Category Archives: இணையதளம்

சுவரொட்டிகளின் சரித்திரம்

கலைகள் இல்லாமல் இயக்கங்கள் இருந்த காலம் தான் உண்டா? இல்லை, இயக்கங்கள் இல்லாமல் இருந்த காலம் தான் உண்டா? கலைகள் என்றால், இசை கவிதை, நாடகம், சுவரொட்டிகள் எல்லாமும் தான்.
சுவரொட்டிகளை கலையின் வடிவமாக சொல்வதில் பலருக்கு தயக்கம் இருக்கலாம்.
.
ஆனால் இந்த கருத்தை மீறி, சுவரொட்டிகள் சமூக மாற்றத்துக்கான இயக்கங்களின் முக்கிய பிரச்சார ஆயுதமாக திகழ்கின்றன. பிரச்சாரத்தின் நேரடி கலைத்தன்மையின் கழுத்தை நெரிக்காமல், அதன் தீவிரத்திற்கு வலு சேர்ப்பதாகவே இருக்கிறது.

அதிலும் குறிப்பாக அரசியல் நோக்கம் கொண்ட சுவரொட்டிகள் கலைத்தன்மையின் காட்சிகளாக மட்டும் அல்லாமல் உலகம் முழுவதும் அமைதிக்காகவும், நியாயத்திற்காகவும் நடைபெற்ற போராட்டத்தின் நினைவுச் சின்னங்களாக விளங்குகின்றன என்பதையும் எண்ணிப்பார்க்க வேண்டும்.

எச்சரிக்கை, தோழமை, வேண்டுகோள் என எத்தனையோ விதமான உணர்வுகளோடு சுவரொட்டிகள் இயக்கச் செய்திகளை தாங்கி நின்றிருக்கின்றன. சமகாலத்தில் பார்க்கும் போது இவற்றின் கலை நுட்பம் மற்றும் முக்கியத்துவம் கண்ணில் படாமல் போய்விடலாம். ஆனால் காலத்தை திருப்பி பார்க்கும் போது, சுவரொட்டிகள், கடந்த காலத்தின் ஒளிக் கீற்றுகளை கண்முன் நிறுத்தி, கால வெள்ளத்தில் மிதக்க வைத்து விடும்.

அந்த காலத்து சினிமா சுவரொட்டிகள் (அ) விளம்பர வாசகங்களை புரட்டிப்பார்த்தாலே, கடந்து போன காலத்தில் கோலோச்சிய கலாச்சார போக்குகளும், வெகு ஜன உணர்வும் மனத்திரையில் நிழலாடும். அப்படி இருக்க சரித்திர சின்னங்கள் என்பது சொல்லக்கூடிய, போராட்ட அமைப்புகள் மற்றும் அரசியல் இயக்க சுவரொட்டிகளை ஒரு சேர பார்க்க முடிந்தால் எப்படி இருக்கும்?

மெய் தான்! ஆனால் இந்த சுவரொட்டிகளுக்கு எங்கே போவது என ஏக்கம் கலந்த குரலில் ஆர்வத்துடன் கேட்பவர் நீங்கள் என்றால், இந்த விவரங்களையும், அதன் தொடர்ச்சியாக வரும் “ஜிஎஸ்பிஜி’ அமைப்பு பற்றிய விவரமும் உங்களுக்கானது தான்!.

ஜிஎஸ்பிஜி என்பது சென்டர் பார் ஸ்டடி ஆப் பொலிடிகல் கிராபிக்ஸ் என்று அமைப்பின் சுருக்கம். அதாவது அரசியல் சுவர் சித்திரங்களின் ஆய்வுக்கான மையம் என்று பொருள். பெயரில் இருந்ததே புரிந்து கொள்ளக்கூடியது போலவே இந்த அமைப்பானது வரலாற்று மற்றும் சமகால சுவரொட்டிகளை சேகரித்து பாதுகாத்து அவற்றின் உட்பொருளை ஆய்வு செய்து வருகிறது. சமுக மாற்றத்தின் அடையாளமாக சுவரொட்டி விளங்குவதை இந்த அமைப்பின் ஆய்வு அழகாக விளக்குகிறது.

சேகரிப்பும் ஆய்வு மட்டுமே இந்த அமைப்பின் நோக்கம் அல்ல! இவற்றின் கலைத்தன்மை மூலம், மக்களிடம் போராடும் குணத்தை தூண்டி விடுவது, இந்த அமைப்பின் பிரதான நோக்கம். சுவரொட்டியை சேகரிக்க என பல்வேறு முறைகளையும், திட்டங்களையும் கொண்டிருக்கும் இந்த அமைப்பு, ரஷ்ய புரட்சி காலத்தில், கம்பனியை கனலேந்திய சுவரொட்டிகள் உட்பட உலகம் முழுவதும் தோன்றிய பல்வேறு இயக்கங்கள் சார்ந்த 50 ஆயிரத்துக்கும் மேற்பட்ட சுவரொட்டிகளை சேகரித்து வைத்திருக்கிறது.

