Tag Archives: cinema

திரைப்புத்தகங்களை பின் தொடரும் டிவிட்டர் பக்கம்!

 

b2திரைப்பட நட்சத்திரங்கள் எந்த புத்தகத்தை ஆர்வத்துடன் வாசிக்கின்றனர் என்பதை அவர்கள் பேட்டி மூலம் அறிந்து கொள்ளலாம். ரசிகர்கள் அந்த புத்தகங்களை தேடிப்பிடித்து வாசிக்கவும் செய்யலாம். எல்லாம் சரி, திரைப்பட கதாபாத்திரங்கள் எந்த புத்தகங்களை வாசிக்கின்றனர் என்பதை நீங்கள் எப்போதேனும் கவனித்ததுண்டா? அதாவது திரைப்படங்களில் வரும் நடிகர் அல்லது நடிகை புத்தகம் படிப்பது போல வரும் காட்சிகளை கவனித்திருக்கிறீர்களா? அந்த புத்தகங்கள் உங்கள் நினைவில் இருக்கின்றனவா?

இந்த கேள்விகள் உங்களுக்கு சுவாரஸ்யம் அளித்தால், @புக்ஸ்_இன்_மூவிஸ் ( @books_in_movies ) டிவிட்டர் பக்கம் உங்களை கவர்ந்திழுக்கும். ஏனெனில் இந்த டிவிட்டர் பக்கம் திரையில் தோன்றி மறைந்த புத்தகங்களை குறும்பதிவு வடிவில் அடையாளம் காட்டி வருகிறது.

திரைப்படங்களில் கதை சொல்லும் உத்தியாகவும், காட்சி அமைப்பிற்கு வலு சேர்க்கவும் பல விஷயங்கள் பயன்படுத்துவது உண்டு. இதேவிதமாக தான் திரையில் தோன்றும் பாத்திரங்கள் புத்தகம் அல்லது நாவலை வாசித்துக்கொண்டிருப்பது போல காண்பிப்பதும் வழக்கம். இந்த திரை வாசிப்பு கதையை ஒட்டியும் இருக்கலாம், அல்லது கதையுடன் நேரடியாக தொடர்பு இல்லாமாலும் அமையலாம்.சில நேரங்களில் திரையில் பாத்திரங்கள் வாசிகப்படுவது போன்ற புத்தகம் பரவலான கவனத்தை ஈர்ப்பதும் உண்டு. கபாலி படத்தின் அறிமுக காட்சியில் ரஜினி காந்த் ’மை பாதர் பாலைய்யா’ எனும் புத்தகத்தை படித்துக்கொண்டிருப்பது போன்ற காட்சி கவனத்தை ஈர்த்தது இதற்கான உதாரணம். பாலச்சந்தரின் ஏக் துஜே கேலியே படத்தில் நாயகி, ஷேக்ஸ்பியர் நாடகங்கள் மற்றும் 20 நாட்களில் தமிழ் மொழியை கற்றுக்கொள்வது எப்படி? எனும் புத்தகங்களை வாசிப்பது போல வரும்.

ஆனால் பெரும்பாலும் ரசிகர்கள் இந்த காட்சிகளை கடந்து போய்விடுவதுண்டு. அதில் வரும் புத்தகங்களையும் கவனிக்காமல் விட்டுவிடுவார்கள். திரை வாசிப்பை மையமாக கொண்டு ஏதேனும் சர்சசை அல்லது விவாதம் ஏற்படும் போது தான், காட்சிகளில் காண்பிக்கப்படும் புத்தகங்களை கவனிக்கத்தோன்றும்.

இவ்வாறு இல்லாமல், திரைப்படங்களில் பாத்திரங்களால் வாசிக்கப்பட்ட புத்தகங்களை எல்லாம் கண்டறிந்து அடையாளம் காட்டும் வகையில் மேலே குறிப்பிட்ட  புக்ஸ்_இன்_மூவிஸ் டிவிட்டர் பக்கம் அமைந்துள்ளது. அபிஷேக் சுமன் எனும் திரைப்பட ரசிகர் இந்த டிவிட்டர் பக்கத்தை நடத்தி வருகிறார். திரைப்படங்களில் எந்த காட்சியில் நடிகர், நடிகையர் புத்தகம் வாசிப்பது போல வருகின்றனவோ அந்த காட்சிகளை எல்லாம் ஸ்கிரின்ஷாட் எடுத்து அதன் விவரத்தை குறும்பதிவாக பகிர்ந்து வருகிறார். எந்த படத்தில், எந்த காட்சியில் என்ன புத்தகம் வாசிக்கப்படுகிறது என்பதை இந்த குறும்பதிவுகள் மூலம் அறிந்து கொள்ளலாம்.

bநம்மூர் திரைப்படங்கள் மட்டும் அல்லாமல் சர்வதேச திரைப்படங்களிலும் பாத்திரங்கள் வாசிக்கும் புத்தகங்களையும் இப்படி படம் பிடித்துக்காட்டி வருகிறார். தில்லிவாசியான அபிஷேக் தணிக்கையாளராக பணியாற்றி வருபவர். சினிமா, புத்தகம் இரண்டிலுமே அவருக்கு ஆர்வம் அதிகம் என்கிறார். திரையில் பாத்திரங்கள் வாசிக்கும் புத்தகம் தொடர்பாக பத்திரிகை ஒன்றில் சில ஆண்டுகளுக்கு முன் வாசித்த கட்டுரை ஏற்படுத்திய தாக்கம் காரணமாக, திரைப்புத்தகங்களை அடையாளம் காட்டும் ஆர்வம் உண்டானதாக அவர் ஸ்க்ரோல் இணைய இதழுக்கு அளித்துள்ள பேட்டியில் தெரிவித்துள்ளார். முதலில் தனது டிவிட்டர் பக்கத்திலேயே இந்த தகவல்களை பகிர்ந்து வந்திருக்கிறார். பின்னர் தான் இதற்கென்றே தனி டிவிட்டர் பக்கத்தை அமைந்த்ததாக குறிப்பிடுகிறார். இதே போலவே ஒளிப்பட பகிர்வு சேவையான இன்ஸ்டாகிராமிலும் ஒரு பக்கத்தை உருவாக்கியிருக்கிறார்.

