Tag Archives: india

டிஜிட்டல் பண பரிவர்த்தனையை எளிதாக்குக்கும் பீம் செயலி

BHIM-Detailsபண மதிப்பு நீக்க நடவடிக்கைக்குப்பிறகு ரொக்கமில்லா பரிவர்த்தனைகளை அரசு பெரிய அளவில் ஊக்குவித்து வருகிறது. இதற்கு உதவும் வகையில் டிஜிட்டல் பரிவர்த்தனைக்கு மாறுவதற்கான புதிய வசதிகளும் அறிமுகம் செய்யப்பட்டு வருகின்றன. அந்த வகையில் அன்மையில் அறிமுகமான பீம் செயலி துவக்க நிலையிலேயே அதிக வரவேற்பை பெற்று கவனத்தை ஈர்த்துள்ளது. தேசிய பேமெண்ட் கார்ப்பரேஷனால் உருவாக்கப்பட்ட இந்த செயலியை பிரதமர் நரேந்திர மோடி அறிமுகம் செய்து வைத்தார். பாரத் பேமெண்ட் இண்டர்பேஸ் பார் மணி என்பதன் சுருக்கமான பீம் செயலி சட்ட மேதை அம்பேத்கர் பெயரையும் குறிக்கும் வகையில் அமைந்துள்ளது.

ஆண்ட்ராய்டு போன்களில் செயல்படக்கூடிய இந்த செயலி ஏற்கனவே அறிமுகம் செய்யப்பட்டுள்ள யூனிபைடு பேமெண்ட் இண்ட்பர்பேஸ் எனப்படும் யு.பி.ஐ தொழில்நுட்ப மேடையை அடிப்படையாக கொண்டு உருவாக்கப்பட்டுள்ளது. யு.பி,ஐ. வசதி ஸ்மார்ட் போன் மூலம் வங்கி கணக்கில் இருந்து நேரடியாக பணபரிவர்த்தனை செய்ய வழி செய்கிறது. இந்த பரிவர்த்தனைகளின் போது வங்கி கணக்கு உள்ளிட்ட விவரங்களை சமர்பிக்க வேண்டிய அல்லது ஊள்ளீடு செய்ய வேண்டிய அவசியம் இல்லை என்பது இந்த வசதியின் சிறப்பாக அமைகிறது.

யு.பி.ஐ வசதி சார்ந்து முன்னணி வங்கிகள் தனி செயலிகளை அறிமுகம் செய்துள்ளன. அந்த வரிசையில் பீம் செயலியும் அறிமுகம் செய்யப்பட்டாலும், எளிமையான பயன்பாட்டில் இது மற்ற செயலிகளில் இருந்தெல்லாம் வேறுபட்டிருக்கிறது. யு.பி.ஐ செயலியின் இலகுவான வடிவமாக வெகுமக்களை மனதில் கொண்டு மிகவும் எளிமையாக இந்த செயலி வடிவமைக்கப்பட்டுள்ளது. எளிமையான இடைமுகம் மற்றும் மொபைல் வங்கிச்சேவைக்கு பதிவு செய்திருக்க வேண்டிய அவசியமில்லை ஆகிய அம்சங்கள் பீம் செயலியின் பயன்பாட்டை எளிதாக்குகிறது.

வங்கி கணக்கு (யு.பி.ஐ இடைமுகத்தில் இணைந்துள்ள வங்கி) மற்றும் அதனுடன் இணைக்கப்பட்ட மொபைல் எண் கொண்ட எல்லோரும் பீம் செயலியை பயன்படுத்தலாம். பீம் செயலி மூலம் எளிதான பண பரிவர்த்தனையை மேற்கொள்ளலாம்.

பீம் செயலியை பயன்படுத்த ஆண்ட்ராய்டு போன் வழியே கூகுள் பிளேஸ்டோரில் இருந்து இந்த செயலியை தரவிறக்கம் செய்து நிறுவிக்கொள்ள வேண்டும். பீம் செயலியை தரவிறக்கம் செய்யும் போது, அதிகாரபூர்வமான செயலியை தான் தரவிறக்கம் செய்கிறோம் என்பதை உறுதி செய்து கொள்வது மிகவும் அவசியம். ஏனெனில் பீம் பெயர் போலவே பல போலி செயலிகள் உலாவிகின்றன. எனவே செயலியை தரவிறக்கம் செய்யும் முன் அது தேசிய பேமனெட் கார்ப்பரேஷன் உருவாக்கிய செயலியா என்பதை கண்டறிய வேண்டும். அதிகார பூர்வ இணைப்பு மூலம் இதை நாடுவது நலம். பொதுவாகவே வங்கி மற்றும் நிதிச்சேவை செயலிகளை பயன்படுத்துவதற்கு முன், அவை அதிகாரபூர்வ செயலி தானா என்பதை உறுதி செய்து கொள்ள வேண்டும். இமெயில் அல்லது குறுஞ்செய்தி மூலம் வரும் இணைப்புகளை எல்லாம் பயன்படுத்துவதை தவிர்க்க வேண்டும்.