இவற்றில் பெரும்பாலானவற்றை வேறு எங்குமே பார்க்க முடியாது. சுவரொட்டிகளிலும் தான் எத்தனை ரகங்கள், காகிதத்தில் அச்சிட்டவை, பட்டுத்துணியில் தீட்டப்பட்டவை, மரத்தில் செதுக்கப்பட்டவை, நகலெடுக்கப்பட்டவை என்று எண்ணற்ற வகைகள் இருக்கின்றன. எல்லாதரப்பு மக்களுடனும் நேரிடையாக தொடர்பு கொண்டு செய்தியை சொல்லி விடுவது இவற்றின் பொதுத்தன்மை.

இவை சிந்திக்கவும் தூண்டும். செயல்படவும் தூண்டும். தங்கள் காலத்தில் பரிமுதல் செய்யப்பட்டு, அழித்தொழிக்கப்பட்ட சுவரொட்டிகளும் உண்டென்பதால், அதனையும் மீறி, சேகரிக்கப்பட்ட சுவரொட்டிகள் காலப்பெட்டகமாக இந்த அமைப்பால் உண்டாக்கப்பட்டிருக்கிறது

வரலாறு கண்ட இயக்கங்களையும் கட்சிகளையும் இந்த சுவரொட்டிகளின் மூலம் பார்க்க முடியும். மூக மாற்றத்துக்கு கொடி தூக்கிய இயக்கங்கள் முதல், போர் எதிர்ப்பை வெளிப்படுத்திய இயக்கங்கள் வரை பல அமைப்புகளின் கட்சிகளாக இவற்றை காணலாம்.

சுவரொட்டி ஆய்வு அமைப்பு, இந்த சுவரொட்டிகளை அருங்காட்சியமாக வைத்து பாதுகாத்து வருவதற்கு, பல நகரங்களில் கண்காட்சியை நடத்தி வருகிறது. மேலும் தனது இணையதளத்தில், இவை இணைய கண்காட்சியாகவும் வைக்கப்பட்டிருக்கின்றன.

———-
link;
www.politicalgraphics.org

அந்தரங்கம் நான் அறிவேன்!

திருவாளர் தீமை!
அமெரிக்காவின் ஜிம் பவுலர் தன்னைத்தானே இப்படித்தான் அழைத்துக் கொள்கிறார். அவர் நடத்தி வரும் இணையதளத்தை அறிந்த வர்கள், இந்த பெயர் பொருத்தமானதே என்று கூறுகின்றனர். ஆனால் இப்படி அழைத்துக் கொள்வதன் மூலம் மட்டுமே அவரது நோக்கத்தை நியாயப்படுத்தி விட முடியாது என்றும் தீர்மானமாகச் சொல்கின்றனர்.
.
பவுலரின் இணையதளம் பெரிய அளவில் வெற்றி பெற்று வரும்போதும் கூட எதிர்ப்பாளர்கள் அவரை மன்னிக்கத் தயாராக இல்லை. பவுலரோ, விமர்சனங் களைப் பற்றி கவலைப்படாமல் தன்னுடைய நோக்கத்தில் உறுதியாக இருக்கிறார்.

இந்த தளம் சர்ச்சைக்குரியதாக இருக்கும் என்பது. இதனை தொடங்கும் போதே எனக்குத் தெரியும் என்று ஒப்புக் கொள்ளும் பவுலர், உண்மையில் இன்டெர் நெட்டின் ஆற்றலை சரியாக பயன்படுத்திக் கொள்ளும் முயற்சியே தன்னுடையது என்றும் தெம்பாக கூறுகிறார்.

அதற்கேற்பவே விற்பனை பிரதிகளில் பலர் இந்த தளத்தை மிகவும் பயனுள்ளது என்று வரவேற்றுள்ளனர். ஆனால் இன்னும் பலரோ இந்த தளத்தை மனதார சபித்துக் கொண்டிருக்கின்றனர்.

அப்படி என்னதான் செய்கிறது இந்த தளம்?

விசிட்டிங் கார்டுகளை எல்லாம் தொகுத்து தருகிறது!
வர்த்தக தொடர்புகளுக்கான விவரங்களை அறிவதற்கான தளம் என்றே பவுலர் இதனை வர்ணிக்கிறார்.

அதாவது வியாபார நிமித்தமாக வர்த்தக நோக்கில் யாரையாவது தொடர்பு கொள்ள விரும்பினால் அவர்களின் அலுவலக முகவரி போன்ற விவரங்களை தெரிந்து கொள்ள ஜிக்சா (டீடிஞ்ண்ச்தீ.ஞிணிட்) இதுதான் தளத்தின் பெயர், முகவரி உதவுகிறது.

உதாரணத்திற்கு விற்பனை பிரதிநிதி ஒருவர் தனது நிறுவன பொருள் பற்றி விளக்கி கூற, குறிப்பிட்ட நிறுவனத்தில் உள்ள உயரதிகாரியை சந்திக்க விரும்புகிறார் என வைத்துக் கொள்வோம். அந்த அதிகாரியின் அலுவலக முகவரியை தெரிந்து கொள்ள அவர் அலைபாய்வார் அல்லவா? அந்த விவரத்தை எளிதாக தெரிந்து கொள்வதற்கான இடம்தான் “ஜிக்சா’ காரணம் வர்த்தக தொடர்புகளுக்கான அடையாளமாக கருதப்படும் விசிட்டிங் கார்டுகளின் சங்கமமாக இந்த தளம் திகழ்கிறது.

