All posts by CyberSimman

இண்டெர்நெட் சமூக மாற்றத்திற்கு வித்திடக்கூடிய ஜனநாயக தன்மை கொண்ட தொழில்நுட்பம் என்று சொல்லப்படுவதில் என‌க்கு மிகுந்த நம்பிக்கை உண்டு என்பதால் இண்டெர்நெட்டை எப்படியெல்லாம் பயன்படுத்திகொள்ள முடிகிறது என சுட்டிக்கட்டுவதை எனது கடமையாக‌வே கருதுகிறேன்... மேலும்

எதிர்காலம் சொன்ன கம்ப்யூட்டர்

யாரையாவது பார்த்து நீ மாடு மேய்க்கத்தான் லாயிக்கு என்று சொல்வது வசைச் சொல்லாக தான் அமையும். பொறுப்பானவர்கள் தங்கள்  மிகுந்த அக்கறை கொண்டவர்களின் நிகழ்கால போக்கு குறித்த  வேதனை மற்றும் விரக்தியை வெளிப்படுத்தும் விதமாக இப்படி வசைப்பாடுவதாக புரிந்து கொள்ளலாம்.
.
பெரும்பாலும் தகப்பன் (அ) தகப்பன் ஸ்தானத்தில் உள்ளவர்கள், மகன் (அ) இளைய சகோதரர்களை பார்த்து சொல்லும் வசை இது.

இது வெறுப்பின் வெளிப்பாடாகவும் இருக்கலாம். சாபமாக கூட இருக்கலாம். ஆனால் இது கனிப்பின் கீழ் வருமா?

எதிர்காலத்தில் ஒருவர் மாடு மேய்க்கப் போவதாக கணித்துச் சொல்ல முடியுமா? கணித்துக் சொன்னாலும் ஏற்றுக் கொள்வார்களா? இல்லை மாடு மேய்க்கப் போவதாகச் சொன்னால் அதை இழிவாகத் தான் கருத வேண்டுமா?

ஒருவர் மாடு மேய்க்கப் போகிறார் என்பது சரியான கணிப்பாக ஏன் இருக்க கூடாது?
அதிகார வர்க்கத்தில் ஒரு சில பதவிகள் தண்டனையின் அடையாள மாக தகுதியிறக்கமாக கருதப்படுவது போல மாடு மேய்ப்பது, வேறு வேலைக்கு தகுதி இல்லாததாலேயே நிகழ்வாக நடைமுறை வாழ்க்கையில்  கருதப் படுகிறது.

மாடு மேய்ப்பதை இப்படி கருத வேறு சமூக காரணங்களும் இருக்கின்றன. ஆனால் தொழில் வாய்ப்புகள் பற்றி யோசிக்கும் போது அவற்றில் பெரும்பாலனோரால் விருப்பப்படும் தொழில்களை யாருமே விரும்பி ஏற்காத இந்த தொழில் உணர்த்த உதவுகிறது.

மாடு மேய்ப்பதை விடுங்கள்! யாராவது விரும்பி சிறை அதிகாரியானது உண்டா? நான் கார் மெக்கானிக்காக வருவேன் என நினைத்து திட்டமிட்டு செயல் பட்டவர்கள் எத்தனை பேர்? விஞ்ஞானியாக வேண்டும் என்று கனவு கண்டு குமாஸ்தாவாக பணியாற்ற நேர்ந்தது விதிவசமா? (அ) விதியின் யதார்த்தமா?

பள்ளி பருவத்திலும், கல்லூரி நாட்களிலும், எல்லோருமே, டாக்டராக வேண்டும், இன்ஜினியராக வேண்டும், ஐஏஎஸ் அதிகாரியாக வேண்டும் என்பது போல தான் விருப்பம்  கொள்கின்றார்களேத் தவிர, மளிகை கடை நடத்த வேண்டும் என்றோ, கூட்டுறவு சங்க தலைவராக வேண்டும் என்றோ நினைத்த துண்டா?

இப்படி விரும்பப்படும் வேலை களும், தொழில்களும் காலத்திற்கு ஏற்ப மாறுபடும். ஒரு சிலரின் தேர்வு, வலுவான அடிப்படையைச் சார்ந்ததாக இருக்கும்.பல நேரங்களில், ஒருவித மந்தை உணர்வின் அடிப்படையில், முழு ஈடுபாடு இல்லாமலேயே, டாக்டராக விரும்புகிறேன், விண்வெளி வீரராக விரும்புகிறேன் என சொல்வதுண்டு.

வாழ்க்கையில் எண்ணற்ற வேலை வாய்ப்புகள் இருக்கும் போது, இப்படி ஒரு சில வேலையை மட்டுமே விரும்பி நாடுவது சரியா? விரும்பிய வண்ணம் வேலை என்பது சிலருக்கு மட்டுமே வாய்க்கும். அதிர்ஷ்டம் பலரை பொறுத்தவரை நினைப்பது  ஒன்றாகவும், வாய்ப்பது வேறொன்றாகவுமே அமைந்து விடுகிறது.

ஆக, ஒருவர் வரும் காலத்தில் என்ன வேலை பார்க்கப் போகிறார் என்பதை கணித்துச் சொல்ல முடியுமா?

