Tag Archives: shopping

இது நடுநிலையான தேடியந்திரம்!

logo10vertical-home2-192x185அன்பபிள் (Unbubble) தேடியந்திரத்தை அறிவீர்களா? இது ஒரு சர்வதேச தேடியந்திரம். ஐரோப்பாவின் பங்களிப்பு.

தேடியந்திர உலகில் எந்த ஒரு ஒற்றை தேடியந்திரமும் ஆதிக்கம் செலுத்துவது நல்லதல்ல, அதை ஏற்றுக்கொள்ளவது அதைவிட நல்லதல்ல எனும் சிந்தனை ஐரோப்பாவில் வலுவாகவே இருக்கிறது. அதன் அடையாளமாக உருவான தேடியந்திரங்களின் வரிசையில் அன்பபிள் தேடியந்திரமும் வருகிறது.

ஆனால் இது மூல தேடியந்திரம் அல்ல: மெட்டா தேடியந்திர வகையைச்சேர்ந்தது. அதாவது இது சொந்தமாக இணையத்தை தேடுவதில்லை. மாறாக, பிற தேடியந்திரங்களின் தேடல் அட்டவனையை பயன்படுத்தி அவற்றில் இருந்து பொருத்தமான தேடல் முடிவுகளை அளிக்கிறது.

மற்ற தேடியந்திரங்களை அடிப்படையாக கொண்டு இயங்கினாலும், இரண்டு காரணங்களுக்காக இந்த தேடியந்திரத்தை கவனிக்க வேண்டும். முதல் காரணம் இதன் தேடல் இடைமுகம் நன்றாக இருக்கிறது. எளிமையாக, ஆனால் சற்று வண்ணமயமாக இருக்கும் இதன் முகப்பு பக்கத்தில் உள்ள தேடல் கட்டத்தில் குறிச்சொல்லை டைப் செய்ததும் முடிவுகளை வரிசையாக பட்டியலிடுகிறது. தேடல் முடிவுகள் நீல நிற கொட்டை எழுத்துக்கள், அதன் கீழ் சிவப்பு நிறத்தில் இணையதளத்தின் பெயர், அதற்கும் கீழ் தளத்திற்கான விளக்கம் என இதன் தேடல் பட்டியல் தெளிவாக, பளிச்சென இருக்கிறது. முடிவுகளின் இடப்பக்கத்தில் தளத்தின் தன்மையை உணர்த்தும் வகையில் அவற்றின் முகப்பு பக்க துண்டு படம் இடம்பெறுகிறது. வலப்பக்கத்தில் கூடுதல் அம்சங்களுக்கான குறிப்புகள் மற்றும் தேடல் பரிந்துரைகளை காணலாம்.

முடிவுகள் பல தேடியந்திரங்களில் இருந்து தேர்வு செய்யப்பட்டவை என்பதை பிரதிபலிக்கும் வகையில் பட்டியலின் தரம் இருப்பதை பார்க்கலாம். ஆக, ஓரளவு சிறந்த தேடல் அனுபவத்தையே அளிக்கிறது.

முடிவுகளை இணையம், புகைப்படங்கள், செய்திகள், ஷாப்பிங் உள்ளிட்ட வகைகளின் கீழ் தேடலாம். அறிவியலுக்கான பகுதியும் இருக்கிறது. குறிப்பிட்ட இணையதளத்தில் மட்டும் தேடுவதற்கான குறுக்கு வழி உள்ளிட்ட மேம்பட்ட தேடல் வசதிகளும் இருக்கின்றன.

இந்த தேடியந்திரம் தொடர்பான இரண்டாவது முக்கிய அம்சம், தேடலில் நடுநிலைத்தன்மையை பின்பற்றுவதாக தெரிவிக்கப்படுவது தான். ஆம், இந்த தேடியந்திரம் நடுநிலையான தேடல் முடிவுகளை அளிப்பதாக உறுதி அளிக்கிறது. இந்த நோக்கத்துடன் பல்வேறு தேடியந்திரங்கள் மற்றும் தேடல் ஆதாரங்களில் இருந்து முடிவுகளை எடுத்து அவற்றின் நடுநிலைத்தன்மையை பரிசீலித்து பட்டியலிடுவதாக தெரிவிக்கப்பட்டுள்ளது.