எனவே ஒருவர் தன்வசம் உள்ள விசிட்டிங் கார்டுகளை இந்த தளத்தில் சமர்ப்பிக்கலாம்அதாவது அதில் உள்ள விவரங்களை இதில் இடம் பெற வைக்கலாம்.

இப்படியாக விசிட்டிங் கார்டுகளுக்கான மாபெரும் தொகுப்பாக இந்த தளம் உருவாகி வருகிறது. ஆகவே விற்பனை பிரதிநிதிகள் யாரேனும் தொடர்பு முகவரியை தேடும் பட்சத்தில் இந்த தளத்தில் தேடிப்பார்த்தாலே தேவையான விவரங்களை சுலபமாக கண்டுபிடித்து விடலாம். சம்பந்தப்பட்ட நபரின் பெயரை கொண்டு தேடும் வசதியும் உண்டு.
(அ) பொதுவாக நிறுவனங்களை குறிப்பிட்டு அதில் பொறுப்பு வகிப்பவர்களையும் தேட முடியும்!

விற்பனை பிரதிநிதிகளுக்கு இந்த வசதி நிச்சயம் வரப்பிரசாதமாக இருக்கும் என்பதில் சந்தேகமில்லை. பவுலரே ஒரு காலத்தில் விற்பனை பிரதிநிதியாக இருந்தவர்தான். அதனால்தான் இதற்கான தேவையை உணர்ந்து “ஜிக்சா’ தளத்தை அமைத்திருக்கிறார்.

மேலோட்டமாக பார்த்தால் இதனை நல்ல முயற்சி என்றே சொல்லத் தோன்றும். விற்பனை பிரதிநிதிகள் தாங்கள் தொடர்பு கொள்ள வேண்டிய பிரமுகர்களின் விவரங்களை உடனடியாக தெரிந்து கொள்ள முடிவது நல்லதுதானே என்று தோன்றலாம். ஆனால் இன்னொரு கோணத்தில் இருந்துப் பார்த்தால் இதனால் ஏற்படக் கூடிய விபரீதங்கள் புரியும்.

விசிட்டிங் கார்டு என்பதே தொடர்பு கொள்வதற்கான அறிமுகச்சீட்டுதான் என்றாலும், அதனை யார் யாருக்கு தருவது என்பது, உடமையாளரின் உரிமை அல்லவா? விசிட்டிங் கார்டை ஒருவர் தருகிறார் என்றால் தன்னோடு தொடர்பு கொள்ள அனுமதி வழங்குகிறார் என்றும்தான் பொருள்! அறிமுகம் இல்லாத வர்களுக்கும், அந்நியர் களுக்கும் ஒருவர் விசிட்டிங் கார்டை கொடுக்க வாய்ப்பில்லை.

அப்படியிருக்கும் போது ஒருவரின் விசிட்டிங் கார்டு, உலகமே பார்க்க அம்பலத்தில் ஏற்றப்படுவது ஏற்புடையதுதானா? இது அவருடைய தனிப்பட்ட உரிமை மீதான ஊடுருவல் இல்லையா?

இந்த காரணத்தினால்தான் பெரும்பாலானோர் இந்த தளத்தை கடுமையாக விமர்சிக்கின்றனர். அனுமதி இல்லாமல் ஒருவருடைய தொடர்பு முகவரியை அனைவரும் பார்க்க பகிரங்கப்படுத்துவது அநாகரீகமான செயல் என்று கடுங்கோபத்துடன் கூறுகின்றனர்.

பவுலரோ விமர்சனங்கள் பற்றி அதிகம் கவலைப்படவில்லை. தொடர்பு முகவரி போன்ற விவரங்களை தொலைபேசி டைரக்டரி உள்ளிட்ட கையேடுகளில் இருந்து எடுக்க முடியும் என்று கூறும் அவர் அந்த தேடலை முறைப்படுத்தி, எளிமையாக்கி தந்திருப்பதாக கூறுகிறார். மேலும் பொது வெளியில் புழங்கக்கூடிய வர்த்தக தொடர்பு விவரங்களை மட்டுமே தமது தளத்தில் இடம் பெற வைப்ப தாகவும்,செல்போன் எண் போன்ற அந்தரங்க தகவல்கள் தவிர்க்கப் படுவதாகவும் கூறுகிறார். அதோடு யார் வேண்டுமானாலும் இந்த தளத்தில் தங்களைப் பற்றிய விவரம் இருக்கிறதா என்பதை பார்த்து அதில் தவறு இருந்தால் மாற்றங்களை செய்ய முடியும் என்றும் கூறுகிறார். (ஆனால் முழுமையாக தளத்தில் இருந்து நீக்குவது சாத்தியம் இல்லை).