மற்றவர்களுடன் அதிகம் பேசும் பழக்கம் இல்லாத தனக்கு, திரைப்படங்களும், புத்தகங்களும் தான் தஞ்சம் அளிப்பதாக கூறும் அபிஷேக், எந்தவித திட்டமிடலும் இல்லாமல் இந்த பக்கத்தை துவக்கியதாக கூறியிருக்கிறார். திரையில் தோன்றும் புத்தகங்களை தேடி கண்டுபிடிப்பதற்காக என்றே அவர் தினமும் திரைப்படம் பார்க்கிறாராம். ஏற்கனவே பார்த்த படங்களில் தோன்றிய புத்தகங்கள் நன்றாக நினைவில் இருந்தது துவக்கத்தில் இவருக்கு கைகொடுத்திருக்கிறது. இப்போது இதற்காக என்றே படங்களை பார்க்கிறார். மற்றவர்கள் பரிந்துரையையும் ஏற்றுக்கொள்கிறார். புத்தகங்கள் மட்டும் அல்ல பத்திரிகை, சஞ்சிகைகள் போன்றவை வாசிக்கப்பட்டாலும் அவற்றையும் பகிர்ந்து கொள்கிறார்.

இதுவரை நானுறுக்கும் மேற்பட்ட புத்தகங்களை பகிர்ந்து கொண்டிருக்கிறார். திரைப்படத்தில் எந்த இடத்தில் புத்தகம் வருகிறது என்பதை சுட்டிக்காட்டுவதோடு நிறுத்திக்கொள்வதாகவும், அந்த புத்தகத்திற்கும் காட்சிக்கும் என்ன தொடர்பு என்றெல்லாம் ஆய்வு செய்வதில்லை என்கிறார் அவர். பல படங்கள் புத்தகங்கள் எந்தவித அர்த்தமும் இல்லாமல் காட்சி அமைப்பிற்கு தேவையான ஒரு பொருளாகவே பயன்படுத்தப்படுவதாகவும் அவர் கூறுகிறார்.

எனினும் ஒரு சில படங்களில் புத்தகங்கள் காட்சி மற்றும் கதை அமைப்புடன் கச்சிதமாக பொருந்தி இருப்பதும் உண்டு என்கிறார். அபிஷேக்கின் டிவிட்டர் பக்கத்தை பின் தொடர்ந்தால் தினம் ஒரு புத்தகத்தை சுவாரஸ்யமான முறையில் அறிமுகம் செய்து கொள்ளலாம். புத்தக பிரியர்கள் இதை புத்தகங்களுக்கான அங்கீகாரமாக கருதலாம் என்றால், திரைப்பட பிரியர்கள் அந்த ஆர்வத்தின் அடிப்படையில் புத்தகங்களை தேடிச்செல்வதற்கான வழியாக இதை கருதலாம்.

குறும்பதிவு சேவையான டிவிட்டரை எப்படி எல்லாம் சுவாரஸ்யமாக பயன்படுத்தலாம் என்பதற்கான அழகான உதாரணமாகவும் இந்த பக்கம் அமைந்துள்ளது. அடுத்த கட்டமாக, இந்த தகவல்களை எல்லாம் கொண்ட இணையதளம் ஒன்றை உருவாக்கவும் திட்டமிட்டிருப்பதாக அபிஷேக் குறிப்பிட்டுள்ளார். அதோடு திரையில் பார்த்த ஆனால் என்ன புத்தகம் என கண்டுபிடிக்க முடியாமல் இருக்கும் நூல்களுக்கான பிரத்யேக பகுதியையும் துவக்க திட்டமிட்டிருப்பதாக கூறியுள்ளார்.

திரைப்புத்தகங்களுக்கான டிவிட்டர் பக்கம்: @books_in_movies

கமலின் ’மய்யம்விசில்’ செயலி எப்படி இருக்கும்?

kamal1_13104அரசியல் பிரவேசம் குறித்து கமல் ஏமாற்றவில்லை; ஆனால் முழுவதுமாக எதிர்பார்ப்பை நிறைவேற்றவும் இல்லை. தெளிவான சமிஞ்சைகளை வெளியிட்டாலும், இன்னும் பல யூகங்களை தன்னிடமே வைத்துக்கொண்டிருக்கிறார். அரசியலுக்கு வருவாரா? எனும் கேள்வியை வைத்துக்கொண்டு ஆர்வத்தை தூண்டிக் கொண்டிருக்காமல், அரசியலுக்கு வந்துவிட்டேன் எனச்சொல்லி ஆர்வத்தை தூண்டியிருக்கிறார். ஆனால், கட்சியின் பெயர், அதன் கொள்கை, எப்போது ஆரம்பம் போன்ற கேள்விகளுக்கு எல்லாம் உடனடி பதில் சொல்லாமல், கட்சி அமைப்புக்கான தயாரிப்பு பணிகள் நடந்து கொண்டிருப்பதாக மட்டும் கூறியிருக்கிறார்.

பிறந்த நாளை முன்னிட்டி செய்தியாளர்களை சந்தித்த நடிகர் கமல்ஹாசன், எதிர்பார்த்தபடியே அரசியல் பிரவசத்தை உறுதிப்படுத்திவிட்டு, கட்சி துவங்கும் முன் மக்களை சந்திக்க சுற்றுப்பயணம் செய்யப்போவதாக கூறியிருக்கிறார். இது நல்ல உத்தி மட்டும் அல்ல, சரியான செயலும் தான். உலக நாயகன் உள்ளூர் மக்களின் கருத்துக்களை நேரில் கேட்டறியட்டும்!

கமல் அறிவிப்பில் கவனத்தை ஈர்த்து விவாதிக்கும் வகையில் பல அம்சங்கள் இருந்தாலும், கட்சிக்கான பிரத்யேக செயலி அறிவிப்பும், இயக்கத்திற்கான பிரத்யேக ஹேஷ்டேகுகள் வெளியிட்டிருப்பதும் கூடுதலாக கவனத்தை ஈர்க்கின்றன. #theditheerpomvaa, #virtuouscycles, #maiamwhistle   ஆகிய மூன்று ஹேஷ்டேகுகளை கமல் அறிவித்திருக்கிறார். இதில் ’மய்யம்விசில்’ ஏற்கனவே டிவிட்டரில் டிரெண்டிங் ஆகத்துவங்கிவிட்டது. இணையத்தில் ஹேஷ்டேக் என்பது முக்கியமான ஆயுதங்கள் அல்லது கருவிகள். பொருத்தமான ஹேஷ்டேக் மூலம் ஒத்த கருத்துக்களை சமூக ஊடக வெளியில் திரட்டுவதோடு, அர்த்தமுள்ள உரையாடலையும் சாத்தியமாக்கலாம். அந்த வகையில் தனக்கான ஹேஷ்டேகுகளை கமலே தேர்வு செய்து வெளியிட்டுள்ளது சரியான டிஜிட்டல் உத்தி தான். ஆனால் இந்த ஹேஷ்டேகுகள் சார்ந்த அர்த்தமுள்ள விவாதம் நடைபெறுவதை உறுதி செய்வது கமலின் கைகளில் தான் இருக்கிறது. அவரது டிவிட்டர் பக்கத்தில் இருந்தே இதை செய்யலாம். பொருத்திருந்து பார்க்கலாம் என்ன செய்கிறார் என!