கிட்டத்தட்ட 20 ஆண்டுகளுக்கு முன் இங்கிலாந்தில், இத்தகைய முயற்சி ஒன்று மேற்கொள்ளப்பட்டது. அந்நாட்டின் எடின்பர்க் பல்கலைக் கழகம் இதற்காக  என்றே “ஜிக்கேல்’ என்னும் பெயரில் ஒரு சாப்ட்வேரை உருவாக்கியது.

மாணவர்கள் எதிர்காலத்தில்  என்னவாக வரக்கூடும் என்பதை, கணித்துச் சொன்ன இந்த சாப்ட்வேர், அந்த காலக்கட்டத்தில் ஏக பரபரப்பை உண்டாக்கியது.

இந்த சாப்ட்வேர் தேர்வு செய்து சொன்ன வேலைகள் பலரது கனவுகளை தகர்த்தெறிந்தது.
1980 களில், இந்த  சாப்ட்வேர் அறிமுகமான போது, அதனிடம் விவரங்களை சமர்ப்பிக்க, மாணவர்கள் மத்தியில் அப்படியொரு ஆர்வம் இருந்தது. எதிர்கால  கனவுகளில்  மிதந்தபடி, அது நிறைவேறுமா? என்பதை தெரிந்து கொள்ளும் ஆர்வத்தோடு, மாணவர்கள் இந்த சாப்டவேர் கேட்ட கேள்விகளுக்கு பதில் அளித்தனர்.

விளையாட்டில் விருப்பம் உண்டா? வெளிப்புறத்தில்  பணியாற்ற விரும்புவீர்களா? ஆம் எனில், அப்போது  இதமான சூழல் தேவை  (அ) எந்த சூழலும் சம்மதமா? விலங்குகளை பிடிக்குமா? வியர்வை சிந்த உழைக்கத் தயாரா?  குழந்தைகளை கொஞ்சுவீர்களா? என்பது போன்ற பல கேள்விகள் கேட்கப்பட்டு அவற்றுக்கு மாணவர்கள் அளித்த பதில்களின் அடிப்படையில், அவர்கள் எதிர்காலத்தில் என்ன வேலை பார்ப்பார்கள் என்பதை இந்த சாப்ட்வேர் கணித்துச் சொல்லியது.

சிலரை சாப்ட்வேர் புன்னகைக்க வைத்தது. பலரை வெறுப்பேற்றியது. ஒரு சிலரை திகைப்பில் ஆழ்த்தியது. டாக்டர், இன்ஜினியர் என்று சொன்னது மட்டும் அல்லாமல், சிறை அதிகாரி, பன்றி வளப்பவர், கார் மெக்கானிக் போன்ற வேலைகளையும் சாப்ட்வேர்  சொன்னது. ஜிம் கிளாஸ் என்றும் உளவியல் பேராசிரியர் தான்  இந்த சாப்ட்வேரை உருவாக்கியவர் எடின்பர்க் பல்கலையில் பணியாற்றியவர் இவர்.

சாப்ட்வேரின் தீர்ப்பு எல்லோரையும் திருப்திப்படுத்தவில்லை என்பதை ஒப்புக் கொள்ளும் கிளாஸ், மனதில் நினைத்துக்கூடப் பார்க்காத வேலைகளை சாப்ட்வேர் சொல்வதை சரியான விதத்தில் புரிந்து கொள்ள வேண்டும் என்கிறார்.

அந்த கட்டத்தில் மாணவர்கள் முன், உள்ள அவர்கள் பரிசீலிக்கத்தக்க மாற்று வாய்ப்புகளை முன் வைத்து, அவர்களுக்கு பொறுத்தமான  வேலைகளுக்கு எல்லையை விரிவு படுத்த உதவும் செயலாக அதனை கருத வேண்டும் என்கிறார் அவர்.

இத்தனை ஆண்டுகளுக்குப் பிறகு சாப்ட்வேர் மற்றும் அதன் பாதிப்பு பற்றி  ஒரு டாக்குமென்ட் தயாரித்து வெளியிடப் பட்டுள்ளது. ஆஸ்திரேலியாவில் இன்னும் இந்த சாப்ட்வேர் புழக்கத்தில் இருக்கிறது. “ஒஐஞ்ஞ்இச்டூ’ என்று தளத்தின் மூலமாக அந்த சாப்ட்வேர் பல  இளைஞர்கள்  தங்கள் எதிர்கால பாதையை தேர்வு செய்ய உதவ வருகிறது.

எதிர்காலம் பற்றிய கணிப்பு குறித்த  சுவாரசியமான பல கேள்விகளை குறித்து சாப்ட்வேர் எழுப்புகிறது. இங்கே இன்னொரு சுவாரசியமான விஷயத்தையும் கவனிக்க வேண்டும்.
கம்ப்யூட்டர் என்பது வெகுஜன  புத்தகத்திற்கு வராத காலத்தில்  அந்த சாப்ட்வேர் அறிமுகம் செய்யப்பட்டது.

அப்போது அதனிடம் கேள்விகளை சமர்ப்பித்தவர்கள் பதிலுக்காக  வாரக் கணக்கில் காத்திருந்தனர். அதன் பிறகு தான் டாட் மேட்ரிசில் பிரிண்ட் அவுட் எடுக்கப்பட்ட முடிவுகள் வந்து சேர்ந்தன. இப்போதோ ஆன்லைனில் சமர்ப்பித்தவுடன் கிளிக் செய்தால் முடிவை உடனேயே பார்த்து விடலாம்.

கம்ப்யூட்டர் அப்படி வளர்ந்து விட்டது. இதனை 1980களில் எத்னை பேர் சரியாக கனித்திருப்பார்கள்.

ஓவியங்களுக்கான ‘இபே’

பங்குச் சந்தையில் ஏற்பட்ட சரிவின் விளைவாக, முதலீடு நோக்கில் தங்கத்தின் மீதான மவுஸ் அதிகரித்திருப்பதாக சொல்கிறார்கள். தங்கம் மட்டும் அல்ல ஓவியம் உள்ளிட்ட கலைப்பொருட்களுக்கும் முதலீடு நோக்கி மதிப்பு ஏற்பட் டிருப்பதாக சொல்லப்படுகிறது.

.

இன்றைய  தேதியில் இந்திய ஓவியர்களின் படைப்புகளை வாங்கிப்போடுவது, சரியான முதலீடாக இருக்கும் என்றும் ஆலோசனை சொல்கின்றனர். வரும் ஆண்டுகளில் ஓவியங்களின் மதிப்பு பல மடங்கு உயரும் என்ற ஆருடமும் சொல்லப்படுகிறது.

இந்த பின்னணியில் ஓவியங்களை சுலபமாக வாங்கி விற்பதற்கான, இணைய தளத்தை அறிமுகம் செய்து கொள்வது மிகவும் பொறுத்தமாக இருக்கும். ‘இந்தியன் ஆர்ட் கலக்டர்ஸ்’ (டிணஞீடிச்ண ச்ணூt ஞிணிடூடூஞுஞிtணிணூண்.ஞிணிட்)என்றும் முகவரியிலான அந்த தளத்தை இந்திய ஓவியங்களுக்கான ‘இபே’ என்றும் வர்ணிக்கலாம்.

சர்வதேச  அளவில் பார்க்கும் போது, இணைய தளங்களை ஓவியர்கள் மற்றும் ஓவிய ஆர்வலர்களுக்கு இடையிலான பாலமாக பயன் படுத்துவது பிரபலமாகவே  இருக்கிறது. அந்த வகையில் இந்தியாவில் கொஞ்சம் தாமதமாகவே இந்த முயற்சி மேற்கொள்ளப் பட்டிருக்கிறது என்று சொல்லலாம்.  இதனை மீறி இந்தியன் ஆர்ட் கலக்டர்ஸ், இணையதளம் சிறப்பானதாகவே இருக்கிறது.

ஓவியங்களை விற்பனை செய்யும் கலைக்கூடங்கள் சார்பில் இன்டெர்நெட் மூலமும் ஓவியங்கள் விற்கப்பட்டு வருகின்றன என்றாலும், இந்த தனிப்பட்ட தளங்களை எல்லாம்விட, இந்தியன் ஆர்ட் கலெக்டர்ஸ் சிறந்ததாக இருக்கிறது. காரணம், ஓவியர்கள் மற்றும் ஓவிய ஆர்வலர்கள் இருதரப்பினருக்குமே இந்த தளம் ஏற்படுத்தி தரும் வாய்ப்புகள் தான்!

அடிப்படையில் பார்த்தால் இந்த தளம் ஓவிய ஆர்வலர்கள் தங்கள் வசம் உள்ள ஓவியங்களை விற்பதற்கானதுதான்! ஓவியங்களுக்கு நாளுக்கு நாள் மதிப்பு கூடிக்கொண்டிருந்தாலும் தற்போது ஓவிய ஆர்வலர்கள் தங்கள் வசம் உள்ள ஓவியங்களை விற்கும்போது, அவர்களுக்கு அதிக லாபம் கிடைப்பதில்லை. (முதலீட்டு நோக்கில் ஓவியங்களை அணுகும்போது லாபம் பற்றி பேசுவதைத் தவிர வேறு வழியில்லை).

காரணம், கலைக்கூடங்கள் 30 சதவீதம் வரை கமிஷன் எடுத்துக்கொள்வதால் லாபத்தின் பெரும் பகுதி கமிஷனாகவே போய்விடும். ஆனால் இந்த தளத்தில் கமிஷன் இல்லாமல் விற்பனை செய்யலாம். அந்த குறிப்பிட்ட ஓவியம் தளத்தில் விற்பனைக்கு என பட்டியலிடப்பட்டிருக்கும். யார் அதிக தொகைக்கு ஏலம் கேட்கின்றனரோ, அவருக்கு ஓவியம் அனுப்பி வைக்கப்படும். வாங்குபவர், ஓவியத்திற்கான விலை விற்பவரிடமோ, ஓவியரிடமோ தர வேண்டியதில்லை. இந்த தளத்திற்கு அனுப்பி வைத்தால் போதும். அந்த விவரம் மட்டும் சம்பந்தப் பட்டவருக்கு உடனே தெரிவிக்கப்படும்.

