Category Archives: டிவிட்டர்

டிவிட்டரில் அறிமுகமாகும் விஞ்ஞானிகள்!

actuallivingscientists.0முதலில் சின்னதாக ஒரு சவால்- உலகின் சிறந்த வாழும் விஞ்ஞானிகளில் எத்தனை பேரை உங்களுக்குத் தெரியும்? நன்றாக யோசித்துப்பார்த்தும், ஒருவர் பெயர் கூட உங்களுக்கு நினைவுக்கு வரவில்லை எனில் உங்களை நீங்களே நொந்துக்கொள்ள வேண்டாம். ஏனெனில், உலகில் பெரும்பாலானோர் இப்படி சமகால விஞ்ஞானிகளை அறியாதவர்களாக தான் இருக்கின்றனர். அமெரிக்காவில் சில ஆண்டுகளுக்கு முன்னர் நடத்தப்பட்ட கருத்துக்கணிப்பில், 70 சதவீதம் பேரால் வாழும் விஞ்ஞானி ஒருவரை நினைவுபடுத்திக்கூற முடியவில்லை என தெரிய வந்துள்ளது. இது கொஞ்சம் வருத்தம் தரும் விஷயம் தான்.

விஞ்ஞானமும், தொழில்நுட்பமும் வியக்கத்தக்க வகையில் வளர்ச்சி அடைந்திருக்கும் காலத்தில், அறிவியலுக்காக என்றே தங்களை அரபணித்துக்கொண்டுள்ள சமகால விஞ்ஞானிகள் குறித்து நாம் அதிகம் அறியாமல் இருப்பது கவலை அளிப்பது தான். பாப் நட்சத்திரங்களையும் திரையுலக பிரமுகர்களையும் நன்கு அறிந்து வைத்திருக்கும் நாம், சமகால விஞ்ஞானிகள் குறித்து அதிக விழிப்புணர்வு பெறாமல் இருப்பது ஏன்? இதற்கு பல காரணங்கள் இருக்கலாம். ஆனால் விஞ்ஞானிகள், அதிக அளவு தங்களை வெளிப்படுத்திக்கொள்வதில்லை என நினைத்தால் அதை மாற்றிக்கொள்ளுங்கள். உண்மையில், விஞ்ஞானிகள் பலவிதங்களில் தங்களை வெளிப்படுத்திக்கொண்டு வருகின்றனர். மற்ற பிரபலங்கள் போல அவர்கள் டிவிட்டர் உள்ளிட்ட சமூக ஊடகங்களிலும் சுறுசுறுப்பாக செயல்பட்டு வருகின்றனர். இவ்வளவு ஏன் டிவிட்டர் விஞ்ஞானிகள் என்று சொல்லகூடிய அளவுக்கு பல விஞ்ஞானிகள் டிவிட்டர் மூலம் தங்கள் ஆய்வுகள் குறித்து சுவாரஸ்யமான தகவல்களை தொடர்ந்து பகிர்ந்து கொண்டு வருகின்றனர்.

அன்மையில் இந்த விஞ்ஞானிகள் இன்னும் ஒரு படி இறங்கு வந்து, தங்களை தாங்களே டிவிட்டரில் அறிமுகம் செய்து கொண்டு, இணையவாசிகளின் கவனத்தை ஈர்க்க முயன்றிருக்கின்றனர். டிவிட்டரில் கவனத்தை ஈர்க்க சிறந்த அ வழியாக கருதப்படும், ஹாஷ்டேக்கை இதற்காக பயன்படுத்திக்கொண்டுள்ளனர். உண்மையில் வாழும் விஞ்ஞானிகள் என பொருள்படும் வகையில் உருவாக்கப்பட்ட ’# ஆக்சுவல் லிவிங் சயிண்டிஸ்ட்’  (#actuallivingscientist) என்பது தான் அந்த ஹாஷ்டேக்!

டிவிட்டரில் செயல்பட்டு வரும் விஞ்ஞானிகள் பலரும், இந்த ஹாஷ்டேகுடன் குறும்பதிவை வெளியிட்டு தங்களை அறிமுகம் செய்து கொண்டுள்ளனர்.

அமெரிக்கா விஞ்ஞானியான டேவிட் ஸ்டீன் தான் முதலில் இதை துவக்கி வைத்தார். வனவிலங்கு பல்லுயிரியல் விஞ்ஞானியான ஸ்டீன் தனது டிவிட்டர் பக்கத்தில் (@AlongsideWild) , பெரும்பாலான அமெரிக்கர்களால் வாழும் விஞ்ஞானிகள் பெயர் சொல்ல முடியவில்லை,( இது உண்மை தான்), எனவே அவர்கள் நாம் செய்வதன் முழு அருமையை உணராமல் இருப்பதில் வியப்பில்லை எனக்கூறி, ’நான் தான் டேவ்’ என்றும் குறிப்பிட்டிருந்தார். ஸ்டீன் டிவிட்டர் பக்கம் தவிர தனி வலைப்பதிவு மூலமும் தனது ஆய்வு பணிகள் தொடர்பான விவரங்களை பகிர்ந்து கொண்டு வருகிறார்: https://davidasteen.com/

ஸ்டீனின் இந்த குறும்பதிவை பார்த்த சக விஞ்ஞானி மேர் ராப்யர் என்பவர், அவருக்கு பதில் அளிக்கும் வகையில் இரு குறும்பதிவை வெளியிட்டார். சரி தான் டேவி, விஞ்ஞானிகள், ஒரு ஒளிப்படத்துடன் தங்களை அறிமுகம் செய்து கொள்வதற்கான சரியான சந்தர்ப்பமாக இது இருக்கும் எனும் வகையில் அவரது குறும்பதிவு அமைந்திருந்தது. இந்த குறும்பதிவுடன் ’# ஆக்சுவல் லிவிங் சயிண்டிஸ்ட்’ எனும் ஹாஷ்டேகையும் இடம்பெறச்செய்திருந்தார்.

விஞ்ஞானிகள், மக்கள் முன் நம்மை நாமே அறிமுகம் செய்து கொள்வோமே என்பது போல அந்த குறும்பதிவு விடுத்த அழைப்பை ஏற்றுக்கொண்டு டிவிட்டரில் செயல்பட்டு வரும் விஞ்ஞானிகள், தங்கள் தாங்களே அறிமுகம் செய்து கொள்ளத்துவங்கினர். மறக்காமல் இந்த ஹாஷ்டேகையும் சேர்த்துக்கொண்டனர். இந்த ஹாஷ்டேக் உயிர்ப்புடன் இருப்பதும், அதன் மூலம் அறிமுகமாகும் விஞ்ஞானிகளின் தொடர் வரிசையும் வியக்க வைப்பதாக இருக்கிறது.