இதெல்லாம் கூட பரவாயில்லை. ஆனால் அவரது நோக்கம் முழுவதும் வணிகமயமாக இருப்பதும், தகவல்களை திரட்ட கையாளப்படும் வழிகளும்தான் கவலையை ஏற்படுத்துகின்றன.

இந்த தளத்தை பயன்படுத்த 25 டாலர் கட்டணம் செலுத்தி உறுப்பினராக வேண்டும். அதன் பிறகு இதன் மூலம் பெற்றுக் கொள்ளும் ஒவ்வொரு முகவரிக்கும் ஒரு டாலர் கட்டணம் தர வேண்டும். கட்டணம் தரத் தயாராக இல்லை என்றால் விசிட்டிங் கார்டுகளை சமர்பித்து அதற்கு இணையான புள்ளிகளை பெற்று அந்த புள்ளிகளை கொண்டு முகவரிகளை வாங்கிக் கொள்ளலாம். புள்ளிகள் வேண்டாம் என்றால் கார்டுகளை சமர்பித்தவுடன் அதற்கான கொள்கையை பெற்றுக் கொள்ளலாம்.

இப்படி விசிட்டிங் கார்டு விவரங்களை விற்பதும், வாங்குவதும் வர்த்தக பிரமுகர்களை முகஞ்சுளிக்க வைத்துள்ளது. தனிப்பட்ட உறவின் அடிப்படையில் கொடுக்கும் வர்த்தக தொடர்பு விவரத்தை இப்படி விற்பது நம்பிக்கையை மீறும் இழிவான செயல் அல்லவா? என்றும் கேட்கின்றனர். அது மட்டுமல்ல, முற்றிலும் மற்றவர்களின் முயற்சியின் அடிப்படையில் தகவல்களை சேகரித்துக் கொண்டு அதன் மூலம் வருவாய் ஈட்டுவதும் சரிதானா என்றும் கேட்கின்றனர்.

இந்த கேள்விகளை மீறி “ஜிக்சா’ தளத்தில் லட்சக்கணக்கான வர்த்தக தொடர்பு விவரங்கள் அரங்கேற்றப் பட்டிருக்கிறது என்பதே விஷயம்!
———–
link;
www.jigsaw.com

டிஜிட்டல் உலக சுமைதாங்கி

டிஜிட்டல் உலகில்தான் நமக்கு எத்தனை சுமைகள். அது மட்டுமா? குழப்பமாகவும் அல்லவா இருக்கிறது. எந்த கோப்பை எங்கே வைத்தோம் என்று தெரிவதில்லை. எந்த படம் எங்கே இருக்கிறது என்பதும் புரிவதில்லை. அதற்குள் புதிய படங்களும், கோப்புகளும் வந்து சேர்ந்து விடுகின்றன. அவற்றை சேமித்து வைப்பதற்கான இடமும் இல்லாமல் போகிறது.
.
இப்படி டிஜிட்டல் உலக குழப்பங்களுக்கு தீர்வாக புதியதொரு இணையதளம் அறிமுகமாகி இருக்கிறது. புதிய இணையதளம் அல்ல. ஏற்கனவே இருந்த இணைய தளம் புதிய வடிவம் எடுத்துள்ளது.

“புட் பிளேஸ்’ (www.putplace.com) எனும் அந்த இணையதளத்தில் நீங்கள் உங்களுடைய கோப்புகள், புகைப்படங்கள், வீடியோ காட்சிகள் இன்னும் சகல விதமான டிஜிட்டல் சங்கதிகளையெல்லாம் சேமித்து வைக்கலாம்.

அதாவது உங்களுடைய கம்ப்யூட்டரில் இதற்கான இருப்பிடத்தை தேட வேண்டிய அவசியமில்லை. புதிய கோப்புகளை சேமித்து வைக்க பழைய கோப்புகளை டெலிட் செய்ய வேண்டிய நிர்ப்பந்தமும் இல்லை. அவ்வாறு செய்யும் போது பின்னாளில் தேவைப்படக் கூடிய கோப்புகளை இழந்து விடுவோமோ என்ற குழப்பமும் இல்லை.

நேராக “புட் பிளேஸ்’ இணையதளத்திலேயே நம்முடைய டிஜிட்டல் சங்கதிகளை சேமித்து வைக்கலாம். இதற்காக அந்த தளத்தில் நமக்கென தனி பக்கத்தை உருவாக்கி கொள்ளலாம்.
விஷயம் அறிந்தவர்களுக்கு இதுவொன்றும் புதிய சேவை அல்லவே என்று கேட்க தோன்றும்.

கோப்புகளை வேறிடத்தில் சேமித்து வைக்கும் வசதியை இதற்கு முன்னரே ஒரு சில இணையதளங்கள் வழங்கி வருகின்றனவே என்னும் சந்தேகம் எழும். நியாயம்தான். “புட் பிளேஸ்’ இந்த சேவையை வழங்கும் முதல் தளமல்ல. ஏற்கனவே பல தளங்கள் இந்த சேவையை வழங்கி வருகின்றன.