வாங்கியவர் தனக்கு ஓவியம் கிடைத்து விட்டது. அது நல்ல நிலையில் இருக்கிறது என்று தெரிவித்ததுமே ஓவியருக்கு பணம் அனுப்பி வைக்கப்படும். குறைந்த கமிஷனாக 15 சதவீதம் பிடித்துக்கொள்ளப்படும்.

ஓவிய ஆர்வலர்கள் விற்க முற்படும்போது அவர்களுக்கு  கூடுதலான சுவாரஸ்யமான வசதிகள் உண்டு. அந்த ஓவியம் பற்றி மற்ற உறுப்பினர்கள் தங்களது கருத்துக்களை சமர்ப்பிக்கலாம். இதன் மூலம் மற்ற ஆர்வலர்களுடன் தொடர்பு கொண்டு ஓவியம் சார்ந்த நட்பையும் வளர்த்துக்கொள்ளலாம்.

நாடு முழுவதும் உள்ள ஓவியர்களின் படைப்புகள் இந்த தளத்தில் இடம் பெற்றுள்ளன. உலகின் எந்த மூலையில்  உள்ள ஓவிய ரசிகரும் இந்த தளத்தில் உள்ள ஓவியங்களை வாங்கிக்கொள்ளலாம். அக இந்திய ஓவியர்களுக்கு உலகளாவிய விற்பனை வாய்ப்பும் இதன் மூலம் சாத்தியமாகிறது.

இந்த தளத்தின் மூலம் ஓவியங்களை விற்பதும் வாங்குவதும் சுலபமானது மட்டும் அல்ல, சுவாரசியமானதும் கூட! ஓவிய ஆர்வலர்கள் ஆர்வத்துடன் பொழுதை கழிக்க போதுமான அம்சங்களை இந்த தளம் கொண்டிருக்கிறது.

இடம் பெற்றுள்ள ஓவியர்கள் அகர வரிசைப்படி தொடர்ந்து அவர்களின் படைப்புகளை பார்வையிடலாம். இவர்களில் ஒரு ஓவியர்களை மாதந்தோறும் தேர்வு செய்து முகப்பு பக்கத்தில் அவர்களின் ஓவியங்கள் அறிமுகம் செய்யப்படுகின்றன.

இதைத்தவிர ஓவிய கண்காட்சி பற்றிய விவரங்களும் ஓவியம் தொடர்பான  இதர நிகழ்வுகள் பற்றிய தகவல்களும் கூட இடம் பெற்றுள்ளன. சுருக்கமாகச் சொன்னால் ஓவிய ஆர்வலர்களுக்கு தேவையான தகவல்கள் அனைத்தும் இந்த தளத்தில் கிடைத்துவிடும்.

இந்த தளத்தின் மூலம் மாதந்தோறும் 40க்கும் மேற்பட்ட ஓவியங்கள் விற்பனை ஆகிறது. குறிப்பாக இளம் ஓவியர்களுக்கு ஷாப்பிங்காக அமைந்துள்ளது.

பொறாமைப்படும் கம்ப்யூட்டர்

கம்ப்யூட்டர்கள் பொறமைப்பட தொடங்கியிருக்கின்றன என்பது உங்களுக்கு தெரியுமா?
இந்த செய்தி உங்களுக்கு தெரி யாமல் இருந்தாலும் பரவாயில்லை. காரணம் கம்ப்யூட்டர்கள் வெகு அண்மையில்தான் பொறாமைப்பட தொடங்கி இருக்கின்றன.
பொறாமைப்படும் கம்ப்யூட்டர் பற்றி முதல் செய்தி சுவீடனிலிருந்து இந்த ஆண்டு தொடக்கத்தில் வெளியாகி உள்ளது.
.
நிச்சயம் இது வியப்பை அளிக்கும் செய்திதான். கம்ப்யூட்டர்களுக்கு சுட்டுப் போட்டாலும் சுயமாக சிந்திக்கும் திறன் வராது என்று கருதப்படுகிறது. அதனையும் மீறி கம்ப்யூட்டர்களுக்கு சொற்பமாக வேனும் சிந்திக்கும் ஆற்றலை ஏற்படுத்தி தருவதற்காக செயற்கை அறிவுத் துறை நிபுணர்கள் மிகுந்த நம்பிக்கையோடு தீவிர ஆய்வில் ஈடுபட்டு வருகின்றனர். 

எந்தவிதத்தில் எல்லாம் இதனை சாத்தியமாக்கலாம் என்று அவர்கள் அறிவின் எல்லைக்கு சென்று விரிவான ஆய்வுகளில் ஈடுபட்டிருக் கின்றனர். இந்த ஆய்வில் இன்னமும் பிள்ளை பருவத்திலேயே இருக்கும் நிலையில், கம்ப்யூட்டர்கள் பொறாமைப்படுவது பற்றி செய்தி அடிபட தொடங் கியிருக்கிறது. அதாவது கம்ப்யூட் டர்கள் சிந்திக் கின்றனவோ இல்லையோ பொறாமைப்பட தொடங்கி விட்டன. லேப்டாப் கம்ப்யூட்டர் ஒன்று அதன் உரிமையாளர் மீது கோபம் கொண்டு தாக்குதல் நடத்தி இருக்கிறது.