bhimsசெயலியை நிறுவிய பின் விருப்ப மொழியை தேர்வு செய்ய வேண்டும். இப்போது முதல் கட்டமாக ஆங்கிலம் மற்றும் இந்திய மொழிகள் மட்டுமே உள்ளன. வரும் வாரங்களில் தமிழ் உள்ளிட்ட மற்ற மொழிகளும் அறிமுகம் செய்யப்பட உள்ளன. இதன் பிறகு பயனாளியின் போன் மற்றும் குறுஞ்செய்திகளை அணுகும் அனுமதியை கேட்கும். இதற்கு அனுமதி அளித்தவுடன், பயனாளியின் போன் எண்ணை உறுதி செய்து கொள்ளும். இரட்டை சிம் கார்டு கொண்ட போன் எனில் எது பரிவர்த்தனைக்கான சிம்கார்டு என குறிப்பிட வேண்டும். அடுத்த கட்டமாக நான்கு இலக்க பாஸ்கோடை உருவாக்கி கொள்ள வேண்டும். இந்த பாஸ்கோடை தான் தொடர்ந்து கடவுச்சொல்லாக பயன்படுத்துவோம். பாஸ்கோடை உருவாக்கிய பிறகு வங்கியை தேர்வு செய்ய வேண்டும். யு.பி.ஐ பட்டியலில் உள்ள 31 வங்கிகளில் இருந்து தேர்வு செய்து கொள்ளலாம். ஒரு வங்கி கணக்கை மட்டும் தான் தேர்வு செய்ய முடியும். வங்கி கணக்கை இணைத்தவுடன், டெபிட் கார்டின் கடைசி ஆறு இலக்கத்தை தெரிவித்து, யு.பி.ஐ பரிவர்த்தனை பின் எண்ணை உருவாக்கி கொள்ள வேண்டும். இதன் பிறகு பரிவர்த்தனைக்கான வி.பி.ஏ எனப்படும் விர்ச்சுவல் பேமெண்ட் அட்ரஸ் எனும் முகவரியை உருவாக்கி கொள்ள வேண்டும். இது மொபைல் எண் அல்லது பெயராக இருக்கலாம். பணம் அனுப்ப அல்லது கோர இந்த முகவரி அவசியம். வி.பி.ஏவை உருவாக்கி கொண்ட பிறகு, பரிவர்த்தனைக்கான பக்கம் தோன்றும். அதில் அனுப்ப ( செண்ட்), கோர ( ரிக்வஸ்ட்) மற்றும் ஸ்கேன் ஆகிய மூன்று பகுதிகள் இருக்கும். செண்ட் பகுதி மூலம் பணம் அனுப்பலாம். ரிக்வஸ்ட் பகுதி மூலம் பணம் அனுப்ப கோரலாம்.

பணம் அனுப்ப, பெறுபவரின் மொபைல் எண் அல்லது பரிவர்த்தனையை முகவரியை குறிப்பிட வேண்டும். உடனே அதை பரிசோதித்து உறுதி செய்யும். அதன் பிறகு தொகையை தெரிவித்து பின் எண்ணை அடித்தவுடன் பணம் பரிவர்த்தனை செய்யப்படும். பணம் பெறுபவர் யு.பி.ஐ பரிவர்த்தனை முகவரி கொண்டவராக இருக்க வேண்டும். இல்லை எனில் அவரது வங்கி கணக்கு மற்றும் ஐ.எப்.எஸ்.சி கோடு தெரிவித்து பரிவர்த்தனை செய்யலாம். பரிவர்த்தனை முகவரி கொண்டவர்கள் எனில், எளிதாக பரிவர்த்தனை செய்யலாம். ஸ்கேன் செய்வது மூலமும் பரிவர்த்தனை செய்யலாம். பணம் அனுப்புவதற்கான கியூ.ஆர் கோடையும் உருவாக்கி அதனை பகிர்ந்து கொள்ளலாம். மற்றவர்கள் உருவாக்கிய கோடை ஸ்கேன் செய்தும் பணம் செலுத்தலாம்.

சாதாரண போனில் *99# என்ற எண்ணை அணுகுவது மூலமும் இந்த வசதியை பயன்படுத்தலாம். பண பரிவர்த்தனை தவிர கணக்கில் உள்ள தொகையை அறியவும் இந்த வசதியை பயன்படுத்தலாம். ஆனால் மற்ற யு.பி.ஐ செயலியில் உள்ளது போல காசோலை கோருவது போன்ற மற்ற வசதிகளை அணுக முடியாது. பீம் செயலி மூலமான பரிவர்த்தனை நேரடியான வங்கி கணக்கிற்கு சென்றுவிடும். இதை பயன்படுத்த கட்டணம் கிடையாது. ஆனால் வங்கிகள் தரப்பில் சிறிதளவு கட்டணம் வசூலிக்கப்படலாம்.

