Tag Archives: keyword

நீங்கள் அறியாத தேடல் ரகசியங்கள்

ddg-bangs-640x460மாற்று தேடியந்திரங்களில் முன்னணியில் இருக்கும் ’டக்டக்கோ’ பற்றி நீங்கள் கேள்விப்பட்டிருக்கலாம். கூகுள் சவால் விடக்கூடிய அளவுக்கு மிகப்பெரிய தேடியந்திரம் இல்லை என்றாலும், ’டக்டக்கோ’ கடந்த 7 ஆண்டுகளில் கொஞ்சம் கொஞ்சமாக வளர்ந்து தனக்கென தனியிடத்தை பிடித்திருக்கிறது. இதற்கு முக்கிய காரணம் டக்டக்கோ இணைவாசிகளின் தனியுரிமையை மதிக்கும் வகையில் செயல்படுவது தான். ஆம், இணையவாசிகளின் தேடல் பழக்கத்தை கண்காணிப்பதில் ஈடுபடாமல் இருப்பதும், அவர்களைப்பற்றி தகவல்களை திரட்டி விளம்பர வலை விரிக்காமல் இருப்பதும் டக்டக்கோவின் தனிச்சிறப்பாக அமைகிறது. இணையத்தில் தகவல்களை தேடுவதற்காக டக்டக்கோவை பயன்படுத்தும் போது, நீங்கள் யார் என்பதை அது கவனிக்காமல் இருக்கிறது. இந்த அனாமதேய தன்மையை பிரைவசி ஆர்வலர்கள் கொண்டாடி வருகின்றனர்.

எனவே உங்கள் இணைய தேடல் அனாமதேயமாக இருக்க வேண்டும் என விரும்பினால் நீங்களும் டக்டக்கோவை பயன்படுத்திப்பார்க்கலாம். பிரைவசி பாதுகாப்பு பிரதான அம்சம் என்றாலும், டக்டக்கோவுக்கு மாறலாம் என நினைப்பதற்கு மேலும் பல காரணங்கள் இருக்கின்றன. ஒரு தேடியந்திரமாக டக்டக்கோ பல தனித்தன்மையான சேவைகளை வழங்கி வருகிறது. இவற்றில் பல பிரத்யேகமானவை என்பது குறிப்பிடத்தக்கது:

ஸ்டாப்வாட்ச்

நீங்கள் விரும்பினால் டக்டக்கோவை ஸ்டாப்வாட்சாக பயன்படுத்தலாம். இதன் கட்டத்தில் ஸ்டாப்வாட்ச் என டைப் செய்தால் போதும், அதற்கான கடிகாரம் தோன்றும். அதில் உங்களுக்கு தேவையான நேரத்தை அமைத்துக்கொள்ளலாம். அது மட்டும் அல்ல, அடுத்தடுத்து வேலைகள் இருப்பின், லேப் வசதி மூலம் தொடச்சியாக பயன்படுத்தலாம். இதே முறையில் டைமர் சேவையையும் பயன்படுத்தலாம். டைமரில் நேரம் முடிந்ததும் அலாரமும் ஒலிக்கும்.

பெரிய எழுத்துக்கள்

ஆங்கில வாசகங்களில் தேவையான இடங்களில் கேபிடல் எழுத்துக்களை அமைக்க விரும்பினால் அதற்கான வசதியையும் இந்த தேடியந்திரம் வழங்குகிறது. வாசகத்தை டைப் செய்து அதற்கு முன் டைடில் கேஸ் என குறிப்பிட்டு இடைவெளி விடுவதன் மூலம் இந்த வசதியை பயன்படுத்திக்கொள்ளலாம். எழுத்துக்களை லோவர் கேஸ் அல்லது அப்பர் கேசாக மாற்றவும் இதை பயன்படுத்தலாம். மாணவர்களுக்கு இந்த வசதி மிகவும் பயனுள்ளதாக இருக்கும்.