கம்ப்யூட்டரால் அவருக்கு ஏற்பட்ட காயம் புகைப்படங்களில் பளிச்சென தெரிகிறது. இதே போல மேலும் பல சம்பவங்கள் நடைபெற்றிருக்கின்றன. இவையெல்லாம் கம்ப்யூட்டர்கள் பொறாமை கொண்டிருப்பதை உணர்த்துகின்றன. இந்த எல்லா சம்பவங்களுக்கும் பொதுவான அம்சம் ஒன்று இருக்கிறது. அது நோக்கியா வின் புதிய செல்போன் ஆகும்.

பொறாமைப்படும் கம்ப்யூட்டர்கள் பற்றி கேள்விப்பட்டவுடன் ஆச்சரிய மடைந்தவர்கள் கூட இப்போது இதன் பின்னே உள்ள சூட்சமத்தை புரிந்து கொண்டிருக்கலாம். அப்படி புரிந்து கொள்ள முடியாதவர்களுக்காக அந்த மர்மத்தை நேரடியாகவே விளக்கி விடலாம்.
அதிநவீன செல்போன் என்று நோக்கியாவால் வர்ணிக்கப்படும் என்.95 ரக போன்களை அறிமுகம் செய்ய அந்நிறுவனம் பின்பற்றிய புதுமையான விளம்பர யுக்திதான் இது.
செல்போன் தயாரிப்பில் நோக்கியா நம்பர்ஒன் நிறுவனமாக இருக்கிறது. ஆனாலும் கூட அதிநவீன போன்கள் விஷயத்தில் நோக்கியா கொஞ்சம் பின்தங்கியே இருக்கிறது. அந்த பெருமையை ஆப்பிள் நிறுவனம் தட்டிச் சென்று விட்டது. அண்மையில் ஆப்பிள் நிறுவனம்           ஐ போனை அறிமுகம் செய்தபோது, அதற்கு கிடைத்த வரவேற்பு அபரிமிதமாக இருந்தது.

இந்நிலையில், நோக்கியா ஐ போன் பரபரப்புக்கு ஈடுகொடுக்கும் வகையில் தன்னுடைய புதிய போனை மிகவும் வித்தியாசமான முறையில் அறிமுகம் செய்து கவனத்தை ஈர்த்திருக்கிறது. இதற்கான இந்நிறுவனம் மிகவும் புதுமையான விளம்பர யுக்தியை வடிவமைத்திருந்தது. கம்ப்யூட்டர்கள் பொறாமைக் கொண்டு அதன் உரிமையாளர்களை தாக்குவதாகவும், இது போன்ற சம்பவங்கள் அதிகரித்து வருவதாகவும் இந்த சம்பவங்கள் அனைத்துக்கும் நோக்கியாவின் என்.95 போனே காரணமாக இருப்பதற்காகவும் அந்த விளம்பரம் தெரிவிக்கிறது.

நோக்கியாவின் போன் ஏன் இதற்கு காரணமாக அமைய வேண்டும். இப்படியொரு கேள்வி எழுந்தால், லேப்டாப் மற்றும் இதர கம்ப்யூட்டர் களால் பொறுத்துக் கொள்ள முடியாத அளவுக்கு நோக்கியாவின் புதிய போன், கம்ப்யூட்டருக்கு உரித்தான அனைத்து அம்சங்களையும் உள்ளடக்கியதாக இருக்கிறது என்பதே காரணம் என்று நோக்கியா குறிப்பால் உணர்த்த விரும்புகிறது.

இந்த போன் ஸ்மார்ட் போன் ரகத்தில் புதிதாக வந்து சேர்ந்திருக்கிறது. ஆடியோ வசதி, வீடியோ வசதி, கேமரா போன் வசதி, ஜிபிஎஸ் வசதி என்று அனைத்து அம்சங்களையும் உள்ளடக் கியதாக கம்ப்யூட்டரை தேவையில் லாமல் செய்து விடக் கூடிய அந்த போன் உருவாக்கப் பட்டிருப்பதாக நோக்கியா தெரிவிக்கிறது. அதனால்தான் லேப்டாப் கம்ப்யூட்டர் களுக்கு இந்த போனை பார்த்தால் பொறாமை ஏற்பட்டு விடுகிறதாம்.

அந்த பொறாமையின் காரண மாகவே அவை தங்கள் உரிமை யாளர்களை தாக்குகின்றனவாம். இப்படியொரு விளம்பர யுக்தியை வகுத்து அது பற்றி முழு விவரம் அளிக்க குளோபல் வார்னிங் டாட் காம் எனும் இணையதளத்தையும் நோக்கியா அமைத்திருக்கிறது.

அந்த இணையதளத்தில் பொறாமைப்படும் போன்கள் அனைத்தும் தாக்குதல் பற்றி பார்க்க முடியும். அப்படியே நோக்கியாவின் புதிய போன் பற்றியும் சுவாரசியமான விதத்தில் தெரிந்து கொள்ள முடியும்.