தற்போது பண பரிவர்த்தனை செயலிகளை விட பீம் செயலி மிகவும் எளிதானதாக கருதப்படுகிறது. முதல் முறை பயனாளிகளை டிஜிட்டல் பரிவர்த்தனை உலகிற்குள் ஊக்குவிக்கும் வகையில் இந்த செயலி வடிவமைக்கப்பட்டுள்ளதாகவும் கருதப்படுகிறது. இந்த செயலி பாதுகாப்பான செயல்பாடுகளை கொண்டிருப்பதாகவும் தெரிவிக்கப்பட்டுள்ளது. மூன்று அடுக்கு பாதுகாப்பை கொண்டுள்ளது. ஒரு முறை 10,000 ரூ வரை பணம் அனுப்பலாம். நாள் ஒன்றுக்கு 20,000 எனும் வரம்பு உள்ளது.

நேரடி பண பரிவர்த்தனைக்கு இது மிகவும் ஏற்றது. இந்த செயலி பரிவர்த்தனையை ஏற்கும் வர்த்தர்களிடமும் இதை பயன்படுத்தலாம். வருங்காலத்தில் இந்த எண்ணிக்கை தற்போதுள்ளதைவிட அதிகரிக்கும் என எதிர்பார்க்கப்படுகிறது. பீம் செயலி பயன்பாட்டில் சில சிறிய இடர்கள் இருப்பதாக கூறப்படுகிறது. மேலும் ஸ்பேம் கோரிக்கைகளும் தொல்லை தருவதாக செய்திகள் வெளியாகியுள்ளன. ஆனால் இவற்றை சரி செய்யும் வகையில் அப்டேட் வர்ஷன் வெளியாகியுள்ளது. ஸ்பேம் தொலைக்கு குறித்து புகார் தெரிவிக்கும் வசதியும் அறிமுகம் செய்யப்பட உள்ளது.

 

மேலும் விவரங்களுக்கு; https://upi.npci.org.in/static/faq/en_US/

நன்றி : தமிழ் இந்துவில் எழுதியது

சுதந்திர போராட்டத்தில் இஸ்லாமியர்கள் பங்களிப்பை சொல்லும் செயலி

muslimஸ்மார்ட்போன் செயலிகளில் பலவிதம் இருக்கின்றன. செயலிகள் உருவாக்கப்படும் நோக்கத்திற்கு ஏற்ப அவற்றின் பயன்பாடும் பலவிதமாக அமைகின்றன. பொதுவாக பயன்பாட்டு வகை செயலிகள், பொழுதுபோக்கு சார்ந்தவை, கேம்கள் ஆகிய ரகங்கள் தான் அதிகம் அறியப்பட்டவையாக இருக்கின்றன. ஆனால், குறிப்பிட்ட விஷயம் தொடர்பாக விழிப்புணர்வை ஏற்படுத்தவும் செயலிகளை பயன்படுத்தலாம். இதற்கு அழகான உதாரணமாக அமைகிறது முஸ்லீம் ஃபிரிடம் பைட்டர்ஸ் செயலி (‘Muslim Freedom Fighters’).

பெயர் உணர்த்தக்கூடியது போலவே இந்த செயலி இந்திய சுதந்திர போராட்டத்தில் இஸ்லாமியர்களின் பங்களிப்பை எடுத்துச்சொல்கிறது.

பன்முகத்தன்மை தான் இந்தியாவின் பலமாக இருந்து வருகிறது. இந்திய சுதந்திர போராட்டமும் இதற்கு சாட்சியாக இருக்கிறது. ஆங்கிலேயர்களுக்கு எதிராக சுதந்திரத்திற்காக போராடிய போது சமூகத்தின் அனைத்து தரப்பு மக்களும் சாதி, மத வேறுபாடுகள் இன்றி அதில் பங்கேற்றனர். இக்கால தலைமுறைக்கு இதை எடுத்துச்சொல்லும் வகையில் இந்த செயலி அமைந்துள்ளது.

ஐதாராபாத்தை சேர்ந்த மென்பொறியாளரான சையது காலீத் சைபுல்லா (Syed Khalid Saifullah ) இந்த செயலியை உருவாக்கியுள்ளார். இந்திய சுதந்திர போராட்டத்தில் முஸ்லிம்களின் பங்களிப்பை ஒரு சில குழுக்கள் இருட்டடிப்பு செய்ய முயன்று வருவதாகவும், அதில் அவர்கள் வெற்றியும் பெற்று வரும் நிலையில், முஸ்லிம்களின் பங்களிப்பை புரிய வைக்கும் வகையில் இந்த செயலியை உருவாக்கியதாக காலீத் கூறுகிறார். பொதுவாகவே முஸ்லிம் சுதந்திர போராட்ட வீரர்கள் பற்றி போதிய விழிப்புணர்வு இல்லாமல் இருப்பதாகவும் , ஐந்து முஸ்லிம் சுதந்திர போராட்ட வீரர்கள் பெயரை கூறுமாறு கேட்டால் 95 சதவீதம் பேருக்கு அது சாத்தியமாவதில்லை என்றும் கூறும் காலீத், இந்த நிலையை போக்கவே, இந்த விஷயம் தொடர்பாக விரிவான தகவல்களை அளிக்கும் செயலியை உருவாக்கும் எண்ணம் ஏற்பட்டதாக கூறுகிறார்.

