Tag Archives: movies

திரைப்புத்தகங்களை பின் தொடரும் டிவிட்டர் பக்கம்!

 

b2திரைப்பட நட்சத்திரங்கள் எந்த புத்தகத்தை ஆர்வத்துடன் வாசிக்கின்றனர் என்பதை அவர்கள் பேட்டி மூலம் அறிந்து கொள்ளலாம். ரசிகர்கள் அந்த புத்தகங்களை தேடிப்பிடித்து வாசிக்கவும் செய்யலாம். எல்லாம் சரி, திரைப்பட கதாபாத்திரங்கள் எந்த புத்தகங்களை வாசிக்கின்றனர் என்பதை நீங்கள் எப்போதேனும் கவனித்ததுண்டா? அதாவது திரைப்படங்களில் வரும் நடிகர் அல்லது நடிகை புத்தகம் படிப்பது போல வரும் காட்சிகளை கவனித்திருக்கிறீர்களா? அந்த புத்தகங்கள் உங்கள் நினைவில் இருக்கின்றனவா?

இந்த கேள்விகள் உங்களுக்கு சுவாரஸ்யம் அளித்தால், @புக்ஸ்_இன்_மூவிஸ் ( @books_in_movies ) டிவிட்டர் பக்கம் உங்களை கவர்ந்திழுக்கும். ஏனெனில் இந்த டிவிட்டர் பக்கம் திரையில் தோன்றி மறைந்த புத்தகங்களை குறும்பதிவு வடிவில் அடையாளம் காட்டி வருகிறது.

திரைப்படங்களில் கதை சொல்லும் உத்தியாகவும், காட்சி அமைப்பிற்கு வலு சேர்க்கவும் பல விஷயங்கள் பயன்படுத்துவது உண்டு. இதேவிதமாக தான் திரையில் தோன்றும் பாத்திரங்கள் புத்தகம் அல்லது நாவலை வாசித்துக்கொண்டிருப்பது போல காண்பிப்பதும் வழக்கம். இந்த திரை வாசிப்பு கதையை ஒட்டியும் இருக்கலாம், அல்லது கதையுடன் நேரடியாக தொடர்பு இல்லாமாலும் அமையலாம்.சில நேரங்களில் திரையில் பாத்திரங்கள் வாசிகப்படுவது போன்ற புத்தகம் பரவலான கவனத்தை ஈர்ப்பதும் உண்டு. கபாலி படத்தின் அறிமுக காட்சியில் ரஜினி காந்த் ’மை பாதர் பாலைய்யா’ எனும் புத்தகத்தை படித்துக்கொண்டிருப்பது போன்ற காட்சி கவனத்தை ஈர்த்தது இதற்கான உதாரணம். பாலச்சந்தரின் ஏக் துஜே கேலியே படத்தில் நாயகி, ஷேக்ஸ்பியர் நாடகங்கள் மற்றும் 20 நாட்களில் தமிழ் மொழியை கற்றுக்கொள்வது எப்படி? எனும் புத்தகங்களை வாசிப்பது போல வரும்.

ஆனால் பெரும்பாலும் ரசிகர்கள் இந்த காட்சிகளை கடந்து போய்விடுவதுண்டு. அதில் வரும் புத்தகங்களையும் கவனிக்காமல் விட்டுவிடுவார்கள். திரை வாசிப்பை மையமாக கொண்டு ஏதேனும் சர்சசை அல்லது விவாதம் ஏற்படும் போது தான், காட்சிகளில் காண்பிக்கப்படும் புத்தகங்களை கவனிக்கத்தோன்றும்.

இவ்வாறு இல்லாமல், திரைப்படங்களில் பாத்திரங்களால் வாசிக்கப்பட்ட புத்தகங்களை எல்லாம் கண்டறிந்து அடையாளம் காட்டும் வகையில் மேலே குறிப்பிட்ட  புக்ஸ்_இன்_மூவிஸ் டிவிட்டர் பக்கம் அமைந்துள்ளது. அபிஷேக் சுமன் எனும் திரைப்பட ரசிகர் இந்த டிவிட்டர் பக்கத்தை நடத்தி வருகிறார். திரைப்படங்களில் எந்த காட்சியில் நடிகர், நடிகையர் புத்தகம் வாசிப்பது போல வருகின்றனவோ அந்த காட்சிகளை எல்லாம் ஸ்கிரின்ஷாட் எடுத்து அதன் விவரத்தை குறும்பதிவாக பகிர்ந்து வருகிறார். எந்த படத்தில், எந்த காட்சியில் என்ன புத்தகம் வாசிக்கப்படுகிறது என்பதை இந்த குறும்பதிவுகள் மூலம் அறிந்து கொள்ளலாம்.

