Tag Archives: sleep

தூங்க வைக்கும் இணையதளம் இது!

தூக்கமின்மை பிரச்சனையால் தவிப்பவர்களுக்கு உதவுவதற்காக என்றே ’நேப்பிளிக்ஸ்’ எனும் புதிய இணையதளம் அறிமுகமாகியுள்ளது. இந்த இணையதளத்தை பார்த்துக்கொண்டிருந்தாலே போதும் தானாக தூக்கம் வந்துவிடும்- அதாவது இந்த தளத்தில் இடம்பெற்றுள்ள யூடியூப் வீடியோக்களை பார்த்தால் தூக்கம் வரும்! அதற்கேற்ற வகையில் இந்த தளத்தில் இடம்பெறும் வீடியோக்கள் தேர்வு செய்யப்பட்டுள்ளன.
யூடியூப்பில் பொதுவாக, ஹிட்களை அள்ளிக்குவிக்கும் வீடியோக்களே அதிகம் பேசப்படும்: அதன் காரணமாகவே அதிகம் பார்த்து ரசிக்கப்படும். இப்படி ஹிட்டான வீடியோக்கள் தவிர அதிகம் கவனத்தை ஈர்க்காத அருமையான வீடியோக்களும் ஆயிரக்கணக்கில் இருக்கின்றன. அதே போல ஒரு சில நிடங்களுக்கு மேல் பார்க்க முடியாமல் அலுப்பூட்டி விரட்டும் வீடியோக்களும் அநேகம் இருக்கின்றன. இந்த வகை வீடியோக்களை யாரும் பெரிதாக கண்டுகொள்வதில்லை.
நேபிபிளிக்ஸ் இணையதளம் இத்தகைய அலுப்பூட்டும் வீடியோக்களை எல்லாம் தேடிப்பிடித்து பட்டியலிடுகிறது. அதன் நோக்கம், இவற்றை பார்த்து தூக்கத்தை வரவைத்துக்கொள்வது தான்.
சுவாரஸ்யம் இல்லாத படங்கள் அல்லது வீடியோக்களை பார்க்கும் போது, தூக்கம் வருகிறது என நொந்து கொள்வோம் அல்லவா? இவற்றை விமர்சசனமாக தான் கருத வேண்டுமா என்ன? இத்தகைய வீடியோக்களை எல்லாம் ஒரே இடத்தில் சேமித்து வைத்து, தூக்கமின்மையால் தவிக்கும் போது, ஏதேனும் ஒரு சில வீடியோக்களை தேர்வு செய்து பார்த்தால் தூங்கி வழியலாம் அல்லவா? இதை தான் நேப்பிளிக்ஸ் தளம் செய்கிறது.
பார்வையாளர்களுக்கு தூக்கத்தை வர வைக்க கூடிய வீடியோக்கள் மட்டுமே இந்த தளத்தில் இடம்பெறுகின்றன. இந்த வீடியோக்களையும், அவரவர் ரசனைக்கேற்ப விளையாட்டு, வீடியோகேம், இசை என பலவகைகளில் இருந்து தேர்வு செய்து பார்க்கலாம். வீடியோக்களில் நேரத்தை செட் செய்து கொள்ளும் வசதியும் இருக்கிறது.
டிவி பார்த்துக்கொண்டே தூங்கிவிடும் பழக்கம் கொண்டவர்களுக்கு இந்த தளம் மிகவும் ஏற்றதாக இருக்கும். பொதுவாக இணையத்தில் வீடியோ பார்ப்பவர்களுக்கும் இந்த தளம் உதவியாக இருக்கும்.
மழையின் ஓசையை படம்பிடிக்கும் வீடியோ, ஒருவர் காரை சுத்தம் செய்வதை சித்தரிக்கும் வீடியோ என இந்த கலெக்‌ஷன் அருமையாக அமைந்திருக்கிறது.

இணையதள முகவரி:http://napflix.tv/

 

இந்த தளத்தை இந்த பதிவுடன் பொருத்திப்பார்த்தால் சுவார்ஸ்யமான புரிதல் உண்டாகும்: http://cybersimman.com/2016/09/18/video-18/

 

இணையத்தில் தூங்கலாம் வாங்க!

sl1இணையத்தில் உலாவலாம், தகவல்கள் தேடலாம், ஷாப்பிங் செய்யலாம், வேலைவாய்ப்புக்கு வலைவீசலாம், வீடியோ பார்க்கலாம், இசை கேட்கலாம், அரட்டை அடிக்கலாம், நேரத்தை கொல்லலாம். இப்படி இன்னும் பலவற்றை செய்யலாம். எல்லாம் சரி, இணையத்தில் தூங்க முடியுமா?

