Tag Archives: email.

ரான்சம்வேர் தாக்குதல்: தப்பிக்க என்ன வழி?

rஇணையத்தை உலுக்கி இருக்கும் வான்னகிரை ரான்சம்வேர் வைரஸ் தாக்குதல் இணையவாசிகள் மத்தியில் அச்சத்தை ஏற்படுத்தியிருக்கும் நிலையில், நோமோர்ரேன்சம்.ஆர்க் இணையதளத்தை அவசியம் தெரிந்து கொள்ள வேண்டும்.

மால்வேர் எனும் தீய நோக்கிலான மென்பொருள்கள் வடிவில் கம்ப்யூட்டருக்குள் நுழைந்து, அதனை தற்காலிகமாக முடக்கி அல்லது, அதில் உள்ள கோப்புகளை அணுக முடியாமல் செய்து விட்டு, இந்த தாக்குதலில் இருந்து விடுபட பினைத்தொகை கேட்டு மிரட்டும் உத்தியுடன் நடைபெறும் தாக்குதல் ரான்சம்வேர் என குறிப்பிடப்படுகிறது.

இந்த வகையான தாக்குதலுக்கு இலக்காகும் நிறுவனங்கள் மற்றும் தனிநபர்களுக்கான புகலிடமாக உருவாக்கப்பட்டது நோமோர்ரேன்சம்.ஆர்க் இணையதளம். யூரோப்போல் ,நெதர்லாந்து காவல்துறை மற்றும் வைரஸ் தடுப்பு நிறுவனங்களான காஸ்பர்ஸ்கை, இண்டெல் செக்யூரிட்டி ஆகியவை இணைந்து இந்த இணையதளத்தை உருவாக்கியுள்ளன.

ரான்சம்வேர் தாக்கினால், பினைத்தொகை கொடுக்க வேண்டாம் என்று வலியுறுத்தும் இந்த தளம், ஏற்கனவே நன்கறியப்பட்ட ரான்சம்வேர் தாக்குதல்களில் இருந்து விடுபடுவதற்கான சாவியை வழங்குகிறது. புதிய தாக்குதலில் இருந்து தப்பிப்பதற்கான வழிமுறைகளையும் தெரிவித்துள்ளது.

இந்த வகை தாக்குதல்களுக்கு தற்காப்பே சிறந்தது என்றாலும், தற்போதைய வான்ன கிரை தாக்குதலில் பாதிக்கப்பட்டவர்களுக்கு வழிகாட்டும் வகையில் இந்த தளம் சில முக்கிய குறிப்புகளை வெளியிட்டுள்ளது.

அவற்றில் முதன்மையானது, mb v1 செயலிழக்கச்செய்வதன் மூலம் இந்த வைரஸ் பரவுவதை தடுக்கலாம் என்பதாகும். மேலும் மைக்ரோசாப்ட் வெளியிட்டுள்ள பாதுகாப்பு பேட்சை உடனே பயன்படுத்த வேண்டும்.

மேலும் சில தற்காப்பு வழிமுறைகளையும் வெளியிட்டுள்ளது: https://www.nomoreransom.org/prevention-advice.html

 

இது தொடர்பான முந்தைய கட்டுரை: http://bit.ly/2pOjlVU

வெற்றி நூலகம்: லிங்க்டுஇன் தொடங்கிய தத்துவ மாணவர்

linkedin_3150669fஇணையவாசிகள் முழுக்க முழுக்க தொழில்முறையாகத் தங்களை வெளிப்படுத்திக் கொள்வதற்கான இடமாக லிங்க்டுஇன் இருக்கிறது. வேலைவாய்ப்புக்குக் காத்திருக்கும் இளம் பட்டதாரிகளும், தங்கள் துறையில் முன்னேறத் துடிக்கும் பணியாளர்களும், வல்லுநர்களும் தங்களுடைய திறமையை வெளிப்படுத்துவதற்கான வலைப்பின்னலாகவும் விளங்குகிறது. நிறுவன விளம்பரங்களைப் பார்த்து விண்ணப்பிக்கும் பழைய முறைக்குப் பதிலாக, பயனாளிகள் தங்களுக்கான தொடர்புகளை ஏற்படுத்திக்கொள்வதன் மூலம் திறமைக்கேற்ற வாய்ப்புகளை அடையாளம் காண உதவுகிறது.

தொடர்புகளின் அருமையை உணர்ந்தவர்!

பயிற்சி மாணவர்களுக்கு அவர்களுடைய துறையில் வழிகாட்டும் வல்லுநர்களின் அறிமுகம் தேவையா? தற்போதைய வேலையிலிருந்து அடுத்த கட்டத்துக்குச் செல்ல வேண்டுமா? சொந்தமாக நிறுவனம் தொடங்க ஆலோசனை தேவையா? எல்லாவற்றுக்கும் லிங்க்டுஇன் வலைப்பின்னல் மூலம் வழிகாணலாம். அதே நேரத்தில் மனிதவள மேம்பாட்டுத்துறை அதிகாரிகளும், நிறுவன உயர் அதிகாரிகளும் திறமைமிக்க இளம் வல்லுநர்களை அடையாளம் கண்டுகொள்ளவும் லிங்க்டுஇன் வழிசெய்கிறது.