இந்த எண்ணத்துடன் ஆய்வு செய்வதவர் ஆரம்ப்பத்தில் போதிய தகவல்கள் கிடைக்காமல் அல்லாடினாலும், பின்னர் சையது நஸீர் அகமது எனும் பத்திரிகையாளர், எழுத்தாளர் இந்திய விடுதலை போராட்ட இயக்கத்தில் முஸ்லிம்களின் பங்களிப்பு பற்றி விவரித்து எழுதிய தி இம்மார்டல்ஸ் புத்தகத்தை கண்டறிந்தார். நூலாசிரியர் 20 ஆண்டுகளுக்கும் மேல் இந்தியா முழுவதும் ஆய்வு செய்து அரிய தகவல்களை சேகரித்து இந்த புத்தகத்தை எழுதியுள்ளார்.

இந்த புத்தகத்தை அடிப்படையாக கொண்டு 155 முஸ்லிம் சுதந்திர போராட்ட வீரர்கள் பற்றிய தகவல்களை செயலியாக அமைத்துள்ளார். இந்த செயலியை இவர் உருவாக்கியுள்ள விதம் இதை மிகவும் சுவாரஸ்யமாக ஆக்குகிறது. சுதந்திர போராளிகள் தொடர்பான தகவல்கள் பெண்கள், வழக்கறிஞர்கள், மன்னர்கள், தியாகிகள், பத்திரிகையாளர்கள், படைப்பாளிகள், மதகுருமார்கள் என பல்வேறு தலைப்பில் தொகுக்கப்பட்டுள்ளன. ஒவ்வொரு தலைப்பை கிளிக் செய்தவுடன் அதில் பட்டியலிடப்பட்டுள்ள வீர்ர்களின் சுருக்கமான வாழ்க்கை சித்திரத்தை அறிமுகம் செய்து கொள்ளலாம். அதோடு ஒவ்வொரு வீர்ர்கள் தொடர்பான தேர்விலும் பயனாளிகள் பங்கேற்கலாம். அதாவது அவர்கள் தொடர்பாக உருவாக்கப்பட்டுள்ள கேள்விகளுக்கு பதில் அளிப்பதன் மூலம் இந்த தேர்வில் பங்கேற்கலாம். ஒவ்வொரு தேர்வாக சரியாக பதில் அளித்து அடுத்த வீர்ர் தேர்வுக்கு முன்னேறலாம். தேர்வில் பங்கேற்காமலே கூட தகவல்களை தெரிந்து கொள்ளலாம் என்றாலும், தேர்வில் பங்கேற்று சரியான பதில்களை அளித்தால் செயலி மூலம் அதற்கான சான்றிதழையும் பெற்றுக்கொள்ளலாம். இந்த விவரங்களை நண்பர்களுடன் சமூக ஊடகத்திலும் பகிர்ந்து கொள்ளலாம். இந்த செயலியை பயன்படுத்த முதலில் அதில் உறுப்பினராக பதிவு செய்து கொள்ள வேண்டும்.

muslim2மிகவும் எளிதாக வடிவமைக்கப்பட்டுள்ள இந்த செயலி மூலம் நம்முடைய சுதந்திர போராட்ட வரலாற்று தகவல்களை சுவாரஸ்யமான முறையில் தெரிந்து கொள்ளலாம்.

முதல் சுதந்திர போர் என வர்ணிகப்படும் 1857 சிப்பாய் கிளர்ச்சியில் பங்கேற்ற பேகம் ஹஸ்ரத் மஹால், இந்தியாவின் முதல் பெண் அமைச்சரான மசுமா பேகம், பகத்சிங் விடுதலைக்காக சட்டப்போராட்டம் நடத்திய முகமது ஆசிப் அலி, இரு தேசம் கொள்கையை எதிர்த்த டாக்டர் சையது முகமது, மாணவராக இருக்கும் போதே சுதந்திர போராட்ட்த்தில் இணைந்த டாக்டர். சாதிக் அலி, இந்து-முஸ்லிம் ஒற்றுமைக்காக பாடுபட்ட டாக்டர்.குன்வர் முகமது அஷரப், சீர்திருத்த கருத்துக்களை முன்வைத்து போராடிய ஆகா சுல்தான் முகமது ஷா என சுதந்திர போராட்டத்தில் சுடர் விட்ட பல ஆளுமைகளை இந்த செயலி மூலம் அறிந்து கொள்ளலாம்.

மென்பொருள் துறையில் 12 ஆண்டுகள் அனுபவம் மிக்க காலீத் 4 மாத காலம் முயற்சி செய்து இந்த செயலியை உருவாக்கியுள்ளார். இதில் உள்ள கேள்விகளை வடிவமைக்க அவரது நண்பரான அமானுல்லா கான் உதவியுள்ளார்.