இது வரை தூங்குகின்ற நேரத்தில் தான் நாம் இணையத்தின் பக்கம் போகாமல் இருக்கிறோம். இப்போது அதையும் மாற்றும் வகையில் இணையத்தில் தூங்கலாம் வாங்க என்று அழைப்பு விடுப்பதற்காகவே ஒரு நிகழ்ச்சிக்கு ஏற்பாடு செய்யப்பட்டு, அதற்காக என்றே ஒரு இணையதளமும் அமைக்கப்பட்டிருக்கிறது. இணையதளத்தின் பெயர் வேறென்ன இணைய படுக்கையறை தான் – Internet Bedroom!
கொஞ்சம் விநோதமான நிகழ்வு தான். ஆனால் இணைய கலாச்சாரம் பற்றி அறிந்தவர்களுக்கு அப்படி ஒன்றும் வியப்பை அளிக்காதது.

இணையத்தில் பலவிதமான சமூகங்கள் இயங்கி கொண்டிருக்கின்றன. ஒவ்வொரு சமுகமும் குறிப்பிட்ட நோக்கம் அல்லது நம்பிக்கை சார்ந்த்தாக இருக்கும். பரவலாக அறியப்பட்ட ரெட்டிட் சமூகம், விக்கி சமூகத்தில் துவங்கி வெகுசிலர் மட்டுமே அறிந்த சமூகங்கள் வரை எண்ணற்ற சமூகங்கள் இருக்கின்றன. இவற்றில் விநோதமானவை, வில்லங்கமானவையும் கூட உண்டு.

இந்த வகையில் தான் இணையத்தில் தூங்கும் கருத்தை முன் வைத்திருக்கும் சமூகம் உருவாகி இருக்கிறது. இஸ்ரேல் நாட்டில் நடைபெற்ற பிரிண்ட் ஸ்கிரீன் கண்காட்சியின் ஒரு பகுதியாக, இந்த இணைய படுக்கயறை அமைக்கப்பட்டிருந்தது. ஆர்வம் உள்ளவர் வாருங்கள், வீடியோ அரட்டை அடியுங்கள், அப்படியே தூங்கி விடுங்கள், அவ்வளவு தான் என்றும் குறிப்பிடப்பட்டிருந்தது.
இணையத்தில் எதற்கு தூங்க வேண்டும்?

இந்த திட்ட்த்தின் இணை நிறுவனரான கென்சுகி செம்போ (Kensuke Sembo ) இணையம் ஒரு போதும் தூங்குவதில்லை என்று அறிந்த போது தான் இந்த யோசனை பிறந்த்தாக இது தொடர்பாக மதர்போர்டு இணைய இதழுக்கு அளித்த பேட்டியில் கூறியிருக்கிறார். ” ஜப்பானிய மக்கள் தூங்கத்துவங்கும் போது, நியூயார்க்கி உள்ளவர்கள் விழித்துக்கொள்கின்றனர்” என்று கூறுபவர், ’ இணையத்திற்கு தூக்கம் தேவை, அப்போது தான் இயல்பான இடமாக இருக்கும் என நினைத்தோம்” என்கிறார்.

இதற்காக தான் இணைய படுக்கையறையை ஏற்படுத்தியிருக்கிறார். கருத்தரங்குகள், மாநாடுகள் போன்றவற்றுக்கு நடுவே தூங்குவது அவமரியாதையாக கருதப்படும். ஆனால் இங்கு அப்படி இல்லை, இது தூங்குவதற்காகவே ஏற்பாடு செய்யப்பட்ட நிகழ்ச்சி என்பதால்,இதில் உறுப்பினர்கள் தூங்க மட்டுமே செய்யலாம். இணையத்தில் தூங்குவதாலேயே இது விஷேசமானது என்றும் அவர் சொல்கிறார்.

எல்லாம் சரி, இணையத்தில் எப்படி தூங்குவது என்று கேட்கலாம். எப்படி என்றால் வெப்கேம் வழியாக தான். அதாவது வீட்டில் தூங்கும் காட்சியை இணையத்தில் இணைத்து ஒளிபரப்பு செய்யலாம். நிகழ்ச்சி நடைபெற்ற கண்காட்சி அரங்கில் தூங்குவதற்கு என்றே அறைகள் அமைக்கப்பட்டிருந்தன. நேரடியாக வர முடியாதவர்கள் வீட்டில் இருந்த படியே கூகுள் ஹாங்கவுட் மூலம் தூக்கத்தில் பங்கேற்கலாம் என தெரிவிக்கப்பட்டிருந்தது.- http://idpw.org/bedroom/000002/

