Tag Archives: wikipedia

விக்கிபீடியா விளையாட்டும், வாசிப்பு சாகசமும்!

wபணி நிமித்தமாக தகவல்களை தேட இணையத்தை பயன்படுத்துவதை நீங்கள் வழக்கமாக கொண்டிருக்கலாம். இணைய ஆய்வில் களைப்பு ஏற்பட்டால் அல்லது பணிக்கு நடுவே ஒரு மாறுதல் ஏற்பட்டால் இணையத்தில் விளையாட்டாக பொழுதை கழித்து இளைப்பாறுதலையும் வழக்கமாக கொண்டிருக்கலாம். அது யூடியூப்பில் நகைச்சுவை வீடியோவாக இருக்கலாம் அல்லது பிரவுசரில் விளையாடும் விளையாட்டாக இருக்கலாம். ஆக, இணையத்தில் நீங்கள் தகவல்களை தேடிக்கொண்டே இருக்கலாம் அல்லது விளையாட்டாக பொழுதை போக்கலாம். எல்லாம் சரி, எப்போதாவது நீங்கள் விளையாட்டாக தகவல்களை தேடியது உண்டா?

அதாவது குறிப்பிட்ட தகவலை தேடாமல், அறிதல் நோக்கில் எதையாவது தேடிய அனுபவம் உண்டா? இத்தகைய அனுபவம் இருந்தாலும் சரி, அல்லது இப்படி எல்லாம் விளையாட்டாக தகவல்களை தேடியது இல்லை என்றாலும் சரி, விக்கிபீடியா கட்டுரைகளை மையமாக கொண்டு உருவாக்கப்பட்டுள்ள புதிய விளையாட்டு உங்களை நிச்சயம் கவர்ந்திழுக்கும். ஏனெனில், விக்கிபீடியா; தி டெக்ஸ்ட் அட்வன்சர் எனும் இந்த விளையாட்டு, விக்கிபீடியா கட்டுரைகளை விளையாட்டு வடிவில் படிக்க வைக்கிறது.

கட்டற்ற இணைய களஞ்சியமான விக்கிபீடியா தகவல் சுரங்கமாக இருப்பது உங்களுக்கு தெரிந்த விஷயம் தான். குறிப்பிட்ட தலைப்பில் தகவல் தேவை எனில் நேராக விக்கிபீடியாவில் தேடிப்பார்க்கலாம். மேலும் பல நேரங்களில் கூகுளில் தகவல்களை தேடும் போதும் பெரும்பாலும் தேடப்படும் பதம் தொடர்பான விக்கிபீடியா பக்கம் முன் வந்து நிற்பதை பார்த்திருக்கலாம்.

புதிய தகவல்களை தெரிந்து கொள்ள விரும்புகிறவர்கள், விக்கிபீடியாவுக்குள் நுழைந்து எந்தவித இலக்கும் இல்லாமல் ஏதாவது ஒரு கட்டுரையில் இருந்து துவங்கி, தொடர்ந்து வெவ்வேறு கட்டுரைகளாக படிக்கும் வழக்கமும் கொண்டிருக்கலாம். ஆங்கில விக்கிபீடியாவில் மட்டும் 60 லட்சத்திற்கும் மேற்பட்ட கட்டுரைகள் இடம்பெற்றிருப்பதால், இப்படி மனம் போன போக்கில் கட்டுரைகளை பின் தொடர்ந்து செல்வது மற்றபடி அறிந்து கொள்ள வாய்ப்பில்லாத புதிய சுவாரஸ்யமான தகவல்களை தெரிந்து கொள்ள உதவும். விக்கிபீடியாவை சுவாரஸ்யமான மற்றும் விநோதமான கட்டுரைகளுக்கு குறைவில்லை என்பதால் இந்த தேடல் பயணம் சாகசம் மிக்கதாகவே இருக்கும்.

ஆனால், எல்லோருக்கும் இந்த பழக்கம் இருக்க வாய்ப்பில்லை. அதனால் என்ன, இந்த சாகசத்தை எல்லோருக்கும் சாத்தியமாக்குவதற்காக தான் விக்கிபீடியா கட்டுரைகள் சார்ந்த விளையாட்டு உருவாக்கப்பட்டுள்ளது. லண்டனைச்சேர்ந்த கேவன் டேவிஸ், இதை உருவாக்கியுள்ளார்.

விக்கிடெக்ஸ்ட் விளையாட்டிற்கான தளத்தில் (http://kevan.org/wikitext/) நுழைந்ததுமே, கட்டுரை தேடலை துவக்குவதற்கான குறிப்புகள் கொடுக்கப்பட்டிருக்கும். அந்த குறிப்புகள் ஒவ்வொன்றும் ஒரு இடத்தை குறிக்கும். அவற்றில் ஏதாவது ஒன்றை கிளிக் செய்தால், அந்த இடம் தொடர்பான விக்கிபீடியா கட்டுரையின் சுருக்கம் மற்றும் தொடர்புடைய ஒளிப்படம் இடம்பெறும். அந்த தகவல்களை படித்து முடித்தால், கீழே அடுத்த கட்டுரைக்கான இணைப்பு இடம் பெற்றிருக்கும். அந்த இணைப்பு இன்னொரு இடத்திற்கு அழைத்துச்செல்லும். பட்டியலில் உள்ள இடங்களை தவிர, பயனாளிகள் தங்கள் மனதில் உள்ள ஏதேனும் இடத்தை டைப் செய்தும் தேடலாம்.

இதில் என்ன சுவாரஸ்யம் என்றால், குறிப்பிட்ட இடத்தில் இருந்து அடுத்த கட்டுரைக்கு எந்த திசையில் வேண்டுமானாலும் செல்லலாம். தேர்வு செய்யும் திசைக்கு ஏற்ப வெவ்வேறு இடம் தொடர்பான கட்டுரை சுருகங்களை படிக்கலாம். இதன் மூலம் முற்றிலும் புதிய இடங்கள் தொடர்பான தகவல்களை தெரிந்து கொள்ளலாம். இந்த தேடலும் ஒரு சாகச விளையாட்டு போல சுவாரஸ்யமாகவே இருக்கும்.