அவரது சுற்றுப்பயணத்திற்கான முன்னேற்பாடாக கூட இந்த பகிர்வுகள் அமையலாம்.

ஹேஷ்டேக் தவிர ’மய்யம்விசில்’ எனும் பெயரிலான செயலியை அறிவித்திருக்கிறார். ஆனால் இந்த செயலி பீட்டா வடிவில் இருப்பதாக கூறியவர், ஜனவரியில் தான் இது அறிமுகமாகும் என கூறிவிட்டார். செயலியின் அம்சங்கள் குறித்தும் எந்த தகவலையும் பகிர்ந்து கொள்ளவில்லை. கதை திருட்டு போல செயலி திருட்டும் நடைபெறலாம் என அஞ்சுகிறார் போலும்!

செயலியின் முக்கிய அம்சங்கள் அறிவிக்கப்பட்டிருந்தால் கமலின் அரசியல் திட்டம் குறித்து அலசியிருக்கலாம். ஆனால் இந்த செயலி ஊழல் குறித்த தகவல்களை பகிர்வதற்கான வழியாக இருக்கும் என்று மட்டுமே கமல் கூறியிருக்கிறார். தன் மீதான தவறுகளையும் சுட்டிக்காட்டலாம் என கூறியிருக்கிறார். மேலதிக விவரங்கள் இல்லை. ஆனால், இந்த செயலி எப்படி இருக்க கூடும் என்று அனுமானிப்பதைவிட, இந்த செயலி எப்படி இருக்க வேண்டும் என்று யோசித்துப்பார்க்கலாம்.

அதற்கு முன்னர், ஒரு புதிய அரசியல் கட்சிக்கு செயலியால் என்ன பயன்? எனும் கேள்வியை கேட்டுக்கொள்ளலாம். ஸ்மார்ட்போன்கள் மூலம், உலகம் உண்மையிலேயே உள்ளங்கையில் வந்திருக்கும் காலகட்டத்தில் மொபைல் செயலிகளின் முக்கியத்துவத்தை குறைத்து மதிப்பிட்டுவிட முடியாது. வர்த்தகம் உள்பட எல்லாத்துறைகளிலும் செயலிகள் பயன்படுத்தப்படுகின்றன. அரசியலிலும் செயலிகள் பயன்படுத்தப்படுகின்றன.

அந்த வகையில் அரசியல் கட்சிகளுக்கும் செயலி ஒரு அருமையான கருவி தான். ஆனால் ஒன்று, கட்சியின் செயலி என்பது வேறுபட்டதாக இருக்க வேண்டும். அதாவது, ஏற்கனவே உள்ள பிரச்சார சங்கதிகளின் டிஜிட்டல்மயமாக்கப்பட்ட வடிவமாக செயலி இருப்பதால் அதிக பயன் இல்லை. அவை அலுப்பையே ஏற்படுத்தும். டிஜிட்டல் தலைமுறையை விலகிச்செல்ல செய்துவிடும். மாறாக ஒரு செயலி துடிப்புடன் இருக்க வேண்டும். தொழில்நுட்ப மொழியில் சொல்வதனால் டைனமிக்காக இருக்க வேண்டும்.

டிஜிட்டல் யுகத்தில் அரசியல் கட்சிகள் செயலிகளை நாடுவதற்கான முக்கிய காரணங்கள் என டெக்யுகோ வலைப்பதிவில் வெளியான கட்டுரை ஒன்று கீழ் கண்டவற்றை பட்டியலிடுகிறது.

  • விழிப்புணர்வு- பொதுமக்கள் மத்தியில் அரசியல் கட்சியின் நோக்கம் பற்றி தெளிவாக உணர்த்தி விழிப்புணர்வை ஏற்படுத்த வேண்டும்.
  • நிதி – செயலி நிதி திரட்டுவதற்கான மேடையாக அமையலாம்.
  • செய்தி- செயலி தகவல் தெரிவிப்பதற்கான சிறந்த வழி.
  • தொடர்பு- செய்தி என்பது ஒருவழிப்பாதையாக இல்லாமல், உரையாடலாக இருக்க வேண்டும்.
  • மீடியா- செய்திகளை வெளியிடுவதற்கான வாகனம்
  • கல்வி- மக்கள் பிரச்சனைகள் பற்றி விழிப்புணர்வை ஏற்படுத்தலாம்.
  • சமூக ஊடகம்- சமூக ஊடக பகிர்வுகள்
  • சர்வே- மக்கள் கருத்துக்களை சர்வேக்கள் மூலம் அறியலாம்.

 

விதிவிலக்கான சந்தர்பங்கள் தவிர பொதுவாக அரசியல் கட்சிகள் ஒரு வழிப்பாதை தகவல் தொடர்பையே பயன்படுத்துகின்றன. மக்களுக்கும், தொண்டர்களுக்கும் தகவல்கள் தெரிவிக்கப்படும் அளவிற்கு அவர்கள் கருத்துக்களை அறிய முயற்சி மேற்கொள்ளப்படுவதில்லை. ஆனால் செயலி மூலம் இதை மாற்றலாம். மக்களுடன் வெளிப்படையாக தொடர்பு கொண்டு அவர்கள் கருத்துக்களை அறியலாம். அரசியல் கட்சிகள் பெரும்பாலும் நிர்வாகிகளின் ஜால்ரா கருத்துக்களையே கேட்க நேரிடுகிறது. செயலி மூலம் மக்கள் என்ன நினைக்கின்றனர் என்பதை பட்டவர்த்தனமாக தெரிந்து கொள்ளலாம். இதற்கு பதிலும் அளிக்கத்துவங்கினால் இரு தரப்பினருக்குமே அது நலன் பயக்கும்.

