்று பிரச்சனையாவதும் உண்டு. இந்த போக்கிற்கு சமீபத்திய உதாரணமாக எபோலா நோய் ஆபத்து உசத்தில் இருந்த போது எபோலா.காம் எனும் முகவரியை வைத்திருந்தவர் அதை பெருந்தொகைக்கு விற்றதை குறிப்பிடலாம்.

ஸ்பெயினின் காஸ்டனோவும் இப்படி தான், ரியோ டிஜெனிரோ நகரின் டிவிட்டர் முகவரியை பதிவு செய்து வைத்திருந்தார். அடுத்த ஆண்டு அந்நகரில் ஒலிம்பிக் போட்டி நடைபெறும் நிலையில் இந்த கணக்கு எத்தனை மதிப்புவாய்ந்தது என யோசித்துப்பாருங்கள். ஒலிம்பிக் போட்டிகள் பற்றிய தகவல்களை பகிரவும் ,மக்கள் மத்தியில் விழிப்புணர்வு ஏற்படுத்தவும் ரியோ நகருக்கு என்று அதிகார பூர்வ டிவிட்டர் பக்கம் மிகவும் அவசியம். ரியோ நகரமோ @riodejaneiro என்ற முகவரியை கோட்டைவிட்டு விட்டது. வேறு பெயரில் டிவிட்டர் கணக்கை ஒலிம்ப்க்கிற்காக துவக்கி கொள்ளலாம் தான். ஆனால் சிக்க என்ன என்றால் ஒலிம்பிக் தொடர்பாக தகவல்கள் தேடப்படும் போது @riodejaneiro என்ற முகவரியை பலர் டைப் செய்து ஏமாறலாம். அல்லது தேடியந்திரங்கள் இந்த முகவரியை முதலில் சுட்டிக்காட்டலாம். எப்படி இருந்தாலும் அதிகாரபூர்வ டிவிட்டர் பக்கம் இந்த முகவரியில் இருந்தால் நன்றாக இருக்கும்.
ஆக, ஸ்பெயின் பெரியவரிடம் கிட்
டத்தட்ட பொன்னான முகவரி இருக்கிறது என்று தான் சொல்ல வேண்டும்.
அவர் நினைத்திருந்தால் இதை வைத்து பெரிய அளவில் காசு பார்த்திருக்கலாம். ஆனால் அவரோ அவ்வாறு செய்யாமல் இந்த முகவரியை ரியோ நகர் அதிகாரிகளுடம் ஒப்படைத்திருக்கிறார். அதுவும் எப்படி தெரியுமா? தானே அவர்களை தொடர்பு கொண்டு இந்த முகவரி பற்றி தெரிவித்து டிவிட்டர் முகவரியை தானமாக அளித்திருக்கிறார். ( உண்மையில் பலமுறை அவர் இமெயில் அனுப்பிய பிறகே ரியோ அதிகாரிகள் இதன் முக்கியத்துவத்தை உணர்ந்துள்ளனர்).

ஒரு காலத்தில் கிராபிக் டிசைனராக வேலை பார்த்த காஸ்டனோ ஸ்பெயின் பொருளாதார தேக்க நிலை காரணமாக இப்போது ஷு பாலிஷ் போடும் வேலை செய்து வருகிறார். ஆனாலும் கூட இந்த முகவரியை விற்று பணம் பார்க்க அவர் விரும்பவில்லை.
ஆன் ஷூபாலிஷ் போடுபவனாக இருக்கலாம், ஆனால் 13 கோடி ரீயோ மக்களுக்கு என்னிடம் பரிசளிக்க ஒரு விஷயம் இருக்கிறதே என்று இது பற்றி அவர் பெருமித்த்துடன் சொல்கிறார்.

