Tag Archives: netflix

தூங்க வைக்கும் இணையதளம் இது!

தூக்கமின்மை பிரச்சனையால் தவிப்பவர்களுக்கு உதவுவதற்காக என்றே ’நேப்பிளிக்ஸ்’ எனும் புதிய இணையதளம் அறிமுகமாகியுள்ளது. இந்த இணையதளத்தை பார்த்துக்கொண்டிருந்தாலே போதும் தானாக தூக்கம் வந்துவிடும்- அதாவது இந்த தளத்தில் இடம்பெற்றுள்ள யூடியூப் வீடியோக்களை பார்த்தால் தூக்கம் வரும்! அதற்கேற்ற வகையில் இந்த தளத்தில் இடம்பெறும் வீடியோக்கள் தேர்வு செய்யப்பட்டுள்ளன.
யூடியூப்பில் பொதுவாக, ஹிட்களை அள்ளிக்குவிக்கும் வீடியோக்களே அதிகம் பேசப்படும்: அதன் காரணமாகவே அதிகம் பார்த்து ரசிக்கப்படும். இப்படி ஹிட்டான வீடியோக்கள் தவிர அதிகம் கவனத்தை ஈர்க்காத அருமையான வீடியோக்களும் ஆயிரக்கணக்கில் இருக்கின்றன. அதே போல ஒரு சில நிடங்களுக்கு மேல் பார்க்க முடியாமல் அலுப்பூட்டி விரட்டும் வீடியோக்களும் அநேகம் இருக்கின்றன. இந்த வகை வீடியோக்களை யாரும் பெரிதாக கண்டுகொள்வதில்லை.
நேபிபிளிக்ஸ் இணையதளம் இத்தகைய அலுப்பூட்டும் வீடியோக்களை எல்லாம் தேடிப்பிடித்து பட்டியலிடுகிறது. அதன் நோக்கம், இவற்றை பார்த்து தூக்கத்தை வரவைத்துக்கொள்வது தான்.
சுவாரஸ்யம் இல்லாத படங்கள் அல்லது வீடியோக்களை பார்க்கும் போது, தூக்கம் வருகிறது என நொந்து கொள்வோம் அல்லவா? இவற்றை விமர்சசனமாக தான் கருத வேண்டுமா என்ன? இத்தகைய வீடியோக்களை எல்லாம் ஒரே இடத்தில் சேமித்து வைத்து, தூக்கமின்மையால் தவிக்கும் போது, ஏதேனும் ஒரு சில வீடியோக்களை தேர்வு செய்து பார்த்தால் தூங்கி வழியலாம் அல்லவா? இதை தான் நேப்பிளிக்ஸ் தளம் செய்கிறது.
பார்வையாளர்களுக்கு தூக்கத்தை வர வைக்க கூடிய வீடியோக்கள் மட்டுமே இந்த தளத்தில் இடம்பெறுகின்றன. இந்த வீடியோக்களையும், அவரவர் ரசனைக்கேற்ப விளையாட்டு, வீடியோகேம், இசை என பலவகைகளில் இருந்து தேர்வு செய்து பார்க்கலாம். வீடியோக்களில் நேரத்தை செட் செய்து கொள்ளும் வசதியும் இருக்கிறது.
டிவி பார்த்துக்கொண்டே தூங்கிவிடும் பழக்கம் கொண்டவர்களுக்கு இந்த தளம் மிகவும் ஏற்றதாக இருக்கும். பொதுவாக இணையத்தில் வீடியோ பார்ப்பவர்களுக்கும் இந்த தளம் உதவியாக இருக்கும்.
மழையின் ஓசையை படம்பிடிக்கும் வீடியோ, ஒருவர் காரை சுத்தம் செய்வதை சித்தரிக்கும் வீடியோ என இந்த கலெக்‌ஷன் அருமையாக அமைந்திருக்கிறது.

இணையதள முகவரி:http://napflix.tv/

 

இந்த தளத்தை இந்த பதிவுடன் பொருத்திப்பார்த்தால் சுவார்ஸ்யமான புரிதல் உண்டாகும்: http://cybersimman.com/2016/09/18/video-18/

 

டிவிடி விலையை ஒப்பிட ஒரு இணையதளம்.