சமூக வலைப்பின்னல் யுகத்தின் தொடக்கப் புள்ளிகளில் ஒன்றாக லிங்க்டுஇன் விளங்குகிறது. ஃபேஸ்புக் அறிமுகமாவதற்கு முன்பே லிங்க்டுஇன் உதயமாகிவிட்டது. அதன் நிறுவனரான, ரீட் ஹாஃப்மன் (Reid Hoffman) தொடர்புகளின் அருமையை உணர்ந்திருந்ததே லிங்க்டுஇன் தோற்றத்துக்கும், வளர்ச்சிக்கும் காரணமாக அமைந்தது. ஹாஃப்மன், கல்லூரிகாலத்தில் தத்துவ அறிஞராக வேண்டும் என விரும்பினார். உலகில் மாற்றத்தை ஏற்படுத்த ஏதாவது செய்ய வேண்டும் எனத் துடித்துக்கொண்டிருந்தவர், பின்னர்ச் சாஃப்ட்வேர் துறைக்கு வந்துவிட்டார்.

எப்படி, எதற்காகப் பகிரப்படுகின்றன?

ரீட் ஹாப்மன், அமெரிக்காவின் கலிபோர்னியாவில் உள்ள பாலே ஆல்டோவில் பிறந்து பெர்க்ளியில் வளர்ந்தவர். அவருடைய பெற்றோர் இருவருமே முற்போக்கு எண்ணம் கொண்ட வழக்கறிஞர்கள். குழந்தையாக இருக்கும்போதே பெற்றோர் அவரை ஆர்ப்பாட்டங்களுக்கும் பேரணிகளுக்கும் அழைத்துச் சென்றனர். பத்து வயதில் அவருக்குக் கணினி விளையாட்டு அறிமுகமானது.

தத்துவம், உளவியல், கணினி அறிவியல், மொழியியல் ஆகிய பிரிவுகளைக் கொண்டிருந்த சிம்பாலிக் சிஸ்டம்ஸ் படிப்பை ஸ்டான்ஃபோர்ட் பல்கலைக்கழகத்தில் படித்தார். அந்தப் பாடத்திட்டம் தத்துவம் மற்றும் உலக நடப்புகள் குறித்து அவரை யோசிக்கவைத்தது.

ஸ்டான்ஃபோர்டில் படித்தபோது தீவிரமாக அரசியல் சார்ந்த விவாதங்களில் ஈடுபட்டார். இங்குதான் அவருக்கு எதிர்காலத்தில் ‘பே பால்’ (Paypal) நிறுவனத்தைத் தொடங்கவிருந்த பீட்டர் தியலின் அறிமுகமும் கிடைத்தது. பொதுவாகவே எண்ணங்களை வெளிப்படுத்துவதிலும், கருத்துகளைப் பகிர்ந்துகொள்வதிலும் அவருக்கு ஆர்வம் இருந்தது. கருத்துகள் எப்படிப் பகிரப்படுகின்றன என்பதில் மட்டுமல்ல, எந்தக் கருத்துகள், எதற்காகப் பகிர்ந்து கொள்ளப்படுகின்றன என்பதிலும் கவனம் செலுத்தினார்.

1990-ல் பட்டப்படிப்பை முடித்தவுடன், புகழ்பெற்ற ஆக்ஸ்ஃபோர்ட் பல்கலைக்கழகத்தில் ஊக்கத்தொகை யுடன் மேற்படிப்பைத் தொடர்வதற்கு வாய்ப்பு கிடைத்தது. பேராசிரியராக, எழுத்தாளராக, தத்துவவாதியாக உருவாகும் எண்ணம் அப்போது ஏற்பட்டது. மேலும் உலகம் மீது நேரடி தாக்கத்தை ஏற்படுத்த விரும்பினார். இதற்குக் கல்வித் துறையைவிட மென்பொருள் துறையே ஏற்றது எனத் தீர்மானித்தவர், ஆக்ஸ்ஃபோர்டில் படிப்பை முடித்தவுடன் ஸ்டான்ஃபோர்ட் திரும்பினார்.

பணமும் படிப்பினையும்

நிறுவனங்களுக்கு நிதி திரட்டுவது பற்றி நிறைய புத்தகங்களைப் படித்தார். மற்ற நேரங்களில் முக்கிய நிதி முதலீட்டாளர்களை சந்தித்தபோதெல்லாம், “முதலில் ஏதாவது சேவையை உருவாக்கிவிட்டு வா…” என்று அறிவுரை கூறி அனுப்பினர். இதனிடையே ஆப்பிளின் இணையப் பிரிவான இ-வேர்ல்டி வேலை கிடைத்தது. ஆப்பிளில் பணியாற்றியபோதே புதிய நிறுவனத்தைத் தொடங்கத் தனக்கு என்னவெல்லாம் தெரிய வேண்டும் எனப் பட்டியலிட்டு அதை நோக்கி உழைத்தார்.

1997-ல் தன்னுடைய முதல் ஸ்டார்ட் அப் நிறுவனமான சோஷியல்நெட்-ஐ தொடங்கினார். டேட்டிங் தளமாக இயங்கினாலும் எதிர்பார்த்த விதத்தில் அந்நிறுவனம் வளரவில்லை. அதில் கிடைத்த பணத்தையும் படிப்பினையையும் வைத்து அடுத்த ஸ்டார்ட் அப்புக்குத் தயாரானார். அப்போது இணையப் பணப் பரிவர்த்தனை நிறுவனமான பே பாலை அவருடைய நண்பர் பீட்டர் தியல் தொடங்கியிருந்தார். அதில் சில காலம் பணியாற்றிப் பணி அனுபவத்தைச் சேகரித்துக்கொண்டார்.