முக்கிய பிரச்சனைகள் தொடர்பாக கட்சி கருத்தை மட்டும் திணிக்காமல் முதலில் மக்கள் மன ஓட்டத்தை அறிந்து அதற்கேற்க கட்சி நிலைப்பாட்டை வகுப்பது ஜனநாயகமயமானதாக இருக்கும். முக்கிய பிரச்சனைகளை மக்களையே பரிந்துரைக்க செய்யலாம்.

வெளிப்படையாக தொடர்பு கொள்வது மூலம் மக்களிடம் நம்பகத்தன்மையை அதிகமாக்கி கொள்ளலாம். நிர்வாகிகள் மற்றும் வேட்பாளர்கள் பற்றிய கருத்துக்களையும் அறியலாம். இது கட்சியையை ஜனநாயகபூர்வமாக வைத்திருக்கும்.

செயலி மூலம் இன்னும் பல விஷயங்களை செய்யலாம். ஆனால் ஒன்று பயணர் இடைமுகம் முக்கியம். அது நட்பானதாக இருக்க வேண்டும். எதையும் வெளிப்படையாக பகிர முடிய வேண்டும். அதைவிட முக்கியமாக கருத்துக்கள் ஒரு வழிப்பாதையாக நின்றுவிடாமல் அவற்றுக்கு முறையாக பதில் அளிக்கப்பட வேண்டும்.

சமூக ஊடக பகிர்வு வசதி, பேஸ்புக் வைவ் வசதி, அரட்டை வசதி, அறிக்கை வெளியீடு உள்ளிட்ட அம்சங்கள் இருக்க வாய்ப்புள்ளது. இவை எல்லாவற்றையும் விட, மக்களுடன் நேரடியாக தொடர்பு கொண்டு அவர்கள் கருத்துக்களை அறிந்து செயல்படும் வழியில் செயலி இருக்க வேண்டும். நிதி திரட்டுவது பற்றி கமல் பேசியது, எல்லாவற்றையும் பதிவு செய்யும் முறையை சுட்டிக்காட்டுகிறது.

கமல் செயலி பற்றி தனியே பேசாமல் மக்கள் தொடர்புக்கான டிஜிட்டல் அரங்கின் ஒரு அம்சமாக இதை சொல்லியிருப்பது நிறைய எதிர்பார்க்க வைக்கிறது. தொழில்நுட்ப போக்குகளை நன்கறிந்த கமல், டிஜிட்டல் உலக சாத்தியங்களை தனது இயக்கத்திற்கு பயன்படுத்திக்கொள்ளும் மேடையை உருவாக்கினார் என்றால் அது நிச்சயம் ஒரு முன்னோடி முயற்சியாக இருக்கும்.

செயலி, டிஜிட்டல் அரங்கம் எல்லாம் நவீன உத்திகள் தான். ஆனால் இவை மட்டும் போதாது. களத்தில் எப்படி செயல்படுகிறார் என்பதை கொண்டே இந்த உத்திகள் பயன் தரும்.

கமல் நிறைய எதிர்பார்ப்பை ஏற்படுத்தியிருக்கிறார். அதை தக்க வைத்துக்கொள்கிறாரா என்பது தான் முக்கியமான கேள்வி!

 

=—

நன்றி; யுவர்ஸ்டோரி தமிழ் இணையதளத்தில் எழுதியது

டிவிட்டரில் கமல்; ஒரு இணைய ரசிகனின் எதிர்பார்ப்பு

CZpvuVPUcAAqhTtடிவிட்டரில் கமல்ஹாசன் இணைந்திருக்கிறார்.முதலில் கமல்ஹாசனுக்கு நல்வரவு.ஏற்கனவே பேஸ்புக்கில் இணைந்திருக்கும் கமல் குறும்பதிவு சேவையான டிவிட்டருக்கும் வந்திருப்பது நிச்சயம் திரைப்பட ரசிகர்கள் மகிழக்கூடியது தான்.கமலின் டிவிட்டர் பிரவேசத்தை அவரது மகள் ஸ்ருதிஹாசன் டிவிட்டர் மூலமே வரவேற்றிருக்கிறார். ஏற்கனவே டிவிட்டரில் இருக்கும் வேறு பல நட்சத்திரங்களும் வரவேற்றிருக்கின்றனர்.
பிரபலங்கள் டிவிட்டருக்கு வரும் போது நிகழ்வது போலவே கமலுக்கு கிடைக்கும் பாலோயர்கள் எண்ணிக்கை பற்றிய கணக்கும் துவங்கியிருக்கிறது.இனி கமல் டிவிட்டர் கணக்கு பாலோயர் எண்ணிக்கையில் மைல்கற்களை தொடும் போதெல்லாம் செய்தியில் அடிபடும் வாய்ப்புள்ளது.

ஒருவிதத்தில் கமலின் இந்த டிவிட்டர் வருகை ஆச்சர்யமானதே.இதையே வேறு விதமாக சொல்வது என்றால் அவர் இதுவரை டிவிட்டருக்கு வராமல் இருந்தது ஆச்சர்யமானது. அந்த வகையில் பார்த்தால் கமலின் டிவிட்டர் வருகை தாமதமாக நிகழ்ந்திருக்கிறது. இதை கமலே ஒப்புக்கொள்வார்.

டிவிட்டருக்கு கமல் எப்போதோ வந்திருக்க வேண்டும் என்று சொல்வதற்கு காரணம் இல்லாமல் இல்லை.அவரது சகாவான ரஜினி காந்த் ஏற்கனவே டிவிட்டரில் இருக்கிறார். அகில இந்திய அளவில் அமிதாப் டிவிட்டரில் கோலோச்சுகிறார்.ஷாருக்கும்,சல்மானும் டிவிட்டரில் தீவிரமாக இருக்கின்றனர்.இங்கேயே பல நட்சத்திரங்கள் டிவிட்டரில் இயங்கி கொண்டிருக்கின்றனர்.- இவர்கள் எல்லாம் வந்துவிட்ட நிலையில் கமல் டிவிட்டருக்கு வரவில்லை என்பதல்ல விஷயம், கமல் டிவிட்டருக்கு வந்திருக்க வேண்டும் என்பதே இங்கே நான் வலியுறுத்த விரும்புவது.

