All posts by CyberSimman

இண்டெர்நெட் சமூக மாற்றத்திற்கு வித்திடக்கூடிய ஜனநாயக தன்மை கொண்ட தொழில்நுட்பம் என்று சொல்லப்படுவதில் என‌க்கு மிகுந்த நம்பிக்கை உண்டு என்பதால் இண்டெர்நெட்டை எப்படியெல்லாம் பயன்படுத்திகொள்ள முடிகிறது என சுட்டிக்கட்டுவதை எனது கடமையாக‌வே கருதுகிறேன்... மேலும்

இணையம் அறிவோம்; இணையம் காப்போம்

 

’நெட் நியூட்ராலிட்டி’ எனப்படும் ’இணைய சமநிலை’ தொடர்பான விவாதம் மீண்டும் கவனத்தை ஈர்த்துள்ளது. அண்மையில் இந்திய தொலை தொடர்பு ஒழுங்குமுறை ஆணையமான டிராய் வெளியிட்ட பரிந்துரைகள் அடிப்படையில் இணைய சமநிலைக்கு ஆதாரவாக அமைந்துள்ளன. இது இணைய சமநிலை ஆர்வலர்களையும், இணைய சுதந்திர ஆதாரவாளர்களையும் மகிழ்ச்சியில் ஆழ்த்தியுள்ளது.

இணைய சமநிலை தொடர்பான பரிந்துரைகளை நவம்பர் 28 ம் தேதி டிராய் வெளியிட்டது. இணைய சேவை வழங்கும் ஐ.எஸ்.பி நிறுவனங்கள் எந்த வகையான உள்ளடக்கத்திற்கும் (சேவை) இடையே பாரபட்சம் காட்டக்கூடாது என்பதும், இத்தகைய விளைவை ஏற்படுத்தக்கூடிய வகையில் அவை யாருடனும் எந்த ஒப்பந்தமும் செய்து கொள்ளக்கூடாது என்பதும் பரிந்துரைகளின் முக்கிய அம்சமாக அமைகின்றன. சாமானியர்களின் நோக்கில் பார்த்தால், இதன் பொருள் இணைய சேவை நிறுவனங்கள் எந்த ஒரு குறிப்பிட்ட இணையதளத்தை வேகத்தை அதிகரிக்கவோ, குறைக்கவோ முடியாது. எல்லா வகையான இணைதளங்களையும், சேவைகளையும் அவை ஒன்றாகவே கருத வேண்டும். எனவே இணையவாசிகள் ஏற்கனவே உள்ளது போலவே எந்த மாறுதலும் இல்லாமல் இணைத்தை அணுகலாம்.

டிராயின் இந்த பரிந்துரைகள் மிகவும் ஆவலுடன் எதிர்பார்க்கப்பட்டன. கடந்த ஒன்னரை ஆண்டுகளுக்கு மேலாக இணைய சமநிலை தொடர்பான பல்வேறு தரப்பினரின் கருத்துக்களை பரிசீலித்து வந்த டிராய், இது தொடர்பான தனது பரிந்துரைகளை வெளியிட்டுள்ளது. இவை இணைய சமநிலைக்கு ஆதரவாக அமைந்திருப்பது ஒரு விதத்தில் இணையவாசிகளுக்கும், இணைய சமநிலை ஆதாரவாளர்களுக்கும் கிடைத்த வெற்றி என்றே சொல்ல வேண்டும். கடந்த இரண்டு ஆண்டுகளுக்கு முன், நாடு தழுவிய அளவில் வெடித்த இணைய சமநிலை போராட்டம் நினைவிருக்கலாம். அப்போது டிராய், ஓவர் தி டாப் சேவைகள் என சொல்லப்படும் வாட்ஸ் அப் , ஸ்கைப் போன்ற சேவைகள் குறித்து, பொதுமக்களிடம் இருந்து கருத்து கேட்கும் வகையில் வெளியிட்டிருந்த அறிக்கையில் இணைய சமநிலைக்கு பாதகமான விஷயங்கள் இருந்தன.

இணைய போராட்டம்

இதனையடுத்து இணைய சுதந்திரத்தை காக்கும் நோக்கத்தோடு இணையவாசிகள் திரண்டனர். இணைய சமநிலைக்கு ஆதாரவான இணையதளங்கள் அமைக்கப்பட்டு, இதை வலியுறுத்தும் வகையில் மெயில்கள் லட்சக்கணக்கில் அனுப்பி வைக்கப்பட்டன. இதன் பயனாக குறிப்பிட்ட சேவைகளை இலவசமாக வழங்க முற்பட்ட ஏர்டெல் ஜீரோ போன்ற சர்ச்சைக்குறிய திட்டங்கள் கைவிடப்பட்டன. பின்னர் பேஸ்புக் நிறுவனம் ஜீரோபேசிஸ் எனும் பெயரில் குறிப்பிட்ட சேவைகளை இலவசமாக வழங்கும் திட்டமும் கைவிடும் சூழல் உருவானது.

இந்நிலையில் தான், டிராயின் பரிந்துரைகளை சீர்தூக்கி பார்க்க வேண்டியிருக்கிறது. இந்த பரிந்துரைகள் தொலைத்தொடர்பு துறையால் பரிசீலிக்கப்பட்டு ஏற்கப்பட்ட பிறகே இவை அமலுக்கு வரும். எனினும் அடிப்படையில் இணைய சமநிலைக்கு திட்டவட்டமாக ஆதரவு தெரிவிக்கும் வகையில் பரிந்துரைகள் அமைந்துள்ளது வரவேற்கத்தக்கதாக அமைந்துள்ளது என்றே பரவலாக கருதப்படுகிறது. ”இணையம் என்பது யார் ஒருவருக்கு சொந்தமானது அல்ல, எனவே அது திறந்த தன்மை கொண்டதாக, எல்லோரும் அணுக கூடியதாக இருப்பதே சரியானது” என டிராய் தலைவர் ஆர்.எஸ்.சர்மா கூறியதை இங்கே பொருத்திப்பார்க்க வேண்டும்.

டிராய் பரிந்துரைகளில் ஒரு சில போதாமைகள் இருப்பதாக இணைய சமநிலை ஆதாரவாளர்கள் கருதினாலும், ஒட்டுமொத்தமாக வரவேற்க தக்கதாகவே இருக்கிறது. அது மட்டும் அல்ல, சர்வதேச அளவில் இணைய சமநிலைக்கு ஆதரவான மிகவும் வலுவான நிலைப்பாடாக இது அமைந்திருப்பதாகவும் பாராட்டப்படுகிறது. அதிலும் குறிப்பாக, இணைய புதுமைகளின் இருப்பிடம் என போற்றப்படும் சிலிக்கான் வேலி அமைந்திருக்கும் அமெரிக்காவில் ஒபாமா அதிபராக இருந்த காலத்தில் கொண்டு வரப்பட்ட இணைய சமநிலைக்கு ஆதாரவான விதிகள் ரத்து செய்யப்படுவதற்கான வாய்ப்பு உருவாகி உள்ள நிலையில் இந்திய நிலைப்பாடு முக்கியத்துவம் பெறுகிறது. இதில் முரண் நகை என்னவெனில், அமெரிக்காவில் பெடரல் கம்யூனிகேஷன்ஸ் கமிஷன்ஸ் சேர்மனாக இருக்கும் இந்திய அமெரிக்கரான அஜித் பாய் என்பவர் தான் இந்த நடவடிக்கையின் மையமாக இருக்கிறார் என்பது தான்.