மறக்கப்பட்ட இந்திய சுதந்திர போராட்ட தியாகிகள் குறித்த விழிப்புணர்வை இந்த செயலி மூலம் ஏற்படுத்துவது மிகுந்த மனநிறைவை தருவதாக காலீத் சொல்கிறார். இந்த செயலியை உருவாக்குவதில் எந்த சிக்கலும் இல்லை என்றும், இதை மக்களிடம் கொண்டு செல்வது தான் சவாலாக இருக்கிறது என்கிறார். எனினும் இந்த செயலி மெல்ல கவனத்தை ஈர்த்து வருகிறது.

சுதந்திர தினத்தன்று அறிமுகம் செய்யப்பட்ட நிலையில், இதுவரை 6,400 பேருக்கு மேல் இதை தரவிறக்கம் செய்து பயன்படுத்தியிருப்பதாக சொல்கிறார். அதுமட்டும் அல்லாமல், பலரும் ஆர்வத்துடன் இதில் உள்ள தேர்வில் பங்கேற்று வருவதாகவும் அவர் உற்சாகத்துடன் சொல்கிறார்.

இந்த செயலிக்கு கிடைத்துள்ள வரவேற்பை அடுத்து தமிழ், உருது உள்ளிட்ட மொழிகளிலும் இதை கொண்டு வர இருப்பதாக சொல்கிறார். ஏற்கனவே பலரிடம் இருந்து இதற்கான கோரிக்கைகள் வரத்துவங்கியிருக்கின்றன.

அடுத்த கட்டமாக, இந்து-முஸ்லிம் ஒற்றுமை, சமூக நல்லிணக்கத்தை வலியுறுத்தும் செயலியை பிரபல சமூக செயற்பாட்டாளரான டாக்டர்.ராம் புனைனி (Dr.Ram Puniani) வழிகாட்டுதலுடன் உருவாக்கி இருப்பதாகவும், குடியரசு தினத்தன்று இதை அறிமுகம் செய்ய இருப்பதாகவும் அவர் தெரிவிக்கிறார்.

 

ஆண்ட்ராய்டு போன்களில் தரவிறக்கம் செய்ய: https://play.google.com/store/apps/details?id=com.raylabs.muslimfreedomfighters

 

 

 

நன்றி; தமிழ் இந்துவில் எழுதியது

 

ஆவணப்படங்களுக்கான தேடல் தளங்கள்

topதிரைப்படங்களுக்கு என்று தனியே தேடியந்திரங்கள் இருப்பது போல டாக்குமண்ட்ரி என குறிப்பிடப்படும் ஆவணப்படங்களுக்காக என்றே தனியே தேடியந்திரங்கள் இருக்கின்றன. டாப்டாக்குமண்ட்ரிபிலிம்ஸ், டாக்குமண்டரிஹெவன்,டாக்குமண்ட்ரிஸ்டிராம், டாக்குமண்ட்ரிவயர் என ஆவணப்பட பிரியர்களை மகிழ்ச்சியில் ஆழ்த்தக்கூடிய அளவில் இந்த பட்டியல் நீள்கிறது.

ஆனால், தேடியந்திர அளவுக்கோளின் படி பார்த்தால் இவற்றை முழு வீச்சிலான தேடியந்திரங்கள் என்று வரையறுக்க முடியாது. இவை தேடல் வசதி கொண்ட இணையதளங்களாக இருக்கின்றன. இருப்பினும் முழுக்க முழுக்க ஆவணப்படங்களை மையமாக கொண்டு செயல்படுவதால் இவற்றின் மூலம் புதிய ஆவணப்படங்களை அணுகுவது எளிதானது.

பொதுவாக தேடியந்திரங்கள் இணையத்தில் துழாவி, இணைய பக்கங்களை அட்டவனையிட்டு அவற்றை தேடப்படும் குறிச்சொல்லுக்கு ஏற்ப பட்டியலிட்டு தருகின்றன. இதற்கு மாறாக ஆவணப்பட இணையதளங்கள் அவற்றை ஒரே இடத்தில் தொகுத்தளிக்கின்றன. இந்த தளங்கள் பட்டியலிடும் ஆவணப்படங்களை பெரும்பாலும், இணையத்தில் நீங்களே தேடிக்கொள்ளலாம். ஆனால் அதற்காக தனியே மெனக்கெடும் தேவை இல்லாமல் இவை ஆவணப்படங்களை தொகுத்து அளிக்கின்றன. எனினும் விஷயமறிந்தவர்களின் தேர்வு மற்றும் சக ஆவணப்பட ரசிகர்களின் பங்கேற்கு ஆகிய அம்சங்கள் இவற்றை ஆவணப்பட தேடலுக்கு நிகரில்லாதவையாக ஆக்குகின்றன.