இந்த அமைப்பின் முதல் இணையத்தில் தூக்கம் நிகழ்ச்சி கடந்த ஆண்டு டிசம்பரில் அமெரிக்காவின் நியூயார்க் நகரில் நடைபெற்றது. கடந்த மாதம் இஸ்ரேலில் நடைபெற்றிருக்கிறது. நிகழ்ச்சி வெற்றிகரமாக முடிந்துவிட்டது என இணைடெர்நெட் பெட்ரூம் இணையதளம் தெரிவிக்கிறது. இரவு உடை அணிந்து வாருங்கள்,ரிலாக்சாக இருங்கள், உங்கள் லேப்டாப் அல்லது ஸ்மார்ட்போன் மூலம் இணையத்தில் நுழைந்து கூகுள் ஹாங்கவுட மூலம் இணைய படுக்கையறையில் தூங்குங்கள் என, இணைய தூக்கத்திற்கான வழிமுறையாக கொடுக்கப்பட்டுள்ளது.

இணையத்தை கொஞ்சம் அமைதியான இடமாக்குவதற்கான செயல் என குறிப்பிடப்படும் இந்த புதுமையான முயற்சி இணைய போக்காக உருவாகுமா? என்றுத்தெரியவில்லை. படுக்கையறை வரை இணையத்தை கொண்டு வருவது என்னவிதமான வில்லங்கத்தை ஏற்படுத்தக்கூடும் என்றும் தெரியவில்லை.
ஆனால் ஒன்று, இணையத்தில் தூங்குவது என்பது இணையத்தில் பல ஆண்டுகளாகவே இருக்கும் கருத்தாக்கமாக தோன்றுகிறது.

இணைய தூக்கம் என்று தேடிப்பார்த்தால் , இந்த கருத்தாக்கம் தொடர்பான இணையதளங்கள், தகவல்களை பார்க்க முடிகிறது. இவ்வளவு ஏன், இணையத்தில் தூங்குவது எப்படி? என விளக்கும் வீடியோவும் இருக்கிறது. இணைய தூக்கம் தொடர்பான வலைப்பதிவும் இருக்கிறது. 2007 ம் ஆண்டில் மகத்தான இணைய தூக்கம் எனும் நிகழ்ச்சி நடைபெற்றிருப்பதும் தெரிய வருகிறது. ஒரு இணைய கலை இயக்கமாக இந்த முயற்சி குறிப்பிடப்பட்டுள்ளது.

இணையத்தில் தூங்குவதெல்லாம் தேவையா? இதனால் என்ன பயன் போன்ற கேள்விகளை பலர் கேட்கலாம். ஆனால், இணையம் சற்று விநோதமான இடமாகவும் இருக்கிறது என்பதே விஷயம்.

வெப்கேம் வழியே காட்சிகளை படம் பிடித்து இணையத்தில் பகிர்ந்து கொள்வது என்பது இணைய கற்காலம் தொட்டே இருக்கிறது. இப்போது ஸ்டிரீமிங் ( இணைய ஒளிபரப்பு) யுகத்தில் இவை புதிய வடிவம் எடுத்துள்ளன. ஒரு பக்கம் பெரிஸ்கோப் போன்ற லைவ் ஸ்டிரீமிங் செயலிகள் பிரபலமாகிக்கொண்டிருக்கின்றன. பேஸ்புக் லைவ் வசதியும் இந்த ரகம் தான்.

இன்னொரு பக்கம் அமேசானுக்கு சொந்தமான டிவிட்ச்.டிவி இணையதளம், வீடியோ கேம் விளையாடுவதை நேரடியாக ஸ்டிரீமிங் செய்வதில் சக்கை போடு போட்டிக்கொண்டிருப்பதை நீங்கள் அறியலாம். டிவிட்ச்.டிவி சமீபத்தில் சாப்பிடுவதை பகிர்ந்து கொள்வதற்காக என்றே ஒரு தனி சேனலை ஆரம்பித்துள்ளது.
சோசியல் ஈட்டிங் சானல் (https://www.twitch.tv/directory/game/Social%20Eating ) எனும் இந்த பக்கம் சாப்பிடுவதை சமூக நிகழவாக மாற்ற முற்படுகிறது. சாப்பிடுவதை காமிராவில் படம் பிடித்துக்காட்டி பகிர்ந்து கொள்ள வைப்பது தான் இந்த சேனலின் நோக்கம்.

காலை உணவு, மதிய உணவு ஆகியவற்றை சுவைப்பதை உலக நேயர்களோடு பகிர்ந்து கொள்ளலாம். இது தேவையா என மீண்டும் கேட்கலாம். இணைய தேசமான தென்கொரியாவில் இது மிகப்பெரிய போக்காக இருப்பதாகவும் அதன் காரணமாகவே இந்த தனி சேனல் என்றும் அமேசான விளக்கம் அளிக்கிறது.