உதாரணத்திற்கு அமெரிக்காவின் வெள்ளை மாளிகையை கிளிக் செய்தால், அந்த மாளிகளையில் உள்ள ஒவ்வொரு அறை தொடர்பான விக்கிபீடியா தகவல்களை தெரிந்து கொள்ளலாம். அடுத்தடுத்து இடங்களுக்கு செல்வது அலுப்பாக இருந்தால், திடிரென ஏதாவது ஒரு இடத்திற்கு தாவிச்செல்லலாம். இதற்கு செல் (கோ) எனும் சொல்லை டைப் செய்து தொடர்ந்து இடத்தின் பெயரை டைப் செய்தால் போதுமானது. இன்னும் கூடுதல் தகவல்கள் தேவை எனில், ஆய்வு (எக்ஸ்) என டைப் செய்து ஏதேனும் தலைப்பை டைப் செய்தால் அது தொடர்பான தகவல்களை பெறலாம்.

இந்த விளையாட்டில் எதிர்கொள்ளும் தகவல் பக்கத்தை சமூகம் ஊடகம் வாயிலாக நண்பர்களுடன் பகிர்ந்து கொள்ளவும் செய்யலாம்.

மிகப்பெரிய சாகச விளையாட்டு என்று சொல்ல முடியாவிட்டாலும், விக்கிபீடியா கட்டுரைகளை படித்து புதிய தகவல்களை தெரிந்து கொள்வதற்கான சுவாரஸ்யமான வழி இது. மேலும் விக்கிபீடியாவின் நீள அகலத்தையும் இதன் மூலம் தெரிந்து கொள்ளலாம். வரிசையாக கட்டுரைகளை படித்து பார்ப்பதை விட, இப்படி தகவல் தேடல் விளையாட்டில் ஈடுபடுவது புதிய அனுபவமாக இருக்கும்.

மென்பொருளாளரான டேவிஸ் இது போன்ற விக்கி விளையாட்டுகளை உருவாக்குவது புதிதல்ல. இவர் ஏற்கனவே கேட்பிஷிங் (http://kevan.org/catfishing.php) எனும் விக்கி விளையாட்டையும் உருவாக்கியிருக்கிறார். இந்த விளையாட்டில் குறிப்பிட்ட ஒரு கட்டுரை இடம்பெறும் வகைகள் அனைத்தும் வார்த்தைகளாக கொடுக்கப்பட்டிருக்கும். அந்த வார்த்தைகள் விவரிக்கும் கட்டுரை எது என்பதை ஊகிக்க வேண்டும். இதை தனியாகவும் விளையாடலாம், நண்பர்களுடன் இணைந்தும் விளையாடலாம்.

இதே போல நாவல் எழுதும் மாதத்தை முன் வைத்து விக்கிபீடியா கட்டுரைகளை மட்டுமே வைத்துக்கொண்டு ஒரு புத்தகத்தையும் எழுதியிருக்கிறார்.

டேவிஸ் இணையதளத்தில் அவர் உருவாக்கிய மேலும் பல இணைய விளையாட்டுகளை பார்க்கலாம். வகை வகையான விளையாட்டுகளை மனிதர் உருவாக்கியிருக்கிறார். எல்லாம் தனித்தனி தலைப்புகளில் வகைப்படுத்தப்பட்டுள்ளன. குறும்பதிவு சேவையான டிவிட்டர் சார்ந்த விளையாட்டுகள் மட்டுமே பல உள்ளன. தேடியந்திரம் சார்ந்த விளையாட்டுகளும் இருக்கின்றன. இவைத்தவிர கலை மற்றும் சோதனை முயற்சி சார்ந்த விளையாட்டுகளும் இருக்கின்றன. வார்த்தை விளையாட்டு மற்றும் வினாடிவினா ரக விளையாட்டுகளும் கூட இருக்கின்றன.

இணையம் எத்தனை சுவாரஸ்யமானது என்பதை டேவிஸ் இணைய பக்கம் பார்த்து தெரிந்து கொள்ளலாம்: http://kevan.org/

வியக்க வைக்கும் விக்கி உலகம்!

’ஒரு கனவு நனவாகி விட்ட நிலையில் நாம் காண வேண்டியது இன்னொரு கனவு’.

இந்த மேற்கோளுக்கு சொந்தக்காரர் யார் என யூகிக்க முடிகிறதா? ஒரு சின்ன க்ளு ,அவர் நம்மவர் தான்!. இதற்கான பதிலை பார்ப்பதற்கு முன் முதலில் விக்கிபீடியா புராணத்தை கொஞ்சம் பார்க்கலாம்.

விக்கிபீடியாவை ஒரு இணைய அதிசயம். கூட்டு முயற்சியின் அடையாளமாக விளங்கும் விக்கிபீடியா இணையத்தின் எல்லையில்லா ஆற்றலுக்கும் உதாரணமாக விளங்குகிறது. விக்கிபீடியா அறிமுகமான போது இந்த அளவு வெற்றி பெறும் என யாரும் எதிர்பார்த்திருக்க மாட்டார்கள். இவ்வளவு ஏன், விக்கிபீடியா வெற்றி பெறும் என்று கூட பெரும்பாலானோர் நினைத்திருக்க மாட்டார்கள்.

ஏனெனில் அப்போது விக்கிபீடியாவின் கருத்தாக்கமே புதிதாக இருந்தது. விக்கிபீடியாவிற்கு முன் கலைக்களஞ்சியம் என்றால் அதை நிர்வகிக்க ஒரு ஆசிரியர் குழு இருக்கும், அதற்கு வழிகாட்ட வல்லுனர்கள் குழு இருக்கும். ஒவ்வொரு தகவலையும் ஆய்வு செய்து பல்முறை சரி பார்த்து இடம்பெறச்செய்வார்கள். ஆனால் கட்டற்ற களஞ்சியமாக அறிமுகமான விக்கிபீடியா இந்த சித்தாந்தத்தையே தலைகீழாக புறட்டிப்போட்டது. விக்கிபீடியா இணையவாசிகளால், இணையவாசிகளுக்காக உருவாக்கப்பட்டது. அதில் மையமாக ஆசிரியர் குழு இல்லை. யார் வேண்டுமானாலும் கட்டுரைகளை சமர்பிக்கலாம்.- அந்த கட்டுரையில் உள்ள தகவல்களை யார் வேண்டுமானாலும் திருத்தி மாற்றி அமைக்கலாம் எனும் ஜனநாயகத்தன்மையுடன் விக்கிபீடியா அறிமுகமானது. இதன் நிறுவனர் ஜிம்மி வேல்ஸ்.