bநம்மூர் திரைப்படங்கள் மட்டும் அல்லாமல் சர்வதேச திரைப்படங்களிலும் பாத்திரங்கள் வாசிக்கும் புத்தகங்களையும் இப்படி படம் பிடித்துக்காட்டி வருகிறார். தில்லிவாசியான அபிஷேக் தணிக்கையாளராக பணியாற்றி வருபவர். சினிமா, புத்தகம் இரண்டிலுமே அவருக்கு ஆர்வம் அதிகம் என்கிறார். திரையில் பாத்திரங்கள் வாசிக்கும் புத்தகம் தொடர்பாக பத்திரிகை ஒன்றில் சில ஆண்டுகளுக்கு முன் வாசித்த கட்டுரை ஏற்படுத்திய தாக்கம் காரணமாக, திரைப்புத்தகங்களை அடையாளம் காட்டும் ஆர்வம் உண்டானதாக அவர் ஸ்க்ரோல் இணைய இதழுக்கு அளித்துள்ள பேட்டியில் தெரிவித்துள்ளார். முதலில் தனது டிவிட்டர் பக்கத்திலேயே இந்த தகவல்களை பகிர்ந்து வந்திருக்கிறார். பின்னர் தான் இதற்கென்றே தனி டிவிட்டர் பக்கத்தை அமைந்த்ததாக குறிப்பிடுகிறார். இதே போலவே ஒளிப்பட பகிர்வு சேவையான இன்ஸ்டாகிராமிலும் ஒரு பக்கத்தை உருவாக்கியிருக்கிறார்.

மற்றவர்களுடன் அதிகம் பேசும் பழக்கம் இல்லாத தனக்கு, திரைப்படங்களும், புத்தகங்களும் தான் தஞ்சம் அளிப்பதாக கூறும் அபிஷேக், எந்தவித திட்டமிடலும் இல்லாமல் இந்த பக்கத்தை துவக்கியதாக கூறியிருக்கிறார். திரையில் தோன்றும் புத்தகங்களை தேடி கண்டுபிடிப்பதற்காக என்றே அவர் தினமும் திரைப்படம் பார்க்கிறாராம். ஏற்கனவே பார்த்த படங்களில் தோன்றிய புத்தகங்கள் நன்றாக நினைவில் இருந்தது துவக்கத்தில் இவருக்கு கைகொடுத்திருக்கிறது. இப்போது இதற்காக என்றே படங்களை பார்க்கிறார். மற்றவர்கள் பரிந்துரையையும் ஏற்றுக்கொள்கிறார். புத்தகங்கள் மட்டும் அல்ல பத்திரிகை, சஞ்சிகைகள் போன்றவை வாசிக்கப்பட்டாலும் அவற்றையும் பகிர்ந்து கொள்கிறார்.

இதுவரை நானுறுக்கும் மேற்பட்ட புத்தகங்களை பகிர்ந்து கொண்டிருக்கிறார். திரைப்படத்தில் எந்த இடத்தில் புத்தகம் வருகிறது என்பதை சுட்டிக்காட்டுவதோடு நிறுத்திக்கொள்வதாகவும், அந்த புத்தகத்திற்கும் காட்சிக்கும் என்ன தொடர்பு என்றெல்லாம் ஆய்வு செய்வதில்லை என்கிறார் அவர். பல படங்கள் புத்தகங்கள் எந்தவித அர்த்தமும் இல்லாமல் காட்சி அமைப்பிற்கு தேவையான ஒரு பொருளாகவே பயன்படுத்தப்படுவதாகவும் அவர் கூறுகிறார்.