ஆனால் “புட் பிளேஸ்’சில் சில குறிப்பிடத்தக்க விசேஷ அம்சங்கள் இருக்கின்றன. டிஜிட்டல் சுமையை குறைப்பதோடு அதனால் ஏற்படக் கூடிய குழப்பத்தையும் நீக்கி விடுகிறது.
இன்டெர்நெட் மற்றும் கம்ப்யூட்டரை பயன்படுத்துபவர்கள் பல்வேறு காரணங்களுக்காக பலவிதமான ஆவணங்களை சேமித்து வைக்க வேண்டி வருகிறது.

எளிமையான நோட்பேட்டில் துவங்கி ஆவணங்கள், புகைப்படங்கள், வீடியோ காட்சிகள் ஆகியவற்றை சேமித்து வைக்க வேண்டி இருக்கிறது. இன்னும் சிலருக்கு ஒலி கோப்புகளும் சேர்ந்து கொள்கிறது.

அதோடு வலைப்பதிவு செய்பவர்களாக இருந்தால் அது தொடர்பான பதிவுகள், கட்டுரைகள் மற்றும் தகவல்களை சேமித்து வைக்க வேண்டியிருக்கிறது. பாட் காஸ்டிங் மூலம் வரும் ஒலி கோப்புகளையும் சேர்த்து வைக்கும் கட்டாயம் ஏற்படுகிறது.

யு டியூப் பிரியர்கள் என்றால் (இப்போது யார்தான் யு டியூப் பார்க்காமல் இருக்கிறார்கள்). அந்த தளத்தில் டவுன்லோடு செய்யப்படும் வீடியோ காட்சிகளையும் சேமித்து வைக்க வேண்டியிருக்கிறது.

இதை தவிர இணையதளங்களில் பார்க்கும் தகவல்கள், இமெயில் மூலம் வந்து சேரும் புகைப்படங்கள் போன்றவற்றையும் சேமித்து வைக்க வேண்டிய தேவை இருக்கிறது.
அது மட்டுமல்லாமல் செல்போன், டிஜிட்டல் கேமரா மற்றும் லேப்டாப் கம்ப்யூட்டர்களிலிருந்தும் கோப்பு களை இடமாற்றம் செய்ய வேண்டியிருக்கிறது.

நபருக்கு நபர் இது மாறுபடலாமே தவிர எல்லோருக்கும் இதற்கான தேவை இருக்கிறது என்பதே விஷயம். ஆனால் சங்கடம் என்னவென்றால் இத்தனை கோப்புகளையும் சேமித்து வைத்துக் கொள்ளும் ஆற்றல் நம்முடைய கம்ப்யூட்டரில் இருப்பதற்கு வாய்ப்பில்லை.

எனவே அதிக கோப்புகளை சேர்க்கும் நிலை ஏற்பட்டால் கம்ப்யூட்டர் முடங்கி போய் விடும். அத்தகைய நேரத்தில் ஏற்கனவே உள்ள கோப்பு களை டெலிட் செய்வதை தவிர வேறு வழியில்லை.

அப்படியே கோப்புகளை டெலிட் செய்து திறமையாக நிர்வகித்து வந்தாலும் கூட, தேவையான நேரத்தில் குறிப்பிட்ட கோப்பை தேடி கண்டுபிடிப்பது சிரமமாக இருக்கும். எந்த கோப்பு, எந்த இடத்தில் எப்போது சேமித்து வைத்தோம் என்று தெரியாமல் குழம்பி தவிக்க வேண்டியிருக்கும்.

ஒரே கல்லில் இரண்டு மாங்காய் அடிப்பது போல, இந்த இரண்டு பிரச்சனைகளுக்குமே சரியான தீர்வை “புட் பிளேஸ்’ இணையதளம் வழங்குகிறது. இந்த தளத்தில் உறுப்பினராக பதிவு செய்து கொண்டால் அதன் பிறகு கொள்ளளவு பற்றி கவலைப்படாமல் நமக்கு தேவையான டிஜிட்டல் சங்கதிகள் அனைத்தையும் சேமித்து வைத்துக் கொள்ளலாம்.

அப்படி சேமித்து வைத்த பிறகுதான் “புட் பிளேஸ்’ ஒரு மாயத்தை நிகழ்த்துகிறது. புகைப்படம் என்றால் அதனை உங்களுடைய பிளிக்கர் தளத்தின் பக்கத்தோடு இது அவற்றை இணைத்து விடுகிறது. அதே போல வீடியோ காட்சிகள் என்றால் யு டியூப் கணக்கில் சேர்த்து விடுகிறது.

இதனால் அந்த கோப்புகளை தேடுவது மிகவும் எளிமையானது. அதே நேரத்தில் அந்த கோப்புகளின் மூலபிரதியை சேமித்து வைக்கிறது. பிளிக்கர் அல்லது யு டியூப்பில் அதனை இழக்க நேரிட்டாலும் இங்கு வந்து தேடி எடுத்துக் கொள்ளலாம். இவ்வாறு டிஜிட்டல் சங்கதிகளை அழகாக வகைப்படுத்தி அவற்றுக் குரிய இடத்தில் போட்டு வைக்கும் இந்த தன்மையின் காரணமாக குழப்பத்திற்கு இடமில்லாமல் தெளிவு பிறக்கிறது.