அமெரிக்காவில் விவாதம்

இணைய சமநிலை இல்லாத நிலை உருவானால், என்ன எல்லாம் பாதிப்பு ஏற்படு என்று அமெரிக்காவும், சிலிக்கான வேலியும் மிகத்தீவிரமாக விவாதித்துக்கொண்டிருக்கிறது. குறிப்பாக இணைய புதுமைக்கு ஊற்றுக்கண்ணாக விளங்கும் ஸ்டார்ட் அப் நிறுவனங்களுக்கு வேட்டு வைத்துவிடலாம் என்று அஞ்சப்படுகிறது. அமெரிக்க வல்லுனர்கள் சிலர் நாமறிந்த வகையில் இணையம் முடிவுக்கு வந்துவிடும் அபாயம் இருப்பதாகவும் எச்சரித்துள்ளனர். எப்படியேனும் இணைய சமநிலையை காப்பாற்ற வேண்டும் எனும் போராட்டமும் அங்கு வலுத்திருக்கிறது.

இணைய சமநிலையின் முக்கியத்துவத்தையும், அவசியத்தையும் புரிந்து கொள்ள வேண்டும் எனில், இதற்கான விளக்கத்தை தெரிந்து கொண்டால் மட்டும் போதாது, இணையத்தின் அடிப்படையையும் புரிந்து கொள்ள வேண்டும்.

இணையம் இன்றியமையாதது என்பது எல்லோருக்கும் தெரியும். இ-காமர்ஸ், பண பரிவர்த்தனை, பொழுதுபோக்கு, இணைய கல்வி என எல்லாவற்றுக்கும் இணையத்தை பயன்படுத்த முடிகிறது. இப்படி இணையம் மிகவும் பழக்கமாகி விட்டதால் பலரும் இணையம் என்றால் என்ன என்றெல்லாம் நினைத்துப்பார்ப்பதில்லை. ஆனால் இது இப்போது மிகவும் அவசியமாகிறது.

இணைய ஆற்றல்

இணையம் என்பது வலைப்பின்னல்களின் வலைப்பின்னல் என்று குறிப்பிடப்படுகிறது, கோடிக்கணக்கான கம்ப்யூட்டர்களும், கையடக்க சாதனங்களும் அந்த வலையில் இணைந்துள்ளது. இதற்கு முன்னர் உருவாக்கப்பட்ட தொலைபேசி உள்ளிட்ட அனைத்துவிதமான வலைப்பின்னல்களில் இருந்தும் இணையம் மிகவும் மாறுபட்டது. ஏனெனில் இணையம் மையமில்லாதது. இணையம் எந்த ஒரு அமைப்பு அல்லது நாடு அல்லது நிறுவனத்தால் கட்டுப்படுத்தப்படாமல் இருக்கிறது. எனவே தான் தணிக்கை முயற்சிகளை எல்லாம் மீறி இணையம் அடிப்படையில் சுதந்திரமானதாக இருக்கிறது. இந்த மையமில்லாத அம்சம் என்பது இணையத்தின் தொழில்நுட்ப கட்டமைப்பிலும் இருப்பதை வல்லுனர்கள் சுட்டிக்காட்டுகின்றனர்.

இணையம் மையமாக கட்டுப்படுத்த முடியாத வகையிலேயே அதன் வடிவமைப்பும் அமைந்துள்ளது. இணையம் எனும் வலைப்பின்னலில் இணையும் புதிய முனைகள் (nodes) மூலமே வலுப்பெறும் வகையில் இணையம் உருவாக்கப்பட்டுள்ளது. அதாவது இணைய போக்குவரத்தை தாங்கியிருக்கும் ரவுட்டர்கள், கம்ப்யூட்டர்கள் போன்றவற்றை எல்லால் விட, இந்த வலைப்பின்னலில் இணையும் புதிய சாதனங்கள் மற்றும் சேவைகள் மூலம் தான் அது தனக்கான புதிய ஆற்றலை பெறுகிறது. இந்த வகை வடிவமைப்பை ‘எண்ட் டூ எண்ட்’ டிசைன் என குறிப்பிடுகின்றனர்.

இந்த இடத்தில் இணையம் உள்ளிட்ட தொழில்நுட்ப தாக்கத்தால் நவீன சமூகத்தில் ஏற்பட்டுள்ள மாற்றங்கள் மற்றும் தாக்கத்தை உணர்த்தும் வகையில் சமகால சமூகத்தை வலைப்பின்னல் சமூகம் என மானுவல் காஸ்டெல்ஸ் எனும் சமூகவியல் அறிஞர் குறிப்பிடுவதை நினைத்துப்பார்ப்பதும் பொருத்தமாக இருக்கும். நம் சமூகம் தற்போது வலைப்பின்னல்களை அடிப்படை சமூக கட்டமைப்பாக கொண்டிருப்பதாக மாறியிருக்கிறது என கூறும் காஸ்டெல்ஸ் உலகமயமாதலும், இணையம் மூலமான அணி சேர்தலும், போராட்டங்களும் இதன் வெவ்வேறு அம்சங்கள் என்கிறார். இந்த வலைப்பின்னலில் எந்த ஒரு தனி முனைக்கும் முக்கியத்துவம் கிடையாது, இதில் இணையும் புதிய முனைகளே இதன் ஆற்றலுக்கு முக்கிய காரணம் என காஸ்டெல்ஸ் குறிப்பிடுகிறார். பழைய முனைகள் முக்கியத்துவம் இழந்து விலகிப்போவதும், புதிய முனைகள் முன்னுக்கு வருவதும் சகஜமானது என்றும் அவர் குறிப்பிடுகிறார். மையமில்லாத தன்மையே இந்த யுகத்தின் தன்மை என்றும் அவர் குறிப்பிடுகிறார். இந்த கருத்தாக்கங்களை விவரித்து அவர் இன்பர்மேஷன் ஏஜ் எனும் மூன்று பகுதி புத்தகத்தை எழுதியிருக்கிறார்.

ஏன் தேவை?

ஆக, இணையத்தின் மையமில்லா தன்மையே அதன் ஆதார பலம். அந்த காலத்தில் உருவான நெட்ஸ்கேப் பிரவுசர், இபே ஏல தளம், ஜியோசிட்டிஸ் இணையதள சேவை மற்றும் இடையே அலையென எழுந்த பேஸ்புக், டிவிட்டர் உள்ளிட்ட சமூக வலைப்பின்னல் சேவைகள், இப்போதைய வாட்ஸ் அப், இன்ஸ்டாகிராம் உள்ளிட்ட புதுமையான சேவைகள் எல்லாம் உருவாக அடிப்படை காரணம் இணையம் திறந்த வெளி தன்மை கொண்டிருப்பதும், அங்கு எல்லோரும் சமம் என்பதுமே ஆகும்.

இந்த தன்மையை கட்டிக்காக்கவே இணைய சமநிலை எனும் கருத்தாக்கம் முன்வைக்கப்பட்டது. அதாவது இணைய சேவை நிறுவனங்கள் எந்த காரணத்திற்காகவும் இணையதளங்கள் அல்லது சேவைகளுக்கு பாரபட்சம் காட்டாமல் எல்லாவற்றையும் சமமாக நடத்த வேண்டும் என்பதாகும். இணைய சேவை நிறுவனங்கள் எந்த ஒரு சேவையையும், முடக்கவோ, வேகத்தை குறைக்கவோ செய்யக்கூடாது என வலியுறுத்தப்படுகிறது. இதே போல ஒரு சில தளங்களுக்கு அதிவேக பாதை அமைத்து தரவும் முயலக்கூடாது என வலியுறுத்தப்படுகிறது.