செய்திகளை தேட

கூகுளில் தகவல்களை தேடும் போது, தொடர்புடைய செய்திகளும் இடம்பெற்றிருக்கும். ஆனால் டக்டக்கோ தேடல் முடிவுகளை மட்டுமே அளிக்கிறது. இருப்பினும் செய்திகளும் இடம்பெற விரும்பினால், தேடலுக்கான கீவேர்டு முன் அல்லது முடிவில் நியூஸ் என சேர்த்துக்கொண்டால் போதும், தொடர்புடைய செய்திகளையும் காணலாம். 100 க்கும் மேற்பட்ட தளங்களில் இருந்து செய்திகள் பட்டியலிடப்படுகின்றன.

பிடிஎப் கோப்புகள்

டக்டக்கோவில் எச்.டி.எம்.எல் கோப்புகளையும் எளிதாக தேடலாம். எச்.டி.எம்.எல்: என குறிப்பிட்டால் பொருத்தமான முடிவுகளை காணலாம். புரோகிராமிங் சிறப்பு குறியீடுகளையும் தேடலாம். இதே போல பிடிஎப் கோப்புகள் அல்லது மின் புத்தகங்களை எதிர்பார்க்கும் போது, கீவேர்டுடன் பிடிஎப் எனும் வார்த்தையை சேர்த்துக்கொண்டால் போது, இத்தகைய கோப்புகளை மட்டும் தேடலாம்.

நெத்தியடி தேடல்

சில நேரங்களில் ஒட்டுமொத்த இணைய கடலிலும் தேட விரும்பாமல் குறிப்பிட்ட இணையதளத்தில் மட்டும் தேட விரும்பலாம். இதற்கும் டக்டக்கோவில் வழி இருக்கிறது. இந்த வசதி ஐபேங்க் என சொல்லப்படுகிறது. தேடல் பதத்திற்கு முன் ஆச்சர்யக்குறியை சேர்த்து, குறிப்பிட்ட தளத்திற்கான முதல் எழுத்தை குறிப்பிட்டால் போதும், அந்த ஒரு தளத்தில் மட்டும் தேடலாம். உதாரணத்திற்கு  !a என்றால் அமேசான் தளத்தில் தேடலாம். இப்படி நூற்றுக்கணக்கான தளங்களில் நேரடியாக தேடும் வசதியை அளிக்கிறது. இதற்கான நீண்ட பட்டியலும் கொடுக்கப்பட்டுள்ளது: https://duckduckgo.com/bang

ஆய்வுப்பிரிவிலும் தளங்கள் பட்டியலிடப்பட்டுள்ளதால் மாணவர்கள் மற்றும் ஆய்வாளர்களுக்கு இந்த சேவை மிகவும் பயனுள்ளதாக இருக்கும். இவ்வளவு ஏன், இந்த வசதியை பயன்படுத்தி கூகுளிலும் தேடலாம் தெரியுமா? https://duckduckgo.com/bang?q=google

உடனடி பதில்கள்

இன்ஸ்டண்ட் ஆன்சர்ஸ் எனும் பெயரில் உடனடி பதில்களையும் டக்டக்கோ வழங்கி வருகிறது. குறிப்பிட்ட பல கேள்விகள் அல்லது பதங்களுக்கு தேடல் வார்த்தையை டைப் செய்ததுமே பொருத்தமான பதிலை காணலாம். கிளிக் செய்யாமலே தேடும் வசதி எனும் வர்ணனையோடு டக்டக்கோ இதை அறிமுகம் செய்தது. கூகுள் நாலட்ச் கிராப் எனும் பெயரில் இது போன்ற வசதியை வழங்கினாலும், முதலில் டக்டக்கோ தான் இதை அறிமுகம் செய்தது.

வீடியோ தேடல்

வீடியோ கோப்புகள் மட்டும் தான் தேவை எனில் தேடல் பதத்திற்கு முன் வீடியோ என சேர்த்துக்கொண்டால் 28 வீடியோக்கள் வந்து நிற்கின்றன. மேலும் வீடியோக்கள் தேவையில் எனில் அதற்கான வசதியை கிளிக் செய்யலாம். சமையல் குறிப்பு வீடியோக்கள் என்று குறிப்பிட்டும் தேடலாம். இந்த முடிவுகள் யூடியூப் மட்டுமே சார்ந்திருப்பது தான் ஒரே குறை.