இந்த அம்சமே “புட் பிளேஸ்’ இணையதளத்தை மிகவும் சிறப்பானதாக ஆக்குகிறது.
வரும் காலத்தில் நம்முடைய டிஜிட்டல் சங்கதிகள் மேலும் அதிகரிக்க கூடும் என்றே கூறப்படுகிறது. எனவே “புட் பிளேஸ்’ போன்ற தளங்களின் சேவை மிகவும் இன்றியமையாதது.

தற்போது இந்த தளம் சோதனை வடிவில் அதாவது பீட்டா முறையில் இருக்கிறது. எனவே இதனை பயன்படுத்த கட்டணம் இல்லை; இலவசமானது. ஆனால் மேம்பட்ட சேவை தேவையென்றால் எதிர்காலத்தில் கட்டணம் செலுத்த வேண்டிய தேவை வரலாம்.

———–
link;
www.putplce.com

ஒரு படத்துக்கு ஒரு மரம்

புகைப்படம் எடுத்துக் கொள்வதற்காக ஸ்டுடியோவுக்கு செல்வதே மிகப் பெரிய நிகழ்வாக இருந்த காலம் உண்டு. இதற்கான தனி தயாரிப்பு தேவை. ஸ்டுடியோவுக்கு போகும் போது தனி மனநிலை ஏற்பட்டு விடும். ஆனால் இப்போது காலம் மாறி விட்டது. இன்று கையடக்க கேமராக்களின் வருகையால் நினைத்த நேரத்தில் காட்சிகளை கிளிக் செய்ய முடிவதால் ஸ்டுடியோக்களுக்கு செல்லும் வைபவம் அதன் முக்கியத்துவத்தை இழந்து விட்டது.

.
ஸ்டுடியோவுக்கு செல்லும் பழக்கம் மங்கி விட்டது போலவே புகைப்படங்களை பிரேம் போட்டு வீட்டில் மாட்டி வைக்கும் வழக்கமும் அரிதாகி வருகிறது.

அந்த கால வீட்டில் அடியேடுத்து வைத்தாலே குடும்பத்துடன் எடுத்துக் கொள்ளப்பட்ட புகைப்படங்களை சுவரில் பார்த்து ரசிக்கலாம். இன்றோ டிஜிட்டல் யுகத்தில் படமெடுப்பது சுலபமாகி இருக்கும் அதே நேரத்தில் புகைப்படங்களை டிஜிட்டல் வடிவத்தில் பார்த்து மகிழ்வதே வழக்கமாகி விட்டது.

எடுத்து படங்களை கம்ப்யூட்டரில் சேமித்து வைத்துக் கொண்டு தேவைப்படும்போது பிரிண்ட் போட்டு கொள்வதும் சுலபமாக இருக்கிறது. ஆனால் ஆயிரம்தான் சொல்லுங்கள். புகைப்படங்களை பிரேம் போட்டு வீட்டில் மாட்டி வைப்பதன் அழகே தனிதான்.

அழகு மட்டுமல்ல அதற்கென ஒரு கலாச்சாரம் மற்றும் பண்பாட்டு தேவை இருக்கவே செய்கிறது. இந்த டிஜிட்டல் யுகத்திலும் புகைப்படங்களை பிரேம் போட்டு அளிக்கும் சேவையை தரும் இணையதளங்கள் இருக்கிறது என்பதுதான் விசேஷம்.

இத்தகைய தளங்களில் ஒன்றான இபோட்டோ பிரேம்ஸ் இணையதளம் பிரேம் போட உதவுவதோடு மரம் வைக்கவும் வழி ஏற்படுத்தி தருகிறது. அதாவது இந்த தளத்தின் மூலம் போட்டோ பிரேமை ஆர்டர் செய்யும் ஒவ்வொரு முறையும், வாங்குபவரின் சார்பாக ஒரு மரக்கன்றை நட திட்டமிட்டிருப்பதாக இந்த தளம் தெரிவிக்கிறது.

சுற்றுச்சூழலுக்கு ஏற்பட்டுள்ள பாதிப்பை குறைப்பதற்காக உலகம் முழுவதும் பசுமை முயற்சிகள் மேற்கொள்ளப்பட்டு வருகின்றன. அதன் ஒரு பகுதியாக இந்த தளம் புகைப்படங்களோடு பசுமை பாதையையும் இணைத்திருக்கிறது.

ஒரு பிரேம், ஒரு மரம் எனும் வாசகத்தோடு இந்த சேவையை இபோட்டோ பிரேம்ஸ் தளம் வழங்கி வருகிறது. டிஜிட்டல் யுகத்திலும் புகைப்படங்களை பிரேம் போட தூண்டும் வகையில் மிகவும் அழகான, நேர்த்தியான பிரேம்களை இந்த தளம் விற்பனை செய்கிறது.

பல்வேறு வகையிலான பிரேம்கள் இந்த தளத்தில் காட்சிக்கு கிடைக்கின்றன. அவற்றில் இணையவாசிகள் தங்களுக்கு பிடித்தமானதை தேர்வு செய்து ஆர்டர் செய்து கொள்ளலாம். அந்த பிரேமில் அவர்கள் விரும்பும் புகைப்படம் வைக்கப்பட்டு அனுப்பி வைக்கப்படும். அதனை தங்களது இல்லத்தில் மாட்டி மகிழலாம்.