தொடர்பின் முக்கியத்துவம்

பே பாலில் இணையம் மூலமான பணப் பரிவர்த்தனை சேவை காலத்தால் முந்தையதாக இருந்ததோடு, கிரெடிட் கார்டு நிறுவனங்கள், வங்கி அமைப்புகளுடன் போராட வேண்டியிருந்தது. இத்தகைய சவால்களைச் சமாளிக்கும் பொறுப்பை ஹாப்மன் ஏற்றுக்கொண்டார். இந்த அனுபவம் அவருக்குத் தொடர்புகளின் முக்கியத்துவத்தை அழுத்தமாக உணர்த்தியது. 2002-ல் பே பால் நிறுவனத்தைப் பிரபல ஏல நிறுவனமான இபே விலைக்கு வாங்கியது.

அதன் மூலம் கையில் கணிசமான பணம் கிடைத்தது. அடுத்து, ஸ்டான் ஃபோர்ட் நண்பர்கள் உள்ளிட்ட நான்கு இணை நிறுவனங்களுடன் சேர்ந்து தொழில்முறையில் செயல்படக் கூடிய சமூக வலைப்பின்னல் சேவையான லிங்க்டுஇன் தளத்தைத் தொடங்கினார்.

ஆரம்பத்தில் அதன் வளர்ச்சி எதிர்பார்த்த வேகத்தில் அமைய வில்லை. பலருக்கும் லிங்க்டுஇன் சேவையின் பயன்பாடு சரியாகப் புரியவில்லை. பயோடேட்டா போன்ற விவரங்களைப் பதிவேற்றுவது தவிர, அதில் என்ன செய்ய முடியும் புரியாமல் தவித்தனர்.

இந்தக் கட்டத்தில்தான் ஹாப்மன், பயனாளிகள் தங்கள் இமெயில் தொடர்புப் பட்டியலை அப்படியே பதிவேற்ற வழிசெய்தார். இதன் வழியாகப் புதிய தொடர்புகள் கண்டறியப்பட வழி பிறந்தது. முன்பின் தெரியாதவர்களிடமிருந்து இ-மெயில்கள் வருவது எரிச்சலை ஏற்படுத்தினாலும், புதிய தொடர்புகளுக்கு இது வழி வகுத்தது.

தேவதை முதலீட்டாளர்

அடுத்ததாக, நிறுவனங்கள் வேலைவாய்ப்புத் தகவல்களைப் பறித்துக்கொள்ளும் வசதிகளையும் இத்தளத்தில் ஏற்படுத்தினார் ஹாஃப்மன். அதோடு லிங்க்டுஇன் தகவல்களை மற்றவர்கள் பொதுவில் பார்க்கவும் வழிசெய்தார். இதனால் கூகுளில் ஒருவரின் பெயர் தேடப்படும்போது, அவரது லிங்கடுஇன் பக்க விவரமும் தேடல் முடிவுகளில் தோன்றுவது சாத்தியமானது.

இதனை அடுத்து, அமெரிக்கா மட்டுமல்லாமல் 200-க்கும் அதிகமான நாடுகளில் வேலைவாய்ப்பு நாடுபவர்கள் மற்றும் தொழில்முறை தொடர்புகளை நாடுபவர்கள் விரும்பிப் பயன்படுத்தும் சேவையாக உருவெடுத்தது. 2016 மத்தியில் மைக்ரோசாஃப்ட் நிறுவனம் லிங்க்டுஇன் நிறுவனத்தை விலைக்கு வாங்கியது தொழில்முறை வலைப்பின்னல் சேவையாக அதன் முக்கியத்துவத்தை உணர்த்தியது.

லிங்க்டுஇன் நிறுவனராக அதன் வளர்ச்சிக்காகத் தீவிரமாகச் செயல் பட்டுக்கொண்டிருந்த அதே நேரத்தில் ஹாஃப்மன், தேவதை முதலீட்டாளராகப் பல ஸ்டார்ட் அப் நிறுவனங்களிலும் முதலீடு செய்துவருகிறார். சிலிக்கான் பள்ளத்தாக்கில் இளம் தொழில்முனைவோருக்கான வழிகாட்டியாகவும் விளங்குகிறார். அந்த வகையில் சிலிக்கான் பள்ளத்தாக்கின் வலைப்பின்னல் மனிதராகப் புகழப்படுகிறார்.

சைபர் சிம்மன் எழுதிய ‘நம் காலத்து நாயகர்கள்’ புத்தகத்தில் இடம்பெற்ற ‘ரீட் ஹாப்மன்’ கட்டுரையின் சுருக்கம். (புதிய தலைமுறை பதிப்பகம்)


தமிழ் இந்துவின் அறிமுகத்திற்கு நன்றி!

உங்களுக்காக ஒரு இணையதளம்

habit-apps-daybookஇலக்குகளை அடைய உதவும் இணையதளங்களின் வரிசையில் புதிய தளமாக அறிமுகமாகி இருக்கும் டேபுக் தளம், பயனாளிகள் தாங்கள் செய்ய விரும்பும் பணிகளை தொடர்ந்து கடைபிடிப்பதற்கான ஊக்கம் அளிக்கும் வழியாக அமைந்துள்ளது.

சுயமுன்னேற்றம் அல்லது மேம்பாட்டில் விருப்பம் உள்ளவர்கள் தாங்கள் செய்ய விரும்பும் செயல்களை குறித்து வைத்துக்கொண்டு அதை மறக்காமல் இருக்க விரும்புவார்கள். இதற்கு உதவும் வகையில் அழகாக வடிவமைக்கப்பட்டுள்ளது டேபுக்.கோ இணையதளம்.