குறுக்கு வழிகள்

இணையசேவைகளுக்கான கீபோர்டு சார்ந்த குறுக்கு வழிகள் தேவை எனில், சீட்ஷீட் வசதியை பயன்படுத்திக்கொள்ளலாம். உதாரணத்திற்கு போட்டோஷாப்  சீட்ஷீட் என தேடினால் போட்டோஷாப் தொடர்பான குறுக்கு வழிகளை பெறலாம். புரோகிராமிங் தொடர்பான தகவல்களையும் எளிதாக தேடலாம்.

டக்டக்கோவில் இன்னும் கூட பல அம்சங்கள் இருக்கின்றன. எல்லாம் சரி, கூகுள் போல வருமா? என கேட்பவர்களுக்காக கூகுல் தொடர்புடைய சுவாரஸ்யமான தகவல் ஒன்று. கூகுளில் ஏதேனும் பிரச்சனையா? எனும் பொருள்பட, ஈஸ் கூகுள் டவுன் என கூகுளில் கேட்டால், இல்லை (நோ) என பதில் பளிச் என தோன்றுகிறது.

 

தளம் புதிது: லண்டன் திரைப்பட வரைபடம்

லண்டன் நகரம் பல விஷயங்களுக்கு புகழ் பெற்றது. தேம்ஸ் நதிக்கரை, லார்ட்ஸ் மைதானம், விம்பிள்டன் மைதானம் என நீளும் இந்த பட்டியலில் திரைப்படங்ளுக்கான படிப்பிடிப்பையும் சேர்த்துக்கொள்ள வேண்டும். ஆங்கில படங்கள் பல லண்டனில் படமாக்கப்பட்டுள்ளன. லண்டன் நகரில் படமாக்கப்பட்ட படங்கள் பற்றி அறிய விருப்பம் எனில், கோ3சினிமா தளத்தின் திரைப்பட படப்பிடிப்பு பகுதி உதவுகிறது.

இந்த பகுதியில் லண்டன் நகர் மற்றும் சுற்றுப்புற பகுதிகளில் படமாக்கப்பட்ட படங்கள் தொடர்பான விவரங்களை பார்க்கலாம். லண்டன் வரைபடம் மீதி இந்த தகவல்கள் அழகாக சுட்டிக்காட்டப்பட்டுள்ளன. வரைப்படத்தில் மஞ்சள் மற்றும் சிவப்பு நிற ஐகான்கள் மீது கிளிக் செய்தால் படப்பிடிப்பு தொடர்பான விவரங்களை காணலாம். திரைப்பட போஸ்டர் சின்னதாக எட்டிப்பார்க்க மற்ற தகவல்களும் சுருக்கமாக இடம்பெற்றுள்ளன.

திரைப்பட ரசிகர்களுக்கு இந்த தளம் நிச்சயம் சுவாரஸ்யமானதாக இருக்கும். லண்டன் நகர் மீது அபிமானமும் இருந்தால் இன்னும் ஈர்ப்புடையதாக இருக்கும். மற்ற நகரங்களுக்குக் இது போன்ற ஒரு வரைபடம் இருந்தால் நன்றாக இருக்குமே என்ற எண்ணத்தையும் இது ஏற்படுத்தலாம்.

இணைய முகவரி:  https://go2cinema.com/filming-location-map

 

செயலி புதிது: மாணவர்களுக்கான பயனுள்ள செயலி

மாணவர்கள் ஸ்மார்ட்போன்களை பொழுதுபோக்கு நோக்கில் மட்டும் பயன்படுத்துவதில்லை. கல்வி தொடர்பான பணிகளுக்கும் ஸ்மார்ட்போனை பயன்படுத்தலாம். இதற்கு உதவக்கூடிய எண்ணற்ற செயலிகள் இருக்கின்றன. இந்த பட்டியலில் டைம்டேபிள் செயலியையும் சேர்த்துக்கொள்ள வேண்டும்.