காஸ்டனோ ஏற்கனவே @canada மற்றும் @madrid ஆகிய முகவரிகளை சம்பந்தப்பட்ட நகரங்களிடம் ஒப்படைத்திருக்கிறார். @japan முகவரியையும் கைவசம் வைத்திருப்பவர் ,2020 ஒலிம்பிக் போட்டிகளை நடத்தும் ஜப்பானிடம் ஒப்படைக்க தயாராக இருப்பதாக சொல்கிறார்.
வித்தியாசமான கொடைவள்ளல் தான் !

——-

இணையத்தை கலக்கிய‌ குறும்படத்தின் கதை.


சில மாதங்களுக்கு முன் இண்டெர்நெட்டை கலக்கிய‌ டிரெய்லர் அது!.

ஆனால் அந்த டிரைலர் திரைப்படத்திற்கானது இல்லை.கிரேக்லிச்ட் ஜோ என்னும் செய்திப்படத்திற்கானது.

இந்த‌ செய்தி படத்துக்காக தனியே இணையதளம் அமைக்கப்பட்டு அதில் டிரெய்லரும் வெளியாகி இணையவாசிகளின் கவனத்தை ஈர்த்த‌து.

ஒரு செய்தி படம் இத்தகைய எதிர்பார்ப்பை ஏற்படுத்தியிருப்பது ஆச்சர்யம் தான்.ஆனால் அந்த படமே முழுவதும் ஆச்சர்யமானது தான்.

அந்த படம் உருவான கதையை கேட்டால் அட நாம்மும் பார்க்கலாமே என்று உங்களுக்கும் தோன்றும்.அமெரிக்காவில் உள்ளவர்களுக்கும் நிச்சயம் தோன்றும்.

அப்படி என்ன பிரமாதமான கதை என்றால்,ஒரு இளைஞரின் சைபர் துறவரம் தான் இந்த செய்தி படத்தின் கதை.

ஜோசப் கார்னர் என்னும் 29 வயது இளைஞர் மேற்கொண்ட
சைபர் துறவரம் இல்லை என்றால் சைபர் விரதத்தின் அனுபவ பதிவாக இந்த படம் உருவாக்கப்பட்டுள்ளது.

சைபர் துறவரம் என்றால் இண்டெர்நெட்டின் ஆற்றலை மட்டுமே நம்பி மற்ற உலக வ்ழிகளை எல்லாம் அடைத்து விட்டு இணைய பாதையில் மட்டுமே பயணித்து பார்ப்பது.

கையை கட்டிக்கொண்டி நீச்சல் அடிப்பது போல கண்ணை கட்டி கொண்டு நெடுஞ்சாலையில் நடப்பது போல இண்டெர்நெட் தரும் வழிகளையும் வாய்ப்பையும் மட்டுமே பயன்படுத்தி பார்க்க முயலும் பரிசோதனை முயற்சிகள் வலையுலகின் ஆரம்ப காலத்தில் இருந்தே பிரபலமாக இருந்டு வருகிறது.

இ காமர்ஸ் என்னும் இணைய வணிகம் அறிமுகமான காலத்தில் டாட்காம்கய் என்பவர் தன்னை ஒரு அறையில் அடைத்து கொன்டு இன்டெர்நெட் மூலமே பொருட்களை ஆர்டர் செய்து உயிர் வாழ முடியும் என காட்ட முயன்றிருக்கிறார்.

அதே போல கிளார்க் ஹாரிஸ் என்பவர் ஒரு மாத காலம் பேசாமல் மவுனமாக இருந்து சமூக வலைப்பின்னல் தளம் மூலமே மற்றவர்களோடு பேச முயன்றிருக்கிறார்.

இங்கிலாந்தை சேர்ந்த ஒருவர் டிவிட்டர் மூலம் கிடைத்த தொடர்புகள் மற்றும் உதவுகளை கொண்டே உலகை வலம் வந்திருக்கிறார்.

அமெரிக்க வாலிப்ர ஒருவர் ஒரு மாத காலத்திற்கு மெக்டோனால்ஸ் பர்கரை தவிர வேறு எதையும் சாப்பிடமால் இருந்து அந்த அனுபவத்தை சூப்பர்மீ என செய்திபட்மாக எடுத்திருக்கிறார்.