கமல் டிவிட்டருக்கு வருவதும் வராததும் அவரது விருப்பம் சார்ந்தது தான்.அதற்கான நேரத்தை தேர்வு செய்து கொள்ளும் உரிமையும் அவருக்கு இருக்கிறது.ஆனாலும் கூட, கமல் போன்ற முன்னோடி கலைஞர்களை டிவிட்டர் பயன்பாட்டில் முதலில் எதிர்பார்ப்பது மிக இயல்பானதே. டிவிட்டர் என்றில்லை,சமூக ஊடக செயல்பாட்டில் கமலை முன்வரிசையில் தான் எதிர்பார்க்க முடியும்.
CZpu2PqVIAMltH3
இந்த எதிர்பார்ப்பின் காரணத்தை மிக எளிதாக புரிந்து கொள்ளலாம்.கமல் தொழில்நுட்பத்தை புரிந்து கொள்வதிலும், பயன்படுத்துபதிலும் எப்போதுமே முன்னோடியாக தான் இருக்கிறார். கமல் படங்களை உருவாக்கும் வித்ததில் இதை பார்க்கலாம். திரைப்பட நுட்பங்கள் பற்றி பேசுவதில் இதை உணரலாம்.பெரும்பாலானோர் தயங்கிய நிலையில் பல ஆண்டுகளுக்கு முன்பே டிஜிட்டல் நுட்பத்தில் படம் எடுக்கத்துணிந்தவர் அவர்.சொந்தமாக ரெட் ஒன் காமிரா வாங்கிவைத்துக்கொண்டு பயிற்சி செய்பவர்.ஸ்டிரீமிங் பற்றி எல்லாம் பெரிதாக பேச்சு வருவதற்கு முன்னதாகவே, லேப்டாப்பில் ரசிகர்கள் படம் பார்க்க விரும்பினால் அதற்கான வாய்ப்பை ஏற்படுத்தி தர வேண்டும் என பேசியவர்.தொழில்நுட்பத்தின் பயன்பாடு மற்றும் சாத்தியங்கள் பற்றி ஆழமாக அறிந்தவர் மட்டும் அல்ல, அதைவிட முக்கியமாக தொழில்நுட்ப மாற்றங்கள் வருங்காலத்தில் ஏற்படுத்தக்கூடிய தாக்கத்தை முன்னதாகவே உணரும் தொலைநோக்கு பார்வை கொண்டவர் கமல்.
எனவே தான் கமலின் தாமதமான டிவிட்டர் வருகை வியப்பை அளிக்கிறது.ஆனால் இப்போது நிகழ்ந்திருக்கும் நிலையில் பல விஷயங்களை எதிர்பார்க்க வைக்கிறது.

கமல் டிவிட்டரை எப்படி பயன்படுத்தப்போகிறார் என்று தெரியவில்லை.அவரது டிவிட்டர் பக்கத்தில் இதற்கான குறிப்புகள் குறைவாகவே இருக்கின்றன.கமலின் டிவிட்டர் பயோவில் நடிகர், இயக்குனர், நடனக்கலைஞர், எழுத்தாளர், தயாரிப்பாளர்,என்று மட்டுமே தெரிவிக்கப்பட்டுள்ளதே தவிர அவரது டிவிட்டர் பக்கத்தின் நோக்கம் பற்றிய குறிப்புகளை கொண்டிருக்கவில்லை. கமலின் முதல் குறும்பதிவும் இந்த நோக்கத்தை போட்டு உடைத்துவிடவில்லை. குடியரசு தினத்தன்று டிவிட்டருக்கு வந்த கமல், ஒரு வீடியோவை மட்டும் பகிர்ந்து கொண்டுள்ளார். தேசிய கீதம் இசைக்கும் அந்த வீடியோவுடன் இந்திய சுதந்திர போராட்டம் இன்னமும் தனித்தன்மை வாய்ந்த்தாக இருக்கிறது என குறிப்பிட்டுள்ளார்.

கமலின் குறும்பதிவுகள் தொடர்ந்து எந்த வேகத்தில் வெளியாகும் என்பதும் அவரே இந்த கணக்கை கையாள திட்டமிட்டிருக்கிறாரா? என்பதும் தெரியவில்லை.
ஆனால் கமலின் டிவிட்டர் பக்கம் எப்படி இருக்க வேண்டும் என்ற எதிர்பார்ப்பு அவரை பின் தொடர விரும்புகிறவர்களுக்கு நிச்சயம் இருக்கும்.கமல் தனது கலையில் வெளிப்படுத்தி வரும் அதே முன்னோடித்தன்மையை, தொழில்நுட்பத்தை பயன்படுத்துவதில் அவரிடம் உள்ள பாய்ச்சலை அவரது டிவிட்டர் பகிர்விலும் எதிர்பார்க்க நமக்கு உரிமை இருக்கிறது.

டிவிட்டர் வெறும் சமூக ஊடக சாதனம் மட்டும் அல்ல; பிரபலங்களின் கைகளில் அது ரசிகர்களை நேரடியாக தொடர்பு கொள்வதற்கான, அவர்களுடன் உரையாடுவதற்கான சாதனமும் கூட! தேர்ச்சி பெற்ற கலைஞர்கள் இதை உணர்ந்து டிவிட்டர் மூலம் ரசிகர்களுடன் பாலம் அமைத்துக்கொண்டிருக்கின்றனர். தங்கள் எண்ணங்களையும்,விருப்பங்களையும் ரசிகர்களுடன் பகிர்ந்து கொள்கின்றனர். நட்சத்திர வெளிச்சத்தை கடந்து தங்கள் உலகிற்குள் ரசிகர்களை அழைத்து தங்கள் கலை உலகின் அகத்தன்மையை வெளிச்சம் போட்டு காட்டுகின்றனர். பாலிவுட்டில் அமிதாப்பின் டிவிட்டர் பக்கத்தை இதற்கு உதாரணமாக சொல்லலாம்.

