Category Archives: டிவிட்டர்

டிவிட்டரில் கமல்; ஒரு இணைய ரசிகனின் எதிர்பார்ப்பு

CZpvuVPUcAAqhTtடிவிட்டரில் கமல்ஹாசன் இணைந்திருக்கிறார்.முதலில் கமல்ஹாசனுக்கு நல்வரவு.ஏற்கனவே பேஸ்புக்கில் இணைந்திருக்கும் கமல் குறும்பதிவு சேவையான டிவிட்டருக்கும் வந்திருப்பது நிச்சயம் திரைப்பட ரசிகர்கள் மகிழக்கூடியது தான்.கமலின் டிவிட்டர் பிரவேசத்தை அவரது மகள் ஸ்ருதிஹாசன் டிவிட்டர் மூலமே வரவேற்றிருக்கிறார். ஏற்கனவே டிவிட்டரில் இருக்கும் வேறு பல நட்சத்திரங்களும் வரவேற்றிருக்கின்றனர்.
பிரபலங்கள் டிவிட்டருக்கு வரும் போது நிகழ்வது போலவே கமலுக்கு கிடைக்கும் பாலோயர்கள் எண்ணிக்கை பற்றிய கணக்கும் துவங்கியிருக்கிறது.இனி கமல் டிவிட்டர் கணக்கு பாலோயர் எண்ணிக்கையில் மைல்கற்களை தொடும் போதெல்லாம் செய்தியில் அடிபடும் வாய்ப்புள்ளது.

ஒருவிதத்தில் கமலின் இந்த டிவிட்டர் வருகை ஆச்சர்யமானதே.இதையே வேறு விதமாக சொல்வது என்றால் அவர் இதுவரை டிவிட்டருக்கு வராமல் இருந்தது ஆச்சர்யமானது. அந்த வகையில் பார்த்தால் கமலின் டிவிட்டர் வருகை தாமதமாக நிகழ்ந்திருக்கிறது. இதை கமலே ஒப்புக்கொள்வார்.

டிவிட்டருக்கு கமல் எப்போதோ வந்திருக்க வேண்டும் என்று சொல்வதற்கு காரணம் இல்லாமல் இல்லை.அவரது சகாவான ரஜினி காந்த் ஏற்கனவே டிவிட்டரில் இருக்கிறார். அகில இந்திய அளவில் அமிதாப் டிவிட்டரில் கோலோச்சுகிறார்.ஷாருக்கும்,சல்மானும் டிவிட்டரில் தீவிரமாக இருக்கின்றனர்.இங்கேயே பல நட்சத்திரங்கள் டிவிட்டரில் இயங்கி கொண்டிருக்கின்றனர்.- இவர்கள் எல்லாம் வந்துவிட்ட நிலையில் கமல் டிவிட்டருக்கு வரவில்லை என்பதல்ல விஷயம், கமல் டிவிட்டருக்கு வந்திருக்க வேண்டும் என்பதே இங்கே நான் வலியுறுத்த விரும்புவது.

கமல் டிவிட்டருக்கு வருவதும் வராததும் அவரது விருப்பம் சார்ந்தது தான்.அதற்கான நேரத்தை தேர்வு செய்து கொள்ளும் உரிமையும் அவருக்கு இருக்கிறது.ஆனாலும் கூட, கமல் போன்ற முன்னோடி கலைஞர்களை டிவிட்டர் பயன்பாட்டில் முதலில் எதிர்பார்ப்பது மிக இயல்பானதே. டிவிட்டர் என்றில்லை,சமூக ஊடக செயல்பாட்டில் கமலை முன்வரிசையில் தான் எதிர்பார்க்க முடியும்.
CZpu2PqVIAMltH3
இந்த எதிர்பார்ப்பின் காரணத்தை மிக எளிதாக புரிந்து கொள்ளலாம்.கமல் தொழில்நுட்பத்தை புரிந்து கொள்வதிலும், பயன்படுத்துபதிலும் எப்போதுமே முன்னோடியாக தான் இருக்கிறார். கமல் படங்களை உருவாக்கும் வித்ததில் இதை பார்க்கலாம். திரைப்பட நுட்பங்கள் பற்றி பேசுவதில் இதை உணரலாம்.பெரும்பாலானோர் தயங்கிய நிலையில் பல ஆண்டுகளுக்கு முன்பே டிஜிட்டல் நுட்பத்தில் படம் எடுக்கத்துணிந்தவர் அவர்.சொந்தமாக ரெட் ஒன் காமிரா வாங்கிவைத்துக்கொண்டு பயிற்சி செய்பவர்.ஸ்டிரீமிங் பற்றி எல்லாம் பெரிதாக பேச்சு வருவதற்கு முன்னதாகவே, லேப்டாப்பில் ரசிகர்கள் படம் பார்க்க விரும்பினால் அதற்கான வாய்ப்பை ஏற்படுத்தி தர வேண்டும் என பேசியவர்.தொழில்நுட்பத்தின் பயன்பாடு மற்றும் சாத்தியங்கள் பற்றி ஆழமாக அறிந்தவர் மட்டும் அல்ல, அதைவிட முக்கியமாக தொழில்நுட்ப மாற்றங்கள் வருங்காலத்தில் ஏற்படுத்தக்கூடிய தாக்கத்தை முன்னதாகவே உணரும் தொலைநோக்கு பார்வை கொண்டவர் கமல்.
எனவே தான் கமலின் தாமதமான டிவிட்டர் வருகை வியப்பை அளிக்கிறது.ஆனால் இப்போது நிகழ்ந்திருக்கும் நிலையில் பல விஷயங்களை எதிர்பார்க்க வைக்கிறது.