அதாவது தேடல் குமிழ் இல்லாத முடிவுகளை பட்டியலிடுக்கிறது. பொதுவாக கூகுள் உள்ளிட்ட தேடியந்திரங்கள் முடிவுகளை வடிகட்டித்தருகின்றன. இந்த வடிகட்டல் பலவிதங்கள் நிகழ்கின்றன. இணையவாசிகளின் இருப்பிடத்திற்கு ஏற்ப அவரது நாட்டுக்கான தேடியந்திர வடிவம் முன்வைக்கப்படலாம். உதாரணத்திற்கு,இந்தியாவில் இருந்து தேடுபவர்களுக்கு இந்தியா சார்ந்த தேடல் முடிவுகள் பிரதானமாக இருக்கும். சர்வதேச பதிப்பில் இருந்து இது வேறுபட்டிருக்கும். இது தவிர, இணையவாசிகளின் கடந்த கால தேடல்களுக்கு ஏற்ப அவரது விருப்பங்கள் சார்ந்த தேடல் முடிவுகள் முன்வைக்கப்படலாம். இத்தகைய வடிகட்டல் நிகழ்கிறது என்பதை இணையவாசிகள் அறியாமலே இருக்கலாம். தேடல் குமிழ் என்பது பயனாளிகளின் தகவல் சுதந்திரத்தை பாதிக்கும் வகையில் அமைவதாக கடுமையான விமர்சனம் இருக்கிறது.

இணைய கடலில் இருந்து தகவல்களை தேடித்தருவதாக நம்பிக்கொண்டிருக்கும் போது, தேடியந்திரங்கள் அந்த முடிவுகளை வடிகட்டி தருவது ஏற்கத்தக்கது அல்லவே. எனவே தான் அவை இணையவாசிகளை சுற்றி ஒரு குமிழை உண்டாக்கி விடுவதாக குற்றம்சாட்டப்படுகிறது.

இந்த தேடல் குமிழ்கள் இல்லாமல் தேடல் முடிவுகளை அளிப்பதாக அன்பபிள் பெருமிதம் கொள்கிறது. அதன் பெயரும் இதை உணர்த்தும் வகையில் அமைந்துள்ளது.

இது தவிர, தேடல் ஆதாரங்களின் தன்மையை பரிசீலித்து, நடுநிலையான முடிவுகளை மட்டுமே தேர்வு செய்வதாகவும் குறிப்பிடப்பட்டுள்ளது. இப்படி நடுநிலையான தேடல் ஆதாரங்களை தீர்மானிப்பதற்கான பிரத்யேக வழியை உருவாக்கி வைத்திருப்பதாகவும் அன்பபிள் தெரிவிக்கிறது.

பல்வேறு தேடியந்திரங்களை பரிசீலித்து ஒரே இடத்தில் சிறந்த முடிவுகளை வசதியான முறையில் அளிப்பது இதன் சிறப்பம்சமாக குறிப்பிடப்பட்டுள்ளது. மேலும் இணையவாசிகள் பற்றிய தனிப்பட்ட தகவல்களை சேகரிக்காமல் இருப்பதாகவும் தெரிவிக்கப்பட்டுள்ளது. பாதுகாப்பான தேடல் முடிவுகளையும் அளிக்கிறது.

ஜெர்மனியில் உள்ள சாஸே எனும் மென்பொருள் நிறுவனம் இந்த தேடியந்திரத்தின் பின்னே உள்ளது.  நன்கொடை மற்றும் ஷாப்பிங் பரிந்துரை மூலமான நிதி ஆதாரங்களை நம்பி இருக்கிறது.

தேடல் என்பது கூகுளுடன் தொடங்கி கூகுளில் முடியாமல் பரந்து விரிந்திருக்கிறது என்பதை உணர அன்பபிள் தேடியந்திரத்தை பயன்படுத்திப்பார்க்கலாம்.

 

தேடியந்திர முகவரி: https://www.unbubble.eu/

 

 

மெட்டா தேடியந்திரங்கள் பற்றி அறிய: http://bit.ly/2dybzLd

 

 

நான் வாங்க விரும்புவதெல்லாம்…;ஷாப்பிங் வலைப்பின்னல்


தேவைகளையும் விருப்பங்களையும் பட்டியலிட்டு பகிர்ந்து கொள்ள உதவும் இணையதளங்கள் இருக்கின்றன.இவை ஒவ்வொன்றும் ஒரு ரகம் .ஒவ்வொன்றும் ஒரு தேவையை நிறைவேற்றுகின்றன.