ஸ்டீன் உள்ளிட்ட விஞ்ஞானிகள் இந்த குறும்பதிவு அலையால் உற்சாகம் அடைந்து, இவற்றை தங்கள் பக்கங்களில் மறு குறும்பதிவிட்டும் வருகின்றனர். பெண் விஞ்ஞானிகள் , வுமன் இன் சயின்ஸ், டிரெஸ் லைக் ஏ வுமன் போன்ற துணை ஹாஷ்டேகுகளையும் சேர்த்து பகிர்ந்து கொள்கின்றனர்.

மாதிரிக்கு சில குறும்பதிவுகளை காணலாம்:

·         நான். டிஎன் லீ. நகர்புற காரணிகளுக்கு மத்தியில் சிறிய பாலூட்டிகளின் பழக்கங்கள் மற்றும் வரலாற்றை ஆய்வு செய்கிறேன்:  @DNLee5

·         நான் ஜேன் ஜேக். மனிதர்கள் அதிகம் உள்ள சூழலில் அழியும் நிலையில் உள்ள கழுகுகள் எப்படி வாழ்கின்றன என ஆய்வு செய்கிறேன்; @janetngbio

·         நான் ரச்சேல். தேனீக்கள் தொடர்பாக ஆய்வு செய்கிறேன்… @RachaelEBee

·         நான் மெசிடஸ், இனப்பெருக்க அமைப்பு குறித்து ஆய்வு செய்து வருகிறேன்: @DrCedes

இப்படி தொடர்ச்சியாக விஞ்ஞானிகள், வாழும் விஞ்ஞானிகள் ஹாஷ்டேகை அடையாளப்படுத்தி தாங்கள் செய்து கொண்டிருக்கும் பணி தொடர்பான தகவல்களை குறும்பதிவுகளாக வெளியிட்டுள்ளனர். இந்த ஹாஷ்டேகின் கீழ், வந்து கைகுலுக்கும் விஞ்ஞானிகள் மற்றும் அவர்கள் ஆய்வின் பரப்பையும் பார்த்தால் வியப்பாகவே இருக்கிறது. அவர்கள் ஆய்வு சூழல் மாறுபட்டிருப்பதை ஒளிப்படங்கள் அழகாக உணர்த்துகின்றன.

இந்த விஞ்ஞானிகளின் குறும்பதிவுகளை படித்துப்பார்த்தால் அவர்கள் ஈடுபட்டுள்ள ஆய்வுகள் குறித்த சுவாரஸ்யமான தகவல்களையும் தெரிந்து கொள்ள முடிகிறது. உங்களுக்கும் அறிவியலில் ஆர்வம் இருந்தால் இந்த ஹாஷ்டேகை பற்றிக்கொண்டு சுவாரஸ்யமான பல விஞ்ஞானிகளை டிவிட்டரில் பின் தொடரலாம். சமூக ஊடக யுகத்தில் மக்களுடன் ஆய்வு தகவல்களை பகிர்ந்து கொள்வதே சரியாக இருக்கும் என விஞ்ஞானிகள் புரிந்து கொண்டிருக்கின்றனர். இப்போது நாம் தான் பதிலுக்கு அவர்களுக்கு மரியாதை செய்ய வேண்டும். அதாவது அவர்களை டிவிட்டர் பக்கங்களை பின் தொடர்ந்து ஆய்வுப்பணிகளை அறிந்து கொள்ள வேண்டாம். சந்தேகங்களை கேள்விகளாக கேட்டு உரையாடினால் இன்னும் கூட சந்தோஷப்படுவார்கள்.

குறிப்பாக வீட்டில் படிக்கும் பிள்ளைகள் இருந்தால் இந்த டிவிட்டர் பக்கங்களையும் படிக்கச்சொல்லி அறிமுகம் செய்யலாம்.  அறிவியல் மீது ஆர்வத்தை வளர்க்க இது நிச்சயம் உதவும்.

டிவிட்டரில் விஞ்ஞானிகளை பின் தொடர்வதில் ஆர்வம் உள்ளவர்களின் வசதிக்காக சயின்ஸ் மேகஜின் , டிவிட்டர் நட்சத்திரங்களாக விளங்கும் விஞ்ஞானிகள் பட்டியலையும் வெளியிட்டுள்ளது: http://www.sciencemag.org/news/2014/09/top-50-science-stars-twitter

 

 

 

அறிமுகம்: டிவிட்டர் அகராதி

2013_11_07_13_twitternail.122adசமூக வலைப்பின்னல் சேவைகளில் குறும்பதிவு சேவையான டிவிட்டர் பிரபலமானதாக இருக்கிறது. 140 எழுத்துகளுக்குள் கருத்துக்களை பகிர்ந்து கொள்ள வழி செய்யும் டிவிட்டர் பலவிதங்களில் பயன்படுகிறது. டிவிட்டர் பயனாளிகளுக்கு அதின் சூட்சமங்கள் எல்லாம் அத்துபடியாக இருக்கலாம். ஆனால் டிவிட்டர் மீது ஆர்வம் கொண்ட பலருக்கு அது புரிபடாமல் இருக்கலாம். டிவீட், ரிடிவீட், பாலோ போன்ற பதங்கள் குழப்பத்தை அளிக்கலாம்.
இத்தகைய குழப்பங்களை போக்கி, டிவிட்டர் சேவையை புரிந்து கொள்ள டிவிட்டரில் பயன்படுத்தப்படும் முக்கிய அம்சங்கள் தொடர்பான பதங்களை அறிந்து கொள்ள வேண்டும். இதற்கான டிவிட்டர் அகராதி இதோ:

டிவீட்; குறும்பதிவு என்று பொருள். டிவிட்டரில் பயனாளிகள் பகிர்ந்து கொள்ளும் கருத்துக்கள். பெரும்பாலும் ஒற்றை வரியாக இருக்கும். அதிக பட்சம் 140 எழுத்து வரம்பு உண்டு. சாமர்த்தியம் இருந்தால் சிறிய வாசங்களாக அமைக்கலாம்.
இவற்றுடன் புகைப்படம் மற்றும் இணைப்புகளையும் பகிர்ந்து கொள்ளலாம்.