கமல் டிவிட்டரை எப்படி பயன்படுத்தப்போகிறார் என்று தெரியவில்லை.அவரது டிவிட்டர் பக்கத்தில் இதற்கான குறிப்புகள் குறைவாகவே இருக்கின்றன.கமலின் டிவிட்டர் பயோவில் நடிகர், இயக்குனர், நடனக்கலைஞர், எழுத்தாளர், தயாரிப்பாளர்,என்று மட்டுமே தெரிவிக்கப்பட்டுள்ளதே தவிர அவரது டிவிட்டர் பக்கத்தின் நோக்கம் பற்றிய குறிப்புகளை கொண்டிருக்கவில்லை. கமலின் முதல் குறும்பதிவும் இந்த நோக்கத்தை போட்டு உடைத்துவிடவில்லை. குடியரசு தினத்தன்று டிவிட்டருக்கு வந்த கமல், ஒரு வீடியோவை மட்டும் பகிர்ந்து கொண்டுள்ளார். தேசிய கீதம் இசைக்கும் அந்த வீடியோவுடன் இந்திய சுதந்திர போராட்டம் இன்னமும் தனித்தன்மை வாய்ந்த்தாக இருக்கிறது என குறிப்பிட்டுள்ளார்.

கமலின் குறும்பதிவுகள் தொடர்ந்து எந்த வேகத்தில் வெளியாகும் என்பதும் அவரே இந்த கணக்கை கையாள திட்டமிட்டிருக்கிறாரா? என்பதும் தெரியவில்லை.
ஆனால் கமலின் டிவிட்டர் பக்கம் எப்படி இருக்க வேண்டும் என்ற எதிர்பார்ப்பு அவரை பின் தொடர விரும்புகிறவர்களுக்கு நிச்சயம் இருக்கும்.கமல் தனது கலையில் வெளிப்படுத்தி வரும் அதே முன்னோடித்தன்மையை, தொழில்நுட்பத்தை பயன்படுத்துவதில் அவரிடம் உள்ள பாய்ச்சலை அவரது டிவிட்டர் பகிர்விலும் எதிர்பார்க்க நமக்கு உரிமை இருக்கிறது.

டிவிட்டர் வெறும் சமூக ஊடக சாதனம் மட்டும் அல்ல; பிரபலங்களின் கைகளில் அது ரசிகர்களை நேரடியாக தொடர்பு கொள்வதற்கான, அவர்களுடன் உரையாடுவதற்கான சாதனமும் கூட! தேர்ச்சி பெற்ற கலைஞர்கள் இதை உணர்ந்து டிவிட்டர் மூலம் ரசிகர்களுடன் பாலம் அமைத்துக்கொண்டிருக்கின்றனர். தங்கள் எண்ணங்களையும்,விருப்பங்களையும் ரசிகர்களுடன் பகிர்ந்து கொள்கின்றனர். நட்சத்திர வெளிச்சத்தை கடந்து தங்கள் உலகிற்குள் ரசிகர்களை அழைத்து தங்கள் கலை உலகின் அகத்தன்மையை வெளிச்சம் போட்டு காட்டுகின்றனர். பாலிவுட்டில் அமிதாப்பின் டிவிட்டர் பக்கத்தை இதற்கு உதாரணமாக சொல்லலாம்.

அமிதாப் டிவிட்டரில் தீவிரமாக இயங்கி வருவதோடு ,ரசிகர்களை நேரில் சந்தித்து பேச முடியாத குறையை போக்கிக்கொள்ளும் வகையில் குறும்பதிவுகள் மூலம் அளவலாவி வருகிறார். அமிதாப் எனும் மனிதரை, அமிதாப் எனும் கலைஞரை அவரது குறும்பதிவுகள் வாயிலாக ரசிகர்கள் அறிந்து கொள்ளலாம். தனது திரையுலக அனுபவங்கள் பற்றி பல சுவாரஸ்யமான விஷயங்களை அமிதாப் தொடர்ந்து பகிர்ந்து வருகிறார்.இவற்றை விட முக்கியமாக தன்னைப்பற்றிய செய்திகளுக்காக அவர் ரசிகர்களை தவிக்க விடுவதில்லை. பேத்தியை கொஞ்சி மகிழ்வது முதல் எல்லாவற்றையும் அவரே தனது டிவிட்டர் பக்கத்தில் பகிர்ந்து கொள்கிறார்.
அமிதாப்பின் டிவிட்டர் பக்கம் மட்டும் அல்ல அவரது வலைப்பதிவும் அதைவிட செழுமையானது. அமிதாப் பல விஷயங்கள் குறித்து தனது எண்ண அலைகளை வலைப்பதிவில் விரிவாகவே பதிவிட்டு வருகிறார். ஒரு நடிகர் தனது ரசிகர்களுக்காக அக்கறையுடன் எழுதும் நாட்குறிப்பாக அமிதாப்பின் வலைப்பதிவு இருப்பதை பார்க்கலாம்.
முக்கிய பதிவுகளுக்கு தனது டிவிட்டர் பக்கத்தில் அமிதாப் இணைப்பு தருவதையும் வழக்கமாக கொண்டுள்ளார். ஒரு தீவிர ரசிகனுக்கு அமிதாபின் சமூக ஊடக பகிர்வுகள் தரக்கூடிய இளைப்பாறுதலும், மகிழ்ச்சியும் நிகரில்லாதது- நிழலாக ரசித்தவரை நிஜமாக தெரிந்து கொள்ள வழி செய்வது!.