சில நேரங்களில் விளம்பர் நோக்கம்,சில நேரங்களில் சமூக நோக்கம் ஆகியவை இந்த சைபர் சோதனைகளுக்கு வித்திட்டிருக்கின்றன.

இதே போலவே ஜோசப் கார்னரும் திடிரென ஒரு இணைய பரிசோதனையில் ஈடுபட்டார்.

ஒரு மாத காலம் கிரேக்லிஸ்ட் இணையதளத்தின் மூலம் மட்டுமே வாழ வேண்டும் என்பது தான் அந்த சோதனை.

கிரேக்லிஸ்ட் இண்டெர்நெட்டின் முன்னணி வரிவிளம்பர தளம்.அநேகமாக டாப்டென் இணையதளங்களில் ஒன்று எனலாம்.

கிரேக்லிஸ்ட்டில் எதையும் விற்கலாம் வாங்கலாம் என்று சொல்லப்படுகிறது.விற்கலாம் வாங்கலாம் என்றால் பல நேரங்களில் இலவசமாக என்றும் பொருள்.மீதி நேரங்களில் மலிவாக வாஙகலாம்.பொருட்களில் துவங்கி சேவைகள் வரை கிரேக்லிஸ்ட்டில் பட்டியலிடப்படாதவையே கிடையாது என்று சொல்லலாம்.

அமெரிக்க மிடில் கிளாசின் மாத பட்ஜெட்டில் கணிசமான சிக்கனத்தை ஏற்படுத்தி தரும் நிறுவனம் என்று வால்மார்ட் பற்றி ஒரு கருத்து உண்டு.அதே கருத்து கிரேக்லிஸ்டிற்கும் பொருந்தும்.அந்த அளவுக்கு சாரசரி அமெரிக்கர்களின் தேவையை கிரேக்லிஸ்ட் பூர்த்தி செய்யும் ஆற்றல் கொண்டிருக்கிறது.

வால்மார்ட் போலவே கிரேக்லிஸ்ட்டும் சர்ச்சைக்குறியது என்பது வேறு விஷயம்.ஆனால் எளிதாகவும் மலிவாகவும் பல விஷயங்களை பெற கிரேக்லிஸ்ட்டை பயன்படுத்தலாம்.நாளிதழ் வரி விளம்பரங்களை விட கிரேக்லிஸ்ட் விளம்பரங்களின் வீச்சும் பரப்பும் அதிகம்.

ஜோசப் காரனர் கடந்த 2008 ம் ஆண்டு கிரேகிலிஸ்ட் வரி விளம்பரங்களை மட்டுமே நம்பி ஒரு மாத காலம் வாழ முடியுமா? என யோசித்தார்.சிந்தனையோடு நின்று விடாமல் அதை சோதித்து பார்த்து விடவும் துணிந்தார்.

இப்படி தான் அவரது ஒரு மாத சைபர் துறவரம் ஆரம்பமானது.

கிரேக்லிஸ்ட் வரி விளம்பரங்கள் மூலம் வாழ்வது என்றால் உணவு முதல் இருப்பிடம் வரை எல்லா தேவைகளுக்கும் வரி விளம்பரங்களை மட்டுமே பயன்படுத்துவது.அதாவது பசிக்கிறதா வரி விளம்பரத்தை பார்த்து தொடர்பு கொண்டு சாப்பாட்டிற்கு ஏற்பாடு செய்து கொள்ள வேண்டும்.தூஙக் வேண்டுமா அதற்கான இடத்தையும் விளம்பரம் மூலம் தான் தேட வேண்டும்.பயணம் சேய வேண்டுமா அதையும் விளம்பரம் மூலம் தான் தேட வேண்டும்.எதற்காகவும் கை காசையும் செலவு செய்யக்கூடாது.நண்பர்கள் உதவியையும் நாடக்கூடாது.எதுவாக இருந்தாலும் கிரேக்லிஸ்ட் வரி விளம்பரமே துணை.ஒரே விதி விலக்கு குடிநீர் மட்டும் தான்.