பிலிம் அவுட்லெட்! திரைப்படத்துறையின் எதிர்காலம் எந்த திசையில் சென்று கொண்டிருக்கிறது என உணர்த்தும் இன்னொரு தளம் இது.திரைப்பட டிவிடிக்களின் விலையை ஒப்பிட்டு பார்க்கும் சேவையை இந்த தளம் வழங்குகிறது.

புதிய திரைப்படங்கள் கொஞ்ச நாட்களில் டிவிடிக்களாக வெளியாகி விடுவதும் அவற்றை இணைய கடைகள் மூலமே வாங்கலாம் என்பது தெரிந்த விஷயம் தான்.ஆனால் விலைகளை ஒப்பிட்டு பார்க்க கூடிய வகையில் அதிக இடங்களில் இருந்து டிவிடிக்கள் கிடைக்கின்றன என்பது உண்மையிலேயே வியப்பானது தான்.

எல்லோருக்கும் தெரிந்த அமேசானில் இருந்து,சென்ட் இட் சாய்ஸ்,தி ஹட்,ஜாவி,பிலே,பேஸ் வரை விதவிதமான தளங்களில் இருந்து ஒவ்வொரு படத்திற்குமான விலையை இந்த தளம் பட்டியலிடுகிறது.எந்த தளத்தில் விலை குறைவாக இருக்கிறதோ அந்த தளத்தில் இருந்தே வாங்கி கொள்ளலாம்.

எந்த படத்தின் டிவிடி தேவையோ அந்த படத்தின் பெயரை டைப் செய்து தேடினால் அந்த டிவிடி கிடைக்கும் இணையதளங்களின் பட்டியல் விலையோடு வந்து நிற்கிறது.டிவிடியா புளு ரேவா என்று கூட குறிப்பிட்டு தேடலாம்.

சமீபத்தில் தேடப்பட்ட படங்கள்,புதிய வரவுகள் போன்ற பட்டியலும் ரசிகர்களுக்கு வழிகாட்டுகின்றன.

இணையம் மூலம் புத்தகங்களை வாங்குபவர்களுக்கு இத்தகையை விலை ஒப்பீட்டு சேவை தளங்கள் இருக்கின்றன.நான்கு ஐந்து இடங்களில் பார்த்துவிட்டு குறைந்த விலையில் புத்தகங்களை வாங்க இந்த தளங்கள் உதவுகின்றன.மற்ற பொருட்களுக்கும் இதே போன்ற ஒப்பீட்டு சேவை தளங்கள் உள்ளன.

இப்போது திரைப்பட டிவிடி விலையை ஒப்பிட்டு பார்த்து கொள்ள பிலிம் அவுட்லெட் உதயாமகியுள்ளது.

படங்களை தியேட்டரில் மட்டுமே பார்த்து கொண்டிருந்தது ஒரு காலம்.இப்போது லேப்டாப்பிலும் பார்க்கலாம்,டிவிவியிலும் பார்க்கலாம் என்ற நிலை பரவலாகிவிட்டது.எந்த அளவுக்கு பரவலாகி விட்டது என்பதற்கு இந்த தளம் சான்று.

இணையதள முகவரி;http://filmoutlet.co.uk/

————-
குறிப்பு;இந்த தளம் பிரதானமாக ஹாலிவுட் திரைப்படங்களுக்கானது .கோலிவுட ரசிகர்கள் ஏக்கப்பெருமூச்சு மட்டுமே விடலாம்.பிறகு ஏன் இந்த பதிவு என கேட்க வேண்டாம்.தமிழிலும் இது போன்ற தளங்கள் வர வேண்டும் என்ற ஏக்கம் தான்!

அன்புடன் சிம்மன்

அசத்துகிறது ஹாலிவுட்;தூங்குகிறது கோலிவுட்.

ஹாலிவுட் எங்கேயோ போய் கொண்டிருக்கிறது.கோலிவுட் எங்கேயோ பின்தங்கி நிற்கிறது என்ற எண்ணம் தான் ஏற்படுகிறது கேன் ஐ ஸ்டிரிம் இட் தளத்தை பார்க்குபோது.கூடவே ஒருவித பட்சாதாபமும் கோலிவுட் மீது உண்டாகிறது.