ஆனால் வீடியோ சேவை வழங்கும் தளங்களும் அதிவேக பாதை தேவை எனும் வாதத்தின் அடிப்படையில் இணைய சமநிலை எதிர்க்கப்படுகிறது. இதன் காரணமாக இணையத்திற்கு மாறுபட்ட கட்டண விகிதங்கள் வரலாம். அதைவிட முக்கியமாக குறிப்பிட்ட சில தளங்கள் முன்நிறுத்தப்பட்டு சில பின்னுக்குத்தள்ளப்படும் நிலை வரலாம். இது நுகர்வோரை பாதிக்கும். மேலும் இணைய சேவை நிறுவனங்களோடு கைகோர்த்து பெரிய நிறுவனங்கள் ஆதிக்கம் செலுத்து புதிய ஸ்டார்ட் அப் நிறுவனங்கள் உருவாவதை கடினமானதாக்கலாம்.

இணைய சமநிலை இன்மையால் ஏற்படக்கூடிய பாதிப்புகளை இன்னும் பெரிதாக பட்டியலிடலாம். அதைவிட எளிதாக இணைய சமநிலை இல்லாத போர்ச்சுகள் நாட்டில், இப்போது இணையவாசிகள் படும்பாட்டை பார்த்தாலே போதும் என்கின்றனர். இங்கு இணையவாசிகள் இணையத்தை முழுமையாக பயன்படுத்த முடியாமல், கேபிள் டிவி பேக்கேஜ் போல குறிப்பிட்ட கட்டணத்திற்கு குறிப்பிட்ட வகை இணையதளங்களை பயன்படுத்தும் நிலை உருவாகி இருப்பதாக செய்திகளில் இருந்து அறிய முடிகிறது.

எனவே தான் இணைய சமநிலையும், அதில் இந்தியா எடுத்துள்ள வலுவான நிலைப்பாடும் முக்கியமாகிறது. இதை கட்டிக்காக்க வேண்டும் என்பது அதைவிட முக்கியம்!

 

 


 

நன்றி; தமிழ் இந்து நாளிதழில் எழுதியது

எஸ்.எம்.எஸ்- 25; தொழில்நுட்ப யுகத்தின் புதிய மொழி

Neilவாட்ஸ் அப் யுகத்தில் எஸ்.எம்.எஸ் சேவை பின்னுக்குத்தள்ளப்பட்டு, அதன் பிரகாசமும் மங்கியிருக்கலாம். ஆனால் அதன் முக்கியத்துவம் இன்னமும் குறைந்துவிடவில்லை. ஸ்மார்ட்போன் தலைமுறைக்கு சற்று அந்நியமாக இருந்தாலும் கூட, எஸ்.எம்.எஸ் சேவை வளரும் நாடுகளிலும், கிராமப்புற பகுதிகளிலும் இன்னமும் தகவல் தொடர்பிற்கான எளிய வழியாக இருக்கிறது. அது மட்டும் அல்ல, எஸ்.எம்.எஸ் சேவை தனக்கே உரிய புதிய மொழியையும் புழக்கத்திற்கு கொண்டு வந்துள்ளது. இன்றைய இமோஜிகளுக்கும், சித்திர எழுத்துக்களுக்கும் இந்த குறுஞ்செய்தி சேவை தான் முன்னோடி.

எஸ்.எம்.எஸ் சேவை தனது வெள்ளிவிழாவை கொண்டாடும் நிலையில், இதன் வரலாற்றையும் வளர்ச்சியையும் திரும்பிப்பார்ப்பது பொருத்தமாக இருக்கும். ஆம், எஸ்.எம்.எஸ் சேவை அறிமுகமாகி 25 ஆண்டுகள் ஆகிவிட்டன.

1992 ம் ஆண்டு டிசம்பர் மாதம் 3 ம் தேதியில் தான் உலகின் முதல் எஸ்.எம்.எஸ்  செய்தி அனுப்பப்பட்டது. அது ஒரு வழி செய்தி என்பது மட்டும் அல்ல, கம்ப்யூட்டரில் இருந்தே அனுப்பி வைக்கப்பட்டது என்பதும் ஆச்சர்யமான விஷயம். அப்போது வோடோபோன் நிறுவனத்தில் பொறியாளராக பணியாற்றிக்கொண்டிருந்த பிரிட்டனைச்சேர்ந்த நீல் பாப்வொர்த் என்பவர் தான் தன்னுடைய சக பொறியாளரான ரிச்சர்டு ஜார்விசுக்கு உலகின் முதல் எஸ்.எம்.எஸ் செய்தியை அனுப்பி வைத்தார். ஜார்விஸ் தான் வைத்திருந்த ஆர்பிட் போனில் அதை பெற்றுக்கொண்டார். கிறிஸ்துமஸ் பண்டிகைக்கு வாழ்த்து தெரிவிக்கும் வகையில், ‘மெரி கிறிஸ்துமஸ்’ எனும் இரண்டு வார்த்தைகள் மட்டுமே அந்த செய்தியில் இருந்தன.

நாம் இப்போது செய்யக்கூடியது போலவே ஜார்விஸ் உடனே அந்த சரித்திர புகழ் பெற்ற செய்திக்கு பதில் அனுப்பிவிடவில்லை. ஏனெனில் அப்போது செல்போன்களில் அந்த வசதி இல்லை. எஸ்.எம்.எஸ் வடிவில் செய்திகளை மட்டுமே பெற முடிந்தது.

முதல் எஸ்.எம்.எஸ் செய்தியை அனுப்பியது நீல் பார்ப்வொர்த், வெள்ளி விழா பரபரப்புக்கு நடுவே இந்த நிகழ்வை நினைவு கூறும் போது,” 1992 ல் எம்.எம்.எஸ் அனுப்பிய போது டெக்ஸ்ட் செய்வது இந்த அளவு பிரபலமாகும் என்றும், இமோஜிகள் மற்றும் லட்சக்கணக்கானோர் பயன்படுத்தும் மேசேஜிங் சேவைகளுக்கு வழி வகுக்கும் என்றெல்லாம் தெரியாது’ என கூறியிருக்கிறார்.

தன் பிள்ளைகளிடமே அண்மையில் தான், முதல் எஸ்.எம்.எஸ் பெருமை பற்றி கூறியதாக தெரிவிக்கும் பாப்வொர்த், இப்போது திரும்பி பார்க்கையில், கிறிஸ்துமஸ் வாழ்த்துச்செய்தி மொபைல் வரலாற்றில் முக்கிய தருணமாக அமையும் என்பதை புரிந்து கொள்ள முடிகிறது என்றும் தெரிவித்துள்ளார்.

இதன் வெள்ளிவிழாவை கொண்டாடும் வகையில் அவர் அந்த வாழ்த்துச்செய்தியை தற்போதைய இமோஜியுடன் சேர்த்து அனுப்பியிருக்கிறார்.