மாபெரும் களஞ்சியம்

விக்கிபீடியாவின் ஆதார தன்மையே இந்த பங்கேற்பு தன்மை தான். விக்கி என்றால் மென்பொருள் மொழியில், எவரும் திருத்தங்களை செய்யக்கூடிய இணையதளம் என்று பொருள். இதை விக்கியின் பின்னே உள்ள மென்பொருள் சாத்தியமாக்குகிறது. ஆக, தொழில்நுட்ப நோக்கில்  யார் வேண்டுமானால் தகவல்களை இடம்பெற வைப்பது சாத்தியமாகலாம். ஆனால் இவ்வாறு உருவாக்கப்படும் இணையதளத்தையும், அதில் இடம் பெறும் தகவல்களையும் எப்படி நம்புவது என்ற கேள்வி எழுந்தது. அதோடு, வல்லுனர்கள், ஆசிரியர்கள் குழு உதவி இல்லாமல் ஒரு களஞ்சியத்தை சாமானியர்கள் ஒன்று சேர்ந்து உருவாக்குவது எல்லாம் நடைமுறையில் செல்லுபடியாகுமா? என்று கேட்கப்பட்டது. இத்தகைய முயற்சி அபத்தமாகவே அமையும் என ஆருடம் கூறப்பட்டது. ஆனால் விக்கிபீடியா இணையவாசிகளின் பங்கேற்பால் பெரும் அளவில் வெற்றி பெற்று உலகின் மாபெரும் களஞ்சியமாக உருவாகியுள்ளது.

விக்கிபிடியாவின் வளர்ச்சி வியக்க வைக்க கூடியதாக இருக்கிறது. இன்று விக்கிபீடியா ஆங்கில மொழியில் மட்டும் அல்லாமல், நம் தமிழ் உள்ளிட்ட 295 மொழிகளில் செயல்படுகிறது. ஆங்கில மொழியில் மட்டும் 5 மில்லியனுக்கு மேல் கட்டுரைகள் இடம்பெற்றுள்ளன. நாள்தோறும் 800 புதிய கட்டுரைகள் சேர்க்கப்படுகின்றன. நொடிக்கு இத்தனை தகவல்கள் திருத்தப்படுகின்றன. தமிழ் மொழியில் கட்டுரைகள் ஒரு லட்சத்தை நெருங்கிக் கொண்டிருக்கின்றன. இந்தி உள்ளிட்ட இந்திய மொழிகளிலும் விக்கிபீடியா இயங்குகிறது. இந்த பிரும்மாண்ட வளர்ச்சிக்கு பின்னே உலகம் முழுவதும் பரவிக்கிடக்கும் தன்னார்வலர் படை ஓயாமல் இயங்கி கொண்டிருக்கிறது. பாரம்பரிய களஞ்சியங்கள் எல்லாம் ஒவ்வொரு பதிப்பின் போது மேம்படுத்தப்படும். விக்கிபீடியா ஒவ்வொரு நொடியும் திருத்தப்பட்டு மேம்படுத்தப்பட்டு கொண்டிருக்கிறது. அதுவே விக்கிபீடியாவின் தனித்தன்மையாக இருக்கிறது.

இணைய உலகில் விக்கிபீடியாவுக்கு இருக்கும் செல்வாக்கை பற்றியும் அதிகம் கூற வேண்டியதில்லை. மாணவர்கள் முதல் ஆய்வாளர்கள் வரை தகவல்கள் தேவை எனில் விக்கிபீடியாவை நாடுகின்றனர். கூகுள் உள்ளிட்ட தேடியந்திரங்களில் தகவல்களை தேடும் போது, அநேகமாக அது தொடர்பான விக்கிபீடியா பக்கம் தேடல் பட்டியலில் முதல் பக்கத்திலேயே வரவேற்கும்.

தகவல் சுரங்கம்

விக்கிபீடியா தகவல் சுரங்கம் என்பதில் சந்தேகம் இல்லை. ஆனால் அதன் தகவல்களை எந்த அளவுக்கு நம்பலாம் எனும் கேள்வி இன்னும் கூட பலருக்கு இருக்கலாம். இந்த கேள்விக்கு நம்பலாம் அல்லது நம்ப முடியாது என ஒற்றை வார்த்தையில் பதிலை எதிர்பார்ப்பது விக்கி சித்தாந்தத்தையே கொச்சை படுத்துவது போலாகிவிடும். ஏனெனில் விக்கிபீடியா அந்த அளவுக்கு நம்பகத்தன்மையை உறுதி செய்வதற்கான பல அடுக்கு செயல்முறைகளையும், அவற்றை இயக்கும் கராரான விதிகளையும் கொண்டுள்ளது. இது பற்றி சுருக்கமாக சொல்வது என்றால் விக்கிபீடியாவில் எப்படி தகவல்களை இடம்பெற வைக்க தன்னார்வலர் படை இயங்கி வருகிறதோ, அதே போல, தகவல்களை சரி பார்க்கவும் , அவற்றில் பிழை எனில் திருத்தம் செய்யவும் ஒரு பெரும் படை செயல்பட்டு வருகிறது. இந்த படை விக்கிபீடியா கட்டுரைகளில் உள்ள தகவல்களை சரி பார்த்து தேவையான திருத்தங்களை மேற்கொள்கிறது. இந்த திருத்தங்களும் திருத்தப்படலாம் என்பதால் பல நேரங்களில் திருத்தல் யுத்தம் நிகழ்வது உண்டென்றாலும், விக்கிபீடியா தன்னைத்தானே திருத்திக்கொண்டே இருக்கிறது.