கமல் நினைத்தால் இதே அனுபவத்தை அவரது ரசிகர்களுக்கு அளிக்க முடியும். தன்னைப்பற்றிய அப்டேட்கள் மட்டும் அல்ல, அவரது சிந்தனை ஓட்டம், புதிய போக்குகளை அவர் எதிர்கொள்ளும்விதம், திரை நுட்பங்களை புரிந்து கொள்வதில் அவரது கோணம் என கமலிடம் எதிர்பார்க்க எத்தனையோ விஷயங்கள் இருக்கின்றன. ரசிகர்களுக்கு மட்டும் அல்ல இளம் படைப்பாளிகளுக்கும் கமலின் டிவிட்டர் பக்கம் தகவல் சுரங்கமாக இருக்கும்.
கமலின் இலக்கிய ஆர்வமும்,வாசிப்பு அனுபவமும் இதற்கு கூடுதல் பலத்தை கொடுக்கும். மய்யம் இலக்கிய இதழை நடத்திவர் துடிப்பு மிக்க வலைப்பதிவாலும் தனது அனுபவங்களை பகிர்ந்து கொண்டு வழிகாட்ட முடியும்.
இவற்றை எல்லாம் அறியாதவர் அல்ல கமல்; ஒரு இணைய ரசிகனாக அவரது ரசிகர்கள் சார்பில் இந்த எதிர்பார்ப்பை முன்வைக்கிறேன்.அவ்வளவு தான் . டிவிட்டரில் கமல் எப்படி விஸ்வரூபம் எடுக்கிறார் என்பதை பொருத்திருந்து பார்ப்போம்.

கமலின் டிவிட்டர் முகவரி: @iKamalhaasan
——

நன்றி; யுவர்ஸ்டோரியில் எழுதியது:

CHPwgS4UgAAXevE

டிவிட்டரில் பெண் விஞ்ஞானிகளின் பளிச் பதிலடி

ஆய்வுக்கூடத்தில் பெண்கள் கவனத்தை சிதற வைப்பார்கள் எனும் கருத்தை பெண் விஞ்ஞானிகள் எப்படி பொறுத்துக்கொள்வார்கள். அதிலும் நோபல் பரிசுப்பெற்ற விஞ்ஞானி ஒருவர் இப்படி ஒரு அவதூறான கருத்தை தெரிவித்த போது எப்படி பொறுத்துக்கொள்வார்கள்? அதனால் தான் உலகம் முழுவதும் உள்ள பெண் விஞ்ஞானிகள் பொங்கி எழுந்து இந்த கருத்துக்கு டிவிட்டரில் அழகாக ஆனால் அழுத்தமாக பதிலடி கொடுத்து வருகிறார்கள்.

நோபல் பரிசு பெற்ற மேதையான டிம் ஹண்ட் அன்மையில் அறிவியல் பத்திரிகையாளர் மாநாட்டில் பேசிய போது பெண் விஞ்ஞானிகளுக்கு எதிராக கருத்து தெரிவித்திருந்தார். ஆய்வுக்கூடத்தில் பெண்கள் இருந்தால் மூன்று விஷயங்கள் தான் நடக்கும், அவர்களிடம் நீங்கள் காதல் கொள்வீர்கள், அவர்கள் உங்கள் மீது காதல் கொள்வார்கள், அதன் பிறகு அவர்கள் கண்ணை கசக்கும் போது நீங்கள் புலம்ப நேரிடும்” என்பது போல அவர் கருத்து தெரிவித்திருந்தார்.

பெண் விஞ்ஞானிகளை அவமதிக்கும் வகையிலான இந்த கருத்து கடும் கண்டனத்திற்கு இலக்கானது. எதிர்ப்பு அலை வலுவான எழுந்ததை அடுத்து விஞ்ஞானி டிம் ஹண்ட் லண்டன் பல்கலைக்கல்லூரி பதவியில் இருந்து விலகினார்.