டாப்டாக்குமண்ட்ரிபிலிம்ஸ்.காம் (http://topdocumentaryfilms.com/ ) இதற்கு நல்ல உதாரணம். இந்த தளம் ஆவணப்படங்களை அழகாக தேர்வு செய்து முன்வைக்கிறது. முகப்பு பக்கத்திலேயே ஆவணப்படங்களின் பட்டியலை பார்க்கலாம். ஒவ்வொரு படம் குறித்த சுருக்கமான அறிமுகத்துடன் அவற்றுக்கான இணைப்பு அளிக்கப்பட்டுள்ளது. எந்த தலைப்பில் ஆவணப்படம் தேவையோ அதற்கான குறிச்சொல்லை டைப் செய்து தேடலாம்.
இவைத்தவிர ஆவணப்படங்களை அவற்றின் வகைகளுக்கு ஏற்பவும் தேடலாம். சிறந்த ஆவணப்படங்களின் பட்டியலும் இருக்கிறது. தனிமனித முயற்சியாக துவங்கி, ரசிகர்களின் பங்களிப்போடு சிறப்பாக செயல்பட்டு வருகிறது இந்த தளம். பின்னூட்டங்கள் வாயிலாக, ஆவணப்படங்கள் தொடர்பான விவாத்த்திலும் ஈடுபடலாம்.

டாக்குமண்டரிஹெவன்.காம் (http://documentaryheaven.com/ ) தளமும் ஏறக்குறைய இதே விதமாக அமைந்திருக்கிறது. வழக்கமான பட்டியல் தவிர, அதிகம் பார்க்கப்பட்டவை, மற்றும் இப்போது பார்க்கப்படுவை எனும் தலைப்புகளிலும் ஆவணப்படங்கள் முன்வைக்கப்படுவது சுவாரஸ்யம் அளிக்கலாம்.

டாக்குமண்டரிஸ்டிராம்.காம் (http://documentarystorm.com/ ) புதிய படங்கள், அதிகம் பார்க்கப்படுபவை, அதிக வாக்குகள் பெற்றவை என தனித்தனி தலைப்புகளில் ஆவணப்படங்களை பட்டியலிடுகிறது. இவைத்தவிர போகிற போக்கில் தேர்வு செய்யப்பட்டு முன்வைக்கப்படும் பட்டியலும் உள்ளது. வகைகள் மற்றும் முன்னணி பட்டியல் மூலமும் தேடலாம்.

டாக்கும்னட்ரிவயர்.காம் ( http://www.documentarywire.com/) தளமும் இதே போன்ற அம்சங்களை கொண்டிருந்தாலும், இந்த தளத்தில் ரசிகர்களின் பங்கேற்பு மற்றும் அதற்கான அம்சங்கள் அதிகம் இருப்பதை உணரலாம். இதில் உறுப்பினராக சேர்ந்து கருத்துக்களை பகிர்ந்து கொண்டு உரையாடலில் ஈடுபடலாம். உறுப்பினர்களின் கருத்துக்கள் தனியே முன்னிறுத்துப்படுவதால், அவற்றை பின்பற்றியும் ஆவணப்படங்களை அணுகலாம். அதிகம் விரும்ப பட்ட மற்றும் அதிகம் விவாதிக்கப்பட்ட ஆவணப்படங்களின் பட்டியலையும் காணலாம்.

பிரிடாக்குமண்டரிஸ்.ஆர்க் ( https://freedocumentaries.org/) ஆவணப்படங்களை ஸ்டீரிமிங் முறையில் பார்க்க வழிசெய்கிறது.

டாக்குமண்டரி24.காம் (http://www.documentary24.com/ ) மிக எளிமையான வடிவமைப்புடன் வரவேற்கிறது. செய்திகளுக்கான பட்டியல் போல ஆவணப்படங்கள் பட்டியலிடப்பட்டிருப்பதால் அவற்றை எளிதாக தேர்வு செய்யலாம்.வரிசையாக பட்டியலை பார்க்கலாம். அல்லது மேலே உள்ள வகைகளில் கிளிக் செய்து அணுகலாம்.
டாக்குமண்டரிலாக்.காம் (http://www.documentary-log.com/ ) கொஞ்சம் சிக்கலான வடிவமைப்பு கொண்டிருந்தாலும், ஆசிரியர் குழு பரிந்துரை, அதிக பின்னூட்டங்கள் பெற்றவை என கூடுதல் அம்சங்களை கொண்டுள்ளது.
டாக்குமண்டரிடியூப்.காம் (http://www.documentarytube.com/ ) தளத்தையும் இந்த பட்டயலில் சேர்த்துக்கொள்ளலாம். ஆவணப்படங்கள் தொடர்பான செய்திகள் மட்டும் கட்டுரைகளையும் அளிப்பது இதன் சிறப்பம்சம்.
ஆவணப்பட உலகில் மூழ்கி திளைக்க விரும்புகிறவர்களுக்கும், புதிய ஆவணப்படங்களை கண்டு கொள்ள விரும்புகிறவர்களுக்கும் இந்த தளங்கள் உற்சாகம் அளிக்க கூடியவை!