அதே போல வாங்க விரும்பும் பரிசுப்பொருட்களை பட்டியலிட்டு பகிர்ந்து கொண்டு அதன் மூலம் புதுமையான மற்றும் பயனுள்ள பரிசுப்பொருளை கண்டு கொள்ளும் உதவும் தளங்களும் இருக்கின்றன.

பரிசு பொருள் என்று இல்லை,பொதுவாக வாங்க விரும்பும் பொருட்களை பட்டியலிட்டு பகிர்ந்து கொள்ள உதவும் சமூகம் ஷாப்பிங் தளங்களும் இருக்கின்றன.

இவை எல்லாவற்றின் நோக்கமும் அடிப்படையில் ஒன்று தான்.இணையம் மூலம் விருப்பங்களை பகிர்ந்து கொண்டு அந்த பகிர்தல் மூலம் புதியவற்றை இனங்காண்பது தான் அது.

இந்த வகை தளங்களின் செயல்பாடுகளும் பொதுவானது தான்.விருப்பங்களை பட்டியலாக பகிர்ந்து கொள்வது.மற்றவர்களின் பட்டியலை பின் தொடர்ந்து அவர்கள் விருப்பங்களை அறிவது.அந்த அறிதல் மூலமாக புதிய யோசனைகளை பெறுவது.இவை தான் இந்த தளங்களின் அடிப்படை செயல்பாடு.

இதன் மூலம் இந்த தளங்கள் சாத்தியமாக்கும் சமூக தன்மையையும் அந்த சமூக தன்மை மூலமாக நிறைவேறும் தனிப்பட்ட தேவைகளும் அற்புதமானவை.

இந்த பிரிவில் புதுப்புது தளங்களும் அறிமுகமாகி கொண்டே தான் இருக்கின்றன.சில உண்மையிலேயே புதுமையானவை.சில ஏற்கனவே உள்ள தளங்களின் இன்னொரு வடிவமாக அலுப்பூட்டக்கூடியவை.

வான்ஸ்டர் இந்த பட்டியலில் புதிதாக சேர்ந்திருக்கிறது.

வான்ஸ்டரை முற்றிலும் புதுமையான சேவை என்று புகழவும் முடியாது.அதே நேரத்துல் ஏற்கனவே உள்ள சேவை தானே என்று புறந்தள்ளி விடவும் முடியாது.

நீங்கள் விரும்பும் எல்லாம் ஒரே இடத்தில் என அழைக்கும் வான்ஸ்டர் ,மூன்று வகையான தேவையை ஒரே நேரத்தில் நிறைவேற்றி கவனத்தை ஈர்க்கிறது.

இணைய பலகையான பின்ட்ரெஸ்ட்டின் தோற்றத்தை நினைவு படுத்தும் முகப்பு பக்கத்தை பெற்றுள்ள வான்ஸ்டர் என்ன செய்கிறது என்றால் உங்கள் விருப்பங்களுக்கான பட்டியலை உருவாக்கி கொள்ள உதவுகிறது.விருப்பங்கள் என்பது நீங்கள் வாங்க விரும்பும் பொருட்கள்.(பெரும்பாலும் இணையம் வழியே வாங்க விரும்புபவை).

புதிதாக வந்துள்ள செல்போனையோ அல்லது புத்தகத்தை வாங்க விரும்புகிறீர்களா,உடனே அதனை உங்கள் விருப்ப பட்டியலில் சேர்த்து கொள்ளலாம்.இதற்கென்றே புக்மார்க் வசதியும் இருக்கிறது.உறுப்பினராக சேர்ந்த பின் புக்மார்க் வசதியையும் உங்கள் பிரவுசரில் சேர்த்து கொண்டால் அதன்பிறகு இணையத்தில் உலாவும் போது வாங்க தூண்டும் பொருள் கண்ணில் பட்டல் அதன் மீது புக்மார்க்கை கிளிக் செய்தால் போதும் அந்த பொருள் தானாக உங்கள் விருப்ப பட்டியலில் சேர்ந்து விடும்.அதுவும் அதன் அழகான புகைப்படத்துடன்.

முகப்பு பக்கத்தில் இந்த புகைப்படங்களை தான் வரிசையாக பார்க்கலாம்.எந்த புகைப்படத்தை கிளிக் செய்தாலும் அத்ய் தொடர்பான விவரங்களை காணலாம்.அதாவது அந்த பொருளை வாங்க விரும்பி குறித்து வைத்தது யார்,வேறு யாரெல்லாம் அதனை வாங்க விருப்பம் தெரிவித்துள்ளனர் போன்ற விவரங்களை அறிந்து கொள்வதோடு அதனை எங்கே வாங்கலாம் என்ற தகவலையும் தெரிந்து கொள்ளலாம்.