முதல் எஸ்.எம்.எஸ் செய்திய அனுப்பியவர் பாப்வொர்த் என்றாலும் அதன் பிரம்மா எனும் பெருமைக்கு உரியவர் பின்லாந்தைசேர்ந்த பொறியாளரான மேட்டி மக்கோனென் (Matti Makkonen ) என்பவர் தான். 1984 ம் ஆண்டு இவர் தான் முதன் முதலில் செல்லுலார் வலைப்பின்னல் வழியே செய்திகளை அனுப்பி வைப்பதற்கான கருத்தாக்கத்தை முன் வைத்தார். ஆனால் மக்கோனென் ஒருபோதும் தன்னை எஸ்.எம்.எஸ் கண்டுபிடிப்பாளர் என மார்தட்டிக்கொண்டதில்லை. பத்திரிகைகளுக்கு பேட்டி கொடுக்கும் பழக்கம் இல்லாத மெக்கோனென் சில ஆண்டுகளுக்கு முன் அபூர்வமாக அளித்த பேட்டியில், இது ஒரு கூட்டு கண்டுபிடிப்பு என்று கூறியிருக்கிறார். அது உண்மை தான். எம்.எம்.எஸ்-ன் அடிநாதமாக விளங்கும் 160 எழுத்துக்கள் எனும் கட்டுப்பாட்டை முதலில் முன்வைத்தவர்கள் ஜெர்மனி பொறியாளர்களான பிரிதெல்ம் ஹில்லேபிராண்ட் மற்றும் பெர்னார்டு ஹிலேபார்ட் ( Friedhelm Hillebrand and Bernard Ghillebaert ) ஆவர்.

1993 ம் ஆண்டு நோக்கியா நிறுவனம் செல்போனில் எஸ்.எம்.எஸ் அனுப்பி பெறும் வசதியை அறிமுகம் செய்தது. அப்போது விற்பனை செய்யப்பட்ட நோக்கியா போன்களில் குறுஞ்செய்தி வருகையை உணர்த்தும் பீப் ஒலி மிகவும் பிரபலம். அதன் பிறகு மெல்ல குறுஞ்செய்தி பிரபலமானது. 1999 ல் தான் பல்வேறு செல்போன் சேவைகளுக்கு இடையே குறுஞ்செய்தி அனுப்பும் வசதி அறிமுகமாகி இந்த சேவை மேலும் பரவலானது.

எஸ்.எம்.எஸ் செய்திக்கு 160 எழுத்துகள் எனும் கட்டுப்பாடு இருந்தாலும் அதுவே அதன் தனித்தன்மையாக அமைந்து நவீன யுகத்திற்கான புதிய சுருக்கெழுத்து மொழியை கொண்டு வந்தது. வார்த்தை சிக்கனத்தை கடைப்பிடிப்பதற்காக, ஆங்கில எழுத்துக்களை சுருக்கி பயன்படுத்தும் வழக்கத்தையும், இவற்றில் பல புதுமைகளையும் அறிமுகம் செய்தது. ஒரு சிலர் இதை மொழியை சிதைக்கும் செயலாக விமர்சித்தாலும், மொழியியல் வல்லுனர்களே இந்த மாற்றங்களை ஆய்வுக்கு உட்படுத்தி, இவை மொழியின் பரிணாமத்தில் ஒரு வளர்ச்சிப்போக்கே என்று கூறுகின்றனர். இன்று இவை பலவகையான இமோஜிகளாக பரினமித்துள்ளன. இவற்றையே கூட ஒரு தனி மொழி என கருதுபவர்களும் இருக்கின்றனர்.

சுருக்கெழுத்து மூலம் மொழி பயன்பாட்டில் புதுமைகளை கொண்டுவந்ததைவிட, தகவல் பரிமாற்றத்தில் இவை ஆற்றும் பங்கு போற்றத்தக்கது. அதிலும் குறிப்பாக பேரிடர் காலங்களில் எஸ்.எம்.எஸ் செய்தி மூலம் மீட்பு பணிகள் மற்றும் நிவாரணப்பணிகள் பற்றிய தகவல்களை பாதிக்கப்பட்ட பகுதிகளுக்கு கொண்டு செல்ல முடிகிறது. கிராமப்புறங்களில் மருத்துவ சேவை தகவல்களையும், அரசு திட்ட தகவல்களையும் கொண்டு செல்வதற்கு ஏற்ற வாகனமாக எஸ்.எம்.எஸ் விளங்குகிறது. இந்தியாவின் கேரளாவில் மற்றும் உலகின் பல பகுதிகளில் மீனவர்களுக்கு மீன் விலையை செல்போனில் தெரிவிப்பது, விவசாய தகவல்களை கொண்டு சேர்ப்பது போன்றவற்றுக்கு எஸ்.எம்.எஸ் வசதியே கைகொடுத்திருக்கிறது. இப்படி எஸ்.எம்.எஸ் சார்ந்த பல முன்னோடி முயற்சிகளை கூறலாம்.

பல்க் மேச்ஜிங் வசதி ஒரு பக்கம் மார்க்கெட்டிங் நிறுவனங்களால் பயன்படுத்தப்பட்டாலும், போதிய உள் கட்டமைப்பு வசதிகள் இல்லாத கிராமப்புற பகுதிகளில் செய்திகளை கொண்டு சேர்ப்பதற்கான இதழியல் வாகனமாகவும் எஸ்.எம்.எஸ் இருந்துள்ளது. மொபைல் பணத்தின் முன்னோடி எனப்படும் கென்யாவில் பிரபலமான இருக்கும் மொபைல் பரிவர்த்தனை சேவையான எம்-பெசாவுக்கு அடிப்படையாக இருப்பதும் இந்த வசதி தான். கென்யா உள்ளிட்ட ஆப்பிரிக்க நாடுகளில் தேர்தல் கால முறைகேடுகளை கண்காணிப்பதற்கான உஷாஹிதி (Ushahidi) எனும் எஸ்.எம்.எஸ் சார்ந்த மென்பொருள் சேவையும் உருவாக்கப்பட்டுள்ளது.

இவ்வளவு ஏன், எஸ்.எம்.எஸ் பிரபலமாகத்துவங்கிய காலத்தில் எஸ்.எம்.எஸ் கதைகள், நாவல்கள் எல்லாம் புழக்கத்திற்கு வந்தன. குறிப்பாக ஜப்பானில் இந்த வகை நாவல்கள் மிகப்பிரபலமாக இருந்தன. அதிவேகமாக செய்திகளை டைப் செய்வதற்கான போட்டிகளும் நடத்தப்பட்டு எஸ்.எம்.எஸ் சாம்பியன்களுக்கு முடி சூட்டப்பட்டதும் உண்டு.

என்றாலும் இவற்றை எல்லாம் பழம் பெருமை என்று ஒதுக்கி விடமுடியாது. சாதாரன செல்போன்கள் புழக்கத்தில் இருக்கும் பல பகுதிகளில் இன்னனும் எஸ்.எம்.எஸ் தான் ராஜா. அங்கெல்லாம் தகவல் பரிமாற்றத்திற்கு இதைவிட்டால் வேறு சிறந்த வழியில்லை என்பது மட்டும் அல்ல, வளரும் நாடுகளில் இப்போதும் கூட எஸ்.எம்.எஸ் சார்ந்த புதுமையான சேவைகளை உருவாக்கி வருகின்றனர். அதனால் தான் டிவிட்டர் , வாட்ஸ் அப் என புதுப்புது சேவைகள் பல வந்தாலும், எஸ்.எம்.எஸ் சேவைக்கான தேவை இன்னும் குறையாமல் இருக்கிறது.

 

பிட்காயினில் முதலீடு செய்யலாமா?

பிட்காயின் என்றால் என்ன? எனும் கேள்வியை இப்போது பலரும் கேட்கத்துவங்கியிருக்கின்றனர். இந்த கேள்விக்கு பின்னே ஒரு ஆர்வம் இருக்கிறது. ( அதிகப்படியான ஆர்வம் என்றும் சொல்லலாம். அதை பின்னர் பார்ப்போம்). இந்த ஆர்வம் தான் முக்கியம். ஏனெனில் இதற்கு முன்னர் கூட இந்த கேள்வி கேட்கப்பட்டிருக்கிறது. அப்போதெல்லாம், கேட்பவரிடம் பிட்காயின் பற்றிய அறியாமையே இருக்கும். பெரும்பாலானவர்கள் பிட்காயின் எனும் ஒரு வஸ்து இருப்பதையே அறிந்திருக்க வாய்ப்பில்லை. எனவே எங்காவது பிட்காயின் பற்றி கேள்விப்படும் போது, பிட்காயின் என்றால் என்ன? என்று ஒருவித அலட்சியத்துடம் அது பற்றி அறிந்து கொள்ளும் ஆர்வம் இல்லாமல் கேட்கும் நிலை இருந்தது.