அமிதாப் டிவிட்டரில் தீவிரமாக இயங்கி வருவதோடு ,ரசிகர்களை நேரில் சந்தித்து பேச முடியாத குறையை போக்கிக்கொள்ளும் வகையில் குறும்பதிவுகள் மூலம் அளவலாவி வருகிறார். அமிதாப் எனும் மனிதரை, அமிதாப் எனும் கலைஞரை அவரது குறும்பதிவுகள் வாயிலாக ரசிகர்கள் அறிந்து கொள்ளலாம். தனது திரையுலக அனுபவங்கள் பற்றி பல சுவாரஸ்யமான விஷயங்களை அமிதாப் தொடர்ந்து பகிர்ந்து வருகிறார்.இவற்றை விட முக்கியமாக தன்னைப்பற்றிய செய்திகளுக்காக அவர் ரசிகர்களை தவிக்க விடுவதில்லை. பேத்தியை கொஞ்சி மகிழ்வது முதல் எல்லாவற்றையும் அவரே தனது டிவிட்டர் பக்கத்தில் பகிர்ந்து கொள்கிறார்.
அமிதாப்பின் டிவிட்டர் பக்கம் மட்டும் அல்ல அவரது வலைப்பதிவும் அதைவிட செழுமையானது. அமிதாப் பல விஷயங்கள் குறித்து தனது எண்ண அலைகளை வலைப்பதிவில் விரிவாகவே பதிவிட்டு வருகிறார். ஒரு நடிகர் தனது ரசிகர்களுக்காக அக்கறையுடன் எழுதும் நாட்குறிப்பாக அமிதாப்பின் வலைப்பதிவு இருப்பதை பார்க்கலாம்.
முக்கிய பதிவுகளுக்கு தனது டிவிட்டர் பக்கத்தில் அமிதாப் இணைப்பு தருவதையும் வழக்கமாக கொண்டுள்ளார். ஒரு தீவிர ரசிகனுக்கு அமிதாபின் சமூக ஊடக பகிர்வுகள் தரக்கூடிய இளைப்பாறுதலும், மகிழ்ச்சியும் நிகரில்லாதது- நிழலாக ரசித்தவரை நிஜமாக தெரிந்து கொள்ள வழி செய்வது!.

கமல் நினைத்தால் இதே அனுபவத்தை அவரது ரசிகர்களுக்கு அளிக்க முடியும். தன்னைப்பற்றிய அப்டேட்கள் மட்டும் அல்ல, அவரது சிந்தனை ஓட்டம், புதிய போக்குகளை அவர் எதிர்கொள்ளும்விதம், திரை நுட்பங்களை புரிந்து கொள்வதில் அவரது கோணம் என கமலிடம் எதிர்பார்க்க எத்தனையோ விஷயங்கள் இருக்கின்றன. ரசிகர்களுக்கு மட்டும் அல்ல இளம் படைப்பாளிகளுக்கும் கமலின் டிவிட்டர் பக்கம் தகவல் சுரங்கமாக இருக்கும்.
கமலின் இலக்கிய ஆர்வமும்,வாசிப்பு அனுபவமும் இதற்கு கூடுதல் பலத்தை கொடுக்கும். மய்யம் இலக்கிய இதழை நடத்திவர் துடிப்பு மிக்க வலைப்பதிவாலும் தனது அனுபவங்களை பகிர்ந்து கொண்டு வழிகாட்ட முடியும்.
இவற்றை எல்லாம் அறியாதவர் அல்ல கமல்; ஒரு இணைய ரசிகனாக அவரது ரசிகர்கள் சார்பில் இந்த எதிர்பார்ப்பை முன்வைக்கிறேன்.அவ்வளவு தான் . டிவிட்டரில் கமல் எப்படி விஸ்வரூபம் எடுக்கிறார் என்பதை பொருத்திருந்து பார்ப்போம்.

கமலின் டிவிட்டர் முகவரி: @iKamalhaasan
——

நன்றி; யுவர்ஸ்டோரியில் எழுதியது:

1apologyscreenshot

மகளின் செயலுக்காக பேஸ்புக்கில் மன்னிப்பு கேட்ட அமெரிக்க அம்மா!

அமெரிக்க அம்மா ஒருவர் தனது மகளின் செயலால் பாதிக்கப்பட்ட பெண்மணியிடம் பேஸ்புக் மூலம் மன்னிப்பு கேட்டு எல்லா அம்மாக்களாலும் பாராட்டப்படும் முன்னோடி அம்மாவாகி இருக்கிறார். அப்படியே மற்றவர்களிடன் எப்படி தன்மையுடன் நடந்து கொள்ள வேண்டும் என்று தன் மகளுக்கு பாடமும் கற்றுத்தந்திருக்கிறார்.
கேயிஷா ஸ்மித் எனும் அந்த அம்மா அமெரிக்காவின் அலபாமாவில் வசிக்கிறார். கடந்த வாரம் அவர் தந்து இரண்டு பெண்கள் மற்றும் பையனை திரையரங்கில் புதிய படமான சிண்ட்ரெல்லா பார்ப்பதற்காக காரில் விட்டுவிட்டு வீட்டிற்கு வந்துவிட்டார்.

திரையரங்கில் அவரது இரண்டு மகள்களும் துடுக்குத்தனமாக நடந்து கொண்டிருக்கின்றனர். அவர்களின் துடுப்புத்தனத்தால், மகளுடன் படம் பார்க்க வந்திருந்த அம்மா ஒருவர் மிகவும் பாதிக்கப்பட்டிருக்கிறார். படம் முடிந்ததும் அந்த பெண்மணி மிகுந்த வருத்ததுடன் இவர்களிடம் வந்து , தனது கணவருக்கு வேலை போய்விட்டதால் இனி தங்களால் சினிமாவுக்கு எல்லாம் வர முடியாது எனும் நிலையில் கடைசியாக பார்த்த படத்தையும் நிம்மதியில்லாமல் செய்துவிட்டதாக வேதனையுடன் குறிப்பிட்டு சென்றிருக்கிறார்.
மகளின் இந்த நடவடிக்கை பற்றி அவர்களின் தம்பி கூறியதை கேட்டு கேயிஷா ஸ்மித் மிகவும் வேதனையடைந்தார்.
1kyeshasmithwoodandkids
இன்னொருவரின் மனம் நோகும் படி மகள்கள் நடந்து கொண்டிருக்கின்றனரே என்று கலங்கியவர் அத்துடன் நிற்கவில்லை. புது யுகத்து அம்மாவாக இந்த விஷயத்தை பேஸ்புக்கிற்கு கொண்டு சென்றார்.
நடந்த சம்பவத்தை முழுவதும் விவரித்து, திரையரங்கில் தனது மகள்களின் மோசமான நடத்தையால் பாதிக்கப்பட்ட அம்மாவிடம் மன்னிப்பு கேட்டுக்கொள்ள விரும்புவதாகவும், பாதிக்கப்பட்ட அந்த பெண்மணியை தேடிகொண்டிருப்பதாகவும் தெரிவித்திருந்தார். தங்கள் செயல் தவறானது என் பெண்களுக்கு உணர்த்தப்பட்டதாக குறிப்பிட்டிருந்தவர் ,இது ஏற்றுக்கொள்ள முடியாத செயலுக்காக அவர்கள் மன்னிப்பு கேட்க தயராக இருப்பதாகவும் தெரிவித்திருந்தார். அதோடு அவர்கள் தங்கள் பாக்கெட் மணியில் தங்கள் செயலால் பாதிக்கப்பட்ட அம்மா மற்றும் அவரது மகளை சினிமாவுக்கு அழைத்துச்சென்று சிற்றுண்டி வாங்கித்தந்து மகிழ்விக்க தயாராக இருப்பதாகவும் உருக்கமாக குறிப்பிட்டிருந்தவர்,சம்பந்தப்பட்ட அம்மா இதை பார்த்தால் தயவு செய்து தன்னை தொடர்பு கொள்ள வேண்டும் என்றும் கேட்டிருந்தார்.