இதனிடையே டிம் ஹண்டின் அவமதிப்பான கருத்திற்கு உலகம் முழுவதும் உள்ள பெண் விஞ்ஞானிகள் டிவிட்டரில் அழகாக பதிலடி கொடுத்து வருகின்றனர்.
பெண்கள் கவர்ச்சியால் கவனத்தை சிதற வைக்கின்றனர் என டிம் ஹண்ட் கூறிய கருத்தை விமர்சித்து மறுக்கும் வகையில் #DistractinglySexy எனும் ஹாஷ்டேகுடன் டிவிட்டரில் தங்கள் பணியிடத்து புகைப்படங்களை பெண் விஞ்ஞானிகள் டிவிட்டரில் வெளியிட்டு வருகின்றனர்.

ஆய்வுக்கூடத்தில் பணியாற்றும் முழு ஆடையுடன் காட்சி தரும் இந்த புகைப்படங்கள் கவர்ச்சி வாதத்தை தவிடுபொடியாக்குகின்றன என்றால் அதனுடன் பகிரப்படும் கருத்துக்கள் , ஹண்ட் போன்றவர்களின் ஆணாதிக்க கருத்துக்களை விமர்சிக்கும் வகையில் அமைந்துள்ளன.
உதாரணத்திற்கு டேனியேலா ஸ்பிட்சர் எனும் பெண் விஞ்ஞானி, தலை முதல் கால் அரை மூடிய ஆய்வுக்கூட ஆடையுடன் , இருபாலர் பணிபுரியும் ஆய்வுக்கூடத்தில் பணி புரிவது சிக்கலாக இருக்கிறது, ஏனெனில் நான் ஆண் விஞ்ஞானி கவனத்தை சிதற வைக்கிறேன் என குறிப்பிட்டுள்ளார்.

ஏமி எனும் விஞ்ஞானி , நோபல் மேதை மேடம் கியூரியின் புகைப்படத்தை வெளியிட்டு , கியூரி கண்ணீர் சிந்துவதை ஒதுக்கி வைத்துவிட்டு ரேடியம் மற்றும் போலோனியத்தை கண்டுபிடித்ததற்கு நன்றி என குறிப்பிட்டுள்ளார்.
இவ்வாறு பெண் விஞ்ஞானிகளின் அர்பணிப்பை பறைசாற்றும் வகையில் பத்தாயிரத்துகும் மேற்பட்ட குறும்பதிவுகள் டிவிட்டரில் வெளியாகி இந்த ஹாஷ்டேக் கவனத்தை ஈர்த்துள்ளது.

பெண் விஞ்ஞானிகளின் பதிலடியை காண: https://twitter.com/hashtag/distractinglysexy?src=rela

——–

ஆந்திராவில் கொல்லப்பட்ட தமிழர்களுக்கு நீதி கேட்கும் ஹாஷ்டேக்

ஆந்திர வனப்பகுதியில் என்கவுண்டரில் 20 தமிழர்கள் சுட்டுக்கொல்லப்பட்ட சம்பவத்திற்கு எதிராக குரல் கொடுக்கும் வகையில் டிவிட்டரில் தமிழர்கள் பலரும் குரல் கொடுத்து வருகின்றனர். இதற்காக உருவாக்கப்பட்ட #20தமிழர்கொலையைகண்டிப்போம் எனும் ஹாஷ்டேக் டிவிட்டரில் டிரெண்டிங் ஆகி கவனத்தை ஈர்த்துள்ளது.
செம்மர கடத்தல் விவகாரத்தில் ஆந்திர போலீசாரால் 20 தமிழர்கள் சுட்டுக்கொல்லப்பட்ட சம்பவம் தமிழக மக்கள் மத்தியில் ஆவேசத்தி ஏற்படுத்தியுள்ளது. இந்த விவகாரம் தொடர்பாக அரசியல் கட்சிகள் மற்றும் அமைப்புகள் கண்டனம் தெரிவித்தும் போராட்டம் நடத்தியும் வருகின்றன. இந்த சம்பவம் தொடர்பாக நீதி விசாரணை நடத்தப்பட வேண்டும் என்றும் கோரப்பட்டு வருகிறது.

கடத்தல்காரர்கள் தப்பிவிட அப்பாவி தமிழர்கள் பலிகடா ஆக்கப்பட்டிருப்பதாகவும் பலரும் வேதனை தெரிவித்துள்ளனர்.
இந்நிலையில் டிவிட்டரிலும் தமிழர்கள் இந்த சம்பவத்தை கண்டித்து குரல் கொடுக்கத்துவங்கியுள்ளனர். தமிழர்கள் கொல்லப்பட்டதற்கு நியாயம் கேட்கும் வகையில் குறும்பதிவுகளை வெளியிட்டு வருகின்றனர். இத்தகைய எதிர்ப்பு குறும்பதிவுகளை ஒன்றிணைக்கும் வகையில் உருவாக்கப்பட்ட #20தமிழர்கொலையைகண்டிப்போம் எனும் ஹாஷ்டேகும் பிரபலமாகியுள்ளது.

பலரும் இந்த ஹாஷ்டேகுடன் தங்கள் உணர்வுகளை வெளிப்படுத்தி வருகின்றனர்.
@NanTamizachi என்பவர் ’20 தமிழர் கொலைசெய்யப்பட்டதை அறிந்தேன் கடத்தல்காரராயினும் விசாரணை இன்றி வேட்டையாடியமை தவறு கண்டிக்கப்படவேண்டியதே
#20தமிழர்கொலையைகண்டிப்போம்’ எனும் குறும்பதிவை வெளியிட்டார்.
தொடர்ந்து பலரும் இந்த இந்த ஹாஷ்டேகை பயன்படுத்த துவங்கினர்.