இப்படி பிரேமை விற்பனை செய்வதோடு, ஒவ்வொரு பிரேம் விற்பனைக்கும் ஒரு மரக்கன்றை நட முடிவு செய்யப்பட்டுள்ளது. இதற்காக மரக்கன்று நடுதலில் ஈடுபட்டுள்ள இயக்கத்தோடு இந்த தளம் ஒப்பந்தம் செய்து கொண்டுள்ளது.

மரக்கன்றுகளை நட்டால் மட்டும் போதாது. அவற்றை உரிய முறையில் பாதுகாக்க வேண்டும். அப்போதுதான் அவை காடுகளாக செழித்து வளரும். இந்த நோக்கத்தோடு செயல்பட்டு வரும் சுற்றுச்சூழல் அமைப்போடு இந்த தளம் ஒப்பந்தம் செய்து கொண்டுள்ளது.

இந்த தளம் சார்பாக தற்போது தாய்லாந்தில் உள்ள இரண்டு இடங்களில் மரக்கன்றுகள் நடப்பட்டு வருகின்றன. சுனாமி பேரலை வீசியபோது தாய்லாந்தில் உள்ள தீவு ஒன்றில் காடுகள் முற்றிலுமாக அழிக்கப்பட்டு விட்டன. அந்த இடத்தில் மீண்டும் காடுகளை உருவாக்குவதற்காக மரக்கன்றுகள் நடப்பட்டு வருகின்றன.

மேலும் இபோட்டோ பிரேம்ஸ் இணையதளம் கரியமில வாயுவின் அடிச்சுவற்றை குறைக்கும் திட்டத்தின் கீழ் சான்றிதழ் பெற்றுள்ளது. எனவே இத்தளத்தின் மூலம் புகைப்பட பிரேம்களை வாங்கும் போது இந்த சான்றிதழின் கீழ் புள்ளிகளையும் பெறலாம்.

புகைப்பட பிரேம்களை வாங்குவதே ஒரு மனநிறைவான விஷயம்தான். அந்த நிறைவோடு உலகின் இயற்கை வளத்தை பெருக்குவதற்கு நம்மாலான ஒரு சிறிய பங்களிப்பை செய்த திருப்தியையும் இந்த தளம் சேர்த்து வழங்குகிறது.

அந்த வகையில் இணையவாசிகளுக்கு இரட்டிப்பான மனநிறைவை இந்த தளம் தருகிறது என்று கூறலாம்.

———–
link;
www.ephotoframes.co.uk

கையுறைகளை காண வாருங்கள்

அழகான ஒரு கையுறை. அதனை சாலை நடுவிலோ அல்லது வேறு ஏதோ பொது இடத்திலோ பார்க்கிறீர்கள் என்று வைத்துக் கொள்ளுங்கள். உங்களுக்கு என்ன செய்ய தோன்றும்? கையுறையை எடுத்துக் கொள்வீர்களா? அல்லது விட்டுச் செல்வீர்களா? என்று உங்களது நேர்மையை பரிசோதிப்பதற்கான கேள்வி அல்ல இது.
.
இப்போது ஒரே கையுறைக்கு பதிலாக பல கையுறைகள் சிதறிக் கிடக்கும் காட்சியை கற்பனை செய்து பாருங்கள். அப்போது நீங்கள் என்ன செய்வீர்கள்? அமெரிக்க பெண்மணி ஒருவர் இது போன்ற அனுபவத்தை எதிர்கொண்ட போது அவருக்குள் அது மிகப் பெரிய பாதிப்பை ஏற்படுத்தி இணையதளம் ஒன்றையும் அமைக்க வைத்துள்ளது.

அந்த இணையதளம் ஒரு புதுமையான முயற்சியாக அமைந்திருக்கிறது. அந்த இணையதளத்தை பற்றி கேள்விப்பட்டீர்கள் என்றால் நீங்களும் கூட வியந்து போவீர்கள்.
தவற விடப்படும் கையுறைகளை அதன் சொந்தக்காரரிடம் சேர்த்து வைப்பதற்கு வழி செய்யும் இணையதளமாக அது ஏற்படுத்தப்பட்டுள்ளது.

ஒன் கோல்டு ஹான்ட் டாட் காம் எனும் பெயரில் இந்த தளம் அமைக்கப்பட்டுள்ளது. அமெரிக்காவின் டெக்சாஸ் நகரில் வசிக்கும் ஜெனிபர் கூச் எனும் இளம்பெண் இந்த தளத்தை அமைத்திருக்கிறார்.

இந்த தளத்தை அவர் ஏற்படுத்திய கதை மிகவும் சுவாரசியமானது. அவர் அமெரிக்காவின் டன்லாஸ் நகரில் பிறந்து வளர்ந்தவர். அதன் பிறகு டெக்சாஸ் நகருக்கு குடியேறி விட்டார்.
டெக்சாஸ் பகுதியில் உள்ள பிட்ஸ்பர்க் நகரம் பனிப்பொழிவுக்கு பெயர் பெற்றது.