சுருக்கமாக சொன்னால், பிட்காயின் பற்றி பெரும்பாலானோர் அறிந்திருக்கவில்லை, அது பற்றி கவலைப்படவும் இல்லை. எதிர்கால நாணயம், மறை பணம், டிஜிட்டல் நாணயம் என்றெல்லாம் பலவிதமாக வர்ணிக்கப்பட்ட பிட்காயினின் அருமையையும், மகிமையும் உணர்ந்த தொழில்நுட்ப பித்தர்களும், நவீன அபிமானிகளும் இருந்தாலும் அவர்கள் தனித்தீவு போலவே இருந்தனர். பிட்காயின் தொடர்பான இணையதளங்களும், விவாத குழுக்களும் அநேகம் இருந்தாலும்,  அவற்றை தொழில்நுட்ப சமூகத்திற்கு வெளியே யாரும் பெரிதாக அறிந்திருக்கவில்லை.

ஆனால், இப்போது பிட்காயினுக்கு மவுஸ் அதிகரித்திருக்கிறது. அதன் விளைவு தான் பலரும் பிட்காயின் பற்றி அறிந்து கொள்ள விரும்புகின்றனர். இந்த ஆர்வத்திற்கு இரண்டு முக்கிய காரணங்கள் இருக்கின்றன. ஒன்று பிட்காயின், இணைய மிரட்டலுக்கான பணமாக அறியப்படுவது. மற்றொன்று பிட்காயின் புதிய தங்கம் என சொல்லப்படுவது.

கடந்த சில மாதங்களுக்கு முன் இணைய உலகை ரான்சம்வேர் வைரஸ் உலுக்கியது நினைவில் இருக்கிறதா? எங்கோ இருக்கும் ஹேக்கர்கள் பயனாளிகளின் கம்ப்யூட்டருக்கு டிஜிட்டல் பூட்டு போட்டு அதை விடுவிக்க பணம் கேட்டு மிரட்டியதால் மற்ற வைரஸ்களைவிட இந்த வைரஸ் நெட்டிசன்களையும், சிட்டிசன்களையும் கொஞ்சம் கூடுதலாகவே கவர்ந்தது. அது மட்டும் அல்ல, இந்த ஹேக்கர்கள் தாங்கள் சிக்கி கொள்ளக்கூடாது என்பதற்காக பினைத்தொகையை ரூபாயாகவோ, டாலாரகாவோ கேட்காமல் பிட்காயினாக கேட்டது நெட்டிசன்களை பிட்காயின் பற்றி யோசிக்க வைத்தது. ஹேக்கர்கள் ஏன் பிட்காயினை கேட்டனர் எனும் கேள்விக்கு இது புதுவகையான பணம், இதை எந்த மத்திய வங்கிகளும் வெளியிடுவதில்லை, இதன் பரிவர்த்தனை பிளாக்செயின் மூலம் நிகழ்கிறது என்றெல்லாம் அடுக்கி கொண்டே போகலாம் என்றாலும் மக்கள் மத்தியில் பதிந்த விஷயம் பிட்காயின் அனாமதேய பணம் என்பதும், அதில் கொடுக்க வாங்கல் வைத்துக்கொண்டால் காவல்துறையால் கண்டுபிடிக்க முடியாது என்பது தான். எனவே டிஜிட்டல் நாணயமான பிட்காயினை இணைய நிழல் உலகிற்கான பணம் என எளிதாக புரிந்து கொண்டனர்.

அதே நேரத்தில், பிட்காயினின் மதிப்பு எங்கே போய்க்கொண்டிருப்பதும், ஒரு சில பிட்காயின்கள் வைத்திருந்தால் கூட இன்று அதன் மதிப்பு லட்சக்கணக்கில் என்று சொல்லப்படுவதும், பிட்காயின் மீது தனி ஆர்வத்தை ஏற்படுத்தி விட்டிருக்கிறது. பிட்காயினை பரிவர்த்தனை செய்யலாம் என்கின்றனர். அதை டாலராகவோ வேறு நாணயமாகவோ மாற்றிக்கொள்ளலாம். இன்றைய தேதி கணக்குப்படி ஒரு பிட்காயினின் மதிப்பு இந்திய நாணயப்படி கிட்டத்தட்ட மூன்று லட்சம் ரூபாய். ஆக, சில ஆண்டுகளுக்கு முன் கொஞ்சம் போல பிட்காயினை வாங்கிப்போட்டிருந்தால் ( வாங்க முடியாது, இணையத்தில் கம்ப்யூட்டர் கொண்டு மைன் செய்ய வேண்டும் என்பது வேறு விஷயம்) இன்று லட்சாதிபதி என்று சொல்லப்படுவதில் ஒரு ஈர்ப்பு இருக்கத்தானே செய்கிறது.

பிட்காயின் தொடர்பான மற்ற விஷயங்களும், விளக்கங்களும் குழப்பத்தை ஏற்படுத்தினாலும், அதை எப்படி பர்வர்த்தனை செய்வது, எப்படி பயன்படுத்துவது போன்றவை இன்னும் சிக்கலாக தோன்றினாலும், பிட்காயின் மதிப்பு ஏறிக்கொண்டிருக்கிறது (இறங்கவும் செய்கிறது) என்பது, பிட்காயின் மீது தனி ஈடுபாட்டை ஏற்படுத்தியிருகிறது. அதோடு தொழில்நுட்ப கில்லாடிகள் பலரும் பிட்காயினில் முதலீடு செய்து வருவதும் இதை மிகச்சிறந்த முதலீடு என பேச வைத்திருக்கிறது. எப்படி ஒரு காலத்தில் காலி மனைகள் வாங்கிப்போட்டால், எதிர்காலத்தில் அதை விற்று பணமாக்கலாம் என கருதப்பட்டதோ அதே போல, இப்போது பிட்காயின் ஒரு முதலீடாக பார்க்கப்படுகிறது. பத்திரிகை கட்டுரைகளும் பிட்காயினை புதிய தங்கம் என வர்ணிக்கும் போது கேட்கவா வேண்டும்!

பொதுமக்கள் மத்தியில் பிட்காயினை வாங்கும் பழக்கம் வந்துவிடவில்லை என்றாலும், இந்த புரியாத நாணயத்தில் பணத்தை போட்டால் அது பலன் தரும் முதலீடாக இருக்கும் எனும் எண்ணம் வலுப்பெறத்துவங்கியிருக்கிறது. பங்குச்சந்தை முதலீடு போல வருங்காலத்தில் பலரும் பிட்காயின் முதலீட்டில் ஆர்வம் காட்டலாம். இப்போதே கூட, புத்திசாலிகள் சிலர் பிட்காயினை வாங்கிப்போடுவோம் என நினைத்து செயல்பட்டுக்கொண்டிருக்கலாம்.

எல்லாம் சரி, பிட்காயினில் முதலீடு செய்யலாமா? இந்த முதலீடு எதிர்பார்த்த பலன் தருமா? பிட்காயினை கண்டுகொள்ளாமல் இருப்பது அருமையான வாய்ப்பை தவறவிடுவதாகுமா?