இந்த செயலி வகுப்பு பாட அட்டவனையை குறித்து வைத்துக்கொண்டு, வகுப்புகளை மறக்காமல் இருக்க உதவுகிறது. இதில் வகுப்புகள் நடைபெறும் நேரத்தை குறிப்பிடுவதோடு, மாணவர்கள் தங்களுக்கு தரப்படும் வீட்டுப்பாடங்கள் போன்றவற்றையும் குறித்து வைக்கலாம். விடுமுறை நாட்களையும் குறித்து கொள்ளலாம். வகுப்பில் எடுக்கும் குறிப்புகளையும் இதில் சேமித்து வைக்கலாம். முக்கியமாக வகுப்பு நடந்து கொண்டிருக்கும் போது போனில் அழைப்பு வந்தால் அதை மவுனமாக்கும் வசதியும் இருக்கிறது.

பள்ளி அல்லது கல்லூரி பாடத்திட்டங்களை நிர்வகிப்பதில் இந்த செயலி மிகவும் உதவியாக இருக்கும். எந்த சாதனத்தில் இருந்து வேண்டுமானாலும் இதில் உள்ள தகவல்களை அணுகலாம்.

மேலும் தகவல்களுக்கு: https://play.google.com/store/apps/details?id=com.gabrielittner.timetable&hl=en_GB

 

 

நன்றி; தமிழ் இந்துவில் எழுதியது.

 

டக்டக்கோ பற்றிய முந்தைய பதிவுகள்;

டக்டக்கோ தேடியந்திரத்திற்கு மாறலாமா? http://cybersimman.com/2015/10/28/search-55/

*

கூகுள் தவிர நீங்கள் அறிந்திருக்க வேண்டிய தேடியந்திரங்கள்! http://cybersimman.com/2016/09/28/%E0%AE%95%E0%AF%82%E0%AE%95%E0%AF%81%E0%AE%B3%E0%AF%8D-%E0%AE%A4%E0%AE%B5%E0%AE%BF%E0%AE%B0-%E0%AE%A8%E0%AF%80%E0%AE%99%E0%AF%8D%E0%AE%95%E0%AE%B3%E0%AF%8D-%E0%AE%85%E0%AE%B1%E0%AE%BF%E0%AE%A8/

 

-\

 

மாற்று தேடியந்திரங்கள் எதற்காக? http://cybersimman.com/2016/07/31/search-56/

டக் டக் கோவில் புதிய தேடல் வசதி

duckடக் டக் கோ கூகுலுக்கு மாற்றாக சொல்லப்படும் தேடியந்திரம் . பிரதான தேடல் தவிர சின்ன சின்ன தேடல் வசதிகளை அறிமுகம் செய்வதிலும் கூகுல் போலவே தான் இருக்கிறது டக் டக் கோ! உதாரணத்துக்கு நேரடியாக தேடும் வசதி.

அதாவது , குறிப்பிட்ட இணையதளங்களில் தேட வேண்டும் என்றால் அந்த தளத்திற்கு சென்று தான் தேட வேண்டும் என்ற அவசியம் இல்லாமலேயே , டக் டக் கோவில் இருந்தே அதில் தேடிக்கொள்ளலாம். தேடலுக்கான குறிச்சொல்லுடன் குறிப்பிட்ட அந்த இணையதளத்தின் பெயரையும் சேர்த்து டைப் செய்தால் , நமது தேடலுக்கான அந்த இணையதள முடிவுகள் டக் டக் கோ பக்கத்திலேயே வந்து நிற்கும். இந்த வசதியை ஐபேங்! என்று டக் டக் கோ குறிப்பிடுகிறது. இதற்கும் ஒரு உதாரணம் பார்க்கலாம். தொழில்நுட்ப வலைப்பதிவான மேக்யூஸ் ஆப் ( இந்த வசதி பற்றி அறிமுகம் செய்த தளம்) தளத்தில் ஐபோன் அல்லது ஆண்ட்ராய்டு ( நடுநிலை!) பற்றிய கட்டுரைகளை தேட விரும்பினால், டக் டக் கோவில் ஐபோன் அல்லது ஆண்ட்ராய்டு என டைப் செய்து கூடவே மேக்யூஸ் ஆப்! என குறிப்பிட்டால் போதும், இந்த தளத்தில் உள்ள தொடர்புடைய கட்டுரைகளை எல்லாம் பார்க்கலாம்.

இது போல நூற்றுக்கணக்கான இணையதளங்கள் பெயரை அடைப்புக்குறியிட்டு தேடும் வசதி இருக்கிறது. இணையதளங்கள் மட்டும் அல்ல, பல பொதுவான குறிச்சொற்களையும் இவ்வாறு தேடலாம். எடுத்துக்காட்டாக புகைப்படங்களை தேட வேண்டும் என்றால் குறிச்சொல்லுடன் இமேஜஸ் எனும் சொல்லை அடைப்புக்குறியுடன் சேர்த்துக்கொள்ள வேண்டும். இந்த வசதிக்கான விரிவான பட்டியலையும் டக் டக் கோ கொடுத்துள்ளது: https://duckduckgo.com/bang.html#menu

தேடிப்பார்த்து சொல்லுங்கள். டக் டக் கோ பற்றிய விரிவான அறிமுகம் தேவையா? இந்த முந்தைய பதிவு பயனுள்ளதாக இருக்கும் :கூகுலுக்கு குட்பை சொல்லுங்கள்: அழைக்கும் புதிய தேடியந்திரம்

கூகுல் த‌லை மேல் ஒரு தேடியந்திரம்.

surf

மாற்று தேடியந்திரங்கள் எத்தனை இருந்தால் என்ன  தேடியந்திர மாற்றம் தேவையில்லை என்றே பெரும்பாலானோர் நினைக்கின்றனர்.அதாவது மாற்று தேடியந்திரம் வேண்டாம்,கூகுலே போதும் என நினைக்கின்றனர்.

ஆனாலும் மாற்று தேடியந்திரங்களுக்கு குறைவில்லை. கூகுலோடு போட்டியிட்டு வெல்ல முடியாவிட்டாலும் தங்களுக்கென தனி தேடல் பாதையை உருவாக்கி கொண்டுள்ள தேடியந்திரங்களும் இல்லாமல் இல்லை.

இவற்றில் சில இணையவாசிகளின் கூகுல் அபிமானத்தை சோதிக்க கூடியது.சிலவற்றின் நோக்கம் கூகுலின் தேடல் ஆதிக்கத்தை முடிவுக்கு கொண்டு வருவதாகவும் இருக்கிறது.ஒரு தேடியந்திரமாக கூகுலின் போதாமைகளை சுட்டிக்காட்டி அதற்கு தீர்வு அளிக்க முயலும் தேடியந்திரங்களும் இருக்கின்றன.

இந்த வகை மாற்று தேடியந்திரங்களில் சில  கூகுலோடு மல்லு கட்டாமல் அதன் தேடல் முடிவுகளை மேம்படுத்தி தரவும் முயல்கின்றன. சர்ஃப் கேன்யான் தேடியந்திரம் இதை தான் செய்கிறது.

கூகுல் மட்டும் அல்ல அதன் போட்டியாளர்களான பிங் மற்றும் யாஹுவின் தேடல் முடிவுகளையும் இது செம்மை படுத்தி தருகிறது.அதாவது இணைய தேடலில் உள்ள பொதுவான குறையை களைந்து தேடல் அனுபவத்தை சீராக்குவதாக சர்ஃப் கேன்யான் சொல்கிறது.

மாற்று தேடியந்திரம் என்றாலும் ஏற்கனவே பயன்படுத்தும் கூகுல் உள்ளிட்ட தேடியந்திரத்தை கைவிடாமலே பயன்படுத்தலாம் என்பது தான் இதன் சிறப்பு.கூகுல் அல்லது யாஹூ போன்ற தேடியந்திரங்களின் தலை மீது உட்கார்ந்து கொண்டு அவற்றின் தேடல் முடிவுகளை தேடுபவரின் நோக்கத்திற்கு ஏற்ப பட்டை தீட்டித்தருவது இதன் ஆதார் பலம்.

அந்த வகையில் இதை பிரவுசர்களின் நீட்சியாக பயன்படுத்தலாம்.அதாவது இதை டவுண்லோடு செய்து கொண்டால் பிரவுசர் துண்டாக ஒளிந்து கொள்ளும். தேடியந்திரங்களை பயன்படுத்தும் போது அவற்றின் தலை மீது அமர்ந்திருப்பது போல முடிவுகளை பார்த்து கொண்டே இருக்கும்.