ரிடிவீட்; மறு குறும்பதிவு என பொருள். ஒருவர் வெளியிடும் குறும்பதிவு சக பயனாளி ஒருவருக்கு பிடித்திருந்தால் அதை அவர் தனது டிவிட்டர் பக்கத்தில் வெளியிடலாம். இதற்கான வசதி தான் ரிடிவீட்.
ரிடிவீட் என்பது ஒரு கருத்திற்கான ஆதரவாகவும் கொள்ளலாம்.
பொதுவாக அதிக முறை ரிடிவீட் செய்யப்பட்டால் அந்த கருத்துக்கு அமோக ஆதரவு என பொருள்.

பாலோ: பேஸ்புக்கில் நண்பர்கள் போல டிவிட்டரில் பாலோயர்கள். அதாவது ஒருவரது டிவிட்டர் பக்கத்தில் வெளியாகும் கருத்துக்கள் பிடித்திருந்தால், அவரது பக்கத்தை பின் தொடரலாம். இதன் மூலம் அவரது டிவிட்டர் பக்கத்திறு செல்லாமலே , அவர் வெளியிடும் குறும்பதிவுகளை நம்முடைய டிவிட்டர் பக்கத்தில் பார்க்கலாம்.

ஹாண்டில்; டிவிட்டர் கைப்பிடி என்பது ஒருவரது டிவிட்டர் முகவரியை குறிக்கும். அதாவது டிவிட்டர் கணக்கை இயக்க தேர்வு செய்யப்படும் பயனர் பெயர்.

டைம்லைன்; குறும்பதிவுகளின் வரிசை. நம்முடைய குறும்பதிவுகள் மற்றும் நாம் பின் தொடர்பவர்கள் வெளியிடும் குறும்பதிவுகள் வரிசையாக நம்முடைய டிவிட்டர் முகப்பு பக்கத்தில் பார்க்கலாம்.

மென்ஷன் (@) : குறும்பதிவில் குறிப்பிட்ட ஒரு டிவிட்டர் பயனாளியை சுட்டிக்காட்ட, அவரது டிவிட்டர் பெயரை @ எனும் குறியீட்டுடன் பயன்படுத்தலாம். இந்த தகவல் உடனே அவருக்கு தெரிவிக்கப்படும். டிவிட்டரில் உரையாடலுக்கான வழி இது.

ரிப்ளை; ஒரு பயனாளியின் பெயர் குறிப்பிடப்பட்ட தகவலுக்கு அவர் அளிக்கும் பதில்.

டைரக்ட் மெசேஜ்; டிவிட்டர் பிரதான பக்கத்தில் வெளியிடும் கருத்துக்களை எல்லோரும் பார்க்கலாம். ஆனால் சில கருத்துக்களை தனிப்பட முறையில் பகிரும் தேவை ஏற்படலாம். இது போன்ற சக பயனாளிகளுக்கு நேரடியாக தகவல் அனுப்ப நேரடி செய்தி வசதி பயன்படுகிறது. இதே முறையில் அவர் பதில் அளிக்கலாம். இந்த இரு தரப்பினர் மட்டுமே இதை பார்க்க இயலும்.

ஹாஷ்டெக்; (#) டிவிட்டர் சேவையின் மிகப்பெரிய ஆயுதம். போராட்டங்களுக்கும், புரட்சிகளுக்கும் கைகொடுத்திருக்கும் அடையாள சின்னம்.
டிவிட்டரில் எண்ணற்ற குறும்பதிவுகள் வெளியாகி கொண்டிருக்கின்றன. அவை கடலில் கரைத்த பெருங்காயமாக மறையலாம். இதை தவிர்க்க ஒரே தலைப்பு அல்லது ஒரே பொருளில் அமைந்த குறும்பதிவுகளை ஒன்றாக பார்க்க வசதியாக உருவாக்கப்படும் குறிச்சொல் தான் ஹாஷ்டேக்.
குறிப்பிட்ட தலைப்பிலான பதிவுகளி அதற்கான ஹாஷ்டேகுடன் பகிர்ந்து கொண்டால் அவை அனைத்தையும் ஒரே இடத்தில் பார்க்கலாம்.
சென்னை மழையின் போது உதவிகளை ஒருங்கிணைக்க சென்னை ரைன்ஸ் போன்ற ஹாஷ்டேக் உருவாக்கப்பட்டன.
நாம் விரும்பிய ஹாஷ்டேகை உருவாக்கலாம். மற்றவர்கள் உருவாக்கும் ஹாஷ்டேகிலும் இணையலாம்

நோட்டிபிகேஷன்; டிவிட்டர் கணக்கு தொடர்பான தகவல்களை பெறும் வழி. நம்முடைய பதிவுகள் பிற இடத்தில் குறிப்பிடப்பட்டால், அல்லது மறு குறும்பதிவிடப்பட்டால் நோட்டிபிகேஷன் மூலம் அதற்கான தகவலை பெறலாம்.

ஹார்ட்; ஒரு குறும்பதிவை விரும்பு வசதி. பேஸ்புக்கின் லைக் போல.

பின்ட் டிவீட்; குறிப்பிட்ட முக்கியமான டிவீட்டை குத்தி வைக்கும் வசதி. இந்த குறும்பதிவு எப்போதும் முதல் இடத்தில் இருந்து வரவேற்கும்.

பயோ; டிவிட்டர் பயனாளி பற்றிய அறிமுகம் குறிப்பு. நீங்கள் யார், எதற்காக குறும்பதிவிடுகிறீர்கள் என்பதை உணர்த்தும் பகுதி. கவித்துவமான பயோக்களை டிவிட்டரில் பார்க்கலாம்.

டிரெண்ட்; டிவிட்டரில் அதிக கவனத்தை ஈர்க்கும் குறும்பதிவுகளின் தலைப்புகள். டிவிட்டரில் அதிகம் விவாதிக்கப்படும் கருத்துகளை அறிய உதவுவது.

புரோமோடட் டிவீட்ஸ்; டிவிட்டரின் விளம்பர குறும்பதிவுகள்.