இந்த தளத்தில் வரிசையாக செய்ய வேண்டிய செயல்களின் பட்டியல் கொடுக்கப்பட்டுள்ளது. படிக்க வேண்டிய புத்தகங்கள், பார்க்க வேண்டிய திரைப்படங்கள், தினமும் ஓடுவது என இந்த பட்டியல் அமைந்துள்ளது. இவற்றை கிளிக் செய்து , நமக்கான குறிப்புகளை அதில் இணைக்கலாம். ஓட்டப்பயிற்சி என்றால், தினமும் அது பற்றி குறிப்பிடலாம். இப்படி செய்வதன் மூலம் தொடர்ந்து அந்த முயற்சியில் ஈடுபடலாம்.

இந்த பட்டியல் தவிர பயனாளிகள் தாங்கள் விரும்பும் எந்த செயலை வேண்டுமானாலும் புதிதாக சேர்த்துக்கொண்டு அது தொடர்பான முன்னேற்றத்தை தொடர்ச்சியாக பதிவு செய்து வரலாம். மிகவும் எளிமையான வடிவமைப்புடன் இந்த தளம் அமைந்துள்ளது .

இலக்கை நோக்கி முன்னேற விரும்புகிறவர்கள் தாங்களை தாங்களே கண்காணித்துக்கொள்ளவும், அடுத்த கட்டத்தை நோக்கி முன்னேறுவதற்கான ஊக்கம் பெறவும் இந்த தளம் உதவும்.

இணைய முகவரி: https://www.daybook.co/

 

 

செயலி புதிது: வாசிப்பை பகிர உதவும் செயலி

படித்தால் மட்டும் போதுமா? பகிர வேண்டாமா? என கேட்பது போல ஸ்மார்ட்போன் யுகத்தில், புத்தக பிரியர்கள் விரும்பி வாசிக்கும் புத்தகத்தை மற்றவர்களுடன் பகிர்ந்து கொள்வதற்கான வசதியை அளிக்கும் வகையுல் புக்லைட்ஸ் செயலி உருவாக்கப்பட்டுள்ளது. ஐபோன்களுக்காக உருவாக்கப்பட்டுள்ள இந்த செயலி மூலம் புத்தக பிரியர்கள் தாங்கள் வாசிக்கும் மின்புத்தகங்களில், மிகவும் ரசித்த பகுதியை அடிக்கோடிட்டு அதன் திரை தோற்றத்தை மற்றவர்களுடம் பகிர்ந்து கொள்ளலாம்.

பொதுவாக ஒரு புத்தகத்தை வாசித்ததும், அதில் நம்மை கவர்ந்த பகுதிகளை மனதுக்குள் அசைபோட்டுவிட்டு பின்னர் மறந்து விடுகிறோம். ஆனால் இதற்கு பதிலாக புத்தகத்தில் ரசித்த பகுதிகளை மற்றவர்களுடன் பகிர்ந்து கொள்வதன் மூலம், வாசிப்பின் பயனை பரவலாக பெறலாம் எனும் அடிப்படையில் இந்த செயலி உருவாக்கப்பட்டுள்ளது.

இதன் மூலம் டிவிட்டர் மற்றும் பேஸ்புக் ஆகிய சேவைகளிலும் புத்தகத்தின் சிறந்த பகுதிகளை பகிர்ந்து கொள்ள முடியும். புத்தக புழுக்கள் தங்கள் ரசனையை பகிர்ந்து கொள்வதற்கான வழியாக இருக்கும் என்பதோடு, புதிய புத்தகங்களை அறிமுகம் செய்து கொள்வதற்கான வழியாகவும் இந்த பகிர்தல் அமையலாம்.

புத்தக வாசிப்பை இணைய யுகத்திற்கு ஏற்றதாக மாற்றும் முயற்சியாக இந்த செயலி அமைந்துள்ளது. எந்த அளவு வெற்றி பெறுகிறது என்பதையும், ஆண்ட்ராய்டு போனுக்கான மாதிரி வெளியாகும் வாய்ப்புள்ளதா என்பதையும் பொறுத்திருந்து பார்க்கலாம்.

மேலும் விவரங்களுக்கு: http://booklights.us/

தொழில்நுட்ப உலகின் சுவடுகளும், புதிய போக்குகளும்!

2016 ல் தொழில்நுட்ப உலகை திரும்பி பார்க்கும் போது சைபர் தாக்குதல்கள், பொய் செய்தி பிரச்சனை, தாக்காளர்கள் கைவரிசை ஆகிய நிகழ்வுகள் ஆதிக்கம் செலுத்தியதை பார்க்க முடிகிறது. பாட்கள் எனப்படும் தானியங்கி மென்பொருள்களின் எழுச்சி, செயற்கை நுண்ணறிவு தொடர்பான விவாதம், இணைய சமநிலைக்கான குரல் ஆகிய போக்குகளும் கவனத்தை ஈர்க்கின்றன. கூகுளின் பிக்சல் போன் அறிமுகம், ஸ்மார்ட்போன் பிரியர்களை பித்து பிடித்து அலைய வைத்த போக்கேமான் கோ விளையாட்டு, ஐஸ் பக்கெட் சாலெஞ்ச் போல பிரபலமாகி வரும் மேனிக்வன் சாலன்ஞ் ஆகிய போக்குகளும் முக்கியமாக திகழ்கின்றன. விடைபெறும் ஆண்டில் தொழில்நுட்ப உலகில் கவனத்தை ஈர்த்த முக்கிய நிகழ்வுகள் பற்றி ஒரு பார்வை:

பிரிபேசிக்சிற்கு தடை

இணைய சேவைகளை பயன்படுத்துவதில் பாரபட்சமான கட்டண முறையை கடைபிடிக்க கூடாது என தொலைதொடர்பு ஒழுங்குமுறை ஆணையமான டிராய் பிறப்பித்த தடையாணை இணைய சமநிலைக்கு ஆதரவான உத்தரவாக அமைந்தது. இந்த உத்தரவை அடுத்து பேஸ்புக் நிறுவனம் தனது சர்ச்சைக்குறிய பிரிபேசிக்ஸ் திட்டத்தை இந்தியாவில் விலக்கி கொள்வதாக அறிவித்தது. இணையதளங்களை இலவசமாக பயன்படுத்த வழி செய்வதாக பேஸ்புக் கூறினாலும், ஒரு பகுதி இணையத்தை மட்டுமே அணுக வழி செய்வதால் இந்த திட்டம் இணைய சமநிலைக்கு எதிரானது என கடும் விமர்சனத்திற்கு இலக்கானது.

வாட்ஸ் அப் என்கிரிப்ஷன்

முன்னணி மெசேஜிங் சேவையான வாட்ஸ் அப், செய்திகள், ஒளிப்படங்கள், வீடியோக்கள் என அனைத்துவிதமான பரிவர்த்தனைகளும் என்கிரிப்ஷன் முறையில் பாதுகாக்கப்படுவதாக அறிவித்து பரபரப்பை ஏற்படுத்தியது. இது இணைய உலகில் இன்கிர்பிஷன் தொடர்பான முக்கியத்துவத்தையும் உண்டாக்கியது. தரவுகள் பரிமாற்றத்தை சங்கேத குறியீடுகள் மூலம் பாதுகாக்கும் இந்த முறையால் அனுப்புகிறவர் மற்றும் பெறுபவர் மட்டுமே உரிய செய்தியை வாசிக்க முடியும்.

வாட்ஸ் அப் தனது தனியுரிமை கொள்கையை மாற்றி அமைத்ததும் பெரும் சர்ச்சையை ஏற்படுத்தியது. இதன் படி பயனாளிகளின் தொலைபேசி எண் உள்ளிட்ட தகவல்களை தாய் நிறுவனமான பேஸ்புக்குடன் பகிர்ந்து கொள்ள இருப்பதாக வாட்ஸ் அப் அறிவித்தது விவாத்ததையும் ஏற்படுத்தியது.

போக்கேமான் கோ மோகம்

ஸ்மார்ட்போன்களில் அறிமுகமான போக்கேமான் கோ விளையாட்டு, பெரும் வரவேற்பை பெற்று புதிய மோகமாக உருவானது. ஆக்மெண்டட் ரியாலிட்டி எனப்படும் மேம்படுத்தப்பட்ட யதார்தத்தை அடிப்படையாக கொண்டு உருவாக்கப்பட்ட இந்த விளையாட்டு, போக்கேமான் ஜீவராசிகளை தேடிப்பிடிப்பதற்காக ஸ்மார்ட்போன் பிரியர்களை வீடு, அலுவலகங்களை விட்டு வெளியேறி பொது இடங்களில் அலைய வைத்தது. குறிப்பிட்ட சில நாடுகளில் தான் முதல் கட்டத்தில் அறிமுகமானாலும் இந்த விளையாட்டு இந்தியா உள்பட பல்வேறு நாடுகளில் வரவேற்பை பெற்றது.

பொய் செய்தி பிரச்னை

சமூக ஊடகங்களின் செல்வாக்கு அதிகரித்து வரும் நிலையில், அவற்றின் மூலம் பகிரப்படும் பொய்ச்செய்தி பிரச்சனை கவலையை ஏற்படுத்தியது. குறிப்பாக அமெரிக்க அதிபர் தேர்தலின் போது டிரம்பிற்கு ஆதாரவாக ரஷ்யாவை மையமாக கொண்ட போலி இணையதளங்கள் சார்பில் உருவாக்கி உலாவிடப்பட்ட பொய்ச்செய்திகள் கவனத்தை ஈர்த்து விவாத்ததை ஏற்படுத்தின. பொய்ச்செய்திகளை கட்டுப்படுத்துவதில் தீவிரம் காட்டுவதாக பேஸ்புக், கூகுள் அறிவித்தன.

சைபர் தாக்குதல்

2016 ல் ஏதேனும் ஒரு வகையில் சைபர் தாக்குதல்கள் தலைப்புச்செய்தியில் இடம் பெற்றுக்கொண்டே இருந்தன. யாஹு நிறுவனம் தனது லட்சக்கணக்கான பயனாளிகள் தொடர்பான தகவல்கள் தாக்காளர்கள் கைவரிசைக்கு இலக்கானது தெரிவித்தது அதிர்ச்சியை ஏற்படுத்தியது. அமெரிக்க தேர்தல் செயல்முறையை பலவீனப்படுத்தும் வகையிலான செயலில் ரஷ்யவைச்சேர்ந்த தாக்காளர்கள் குழு ஈடுபட்டதாக செய்திகள் வெளியாயின. ஜனநாயக கட்சியின் பிரச்சார வலைப்பின்னல் தாக்குதலுக்கு இலக்கானது.

ராகுலுக்கு குறி

பேஸ்புக் நிறுவனர் மார்க் ஜக்கர்பர்க், கூகுள் சி.இ.ஒ சுந்தர்பிச்சை உள்ளிட்டோரும் தாக்காளர்களின் கைவரிசைக்கு இலக்கானார்கள். இந்தியாவில் காங்கிரஸ் துணைத்தலைவர் ராகுல் காந்தியின் டிவிட்டர் பக்கம் மற்றும் காங்கிரஸ் கட்சியின் டிவிட்டர் பக்கம் தாக்குதலுக்கு இலக்கானது.