தேடல் பட்டியல் தோன்றியதும் முடிவுகளுக்கு அருகே நீல நிற‌த்தில் உள்ள அம்புக்குறிய கிளிக் செய்ய வேண்டும். சர்ஃப் கேன்யானுக்கு சொந்தமான இந்த அம்பு குறி இப்போது நீங்கள் எதிர்பார்க்காத மாய‌த்தை நிகழ்த்தும்.தேடல் பட்டியலில் உள்ள முடிவுகளில் உங்கள் தேடலுக்கு மிகவும் பொருத்தமானதை முதலில் கொண்டு வந்து நிறுத்தும் .அந்த இணைய பக்கம் தேடல் பட்டியலில் 3 ம் பக்கத்திலோ அல்லது 4 ம் பக்கத்திலோ மறைந்திருக்கலாம்.நீங்கள் டைப் செய்த குறிச்சொல்லின் அடைப்பையில் உங்களுக்கு பொருத்தமாக அமையக்ககூடிய அந்த பக்கத்தை இந்த தேடியந்திரம் தானாக தேடி முதலில் கொண்டு வந்து நிறுத்துகிற‌து.

வழக்கமாக இதை நீங்களே செய்ய வேன்ட்டியிருக்கும். குறிச்சொல்லுக்கேற்ற பக்கங்கள் பட்டியலிப்பட்டாலும் அவற்றை ஒவ்வொன்றாக அல‌சி ஆராய்ந்து எது பொருத்தமானது என தீர்மானிக்க வேண்டும். இதற்கு கொஞ்சம் நேரம் செல்வாகும்.

சர்ஃப் கேன்யான் இந்த வேலையை இணையவாசிகள் சார்பில் மேற்கொள்கிறது.இணையவாசிகளின் குறிச்சொல்லை கண்காணித்து அதன் அடிப்படையில் சரியான இணைய பக்கங்களை தேடல் பட்டியலில் இருந்து இழுத்து வந்து நிறுத்தி வியக்க வைக்கிற‌து.

முதல் முடிவு வந்ததும் அடுத்ததாக மீண்டும் ஒரு முறை நீல அம்பு குறியை கிளிக் செய்தால் அடுத்த கட்டமாக தேடி மேலும் பொருத்தமான பக்கத்தை காட்டுகிறது.

ஒரு எளிய உதாரணம் மூலம் இந்த செயல்பாட்டை புரிந்து கொள்ளலாம்.டால்பின் என்று தேடும் போது தேடியந்திரங்களுக்கு சின்னதாக ஒரு குழப்பம் ஏற்படும்.டால்பின் என்பது மீனா அல்லது மியாமி டால்பின்ஸ் எனும

இணைய உலகின் கடைக்கோடி தளங்களை தேடும் தேடியந்திரம்!.

நம்பர் ஒன் இணையதளம்,டாப் டென் தளங்கள்,நூறு முன்னணி தளங்கள் போன்ற பட்டியலை எல்லாம் கொஞ்சம் மறந்து விடுங்கள்.எல்லோரும் எல்லா நேரங்களிலும் முன்னலை பெறும் தளங்களை தான் கவனிக்கின்றனர்.எப்போதாவது கடைக்கோடி தளங்களை பற்றி யோசித்ததுண்டா?

கடைக்கோடி தளங்கள் என்றால் தேடல் முடிவுகள் பட்டியலில் பின் தங்கியிருக்கும் தளங்கள்.பாராமுகத்துக்கு ஆளாகும் பரிதாப தளங்கள்.

இணைய உலகில் கோடிக்கணக்கான இணையதளங்கள் இருந்தாலும் கூகுல் உள்ளிட்ட தேடியந்திரங்கள் இவை எல்லாவற்றையும் பட்டியலிட்டு தந்தாலும் பெரும்பாலான இணையவாசிகளில் தேடல் என்பது முதல் சில பக்கங்களிலேயே முடிந்து போய் விடுகிறது.

கூகுலில் தேடும் ஒவ்வொரு முறையும் இத்தனை நொடிக்குள் (உண்மையில் ஒரு நொடிக்கும் குறைவான நேரத்தில்)இத்தனை லட்சம் பக்கங்களை பட்டியலிடுவதாக குறிப்பிடப்பட்டிருக்கும்.இந்த குறிப்பையே கூட பலரும் கவனித்திருக்க மாட்டார்கள்.