( இணையம் தொடர்பான விஷயங்களின் அடிப்படையை அறிமுகம் செய்யும் முயற்சியில் அடுத்த பகுதி- அன்புடன் சிம்மன் )

டிவிட்டர் ஒரு அறிமுகம்: http://cybersimman.com/2009/08/26/twitter-26/

டிவிட்டருக்கு வயது பத்து!

சமூக வலைப்பின்னல் சேவைகளில் ஒன்றான டிவிட்டர் பத்தாண்டுகளை நிறைவு செய்திருக்கிறது. 2006 ம் ஆண்டு மார்ச் மாதம் உதயமாகி , அதே ஆண்டு ஜூலை மாதம் அதிகாரபூர்வமாக அறிமுகமான டிவிட்டர் அதன் பிறகு தனது வளர்ச்சிப்பாதையில் எத்தனையோ மைல்கற்களையும், மாற்றங்களையும் சந்தித்துள்ளது.

ஆனால் இவற்றை எல்லாம் விட முக்கியமானவை டிவிட்டர் குறும்பதிவு சேவையாக தன்னை உருமாற்றிக்கொண்டு வந்துள்ள விதம். 140 எழுத்துக்களுக்குள் நிலைத்தகவல்கள் பகிர்வுக்கான சாதனமாக டிவிட்டர் புகழ்பெற்றிருந்தாலும் டிவிட்டரின் துவக்கப்புள்ளி ஆச்சர்யமானது.

டிவிட்டர் உண்மையில் ஒரு உப சேவையாக கிளத்து வளர்ந்தது. ஓடியோ எனும் நிறுவனம் தான் அதன் மூலவேர். பாட்காஸ்டிங் சேவைக்கான இந்த நிறுவனத்திற்கான முயற்சியில் ஈடுபட்டிருந்த போது தான் அதன் நிறுவனர்களான ஜேட் டோர்சே, இவான் வில்லிமஸ் ( பிலாகர் நிறுவனர்) மற்றும் பிஸ் ஸ்டோன் ஆகியோர் டிவிட்டர் சேவை பற்றி ஆலோசித்தனர்.

எஸ்.எம்.எஸ் எனப்படும் குறுஞ்செய்திகள் பிரபலமாக இருந்த கால கட்டம் அது. அப்போது தனிநபர்கள் குழுவினருக்கு குறுஞ்செய்தி அனுப்பும் வசதியாகவே டிவிட்டர் முன்வைக்கப்பட்டது.

அதன் பிறகு தனிநபர்கள் நிலைத்தகவலை தங்கள் வட்டத்திற்குள் பகிர்ந்து கொள்ளும் சேவையாக அறியப்பட்டது.
”நான் இப்போது என்ன செய்து கொண்டிருக்கிறேன்” எனும் தகவலை பகிர்ந்து கொள்ள வழி செய்த டிவிட்டர், இது போன்ற தகவல்களிலும் எல்லாம் யாருக்கு ஆர்வம் இருக்கும் என்ற விமர்சனங்களை மீறி பயனாளிகளை கவர்ந்தது. அதன் பிறகு செய்திகளை பகிர்ந்து கொள்வதற்கான சாதனமாக டிவிட்டர் உருவெடுத்து மெல்ல விஸ்வரூப வளர்ச்சி அடைந்தது.

பூகம்பம் போன்ற நிகழ்வுகளை உடனடியாக பகிர உதவியது, விபத்துகளின் போது தகவல் அளிக்க செய்தது போன்றவை பிரபலமாக்கிய டிவிட்டர் சேவையை, எகிப்து உள்ளிட்ட நாடுகளில் புரட்சி வெடித்த போது மக்கள் உணர்வுகளை பகிர உதவும் சாதனமாகவும் புகழ்பெற வைத்தது.

டிவிட்டர் வளர்ச்சியில் மற்றொரு முக்கியமான விஷயம் அதன் ஆதார அம்சங்களான @ மூலம் பதில் அளிக்கு வசதி, ஒரு அலையென குறும்பதிவுகளை ஒற்றை தலைப்பின் கீழ் உருப்பெறச்செய்யும் ஆற்றலை தரும் ஹாஷ்டேக் வசதி மற்றும் ஒரு குறும்பதிவை நூறு குறும்பதுவுகளாக விஸ்வரூபம் எடுக்கச்செய்யும் ரிடிவீட் வசதி ஆகிய அம்சங்கள் அதன் பயனாளிகளால் முன்வைக்கப்பட்டு ஏற்றுக்கொள்ளப்பட்டவையாகும்!.
@ மூலம் பதில் அளிக்கும் வசதியை முன்வைத்தவர்

டிவிட்டர் தோற்றம் பற்றி இன்னொரு சுவாரஸ்யமான விஷயம் அதன் ஆரம்ப பெயர் டிவிட்ராகவே (twttr) இருந்தது. அந்த கால கட்டத்தில் பிரபலமாக இருந்த பிளிக்கர் (Flickr )சேவையின் தாக்கம் என்று வைத்துக்கொள்ளுங்களேன். அதோடு அப்போது டிவிட்டர்.காம் எனும் முகவரியும் பதிவு செய்யப்பட்டிருந்தது. ஆறு மாதங்கள் கழித்து அந்த முகவரியை வாங்கிய பிறகே டிவிட்டர் என பெயர் மாற்றப்பட்டது.

———

தளம் புதிது; டிஜிட்டல் நாகரீகம்

இமெயில் நாகரீகம் ,செல்போன் நாகரீகம் பற்றி எல்லாம் ஒரு காலத்தில் பிரபலமாக பேசப்பட்டது உங்களுக்கு நினைவிருக்கலாம். இமெயில் மற்றும் செல்போன் பயன்பாட்டில் செய்யக்கூடியவை மற்றும் செய்யக்கூடாதவை பற்றிய விதிகள் இவ்வாறு நினைவுபடுத்தப்பட்டன. அதிலும் குறிப்பாக பொதுவெளியில் இவற்றை கடைபிடிப்பது முக்கியம் என கருதப்பட்டது.

இவை பழைய சங்கதி என ஆகிவிட்டாலும் அடிப்படையானவை என்பதை மறுப்பதற்கில்லை.
இந்நிலையில், இன்றைய தொழில்நுட்பம் மட்டும் அல்லாமல் வருங்கால தொழில்நுட்பங்களை பயன்படுத்தும் போது பின்பற்ற வேண்டிய பொது விதிகளை எட்டிக்.இயே தளம் பரிந்துரைக்கிறது.