இது போன்ற கேள்விகளுக்கு எளிய பதில்கள் இல்லை. எல்லா முதலீடுகள் போலவே பிட்காயின் முதலீடும் ரிஸ்கானவை, அவை அள்ளித்தரலாம். அல்லது மதிப்பு சரிந்து காலையும் வாரலாம். ஆனால் விஷயம் அதுவல்ல, பிட்காயினை முதலீடு நோக்கில் மட்டும் அணுகுவது சரியாக இருக்காது.

முதலில் பிட்காயினை புரிந்து கொள்ள வேண்டும். இதுவரை பிட்காயினை வாலெட்டில் வைத்திருப்பவர்கள் ( அதற்கென டிஜிட்டல் பர்ஸ் இருக்கிறது) அடிப்படையில் பிட்காயினின் மைய கருத்தாக்கத்தால் ஈர்க்கப்பட்டவர்கள். அதன் பயனாக அவர்கள் பிட்காயினில் பரிவர்த்தனை செய்ய விரும்பினர். அது அவர்களுக்கு முதலீடாகவும் பலன் அளிக்கிறது. இதில் யூக பேரங்கள் நுழைந்துவிட்டன என்றாலும், பிட்காயினில் ஆர்வம் உள்ளவர்கள் முதலில் அதை முழுமையாக புரிந்து கொள்வதே சரியாக இருக்கும்.

பிட்காயினின் அடிப்படை கருத்தாக்கத்தை உள்வாங்கிக்கொள்ள வேண்டும். பிட்காயினை அதன் அபிமானிகள் விரும்புவதற்கான முக்கிய காரணம், அது அனாமதேய பணமாக இருக்கிறது என்பது மட்டும் அல்ல, அது மையமாக கட்டுப்படுத்தப்படாத பணமாகவும் இருப்பதனால் தான். கோட்பாடு அளவில் பார்த்தால், பிட்காயின் எந்த ஒரு அரசாங்கம் அல்லது மத்திய வங்கியால் வெளியிடப்படாமல் அதன் பயனாளிகளால் நிர்வகிகப்படும் பணம். பிட்காயினை இஷ்டம் போல அச்சிட முடியாது என்பதும், நிர்ணயிக்கப்பட்ட அளவு நாணயங்கள் மட்டுமே மொத்தமாக உருவாக்கப்பட முடியும் என்பது போன்ற பல அமசங்கள் அதில் இருக்கின்றன. மேலும் பிட்காயின் பரிவர்த்தனைகள் அனைத்தும் கண்ணுக்குத்தெரியாத டிஜிட்டல் லெட்ஜரில் பதிவாகி வருகின்றன. பிளாக்செயின் என சொல்லப்படும் இந்த நுட்பத்தை தான் வங்கிகளும் நிதி உலகுமும் உன்னிபாக கவனித்து வருகின்றன.

ஆக, கொள்கை அளவிலும், தொழில்நுட்ப நோக்கிலும் அறிந்து கொள்ள பிட்காயினில் அநேக விஷயங்கள் இருக்கின்றன. அதன் பிறகே பிட்காயின் முதலீடு பற்றி யோசிக்க வேண்டும். அது மட்டும் அல்ல பிட்காயினின் சட்டப்பூர்வ அந்தஸ்தும் கேள்விக்குறியாக இருக்கிறது. இந்தியாவில் பிட்காயின் பயன்பாடு பற்றி ரிசர்வ் வங்கி ஏற்கனவே எச்சரித்துள்ளது. இந்த நாணயத்தை முறைப்படுத்துவது பற்றியும் பேச்சு இருக்கிறது.

எனவே பிட்காயினை தொடர்ந்து கவனியுங்கள், அது நல்ல விஷயம்.

இந்த கதை எல்லாம் வேண்டாம், பிட்காயினில் முதலீடு செய்யலாமா? வேண்டாமா? என தொடர்ந்து பிடிவாதமாக கேட்டால், பொருளாதார பேராசிரியர் ராபர்ட் ஷில்லர் பிட்காயின் பற்றி அண்மையில் அளித்துள்ள பேட்டியில் கூறிய கருத்துக்களை தான் சுட்டிக்காட்ட வேண்டும். ஷில்லர் ஒன்றும் சாதாரண பேராசிரியர் அல்ல. மனிதர் பொருளாதாரத்திற்கான நோபல் பரிசு பெற்றவர். அதைவிட முக்கியமான விஷயம், 2008 ல் அமெரிக்காவில் உருவான பொருளாதார நெருக்கடியால் உலக அளவில் பெரும் தேக்க நிலை உண்டானது அல்லவா? அது பற்றி 2003 ம் ஆண்டே கணித்து எச்சரித்தவர் ஷில்லர்.

அமெரிக்காவில் வீடுகளின் விலை எக்கச்சக்கமாக உயர்வது கண்டு, இது செயற்கையானது, இந்த குமிழ் வெடிக்கும் என அவர் எச்சரித்தார். சில ஆண்டுகள் கழித்து சப் பிரைம் கிரைசிஸ் வடிவில் அந்த குழு வெடித்தது.

இப்படி வரலாறுதோறும் ஏற்படும் குமிழ்கள் மற்றும் அவற்றிக்கு காரணமாக மிகை ஆர்வம் பற்றியும் ஷில்லர் விரிவாக ஆய்வு செய்து எழுதியும் பேசியும் வருகிறார்.

அப்படிப்பட்ட ஷில்லர் தான், தற்போதைய சூழலில் மிகை ஆர்வத்திற்கு அழகான உதாரணம் பிட்காயின் என கூறியிருக்கிறார். பிட்காயின் கதைக்கு உள்ள ஊக்கம் தரும் தன்மையும், அதன் பின்னே உள்ள மர்ம நிறுவனர் கதையும் சேர்த்து இதன் மீதான ஆர்வத்தை அதிகமாக்கியுள்ளது என்கிறார் ஷில்லர். பிட்காயினை என்னால் புரிந்து கொள்ள முடியும், அதில் யூகம் செய்து பணம் பார்க்க முடியும் என்ற நம்பிக்கை பலருக்கு இருப்பதாகவும் ஷில்லர் கூறியிருக்கிறார்.

ஆக, பிட்காயின் பற்றி புரிந்து கொள்ளும் முயற்சியை நீங்கள் ஷில்லரின் பேட்டியில் இருந்து கூட துவக்கலாம்: https://qz.com/1067557/robert-shiller-wrote-the-book-on-bubbles-he-says-the-best-example-right-now-is-bitcoin/

யுவர் ஸ்டோரி தமிழில் எழுதும் தகவல் திங்கள் இதழில் எழுதியது. இப்போதைய சூழலில் இன்னும் பொருத்தமான வாசிப்பு.

 

டிஜிட்டல் விடுதலை அளிக்கும் இசை சாதனம்

20160919_MIGHTY_RIO18_CMF1_-_BluBlack_-_HERO_Shadow_-_SML_largeகட்டுரைக்குள் நுழைவதற்கு முன் ஒரு சிறு குறிப்பு. இந்த கட்டுரையில் விவரிக்கப்பட இருக்கும் இசை சாதனத்தை இந்தியர்கள் இப்போதைக்கு பயன்படுத்துவதற்கான வாய்ப்பில்லை. ஏனெனில் இந்த சாதனத்தை தருவித்துக்கொண்டாலும் அதன் ஆதாரமாக இருக்கும் இசை பாயும் சேவையான ஸ்பாட்டிபை இந்தியாவில் இன்னமும் அதிகாரபூர்வமாக அறிமுகமாகவில்லை என்பதால், அதை பயன்படுத்த முடியாது. அதனால் என்ன, சில சாதனங்களை நீங்கள் பயன்படுத்த வேண்டும் என்றில்லை, அதன் கருத்தாக்கத்தை தெரிந்து கொண்டாலே அட, நன்றாக இருக்கிறதே என வியக்கத்தோன்றும்.