———

குறிப்பு: தேடியந்திரங்கள் தொடர்பாக தமிழ் இந்து இணைய பதிப்பில் எழுதி வரும் ஆ’வலை’ வீசுவோம் தொடரின் நீட்சியாக இதை வாசித்தால் இன்னும் பயனுள்ளதாக இருக்கும்:http://bit.ly/2aFndTa

2

உங்கள் லைசன்சின் செல்வாக்கு என்ன? அடையாளம் காட்டும் இணையதளம்

உங்கள் வாகன ஓட்டுனர் உரிமம் (லைசன்ஸ்) எந்த அளவுக்கு செல்வாக்கு மிக்கது என்பது உங்களுக்கு தெரியுமா? அதாவது அந்த உரிமம் உள்ளூரில் செல்லுபடி ஆவது தவிர உலக நாடுகளில் வேறு எங்கெல்லாம் ஏற்றுக்கொள்ளப்படும் என்பது உங்களுக்குத்தெரியுமா?

இது சுவாரஸ்யமான கேள்வி மட்டும் அல்ல; அடிக்கடி வெளிநாடுகளுக்கு செல்பவர்களுக்கு அந்த நாடுகளில் தங்கள் வாகன ஓட்டுனர் உரிமம் செல்லுபடியாகுமா? என தெரிந்து கொள்வது பயனுள்ளதாக இருக்கும். இந்த விவரங்களை எல்லாம் ஒரே இடத்தில் தெரிந்து கொள்ள முடிந்தால் எப்படி இருக்கும்? கேப்டன்கம்பேர்.காம் இணையதளம் இதை அழகாக செய்கிறது.

ஆஸ்திரேலியாவை சேர்ந்த கார் இன்சூரன்ஸ் இணையதளமான இது, உலக நாடுகளின் வாகன உரிமத்தின் செல்வாக்கை தொடர்பான விவரங்களை அளிக்கிறது.

இந்த விவரங்களின் அடிப்படையில் பல்வேறு நாடுகளின் வாகன ஓட்டுனர் உரிமம் எந்த அளவுக்கு சக்தி மிக்கது என்பதை பட்டியலிட்டுள்ளது. அதன்படி பிரிட்டன் மற்றும் பிரான்ஸ் ஆகிய நாடுகள் தான் சக்திவாய்ந்த வாகன ஓட்டுனர் உரிமங்களை பெற்றுள்ளன. இந்நாடுகளின் வாகன ஓட்டுனர் உரிமம் அநேகமாக முக்கிய நாடுகள் எல்லாவற்றிலும் செல்லுபடியாகிறது. இந்த இரு நாடுகளுக்கும் 97 புள்ளிகள் கொடுக்கப்பட்டுள்ளன. 96 புள்ளிகளுடன் ஜெர்மனி 2 வது இடத்திலும் ஸ்வீடன் 93 புள்ளிகளுடன் 3 வது இடத்திலும் உள்ளது. இந்தியாவின் வாகன ஓட்டுனர் உரிமத்திற்கு 70 புள்ளிகள் கொடுக்கப்பட்டுள்ளது.

இந்த புள்ளிகள் எப்படி கணக்கிடப்படுகின்றன ?ஒரு நாட்டின்வாகன ஓட்டுனர் உரிமம் எந்த எந்த நாடுகளில் எல்லாம் எந்த அளவு செல்லுபடியாகின்றன என்பதன் அடிப்படையில் புள்ளிகள் கொடுக்கப்பட்டு அவற்றின் கூட்டுத்தொகையே இப்படி செல்வாக்காக சுட்டிக்காட்டப்படுகிறது.

இதன் படி பார்த்தால் இந்திய வாகன ஓட்டுனர் உரிமம் சீனாவில் ஏற்றுக்கொள்ளப்படுவதில்லை. அங்கு புதிதாக தான் விண்ணப்பிக்க வேண்டும். ஆனால் ரஷ்யாவில் ஆறு மாதங்களுக்கு செல்லுபடியாகும். அதன் பிறகு சோதனையில் பங்கேற்காமல் அந்நாட்டு உரிமைத்தை பெற்றுக்கொள்ளலாம். அதே போல கனடாவில் ஆறு மாதங்களுக்கு செல்லும். அமெரிக்காவில் கொஞ்சம் கட்டுப்பாடுகளுடன் செல்லுபடியாகும். பிரேசில் நாட்டிலும் ஆறு மாதங்களுக்கு ஏற்றுக்கொள்ளப்படும். ஜெர்மனியிலும் இதே போல ஏற்றுக்கொள்ளப்படும்.
இப்படி இந்திய உரிமம் மற்ற நாடுகளில் எந்த அளவுக்கு செல்வாக்கு மிக்கது என்பதை தெரிந்து கொள்ளலாம். இதே போலவே மற்ற நாடுகளின் உரிமங்களின் செல்வாக்கையும் தெரிந்து கொள்ளலாம்.உதாரணத்திற்கு பிரான்ஸ் நாட்டு உரிமத்திற்கு இந்தியா 12 மாத காலம் அனுமதி அளிக்கிறது.
உலக வரைபடத்தின் மீது இந்த விவரங்கள் சுட்டிக்காட்டப்படுகின்றன.