நகைச்சுவை மிளர, பொருத்தமான கார்ட்டூன் சித்திரங்களும் இந்த விதிகள் அளிக்கப்பட்டுள்ளன.
படித்து விட்டு ரசிக்கவும் செய்யலாம். சிந்திக்கவும் செய்யலாம்.

ஸ்மார்ட்போன் முதல் ட்ரோன்கள் வரை பல வித தொழில்நுட்பங்களை வரையான ஆலோசனைகள் உள்ளன. ஸ்மார்ட்போன் பயன்பாட்டு குறிப்புகள் தாக் ஆகச்சிறந்தவையாக இருக்கின்றன.

வெளிச்சம் குறைவான பகுதி என்றால் போனை இயக்குவதற்கு முன் அதன் பின்னணி ஒளியை குறைக்கவும் மற்றும் உரையாடலின் போது போனில் நோட்டிபிகேஷன் வந்தால் , பேசிக்கொண்டிருப்பவர் முடிக்கும் வரையாவது காத்திருந்து அதை பார்க்கவும் போன்ற குறிப்புகள் அலட்சியம் செய்ய முடியாதவை.

——-

செயலி புதிது; பாரம்பரியம் காப்போம்

நாட்டில் உள்ள முக்கிய நினைவுச்சின்னங்களை பராமரிப்பதும், பேணிக்காப்பதும் அரசின் கடமை மட்டும் அல்ல; பொதுமக்களுக்கும் அந்த பொறுப்பு இருக்கிறது. பாரம்பரிய சின்னங்களை பாதுகாப்பதில் மக்களும் அரசுக்கு உதவும் வகையில் சுற்றுலாத்துறை அமைச்சகம் ஸ்வச் பர்வர்த்தன் எனும் செயலியை அறிமுகம் செய்துள்ளது.

இந்த செயலி மூலம் பொது மக்கள் மற்றும் சுற்றுலா பயணிகள் தாஜ்மகால் உள்ளிட்ட பாரம்பரிய சின்னங்களைச்சுற்று உள்ள குப்பைகள், அசுத்தங்கள் மற்றும் பிற பாதிப்புகள் பற்றி புகைப்படத்துடன் புகார் தெரிவிக்கலாம். இவை அதற்குறிய அகராதிக்கு அனுப்பி வைக்கப்பட்டு உரிய நடவடிக்கை எடுக்கப்படும். தொல்லியல் துறை கட்டுபபாட்டில் உள்ளவற்றில் 25 பாரம்பரிய சின்னங்கள் முதல் கட்டமாக இந்த பட்டியலில் இடம்பெற்றுள்ளன. இவை மெல்ல விரிவாக்கம் செய்யப்பட உள்ளன.

தரவிறக்கம் செய்ய; https://play.google.com/store/apps/details?id=in.org.degs.swachhparyatanapp&hl=en

——-

விடியோ புதிது; விஞ்ஞானம் அழைக்கிறது

இணையத்தில் கல்வி சார்ந்த மற்றும் அறிவியல் சார்ந்த வீடியோக்கள் கொட்டிக்கிடக்கின்றன என்பது தெரிந்த விஷயம் தான். இவற்றை தேடித்தரும் தளங்களும் இருக்கின்றன. இதே போல கம்ப்யூட்டர் அறிவியல் சார்ந்த வீடியோக்கள் மற்றும் காட்சி விளக்கங்களை காண விரும்பினால் அவற்றை தேடி அலையாமல் ஒரே இடத்தில் தொகுத்து அளிக்கிறது சி.எஸ்.வீடியோலக்சர்ஸ் இணையதளம்.

பல்கலைக்கழகங்கள் போன்ற அமைப்புகளில் இருந்து எடுக்கப்பட்ட வீடியோக்களை இதில் பார்க்கலாம். அல்கோரிதம், கம்ப்யூட்டர் சிஸ்டம், டேட்டா, செயற்கை அறிவு என பலவித பதங்கள் தொடர்பான வீடியோக்கள், காட்சி விளக்கங்கள், பிடிஎப் வழிகாட்டிகள் ஆகியவற்றை காணலாம். கம்ப்யூட்டர் அறிவியல் தொடர்பான பாட திட்டங்களை தேடிக்கொண்டிருப்பவர்களுக்கு அதிகம் பயனுள்ளதாக இருக்கும்.

இணைய முகவரி; http://csvideolectures.com/

டிவிட்டர் வழியே ஒரு புதுமையான முறையீடு

comவர்த்தக நிறுவனங்களின் மோசமான சேவைக்கு எதிராக டிவிட்டரை பயன்படுத்துவது வழக்கமான உத்தி தான்.சொல்லப்போனால் குறும்பதிவு சேவையான டிவிட்டர் பிரபலமானதில், நுகர்வோர் குரலாக அது பயன்படும் விதமும் ஒரு முக்கிய காரணம்.விமான பயணிகளில் துவங்கி பல வகையான நுகர்வோர் மோசமான சேவை குறித்த அதிருப்தியை டிவிட்டரில் வெளிப்படுத்து வர்த்தக நிறுவனங்களை வழிக்கு கொண்டு வர முடியும் என உணர்த்தியுள்ளனர்.

சில மாதங்களுக்கு முன் முன்னால் இந்திய கிரிக்கெட் வீரர் சச்சின் டெண்டுல்கர்,பிரிட்டிஷ் ஏர்வேஸ் விமான சேவை நிறுவனம் தனது லக்கேஜை சரியாக கையாளத்தவறியது குறித்து டிவிட்டரில் முறையிட்ட சம்பவமும் அதனால் ஏற்பட்ட விளைவும் உங்களுக்கு நினைவிருக்கலாம். ஏர்வேஸ் தரப்பில் , உங்கள் முழுபெயரையும் தெரிவித்தால் என்னவென்று கவனிக்கிறோம் என டிவிட்டரில் பதில் சொல்லப்பட,சச்சினை தெரியவில்லையா? என டிவிட்டரில் அவரது ரசிகர்கள் பொங்கியெழுந்து பிரிட்டிஷ் ஏர்வேசை ஒருவழி செய்துவிட்டனர்.