அப்படி வியந்து போவதற்காக தான், மைட்டி எனும் அந்த சாதனத்தை இந்தப்பகுதியில் அறிமுகம் செய்து கொள்வோம். இந்த சாதனம் புதுமையானது மட்டும் அல்ல விஷயம், நாம் வசிக்கும் காலத்தையும் நினைவூட்டுவதாக இந்த சாதனம் அமைந்திருப்பது தான் இன்னும் முக்கியமான விஷயம்.

ஆம். நாம் கேட்ஜெட்களின் காலத்தில் வசிக்கிறோம். இதை ஒரு நுகர்வோராகவும் நாம் உணர வேண்டியது அவசியம். தொழில்முனைவோராகவும் இதை உணர்ந்திருப்பது நல்லது. அப்போது தான் மைட்டி போன்ற புதுமையான கேட்ஜெட்டை நம்மாலும் உருவாக்க முடியும்.

கேட்ஜெட் என்பதை குறுஞ்சாதனம் என்று புரிந்து கொள்ளலாம். டிவி ரிமோட் துவங்கி, கார் கதவுகள் தானாக லாக் செய்து கொள்ள உதவும் சாவிக்கொத்து சாதனம் வரை பலவிதமான கேட்ஜெட்களை நாம் பயன்படுத்துகிறோம். ஏசி ரிமோட், கிட்சன் டைமர் எல்லாவற்றையும் இதில் சேர்த்துக்கொள்ளலாம். இவைத்தவிர பிரத்யேகமான கேட்ஜெட்களும் அறிமுகமாகி கொண்டிருக்கின்றன. இந்த வரிசையில் தான் மைட்டி கேட்ஜெட்டும் அறிமுகமாகி இருக்கிறது.

உள்ளங்கையில் அடங்கிவிடக்கூடிய வகையில் சதுர வடிவமாக இருக்கும் இந்த சாதனம் ஒரு இசை கேட்பு சாதனம். அதாவது மியூசிக் பிளேயர். இதில் உள்ள பட்டனை நான்கு திசையிலும் அழுத்தி பாட்டு கேட்கலாம். இதை சட்டை பாக்கெட் அல்லது பாண்ட் பாக்கெட்டில் சொருகி கொண்டால் போதும், இயர்போனில் விரும்பிய இசையை கேட்டு மகிழலாம். இதென்ன பிரமாதம், ஸ்மார்ட்போன் இருந்தாலே போதுமே எப்போது வேண்டுமானாலும் இசை கேட்கலாமே, இதற்கு என தனியே ஒரு சாதனம் தேவையா? என்று நீங்கள் கேட்கலாம். விஷயமே அது தான். இது ஸ்மார்ட்போனுக்கான துணை சாதனம். அதாவது ஸ்மார்ட்போனை கையில் எடுத்துச்செல்லாமலே அதன் மூலம் இசை கேட்டு ரசிக்க வழி செய்யும் சாதனம்.

நீங்கள் இசைப்பிரியர் என்றால், அதிலும் ஸ்டீரிமிங் வகையில் இசையை பாய்ந்தோடச்செய்யும் ஸ்பாட்டிபை சேவையின் ரசிகர் என்றால், இது போன்ற ஒரு சாதனத்தின் தேவையை எளிதாக புரிந்து கொள்ளலாம். ஏனெனில் அவர்களுக்காக உருவாக்கப்பட்டது தான் இந்த சாதனம். ஸ்பாட்டிபை காப்புரிமை சிக்கல் இல்லாமல் சந்தா செலுத்தி விரும்பிய பாடல்களை ஸ்டீரிமிங் முறையில் கேட்டு ரசிக்க வழி செய்யும் சேவை என்பதை நீங்கள் அறிந்திருக்கலாம். காப்புரிமை காரணமாகவே இன்னமும் இந்தியாவில் அந்த சேவை அதிகாரபூர்வமாக அறிமுகமாகவில்லை.

ஸ்பாட்டிபை சேவையை கம்ப்யூட்டரிலும் கேட்கலாம்; அதைவிட சுலபமாக செயலி மூலம் ஸ்மார்ட்போனிலும் கேட்கலாம். வீட்டில் இருக்கும் போது அல்லது பஸ்சிலோ, காரிலோ பயணம் செய்யும் போதோ ஸ்மார்ட்போனில் ஸ்பாட்டிபை மூலம் பாட்டு கேட்பதில் எந்த சிக்கலும் இல்லை. ஆனால் ஜாகிங் செல்லும் போது அல்லது உடற்பயிற்சி செய்யும் போது ஸ்மார்ட்போனை கையில் எடுத்துச்செல்வது சிக்கலாக இருக்கலாம். இது போன்ற நேரங்களில் காதில் இயர்போனை மாட்டியபடி பாடல்களை கேட்டுக்கொண்டிருப்பது உற்சாகத்தை அளிக்க கூடும் என்றாலும், ஸ்மார்ட்போன் இல்லாமல் இது சாத்தியமில்லை. ஆனால், ஜாகிங்கிற்கு நடுவே ஸ்மார்ட்போன் இடைஞ்சலாக இருக்கலாம். அது மட்டும் அல்ல அதன் அழைப்புகளும், நோட்டிபிகேஷன்களும் தொல்லையாக அமையலாம்.

இவை எல்லாம் இல்லாமல், இசையை மட்டும் கேட்டு ரசித்தபடி, ஜாகிங்கோ, வாக்கிங்கோ அல்லது டிரெக்கிங்கோ செய்ய முடிந்தால் எப்படி இருக்கும்? என்று ஏங்குபவர்களுக்காக உருவாக்கப்பட்டது தான் மைட்டி இசை கேட்பு சாதனம். ஆப்பிளின் பழைய ஐபாடு இசை எம்பி 3 பிளேயரை நினைவுபடுத்தும் இந்த சாதனத்தை ஏகாந்தமாக வெளியே செல்ல விரும்பும் போது கையில் எடுத்துச்செல்லலாம். புளுடூத் மற்றும் வயர்லெஸ் மூலம் இதை ஸ்மார்ட்போனில் இணைத்துவிட்டால் போதும் ஸ்பாட்டிபையில் கேட்க விரும்பும் பாடல்களை இதிலேயே கேட்கலாம். இதற்கான பிரத்யேக ஒருங்கினைப்பு செயலியையும் மைட்டி வழங்குகிறது. ஆக, வெளியே செல்லும் போது, போன் கீழே விழுந்த விடும் என்ற கவலை இல்லாமல் பாட்டு கேட்கலாம். அது மட்டும் அல்ல, நொடிக்கொரு முறை போனை எடுத்துப்பார்க்க வேண்டும் எனும் டிஜிட்டல் கவனச்சிதறல்கள் இல்லாமல் காரியத்தில் கண்ணாக இருக்கலாம். இத்தகைய டிஜிட்டல் விடுதலையை விரும்புகிறவர்கள் மைட்டியை நிச்சயம் கூடுதலாக விரும்புவார்கள்.

இது தான் மைட்டியின் கதை. யோசித்துப்பார்த்தால் ஆச்சர்யமாக இருக்கும். படம் பார்ப்பது, பாட்டு கேட்பது, கேம் ஆடுவது என எல்லாவற்றையும் ஸ்மார்ட்போன் மூலமே நிறைவேற்றிக்கொள்ளலாம் எனும் நிலையில், பாடல்களை கேட்டு ரசிப்பதற்காக மட்டுமே ஒரு சின்னஞ்சிறிய சாதனத்தை உருவாக்குவதும் அதற்கான தேவை இருப்பதை உணர்வதும் ஆச்சர்யமானது தான் இல்லையா!

அதிலும் குறிப்பாக டிஜிட்டல் இசையை கேட்க வழி செய்து பெரும் வெற்றி பெற்ற ஆப்பிளின் ஐபாடு சாதனம், ஐபோன் எழுச்சிக்குப்பிறகு தேவையற்று போய்விட்டதாக கருதப்பட்ட நிலையில், மைட்டி வடிவில் இசை கேட்பு சாதனம் மறு அவதாரம் எடுத்துள்ளது ஆச்சர்யமானது. ஆனால், முன்னாள் கூகுள் பொறியாளரான அந்தோனி மெண்டல்சனுக்கு முதன் முதலில் இந்த ஐடியா உதித்த போது, இது செல்லுபடியாகும் என எத்தனை பேர் நினைத்திருப்பார்கள் எனத்தெரியவில்லை. அதனால் தான் மெண்டல்சன், இணைய நிதி திரட்டும் மேடையான கிக்ஸ்டார்ட்டரை இதற்கான வெள்ளோட்ட மேடையாக தேர்வு செய்தார்.

மைட்டி சாதனத்தின் மையக்கருத்தை விளக்கி கூறி, இதற்கு ஆதரவு அளிக்குமாறு கிக்ஸ்டார்ட்டர் மூலம் அவர் கோரினார். இதற்கு அமோக வரவேற்பு கிடைத்ததோடு கேட்டதை விட அதிகமாக நிதியும் குவிந்தது. ஆனால் வாக்குறுதி அளித்தது போல் உடனடியாக மைட்டி சாதனத்தை உற்பத்தி செய்து கொடுக்க முடியாமல் போனாலும் சற்று தாமதமாக இந்த சாதனம் அதை ஆதரித்தவர்களுக்கு அனுப்பி வைக்கப்பட்டுள்ளது. அது மட்டும் அல்ல, இப்போது கட்டணம் செலுத்தி வாங்கிக்கொள்ளும் வகையில் சந்தையிலும் அறிமுகம் செய்யப்பட்டுள்ளது.

,கொஞ்சம் புதுமையான ஐடியாவில் உருவானது தான் மைட்டி சாதனம். ஆனால் இதற்கான தேவை இருப்பதை இசைப்பிரியர்கள் நிருபித்துள்ளனர். ஸ்மார்ட்போன் தான் எல்லாம் என்பதை எல்லாம் விட்டுத்தள்ளுங்கள், நமக்கு இது போன்ற சின்னஞ்சிறிய சாதனங்களும் தேவை தான். அதனால் தான் நம் காலத்தை கேட்ஜெட்களின் காலம் என்பது பொருத்தமாக இருக்கும்!

மைட்டி சாதனத்தின் இணையதளம்: https://bemighty.com/

கற்றலில் உதவும் வீடியோக்கள்

classhookஇணையத்தில் பொழுதுபோக்கு வீடியோக்கள் மட்டும் அல்ல, பாடங்களை கற்றுக்கொள்ள உதவும் கல்வி வீடியோக்களும் அநேகம் இருப்பது தெரிந்த விஷயம் தான். இத்தகைய கல்வி சார்ந்த வீடியோக்களை தேடித்தரும் இணையதளங்களும் இருக்கின்றன.
கிளாஸ்ஹுக் தளமும், கல்வி சார்ந்த வீடியோக்களை தேடித்தருகிறது என்றாலும், முற்றிலும் புதுமையான முறையில் இதை நிறைவேற்றுகிறது. இந்த தளம், புதிய விஷயங்களை கற்றுக்கொள்ள உதவும் திரைப்பட கிளிப்களை அடையாளம் காட்டுகிறது.
திரைப்படங்கள் மற்றும் டிவி நிகழ்ச்சியில், கணிதம், அறிவியல் மற்றும் உலக நடப்புகள் சார்ந்த உரையாடல்கள் இடம்பெறுவது உண்டல்லவா? இத்தகைய உரையாடல் கொண்ட வீடியோக்களை இந்த தளம் பட்டியலிடுகிறது. ( ஆனால் ஹாலிவுட் படங்கள் தான் இடம்பெற்றுள்ளன)
இந்த காட்சிகளை கொண்டு ஆசிரியர்கள் வகுப்பில் மாணவர்களுக்கு தொடர்புள்ள பாடத்தை நடத்தினால் அவர்களால் எளிதாக புரிந்து கொள்ள முடியும் என இந்த தளம் கருதுகிறது. அதனால் தான் கற்றலுக்கு உதவக்கூடிய கிளிப்களை தேடித்தருகிறது. வகுப்புகளுக்கு ஏற்பவும் தேடலாம்.
அறிவியல், கணிதம், மொழி என எந்த தலைப்பு சார்ந்த வீடியோக்கள் தேவை என தேடிப்பார்க்கலாம். அல்லது இதில் பட்டியலிப்பட்டுள்ள கிளிப்களை ஒவ்வொன்றாக பார்க்கலாம். தேவையான தலைப்புகளை டைப் செய்தும் தேடிப்பார்க்கலாம்.
ஆசிரியர்கள் பயன்படுத்திக்கொள்ளலாம். ஆர்வம் உள்ளவர்கள் முற்றிலும் தகவல் நோக்கில் வீடியோ கிளிப்களை பார்த்து ரசிக்கவும் இந்த தளத்தை அணுகலாம்.
இணைய முகவரி: https://www.classhook.com/

செயலி புதிது; இன்ஸ்டாகிராம் பயண வழிகாட்டி
ஒளிப்பட பகிர்வு செயலியான இன்ஸ்டாகிராமை பல விதங்களில் பயன்படுத்தலாம். உணவுப்பிரியர்கள் அதில் பகிரப்படும் ரெஸ்டாராண்ட் சார்ர்ந்த படங்கள் மூலம் புதிய உணவை சுவைக்க ஏற்ற இடங்களை அடையாளம் காணலாம். அதே போல பேஷன் பிரியர்கள் புதிய ஆடை அலங்காரங்களை ஒளிப்படங்களாக காணலாம். யோகா பிரியர்கள் ஒளிப்படங்களை பார்த்து யோகா கற்றுக்கொள்ளலாம். இதே போலவே சுற்றுலா பிரியர்கள் இன்ஸ்டாகிராமில் பகிரப்படும் பயணம் சார்ந்த படங்கள் மூலம் புதிய இடங்களை தெரிந்து கொள்ளலாம்.
– இப்படி பயணம் சார்ந்த படங்களை பார்ப்பதற்காக என்றே தனியே ஷெர்பா எனும் செயலி அறிமுகம் செய்யப்பட்டுள்ளது. ஐபோனுக்கான இந்த செயலி மூலம், இன்ஸ்டாகிராமில் பகிரப்படும் சுற்றுலா சார்ந்த படங்களை பின் தொடரலாம்.
– உலக நகரங்கள் சார்ந்த ஒளிப்படங்களை வரிசையாக காணலாம். உலக வரைப்படம் மீதான இடங்களை கிளிக் செய்தும் ஒளிப்படங்களை காணலாம்.
– பயணங்களுக்கான புதிய சுவாரஸ்யமான இடங்களை அறிமுகம் செய்து கொள்ள இந்த செயலி உதவும்.
– மேலும் தகவல்களுக்கு: https://sherpa.guide