பார்கோடு விக்கிபீடியா

நுகர்வோர் என்ற முறையில் நமக்கு எவ்வளவு பெரிய பொறுப்பு இருக்கிறது தெரியுமா? நாம் சரியான விவரம் தெரியாமல் தவறான பொருட்களை வாங்கி விடலாகாது என்று சொல்லப்படுவது உங்களுக்கு தெரியுமா?
.
நுகர்வோரான உங்கள் கடமையை சரிவர செய்ய,  வாங்கப்படும் பொருள் பற்றியும், அதனை தயாரித்த நிறுவனம் பற்றியும் நீங்கள் தெரிந்து கொண்டு செயல்பட வேண்டும் என்பது  தெரியுமா? 

 எல்லாம் தெரியும், விளம்பரங்களை பார்த்து விஷயங்களை தெரிந்து  கொண்ட பின்னர் தான் கடைக்கே போகிறோம் என்று நீங்கள் அலுப்புடன் அலட்சியமாக சொல்லலாம். ஆனால், இங்கே குறிப்பிடுவது விளம்பரம் மூலம்  தெரிவிக்கப்படும் தகவல்களை அல்ல; அவற்றின் பின்னே உள்ள தகவல்களை அதாவது நிறுவனங்கள் மறைக்க விரும்பும் தகவல்கள் மற்றும் வெளியிட விரும்பாத விவரங்கள் இவற்றை எல்லாம் ஏன் தெரிந்து கொள்ள வேண்டும் என்று நீங்கள் கேட்கலாம்.

அது உங்களின் தார்மீக கடமை என்று சொல்கின்றேன்.  அப்போது தான் நீங்கள் தார்மீக  பொறுப்புடன் நடந்து கொள்ள முடியும் என்றும் சொல்கின்றனர்.

சொல்வது, வர்த்தக நிறுவனங்கள் லாபத்தை மட்டும் குறிக்கோளாக கொண்டு செயல்படாமல்  சமூக பொறுப்புடன்  நடந்து கொள்ள வேண்டும் என்று நினைப்பவர்கள் இதனை உறுதி செய்ய நுகர்வோர் செய்ய வேண்டியது எல்லாம், தகவல்களை  தெரிந்து கொண்டு அதனடிப்படையில்  சரியான முடிவுகளை  மேற்கொள்வது தான்.

 கெட்ட பெயர் சம்பாதித்த நிறுவனங்களை நுகர்வோர் இயல்பாகவே  தவிர்த்து விடுவ துண்டு. ஆனால்  நுகர்வோர் அறியாமலேயே தவறான  கொள்கைகளை/ நடைமுறையை கடைபிடிக்கும் நிறுவனங்கள் இருக்கின்றனவே. ஒரு நிறுவனம் தெரிந்தே குழந்தை தொழிலாளர்களை  வேலைக்கு நியமித்திருக்கலாம். ஒரு நிறுவனம், சுற்றுச் சூழல் 
மாசுபடுவது பற்றி கவலைப்படாமல் செயல்பட்டு கொண்டிருக்கலாம். ஒரு நிறுவனம் உள்ளூர் மக்களின்  நீர் ஆதாரத்தை சுரண்டி  லாபம் பார்த்து கொண்டிருக்கலாம்.  இப்படி எத்தனையோ விஷயங்களை சொல்லலாம்.

வர்த்தக செயல்பாடுகள் பற்றி பெருமைபட்டுக் கொள்ளும் நிறுவனங்கள், இத்தகைய  சர்ச்சைக்குரிய சங்கதிகளை மூடி மறைத்து விடவே  முயற்சி செய்கின்றன.

 இப்போது உங்கள் முன் உள்ள கேள்வி, ஒரு நிறுவனம் தவறாக  செயல்படுகிறது என்று தெரிந்து கொண்டால்  அதன் தயாரிப்பை, வாங்காமல் புறக்கணிப்பது தானே சரி.  ஆம் என்பது உங்கள் பதிலாக இருந்தால்,  இந்த தகவல்களை  எல்லாம் எப்படி தெரிந்து கொள்வது என்ற கவலை உங்கள் மனதில் உண்டாகலாம்.

அந்த  கவலையே  வேண்டாம். நிறுவனங்களின்  பொருட்கள் பற்றிய விவரங்களை அளிப் பதற்காக  என்றே ஒரு இணைய தளம் உருவாக்கப்பட்டு வருகிறது.

 இன்றைய  வர்த்தக உலகில் எல்லா பொருட்களுமே விலையை குறிக்க பார்கோடை தாங்கி நிற்கின்றன அல்லவா? அந்த பார்கோடை வைத்தே  அப்பொருள் தொடர்பான முழு விவரங்களையும் அளிப்பதை நோக்கமாக  கொண்டு இந்த தளம் உருவாக்கப்பட்டு வருகிறது.  அந்த வகையில்  இதனை பார்கோடு விக்கிபீடியா என்று சொல்லலாம்.

ஒரு பற்பசையையோ, சோப்பு கட்டியையோ பால் பாக் கெட்டையோ நீங்கள்  வாங்க போகிறீர்கள் என்று வைத்துக் கொள்வோம். உடனே அதில் உள்ள பார்கோடை குறித்து வைத்துக் கொண்டு இந்த தளத்தில் அதனை டைப் செய்து பார்த்தீர்கள் என்றால் அந்த தயாரிப்பு தொடர்பான விவரங்கள்  திரையில் வந்து நிற்கும்.