இது கொஞ்சம் பழைய கதை.இது போன்ற நிறைய கதைகள் உள்ளன. இப்போது லேட்டஸ்ட் கதையை பார்ப்போம்.
அமெரிக்காவின் இணைய சேவை வாடிக்கையாளர் ஒருவர் அந்நாட்டின் இணைய சேவை நிறுவனமான காம்கேஸ்ட்டிற்கு எதிராக டிவிட்டரில் புகாரை தெறிக்கவிட்டிருக்கிறார். அலெக்சே எனும் பெயர் கொண்ட அந்த வாடிக்கையாளர் தனது புகாரை தானியங்கிமயமாக்கியிருப்பதும் அதற்காக என்றே தனியே ஒரு டிவிட்டர் கணக்கை துவக்கியிருப்பதும் தான் கவனிக்க வேண்டிய விஷயமாக இருக்கிறது.

இணையத்தில் புழங்குபவர்களுக்கு இணைய சேவை நிறுவனமான காம்கேஸ்டிற்கு வாடிக்கையாளர்கள் மத்தியில் அத்தனை நல்ல பெயர் இல்லை என்பதை கவனித்திருக்கலாம்.நுகர்வோர் அடிக்கடி காம்கேஸ்ட்டுடன் மல்லுக்கட்டு தொடர்பான செய்திகளை பார்க்கலாம்.விளம்பரத்தில் அது சொல்வது ஒன்றாகவும் ஆனால் வழங்கும் சேவை அதற்கு மாறாக இருப்பதால் ஏற்படும் ஏமாற்றம் அல்லது அதிருப்தி இதற்கு காரணமாக இருப்பதையும் உணரலாம்.

ரெட்டிட் பயனாளியான அலெக்சேவும் இப்படி தான் ஏமாற்றத்திற்கு இலக்கானார். நிறுவனத்திடம் இருந்து அவர் பெற்ற இணைய இணைப்பின் வேகம் 150 எம்பிஎஸ் என்று சொல்லப்பட்டிருக்கிறது. ஆனால் பலமுறை இணைய இணைப்பு மந்தமாகி அதன் வேகம் 50 எம்பிஎஸ்-க்கும் குறைவாக இருப்பதாக அலெக்ஸே உணர்ந்திருக்கிறார்.
இதனால் நொந்து போனவர் காம்கேஸ்ட்டிடம் டிவிட்டர் வழியே முறையிட தீர்மானித்தார்.

ஆனால் பலரும் எதிர்பார்க்ககூடியது போல, எனது இணைய சேவை மோசம் என ஒரு குறும்பதிவுடன் புகார் செய்வதோடு அவர் நிறுத்திக்கொள்ளவில்லை.
மாறாக இதற்காக என்றே ஒரு டிவிட்டர் கணக்கை உருவாக்கினார். அதற்கு முன்பாக தன்னிடம் இருந்த ராஸ்பெரி பை கம்ப்யூட்டர் உதவியுடன் சின்னதாக ஒரு புரோகிராம் எழுதினார்.

எப்பொழுதெல்லாம், அவரது இணைய இணைப்பின் வேகம் 50 எம்பிஎஸ்-க்கு குறைவாக செல்கிறதோ அப்போதெல்லாம் அதை கவனித்து தெரிவிக்கும் வகையில் அந்த புரோகிராம் அமைந்திருந்தது. இதற்காக அந்த புரோகிராம் அடிகக்டி வேகப்பரிசோதனையை நடத்திக்கொண்டிருக்கும். வேகம் குறைவது நிகழும் ஒவ்வொரு முறையும், டிவிட்டரில் இது பற்றி முறையீடு செய்யும் வகையில் தானியங்கி புரோகிராம் ஒன்றையும் எழுதினார்.
ஆக, இந்த டிவிட்டர் பாட், காம்கேஸ்ட் இணைய இணைப்பின் வேகம் குறையும் போதெல்லாம் அதை டிவிட்டர் பக்கத்தில் குறும்பதிவாக வெளியிடும்.

காம்காஸ்ட் நிறுவனமே, நான் 150 எம்பிஎஸ் வேகத்திற்கு கட்டணம் செலுத்தும் போது, அதன் வேகம் 18 எம்பிஎஸ்சாக குறைந்தால் எப்படி என கேட்பது போல அந்த குறும்பதிவுகள் அமைகின்றன.
இந்த புதுமையான முறையீடு பற்றிய விவரத்தை ரெட்டிட் இணையதளம் மூலம் பகிர்ந்து கொண்டு கவனத்தை ஈர்த்துள்ளார்.

காம்கேஸ்ட் சேவைக்கு எதிராக புகார் செய்வதற்காகவே அவட் ஒரு டிவிட்டர் கணக்கை துவக்கி அந்த பணியை திறம்பட செய்து முடிக்க டிவிட்டர் பாட் ஒன்றையும் உருவாக்கி இருப்பது பல நுகர்வோரை சபாஷ் போட வைத்துள்ளது.

இதில் இன்னொரு முக்கியமான விஷயம் என்ன என்றால், அலெக்சே டிவிட்டர் பக்கத்தில் தான் யார் என்பதை வெளிப்படுத்திக்கொள்ளவில்லை. முறையீடு செய்யும் ஒவ்வொரு முறையும் தான் யார் என்பதை காம்கேஸ்ட்டிற்கு தெரியாமல் இருக்க வேண்டும் என்கிறார் அவர். ஏனெனில் இந்த முறையீட்டின் பலன் தனக்கு மட்டும் கிடைக்காமல், மோசமான சேவையால் அவதிப்படும் ஒவ்வொரு காம்கேஸ்ட் பயனாளிக்கும் கிடைக்க வேண்டும் என்கிறார். அதனால் தான் நான் ஒரு காம்கேஸ் பயனாளி எனும் பெயரில் அந்த பக்கத்தை அமைத்திருக்கிறார்.

எப்படி இருக்கிறது இந்த இணைய போராட்டம்!