நம்பகத்தன்மை

எனவே விக்கிபிடியாவில் உள்ள தகவல்கள் நம்பகமானவை என்று சொல்வது சரியல்ல, நியாயமும் அல்ல. ஆனால் அதற்காக விக்கிபீடியா தகவல்கலை அப்படியே கண்ணை மூடிக்கொண்டும் நம்பி விடக்கூடாது. இவை அடிப்படையில் வழிகாட்டி நோக்கிலானவை என்பதை புரிந்து கொள்ள வேண்டும். இவற்றை ஒரு துவக்கப்புள்ளியாக வைத்துக்கொள்ளலாம். அதோடு விக்கிபீடியா கட்டுரைகள் செயல்படும் விதத்தையும் புரிந்து கொள்ள வேண்டும். விக்கிபீடியாவில் யார் வேண்டுமானாலும் கட்டுரை எழுதலாம் என்றாலும், மனம் போன போக்கில் எதையும் எழுத முடியாது. முதலில் கட்டுரை தலைப்பை சமர்பிக்க வேண்டும். அதை சக பயனாளிகள் குழு பார்த்து ஏற்றுக்கொள்ள வேண்டும். அதன் பிறகு தகவல்களை சேர்க்கலாம். தகவல்களையும் இஷ்டம் போல சேர்க்க முடியாது. அதற்கான ஆதாரங்களை சமர்பிக்க வேண்டும். மாற்றம் செய்ய வேண்டுமானாலும் ஆதாரங்கள் தேவை. தகவலுக்கான மூலத்தை சுட்டிக்காட்ட வேண்டும்.

விக்கி கட்டுரைகளை வாசிக்கும் போது, தகவல்கள் தொடர்பான ஆதாரங்கள் இணைப்பை படித்துப்பார்க்க வேண்டும். கட்டுரைக்கு கீழே இந்த இணைப்புகள் வரிசையாக இருக்கும். அதிகார பூர்வ தளங்களுக்கான இணைப்புகளும் கொடுக்கப்பட்டிருக்கும். இவற்றை படித்துப்பார்க்கும் போது தகவல்களின் நம்பகத்தன்மை குறித்த தெளிவு உண்டாகும். குறிப்பாக மிக முக்கிய தகவல் எனில். அது தொடர்பான ஆதாரங்கள் என்ன என்பதை ஆராய வேண்டும். தேவை எனில் அந்த தகவல் குறித்து தனியே கூகுளில் தேடிப்பார்க்கலாம். விக்கியில் வாசித்தால் மட்டும் போதாது, கொஞ்சம் ஆய்வும் தேவை.

விக்கிபீடியா பயனாளியாக மட்டும் இல்லாமல் விக்கிபீடியாவில் பங்கேற்கவும் செய்தால், இந்த செயல்முறையை நன்றாக விளங்கி கொள்ளலாம். அதோடு விக்கிபீடியாவில் பங்கேற்பது என்பது நம் மொழியில் உள்ள களஞ்சியத்தின் வளத்தை பெருக்குவதில் தொண்டாற்றுவது போல தான். தமிழ் விக்கிபீடியாவில் இன்னும் கட்டுரைகளை சேர்க்கலாம். திருத்தங்களை மேற்கொண்டு மேம்படுத்தலாம். :

தினம் தினம் தகவல்கள்

நிற்க விக்கிபீடியாவில் தெரிந்து கொள்ள வேண்டிய விஷயங்கள் இன்னும் பல இருக்கின்றன. விக்கிபீடியாவில் தேவையான தகவல்களை பெறலாம் என்பதோடு தினந்தோறும் புதிய விஷயங்கள் கற்றுக்கொள்ளவும் செய்யலாம். விக்கிபீடியா முகப்பு பக்கத்தில் இருந்தே இதை துவங்கலாம். விக்கிபீடியா பரவலாக அறியப்பட்டதாக இருந்தாலும் கூட, அந்த தளத்திற்கு நேரடியாக பலரும் விஜயம் செய்வதில்லை. பெரும்பாலானோர் கூகுள் தேடல் மூலம் கண்டறியும் குறிப்பிட்ட விக்கிபீடியா பக்கத்தையே நாடுகின்றனர். ஆனால் விக்கிபீடியா முகப்பு பக்கத்தில் தினமும் ஒரு கட்டுரை முன்னிறுத்தப்படும். அதன் மூலம் புதிய தகவல்களை தெரிந்து கொள்ளலாம். அருகிலேயே செய்திகளின் பட்டியலையும் பார்க்கலாம். அதன் கீழே உங்களுக்குத்தெரியுமா எனும் தலைப்பிலும், இன்றைய தின நிகழ்வுகள் எனும் தலைப்பிலும் தகவல்களை பார்க்கலாம். தினமும் ஒரு புகைப்படம் மூலம் தகவல் முன்வைக்கப்படும்.

தினமும் இல்லாவிட்டாலும் அடிக்கடி விக்கிபிடியாவுக்குள் எட்டிப்பார்ப்பதை வழக்கமாக கொண்டு சில நிமிடங்களை செலவிட்டால் புதிய விஷயங்களை அறுவடை செய்து கொண்டே இருக்கலாம். முகப்பு பக்கத்தில் விக்கிபீடியாவில் அப்டேட்டாகும் தகவல்களை எளிதாக அடையாளம் காணலாம் என்றால், போர்ட்டல் பகுதியின் மூலம் விக்கி சுரங்கத்தில் உள்ளவற்றை எல்லாம் காணலாம்.: https://en.wikipedia.org/wiki/Portal:Contents/Portals

இந்த பகுதியில் விக்கி கட்டுரைகள் பல்வேறு தலைப்புகள் வகைப்படுத்தப்பட்டுள்ளன. அகர வரிசைப்பட்டியலையும் காணலாம். இதில் மேலோட்டமாக பார்வையை ஓட்டி விருப்பமான பகுதியை தேர்வு செய்து மேற்கொண்டு படிக்கலாம். இதே பகுதியில் மிகவும் பிரபலமான கட்டுரை பட்டியல் மூலமும் புதிய கட்டுரைகளை அணுகலாம். போர்ட்டல் பகுதியில் உள்ள தலைப்புகளையும், வகைகளையும் பார்த்தாலே விக்கிபீடியாவின் நீள ,அகலத்தை நன்றாக தெரிந்து கொள்ளலாம்.