நிச்சயமாக இந்த கருத்து கோலிவுட் படங்களின் தொழில்நுட்பம் அல்லது அவற்றின் தரம் சார்ந்ததோ அல்ல!கோலிவுட் படங்கள் விநியோகிக்கப்படும் விதம் தொடர்பான ஏக்கம் இது.

கோலிவிட்டில் வெளியாகும் படங்களில் நூற்றில் பத்து கூட வெற்றி பெறுவதில்லை என்னும் நிலை.தியேட்டர்களிலோ கூட்டம் இல்லை.வெள்ளி விழா படங்கள் 100 நாள் படங்களை எல்லாம் கோலிவுட் மறந்து பல வருடங்களாச்சு!

இரண்டாவது வாரத்திற்கு வந்தாலோ படம் வெற்றி என நிம்மதி பெருமூச்சு விடுகிறது கோலிவுட் வட்டாரம்.இந்த நிலைக்கு திருட்டு விசிடியும்,இப்போது இண்டெர்நெட்டும் காரணமாக சொல்லப்படுகிறது.படம் ரீலிசான அன்றே இண்டெர்நெட்டில் டவுண்லோடுக்கு வந்துவிட்டால் தியேட்டருக்கு யார வருவார்கள் என்று கோலிவுட் புள்ளிகள் ஆவேசமாக கேட்பது வழக்கமாக உள்ளது.

இதில் உண்மை இருக்கலாம்,ஆனால் தொழில்நுட்பம் திரைப்பட விநியோகத்திற்கு திறந்து விட்டிருக்கும் மாற்று வழிகளாக இவற்றை பார்க்க துவங்கினால் இதே நெட்டை வைத்து வருவாயும் பார்க்கலாமே!ஹாலிவுட்டில் இதை தான் செய்கின்றனர்.

படம் ரீலிசான குறிப்பிட்ட காலத்தில் அவர்களே தரமான டிவிடியையும் சந்தையில் அனுமதிக்கின்றனர்.எஹ் டி,புளு ரே என அசத்தலான தரத்திலான டிவிடி எல்லாம் வந்துவிட்டன.எனவே திரையரங்குகளில் திருட்டுத்தனமாக எடுக்கப்பட்ட பிரதிகளை விட இந்த டிவிடிக்கள் சூப்பராக இருக்கும்.அதே போல நெட்பிலிக்ஸ் போன்ற திரைபட சேவை தளங்களின் மூலம் ஸ்டிரிமிங் என்று சொல்லப்படும் முறையில் படங்களை காணச்செய்கின்றனர்.

எல்லாமே அனுமதிக்கப்பட்டவை.கட்டணம் வசூலித்து தருபவை.இன்னும் பல வழிகளில் இணையம் மூலமே புதிய படங்கள் ரசிகர்களை வந்தடைகின்றன.

இப்படி எத்தனை வழிகளில் எல்லாம் இருக்கின்றன என்னும் வியப்பை தான் கேன் ஐ ஸ்டிரிம் தளம் ஏற்படுத்துகிறது.

ஒருவிதத்தில் இந்த தளத்தின் பெயரோ பல விஷயங்களை சொல்லாமல் சொல்கிறது.ஸ்டிரீமிங் என்றால் திரைப்படங்கள் இண்டெர்நெட்டில் பாய்ந்தோடச்செய்வது என்று புரிந்து கொள்ளலாம்.அதாவது டவுண்லோடு செய்யும் தேவை இல்லாமால் திரைப்படங்களை அப்படியே பார்த்து மகிழ்வது.

ரசிகர்கள் ,திரை உலகினர் இருவருக்குமே இது சாதகமானது.ரசிகர்களை பொருத்தவரை ப்டம் டவுண்லோடு ஆக காத்திருக்காமல் விரும்பியவுடன் பார்த்து ரசிக்கலாம்(கட்டணம் செலுத்தி தான்).டவுன்லோடு செய்யப்படாததால் வேறு யாருடனும் பகிர்ந்து கொள்ள முடியாதது என்பது திரை உலகிற்கு சாதகம்.

நெட்பிலிக்ஸ் போன்ற தளங்கள் இந்த வசதியை தருகின்றன.