விவரங்கள் என்றதும் வெறும்  தகவல்கள் மட்டும் அல்ல. நிறுவனத்தின் செயல்பாடுகளை ஒரே பார்வையில் அலசி ஆராய்ந்து எடை போட்டு விட உதவும் வகையிலான செய்திகள், விமர்சனங்கள், சர்ச்சைகள் என சகல விதமான விவரங்களும் தொகுக்கப் பட்டிருக்கும்.

உதாரணத்திற்கு நிறுவனத்தின் தயாரிப்பு முறை மற்றும் தொழிற்சாலையில்  ஊழியர்கள் நடத்தப்படும் விதம் குறித்து  ஏதாவது செய்திகள் வெளி வந்திருந்தால் அவை கட்டாயம் இடம் பெற்றிருக்கும் நிறுவனம் அரசு சலுகையை தவறாக பயன்படுத்தியது தொடர்பான செய்திகள் போன்றவையும் இடம் பெற்றிருக்கும்.

அதே போல அந்த   தயாரிப்பு பற்றி சக நுகர்வோரின் விமர்சன கருத்துக்களும் இடம் பெற்றிருக்கும். நிறுவனம் ஏதாவது சர்ச்சையில் சிக்கியிருந்தால் அந்த விவரமும் குறிப்பிடப்பட்டிருக்கும். இப்படியாக  ஒவ்வொரு பொருள் பற்றிய முழு விவரங்களும் தொகுத்தளிக்கப் பட்டிருக்கும். பார்கோடை  டைப் செய்வதன் மூலம் எந்த பொருள் பற்றியும் இதன் வழியே தெரிந்து கொள்ளலாம்.

இவ்வாறாக ஒரு நிறுவனம் தவறாக எதையும் செய்யவில்லை என்பதை உறுதி செய்து கொண்டு  அப்பொருளை நிம்மதியுடன் வாங்கலாம். இல்லை என்றால் இது போன்ற செயல்பாடுகளுடன் உடன்பட மாட்டேன் என கம்பீரமாக மறுத்து நிராகரிக்கலாம்.

நுகர்வோருக்கான இந்த தளம் நுகர்வோர் பங்களிப்பு இல்லாமல்  சிறப்பாக உருவாக வாய்ப்பில்லை. எனவே  நுகர்வோர் உதவியுடனேயே இதில் விவரங்கள் இடம் பெற உள்ளது.

  எனவே தான்  விக்கி பீடியா பாணியில் இந்த தளம் அமைக்கப்பட்டு வருகிறது.  இதில் நுகர்வோர் வர்த்தக நிறுவனங்கள் தொடர்பான   தங்கள் மதிப்பீடுகள், கருத்துக்கள் மற்றும் கண்ணில் படும் செய்திகளை  சமர்பிக்கலாம். இப்படியாக  நுகர்வோர் சமர்பிக்கும் தகவல்கள் தொகுக்கப்பட்டு பொருட் களுக்கான  களஞ்சியமாக  இந்த தளம் உருவாக உள்ளது. 

மைஸ்பேஸ் இருக்க பயமேன்

வலைப்பின்னல் தளங்களின் விபரீத விளைவுகள் பற்றி  என்னன்னவோ சொல்கிறார்கள். இந்த தளங்கள் எல்லாம் ஆபத்தின் மறுவடிவம் என்பது போல, இவற்றால் ஏற்படும் தீமைகளும், பாதிப்புகளும் பெரிதாக பேசப்படுகிறது. இவற்றுக்கு நடுவே, வலைப்பின்னல் தளங்களின் ஆதார பலத்தையும் மறந்துவிடக்கூடாது. இந்த பக்க விளைவுகள் எல்லாம்  அலட்சியப்படுத்தக் கூடிய அங்கொன்றும், இங்கொன்றுமான நிகழ்வே  என்பதையும் நினைவில் கொள்ள வேண்டும்.

.
இந்த கருத்தை உறுதிப்படுத்திக் கொள்ள விவாதத்தில் ஈடுபடாமல், வலைப் பின்னல் தளங்களினால்  உண்டாகக் கூடிய நல்ல பயன்களுக்கான அழகான உதாரணம் ஒன்றை பார்ப்போம்.  

அது, மைஸ்பேஸ் திறந்து விட்டிருக்கும் கூடுதல் கதவுகள் பற்றிய கதையாக விரிகிறது. இளைஞர்களின் இணைய கூடாரம் என்று  வர்ணிக்கப்படும் “மைஸ்பேஸ்’ வலைப்பின்னல் தளங்களின்  பிரதிநிதியாக அறியப்படுகிறது. இந்த தளத்தின் மூலம் அதன் உறுப்பினர்கள் இமெயிலில் தொடங்கி, செய்திகள், கருத்துக்கள் என சகலத்தையும் பரிமாறிக் கொள்கின்றனர்.
மைஸ்பேஸ் மூலம் எளிதாக  நண்பர்களை தேடிக்கொள்ளலாம். தவிர, மைஸ்பேஸ் வழியே வீடியோ கோப்புகளையும் பகிர்ந்து கொள்ளலாம். இந்த இரண்டையும் இணைத்தால், உங்களுக்கான பிரத்யேக ரசிகர்கள்  கிடைத்து விட மாட்டார்கள்.  அதாவது நீங்கள் துடிப்பும், படைப்பாற்றல் மிக்க கலைஞராகவும் இருந்து, உங்கள் படைப்பை, ரசிக்கக் கூடியவர்களை (நீங்களே) தேடிக் கொள்ளும் ஆர்வமும் இருந்தது என்றால்!

அமெரிக்காவைச் சேர்ந்த மார்ஷல் ஹெர்கோவிம்ப்  மற்றும் எட்வர்டு விக் ஆகியோர் இதைதான் செய்திருக்கின்றனர். இருவரும் சேர்ந்து இயக்கியுள்ள  தொலைக்காட்சி தொடரை “மைஸ்பேஸ்’ தளத்தில் வெளியிட்டிருக்கின்றனர்.  மைஸ்பேஸ் தளத்தில் வீடியோ கோப்புகளை  பதிவேற்ற முடியும் என்னும் போது, தொலைக்காட்சி தொடரின் நிகழ்ச்சிகளையும் ஒவ்வொன்றாக இந்த தளத்தின் மூலமே ஒளிபரப்பலாம் தானே!
ஆக, இந்த தொடரை  பார்க்க எந்த சேனலின் தயவும், தேவை இல்லை. மைஸ்பேஸ் தளத்தில் இதற்கென துவக்கப்பட்டுள்ள  பக்கத்திற்கு போனால் பார்த்து ரசிக்கலாம். மைஸ்பேஸ் இலக்கணப்படி உறுப்பினர்கள் இதை பார்த்து ரசித்த கையோடு, மற்ற உறுப்பினர்களோடு   நிகழ்ச்சி பற்றிய கருத்துகளை பகிர்ந்து கொள்ளலாம். இப்படி பகிர்ந்து கொள்வதன்  மூலம்  புதிய நண்பர்களையும் தேடிக் கொள்ளலாம்.  தொடர்பு சங்கிலி பெரிதாக, பெரிதாக  நண்பர்கள்  எண்ணிக்கையும் அதிகரிக்கும்.

ஒட்டுமொத்தமாக பார்க்கும் போது, நிகழ்ச்சிக்கான புதிய ரசிகர்கள்  கிடைக்கப் பெற்று, எண்ணிக்கையும் கூடிக் கொண்டே போகும். இந்த நம்பிக்கையில்தான் ஹெர்கோவிம்ப்  மற்றும் விக் ஆகிய இருவரும் எந்த சேனலையும் சார்ந்திருக்காமல் நேரிடையாக மைஸ்பேஸ் தளத்தில் தங்கள் படைப்பை இடம் பெற வைத்திருக்கின்றனர்.

உண்மையில் தொலைக்காட்சி சேனல்  ஒன்றுடன் ஏற்பட்ட மோதலின் விளைவாகவே இவர்கள் மைஸ்பேசிடம் வந்திருக்கின்றனர். கால் வாழ்க்கை என்னும் பெயரில் ஏபிசி தொலைக்காட்சிக்காக இவர்கள்  நிகழ்ச்சியின் சில பகுதியை தயாரித்துக் கொடுத்தனர். ஆனால் தொலைக்காட்சி நிர்வாகம் கதைக் கருவில் கைவைத்து, படைப்பாளி என்ற முறையில் ஏற்றுக்கொள்ள முடியாத நிபந்தனைகளை  ஆலோசனைகள் என்னும் பெயரில் முன்வைத்ததால் இருவரும் வெறுப்புற்று வெளியே வந்து விட்டனர்.

அதன் பிறகு இந்த நிகழ்ச்சியை முழுத்தொடராக உருவாக்கி, “கால் வாழ்க்கை’ என்னும் பெயரில் மைஸ்பேஸ் தளத்தில் வெள்ளோட்டம்   விட்டிருக்கின்றனர். நிகழ்ச்சியை மைஸ்பேஸ் உறுப்பினர்கள் வீடியோ கோப்பாக பார்க்க முடியும் என்பதோடு, அவர்களின் கூடுதல் கவனத்தையும், ஆர்வத்தையும் ஈர்க்கும் வகையில், நிகழ்ச்சிக்கான பக்கத்தில் அதன் கதாபாத்திரங்கள் மற்றும் கதைப்போக்கு பற்றிய விவரங்களும் தொகுத்தளிக்கப்பட்டுள்ளன.
கதாபாத்திரங்கள் பேசுவது போன்ற இந்த தகவல்கள், நிகழ்ச்சி மீது பற்று கொண்ட ரசிகர்கள்  வட்டத்தை உருவாக்கும் வகையில் அமைக்கப்பட்டுள்ளது.

இப்படி மைஸ்பேஸ் தனித்தன்மையை பயன்படுத்திக் கொள்வதோடு, இதே பாணியில் இந்த நிகழ்ச்சிக்காக என்றே தனியே ஒரு வலைப்பின்னல் தளமும் (quaterlife.com) என்னும்  பெயரில் உருவாக்கப்பட்டுள்ளது.
படைப்பாற்றல் பாதிக்கப்படாமல், கலைஞனுக்குரிய முழு சுதந்திரத்தோடு, நிகழ்ச்சிகளை தயாரித்து வெளியிட இது சிறந்த வழி என்று கருதப்படுகிறது.