எனினும் ஒரு சில படங்களில் புத்தகங்கள் காட்சி மற்றும் கதை அமைப்புடன் கச்சிதமாக பொருந்தி இருப்பதும் உண்டு என்கிறார். அபிஷேக்கின் டிவிட்டர் பக்கத்தை பின் தொடர்ந்தால் தினம் ஒரு புத்தகத்தை சுவாரஸ்யமான முறையில் அறிமுகம் செய்து கொள்ளலாம். புத்தக பிரியர்கள் இதை புத்தகங்களுக்கான அங்கீகாரமாக கருதலாம் என்றால், திரைப்பட பிரியர்கள் அந்த ஆர்வத்தின் அடிப்படையில் புத்தகங்களை தேடிச்செல்வதற்கான வழியாக இதை கருதலாம்.

குறும்பதிவு சேவையான டிவிட்டரை எப்படி எல்லாம் சுவாரஸ்யமாக பயன்படுத்தலாம் என்பதற்கான அழகான உதாரணமாகவும் இந்த பக்கம் அமைந்துள்ளது. அடுத்த கட்டமாக, இந்த தகவல்களை எல்லாம் கொண்ட இணையதளம் ஒன்றை உருவாக்கவும் திட்டமிட்டிருப்பதாக அபிஷேக் குறிப்பிட்டுள்ளார். அதோடு திரையில் பார்த்த ஆனால் என்ன புத்தகம் என கண்டுபிடிக்க முடியாமல் இருக்கும் நூல்களுக்கான பிரத்யேக பகுதியையும் துவக்க திட்டமிட்டிருப்பதாக கூறியுள்ளார்.

திரைப்புத்தகங்களுக்கான டிவிட்டர் பக்கம்: @books_in_movies

திரைப்பட ரசிகர்களுக்கான இணையதளம்

mஹாலிவுட பட ரசிகர்கள் அடுத்ததாக என்ன படம் பார்க்கலாம் என்பதை சுவார்ஸ்யமான முறையில் பரிந்துரைக்கும் இணையதளமாக முவிக்ஸ் விளங்குகிறது. ரசிகர்கள் தங்களுக்கு பிடித்தமான படத்தை இந்த தளத்தில் சமர்பித்தால் அதை அடிப்படையாக கொண்டு அவர்களுக்கு பிடிக்க கூடிய வேறு திரைப்படங்களை பரிந்துரைக்கிறது.

ரசிகர்கள் குறிப்பிடும் திரைப்படங்களின் அடிப்படையில் அவர்களுக்கு பிடிக்க கூடிய திரைப்படங்களை முன் வைக்கும் பரிந்துரை சேவையை வழங்கும் இணையதளங்கள பல இருக்கின்றன.

எனினும் முவிக்ஸ் அவற்றில் இருந்து அதன் எளிமையான தன்மையால் வேறுபடுகிறது. பொதுவாக பரிந்துரை தளங்களில் உறுப்பினராக பதிவு செய்து கொள்ள வேண்டும். பல படங்களை சமர்பிக்க வேண்டும். ஆனால் முவிக்ஸ் சேவையை பயன்படுத்த உறுப்பினராக பதிவு செய்ய வேண்டிய அவசியமில்லை. இந்த தளத்தில் நுழைந்து, மனதில் உள்ள திரைப்படத்தை குறிப்பிட்டால் போதும், பார்க்க வேண்டிய படங்களை பரிந்துரை செய்கிறது. நிறைய படங்களை சமர்பித்தால் பரிந்துரை இன்னும் சிறப்பாக அமையலாம்.

செயற்கை நுண்ணறிவு சார்ந்த நுட்பம் மூலம் திரைப்படங்களின் பல்வேறு அம்சங்களை உடனடித்தன்மையுடன் பரிசீலித்து இந்த சேவை செயல்படுவதாக முவிக்ஸ் தளம் தெரிவிக்கிறது. இந்த முறையை ஆழ் கற்றல் என குறிப்பிடுகிறது.

மிக எளிமையான வடிவமைப்பை கொண்ட இந்த இணையதளம் நிச்சயம் திரைப்பட ரசிர்களை நிச்சயம் கவரும். அதோடு செயற்கை நுண்ணறிவு தொழில்நுட்பத்தில் ஆர்வம் கொண்டவர்களையும் இந்த தளம் கவரும்.

இணையதள முகவரி: https://movix.ai/

 

 

செயலி புதிது; சுவார்ஸ்யமான ஒளிபட செயலி

ஸ்மார்ட்போன் உலகில் இப்போது ஒளிபடம் சார்ந்த செயலிகள் பிரபலமாகவும், சுவாரஸ்யமாகவும் இருக்கின்றன. இந்த வரிசையில் இப்போது பேஸ் ஆப் செயலி அறிமுகமாகி இருக்கிறது.