ஆனால் இந்த வசதிகள் எல்லாம் படம் வெளியானவுடன் கிடைத்துவிடுவதில்லை.படம் வெளியான குறிப்பிட்ட காலத்திற்கு பிறகு அவற்றின் டிவிடியும்,இணைய வடிவமும் வெளியாக துவங்குகின்றன.இவை படத்திற்கு படம் நிறுவனத்திற்கு நிறுவனம் மாறுபடலாம்.

எனவே ஒரு படத்தின் ஸ்டிரீமிங் எப்போது கிடைக்கும் என்பது தான் ஹாலிவுட் ரசிகர் கேட்கும் கேள்வியாக இருக்கிறது.அதாவது தியேட்டருக்கு போகாமல் விட்டில் இருந்தே படம் பார்க்க விரும்புகிறவர்கள்.

இந்த கேள்விக்கான விடை அளிக்கும் வகையில் தான் கேன் ஐ ஸ்டிரிம் இட் தளம் உருவாக்கப்பட்டுள்ளது.

எந்த படத்தை காண விருப்பமோ அந்த படத்தின் பெயரை இந்த தளத்தில் டைப் செய்தால் அந்த படம் எப்போது முதல் எந்த எந்த வடிவில் கிடைக்கும் என்ற தகவல் வந்து நிற்கிறது.

ஒவ்வொரு படத்திற்கும் வரிசையாக ஸ்டிரிமிங் எப்போது,டிவிடி ரீலிஸ் எப்போது,டிஜிட்டல் விற்பனை எப்போது,வாடகை ஸ்டிரிமிங் எப்போது என்ற தகவல்கள் தரப்படுகிறது.அப்படியே நெட்பிலிக்ஸ்,அமேசான்,மற்றும் ஹூலு போன்ற தளங்களில் எப்போது வாங்கலாம் என்ற விவரமும் தரப்படுகிறது.

ஹாலிவுட் ரசிகர்களின் வசதிக்காக அமைக்கப்பட்டுள்ள தளம் என்றாலும் ஹாலிவுட் படங்களின் விநியோகிக்க்ப்படும் பலவிதமான வழிகளை பார்த்தால் பிரம்மிப்பாக தான் இருக்கிறது.