@eraam17 ( வாழ்க தமிழ்) எனும் டிவிட்டர் பயனாளியும், @Dhuvans (சிலிக்கான் சிற்பி) உள்ளிட்டோர் இதை வழிமொழிவது போல இந்த ஹாஷ்டேகுடன் குறும்பதிவுகளை பகிர்ந்து கொண்டனர்.
இந்த ஹாஷ்டேகை பகிர்ந்து கொண்வர்கள் இதை டிரெண்டிங் ஆக்கவும் கோரிக்கை வைக்க மேலும் பலரும் இதில் இணைந்தனர். இதனால் #20தமிழர்கொலையைகண்டிப்போம்’ டிவிட்டரில் பிரபலமாகி கவனத்தை ஈர்த்துள்ளது.
இந்த ஹாஷ்டேகுடன் வெளியான சில குறும்பதிவுகள் வருமாறு:

* @kalvankallan; மரம் வெட்டி கொண்டிருந்த ஆந்திர தொழிலாளர்கள் ஒருவர் கூட பலியாகாதது எப்படி? அவர்களை தப்பிக்கவைத்தது யார்?

* @bhuviii_; “தமிழன் என்று சொல்லடா தலைநிமிர்ந்து நில்லடா” என்றவன் இன்று உயிரோடு இருந்தால் வெக்கி தலைகுனிவான்!

* @CrazeTalk; தமிழன்டா என்று சொன்ன காலம் போய் .! தமிழன் தானடா என சொல்லும் காலம் வந்துவிட்டது

* @MSoundraa; அந்திரா போலீசுக்கு புரியிற மாதிரி ஒரு டேக்க ட்ரென்டு பண்ணுங்கைய்யா பிரபலங்களே

* @govikannan; மரம் வெட்டியர்களை சுட்டாச்சு, மரம் வெட்டச் சொன்னவர்களுக்கு வெண்சாமரம்

* @apdipodra; நாங்க அவங்க மரம் வெட்டுனது சரின்னு சொல்ல வரல. ஆனா ஆந்திரா போலீஸ் பண்ணது அதை விட பெரிய தப்புன்னுதான் சொல்றோம்.

* @itsurjoe: கண்டனத்திற்காவது தமிழன் ஒன்று சேரட்டும்

* @Dinakar89; அவர்கள் குடும்பத்திற்கு
நிதி வழங்கினால் மட்டும் போதாது !!
நீதியும் வழங்குங்கள்!

• @psvelu1979; மொழிவேறுபாடுகள் எல்லாம் மனிதர்களுக்குத்தானே அன்றி மனித உயிர்களுக்கு இல்லை.
• @Im_AriGM; 20 தொழிலாளிகள் செய்தது தவறுதான் அவர்களை நீதியின் வாசலில் நிறுத்துவதை விடுத்து தண்டனை கொடுக்க நீங்கள் யார்?

தொடர்ந்து இந்த ஹாஷ்டேகுடன் குறும்பதிவுகள் வெளியாகி வருகின்றன. குறும்பதிவுகளில் ஆவேசம் வெளிப்படுவதுதுடன், பிரபலங்கள் மற்றும் அரசியல் கட்சிகளை கண்டிக்கும் குறும்பதிவுகளையும் சிலர் வெளியிட்டுள்ளனர்.சிலர் இந்த ஹாஷேடேகை ஆங்கிலத்தில் மொழிபெயர்த்து புரிய வைக்க வேண்டும் என்றும் கேட்டுள்ளனர். ஒரு சிலர் இப்படி ஹாஷ்டேக் மூலமாவது போராடுவோம் என்று கூறியுள்ளனர். சில குறும்பதிவுகள் எல்லை மீறுவதாக இருந்தாலும் இந்த பிரச்சனையை தெலுங்கு மக்களுக்கு எதிரானதாக பார்க்க வேண்டாம் என்றும் வேண்டுகோள் விடுத்துள்ளனர். ஹாஹ்டேக் மூலமான போராட்டம் என்பது வீட்டிற்குள்ளேயே இருந்து போராடுவதற்கு சமம் என்று கூறப்பட்டாலும் சமூக வலைப்பின்னல் யுகத்தில் இது கவனத்தை ஈர்ப்பதற்கான முக்கிய ஆயுதமாகவும் உணர்வுகளை வெளிப்படுத்துவதற்கான வழியாகவும் அமைந்திருக்கிறது. இதன் அடையாளமாக கொல்லப்பட்ட அப்பாவித்தமிழர்களுக்காக டிவிட்டரில் குரல் ஒலிக்கிறது.