மகள்களின் செயலுக்காக இப்படி பேஸ்புக் மூலம் மன்னிப்பு கேட்க முன்வந்து அந்த பாதிப்புக்கு ஈடு செய்யவும் முற்பட்ட அவரது கண்டிப்பு மிக்க தாயுள்ளத்தை வெளிப்படுத்திய இந்த பேஸ்புக் பதிவை பார்த்தவர்கள் எல்லாம் வியப்புடன் அதை தங்கள் நட்பு வட்டத்தில் பகிர்ந்து கொண்டனர்.
இப்படி ஆயிரகணக்கானவர்களால் பார்க்கப்பட்ட அந்த பதிவு இறுதியில் அதற்குறிய பெண்மணியாலும் பார்க்கப்பட்டது.

ரெபேக்கா பாய்ட் எனும் அந்த பெண்மணி இந்த மன்னிப்பு கோரலை பார்த்து நெகிழ்ந்து போய்விட்டார்.
அந்த பெண்களின் செயலால் தான் வேதனையடைண்டாலும் அவர்கள் அம்மாவின் மன்னிப்பு கோரும் பதிவை படித்த போது கண் கலங்கிவிட்டதாக குறிப்பிட்டுள்ளார். அந்த பெண்கள் மீது தனக்கு கோபமில்லை என்று கூறியவர் ,அவர்கள் கற்றுக்கொள்வார்கள் என்றும் கூறியுள்ளதுடன் ஒரு அம்மாவாக கேயிஷா பொறுப்புடன் நடந்து கொண்ட விதம் குறித்தும் பாராட்டு தெரிவித்திருந்தார்.

இதனிடையே இந்த நிகழ்வு பற்றி ஆன்லைனில் படித்தவர்களில் பலர் அவரது கணவருக்கு வேலை வாய்ப்பு வழங்கவும் முன் வந்திருந்தனர்.

பேஸ்புக் தற்பெருமைக்கும், அலுப்பூட்டும் நிலைத்தகவலுக்கும் மட்டும் அல்ல, அதன் வழியே சின்ன சின்ன அற்புதங்களும் நடந்தேறும் என்பதற்கு இந்த சம்பவம் அழகான உதாரணமாக இருப்பதாக பலரும் பாராட்டுகின்றனர்.

——–

விகடன்.காமி எழுதியது.

—-

தினமணி.காமில், இணையம் தொடர்பான முக்கிய பதிவுகளை நெட்டும் நடப்பும் என எழுதுகிறேன்: படித்து விட்டு கருத்து மற்றும் ஆலோசனை சொல்லவும்: http://www.dinamani.com/junction/nettum-nadappum/2015/04/03/%E0%AE%87%E0%AE%A3%E0%AF%88%E0%AE%AF%E0%AE%A4%E0%AF%8D%E0%AE%A4%E0%AE%BF%E0%AE%A9%E0%AF%8D-%E0%AE%AE%E0%AF%81%E0%AE%A4%E0%AE%B2%E0%AF%8D-%E0%AE%AE%E0%AF%81%E0%AE%95%E0%AE%B5%E0%AE%B0%E0%AE%BF/article2743460.ece

திரைப்படங்களை பார்த்து ரசிப்பதற்கான இணையதளம்.

tubeplus.me

‘டியூப்பிளஸ்.மீ’ இணையதளம் அதனை கூர்ந்து கவனிப்பவர்களுக்கு ஒரு செய்தியை சொல்லாமல் சொல்லிக்கொண்டிருப்பதாகவே தோன்றுகிறது.திரைப்படங்களுக்கான எதிர்காலம் இப்படி தான் இருக்கப்போகிறது என்பது தான் அந்த செய்தி.

அதாவது திரைப்படங்களை பார்த்து ரசிப்பதற்கான பிரதான இடமாக இணையம் தான் இருக்கப்போகிறது என்று இதனை புரிந்து கொள்ளலாம்.

திரைப்படங்கள் திரையரங்குகளில் வெளியானாலும் அவை வந்து சேரும் இடம் என்னவோ இணையமாக தான் இருக்கும் என்பதை இந்த தளம் உணர்த்திக்கொண்டிருக்கிறது.

அந்த அளவுக்கு இந்த தளம் திரைப்படங்களின் இருப்பிடமாக இருக்கிறது.இதுவரை வெளியான பெரும்பாலான படங்கள் இந்த தளத்தில் தொகுக்கப்பட்டு பட்டியலிடப்பட்டுள்ளன.அவற்றை இணையத்திலேயே கண்டு களிப்பதற்காக தான் இந்த தளம் உருவாக்கப்பட்டுள்ளது.

எனவே இந்த தளத்தில் நுழைந்து விருப்பமான படத்தை தேர்வு செய்து இணையத்திலேயே அந்த படத்தை பார்த்து ரசிக்கலாம்.

(ப‌டங்கள் என்னும் போது பெரும்பாலும் ஹாலிவுட் படங்கள் தான் என்றாலும் பாலிவுட் கோலிவுட் படங்களும் இந்த பட்டியலில் இடம் பெற்றுள்ளன)

பார்க்க விரும்பும் படங்களை தேர்வு செய்வது சுலபம் தான்.மனதில் உள்ள படத்தின் பெயரை குறிப்பிட்டு தேடிப்பார்ப்பது ஒரு வழி.இல்லை என்றால் எந்த வகையான படம் தேவை என குறிப்பிட்டு(ஆக்ஷன்,காமெடி,திரில்லர்…) எந்த காலகட்டத்தை சேர்ந்த படமாக இருக்க வேண்டும் என்பதையும் குறிப்பிட்டு படங்களின் பட்டியலை பார்த்து தேர்வு செய்து கொள்ளலாம்.திரைப்படங்களை அவற்றின் ரகத்திற்கு ஏற்ப தனித்தனி குறிச்சொற்கள் மூலமாகவும் தேர்வு செய்யலாம்.