இணையதள முகவரி;http://www.canistream.it/

வாடகைக்கு கலை படைப்புகள்: உதவும் இணைய‌தளம்

இண்டர்நெட் உலகில்
‘நெட்பிலிக்ஸ்’ மாதிரி என்பது மிகவும் புகழ் பெற்றது.
திரைப்பட டிவிடி துறையில் தலைகீழ் மாற்றத்தை ஏற்படுத்திய இந்த மாதிரி வேறு துறைகளிலும் வெற்றிகரமாக பின்பற்றலாம்.
அந்த வகையில் கலைத்துறைக்கு ‘நெட்பிலிக்ஸ்’  மாதிரியை, டர்னிங் ஆர்ட் இணைய தளம் கொண்டு வந்திருக்கிறது.  பெயருக்கு ஏற்பது இந்த இணைய தளம் கலை படைப்புகளை வாங்கும் தன்மையை தலைகீழாக மாற்றி அமைத்திருக்கிறது.
இன்னொரு விதமாக சொல்வது என்றால் கலை படைப்புகளை ஜனநாயக  மயமாகவும் ஆக்கி இருக்கிறது.
இணைய டிவிடி வாடகை சேவையான ‘நெட்பிலிக்ஸ்’ சேவையின்  சிறப்பம்சம், இண்டர்நெட் மூலம் திரைப்பட டிவிடிக்களை வாடகைக்கு தருவித்துக்கொள்ள உதவுவதேயாகும்.
அதாவது இண்டர்நெட் மூலம் விருப்பமான டிவிடியை ஆர்டர் செய்து விட்டு அவற்றை தபால் மூலம் பெற்றுக்கொள்ளலாம். டிவிடி மையங்களில் டிவிடிக்களை வாடகைக்கு எடுப்பதுபோலவே ஆன்லைன் மற்றும் ஆப்லைன் உலகை  இணைத்து உருவாக்கப்பட்ட இந்த சேவையின் மூலமாக இண்டர்நெட் வழியாக  டிவிடிக்களை  ஆர்டர் செய்ய முடியும்.
இந்த சேவையில் உள்ள அணுகூலம் என்னவென்றால்  குறிப்பிட்ட காலத்திற்குள் டிவிடிக் களை திருப்பி தர வேண்டும் என்ற நிர்ப்பந்தமோ அப்படி திருப்பித் தர தவறும் பட்சத்தில் அபாரதம் செலுத்த வேண்டிய கட்டாயமோ கிடையாது.
சந்தாதாரராக சேர்ந்து, விருப்பமான டிவிடியை  எவ்வளவு கால வேண்டுமானாலும் வைத்துக் கொள்ளலாம்.  அடுத்த டிவிடி தேவை என்றால் கைவசம் உள்ள டிவிடியை தபால் மூலம் அனுப்பி வைக்க வேண்டும். அமெரிக்க திரைப்பட ரசிகர்கள் மத்தியில் பெரும் வரவேற்பை பெற்ற இந்த சேவை புதிய இணைய மாதிரியாக பாராட்டப்படுகிறது.
தற்போது இந்த மாதிரியை அப்படியே பின்பற்றி  டர்னிங் ஆர்ட் இணைய தளம் உருவாக்கப்பட் டுள்ளது. இந்த இணைய தளம் கலைப்படைப்புகளுக்கான ‘நெட்பிலிக்ஸ்’  என்று வர்ணிக்கப்படுகிறது.  ‘நெட்பிலிக்ஸ்’  தளத்தில் எப்படி டிவிடிக்களை வாடகைக்கு எடுக்கிறோமோ அதே போல இந்த தளத்தில் கலை படைப்புகளை வாடகைக்கு எடுத்து வீட்டுச் சுவற்றில் மாட்டி அழகு பார்க்கலாம்.
கலா ரசனை என்பது எல்லோருக்கும் பொதுவானது என்றாலும் கலை படைப்புகளை வாங்குவது என்பது பெரும்பாலும் செல்வந்தர்களுக்கு  மட்டுமே உகந்த விஷயமாக கருதப்படுகிறது .
கலை படைப்புகளை வாங்குவதற்கான வசதி இருக்க வேண்டும் என்பது ஒருபுறம் இருக்க, சரியான கலை படைப்புகளை  தேர்வு செய்து வாங்குவதற்கான நிபுணத்துவமும் இருக்க வேண்டும்.
இதற்காக செல்வந்தர்கள் கலை விமர்சகர்கள் மற்றும் ஆலோசகர்களின் உதவியை நாடலாம்.  ஆனால் சாமன்யர்களுக்கு இது சாத்தியமில்லை.
இந்த சிக்கலுக்குத்தான் டர்னிங் ஆர்ட் இணைய தளம் அழகான தீர்வை முன் வைக்கிறது.  இந்த தளம் மதிப்பு வாய்ந்த கலை படைப்புகளின் பிரதிகளை வாடகைக்கு  தருகிறது.
சந்தாதாரர்கள் இந்த நகல்களில் தங்களுக்கு பிடித்தமானதை
ஆர்டர் செய்து அவற்றை தங்கள் வீட்டுச்சுவர்களில் மாட்டிக்கொள்ளலாம்.
பின்னர் நண்பர்கள் மற்றும் தெரிந்தவர்களிடம் அந்த ஓவியத்தை காண்பித்து அது மதிப்பு மிக்கதாக இருக்கிறதா என்பதை உறுதி செய்து கொண்டு விரும்பினால் மூல ஓவியத்தை அதற்குரிய விலை கொடுத்து வாங்கிக்கொள்ளலாம்.
இல்லையென்றால் ஒரு மாதம் கழித்து அந்த நகலை திருப்பி ஒப்படைத்துவிட்டு வேறு ஒரு ஓவிய நகலை வாங்கி மாட்டிக்கொள்ள லாம்.எப்போது பார்த்தாலும் ஒரே மாதிரியான கலை படைப்புகள்  சுவற்றில் தொங்கிக்கொண்டிருப்பதை  விரும்பாதவர்களும் இந்த சேவையை பயன்படுத்தி மாதம் ஒரு கலை படைப்பை வாங்கி தங்கள் வீட்டை அலங்கரிக்கச் செய்யலாம்.
நகல்களை வாங்கி பழக்கப் படுத்திக்கொள்வதின் மூலமாக இணைய‌வாசிகளுக்கு கலை படைப்புகளை தேர்வு செய்வதில் நிபுணத்துவமும் உண்டாகும்.

————–

http://www.turningart.com/