காரணம்,தேடல் பட்டியலின் முதல் பக்கத்திலேயே பொருத்தமான இணையதளங்கள் பட்டியலிடப்படுவதால் பலரும் அதிலேயே திருப்தி அடைந்து வெளியேறி விடுகின்றனர்.ஒரு சிலர் கூடுதல் முடிவுகளை நாடி மூன்றாவது ,நான்காவது ,ஐந்தாவது பக்கங்களுக்கு சென்று பார்ப்பதுண்டு.எப்படி இருந்தாலும் அதிகபட்சம் முதல் பத்து பக்கங்களை தாண்டி செல்வது அரிதானது தான்.

தேடலின் நோக்கமே தேவையான தகவல் அடங்கிய தளங்களை கண்டுபிடிப்பது தான் என்னும் போது முதல் பக்கத்திலேயே நாடி வந்த தளம் இருந்தால் அதை தாண்டி செல்ல வேண்டிய அவசியம் என்ன?

எல்லாம் சரி தான் ,ஆனால் தேடல் பட்டியலில் நூறாவது பக்கத்திலோ அல்லது ஆயிரமானது பக்கத்திலோ அல்லது பத்தாயிரமாவது பக்கத்திலோ உள்ள தளங்களின் கதி என்ன?இந்த தளங்கள் எல்லாமோ பின்னுக்கு தள்ளப்பட்டவை தானா?

ஒவ்வொரு தேடல் முடிவிலும் லட்சக்கணக்கான பக்கங்களில் முடிவுகள் நீளூம் போது எல்லோருமே முதல் சில பக்கங்களில் உள்ள தளங்களை மட்டுமே பார்ப்பது இணைய உலகின் நிதர்சனம் தான்!.நடைமுறை நோக்கில் பார்த்தால் இது மிகவும் இயல்பாகவும் தோன்றலாம்.

இந்த இணைய யதார்த்தம் ஒரு ப‌க்கம் இருக்கட்டும் ஒரு சுவாரஸ்யத்துக்கேனும் எப்போதாவது இணைய கடலில் ஆழச்சென்று பார்க்க வேண்டும் என்று நினைத்திருக்கிறிர்களா?அதாவது இரண்டு லட்சமாவது பக்கதில் என்ன தளங்கள் இருக்கின்றன என்றோ அல்லது 17 வது லட்ச பக்கத்தில் என்ன தளங்கள் இருக்கின்றன என்றோ தெரிந்து கொள்ள ஆர்வம் ஏற்பட்டிருக்கிறதா?

ஆம் என்றோ அல்லது அட இப்படி இது வரை யோசித்து பார்த்ததேயில்லை என்றோ நினைத்தால் மில்லியன் ஷார்ட் தளத்தை மனதார வாழ்த்துங்கள்.காரணம் இந்த விநோத தேடியந்திரம் இணைய உலகில் யாருமே பார்க்காத தளங்களை பார்ப்பதற்கான வாய்ப்பை ஏற்படுத்தி தருகிறது.முன்னணி இணையதளங்களை கடந்து சென்று எங்கோ மூளையில் மறைந்து கிடக்கும் தளங்களை இந்த தேடியந்திரம் மூலம் காணலாம்.

அதாவது தேடல் பட்டியலின் பத்தாயிரமாவது பக்கத்தில் உள்ள தளங்களை அல்லது பத்து லட்சமாவது பக்கத்தில் உள்ள தளங்களையோ இதன் மூலம் காணலாம்.

மில்லியன்ஷார்ட் தேடியந்திரம் இதனை எப்படி சாத்தியமாக்குகிறது என்றால் தேடலில் ஈடுபடும் போது இணையவாசிகள் முதலில் உள்ள பக்கங்களை நீக்கிவிட வழி செய்து இதனை நிறைவேற்றுகிறது.இதில் உள்ள வாய்ப்பை பயன்படுத்தி முதல் நூறு பக்கங்களையோ ,முதல் ஆயிரம் பக்கங்களையோ ,முதல் லட்சம் பக்கங்களையோ,அல்லது முதல் மில்லியன் பக்கங்களையோ நீக்கி விட்டு எஞ்சியுள்ள பக்கங்களை காணலாம்.

தேடலில் ஈடுபடும் போது ஒவ்வொரு பக்கமாக கிளிக் செய்து பார்த்தாலும் பத்து பதினைந்து பக்கங்களை கடந்த பிறகு ஒரு அலுப்பும் களைப்பும் வந்து விடும் அல்லவா?

மில்லியன்ஷார்ட்டோ ஒரே கிளிக்கில் ஆயிரம் ஆயிரம் பக்கங்களாக கடந்து பட்டியலின் கடைக்கோடியில் உள்ள தளங்களை காண வழி செய்கிறது.

பின்னுக்கு தள்ளப்பட்ட இந்த தளங்கள் பயனில்லாதவையாக இருக்கலாம்.அல்லது இவற்றில் சில முத்துக்களும் இருக்கலாம்.எப்படி இருந்தாலும் கூகுல் உட்பட வேறு எந்த தேடியந்திரத்திலும் இல்லாத வசதியாக தேடல் பட்டியலில் பின்னோக்கி சென்று பார்க்க இந்த தேடியந்திரம் உதவுகிறது.

சுவாரஸ்யமான இந்த தேடியந்திரம் தன்னை ஒரு பரிசோத‌னை தேடியந்திரம் என்றே வர்ணித்து கொள்கிறது.எனவே கூகுலுக்கு மாற்றாக எல்லாம் இதனை கருத வேண்டாம்.ஆனால் எப்போதாவது இணைய உலகில் புதிய எல்லைகளை காண்ட வேண்டும் என நினைத்தால் இதனை பயன்படுத்தி பாருங்கள்!.வியந்துபோவீர்கள்!.

http://in.millionshort.com

ஒரே கிளிக்கில் பல தேடல்கள்!.

ஒரே நேரத்தில் ஒன்றுக்கும் மேற்பட்ட தேடியந்திரங்களில் தேட உதவும் தேடியந்திரங்களின் வரிசையில் சூவலையும் சேர்த்து கொள்ளலாம்.

கூகுல் தவிர வேறு பல தேடியந்திரங்களிலும் தேடிப்பார்க்க வேண்டிய தேவை இருப்பவ‌ர்கள் இந்த தேடியந்திரத்தில் தங்களுக்கான குறிச்சொல்லை டைப் செய்தால் கூகுல் தவிர விக்கிபீடியா,ஆன்சர் டாட் காம்,அமேசான்,பிங்,யூடியூப்,யாஹூ ஆகிய தேடியந்திரங்களில் தேடும் வாய்ப்பை அளிக்கிறது.

ஒவ்வொரு தேடியந்திரத்திலும் அந்த குறிச்சொல்லுடன் தொடர்புடைய வேறு பல குறிச்சொற்களையும் இந்த தேடியந்திரம் பரிந்துரைக்கிறது.இந்த பரிந்துரை பொருத்தமாக இருந்தால் அந்த குறிச்சொல்லில் கிளிக் செய்து பார்க்கலாம்.அல்லது குறிப்பிட்ட தேடிய‌ந்திரத்தை தேர்வு செய்து அதன் முடிவுகளை பார்க்கலாம்.

தேவையான தேடியந்திரங்களை கீழே உள்ள ஐகான்களில் இருந்து தேர்வு செய்து கொள்ளலாம்.

அது மட்டும் அல்ல மேலும் பல தேடியந்திரங்கள் தேவை என்றால் அவற்றையும் தேர்வு செய்து அந்த தேடியந்திரத்தையும் தேடல் பட்டியலில் சேர்த்து கொள்ளலாம்.

தேடியந்திர முகவரி;http://www.soovle.com/

———–
இதே போன்ற மேலும் சில தேடியந்திரங்கள் பற்றிய பதிவுகள்;

1.100 தேடியந்திர தேடல் பலன்;http://cybersimman.wordpress.com/2009/03/25/asearc/

2.ஒரே நேர‌த்தில் தேட மேலும் சில தேடியந்திரங்கள்.;http://cybersimman.wordpress.com/2010/10/29/search-20/

3.ஒரே நேரத்தில் பல தேடியந்திரங்களில் தேட;http://cybersimman.wordpress.com/2011/06/01/search-25/