Tag Archives: edit

பிளேஷ் மூடுவிழா அறிவிப்பும், இணைய வரலாறு கவலையும்!

960x0பழையன கழிதல் என்பது மென்பொருள் சேவைகளுக்கும் பொருந்தும் தான். அதிலும் இணைய தொழில்நுட்பம் வெகு வேகமாக மாறிக்கொண்டிருக்கும் நிலையில், பழைய மென்பொருள் சேவைகள் காலாவதியாகி கைவிடப்படும் நிலை ஏற்படுவது இயற்கையானது தான். இணையத்தின் அடையாளங்களில் ஒன்றாக திகழும் அடோப் பிளேஷ் மென்பொருளுக்கும் இது தான் நிகழ இருக்கிறது. பிளேஷ் மென்பொருளுக்கு விடை கொடுக்க இருப்பதாக அடோப் நிறுவனம் அண்மையில் அறிவித்ததை நீங்களும் கவனித்திருக்கலாம். இது தொடர்பாக அடோப் வெளியிட்ட அறிவிப்பில், பிளேஷ் மென்பொருள் வாழ்க்கையை முடிக்க இருப்பதாக தெரிவித்திருந்தது. 2020 ம் ஆண்டு வாக்கில் பிளேஷ் பிளேயர் மென்பொருளை வெளியிடுவது மற்றும் அதற்கான அப்டேட்கள் நிறுவத்தப்படும் என்றும் அந்த அறிவிப்பில் தெரிவிக்கப்பட்டிருந்தது. இதன் பொருள் பிளேஷ் மென்பொருள் மெல்ல கொல்லப்படும் என்பதாகும்.

இந்த அறிவிப்புக்கான எதிர்வினைகளை பார்க்கும் போது, பிளேஷ் மென்பொருளுக்கு விடை கொடுக்க பெரும்பாலானோர் தயாராகிவிட்டது போலவே தோன்றுகிறது. பிளேஷ் மென்பொருளின் முடிவு நீண்ட காலமாக எதிர்பார்க்கப்பட்டது தான் என்றும், இப்போதாவது அடோபிற்கு இதை அறிவிக்க மனம் வந்ததே என்பது போலவும் தான் பலரும் கருத்து தெரிவித்துள்ளனர். தொழில்நுட்ப செய்தி தளங்கள் கூட, பிளேஷின் தவிர்க்க இயலாத மரணம் என்பது போல தலைப்பு வெளியிட்டிருந்தன. கிஸ்மோடோ இணையதளம் பிளேஷை கருணக்கொலை செய்ய அடோப் முன்வந்துள்ளது என வர்ணித்திருந்தது. இன்னும் சிலர், தவிர்க்க இயலாத பிளேஷ் முடிவு இப்போதாவது அறிவிக்கப்பட்டுள்ளதே என நிம்மதி பெருமூச்சு விட்டுள்ளனர். பல தளங்கள் பிளேஷ் மென்பொருளுக்கு இறங்கற்பா எழுதிக்கொண்டிருக்கின்றன.

பிளேஷ் மீது ஏன் இத்தனை வெறுப்பும், விமர்சனமும் இருந்தாலும் ஒரு காலத்தில் அது கொண்டாடப்பட்ட மென்பொருளாக இருந்ததை மறந்துவிடக்கூடாது. பிளேஷ் அடிப்படையில் இணையத்திற்கான மல்டிமீடியா சேவைகளை உருவாக்க பயன்படும் மென்பொருள். அனிமேஷன், வீடியோகேம் மற்றும் வீடியோக்களை உருவாக்க பிளேஷ் பயன்படுத்தப்படுகிறது. கிராபிக் தான் இதன் பலம் என்பதால், இணையதளங்களை செழுமையாக்க கூடிய செயலிகளையும், சேவைகளையும் பிளேஷ் கொண்டு எளிதாக உருவாக்க முடிந்தது. அது மட்டும் அல்ல இணையத்தில் வீடியோக்களை எளிதாக பார்க்கவும் பிளேஷ் கைகொடுத்தது. வீடியோ பகிர்வு சேவை பிரிவில் முன்னோடியான யூடியூப் 2005 ல் அறிமுகமான போது பிளேஷ் பிளேயர் மூலமே வீடியோக்களை பார்க்க வழி செய்ததாக விக்கிபீடியா கட்டுரை குறிப்பிடுகிறது என்றால் பார்த்துக்கொள்ளுங்கள். அது மட்டும் அல்ல, பிளேஷ் கொண்டு எண்ணற்ற கேம்களும், அனிமேஷன்களும் உருவாக்கப்பட்டுள்ளன.

இப்படி கோலோச்சிய பிளேஷ் முடுவிழாவை நோக்கி தள்ளப்பட இரண்டு முக்கிய காரணங்கள் இருக்கின்றன. முதல் காரணம், பிளேஷ் தொழில்நுட்பம் காலாவதியாகவிட்டது என்பது. ஒரு காலத்தில் இணையதளங்களுக்கான சுவாரஸ்யமான உள்ளடக்கத்தை உருவாக்க பிளேஷ் தேவைப்பட்டது என்றாலும், அதன் பின் நிகழ்ந்த பாய்ச்சலில் அதைவிட மேம்பட்ட தொழில்நுட்பங்கள் வந்துவிட்டன. அதோடு பிரவுசர்களில் பயன்படுத்தப்படும் எச்டிஎம்.எல் தொழில்நுட்பத்திற்கு பிளேஷ் அந்நியமாகிவிட்டது. எனவே மென்பொருளாளரகள் பிளேஷுக்கு குட்பை சொல்லி வருகின்றனர்.

பிளேஷை பொருத்தவரை இன்னொரு பிரச்சனை, அதில் உள்ள பாதுகாப்பு பிரச்சனைகள். பிளேஷ் மென்பொருள் கொண்டு உருவாக்கப்படும் பல சேவைகள் மால்வேர் எனப்படும் வில்லங்க வாகனங்கள் மறைந்திருக்கும் இடமாக கருதப்படுகிறது. பிளேஷில் உருவாக்கப்பட்ட எட்டிப்பார்க்கும் விளம்பரங்கள் அல்லது வீடியோக்கள் மால்வேர்களின் உரைவிடமாக அமைவது உண்டு. அதோடு, உங்கள் பிளேஷ் பிளேயர் காலாவதியாகிவிட்டது, அப்டேட் செய்யவும் எனும் அறிவிப்பையும் பிளேஷ் சார்ந்த தளங்களில் அடிக்கடி பார்த்திருக்கலாம். பெரும்பாலும் இதுவும் வில்லங்க அறிவிப்பாக அமைந்து, இதை கிளிக் செய்தால் மால்வேருக்கான ஜன்னல் திறக்கப்பட்டு அவை கம்ப்யூட்டருக்குள் புகுந்துவிடும். இதற்கு பிளேஷை குற்றம் சாட்ட முடியாது என்றாலும், மால்வேரை உருவாக்கும் விஷமிகளின் பயன்பாட்டால் பிளேஷ் பாதுகாப்பு ஓட்டைகள் நிறம்பியதாக கருதப்பட்டு வருகிறது.

மேம்பட்ட தொழில்நுட்பம் வந்துவிட்டதாலும், மால்வேர் வாகனமாக இருப்பதாலும் பிளேஷுக்கு எதிராக வலுவான விமர்சனங்கள் தொடர்ந்து கூறப்படுகின்றன. பல பிரவுசர் நிறுவனங்களும், பிளேஷை கழற்றிவிட்டுள்ளன. இவ்வளவு ஏன், ஆப்பிள் நிறுவனர் மறைந்த ஸ்டீவ் ஜாப்ஸ், ஐபோனில் இதற்கு இடமே கொடுக்கவில்லை. பிளேஷ் மறைந்தாக வேண்டிய மென்பொருள் என முதலில் அறிவித்தது ஜாப்ஸ் தான். பிளேஷ் டெஸ்க்டாப் காலத்திற்கான மென்பொருள், ஸ்மார்ட்போன யுகத்தில் அதற்கு தேவையில்லை என ஜாப்ஸ் காட்டமாக கூறியிருந்தார்.

ஏதோ ஒரு விதத்தில் பலரும் இப்போது இதை ஏற்கத்துவங்கிவிட்டனர். அதன் விளைவு தான் அடோப் நிறுவனம், பிளேஷை கைவிடும் முடிவை அறிவித்துள்ளது: https://blogs.adobe.com/conversations/2017/07/adobe-flash-update.html

நிற்க இந்த செய்திக்கு இன்னொரு பக்கம் இருக்கிறது. பிளேஷ் மென்பொருளுக்கு ஆதரவாளர்கள் இருக்கின்றனர் என்பதும், அவர்களில் பலர் பிளேஷ் நீடுழி வாழ வேண்டும் என கோரிக்கை எழுப்பியிருப்பதும் தான் அது. மென்பொருளாலரான ஜுஹா லின்ஸ்டெட் (Juha Lindstedt ) என்பவர் பிளேஷை கைவிடக்கூடாது என வலியுறுத்தி கையெழுத்து இயக்கம் ஒன்றை துவக்கியிருக்கிறார். அவரது கோரிக்கை ஒரளவு வரவேற்பை பெற்றிருப்பதோடு காரசாரமான விவாதத்தையும் துவக்கி வைத்திருக்கிறது.

லின்ஸ்டெட் பிளேஷை காப்பற்ற வேண்டும் என்பதற்காக எடுத்து வைக்கும் வாதம் மிகவும் முக்கியமானது. பிளேஷுக்கு முடிவிழா என்பது ஒரு மென்பொருள் சார்ந்த முடிவு மட்டும் அல்ல, அது இணைய வரலாறு சார்ந்ததும் கூட என்பது தான் அவரது வாதத்தின் முக்கிய அம்சம். அதாவது பிளேஷ் கொண்டு உருவாக்கப்பட்ட இணையசேவைகளும், கேம்களும், அனிமேஷன்களும் தொடர்ந்து பயன்படுத்தப்படா முடியாமல் போய்விடும் என்று அவர் கவலைப்படுகிறார். இந்த சேவைகளும், கேம்களும் இணைய வரலாற்றின் அங்கமாக இருப்பதால் அவை காணாமல் போவது இணைய வரலாற்றின் ஒரு பகுதி அழிந்து போவதற்கு சமம் என்கிறார் அவர்.

இதற்காக கித்ஹப் எனும் தொழில்நுட்ப தளத்தில் கோரிக்கை மனு அளித்து ஆதரவு கோரியுள்ளவர், பிளேஷ் பிளேயர் என்பது இணைய வரலாற்றின் முக்கிய துண்டு, அதை கொல்வது எதிர்கால தலைமுறை கடந்த காலத்தை அணுக முடியாமல் செய்துவிடும் என்று தெரிவித்துள்ளார். கேம்கள், இணையதளங்கள், இணைய சோதனை முயற்சிகள் எல்லாமே மறக்கப்பட்டுவிடும் என்றும் அவர் தெரிவித்துள்ளார்.

மென்பொருளில் ஏற்படும் முன்னேற்றம் என்பது கடந்த காலத்தை அழிப்பதாக அமைய வேண்டுமா என்பது தான் அவர் கேட்கும் கேள்வி. ஆம், சில ஆண்டுகள் கழித்து மென்பொருள் வரலாறு பற்றி விவாதிக்கும் போது பிளேஷ் மென்பொருள் தொடர்பாக பேசும் போது, அதற்கான உதாரணங்களை காண முடியாமல் வெறும் விக்கிபீடியா கட்டுரையை தகவலை மட்டும் காண்பது என்பது வரலாற்று வெறுமையாகி விடலாம் அல்லவா? இந்த கவலையினால் தான் லின்ஸ்டெட் பிளேஷை காப்பாற்ற குரல் கொடுக்க கோரியிருக்கிறார். ஆனால், பிளேஷ் தொடர்பான நிதர்சனத்தை அவர் உணராமல் இல்லை. எனவே தான், பிளேஷ் மென்பொருளை கொலை செய்துவிடாமல், அதை ஓபன் சோர்ஸ் முறையில் வெளியிட்டு இணையவாசிகள் கைகளில் ஒப்படைக்க வேண்டும் என கேட்டிருக்கிறார். இது சரியா? பலன் தருமா? எனும் நோக்கில் மென்பொருள் உலகில் விவாதம் நடைபெற்று வருகிறது.: https://github.com/pakastin/open-source-flash

இணைய யுகத்தின் பழைய சேவைகளையும், தளங்களையும் தக்க வைத்து, இணைய வரலாற்றை காக்க வேண்டும் எனும் இயக்கத்தின் பாதையில் பிளேஷுக்கான போராட்டம் முக்கிய பங்கு வகிக்கும் என எதிர்ப்பாக்கலாம். இந்த செய்திக்கு வாலாக ஒரு தகவலையும் நினைத்துப்பார்ப்பது பொருத்தமாக இருக்கும். அண்மையில் மைக்ரோசாப்ட் நிறுவனம் வரைவதற்கான எம்.எஸ் பெயிண்ட் மென்பொருளுக்கு விடை கொடுப்பதாக அறிவித்தது. ஆனால் அந்த எளிமையான மென்பொருளுக்கு ஆதரவாக பயனாளிகள் டிவிட்டரில் பொங்கியதை அடுத்து, பெயிண்ட் மென்பொருள் விண்டோஸ் ஸ்டோரில் தொடரும் என அறிவித்தது. 32 ஆண்டுகளுக்கு முன் அறிமுகமான மென்பொருளுக்கு இத்தனை அபிமானிகளா என்றும் வியந்து போவதாக மைக்ரோசாப்ட் தெரிவித்திருந்தது. கம்ப்யூட்டரில் வரைவதை எளிதாக்கிய அந்த மென்பொருளும் இணைய வரலாற்றின் அங்கம் தான்.

 

தளம் புதிது: அந்த நாள் இணையதளங்கள்

இணைய வரலாற்றை திரும்பி பார்க்க இணையதளங்களை திரும்பி பார்ப்பதைவிட சிறந்த வழி வேறில்லை. அதாவது, சில ஆண்டுகளுக்கு முன் குறிப்பிட்ட இணையதளங்கள் எப்படி இருந்தன என்பதை திரும்பி பார்ப்பது. குறிப்பிட்ட கால கட்டத்தில் இணையதளங்கள் எப்படி தோற்றம் அளித்த என தெரிந்து கொள்ள முடிவது இணைய வடிவமைப்பு பற்றி மட்டும் அல்ல, உள்ளடக்கத்தின் போக்கு பற்றியும் புரிய வைக்கும்.

அந்த வகையில், இணையத்தின் முன்னணி இணையதளங்கள் பத்தாண்டுகளுக்கு முன் எப்படி இருந்தன என்பதை தெரிந்து கொள்ள வழி செய்கிறது டென் இயர்ஸ் அகோ இணையதளம்.

இதன் முகப்பு பக்கத்தில் பட்டியலிடப்பட்டுள்ள ரெட்டிட், யூடியூப், அமேசான், பிபிசி, டைம், ஆப்பிள் உள்ளிட்ட இணையதளங்களின் லோகோ மீது கிளிக் செய்தால் அவை 10 ஆண்டுகளுக்கு முன் எப்படி காட்சி அளித்தன என்பதை பார்க்கலாம்.

இணையதளங்களின் பழைய வடிவங்களை சேமித்து காப்பாற்றிவரும், வெப் ஆர்கேவ் தளத்தில் சேமிக்கப்பட்ட இணைய பக்கங்களை கொண்டு இந்த இணையதளம் உருவாக்கப்பட்டுள்ளது. நீல் அகர்வால் என்பவர் இந்த சுவாரஸ்மான இணையதளத்தை அமைத்திருக்கிறார்.

இணைய முகவரி: http://tenyearsago.io/

 

செயலி புதிது; புத்தக குழுக்களை உருவாக்கலாம் வாங்க!

நல்ல புத்தகத்தை படித்தால் மட்டும் போதுமா என்ன? அது பற்றி சக வாசகர்களுடன் விவாதித்தால் தான் வாசிப்பு அனுபவம் இன்னும் விசாலமாகும் அல்லவா? ஸ்மார்ட்போன் யுகத்தில் இத்தகைய பகிர்தலுக்கு உதவும் வகையில் புக்டிரைப்ஸ் செயலி உருவாக்கப்பட்டுள்ளது.

ஐபோனுக்காக உருவாக்கப்பட்டுள்ள இந்த செயலியில், புத்தக புழுக்கள் தாங்கள் படித்த ரசித்த புத்தகம் தொடர்பான குழுவை உருவாக்கி கொண்டு அது பற்றி விவாதிக்கலாம். இந்த குழுவில் சேருமாறு நண்பர்களுக்கு அழைப்பு விடுக்கலாம். நமக்கு பிடித்த புத்தகம் தொடர்பான குழுவில் சேர்ந்து கருத்து தெரிவிக்கலாம்.

நாம் விவாதிக்க விரும்பும் புத்தகங்களை நண்பர்களுடன் பகிர்ந்து கொண்டு கருத்து சொல்ல அழைக்கலாம். ஒவ்வொரு புத்தகம் பின்னும் ஒரு குழு இருக்கிறது என்பதை சாத்தியமாக்க விரும்புகிறது இந்த செயலி.

மேலும் விவரங்களுக்கு: http://booktribes.us/

 

 

நன்றி; தமிழ் இந்து இளமை புதுமையில் எழுதியது.

வியக்க வைக்கும் விக்கி உலகம்!

’ஒரு கனவு நனவாகி விட்ட நிலையில் நாம் காண வேண்டியது இன்னொரு கனவு’.

இந்த மேற்கோளுக்கு சொந்தக்காரர் யார் என யூகிக்க முடிகிறதா? ஒரு சின்ன க்ளு ,அவர் நம்மவர் தான்!. இதற்கான பதிலை பார்ப்பதற்கு முன் முதலில் விக்கிபீடியா புராணத்தை கொஞ்சம் பார்க்கலாம்.

விக்கிபீடியாவை ஒரு இணைய அதிசயம். கூட்டு முயற்சியின் அடையாளமாக விளங்கும் விக்கிபீடியா இணையத்தின் எல்லையில்லா ஆற்றலுக்கும் உதாரணமாக விளங்குகிறது. விக்கிபீடியா அறிமுகமான போது இந்த அளவு வெற்றி பெறும் என யாரும் எதிர்பார்த்திருக்க மாட்டார்கள். இவ்வளவு ஏன், விக்கிபீடியா வெற்றி பெறும் என்று கூட பெரும்பாலானோர் நினைத்திருக்க மாட்டார்கள்.

ஏனெனில் அப்போது விக்கிபீடியாவின் கருத்தாக்கமே புதிதாக இருந்தது. விக்கிபீடியாவிற்கு முன் கலைக்களஞ்சியம் என்றால் அதை நிர்வகிக்க ஒரு ஆசிரியர் குழு இருக்கும், அதற்கு வழிகாட்ட வல்லுனர்கள் குழு இருக்கும். ஒவ்வொரு தகவலையும் ஆய்வு செய்து பல்முறை சரி பார்த்து இடம்பெறச்செய்வார்கள். ஆனால் கட்டற்ற களஞ்சியமாக அறிமுகமான விக்கிபீடியா இந்த சித்தாந்தத்தையே தலைகீழாக புறட்டிப்போட்டது. விக்கிபீடியா இணையவாசிகளால், இணையவாசிகளுக்காக உருவாக்கப்பட்டது. அதில் மையமாக ஆசிரியர் குழு இல்லை. யார் வேண்டுமானாலும் கட்டுரைகளை சமர்பிக்கலாம்.- அந்த கட்டுரையில் உள்ள தகவல்களை யார் வேண்டுமானாலும் திருத்தி மாற்றி அமைக்கலாம் எனும் ஜனநாயகத்தன்மையுடன் விக்கிபீடியா அறிமுகமானது. இதன் நிறுவனர் ஜிம்மி வேல்ஸ்.

மாபெரும் களஞ்சியம்

விக்கிபீடியாவின் ஆதார தன்மையே இந்த பங்கேற்பு தன்மை தான். விக்கி என்றால் மென்பொருள் மொழியில், எவரும் திருத்தங்களை செய்யக்கூடிய இணையதளம் என்று பொருள். இதை விக்கியின் பின்னே உள்ள மென்பொருள் சாத்தியமாக்குகிறது. ஆக, தொழில்நுட்ப நோக்கில்  யார் வேண்டுமானால் தகவல்களை இடம்பெற வைப்பது சாத்தியமாகலாம். ஆனால் இவ்வாறு உருவாக்கப்படும் இணையதளத்தையும், அதில் இடம் பெறும் தகவல்களையும் எப்படி நம்புவது என்ற கேள்வி எழுந்தது. அதோடு, வல்லுனர்கள், ஆசிரியர்கள் குழு உதவி இல்லாமல் ஒரு களஞ்சியத்தை சாமானியர்கள் ஒன்று சேர்ந்து உருவாக்குவது எல்லாம் நடைமுறையில் செல்லுபடியாகுமா? என்று கேட்கப்பட்டது. இத்தகைய முயற்சி அபத்தமாகவே அமையும் என ஆருடம் கூறப்பட்டது. ஆனால் விக்கிபீடியா இணையவாசிகளின் பங்கேற்பால் பெரும் அளவில் வெற்றி பெற்று உலகின் மாபெரும் களஞ்சியமாக உருவாகியுள்ளது.

விக்கிபிடியாவின் வளர்ச்சி வியக்க வைக்க கூடியதாக இருக்கிறது. இன்று விக்கிபீடியா ஆங்கில மொழியில் மட்டும் அல்லாமல், நம் தமிழ் உள்ளிட்ட 295 மொழிகளில் செயல்படுகிறது. ஆங்கில மொழியில் மட்டும் 5 மில்லியனுக்கு மேல் கட்டுரைகள் இடம்பெற்றுள்ளன. நாள்தோறும் 800 புதிய கட்டுரைகள் சேர்க்கப்படுகின்றன. நொடிக்கு இத்தனை தகவல்கள் திருத்தப்படுகின்றன. தமிழ் மொழியில் கட்டுரைகள் ஒரு லட்சத்தை நெருங்கிக் கொண்டிருக்கின்றன. இந்தி உள்ளிட்ட இந்திய மொழிகளிலும் விக்கிபீடியா இயங்குகிறது. இந்த பிரும்மாண்ட வளர்ச்சிக்கு பின்னே உலகம் முழுவதும் பரவிக்கிடக்கும் தன்னார்வலர் படை ஓயாமல் இயங்கி கொண்டிருக்கிறது. பாரம்பரிய களஞ்சியங்கள் எல்லாம் ஒவ்வொரு பதிப்பின் போது மேம்படுத்தப்படும். விக்கிபீடியா ஒவ்வொரு நொடியும் திருத்தப்பட்டு மேம்படுத்தப்பட்டு கொண்டிருக்கிறது. அதுவே விக்கிபீடியாவின் தனித்தன்மையாக இருக்கிறது.

இணைய உலகில் விக்கிபீடியாவுக்கு இருக்கும் செல்வாக்கை பற்றியும் அதிகம் கூற வேண்டியதில்லை. மாணவர்கள் முதல் ஆய்வாளர்கள் வரை தகவல்கள் தேவை எனில் விக்கிபீடியாவை நாடுகின்றனர். கூகுள் உள்ளிட்ட தேடியந்திரங்களில் தகவல்களை தேடும் போது, அநேகமாக அது தொடர்பான விக்கிபீடியா பக்கம் தேடல் பட்டியலில் முதல் பக்கத்திலேயே வரவேற்கும்.

தகவல் சுரங்கம்

விக்கிபீடியா தகவல் சுரங்கம் என்பதில் சந்தேகம் இல்லை. ஆனால் அதன் தகவல்களை எந்த அளவுக்கு நம்பலாம் எனும் கேள்வி இன்னும் கூட பலருக்கு இருக்கலாம். இந்த கேள்விக்கு நம்பலாம் அல்லது நம்ப முடியாது என ஒற்றை வார்த்தையில் பதிலை எதிர்பார்ப்பது விக்கி சித்தாந்தத்தையே கொச்சை படுத்துவது போலாகிவிடும். ஏனெனில் விக்கிபீடியா அந்த அளவுக்கு நம்பகத்தன்மையை உறுதி செய்வதற்கான பல அடுக்கு செயல்முறைகளையும், அவற்றை இயக்கும் கராரான விதிகளையும் கொண்டுள்ளது. இது பற்றி சுருக்கமாக சொல்வது என்றால் விக்கிபீடியாவில் எப்படி தகவல்களை இடம்பெற வைக்க தன்னார்வலர் படை இயங்கி வருகிறதோ, அதே போல, தகவல்களை சரி பார்க்கவும் , அவற்றில் பிழை எனில் திருத்தம் செய்யவும் ஒரு பெரும் படை செயல்பட்டு வருகிறது. இந்த படை விக்கிபீடியா கட்டுரைகளில் உள்ள தகவல்களை சரி பார்த்து தேவையான திருத்தங்களை மேற்கொள்கிறது. இந்த திருத்தங்களும் திருத்தப்படலாம் என்பதால் பல நேரங்களில் திருத்தல் யுத்தம் நிகழ்வது உண்டென்றாலும், விக்கிபீடியா தன்னைத்தானே திருத்திக்கொண்டே இருக்கிறது.

நம்பகத்தன்மை

எனவே விக்கிபிடியாவில் உள்ள தகவல்கள் நம்பகமானவை என்று சொல்வது சரியல்ல, நியாயமும் அல்ல. ஆனால் அதற்காக விக்கிபீடியா தகவல்கலை அப்படியே கண்ணை மூடிக்கொண்டும் நம்பி விடக்கூடாது. இவை அடிப்படையில் வழிகாட்டி நோக்கிலானவை என்பதை புரிந்து கொள்ள வேண்டும். இவற்றை ஒரு துவக்கப்புள்ளியாக வைத்துக்கொள்ளலாம். அதோடு விக்கிபீடியா கட்டுரைகள் செயல்படும் விதத்தையும் புரிந்து கொள்ள வேண்டும். விக்கிபீடியாவில் யார் வேண்டுமானாலும் கட்டுரை எழுதலாம் என்றாலும், மனம் போன போக்கில் எதையும் எழுத முடியாது. முதலில் கட்டுரை தலைப்பை சமர்பிக்க வேண்டும். அதை சக பயனாளிகள் குழு பார்த்து ஏற்றுக்கொள்ள வேண்டும். அதன் பிறகு தகவல்களை சேர்க்கலாம். தகவல்களையும் இஷ்டம் போல சேர்க்க முடியாது. அதற்கான ஆதாரங்களை சமர்பிக்க வேண்டும். மாற்றம் செய்ய வேண்டுமானாலும் ஆதாரங்கள் தேவை. தகவலுக்கான மூலத்தை சுட்டிக்காட்ட வேண்டும்.

விக்கி கட்டுரைகளை வாசிக்கும் போது, தகவல்கள் தொடர்பான ஆதாரங்கள் இணைப்பை படித்துப்பார்க்க வேண்டும். கட்டுரைக்கு கீழே இந்த இணைப்புகள் வரிசையாக இருக்கும். அதிகார பூர்வ தளங்களுக்கான இணைப்புகளும் கொடுக்கப்பட்டிருக்கும். இவற்றை படித்துப்பார்க்கும் போது தகவல்களின் நம்பகத்தன்மை குறித்த தெளிவு உண்டாகும். குறிப்பாக மிக முக்கிய தகவல் எனில். அது தொடர்பான ஆதாரங்கள் என்ன என்பதை ஆராய வேண்டும். தேவை எனில் அந்த தகவல் குறித்து தனியே கூகுளில் தேடிப்பார்க்கலாம். விக்கியில் வாசித்தால் மட்டும் போதாது, கொஞ்சம் ஆய்வும் தேவை.

விக்கிபீடியா பயனாளியாக மட்டும் இல்லாமல் விக்கிபீடியாவில் பங்கேற்கவும் செய்தால், இந்த செயல்முறையை நன்றாக விளங்கி கொள்ளலாம். அதோடு விக்கிபீடியாவில் பங்கேற்பது என்பது நம் மொழியில் உள்ள களஞ்சியத்தின் வளத்தை பெருக்குவதில் தொண்டாற்றுவது போல தான். தமிழ் விக்கிபீடியாவில் இன்னும் கட்டுரைகளை சேர்க்கலாம். திருத்தங்களை மேற்கொண்டு மேம்படுத்தலாம். :

தினம் தினம் தகவல்கள்

நிற்க விக்கிபீடியாவில் தெரிந்து கொள்ள வேண்டிய விஷயங்கள் இன்னும் பல இருக்கின்றன. விக்கிபீடியாவில் தேவையான தகவல்களை பெறலாம் என்பதோடு தினந்தோறும் புதிய விஷயங்கள் கற்றுக்கொள்ளவும் செய்யலாம். விக்கிபீடியா முகப்பு பக்கத்தில் இருந்தே இதை துவங்கலாம். விக்கிபீடியா பரவலாக அறியப்பட்டதாக இருந்தாலும் கூட, அந்த தளத்திற்கு நேரடியாக பலரும் விஜயம் செய்வதில்லை. பெரும்பாலானோர் கூகுள் தேடல் மூலம் கண்டறியும் குறிப்பிட்ட விக்கிபீடியா பக்கத்தையே நாடுகின்றனர். ஆனால் விக்கிபீடியா முகப்பு பக்கத்தில் தினமும் ஒரு கட்டுரை முன்னிறுத்தப்படும். அதன் மூலம் புதிய தகவல்களை தெரிந்து கொள்ளலாம். அருகிலேயே செய்திகளின் பட்டியலையும் பார்க்கலாம். அதன் கீழே உங்களுக்குத்தெரியுமா எனும் தலைப்பிலும், இன்றைய தின நிகழ்வுகள் எனும் தலைப்பிலும் தகவல்களை பார்க்கலாம். தினமும் ஒரு புகைப்படம் மூலம் தகவல் முன்வைக்கப்படும்.

தினமும் இல்லாவிட்டாலும் அடிக்கடி விக்கிபிடியாவுக்குள் எட்டிப்பார்ப்பதை வழக்கமாக கொண்டு சில நிமிடங்களை செலவிட்டால் புதிய விஷயங்களை அறுவடை செய்து கொண்டே இருக்கலாம். முகப்பு பக்கத்தில் விக்கிபீடியாவில் அப்டேட்டாகும் தகவல்களை எளிதாக அடையாளம் காணலாம் என்றால், போர்ட்டல் பகுதியின் மூலம் விக்கி சுரங்கத்தில் உள்ளவற்றை எல்லாம் காணலாம்.: https://en.wikipedia.org/wiki/Portal:Contents/Portals

இந்த பகுதியில் விக்கி கட்டுரைகள் பல்வேறு தலைப்புகள் வகைப்படுத்தப்பட்டுள்ளன. அகர வரிசைப்பட்டியலையும் காணலாம். இதில் மேலோட்டமாக பார்வையை ஓட்டி விருப்பமான பகுதியை தேர்வு செய்து மேற்கொண்டு படிக்கலாம். இதே பகுதியில் மிகவும் பிரபலமான கட்டுரை பட்டியல் மூலமும் புதிய கட்டுரைகளை அணுகலாம். போர்ட்டல் பகுதியில் உள்ள தலைப்புகளையும், வகைகளையும் பார்த்தாலே விக்கிபீடியாவின் நீள ,அகலத்தை நன்றாக தெரிந்து கொள்ளலாம்.

இணையத்தில் நேரம் கிடைக்கும் போதெல்லாம் விக்கிபீடியா தளத்தில் உலா வருவதை ஒரு பழக்கமாக வைத்துக்கொண்டால் நீங்களும் கூட நாளடைவில் நடமாடும் தகவல் களஞ்சியமாக மாறிவிடலாம். அதோடு குறிப்பிட்ட தலைப்பில் உங்கள் தகவல் ஞானத்தையும் ஆழமாக்கி கொள்ளலாம்.

சகோதர தளங்கள்

விக்கிபீடியா தளமே வியக்க வைக்க கூடியது என்றால் அதன் சகோதர தளங்களை பார்த்தால் இன்னும் பிரம்மிப்பு உண்டாகும். ஆம், விக்கிமீடியா அறக்கட்டளையால் நிர்வகிக்கப்படும் விக்கிபீடியா சார்பில் விக்குபுக்ஸ், விக்கிகோட்ஸ், விக்கிஷ்னரி, விக்கிநியூஸ், விக்கிசோர்ஸ் ,விக்கிவர்சிட்டி, விக்கிடேட்டா உள்ளிட்ட துணை திட்டங்களும் செயல்படுத்தபட்டு வருகின்றன. எல்லாமே இணையவாசிகளால் உருவாக்கப்படுபவை.

இவற்றில் விக்கி நியூஸ் (https://en.wikinews.org/ ) என்பது செய்திகளுக்கானது. விக்கி சமூகத்தால் பகிர்ந்து கொள்ளப்படும் செய்திகளை இந்த பக்கத்தில் அணுகலாம். உலக செய்து முதல் உள்ளூர் செய்திகள் வரை உண்டு. செய்திக்ள் தவிர, கட்டுரைகள், நேர்காணல்கள், செய்தி சேகர்ப்பு ஆகியவற்றையும் வாசிக்கலாம். விக்கி செய்திகள் தமிழிலும் இருக்கிறது: http://bit.ly/2oZMSyx

விக்கி செய்திகள் போலவே விக்கி புக்ஸ் (https://en.wikibooks.org/wiki/Main_Page ) பகுதியில் புத்தகங்களை வாசிக்கலாம். பல்வேறு தலைப்புகளில் புத்தகங்கhttps://en.wikibooks.org/wiki/Main_Pageளை வாசிக்க முடியும்.

விக்கிஷ்னரி (https://en.wiktionary.org/wiki/Wiktionary:Main_Page ) பகுதி விக்கி அகராதியாகும். இந்த அகராதியில் ஆங்கில் சொற்களுக்கான பொருள்மற்றும் பயன்பாட்டை தெரிந்து கொள்ளலாம். தமிழிலும் விக்கிஷ்னரி இருக்கிறது. இதே போலவே பிரபலமானவர்களின் மேற்கோள்களின் தொகுப்பாக விக்கிகோட் பகுதி அமைகிறது. மேற்கோள்களையும், பொன்மொழிகளையும் இதில் காணலாம். இதன் தமிழ் பகுதியில் தான் மேலே சொன்ன கனவு மேற்கோள் வருகிறது. அதன் சொந்தக்காரர் நடிகர் கமல்ஹாசன். https://en.wiktionary.org/wiki/Wiktionary:Main_Page

இந்த பக்கத்தில் மேலும் பல பிரபலங்கள், இலக்கியங்கள், திரைப்படங்களின் மேற்கோள்களை பார்க்கலாம். கலை,இலக்கியம், சமயம், வீரம் என தனித்தனி தலைப்புகள் கீழும் மேற்கோள்களை அணுகலாம். மயில்சாமி அண்ணாதுரை முதல் பாவலரேறு பெருஞ்சித்திரனார், மண்டேலா, மகாத்மா என மேதைகளின் மேற்கோள்களையும் அறியலாம்.

விக்கி வாயேஜ் (https://en.wikivoyage.org/wiki/Main_Page ) என்பது பயண வழிகாட்டி. உலகின் எந்த நாடு அல்லது நகருக்கு பயணம் செல்ல விரும்புகிறோமோ அந்த நாடு அல்லது நகரம் தொடர்பான தகவல்களை அறியலாம். குறிப்பாக சுற்றுலா நோக்கிலான தகவல்கள் மற்றும் பயண வழிகளை அறியலாம்.

விக்கி பல்கலை

விக்கி சோர்ஸ் என்பது மூலத்தகவல்களுக்கான நூலகம் போன்றது. விக்கிடேட்டா தரவுகளுக்கான காப்பகம். விக்கி வார்சிட்டி (https://en.wikiversity.org/wiki/Wikiversity:Main_Page) பகுதியில் விக்கி பல்கலைகழகம் போன்றது. கல்வி சார்ந்த தகவல்கள் இதில் கொட்டிக்கிடக்கின்றன. இணைய வடிவமைப்பு உள்பட பல விஷயங்களை இந்த ப்குதியில் கற்றுக்கொள்ளாலாம். மாணவர்கள் இந்த பக்கத்திற்குள் நுழைந்தால் பயனுள்ள பல தகவல்களை பெறலாம். பள்ளி பாடத்திற்கான ஊக்கத்தையும் பெறலாம், போட்டித்தேர்வுகளுக்கு தயாராகும் வகையில் தகவல்களையும் திரட்டிக்கொள்ளலாம்.

இவைத்தவிர விக்கி ஸ்பிஷியஸ் (https://species.wikimedia.org/wiki/Main_Page ) பகுதியில் தாவிரங்கள், விலங்குகள் உள்ளிட்ட உயிரணங்கள் தொடர்பான தகவல்களை அறியலாம். இவை எல்லாமே இணையவாசிகள் பங்கேற்பால் உருவாகி வருபவை., எனவே நீங்களும் பங்கேற்கலாம். தமிழ் விக்கிபீடியா பக்கம்: http://bit.ly/1o52tcM

விக்கி ஆர்வலர்கள் அவசியம் அறிந்திருக்க வேண்டிய இன்னொரு இணையதளம் விக்கிமீடியா அறக்கட்டளையின் வலைப்பதிவாகும்: https://blog.wikimedia.org/ . இதில் விக்கிபீடியாவின் புதிய திட்டங்கள், விக்கி சமூக நிகழ்வுகள் உள்ளிட்டவற்றை அறிந்து கொள்ளலாம். இந்த வரிசையில் சிம்பிள் விக்கிபீடியாவையும் (https://simple.wikipedia.org/wiki/Main_Page ) சேர்த்துக்கொள்ள வேண்டும். இது விக்கிபீடியாவின் எளிமையான வடிவம். இதில் உள்ள கட்டுரைகள் எல்லாம் அடிப்படை ஆங்கிலத்தில் எழுதப்பட்டிருக்கும். வாக்கியங்களும் சிறியதாக எளிதில் படிக்க கூடியதாக இருக்கும். சிறுவர் ,சிறுமியர் மற்றும் முதல் ஆங்கிலம் கற்று வருபவர்களுக்கு இந்த எளிமையான பக்கம் ஏற்றதாக இருக்கும். இதே போல கிவிக்ஸ் (http://www.kiwix.org/ ) இணையதளம் விக்கிபீடியா பக்கங்களை தரவிறக்கம் செய்து இணைய இணைப்பு இல்லாமலேயே பயன்படுத்த உதவுகிறது.

இவை எல்லாம் விக்கி சாம்பிராஜ்யத்தின் சில மாதிரிகள் மட்டுமே. விக்கி உலகிற்குள் நுழைந்தால் இன்னும் பல அற்புதங்களை நீங்களே தெரிந்து கொள்ள முடியும்.

 

 

 

 

 

 

 

 

வாட்ஸ் அப் சேவையில் காத்திருக்கும் மாற்றங்கள்!

தொழில்நுட்ப உலகில் மாற்றம் ஏற்பட்டு வரும் வேகத்தை பார்த்தால் மலைப்பாக தான் இருக்கிறது. அதிலும் குறிப்பாக செல்போன் சார்ந்து நிகழும் மாற்றங்கள் இன்னும் வேகமாக, இன்னும் மலைப்பாக இருக்கிறது. சில ஆண்டுகளுக்கு முன்வரை, செல்போன் என்றால் நோக்கியா என்றிருந்தது. உயர்ரக பிரிவில் பிளாக்பெரி ஆதிக்கம் செலுத்தியது. இன்றோ நோக்கியா இருந்த இடம் தெரியவில்லை. பிளாக்பெரி ஸ்மார்ட்போன் தயாரிப்பை நிறுத்தப்போவதாக தகவல் வெளியாகியுள்ளது. இன்று ஸ்மார்ட்போன்களுக்கான இயங்குதளம் என்றால் ஆண்ட்ராய்டும், ஐஓஎஸ்-ம் என்றாகி இருக்கிறது.

இந்த பின்னணியில் தான் வாட்ஸ் அப் சேவையில் நிகழ காத்திருக்கும் மாற்றங்களை புரிந்து கொள்ள வேண்டியிருக்கிறது.

முன்னணி மெசேஜிங் சேவையான வாட்ஸ் அப் வசதியை தொடர்ந்து பெற வேண்டும் என்றால், உங்கள் போனை மாற்றிக்கொள்ளுங்கள் என சொல்லும் அளவுக்கு வாட்ஸ் அப் செல்வாக்கு மிக்கதாக மாறியிருப்பதும் இந்த மாற்றங்களின் முக்கிய அம்சமாக இருக்கிறது.

பழைய போன் மாதிரிகள் மற்றும் பழைய இயங்குதளங்களை கொண்ட போன்களில் எல்லாம் வாட்ஸ் அப் சேவை 2016 ம் ஆண்டுக்குப்பிறகு செயல்படாது எனும் தகவலை நீங்கள் அறிந்திருக்கலாம். கடந்த பிப்ரவரி மாதம் வாட்ஸ் அப் தனது வலைப்பதிவில் இதற்கான அறிவிப்பை வெளியிட்டது. அதன் பிறகு நவம்பர் மாதம் மீண்டும் ஒரு அறிவிப்பை இதை உறுதி செய்தது. இதன்படி, நோக்கியா, பிளாக்பெரி, விண்டோஸ், ஆண்ட்ராய்டு ஆகியவற்றின் பழைய மாடல்களில் வாட்ஸ் அப் சேவை செயல்படாது என தெரிவிக்கப்பட்டது. ஐ.ஒ.எஸ் இயங்குதளத்தின் பழைய வடிவங்களுக்கும் இது பொருந்தும். எனினும் இந்த முதல் கட்ட பட்டியலில் இருந்து பிளாக்பெரி மற்றும் நோக்கியா சிம்பயான் போன்களுக்கு விலக்கு அளிக்கப்பட்டுள்ளது. ஆனால் இந்த நீட்டிப்பும் கூட 2017 ஜுன் மாதம் வரை தான். அதன் பிறகு வாட்ஸ் அப் செயல்படக்கூடிய புதிய போன் அல்லது இயங்குதளத்திற்கு மாறியாக வேண்டும்.  ஆண்ட்ராய்டு 2.2, ஐ.ஓ.எஸ் 6 மற்றும் விண்டோஸ் போன்7 உள்ளிட்ட பழைய ரகங்களில் இந்த ஆண்டிற்கு பிறகு வாட்ஸ் அப் சேவையை பயன்படுத்த இயலாது. வாட்ஸ் அப் விஷயத்தில் இப்படி காலாவதியாகும் பழைய போன் மாதிரிகளை வைத்திருப்பவர்கள் தங்கள் செல்போன்களை மாற்றிக்கொள்ள வேண்டும்.

ஒரு செயலிக்காக போனை மாற்ற வேண்டும் என்பது கொஞ்சம் விநோதமானது தான். வாட்ஸ் அப்பின் செல்வாக்கு அப்படி என்றாலும், இந்த மாற்றத்திற்கான காரணம் அதுவல்ல. வாட்ஸ் அப் புதிய தொடர்ச்சியாக புதிய அம்சங்களை அறிமுகம் செய்து வருகிறது. ஒரு சேவையாக தனது பயன்பாட்டுதன்மையை தக்க வைத்துக்கொள்ள வாட்ஸ் அப்பிற்கு இந்த புதுப்பித்தல் அவசியம்.

இதன் பக்கவிளைவு தான், பழைய இயங்குதளங்கள் மீது கவனம் செலுத்த முடியாத நிலை.

இதற்கு வாட்ஸ் அப்பை குற்றம் சொல்லவும் முடியாது. ஏனெனில் வாட்ஸ் அப் அறிமுகமான காலத்தில், பிளாக்பெரியும், ஐபோனும், நோக்கியா சிம்பயான் போன்களுமே ஸ்மார்ட்போன் பரப்பில் பரவலாக பயன்பாட்டில் இருந்தன. ஆனால் அதன் பிறகு ஆண்ட்ராய்டு அலை வீசத்துவங்கி, ஐபோன் ஆதிக்கமும் வலுப்பெற்றது. இந்த போக்குகளுக்கு ஈடு கொடுத்து வளர்ச்சி அடைந்த வாட்ஸ் அப், முன்னணி செயலிகளில் ஒன்றாக இருப்பதோடு, வீடியோ காலிங் உள்ளிட்ட வசதிகளை அறிமுகம் செய்திருக்கிறது. மேலும் பல புதிய அம்சங்களை அறிமுகம் செய்ய உள்ளது.

இந்நிலையில், புதிய வசதிகளுக்கு ஈடு கொடுக்க ஏற்றதாக இல்லாத பழைய இயங்குதளங்களுக்கான ஆதரவை நிறுத்துக்கொள்வது தவிர வேறுவழியில்லை என வாட்ஸ் அப் தெரிவித்துள்ளது. நண்பர்களுடனும், குடும்பத்தினருடனும் உறவு கொள்வதற்கான மேம்பட்ட வழிகளை வாடிக்கையாளர்களுக்கு அளிக்க இது அவசியம் என்றும் தெரிவித்துள்ளது. எதற்கும் பழைய போன் வைத்திருப்பவர்கள் வாட்ஸ் அப் சேவை செயல்படக்கூடிய போன்களின் பட்டியலை பார்த்துக்கொள்வது நல்லது. இந்த முழு பட்டியலும் இந்த இணைப்பில் காணலாம்:

நிற்க, வரும் காலத்தில் வாட்ஸ் அப் அறிமுகம் செய்ய உத்தேசிள்ளதாக கூறப்படும் புதிய அம்சங்களில் சிலவற்றை பார்க்கலாம். செய்திகளை பகிர்ந்து கொண்ட பின் திரும்ப பெறும் வசதி மற்றும் திருத்தம் செய்யும் வசதிகள் அறிமுகம் ஆக இருப்பதாக தகவல்கள் வெளியாகியுள்ளன.

இப்போதைக்கு வாட்ஸ் அப்பில் ஒரு செய்தியை அனுப்பிவிட்டு, பின்னர் அதை விலக்கி கொள்ள நினைத்தால் அதற்கான வழியில்லை. ஆனால், ஜிமெயிலில் இருப்பது போலவே, அனுப்பியவுடன், அந்த செய்தியை திரும்ப பெற விரும்பினால் அதை சாத்தியமாக்கும் வசதி அறிமுகமாக உள்ளது. இதன் படி, செய்தியின் மீது, கிளிக் செய்தால், அதை திரும்ப பெறுவதற்கான வாய்ப்பு தோன்றும். அதை கிளிக் செய்து அந்த செய்தியை அழித்துவிடலாம். ஆனால் இதற்கு கால வரையறை இருக்கிறது. தற்போது சோதனை வடிவில் ஒரு சில போன் மாதிரிகளில் அறிமுகம் செய்யப்பட்டுள்ள இந்த சேவை முழு வீச்சில் அறிமுகம் ஆகும் போது தான் இதன் செயல்பாடு பற்றி தெளிவு கிடைக்கும். இப்போதுள்ள செய்திகளை டெலிட் செய்யும் வசதியில் இருந்து இது மாறுபட்டது.ஏனெனில் செய்திகளை டெலிட் செய்தாலும் அது அனுப்பியவர் போனில் இருந்து தான் மறையும். மற்றவர்கள் போனில் இருந்து நீக்க முடியாது. ஆனால் புதிய சேவையில் இது சாத்தியம்.

இதே போலவே செய்திகளை திருத்தும் வசதியும் அறிமுகம் ஆக உள்ளது. எல்லாம் சரி, அப்படியே வதந்திகளை கட்டுப்படுத்தும் நோக்கிலும் ஒரு வசதி அறிமுகமானால் நன்றாக இருக்கும் அல்லவா!

 

 

மகளை இழந்த அப்பாவை நெகிழ வைத்த இணையம்.

baby1இணையத்தில் வெட்டிச்சண்டைகளும் வீண் விவாதங்களும் நடப்பதுண்டு. துவேஷத்தையும் வெறுப்பையும் பின்னூட்டங்களாக வெளியிட்டு குரூரத்தை வெளிப்படுத்தும் நிகழ்வுகளும் உண்டு. இருப்பினும் இணையம் அழகான இடம் தான். இதற்கு நெகிழ வைக்கும் எத்தனையோ உதாரணங்கள் இருக்கின்றன. சமீபத்திய உதாரணம் செல்ல மகளை இழந்து தவித்த அப்பாவின் சோகத்திற்கு மருந்திட இணையவாசிகள் ஓடோடி வந்து உதவிய உருக வைக்கும் சம்பவம்.

அமெரிக்காவின் ஓஹியோவைச்சேர்ந்த நாதன் ஸ்டிபெல் தான் இப்படி இணைய அன்பால் நெகிழந்து போயிருக்கும் அப்பா. ஸ்டிபலுக்கும் ஏற்பட்ட நிலை உலகில் எந்த அப்பாவுக்கும் ஏற்படக்கூடாதது. அவரது செல்ல மகள் ஆறே வாரங்கள் தான் உயிருடன் இருந்தார். அதிலும் அந்த ஆறு வாரங்களும் அந்த குழந்தை மருத்துவமனையிலேயே கழித்திருக்கிறது. கல்லிரல் பாதிப்பால் பிறந்ததில் இருந்து அந்த குழந்தை மருத்துவமனையில் உயிருக்கு போராடியிருக்கிறது. எந்த பெற்றோரையும் உலுக்கி விடும் நிலை தான்.

மகளை பறிகொடுத்த ஸ்டிபெல் அந்த குழந்தையின் புகைப்படமேனும் தன்னிடம் இருக்க வேண்டும் என விரும்பினார். ஆனால் மருத்துவமனையில் எடுக்கப்பட்ட புகைப்படத்தில் குழந்தை சிகிச்சைக்காக குழாய்கள் பொருந்திய நிலையிலேயே இருந்தது. இதனால் அந்த அப்பாவால் குழந்தையின் முழு முகத்தை பார்க்க முடியவில்லை.
baby-581x620இந்த நிலையில் தான் இணையத்தின் முகப்பு பக்கம் என்று வர்ணிக்கப்படும் ரெட்டிட் இணையதளத்தில் அவர் அந்த உருக்கமான கோரிக்கையை வைத்தார்.
என மகள் தான் வாழ்ந்த ஆறு வார காலத்தை மருத்துவமனையிலேயே கழித்ததால் அவளுடைய ஒரு நல்ல புகைப்படம் கூட என்னிடம் இல்லை. யாரேனும் இந்த குழாய்களை நீக்கிவிட்டு குழந்தையின் முகம் முழுவதும் தெரிவது போல மாற்றித்தர முடியுமா?என அவர் கேட்டிருந்தார்.

புகைப்படங்களில் திருத்தங்களை மேற்கொள்ளும் போட்டோஷாப் பயன்பாடு தெரிந்த யாரேனும் இதற்கு உதவலாம் என அவர் எதிர்பார்த்திருந்தார்.

அவர் எதிர்பார்ப்பு வீண் போகவில்லை. குழாய்கள் நீக்கப்பட்டு குழந்தையின் அழகான புகைப்படம் சமர்பிக்கப்பட்டது. இப்படி பலரும் புகைப்படங்களை உருவாக்கி சமர்பித்திருந்தனர். இந்த முகம் தெரியாத மனிதர்களின் ஆதரவால் அவர் திக்குமுக்காடிப்போய்விட்டார். ” நான் ஒரே ஒரு நல்ல படம் தான் கேட்டேன். ஆனால் இத்தனை பேர் அதற்கான முயர்சியில் ஈடுபட்ட்து அற்புதமாக இருக்கிறது. இப்போது நிறைய படங்கள் இருக்கின்றன” என்று அவர் நெகிச்சியுடன் குறிப்பிட்டிருந்தனர்.

குழாய்கள் நீக்கப்பட்ட அந்த படங்களில் குழந்தையின் தோற்றம் அத்தனை அழகாக இருந்தது. அந்த காட்சியை பார்த்து தந்தையுள்ளம் எத்தனை மகிழ்ந்திருக்கும்!
குழந்தையின் புகைப்பட்த்தை உருவாக்கி தந்துடன் நில்லமால் பலரும் அந்த தந்தையின் சோகத்தை புரிந்து கொண்டு ஆறுதல் கூறியிருந்தனர். ஒரு சிலர் தாங்களும் அவரைப்போலவே மகளை இழந்த சோகத்தை பகிர்ந்து கொண்டு அவருக்கு ஆறுதல் சொல்லியிருந்தனர். மருத்துவமனையில் குழந்தையை சேர்க்க நேர்ந்த அனுப்வத்தையும் பகிர்ந்து கொண்டு அவரது வலியை உணர முடிவதாக சிலர் கூறியிருந்தனர். ஒரு பயனாளி உங்கள் இடத்தில் என்னை வைத்துப்பார்த்தால் இதயம் வலிக்கிறது என்று கூறியிருந்தார். இன்னொருவரோ எனது பையன்களுக்கு 11மற்றும் 12 வயதாகிறது.அவர்கள் நண்பர்களுடன் அதிகம் இருக்கின்றனர். நான் இனி அவர்கள் அருகில் இருப்பேன் என குறிப்பிட்டிருந்தார். பலர் ஆறுதல் வார்த்தைகளோடு புகைப்படங்களையும் உருவாக்கி சமர்பித்திருந்தனர். சிலர் ஆயில்பெயிண்டிங்கில் வரைந்து அனுப்புவதாகவும் கூறியிருந்தார்.

இந்த உரையாடல்கள் அன்பின் மொழியாகவும், மனிதநேயத்தின் வெளிப்பாடாகவும் அமைந்திருந்தன. தந்தைகளின் உலகையும் உணர்வையும் வெளிப்படுத்துவதாகவும் இருந்தன.

ரெட்டிட் கோரிக்கை பக்கம்: http://www.reddit.com/r/pics/comments/2ajul6/photoshop_request_my_daughter_recently_passed/

குழந்தையின் புகைப்படங்கள்; http://imgur.com/nZFisJl

———–

விகடன்.காமில் எழுதியது; நன்றி.விகடன்.காம்

விக்கிபீடியாவை மேலும் சிறப்பாக பயன்படுத்துவதற்கான வழிகள்!

wi1இணையவாசிகளின் பங்களிப்பால் உருவாகும் கட்டற்ற கலைகளஞ்சியமான விக்கிபீடியாவை நீங்கள் விரும்பலாம், விரும்பாமல் போகலாம். ஆனால் அதை பயன்படுத்தாமல் இருக்க முடியாது. ஒன்று விக்கிபீடியாவை நீங்கள் தற்செயலாக பயன்படுத்தலாம் – எப்படியும், இணையத்தில் தகவல்களை தேடும் போது , உங்கள் குறிச்சொல் தொடர்பான விக்கிபீடியா பக்கம் வந்து நிற்கலாம். அல்லது நீங்களே விரும்பி விக்கிபீடியாவில் தகவல்களை தேடலாம். நம்பகத்தன்மை பற்றிய கேள்விகள், அதில் அரங்கேறும் திருத்தங்களின் அரசியல் ஆகியவற்றை மீறி விக்கிபீடியா மிகச்சிறந்த தகவல் சுரங்கம். அதிகம் பயன்படுத்தப்படும் இணையதளங்களின் பட்டியலில் அது ஆறாவது இடத்தில் இருப்பதற்கான காரணமும் அதுவே.

ஒரு முறை விக்கிபீடியாவை பயன்படுத்தினால் அதில் உள்ள ஏதவாது ஒரு அம்சம் உங்களை கவராமல் இருக்க வாய்ப்பில்லை. தகவல் களஞ்சியமாக விக்கிபீடியா பயன் மிக்கது என்றாலும் அதன் வடிவமைப்பு அத்தனை நேர்த்தியானது அல்ல. அதோடு விக்கிபீடியாவை பயனாளிகள் தங்கள் தேவைக்கேற்ப மாற்றியமைத்துக்கொள்ள முடியாது. இந்த குறைகளுக்கு தீர்வு காணவும், விக்கிபீடியாவை மேலும் சிறந்த முறையில் பயன்படுத்தவும் வழிகள் இல்லாமல் இல்லை. உங்கள் விக்கி அனுபவத்தை மேம்படுத்தக்கூடிய சில வழிகளையும் விக்கி சார்ந்த சேவைகளையும் இங்கே பார்க்கலாம்.

 

எளிய ஆங்கித்தில்!
எப்போதாவது விக்கிபீடியா கட்டுரைகள் கடினமாக இருப்பதாக உணர்ந்திருக்கிறீர்களா? கட்டுரையில் பயன்படுத்தப்படும் ஆங்கிலம் மற்றும் அதில் இடம்பெறும் கரடுமுரடான சொற்கள் இடையூறாக இருப்பதாக நினைத்திருக்கிறீர்களா? ஆம் எனில், கவலையேபடாதீர்கள், உங்களுக்காக என்றே எளிய ஆங்கில விக்கிபீடியா (http://simple.wikipedia.org/wiki/Main_Page ) இருக்கிறது. இங்கு விக்கிபீடியா கட்டுரைகளை எளிய ஆங்கிலத்தில் படிக்கலாம். அடிப்படையில் விக்கிபீடியாவில் உள்ள கட்டுரைகள் தான் இங்கும் இருக்கின்றன. ஆனால் அவை எல்லாமே சிக்கல் இல்லாமல் எளிய ஆங்கிலத்தில் எழுதப்பட்டுள்ளன. விக்கி கட்டுரைகளில் உள்ள கரடுமுரடான சொற்கள் நீக்கப்பட்டு அவற்றின் சாரம்சம் எளிதாக புரியும் வகையில் சிக்கலான விஷயங்கள் நீக்கப்பட்டு எளிதாக படிக்க கூடிய வகையில் திருத்தி எழுத்தப்பட்டுள்ளன. எளிய ஆங்கிலத்தில் எழுதப்பட்ட மூலக்கட்டுரைகளையும் இங்கு சமர்பிக்கலாம். அடிப்படையான ஆங்கில சொற்களை மட்டுமே பயன்படுத்த வேண்டும். விக்கிபீடியா கட்டுரைகள் எல்லோருக்குமானதாக இருக்க வேண்டும் எனும் நோக்கத்துடன் எளிமையான வடிவில் வழங்கப்பட்டு வருகின்றன. 2003 ம் ஆண்டு முதல் செயல்பட்டு வரும் இதில் ஒரு லட்சத்திற்கும் அதிகமான கட்டுரைகள் உள்ளன. குறிப்பாக மாணவர்களுக்கு மிகவும் பயனுள்ளதாக இருக்கும். ஆங்கிலத்தை தாய்மொழியாக கொள்ளாதவர்களுக்கும் ஏற்றதாக இருக்கும். இதே போலவே விக்கி அகராதியான விக்கிஷ்னரிக்கும் எளிய ஆங்கில வடிவம் இருக்கிறது – http://simple.wiktionary.org/wiki/Main_Page

 

செய்திகளை தொடர
செய்திகள் என்றதும் விக்கிபீடியா நினைவுக்கு வர வாய்ப்பில்லை. அதற்கு செய்தி தளங்களையோ அல்லது தேடியந்திரங்களையோ தான் தேடிச்செல்வோம். இருப்பினும் தவறவிட்ட முக்கிய செய்திகளை தெரிந்து கொள்ள விக்கிபீடியா சிறந்த இடம் என்பது உங்களுக்குத்தெரியுமா? இதற்காக நீங்கள் செய்ய வேண்டியதெல்லாம் , விக்கிபீடியா தளத்தில் , நீங்கள் எந்த மாதத்தின் நிகழ்வுகளை தெரிந்து கொள்ள விரும்புகிறீர்களோ , அந்த மாதத்தை விக்கிபீடியா தேடலில் கட்டத்தில் குறிப்பிட்டு தேடினால் , அந்த மாதத்தின் முக்கிய நிகழ்வுகளை எல்லாம