முகப்பு பக்கத்தில் பகிரப்படும் வாங்குவதற்கான விருப்பங்களை பார்க்கும் போது புதிய பொருட்களை அறிமுகம் செய்து கொள்ளலாம் என்றால் புகைப்படங்களை கிளிக் செய்து பார்ப்பதன் மூலம் அவை மற்றவர்கள் மத்தியில் பிரபலமாக இருக்கிறதா என்றும் தெரிந்து கொள்ளலாம்.

பொருட்களின் கீழ் அவை பற்றிய கருத்துக்களையும் தெரிவிக்கலாம்.பொருட்கள் பற்றிய கூடுதல் தகவல் மற்றும் அவற்றின் பயன்பாடு குறித்து அறிய இந்த பின்னூட்டங்கள் உதவலாம்.

மற்றவர்கள் விருப்பம் தெரிவித்த பொருட்களை நாமும் விரும்பினால் ஒரே கிளிக்கில் நமது விருப்ப பட்டியலில் சேர்த்து விடலாம்.குறிப்பிட்ட ஒரு உறுப்பினரின் தேர்வுகள் வியக்க வைத்தால் அவரை பின் தொடர தீர்மானிக்கலாம்.அதன் பிறகு விரும்பும் புதிய பொருட்களை நாமும் உடனடியாக தெரிந்து கொள்ளலாம்.இந்த வலையில் வாங்கும் விருப்பத்திற்கான வலைப்பின்னலாக இந்த தளம் செயல்படுகிறது.

ஷாப்பிங்கில் நாட்டம் கொண்டவர்கள் பரிசளிக்க ஏற்ற புதிய பொருட்களை அறிமுகம் செய்து கொள்ள இந்த தளம் மிகவும் உதவியாக இருக்கும்.

அது மட்டும் அல்ல குறிப்பிட்ட பொருளை வாங்கலாமா வேண்டாமா என்ற சந்தேகம் இருந்தால்,அந்த கேள்வியை நமது நண்பர்கள் மத்தியில் கேட்டு கருத்து கணிப்பு நடத்தி அதனடிப்படையில் முடிவு செய்யலாம்.இது இந்த தளம் வழங்கும் இரண்டாவது வசதி.

அதே போல குறிப்பிட்ட பொருளை நண்பருக்கு வாங்கி பரிசளிக்க விரும்பி அதன் விலை கூடுதலாக இருப்பதாக நினைத்தால் மற்ற நண்பர்களோடு இணைந்து கூட்டாக அதனை வாங்கி கொடுக்கலாம்.இதற்கான ஒருங்கிணைப்பு வசதியையும் இந்த தளம் வழங்குகிறது.இது இந்த தளத்தின் மூன்றாவது வசதி.

இது தவிர பிறந்த நாள் மற்றும் திருமண நாள் போன்ற பரிசளிப்புக்கு ஏற்ற நாட்களை மறக்காமல் இருக்க நினைவூட்டும் வசதியும் இருக்கிறது.

பேஸ்புக் மூலமே உறுப்பினராகலாம்.தனியேவும் உறுப்பினராகலாம்.

இணையதள முகவரி;http://www.wantster.com/

ஆன்லைனில் சட்டை தைக்கலாம்.

ஷாப்பிங்,பேங்கிங் என எல்லாவற்றையும் இண்டெர்நெட் மூலமே செய்து கொள்ளும் காலம் இது.சினிமா டிக்கெட் புக் செய்வது பயணத்திற்கான டிக்கெட் புக் செய்வது போன்றவற்றையும் ஆன்லைனிலேயே முடித்து கொண்டு விடலாம்.

இப்போது விருப்பத்திற்கேற்ற ஆடைகள் வாங்கி கொள்வதையும் கூட இண்டெநெட் மூலமே நிறைவேற்றி கொள்ளலாம்.இதற்காக என்றே பிரத்யேக இணையதளங்கள் அறிமுகமாகி கொண்டிருக்கின்றன.

ஆடைகளை ஆன்லைனில் வாங்கி கொள்ள‌லாம்! அது சாத்தியம் தான்!ஆனால் அளவெடுத்து தைப்பது போல வருமா என்று கேட்பவர்கள் பாம்பே ஷர்ட் கம்பெனி இணையதளத்திற்கு சென்று பார்க்க வேண்டும்.