இந்த உறுதியோடு அந்த ஆண்டு டிசம்பர் மாதம் முதல் தேதி ஒரு லேப்டாப்,புதிய செல்போன்,இமெயில் முகவ்ரி,பாச்போர்ட்,டூத்பிரெரெஷ்,மற்றும் துணிகளோடு வீட்டை விட்டு புறப்பட்டு விட்டார்.

அதன் பிறகு சரியாக ஒரு மாத காலம் அறிமுகம் இல்லாதவர்களின் கருணையை நம்பியே அவர் இருந்திருக்கிறார்.

இந்த அனுபவத்தை தான் கிரேக்லிஸ்ட் ஜோ என்னும் பெயரில் செய்தி படமாக உருவாக்கி இருக்கிறார்.

தனது பரிசோதனையை படம் எடுக்கும் திட்டத்தோடு தன்னோடு கேமிராமேன் ஒருவரையும் அழைத்து சென்றிருந்தார்.அந்த காமிராமேனும் கிரேக்லிஸ்ட் விளம்பரம் மூலம் கிடைத்தவர் தான்.

முப்பது நாட்கள் வரி விளம்பரம் மூலம் அறிமுகம் இல்லாதவர்களை தொடர்பு கொண்டு அவர்கள் தயவில் வாழ வேண்டும் என்னும் போது அந்த அனுபவம் வித்தியாசமாகவும் சுவாரஸ்யமாகவும் இருக்க வேண்டும் தானே.அந்த நம்பிகையில் தான் கிரேக்லிஸ்ட் ஜோ தயாராகியிருக்கிறது.

வெறும் சுவாரஸ்ய அனுபவத்தை பதிவு செய்வது மட்டும் கார்னரின் நோக்கம் அல்ல:அறிமுகம் இல்லாதவர்களின் கருணை மற்றும் உதவும் மனோபாவத்தையும் உணர்த்துவது தான்.

இந்த எண்ணம் தனக்கு தோன்றியதே 2008 ல் அமெரிக்காவில் நிலவிய அவநம்பிக்கையினால் தான் என்கிறார் கார்னர்.பொருளாதார சீர்குலைவால் வேலையில்லா திண்டாட்டம் அதிகரித்து நாளிதழிகளில் இருந்து டிவி நிகழ்ச்சி வரை எங்கும் பொருளாதார தேக்க நிலை பற்றிய பாதிப்பு பற்றி பேசிக்கொண்டிருந்த போது காரனர் ஏன் எல்லோரும் புலம்பி கொண்டிருக்க வேண்டும் நம் நாட்டில் நல்லதே இல்லையா என காட்ட விரும்பி அதற்கான பயணமாக இந்த கிரேக்லிஸ்ட் சோதனையை தேர்வு செய்தார்.

இந்த சோதனை மூலம் வித்தியாசமான மனிதர்கள்,எதிர்பாராத அனுபவங்கள் வாயிலாக சராசரி அமெரிகர்களின் கருணையும் இந்த படத்தில் பதிவு செய்திருக்கிறார்.

எல்லோரும் இதனை பார்க்க வேண்டும் என்ற ஆவலில் படத்திற்காக அதே பெயரில் இணையதளத்தையும் அமைத்திருந்தார்.இந்த தளத்திலேயே டிரெய்லரையும் பார்க்கலாம்.படத்தை ஐடியூன்சில் வாங்கி பார்க்கலாம்.
இந்த படம் உருவான பின்னணி காட்சிகள் பற்றி ஏபிசி இணையதளம் சுவாரஸ்யமான கட்டுரையை வெளியிட்ட‌து.

இணையதள முகவரி;http://www.craigslistjoe.com/