தமிழர் கொலைகளை கண்டிக்கும் குறும்பதிவுகளை பின் தொடர் ஹாஷ்டேக்: #20தமிழர்கொலையைகண்டிப்போம்


நன்றி; விகடன்.காமில் எழுதியது.

tweet23n-2-web

டிவிட்டரால் ஏற்பட்ட விபரீதம்

டிவிட்டரில் அதிக பாலோயர்கள் இருப்பதாக பெருமை பட்டுக்கொள்வதும் , பிரபலங்கள் பின் தொடர்வதை சொல்லி மகிழ்வதும் சமூக ஊடக யுகத்தில் இயல்பானது தான். ஆனால் அமெரிக்காவிலோ இளம் பெண் ஒருவர் அதிபர் ஒபாமா தனது டிவிட்டர் பாலோயர் என்று கூறியதற்காக உளவியல் சிகிச்சை பிரிவில் சேர்க்கப்பட்டிருக்கிறார். 8 நாட்கள் மனநல ஆலோசனைகளுக்கு உடபடுத்தப்பட்டவர் இப்போது அந்த மருத்துவமனைக்கு எதிராக வழக்கு தொடுத்திருக்கிறார்.

அமெரிக்காவின் லாங்க் ஐல்ண்ட் பகுதியை சேர்ந்த கமிலா பிரோக் எனும் அந்த பெண், கடந்த செப்டம்பர் மாதம் ஹார்லெம் பகுதியில் காரில் சென்ற போது போக்குவரத்து காவலர்களிடம் சிக்கியிருக்கிறார். போதை மருந்து பயன்படுத்தியதாக அவர் மீது குற்றம்சாட்டப்பட்டது. ஆனால் அவரது காரில் எந்த போதப்பொருளும் இருக்கவில்லை என்று அவரது தரப்பில் மறுக்கப்பட்டுள்ளது.

மறு நாள் காரை எடுத்துவர அவர் காவல் நிலையம் சென்ற போது அவர் வலுக்கட்டயமாக மருத்துவமனைக்கு சிகிச்சைக்காக அழைத்து செல்லப்பட்டிருக்கிறார்.

உணர்ச்சிவயப்பட்ட நிலையில் மிகவும் கொந்தளிப்பான மனநிலையில் அவர் இருந்ததாக அதிகாரிகள் தெரிவித்துள்ளனர். உணர்ச்சியமயமான நிலையில் இருந்தது உண்மை தான் ஆனால் எந்தவிதத்திலும் மனச்சோர்வுடன் இருக்கவில்லை என்று பிரோக் மறுத்துள்ளார்.

tweet23n-1-webஹார்லெம் மருத்துவமனையில் டாக்டர்களிடம் அவர் தான் வங்கியில் வேலை பார்ப்பதாகவும், டிவிட்டரில் அதிபர் ஒபாமா தன்னை பின் தொடர்வதாகவும் கூறியிருக்கிறார். ஒபாமா மோசமானவர்களின் பாலோயராக இருப்பாரா? என்றும் அவர் கேட்டிருக்கிறார்.

டிவிட்டரில் ஒபாமா பாலோயராக இருக்கும் தகவலை சொன்னால் தன்னை நம்புவார்கள் என்று அவர் எதிர்பார்த்ததற்கு மாறாக அதனாலேயே டாக்டர்கள் அவர் மீது சந்தேகம் கொண்டு அவருக்கு மயக்க ஊசி போட்டு தொடர்ந்து உளவியல் ஆலோசனைக்கு உட்படுத்தியுள்ளனர்.

இந்த பெண் வேலையில்லாமல் பாதிக்கப்பட்டிருக்கிறார், ஒபாமா டிவிட்டரில் தன்னை பின் தொடரவில்லை என்று கூறுகிறார் என அவரைப்பற்றி மருத்துவமனை குறிப்பில் தெரிவிக்கப்பட்டுள்ளது.
ஒபாமா டிவிட்டர் பாலோயர் என கூறியதால் அவரது மனநிலை குறித்து டாக்டர்கள் மேலும் சந்தேகம் அடைந்ததாக கூறப்படுகிறது.

8 நாட்களுக்கு பிறகு அவர் மருத்துவமனையில் இருந்து விடுவிக்கப்பட்டார். இதற்கான காரணமுன் கூறவில்லை என்கிறார் பிரோக். ஆனால் மருத்துவ கட்டணமாக 13,000 டாலர் செலுத்த வேண்டும் என்று கூறப்பட்டுள்ளது.
பிரோக் இந்த சம்பவத்தால் நொந்துப்போய் நீதிமன்றத்திற்கு சென்றிருக்கிறார்.
சமூக ஊடக பாதிப்பு தொடர்பான பலவித உதாரணங்க்ள் இருந்தாலும் பிரோக்கிறகு நேர்ந்த கதி மிகவும் விநோதமானதாக கருதப்படுகிறது.

பிரோக் கூறியபடி உண்மையில் அதிபர் ஒபாமா அவரது டிவிட்டர் பாலோயர் தான். ஆனால் இதில் வியப்பதற்கு எதுவுமில்லை. ஒபாமாவின் டிவிட்டர் கணக்கு நிர்வகிக்கப்படும் பக்கமாக இருக்கிறது. கிட்டத்தட்ட 6,40,000 பேரை ஒபாமாவின் டிவிட்டர் பக்கம் பின் தொடர்கிறது.