செயற்கை நுண்ணறிவை அடிப்படையாக கொண்ட இந்த செயலி பயனாளிகளின் ஒளிபடத்தை பலவிதமாக மாற்றிக்கொள்ள உதவுகிறது. ஒருவர் தனது எதிர்கால தோற்றத்தை, புன்னகை மிக்க தோற்றத்தை காணலாம். பாலினத்தை மாற்றியும் பார்த்துக்கொள்ளலாம். இளம் வயது தோற்றத்தையும் காணலாம்.

இந்த செயலியை வேறு பல விதங்களிலும் சுவாரஸ்மாக பயன்படுத்தலாம். ஏற்கனவே உள்ள ஒளிப்பங்களை திருத்த அல்லது புதிதாக எடுத்த படத்தை மாற்றவும் பயன்படுத்திக்கொள்ளலாம். இந்த செயலின் சில அம்சங்கள் நிறவெறி தன்மை கொண்டிருப்பதாகவும் சர்ச்சை உண்டாகியுள்ளது. எனினும் இது தொடர்பாக செயலியை உருவாக்கிய நிறுவனம் சார்ப்பில் மன்னிப்பு கோரப்பட்டுள்ளது.

இருப்பினும் இந்த செயலி பயனாளிகளை வெகுவாக கவந்து வருகிறது. லட்சக்கணக்கில் இந்த செயலி பதிவிறக்கம் செய்யப்பட்டு வருகிறது.

ஆண்ட்ராய்டு மற்றும் ஐபோன்களில் இந்த செயலி செயல்படுகிறது.

மேலும் தகவல்களுக்கு: https://www.faceapp.com/

பொய்யாக ஒரு தேடியந்திரம்!

Fake-search-engine-pic3இப்படி ஒரு தேடியந்திரம் தேவைப்படலாம் என்பது உங்களுக்கு வியப்பை அளிக்கலாம். ஆனால், பொய்யான ஒரு தேடியந்திரத்திற்கான தேவை உண்மையானது என்பதால், பிலிம்சோர்சிங் தளம், தேடியந்திரம் போல தோற்றம் தரக்கூடிய பொய்யான தேடியந்திர சேவையை உருவாக்கியுள்ளது.
திரைப்படம் அல்லது குறும்படங்களை இயக்கும் போது, முக்கிய பாத்திரம் அல்லது துணை பாத்திரம் இணைய தேடலில் ஈடுபடுவது போல ஒரு காட்சி வரலாம். இந்த காட்சியை படமாக்க என்ன செய்வீர்கள்? இதென்ன அந்த பாத்திரம் கூகுளில் தகவல் தேடுவது போல காட்சி எடுக்க வேண்டும் என்று உடனே பதில் சொல்லிவிடுவீர்கள்.
இது இயல்பானது தான் என்றாலும், கூகுளில் தேடுவது போல காட்சி அமைப்பதில் ஒரு சிக்கல் இருக்கிறது. கூகுளிடம் அனுமதி வாங்க வேண்டுமா என்பது தான் அது. கூகுளிடம் அனுமதி தேவை எனில் முறையாக வேண்டுகோள் சமர்பித்து பதிலுக்கு காத்திருக்க வேண்டும். வர்த்தக நோக்கிலான திரைப்படம் எனில் இப்படி செய்வதே சிறந்ததாக இருக்கும்.
இல்லை எனில், யார் கேடக்கப்போகிறார்கள் என துணிந்து கூகுள் தேடல் ஸ்க்ரீன்ஷாட்டை வைத்துக்கொள்ளலாம். பெரும்பாலும் சிக்கல் வரவாய்ப்பில்லை. ஆனால் எதிர்பாராமல் காப்புரிமை மீறல் எனும் நோக்கில் வில்லங்கமாகும் வாய்ப்பிருக்கிறது.