நிற்க, புகைப்பட பகிர்வு சேவையான இன்ஸ்டாகிராமில், உணவு சார்ந்த புகைப்படங்களை கலை நயத்துடன் பகிர்ந்து கொண்டே நட்சத்திரமானவர்கள் எல்லாம் இருக்கின்றனர். வீட்டிலோ, ரெஸ்டாரண்டிலோ சுவையான உணவு கண்முன் இருக்கும் போது அதன் சுவையை அனுபவிக்கத்துவங்குவதற்கு முன், அதை கிளிக் செய்து இன்ஸ்டாகிராமில் பகிர்ந்து கொள்ளாவிட்டால் சாப்பிட்ட்து போலவே இருக்காது என்று சொல்லக்கூடியவர்கள் எல்லாம் இருக்கின்றனர். சந்தேகமாக இருந்தால், இன்ஸ்டாகிரம் + உணவு என்று தேடிப்பாருங்கள்.

waterfall-lawson_3290888b

யூடியூப் காவிய வீடியோவும், வால்பேப்பர் செயலியும்

யூடியூப்பில் ஒரு காவிய வீடியோ

யூடியூப்பில் வீடியோக்கள் வைரலாகிப்பரவி ஹிட்டாவது புதிதல்ல என்றாலும்
காணொலி கலைஞரான ஜானி லாசனின் நீர்விழ்ச்சி விடியோ அவற்றில் தனித்து நிற்கிறது.
இந்த வீடியோ இதுவரை 60 லட்சம் முறை பார்த்து ரசிக்கப்பட்டுள்ளது. யூடியூப் அளவுகோள்படி பார்த்தால் இது பெரிய எண்ணிக்கை இல்லை தான். ஆனால் இந்த வீடியோவின் தனிச்சிறப்பு அதன் நீளம் மற்றும் அது உண்டாக்கும் விளைவு!.
ஆம், நீங்கள் இதுவரை பல யூடியூப் வீடியோக்களை பார்த்து ரசித்திருக்கலாம். அவை எல்லாமே பெரும்பாலும் நிமிடக்கணக்கில் ஓடும் குவிக் பைட் ரகங்கள். இதற்கு மாறாக ஜானி லாசனின் நீர்விழ்ச்சி வீடியோ எட்டு மணி நேரம் ஓடக்கூடியது.
எட்டு மணி நேர வீடியோவா என ஆச்சர்யமாக இருக்கிறதா? அதைவிட ஆச்சர்யம் அந்த வீடியோ ஏற்படுத்திவரும் விளைவு. தூக்கமில்லாமல் தவிக்கும் பலருக்கு அந்த வீடியோ தான் தாலாட்டாக அமைந்து மன நமைதியை அளித்து நன்றாக தூங்கவும் வைக்கிறது. இந்த வீடியோ ஏற்படுத்தும் தாக்கம் காரணமாக மருத்துவமனை ஒன்றில் இதை தூக்கமின்மை தொடர்பான ஆய்வுக்கான கருப்பொருளாக சேர்த்திருக்கின்றனர் என்றால் பார்த்துக்கொள்ளுங்கள்!
அயர்லாந்தின் மாசுபடாத லிட்ரீம் கிராமப்பகுதியில் உள்ள வனத்தின் நீர்விழ்ச்சியில் படமாக்கப்பட்ட இந்த வீடியோவை பார்க்கும் போது மரங்கள் அடர்ந்த காட்டுக்குள் இருப்பது போல உணர்வு ஏற்படுகிறது. இடையே நீரின் சளசளப்பும் பறவைகளின் சங்கீதமும் கேட்டுக்கொண்டே இருக்கின்றன.இயற்கை ஆட்சி செய்யும் இடங்களில் மட்டுமே கேட்கக்கூடிய இன்னும் சில அற்புத ஒலிகளும் கேட்டுக்கொண்டே இருக்க அந்த நிர்விழ்ச்சியை பார்த்துக்கொண்டே இருக்கலாம்.
லட்சகணக்கானோர் இப்படி தான் பார்த்து மகிழ்ந்திருக்கின்றனர். சும்மாயில்லை, நகரத்து வாழ்வின் நெருக்கடியால் உண்டான கவலைகளை மறந்து இந்த வீடியோவிலும் அது தரும் அமைதியிலும் லயித்திருக்கின்றனர்.
பலர் இந்த வீடியோ தரும் ஆறுதலால் தங்கள் தூக்கமின்மையை மறந்து நன்றாக தூங்கியிருக்கின்றனர்.
இந்த வீடியோவை பார்த்துக்கொண்டிருக்கும் பலரும் நடுவிலேயே தூங்கி விடுகின்றனர். பின்னர் திடிரென கண் விழித்துப்பார்த்தால் வீடியோ ஓடிக்கொண்டே இருக்கும். அது தரும் இதத்தால் மீண்டும் தானாக தூக்கம் வந்துவிடும் என்கிறார் வீடியோவை உருவாக்கிய ஜானி லாசன். அதனால் தான் இந்த வீடியோவை 8 மணி நேரம் ஓடக்கூடியதாக படம் பிடித்ததாகவும் சொல்கிறார்.
லாசன் ஐந்து ஆண்டுகளுக்கு முன் தனது முதல் இயற்கை வீடியோவை யூடியூப்பில் பதிவேற்றினார். மக்களின் வாழ்க்கையில் இயற்கையை கொண்டு வருவது அவரது நோக்கமாக இருக்கிறது. இயற்கையின் எழில் கொஞ்சம் பகுதியில் வசிக்க முடிந்த பெரும் அதிர்ஷ்டம் தனக்கு வாய்த்திருப்பதால் அதை யூடியூப் மூலம் வீடியோவாக மற்றவர்களுடன் பகிர்ந்து கொள்வதாக சொல்கிறார்.
லாசனின் நீர்விழ்ச்சி விடீயோ: https://www.youtube.com/watch?t=1619&v=eKFTSSKCzWA

———
தளம் புதிது; ஹைடெக் செய்திகளின் சங்கமம்
தொழில்நுட்ப செய்திகளை பின் தொடர்வதில் ஆர்வம் இருக்கிறதா? இந்த செய்திகள் அனைத்தையும் ஒரே இடத்தில் தெரிந்து கொள்ள முடிந்தால் இன்னும் சிறப்பாக இருக்கும் என தோன்றுகிறதா? இந்த விருப்பத்தை நிறைவேற்றும் வகையில் ஆல் டெக் நியூஸ் (http://alltechnews.co/ ) இணையதளம் உருவாகி இருக்கிறது. இந்த தளத்தில் தொழில்நுட்ப உலகின் அனைத்து முக்கிய செய்திகளையும் தெரிந்து கொள்ளலாம். தொழில்நுட்ப செய்திகளை சிறப்பாக அளிக்கும் டிஜிட்டல் டிரென்ஸ், கீக்.காம் ஆகிய தளங்களில் துவங்கி ஹேக்கர் நியூஸ்,பிபிசி உள்ளிட்ட 41 தளங்களில் இருந்து செய்திகளை தொகுத்து வழங்குகிறது. செய்திகளுக்கான தேடல் வசதியும் இருக்கிறது.
தளத்தின் மையப்பகுதியில் செய்திகள் வரிசையாக இடம்பெற வலுது பக்கத்தில் மூல தளங்களின் பட்டியலும் இடம்பெற்றுள்ளது.
ஹைடெக் ஆர்வலர்கள் புக்மார்க் செய்து கொள்ள வேண்டிய தளம் இது; http://alltechnews.co/

செயலி புதிது; தினம் ஒரு வால்பேப்பர்
ஸ்மார்ட்போன்களில் விதவிதமான வால்பேப்பர்கள் தோன்ற விரும்பினால் மியூசி (Muzei) செயலியை நாடலாம். தினம் ஒரு அழகிய வால்பேப்பரை போனில் இது இடம்பெறச்செய்கிறது. இவை வழக்கமான வால்பேப்பர் அல்ல, ஒவ்வொன்றும் ஒரு புகழ்பெற்ற கலைப்படைப்பாகும். அருங்காட்சியகம் உள்ளிட்ட பலவேறு இடங்களில் இருந்து இவற்றை எடுத்து தருகிறது. போனில் உள்ள ஐகான்கள் பளிச் என தெரியும் வகையில் இவற்றின் தோற்றம் பின்னணியில் கலந்து விடுகிறது. கலைப்படைப்பில் இரு முறை கிளிக் செய்தால் அதன் முழு தோற்றம் மற்றும் விவரங்களை காணலாம். கூடுதல் தகவல் மியூசி என்றால் ரஷ்ய மொழியில் அருங்காட்சியம் என்று பொருளாம்.
ஆண்ட்ராய்டில் தரவிறக்கம் செய்ய: https://play.google.com/store/apps/details?id=net.nurik.roman.muzei


குரோம் ரகசியங்கள் ( இணைய குறிப்பு)
குரோம் பிரவுசரில் பல கூடுதல் வசதிகள் நீட்டிப்பு சேவை மூலம் சாத்தியமாகின்றன. ஆனால் குரோம் பிரவசரிலேயே சில சேவைகளை எளிதாக பயன்படுத்திக்கொள்ளலாம் தெரியுமா?
நீங்கள் இசைப்பிரியர் என்றால் ,குரோம் பிரவுசரில் வெற்று டேப்பை (tab ) வரவைத்து அதில் ஆடியோ அல்லது வீடியோ கோப்பை கொண்டு வந்து வைதால் போதும் பாட்டு கேட்கலாம்;வீடியோ பார்க்கலாம். மீடியா பிளேயருக்கு பதில் இதை பயன்படுத்தலாம். இதே போலவே பிடிஎப் கோப்புகளையும் குரோம் டேபிலேயே வைத்து படிக்கலாம். இதற்கும் வெற்று டேப்பில் கோப்பை இழுத்து வந்தால் போதுமானது. கோப்புகளை ஜூம் செய்யும் வசதி மற்றும் அச்சிடு வசதியும் உண்டு.


லைக்குகளில் ஒரு சாதனை
டிஜிட்டல் யுகத்தில் பத்திரிகைகளின் பாடு திண்டாட்டமாக இருந்தாலும் புகழ்பெற்ற நேஷனல் ஜியாக்ரபிக் இதழ் இக்கால தலைமுறை மத்தியிலும் பிரபலமாக இருக்கிறது. குறிப்பாக இளசுகள் புழங்குமிடமாக இருக்கும் சமூக ஊடக பரப்பில் இந்த இதழ் நல்ல வரவேற்பை பெற்றுள்ளது. இந்த இதழின் இன்ஸ்டாகிராம் கணக்கான @natgeo 17 மில்லியன் பாலோயர்களை பெற்றிருக்கிறது. பொதுவாக ஹாலிவுட் நட்சத்திரங்கள் மற்றும் மாடல் அழகிகளே லட்சக்கணக்கில் பாலோயர்களை பெறும் இன்ஸ்டாகிராமில் அதிக ஆதரவு பெற்ற பிரபலங்கள் அல்லாத கணக்குகளில் நேஷனல் ஜியாக்ரபிக் டாப்பில் உள்ளது. சமீபத்தில் இதன் இன்ஸ்டாகிராம் பக்கம் ஒரு பில்லியன் லைக்குகள் எனும் மைல்கல்லை எட்டியுள்ளது. இதனை முன்னிட்டு @natgeoyourshot, @natgeoadventure ஆகிய இரண்டு புதிய இன்ஸ்டாகிராம் பக்கங்களும் அமைக்கப்பட்டுள்ளன.
முதல் கணக்கு மூலம் வாகர்கள் தங்கள் புகைப்படங்களை சமர்பிக்கலாம். புத்தாயிரமாண்டின் தலைமுறை மத்தியில் @natgeo பிரபலமாக உள்ளது குறிப்பிடத்தக்கது.

—-

நன்றி; தமிழ் இந்துவில் எழுதியது.

பேஸ்புக் படுக்கை வந்தாச்சு!.


நம் காலத்து தலைமுறையினர் மத்தியில் பேஸ்புக்கின் ஆதிக்கம் எந்த அளவுக்கு தீவிரமாகி இருக்கிறது என்பதற்கு இதைவிட அழகான உதாரணம் தேவையில்ல.ஆம் பேஸ்புக் படுக்கை இப்போது அறிமுகமாகியிருக்கிறது.

சமுகவலைப்பின்ன சேவைகளில் நம்பர் ஒன்னாக இருக்கும் பேஸ்புக்கின் பிரபலமான லோகோ வடிவிலேயே இந்த படுக்கை வடிவமைக்கப்பட்டுள்ளது.பேஸ்புக்கின் லோகோவான எப் என்னும் ஆங்கில எழுத்து அப்படியே படுக்கையாக வடிவமைக்கப்பட்டுள்ளது.அதன் நிறம் நீலம் என்பதை சொல்ல வேண்டியதில்லை.

படுக்கை மீதான‌ போர்வையும் சமூக வலைப்பின்னல் சேவைகளின் லோகோவால் அழகாக அலங்கரிக்கப்பட்டிருக்கிறது.

தோற்றத்தில் மட்டும் இது பேஸ்புக் படுக்கை அல்ல;உள்ளடக்கத்திலும் தான்.காரணம் இதில் அமர்ந்தபடியே பேஸ்புக் செய்யலாம்.இதன் தலை பகுதியில் நேர்த்தியான இருக்கையோடு கம்ப்யூட்டரும் வைக்கப்பட்டுள்ளது.

ஆக காலை கண விழித்தவுடன் பேஸ்புக் முன் அமர்ந்து வலை நண்பர்களோடு உலாவ துவங்கி விடலாம்.அதே போல இரவு நெடுநேரம் பேஸ்புக்கில் உலாவி களைத்திருந்தால் அப்படியே படுக்கையில் சாய்ந்து தூங்கி விடலாம்.

எப்போர்துமே பேஸ்புக் தொடர்பில் இருக்க வேண்டும் என்று விரும்புகிறவர்களுக்காக இந்த பேஸ்புக் படுக்கையை டாமிஸ்லாவ் வானரிக் என்னும் வடிவமைப்பு கலைஞர் உருவாக்கியுள்ளார்.

கட்டிலையும் படுக்கையும் எத்தனையோ விதங்களில் வடிவமைத்துள்ளனர்.சமகாலத்து மோகமான பேஸ்புக்க்கை உள்ளடக்கியபடி இந்த கட்டிலை வடிவமைத்துள்ள டாமிஸ்லாவை பாராட்டத்தான் வேண்டும்.

பேஸ்புக் பிரியர்கள் நிச்சயம் இந்த வடிவமைப்பை பார்த்து சொக்கிபோவார்கள்.

பேஸ்புக் போலவே இதனை வெறுக்கவோ விரும்பவோ செய்யலாம்.

பேஸ்புக் இல்லாமல் இருக்க முடியாது என்னும் அளவுக்கு பலரும் பேஸ்புக்கிற்கு அடிமையாகி வரும் காலத்தில் அதன் காட்சிரீதியான‌ அடையாளமாக இந்த பேஸ்புக் படுக்கை அமைந்துள்ளது.

இதே வடிவமைப்பு கலைஞர் பேஸ்புக் கீரிமையும் வடிவமைத்துள்ளார்.மனித வடிவமைப்பில் கில்லாடியாக தோன்றுகிறார்.அவரது தளத்தில் பல பொருட்களில் வடிவமைப்புகளை பட்டியலிட்டுள்ளார்.எல்லாமே நவீனமும் நேரத்தியும் இணைந்தவை.புதுமையான சிந்தனையை பிரதிபலிப்பவை.

இணையதள முகவரி;http://www.behance.net/deviantom/frame/2721891

DreamDoze - social dream interpretations-1

கன‌வுகளை புரிந்து கொள்ள‌ ஒரு இணையதளம்!


எல்லோரும் கனவு காண்கிறோம்.அவற்றை எல்லோரும் பெரும்பாலும் மறந்து போய் விடுகிறோம்.இதற்கு மாறாக கனவுகளை குறித்து வைத்து கொண்டால் எப்படி இருக்கும்?அப்படியே கனவுகளை மற்றவர்களோடு பகிர்ந்து கொண்டு கனவுகளுக்கான பொருளை தெரிந்து கொண்டால் எப்படி இருக்கும்?

‘டிரீம் சோன்’ இணையதளம் இந்த இரண்டையும் சாத்தியமாக்குகிறது.இந்த இரண்டும் கலந்திருப்பதே இந்த தளத்தை சுவாரஸ்யமாக்குகிறது.

காரணம் கனவுகளை குறித்து வையுங்கள் என்றால் பலருக்கு அதில் ஆர்வம் இருக்காது.ஆனால் நேற்று கண்ட கனவு உணர்த்துவது என்ன என்பதை அறிந்து கொள்வதில் பெரும்பாலானோருக்கு ஆர்வம் இருக்கும்.கனவின் பொருளை அறிய அதனை உற்சாகத்தோடு பகிர்ந்து கொள்ள முன் வருவார்கள்.

இந்த நோக்கத்துடன் தான் டிரீம் சோன் தளம் உருவாக்கப்பட்டுள்ளது.

அடிப்படையில் இந்த தளம் எளிமையானது.

நேற்று இரவு நீங்கள் கண்ட கனவு என்ன? என்பதை இந்த தலத்தில் பகிர்ந்து கொள்ளலாம்.இதற்காகவே பேஸ்புக் கட்டம் போல ஒரு கட்டம் கொடுக்கப்பட்டுள்ளது.அதில் கனவில் கண்ட காட்சியை விவரித்து விட்டு அந்த கனவின் வகையையும் குறிப்பிட வேண்டும்.இதற்கான பட்டியலும் அருகிலேயே இருக்கிறது.

கனவினை பகிர்ந்து கொண்ட பின் சக உறுப்பினர்கள் அதனை படித்து பார்த்து தாங்கள் அறிந்த வகையில் கனவிற்கான விளக்கத்தை வழங்குவார்கள்.விளக்கம் அளிப்பவர்கள் கனவுகளை அலசி ஆராய்வதில் உளவியல் புலிகளாக இருக்கலாம்,அல்லது ஆர்வத்தின் அடிப்படையில் மட்டுமே விளக்கம் தருபவராக‌வும் இருக்கலாம்.

எது எப்படியோ நேற்று கண்ட கனவின் பொருள் தெரியாமல் குழம்பித்தவிக்காமல்,அதற்கான அர்த்தத்தை யாரிடம் கேட்பது என தடுமாறாமல் கனவின் பொருளை அறிந்து கொள்ளலாம்.

நாம் கண்ட கனவில் மட்டும் தான் கவனம் செலுத்த வேண்டுமா என்ன?,மற்றவர்கள் கண்ட கனவுகளையும் படுத்து பார்க்கலாமே என்று நினைத்தால் தளத்தில் பகிர்ந்து கொள்ளப்பட்ட கனவுகளையும் கூடவே அவற்றுக்கு மற்றவர்கள் அளித்த விளக்கங்களையும் படித்துப்பார்க்கலாம்.

அந்த ஆர்வம் வந்து விட்டால் இந்த தளம் கனவுகளின் பொக்கிஷமாக காட்சி தரும்.

சமீபத்தில் பகிர்ந்து கொண்ட கனவுகள்,பிரபலமான கனவுகள் ஆகிய தலைப்புகளில் கனவுகளை படிக்க முடிவதோடு கனவுகளை வகைகளுக்கு ஏற்ற தலைப்புகளின் கீழும் கனவுகளை படிக்கலாம்.

விசித்தரமானது முதல் வியப்பூட்டக்கூடியது வரை வித‌விதமான கனவுகளை படிக்கும் போது மனித மனதின் ஆழத்தையும் விசாலத்தையும் தெரிந்து கொள்ளலாம்.அப்படியே கனவுகளுக்கான விளக்கங்களை படித்துப்பார்க்கும் போது உளவியல் நோக்கில் அவற்றை எப்படி புரிந்து கொள்வது என்பதற்கான குறிப்புகளையும் தெரிந்து கொள்ளலாம்.

இந்த ஆர்வமும் அனுபவமும் நாமும் கூட பிறரது கனவுகளை பகுத்தாய முற்பட வைக்கலாம்.அந்த ஆர்வம் ஏற்பட்டால் இன்னும் விளக்கப்படாத கனவுகளின் பட்டியலை பார்க்கலாம்.

அதிக அளவில் கனவுகளுக்கு விளக்கம் அளித்த முன்னிலை பெற்றவர்களி பட்டியலும் இதற்கு ஊக்கம் அளிக்கிறது.

ஆக இந்த தளத்தில் கனவுகளை பகிர்ந்து கொள்ளலாம்,கனவுகளுக்கு விளக்கம் தரலாம்.

விரும்பினால் கனவு டைரியை துவங்கி தினம் காணும் கனவுகளை குறித்து வைக்கவும் செய்யலாம்.

நாம் காணும் கனவுகளில் 90 சதவீதம் மறக்கப்பட்டு விடும் நிலையில் கனவுகளை பகிர்ந்து கொண்டு அவற்றை சேகரித்து வைப்பது மிகவும் அவசியமாகிறது என இந்த தளத்திற்கான முன்னுறையில் குறிப்பிடப்பட்டுள்ளது.அந்த வகையில் கனவுகளை பகிர்ந்து கொண்டு அதனை புரிந்து கொள்வதற்கான இருப்பிடமாக இந்த தளம் உருவாக்கப்பட்டுள்ளதாகவும் தெரிவிக்கப்பட்டுள்ளது.

கனவுகளை பகுப்பாய்வதற்கான உளவியல் இயந்திரமாக விளங்க வேண்டும் என்ற நோக்கமும் கொண்டுள்ள இந்த தளம் இதில் பாய்ந்தோடு கனவுகளின் பிரவாகத்தில் மனித குலத்தின் ஆழ் மன செயல்பாட்டை புரிந்து கொள்ளவும் வழி வகுக்கும் என்று நம்புகிறது.

உளவியல் அமைப்பின் இணையதளம் போல உள்ள இந்த இணையதளத்தை இரண்டு நண்பர்கள்(கனவுகளில் ஆர்வம் கொண்ட இரு நண்பர்கள்.) உருவாக்கியுள்ளனர் என்பது கொஞ்சம் வியப்பானது தான்.

கனவுகளை பகிரவும் அவறை மற்றவர்களால் விளக்கம் தரப்படவும் வாருங்கள் என்று அழைப்பும் விடுக்கும் இந்த தளம் கனவுகளை புரிந்து கொளவதற்கும் விளக்கம் தருவதற்குமான உளவியல் பால பாடத்தையும் சுருக்கமாக வழங்குகிறது.

அருமையான தளம்.தூக்கத்தில் நாம் மேற்கொள்ளும் புதிரான பயணங்களை பகிர்ந்து கொள்ளவதற்கான இடமாக விளங்கும் இதில் உள்ள ஒரே குறை கனவுகளுக்கான மந்திர சாவியை தந்து இன்டர்பிரடேஷன் ஆப் டிரீம்ஸ் என்னும் புத்தகத்தின் மூலம் வழங்கிய உளவியல் தந்தை சிமன்ட பிராய்டு பற்றிய எந்த குறிப்பும் இல்லாததே!

இணையதள முகவரி;http://dreamdoze.com/