இல்லை என்றால் முகப்பு பக்கத்திலேயே கொடுக்கப்பட்டுள்ள டாப் டென் பட்டியலில் இருந்தும் தேர்வு செய்து கொள்ளலாம்.இந்த பட்டியல் அவப்போதைய முக்கிய நிகழ்வுக்கு ஏற்ப மாறிக்கொண்டிருக்கிறது.எனவே மிகுந்த உயிரோட்டமான பரிந்துரையாகவும் அமைந்திருக்கிறது.

ஒரு படத்தை தேர்வு செய்து கிளிக் செய்தால் அந்த படம் தொடர்பான தகவல்கள் கொடுக்கப்பட்டிருப்பதோடு அதனை இணையத்திலேயே பார்த்து ரசிப்பதற்கான இணைப்புகளும் கொடுக்கப்பட்டுள்ளன.அந்த படம் இணையத்தில் எங்கெல்லாம் டவுண்லோடு செய்ய கிடைக்கிறதோ அந்த இடங்கள் எல்லாம் இணைப்புகளாக கொடுக்கப்பட்டுள்ளன.

அந்த திரைப்படத்தின் முன்னோட்டத்திற்கான இணைப்பும் கொடுக்கப்பட்டுள்ளது.

இணையத்தில் தேடி அலையாமல் ஒரே இடத்தில் எல்லா படங்களுக்குமான இணைப்பை வழங்குவது தான் இந்த தளத்தின் சிறப்பு.(திரைப்படங்கள் மட்டும் அல்ல திவி நிகழ்ச்சிகளையும் இவ்வாறு பட்டியலிடுகிறது)

இணையத்தில் முழு நீள திரைப்பட‌ங்களையும் திரைப்பட கிளிப்களையும் பார்த்து ரசிக்க இணையதளங்களும் டோரண்ட்களும் நிறையவே இருக்கின்றன.

ஆனால் ஒரே இடத்தில் அவற்றை தொகுத்தளிக்கிறது இந்த தளம்.

இந்த தன்மையே வியக்க வைக்கிறது.யோசித்து பார்த்தால் இது ஒரு பெரிய விஷயம் அல்ல.இணையத்தில் சிதறிக்கிடக்கும் திரைப்பட வீடியோ கோப்புகளை எல்லாம் திரட்டி அழகாக தொகுத்தளிக்கும் பணியை மட்டும் தான் இந்த தளம் செய்கிறது.ஆனால் இது உருவாக்கும் விளைவு அற்புதமாக இருக்கிறது.

இணையத்தில் பார்க்ககூடிய திரைப்படங்களையும் அவை சார்ந்த தகவல்களையும் ஒரே இடத்தில் விரம் நுனியில் பெற முடிவது திரைப்பட ரசிகர்களை கிரங்கிப்போகவே செய்யும்.

இப்படி ஒரே இடத்தில் படங்கள் குவிந்து கிடப்பதை பார்க்கும் போது எதிர்காலத்தில் வெளியாகும் படங்களும் இப்படி காணக்கிடைப்பது சிறப்பாக இருக்கும் என்று தோன்றுகிறது.ஏன் இப்போது வெளியாகும் படங்கள் கூட இதே போல பட்டியலிடப்படலாம்.

ஆனால் ஏற்கனவே வெளியான படங்களை இணையத்தில் பார்ப்பது என்பது வேறு புதிதாக வெளியாகும் படங்களை இணையத்தில் பார்க்க முடிவது என்பது வேறு.புதிய படங்கள் இணையத்தில் வெளியாவதை தயாரிப்பாளர்களாலும் விநியோகிஸ்தர்களாலும் ஜீரணித்துக்கொள்ள முடியாது.

இருப்பினும் தொழில்நுட்பம் வெளியீட்டு வாயில்களை அகல திறந்து வைத்திருக்கும் போது அதற்கு அனை போடுவதோ காவல் காப்பதோ கடினம் தான்.

இணையத்திலேயே படங்களை வெளியிடுவதற்கான நிர்பந்தத்தை அல்லது அவசியத்தை திரைத்துறையினர் உணர்வதற்கு காலமாகலாம் ஆனால் அதுவே எதிர்காலம் என்பதை டைம்பிளஸ்.மீ தளம் சொல்லாமல் சொல்லிக்கொண்டிருக்கிறது.

நிற்க திரைப்படங்களை திரையரங்குகளோடு இணையத்திலும் வெளியிடுவதில் தயாரிப்பாளர்கள் நோக்கில் உள்ள சிக்கல்கள் புரிந்துகொள்ளகூடியதே.ஆனால் அதனை ஒரு வழியாக ஏற்றுக்கொண்டால் திரையரங்கு போலவே இணைய வெளியீடு மூலமும் கட்டணம் வசூலிப்பதற்கான வழிகள் உருவாக்கப்படலாம்.

டைம்பிளஸ் தளத்திலேயே எல்லா வீடியோக்களும் காப்புரிமை விதிகளின் கீழே வெளியிடப்படுவதாக குறிப்பிடப்பட்டுள்ளது.திரைப்பட உரிமையாளர்கள் தங்கள் அனுமதி இன்றி படங்கள் பட்டியலிடப்பட்டிருப்பதாக கருதினால் அதனை நீக்கி கொள்ளவும் வழி செய்யப்பட்டுள்ளது.

இதுவும் திரைப்படங்களுக்கான எதிர்காலம் தான்.

இணையதள முகவரி;http://www.tubeplus.me/

பி.கு;கமல்ஹாசனின் விஸ்வரூபம் படத்தை டிடிஎச் மூலம் வெளியிடும் முன்னோடி முயற்சியை புரிந்து கொள்ள முயலாமல் கண்மூடித்தனமாக எதிர்பவர்கள் இது போன்ற இணைய முயற்சிகளை அலசி ஆராய்ந்து நிதர்சனத்தை புரிந்து கொள்ள வேண்டும்.