தவிர, இந்த படம் இணையத்தில் வைரலாகி விட்டது எனில் , கூகுளுக்கு தேவையில்லாமல் விளம்பரம் அளித்தது போல ஆகிவிடலாம். இதைவிட சிறந்த வழி, கூகுளை பயன்படுத்தாமல், ஏதேனும் ஒரு தேடியந்திரத்தை பயன்படுத்துவது போல காட்சி அமைப்பது தான். அதாவது நாமே ஒரு தேடியந்திரத்தை உருவாக்கி கொள்ளலாம். இந்த தேடியந்திரத்தையும் நீங்கள் உருவாக்க வேண்டியதில்லை, இதோ நாங்கள் உருவாக்கி வைத்திருக்கிறோம் பயன்படுத்திக்கொள்ளுங்கள் என்கிறது பிலிம் சோர்சிங் தளம்.
இப்படி அந்த தளம் உருவாக்கிய பொய்யான

தேடியந்திரம் தான் குவைரோ ( ) . இந்த தேடியந்திரத்தை பயன்படுத்தி தேடல் காட்சியை படமாக்கி கொள்ளலாம். தேடியந்திரத்தை பயன்படுத்தியது போலவும் இருக்கும், ஆனால் காப்புரிமை சிக்கல் எதுவும் வராது.
பிலிம்சோர்சிங் தளம் திரைப்பட உருவாக்கம் தொடர்பான தகவல்கள் மற்றும் சேவைகளை அளித்து வருகிறது. அதன் ஒரு பகுதியாக இப்படி பொய்யான தேடியந்திரத்தை பயன்படுத்தும் சேவையை அளிக்கிறது.
இணைப்பு: https://www.filmsourcing.com/fake-search-engine-for-film-and-tv

=-

திரைப்பட ரசிகர்களுக்கான குறிப்பேடு இந்த இணையதளம்.


என்ன படம் பார்க்கலாம்?

இந்த கேள்வி பல நேரங்களில் ரசிகர்களை குழப்பத்தில் ஆழ்த்தி விடலாம்.திரைப்படங்களுக்கான விளம்பரத்தை நம்பியோ அல்லது விமர்சனத்தை வைத்தோ ஒரு படத்தை பார்க்கலாம் என தீர்மானிப்பதும், பார்க்க வேண்டாம் என விட்டுவிடுவதும் ரிஸ்கானது தான்!படங்கள் பற்றிய பரவலான பேச்சை வைத்தும் ஒரு படத்தை நல்ல படம் என்று சொல்லிவிட முடியாது.

அப்படி என்றால் என்ன படத்தை பார்க்கலாம் என தீர்மானிப்பது எப்படி?

இந்த கேள்விக்கான பதிலை தெரிந்து கொள்ள உதவுவதற்கான சுவாரஸ்யமான இணையதளமாக பர்த்திகி உருவாக்கப்பட்டுள்ளது.

பெரும்பாலான நேரங்களில் ஒரு திரைப்படத்தை பார்க்கலாமா வேண்டாமா என்பதை நண்பர்களின் பரிந்துரையை வைத்து தானே தீர்மானிப்பீர்கள்.பர்த்திகியும் இப்படி நண்பர்கள் பரிந்துரையின் அடிப்படையில் பார்க்க வேண்டிய அடுத்த படத்தை தெரிந்து கொள்ள உதவுகிறது.நண்பர்கள் என்றால் நிஜ உலக நண்பர்கள் மட்டும் அல்ல;பேஸ்புக் தோழ‌ர்கள் டிவிட்டர் சகாக்கள் என இணைய நட்பு வட்டம் முழுவதும் இதில அடங்கும்.

அது மட்டும் அல்ல நண்பர்களின் பரிந்துரையையும் விமர்சன‌ங்களையும் குறித்து வைத்து கொள்ளும் வசதியையும் பர்த்திகி வழங்குகிறது.

பர்த்திகியில் உள்ளே நுழைந்ததுமே அதன் உறுப்பினர்கள் பார்த்து ரசித்த படங்களின் பட்டியல் வரவேற்கும்.அந்த படத்தின் கதை அந்த படம் பற்றிய விமர்சனம் ஆகியவற்றை எல்லாம் படித்து பார்க்கலாம்.அப்படியே ரசிகர்களுக்கான திரைபட தளங்களின் ஆதார வசதியாகி விட்ட இரண்டு கருத்துக்களில் ஒன்றை நீங்களும் பதிவு செய்து கொள்ளலாம்.