ஆண்களுக்கான சட்டைகளை ஆன்லைனில் வாங்கி கொள்வதற்கான சேவையை வழங்கும் இந்த தளம் ஆர்டர் செய்பவர் தங்கள் விருப்பத்திற்கேற்ற வகையில் அளவு கொடுக்கவும் வழி செய்கிறது.சட்டைக்கான நிறம் மற்றும் வடிவமைப்பையும் விரும்பிய வகையில் தேர்வு செய்து கொள்ளலாம்.

இணையத்திலேயே சட்டைக்கு அளவு கொடுக்க முடியும் என்று சொன்னால் கொஞ்சம் ஆச்சர்யமாக இருக்கலாம்.ஆனால் அது எத்தனை சுலபமானது என்பதையும் இந்த தளத்தின் மூலம் தெரிந்து கொள்ளலாம்.

இதற்காக எப்படி அளவு கொடுப்பது என்னும் விளக்க பகுதி இருக்கிறது.முதலில் காலரை அளந்து கொள்ள வேண்டும்,அடுத்ததாக மார்பின் அளவை கணக்கிட வேண்டும் என்று அடுத்தடுத்து வழிகாட்டி அழகாக சட்டைக்கான அளவுகளை அளவிட்டு அவற்றை ஆன்லைனிலேயே சமர்பிக்க இந்த தளம் வழி செய்கிறது.(உங்கள் மனைவி அல்லது அம்மாவை கூப்பிட்டு அளவு எடுக்க சொல்லுங்கள் என்கிறது வீடியோ விளக்க அறிமுகம்)

இந்த அளவுகளின் அடிப்படையில் வாடிக்கையாளர் தேர்வு செய்யும் துணி ரகத்தில் சட்டை தைத்து அனுப்பி வைக்கப்படும்.’

து8ணி ரகத்தை தேர்வு செய்யும் போதே அதன் நிறத்தையும் தேர்வு செய்து கொள்ளலாம்.அதோடு சட்டையின் காலர் எப்படி இருக்க வேண்டும் கைப்பகுதி எப்படி இருக்க வேண்டும் என்பது போன்ற அமசங்களையும் விருப்பம் மற்றும் ரசனைக்கேற்ப தேர்வு செய்து கொள்ளலாம்.அழகாக புகைப்பட குறிப்போடு பலவகையான வடிவமப்பு வாய்ப்புகள் கொடுக்கப்பட்டுள்ளன.

ஆக நேரில் அளவு கொடுப்பதை விட இன்னும் கச்சிதமாக சட்டையின் அள‌வையும் வடிவமைப்பையும் இருந்த இடத்தில் இருந்தே தேர்வு செய்து கொள்ளலாம்.

தையல் கடைக்கு போக நேரமில்லாதவர்கள் அல்லது தையல் கடையை தேடி போக வேண்டுமே என அலுத்து கொள்பவர்கள் யார் வேண்டுமானாலும் விட்டிலிருந்தபடியே இந்த தளத்தின் மூலம் எளிதாக தங்களுக்கு தேவையான சட்டையை ஆர்டர் செய்து கொள்ளலாம்.

எல்லாம் சரி அளவு சரியாக இல்லை என்றால் என்ன செய்வது?அதற்கும் விளக்கம் தரப்பட்டுள்ளது.சரியாக அளவு கொடுத்திருந்தும் அதிலிருந்து குறிப்பிடத்தக்க மாற்றம் இருந்தால் சரி செய்து தருவதாக உறுதி தரப்பட்டுள்ளது.

சொந்த உஅபயோகத்திற்கும் இந்த தளத்தை பயன்படுத்தலாம்.சகோதரர் அல்லது காதலர் போன்றவருக்கு பரிசளித்து ஆச்சர்யத்தில் ஆழ்த்தவும் பயன்படுத்தலாம்.

ஆன்லைனிலேயே சட்டை தைத்து கொள்ளும் உதவும் இதே போன்ற இணையதளம் ஒன்று ஏற்கனவே இருக்கவும் செய்கிறது.ஷர்ட்ஸ் மைவே என்னும் தளம் இணையம் வழி சட்டை தைக்கும் வசதியை வழங்குகிறது.எந்த நாட்டில் இருந்தும் இந்த சேவையை பயன்படுத்தலாம்.