இணையத்தில் நேரம் கிடைக்கும் போதெல்லாம் விக்கிபீடியா தளத்தில் உலா வருவதை ஒரு பழக்கமாக வைத்துக்கொண்டால் நீங்களும் கூட நாளடைவில் நடமாடும் தகவல் களஞ்சியமாக மாறிவிடலாம். அதோடு குறிப்பிட்ட தலைப்பில் உங்கள் தகவல் ஞானத்தையும் ஆழமாக்கி கொள்ளலாம்.

சகோதர தளங்கள்

விக்கிபீடியா தளமே வியக்க வைக்க கூடியது என்றால் அதன் சகோதர தளங்களை பார்த்தால் இன்னும் பிரம்மிப்பு உண்டாகும். ஆம், விக்கிமீடியா அறக்கட்டளையால் நிர்வகிக்கப்படும் விக்கிபீடியா சார்பில் விக்குபுக்ஸ், விக்கிகோட்ஸ், விக்கிஷ்னரி, விக்கிநியூஸ், விக்கிசோர்ஸ் ,விக்கிவர்சிட்டி, விக்கிடேட்டா உள்ளிட்ட துணை திட்டங்களும் செயல்படுத்தபட்டு வருகின்றன. எல்லாமே இணையவாசிகளால் உருவாக்கப்படுபவை.

இவற்றில் விக்கி நியூஸ் (https://en.wikinews.org/ ) என்பது செய்திகளுக்கானது. விக்கி சமூகத்தால் பகிர்ந்து கொள்ளப்படும் செய்திகளை இந்த பக்கத்தில் அணுகலாம். உலக செய்து முதல் உள்ளூர் செய்திகள் வரை உண்டு. செய்திக்ள் தவிர, கட்டுரைகள், நேர்காணல்கள், செய்தி சேகர்ப்பு ஆகியவற்றையும் வாசிக்கலாம். விக்கி செய்திகள் தமிழிலும் இருக்கிறது: http://bit.ly/2oZMSyx

விக்கி செய்திகள் போலவே விக்கி புக்ஸ் (https://en.wikibooks.org/wiki/Main_Page ) பகுதியில் புத்தகங்களை வாசிக்கலாம். பல்வேறு தலைப்புகளில் புத்தகங்கhttps://en.wikibooks.org/wiki/Main_Pageளை வாசிக்க முடியும்.

விக்கிஷ்னரி (https://en.wiktionary.org/wiki/Wiktionary:Main_Page ) பகுதி விக்கி அகராதியாகும். இந்த அகராதியில் ஆங்கில் சொற்களுக்கான பொருள்மற்றும் பயன்பாட்டை தெரிந்து கொள்ளலாம். தமிழிலும் விக்கிஷ்னரி இருக்கிறது. இதே போலவே பிரபலமானவர்களின் மேற்கோள்களின் தொகுப்பாக விக்கிகோட் பகுதி அமைகிறது. மேற்கோள்களையும், பொன்மொழிகளையும் இதில் காணலாம். இதன் தமிழ் பகுதியில் தான் மேலே சொன்ன கனவு மேற்கோள் வருகிறது. அதன் சொந்தக்காரர் நடிகர் கமல்ஹாசன். https://en.wiktionary.org/wiki/Wiktionary:Main_Page

இந்த பக்கத்தில் மேலும் பல பிரபலங்கள், இலக்கியங்கள், திரைப்படங்களின் மேற்கோள்களை பார்க்கலாம். கலை,இலக்கியம், சமயம், வீரம் என தனித்தனி தலைப்புகள் கீழும் மேற்கோள்களை அணுகலாம். மயில்சாமி அண்ணாதுரை முதல் பாவலரேறு பெருஞ்சித்திரனார், மண்டேலா, மகாத்மா என மேதைகளின் மேற்கோள்களையும் அறியலாம்.

விக்கி வாயேஜ் (https://en.wikivoyage.org/wiki/Main_Page ) என்பது பயண வழிகாட்டி. உலகின் எந்த நாடு அல்லது நகருக்கு பயணம் செல்ல விரும்புகிறோமோ அந்த நாடு அல்லது நகரம் தொடர்பான தகவல்களை அறியலாம். குறிப்பாக சுற்றுலா நோக்கிலான தகவல்கள் மற்றும் பயண வழிகளை அறியலாம்.

விக்கி பல்கலை

விக்கி சோர்ஸ் என்பது மூலத்தகவல்களுக்கான நூலகம் போன்றது. விக்கிடேட்டா தரவுகளுக்கான காப்பகம். விக்கி வார்சிட்டி (https://en.wikiversity.org/wiki/Wikiversity:Main_Page) பகுதியில் விக்கி பல்கலைகழகம் போன்றது. கல்வி சார்ந்த தகவல்கள் இதில் கொட்டிக்கிடக்கின்றன. இணைய வடிவமைப்பு உள்பட பல விஷயங்களை இந்த ப்குதியில் கற்றுக்கொள்ளாலாம். மாணவர்கள் இந்த பக்கத்திற்குள் நுழைந்தால் பயனுள்ள பல தகவல்களை பெறலாம். பள்ளி பாடத்திற்கான ஊக்கத்தையும் பெறலாம், போட்டித்தேர்வுகளுக்கு தயாராகும் வகையில் தகவல்களையும் திரட்டிக்கொள்ளலாம்.