பிரோக்கின் டிவிட்டர் பக்கத்தை பார்த்திருந்தால் இதை எளிதாக உறுதி செய்து கொண்டிருக்கலாம். ஆனால் டாக்டர்களும் அதிகாரிகளும் அவ்வாறு செய்யாதது ஏன் என்று தெரியவில்லை என்று இந்த வழக்கு குறித்து கருத்து தெரிவித்தவர்கள் வியப்பாக கூறியுள்ளனர்.

சமூக ஊடக செல்வாக்கு பல நேரங்களில் புதிய வாய்ப்புகளையும் பெற்றுத்தரும் என்பதற்கு பல உதாரணங்கள் இருக்கின்றன. ஆனால் டிவிட்டரில் அதிபர் பாலோயராக இருக்கிறார் என கூறியதற்காக ஒருவர் பாதிக்கப்பட்டிருப்பது இதுவே முதல் முறை.

இந்த சம்பவம் தொடர்பாக நியாயம் கேட்டு வழக்கு தொடர்ந்திருக்கும் பிரோக், எல்லோரிடமும் வைக்கும் வேண்டுகோள், ஒபாமா போலவே நீங்களும் டிவிட்டரில் என்னை பின் தொடருங்கள் என்பது தான். எப்படி இருக்கிறது!

பிரோக்கின் டிவிட்டர் பக்கம்: https://twitter.com/akilahbrock/

இவர் ட்விட்டர் வள்ளல் தெரியுமா?

2016 ஒலிம்பிக் போட்டிகள் பிரேசிலின் ரியோ டிஜெனிரோ நகரில் நடைபெற இருப்பது தெரிந்த விஷயம் தான். இந்த போட்டிகளை உலகம் வியந்து போகும் வகையில் நடத்திக்காட்ட ரியோ நகர அதிகாரிகள் தீவிரமாக இருக்கின்றனர். இதுவும் எதிர்பார்க்க கூடியது தான். ஆனால் ரியோ ஒலிம்பிக் போட்டிகள் சிறப்பாக நடைபெறுவதில் ஸ்பெயின் நாட்டு ஏழை பெரியவர் ஒருவருக்கு சின்ன பங்கிருக்கிறது.

ரியோ ஒலிம்பிக் போட்டிகள் பெரிய அளவில் வெற்றி பெற்றால்,குறிப்பாக சமூக ஊடகங்களில் அது தாக்கத்தை ஏற்படுத்தினால் நிச்சயம் அதற்காக ரியோ நகரமும் பிரேசில் மக்களும் ஸ்பெயினின் சேவியர் காஸ்டனோவாவிற்கு நன்றி சொல்ல வேண்டும். ஏனெனில் இந்த போட்டிகளுக்காக அவர் மனமுவந்து பெரிய உதவியை செய்திருக்கிறார். அவர் கொடைவள்ளலாக நடந்து கொண்டு ரியோ நகருக்கு கைகொடுத்திருக்கிறார். அவர் அப்படி என்ன செய்திருக்கிறார் என்றால், ரியோ நகரின் பெயரில் தான் பதிவு செய்து வைத்திருந்த @riodejaneiro எனும் டிவிட்டர் முகவரியை விட்டுக்கொடுத்திருக்கிறார்.

சமூக ஊடக உலகில் அதிகார பூர்வ கணக்குகளுக்கு இருக்கும் முக்கியத்துவத்தை உணர்ந்தவர்களுக்கு இது எத்தனை பெரிய விஷயம் என்று தெரியும்.அதிலும் கஸ்டனோ இந்த முகவரியை ஒப்படைக்க பேரம் பேசாமல் இதன் மூலம், எந்த லாபமும் அடைய நினைக்காமல் இலவசமாக ரியோ நகரிடம் இந்த கணக்கை ஒப்படைத்திருக்கிறார்.

காஸ்டனோ ஷூ பாலிஷ் போடுபவராக வேலை பார்க்கும் ஏழ்மை நிலையில் இருப்பவர் என அறியும் போது அவர் இப்படி பெருந்தன்மையுடன் நடந்து கொண்டிருப்பது இன்னும் கூட வியப்பளிக்கலாம்.
ஒருவித்ததில் காஸ்டனோவை தொலைநோக்கு மிக்கவர் என்று தான் சொல்ல வேண்டும்.. அதைவிட டிவிட்டர்நோக்கு மிக்கவர் என்று சொல்லலாம். கடந்த 2007 ம் ஆண்டீல் டிவிட்ட்ர சேவை அறிமுகமான காலத்தில் அவர் பல முக்கிய குறிச்சொற்களை கொண்டு டிவிட்டர் முகவரிகளை பதிவு செய்து வைத்துக்கொண்டார். கவனிக்க அந்த காலக்கட்டத்தில் டிவிட்டர் சேவை அத்தனை பிரபலமாகவில்லை. அப்போதே அவர் டிவிட்டரின் முக்கியத்தவத்தை உணர்ந்து செயல்பட்டார்.