இந்திய தளமாப பாம்பே ஷர்ட் தளத்திற்கு இந்த தளமே முன்னோடி என சொல்லலாம்.

இணையதள முகவரி:http://www.bombayshirts.com/

————–

ஷ‌ர்ட்ஸ் மைவே பற்றி இண்டெர்நெட் டைலர் என்னும் தலைப்பில் ஏற்கனவே எழுதியுள்ளேன்.

என் ஸ்டைல் எப்படி? கேட்க ஒரு இணையதளம்.

ஆலோசனை கேட்க உதவும் இணையதளங்கள் ஒரு அலையெனவே தொடர்ச்சியாக அறிமுகமாகி கொண்டிருக்கின்றன.

குழப்பமில்லாமல் முடிவெடுக்க இணையம் மூலம் நண்பர்களிடம் ஆலோசனை நடத்த வழி செய்யும் தளங்களை போலவே ஒருவரின் தோற்ற பொலிவை மேம்படுத்தி கொள்வது குறித்தும் ஆலோசனை கேட்கும் அழகான தளங்கள் அறிமுகமாகி வருகின்றன.

அந்த வகையில் உங்கள் தோற்றத்தையே மாற்றி காட்ட (மேலும் அழகாக தான்)வழி செய்ய ரீ ஸ்டைல் மீ தளம் உதயமாகியிருக்கின்றது.

புற தோற்றத்தில் ஆர்வமும் அக்கரையும் கொண்டவர்கள்(யார் தான் இதற்கு விதிவிலக்கு)இந்த தளத்தின் மூலம தங்கள் உடை அலங்காரம் குறித்தும் தோற்றம் குறித்தும் மற்றவர்களின் (நண்பர்கள்)கருத்தை அறிந்து கொள்ளலாம்.அவற்றின் அடிப்படையில் தங்கள் ஸ்டைலை மாற்றியும் கொள்ளலாம்.

மணிக்கணக்கில் கண்னாடி முன் நின்று அழகு பார்ப்பவர்களும்,இந்த உடையில் எப்படி இருக்கிறேன் என்று பார்ப்பவர்களிடம் எல்லாம் அலுக்காமல் கருத்து கேட்பவர்களும் இந்த தளத்தை வரப்பிரசாதமாகவே கருதுவார்கள்.காரணம் அதை தான் இந்த தளம் செய்கிறது.

புற தோற்றத்தை மேலும் மெருகேற்றி கொள்ள நினைப்பவர்கள் இந்த தளத்தில் தங்களின் புகைப்படத்தை சமர்பித்து மற்றவர்கள் கருத்து சொல்ல காத்திருக்க வேண்டும்.அதன் பிறகு தளத்தின் உறுப்பினர்கள் இந்த புகைப்படத்தை பார்த்து விட்டு தங்களின் கருத்துக்களை தெரிவிப்பார்கள்.

புகைப்படத்திற்கு மேலே வரிசையாக முக அழகு உட்பட பல்வேறு அம்சங்களுக்கான குறியீடுகளும் கொடுக்கப்பட்டுள்ளன.புகைப்படத்தை பார்த்து எந்த அம்சம் கவர்கிறதோ அந்த அம்சத்தில் கிளிக் செய்து கருத்து தெரிவிக்கலாம்.

அஹா அற்புதம் என்று பாராட்டாகவும் தெரிவிக்கலாம்.இல்லை தலை முடி வாரும் வாகை மாற்றி கொள்ளலாம் என்பது போலவும் கருத்து தெரிவிக்கலாம்.பல நேரங்களில் சின்ன சின்ன மாற்றம் அருமையான பலனை தரககூடும் .அது போலவே இந்த யோசனைகள் ஒருவரின் தோற்றத்தை மேம்படுத்தி கொள்ளவும் வழி வகுக்ககலாம்.

அதோடு மற்றவர்கள் நம்மை எப்படி பார்க்கின்றனர் என்று தெரிந்து கொள்ள முடிவது தோற்றம் பற்றிய தன்னம்பிக்கையை தரும் தானே.

ஆழமாக அலசி ஆராய்ந்து கருத்து சொல்ல மனம் இல்லாதவர்கள் தோற்ற பொலிவை ஆமோதிக்கலாம்,அல்லது நிராகரிக்கலாம்.இதற்கு வசதியாக கட்டை விரலை உயர்த்தும் செய்கை மற்ரும் கடை விரலை கீழே காண்பிக்கும் செய்கை ஆகியவற்றுக்கான குறியீடுகள் கொடுக்கப்பட்டுள்ளன.தோற்றம் தொடர்பான அம்சங்களுக்கு மேலும் கீழும் இந்த குறியீடுகள் உள்ளன.

இவற்றில் கிளிக் செய்து விட்டு வாக்களிக்கவும் செய்யலாம்.வாக்குகளின் அடிப்படையில் ஒருவர் தனது அழகுக்கு என்ன மதிப்பு உள்ளது என்பதை தெரிது கொள்ளலாம்.

புகைப்படத்தை சம்ர்பிகும் போதே அதனை பேஸ்புக் மற்றும் டிவிட்டர் உள்ளிட்ட நண்பர்களோடு பகிர்ந்து கொண்டு கருத்து கேட்கும் வசதியும் உள்ளது.

இதே போல இந்த தளத்தில் தங்கள் படங்களை சம்ர்பித்து விட்டும் ஆலோசனை கேட்டு காத்திருக்கும் மற்ற உறுப்பினர்களுக்கு நிங்களும் ஆலோசனை கூறலாம்.ஏற்கனவே சமர்பித்தவர்களுக்கு கிடைத்த வரவேற்பு எப்ப்டி இருக்கிறது என்பதையும் பார்க்கலாம்.சமீபத்திய ப்டங்கள்,பிரபலமானவை என்று பலவேறு வகைகளில் இவை பட்டியலிடப்பட்டுள்ளன.

நாடுகளின் அடிப்படையிலும் பட்டியல் இருக்கிறது.

நடிகைகளும் மாடல்களும் தான் அழகு கலை நிபுணர்களின் ஆலோசனை கேட்டு தங்கள் அழகை மேம்படுத்தி கொள்ள வேண்டுமா என்ன? நீங்களும் கூட நண்பர்களின் ஆலோசனையை கேட்டு பயன்பெறலாம்.நிபுணர்களின் குறிபுகளை விட நண்பர்கள் வழங்கும் இந்த ஆலோசனை ஜனநாயகமயமானது.

இதே போலவே புகைப்படத்தை சமர்பித்து மற்றவர்களின் முதல் அபிப்ராயத்தை அறிந்து கொள்ள உதவும் சேவையை ஸ்பீகிங் பேசஸ் தளம் வழங்கி வந்தது.ஆனால் இந்த சேவை காணாமல் போய் விட்டது.

இணையதள முகவரி;http://www.restyleme.com/

afday

எங்கெங்கு காணினும் கலைகளடா!

பரிசுப்பொருட்களை வாங்க நினைக்கும் போது ஒரு குழப்பம் வரும் அல்லவா?வழக்கமான பொருட்களாக இல்லாமல் வித்தியாசமான பயனுள்ள பொருட்களை பரிசளித்தால் நன்றாக இருக்கும் என்று நினைப்போம் ஆனால் அவற்றை எங்கே வாங்குவது என தெரியாமல் தவிப்போம் அல்லவா?

இத்தகைய குழப்பம் உள்ளவர்கள் ஆப் டே தளத்திற்கு சென்றால் சொக்கிப்போய் விடுவார்கள்.அதே போல கலை உள்ளம் கொண்டவர்களும் இந்த தளத்தை பார்த்தால் மகிழ்ச்சி அடைவார்கள்.

இ காமர்ஸ் என்று சொல்லப்படும் இணைய வணிக வகையை சேர்ந்த இந்த தளம் இந்திய கலைப்பொருட்களை விற்பனை செய்கிறது.

கலைப்பொருட்கள் என்றால் பொதுவாக ஒரு கண்ணோட்டம் இருக்கும் அல்லவா! அத்தகைய வரையரை எதுவும் இல்லாமல் பாரம்பரிய வகையில் இருந்து நவீன வகை வரை எல்லா வகையான கலைப்பொருட்களும் இங்கே இடம் பெறுகின்ற‌ன.வித்தியாசமானவை ,விநோதமானவையும் இதில் அடங்கும்.

அதற்கேற்ப எங்கெங்கும் கலைகள்,என்பதே இந்த தளத்தின் கொள்கையாக இருக்கிறது.நம்மை சுற்றி எல்லா இடங்களிலும் கலைகள் எல்லா வடிவிலும் இருக்கின்றன என்று சொல்லும் இந்த தளம் சிலையிலும் கலையை காணலாம்,மோதிரத்திலும் காணலாம் என்கிற‌து. இப்படி கலையை காணக்கூடிய பொருட்களை எல்லாம் விற்பனை செய்வதற்கான களமாக இந்த தளம் உருவாக்கப்பட்டுள்ளது.அதாவது தினசரி வாழ்கையிலேயே கலைகளை காண முடியும் .இதன் ஆங்கில வாசகமான ஆர்ட் பார் எவ்ரிடே என்பதன் சுருக்கமே தளத்தின் இணைய முகவரி.

அதோடு இந்திய கைவினை கலைஞர்களும் படைப்பாற்றலோடு விதவிதமான கலைப்பொருட்களை உருவாக்கி வருகின்றனர்.இந்த பொருட்களுக்கான இணைய சந்தையாகவும் ஆப் டே செயல்ப‌டுகிறது.கலைப்பொருட்களை யாரும் எவரும் சுலபமாக வாங்கி கொள்வதற்கான வழியாகவும் இந்த தளம் விளங்குகிறது.

கலை ஆர்வம் கொண்டவ‌ர்களை முதல் பார்வையிலேயே கவர்ந்துவிடக்கூடிய வகையில் எளிமையான ,நேர்த்தியான முறையில் கலை பொருட்கள் முகப்பு பக்கத்தில் பட்டியலிடப்பட்டுள்ளன.

முதலில் நச்சென ஒர் பொருள் இடம் பெறுகிறது.புகைப்படத்தோடு அதன் விவரங்களும் விலையும் கொடுக்கப்பட்டுள்ளது .அதன் கீழே வரிசையாக புகைப்படத்தோடு பொருட்கள் பட்டியல் தொடர்கின்றன.எந்த பொருள் கவர்கிறதோ அதனை கிளிக் செய்து மேலும் விவரங்களை தெரிந்து கொள்ளலாம்.

அருகிலேயே பொருட்கள் அவற்றின் வகைகளுக்கு ஏற்பவும் பட்டியலிடப்பட்டுள்ளன.கைப்பைகள்,ஓவியங்கள்,நகைகள்,விளையாடு பொருட்கள்,கல்வி பொருட்கள்,கடிகார‌ங்கள்,காகித பொருட்கள் என பல வகை பொருட்கள் பட்டியலில் உள்ளன.மேலும் சுடுமண் பொம்மைகள்,விளக்குகள்,வீடுகளுக்கான அலங்கார‌ பொருட்கள் ஆகியவகையும் உள்ளன.

ஓவ்வொரு பொருளாக கிளிக் செய்து பார்த்தால் ஏதோ கலை கூடத்தை சுற்றி பார்த்த உண‌ர்வு ஏற்படுகிறது.ஒவ்வொரு பொருளும் தன் கவண்ணத்திலும் பயன்பாட்டு தன்மையிலும் கவர்ந்திழுக்கின்றன.

வித்தியாசமான் சுவர் கடிகாரம்,அலங்கார கைப்பை,சிறுவர்களுக்கான பென்சில் பாக்ஸ் ,ஓவியம் போன்ற‌ அஞ்சல் அட்டை,மர கார் பொம்மை என எல்லா பொருட்களுமே கண்ணையும் கருத்தையும் கவர்கின்றன.விலையும் கையை கடிக்காமல் தான் இருப்பதாக‌ தோன்றுகிறது.

வீட்டு உபயோகத்திற்கும் வாங்கலாம்.மற்றவர்களுக்கு பரிசளிக்கவும் வாங்கலாம்.இணையம் வழி ஷாப்பிங் மட்டும் அல்லாமல் ஆர்டர் செய்து விட்டு டெலிவரியின் போது பணம் தரும் வசதியும் உள்ளது.

ஐஐஎம் பட்டதாரியான ராஷ்மி என்னும் பெண்மணி இந்த தளத்தை நடத்திவருகிறார்.ராஜஸ்தான்,பஞ்சாப்,ஜம்மு ஆகிய இடங்களில் பயணம் செய்த போது பார்க்க நேர்ந்த பல வகையான கலைகள் தன்னை கவர்ந்ததாகவும் கலைப்பொருட்கள் விற்பனை செய்யும் கடைகளில் இவற்றை பெரும்பாலும் காண முடியாமல் போனதையும் பார்த்து இந்த இடைவெளியை போக்கும் வகையில் ஆப் டே தளத்தை துவக்கியதாக ராஷ்மி உற்சாகமாக் கூறுகிறார்.

இணையதள முக‌வரி;http://www.afday.com/