இவைத்தவிர விக்கி ஸ்பிஷியஸ் (https://species.wikimedia.org/wiki/Main_Page ) பகுதியில் தாவிரங்கள், விலங்குகள் உள்ளிட்ட உயிரணங்கள் தொடர்பான தகவல்களை அறியலாம். இவை எல்லாமே இணையவாசிகள் பங்கேற்பால் உருவாகி வருபவை., எனவே நீங்களும் பங்கேற்கலாம். தமிழ் விக்கிபீடியா பக்கம்: http://bit.ly/1o52tcM

விக்கி ஆர்வலர்கள் அவசியம் அறிந்திருக்க வேண்டிய இன்னொரு இணையதளம் விக்கிமீடியா அறக்கட்டளையின் வலைப்பதிவாகும்: https://blog.wikimedia.org/ . இதில் விக்கிபீடியாவின் புதிய திட்டங்கள், விக்கி சமூக நிகழ்வுகள் உள்ளிட்டவற்றை அறிந்து கொள்ளலாம். இந்த வரிசையில் சிம்பிள் விக்கிபீடியாவையும் (https://simple.wikipedia.org/wiki/Main_Page ) சேர்த்துக்கொள்ள வேண்டும். இது விக்கிபீடியாவின் எளிமையான வடிவம். இதில் உள்ள கட்டுரைகள் எல்லாம் அடிப்படை ஆங்கிலத்தில் எழுதப்பட்டிருக்கும். வாக்கியங்களும் சிறியதாக எளிதில் படிக்க கூடியதாக இருக்கும். சிறுவர் ,சிறுமியர் மற்றும் முதல் ஆங்கிலம் கற்று வருபவர்களுக்கு இந்த எளிமையான பக்கம் ஏற்றதாக இருக்கும். இதே போல கிவிக்ஸ் (http://www.kiwix.org/ ) இணையதளம் விக்கிபீடியா பக்கங்களை தரவிறக்கம் செய்து இணைய இணைப்பு இல்லாமலேயே பயன்படுத்த உதவுகிறது.

இவை எல்லாம் விக்கி சாம்பிராஜ்யத்தின் சில மாதிரிகள் மட்டுமே. விக்கி உலகிற்குள் நுழைந்தால் இன்னும் பல அற்புதங்களை நீங்களே தெரிந்து கொள்ள முடியும்.

 

 

 

 

 

 

 

 

ஒரு இணைய கையேடு மூடப்படுகிறது, கொஞ்சம் வருந்தலாமே பிளிஸ்!

C6ifJ90VwAAatO4டி.எம்.ஒ.இசட் தளம் முடப்பட்டிருக்கிறது. தனிப்பட்ட முறையில் இது எனக்கு வருத்தம் தரும் செய்தி என்றாலும், அதைவிட முக்கியமானது, இணையத்தின் மகத்தான ஒரு சகாப்தம் முடிவுக்கு வந்திருக்கிறது என்பது தான். அது மட்டுமா, இணைய தேடலின் ஒரு முக்கிய அத்தியாயம் முடிவுக்கு வந்திருக்கிறது. மறக்கப்பட்ட அத்தியாம் என்று வைத்துக்கொள்ளுங்களேன். அதனால் தான் இந்த செய்தி இன்னும் வேதனை தருகிறது.
டி.எம்.ஒ.இசட் தளமா அது என்ன? என்ற சந்தேகம் உங்களுக்கு இருந்தால், இந்த தளம் பற்றி ஒரு சுருக்கமான அறிமுகம். இணையத்தின் ஆதிகால கையேடு இது. அதாவது இணையதளங்களை பட்டியலிட்டு பரிந்துரைத்த தளம். யாஹு கையேட்டை போல என்று வைத்துக்கொள்ளுங்களேன்.
யாஹூ கையேடா? அது என்ன என்றும் கேட்கலாம். என்ன செய்ய? கூகுள் அலையில் காணாமல் போன சேவையில் யாஹூ கையேடும் ஒன்று! இருந்தாலும் என்ன யாஹு கையேடு தான் இரு காலத்தில் இணையவாசிகளுக்கு புதிய பயனுள்ள இணையதளங்களை அடையாளம் காட்டும் சேவையாக இருந்தது. இணையத்தின் கலங்கரை விளக்கம் என்றும் சொல்லலாம். அதாவது கவனமாக தேர்ந்தெடுக்கப்பட்ட சிறந்த இணையதளங்கள், அவற்றின் தன்மைக்கேற்ப பலவித தலைப்புகளில் பட்டியலிடப்பட்டிருக்கும். புதிய தளங்களை நாடுபவர்கள் இந்த பட்டியலில் தங்களுக்கு தேவையான பிரிவில் விரும்பிய தலைப்பை கிளிக் செய்து, புதிய தளங்களை தெரிந்து கொள்ளலாம். இதுவும் ஒரு தேடியந்திரம் தான்!
இணையத்தின் துவக்கத்தில் இதுவே இணையதளங்களை கண்டறிவதற்கான வழியாக இருந்தது. லைகோஸ், அல்டாவிஸ்டா போன்ற தேடியந்திரங்களுக்கு மத்தியிலும் இது பிரபலமாக இருந்தது. எனினும், தேடியந்திரமாக கூகுள் எழுச்சி பெற்று இணையத்தில் எதையும் தேடுவதை சுலபமாக்கிய பிறகு, யாஹூ கையேடு செல்வாக்கை இழந்து பின்னர் மூடப்பட்டது.
யாஹூ கையேடு மூடப்பட்டாலும், அதே போன்ற இணைய கையேடான , ஓபன் டைரக்டரி எனப்படும் டி.எம்.ஓ.இசட் தளம் தொடர்ந்து செயல்பட்டுக்கொண்டிருந்தது. சிறந்த இணையதளங்களை அறிந்து கொள்ள உதவும் இந்த தளம், தன்னார்வலர்களின் பங்களிப்புடன் இணைய கூட்டு முயற்சியாக பளிச்சிட்டுக்கொண்டிருந்தது. இடையே இந்த தளத்தின் வடிவமைப்பும் புதுப்பிக்கப்பட்டு சிறந்த தோற்றத்தை பெற்றிருந்தது.
இந்நிலையில் தான், இந்த சேவை மார்ச் 14 க்கு பிறகு செயல்படாது என கடந்த மாதம் ஏ.ஓல்.எல் நிறுவனம் அறிவித்தது. ஏ.ஓ.எல் தான் ஓபன் டைரக்டரி தளத்தின் உரிமையாளர்.
தேடியந்திர முடிவுகளை பட்டியலிடுவது உட்பட பலவற்றில் மென்பொருள்கள் இயக்கும் அல்கோரிதம் ஆதிக்கம் செலுத்தும் இணைய உலகில், கைகுத்தல் அரசி போல, மனிதர்கள் பார்த்து கவனமாக தேர்வு செய்த இணையதளங்களின் தொகுப்பாக ஓபன் டைரக்டரி இருந்தது என்பது அதன் தனிச்சிறப்பு. தன்னார்வர்லர்கள் பார்த்து பார்த்து தொகுத்து வழிகாட்டிய அந்த சேவை மூடுவிழா கண்டிருக்கிறது என்பது வருத்தமாக உள்ளது. ஒருவிதத்தில் இணையத்தில் இனி மனிதர்கள் தேர்வுக்கு மதிப்பில்லையோ எனும் கேள்வியையும் எழுப்புகிறது.
கூகுள் ஆதிக்கத்தால் மற்ற மாற்று தேடியந்திரங்களே கவனிப்பாரற்று கிடக்கும் போது, ஓபன் டைரக்டரி சேவை ஈர்ப்பில்லாமல் போனதில் வியப்பென்ன என நினைக்கலாம். இன்னொரு கோணத்தில் பார்த்தால், இணைய கையேடு எனும் கருத்தாக்கத்தின் தேவை முடிந்துவிட்டதே என்றும் கூறலாம்.
இந்த சேவை மூடப்படுவது பற்றிய இரங்கற்பா செய்திகளில் கூட, எப்படியும் ஓபன் டைரக்டரி சேவையை இப்போது யாரும் கண்டுகொள்வதில்லை, மேலும் அது அடிக்கடி சரியாக அப்டேட் செய்யப்படுவதும் இல்லை என்று தெரிவிக்கப்பட்டுள்ளது.
இந்த பாராமுகத்தை மீறி, ஓபன் டைரக்டரி சேவை முக்கியமானது என்பதை, அது தொடர்பான குறும்பதிவுகள் உணர்த்துகின்றன. (#DMOZ ) . அது மட்டும் அல்ல, இந்த சேவை மூடப்பட்டது ஏ.ஓ.எல் நிறுவனத்தின் தனிப்பட்ட முடிவு என்றும், இந்த திடீர் முடிவு அதன் தன்னார்வலர்கள் சமூகத்தை அதிர்ச்சியில் ஆழ்த்தியுள்ளது என்றும் மதர்போர்ட் செய்தி தளம் தெரிவிக்கிறது. இது பற்றி ஏ.ஓ.எல் விரிவான விளக்கம் அளிக்கவில்லை என்றும் கூறப்பட்டுள்ளது.
ஏ.ஓ.எல் மூடிவிட்டாலும் தன்னார்வலர்கள் ஒன்று கூடி ஏதேனும் ஒரு வகையில் இதை காப்பாற்றலாம் என எதிர்பார்க்க தோன்றுகிறது.
நிற்க அதே செய்தியில், இந்த தளத்தின் முக்கியத்துவம் பற்றிய ஒரு குறிப்பும் வருகிறது. தன்னார்வலர்கள் கூட்டு முயற்சியால் செயல்படும் இந்த தளம், கட்டற்ற களஞ்சியமான விக்கிபீடியாவுக்கு முன்னோடியும் கூட. இந்த சேவை தங்களுக்கு ஊக்கம் அளித்ததாக விக்கிபீடியா இணை நிறுவனர் லாரி சாங்கர் ஒரு முறை கூறியுள்ளார்.
ஏ.ஒ.எல் நிறுவனம் விலைக்கு வாங்கி இருந்தாலும், இதன் தன்னார்வலர்கள் தங்களுக்குள் சமூக ஒப்பந்தம் செய்து கொண்டே செயல்பட்டு வந்தனர்..
ஆக, விக்கிபிடியாவுக்கு முன்னுதாரணமாக இருந்த இந்த சேவை ஏதேனும் ஒரு வகையில் மறு அவதாரம் எடுக்கட்டும்.
இணையத்தில் எப்போதும் கூட்டு முயற்சியின் கை ஓங்கியிருக்க வேண்டும்.

குறிப்பு1; டி,எம்.ஓ.இசட் சேவை பற்றி தமிழ் இந்து இணைய பதிப்பில் எழுதிய ஆவலை விசுவோம் தொடரில் விரிவாக எழுதியுள்ளேன்.- http://bit.ly/2d8rMHm

 

வரைபடத்தில் விக்கிபீடியா

geopedia sunday river
கட்டற்ற களஞ்சியமான விக்கிபீடியாவில் இடம்பெற்றுள்ள தகவல்களை கொஞ்சம் சுவாரஸ்யமான முறையில் அணுக வழி செய்கிறது ஜியோபீடியா இணையதளம்.

இந்த தளம் உலக வரைபடத்தையும் ,விக்கிபீடியா கட்டுரைகளையும் ஒன்றாக்கி தருகிறது. இந்த தளத்தில் தோன்றும் வரைபடத்தில் உள்ள இடங்கள் மீது கிளிக் செய்தால் அந்த இடம் தொடர்பாக விக்கிபீடியாவில் உள்ள கட்டுரைகள் அணுகலாம்.

நாம் தேர்வு செய்த இடத்தில் இருந்து எத்தனை கி.மீ தொலைவில் உள்ள இடம் பற்றி கட்டுரைகள் வேண்டும் என்றும் தேர்வு செய்து கொள்ளலாம். அதே போல கட்டுரைகளின் எண்ணிக்கையையும் தீர்மானிக்கலாம்.
சுவாரஸ்யமான வழி என்பதோடு இருப்பிடம் சார்ந்த தகவல்களை இணையத்தில் தேடும் போது இந்த சேவை பயனுள்ளதாக இருக்கும்.

பயனாளிகள் இருப்பிடம் சார்ந்த கட்டுரைகளை தேடலாம். விக்கிபீடியா போலவே தன்னார்வலர்கள் பங்களிப்பால் உருவான வரைபட சேவையான ஓபன்ஸ்டீரிட் மேப் வசதியை பயன்படுத்தி இந்த ஜியோபீடியா உருவாக்கப்பட்டுள்ளது.

இணையதள முகவரி: http://www.geopedia.de/

Wikipedia-798x310

விக்கிபீடியாவின் 2014 ஆண்டு வீடியோ கண்ணோட்டம்

2014 ம் ஆண்டு முக்கிய நிகழ்வுகளை திரும்பி பார்க்க விருப்பமா? இந்த கேள்வியை இப்போது விக்கிபீடியாவும் கேட்டு தன் பங்குகிற்கு அருமையான ஆண்டு இறுதி வீடியோவை வெளியிட்டுள்ளது. விக்கிபீடியா வரலாற்றிலேயே முதல் முறையாக இத்தகைய ஆண்டு கண்ணோட்ட வீடியோ வெளியாகியுள்ளது.
ஆண்டுதோறும் முன்னனி இணைய நிறுவனங்கள் ஆண்டின் முக்கிய நிகழ்வுகளை தொகுத்து அளிக்கும் வழக்கம் கொண்டுள்ளன. இந்த ஆண்டுக்கான பட்டியல் வெளியாக கொண்டிருக்கின்றன. யூடீயூப் ஆண்டின் சிறந்த வீடியோ நிகழ்வுகளை தொகுப்பாக்கியது. சமூக வலைப்பின்னல் சேவைகளான டிவிட்டர் மற்றும் பேஸ்புக்கும் ஆண்டு இறுதி பட்டியல் மற்றும் வீடியோவை வெளியிட்டுள்ளன. தேடியந்திரமான கூகுளும் இந்த ஆண்டுக்கான தேடல் பட்டியலை வெளியிட்டுள்ளது.
இந்த வரிசையில் விக்கிபீடியா முதல் முறையாக இணைந்துள்ளது. இணையவாசிகள் பங்களிப்புடன் உருவாகும் கட்டற்ற களஞ்சியமான விக்கிபீடியாவை நிர்வகிக்கும் விக்கிமீடியா அறக்கட்டளை 2014 ம் ஆண்டுக்கான முக்கிய நிகழ்வுகளின் தொகுப்பை #எடிட்2014 எனும் தலைப்பில் வெளியிட்டுள்ளது.
இந்த வீடியோவில் விக்கிபீடியாவின் தன்மைக்கேற்ப அதன் பயனாளிகள் முன்னிறுத்தப்பட்டுள்ளனர். 2014 நீங்கள் படித்ததும் ,எடிட் செய்ததும் எனும் அறிமுகத்துடன் இந்த வீடியோ, விக்கிபீடியா பயனாளிகள் பார்வையில் இந்த ஆண்டின் முக்கிய நிகழ்வுகளை தொகுத்து வழங்குகிறது.
செய்திகள், புகைப்படங்கள ஆகிய்வற்றின் தொகுப்பாக இந்த வீடியோ அமைந்துள்ளது.
ஃபிஃபா கால்பந்து உலக கோப்பையில் துவங்கி, இந்திய பொது தேர்தல், இணையத்தில் வைரலாக பரவிய ஐஸ்பக்கெட் சாலெஞ்ச், ஆப்பிரிக்காவை உலுக்கிய எபோலா நோய் என முக்கிய நிகழ்வுகளை இந்த வீடியோ திரும்பி பார்க்கிறது. குளிர்கால ஒலிம்பிக்ஸ், விண்வெளி ஆய்வு ஆகிய நிகழ்வுகளையும் இந்த 3 நிமிட வீடியோ நினைவு படுத்துகிறது.
குறைந்த பட்ஜெட்டில் 2 மாத காலத்தில் இந்த வீடியோ தொகுப்பு உருவாக்கப்பட்டதாக விக்கிமீடியா அறக்கட்டளை வலைப்பதிவு தெரிவிக்கிறது. விக்கிபீடியாவின் தன்மையை பிரதிபலுக்கும் வகையில் பயனாளிகள் பதிவேற்றிய தகவல்கள் மற்றும் புகைப்படங்களை கொண்டு வீடியோ உருவாக்கப்பட்டுள்ளதாக குறிப்பிடப்பட்டுள்ளது.
இதில் உள்ள ஒவ்வொரு படமும், காட்சியின் பயனாளிகளின் பங்களிப்பு ,நாங்கள் தொகுக்க மட்டுமே செய்துள்ளோம் என்றும் விக்கிமீடியாவின் கதைசொல்லி மற்றும் வீடியோ தயாரிப்பாளர் விக்டர் கிரிகாஸ் கூறியுள்ளார்.
சுதந்திரமாக பயன்படுத்தும் புகைப்படங்கள் எப்படி உலகின் முக்கிய நிகழ்வுகளை படம் பிடிக்க உதவுயுள்ளன என்பதையும் இந்த வீடியோ உணர்த்துவதாக குறிப்பிடப்பட்டுள்ளது. அதே நேரத்தில் இத்தகைய சுந்திரமான பகிர்வு மேலும் அவசியம் என்பதை எபோலா தொடர்பான செய்திகளுக்கான பழைய படங்கள் உணர்த்துவதாகவும் குறிப்பிடப்பட்டுள்ளது.
உலகம் முழுவதும் கோடிக்கணக்கானோர் விக்கிபீடியாவை தகவல்களை அறிய பயன்படுத்தும் நிலையில் எபோலா நோய் பாதிப்பு , கூட்டு முயற்சியில் அவசியத்தை வலியுறுத்துவதாகவும் தெரிவிக்கப்பட்டுள்ளது. எபோலா பற்றிய தகவல்களை விரிவாக அளிப்பதற்காக டிரான்ஸ்லேட்டர்ஸ் வித் அவுட் பார்டர்ஸ் மற்றும் விக்கி பிராஜெக்ட் மெட் அறக்கட்டளை ஆகிய அமைப்புகள் மூலம் தன்னார்வளர்கள் இணைந்து எப்போலா தகவல்களை 50 க்கும் மேற்பட்ட மொழிகளில் மொழிபெயர்த்துள்ளனர் என்றும் பெருமையுடன் குறிப்பிடப்பட்டுள்ளது.
விக்கிமீடியா வலைப்பதிவு : http://blog.wikimedia.org/2014/12/17/wikipedias-first-ever-annual-video-reflects-contributions-from-people-around-the-world/

விக்கி வீடியோ கண்ணோட்டம் :https://www.youtube.com/watch?v=ci0Pihl2zXY