இணைய உலகில் இது ஆரம்ப காலம் தொட்டு நடப்பது தான். ரெயிலில் முன்கூட்டியே துண்டு போட்டு இடம் பிடிப்பது போல, பின்னாளில் வளரக்கூடிய இடத்தில் தரிசாக கிடக்கும் நிலத்தை வாங்கிப்போடுவது போல இணையத்திலும் புதிய சேவைகளில் முக்கிய பெயர்களை பதிவு செய்து வைத்துக்கொள்ளும் கில்லாடிகள் இருக்கின்றனர். சிலர் இதை திட்டமிட்டு செய்வதுண்டு. சிலர் தற்செய்லாக செய்து வைப்பதும் உண்டு. எது எப்படியோ அந்த குறிப்பிட்ட இணைய சேவை பிரபலமானால் இத்தகைய முகவரிகளுக்கு கிராக்கி ஏற்படும் . இதை பயன்படுத்தி காசு பார்த்தவர்களும் இருக்கிறார்கள். சில நேரங்களில் இது வம்பு வழக்கு என்று பிரச்சனையாவதும் உண்டு. இந்த போக்கிற்கு சமீபத்திய உதாரணமாக எபோலா நோய் ஆபத்து உசத்தில் இருந்த போது எபோலா.காம் எனும் முகவரியை வைத்திருந்தவர் அதை பெருந்தொகைக்கு விற்றதை குறிப்பிடலாம்.

ஸ்பெயினின் காஸ்டனோவும் இப்படி தான், ரியோ டிஜெனிரோ நகரின் டிவிட்டர் முகவரியை பதிவு செய்து வைத்திருந்தார். அடுத்த ஆண்டு அந்நகரில் ஒலிம்பிக் போட்டி நடைபெறும் நிலையில் இந்த கணக்கு எத்தனை மதிப்புவாய்ந்தது என யோசித்துப்பாருங்கள். ஒலிம்பிக் போட்டிகள் பற்றிய தகவல்களை பகிரவும் ,மக்கள் மத்தியில் விழிப்புணர்வு ஏற்படுத்தவும் ரியோ நகருக்கு என்று அதிகார பூர்வ டிவிட்டர் பக்கம் மிகவும் அவசியம். ரியோ நகரமோ @riodejaneiro என்ற முகவரியை கோட்டைவிட்டு விட்டது. வேறு பெயரில் டிவிட்டர் கணக்கை ஒலிம்ப்க்கிற்காக துவக்கி கொள்ளலாம் தான். ஆனால் சிக்க என்ன என்றால் ஒலிம்பிக் தொடர்பாக தகவல்கள் தேடப்படும் போது @riodejaneiro என்ற முகவரியை பலர் டைப் செய்து ஏமாறலாம். அல்லது தேடியந்திரங்கள் இந்த முகவரியை முதலில் சுட்டிக்காட்டலாம். எப்படி இருந்தாலும் அதிகாரபூர்வ டிவிட்டர் பக்கம் இந்த முகவரியில் இருந்தால் நன்றாக இருக்கும்.
ஆக, ஸ்பெயின் பெரியவரிடம் கிட்
டத்தட்ட பொன்னான முகவரி இருக்கிறது என்று தான் சொல்ல வேண்டும்.
அவர் நினைத்திருந்தால் இதை வைத்து பெரிய அளவில் காசு பார்த்திருக்கலாம். ஆனால் அவரோ அவ்வாறு செய்யாமல் இந்த முகவரியை ரியோ நகர் அதிகாரிகளுடம் ஒப்படைத்திருக்கிறார். அதுவும் எப்படி தெரியுமா? தானே அவர்களை தொடர்பு கொண்டு இந்த முகவரி பற்றி தெரிவித்து டிவிட்டர் முகவரியை தானமாக அளித்திருக்கிறார். ( உண்மையில் பலமுறை அவர் இமெயில் அனுப்பிய பிறகே ரியோ அதிகாரிகள் இதன் முக்கியத்துவத்தை உணர்ந்துள்ளனர்).

ஒரு காலத்தில் கிராபிக் டிசைனராக வேலை பார்த்த காஸ்டனோ ஸ்பெயின் பொருளாதார தேக்க நிலை காரணமாக இப்போது ஷு பாலிஷ் போடும் வேலை செய்து வருகிறார். ஆனாலும் கூட இந்த முகவரியை விற்று பணம் பார்க்க அவர் விரும்பவில்லை.
ஆன் ஷூபாலிஷ் போடுபவனாக இருக்கலாம், ஆனால் 13 கோடி ரீயோ மக்களுக்கு என்னிடம் பரிசளிக்க ஒரு விஷயம் இருக்கிறதே என்று இது பற்றி அவர் பெருமித்த்துடன் சொல்கிறார்.

காஸ்டனோ ஏற்கனவே @canada மற்றும் @madrid ஆகிய முகவரிகளை சம்பந்தப்பட்ட நகரங்களிடம் ஒப்படைத்திருக்கிறார். @japan முகவரியையும் கைவசம் வைத்திருப்பவர் ,2020 ஒலிம்பிக் போட்டிகளை நடத்தும் ஜப்பானிடம் ஒப்படைக்க தயாராக இருப்பதாக சொல்கிறார்.
வித்தியாசமான கொடைவள்ளல் தான் !

——-