அதாவது படத்தை ஏற்கனவே பார்த்து விட்டேன் என்றோ அல்லது நானும் பார்க்க விரும்புகிறேன் என்றோ தெரிவிக்கும் அறிவிப்பை கிளிக் செய்யலாம்.

இந்த கிளிக்குகள் தான் உங்களுக்கான திரைப்பட குறிப்பேடாக உருவாகும்.அதாவது நீங்கள் பார்த்த படங்கள் மற்றும் பார்க்க விரும்பும் படங்களின் பட்டியலை உருவாக்கி கொள்ளலாம்.

பார்த்த படம் என்றால் அந்த படம் பற்றிய உங்கள் கருத்துக்களையும் விமர்சனமாக இடம் பெறச்செய்யலாம்.உங்களின் இந்த விமர்சனம் நண்பர்களுக்கான இயல்பான பரிந்துரையாக அமையும்.உங்கள் கருத்து அடிப்படையில் அவர்களும் அந்த படத்தை பார்க்க தீர்மானிக்கலாம்.இதே போலவே நீங்களும் கூட உங்கள் நண்பர்கள் பக்கத்தை பார்வையிடுவதன் மூலம் எந்த படத்தை பார்க்கலாம் என தெரிந்து கொள்ளலாம்.

ஆக இந்த தளத்தில் உறுப்பினரானவுடன் உங்கள் நண்பர்களுக்கு எல்லாம் தகவல் சொல்லி இதில் இணைய வைத்தால் நீங்கள் பார்த்த படங்களையும் அவர்கள் பார்த்த படங்களையும் பரஸ்பரம் தெரிந்து கொள்ள வசதியாக இருக்கும்.

அதே போல திரைப்படங்களின் பட்டியலை பார்க்கும் போதும் அந்த படத்தை உங்கள் நண்பர்களின் எத்தனை பேர் பார்த்துள்ளனர் அவர்கள் கருத்து என்ன என்பதையும் தெரிந்து கொள்ளலாம்.ஆக இந்த தளத்தை பொருத்தவரை எல்லாமே நட்பானவை ஆகையால் நம்பகமானவை.

ஒரு படம் மிகவும் பிடித்திருக்கிறது என்றால் அதனை நண்பர்களுக்கு நேராக இமெயில் மூலம் பரிந்துரைக்கலாம்.இத்தகைய பரிந்துரை உங்களுக்கும் வந்து சேரும் என்பதை சொல்ல வேண்டியதில்லை.அவ்வாறு பரிந்துரை வந்தால் அந்த படத்தை பார்க்க விரும்புகிறேன் என கிளிக் செய்து பார்க்க வேண்டிய பட்டியலில் சேர்த்து கொள்ளலாம்.

இந்த பட்டியல் பார்க்க நினைத்த படங்களை மறக்காமல் இருக்க கை கொடுக்கும்.

பார்த்த அல்லது பார்க்க விரும்பும் படங்களின் அடிப்படையில் நண்பர்களோடு கருத்து பரிமாற்றத்திலும் ஈடுபடலாம்.இந்த இணைய உரையாடல்கள் சுவார்ஸ்யமான புதிய படங்களை தெரிந்து கொள்ள உதவும்.முற்றிலும் எதிர்பாராத பரிந்துரைகளை தற்செயலாக எதிர்கொள்ளலாம்.திரைப்பட ரசிகர்களுக்கு இதைவிட வேறென்ன வேண்டும்.

திரைப்ப்டங்களுக்கு மட்டும் அல்ல டிவி நிகழ்ச்சிகள் மற்றும் புத்தகங்களுக்கும் இதே போன்ற வசதியை இந்த தளம் வழங்குகிறது.

ஆனால் ஒன்று பெரும்பாலான தளங்களை போல இதுவும் ஹாலிவுட் படங்களுக்கானது.

இணையதள முகவரி;http://www.partigi.com/

——-

திரைப்பட ரசிகர்களுக்கான மேலும் ஒரு இணைய சேவைக்கு இந்த பதிவை வாசிக்கவும்;திரைப்ப‌டங்களுக்கான சூப்பர் இணைய‌தளம்

920a84e4a502422425143e0bb75b5d4e

திரைப்படங்களுக்கான புதுமையான தேடியந்திரம்.


எனி கிளிப் தளத்தை பற்றி கேள்விப்பட்டவுடன் திரைப்பட ரசிகர்கள் எல்லோரும் அதனை புக்மார்க் செய்து கொள்ள விரும்புவார்கள் .அதன் பிறகு ஆங்கில படங்கள் தொடர்பாக எப்போது சந்தேகம் ஏற்பட்டாலும் எனி கிளிப்பை தான் நாடுவார்கள்.திரைப்படங்களை ரசிக்க விரும்பினாலும் எனி கிளிப்பை தான் நாடுவார்கள்.

முதல் முறையாக இந்த தளத்தை பார்க்கும் போதே உணமையான திரைப்பட ரசிகர்கள் சொக்கிப்போய் விடுவார்கள்!.காரணம் இந்த தளம் திரைப்படங்கள் தொடர்பான எந்த தகவலையும் தேடிக்கொள்ளலாம் என்பது தான்.அந்த வகையில் இந்த தளம் திரைப்படங்களுக்கான தேடியந்திரம்.ஆனால் மாமூலான தேடியந்திரம் அல்ல.
திரைப்படங்களுக்குள் உள்ள விவரங்களை தேடித்தரும் தேடியந்திரம்.அதாவது ஒரு படத்தில் உள்ள காட்சிகள்,வசனங்கள்,ஆடை அலங்காரம் என எதை வேண்டுமானாலும் தேடலாம்!.

சில நேரங்களில் திரைப்பட ரசிகர்களுக்கு தாங்கள் பார்த்து ரசித்த அபிமான நட்சத்திரத்தின் படத்தில் குறிப்பிட்ட காட்சி குறித்த சந்தேகம் ஏற்படலாம்.நண்பர்களுடன் விவாதித்து கொண்டிருக்கும் போது ஒரு படத்தின் குறிப்பிட்ட வசனத்தை நினைவு கூர விரும்பலாம்.இது போன்ற நேரங்களில் எனி கிளிப்பில் அந்த விவரத்தை குறிப்பிட்டு தேடினால் சம்பந்தப்பட்ட காட்சியை அல்லது வசனத்தை வீடியோ கிளிப்பாக இது உன் வைக்கிற‌து.

இதே போல ஒரு படத்தின் எந்த இடத்திலும் எந்த விவர்த்தையும் தேடலாம்.சந்தேகம் நிவர்த்தியாக மட்டும் அல்ல ஏற்கனவே பார்த்து ரசித்த படத்தில் குறிப்பிட்ட காட்சியை மீண்டும் பார்த்து ரசிக்க விரும்பினாலும் இதனை பயன்படுத்தி கொள்ளலாம்.

காட்சிகள்,வசனங்கள்,பாடல்கள்,நாயகியின் ஆடை என எல்லாவற்றையும் தேடி அவற்றுக்கான வீடியோ கிளிப்பை பெறலாம்.அதற்கேற்ற வகையில் திரைப்படங்கள் தொடர்பான எல்லா விவரங்களையும் சேகரித்து பட்டியலிட்டுள்ளனர்.

இந்த கிளிப்களை நண்பர்களோடு பகிர்ந்து கொள்ளவும் செய்யலாம்.

தேடப்பட்ட கிளிப்கள் தற்போது பார்க்கப்பட்டு வரும் கிளிப்கள் போன்ற தலைப்புகளிலும் காட்சிகளை ரசிக்கலாம்.

ஹாலிவுட் படங்களுக்கான இந்த தேடியந்திரம் எத்தனை அற்புதமானது என்று சொல்ல வேண்டியதில்லை.

அதே நேரத்தில் இணையத்தை பொருத்த வரை கோலிவுட் எத்தனை பின் தங்கியிருக்கிறது என்பதையும் இந்த தளம் உணர்த்துகிறது.

கோலிவுட்டுக்கும் இதே போன்ற‌ தேடியந்திர‌ம் இருந்தால் ரஜினியின் பன்ச் டயலாகையோ சிவாஜியின் நடிப்பு கீற்றையோ ,எம்ஜிஆரின் பாடல் வ‌ரிகளையோ நொடிப்பொழுதில் தேடி ரசிக்கலாம்.

ஆனால் அதற்கு முதலில் நமது படங்களில் உள்ள சகல விதமான விவரங்க‌ளையும் தொகுத்து தேடக்கூடியவையாக மாற்ற வேண்டுமே!.

இணையதள முகவரி;http://www.anyclip.com/