ஆனால் எல்லா உலக நாடுகள் பற்றிய தகவல்களும் கிடையாது. 36 முக்கிய நாடுகளின் விவரங்கள் மட்டுமே தொகுக்கப்பட்டுள்ளன.
inஇந்த இணையதளத்தில் கூடுதல் சுவாரஸ்யம் என்ன என்றால் ஒவ்வொரு நாட்டின் போக்குவரத்து தொடர்பான சுவையான தகவல்களும் இடம்பெற்றுள்ளன.
உதாரணத்திற்கு சீனாவில் பகலில் ஹெட்லை எரிந்தால் அபராதம் உண்டு. ஆஸ்திரேலியாவில் காரோட்டிச்சென்றால் பெட்ரோல் இருப்பை உறுதி செய்து கொள்ள வேண்டும். ஏனெனில் அங்கு பெட்ரோல் பங்குககளை பலமைல் இடைவெளியில் தான் பார்க்க முடியும். அதே போல சராசரியாக ஆஸ்திரேலிய காரோட்டிகள் ஆண்டுக்குஇ 13,000 கி.மீ பயண,ம் செய்கின்றனர். இப்படி பல சுவாரஸ்யமான விவரங்களை தெரிந்து கொள்ளலாம்.

இணையதள முகவரி: http://www.captaincompare.com.au/power-driving-licence/

indexபாஸ்போர்ட்; இதே போலவே உலக நாடுகளின் பாஸ்போர்ட்டின் செல்வாக்கை பாஸ்போர்ட் இண்டெக்ஸ் இணையதளம் அடையாளம் காட்டுகிறது. பாஸ்போர்ட்டின் செல்வாக்கு, குறிப்பிட்ட நாட்டின் பாஸ்போர்ட் வைத்திருப்பவர்கள் எந்த நாடுகளுக்கு எல்லாம் விசா இல்லாமல் செல்லலாம் அல்லது அங்கு போய் இறங்கியவுடன் விசா பெற்றுக்கொள்ளலாம் என்பதன் அடிப்படையில் கணக்கிடப்படுகிறது.
இந்த பட்டியலின் படி பிரிட்டனுக்கு தான் முதலிடம் . அந்நாட்டு பாஸ்போர்ட் வைத்திருந்தால் உலகில் 147 நாடுகளில் விசா வேண்டாம். அமெரிக்காவும் இதே செல்வாக்கை பெற்றிருக்கிறது. இந்த பட்டியலில் இந்தியாவுக்கு 59 வது இடம். 59 நாடுகளில் இந்தியர்கள் விசா பெறாமல் செல்லலாம்.
பாஸ்போர்ட் செல்வாக்கு பட்டியல் தனியே கொடுக்கப்பட்டுள்ளதுடன் உலக வரைபடத்தின் மீது கிளி செய்தும் இந்த விவரங்களை தெரிந்து கொள்ள வழி இருக்கிறது. மேலும் முகப்பு பக்கத்தில் வரிசையாக் எல்லா நாடுகளின் பாஸ்போர்ட்டும் இடம்பெற்றுள்ளன. அவற்றிலும் கிளிக் செய்து பார்க்கலாம்.

இணையதள முகவரி: http://www.passportindex.org/index.php

——-

அம்பேத்கர் பிறந்தநாளில் கூகுள் டூடுல் !

சட்ட மேதை அம்பேத்கர் 124 வது பிறந்தநாளை கொண்டாடும் வகையில் கூகுல் தனது முகப்பு பக்கத்தில் லோகோவில் அம்பேத்கர் உருவம் தோன்றும் வகையில் டூடுல் சித்திரத்தை உருவாக்கியுள்ளது.
முன்னனி தேடியந்திரமான கூகுள், முக்கிய தினங்கள் மற்றும் மேதைகளின் பிறந்தநாள் ஆகிய நிகழ்வுகளின் போது தனது முகப்பு பக்கத்தில் உள்ள லோகோவில் அவர்களை போற்றும் வகையில் சித்திரங்களை வெளியிடுவது வழக்கம். கூகுல் டூடுல் என இவை பிரபலமாக குறிப்பிடப்படுகின்றன.

இந்திய அரசியல் சாசனத்தின் தந்தை என போற்றப்படுபவரும், சமூக நீதிக்காக போராடியவருமான பி.ஆர்.அம்பேத்கரின் 124 வது பிறந்த நாளை முன்னிட்டு கூகுள் தனது லோகோவில் அம்பேத்கர் உருவப்படம் இடம்பெற்ற டூடுல் சித்திரத்தை வெளியிட்டுள்ளது.

கூகுள் எழுத்துக்களின் நடுவே அம்பேத்கரின் உருவம் தோன்றுவது போல இந்த டூடுல் அமைந்துள்ளது. இந்த டூடுல் மீது கிளிக் செய்தால் அம்பேத்கர் தொடர்பான தேடல் முடிவுகள் இடம்பெற்ற இணைய பக்கத்திற்கான இணைப்பு கொடுக்கப்பட்டுள்ளது.

கூகுள் டூடுல் பற்றி விவரமறிய: http://www.google.com/doodles
———

கூகுள் டூடுல் பற்றிய முந்தைய பதிவுகள் சில: http://cybersimman.com/category/search/page/12/

http://cybersimman.com/2010/05/22/google-49/