Tag Archives: தேடல்

பாட்டி கற்றுக்கொடுத்த இணைய பாடம்!

_89993166_ben_john_granஇங்கிலாந்தைச்சேர்ந்த 86 வயது பாட்டி ஒருவர் கூகுளில் எப்படி தேடுவது என கற்றுக்கொடுத்திருக்கிறார். கூகுளில் தேடுவது தான் நமக்கெல்லாம் அத்துப்படியாயிற்றே, அப்படி இருக்க பாட்டியிடம் கற்றுக்கொள்ள என்ன இருக்கிறது என பலரும் நினைக்கலாம். உண்மையில் பாட்டி, தேடல் நுட்பத்தை கற்றுக்கொடுக்கவில்லை, ஆனால் இணைய பயன்பாட்டில் கொஞ்சம் பணிவு தேவை என்பதை தனது அறியாமை மூலம் அழகாக புரிய வைத்திருக்கிறார்.

விஷயம் இது தான். இங்கிலாந்தின் கிரேட்டர் மான்செஸ்டரில் வசிப்பவர் மே அஸ்வத். 86 வயதான இந்த பாட்டி வயதானவர்களுக்கான இணைய வகுப்பில் சேர்ந்து அடிப்படை விஷயங்களை கற்றுக்கொண்டிருக்கிறார். இருந்தாலும் இன்னும் இமெயிலுக்கு கூட அவர் அதிகம் பழகவில்லை. ஆனால் அடிக்கடி கூகுளில் தேடிப்பார்க்கும் பழக்கம் கொண்டிருக்கிறார். இப்படி தான் சமீபத்தில் அவர் கூகுளில் ஒரு தகவலை தேடிப்பார்த்திருக்கிறார். அதன் பிறகு தனது லேப்டாப்பை அணைக்காமல் அப்படியே விட்டுவிட்டார்.
பேரன் பென் எகர்ஸ்லே, பாட்டியை காண வந்த போது இந்த லேப்டாப்பை பார்த்து அதில் கூகுள் தேடல் பக்கம் அப்படியே இருப்பதை கவனித்திருக்கிறார். பாட்டி என்ன தேடிய விதத்தை பார்த்து பேரன் அசந்து போய்விட்டார்.

ஏனெனில் பாட்டி தனது தேடல் கோரிக்கையை மிகவும் பணிவாக டைப் செய்து நன்றியும் தெரிவித்திருந்தார்.
“ தயவு செய்து இந்த ரோமன் எழுத்துக்களை மொழிபெயர்க்கவும், மிக்க நன்றி” – இப்படி தான் பாட்டியின் தேடல் கோரிக்கை அமைந்திருந்தது. கூகுளில் கோடானு கோடி முறை தகவல்கள் தேடப்பட்டு வருகின்றன. பெரும்பாலானோர் கேள்விகளாக கூட கோரிக்கை வைத்துள்ளனர். சிலர் கேலியாக கூட தேடியுள்ளனர். ஆனால், இப்படி தயவு செய்து என கேட்டு பணிவுடன் தேடி அதற்கு நன்றியும் தெரிவித்துக்கொண்ட முதல் பயனாளியாக இந்த பாட்டி தான் இருக்க வேண்டும்.

பேரன் பென் உடனே பாட்டியின் தேடல் பக்கத்தை ஸ்கிரீன்ஷாட் எடுத்து தனது டிவிட்டர் பக்கத்தில், பகிர்ந்து கொண்டார். “ என் பாட்டியின் லேப்டாப்பை திறந்து பார்த்த போது அவர் தயவு செய்து, மற்றும் நன்றி என பயன்படுத்தியதை பார்த்து சிரிக்காமல் இருக்க முடியவில்லை என அவர் தெரிவித்திருந்தார்.
இந்த பகிர்வு பற்றி அவர் பெரிதாக நினைக்கவில்லை. ஆனால் மற்றவர்களை பாட்டியின் பணிவான தேடல் மிகவும் கவர்ந்து விட்டது. பலரும் இந்த பணிவை பாராட்டி டிவிட்டர் மூலம் பதில் அளித்தனர். மேலும் பலர் இந்த குறும்பதிவை தங்கள் நட்பு வட்டத்தில் பகிர்ந்து கொண்டனர். இந்த தகவலை பார்த்தவர்களும் வியந்து போய் அதை தங்கள் பங்கிற்கு மறு குறும்பதிவிட்டனர்.

இப்படியாக 10,000 முறைகளுக்கு மேல்க் அந்த குறும்பதிவு பகிரப்பட்டு அதைவிட அதிக முறை விரும்பப்பட்டு பாட்டி இணைய புகழ் பெற்ற பாட்டியாகிவிட்டார். அது மட்டும் அல்ல இந்த குறும்பதிவுகளை கவனித்த கூகுல் நிறுவனமே அவருக்கு பதில் அளித்து, எங்களுக்கு நன்றி எல்லாம் சொல்ல வேண்டாம் பாட்டியம்மா எனக்கூறி அவரது பணிவுக்கு நன்றி தெரிவித்துள்ளது.

ஆனால் பாட்டி இணைய புகழ் பெற்றது முக்கியமல்ல: அவர் செய்த விஷயமும் அதற்கான எதிர்வினையுமே முக்கியமாக இருக்கிறது.

நாம் எல்லோரும் தான் இணையத்தில் தேடுகிறோம். சொல்லப்போனால் தேடல் கலையில் நிபுணத்துவமும் பெற்று விடுகிறோம். ஆனால் தேடலை நாம் சர்வ சாதாரணமாக எடுத்துக்கொள்கிறோம். தேடல் என்றில்லை இணையத்தில் பல விஷயங்களை மிகச்சாதாரணமாக நினைத்து விடுகிறோம்.
ஆனால் பாட்டி மே அஸ்வத்தை போன்ற ஒருவர் நமக்கு அரிதான ஒரு விஷயத்தை நினைவுபடுத்தியிருக்கிறார். அதாவது இணையத்தில் புழங்கும் போது நாம் பணிவுடன் செயல்பட மறந்து விடுகிறோம் என்பதை அவர் உணர்த்தியிருக்கிறார்.