காம்காஸ்ட் பயனாளியின் டிவிட்டர் முகவரி: @A_Comcast_User

ரெட்டிட் விவாதமும் (https://www.reddit.com/r/technology/comments/43fi39/i_set_up_my_raspberry_pi_to_automatically_tweet/ )அடையாளம் காட்டிய மதர்போர்ட் இணையதளமும்:http://motherboard.vice.com/read/this-bot-will-tweet-at-comcast-whenever-your-internet-is-slower-than-advertised

—–

——

டிவிட்டரில் கமல்; ஒரு இணைய ரசிகனின் எதிர்பார்ப்பு

CZpvuVPUcAAqhTtடிவிட்டரில் கமல்ஹாசன் இணைந்திருக்கிறார்.முதலில் கமல்ஹாசனுக்கு நல்வரவு.ஏற்கனவே பேஸ்புக்கில் இணைந்திருக்கும் கமல் குறும்பதிவு சேவையான டிவிட்டருக்கும் வந்திருப்பது நிச்சயம் திரைப்பட ரசிகர்கள் மகிழக்கூடியது தான்.கமலின் டிவிட்டர் பிரவேசத்தை அவரது மகள் ஸ்ருதிஹாசன் டிவிட்டர் மூலமே வரவேற்றிருக்கிறார். ஏற்கனவே டிவிட்டரில் இருக்கும் வேறு பல நட்சத்திரங்களும் வரவேற்றிருக்கின்றனர்.
பிரபலங்கள் டிவிட்டருக்கு வரும் போது நிகழ்வது போலவே கமலுக்கு கிடைக்கும் பாலோயர்கள் எண்ணிக்கை பற்றிய கணக்கும் துவங்கியிருக்கிறது.இனி கமல் டிவிட்டர் கணக்கு பாலோயர் எண்ணிக்கையில் மைல்கற்களை தொடும் போதெல்லாம் செய்தியில் அடிபடும் வாய்ப்புள்ளது.

ஒருவிதத்தில் கமலின் இந்த டிவிட்டர் வருகை ஆச்சர்யமானதே.இதையே வேறு விதமாக சொல்வது என்றால் அவர் இதுவரை டிவிட்டருக்கு வராமல் இருந்தது ஆச்சர்யமானது. அந்த வகையில் பார்த்தால் கமலின் டிவிட்டர் வருகை தாமதமாக நிகழ்ந்திருக்கிறது. இதை கமலே ஒப்புக்கொள்வார்.

டிவிட்டருக்கு கமல் எப்போதோ வந்திருக்க வேண்டும் என்று சொல்வதற்கு காரணம் இல்லாமல் இல்லை.அவரது சகாவான ரஜினி காந்த் ஏற்கனவே டிவிட்டரில் இருக்கிறார். அகில இந்திய அளவில் அமிதாப் டிவிட்டரில் கோலோச்சுகிறார்.ஷாருக்கும்,சல்மானும் டிவிட்டரில் தீவிரமாக இருக்கின்றனர்.இங்கேயே பல நட்சத்திரங்கள் டிவிட்டரில் இயங்கி கொண்டிருக்கின்றனர்.- இவர்கள் எல்லாம் வந்துவிட்ட நிலையில் கமல் டிவிட்டருக்கு வரவில்லை என்பதல்ல விஷயம், கமல் டிவிட்டருக்கு வந்திருக்க வேண்டும் என்பதே இங்கே நான் வலியுறுத்த விரும்புவது.

கமல் டிவிட்டருக்கு வருவதும் வராததும் அவரது விருப்பம் சார்ந்தது தான்.அதற்கான நேரத்தை தேர்வு செய்து கொள்ளும் உரிமையும் அவருக்கு இருக்கிறது.ஆனாலும் கூட, கமல் போன்ற முன்னோடி கலைஞர்களை டிவிட்டர் பயன்பாட்டில் முதலில் எதிர்பார்ப்பது மிக இயல்பானதே. டிவிட்டர் என்றில்லை,சமூக ஊடக செயல்பாட்டில் கமலை முன்வரிசையில் தான் எதிர்பார்க்க முடியும்.
CZpu2PqVIAMltH3
இந்த எதிர்பார்ப்பின் காரணத்தை மிக எளிதாக புரிந்து கொள்ளலாம்.கமல் தொழில்நுட்பத்தை புரிந்து கொள்வதிலும், பயன்படுத்துபதிலும் எப்போதுமே முன்னோடியாக தான் இருக்கிறார். கமல் படங்களை உருவாக்கும் வித்ததில் இதை பார்க்கலாம். திரைப்பட நுட்பங்கள் பற்றி பேசுவதில் இதை உணரலாம்.பெரும்பாலானோர் தயங்கிய நிலையில் பல ஆண்டுகளுக்கு முன்பே டிஜிட்டல் நுட்பத்தில் படம் எடுக்கத்துணிந்தவர் அவர்.சொந்தமாக ரெட் ஒன் காமிரா வாங்கிவைத்துக்கொண்டு பயிற்சி செய்பவர்.ஸ்டிரீமிங் பற்றி எல்லாம் பெரிதாக பேச்சு வருவதற்கு முன்னதாகவே, லேப்டாப்பில் ரசிகர்கள் படம் பார்க்க விரும்பினால் அதற்கான வாய்ப்பை ஏற்படுத்தி தர வேண்டும் என பேசியவர்.தொழில்நுட்பத்தின் பயன்பாடு மற்றும் சாத்தியங்கள் பற்றி ஆழமாக அறிந்தவர் மட்டும் அல்ல, அதைவிட முக்கியமாக தொழில்நுட்ப மாற்றங்கள் வருங்காலத்தில் ஏற்படுத்தக்கூடிய தாக்கத்தை முன்னதாகவே உணரும் தொலைநோக்கு பார்வை கொண்டவர் கமல்.
எனவே தான் கமலின் தாமதமான டிவிட்டர் வருகை வியப்பை அளிக்கிறது.ஆனால் இப்போது நிகழ்ந்திருக்கும் நிலையில் பல விஷயங்களை எதிர்பார்க்க வைக்கிறது.

கமல் டிவிட்டரை எப்படி பயன்படுத்தப்போகிறார் என்று தெரியவில்லை.அவரது டிவிட்டர் பக்கத்தில் இதற்கான குறிப்புகள் குறைவாகவே இருக்கின்றன.கமலின் டிவிட்டர் பயோவில் நடிகர், இயக்குனர், நடனக்கலைஞர், எழுத்தாளர், தயாரிப்பாளர்,என்று மட்டுமே தெரிவிக்கப்பட்டுள்ளதே தவிர அவரது டிவிட்டர் பக்கத்தின் நோக்கம் பற்றிய குறிப்புகளை கொண்டிருக்கவில்லை. கமலின் முதல் குறும்பதிவும் இந்த நோக்கத்தை போட்டு உடைத்துவிடவில்லை. குடியரசு தினத்தன்று டிவிட்டருக்கு வந்த கமல், ஒரு வீடியோவை மட்டும் பகிர்ந்து கொண்டுள்ளார். தேசிய கீதம் இசைக்கும் அந்த வீடியோவுடன் இந்திய சுதந்திர போராட்டம் இன்னமும் தனித்தன்மை வாய்ந்த்தாக இருக்கிறது என குறிப்பிட்டுள்ளார்.