பாட்களின் எழுச்சி

பாட்கள் என குறிப்பிடப்படும் தானியங்கி மென்பொருள்கள் தொடர்பான செய்திகள் பெருமளவு கவனத்தை ஈர்த்தன. அரட்டைக்கான பாட்கள், வர்த்தக நிறுவனம் சார்பில் வாடிக்கையாளர்களுக்கு வழிகாட்டும் பாட்கள் உள்ளிட்டவை வருங்காலத்தில் புதிய போக்காக அமையும் என வல்லுனர்கள் தெரிவித்தனர். வங்கிச்சேவை உள்ளிட்டவற்றில் இந்த வகை மென்பொருகளே வழிகாட்டும் நிலை உருவாகும் என எதிர்பார்க்கப்படுகிறது. பேஸ்புக்,கூகுள், மைக்ரோசாப்ட் ,ஆப்பிள் உள்ளிட்ட நிறுவனங்கள் இதில் தீவிரம் காட்டி வருகின்றன. இதே போலவே செயற்கை நுண்ணறிவு சார்ந்த ஆய்வுகளும் தீவிரமாகியுள்ளன. தானியங்கி மயமாக்களின் விளைவாக வேலை இழப்பு ஏற்படும் அபாயம் பற்றியும் ஆய்வுகள் வெளியாகின.

யு.பி.ஐ செயலி அறிமுகம்

தேசிய பேமெண்ட்ஸ் கார்ப்பரேஷன் உருவாக்கிய யு.பி.ஐ செயலி அறிமுகமானது. ஸ்மார்ட்போன் மூலம் வங்கி கணக்கில் இருந்து நேரடியாக பணம் அனுப்ப, பெற உதவும் இந்த செயலியை முன்னணி வங்கிகள் அறிமுகம் செய்தன. டிஜிட்டல் பரிவர்த்தனை தொடர்பான விவாதமும், விழிப்புணர்வும் அதிகரித்து வரும் நிலையில், பண பரிவர்த்தனைக்காக முக்கிய வழிகாக யு.பி.ஐ கவனத்தை ஈர்க்கிறது.

கபாலி தி பாஸ்

பெரிதும் எதிர்பார்ப்பை ஏற்படுத்திய நடிகர் ரஜினி காந்தின் கபாலி திரைப்படம் இணையத்தில் அதிர்வலைகளை எழுப்பியது. இந்த படத்தின் முன்னோட்டம் வெளியான போது இணையத்திலும், சமூக ஊடகங்களிலும் கபாலிடா எனும் பதம் டிரெண்டானது. முன்னோட்ட காணொலி யூடியூப்பில் பெரும் வரவேற்பை பெற்றது. படம் வெளியான போதும் டிவிட்டரில் ரஜினியின் திரை செல்வாக்கை வெளிப்படுத்தும் குறும்பதிவுகள் அதிக அளவில் பகிரப்பட்டன.

சுஷ்மாவின் சுறுசுறுப்பு’

வெளியுறவுத்துறை அமைச்சரான சுஷ்மா ஸ்வராஜ், டிவிட்டர் மூலம் தொடர்பு கொண்டவர்களுக்கு தேவையான உதவிகளை செய்வதில் சுறுசுறுப்பாக செயல்பட்டு அனைவரது பாராட்டையும் பெற்றார். டிவிட்டர் பயன்பாட்டில் முன்னுதாரணமாக திகழும் ஸ்வராஜ், நோய்வாய்ப்பட்டு மருத்துவமனையில் அனுமதிக்கப்பட்ட தகவலையும் டிவிட்டர் மூலம் தானே பகிர்ந்து கொண்டார். இணையவாசிகள் அவர் நலம்பெற விரும்பி குறும்பதிவுகளை வெளியிட்டனர்.

கலைநயமான செயலி

ஆண்ட்ராய்டு மற்றும் ஐபோன்களுக்காக எண்ணற்ற செயலி அறிமுகமானாலும், பிரிஸ்மா செயலி பெரும்பாலானோரின் கவனத்தை ஈர்த்தது. பயனாளிகள் தங்கள் ஒளிப்படங்களை நவீன ஓவியம் போல மாற்றிக்கொள்ள வழி செய்யும் இந்த செயலி வாயிலாக பகிரப்பட்ட படங்கள் அவற்றின் கலைநயமான தோற்றத்திற்காக வரவேற்பை பெற்றன.

கூகுள் பிக்சல் போன்

கூகுள் நிறுவனம் அறிமுகம் செய்த பிக்சல் ஸ்மார்ட்போன்கள் ஆண்டின் சிறந்த ஸ்மார்ட் அறிமுகங்களில் ஒன்றாக திகழ்கிறது. கூகுள் நிறுவனத்தால் நேரடியாக அறிமுகம் செய்யப்பட்ட முதல் ஸ்மார்ட்போன் எனும் அந்தஸ்து மற்றும் இதன் மேம்பட்ட தொழில்நுட்ப அம்சங்கள் பரவலாக பேசப்பட்டன. புதிய ஆண்ட்ராய்டு இயங்குதளத்தை அடிப்படையாக கொண்டு அறிமுகமானது. ஐபோன் 7பிளஸ், சாம்சங் காலெக்ஸி எஸ் 7, மோட்டோ இசட், ஜியோமி ரெட்மி 3எஸ் பிரைம், எச்டிசி 10 உள்ளிட்ட ஸ்மார்ட்போன்களின் குறிப்பிடத்தக்கதாக அமைந்தன. இவற்றில் காலெக்ஸி 7 போன்கள் அவற்றின் தீப்பிடித்துக்கொள்ளும் தன்மைக்காக சர்ச்சைக்கு இலக்காயின.

ஸ்னேப்சேட் கண்ணாடி’

தானாக மறையும் ஒளிப்படங்களை பகிர்ந்து கொள்ள வழி செய்யும் ஸ்னேப்சேட் நிறுவனம், புதிய முக்கு கண்ணாடியை அறிமுகம் செய்தது. ஸ்னேப்சேட் ஸ்பெக்டகல் எனும் இந்த சாதனம் அறுவை சிகிச்சை உள்ளிட்டவற்றை நேரடி ஒளிபரப்பு செய்ய உதவி வருகிறது. அணிகணிணி உலகில் புதிய போக்காக அமையலாம் என எதிர்பார்க்கப்படுகிறது.

சாய்வாலா புகழ்

இணையம் மூலம் பல படங்களும், வீடியோக்களும் வைரலாக பரவி புகழ் பெற்றன என்றாலும், பாகிஸ்தானில் டீக்கடை ஒன்றில் பணியாற்றிய வாலிபர் ஒரு ஒளிப்படத்தால் ஒரே நாளில் இணையம் முழுவதும் அறிந்தவரானார். அர்ஷ்த் கான் எனும் அந்த வாலிபர் டீக்கடை ஒன்றில் டீ ஆற்றிக்கொண்டிருக்கும் காட்சியை ஒளிப்படக்கலைஞர் ஒருவர் தனது டிவிட்டர் பக்கத்தில் பகிர்ந்து கொண்டார். அந்த வாலிபரின் அழகான தோற்றமும், பச்சை நிற கண்களும் கவர்ந்திழுத்தி அவரது ஒளிப்படத்தை லட்சகணக்கானோர் பகிர வைத்தது. அவரது பாகிஸ்தானை சேர்ந்தவராக இருந்தது இந்தியர்கள் மத்தியில் கூடுதல் கவனத்தை ஏற்படுத்தியது. இணைய புகழ் காரணமாக இந்த வாலிபருக்கு விளம்பர பட வாய்ப்பும் தேடி வந்தது. இதே போல அமெரிக்காவில் டேம் டேனியல் எனும் வாலிபர் தனது அழகான தோற்றத்திற்காக இணைய புகழ் பெற்றார்.

இணைய மயக்கம்

பெண்மணி ஒருவரின் கால்களின் தோற்றமும் இணையதத்தை குழப்பத்தில் ஆழ்த்தியது. அந்த படத்தில் உள்ள கால்களின் தோற்றம் பளபளப்பாக இருக்கிறதா? அல்லது அவற்றின் மீது வெள்ளை பெயிண்ட் பூசப்பட்டிருக்கிறதா? எனும் கேள்விக்கு தெளிவாக பதில் சொல்ல முடியதாதே இந்த படத்தை பற்றி பேச வைத்தது. இணையம் இதற்கு பதில் அளிப்பதில் சரி பாதியாக பிரிந்து நின்றது. அதே போல பள்ளி மாணவர்களுக்கான் குதிரை படங்களை கொண்ட அல்ஜீப்ரா புதிரும் இணையத்தை கவர்ததது.

வைரல் வீடியோ

சில ஆண்டுகளுக்கு முன்னர் குளிரிந்த நீரை மேலே கொட்டிக்கொள்ளும் ஐஸ் பக்கெட் சாலெஞ் வீடியோ வைரலானது போல 2016 இறுதியில் சிலையாக நிற்கும் மானிக்குவன் சாலஞ்ச வைரலானது. பின்னணியில் இசை ஒலிக்க, ஒரு செயலை செய்து கொண்டிருக்கும் போதே இடையே சிலையாக நிற்பது போல காட்சி தரும் வகையிலான வீடியோவை பகிர்வது புதிய போக்காக உருவாகி இருக்கிறது.

 

 

நன்றி. தமிழ் இந்துவுக்காக எழுதியது

 

 

புத்தகம் படிக்க உதவும் செயலி

தளம் புதிது: ஆவணப்படங்களை பார்த்து ரசிக்க!

docuஇணையத்தில் ஆவணப்படங்களை பார்த்து ரசிக்க உதவும் இணையதளங்களின் பட்டியலில் புதிதாக இணைந்திருக்கிறது ரோக்கும்னடரிஸ் இணையதளம்.
இந்த தளம் தேர்ந்தெடுக்கப்பட்ட சிறந்த ஆவணப்படங்களை பார்த்து ரசிக்க உதவுவதாக கூறுகிறது.
பிபிசி. சேனல்4, நெட்பிளிக்ஸ் ,யூடியூப் மற்றும் விமியோ உள்ளிட்ட தளங்களில் இருந்து ஆவணப்படங்களை தேர்வு செய்து இந்த தளம் பட்டியலிடுகிறது. முகப்பு பக்கத்திலேயே இந்த பட்டியலை பார்க்கலாம். அவற்றில் தேவையானதை கிளிக் செய்து பார்த்துக்கொள்ளலாம்.
இப்போதைக்கு பிரிட்டனில் உள்ள ஆவணப்படங்களை மட்டுமே பட்டியலிடுவதாகவும், விரைவில் உலகம் முழுவதும் உள்ள ஆவணப்படங்கள் பட்டியலிடப்படும் என்றும் தெரிவிக்கப்பட்டுள்ளது.
எனவே இவற்றில் சிலவற்றை பார்ப்பதில் காப்புரிமை சிக்கல்கள் இருக்கலாம்.
ஆனால் யூடியூப் போன்ற தளங்களில் இருந்து தேர்வு செய்யப்படவற்றை எளிதாக பார்க்கலாம். எப்படி இருந்தாலும் புதிய ஆவணப்படங்கள் பற்றி தெரிந்து கொள்வதற்கான சிறந்த தளமாக இருக்கிறது.
இமெயில் முகவரியை சமர்பித்து உள்பெட்டியிலும் புதிய ஆவணப்படங்கள் பற்றிய தகவல்களை பெறலாம்.

இணையதள முகவரி: http://rocumentaries.com/

செயலி புதிது: புத்தகம் படிக்க உதவும் செயலி

bookletஸ்மார்ட்போன் தலைமுறையினர் மத்தியில் புத்தகம் படிக்கும் பழக்கம் குறைந்துவிட்டது என்று சொல்லப்படுவதை அடிக்கடி கேள்விபடுகிறோம். இந்த பிரச்சனைக்கு, ஸ்மார்ட்போன் மூலமே தீர்வு ஒன்றை முன்வைத்திருக்கிறார் ஸ்மார்ட்போன் தலைமுறை இளைஞரான அம்ருத் தேஷ்முக். இவரது தீர்வு புத்தகம் படிக்க உதவும் செயலி.
புக்லெட் எனும் இந்த செயலி மூலம் அவர் வாரம் ஒரு புத்தகத்தின் சுருக்கத்தை வழங்கி வருகிறார். முழு புத்தகத்தையும் படிக்க வேண்டிய அவசியம் இல்லாத அளவுக்கு அதன் சாரம்சத்தை புரிய வைக்கும் அளவுக்கு இந்த புத்தக சுருக்கம் அமைகிறது. அதே நேரத்தில் வெறும் விமர்சனமாக இல்லாமல், வாசிப்பு அனுபவத்தை வழங்க கூடியதாக இருக்கிறது.
பெஸ்ட் செல்லர் என சொல்லப்படும் அதிகம் விற்பனையாகும் புத்தகங்களில் இருந்து ஒரு புத்தகத்தை தேர்வு செய்து வாசித்து அதன் சுருக்கத்தை அளிக்கிறார் அம்ருத். 20 நிமிடங்களில் படித்துவிடக்கூடியதாக இது அமைந்துள்ளது. பல்வேறு தலைப்புகளில் புத்தகங்கள் தேர்வு செய்யப்படுகின்றன. சுயசரிதை, சுயமுன்னேற்றம், நிர்வாகவியல் உள்ளிட்ட துறைகளில் புத்தகங்கள் அமைந்துள்ளன. எல்லாமே ஆங்கில புத்தகங்கள்.
வேலைபளு அல்லது சோம்பல் காரணமாக புத்தகங்களை படிக்கும் பழக்கம் குறைந்துவிட்ட நிலையில் வாசிப்பு பழக்கத்தை ஏற்படுத்தும் நோக்கத்துடன் இந்த செயலியை அவர் உருவாக்கியுள்ளார்.
புத்தக சுருக்கத்தையும் படிக்க நேரமில்லை என்பவர்களுக்கான அவற்றை ஒலிப்புத்தகமாகவும் வழங்குகிறார்.

மேலும் விவரங்களுக்கு: https://play.google.com/store/apps/details?id=com.booklet.app&hl=en

வீடியோ புதிது: போட்டோஷாப் பாடங்கள்

productphotofeat-800x420-300x200-c-defaultவீடியோ பகிர்வு சேவையான யூடியூப்பில் லட்சக்கணக்கில் பார்க்கப்பட்ட வீடியோக்களும், ஆயிரக்கணக்கில் உறுப்பினர்களை கொண்ட சேனல்களும் இருக்கின்றன. ஆனால் இப்படி அமோக ஆதரவு பெற்ற சேனல்களை தான் கவனிக்க வேண்டும் என்றில்லை. அதிக உறுப்பினர்களின் ஆதரவு பெறாத சேனல்களிலும் கூட நல்ல வீடியோக்கள் இருக்கலாம்.
சமூக தளமான ரெட்டிட் பயனாளி ஒருவர் இத்தகைய வீடியோ சேனல் ஒன்றை அடையாளம் காட்டியுள்ளது. கிறிஸ்டினா கிரேமரின் கிரேசி போட்டோஷாப் வீடியோ டுடோரியல் எனும் அந்த சேனலில் மொத்தமே ஏழு வீடியோக்கள் தான் இருக்கின்றன. மேலும் இரண்டு ஆண்டுகளுக்கும் மேல் புதுப்பிக்கப்படாமல் இருக்கிறது,’
எனினும் அதில் உள்ள வீடியோக்கள் புகைப்படங்களை போட்டோஷாப் செய்வது தொடர்பாக அருமையான விளக்கங்களை கொண்டிருப்பதாக ரெட்டிட் பயனாளி கூறியிருக்கிறார்.
புகைப்படங்களை திருத்துவது தொடர்பான நுட்பங்களை தேடிக்கொண்டிருந்த போது இந்த சேனலில் உள்ள வீடியோக்களில் தனக்கான பதில் கிடைத்ததாக அந்த பயனாளி குறிப்பிட்டுள்ளதை பெட்டாபிக்சல் தளம் அடையாளம் காட்டியுள்ளது.

ரெட்டிட் பயனாளியின் பரிந்துரை சரிதானா என நீங்களே சோதித்துப்பார்த்துக்கொள்ளலாம்;https://www.youtube.com/channel/UCZIcebBcU81BWJLrNA3Yz3g