உண்மையில் பாட்டி இதை தெரியாமல் தான் செய்திருக்கிறார். இணையத்தில் தேடும் போது வேண்டுகோளே தேவையில்லை, கட்டளையிட்டாலே போதும் என்பதை அறியாமல், அவர் தயவு செய்து என விளித்து வேண்டுகோள் வைத்திருக்கிறார். ” கூகுளில் தேடும் போது மறுமுனையில் யாரோ ஒருவர் இருந்து தேடித்தருகிறார் என நினைத்ததாகவும், வேண்டுகோள் விடுத்தால் விரைவான பதில் கிடைக்கும் எனும் நம்பிக்கையில் இவ்வாறு கோரிக்கை வைத்ததாகவும் பாட்டியே கூறியுள்ளார்.

பாட்டி அறியாமையில் செய்தாலும் அவரது செயல் யோசிக்க வைக்கிறது. இணையவாசிகள் பலரும் தேடலில் அவர் காட்டிய பணிவால் வியந்தும் நெகிழ்ந்தும் போயிருக்கின்றனர். ஒருவர் இது தான் மிகவும் அழகான விஷயம் என்று பாராட்டியுள்ளார். இன்னொருவர் அடுத்த முறை தேடும் போது நானும் இதே முறையை பின்பற்றுகிறேன் என கூறியுள்ளார். இன்னொருவர் பாட்டியின் பண்பாடு வியக்க வைக்கிறது என கூறியுள்ளார். முந்தைய தலைமுறைக்கு மட்டும் தான் இது சாத்தியம் என்றும் பலர் கூறியுள்ளனர்.

இந்த விவாதச்சரடு சில சுவாரஸ்யமான கேள்விகளை எழுப்புகிறது.தயவு செய்து மற்றும் நன்றி போன்ற வார்த்தைகளை பயன்படுத்துவது நல்ல பண்பாடு. இணையத்தில் நாம் ஏன் அதை மறந்து விடுகிறோம். யோசித்துப்பாருங்கள், இணையத்தில் தேடும் ஒவ்வொரு முறையும் , அந்த கோரிக்கையை பணிவோடு சமர்பித்தால் எப்படி இருக்கும். இணைய தேடலில் குறிச்சொல்லை அடிப்பதை விட்டுவிட்டு, தயவசெய்து என துவங்கி நீட்டி முழக்குவது எல்லாம் தேவையா? என பலரும் கேட்கலாம். ஆனால் இணையத்தில் தேடும் போது பணிவு தேவை என்பதல்ல விஷயம்; இந்த விதிவிலக்கான ஒரு நிகழ்வு அதன் அரிதான தன்மை காரணமாக இணையத்தை நாம் பயன்படுத்தும் விதம் பற்றி யோசிக்க வைக்கிறது. கூகுளில் தேடும் போது பணிவோ ,கணிவோ தேவைப்படாது தான். ஆனால் இணையத்தில் விவாதத்தில் பங்கேற்கும் போதும், கருத்துக்களை வெளியிடும் போதும் நாம் அடிப்படை மனித பண்புகளை கடைபிடிக்க வேண்டும் அல்லவா?

கருத்துக்களை வெளியிடுவது எளிதாக இருக்கிறது என்பதற்காக, எதை வேண்டுமானாலும் ,எப்படி வேண்டுமானாலும் சொல்லும் போக்கு இணையத்தின் பிராகாசத்தையே குறைக்கிறதே!

பேஸ்புக் கருத்துக்களிலும், வலைப்பதிவு விவாதங்களிலும் எத்தனை காழ்ப்புணர்ச்சியை, துவேஷத்தின் வெளிப்பாட்டை அடிக்கடி பார்க்க நேர்கிறது. கலாய்க்கும் வாய்ப்பை பயன்படுத்தி ஆளுமைகளை அடித்து நொறுக்குகிறோம். மறுமுனையில் இருப்பவர் நிலை பற்றி கவலைப்படாமல் மோசமாக கருத்துச்சொல்லி மனங்களை உடைக்கிறோம். உடன் பருமனாக இருப்பவர் புகைப்படத்தை பார்த்து எள்ளி நகையாடுவதும், ஒருவரின் நிறம் அல்லது பின்னணி குறித்து துவேஷமான கருத்துக்களை கூறி காயப்படுத்துகிறோம். எத்தனை பலவீனமான உள்ளங்களை இணையம் பக்கமே வராமல் ஓடச்செய்திருப்போம். இசங்களை கேலி செய்கிறோம். இன்னும் பலவிதங்களில் இணைய சுதந்திரத்தை அதன் அருமையே உணராமல் தவறாக பயன்படுத்திக்கொண்டிருக்கிறோம்.

இவை எல்லாவற்றையும் தான் பாட்டி தன்னை அறியாமல் சுட்டிக்காட்டியிருக்கிறார். மாற்று கருத்தை முன்வைத்தால் கூட கண்ணியமாக தெரிவிக்க வேண்டும், கருத்து கூறும் போது மற்றவர் மனம் காயப்படாமல் இருக்க வேண்டும் என்பது போன்ற மனிதநேர பண்புகள் இணைய உரையாடலிலும் நமக்குத்தேவை என அவர் உணர்த்தியிருக்கிறார்.

பாட்டி பேரனின் டிவிட்டர் பக்கம்: @Push10Ben

பாட்டிக்கு கூகுள் பாராட்டு பற்றிய பிபிசி செய்தி: http://www.bbc.com/news/uk-36538356

duckduckgo-bangs

டக்டக்கோ தேடியந்திரத்திற்கு மாறலாமா?

தேடியந்திரம் என்றவுடன் கூகுள் தான் உங்கள் நினைவுக்கு வரும்.பிரபல டி.வி விளம்பரம் ஒன்றின் வாசகம் போல, எனக்கு நினைவு தெரிந்த நாளில் இருந்து கூகுளை தான் தேடலுக்கு பயன்படுத்திக்கொண்டிருக்கிறேன் என பலரும் கூறலாம்

ஆனால்,கூகுளைத்தவிரவும் பல தேடியந்திரங்கள் இருப்பதை நீங்கள் அறிவீர்களா?எல்லாம் தெரியும்,ஆனால் எந்த தேடியந்திரமும் கூகுளுக்கு நிகராக முடியாது என பதில் சொல்வதற்கு முன் டக்டக்கோ தேடியந்திரத்தை பயன்படுத்தி பார்க்க வேண்டும்.
கொஞ்சம் விநோதமான பெயர் கொண்ட டக்டக்கோ மாற்று தேடியந்திரங்களின் வரிசையில் முதலில் வருகிறது.கூகுளுக்கு சவால் விட முயன்ற பல தேடியந்திரங்கள் மண்ணைக்கவ்வி விட்ட நிலையில் டக்டக்கோ இன்னமும் தாக்கு பிடித்திருக்கிறது என்பது மட்டும் அல்ல;இணைய தேடலில் தனக்கென தனி இடத்தையும் பிடித்திருக்கிறது.

மாற்று தேடியந்திரம்
இன்னமும் கூகுள் தான் தேடலின் முடிசூடா மன்னனாக இருக்கிறது என்றாலும் பல இணையவாசிகள் டக்டக்கோ தேடியந்திரத்திற்கு மாறிக்கொண்டிருக்கின்றனர்.இப்படி மாறியவர்கள் டக்டக்கோ தரும் அனுபவம் சிறந்ததாக இருக்கிறது என சான்றிதழும் அளிக்கின்றனர்.

இது கொஞ்சம் ஆச்சர்யம் தான்.கூகுள் தேடலின் எளிமை மற்றும் வல்லமைக்கு பழகியவர்கள் இன்னொரு தேடியந்திரத்தை பாராட்டுவது என்பது அரிதானது தான். ஆனால் கூகுள் தேடலுக்கு பழகியவர்களை வியப்பில் ஆழ்த்தக்கூடிய வகையில் டக்டக்கோ தேடியந்திரம் புதுமையான பல அம்சங்களை கொண்டிருக்கிறது. அது மட்டும் அல்ல,டக்டக்கோ ஏற்கனவே உள்ள அம்சங்களை மெருகேற்றி வருவதுடன் புதிய அம்சங்களையும் அறிமுகம் செய்து வருகிறது.

ஒரு தேடியந்திரமாக டக்டக்கோ தரும் அனுபவத்தை பார்ப்பதற்கு முன்னர் இந்த தேடியந்திரத்திற்கு மாறுவதற்காக பலரும் கூறும் காரணத்தை நீங்கள் அவசியம் தெரிந்து கொள்ள வேண்டும்- டக்டக்கோ உங்களை கண்காணிப்பதில்லை என்பது தான் அந்த காரணம்!.

காண்காணிப்பில் இருந்து விடுதலை

ஆம்,டக்டக்கோவின் சிறப்பம்சம் இணையவாசிகளின் எந்த ஒரு அசவையும் அது கண்காணிக்காமல் நல்லதொரு தேடியந்திரமாக இருப்பது தான்.கண்காணிப்பு என்னும் போது ,இணையவாசிகள் என்ன தேடுகின்றனர், எந்த வகையான இணையதளங்களுக்கு செல்கின்றனர்?இணையதளத்தில் என்ன பொருட்களை வாங்குகின்றனர்? என்பது போன்ற விவரங்களை எல்லாம் தெரிந்து கொள்ளமால் இருப்பதை குறிக்கிறது.இது அனைத்தையும் கூகுள் செய்கிறது என்பதை நிங்கள் அறிந்து கொள்ள வேண்டும்.

கூகுள் தேடல் சாம்ப்ராஜ்யமே அதன் விளைம்பர வருவாயில் இருக்கிறது. இந்த விளம்பர வருவாய் எப்படி வருகிறது? உங்களைப்போன்ற இணையவாசிகள் மூலமாக தான். இணையவாசிகளின் தேடலை கண்காணித்து அவர்கள் தேடும் பதங்களுக்கு பொருத்தமான விளம்பரங்களை தேடல் முடிவுகள் அருகே இடம் பெற வைத்து அதன் மூலம் கூகுள் வருமானம் ஈட்டுகிறது. இவ்வளவு ஏன், உங்கள் ஜிமெயில் முகவரிக்கு வரும் மெயில்களை கூட கூகுள் படிப்பதை உங்கள் மெயில் வாசகங்களுக்கு அருகிலான விளம்பரங்கள் மூலமே நீங்கள் தெரிந்து கொள்ளலாம்.

இந்த கண்காணிப்பு இணையவாசிகள் தனியுரிமையை மீறாத வகையில் அவர்களை பற்றிய தனிப்பட்ட விவரங்கள் சேகரிக்கப்படாமல் மேற்கொள்ளப்படுகிறது என கூகுள் தரப்பில் விளக்கம் அளிக்கப்படுகிறது.இணையவாசிகளின் தேடல் அனுபவத்தை மேம்படுத்தவும் இந்த விவரங்கள் தேவைப்படுவதாக கூகுள் கூறுகிறது.
ஆனாலும் என்ன கூகுள் இணையவாசிகளை தேடலை கண்காணிக்கிறது என்பதே விஷயம்.

தேடல் குமிழ் சிறை

இதில் இன்னொரு விஷயமும் இருக்கிறது,கூகுளின் தேடல் முடிவுகள் எல்லோருக்கும் பொதுவானது இல்லை தெரியுமா? ஒருவர் எந்த வகையான தேடல் முடிவுகளை பயன்படுத்துகிறார் என்பதன் அடிப்படையில் அவரவருக்கு என்று பொருத்தமான தேடல் முடிவுகளை கூகுள் முன்வைக்கிறது. ஆக, கூகுள் மூலம் நீங்கள் ஏற்கனவே விஜயம் செய்த இணையதளங்களின் அடிப்படையில் உங்களுக்கான தேடல் முடிவு அமையும்.கூகுள் இதை இணையவாசிகளின் தேவைக்கேற்ப பிரத்யேகமான முடிவுகளை அளிப்பது என்கிறது.ஆனால் இதன் இன்னொரு பொருள் , இணையவாசி தேடிய பதத்திற்கு பொருத்தமான பொதுவான தேடல் முடிவுகள் தோன்றுவதற்கு பதில் கூகுளால் வடிகட்டப்பட்ட தேடல் முடிவுகளை காண நேருகிறது என்பது தான். இந்த அம்சம் தேடல் குமிழ் என குறிப்பிடப்படுகிறது.

கூகுள் செட்டிங்ஸ் பகுதிக்கு சென்று இந்த வசதியை முடக்கி, பொதுவான தேடல் முடிவுகள் தோன்றும் படி செய்யலாம் தான். ஆனால் பெரும்பாலானோர், தேடல் குமிழ் என்ற ஒன்று இருப்பதையே அறியாதவர்களாக இருக்கின்றனர் எனும் போது அதை நீக்குவதற்கு கூகுள் மறைத்து வைத்திருக்கும் வசதியை எப்படி அறிந்திருக்க முடியும்?
duckduckgo-google-644x373
விளம்பர உலகம்

நிற்க இது கூகுள் மீது புகார் வாசித்தல் அல்ல; இன்றைய இணைய உலகம் இப்படி தான் இருக்கிறது. பேஸ்புக் உள்ளிட்ட பல முன்னணி இணைய சேவைகள் வருவாய்க்காக இது போன்ற வழிகளை தான் பின்பற்றுகின்றன.
இந்த காரணங்களினால் தான் டக்டக்கோவை அறிந்தவர்கள் அதை தலையில் வைத்து கொண்டாட தயாராக இருக்கின்றனர்.ஏனெனில் கூகுள் போல டக்டக்கோ இணையவாசிகளின் தேடல் செயல்பாடுகளை கணகாணிக்காமல் இருக்கிறது. இணையவாசிகள் தேடல் மூலம் அது விளம்பர வருவாய் ஈட்ட முயற்சிக்கவில்லை. (டக்டக்கோவில் விளம்பரம் உண்டு; ஆனால் அதை இல்லாமல் செய்யும் வசதியும் இருக்கிறது).
உங்களை கணகாணிக்காத தேடியந்திரம் என்ற வாசகத்துடன் டக்டக்கோ தன்னை முன்னிறுத்திக்கொண்டு கவனத்தை ஈர்த்தது. இதனிடையே அமெரிக்க விசுலூதி எட்வர்ட் ஸ்னோடன், அமெரிக்கா எப்படி இ-மெயில் உள்ளிட்டவற்றை உளவு பார்க்கிறது என்பதை அம்பலப்படுத்தி தனியுரிமை மீறல் பற்றிய விழிப்புணர்வை ஏற்படுத்திய பிறகு டக்டக்கோ தேடியந்திரத்தின் கண்காணிக்காத தன்மைக்காக பலரும் அதன் பக்கம் சாய்ந்துள்ளனர்.
எனவே, தேடல் செயல்பாடுகள் கண்காணிக்கப்படாத தேடல் அனுபவத்தை நீங்கள் விரும்பினால் டக்டக்கோ நல்ல மாற்று!.
சரி,ஒரு தேடியந்திரமாக டக்டக்கோவின் செயல்பாடு எப்படி?

தேடல் சேவை எப்படி?

டக்டக்கோவும் கூகுள் போலவே எளிமையான முகப்பு பக்கத்துடன் தேடல் சேவை அளிக்கிறது. தேடலுக்கான் குறிச்சொல்லை டைப் செய்தவுடன் பொருத்தமான தேடல் முடிவுகளை பட்டியலிடுகிறது. தேடல் பட்டடியலுக்கு மேல் தேடல் பதம் தொடர்பான பல்வேறு தலைப்புகளில் சுருக்கமான அறிமுகங்களை பார்க்கலாம். பல நேரங்களில் இவை நீங்கள் தேடும் பொருளுக்கு தொடர்புடைய பலனுள்ள தகவல்களாக இருப்பதை உணரலாம்.
இணைய பக்கங்கள் தவிர,புகைப்படங்கள்,வீடியோக்கள்,விளக்கங்கள் மற்றும் செயலிகளுக்கான பகுதிகள் இருப்பதையும் பார்க்கலாம்.தேடல் முடிவுகளுக்கு மேல் தோன்றும் பலவகை கட்டங்கள் கூடுதல் விவரங்களாக அமைந்திருப்பதையும் உணரலாம்.

அடிப்படை தேடல் அனுபவம் எப்படி இருக்கிறது என பயன்படுத்திப்பாருங்கள்.
ஆனால் வழக்கமான தேடல் தவிரவும் டக்டகோவிடம் அநேக அம்சங்கள் இருக்கின்றன.அவை தான் பயனாளிகளை கவர்ந்திழுத்து வருகின்றன.

அசத்தலான ஐபேங்!

இந்த அம்சங்களில் முதலில் வருவது ஐபேங்க்ஸ் வசதி. அதாவது டக்டக்கோவில் தேடாமலேயே நீங்கள் விரும்பும் இணையதளங்களுக்கு நேராக தாவிச்சென்றுவிடலாம்.உதாணத்திற்கு விக்கிபீடியா தளத்தில் ஒரு தகவல் தேவை என்றால் தேடல் பத்ததை டைப் செய்து அதனுடன் விக்கிபீடியா பெயரையும் சேர்த்து டைப் செய்ய வேண்டாம். இதற்கு பதிலாக விக்கிபீடியாவில் தேட உள்ள பத்ததை டைப் செய்து அதற்கு முன்னதாக ஒரு அடைப்புக்குறி மற்றும் டபிள்யு எனும் எழுத்தை டைப் செய்தால் போதும் நேராக அந்த தளத்திற்கு சென்று விடலாம்.
இதே போல மின்வணிக தளமான அமேசானில் ஏதாவது தேட விரும்பினால், அடைப்புக்குறி மற்றும் ஏ எனும் எழுத்தை டைப் செய்தால் போதும். இந்த வசதியை தான் ஐபேங் என குறிப்பிடுகிறது. இப்படி 6,000 க்கும் மேற்பட்ட ஐபேங் வசதி இருக்கிறது. இவற்றை பயன்படுத்திக்கொள்ளலாம் என்பதோடு நீக்களும் கூட உங்களுக்கு விருப்பமான ஐபேங் வசதியை பரிந்துரைக்கலாம்.
இந்த அம்சத்தை பயன்படுத்த கொஞ்சம் பயிற்சி தேவை. ஆனால் டக்டக்கோ தரும் ஐபேங் பட்டியலை சிலமுறை பயன்படுத்தின்ப்பார்த்தால் இதன் பயன்பாடும் ,சுவாரஸ்யமும் உங்களை ஈர்க்கும்.
duck_2517489h
உங்களிடம் அதிகாரம்

அதே போல டக்டக்கோ தேடியந்திரத்தில் இணையவாசிகள் தங்கள் இஷ்டம் போல அதன் அம்சங்களை மாற்றிக்கொள்ளலாம்.டக்டக்கோ அளிக்கும் உடனடி பதில்கள் பிடிக்கவில்லையா?அவற்றை நீக்கி விடலாம். தேடல் முடிவுகளின் எழுத்துரு,பின்னணி வண்ணம் போன்றவற்றையும் மாற்றிக்கொள்ளலாம்.தேடியந்திரம் செயல்படும் பிராந்தியம்,மற்றும் அதில் உள்ள மொழியையும் மாற்றிக்கொள்ளலாம்.
இதே போல விளம்பரங்களையும் வேண்டாம் என சொல்லலாம். ஆனால் அதற்கு டக்டக்கோவை மற்றவர்களுக்கு பரிந்துறைத்தால் போதுமானது.
இணையத்தில் கீபோர்டு குறுக்கு வழிகள் இருப்பது போல டக்டக்கோவில் தேடலுக்கான கீபோர்டு குறுக்கு வழிகளும் இருக்கின்றன.தேடல் முடிவுகளில் மேலும் கீழும் செல்ல, கீபோர்ட் அம்புக்குறியை பயன்படுத்தலாம். அதன் பிறகு எண்டர் விசையை அழுத்தினால் குறிப்பிட்ட இணையதளம் திறக்கபப்டும். ஆக,மவுஸ் மீது கைவைக்காமலே இணையத்தில் உலாவலாம்.

டக்டக்கோவை பயன்படுத்திப்பாருங்கள்!

தேடியந்திர முகவரி:https://duckduckgo.com/

——

நன்றி;விகடன்.காமில் எழுதிய கட்டுரை

( டக்டக்கோவில் உள்ள மேலும் சில முக்கிய தேடல் அம்சங்கள் பற்றி தனியே பார்க்கலாம்).

டக்டக்கோ தேடியந்திரங்கள் பற்றி தமிழ் இந்து தேடியந்திர தொடரில் எழுதிய பகுதி இது:http://tamil.thehindu.com/general/technology/%E0%AE%86%E0%AE%B5%E0%AE%B2%E0%AF%88-%E0%AE%B5%E0%AF%80%E0%AE%9A%E0%AF%81%E0%AE%B5%E0%AF%8B%E0%AE%AE%E0%AF%8D-10-%E0%AE%A8%E0%AE%AE%E0%AF%8D%E0%AE%AE%E0%AF%88-%E0%AE%95%E0%AE%A3%E0%AF%8D%E0%AE%95%E0%AE%BE%E0%AE%A3%E0%AE%BF%E0%AE%95%E0%AF%8D%E0%AE%95%E0%AE%BE%E0%AE%A4-%E0%AE%A4%E0%AF%87%E0%AE%9F%E0%AE%BF%E0%AE%AF%E0%AE%A8%E0%AF%8D%E0%AE%A4%E0%AE%BF%E0%AE%B0%E0%AE%AE%E0%AF%8D/article7562098.ece

g

நேபாள பூகம்பம்; பாதிக்கப்பட்டோர் பற்றி அறிய உதவும் கூகுள் சேவை

நேபாளத்தை உலுக்கிய பூகம்பத்தால் பாதிக்கப்பட்டவர்கள் பற்றி தகவல் அறியவும், உயிர் பிழைத்தவர்கள் பற்றி தகவல் தெரிவிக்கவும் உதவும் வகையில் கூகுள் நிறுவனம் பர்சன் பைண்டர் இணைய சேவையை துவக்கியுள்ளது.

பூகம்பம், சூறாவளி போன்ற இயற்கை பேரிடர் பாதிப்புகளின் போது தகவல் தொடர்பும் பாதிக்கப்படுவதால் இவற்றில் சிக்கியவர்களின் நிலை பற்றி உடனடியாக தகவல் பெறுவது பெரும் சிக்கலுக்கு உள்ளாகிறது. பேஸ்புக் ,டிவிட்டர் உள்ளிட்ட சமூக ஊடக சேவைகள் கைகொடுத்தாலும் கூட பேரிடர் பகுதிகளில் வசித்தவர்கள் நிலை என்ன என்பதை அவரது உறவினர்களும் அன்புக்கிறியவர்களும் உடனடியாக தெரிந்து கொள்வது கடினமான செயலாகவே இருக்கிறது. அதே போல பேரிடரில் இருந்து மீண்டவர்கள் தாங்கள் நலமாக இருக்கும் தகவலை அன்புக்குறியவர்களிடம் பகிர்ந்து கொள்வது சிக்கலானதாகவே இருக்கிறது.

இது போன்ற சூழலில் எளிதாக கைகொடுக்கும் தொழில்நுட்பமாக பியூபில் பர்சரன் இணைய சேவையை கூகுள் உருவாக்கி உள்ளது. அடிப்படையில் எளிமையான இணையதளமான இந்த சேவையில் இரண்டு பகுதிகள் இருக்கும். ஒன்று உயிர்பிழைத்தவர்கள் மற்றும் நலமுடன் இருப்பவர்கள் பற்றிய விவரங்களை தெரிவிப்பதற்கான பகுதி. பேரிடர் பகுதிகளில் தகவல் ஒருங்கிணைப்பு பெரும் சோதனைக்கு உள்ளாகும் ஆரம்ப கட்டத்தில் மீட்கப்பட்டவர்கள் பற்றிய விவரங்களை அறிந்தவர்கள் இந்த பகுதியில் அவற்றை வெளியிடலாம்.

இரண்டாவது பகுதி பாதிக்கப்பட்டவர்களின் உறவினர்கள் அவர்கள் தொடர்பான விவரங்களை தேடுவதற்கானது. இந்த பகுதியில் உறவினர்கள் பெயர் உள்ளிட்ட தகவல்களை தெரிவித்து அவர்களில் நிலை பற்றிய விவரங்களை கோரலாம். இதைப்பார்த்து விவரமறிந்தவர்கள் தகவல்களை பகிர்ந்து கொள்ளலாம்.

இவ்வாறு பாதிக்கப்பட்டவர்களின் நிலை குறித்து அறிவதற்கான மற்றும் உயிர் பிழைத்தவர்கள் குறித்த விவரங்களை பகிர்ந்து கொள்வதற்கான தகவல் மேடையாக இந்த தளம் செயல்படுகிறது.
இந்த இணைய சேவையை கூகுள் நேபாள பூகம்பத்திற்காக புதுப்பித்துள்ளது. ஏற்கனவே உத்ராகாண்ட் மேக்வெடிப்பு பாதிப்பு மற்றும் பாலின் புயல் பாதிப்பு போன்ற பேரிடர்களின் போது கூகுள் இந்த பர்சன் பைண்டர் சேவையை அமைத்தது. தற்போது நேபாள மக்களுக்கு உதவுவதற்காக இந்த சேவையை அமைத்துள்ளது.

இணையதள முகவரி: https://google.org/personfinder/2015-nepal-earthquake/

இதே போல பேஸ்புக் தளமும் பாதிக்கப்பட்ட பகுதியில் உள்ளவர்கள் தங்கள் நிலை குறித்து நிலைத்தகவலாக தெரிவிக்கும் வசதியை அறிமுகம் செய்துள்ளது.
பேஸ்புக்கின் இந்த வசதி பற்றிய விவரம் வருமாறு:

புயல் ,பூகம்பம் போன்ற பேரிடர் காலங்களில் நலமாக இருக்கிறேன் என நெருக்கமானவர்களுக்கு தகவல் தெரிவிக்கும் புதிய வசதியை சமூக வலைப்பின்னல் சேவையான பேஸ்புக் அறிமுகம் செய்துள்ளது. சேப்டி செக் எனும் பெயரில் இந்த வசதி அறிமுகமாகியுள்ளது.
பூகம்பம் ,புயல்,சுனாமி போன்ற இயற்கை பேரிடர் நிகழ்வுகளின் போது எல்லோருக்கும் உறவினர்களும் நண்பர்களும் நலமாக இருக்கின்றரா? என அறிந்து கொள்ளும் துடிப்பு இயல்பாக ஏற்படும். பேரிடர் காலங்களில் பலர் சமூக ஊடகம் மூலம் இந்த கேள்வியை கேட்பதையும் , பலரும் சமூக ஊடகம் வாயிலாக தாங்கள் நலமுடன் இருப்பதை தெரிவிப்பதையும் பார்க்கலாம்.
இப்போது இந்த தகவலை சுலபமான முறையில் நட்பு வட்டாரத்தில் பகிர்ந்து கொள்ளும் புதிய வசதியை பேஸ்புக் அறிமுகம் செய்துள்ளது. சேப்டி செக் எனும் பெயரில் பேஸ்புக் இதை அறிமுகம் செய்துள்ளது.
இந்த வசதியின் மூலம் இயற்கை பேரிடர் தாக்கும் போது, நலமாக இருக்கும் தகவலை பேஸ்புக் மூலம் எளிதாக பகிரலாம். பாதிக்கப்பட்ட பகுதியில்; உள்ள நண்பர்கள் நலமுடன் இருப்பதையும் இதன் மூலம் அறியலாம்.
சேப்டி செக் வசதியை இயக்கி வைத்தால், உங்கள் நகரில் புயலோ, பூகம்பமோ தாக்கும் போது , பேஸ்புக் உங்களுக்கு ஒரு நோட்டிபிகேஷன் அனுப்பி தகவல் கோரும். அதில் நலமாக இருக்கிறேன் எனும் வாய்ப்பை தேர்வு செய்தால் அந்த செய்தி உங்கள் டைம்லைனில் தோன்றும். நண்பர்களும் உறவினர்களும் நீங்கள் நலமாக இருப்பதை தெரிந்து கொள்ளலாம். இதே போல உங்கள் நண்பர்கள் நிலையையும் நீங்கள் அறியலாம். உங்கள் நண்பர்கள் பற்றிய தகவல் தெரிந்தால் அதையும் பகிரலாம். ( ஆனால் இதற்கு அவர்கள் அனுமதி தேவை).
பேஸ்புக்கில் நீங்கள் சம்பர்பித்துள்ள நகரின் அடிப்படையில் இந்த சேவை இயங்குகிறது. நீங்கள் அந்த நகரில் இல்லை அல்லது உங்களுக்கு பாதிப்பு இல்லை என்றால் அதையும் தெரிவிக்கலாம்.

ஜப்பான் சுனாமிக்கு பிறகு பரிதவித்தவர்கள் தங்கள் நிலையை உறவினர்களுக்கு தெரிவிக்க் பேஸ்புக் பேரிடர் தகவல் பலகையின் மேம்பாடாக இந்த வசதியை பேஸ்புக் அறிமுகம் செய்துள்ளது. நிச்சயம் பேஸ்புக்கின் ஸ்டேடஸ் அப்டேட்களில் இது தான் பயனுள்ளதாக இருக்கும்.
உலக அளவில் இந்த சேவை அறிமுகமாக உள்ளது. செல்போன் செயலிகளிலும் செயல்படும். நேபாளத்தில் பூகம்ப பாதிப்பில் சிக்கியவர்களுக்கு இந்த வசதி பேருதவியாக இருக்கும் .

பேஸ்புக் சேப்டி செக் வசதி பற்றி அறிய: https://www.facebook.com/about/safetycheck/

————

கூகுலில் நீங்கள் தேடப்படுகிறீர்கள் உஷார்..

எத்தனை பேருக்கு சொந்தமாக இணையதளம் இருக்கிறது என்று தெரியவில்லை.ஆனால் அந்த எண்ணிகை சொற்பமாக தான் இருக்க வேண்டும்.காரணம் பெரும்பாலானோர் தங்களுக்கென தனியே இணையதளம் இருக்க வேண்டும் என்று கருதுவதாக சொல்ல முடியாது.

வர்த்தகத்தில் ஈடுபடுவர்களும் பிரபலமாக இருப்பவர்களுமே தங்களுக்கான இணையதளத்தை வைத்து கொள்கின்றனர்.மற்றபடி சாமன்யர்கள் யாரும் சொந்தமாக இணையதளம் வேண்டும் என நினைப்பதாக தெரியவில்லை.

அப்படியே யாரவது சொந்தமாக இணையதளம் வைத்து கொண்டு அதில் தங்களைப்பற்றிய தகவல்களை இடம்பெற வைத்திருந்தால் அவரை தன்முனைப்பு மிக்கவராகவே கருத வாய்ப்புள்ளது.

மற்றவர்களை விடுங்கள் சாமன்யர்களில் பலரும் கூட எதற்காக சொந்த இணையதளம் என்றே நினக்ககூடும்.நம்மை பற்றி இணையதளம் அமைத்து உலகிற்கு தெரிவிக்கும் அளவுக்கு என்ன இருக்கிறது என்றும் கூட சுய இளக்காரம் கொள்ளலாம்.

ஆனால் ஒவ்வொருக்கும் தனியே ஒரு இணையதளம் இருப்பது நல்லது என்றே தோன்றுகிறது .அது மட்டும் அல்ல அரசியல் மொழியில் சொல்வதானால் சொந்த இணையதளம் என்பதை காலத்தின் கட்டாயம் என்றும் சொல்லலாம்.

ஏன் என்றால் எல்லோரும் உங்கள் கூகுலில் தேடிக்கொண்டிருக்கின்றனர்.ஆம் கூகுலில் தகவல்களை மட்டும் தேடுவதில்லை.மனிதர்கள் பற்றிய விவரங்களையும் தான் தேடுகின்றனர்.

வேலைக்காக விண்ணப்பித்தவ‌ர்களின் தகுதியை சரி பார்க்க வேண்டும் என்றாலும் சரி புதிதாக அறிமுகமானவர் தொடர்பான விவரங்கள் தேவை என்றாலே பலரும் செய்வது கூகுலில் பெயரை குறிப்பிட்டு தேடிப்பார்ப்பது தான்.

இவ்வளவு ஏன் பெண் பார்ப்பவர்கள் மாப்பிளை எப்படி என தெரிந்து கொள்ளவும் கூட கூகுல் மூலம் தேடிப்பார்க்கலாம்.

கூகுலிங் என்று சொல்லப்படும் இந்த பழக்கம் மிகவும் பரவ‌லாகி வருகிறது.

இவ்வாறு தேடப்படும் போது இணையத்தில் உங்களைப்பற்றி இறைந்து கிடக்கும் தகவல்களை எல்லாம் கூகுல் பட்டியலிட்டு காட்டும்.பேஸ்புக்கில் பகிர்ந்தவை,வலைப்பதிவில் உள்ளவை,வேலைவாய்ப்பு தளங்களில் சமர்பித்தவை ,இனைய குழுக்களில் விவாதங்களின் போது தெரிவித்த‌வை என எல்லா வகையான தகவல்களையும் கூகுல் திரட்டித்தரலாம்.

அவற்றில் எதிர்மறையானவையும் இருக்கலாம்,பாதகமானவையும் இருக்கலாம்.உங்களைப்பற்றி தவறான தகவலை தரக்கூடியவையும் இருக்கலாம்.

இப்போது யோசித்து பாருங்கள் உங்களுக்கென தனியே இணையதளம் இருக்கும் படசத்தில் கூகுலிங் செய்யும் போது அநேகமாக அந்த பக்கம் முதலில் வந்து நிற்கும்.உங்ககளை பற்றிய சரியான அறிமுகத்தையும் அந்த பக்கம் தரகூடும்.அல்லது மற்ற பக்கங்களில் உள்ள விவரங்களோடு ஒப்பிட்டு பார்த்து சரியான முடிவுக்கு வரவும் உதவும்.

எனவே கூகுலில் தேடப்படும் போது நீங்கள் நீங்களாகவே அறியப்பட வேண்டுமாயின் உங்களூக்கான இணையதளம் அவசியம்.

அட சரி தான்,ஆனால் இணையதளம் வைத்து கொள்ளும் அளவுக்கு நான பெரிய ஆள் இல்லையே என்றோ அல்லது இணையதளத்தை வைத்து பராமரிப்பது கடினம் என்று நினைதாலோ அதற்கு சுலபமாக ஒரு வழி இருக்கிற‌து.

இதற்காக என்றே விஸிபிலிட்டி என்னும் தளம் உருவாக்க‌ப்பட்டுள்ளது.இந்த தளம் கூகுலில் உங்களை பற்றி எந்த வகையான தகவல்கள் இடம்பெற வேண்டும் என்பதை கட்டுப்படுத்த உதவுகிறது.

அதாவது இந்த தள‌த்தில் உங்களுக்கான தேடல் பட்டனை உருவாக்கி அதில் உங்கலைப்பற்றிய தகவல்களை இடம்பெற வைக்கலாம்.
விஸிபிலிட்டி கூகுலுக்கான என்னை தேடு (சர்ச் மீ)பட்டனை தருவதாக சொல்கிறது.ஒருவருடைய பெயர் கூகுலில் தேடப்படும் போது இந்த பட்டன் முதலில் வரும் என்றும் உறுதி அளிக்கிறது.இதனை கிளிக் செய்தால் தேடப்ப‌ட்டவரின் விவரம் அவர் விரும்பிய வண்ணமே தோன்றும்.இதை தான் விஸிபிலிட்டி உங்கள் தேடல் விவரங்க‌ளை நீங்களே கட்டுப்படுத்தி கொள்ள உதவுவதாக கூறுகிறது.

விஸிபிலிட்டியில் என்னை தேடு பட்டனை உருவாக்கி கொள்ள முதலில் எப்யர் மற்றும் ப‌ணியிடம் போன்ற விவரங்க‌ளை சமர்பிக்க வேண்டும்.அதன் பிறகு பயனாளி தன்னை தீர்மானிக்கும் குறிச்சொற்களை சமர்பிக்கலாம்.தேவைப்பட்டால் இந்த விவரங்களை மாற்றி அமைத்து மேம்படுத்தி கொள்ளலாம். விவரங்களில் திருப்தியான பிறகு இந்த பக்கத்தை சம‌ர்பித்து கூகுல் தேடல் பட்டனை பெற்று கொள்ளலாம்.

எல்லாம் சரி இந்த பக்கம் தான் கூகுலில் முதலில் வந்து நிற்கும் என்பதற்கு என்ன நிச்சயம் என்று கேட்கலாம்.

அந்த சந்தேகமே வேண்டாம்,கூகுலில் முன்னிலை பெறக்கூடிய வகையில் பிரத்யேக தேடல் தொழில்நுட்பம் ஒன்றை உருவாக்கி வைத்திருப்பதாக விஸிபிலிட்டி சொல்கிறது.முன் தேடல் என்று இதனை குறிப்பிடுகிற‌து.கூகுலில் தேடப்படும் போது முன்னிலை பெறும் வகையில் தேடலுக்கான விவரங்களை முன்கூட்டியே தேர்வு செய்ய வழி செய்யும் இந்த உத்தியை நீண்ட ஆய்வுக்கு பின் உருவாக்கியிருப்பதாகவும் தெரிவிக்கிறது.

இந்த தேடு பட்டனை வலைப்பதிவு மற்றும் பேச்புக் போன்றவ‌ற்றிலும் இடம் பெற வைக்கலாம்.தனி நபர்கள் மட்டும் அல்ல நிறுவன‌ங்களும் இந்த சேவையை பயன்படுத்தலாம்.

ஆக கூகுல் யுகத்தில் தேவையான சேவை என்றே இதனை குறிப்பிடலாம்.

இணையதள முகவரி;http://vizibility.com/

புதிய தேடியந்திரம் கிவீல்

கொஞ்சம் விநோதமான பெயருடன் அறிமுகமாகியுள்ள தேடியந்திரம் கிவீல்.இதன் ஆங்கில எழுத்துக்களை எப்படி உச்சரிப்பது என குழப்பம் ஏற்படலாம்.ஆனால் இதன் வடிவமைப்பு குழப்பம் இல்லாமல் தெளிவாகவே உள்ளது.

புதியவர்களுக்கான தேடியந்திரம் என வர்ணித்துக்கொள்ளும் இந்த தேடியந்திரத்தில் கூகுலில் தேடுவது போலவே தேடலாம்.செய்திகள்,புகைபப்டங்கள்,வீடியோ,சமூக வலைப்பின்னல் தளங்கள்,ஷாப்பிங் என பல்வேறு வகையான தகவல்களை குறிப்பிட்டு தேடலாம்.

மேலும் தேடல் உலகில் பிரப்லாமாக இருக்கும் தலைப்புகள் பற்றிய பட்டியலும் இடம் பெறுவதால் அத்னையும் தேடல் வழிகாட்டியாக ஏற்றுக்கொள்ளலாம்.

இரண்டாம் அலை தேடியந்திரம் என கூறப்படும் இந்த தேடியந்திரம் பிங்கின் தேடல் தொழில்நுட்பத்தையே பயன்படுத்துகிறது.

தேடியந்திர முகவரி;http://www.keewl.com/