கமலின் குறும்பதிவுகள் தொடர்ந்து எந்த வேகத்தில் வெளியாகும் என்பதும் அவரே இந்த கணக்கை கையாள திட்டமிட்டிருக்கிறாரா? என்பதும் தெரியவில்லை.
ஆனால் கமலின் டிவிட்டர் பக்கம் எப்படி இருக்க வேண்டும் என்ற எதிர்பார்ப்பு அவரை பின் தொடர விரும்புகிறவர்களுக்கு நிச்சயம் இருக்கும்.கமல் தனது கலையில் வெளிப்படுத்தி வரும் அதே முன்னோடித்தன்மையை, தொழில்நுட்பத்தை பயன்படுத்துவதில் அவரிடம் உள்ள பாய்ச்சலை அவரது டிவிட்டர் பகிர்விலும் எதிர்பார்க்க நமக்கு உரிமை இருக்கிறது.

டிவிட்டர் வெறும் சமூக ஊடக சாதனம் மட்டும் அல்ல; பிரபலங்களின் கைகளில் அது ரசிகர்களை நேரடியாக தொடர்பு கொள்வதற்கான, அவர்களுடன் உரையாடுவதற்கான சாதனமும் கூட! தேர்ச்சி பெற்ற கலைஞர்கள் இதை உணர்ந்து டிவிட்டர் மூலம் ரசிகர்களுடன் பாலம் அமைத்துக்கொண்டிருக்கின்றனர். தங்கள் எண்ணங்களையும்,விருப்பங்களையும் ரசிகர்களுடன் பகிர்ந்து கொள்கின்றனர். நட்சத்திர வெளிச்சத்தை கடந்து தங்கள் உலகிற்குள் ரசிகர்களை அழைத்து தங்கள் கலை உலகின் அகத்தன்மையை வெளிச்சம் போட்டு காட்டுகின்றனர். பாலிவுட்டில் அமிதாப்பின் டிவிட்டர் பக்கத்தை இதற்கு உதாரணமாக சொல்லலாம்.

அமிதாப் டிவிட்டரில் தீவிரமாக இயங்கி வருவதோடு ,ரசிகர்களை நேரில் சந்தித்து பேச முடியாத குறையை போக்கிக்கொள்ளும் வகையில் குறும்பதிவுகள் மூலம் அளவலாவி வருகிறார். அமிதாப் எனும் மனிதரை, அமிதாப் எனும் கலைஞரை அவரது குறும்பதிவுகள் வாயிலாக ரசிகர்கள் அறிந்து கொள்ளலாம். தனது திரையுலக அனுபவங்கள் பற்றி பல சுவாரஸ்யமான விஷயங்களை அமிதாப் தொடர்ந்து பகிர்ந்து வருகிறார்.இவற்றை விட முக்கியமாக தன்னைப்பற்றிய செய்திகளுக்காக அவர் ரசிகர்களை தவிக்க விடுவதில்லை. பேத்தியை கொஞ்சி மகிழ்வது முதல் எல்லாவற்றையும் அவரே தனது டிவிட்டர் பக்கத்தில் பகிர்ந்து கொள்கிறார்.
அமிதாப்பின் டிவிட்டர் பக்கம் மட்டும் அல்ல அவரது வலைப்பதிவும் அதைவிட செழுமையானது. அமிதாப் பல விஷயங்கள் குறித்து தனது எண்ண அலைகளை வலைப்பதிவில் விரிவாகவே பதிவிட்டு வருகிறார். ஒரு நடிகர் தனது ரசிகர்களுக்காக அக்கறையுடன் எழுதும் நாட்குறிப்பாக அமிதாப்பின் வலைப்பதிவு இருப்பதை பார்க்கலாம்.
முக்கிய பதிவுகளுக்கு தனது டிவிட்டர் பக்கத்தில் அமிதாப் இணைப்பு தருவதையும் வழக்கமாக கொண்டுள்ளார். ஒரு தீவிர ரசிகனுக்கு அமிதாபின் சமூக ஊடக பகிர்வுகள் தரக்கூடிய இளைப்பாறுதலும், மகிழ்ச்சியும் நிகரில்லாதது- நிழலாக ரசித்தவரை நிஜமாக தெரிந்து கொள்ள வழி செய்வது!.

கமல் நினைத்தால் இதே அனுபவத்தை அவரது ரசிகர்களுக்கு அளிக்க முடியும். தன்னைப்பற்றிய அப்டேட்கள் மட்டும் அல்ல, அவரது சிந்தனை ஓட்டம், புதிய போக்குகளை அவர் எதிர்கொள்ளும்விதம், திரை நுட்பங்களை புரிந்து கொள்வதில் அவரது கோணம் என கமலிடம் எதிர்பார்க்க எத்தனையோ விஷயங்கள் இருக்கின்றன. ரசிகர்களுக்கு மட்டும் அல்ல இளம் படைப்பாளிகளுக்கும் கமலின் டிவிட்டர் பக்கம் தகவல் சுரங்கமாக இருக்கும்.
கமலின் இலக்கிய ஆர்வமும்,வாசிப்பு அனுபவமும் இதற்கு கூடுதல் பலத்தை கொடுக்கும். மய்யம் இலக்கிய இதழை நடத்திவர் துடிப்பு மிக்க வலைப்பதிவாலும் தனது அனுபவங்களை பகிர்ந்து கொண்டு வழிகாட்ட முடியும்.
இவற்றை எல்லாம் அறியாதவர் அல்ல கமல்; ஒரு இணைய ரசிகனாக அவரது ரசிகர்கள் சார்பில் இந்த எதிர்பார்ப்பை முன்வைக்கிறேன்.அவ்வளவு தான் . டிவிட்டரில் கமல் எப்படி விஸ்வரூபம் எடுக்கிறார் என்பதை பொருத்திருந்து பார்ப்போம்.

கமலின் டிவிட்டர் முகவரி: @iKamalhaasan
——

நன்றி; யுவர்ஸ்டோரியில் எழுதியது: