Tag Archives: news

f1

பேஸ்புக் அடிமைகளா நாம்?


உழைப்பு யாருது, செல்வம் யாருது …
என்பது ஆந்திராவின் மக்கள் கவிஞரான செரபண்ட ராஜுவின் கவிதை வரி.
இந்த ஆவேச வரிகள் உழைக்கும் மக்களுக்காக குரல் கொடுத்து எழுதப்பட்டவை.
பேஸ்புக் தொடர்பாக அமெரிக்கரான மைக்கேல் ரோசன்பிளம்’ என்பவர் எழுதியுள்ள இணைய பத்தியை படிக்கும் போது இந்த வரிகள் தான் நினைவுக்கு வருகிறது.
உழைப்பாளிகளுக்கான செரபண்ட ராஜுவின் தார்மீக கோபம் போல, ரோசன்பிளம் இணையவாசிகளின் சார்பில், உள்ளடக்கம் யாருடையது ,செல்வம் யாருடையது ? என கேட்டு இந்த பத்தியை எழுதியிருக்கிறார்.
ஹபிங்டன் போஸ்ட் இணைய இதழில் பேஸ்புக்கை தொழிற்சங்கமயமாக்குவோம் (Let’s Unionize Facebook) எனும் தலைப்பில் எழுதியுள்ள இந்த பத்தியில், அவர் நாமெல்லாம் பேஸ்புக் அடிமைகளா? என்று கேள்வி எழுப்புகிறார். பேஸ்புக்கிற்கு மட்டும் அல்ல, டிவிட்டர் அடிமைகள், இன்ஸ்டாகிராம் அடிமைகள் என்றும் குறிப்பிடுகிறார். இந்த இணைய சேவைகளுக்காக நாம் ஓயாமல் உள்ளடக்கத்தை உருவாக்கி கொடுத்துக்கொண்டிருக்கிறோம் என்றும் அவர் குறைப்பட்டுக்கொள்கிறார்.
இந்த கருத்துக்கு அவர் வந்து நிற்கும் விதம் தான் கவனத்திற்கு உரியது. வரலாற்றின் இடைப்பட்ட காலமான 15 ம் நூற்றாண்டில் நிலமே பெரும் செல்வமாக கருதப்பட்டதாகவும், பெரும் நிலப்பரப்பை கொண்ட பிரபுக்களிடம் பலரும் அடிமைகளாக வேலை பார்த்தனர் என்றும் குறிப்பிடுகிறார்.

சைபர்வெளி அடிமைகள்
காலம் மாறியிருக்கிறதே தவிர வரலாறு மாறவில்லை , இன்று நிலம் என்பது சைபர்வெளியாகி இருக்கிறது, அதில் நாமெல்லாம் அடிமைகளாக இருக்கிறோம், அமேசானின் ஜெப் பெசோசும், பேஸ்புக்கின் ஜக்கர்பெர்கும் இணைய பிரபுக்களாக நமது உள்ளடக்கத்தை கொண்டு செல்வம் சேர்த்துக்கொண்டிருப்பதாகவும் அவர் குறிப்பிடுகிறார்.
பேஸ்புக்கின் 100 சதவீத உள்ளடக்கம் நம்முடையது அல்லவா என கேட்கும், இதை இலவசமாக செய்து கொண்டிருக்கும் முட்டாள்கள் அல்லவா நாம் என்றும் கேட்கிறார். இதை அவர் சொல்லும் விதம் இன்னும் துடிப்பாக இருக்கிறது. தினமும் நாம் எந்த ஊதியமும் பெறாமல் , ஜக்கர்பர்கின் இணைய நிலத்தில் குடியிருக்கும் உரிமைக்காக அவருக்காக உள்ளடக்கத்தை உருவாக்கி கொண்டிருக்கிறோம் என்றும் அவர் சுட்டிக்காட்டுகிறார்.ஜக்கர்பர்கின் 33 பில்லியன் டாலர் செல்வமும் நாம் சேர்த்து கொடுத்தது என்கிறார்.
இதன் பிறகு அவர் சொல்லும் விஷயம் என்ன தெரியும? 20 ம் நூற்றாண்டில் இங்கிலாந்து மற்றும் அமெரிக்காவில் உள்ள தொழிலாளர்கள் தங்களிடம் உழைப்பு எனும் சக்தி இருப்பதை உணர்ந்து கொண்டு அதன் ஆற்றலை உணர்த்த தொழிற்சங்கம் அமைத்துக்கொண்டது போல, பேஸ்புக் பயனாளிகள் தொழிற்சங்கம் அமைக்கலாகாதா? என்றும் ரோசன்பிளம்’ கேள்வி எழுப்புகிறார்.

f2பேஸ்புக்கிற்காக உழைப்பு!

நிச்சயம் புதுவிதமான சிந்தனை தான். அதற்காக பேஸ்புக்கிற்கு எதிராக நாம் கொடி பிடித்து போராட வேண்டும் என்று அர்த்தமில்லை. ஆனால் நிச்சயம் நமது பேஸ்புக பழக்கம் பற்றி யோசித்தாக வேண்டும். பேஸ்புக்கை இலவச சேவையாக கருதி மகிழ்ச்சியுடன் பயன்படுத்திக்கொண்டிருக்கிறோம். ஆனால் நமது உள்ளடக்கத்தை வைத்து பேஸ்புக் விளம்பர வருவாயை அள்ளிக்கொண்டிருக்கிறது என்பதை மறந்து விடுகிறோம். நம்மை அறியாமல் நாம் பேஸ்புக் போன்ற தளங்களுக்காக அடிமைகள் போல உள்ளடக்கத்தை உருவாக்கி கொண்டிருக்கிறோம்.
இந்த கருத்து உங்களுக்கு ஏற்புடையதாக இல்லாமல் இருக்கலாம். சமூக வலைப்பின்னலாக அது ஏற்படுத்தி தரும் பலன்களை வைத்து நீங்கள் வாதிடலாம். உண்மை தான், பேஸ்புக் இணைய யுகத்தில் நட்புக்கும் ,தகவல் பரிமாற்றத்திற்கும் இன்னும் பல பயன்களுக்கும் வித்திட்டிருக்கிறது. மறுப்பதற்கில்லை. பல நேரங்களில் பேஸ்புக் போன்ற சேவைகள் சமூக ஊடகங்களாக செயல்படுகின்றன. எகிப்திலும் வளைகுடா நாடுகளிலும் மலர்ந்த சமூக புரட்சியில் பேஸ்புக்கிற்கும் அதன் சமூக சகாக்களுக்கும் முக்கிய பங்கிருக்கிறது. சமூக ஊடகங்களில் பயன்பாட்டிற்கு இன்னும் நிறைய உதாரணங்கள் இருக்கின்றன.

பேஸ்புக் பயன்பாடு
பிரச்சனை பேஸ்புக்கை நாம் எப்படி பயன்படுத்த பழகியிருக்கிறோம் என்பது தான். சமூக வலைப்பின்னலாக பேஸ்புக்கின் ஆதார பலம் நண்பர்கள்,நண்பர்களின் நண்பர்கள் ,அவர்களின் நண்பர்கள் என நட்பு வளையத்தை விரியச்செய்வது தான். இந்த நட்பு வளையத்தில் எதை பகிர்ந்து கொள்கிறோம் என்பதும் , எதற்காக பகிர்ந்து கொள்கிறோம் என்பது முக்கியமானது இல்லையா?
எல்லாவற்றையும் நிலைத்தகவலாக பகிர்ந்து கொள்வது இயல்பாக இருக்கிறது. வீட்டு விஷேசத்தில் எடுத்த புகைப்படங்களையும், சுற்றுலா பயணத்தில் எடுத்த புகைப்படங்களையும் எந்த யோசனையும் இல்லாமல் பேஸ்புக்கில் பகிர்கிறோம். அதனால் என்ன வந்துவிடப்போகிறது?
ஆனால், உங்கள் தனிப்பட்ட பயணம் பற்றிய புகைப்படம் , நண்பர்களின் நண்பர்களுக்கு எந்த விதத்தில் அவசியமானது யோசித்துப்பாருங்கள்? உங்கள் மகனுடனோ , மகளுடனோ இருக்கும் புகைப்படம் நிலைத்தகவலாக வெளியிடுவது எதற்காக? அவற்றுக்கு காரணம் இல்லாமல் கிடைக்கும் லைக்குகளை விட்டுத்தள்ளுங்கள்.
புகைப்படங்களை நண்பர்களுடன் பகிர்ந்து கொள்வது இயல்பானது தான். வீட்டிற்கு வரும் நண்பர்களிடமும் உறவினர்களிடமு புகைப்பட ஆல்பத்தை காண்பித்து மகிழ்வது வழக்கமானது தான். ஆனால் நன்றாக் யோசித்துப்பாருங்கள், எல்லோரிடமும் நீங்கள் இவ்வாறு செய்வதில்லை. அதற்கு ஒரு பரஸ்பர நெருக்கம் தேவை. வரவேற்பறையில் பேசிக்கொண்டிருக்கும் எல்லா நண்பர்களுக்கும் நீங்கள் புகைப்பட ஆல்பத்தை காட்ட விரும்ப மாட்டீர்கள். அதற்கான நெருக்கமும் இணக்கமும் இல்லாத நிலையில் அந்த நண்பரும் கூட அதை விரும்பமாட்டார். இதெல்லாம் எழுதப்படாத சமூக விதிகள். இயல்பாக எல்லோரும் அனுசரித்து நடப்பவை.
f3
தனியுரிமை கவலை
ஆனால் பேஸ்புக்கில் சொந்த ஊர் பயண புகைப்படங்களை பகிர்ந்து கொள்வது எந்தவகையான வெளிப்பாடு? ஊர் மாறியிருக்கிறது, விவசாயம் மங்கிவிட்டது போன்ற பொதுவான எண்ணங்களை பகிர்ந்து கொள்ளலாம். கிராமத்து மண்வாசத்தையும் பகிர்ந்து கொள்ளலாம். ஆனால் தனிப்பட்ட குடும்ப காட்சிகளை சித்தரிக்கும் புகைப்படங்களை பகிர்வது எதனால்? உங்கள் பிள்ளைகளின் புகைப்படங்களும் குடும்பத்தின் புகைப்படங்களும் தேவையில்லாமல் இணையத்தில் எல்லா இடங்களிலும் இறைந்து கிடப்பது நல்லதல்ல.
வேலைக்கு ஆள் எடுக்கும் நிறுவனங்கள் ,விண்ணப்பித்தவர்கள் பற்றி தகவல்கள் சேகரிக்க சமூக வலைப்பின்னல் பக்கங்களை அலசிக்கொண்டிருக்கின்றன என்பது உங்களுக்குத்தெரியுமா? விண்ணப்பத்தில் குறிப்பிடும் தகவல்களை எல்லாம் விட ஒருவரைப்பற்றி சித்திரத்தை அவரது சமூக வலைப்பின்னல் பதிவுகள் உணர்த்தி விடுவதாக கருதப்படுவதும் உங்களுக்குத்தெரியுமா? இன்சூரன்ஸ் நிறுவனங்கள் பேஸ்புக் பதிவுகளை ஆதாரமாக கொண்டு செயல்படுவதாக கூறப்படுவதை அறிந்திருக்கிறீர்களா?
நேற்று நீங்கள் பேஸ்புக்கில் எந்த சிந்தனையும் இல்லாமல் பகிர்ந்து கொண்ட தகவலும் புகைப்படமும் என்றேனும் ஒரு நாள் உங்களுக்கு வில்லங்கமாக முடியும் வாய்ப்பு இருக்கிறது தெரியுமா?
ஜார்ஜ் ஆர்வெல் சித்தரித்த கண்காணிப்பு யுகம் போல நாளை யாரேனும் , பேஸ்புக்கில் நீங்கள் விரோதமான கருத்தை சொல்லியிருந்தீர்களே என்று கேட்க்க்கூடிய நிலை வரலாம். இது கற்பனை தான். ஆனால் நிகழாது என்று சொல்வதற்கில்லை.

என்ன செய்யலாம் ?

அதற்காக பேஸ்புக் பயன்பாடே தவறு என்று பொருள் அல்ல. அது உங்கள் விருப்பம்; உரிமையும் கூட. பேஸ்புக்கை பயன்படுத்துங்கள், ஆனால் எதற்காக பயன்படுத்துகிறோம் என யோசிக்கவும் செய்யுங்கள். லைக்குகளுக்கும் ,கமெண்டுக்கும் ஆசைபட்டு நீங்கள் பொதுவில் பகிர விரும்பாத எதையும் இணையத்தில் ஆவணப்படுத்தாதீர்கள். இணையத்தில் வெளியிட்ட எதையும் நீங்கள் திரும்ப பெற முடியாது? உங்கள் பக்கத்தில் டெலிட் செய்தாலும் அதற்கு முன்பாகவே அதன் நகல் இணையத்தில் பல இடங்களில் பதிவாகி இருக்கும்.
எனவே , எதையும் பகிரும் முன் , இது சமூக வெளிக்கு ஏற்றதா என யோசியுங்கள்.
கருத்துக்கள் என்றால் வலைப்பதிவாக எழுத முடியுமா என முயன்றுப்பாருங்கள். புகைப்படங்கள் என்றால் இமெயில் மூலம் தேர்ந்தெடுத்த நண்பர்களுடன் பகிர்ந்து கொள்ளலாமா என யோசியுங்கள்.
மறக்காமல் பேஸ்புக்கின் தனியுரிமை அமைப்பிற்கு (பிரைவசி செட்டிங்) சென்று பாருங்கள். எந்த வகை தகவல்கள் யாருக்கானவை என தீர்மானியுங்கள். தனியுரிமையில் இறுதி அதிகாரம் பேஸ்புக்கிடமே இருக்கிறது என்றாலும் கொடுக்கப்பட்டுள்ள உரிமையையாவது பயன்படுத்திக்கொள்ளுங்கள்.
இது பேஸ்புக்கை சரியாக பயன்படுத்த வைக்கும்.

விக்கி வாழ்க!
வலைப்பதிவு யுகம் முடிந்து பேஸ்புக் யுகம் துவங்கியிருப்பதாக கருதப்படும் நிலையில், பலரும் வலைப்பதிவுக்கு முழுக்கு போட்டு பேஸ்புக் படைப்பாளிகளாகில் வருவதாக சொல்லப்படும் கட்டத்தில் இந்த எதிர்கருத்து ஆச்சர்யத்தை அளிக்கலாம். ஆனால் இணையத்தில் தனியுரிமையின் அவசியத்தையும் அதன் அலட்சியத்தால் ஏற்படக்கூடிய பாதிப்புகளையும் மெல்ல உணர்த்துவங்கியிருக்கிறோம் என்பதை மறந்துவிடக்கூடாது.
எல்லாவற்றையும் பகிரும் போக்கு பற்றிய கேள்விகளை எழுப்புவது தான் இந்த பதிவுன் நோக்கம்.
இன்னொரு முக்கிய விஷயம் சமூக ஊடக் பயன்பாட்டில் ஒருவர் தனக்கான சரியான வலைப்பின்னலை கண்டுகொள்வதும் முக்கியம். கல்லூரி மாணவர்களுக்கும், பணியிட்த்தில் இருப்பவர்களுக்கும் பேஸ்புக் பயன்பாடு கேளிக்கையை தரலாம். ஆனால் தொழில்முறை நபர்களுக்கான லிங்க்டுஇன் சமூக வலைப்பின்னல் தங்களுக்கு இன்னும் பொருத்தமாக இருக்காதா? என யோசிக்க வேண்டும்.
இவ்வளவு ஏன் விக்கிபீடியா கூட சமூக வலைப்பின்னல் ரகத்தை சேர்ந்தது தான் தெரியுமா? ஒயாமல் நிலைத்தகவல் பதிவு செய்வதற்கு நடுவே விக்கிபீடியாவிலும் நல்ல தகவல்களை பகிர்ந்து கொள்ளாலாமே!

பேஸ்புக் தொடர்பான மைக்கேல் ரோசன்பிளம்’ கட்டுரை: http://www.huffingtonpost.com/michael-rosenblum/lets-unionize-facebook_b_7526822.html?ir=India&adsSiteOverride=in

குறிப்பு; பேஸ்புக் தொடர்பான சிந்தனைகளில் ஓபன் சோர்ஸ் முன்னோடியான ரிச்சர்ட் ஸ்டால்மன் கருத்துக்கள் முக்கியமானவை. பேஸ்புக் பயன்பாட்டிற்கு எதிராக அவர் எழுதிய கட்டுரை எழுப்பும் கேள்விகள் சிந்தனைக்குறியவை; https://stallman.org/facebook.html

——–

நன்றி; தினமணி.காமில் நெட்டும் நடப்பும் பகுதியில் எழுதியது

இணையதளங்களை திருத்துவோம் வாருங்கள்

bbcஉங்களுக்கு ஹேக்கிங் செய்யத்தெரியாவிட்டால் என்ன? நீங்கள் விரும்பினால் ஒரு இணையதளத்தின் தோற்றத்தை மாற்றலாம் தெரியுமா? அந்த இணையதளத்தின் தலைப்பை திருத்தலாம் . புகைப்படங்களை மாற்றலாம். – ஷர்ட்யுஆரெல் ( http://shrturl.co/) இணையதளம் இவை எல்லாவற்றையும் சாத்தியமாக்குகிறது .

அடிப்படையில் இந்த இணையதளம் எந்த ஒரு இணையதளத்தின் போலி வடிவத்தையும் உருவாக்கி கொள்ள வழி செய்கிறது. எப்படி ? நீங்கள் மாற்ற விரும்பும் தளத்தின் இணைய முகவரியை இந்த தளத்தில் சமர்பிக்க வேண்டும். அதன் பிறகு சமர்பிக்கப்பட்ட இணையதளத்தின் நகல் தோற்றத்தை இது உருவாக்கித்தருகிறது. இந்த நகல் தோற்ற தளம் திருத்தங்களை செய்யக்கூடியது. ஆக, அதில் உள்ள தலைப்புகளையோ ,புகைப்படங்களையோ நீங்கள் மாற்றிக்கொள்ளலாம்.

திருத்தங்களை செய்த பின், மாறிய தோற்றத்தின் இணைய முகவரியை பெற்று நண்பர்களுடன் பேஸ்புக் அல்லது டிவிட்டர் மூலம் பகிர்ந்து கொள்ளலாம். தளத்தின் தோற்றத்தை பார்த்தால் பார்த்து பழகிய பிரபலமான தளம் போல இருக்கும். ஆனால் அதன் உள்ளடக்கமோ மாறி இருக்கும்.

பொதுவாக ஒரு இணையதளத்தின் உள்ளே அத்துமீறி உள்ளே நுழைந்து அதன் உள்ளடக்கத்தை மாற்றுவது ‘டிஃபேசிங்’ என்று சொல்லப்படுக்கிறது. இணைய தளம் மீது கரை பூசுவது அல்லது அசிங்கப்படுத்துவது என பொருள். இந்த அத்துமீறிய செயல் ஹேக்கிங்கில் ஒரு வகை . அரசியல் நோக்கம் முதல் வில்லங்கமான நோக்கம் வரை பல்வேறு காரணங்களுக்காக இப்படி இணையதளங்கள் அவ்வப்போது ஹேக் செய்யப்படுவதுண்டு.

இப்போது ஹேக்கிங் செய்யமாலேயே எந்த ஒரு இணையதத்தின் தோற்றத்தையும் மாற்ற ஷர்ட்யூஆரெல் வழி செய்கிறது. ஆனால் ஹேக்கிங் போல மூல தளத்திற்கு எந்த பாதிப்பும் கிடையாது. அதன் நகல் தோற்றத்தில் தான் மாற்றங்கள் செய்யப்படுகிறது.

இந்த சேவையை பலவிதங்களில் பயன்படுத்தலாம். விளையாட்டாகவும் பயன்படுத்தலாம். வில்லங்கமாகவும் பயன்படுத்தலாம். வில்லங்கமாக பயன்படுத்தினால் விபரீதத்திற்கு நீங்களே பொறுப்பு. வில்லங்கமாக பயன்படுத்த வேண்டாம் என்றும் வேண்டுகோள் விடுக்கப்பட்டுள்ளது. எனவே அரசு தளங்கள் மீதோ , நிறுவன தளங்கள் மீதோ கை வைக்காமல் இருப்பது நல்லது. மாற்றாக சொல்ல நினைக்கும் செய்தியை ஆச்சரயம் கலந்த சுவாரஸ்யத்துடன் சொல்ல இந்த வசதியை பயன்படுத்தலாம்.

அதே போல இணையதள வடிவமைப்பில் ஆர்வம் உள்ளவர்கள் இணையதள தோற்றம் தொடர்பான உதாரணங்களுக்கு இந்த சேவையை பயன்படுத்தலாம்.

——-

இணையதள முகவரி: http://shrturl.co/

 

————-

பி.கு:<100-00-0002-219-9_b/strong> இந்த வகையான இணைய சேவைகள் இணையத்தின் வழக்கமாகவே இருக்கிறது. இணைய கோபத்தை வெளிப்படுத்த வாய்ப்பு அளிக்கும் இதே போன்ற சேவை பற்றி ஏற்கனவே எழுதியுள்ளேன்.

மேலும் இது போலவே , பிரபல செய்தி தளங்களின் தோற்றத்தில் நாம் விரும்பும் செய்திகளை இடம் பெற வைக்ககூடிய சுவாரஸ்யமான இணையதளமும் இருக்கிறது. அந்த இணையதளம் பற்றி அறிய விரும்பினால், சிறந்த இணையதளங்கள் பற்றிய விரிவான அறிமுகங்களை கொண்ட எனது புத்தகமான ’இணையத்தால் இணைவோம் ’ வாங்கிப்பாருங்கள்; https://www.nhm.in/shop/100-00-0002-219-9.html

 

விளையாட்டக பயன்படுத்தக்கூடிய இணைய சேவை.

கூகிள் அலர்ட் சேவை சிறப்பாக பயன்படுத்தும் வழிகள்.

gogஇணையத்தில் தகவல்களை தேட அநேகமாக நீங்கள் கூகிள் தேடியந்திரத்தை தான் பயன்படுத்திக்கொண்டிருப்பீர்கள். அதே போல செய்திகளை படிக்க கூகிள் நியூஸ் சேவையும் இருப்பதை நீங்கள் அறிந்திருக்கலாம். கூகிள் வேறு பல சேவைகளையும் வழங்கி வருவதும் உங்களுக்கு தெரிந்திருக்கலாம். இப்படி கூகிள் வழங்கும் எண்ணற்ற சேவைகளில் அதிகமாக பிரபலமாகாத ஆனால் மிகவும் பயனுள்ள சேவை என்று கூகிள் அலர்ட் சேவை வர்ணிக்கபடுகிறது. இந்த சேவை மூலம் நீங்கள் விரும்பும் துறை அல்லது தலைப்புகளில் எந்த செய்தியையும் தவறவிடாமல் இருக்கலாம்.

கூகிள் அலர்ட் ஒரு அறிமுகம்

 கூகிள் அலர்ட் ஒரு தானியங்கி இணைய சேவை. இணையத்தில் குறிப்பிட்ட தலைப்பிலான சமீபத்திய செய்தி அல்லது நடவடிக்கை குறித்து இந்த சேவை இமெயில் மூலம் உங்களுக்கு தகவல் தெரிவிக்கும். ஒருவிதத்தில் புதிய செய்திக்கான எச்சரிக்கை சேவை என்று இதை புரிந்து கொள்ளலாம். எதற்கு இந்த எச்சரிக்கை என்று நீங்கள் கேட்கலாம். இணையத்தில் புதிய செய்திகளை தவறவிடாமல் இருக்க என்பது தான் இதற்கான பதில்.

எண்ணற்ற செய்தி தளங்களும் , தேடியந்திரங்களும் இருக்கும் போது செய்திகளை தெரிந்து கொள்வது மிகவும் சுலபமானது தான். ஆனால் செய்திகளை தெரிந்து கொள்ள எண்ணற்ற வழிகள் இருப்பதாலேயே முக்கிய செய்திகளை நீங்கள் தவறவிடிவதற்கான வாய்ப்புகளும் அதிகம் உள்ளன. காரணம் நீங்கள் எப்போதுமே ஆன்லைனில் இருக்க முடியாது, அப்படியே அதிக நேரம் இணையத்தில் இருந்தாலும் எல்லா நேரங்களிலும் செய்திகளையே பார்த்துக்கொண்டிருக்க முடியாது. உங்களுக்கு தேவையான நேரத்தில் செய்தி தளங்களுக்கு சென்று பார்ப்பீர்கள். அப்போது கண்ணில் படும் முக்கிய செய்திகளை படித்து விடுவீர்கள். ஆனால் நீங்கள் பார்க்காத நேரத்தில் வெளியாகும் செய்திகள் உங்கள் கவனத்திற்கு வராமலே போய்விடும் அல்லவா? அவற்றில் சில உங்களுக்கு முக்கியமனதாகவும் பயனுள்ளதாகவும் இருக்கலாம். இப்படி நீங்கள் தெரிந்து கொள்ள வேண்டும் என நினைக்கும் செய்திகளை தவறவிடாமல் இருக்க கூகிள் அலர்ட் கைகொடுக்கிறது.

அலர்ட் பெறுவது எப்படி?

பொதுவாக கூகிள் அலர்ட்களை ஒருவர் தங்களுக்கு ஆர்வம் அதிகம் உள்ள துறைகள் சார்ந்த செய்திகள் தெரிவிக்கப்படுவதற்காக பயன்படுத்திக்கொள்ளலாம். இதற்கேற்ப குறிச்சொற்களை (கீவேர்டு) தேர்வு செய்து கொள்ள வேண்டும். உதாரணத்திற்கு ஒருவருக்கு மென்பொருள் சார்ந்த செய்திகள் தேவை என்றால் மென்பொருள் (சாப்ட்வேர்) எனும் குறிச்சொற்களை தேர்வு செய்து கொள்ள வேண்டும். ஓபன் சோர்ஸ் ஆர்வலர்கள் லினக்ஸ் எனும் குறிச்சொல்லை பயன்படுத்தலாம். விளையாட்டு பிரியர்கள் கிரிக்கெட் அல்லது கால்பந்து என தேர்வு செய்து கொள்ளலாம். மாணவர்கள் நுழைவுத்தேர்வு எனும் குறிச்சொல்லை தேர்வு செய்து கொள்ளலாம். குறிச்சொற்கள் தனிநபர்கள் சார்ந்த்தாகவும் இருக்கலாம். அதாவது டெண்டுலகர் என்றோ பில் கேட்ஸ் என்றோ தேர்வு செய்து கொள்ளாலாம். குறிச்சொல்லை சமர்பித்த பின் , கூகிள் தேடியந்திரம் இந்த தலைப்பிலான செய்திகளை கவனித்துக்கொண்டே இருக்கும். எப்போது புதிய செய்தி அல்லது தகவல் வெளியானலும் உடனே உங்களுக்கு இமெயில் மூலம் தகவல் தெரிவித்துவிடும். இமெயில் பெட்டியை திறந்து பார்க்கும் போது , இந்த எச்சரிக்கை மெயில்கள் வாயிலாக புதிய செய்தியை தெரிந்து கொள்ளலாம். அவை பயனுள்ளது என தெரிந்தால் உடனே கிளிக் செய்து மூல செய்தியை விரிவாக தெரிந்து கொள்ளலாம். இல்லை சும்மா இருந்துவிடலாம்.

பயன்படுத்துவது எப்படி?

கூகிள் அலர் சேவை

திரட்டிகளின் அடுத்த வடிவம்.

minglewing
பின்ரெஸ்ட் போலவே இருக்கும் மற்றொரு தளம் ‘மிங்கில்விங்’.தோற்றத்தில் அச்சுஅசல் பின்ரெஸ்ட் போலவே இருந்தாலும் இந்த தளம் செயல்பாட்டில் கொஞ்சம் வேறுபடவே செய்கிறது.

முகப்பு பக்கத்தில் கட்டம் கட்டமாக‌ புகைப்படத்தோடு செய்திகளுக்கான இணைப்புகள் இடம் பெறுகின்றன.எல்லாமே பேஸ்புக்கில் பகிரப்பட்டவை.

பேஸ்புக்கில் பகிர்ந்தவற்றை மறுபடியும் இங்கே பகிர வேண்டும் என்று கேட்கலாம்.விஷயம் என்னவென்றால் சமுகவலைப்பின்னல் சேவையான பேஸ்புக் பிரதானமாக நண்பர்களுக்கான வலைப்பின்னல்.அதில் பகிர்பவை அதற்கான நட்பு வட்டத்திலேயே அடங்கிவிடும்.நல்ல விஷயங்களை ஏன் ஒரு சமூக வட்டத்திற்குள் சுருக்கி கொள்ள வேண்டும்.

அது தான்,நட்பு வட்டத்துக்கு வெளியே பகிர்ந்து கொள்வதற்கான வாய்ப்பை மிங்கில்விங் தருகிறது.பேஸ்புக் உறையாடல்களுக்கு சிறகு முளைக்க வைப்பதாக இந்த தளம் சொல்கிறது.அதாவது பேஸ்புக்கில் வெளியிடுபவற்றை உலகோடு பகிர்ந்து கொள்வதை இப்படி சிறகு முளைப்பதாக சொல்கிறது.தளத்தின் பெயரிலும் அந்த சிறகு ஒட்டிக்கொண்டிருக்கிறது.

பேஸ்புக் கணக்கை கொண்டே இந்த தளத்திலும் உறுப்பினராக பகிர்ந்து கொள்ளலாம்.செய்தி,கட்டுரை,வீடியோ என எதை வேண்டுமானலும் பகிரலாம்.

இந்த பகிர்வுகள் அவற்றுக்கு உரிய தலைப்பில் தனித்தனியே பட்டியலிடப்படுகின்றன.இசை,அரசியல்,பொழுதுபோக்கு,தொழில்நுட்பம் என அவரவர் விரும்பும் தலைப்பை தேர்வு செய்து அதில் உள்ள பகிர்வுகளை படிக்கலாம்.

உண்மையிலேயே சுவாரஸ்யமான பயனுள்ள இணைப்புகளுக்கு இவை அழைத்து செல்கின்றன.குறிப்பிட்ட ஒரு உறுப்பினரின் மற்ற பகிர்வுகளையும் பார்க்கலாம்.அவற்றுக்கு கருத்தும் தெரிவிக்கலாம்.

பின்ரெஸ்ட் தாக்கத்தை இந்த தளமும் மறுக்கவில்லை. சொல்லப்போனால் கொஞ்சம் ரெடிட்.கொஞ்சம் பின்ரெஸ்ட் இரண்டும் சேர்ந்த கலவை என்றே தன்னை வர்ணித்து கொள்கிறது.

மிகச்சரியான அறிமுகமும் கூட!

இணைய திரட்டியான ரெடிட் போலவே பயனுள்ள செய்திகளையும் இணைப்புகளையும் பகிர்ந்து கொள்ள உதவுகிறது.அவை அழகாக பின்ரெஸ்ட் போலவே தலைப்பின் கீழ் புகைப்படங்களோடு கட்டம் கட்டமாக அடுக்கப்படுகிறது.பார்வைக்கும் சரி தேர்வுக்கும் சரி இது மிகுந்த சுலபமாக இருப்பதை பயன்படுத்தி பார்த்தால் புரிந்து கொள்ளலாம்.

அந்த வகையில் திரட்டிகளின் அடுத்த வடிவம் என்று இதனை சொல்லலாம்.

இணைய முகவரி.http://minglewing.com/#

இண்டெர்நெட்டில் ஒலிம்பிக்சிற்கு தடை போட‌!

லண்டன் ஒலிம்பிக் கோலகலமாக துவங்கியுள்ள நிலையில் ஒலிம்பிக் ஜுரம் உலகம் முழுவதும் பரவியிருக்கிறது.இணையத்திலும் எங்கு திரும்பினாலும் ஒலிம்பிக் தான்.

ஒலிம்பிக் போட்டிகளை இணையத்தில் கண்டு களிப்பது எப்படி என வழிகாட்டும் குறிப்புகள்,ஒலிம்பிக்கை பின் தொடர உதவும் இணையதள‌ங்களின் பட்டியல் ஆகியவற்றுக்கும் குறைவில்லை.செய்தி தளங்களை பற்றி கேட்கவே வேண்டாம்,ஒலிம்பிக்கிற்கு என்று தனி பகுதியே அமைக்கப்பட்டுள்ளது.

தேடியந்திரமான கூகுல் வேறு தினம் ஒரு ஒலிம்பிக் லோகோ என கலக்கி கொண்டிருக்கிறது.

ஒலிம்பிக் வீரர்களின் டிவிட்டர் குறும்பதிவுகள் பற்றியும் பரப‌ரப்பாக பேசப்படுகிறது.

விளையாட்டு திருவிழா என்று வர்ணிக்கப்படும் ஒலிம்பிக் தொடர்பான எதிர்பார்ப்பும் பரபரப்பும் புரிந்து கொள்ளக்கூடியது தான்.

இப்படி இணையமே ஒலிம்பிக் மயமாகி இருக்கும் நிலையில் ஒலிம்பிக்கிற்கு எதிராக ஒரு இணைய சேவை அறிமுகமாகியிருக்கிறது தெரியுமா?

ஒலிம்பிக் செய்திகளை உங்கள் பார்வையில் இருந்து முற்றிலுமாக மறைத்து விடுவதற்காக உருவாக்கப்பட்டுள்ள சேவை அது.

எந்த இணையதளத்திற்கு சென்றாலும் ஒலிம்பிக் செய்திகள் கண்ணில் படுவதை விரும்பாத‌வர்கள் (அப்படி எத்தனை பேர் இருப்பார்கள்)பிரவுசரின் நீட்சியாக வரும் இந்த சேவையை டவுண்லோடு செய்து கொண்டால் அதன் பிற‌கு ஒலிம்பிக் தொடர்பான எல்லா செய்திகளும் அவர்கள் பார்வைக்கு முடக்கப்பட்டு விடும்.

ஆக ஒலிம்பிக் பற்றிய கவன‌ சிதறல் இல்லாமல் இணையத்தில் உலா வரலாம்.

ப்ரி ஆர்ட் ஆண்டு டெக்னாலஜி என்னும் தொழிநுட்ப இணையதளம் ஒல்விம்பிக்ஸ் என்னும் பெயரிலான இந்த பிரவுசர் நீட்சி சாதனத்தை உருவாக்கி உள்ளது.

ஒலிம்பிக்ஸ் வந்து விட்டது,எல்லா பெரிய நிகழ்வுகள் போல இப்போதும் இணையத்தில் நாம் விரும்பி செல்லும் இடங்களில் எல்லாம் ஒலிம்பிக்கின் ஆதிக்கம் தான்.என‌வே தடகளம் பற்றி எல்லாம் கவலைப்படாத இணையவாசிகள் வசதிக்காக இந்த சேவையை உருவாக்கி இருப்பதாக இந்த தளத்தில் குறிப்பிடப்பட்டுள்ள‌து.

குரோம்,பயர்பாக்ஸ்,சபாரி ஆகிய பிரவுசர்களில் இது செயல்படுகிறது.

விளையாட்டு பிரியர்களும்,ஒலிம்பிக் ரசிகர்களும் இதனை கொஞ்சம் ஓவர் என கருதலாம்.

ஆனால் விஷயம் என்னவென்றால் இண்டெர்நெட்டில் எல்லாவற்றிற்கும் வாய்ப்பு இருக்கிறது என்பதை உணர்த்தும் சேவை இது.

ஒலிம்பிக்கை பின் தொடர‌ விருப்பமில்லாதவர்கள் எல்லா இணையதளங்களிலும் ஒலிம்பிக் பற்றிய செய்திகளே இடம் பெறூம் போது வெறுப்படைய வாய்ப்பிருக்கிற‌து அல்லவா?

அவர்கள் தங்கள் அளவில் ஒலிம்பிக்கிற்கு தடை விதித்து கொள்ள இந்த சேவை வழி செய்கிறது.

விளையாட்டு உணர்வின் உச்சமாக கருதப்படும் ஒலிம்பிக் போட்டியை இப்படி விரோதமாக நினைப்பதை ஏற்று கொள்ள முடியாது தான்.ஆனால் குறிப்பிட்ட நிக்ழ்வுகளின் போது எல்லா தளங்களும் அந்த நிகழ்வு பற்றியே பேசுவதும் அலசி ஆராய்வதும் பலருக்கு அயர்ச்சியை தருவது நிச்சயம்.

இது போன்ற நேரங்களில் குறிப்பிட்ட அந்த நிகழ்வுகளை குறிச்சொல் பூட்டு போட்டு முடக்கி விடக்கூடிய பொதுவான ஒரு இணைய தடுப்பு சேவையை உருவாக்கினாலும் நன்றாக தான் இருக்கும்.

இணையதள முகவரி;http://fffff.at/olwimpics/