அங்குள்ள மலைச் சரிவுகளில் பனிப்பொழிவு பெய்து பார்ப்பதற்கு ரம்மியமாக இருக்கும். இதனை பார்க்க பல சுற்றுலா பயணிகள் அங்கு வருகை தருவதுண்டு. சமீபத்தில் ஜெனிபர் கூச் இந்த பகுதிக்கு சென்றபோது அவருக்கு மிகவும் வித்தியாசமான அனுபவம் ஏற்பட்டது.

பனிப்பொழிவுக்கு நடுவே அவர் அழகான கையுறையை கண்டார். அந்த கையுறை யாருடையதாக இருக்கும்? யார் அதனை தவற விட்டிருப்பார்கள்? போன்ற எண்ணங்கள் அவருக்கு ஏற்பட்டது.

அதற்குள் அந்த இடத்தில் மேலும் பல அழகான கையுறைகள் அங்கும், இங்குமாக சிதறிக் கிடப்பதை அவர் பார்த்தார். பனி மலையில் இப்படி அங்கும், இங்குமாக கையுறைகள் சிதறி கிடந்தது காண்பதற்கு அழகாக இருந்ததோடு அவரது சிந்தனையையும் உலுக்குவதாக அமைந்திருந்தது.

முதலில் பார்த்த கையுறையை அவர் கையில் எடுக்க முயற்சித்தார். அப்போது அந்த கையுறை யாருடையதாக இருக்கும் என்ற எண்ணம் மீண்டும் ஏற்பட்டது. ஒருவேளை அந்த கையுறையை தவற விட்டவர் அதனை எடுத்துச் செல்ல மீண்டும் வந்தால் என்ன ஆவது என்ற எண்ணமும் அவருள் எழுந்தது. அந்த எண்ணத்துடனேயே அந்த கையுறையை எடுத்துக் கொண்டார்.

ஆனால் அந்த கையுறை இருந்த இடத்தில் ஒரு குறுக்குச் சீட்டை விட்டு வந்தார். அந்த சீட்டில் ஒன் கோல்டு ஹான்ட் டாட் காம் எனும் இணையதள முகவரியை எழுதி வைத்திருந்தார். இப்படித்தான் அந்த இணையதளம் உருவானது.

வீட்டிற்கு வந்ததும் அந்த பெயரில் ஒரு இணையதளத்தை உருவாக்கி அதில் அந்த கையுறையின் புகைப்படத்தையும், அதனை தான் கண்டெடுத்த விவரத்தையும் இடம் பெற செய்தார்.

கையுறைக்கு சொந்தக்காரர் அதனை பெற்றுக் கொள்ளலாம் என்றும் அவர் தெரிவித்திருந்தார். இப்படியாக அங்கே கண்டெடுத்த மற்ற கையுறைகளையும் புகைப்படத்தோடு தளத்தில் இடம் பெற வைத்தார். கையுறைகளை கண்டெடுத்த இடம் மற்றும் அவற்றின் நிலை குறித்தும் அவர் சிறு குறிப்பும் எழுதியிருந்தார்.

கையுறைகளை தவற விட்டவர்கள் இந்த தளத்தின் மூலமாக அவற்றை திரும்ப பெற்றுக் கொள்ள வேண்டும் என்பது அவரது விருப்பம். இதுவரை ஒருவர் கூட கையுறையை கேட்டு வரவில்லை என்றாலும், இந்த தளம் இணையவாசிகளின் கவனத்தை மிகவும் ஈர்த்திருக்கிறது. பலர் இதனை பாராட்டத்தக்க முயற்சி என்று வர்ணித்துள்ளனர்.

கையுறைகளின் புகைப்படங்கள் மற்றும் அவை கண்டெடுத்த காட்சி பற்றிய குறிப்புகள், படிப்பதற்கு சுவாரசியமாக இருக்கின்றன. மேலும் ஒருவர் தவற விட்ட பொருள் அவரை சென்றடைய வேண்டும் எனும் விருப்பம் மற்றும் அதற்கான அக்கறையும் பலரை கவர்ந்துள்ளது.

இதனையடுத்து ஜெனிபர் கூச், அந்த நகரம் முழுவதும் கையுறைகளை சேமிப்பதற்கான பெட்டிகளை வைப்பது பற்றி யோசித்து வருகிறார். அது மட்டுமல்லாமல் அமெரிக்காவின் மற்ற நகரங்களிலும் இத்தகைய தளங்கள் அமைக்கப்பட வேண்டும் என்று அவர் விரும்புகிறார்.

ஏற்கனவே நியூயார்க் நகருக்கு இது போன்ற தளம் ஒன்றை அமைக்க விரும்புவதாக பெண்மணி ஒருவர் அவரிடம் கூறியுள்ளார். அமெரிக்கா மட்டுமல்ல மற்ற நாடுகளிலும், இது போன்ற இணையதளங்கள் அமைக்கப்பட வேண்டும் என்றும் அவர் விரும்புகிறார்.
———–
link;www.onecoldhand.com